སངས་རྒྱས་སྨན་ལྷ་དངོས་སུ་མཇལ་བའི་སྨོན་ལམ་མཐོང་གྲོལ་ཆེན་མོ།
སངས་རྒྱས་སྨན་ལྷ་དངོས་སུ་མཇལ་བའི་སྨོན་ལམ་མཐོང་གྲོལ་ཆེན་པོ་བཞུགས་སོ། །ན་མོ་མ་ཧཱ་བྷེ་ཥ་ཛྷེ། བཅོམ་ལྡན་རྒྱལ་བ་བཻཌཱུརླ་ཡི་མདོག༔ མཚན་དཔེས་རབ་བརྒྱན་ཆོས་གོས་། གསུམ་གྱིས་བཀླུབས༔ པད་ཟླའི་གདན་ལ་རྡོ་རྗེ་སྐྱིལ་ཀྲུང་བཞུགས༔ རྣམ་རྒྱལ་ལྷུང་བཟེད་འཛིན་ལ་ཕྱག་འཚལ་ལོ༔ གང་ཞིག་སེར་སྣའི་ལས་ཀྱིས་བཅིངས་བ་ལས༔ ཡི་དྭགས་གནས་སུ་བསྐལ་པར་གནས་གྱུར་ན༔ གང་ཞིག་ཁྱེད་ཀྱི་མཚན་ཙམ་ཐོས་པ་ཡིས༔ བཀྲེས་སྐོམ་གནས་ནས་ཐར་མཛད་རྒྱལ་ལ་བསྟོད༔ ལོག་ལྟའི་དབང་གིས་དམྱལ་བར་ལྟུང་གྱུར་ན༔ ཁྱེད་ཀྱི་མཚན་ཙམ་ཐོས་པའི་བསོད་ནམས་ཀྱིསཿ མི་སྐྱེ་ཡང་དག་ལྟ་བ་འཛིན་པར་གྱུར༔ ཡང་དག་ལམ་སྟོན་སྨན་གྱི་ལྷ་ལ་བསྟོད༔ ཕྲག་དོག་ཞེ་སྡང་དབང་གིས་དུད་འགྲོའི་ལུས༔ ཤིན་ཏུ་མནར་མེད་སྐྱེས་ན་སྡུག་བསྔལ་བས༔ ཁྱེད་ཀྱི་མཚན་ཐོས་དབང་རྣོ་མཁས་པར་སྐྱེ༔ མ་རིག་མུན་སེལ་སྨན་གྱི་ལྷ་ལ་བསྟོད༔ གཞན་གྱི་ཕྲག་དོག་དབང་གིས་རིག་སྔགས་དང༔ བྱད་སྟེམས་སྦྱོར་བས་སྲོག་དང་བྲལ་གྱུར་ལས༔ ཁྱེད་ཀྱི་མཚན་ཐོས་ཙམ་ལས་གནོད་མི་ནུས༔ བདུད་འཇོམས་རྒྱལ་པོ་ཁྱོད་ལ་ཕྱག་འཚལ་
བསྟོད༔ ཚུལ་ཁྲིམས་འཆལ་བས་ཁྱེད་ཀྱི་མཚན་ཐོས་ན༔ བདེ་བ་ཅན་སོགས་གང་དུ་སྨོན་པ་ཡི༔ དག་པའི་ཞིང་དུ་བརྫུས་ཏེ་སྐྱེ་གྱུར་པའི༔ ཐར་པའི་ལམ་སྟོན་ཁྱེད་ལ་ཕྱག་འཚལ་བསྟོད༔ མགོན་མེད་དབུལ་ཕོངས་ནད་ཀྱིས་ཐེབས་པ་ལ༔ ཁྱེད་ཀྱི་མཚན་ཐོས་ནད་རྣམས་རབ་ཏུ་ཞི༔ མགོན་མེད་མགོན་གྱུར་བཅོམ་ལྡན་བེཌཱུརྱ༔ སྨན་པའི་རྒྱལ་པོ་ཁྱེད་ལ་ཕྱག་འཚལ་བསྟོད༔ བཅོམ་ལྡན་ཁྱེད་ལ་བསྟོད་པའི་བསོད་ནམས་ཀྱིས༔ བདག་ཅག་སློབ་དཔོན་འཁོར་དང་བཅས་པ་ཡི༔ འདུ་བ་རྣམ་བཞིའི་ནད་རྣམས་ཞི་བ་དང་༔ རྒྱལ་པོ་ལ་སོགས་འཇིགས་པ་ཀུན་ལས་ཐར༔ དགོས་འདོད་ཐམས་ཅད་འབད་མེད་ལྷུན་གྲུབ་ཅིང་༔ ནམ་ཞིག་འཕོས་ཚེ་བྱང་ཆུབ་སེམས་དཔའ་བརྒྱད༔ རྫུ་འཕྲུལ་སྟོབས་ཀྱིས་མཁའ་ལ་བྱོན་ནས་ནི༔ ནུབ་ཕྱོགས་བདེ་བ་ཅན་དུ་ལམ་བསྟན་ཅིང་༔ པདྨའི་མཆོག་ལ་རྫུས་ཏེ་སྐྱེས་ནས་ཀྱང་༔ ཚེ་དཔག་མེད་པ་མཆོད་པས་མཉེས་པར་ཤོག༔ ཉིན་རེ་དུས་གསུམ་ཁྱེད་ལ་གསོལ་བཏབ་ན༔ སྡིག་ཆེན་ཤན་པ་ཡིན་ཀྱང་མཐོ་རིས་བགྲོད༔ བདེ་བ་ཅན་ཏུ་རྫུས་ཏེ་སྐྱེ་བར་ཤོག༔ ས་གླང་ལོ་མཆུ་ཟླའི་ཡར་ཚེས་ལྔ་ཡི་ནུབ་མོ། རྨི་ལམ་དུ་སངས་རྒྱས་སྨན་བླ་
དངོས་སུ་མཇལ་སྣང་བྱུང་སྟེ་སྐུ་ནི་ཇི་ལྟར་འདུག་ཡིད་ལ་གསལ་བར་མ་ཟིན་ཀྱང་། དད་པའི་དབང་གིས་སྐུ་ལས་འོད་ཟེར་འཕྲོས་པས། ཏིང་འཛིན་གྱི་དབང་བཞི་གསལ་བར་བླངས་བར་རྨིས་པས་སྨོན་ལམ་མཐོང་གྲོལ་བདེ་ཆེན་འདི། ༧ རཱ་ག་ཨ་སྱས་སྦྱར་བའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒོང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།