གནམ་ཆོས་ཕྱག་རྡོར་ལུགས་པའི་མངོན་རྟོགས།
གནམ་ཆོས་ཕྱག་རྡོར་ལུགས་པའི་མངོན་རྟོགས་བཞུགས་སོ༔
གསང་བདག་མཆོག་ལ་ཕྱག་འཚལ་ལོ༔ ཕྱག་རྡོར་ལུགས་པ་སྒྲུབ་པ་ནི༔ དཀྱིལ་འཁོར་དང་ནི་གཏོར་མ་མེད༔ ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར་བྱུང་ཆུབ་མཆོག་ཏུ་སེམས་བསྐྱེད་དོ༔ རང་ཉིད་ལུགས་བདག་མདུན། སྐུ་མདོག་མཐིང་༔ ཞལ་གདངས་ལྗགས་ནི་ཤིན་ཏུ་འདྲིལ༔ མཆེ་བ་རབ་གཙིགས་དབུ་སྐྲ་འབ༔ སྤྱན་གསུམ་དུས་གསུམ་འགྲོ་ལ་གཟིགས༔ གཡས་ཞལ་དེ་ནི་ཀུནྡའི་མདོག༔ གཡོན་ཞལ་པདྨ་རཱ་གའི་མདོག༔ དབུ་ལ་ཐོད་
སྐམ་ལྔ་ཡིས་བརྒྱན༔ རུས་པའི་རྒྱན་དང་སྦྲུལ་ལ་སོགས༔ ཡིད་ལ་མི་སྡུག་པ་ཡིས་བརྒྱན༔ དུར་ཁྲོད་ཆས་ཀྱིས་རབ་ཏུ་བརྒྱན༔ གཡས་ཀྱི་དང་པོས་རྡོ་རྗེ་འཕྱར༔ སྡེ་བརྒྱད་ཐམས་ཅད་དབང་དུ་སྡུད༔ གཡོན་པས་སྡིགས་མཛུབ་རབ་ཏུ་སྒྲེངས༔ གནོད་བྱེད་དགྲ་བགེགས་གཟིར་ཞིང་གནོན༔ ཕྱག་གཡས་དེ་ནི་བར་མ་ཡིས༔ གདོན་བགེགས་སྙིང་ནི་རལ་གྲིས་གཏུབས༔ གཡོན་གྱི་བར་པས་ཞགས་པ་བསྣམས༔ རྒྱལ་བསེན་ཕོ་མོ་འཆིང་བར་བྱེད༔ གཡས་ཀྱི་འོག་མས་ཌཱ་རུ་དཀྲོལཿ རྒྱལ་བསེན་ཀླད་པ་ཆེམ་ཆེམ་དཀྲུགས༔ གཡོན་གྱི་
འོག་མས་རྩེ་གསུམ་འཛིན༔ དུག་གསུམ་དེ་ནི་སྒྲོལ་བར་བྱེདཿ ཡེ་ཤེས་མེ་ཡི་ཀློང་ན་ནི༔ ཧཱུྃ་ཧཱུྃ་ཕཊ་སྒྲ་རབ་ཏུ་སྒྲོག༔ ཞབས་བཞི་པད་ཉིའི་བླ་རུ་ནི༔ ལྷ་སྲིན་སྡེ་བརྒྱད་སྟེང་དུ་བགྲད༔ ཐུགས་ཀར་འཁོར་ལོ་ཉི་མའི་སྟེང་༔ ཧཱུྃ་ནི་ཤིན་ཏུ་ནག་པོ་ལས་འོད་ཟེར་ནག་པོ་འཕྲོས་པ་ཡིསཿ ལྕང་ལོ་ཅན་གྱི་གནས་མཆོག་ནས༔ ཕྱག་རྡོར་ལུགས་པ་སྤྱན་དྲངས་སོ༔ བདག་མདུན་བུམ་པའི་ལྷ་ལ་ཐིམ༔ ཞེས་པ་དབང་སྒྲུབ་དུས་སུ་ཡིན༔ རྒྱུན་གྱི་ཐུགས་དམ་ལ༔ བདག་ལ་སིབ་སིབ་ཐིམ་པར་གྱུར༔ ཨོཾ་ཨཱཿཧཱུྃ་བཛྲ་པཱ་ཎི་ཧཱུྃ་ཧཱུྃ་ཕཊ༔ དེ་ཡིས་ཕྱག་རྡོར་ལུགས་པ་འགྲུབ༔ ས་མ་ཡ༔ ཁ་ཐཾ༔ གུ་ཧྱ༔ ན་མ་ས༔ ཧཱུྃ༔ ཞལ་གདམས་ཐུགས་ཀར་འཁོར་ལོ་རྩིབས་དྲུག་གི་སྟེང་དུ་ཉི་མ་ལ་ཧཱུྃ་བསྒོམ༔ སྔགས་གྲངས་སྒྲུབ་པའི་གྲངས་ཚད་མེད༔ ས་མ་ཡ༔ རྒྱ་རྒྱ་རྒྱ༔ ཞེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་མེ་སྤྲེའུ་མགོ་ཟླའི་ཚེས་དྲུག་ལ་ཕྱག་རྡོར་ཁྲོ་བོ་ཕྱག་གཉིས་པ་ཞིག་གིས་དངོས་སུ་གསུངས་སོ་༈ གནམ་ཆོས་ལས་ཕྱག་རྡོར་གོས་སྔོན་ཅན་གྱི་དབང་ཡོད༔ ན་མོ་བཛྲ་པཱ་ཎི་ཡེ༔ ཕྱག་རྡོར་ལུགས་པའི་དབང་བསྐུར་ནི༔ སྟ་གོན་དབང་སྒྲུབ་སྤྱི་ལྟར་བྱ༔ གསུངས་ཕྱིར་བུམ་པ་མཆོད་གཏོར་བཤམས༔ མངོན་རྟོགས་གཅིག་གིས་བདག་མདུན་བུམ་གསུམ་བསྒྲུབ༔ བསྙེན་པ་བརྒྱ་སྟོང་ཅི་འགྲུབ་བཟླ༔
ཨདྷཾ་སོགས། ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ༔ ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི༔ ཕྱག་རྡོར་གོས་སྔོན་ཅན་ལ་ཕྱག་འཚལ་བསྟོད༔ དེ་ནས་སློབ་མ་འདུས་ནས་ཁྲུས་དང་མཎྜལ་བྱས་ལ༔ འོ་ན་ད་ལམ་ཁྱེད་རྣམས་ལ་ཕྱག་ན་རྡོ་རྗེའི་དབང་བསྐུར་བ་ཡིན་ཏེ༔ སྔོན་བསྐལ་པ་གངྒའི་ཀླུང་དགུ་བཅུ་རྩ་དགུའི་བྱེ་མ་སྙེད་འདས་པ་ན་བསྐལ་པ་གདུལ་དཀའ་བ་ཞེས་བྱ་བ་ལ༔ སངས་རྒྱས་ཡེ་ཤེས་སྒྲོལ་མ་ཆེན་པོའི་འོད་ཟེར་ཞེས་བྱ་བ་བྱོན་ཏེ༔ དེས་བྱང་ཆུབ་སེམས་དཔའ་རྡོ་རྗེ་འཛིན་གྱི་རིགས་མཐའ་ཡས་མུ་མེད་པ་ལ་ཆོས་གསུངས་སོ༔ དེ་ནས་སངས་རྒྱས་ཞལ་འཛུམ་པ་ལས་སྔོན་མ་བྱུང་བའི་འོད་ཟེར་ཁ་དོག་སྣ་ཚོགས་བྱུང་ངོ་༔ དེའི་ཚེ་རྡོ་རྗེ་འཆང་ཆེན་པོར་རྒྱལ་པོ་དབང་ཕྱུག་རྒྱལ་པོས་ཕྱག་འཚལ་ནས་དེའི་རྒྱུ་མཚན་ཞུས་པས༔ བཅོམ་ལྡན་འདས་ཀྱི་ཐུགས་ཀ་ནས་བཻཌཱུརྱ་ལྟ་བུའི་འོད་ཟེར་གྱིས་རྟེན་ཐམས་ཅད་གསལ་བའི་མེ་ལྕེ་བྱུང་སྟེ༔ འོད་ཟེར་དེའི་དབུས་ནས་གསང་བདག་ལག་ན་རྡོ་རྗེ་འཁོར་རིག་པའི་ལྷ་མོ་དང་བཅས་པ་བྱུང་ངོ་༔ དེའི་ཚེ་སངས་རྒྱས་དེས་འཁོར་
རྣམས་ལ་གསང་བདག་གི་རྒྱུད་དཔག་ཏུ་མེད་པ་གསུངས་སོ༔ དེ་ཚུན་ཆད་སངས་རྒྱས་བྱེ་བ་ཕྲག་དགུ་བཅུ་རྩ་དགུའི་དྲུང་དུ་བདུད་ཕམ་པར་བྱས་ནས་བསྟན་པ་བཟུང་ངོ་༔ དེ་རྗེས་སངས་རྒྱས་དཔག་ཏུ་མེད་པའི་བསྟན་པ་ལ་བདུད་བཏུལ་ལོ༔ འོད་སྲུང་ལ་སོགས་དང་ཤཱཀྱའི་བསྟན་པ་ལ་བདུད་མ་དུལ་བ་འདུལ་བ་དང་༔ གསང་བ་འཛིན་ཅིང་བསྐལ་བཟང་འདིའི་སངས་རྒྱས་ཐམས་ཅད་ཀྱི་བསྟན་པ་བསྲུང་ཞིང་གསང་བ་འཛིན་པ་ཡིན་ཏེ༔ སངས་རྒྱས་ཀུན་བས་སྔར་སངས་རྒྱས་ཞེས་གསུངས་པས་དང་པོའི་སངས་རྒྱས་ཉིད་ཡིན་ཀྱང་ཁྲོ་བོའི་ཚུལ་དུ་བཞུགས་པ་སྟེ༔ ད་ལྟ་ཡང་སངས་རྒྱས་བྱང་སེམས་ཐམས་ཅད་ཀྱི་སྤྲུལ་པ་ཇི་ཙམ་མཛད་པ་དེའི་གྲངས་སུ་སྤྲུལ་ནསཿ ཕྱི་བཞིན་དུ་འབྲངས་ནས་བར་ཆད་སེལ་བ་དང་༔ མ་འོངས་པ་ན་ཡང་བསྐལ་པ་བཟང་པོའི་སངས་རྒྱས་སྟོང་ཐམས་ཅད་ཀྱི་བདུད་འདུལ་ཞིང་༔ གསང་བ་འཛིན་ཅིང་རྡོ་རྗེ་རྩ་ལ་གྱིས་འགྲོ་བ་ཞེས་བྱ་བར་སངས་རྒྱས་པའི་ཚུལ་དང་༔ བསྐལ་པ་བྱེ་བ་འདས་པའི་འོག་ཏུ་འཇིག་རྟེན་གྱི་ཁམས་སྐར་མ་བཀྲམ་པ་ལྟ་བུ་ཞེས་བྱ་བ་ལ་སངས་རྒྱས་རྡོ་རྗེ་རྣམ་པར་གནོན་པ་ཞེས་བྱ་བར་འཚང་རྒྱ་བའི་ཚུལ་སྟོན་པར་
བཤད་དོ༔ རིག་པ་མཆོག་གི་རྒྱུད་ལས༔ གང་གིས་དེ་བཞིན་གཤེགས་པ་འབུམ་ཕྲག་གངྒཱའི་ཀླུང་དགུ་བཅུ་རྩ་གཉིས་ཀྱི་བྱེ་མ་སྙེད་ལ་ཕྱག་བྱས་པ་བས༔ གང་གིས་རིག་པའི་རྒྱལ་པོ་ལག་ན་རྡོ་རྗེ་ལ་ཡིད་ཀྱིས་ཕྱག་བྱས་པ་དེ་ནི་དེ་བས་བསོད་ནམས་མང་དུ་བསྐྱེད་དོ་ཞེས་གསུངས་སོ༔ དེ་ལ་ཕྱག་ན་རྡོ་རྗེ་འདི་ལ་རིགས་བརྒྱ་རྩ་བརྒྱད་ཡོད་པར་མཚན་བརྒྱ་རྩའི་བསྟོད་པ་ལས་གསལ༔ ཁྱད་པར་གནམ་ཆོས་ལས་ཕྱག་རྡོར་རིགས་བཅུ་གསུམ་བྱུང་བའི་ནང་ནས་འདི་ཕྱག་རྡོར་ལུགས་པ་ཞེས་བྱ་སྟེ༔ ཕྱག་རྡོར་གྱི་ནང་ནས་འདི་གོས་སྔོན་ཅན་གྱི་ལུགས་ཡིན༔ གོས་སྔོན་ཅན་ལ་ཡང་སྔགས་ཨུ་ཙཱརྱ་དང་༔ ནཱི་ལཾ་བཱ་ར་དྷ་ར་དང་བཛྲ་པཱ་ཎི་གསུམ་ལས་འདི་པཱ་ཎི་ཅན་ཡིན་པས་ཕྱག་རྡོར་ལུགས་པ་ཞེས་བྱ༔ འདིའི་དབང་ཐོབ་ན་ལྷ་སྲིན་སྡེ་བརྒྱད་གང་གིས་ཀྱང་ཚུགས་པར་མི་ནུས་ཏེ༔ ལོ་དུས་སུ་ཟླ་བ་ལྔ་པའི་ཚེས་གཅིག་ནས་ལྷ་འདྲེ་ཆེ་རིམ་ཐམས་ཅད་ལྷ་ཡུལ་དུ་ལྟད་མོ་བལྟར་འགྲོ༔ ཕྱིར་ལམ་རི་རབ་ཆེན་པོའི་བྱང་ཕྱོགས་ལྕང་ལོ་ཅན་དུ་རྣམ་སྲས་ཀྱི་ཕོ་བྲང་དུ་སྟོན་མོ་བྱེད༔ དེར་ཕྱག་ན་རྡོ་རྗེ་ཕེབས་ནས་ཆོས་བཤད༔ དེར་ཕྱག་རྡོར་གྱི་བཀའ་དང་དམ་ལས་འདས་པ་
རྣམས་ལྕང་ལོ་ཅན་དུ་འགྲོ་མི་ཕོད་པས་དེར་མ་ཕྱིན་ན་སྡུག་སྣང་ཆེན་པོ་ཡོད་རྒྱལ་པོའི་ཕོ་བྲང་དུའང་འགྲོ་མི་ཕོད༔ གལ་ཏེ་སོང་ཡང་གདན་བཤམས་པའི་སྟན་ཡང་མི་འཐོབ༔ ཕྱག་རྡོར་གྱི་ལས་མཁན་རྡོ་རྗེ་གནོད་སྦྱིན་གྱི་ཚོགས་རྣམས་ཀྱིས་སྤུ་གྲི་རྣོན་པོས་གདོན་དེའི་སྣ་དང་རྣ་བ་གཅོད༔ འཁོར་ལོ་རབ་ཏུ་འབར་བས་དེའི་ཀླད་པ་གཤག༔ ཕྱག་ན་རྡོ་རྗེའི་བཀའ་ཆད་ཀྱིས་ཁ་ནས་ཁྲག་སྐྱུག་ཅིང་སྙིང་ལ་མེ་འབར་ནས་ཚིག་སྟེ་ཤི་ནས་མནར་མེད་པའི་དམྱལ་བར་སྐྱེ་བར་བཤད༔ འོ་ན་དེས་ན་ལྷ་འདྲེས་བསྲུང་བའི་རྒྱུ་དམ་ཚིག་གང་ཡིན་ཞེ་ན་ཕྱག་ན་རྡོ་རྗེའི་དབང་ཐོབ་པ་དང་ལྷ་བསྒོམ་པ་དང་སྔགས་བཟླ་བ་དང་སྲུང་བ་བཏགས་པ་ལ་གནོད་པ་མི་བྱེད་པ་ཡིན་པས༔ སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པ་ཕྱག་རྡོར་གྱི་དབང་ཐོབ་པ་དང་ལྷ་བསྒོམ་པ་དང་སྔགས་བཟླ་བ་ལ་གནོད་མི་སྲིད་པ་ཡིན་ནོ༔ དེ་ལྟ་བུའི་དབང་ཞུ་བའི་ཕྱིར་སློབ་དཔོན་དང་དབང་རྫས་རྣམས་ཕྱག་ན་རྡོ་རྗེ་དངོས་ཡིན་སྙམ་པ་གྱིས་ལ་དེ་ནས་གསོལ་བ་འདེབས་པ་འདིའི་རྗེས་ཟློས་མཛོད༔ བླ་མ་དཀོན་མཆོག་གསུམ་པོ་དང་༔ ཡི་དམ་ལྷ་ཚོགས་མ་ལུས་དང་༔ ཁྱད་པར་ཕྱག་རྡོར་ལུགས་པ་ལ༔
གསོལ་བ་འདེབས་སོ་དབང་བསྐུར་སྩོལ༔ ལན་གསུམ༔ དེ་ནས་སྐྱབས་འགྲོ་སེམས་བསྐྱེད་འདིའི་རྗེས་ཟློས་མཛོད༔ དཀོན་མཆོག་གསུམ་ལ་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་དགེ་ལ་རྗེས་ཡི་རང་༔ སངས་རྒྱས་བྱང་ཆུབ་ཡིད་ཀྱིས་བཟུང་༔ སངས་རྒྱས་ཆོས་དང་ཚོགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་ནི་རབ་བསྒྲུབ་ཕྱིར༔ བྱང་ཆུབ་མཆོག་གི་སེམས་ནི་བསྐྱེད་པར་བགྱི༔ བྱང་ཆུབ་མཆོག་གི་སེམས་ནི་བསྐྱེད་བགྱིས་ནས༔ སེམས་ཅན་ཐམས་ཅད་བདག་གི་མགྲོན་དུ་གཉེརཿ བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི༔ འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག༔ གསུམ་མམ་ཚིག་རྗེས་མ་གསུམ། དེ་ནས་སློབ་མ་ལྷར་བསྐྱེད་པའི་དོན་དུ༔ སློབ་མ་ལུགས་པ་སྐུ་མདོག་མཐིང་༔ ཞལ་གདངས་ལྗགས་ནི་ཤིན་ཏུ་འདྲིལ༔ མཆེ་བ་རབ་གཙིགས་དབུ་སྐྲ་འབརཿ སྤྱན་གསུམ་དུས་གསུམ་འགྲོ་ལ་གཟིགས༔ གཡས་ཞལ་དེ་ནི་ཀུནྡའི་མདོག༔ གཡོན་ཞལ་པདྨ་རཱ་གའི་མདོག༔ དབུ་ལ་ཐོད་སྐམ་ལྔ་ཡིས་བརྒྱན༔ རུས་པའི་རྒྱན་དང་སྦྲུལ་ལ་སོགས༔ ཡིད་
ལ་མི་སྡུག་པ་ཡིས་བརྒྱན༔ དུར་ཁྲོད་ཆས་ཀྱིས་རབ་ཏུ་བརྒྱན༔ གཡས་ཀྱི་དང་པོས་རྡོ་རྗེ་ཕྱར༔ སྡེ་བརྒྱད་ཐམས་ཅད་དབང་དུ་སྡུད༔ གཡོན་པས་སྡིགས་མཛུབ་རབ་ཏུ་སྒྲེངས༔ གནོད་བྱེད་དགྲ་བགེགས་གཟིར་ཞིང་གནོན༔ ཕྱག་གཡས་དེ་ནི་བར་མ་ཡིས༔ གདོན་བགེགས་སྙིང་ནི་རལ་གྲིས་གཏུབས༔ གཡོན་གྱི་བར་པས་ཞགས་པ་བསྣམས༔ རྒྱལ་བསེན་ཕོ་མོ་འཆིང་བར་བྱེད༔ གཡས་ཀྱི་འོག་མས་ཌཱ་རུ་དཀྲོལ༔ རྒྱལ་བསེན་ཀླད་པ་ཆེམ་ཆེམ་དཀྲུགས༔ གཡོན་ཀྱི་འོག་མས་རྩེ་གསུམ་འཛིན༔ དུག་གསུམ་དེ་ནི་སྒྲོལ་བར་བྱེད༔ ཡེ་ཤེས་མེ་ཡི་ཀློང་ན་ནི༔ ཧཱུྃ་ཧཱུྃ་ཕཊ་སྒྲ་རབ་ཏུ་སྒྲོག༔ ཞབས་བཞི་པད་ཉིའི་བླ་རུ་ནི༔ ལྷ་སྲིན་སྡེ་བརྒྱད་སྟེང་དུ་བགྲད༔ ཐུགས་ཀར་འཁོར་ལོ་ཉི་མའི་སྟེང་༔ ཧཱུྃ་ནི་ཤིན་ཏུ་ནག་པོ་ལས༔ འོད་ཟེར་ནག་པོ་འཕྲོས་པ་ཡིས༔ ལྕང་ལོ་ཅན་གྱི་གནས་མཆོག་ནས༔ ཕྱག་རྡོར་ལུགས་པ་སྤྱན་དྲངས་སོ༔ ཕྱོགས་བཅུའི་ཞིང་ནས་གསང་བའི་བདག༔ གྲངས་མེད་སྤྱན་དྲངས་སློབ་མར་ཐིམ༔ ཧཱུྃ༔ ཕྱག་རྡོར་ལུགས་པའི་ལྷ་ཚོགས་མ་ལུས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་
གསོལ༔ སྐལ་ལྡན་དད་ལྡན་འདི་ལ་དབང་མཆོག་བསྐུར་ལོག་འདྲེན་ཚེ་ཡི་བར་ཆད་བསལ་དུ་གསོལ༔ ཨོཾ་ཨཱཿཧཱུྃ་བཛྲ་པཱ་ཎི་ཧཱུྃ་ཧཱུྃ་ཕཊ༔ ཨོཾ་བཛྲ་ཨ་ཝེ་ཤ་ཡ་ཨ་ཨཱཿ ཞེས་མང་དུ་བརྗོད་ཅིང་སྤོས་དང་རོལ་མོ་བྱ༔ དེ་ནས་རྡོ་རྗེ་མགོར་བཞག་ལ༔ ཏིཥྛ་བཛྲ༔ དེས་དབང་གི་གཞི་བཀོད་པ་སོང་ནས༔ དངོས་གཞིའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད༔ བླ་མ་དཀོན་མཆོག་གསུམ་པོ་དང་༔ ཡི་དམ་ལྷ་ཚོགས་མ་ལུས་དང་༔ ཁྱད་པར་ཕྱག་རྡོར་ལུགས་པ་ལ༔ གསོལ་བ་འདེབས་སོ་སྐུ་གསུང་ཐུགས༔ ཡོན་ཏན་ཕྲིན་ལས་དབང་བསྐུར་སྩོལ༔ བུམ་པའི་དབང་ནི་བུམ་པ་ཐོགས་ལཿ ད་བུམ་པ་འདི་ཉིད་ཕྱི་རིན་པོ་ཆེའི་བུམ་པ༔ ལྟོ་བ་ཡངས་པ༔ མགྲིན་པ་རིང་བ༔ མཆུ་འཕྱང་བ༔ ལྷ་རྫས་ཀྱི་དར་སྔོན་པོས་མགུལ་པ་དཀྲིས་པ༔ ནང་རིན་པོ་ཆེའི་གཞལ་ཡས་ཁང་གི་དབུས་སུ་ཕྱག་ན་རྡོ་རྗེ་བཞུགས་པའི་སྐུ་ལས་བདུད་རྩིའི་རྒྱུན་བབས༔ ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་ཞུགསཿ ལུས་ཀྱི་གནས་བཞི་གང་སྒྲིབ་པ་བཞི་དག༔ དབང་བཞི་ཐོབ༔ སྐུ་བཞི་མངོན་དུ་བྱས་པའི་སྐལ་བ་དང་ལྡན་པར་སྒོམས་ཤིག༔ ཧཱུྃ༔ བུམ་
པ་འདི་ནི་གཞལ་ཡས་ཁང་༔ འདི་ནང་ཕྱག་ན་རྡོ་རྗེ་བཞུགས༔ ཁྱོད་ཀྱི་མགོ་ལ་བཞག་པ་ཡིས༔ ཕྱག་ན་རྡོ་རྗེའི་དབང་རྫོགས་ཤོག༔ ཨོཾ་ཨཱཿཧཱུྃ༔ བཛྲ་པཱ་ཎི་ཧཱུྃ་ཧཱུྃ་ཕཊ༔ ཀུལླཱ་ཨ་ཨ་བྷི་ཥིཉྩ་མཾ༔ སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ༔ བདག་དང་གཞན་གྱི་དཔལ་གྱུར་སྙིང་རྗེ་ཅན༔ བདུད་ལས་རྣམ་རྒྱལ་ཡེ་ཤེས་ལྔ་དང་ལྡན་ཕྱག་ན་རྡོ་རྗེའི་སྐུ་ཡི་བཀྲ་ཤིས་ཤོག༔ དེས་སྐུའི་དབང་ཐོབ༔ ལུས་ཀྱི་ནད་གདོན་ཞི༔ འདིའི་སྐུ་བསྒོམ་པར་དབང་༔ མཚན་དཔེ་ལྡན་པའི་སྐུ་ཐོབ་པའི་སྐལ་བ་དང་ལྡན་ནོ༔ དེ་ནས་དུང་དཀར་ཐོགས་ལ༔ ད་མདུན་བསྐྱེད་ཀྱི་མགྲིན་པ་ནས་འོད་ཟེར་ཕྱོགས་བཅུར་འཕྲོས་པས་སངས་རྒྱས་ཐམས་ཅད་ཀྱི་གསུང་དབྱངས་ཡན་ལག་དྲུག་ཅུ་ཆོས་སྒོ་བརྒྱད་ཁྲི་བཞི་སྟོང་ཐམས་ཅད་ཀྱི་ངོ་བོ་ཡིན་པ་ལ་རྣམ་པ་དུང་དཀར་པོ་གཡས་སུ་འཁྱིལ་པ༔ ནང་གི་རྩ་རྗེས་ལ་བཀྲ་ཤིས་པའི་རྟགས་བརྒྱད་དོད་ཅིང་ཆོས་ཀྱི་སྒྲ་རང་གྲགས་སུ་སྒྲོག་པ་མང་པོ་བྱོན་ནས་ཁྱེད་རང་རྣམས་ཀྱི་མགྲིན་པར་ཐིམ་པར་སྒོམས་ཤིག༔ ཧཱུྃ༔ དུང་དཀར་འདི་ནི་གོས་སྔོན་ཅན༔ གསུང་གི་རྟགས་རྣམས་ཡོངས་སུ་རྫོགས༔ ཁྱོད་ཀྱི་མགྲིན་པར་བཞག་པ་ཡིས༔
གསུང་གི་དབང་རྣམས་ཡོངས་རྫོགས་ཤོག༔ རྩ་སྔགས་མཇུག་ཏུ༔ ཤཾ་ཁ་ལ་ཨ་བྷི་ཥིཉྩ་མཱི༔ སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ༔ བདག་དང་གཞན་གྱི་དཔལ་གྱུར་སྙིང་རྗེ་ཅན༔ བདུད་ལས་རྣམ་རྒྱལ་ཡེ་ཤེས་ལྔ་དང་ལྡན༔ ཕྱག་ན་རྡོ་རྗེའི་གསུང་གི་བཀྲ་ཤིས་ཤོག༔ དེས་ངག་གི་སྒྲིབ་པ་དག༔ གསུང་གི་དབང་ཐོབ༔ འདིའི་སྔགས་བཟླ་བར་དབང་༔ གསུང་དབྱངས་ཡན་ལག་དྲུག་ཅུ་དང་ལྡན་ནོ༔ དེ་ནས་རྡོ་རྗེ་ཐོགས་ལ༔ ད་མདུན་བསྐྱེད་ཀྱི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས་སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བཻཌཱུརྱའི་རྡོ་རྗེ་རྩེ་ལྔ་པ་དཔག་ཏུ་མེད་པ་བྱོན་ནས་ཁྱེད་རང་རྣམས་ཀྱི་སྙིང་གར་ཐིམ་པར་སྒོམས་ཤིག༔ ཧཱུྃ༔ རྡོ་རྗེ་འདི་ནི་གོས་སྔོན་ཅན༔ ཐུགས་ཀྱི་རྟགས་རྣམས་རྫོགས་པ་ཡིན༔ ཁྱོད་ཀྱི་སྙིང་གར་བཞག་པ་ཡིསཿ ཐུགས་ཀྱི་དབང་རྣམས་ཡོངས་རྫོགས་ཤོག༔ རྩ་སྔགས་མཇུག་ཏུ༔ བཛྲ་ཨ་བྷི་ཥིཉྩ་མཱི༔ སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ༔ བདག་དང་གཞན་གྱི་དཔལ་གྱུར་སྙིང་རྗེ་ཅན༔ བདུད་ལས་རྣམ་རྒྱལ་ཡེ་ཤེས་ལྔ་དང་ལྡན༔ ཕྱག་ན་རྡོ་རྗེའི་ཐུགས་ཀྱི་བཀྲ་ཤིས་
ཤོག༔ དེས་ཐུགས་ཀྱི་དབང་ཐོབ༔ སེམས་ཀྱི་སྒྲིབ་པ་དག༔ ཏིང་ངེ་འཛིན་བསྒོམ་པར་དབང་༔ ཏིང་ངེ་འཛིན་བརྒྱ་ཕྲག་དུ་མ་རྒྱུད་ལ་སྐྱེ་བའི་སྐལ་བ་དང་ལྡན་ནོ༔ དེ་ནས་སྐུ་གཟུགས་ཐོགས་ལ༔ སྐུ་གཟུགས་འདི་ནི་ཕྱག་རྡོར་དངོས་སུ་གསལ་བའི་སྐུ་ལས་འོད་ཟེར་ཕྱོགས་བཅུར་འཕྲོས་པས་སྟེང་ཕྱོགས་འོག་མིན་ལྕང་ལོ་ཅན་དང་རི་རབ་བྱང་ཕྱོགས་ལྕང་ལོ་ཅན་བྱེ་བ་ཕྲག་བརྒྱ་ནས་ཕྱག་ན་རྡོ་རྗེའི་སྐུ་ཆེ་བ་རི་རབ་ཙམ༔ ཆུང་བ་ཡུངས་འབྲུ་ཙམ་དཔག་ཏུ་མེད་པ་ཁྱེད་རང་རྣམས་ལ་ཐིམ་པར་སྒོམས་ཤིག༔ ཧཱུྃ༔ འདི་ནི་ཕྱག་རྡོར་ལུགས་པ་ཡིན༔ འདི་ཉིད་ཁྱོད་ཀྱི་མགོར་བཞག་པསཿ ཡོན་ཏན་དབང་རྣམས་ཐོབ་བར་ཤོག༔ རྩ་སྔགས་མཇུག་ཏུ༔ ཀཱ་ཡ་ཨ་བྷི་ཥིཉྩ་མཱི༔ སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ༔ བདག་དང་གཞན་གྱི་དཔལ་གྱུར་སྙིང་རྗེ་ཅན༔ བདུད་ལས་རྣམ་རྒྱལ་ཡེ་ཤེས་ལྔ་དང་ལྡན༔ ཕྱག་ན་རྡོ་རྗེའི་ཡོན་ཏན་བཀྲ་ཤིས་ཤོག༔ དེས་ཡོན་ཏན་གྱི་དབང་ཐོབ༔ བསགས་པ་ཆ་མཉམ་གྱི་སྒྲིབ་པ་དག༔ བསོད་ནམས་དང་ཡེ་ཤེས་རྒྱས༔ ཡོན་ཏན་ལྷུན་གྱིས་གྲུབ་པའི་སྐལ་བ་དང་ལྡན་ནོ༔ དེ་ནས་གཏོར་མ་ཐོགས་ལ༔ ད་གཏོར་མ་འདི་ཉིད་ཕྱག་རྡོར་
དངོས་སུ་གསལ་བའི་སྐུ་ལས་འོད་ཟེར་ཁ་དོག་དཀར་སེར་དམར་ལྗང་གི་ཚོགས་འཕྲོས༔ ཁྱེད་རང་རྣམས་ལ་ཐིམ་པས་ཕྲིན་ལས་རྣམ་བཞི་ཐོགས་མེད་དུ་འགྲུབ་པར་སྒོམས་ཤིག༔ ཧཱུྃ༔ གཏོར་མ་འདི་ནི་གོས་སྔོན་ཅན༔ ཁྱོད་ཀྱི་ལག་ཏུ་གཏད་པ་ཡིས༔ ཕྲིན་ལས་དབང་རྣམས་ཡོངས་རྫོགས་ཤོག༔ རྩ་སྔགས་མཇུག་ཏུ༔ ཤཱནཾ༔ པུཎྚི༔ ཝ་མཱ་ར་ཡ་བ་ལིཏ་ཨ་བྷི་ཥིཉྩ་མཱི༔ སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ༔ བདག་དང་གཞན་གྱི་དཔལ་གྱུར་སྙིང་རྗེ་ཅན༔ བདུད་ལས་རྣམ་རྒྱལ་ཡེ་ཤེས་ལྔ་དང་ལྡན༔ ཕྱག་ན་རྡོ་རྗེའི་ཕྲིན་ལས་བཀྲ་ཤིས་ཤོག༔ དེས་ཕྲིན་ལས་ཀྱི་དབང་ཐོབ༔ ཤེས་བྱའི་སྒྲིབ་པ་དག༔ འདིའི་ཕྲིན་ལས་གང་བརྩམས་འགྲུབ་ཅིང་བདེ་བ་ཆེན་པོའི་སྐུ་འགྲུབ་པའི་སྐལ་བ་དང་ལྡན་ནོ༔ ད་གཏོར་མ་འདི་ཉིད་གསང་བདག་ཕྱག་ན་རྡོ་རྗེ་གོས་སྔོན་ཅན་དེ་ཁྱེད་རང་གི་སྤྱི་བོར་བྱོན་པ་ཙམ་གྱིས༔ སྐུ་ལས་འོད་ཟེར་ཕྱོགས་བཅུར་འཕྲོས་ཏེ་སྟེང་ཕྱོགས་འོག་མིན་ལྕང་ལོ་ཅན་དང་༔ རི་རབ་བྱང་ཕྱོགས་ལྕང་ལོ་ཅན་བྱེ་བ་ཕྲག་བརྒྱ་ནས་གསང་བདག་ཕྱག་ན་རྡོ་རྗེའི་སྐུ་ཆེ་ཕྲ་སྣ་ཚོགས༔ གསུང་སྔགས་ཀྱི་ཕྲེང་༔ ཐུགས་
རྡོ་རྗེ་རྩེ་ལྔ་པ་དཔག་ཏུ་མེད་པ་བྱོན་ནས་ཐུགས་ཀར་ཐིམ༔ དེ་འོད་དུ་ཞུ་ནས་ཁྱེད་རང་ལ་ཐིམ་པས་དབྱེར་མེད་དུ་གྱུར་པར་སྒོམས་ཤིག༔ ཆོས་སྐུ་ཀུན་ཏུ་བཟང་པོ༔ དྲུག་པ་རྡོ་རྗེ་འཆང་ཆེན༔ གུ་རུ་པདྨ་འབྱུང་གནས༔ མཁའ་འགྲོ་ཡེ་ཤེས་མཚོ་རྒྱལ༔ ཤུད་པུ་དཔལ་གྱི་སེང་གེ༔ མི་འགྱུར་རྡོ་རྗེ་བདུད་འདུལ་རོལ་པ་རྩལ་ལ་སོགས་པའི་བརྒྱུད་པའི་བླ་མ་རྣམས་དང་༔ དེ་བཞིན་གཤེགས་པ་གང་གཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་ཀྱིས་མཐུ་སྟོབས་ཀྱི་བདག་པོར་དབང་བསྐུར་བ་གསང་བའི་བདག་པོ་ཕྱག་ན་རྡོ་རྗེ་གོས་སྔོན་པོ་ཅན་འཁོར་གོས་སྔོན་ཅན་ལྔ་བརྒྱའི་ཚོགས་དང་བཅས་པས་རྡོ་རྗེའི་སློབ་མ་འདི་རྣམས་ལ་བྱིན་གྱིས་བརླབ་པར་མཛད་དུ་གསོལ༔ སྟེང་གདོན་གཟའ་འོག་གདོན་ཀླུ༔ བར་གདོན་ལྷ་སྲིན་སྡེ་བརྒྱད་ཀྱི་གནོད་པས་མི་ཚུགས་པར་སྲུངས་ཤིག༔ གཟའ་ཀླུ་ས་བདག་གི་ནད་ཐམས་ཅད་ཞི་བར་མཛོད་ཅིག༔ བསོད་ནམས་དང་ཉམས་རྟོགས་འཕེལ་ཞིང་རྒྱས་པར་མཛོད་ཅིག༔ འཁོར་བ་དང་ངན་སོང་གི་འཇིགས་པ་ཆེན་པོ་ལས་བསྐྱབ་པར་མཛད་དུ་གསོལ༔ ཨོཾ་ཨཱཿཧཱུྃ་བཛྲ་པཱ་ཎི་ཧཱུྃ་ཧཱུྃ་ཕཊ༔ མ་ཧཱ་བ་ལིཾ་ཏ་ཀཱ་ཡ་ཝཱཀྐ་ཙིཏྟ་ཨ་དྷིཥྛ་ན་ས་མ་
ཡ་ཛཿཧཱུྃ་བཾ་ཧོ༔ དེས་ཕྱག་ན་རྡོ་རྗེ་གོས་སྔོན་ཅན་གྱི་དབང་ལེགས་པར་ཐོབ་པ་ཡིན་པས༔ འདིའི་སྔགས་ཀྱི་མགོ་ལ་འབྲུ་གསུམ་ཡོད་པས༔ ལྷ་ཁྲོ་བོ་ཡིན་ཀྱང་གོང་ནོན་གཞན་བསྙེན་པ་བྱ་མི་དགོས༔ ཨཱནམ་མཁའི་ཡི་གེ་ཡིན་པས་སུས་བཏོན་ཡང་འབྱུང་བ་མཐུན༔ ཞལ་གསུམ་ཁ་དོག་གསུམ་ཡོད་པས་སུས་འདོན་ཡང་སྨེ་བ་མི་མཐུན་པའི་སྐྱོན་མེད༔ དེའང་གོས་སྔོན་ཅན་རྡོ་རྗེ་བེ་ཅོན་གྱི་རྒྱུད་ལས༔ ཧཱུྃ༔ ང་ནི་ཁྲོ་བོ་གོས་སྔོན་ཅན༔ སངས་རྒྱས་ཐམས་ཅད་འདུས་པའི་སྐུ༔ སངས་རྒྱས་ཀུན་གྱིས་བྱིན་གྱིས་བརླབས༔ དབང་བསྐུར་མཆོག་ཐོབ་ང་ཡིས་བསྐུར༔ ཞེས་གསུངས་པས༔ ལྷ་འདི་འགྲུབ་ན་སངས་རྒྱས་ཐམས་ཅད་འགྲུབ་པ་ཡིན་ཞིང་༔ རྒྱུད་དེ་ཉིད་ལས༔ ཇི་ལྟར་བསྒྲིབས༔ དབང་བསམ་པའི་དངོས་པོ་ཀུན༔ ཁྱེད་ལས་འབྱུང་བས་མི་ཟད་གཏེརཿ སྣ་ཚོགས་ཡིད་བཞིན་འཕྲུལ་པོ་ཆེ༔ ཡིད་བཞིན་ནོར་བུ་ཁྱོད་ཕྱག་འཚལ༔ ནད་དང་རིམས་ཀྱི་གཤེད་པོ་མཛད༔ ནོར་དང་རྫས་ཀྱི་བདག་པོ་མཛད༔ འཇིགས་པ་ཀུན་ལས་བསྐྱབ་པར་མཛད༔ བླ་མེད་སྐྱོབ་མཛད་ཁྱོད་ཕྱག་འཚལ༔ ཞེས་གསུངས་པས་ཡིད་བཞིན་གྱི་ནོར་བུ་དང་
འདྲ༔ ནད་གདོན་ཉེས་སྐྱོན་ཐམས་ཅད་ཞི༔ བདེ་ལེགས་བཀྲ་ཤིས་ཐམས་ཅད་འཕེལ་ཏེ༔ རྒྱུད་ལས༔ གང་ཞིག་འདི་འཛིན་རྣལ་འབྱོར་དེ༔ ཉེས་པ་ཀུན་ལས་རབ་ཏུ་ཐརཿ ལེགས་པའི་ཡོན་ཏན་ཐམས་ཅད་ཐོབ༔ འབྲས་བུ་ཡང་དག་མངོན་པར་འགྲུབ༔ ཅེས་གསུངས་སོ༔ དེས་ན་འདི་ཡི་དམ་དུ་འཛིན་ཅིང་བསྙེན་པ་སོགས་བྱ་སྙམ་པས་འདིའི་རྗེས་ཟློས་མཛོད༔ གཙོ་བོས་ཇི་ལྟར་སོགསཿ ས་གཞི་སྤོས་ཆུས་སོགས༔ ཞེས་པ་གནམ་ཆོས་ལས་ཕྱག་རྡོར་རིགས་བཅུ་གསུམ་གཟུངས་དབང་ཡིན་མོད་ཀྱི༔ ཨོཾ་ཙུག་བྱེད་ལ་དབང་གུད་དུ་འབྱུང་བ་ཕྱག་རྡོར་གཞན་ལ་རྒྱུས་བཀབ་ཀྱང་ཆོག་པས༔ དེའི་དབང་དུ་བྱས་ནས་འདིར་ཕྱག་རྡོར་ལུགས་པའི་དབང་ལོ་རྒྱུས་སོགས་ཀྱིས་ཁ་བཀང་སྟེ་འདིའི་མངོན་རྟོགས་དང་སྔགས་འདི་ཤིན་ཏུ་ལེགས་པསཿ འདོན་ཅིང་བསྙེན་པ་བྱེད་མཁན་མང་དུ་འབྱུང་བར་སེམས་པས༔ རཱ་ག་ཨ་སྱས་བསྒྲིགས་པ་ལྟར་དགེ་སློང་བརྩོན་འགྲུས་ཀྱིས་ཡི་གེར་བྲིས་པ་ལ་ཉེས་འགལ་མཆིས་ན་བཤགས་ཤིང་དགེ་བས་གཞན་ཕན་རྒྱ་ཆེན་པོ་འབྱུང་བར་གྱུར་ཅིག༔ མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།