གནམ་ཆོས་ལས་ཕྱག་རྡོར་ཨོཾ་ཙུག་བྱེད་ཀྱི་དབང་ཆོག
གནམ་ཆོས་ལས་ཕྱག་རྡོར་ཨོཾ་ཙུག་བྱེད་ཀྱི་དབང་ཆོག་བཞུགས་སོ༔
ན་མོ་བཛྲ་པཱ་ཎི་ཡེ༔ ཨོཾ་ཙུག་བྱེད་པའི་དབང་ཆོག་ནི༔ སྟ་གོན་དབང་སྒྲུབ་སྤྱི་ལྟར་བྱ༔ གསུངས་ཕྱིར་བུམ་པ་གཏོར་མཆོད་བཤམ༔ རང་དང་མདུན་བསྐྱེད་གཏོར་མ་དང་༔ བུམ་ལྷ་ཕྱག་རྡོར་ཨོཾ་ཙུག་བྱེད༔ དྲང་སྲོང་ཆ་ལུགས་རལ་ཐོད་བཅིངསཿ ཨག་ཚོམ་དབུ་སྐྲ་དུང་ལྟར་དཀར༔ ཞབས་གཉིས་ཨོཾ་ཙུག་མཛད་ནས་ནི༔ གཡས་པས་རྡོ་རྗེ་ནམ་མཁར་གདེངས༔ བར་ཆད་ཐམས་ཅད་ཞི་བར་མཛད༔ གཡོན་པས་དྲིལ་བུ་ཐུགས་ཀར་དཀྲོལ༔ ཚེ་བསོད་དཔལ་འབྱོར་རྒྱས་པར་བྱེད༔ སྐུ་མདོག་སྔོ་སྐྱ་དར་དཀར་གྱི༔ སྨད་གཡོགས་འོག་ནས་སྟག་ཤམ་མངོན༔ པུས་མོ་
གཡོན་པ་བསླངས་པའི་སྟེང་༔ གཡས་ཀྱི་པུས་མོ་བཀལ་བའོ༔ པདྨ་ཟླ་གདན་གསལ་བར་བསྒོམ༔ ཐུགས་ཀར་ཟླ་སྟེང་ཧཱུྃ་ཡིག་མཐར༔ སྔགས་ཀྱི་གཡས་སུ་བསྐོར་བ་ལས༔ འོད་ཟེར་ཕྱོགས་བཅུར་འཕྲོས་པ་ཡིས༔ ཕྱོགས་བཅུའི་ཞིང་ནས་གསང་བའི་བདག་གྲངས་མེད་སྤྱན་དྲངས་བདག་མདུན་ཐིམ༔ བུམ་པ་བདུད་རྩིས་གང་བར་གྱུརཿ ཨོཾ་བཛྲ་པཱ་ཎི་ན་མ་ཧཱུྃ༔ ཞེས་པ་བརྒྱ་སྟོང་ཅི་འགྲུབ་བཟླ༔ ཨཧཱུྃ་སོགས། ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ༔ ལོག་འདྲེན་བགེགས་ཀྱི་ཚོགས་རྣམས་
འཇོམས་མཛད་པའི༔ ཕྱག་རྡོར་ཨོཾ་ཙུག་བྱེད་ལ་ཕྱག་འཚལ་བསྟོད༔ དེ་ནས་སློབ་མ་འདུས་ནས་ཁྲུས་དང་མཎྜལ་བྱས་ལ༔ འོ་ན་ད་ལམ་ཁྱེད་རྣམས་ལ་ཕྱག་ན་རྡོ་རྗེའི་དབང་བསྐུར་བ་ཡིན་ཏེ༔ ལྷ་འདིའི་ངོ་བོ་ནི་དང་པོའི་སངས་རྒྱས་ཀུན་ཏུ་བཟང་པོ་ཉིད་ཡིན་པསཿ སངས་རྒྱས་ཀུན་བས་སྔར་སངས་རྒྱས༔ ཞེས་གསུངས༔ དེ་ལའང་སྐུའི་རྣམ་གྲངས་མི་འདྲ་བ་བརྒྱ་རྩ་བརྒྱད་ཡོད་པར་མཚན་བརྒྱ་རྩ་བརྒྱད་ཀྱི་བསྟོད་པའི་རྒྱུད་ཚིག་ལས་གསལ༔ དེ་ལའང་སྐུ་ཞི་བ་དང་ཁྲོ་བོ་དང་ཞི་མ་ཁྲོ་གསུམ་ལས་འདི་ཞི་མ་ཁྲོ་ཡིན༔ དེའང་གནམ་ཆོས་ཐུགས་ཀྱི་གཏེར་ཁ་ལས་ཕྱག་རྡོར་རིགས་བཅུ་གསུམ་ཙམ་བྱུང་བའི་ནང་ནས་འདི་ཞབས་ཨོཾ་ཙུག་ཏུ་བཞུགས་པས་ཕྱག་རྡོར་ཨོཾ་ཙུག་ཅེས་བྱ་སྟེ༔ སྔོན་ས་སྟེང་དུ་མ་གྲགས་པ་ཞིག་ཡིན༔ དེའང་ཕྱག་ན་རྡོ་རྗེ་དྲང་སྲོང་རྐོན་པ་སྐྱེས་ཞེས་བྱ་བར་སྤྲུལ་ནས་རི་བར་ཀྱི་ནུབ་ཕྱོགས་སུ་ལོ་འབུམ་ཕྲག་གཅིག་ལ་ཏིང་ངེ་འཛིན་ལ་བཞུགས་སོ༔ དེའི་ཚེ་སངས་རྒྱས་རྣམ་གཟིགས་འཇིག་རྟེན་དུ་བྱོན་ནས་སངས་རྒྱས་པར་ཉེ་བ་ན༔ དེ་ལ་བར་དུ་གཅོད་པའི་ཕྱིར་བདུད་ཀྱི་དམག་ཚོགས་ཆེན་པོ་འདུས་ཏེ་མཚོན་ཆའི་ཆར་ཕབ་བོ༔ དེའི་ཚེ་སངས་རྒྱས་
ཀྱིས་ཆོས་གོས་བྱ་ཁྱུང་པོ་ག་པ་ལྟར་མཛད་ནས༔ ཀྱེ་དྲང་སྲོང་ཁྲོས་པའི་ཆ་བྱད་ཅན༔ བདུད་སྲིན་འདུལ་ཕྱིར་གཤེགས་སུ་གསོལ༔ ཞེས་གསུངས་མ་ཐག་ཏུ་རི་རབ་ནུབ་ཕྱོགས་ནས་དྲང་སྲོང་རྐོན་པ་སྐྱེས་དེ་ཕྱག་ན་རྡོ་རྗེ་རྩེ་དགུ་པ་འཛིན་སྐུ་ལ་བསྐལ་པའི་མེ་དཔུང་འབར་ཞིང་ནམ་མཁའ་ལ་བྱོན་ནས་བདུད་དང་སྲིན་པོའི་དམག་དེ་ཐམས་ཅད་བཟློག་པར་གྱུར་ཏེ༔ དེ་ལ་སངས་རྒྱས་དང་བྱང་ཆུབ་སེམས་དཔའ་གྲངས་མེད་པས་མཐུ་དཔུང་བསྐྱེད་ནས་སྲིད་པ་གསུམ་གྱི་བདག་པོར་བྱིན་གྱིས་བརླབས༔ དབང་རྟགས་སུ་རྡོ་རྗེ་གཏད་ནས་མཚན་ཕྱག་ན་རྡོ་རྗེར་བཏགས་སོ༔ དེའི་ཆེ་ཕྱག་ན་རྡོ་རྗེས་ཞུས་པ༔ ཀྱེ་བཅོམ་ལྡན་འདས༔ བདག་ནི་དུས་གསུམ་གྱི་སངས་རྒྱས་ཐམས་ཅད་ཀྱི་དཔང་པོར་གྱུར་པ་ལགས་ཏེ༔ སྔ་རབས་འདས་པའི་སངས་རྒྱས་བདུན་དང་༔ ད་ལྟར་བཞུགས་པའི་སངས་རྒྱས་གཅིག་དང་༔ སླད་ནས་འབྱོན་པའི་སངས་རྒྱས་དགུ་བརྒྱ་དང་དགུ་བཅུ་རྩ་གཅིག་དེ་རྣམས་མ་རྫོགས་ཀྱི་བར་དུ་བར་ཆད་ཐམས་ཅད་བསྲུང་བར་བདག་གིས་དམ་བཅའོ༔ བཅོམ་ལྡན་འདས་བདག་ནི་སྔ་རབས་འདས་པའི་སངས་རྒྱས་ཐམས་ཅད་ཀྱིས་ཀྱང་
གསུངས་ལ༔ སླད་ཀྱིས་འབྱོན་པའི་སངས་རྒྱས་ཐམས་ཅད་ཀྱིས་ཀྱང་རྗེས་སུ་གསུང་ཞིང་ད་ལྟར་བཞུགས་པའི་སངས་རྒྱས་ཐམས་ཅད་ཀྱིས་ཀྱང་གསུང་བར་བགྱིའོ༔ བཅོམ་ལྡན་འདས་ཀྱིས་ཀྱང་བདག་བྱིན་གྱིས་བརླབ་ཏུ་གསོལ༔ བཅོམ་ལྡན་འདས་ཀྱིས་བཀའ་བསྩལ་པ༔ ཕྱག་ན་རྡོ་རྗེ་ཁྱོད་ནི་སྔ་རབས་འདས་པའི་སངས་རྒྱས་ཀྱིས་ཀྱང་ཁྲོ་བོ་དང་སེམས་དཔའ་གཉིས་སུ་བྱིན་གྱིས་བརླབས་ལ༔ སླད་ནས་འབྱོན་པའི་སངས་རྒྱས་རྣམས་ཀྱིས་ཀྱང་ཁྲོ་བོ་དང་སེམས་དཔའ་གཉིས་སུ་བྱིན་གྱིས་བརླབས་ཏེ༔ ད་ལྟ་བདག་གིས་ཀྱང་བྱིན་གྱིས་བརླབས་སོ༔ ཁྱོད་ནི་འཇིག་རྟེན་དབང་ཕྱུག་ཆེན་པོ་ལ་སོགས་ལྷ་ཆེན་པོ་ཐམས་ཅད་ཀྱི་བདག་པོ་གྱིས་ཤིག༔ སེམས་ཅན་ཐམས་ཅད་འཁོར་བ་དང་ངན་སོང་གི་རྒྱ་མཚོ་ལས་སྒྲོལ་ཅིག༔ ཅེས་གསུངས་སོ༔ ཕྱག་རྡོར་འདི་དྲང་སྲོང་གི་ཆ་ལུགས་སུ་འོང་བ་ནི་དེ་ལྟར་རོ༔ འདིའི་སྔགས་ནི་ཤིན་ཏུ་ངོ་མཚར་ཆེ་སྟེ༔ ཨོཾ་ནི་སྐུ་ལྔ་ཡེ་ཤེས་ལྔ༔ བཛྲ་པཱ་ཎི་ན་མ་ནི་ཕྱག་ན་རྡོ་རྗེ་ལ་ཕྱག་འཚལ་ལོ༔ ཧཱུྃ་ནི་སྡུག་བསྔལ་ཐམས་ཅད་འཇོམས་པའི་དོན་ཏེ༔ ཕྱག་རྡོར་རིག་པ་མཆོག་གི་རྒྱུད་ལས༔ བཅོམ་ལྡན་འདས་ཀྱིས་འབྱུང་པོའི་བདག་
པོ་དབང་ལྡན་ལ་བཀའ་བསྩལ་པ༔ འབྱུང་པོའི་བདག་པོ༔ གང་གིས་དེ་བཞིན་གཤེགས་པ་འབུམ་ཕྲག་གངྒའི་ཀླུང་དགུ་བཅུ་རྩ་གཉིས་ཀྱི་བྱེ་མ་སྙེད་ལ་ཕྱག་བྱས་པ་བས༔ གང་གིས་རིག་པའི་རྒྱལ་པོ་མཆོག་ལག་ན་རྡོ་རྗེ་ལ་ཡིད་ཀྱིས་ཕྱག་བྱས་པས་དེ་ནི་དེ་བས་བསོད་ནམས་མང་དུ་སྐྱེད་དོ༔ ཞེས་གསུངས་པའི་ཕྱིར་སངས་རྒྱས་འབུམ་ཕྲག་གངྒཱའི་ཀླུང་དགུ་བཅུ་རྩ་གཉིས་ཀྱི་བྱེ་མ་སྙེད་ལ་ཕྱག་འཚལ་བས་ནི་ཕྱག་ན་རྡོ་རྗེ་ལ་སེམས་དད་པའི་སྒོ་ནས་སྔགས་འདི་ལན་གཅིག་བརྗོད་པས་བསོད་ནམས་ཆེ་བ་ཡིན་ནོ༔ འདི་ཡི་དམ་དུ་བྱས་ཏེ་རྒྱུན་དུ་བསྙེན་ན་ཕྱག་ན་རྡོ་རྗེས་དུས་རྟག་ཏུ་མགོན་སྐྱབས་བྱེད་པའི་ཕྱིར་བར་ཆད་ཐམས་ཅད་ཀྱིས་མི་ཚུགས༔ གདོན་ཐམས་ཅད་ཀྱིས་གནོད་པ་མི་འབྱུང་༔ ནད་ཐམས་ཅད་ཞི༔ བསོད་ནམས་དང་དབང་ཐང་རྒྱས༔ ཡིད་ལ་བསམ་པའི་དོན་ཐམས་ཅད་འགྲུབ་སྟེ༔ དེའི་གཞུང་ལས༔ འདི་བསྒྲུབས་ཕན་ཡོན་བསམ་མི་ཁྱབ༔ བར་ཆད་ཀུན་གྱིས་མི་ཚུགས་ཤིང་༔ ཞི་རྒྱས་དབང་དྲག་ལས་རྣམས་འགྲུབ༔ བགེགས་རྣམས་ཀུན་ཀྱང་མི་འབྱུང་ངོ༔ རྟག་ཏུ་འདི་ཡིས་མགོན་སྐྱབས་བྱེད༔ ཅེས་གསུངས་སོ༔ གདོན་
ཤས་ཆེ་བའི་གཅོང་ནད་ཅན་གྱིས་འདིའི་བསྙེན་པ་བྱས་ན་ཕན་པའང་མྱོང་བས་འགྲུབ༔ དེས་ན་སློབ་དཔོན་དབང་རྫས་རྣམས་ཕྱག་ན་རྡོ་རྗེ་དངོས་ཡིན་སྙམ་པ་གྱིས་ལཿ དེ་ནས་གསོལ་བ་འདེབས་པ་ནི་འདིའི་རྗེས་ཟློས་མཛོད༔ བླ་མ་དཀོན་མཆོག་གསུམ་པོ་དང་༔ ཡི་དམ་ལྷ་ཚོགས་མ་ལུས་དང་༔ ཁྱད་པར་ཨོཾ་ཙུག་བྱེད་པ་ལ༔ གསོལ་བ་འདེབས་སོ་དབང་བསྐུར་སྩོལ༔ ལན་གསུམ། དེ་ནས་སྐྱབས་འགྲོ་སེམས་བསྐྱེད་འདིའི་རྗེས་ཟློས་མཛོད༔ དཀོན་མཆོག་གསུམ་ལ་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་དགེ་ལ་རྗེས་ཡི་རང་༔ སངས་རྒྱས་བྱང་ཆུབ་ཡིད་ཀྱིས་བཟུང་༔ སངས་རྒྱས་ཆོས་དང་ཚོགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་ནི་རབ་བསྒྲུབ་ཕྱིར༔ བྱང་ཆུབ་མཆོག་གི་སེམས་ནི་བསྐྱེད་པར་བགྱི༔ བྱང་ཆུབ་མཆོག་གི་སེམས་ནི་བསྐྱེད་བགྱི་ནས༔ སེམས་ཅན་ཐམས་ཅད་བདག་གི་མགྲོན་དུ་གཉེརཿ བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི༔ འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག༔ གསུམ། དེ་ནས་སློབ་མ་ལྷར་བསྐྱེད་པའི་དོན་དུ༔ སློབ་མ་ཕྱག་རྡོར་ཨོཾ་ཙུག་བྱེདཿ དྲང་
སྲོང་ཆ་ལུགས་རལ་ཐོད་བཅིངས༔ ཨག་ཚོམ་དབུ་སྐྲ་དུང་ལྟར་དཀར༔ ཞབས་གཉིས་ཨོཾ་ཙུག་མཛད་ནས་ནི༔ གཡས་པས་རྡོ་རྗེ་ནམ་མཁར་གདེངས༔ བར་ཆད་ཐམས་ཅད་ཞི་བར་མཛད༔ གཡོན་པས་དྲིལ་བུ་ཐུགས་ཀར་དཀྲོལ༔ ཚེ་བསོད་དཔལ་འབྱོར་རྒྱས་པར་བྱེད༔ སྐུ་མདོག་སྔོ་སྐྱ་དར་དཀར་གྱི༔ སྨད་གཡོགས་འོག་ནས་སྟག་ཤམ་མངོན༔ པུས་མོ་གཡོན་པ་བསླངས་པའི་སྟེང་༔ གཡས་ཀྱི་པུས་མོ་བཀལ་བའོ༔ པདྨ་ཟླ་སྟེང་གསལ་བར་བསྒོམ༔ ཐུགས་ཀར་ཟླ་སྟེང་ཧཱུྃ་ཡིག་མཐར༔ སྔགས་ཀྱི་གཡས་སུ་བསྐོར་བ་ལས༔ འོད་ཟེར་ཕྱོགས་བཅུར་འཕྲོས་པ་ཡིས༔ ཕྱོགས་བཅུའི་ཞིང་ནས་གསང་བའི་བདག༔ གྲོངས་མེད་སྤྱན་དྲངས་སློབ་མར་ཐིམ༔ ཧཱུྃ༔ ཕྱག་རྡོར་ཨོཾ་ཙུག་བྱེད་ཀྱི་ལྷ་ཚོགས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ སྐལ་ལྡན་དད་ལྡན་འདི་ལ་དབང་མཆོག་བསྐུར༔ ལོག་འདྲེན་ཚེ་ཡི་བར་ཆད་བསལ་དུ་གསོལ༔ ཨོཾ་བཛྲ་པཱ་ཎི་ན་མ་ཧཱུྃ༔ ཨོཾ་བཛྲ་ཨ་ཝེ་ཤ་ཡ་ཨ་ཨཱཿ ཞེས་མང་དུ་བརྗོད་ཅིང་སྤོས་དང་རོལ་མོ་བྱ༔ དེ་ནས་རྡོ་རྗེ་མགོར་བཞག་ལ༔ ཏིཥྛ་བཛྲ༔ དེས་དབང་གི་གཞི་བཀོད་པ་
སོང་ནས་དངོས་གཞིའི་དོན་དུ་འདིའི་རྗེས་ཟློས་མཛོད༔ བླ་མ་དཀོན་མཆོག་གསུམ་པོ་དང་༔ ཡི་དམ་ལྷ་ཚོགས་མ་ལུས་དང་༔ ཁྱད་པར་ཨོཾ་ཙུག་བྱེད་པ་ལ༔ གསོལ་བ་འདེབས་སོ་སྐུ་གསུང་ཐུགས༔ ཡོན་ཏན་ཕྲིན་ལས་དབང་བསྐུར་སྩོལ༔ བུམ་པའི་དབང་ནི་བུམ་པ་ཐོགས་ལ༔ ད་བུམ་པ་འདི་ཉིད་ཕྱི་རིན་པོ་ཆེའི་བུམ་པ་ལྟོ་བ་ཡངས་པ༔ མགྲིན་པ་རིང་བ༔ མཆུ་འཕྱང་བ༔ ལྷ་རྫས་ཀྱི་དར་སྔོན་པོས་མགུལ་པ་དཀྲིས་པ༔ ནང་རིན་པོ་ཆེའི་གཞལ་ཡས་ཁང་གི་དབུས་སུ་ཕྱག་ན་རྡོ་རྗེ་བཞུགས་པའི་སྐུ་ལས་བདུད་རྩིའི་རྒྱུན་བབ༔ སྤྱི་བོ་ཚངས་པའི་བུ་ག་ནས་ཞུགས༔ ལུས་ཀྱི་གནས་བཞི་གང་༔ སྒྲིབ་པ་བཞི་དག༔ སྐུ་བཞི་མངོན་དུ་བྱེད་པའི་སྐལ་བ་དང་ལྡན་པར་སྒོམས་ཤིག༔ ཧཱུྃ༔ བུམ་པ་འདི་ནི་གཞལ་ཡས་ཁང་༔ འདི་ནང་ཨོཾ་ཙུག་བྱེད་པ་བཞུགས༔ ཁྱོད་ཀྱི་མགོ་ལ་བཞག་པ་ཡིས༔ ཨོཾ་ཙུག་བྱེད་པའི་དབང་རྫོགས་ཤོག༔ ཨོཾ་བཛྲ་པཱ་ཎི་ན་མ་ཧཱུྃ༔ ཧཱུྃ་བྷ་ཨ་བྷི་ཥིཉྩ་མཱི༔ ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ་ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི༔ ཕྱག་
རྡོར་ཨོཾ་ཙུག་སྐུ་ཡི་བཀྲ་ཤིས་ཤོག༔ དེས་སྐུའི་དབང་ཐོབ༔ ལུས་ཀྱི་ནད་གདོན་ཞི༔ འདིའི་སྐུ་བསྒོམ་པར་དབང་༔ མཚན་དཔེ་ལྡན་པའི་སྐུ་ཐོབ་པའི་སྐལ་བ་དང་ལྡན་ནོ༔ དེ་ནས་དུང་དཀར་ཐོགས་ལཿ མདུན་བསྐྱེད་ཀྱི་མགྲིན་པ་ནས་འོད་ཟེར་ཕྱོགས་བཅུར་འཕྲོས་པས༔ སངས་རྒྱས་ཐམས་ཅད་ཀྱི་གསུང་དབྱངས་ཡན་ལག་དྲུག་ཅུ་ཆོས་སྒོ་བརྒྱད་ཁྲི་བཞི་སྟོང་ཐམས་ཅད་ཀྱི་ངོ་བོ་ཡིན་པ་ལཿ རྣམ་པ་དུང་དཀར་པོ་གཡས་སུ་འཁྱིལ་པ༔ ནང་གི་རྩ་རྗེས་ལ་བཀྲ་ཤིས་པའི་རྟགས་བརྒྱད་དོད་ཅིང་ཆོས་ཀྱི་སྒྲ་རང་གྲག་ཏུ་སྒྲོག་པ་མང་པོ་བྱོན་ནས་ཁྱེད་རང་རྣམས་ཀྱི་མགྲིན་པར་ཐིམ་པར་སྒོམས་ཤིག༔ ཧཱུྃ༔ དུང་དཀར་འདི་ནི་ཨོཾ་ཙུག་བྱེད༔ གསུང་གི་རྟགས་རྣམས་ཡོངས་སུ་རྫོགས༔ ཁྱོད་ཀྱི་ན་པར་བཞག་པ་ཡིས༔ གསུང་གི་དབང་རྣམས་ཡོངས་རྫོགས་ཤོག༔ ཨོཾ་བཛྲ་པཱ་ཎི་ན་མ་ཧཱུྃ༔ ཤཾ་ཁ་ཨ་བྷི་ཥིཉྩ་མཱི༔ ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ་ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི༔ ཕྱག་རྡོར་ཨོཾ་ཙུག་གསུང་གི་བཀྲ་ཤིས་ཤོག༔ དེས་ངག་སྒྲིབ་དག༔
གསུང་དབང་ཐོབ༔ འདིའི་སྔགས་བཟླ་བར་དབང་༔ གསུང་དབྱངས་ཡན་ལག་དྲུག་ཅུ་དང་ལྡན་ནོ༔ དེ་ནས་རྡོ་རྗེ་ཐོགས་ལཿ མདུན་བསྐྱེད་ཀྱི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས་སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བཻཌཱུརྱའི་རྡོ་རྗེ་རྩེ་ལྔ་པ་དཔག་ཏུ་མེད་པ་བྱོན་ནས་ཁྱེད་རང་རྣམས་ཀྱི་སྙིང་གར་ཐིམ་པར་སྒོམས་ཤིག༔ ཧཱུྃ༔ རྡོ་རྗེ་འདི་ནི་ཨོཾ་ཙུག་བྱེད༔ ཐུགས་ཀྱི་རྟགས་རྣམས་རྫོགས་པ་ཡིན༔ ཁྱོད་ཀྱི་སྙིང་གར་བཞག་པ་ཡིསཿ ཐུགས་ཀྱི་དབང་རྣམས་ཡོངས་རྫོགས་ཤོག༔ ཨོཾ་བཛྲ་པཱ་ཎི་ན་མ་ཧཱུྃ༔ བཛྲ་ཨ་བྷི་ཥིཉྩ་མཱི༔ ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ༔ ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི༔ ཕྱག་རྡོར་ཨོཾ་ཚུག་ཐུགས་ཀྱི་བཀྲ་ཤིས་ཤོག༔ དེས་ཐུགས་ཀྱི་དབང་ཐོབ༔ སེམས་ཀྱི་སྒྲིབ་པ་དག༔ ཏིང་ངེ་འཛིན་སྒོམ་པར་དབང་༔ ཏིང་ངེ་འཛིན་བརྒྱ་ཕྲག་དུ་མ་རྒྱུད་ལ་སྐྱེ་བའི་སྐལ་བ་དང་ལྡན་ནོ༔ དེ་ནས་སྐུ་གཟུགས་ཐོགས་ལ༔ སྐུ་གཟུགས་འདི་ཕྱག་རྡོར་དངོས་སུ་གསལ་བའི་སྐུ་ལས་འོད་ཟེར་ཕྱོགས་བཅུར་འཕྲོས་པས་སྟེང་ཕྱོགས་འོག་
མིན་ལྕང་ལོ་ཅན་དང་རི་རབ་བྱང་ཕྱོགས་ལྕང་ལོ་ཅན་བྱེ་བ་ཕྲག་བརྒྱ་ནས་ཕྱག་ན་རྡོ་རྗེའི་སྐུ་ཆེ་བ་རི་རབ་ཙམ༔ ཆུང་བ་ཡུངས་དཀར་གྱི་འབྲུ་ཙམ་དཔག་ཏུ་མེད་པ་བྱོན་ནས་ཁྱེད་རང་རྣམས་ལ་ཐིམ་པར་སྒོམས་ཤིག༔ ཧཱུྃ༔ འདི་ནི་ཨོཾ་ཙུག་བྱེད་པ་སྟེ༔ ཡོན་ཏན་རྟགས་རྣམས་རྫོགས་པ་ཡིན༔ འདི་ཉིད་ཁྱོད་ཀྱི་མགོར་བཞག་པས༔ ཡོན་ཏན་དབང་རྣམས་ཐོབ་པར་ཤོག༔ ཨོཾ་བཛྲ་པཱ་ཎི་ན་མ་ཧཱུྃ༔ ཀཱ་ཡ་ཨ་བྷི་ཥིཉྩ་མཾ༔ ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ༔ ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི༔ ཕྱག་རྡོར་ཨོཾ་ཙུག་ཡོན་ཏན་བཀྲ་ཤིས་ཤོག༔ དེས་ཡོན་ཏན་གྱི་དབང་ཐོབ༔ བསགས་པ་ཆ་སྙོམས་ཀྱི་སྒྲིབ་པ་དག༔ བསོད་ནམས་དང་ཡེ་ཤེས་རྒྱས༔ ཡོན་ཏན་ལྷུན་གྱིས་གྲུབ་པའི་སྐལ་བ་དང་ལྡན་ནོ༔ དེ་ནས་གཏོར་མ་ཐོགས་ལ༔ ད་གཏོར་མ་འདི་ཉིད་ཕྱག་རྡོར་དངོས་སུ་གསལ་བའི་སྐུ་ལས་འོད་ཟེར་ཁ་དོག་དཀར་སེར་དམར་ལྗང་གི་ཚོགས་འཕྲོས༔ ཁྱེད་རང་ལ་ཐིམ་པས་ཕྲིན་ལས་རྣམ་བཞི་ཐོགས་མེད་དུ་འགྲུབ་པར་སྒོམས་ཤིག༔ ཧཱུྃ་གཏོར་མ་འདི་ནི་ཨ་
ཙུག་བྱེད༔ ཁྱོད་ཀྱི་ལག་ཏུ་གཏད་པ་ཡིསཿ ཕྲིན་ལས་དབང་རྣམས་ཡོངས་རྫོགས་ཤོག༔ ཨོཾ་བཛྲ་པཱ་ཎི་ན་མ་ཧཱུྃ༔ ཤིནྟ་པུདྡྷཾཝ་ཤཾ་མཱ་ར་ཡ་བ་ལི་ཏ་ཨ་བྷི་ཥིཉྩ་མཱི༔ ལྕང་ལོ་ཅན་གྱི་གནས་མཆོག་དམ་པ་ནས༔ གསང་སྔགས་རིག་སྔགས་ཀུན་གྱི་བདག་པོ་སྟེ༔ ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པའི༔ ཕྱག་རྡོར་ཨོཾ་ཙུག་ཕྲིན་ལས་བཀྲ་ཤིས་ཤོག༔ ད་གཏོར་མ་འདི་ཉིད་བཅོམ་ལྡན་འདས་གསང་བདག་ཕྱག་ན་རྡོ་རྗེ་སྐུ་དྲང་སྲོང་གི་ཆ་ལུགས་ཅན་དེ་ཁྱེད་རང་གི་སྤྱི་བོར་བྱོན་པ་ཙམ་གྱིས་སྐུ་ལས་འོད་ཟེར་ཕྱོགས་བཅུར་འཕྲོས་ཏེ་སྟེང་ཕྱོགས་འོག་མིན་ལྕང་ལོ་ཅན་དང་རི་རབ་བྱང་ཕྱོགས་ལྕང་ལོ་ཅན་བྱེ་བ་ཕྲག་བརྒྱ་ནས་གསང་བདག་ཕྱག་ན་རྡོ་རྗེའི་སྐུ་ཆེ་ཕྲ་སྣ་ཚོགས༔ གསུང་སྔགས་ཀྱི་ཕྲེང་བ༔ ཐུགས་རྡོ་རྗེ་རྩེ་ལྔ་པ་དཔག་ཏུ་མེད་པ་བྱོན་ནས་ཐུགས་ཀར་ཐིམ༔ དེ་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་དབྱེར་མེད་དུ་གྱུར་པར་སྒོམས་ཤིག༔ ཆོས་སྐུ་ཀུན་ཏུ་བཟང་པོ༔ དྲུག་པ་རྡོ་རྗེ་འཆང་ཆེན༔ གུ་རུ་པདྨ་འབྱུང་གནས༔ མཁའ་འགྲོ་ཡེ་ཤེས་མཚོ་རྒྱལ༔ ཤུད་པུ་དཔལ་གྱི་སེང་གེ༔ མི་འགྱུར་རྡོ་རྗེ་བདུད་འདུལ་རོལ་པ་རྩལ་ལ་
སོགས་པ་བརྒྱུད་པའི་བླ་མ་རྣམས་དང་༔ དེ་བཞིན་གཤེགས་པ་གངྒའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་ཀྱི་མཐུ་སྟོབས་ཀྱི་བདག་པོར་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ་དྲང་སྲོང་གི་ཆ་ལུགས་སུ་བཞུགས་པ་ཨོཾ་ཙུག་བྱེད་འཁོར་བདེན་ཚིག་གྲུབ་པའི་དྲང་སྲོང་བྱེ་བ་འབུམ་དང་བཅས་པས་རྡོ་རྗེའི་སློབ་མ་འདི་རྣམས་ལ་བྱིན་གྱིས་བརླབ་པར་མཛད་དུ་གསོལ༔ སྟེང་གདོན་གཟ༢༔ འོག་གདོན་བར་གདོན་ལྷ་སྲིན་སྡེ་བརྒྱད་ཀྱི་གནོད་པས་མི་ཚུགས་པར་སྲུངས་ཤིག༔ གཟའ་ཀླུ་ས་བདག་གི་ནད་ཐམས་ཅད་ཞི་བར་མཛོད་ཅིག༔ བསོད་ནམས་དང་ཉམས་རྟོགས་འཕེལ་ཞིང་རྒྱས་པར་མཛོད་ཅིག༔ འཁོར་བ་དང་ངན་སོང་གི་འཇིགས་པ་ཐམས་ཅད་ལས་བསྐྱབ་པར་མཛད་དུ་གསོལ༔ ཨོཾ་བཛྲ་པཱ་ཎི་ན་མ་ཧཱུྃ༔ མ་ཧཱ་བ་ལིཾ་ཏ་ཀཱ་ཡ་ཝཱཀ་ཙིཏྟ་ཨ་དྷིཥྛན་ས་མ་ཡེ་ཛཿཧཱུྃ་བཾ་ཧོ༔ དེས་དབང་ལེགས་པར་ཐོབ་པ་ཡིན་པས་འདི་ཡི་དམ་དུ་བཟུང་བར་མཛོད༔ དེ་ནས་རྗེས་ཟློས་མཛོད༔ གཙོ་བོས་ཇི་ལྟར་སོགས། ས་མ་ཡ༔ རྒྱ་རྒྱ་རྒྱ༔ ཞེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་པ་མེ་སྤྲེའུ་ཁྲུམས་ཟླ་བའི་ཉེར་གསུམ་ནུབ་ཨུ་རྒྱན་རིན་པོ་
ཆེ་སྤྲུལ་སྐུའི་ཆ་ལུགས་ཅན་ཞིག་གིས་འདིའི་སྒྲུབ་ཐབས་ལས་ཚོགས་དང་བཅས་པ་དངོས་སུ་གསུངས༔ དེའི་ཕྱིར་ནུབ་ཕྱག་རྡོར་ཁྲོ་བོའི་ཆ་ལུགས་ཅན་ཞིག་གིས་འདིའི་དབང་ཆོག་དངོས་སུ་གསུངས་པ་ཡིན་ནོ༔ དེ་ལྟར་བརྒྱུད་པ་ཉེ་ཞིང་བྱིན་རླབས་ཀྱི་སོ་མ་ཉམས་པའི་དབང་ཐོབ་པའི་གཏང་རག་ཏུ་མཎྜལ་འབུལ༔ ས་གཞི་སྤོས་ཆུས་སོགས། འདི་སྒྲུབ་ཐབས་ལས་ཚོགས་དང་བཅས་པ་དབང་རྣམས་སོ་སོར་ཡོད་པ་གསར་བུ་རྣམས་ལ་ཕན་པའི་ཕྱིར་ལོ་རྒྱུས་སོགས་ཀྱིས་བརྒྱན་ཏེ་གཏེར་བློན་རཱ་ག་ཨ་སྱས་བསྒྲིགས་པ་ལ་ཉེས་འགལ་མཆིས་ན་ལྷ་ལ་བཤགས་ཤིང་༔ ཆོས་ལྡན་གྱི་སྐྱེ་འགྲོ་དཔག་ཏུ་མེད་པའི་བར་ཆད་སེལ་བར་གྱུར་ཅིག༔ འདི་ཁྲོམ་དབང་དུ་བྱེད་ན་དབང་རྫས་དུང་ཆོས་བུམ་པའི་ཁར་བཞག༔ རྡོ་རྗེ་ནི་གཟུངས་ཐག་རྡོ་རྗེས་ཆོག་སྟེ༔ དེ་གསུམ་ལན་གཅིག་འགྲིམ༔ སྐུ་གཟུགས་གཏོར་མ་ལ་བཙུགས་ཏེ་ལན་གཉིས་འགྲིམས་པས་འཐུས༔ དབང་འགྲིམ་ཚེ་སྔགས་དེ་ཁྲོམ་ལ་འུར་འདོན་བཅུག་ན་རང་གཞན་ཀུན་གྱིས་སྲུང་བའི་མཆོག༔ ཅེས་པ་ཡི་གེ་པ་ནི་གླིང་གི་དགེ་སློང་སྦྱིན་པ་པདྨ་དད་པས་བྲིས༔ དམིགས་པ་བསྒོམ་ཞིང་སྔགས་བཟླ་བར་རང་གིས་ཆོག་ལ༔ ཡི་དམ་བྱེད་ན་དབང་སྒྲུབ་ཀྱི་ཚིགས་བཅད་དེ་ཚིག་ཅུང་ཟད་བསྒྱུར་ཤེས་པར་བྱའོ༔ ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོའི་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།