དཔལ་རྟ་མགྲིན་ནག་པོ་ལྕགས་རལ་ཅན་གཏེར་ཁ་གོང་འོག་གི་གཏོར་ཟློག་བཅའ་འདོན་མན་ངག་གི་ཟིན་བྲིས་བལྟས་ཆོག
དཔལ་རྟ་མགྲིན་ནག་པོ་ལྕགས་རལ་ཅན་གཏེར་ཁ་གོང་འོག་གི་གཏོར་ཟློག་བཅའ་འདོན་མན་ངག་གི་ཟིན་བྲིས་བལྟས་ཆོག་བཞུགས་སོ།།
ན་མོ་རྒྱ་གྷི་ཝ་ཡེ། རྟ་མགྲིན་གཏོར་ཟློག་ཟིན་བྲིས་ནི། །ལྕགས་སྣོད་ནང་དུ་འཇིམ་ཞལ་སྟེང་། །འཁོར་ལོ་རྩིབས་བཞི་དེ་ཡི་རྒྱབ། །རྩིབས་བརྒྱད་བྲི་སྟེ་ནག་པོ་བྱ། །དབུས་དང་རྩིབས་ནི་རེ་རེ་ལ། །ཁྲུབ་ཁུང་བྲུས་ནང་ཟན་ལིང་བཞག །བསྡུ་ན་རྩིབས་སོགས་མེད་ཀྱང་ཆོག །དམར་གཏོར་ཆེ་བ་གཅིག་ལ་ནི། །རྩང་ནི་ཉི་ཤུ་རྩ་བརྒྱད་བཙུགས། །དེ་རྒྱབ་དམར་གཏོར་ཆུང་བ་བཞི། །རྩང་ནི་བདུན་རེ་དེ་ཡི་རྒྱབ། །སྡེ་བརྒྱད་བཤོས་བུའམ་དམར་གཏོར་བརྒྱད། །རེ་རེར་རྩང་ནི་གསུམ་རེའོ། །དེ་རྒྱབ་རྩང་རིང་ཉེར་བརྒྱད་བསྐོར། །རྩེ་ལ་ཁྱུང་གི་ཙཀླུ་
དང་། །དར་ནག་གདུགས་ནི་འབུབ་པར་བྱ། །གཏོར་མ་རྣམས་ལ་ཤ་དང་ནི། །ལིང་མགོ་ཐུར་བསྟན་པ་བཙུགས། །གཏོར་ཆུང་ཟན་ལིང་མང་དུ་བསགས། །བླ་མ་ཡི་དམ་ལས་གཞུང་བསྲང་། །དེ་ནས་བདག་བསྐྱེད་ཉང་ལུགས་སམ། །རཏྣ་ལུགས་ཀྱི་རྟ་མགྲིན་བསྒོམ། །མདུན་བསྐྱེད་རྟ་ནག་ཉང་ལུགས་ནི། །གཙོ་འཁོར་ལྔ་དང་དེ་ཡི་རྒྱབ། །སྡེ་བརྒྱད་བསྐོར་བ་གཞུང་ལྟར་བསྐྱེད། །སྤྱན་འདྲེན་མཆོད་བསྟོད་ཉིང་ལུགས་ལྟར། །རང་གི་ཐུགས་ཀའི་སྔགས་འཁོར་ལས། །འོད་ཟེར་སྔགས་ཕྲེང་མདུན་བསྐྱེད་ཞལ། །ཐུགས་ཀར་བརྒྱུད་དེ་ལྟེ་བ་
ནས་། །ཚུར་བྱུང་རང་གི་ལྟེ་བ་ནས། །ཐུགས་ཀར་བསྟིམ་པའི་སྔགས་ཕྲེང་ལས། །མེ་དཔུང་ཚྭ་ཚྭ་འཕྲོས་པ་ཡིས། །གནོད་བྱེད་ཐམས་ཅད་ཚར་བཅད་བསམ། །ཉང་ལུགས་རྩ་སྔགས་བསྙེན་པ་དང་། །རྗོད་བརྒྱད་ཅུང་ཟད་བཟླས་པའི་རྗེས། །ལས་རིམ་བདུན་པའི་གཞུང་ལྟར་དུ། །སྤྱན་འདྲེན་མཆོད་བསྟོད་མངའ་གསོལ་དང་། །བསྐང་བ་ལ་སོགས་གཞུང་ལྟར་བཏང་། །དེ་ནས་ལིང་བསྐྱེད་ཆོག་དང་། །འགུགས་གཞུག་བསྒྲལ་ལས་ཉིང་ལུགས་ལྟར། །ལིང་རོ་བསྟབ་ལ་བཟློག་པ་འདོན། །གཏོར་ཆུང་རེ་བྲན་གཙོ་བོ་དང་། །འཁོར་གསུམ་བསྐུལ་པ་རེ་རེ་དང་། །བཅས་ཏེ་གཏོར་ཆུང་རེ་རེ་འབུལ། །བཟློག་པ་ཡིན་ན་སྡེ་བརྒྱད་ནི། །གོ་ཆ་ཅན་གྱི་བསྐུལ་རེ་དང་། །བཅས་ཏེ་སོ་སོར་གཏོར་ཆུང་འབུལ། །དགྲ་ཆོས་ཡིན་ན་སྡེ་བརྒྱད་ཀྱི། །བསྐུལ་པ་གོ་ཆ་མེད་པ་ཅན། །རེ་རེའི་བསྐུལ་རེར་གཏོར་ཆུང་འབུལ། །དེ་ནས་གཞུང་གི་དགྲ་ཆོས་འདོན། །དེ་ནས་རྩང་གྱེར་གཞུང་ལྟར་འདོན། །ཐན་བྱུང་ན་ནི་ཐན་བཟློག་ནི། །ཉང་ལུགས་གཞུང་ལྟར་འདོན་པར་བྱ། །ཐུན་མཚམས་མདུན་བསྐྱེད་གཙོ་འཁོར་ལས། །སྤྲུལ་པ་ཡང་སྤྲུལ་ཁྲོ་ཁྱུང་ཚོགས། །དཔག་མེད་འཕྲོས་པས་
གནོད་བྱེད་རྣམས། །བསྐད་དང་བསད་པའི་དམིགས་པ་བཅས། །རྩ་སྔགས་བསྙེན་ཅིང་རྦད་བརྒྱུད་ཀྱང་། །ཅུང་ཟད་བསྙེན་པ་མན་ངག་གོ །གལ་ཆུང་འཇམ་པར་འདོད་ན་ནི། །སྡེ་བརྒྱད་བསྐུལ་པ་མི་འདོན་ནོ། །དེ་ལྟར་ཞག་གྲངས་གསུམ་ལྔ་བདུན། །དེ་ནས་རང་གཞུང་གསེར་སྐྱེམས་དང་། །སྒོ་དབྱེ་བྱས་ལ་མདོས་ཞལ་བསྒྱུར། །སླ་ངའི་ནང་དུ་ཤོག་ལིང་ངམ། །ཟན་ལིང་བཞག་ལ་བཀུག་གཞུག་བྱས། །སྡེ་བརྒྱད་སོ་སོའི་བསྐུལ་རེ་དང་། །བཅས་ཏེ་གཏོར་མ་ལིངྒར་རྒྱོབ། །དེ་ནས་གཙོ་འཁོར་ལྔ་པོ་ཡི། །གནོད་སྦྱིན་ཡཀཱ་སྡིག་པ་ཁྱུང་། །བསྐུལ་རེ་དང་བཅས་རེ་རེ་བརྒྱབ། །ཁྱུང་སྡིག་བསྐུལ་ལ་སྔགས་རིང་ནི། །འདོན་ཞིང་རྒྱབ་སྟེ་ཡང་ན་ནི། །ཆོས་དབང་ལུགས་ཀྱི་ཁྱུང་སྡིག་སབ། །སྤྲོ་ན་རཏྣ་པད་གླིང་གི །ལྟུང་སྡིག་བསྐུལ་པ་སབ་ཀྱང་རུང་། །དེ་ནས་གཙོ་བོའི་བསྟོད་བསྐུལ་བཅས། །གཙོ་བོའི་གཏོར་མར་མེ་རུ་བཙུགས། །སྣོད་ཏུ་བཞག་ལ་སྦྱིན་བདག་གི །མགོ་འམ་ཕྲག་པའི་གོང་དུ་འགྲིམ། །དེ་ནས་མཆོད་གཡོག་པས་བཀྱག་སྟེ། །བཟློག་པའམ་བཟློག་ཐུང་བཞེས་འབོད་བཅས། །མེ་ཧོམ་ནང་དུ་འབུལ་བར་བྱ། །ཟོར་
གཏོར་ཐམས་ཅད་མེ་ལ་བསྲེགས། །གཏོར་སྣོད་སྒྲུབ་ལ་རྟ་བྲོ་བརྡུང་། །དེ་ནུབ་རྗེས་ཆོག་གཏང་རག་གི །རྟ་མགྲིན་མཆོད་བསྟོད་བསྡུས་པ་བྱ། །དེ་རྣམས་ཉང་ལུགས་ཕྱག་ལེན་ནོ།།་༈ ཨེ་མ་ཧོ། །གཞུང་ནས་བསྲེ་བསླད་མ་གསུངས་ཀྱང་། །སྔགས་རྒན་འགའ་རེའི་ཕྱག་སྲོལ་ལྟར། །རཏྣ་གླིང་གི་རྟ་ནག་ལུགས། །བཅའ་ཚོགས་གོང་དང་མཐུན་པ་ལ། །དམར་གཏོར་རྩང་བཅས་གཙོ་འཁོར་ལྔ། །དེ་རྒྱབ་མཐེབ་སྐྱུ་བརྒྱད་བཞག་གོ །དེ་རྒྱབ་རྩང་གིས་བསྐོར་བྱས་ལ། །བདག་མདུན་གཉིས་ཀ་ལྷ་ལྔ་བསྒོམ། །དེ་ནས་ལིངྒ་བསྒྲལ་ཆོག་ནི། །རང་གིས་གང་བདེ་སྦྱར་བྱས་ལ། །ལིང་རོ་མདོས་ཀྱི་ཞལ་དུ་བསྟབ། །དེ་ནས་བཟློག་གཞུང་ཉང་ལུགས་སྦྱར། །ཉང་ལུགས་ལས་རིམ་བདུན་མ་ནི། །མཐར་ཆགས་བཏོན་ཀྱང་འགལ་བ་མེད། །ཐུན་མཚམས་བསྙེན་པ་རྦད་བརྒྱད་བཟླས། །དེ་ནས་གསེར་སྐྱེམས་སྒོ་དབྱེ་ནི། །མཚོན་ཆ་འཁོར་ལོ་སབ་པར་རུང་། །ཕྱི་རུ་འབུལ་ལམ་གཏོར་ཁ་སྟོན། །གང་འདོད་སྤྱི་མཐུན་བྱ་བར་རུང་། །སྡེ་བརྒྱད་སྦྱར་ན་རྩུབ་ཅིང་གཉན། །མི་སྦྱར་བསྐང་བཟློག་ཚར་མང་འདོན། །ཐུན་མཚམས་བསྙེན་པ་མང་དུ་བྱ། །གཏོར་སྒྲུབ་
ཡིན་པས་བསྙེན་པར་འགྲོ། །མང་དུ་བྱས་ཀྱང་བྱིན་རླབས་ཆེ། །སྔགས་རིང་མང་ན་ཟབ་ཅིང་གཉན། །གཏོར་ཟློག་བརྒྱ་རྩ་གཉིས་པོ་ཡི། །འགྲིག་ཆོག་བདག་གིས་བསྒྲིགས་པ་ཡི། །དཔེ་ཆ་ཡོད་ཀྱང་འདིར་མ་མཆིས། །གོ་བའི་བུ་ལ་བརྡའ་ཡིས་ཆོག །ཧ་ཁོག་གོ་ལ་གང་བྱས་བདེ། །སྔགས་འཆང་དབང་དྲག་ཅེས་བྱ་ཡི། །ངོ་མ་ཆོག་པར་འཕྲལ་དུ་བྲིས། །རྒྱས་པར་བྲི་བར་མ་ཁོམ་ཡང་། །རྩ་ཚིག་འདི་ལ་མ་འདུས་མེད། །དེ་སྐད་འཕྲལ་དུ་རྣལ་འབྱོར་པ། །རཱ་ག་ཨ་སྱས་རེག་ཟིན་བྱས། །འགལ་མཆིས་བཤགས་ཤིང་དགེ་མཆིས་ན། །བླ་མེད་བྱང་ཆུབ་ཐོབ་གྱུར་ཅིག །མངྒ་ལཾ། །རྟ་མགྲིན་བཟློག་པའི་ཟིན་བྲིས་འདི། །ཆགས་མེད་རིན་པོ་ཆེའི་ཕྱག་བྲིས་ལས་བཤུས་ཏེ་དཔེ་འདི་ཀ་རང་ལགས་སོ། །ཞེས་པ་གནས་མདོ་སངས་རྒྱས་རིན་པོ་ཆེའི་ཕྱག་བྲིས་ངོ་མའི་བུ་དཔེ་འདི་ཀའོ་ཀརྨ་ཉི་མས་གསུང་པའི་བུ་འདི་ཤིན་ཏུ་དག །སརྦ་མངྒ་ལཾ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།