འཕགས་པ་རེ་མནྟ་ཡི་གཏོར་ཆོག
འཕགས་པ་རེ་མནྟ་ཡི་གཏོར་ཆོག་བཞུགས་སོ། །
ན་མོ་རྒྱ་གྲི་ཝ་ཡེ། ཡེ་ཤེས་ཀྱི་མགོན་པོ་བེར་ནག་ཅན་གྱི་དཀྱིལ་འཁོར། ཤར་གྱི་མགོན་པོ་དཔལ་རབ་འཆང་བ་ཞེས་བྱ་བ་དང་། མགོན་པོ་ཕྱག་བཞི་པའི་དམག་འགྱེད་ཀླུ་སྒྲུབ་ཀྱིས་མཛད་པ་ནས་འབྱུང་བའི་མགོན་པོ་རྟ་མང་ཞེས་བྱ་བ་དང་། བྱ་རྒྱུད་དུ་གཏོགས་པའི་རྟ་གཟུངས་རྣམས་ནས་བྱུང་པའི་འཕགས་པ་རྟ་བདག་མགོན་པོ་མཆོད་པར་འདོད་པ། བྱ་རྒྱུད་ལྟར་བྱེད་ན་དཀར་གསུམ་དང་། མགོན་པོའི་རྒྱུད་ལྟར་བྱེད་ན་ཤ་ཆང་གཙང་མའི་གཏོར་མ་རིན་པོ་ཆེའི་དབྱིབས་ཅན་བཤམས་ལ་རང་ཡི་དམ་དུ་གསལ་བས། ཨོཾ་སྭ་བྷ་ཝས་སྦྱངས། རང་མདུན་པད་ཉི་ཧཱུྃ་ཡིག་ལེས། །དཔལ་ལྡན་མགོན་པོ་རེ་མནྟ། །དམར་གསལ་བསེ་ཁྲབ་རྨོག་ཞུ་གསོལ། །ཕྱག་གཉིས་རལ་གྲི་
འཁོར་ལོ་བསྣམས། །རྟ་སྔོན་གསེར་གྱི་ཞུབ་ཅན་ཆིབས། །སྟེང་ན་ཁྱུང་དང་བྱ་ཁྲ་ལྡིང་། །མདུན་རྒྱབ་སྟག་དང་སེང་གེ་འགྲོ། །རང་འདྲའི་འཁོར་ཚོགས་ལྔ་བརྒྱས་བསྐོར། །གཙོ་བོའི་གནས་གསུམ་འབྲུ་གསུམ་དང་། །ས་བོན་འོད་ཀྱིས་སྤྱན་དྲངས་གྱུར། །ཧཱུྃ༔ དད་པ་དང་ནི་དམ་ཚིག་གིས། །རྟ་བདག་མགོན་པོ་སྤྱན་དྲངས་ནས། །སྔོན་གྱི་ཐུགས་དམ་རྗེས་དགོངས་ལ། །ད་ལྟ་ཉིད་དུ་གཤེགས་སུ་གསོལ། །དཔའ་རབ་འཆང་བ་གཤེགས་སུ་གསོལ། །ཉི་མའི་སྲས་པོ་གཤེགས་སུ་གསོལ། །དགྲ་ལྷའི་མཆོག་གྱུར་གཤེགས་སུ་
གསོལ། །འཕགས་པ་གཟི་ལྡན་གཤེགས་སུ་གསོལ། །ལམ་ལྷའི་རྒྱལ་པོ་གཤེགས་སུ་གསོལ། །བྱ་ཁྲ་ལྡིང་བ་གཤེགས་སུ་གསོལ། །སྟག་གཟིག་འབྲང་བ་གཤེགས་སུ་གསོལ། །འཁོར་ཚོགས་ལྔ་བརྒྱ་གཤེགས་སུ་གསོལ། །ཨོཾ་ཨཱརྱ་རེ་མནྟ་ས་པཱ་རི་ཝཱ་ར་བཛྲ་ས་མ་ཡ་ཛཛཿ ཛཧཱུྃ་བཾ་ཧོ༔ ཧཱུྃ། སྔོན་ཚེ་ཤཱཀྱ་སེང་གེ་དང་། །རྟ་མཆོག་དབང་གི་རྒྱལ་པོ་དང་། །གསང་བའི་བདག་པོའི་སྤྱན་སྔ་རུ། །ཁས་བླངས་དམ་ཚིག་དྲན་མཛོད་ལ། །རིན་ཆེན་གཞལ་ཡས་དམ་པ་འདིར། །ཅང་ཤེས་པདྨ་ཉི་ཟླའི་སྟེང་། །འཁོར་བཅས་དགྱེས་པར་བཞུགས་ནས་ཀྱང་། །བདག་གིས་ལས་རྣམས་འགྲུབ་པར་མཛོད། །ཨོཾ་ཨཱརྱ་རེ་མན་ས་པཱ་རི་ཝཱ་ར་ཏིཥྛ་ལྷན། ས་མ་ཡ་ཧཱུྃ། ས་མ་ཡ་ཧོ༔ ཧཱུྃ། འཕགས་པ་རྟ་བདག་འཁོར་བཅས་ལ། །དངོས་འབྱོར་ཡིད་སྤྲུལ་མཆོད་པའི་སྤྲིན། །རབ་མཛེས་དབྱིབས་ལེགས་མེ་ཏོག་དང་། །སྦྱར་དང་ཡོངས་སུ་གྱུར་པའི་སྤོས། །རིན་ཆེན་ཉི་ཟླའི་སྒྲོན་མེའི་འོད། །ཡན་ལག་བརྒྱད་ལྡན་ཁྲུས་ཀྱི་ཆབ། །རོ་བརྒྱ་ལྡན་པའི་བཤོས་གཙང་དང་། །རྔ་དྲིལ་ཆ་ལང་དུང་ཆེན་སྒྲ། །འདོད་ཡོན་ལྔ་དང་རིན་ཆེན་
བདུན། །བཀྲ་ཤིས་འགྲུབ་པའི་རྫས་རྟགས་བརྒྱད། །དར་ཟབ་འབྲུ་སྨན་རིན་ཆེན་སོགས། །གུས་པས་འབུལ་གྱི་བཞེས་སུ་གསོལ། །ཨོཾ་ཨཱརྱ་རེ་མན་ས་པཱ་རི་ཝཱ་ར་ཨགྷཾ་སོགས་བརྗོད། ཨ་མྲི་ཏ་སོགས། ཨོཾ་སྭ་བྷཱ་ཝ་སོགས། སྟོང་པ་ཉིད་དུ་གྱུར་། སྟོང་པའི་ངང་ལས་ཧཱུྃ་ལས་བྱུང་བའི་རིན་པོ་ཆེ་ཡི་སྣོད་ཀྱི་ནང་དུ། ༀ་ལས་བྱུང་བའི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨ་ཀཱ་རོ་སོགས། ལན་གསུམ། ཨོཾ་ཨཱརྱ་རེ་མནྟ་ས་པ་རི་ཝཱ་ར་ཨི་དཾ་བྷ་ལི་ཏ་གཱི་ཧ་ནན་ཏུ་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪམ་མ་སརྦ་ཀརྨ་སིདྡྷི་ཨ་མོ་གྷ་སྭཱ་ཧཱ། ལན་གསུམ། དཔལ་ལྡན་མགོན་པོ་འཕགས་པ་རེ་མནྟ་འཁོར་དང་བཅས་པ་ལ་མཆོད་སྦྱིན་གྱི་གཏོར་མ་འདི་འབུལ་ལོ། །ཡོངས་སུ་བཞེས་ལ། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། ཁྱད་པར་དུ་བདག་གི་རྟ་རྣམས་སྲུང་ཞིང་བསྐྱབ་པ་དང་། སྡོམ་ལྷོད་གྲང་བ་འཐེང་གྲུམ་ལ་སོགས་པའི་རྟ་ནད་ཐམས་ཅད་རབ་ཏུ་ཞི་བ་དང་། ལམ་གྱི་དགྲ་དང་གློ་བུར་གྱི་དགྲ་རྐུན་ཐམས་ཅད་བཟློག་པ་དང་། གནོད་པར་བྱེད་པའི་རྟ་འདྲེ་རྟིལ་སྲི་
ཐམས་ཅད་སྐད་ཅིག་ཉིད་ལ་རྡུལ་དུ་བརླག་པ་དང་། བདག་གི་རྟ་དྲེལ་ཐམས་ཅད་འཕེལ་ཞིང་རྒྱས་ལ་ཚེ་སྲོག་བརྟན་པའི་ཕྲིན་ལས་མཛོད་ཅིག །ཧཱུྃ། ཤར་ཕྱོགས་སྐྱོང་བའི་མགོན་པོ་དཔལ་རབ་འཆང་། །ནོར་ལྷའི་རྒྱལ་པོ་འཕགས་པ་རེ་མནྟ། །གཟི་ལྡན་ཉི་མའི་སྲས་པོ་དགྲ་ལྷའི་མཆོག །སྐུ་མདོག་དམར་ནག་ཁྲོ་གཏུམ་རྔམ་པའི་སྐུ། །དབུ་ལ་ཤེལ་རྨོག་སྐུ་ལ་བསེ་ཁྲབ་གསོལ། །ཕྱག་གཡས་རྩེ་ལྔ་མདའ་དར་རལ་གྲི་ཕྱར། །ཕྱག་གཡོན་གསེར་གྱི་འཁོར་ལོ་དར་མདུང་བསྣམས། །རྫུ་འཕྲུལ་ལྡན་པའི་རྟ་སྔོན་གསེར་ཞུབ་ཅན། །ཆིབས་ནས་འཛམ་གླིང་བསྐོར་ཞིང་གཡང་སྡུད་པའི། །ལྷ་མཆོག་མགོན་པོ་ཁྱོད་ལ་བདག་བསྟོད་དོ། །ཆ་ལུགས་རང་འདྲའི་འཁོར་ཚོགས་ལྔ་བརྒྱ་ནི། །གསེར་ཁྲབ་གསོལ་ཞིང་སྔོན་པོ་ཆུ་རིས་ཆིབས། །འཛམ་གླིང་ཁྱབ་པར་རྒྱུག་ཅིང་རྟ་གཡང་སྡུད། །ཁྱུང་ཆེན་ལྡིང་ཞིང་ལྕགས་ཀྱི་བྱ་ཁྲ་འཇུམ། །སྟག་མོ་འགྲོལ་ཞིང་རྒྱུག་པས་རྟ་དྲེལ་སྲུང་། །དུང་སེང་འགྱིང་ཞིང་གཡུ་ཡི་རལ་པ་སྤྲུག །སྤྲུལ་པ་འཁོར་དང་བཅས་ལ་བདག་བསྟོད་དོ། །གཏེར་བདག་འཁོར་བཅས་རྟ་གཡང་ཀུན་བསྡུས་ལ། །བསེ་སྒྲོམ་སྨུག་
པོའི་ནང་དུ་གཡང་ཁུག་ལ། །རལ་གྲི་འཁོར་ལོ་འབར་བས་རྒྱས་ཐོབ་ཅིག །བསྡུ་ན། ཧཱུྃ། ཤར་ཕྱོགས་མགོན་པོ་དཔའ་རབ་འཆང་། །ལམ་ལྷའི་རྒྱལ་པོ་དགྲ་ལྷའི་མཆོག །ཉི་མའི་སྲས་པོ་གཟི་ལྡན་ཅན། །རེ་མནྟ་ལ་བདག་བསྟོད་དོ། །ཞེས་བསྟོད་ནས། ཐུགས་ཀར་ཉི་མའི་སྟེང་དུ་ཧཱུྃ་ཡིག་དམར་པོའི་མཐར། སྔགས་ཀྱི་བསྐོར་བར་དམིགས་ནས། ཨོཾ་བཛྲ་མ་ཧཱ་ཀྲོ་དྷ་རེ་མན་ཧ་ན་ཧ་ན་ཧཱུྃ་ཕཊ༔ ཅེས་སྙིང་པོ་དང་། ཨོཾ་ཨཱརྱ་རེ་མནྟ་སྭཱ་ཧཱ། ཞེས་ཉེ་སྙིང་ཅི་ནུས་བཟླས། དེ་ནས་རྗེས་ཆོག་སྤྱི་དང་མཐུན་པར་བྱའོ། །ཡེ་ཤེས་པ་གཤེགས་སམ་རྟེན་ལ་བསྟིམས། དམ་ཚིག་པ་རང་ལ་བསྡུ་བའམ་མི་དམིགས་པར་བསམ། ཞེས་པ་འདི་༧ རཱ་ག་ཨ་སྱས་རང་ལོ་སོ་བདུན་ཤིང་མོ་བྱའི་ལོ་ས་ག་ཟླ་བའི་ཉེར་གསུམ་གནོད་སྦྱིན་རྒྱུ་བའི་དུས་ཚེས་ལ་ལེགས་པར་བྲིས་པའོ། །འདི་ལ་འགལ་འཁྲུལ་གང་མཆིས་འཕགས་པ་ཉིད་ལ་བཤགས། །དགེ་བས་འགྲོ་བའི་རྟ་ནད་རབ་ཞི་ནས། །ཞོན་པས་མི་འཕོང་འགྲོ་བ་བདེ་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།