དགོངས་གཏེར་རྟ་མགྲིན་ལྗང་གུའི་དབང་།
དགོངས་གཏེར་རྟ་མགྲིན་ལྗང་གུའི་དབང་བཞུགས་སོ༔
རཏྣ་གུ་རུ་ནི་མོ༔ དགོངས་གཏེར་རྟ་མགྲིན་ལྗང་གུའི་ཟིན་བྲིས་བྲི༔ ཆོས་བདག་སྲུང་མས་བཀའ་ཡི་གནང་བ་སྩོལཿ ཚེ་རྟ་མགོ་འབྲེལ་ཚུལ་དུ་འདི་བསྐུལ་ན༔ ཟན་བུམ་སྟེང་དུ་མར་གྱི་རྟ་མགོ་ནི༔ ནོར་བུས་མཚན་པ་བྱས་པས་འཐུས་པ་ཡིན༔ ལོགས་སུ་བྱེད་ན་རྗེས་གནང་གཏོར་མ་ལ༔ སྐུའམ་ནོར་བུས་མཚན་པའི་རྟ་མགོ་བཙུགས༔ བུམ་པ་མཆོད་གཏོར་ལ་སོགས་སྤྱི་ལྟར་བཤམས༔ དྲན་རྫོགས་དམ་ཡེ་དབྱེར་མེད་ལྷ་བསྐྱེད་དེ༔ སྐྱབས་སེམས་དེ་ནང་སྤྱི་འཚམས་སོང་བས་འཐུས༔ བདག་ཉིད་དང་བུམ་པའི་ནང་དང་གཏོར་མའི་རྩེར༔ རྟ་མགྲིན་སྐུ་མདོག་ལྗང་གུ་ཕྱག་གཉིས་གྲི་ཐོད་འཛིན་པ༔ ཁྲོ་བོའི་ཆས་ཐམས་ཅད་ཀྱིས་བརྒྱན་པ༔ དབུ་གཙུག་རྟ་མགོས་མཚན་པ༔
དེའི་གནས་གསུམ་ཡི་གེ་གསུམ་དང་ཐུགས་ཀར་ཉི་སྟེང་ཧི༔ཡིག་ལྗང་གུའི་མཐར་སྔགས་ཕྲེང་གཡས་སུ་འཁོར་བ་ལས་འོད་ཟེར་ཕྱོགས་བཅུར་འཕྲོས་པས༔ སངས་རྒྱས་ཀྱི་ཞིང་ཐམས་ཅད་ནས་རྟ་མགྲིན་ལྗང་གུ་ཆར་བཞིན་བབ་ནས་བདག་མདུན་བུམ་ལྷ་སོ་སོར་ཐིམ་པས་ཡེ་ཤེས་གཞུག་པ་དང་དབང་བསྐུར་བ་དུས་གཅིག་ཏུ་བྱས༔ བུམ་ལྷའི་སྐུ་ལས་བདུད་རྩིའི་རྒྱུན་བབ་བུམ་པ་གང་བར་གྱུར༔ ཨོཾ་བྱ་ཤྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཅེས་བརྒྱ་རྩ་ལས་མི་ཉུང་བ་བཟླས་སོ༔ ཨ་བྷཾ་སོགས། ཁྲོ་བོའི་རྒྱལ་པོ་རྟ་མཆོག་དཔལ༔ རྟ་སྐད་དྲག་པོ་བསྒྲགས་པ་ཡིས༔ གདུག་པ་
མ་ལུས་འདུལ་མཛད་པ༔ ཁྲོ་བོའི་རྒྱལ་ལ་ཕྱག་འཚལ་བསྟོད༔ དེ་ནས་སློབ་མ་འདུས་ཏེ་ཁྲུས་བྱས་མཎྜལ་ཕུལ་ནས༔ འོ་ན་ད་ལམ་ཁྱེད་རྣམས་ལ་རྟ་མགྲིན་ལྗང་གུའི་དབང་ཞིག་བསྐུར་བ་ཡིན་ཏེ༔ དེ་ཡང་བཅོམ་ལྡན་འདས་བདེ་བ་ཆེན་པོ་པདྨ་གར་གྱི་དབང་ཕྱུག་དེ་ཉིད་འོག་མིན་གྱི་གནས་ན་བཞུགས་པའི་ཚེ༔ དྲེགས་བྱེད་སྣ་ཚོགས་སྤྲུལ་ཞེས་བྱ་བ་མ་རུངས་པ་ཞིག་གིས་སེམས་ཅན་ཐམས་ཅད་ལ་གནོད་པ་བྱས་པས༔ དཔལ་རྟ་མཆོག་རོལ་པའི་དཀྱིལ་འཁོར་དུ་སྤྲུལ་ནས་བཏུལ༔ རྟ་མགྲིན་གྱི་དཀྱིལ་འཁོར་རྒྱས་པའི་རྒྱུད་གསུངས༔ དེར་བདུད་ཀྱི་རྒྱལ་པོ་མྱ་ངན་སྐྱེས་ཏེ༔ དུག་ལྔ་རབ་ཏུ་འབར་ཏེ་ཁྲོས་ནས་རང་གིས་དྲག་སྔགས་བརྗོད་ཅིང་འཇིག་རྟེན་གསུམ་འཁྲུགས་པར་བྱེད༔ མི་ནད་དང་མུ་གེ་དང་འཁྲུག་པ་དང་མཚོན་ཆའི་ཆར་དང་༔ ལོ་ཏོག་ཐམས་ཅད་འཇོམས༔ འབྱུང་པོ་ཐམས་ཅད་འཇིགས་གཟུགས་དང་ཉེས་པ་སྣ་ཚོགས་རྒྱུན་མི་ཆད་པར་བཏང་༔ ས་གཞི་ཐམས་ཅད་མེ་རུ་འབར་བ་དང་༔ ཆུས་གང་བ་དང་༔ དུག་དང་དབྱིག་དུག་ལ་སོགས་པའི་ནད་ནི་རླུང་ལྟར་འཚུབས༔ མཐོ་རིས་དང་ཐར་པའི་ལམ་ལ་བར་དུ་གཅོད༔ མི་རྣམས་ཀྱི་སེམས་ནི་
བསྒྱུར༔ འགྲོ་དྲུག་སྡུག་བསྔལ་ལ་བཀོད་དོ༔ དེར་སངས་རྒྱས་བཅོམ་ལྡན་འདས་ཀྱི་ཐུགས་ཀ་ནས་ཁྲོ་བོ་རྟ་མགྲིན་གྱི་དཀྱིལ་འཁོར་དུ་སྤྲུལ་ནས་དམ་ལ་བཏགས་སོ༔ དེ་ནས་བསྐལ་པ་འདི་ལ་སངས་རྒྱས་འོད་སྲུངས་ཀྱི་བསྟན་པའི་མཇུག་ཏུ་བདུད་ཀྱི་རྒྱལ་པོ་མ་ཏྲཾ་རུ་ཏྲས་སེམས་ཅན་རྣམས་བསད་ཅིང་ཟོས་པས་བསྐལ་པ་སྟོངས་ལ་ཁད་པ་དང་༔ བཅོམ་ལྡན་འདས་ཀྱིས་རྟ་མགྲིན་གྱི་དཀྱིལ་འཁོར་དུ་སྤྲུལ༔ རྟ་མགྲིན་གྱི་རྟེའུ་སྔོན་པོར་སྤྲུལ་ནས་བདུད་ཀྱི་ཁོག་ཏུ་ཞུགས་ཏེ་བསྒྲལ༔ ལུས་འཕྲོག་པས་ཁྲོ་བོ་རྟ་མགྲིན་གྱི་སྐུར་གྱུར༔ སེམས་དམ་ལ་བཏགས་པས་བསྟན་སྲུང་མ་ཧཱ་ཀཱ་ལར་གྱུརཿ དེའི་ཚེ་རྟ་མཆོག་རོལ་པའི་རྒྱུད་གསུངསཿ ཕྱིས་སྤྲུལ་སྐུ་ཤཱཀྱ་ཐུབ་པས་རྟ་མགྲིན་རྟོགས་པ་བདུན་བརྒྱ་པ་སོགས་གསུངས༔ དེ་དག་ནི་རྟ་མགྲིན་གྱི་རིགས་དཔག་ཏུ་མེད་པ་གསུངས་པས་རྟ་མགྲིན་གྱི་རིགས་རྟ་མོག་རོའི་སྤུ་གྲངས་ཙམ་ཡོད་པར་གྲགས༔ ཁྱད་པར་རྒྱུད་སཾ་བུ་ཊི་ལས་རྟ་མགྲིན་ལྗང་གུ་ཞལ་བཞི་ཕྱག་བརྒྱད་པ་ཅིག་གསུངས༔ རྙིང་མ་སྤྱིའི་མཚམས་ལྷ་ལ་རྟ་མགྲིན་ལྗང་གུ་ཕྱག་གཉིས་པ་ཅིག་གསུངས༔ འདི་ནི་དགོངས་གཏེར་གྱི་ལུགས་ཡིན་ཏེ༔
སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཅིག་ནས་བཟུང་ལོ་གསུམ་ལ་གནམ་ཆོས་ཐུགས་ཀྱི་གཏེར་ཁ་པོ་ཏི་བཅུ་གསུམ་ཙམ་བྱུང་༔ དེ་ནས་དགོངས་གཏེར་ཐུགས་ཀྱི་ཀློང་གསལ་ཡང་དེ་ཙམ་ཅིག་དང་༔ དེ་ནས་ས་གཏེར་བརྒྱ་རྩ་འདོན་པའི་རྟེན་འབྲེལ་ཡོད༔ དགུང་ལོ་བཅུ་བདུན་པ་ལ་དགོངས་གཏེར་རྫོགས་ནས༔ དབང་སྣ་ཡ་ཟུང་ཞིག་ཕབ་པའི་ནང་ནས་འདི་བྱུང་བ་ཡིན༔ ཆོས་ཡང་དག་པར་སྡུད་པའི་མདོ་ལསཿ བྱང་ཆུབ་སེམས་དཔའ་བསམ་པ་དག་པ་ལ་ལ་ནི་རང་གི་ཡིད་ཀྱི་དཔྱོད་པ་ཉིད་ལས་གདམས་ངག་རྗེས་སུ་བསྟན་པ་ཐམས་ཅད་འབྱུང་ངོ་༔ ཞེས་གསུངས་པ་དང་མཐུན་ཏེ༔ བཀའ་མ་ལས་གཏེར་མ་ཟབ་གཏེར་མ་ལས་གནམ་ཆོས་ཟབ༔ གནམ་ཆོས་ལས་དགོངས་གཏེར་འདི་ཟབ་པ་ཡིན་ནོ༔ རྟ་མགྲིན་འདིའི་ཕན་ཡོན་ནི༔ རྟ་མཆོག་རོལ་པ་ཁྲོ་བོ་རྣམ་པར་རོལ་པའི་རྒྱུད་ཆེན་པོ་ལས༔ དབང་མཆོག་ཁྲོ་བོ་རྟ་མགྲིན་དང་༔ རྒྱུད་རྒྱལ་རིན་ཆེན་ཕུང་པོ་ལ༔ གང་གིས་མཐོང་ཙམ་མོས་པ་དེ༔ དེ་ནི་ནད་སོགས་འཇིགས་ལས་གྲོལ༔ གང་གིས་ཡི་དམ་ལྷར་བཟུང་བ༔ དེ་ནི་སྐྱེ་བ་བདུན་བརྒྱ་རུ༔ དམྱལ་བ་ལ་སོགས་སྤང་བ་སྟེ༔ རྒྱུན་དུ་ལུས་
སེམས་ལྷར་འཆར་ཞིང་༔ ཞིང་ཁམས་དག་པའི་ས་ལ་རོལ༔ ཡི་གེ་རེ་རེ་འབུམ་བཟླས་ན༔ ཚེ་འདི་ཉིད་ལ་ཞལ་མཐོང་འགྱུརཿ གཏོར་མ་ཤས་ཅིག་བྱིན་པ་ཡང་༔ འཇིག་རྟེན་ས་ལ་དབང་བར་འགྱུར༔ སྔགས་ཙམ་ཡང་ཡང་བརྗོད་པ་ཡང་༔ དེ་ལ་ལྷ་སྲིན་འཚེ་བ་སྤང་༔ ཞེས་དང་༔ རྟ་མགྲིན་དྲེགས་པ་དབང་སྡུད་ཀྱི་རྒྱུད་ལསཿ འབྲས་བུ་ཐུན་མོང་གྲུབ་ཆེན་བརྒྱད༔ མཆོག་ལ་རིག་འཛིན་རྣམ་བཞི་དང་༔ སྐུ་གསུམ་སྐུ་བཞི་སྐུ་ལྔ་སོགསཿ ཕྱག་རྒྱ་ཆེན་པོ་མཆོག་འགྲུབ་བོ༔ ཞེས་དང་༔ རྟ་མགྲིན་ཡང་གསང་ཁྲོས་པའི་རྒྱུད་ལས་༔ ནམ་ཞིག་དུས་ཀྱི་ཐ་མ་ལ༔ སྔགས་པ་ནང་འགྲས་ཆོད་གཏོང་བྱེད༔ དེ་ཚེ་ཟབ་པའི་ཁྱད་འདོན་ན༔ ནད་དང་གདོན་རྣམས་སྲུང་བ་དང་༔ ཕྲིན་ལས་དམིགས་པ་གང་བྱེད་ཀྱང་༔ རང་ཉིད་རྟ་མགྲིན་སྐུར་གསལ་ནས༔ སུས་ཀྱང་ཚུགས་པར་མི་འགྱུར་ཏེ༔ སྟོང་པའི་གོ་ཆ་བླ་ན་མེད༔ འདི་ནི་སྲུང་བའི་རྒྱལ་པོ་ཡིན༔ ཞེས་དང་༔ ཨུ་རྒྱན་རིན་པོ་ཆེའི་ཞལ་ནས༔ དབང་རྫོ་གས་སྐྱེས་བུ་སུ་དང་སུས༔ མཐས་ཀྱང་སྲིད་པ་བར་དོ་ནས༔ བདེ་ཆེན་འབར་བའི་གཞལ་ཡས་སུ༔ ཡི་
དམ་ལྷ་ཡིས་འཁྲིད་པར་འགྱུར༔ ཞེས་དང་༔ རྟ་མགྲིན་རྣམ་པར་བཀོད་པའི་མདོ་ལསཿ དཔལ་རྟ་མགྲིན་འདིའི་མཚན་སྔགས་འབུ་སྲིན་ཡན་ཆད་སུའི་རྣ་བར་ལན་གཅིག་ཐོས་ན་ཡང་ངན་སོང་གི་སྐྱེ་སྒོ་ཆོད་ནས་བྱང་ཆུབ་སེམས་དཔར་འགྱུར་གསུངས་ན་དབང་ཐོབ་ན་ཕན་ཡོན་སྨོས་ཅི་དགོས༔ དེ་ལྟ་བུའི་དབང་ཟབ་མོ་ཞུ་བའི་ཕྱིར་རྗེས་ཟློས་མཛོད་དུས་གསུམ་སངས་རྒྱས་ཐམས་ཅད་དང་༔ ཁྱད་པར་རྟ་མགྲིན་ལྗང་གུ་ལ༔ གསོལ་བ་འདེབས་སོ་དབང་བསྐུར་སྩོལ༔ གསུམ། ད་དཀོན་མཆོག་གསུམ་ལ་སྐྱབས་སུ་འགྲོ་ཞིང་སྡིག་པ་ཐམས་ཅད་བཤགས་སོ་སྙམ་པ་གྱིས་ལ་འདིའི་རྗེས་ཟློས་གྱིས་ཤིག༔ དཀོན་མཆོག་གསུམ་ལ་བདག་སྐྱབས་མཆི༔ རྟ་མགྲིན་ལ་ཡང་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་དགེ་ལ་རྗེས་ཡི་རང་༔ སངས་རྒྱས་བྱང་ཆུབ་ཡིད་ཀྱིས་བཟུང་༔ སངས་རྒྱས་ཆོས་དང་ཚོགས་མཆོད་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་ནི་རབ་བསྒྲུབ་ཕྱིར༔ བྱང་ཆུབ་མཆོག་གི་སེམས་ནི་བསྐྱེད་པར་བགྱི༔ བྱང་ཆུབ་མཆོག་གི་སེམས་ནི་བསྐྱེད་བགྱི་ནས༔ སེམས་ཅན་ཐམས་ཅད་བདག་གིས་
མགྲོན་དུ་གཉེར༔ བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི༔ འགྲོ་ལ་ཕན་ཕྱིར་སངས་རྒྱས་མྱུར་ཐོབ་ཤོག༔ གསུམ་མམ་ཚིག་རྗེས་མ་གསུམ༔ ལས་བུམ་ཀུ་ཤས་སློབ་མ་བྲན་ཚུལ་བྱས་ལ༔ ཨོཾ་སྭ་བྷཱ་ཝ་སོགས། སྟོང་པའི་ངང་ལས་ཁྱེད་རང་དབང་ཞུ་བ་པོ་རྣམས་དང་༔ གང་ལ་དབང་ཞུ་བའི་ཡུལ་མདུན་བསྐྱེད་དང་གཏོར་མ་སོ་སོར་སྣ་ཚོགས་པདྨ་འདབ་མ་བརྒྱད་པའི་ཟེའུ་འབྲུར་ཉི་མའི་དཀྱིལ་འཁོར་གྱི་སྟེང་དུ་ཧཱུྃཡིག་མར་གད་ཀྱི་མདོག་ཅན་ལས་འོད་ཟེར་འཕྲོས༔ འཕགས་པ་མཆོད༔ སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས་དཔལ་ལས་ཀྱི་རིགས་ཀྱི་རྟ་མགྲིན་སྐུ་མདོག་མར་གད་ཀྱི་མདོག་ལྟར་ལྗང་བ༔ ཞལ་གཅིག༔ དམར་ལ་ཟླུམ་པའི་སྤྱན་གསུམ་བགེགས་ལ་སྡང་མིག་ཏུ་བགྲད་པས་སྐྲག་པར་བྱེད་པ༔ དབུ་སྐྲ་དམར་སེར་ནག་མེ་རླུང་གིས་བསྐྱོད་པ་ལྟར་གྱིས་གྱེན་དུ་འབར་བའི་གསེབ་ནས་རྟ་མགོ་ལྗང་ཞུར་རྡོག་མ་ལེ་བརྒན་མེ་ལྟར་འབར་ཞིང་རྟ་སྐད་དྲག་པོ་ནམ་མཁའི་དབྱིངས་སུ་འཚེར་བ༔ ཐོད་སྐམ་ལྔའི་དབུ་བརྒྱན་ལ་རིན་པོ་ཆེའི་རྩེ་བྲན་འོད་འབར་བ་ལྔས་བརྒྱན་པ༔ ཞལ་གདངས་ཤིང་ལྗགས་འདྲིལ་བ༔ ཟླ་བ་ཚེས་པ་
ལྟ་བུའི་མཆེ་བ་བཞི་གཙིགས་པས་བདུད་བཞི་འཇོམས་པ༔ སྨ་ར་དང་སྨིན་མ་དམར་སེར་ལ་མེ་སྟག་གི་ཚྭ་ཚྭ་འཕྲོ་བ༔ ཕྱག་གཡས་སྣ་ཚོགས་རྡོ་རྗེས་ཡུ་བ་བྱས་པའི་གྲི་གུག་ནམ་། མཁའ་ལ་ཕྱར་བ༔ གཡོན་པས་བདུད་བཞིའི་ཁྲག་གིས་བཀང་བའི་ཐོད་པ་ཐུགས་ཀར་འཛིན་པ༔ སྐུ་ཆེ་ལ་ཡན་ལག་རགས་པ༔ ཞབས་གཡས་བསྐུམ་གཡོན་བརྐྱང་བའི་འདོར་སྟབས་ཀྱིས་པད་ཉི་དགྲ་བགེགས་མནན་པ༔ ཁྲག་གི་ཐིག་ལེ༔ ཞག་གི་ཟོ་རིས༔ ཐལ་ཆེན་གྱི་ཚོམ་བུ༔ རུས་པའི་རྒྱན་དྲུག༔ སྦྲུལ་གྱི་ཆུན་འཕྱང་༔ གླང་ཆེན་གྱི་ཀོ་བ༔ ཞིང་ཆེན་གྱི་གཡང་གཞི༔ སྟག་ལྤགས་ཀྱི་ཤམ་ཐབས་ཏེ་ཁྲོ་བོའི་ཆོས་ཐམས་ཅད་ཀྱིས་བརྒྱན་པ༔ བསྐལ་པའི་མེ་ཕུང་འབར་བའི་དབུས་ན་བཞུགས་པའི་དཔྲལ་བར་ཨོཾ་དཀར་པོ༔ མགྲིན་པ་ཨཱདམར་པོ༔ ཐུགས་ཀར་ཧཱུྃ་སྔོན་པོ༔ ཐུགས་ཀའི་དབུས་སུ་ཧྲཱིཿལྗང་གུ་དེ་ལས་འོད་ཟེར་འཕྲོས་པས་བདེ་ཆེན་དབང་དྲག་རོལ་པའི་གཞལ་ཡས་ནས་དཔལ་རྟ་མགྲིན་ལྗང་གུའི་སྐུ་ཆེ་བ་ལ་རི་རབ་ཙམ༔ ཆུང་བ་ལ་ཡུངས་ཀར་གྱི་འབྲུ་ཙམ་ཁ་བ་བུ་ཡུག་ལྟར་བྱོན་ནས་ཁྱེད་རང་རྣམས་ལ་སིབ་སིབ་ཐིམ་པར་སྒོམས་ཤིག༔ སྤོས་རོལ་མོ་
དབྱངས་དང་བཅས༔ ཧཱུྃ༔ རྟ་མགྲིན་ལྗང་གུའི་ལྷ་ཚོགས་མ་ལུས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ སྐལ་ལྡན་དད་ལྡན་འདི་ལ་དབང་མཆོག་བསྐུར༔ ལོག་འདྲེན་ཚེ་ཡི་བར་ཆད་བསལ་དུ་གསོལ༔ ཨོཾ་རྒྱ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ བཛྲ་ཨ་ཝེ་ཤ་ཡ་ཨ་ཨཱཿ གསུམ་མམ་བདུན་བརྗོད༔ རྡོ་རྗེ་མགོར་བཞག་ལ༔ ཡེ་ཤེས་པ་དེ་བརྟན་པར་གྱུར༔ ཏིཥྛ་བཛ྄༔ དབང་ལྷ་ཡེ་ཤེས་པ་དཔག་ཏུ་མེད་པ་སྤྱན་དྲངས༔ བཛྲ་ས་མཱ་ཛཿ སློབ་མ་འདི་རྣམས་ལ་དབང་བསྐུར་དུ་གསོལ༔ ཞེས་གསོལ་བ་བཏབ་པས་དབང་ལྷ་རྣམས་ཀྱིས་བུམ་པས་དབང་བསྐུར་བར་སྒོམས་ཤིག་བུམ་པའི་དབང་བསྐུར་གཞལ་ཡས་ཆེན་པོའི་མཆོག་སྐལ་ལྡན་རྣམས་ལ་དུས་འདིར་ཡོངས་རྫོགས་ནསཿ སྐུ་བཞི་ལྷུན་གྲུབ་ཕྲིན་ལས་རྣམ་བཞི་བརྙེསཿ རྒྱ་ཆེ་རྒྱུན་མི་ཆད་པའི་དབང་ཐོབ་ཤོག༔ ཨོཾ་ཧུ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ༔ འོ་དེ་ལྟར་དབང་བསྐུར་བས་བདུད་རྩིའི་ཆུས་ལུས་གང་༔ སྡིག་སྒྲིབ་དག༔ ཆུའི་ལྷག་མ་སྤྱི་བོར་ལུད་པས་རྟ་དབུས་མཚན་ནས་རྟ་སྐད་ལན་གསུམ་ཐོན་པར་།
སྒོམས༔ ཞེས་ཀུ་ཤས་བྲན༔ བུམ་ཆུ་ངག་ཏུ་བླུད་པས་ངག་ལ་ནུས་པ་ཐོགས་པ་མེད་པར་གྱུར༔ ཅེས་བུམ་ཆུ་བླུད༔ ད་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དབང་ཞུ་བའི་ཕྱིར་རྗེས་ཟློས༔ དུས་གསུམ་སངས་རྒྱས་ཐམས་ཅད་དང་༔ ཁྱད་པར་རྟ་མགྲིན་ལྗང་གུ་ལ༔ གསོལ་བ་འདེབས་སོ་སྐུ་ལྔ་ཡི༔ དབང་དང་དངོས་གྲུབ་སྩལ་དུ་གསོལ༔ གསུམ། དེ་ལྟར་གསོལ་བ་བཏབ་པས་མདུན་བསྐྱེད་ཀྱི་དཔྲལ་བ་ནས་སྐུའི་རྟ་མགྲིན་སྐུ་མདོག་དུང་ལྟར་དཀར་བ་སྐུ་ཆུང་ལ་ཡན་ལག་དོད་པ་དཔག་ཏུ་མེད་པ་འཕྲོས༔ ཁྱེད་རང་གི་དཔྲལ་བ་ནས་ཞུགས༔ ལུས་ཀྱི་ནང་ཐམས་ཅད་ཁྲོ་བོ་དཀར་པོས་གང་བར་སྒོམས་ཤིག༔ ཧཱུྃ༔ དམ་ཚིག་ཆེན་པོའི་ཚུལ་བསྟན་པ༔ ཁྲོ་བོ་ཆེན་པོ་གཤེགས་སུ་གསོལ༔ སྤྲུལ་པའི་ཁྲོ་རྒྱལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་སྩོལ༔ སྐུ་ཡི་སྒོ་ནས་དབང་མཆོག་བསྐུར༔ ལུས་ཀྱི་ནད་གདོན་ཞི་བར་མཛོད༔ ཨོཾ་རྒྱ་ཤྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཀཱ་ཡ་ཨ་ཡིཉྩ་ཨོ༔ འདིར་ཡོད་ན་རྟ་མགྲིན་གྱི་སྐུ་ཁ་དོག་ལྔ་གནས་སོ་སོར་བཞག༔ མེད་ན་གཏོར་མ་བཞག་པས་འཐུསཿ མེ་ཏོག་འཐོར་ཞིང་༔ ཧྲཱིཿ རྒྱལ་བ་ཀུན་གྱི་
ཆོས་སྐུ་པདྨའི་གསུང་༔ ཆོས་སྐུ་འོད་དཔག་མེད་པ་རྡོ་རྗེའི་ཆོས༔ སྤྱན་རས་གཟིགས་དབང་ཧྲཱིཿལས་རྔམས་ཆེན་སྐུ༔ རྟ་སྐད་བཞད་པ་སྐུ་ཡི་བཀྲ་ཤིས་ཤོག༔ འོ་དེས་སྐུའི་དབང་ཐོབ༔ ལུས་ཀྱི་སྒྲིབ་པ་དག༔ ལུས་ཀྱི་ནད་གདོན་ཞི༔ ལུས་ལ་སྐུ་རྡོ་རྗེའི་ས་བོན་ཐེབས་པའོ༔ ཡང་མདུན་བསྐྱེད་ཀྱི་མགྲིན་པ་ནས་གསུང་གི་རྟ་མགྲིན་སྐུ་མདོག་པདྨ་རཱ་ག་ལྟ་བུ་སྐུ་ཆུང་ལ་ཡན་ལག་དོད་པའི་ཚོགས་དཔག་ཏུ་མེད་པ་འཕྲོས༔ ཁྱེད་རང་གི་མགྲིན་པ་ནས་ཞུགས༔ ལུས་ཀྱི་ནང་ཐམས་ཅད་ཁྲོ་བོ་དམར་པོའི་ཚོགས་ཀྱིས་གང་བར་སྒོམས་ཤིག༔ ཧཱུྃ༔ དམ་ཚིག་ཆེན་པོའི་ཚུལ་བསྟན་པ༔ ཁྲོ་བོ་ཆེན་པོ་གཤེགས་སུ་གསོལ༔ སྤྲུལ་པའི་ཁྲོ་རྒྱལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་སྩོལ༔ གསུང་གི་སྒོ་ནས་དབང་མཆོག་བསྐུར༔ ངག་ལ་ནུས་པ་སྐྱེད་དུ་གསོལ༔ ཨོཾ་རྒྱ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཝཱཀ་ཨ་བྷི་ཥིཉྩ་ཨཱཿ ཞེས་མགྲིན་པར་བཞག༔ དབང་ཆེན་ཀུན་འདུས་དབང་གི་རྒྱལ་པོ་ལྟར༔ དབང་གི་མདོག་ལྗང་བསྐལ་པའི་མེ་འབར་བ༔ དབང་ཆེན་རྔམས་པ་ཉི་མ་འབུམ་གྱི་གཟི༔ དབང་
མཛད་ལྷ་ཡི་གསུང་གི་བཀྲ་ཤིས་ཤོག༔ འོ་དེས་གསུང་གི་དབང་ཐོབ༔ ངག་གི་སྒྲིབ་པ་དག༔ ངག་ལ་གནོད་པའི་དིག་ལྷུགས་སོགས་ཞི༔ ངག་ལ་གསུང་རྡོ་རྗེའི་ས་བོན་ཐེབས་པའོ༔ ཡང་མདུན་བསྐྱེད་ཀྱི་ཐུགས་ཀ་ནས་ཐུགས་ཀྱི་རྟ་མགྲིན་སྐུ་མདོག་བཻཌཱུརྱ་ཞུན་མ་ལྟ་བུ་སྐུ་ཆུང་ལ་ཡན་ལག་དོད་པའི་ཚོགས་དཔག་ཏུ་མེད་པ་འཕྲོས༔ ཁྱེད་རང་རྣམས་ཀྱི་སྙིང་ག་ནས་ཞུགས་ལུས་ཀྱི་ནང་ཐམས་ཅད་ཁྲོ་བོས་སྔོན་པོས་གང་བར་སྒོམས་ཤིག༔ ཧཱུྃ༔ དམ་ཚིག་ཆེན་པོའི་ཚུལ་བསྟན་པ༔ ཁྲོ་བོ་ཆེན་པོ་གཤེགས་སུ་གསོལ༔ སྤྲུལ་པའི་ཁྲོ་རྒྱལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཐུགས་ཀྱི་སྒོ་ནས་དབང་མཆོག་བསྐུར༔ ཡིད་ལ་བདེ་སྟོང་སྦྱར་དུ་གསོལ༔ ཨོཾ་རྒྱ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཙིཏྟ་ཨ་བྷི་ཥིཉྩ་ཧཱུྃ༔ ཞེས་སྙིང་གར་བཞག༔ ཐུགས་རྗེ་ཞི་བའི་ངང་ལས་མ་གཡོས་ཀྱང་༔ མ་རུངས་གདུག་པའི་དགྲ་བགེགས་བསྒྲལ་བའི་ཕྱིར༔ ཞེ་སྡང་ཁྲོ་གཏུམ་དུས་མཐའི་མེ་ལྟར་འབར༔ རྔམས་བརྗིད་འགྱིང་བའི་ཐུགས་ཀྱི་བཀྲ་ཤིས་ཤོག༔ འོ་དེས་ཐུགས་ཀྱི་དབང་ཐོབ༔ སེམས་ཀྱི་སྒྲིབ་པ་
དག༔ སེམས་ལ་ཐུགས་རྡོ་རྗེའི་ས་བོན་ཐེབས་པའོ༔ ཡང་མདུན་བསྐྱེད་ཀྱི་ལྟེ་བ་ནས་ཡོན་ཏན་གྱི་རྟ་མགྲིན་སྐུ་མདོག་གསེར་བཙོ་མ་ལྟ་བུ་སྐུ་ཆུང་ལ་ཡན་ལག་དོད་པའི་ཚོགས་དཔག་ཏུ་མེད་པ་འཕྲོས༔ ཁྱེད་རང་རྣམས་ཀྱི་ལྟེ་བ་ནས་ཞུགས༔ ལུས་ཀྱི་ནང་ཐམས་ཅད་ཁྲོ་བོ་སེར་པོའི་ཚོགས་དཔག་ཏུ་མེད་པས་གང་བར་སྒོམས་ཤིག་ཧཱུྃ༔ དམ་ཚིག་ཆེན་པོའི་ཚུལ་བསྟན་པ༔ ཁྲོ་བོ་ཆེན་པོ་གཤེགས་སུ་གསོལཿ སྤྲུལ་པའི་ཁྲོ་རྒྱལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཡོན་ཏན་སྒོ་ནས་དབང་མཆོག་བསྐུརཿ མཐུ་སྟོབས་རྩལ་ཆེན་བསྐྱེད་དུ་གསོལ༔ ཨོཾ་རྒྱ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ སརྦ་ཨ་བྷི་ཥིཉྩ་ཧི༔ མ་ཆགས་པདྨ་རིགས་ཀྱི་རྣམ་འཕྲུལ་གྱི༔ རྒྱལ་པོའི་ཚུལ་གྱིས་གདུག་པ་ཀུན་འདུལ་བ༔ དབང་ཆེན་བསྐལ་པའི་མེ་ལྟར་གཟི་བརྗིད་འབར༔ ཁྲོ་རྒྱལ་རྟ་མགྲིན་ཡོན་ཏན་བཀྲ་ཤིས་ཤོག༔ འོ་དེས་ཡོན་ཏན་གྱི་དབང་ཐོབ༔ བསགས་པ་ཆ་སྙོམས་ཀྱི་སྒྲིབ་པ་དག༔ ཚེ་བསོད་ནམས་ལ་བར་དུ་གཅོད་པ་ཞི༔ ཡོན་ཏན་ལྷུན་གྱིས་གྲུབ་པའི་ས་བོན་ཐེབས་
པའོ༔ ཡང་མདུན་བསྐྱེད་ཀྱི་གསང་བ་ནས་ཕྲིན་ལས་ཀྱི་རྟ་མགྲིན་མར་གད་ཞུན་མའི་མདོག་ལྟ་བུ་དཔག་ཏུ་མེད་པ་འཕྲོས༔ ཁྱེད་རང་གི་གསང་བ་ནས་ཞུགས་༔ ལུས་ཀྱི་ནང་ཐམས་ཅད་ཁྲོ་བོ་ལྗང་གུའི་ཚོགས་ཀྱིས་གང་བར་སྒོམས་ཤིག༔ ཧཱུྃ༔ དམ་ཚིག་ཆེན་པོའི་ཚུལ་བསྟན་པ༔ ཁྲོ་བོ་ཆེན་པོ་གཤེགས་སུ་གསོལ༔ སྤྲུལ་པའི་ཁྲོ་རྒྱལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་སྩོལཿ ཕྲིན་ལས་སྒོ་ནས་དབང་མཆོག་བསྐུར༔ ནད་གདོན་བགེགས་རྣམས་ཚར་ཆོད་ཅིག༔ ཨོཾ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཀརྨ་ཨ་བྷི་ཥིཉྩཕཊ༔ ཧཱི༔ སྐྱེ་འགག་གཉིས་སུ་མེད་པའི་ངོ་བོ་ལས༔ ཆོས་ཉིད་མི་འགྱུར་རྟ་མཆོག་རོལ་བའི་སྐུ༔ གསུང་མཆོག་རྟ་སྐད་འཚེར་བས་འགྲོ་བ་འདུལ༔ དབྱེར་མེད་ལྷུན་གྲུབ་ཕྲིན་ལས་བཀྲ་ཤིས་ཤོག༔ འོ་དེས་ཕྲིན་ལས་ཀྱི་དབང་ཐོབ༔ ཤེས་བྱའི་སྒྲིབ་པ་དག༔ ཅི་ལྟར་བསམ་པའི་དོན་ལ་བར་དུ་གཅོད་པ་ཐམས་ཅད་ཞི༔ ཕྲིན་ལས་འགྲོ་བ་འདུལ་བའི་ས་བོན་ཐེབས་པའོ༔ དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་ལྔ་ཐོབ་ནས༔ ད་གཏོར་མ་ལ་བརྟེན་ནས་
བཀའ་བསྒོའི་དོན་དུ་གཏོར་མ་འདི་ཉིད་རྟ་མགྲིན་ལྗང་གུ་སྔར་སྨོས་མ་ཐག་པའི་མཚན་ཉིད་ཅན༔ སྟེང་གི་ཆ་ལ་བརྒྱུད་པའི་བླ་མ་དང་བཅས་པ་སྤྲིན་འཁྲིགས་པ་ལྟར་ཁྱེད་རང་རྣམས་ཀྱི་སྤྱི་བོར་བྱོན་ནས་ངེད་ཀྱིས་གསོལ་བ་ཇི་ལྟར་བཏབ་པ་ལྟར་བྱིན་རླབས་དངོས་གྲུབ་ཐམས་ཅད་སྩོལ་ཏེ༔ འོད་དུ་ཞུ་ནས་ཁྱེད་རང་རྣམས་ལ་ཐིམ་པར་སྒོམས་ཤིག༔ ཧཱུྃ༔ དམ་ཚིག་ཆེན་པོའི་ཚུལ་བསྟན་པ༔ ཁྲོ་བོ་ཆེན་པོ་གཤེགས་སུ་གསོལ༔ སྤྲུལ་པའི་ཁྲོ་རྒྱལ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ སྐུ་གསུང་ཐུགས་ཀྱི་དངོས་གྲུབ་སྩོལ༔ གཏོར་མའི་དབང་བསྐུར་ལྷ་དང་གཉིས་སུ་མེད༔ རྟ་མཆོག་སྐུ་གསུང་ཐུགས་ཡོན་ཕྲིན་ལས་རྣམས༔ མ་ལུས་ཡོངས་སུ་རྫོགས་པའི་དབང་བཞི་མཆོག༔ སྐལ་ལྡན་འདི་ལ་དུས་འདིར་ཡོངས་རྫོགས་ཤོག༔ ཆོས་སྐུ་སྣང་བ་མཐའ་ཡས༔ ལོངས་སྐུ་ཐུགས་རྗེ་ཆེན་པོ༔ སྤྲུལ་སྐུ་པདྨ་འབྱུང་གནས༔ མཁའ་འགྲོ་ཡེ་ཤེས་མཚོ་རྒྱལ༔ ལོ་ཆེན་བཻ་རོ་ཙ་ན༔ ཤུད་བུ་དཔལ་གྱི་སེངྒེ༔ བདུད་འདུལ་རོལ་བ་རྩལ་ལ་སོགས་པ་རིག་འཛིན་བརྒྱུད་པའི་བླ་མ་རྣམས་དང་༔ ལས་ཀྱི་རིགས་ཀྱི་རྟ་མཆོག་
ཧེ་རུ་ཀ༔ འཁོར་སྤྲུལ་པ་ཡང་སྤྲུལ་དང་བཅས་པས་བྱིན་གྱིས་བརླབས་པ་དང་དབང་བསྐུར་བར་མཛད་དུ་གསོལ༔ ཕོ་གདོན་མོ་གདོན་ཀླུ་གདོན་ལ་སོགས་པ་ལྷ་སྲིན་སྡེ་བརྒྱད་ཀྱི་གནོད་པས་མི་ཚུགས་པར་སྲུངས་ཤིག༔ གག་ལྷོག་གཟེར་གསུམ་ཡམས་ནད་རིམས་ནད་ལ་སོགས་པ་ནད་རིགས་བཞི་བརྒྱ་རྩ་བཞིའི་གནོད་པ་ཐམས་ཅད་ཞི་བར་མཛོད་ཅིག༔ བསོད་ནམས་དབང་ཐང་རླུང་རྟ་ཐམས་ཅད་དར་ཞིང་རྒྱས་པར་མཛོད་ཅིག༔ ཡིད་ལ་འདོད་པའི་དངོས་གྲུབ་ཐམས་ཅད་དབང་དུ་འདུ་པར་མཛོད་ཅིག༔ འཁོར་བ་དང་ངན་སོང་གི་སྡུག་བསྔལ་ཐམས་ཅད་ལས་སྐྱོབ་པར་མཛད་དུ་གསོལཿ ཨོཾ་བྱ་གི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཧཱུྃ་བྱ་ཤྲཱི་ཝ་ཧུཾ་ཧཱུྃ་ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཧཱུྃ༔ ད་ཁྱེད་རང་གི་ངེད་ལ་མེ་ཏོག་ལྗང་གུའི་ཕྲེང་བ་གཅིག་ཕུལ་བའི་མོས་པས་རྗེས་ཟློས་གྱིས༔ བཅོམ་ལྡན་བདག་གིས་བཟུང་ལགས་ཀྱིས༔ བདག་ལ་འགོ་བར་མཛད་དུ་གསོལཿ དེ་ལྟར་གསོལ་བ་བཏབ་པས་སློབ་དཔོན་གྱི་ཐུགས་ཀ་ནས་སྔགས་ཕྲེང་འཕྲོས༔ ཁྱེར་རང་གི་ཞལ་དུ་ཞུགས༔ ཐུགས་ཀར་གཡས་སུ་འཁོད་པའི་མོས་པས་རྗེས་ཟློས་ལན་གསུམ་མཛོད༔ ཨོཾ་རྒྱ་གྲི་ཝ་ཧུ་ལུ་ཧུ་ལུ་ཧཱུྃ་
ཕཊ༔ དེ་ནས་སྔགས་ཕྲེང་དེ་ཉིད་མེ་ཏོག་གི་ཕྲེང་བར་གྱུར་ནས་སྤྱི་བོར་བཞག་པའི་མོས་པ་མཛོདཿ བཅོམ་ལྡན་འདི་ལ་སྩལ་ལགས་ཀྱིསཿ འདི་ལ་འགོ་བར་མཛད་དུ་གསོལ༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ འོ་དེས་དགོངས་གཏེར་རྟ་མགྲིན་ལྗང་གུའི་དབང་རྒྱས་པར་ཐོབ་པ་ཡིན་པས་འདི་ཉིད་ཡི་དམ་དུ་བཟུང་བའི་མོས་པས་རྗེས་ཟློས༔ གཙོ་བོས་ཇི་ལྟར་བཀའ་སྩལ་བ༔ དེ་དག་ཐམས་ཅད་བདག་གིས་བགྱི༔ ད་གཏང་རག་གི་ཚུལ་དུ་མཎྜལ་ཕུལ༔ ས་གཞི་སྤོས་ཆུས་སོགས། ཞེས་པ་གཏེར་བློན་རཱ་ག་ཨ་སྱས་བསྒྲིགས་པ་ལ་ཉེས་འགལ་མཆིས་ན་ལྷ་ལ་བཤགས་ཤིང་༔ དགེ་བས་འགྲོ་དོན་དཔག་ཏུ་མེད་པར་གྱུར་ཅིག ཡི་གེ་པ་ནི་ཉེ་གནས་ཀུན་དགས་བགྱིས་སོ༔ མངྒ་ལཾ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།