བདུད་རྩི་སྨན་གྱི་སྐོར། གཡུ་ཐོག་བླ་སྒྲུབ་གསོལ་འདེབས།
ན་མོ་གུ་རུ་བྷེ་ཥ་ཛཱི་ཡེ། །འདི་ནས་ཤར་གྱི་ཕྱོགས་རོལ་ན། །བཻཌཱུརླ་སྣང་ཞིང་ཁམས་ན། །བཞུགས་པའི་བཅོམ་ལྡན་སྨན་གྱི་བླ། །གསོལ་བ་འདེབས་སོ་ཐུགས་རྗེས་གཟིགས། །ལྟ་ན་སྡུག་གི་ཕོ་བྲང་ན། །ཤཱཀ་ཐུབ་བཅོམ་ལྡན་སྨན་གྱི་བླ། །རིག་པའི་ཡེ་ཤེས་ཡིད་ལས་སྐྱེས། །གསོལ་བ་འདེབས་སོ་ཐུགས་རྗེས་གཟིགས། །པདྨ་འོད་ཀྱི་ཞིང་ཁམས་ན། །ཨོ་རྒྱན་གུ་རུ་སྨན་གྱི་བླ། །སྡུག་བསྔལ་ནད་སེལ་རིག་འཛིན་འབུམ། །གསོལ་བ་འདེབས་སོ་ཐུགས་རྗེས་གཟིགས། །མཁའ་སྤྱོད་ཌཱཀིའི་ཞིང་ཁམས་ན། །འཇའ་ལུས་མཁའ་སྤྱོད་དཔལ་ལྡན་ཕྲེང་། །བདུད་རྩི་སྨན་གྱི་ལྷ་མོའི་ཚོགས། །གསོལ་བ་འདེབས་སོ་ཐུགས་རྗེས་གཟིགས། །གངས་ཅན་བོད་ཀྱི་ཞིང་ཁམས་ན། །སྤྱན་རས་གཟིགས་དང་དབྱེར་མེད་པའི། །གཡུ་ཐོག་མགོན་པོ་སྨན་གྱི་བླ། །གསོལ་བ་འདེབས་སོ་ཐུགས་རྗེས་གཟིགས། །བདུད་རྩི་སྨན་གྱི་རིག་འཛིན་མཆོག །གསོ་རིག་བསྟན་པ་རྒྱས་མཛད་པ། །ཟུར་མཁར་ཆོས་རྗེ་གོང་འོག་ལ། །གསོལ་བ་འདེབས་སོ་ཐུགས་རྗེས་གཟིགས། །བླ་མ་སྨན་རྒྱལ་རིགས་ལྔ་དང་། །ཡི་དམ་རྟ་ཕག་གཙོ་
དང་འཁོར། །ཆོས་སྐྱོང་དམ་ཅན་སྡེ་དགུ་ལ། །གསོལ་བ་འདེབས་སོ་དངོས་གྲུབ་སྩོལ། །བདག་དང་བདག་ལ་འབྲེལ་ཐོགས་རྣམས། །ཚེ་རབས་འཁོར་བ་ཐོག་མེད་ནས། །ཚེ་ཐུང་ནད་མང་ངན་སོང་རྒྱུ། །སྡིག་སྒྲིབ་ཐམས་ཅད་མཐོལ་ལོ་བཤགས། །གསོ་རིག་ཡེ་ཤེས་ཐུགས་རྗེ་ཡིས། །མ་རིག་དུག་ལྔའི་སེམས་ཅན་རྣམས། །ཉོན་མོངས་ནད་ལས་གྲོལ་མཛད་པའི། །རྣམ་དག་མཛད་ལ་རྗེས་ཡི་རང་། །མ་རིག་བག་ཆགས་ནད་ཀྱི་རྒྱུ། །ལས་འབྲས་ཉོན་མོངས་རྐྱེན་གྱི་ནད། །གྲོལ་མཛད་བདུད་རྩིའི་གསོ་རིག་གི །ཆོས་འཁོར་དམ་པ་བསྐོར་བར་བསྐུལ། །སྐྱེ་རྒ་ན་འཆིའི་རྦ་རླབས་འཁྲུགས། །འཁོར་བའི་རྒྱ་མཚོ་གཏིང་ཟབ་ལས། །སྡུག་བསྔལ་སེམས་ཅན་མ་གྲོལ་བར། །མྱ་ངན་མི་འདའ་བཞུགས་པར་གསོལ། །དགེ་དེས་བདག་སོགས་སེམས་ཅན་རྣམས། །ཉོན་མོངས་ནད་ཀྱིས་ཐེབས་པ་ལ། །ཡེ་ཤེས་བདུད་རྩི་སྨན་མཆོག་གིས། །ཐར་མེད་ངན་སོང་བཟོད་དཀའ་བའི། །ཟུག་རྔུའི་གདུང་བ་ཀུན་བསལ་ནས། །བླ་མེད་རྫོགས་སངས་རྒྱས་པ་ཡི། །གེགས་མེད་འཚོ་བའི་ཕྱིར་བསྔོའོ། །སྨོན་ལམ་བདེན་ཚིག་ངེས་འགྲུབ་
ཤོག །བདེར་གཤེགས་སྨན་ལྷ་མཆེད་བདུན་གཅིག་བསྡུས་པ། །སྨན་རྒྱལ་གཡུ་ཐོག་ཡོན་ཏན་མགོན་པོ་ལ། །གསོལ་བ་འདེབས་སོ་ལུས་ཀྱི་ནད་ཀུན་སོལ། །སེམས་ལ་བདེ་སྟོང་འཆར་བར་བྱིན་གྱིས་རློབས། །ཞེས་པ་འདི་ཡང་བླ་སྒྲུབ་ཞག་བདུན་དུས། །རྟགས་མཚན་མྱུར་དུ་བྱུང་ནས་སྨྲས་པ་ཡིན། །བླ་མ་གཞན་ལ་ཟླ་གཅིག་གསོལ་འདེབས་པས། །གཡུ་ཐོག་པ་ལ་ཞག་གཅིག་ལྷག་པ་དང་། །འདི་ཉིད་སྒྲུབ་པ་འགྲུབ་པ་དུས་མཉམ་སྟེ། །དེ་མ་བདེན་ན་ཕྱོགས་བཅུའི་སངས་རྒྱས་ཀྱིས། །ཁོང་གི་དབུ་ཁོས་གཡུ་ཐོག་པ་ཡིས་གསུངས། །དེ་ཉིད་ཨེ་བདེན་ཚད་དུས་བྱས་ནས་བསྒྲུབས། །རྟགས་མཚན་མྱུར་བས་ཡིད་ཆེས་དད་པ་སྐྱེས། །འདི་ནི་རཱ་ག་ཨ་སྱའི་མྱོང་བ་ཡིན།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།