ཅང་ཤེས་རྟའི་ཞི་བྱེད་གླུད་རྫོངས་བྱ་ཐབས།
ཅང་ཤེས་རྟའི་ཞི་བྱེད་གླུད་རྫོངས་བྱ་ཐབས་བཞུགས་སོ། །
རྟ་ལ་གདོན་བགེགས་ཀྱིས་གནོད་འཚེ་བྱུང་ན། དེ་ལ་ཞི་བྱེད་ཀྱི་གླུད་རྫོངས་བྱ་བ་ནི། དང་པོ་ཕྱེ་ཕུད་དང་། ཆང་ཕུད་།་ཤ་གཙང་། འབྲུ་མར་སྨན་སྣ། །དར་ཟབ། །རིན་པོ་ཆེའི་རིགས། དཀར་གསུམ། མངར་གསུམ། ཟས་སྣ། ལྟོ་རྫས། བྱང་རྫ་ས་མཆོད་རྫས་ལ་སོགས་ཡོ་བྱད་རྣམས་འདུ་བགྱིས་ཏེ། རང་ཡི་དམ་གང་བྱེད་ཀྱི་མཆོད་གཏོར་གཅིག་དང་། གཞི་བདག་གཏོར་མ་གཅིག །གནོད་འཚེའི་ལྷ་སྲུང་དམིགས་གསལ་བྱུང་ན་དེའི་གཏོར་མ་གཅིག་བཅས་རྒྱུན་ལྡན་དང་སྨན་རཀ་བཅས་བཤམས། མ་འབྱོར་ན། ཕྱེ་མར་ཆང་ཕུད། མདའ་དར་བཅས་བཤམས། དེའི་མདུན་དུ་ཕྱེ་ལ། གོང་གི་འབྲུ་སྨན། དར་ཟབ། རིན་པོ་ཆེ་དང་། རྟ་ནད་པའི་སྤུ་ལ་སོགས་པ་བསྲེས་པའི་གྱི་ལིང་རྟའི་གཟུགས་བརྙན་ཡིད་དུ་འོང་བ་སྤུ་
མདོག་ནད་པ་བཞིན་ཚོན་གྱིས་ཁ་དོག་བསྒྱུར་བ། རིན་པོ་ཆེའི་སྒ་སྲབ་ལ་སོགས་པ་བརྒྱན་གྱིས་མཛེས་པ། དེའི་མཐར་གླུད་རྫས་ཀྱིས་བསྐོར་ཏེ་བཞག །ཟུར་དུ་དྲི་བཟང་ཅན་གྱི་ཤིང་སྣ་ཅི་འབྱོར་པས་བསང་དུད་སྦྱར། མཆོད་གཏོར་གླུད་རྫས་རྣམས། ཨ་མྲྀ་ཏས་བསང་། སྭ་བྷ་ཝས་སྦྱང་། ༀ་ཨཱཿཧཱུྃ་ལན་གསུམ་གྱིས་བྱིན་གྱིས་བརླབས་ཏེ། ཡི་དམ་གང་བྱེད་དང་། གཞི་བདག་བཅས་ཀྱི་གསོལ་མཆོད་རྒྱས་པའམ། གཏོར་བསྔོས་སོགས་ཀྱི་གཞུང་བསྲང་། དེའི་གླུད་དེ་ཉིད་རྟ་དངོས་སུ་བསམས་ཤིང་གླུད་རབ་དངོས་གཞི་ལ་འཇུག་པ་འདི་ལྟར་རོ། ༈ །གཞུང་དུ། རྟའི་གླུད་གཏོང་བ་ཆང་བུ་ཟེ་རྔོག་གི་སྤུ་དང་བཅས། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས་ལ་རྟའི་གླུད་འདི་ལྟར་དངོས་སུ་བསམས་ལ།
ཧཱུྃ་ལས་དཔལ་ཆེན་རྒྱལ་པོ་སྟེ། །འགྲོ་བའི་དོན་དུ་རྟག་ཏུ་བརྩོན། །ཁམས་གསུམ་འདི་ན་སུ་ཡང་རུང་། །བགེགས་སུ་གྱུར་པ་ཀུན་ཉོན་ཅིག །རྟ་ཡི་ཕ་ནི་གྱི་ལིང་ཤོག་སྒྲ་ཡིན། །མ་ནི་ངང་མེ་ཤོག་རིང་ཡིན། །དེ་གཉིས་སྲིད་ཅིང་སྤྲུལ་པ་ལ། །རྟ་ཡི་རིགས་ནི་བཞི་རུ་བྱུང་། །ཉ་དང་སྦལ་པ་འདྲ་བ་དང་། །ཤ་འདྲ་བྱ་འདྲ་དེ་དང་བཞི། །ཉ་འདྲ་དེ་ནི་རྒྱལ་པོའི་རྟ། །སྦལ་འདྲ་དེ་ནི་བཙུན་པའི་རྟ། །ཤ་འདྲ་དེ་ནི་སྐྱེ་བོའི་རྟ། །བྱ་འདྲ་དེ་ནི་དམངས་ཀྱི་རྟ། །རྟ་ཡུལ་ཀང་པོའི་ཐང་ལྗོངས་སུ། །ཀོང་པོ་བན་པ་བྱ་བ་ལ། །རྟ་ནི་མ་བརྒྱ་བུ་བརྒྱ་ཡོད། །རྟ་ལ་བཙན་གྱི་སྒྲོག་ཏུ་བཅུག །རྟ་ནད་འཚེར་ལང་གློ་འབྲས་དང་། །ལྷོག་པ་ལ་སོགས་ནད་རིགས་དང་། །འདྲེ་གདོན་གནོད་འཚེ་མ་བྱུང་བར། །བྱུང་སྟོན་ཧོར་བརྒྱ་སྤྱན་དྲངས་ནས། །རྟ་ཡི་ནད་གདོན་ཞི་བའི་ཐབས། །རྟ་ལས་ལྷག་པའི་གླུད་རྫོངས་མཛད། །རྟ་ཡི་གླུད་བཟང་ཡིད་འོང་ལ། །རིན་ཆེན་གསེར་གྱི་སྒ་གཅིག་གཏད། །གཡུ་ཡི་སྲབ་མཛེས་གཅིག་ཀྱང་བཀོད། །དར་ཚོན་སྣ་ལྔའི་མཐུར་ཞིག་བཏགས། །འབུའི་རིན་ཆེན་སྣ་ཚོགས་ཁལ་གཅིག་བཀལ། །དྲག་པོ་
བཙན་གྱི་སྤྱན་ལམ་དུ། །རྟ་སྐད་དེ་ནི་ཙེ་རེ་རེ། །ནག་པོ་བདུད་ཀྱི་སྤྱན་ལམ་དུ། །འདུར་འགྲོས་དེ་ནི་ཤིགས་སེ་ཤིག །ཡིད་འོང་གཟུགས་མཛེས་རིན་ཆེན་བརྒྱན་། །རིན་ཆེན་གཟུགས་ཆེན་ལ། །འདོད་པའི་ཆས་སུ་བཅུག །ཀོང་པོ་བན་པའི་རྟ་ཡི་གླུད། །དར་རས་ཡོན་བདག་རྟ་ཡི་གླུད། །རྟ་བོས་དགའ་བའི་གླུད་ཁྱེར་ནས་རྟ་ཡི་གདོན་བགེགས་ཞི་བར་མཛོད། །རྟ་བས་གླུད་བཟང་འདི་ནི་དགའ། །འབུལ་བ་ངེད་ཀྱིས་མི་ནོར་རོ། །བཞེས་པ་ཁྱོད་ཀྱིས་མ་འཁྲུལ་ཅིག །གནོད་འཚེ་གདུག་པའི་སེམས་ལྡན་རྣམས། །རང་གི་ལུས་ལ་དཔེ་ལོང་ལ། །གཞན་ལ་གནོད་པ་མ་བྱེད་ཅིག །ནམ་མཁའ་གང་བའི་ལྷ་འདྲེ་ལ། །ས་གཞི་གང་བའི་ཡས་འདི་འབུལ། །རིན་ཆེན་མི་ཡི་གླུད་དུ་འབུལ། །འཛིན་ཆགས་ནོར་གྱི་གླུད་དུ་འབུལ། །སྲོག་ཆགས་ཕྱུགས་ཀྱི་གླུད་དུ་འབུལ། །རྐང་བཞི་རྟ་ཡི་གླུད་དུ་འབུལ། །རྒྱུ་ནི་རྣམ་པ་བཞི་ལ་བྱས། །ཕྱེ་ཕུད་གཙང་ཞིང་ནས་ཕུད་དང་། །སྦྱར་ནི་ཆུ་དང་ཆང་ལ་སྦྱར། །ཁོང་ཆུ་གསེར་དང་གཡུ་ལ་བྱས། །ཁ་མིག་དྲུང་ལ་ཟེ་རྔོག་རྒྱས། །རྨིག་པ་ལྕགས་ལ་རྣ་བ་
གསེར། །དེ་འདྲའི་རྟ་གླུད་ལེགས་པ་འདི། །སེམས་ཀྱི་གླུད་འདི་ནམ་མཁར་འབུལ། །ནམ་མཁར་གནས་པའི་ལྷ་འདྲེ་རྣམས། །རྟ་ལ་མ་གནོད་གླུད་འདི་བཞེས། །སེམས་ཀྱི་ན་ཚ་བཟློག་ཏུ་གསོལ། །ཤ་ཡི་གླུད་འདི་ས་ལ་འབུལ། །ས་ལ་གནས་པའི་ལྷ་འདྲེ་རྣམས། །རྟ་ལ་མ་གནོད་གླུད་འདི་བཞེས། །ཤ་ཡི་ན་ཚ་བཟློག་ཏུ་གསོལ། །རུས་པའི་གླུད་འདི་རྡོ་ལ་འབུལ། །རྡོ་ལ་གནས་པའི་ལྷ་འདྲེ་རྣམས། །རྟ་ལ་མ་གནོད་གླུད་འདི་ལོངས། །རུས་པའི་ན་ཚ་བཟློག་ཏུ་གསོལ། །རྩ་ཡི་གླུད་འདི་ཤིང་ལ་འབུལ། །ཤིང་ལ་གནས་པའི་ལྷ་འདྲེ་རྣམས། །རྟ་ལ་མ་གནོད་གླུད་འདི་བཞེས། །རྩ་ཡི་ན་ཚ་བཟློག་ཏུ་གསོལ། །ལྤགས་པའི་གླུད་འདི་ཐང་ལ་འབུལ། །ཐང་ལ་གནས་པའི་ལྷ་འདྲེ་རྣམས། །རྟ་ལ་མ་གནོད་གླུད་འདི་བཞེས། །ལྤགས་པའི་ན་ཚ་བཟློག་ཏུ་གསོལ། །དྲོད་ཀྱི་གླུད་འདི་མེ་ལ་གཏོང་། །མེ་ལ་གནས་པའི་ལྷ་འདྲེ་རྣམས། །རྟ་ལ་མ་གནོད་གླུད་འདི་བཞེས། །དྲོད་ཀྱི་ན་ཚ་བཟློག་ཏུ་གསོལ། །དེ་ལྟར་གླུད་རྫོངས་འདི་ཕུལ་བས། །བདག་ཅག་མི་རྟ་བཅས་པ་ཡི། །གཞི་ལམ་བྱེས་གསུམ་ཐམས་ཅད་དུ། །ཉེས་ཚོགས་གྱུར་
པ་ཀུན་བསལ་ཏེ། །དེ་ལྟར་མཆོད་པ་བྱས་ནས། །ཡུལ་བྱེས་གང་དུ་ཡང་། །གཞི་བདག་གསོལ་མཆོད་བྱས་ན་ནི། །ཡུལ་བྱེས་གང་དུ་ཡང་། །ཉེས་པ་ཐམས་ཅད་བསལ་ནས། །བཟུང་བ་ཡོད་ན་ད་ཐོངས་ཤིག །བཅིངས་པ་ཡོད་ན་ད་ཁྲོལ་ཞིག །བསྡམས་པ་ཡོད་ན་ད་གློད་ཅིག །མནན་པ་ཡོད་ན་ད་ཐེག་ཅིག །ཅེས་བརྗོད་ནས། གླུད་དེ་རྟ་ནད་པའི་ལུས་ལ་ཕྱིན་ཁ་ལོགས་སུ་ལན་གསུམ་བསྐོར་ནས་ལམ་གསུམ་མདོར་བསྐྱལ་ལོ། །ཅང་ཤེས་རྟའི་གླུད་གཏོང་ཐབས་རྫོགས་སོ། །འཇིག་རྟེན་འདས་དང་མ་འདས་པའི། །ལྷ་ཚོགས་ཡི་དམ་སྲུང་མ་དང་། །བདག་ཅག་མི་རྟར་འགོ་བ་དང་། །སྲུང་སྐྱོབ་བྱེད་པའི་ལྷ་ཚོགས་རྣམས། །རྟ་འདི་ནད་ལས་མྱུར་གྲོལ་དང་། །བདག་གི་ཕྲིན་ལས་རྣམ་བཞི་སྒྲུབས། །གཞན་ཡང་སྟོང་གསུམ་ཉུལ་བྱེད་པའི། །ལྷ་འདྲེ་ཡིད་ཀྱི་གཟུགས་ཅན་རྣམས། །རྟ་ལ་མ་གནོད་མ་འཚེ་ཞིག །རྟ་བས་གླུད་བཟང་འདི་ཁྱེར་ལ། །རང་རང་སོ་སོའི་གནས་སུ་གཤེགས། །
ཤོག་སྟོང་།