ལས་རིམ་བདུན་མའི་གཏོར་ཟློག་བཅའ་ཐབས།
ན་མོ་གྱ་གྷི་ཝ་ཡེ། ལས་རིམ་བདུན་པའི་བཅའ་ཐབས་ནི། །ལྕགས་སྣོད་གཙང་མ་ཕུབ་མས་བཀང་། །དེ་སྟེང་འཇིམ་པའི་ཞ་ལ་བྱུགས། །དེ་སྟེང་འཁོར་ལོ་རྩིབས་བརྒྱད་བྲི། །དེ་སྟེང་གྲུ་བཞི་ཟུར་མདུན་བསྟན། །དེ་སྟེང་འཇིམ་པ་གྲུ་གསུམ་བཞག །དེ་དག་སོ་སོར་གྲུ་གསུམ་བྲུ། །ཐམས་ཅད་ནག་པོ་ནང་ནི་དམར། །གྲུ་གསུམ་རེ་ནང་ལིང་ཆུང་བཞག །དེ་སྟེང་དབུས་སུ་དམར་གཏོར་ཏེ། །རྩེ་ལ་མར་གྱི་མེ་རི་དང་། །ཟུར་ལ་རྩང་ཆུང་ཉེར་གཅིག་བཙུགས། །དེ་རྒྱབ་དེ་ཡི་སུམ་གཉིས་ཙམ། །སླེབས་པའི་འཁོར་བཞི་དམར་གཏོར་རེ། །མར་རྒྱན་མི་བྱ་རྩང་བདུན་རེ། །དེ་རྒྱབ་སྡེ་བརྒྱད་བཤོས་བུ་འམ། །ཡང་ན་དམར་གཏོར་ཆུང་ཆུང་བརྒྱད། །བཤོས་བུ་བྱེད་ན་མར་ཡང་བརྒྱན། །དམར་གཏོར་བྱེད་ན་མར་མི་བརྒྱན། །རེ་རེར་རྩང་ཐུར་གསུམ་རེ་སྟེ། །དེ་ལྟར་གཙོ་འཁོར་བཅུ་གསུམ་ལ། །ཡོད་ན་སོ་སོའི་ཙཀྲི་དང་། །ཤ་དང་ལིང་གས་བརྒྱན་པར་བྱ། །དེ་རྒྱབ་རྩང་རིང་ཉེར་བརྒྱད་ནི། །རྒྱ་གྲམ་སྲིན་མོ་འགྲོས་སུ་བཙུགས། །ཕྱོགས་བཞིར་རྩང་ཐུང་ཟླུམ་པོ་དང་། །གྲུ་བཞི་ཟླ་གམ་གྲུ་གསུམ་བཞི། །སྒོ་རྩང་བཞི་པོ་བསླང་སྟེ་བཙུགས། །སྔོ་
དམར་སྐུད་པས་དཀྲིས་པ་ལ། །ཡོད་ན་རྩང་རྒྱན་བརྒྱད་ཀྱང་བརྒྱན། །རས་སམ་ཤོག་བུ་གང་ཡོད་འདྲ། །མདུན་ལ་རྩང་བསྟོད་སེམས་ཅན་གཟུགས། །རྒྱབ་ན་བཟློག་སྔགས་བྲི་བའོ། །རྩང་རྩེར་ཤ་དུམ་ལིང་གས་བརྒྱན། །ཡང་ན་སྟག་མའི་ལོ་མ་ལ། །ལིང་བྲིས་བརྒྱན་པ་སྟག་ལིང་ཟེར། །དར་གདུགས་ནག་པོ་ཡོད་ན་རབ། །མེད་ན་མདའ་དར་ནག་པོ་བཙུགས།་བཟློག་མདོས་རང་གི་སྙིང་ཁ་ལས། །མཐོ་ན་རང་ལ་ལྡོག་པར་གསུངས། །གཤེད་འདུལ་ལ་སོགས་ཡིན་ན་ནི། །གཏོར་ཟློག་ཞབས་སུ་ཧོམ་ཁུང་བྱ། །བདེ་རིམ་ལ་ནི་མི་དགོས་སོ། །རྩང་པ་ཁྲ་འབོས་བསྐུལ་བྱས་ནས། །རཱ་ག་ཨ་སྱས་འཕྲལ་དུ་བྲིས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།