རྒྱུད་བཞིའི་བཀའ་སྲུང་ཞང་བློན་གསོལ་མཆོད།
རྒྱུད་བཞིའི་བཀའ་སྲུང་ཞང་བློན་གསོལ་མཆོད་བཞུགས། རྒྱུད་བཞིའི་བཀང་སྲུང་ཞང་བློན་མཆོད་ཅིང་བསྙེན་ན་བདག་བསྐྱེད་མ་བསྡུས་གོང་དེར༔ རབ་གཏོར་མ་ཟུར་གསུམ་མར་རྒྱན་རིན་པོ་ཆེའི་དབྱིབས་ཅན་ཤ་གཙང་མས་བརྒྱན༔ མེད་ན་ཟངས་སྡེར་ནང་དུ་འབྲུ་སྣའམ་ཕྱེ་མར་རམ༔ ཤ་གཙང་མའམ༔ མར་རམ་ཐུད་དུམ་བུ་བྲན༔ མེད་ན་ཇ་ཕུད་བཤམ་ཡང་རུང་སྟེ༔ མཆོད་པ་གཅིག་ནི་ངེས་པར་དགོས་སོ༔ མདུན་དུ་རྡོ་རྗེ་བདུད་འདུལ་ནི༔ སྐུ་མདོག་ནག་པོ་ཞལ་གཅིག་པ༔ ཕྱག་གཉིས་སྐུ་ལ་བེར་ནག་གསོལ༔ གཡས་གཡོན་བེང་དང་ལྕགས་པར་བསྣམས༔ ཞབས་གཉིས་ཕྱེད་པའི་སྐྱིལ་མོས་བཞུགས༔ ཧཱུྃ༔ འོག་མིན་དུར་ཁྲོད་ཆེན་པོ་དང་༔ རྩུབ་འགྱུར་ཚལ་དང་བསིལ་བའི་ཚལ༔ དུར་ཁྲོད་བརྒྱད་དང་ཉེར་བཞིའི་གནས༔ གཙུག་ལག་ཆོས་འཁོར་བཞུགས་གནས་ནསཿ ཞང་བློན་འཁོར་བཅས་སྤྱན་འདྲེན་ནོ༔ གཙོ་འཁོར་འཚམས་པའི་གདན་ལ་བཞུགས༔ ཕྱི་ནང་གསང་བའི་མཆོད་སྤྲིན་དང་༔ རང་རང་མཐུན་པའི་རྫས་ཀྱིས་བསྐང་༔ སྨན་རཀ་གཏོར་མ་འབུལ་གྱིས་བཞེས༔ ཨོཾ་མ་ཧཱ་ཀཱ་ལ་ཙིཏྟ་རཱ་ག་རཱ་ག་ཧཱུྃ་ཕཊ༔ ས་པ་རི་ཝཱ་ར་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཧཱུྃ༔ སྔོན་ཚེ་རྒྱལ་བའི་སྤྱན་སྔ་རུ༔ ཁས་
བླངས་སངས་རྒྱས་བསྟན་པ་སྲུངསཿ མཐུ་སྟོབས་ནམ་མཁའི་མཐའ་དང་མཉམ༔ ཞིང་བློན་འཁོར་བཅས་བདག་གིས་བསྟོད༔ དམ་རྫས་བརྒྱན་པའི་གཏོར་མ་བཞེས༔ ཕྲིན་ལས་རྣམ་བཞི་འགྲུབ་པ་དང་༔ གང་བཅོལ་ལས་རྣམས་འགྲུབ་པར་མཛོད༔ ཅེས་གནམ་ཆོས་ཀྱི་ལས་བྱང་དང་རྒྱས་པར་འདོད་ན་སྔར་གྱི་བསྟོད་རྙིང་འདིས་བསྟོད༔ ཧཱུྃ༔ གོས་སྔོན་འཆང་བ་ལག་ན་རྡོ་རྗེའི་སྲས༔ གཏེར་བདག་བྱེ་བའི་ཅོད་པན་གྱིས་བཏུད་པ༔ ཞང་བློན་བེར་ཆེན་རྡོ་རྗེ་བདུད་འདུལ་ཏེ༔ གནོད་སྦྱིན་ནག་པོ་ཁྲག་རལ་ཅན་ཞེས་བྱ༔ འཇིག་རྟེན་འཇིག་རྟེན་འདས་པའི་ལས་རྣམས་ཀུན༔ ཐོགས་མེད་སྒྲུབ་ལ་རྫུ་འཕྲུལ་མཛད་པའི་སྐུ༔ དུས་མཐའི་ཆར་སྤྲིན་འཁྲིགས་འདྲ་ཆེར་གནག་ཅིང་༔ ཐུང་ཞིང་སྦོམ་ལ་ཡན་ལག་་རགས་པ་ཅན༔ ཁྲོས་པའི་མིག་དམར་མཆེ་གཙིགས་གད་རྒྱངས་ཅན༔ སྨིན་མ་ཨག་ཚོམ་དམར་སེར་འབར་ལ་འཁྲུགས༔ སྒྲུབ་པའི་རེ་སྐོང་ཡིད་བཞིན་ནོར་བུ་དང་༔ ལུས་ཅན་ནད་འཇོམས་བདུད་རྩིའི་བུམ་པ་འཛིན༔ སྲོག་ཞུ་རིན་ཆེན་རྒྱུན་དང་ཟ་འོག་བེར༔ གསེར་སྐྱེད་སག་ལྷམ་གསོལ་ནས་འདོར་སྟབས་ཀྱིས༔ སྲིན་མོ་རྡོ་རྗེ་ཀུན་འགྲུབ་མར་
བཅས་ནས༔ ས་གསུམ་རྣམ་པར་གནོན་ལ་ཕྱག་འཚལ་བསྟོད༔ དམ་རྫས་བརྒྱན་པའི་མཆོད་གཏོར་འདི་བཞེས་ལ༔ བདག་གི་འདོད་པའི་དོན་ཀུན་འགྲུབ་པར་མཛོད༔ ཅེས་བསྟོད་ནས། རང་སྨན་བླར་གསལ་བའི་ཐུགས་ཀ་ནས་འོད་ཟེར་འཕྲོས་པས༔ མདུན་གྱི་མགོན་པོའི་ཐུགས་ཀར་ཉི་མའི་སྟེང་དུ་ཧཱུྃ་མཐིང་ནག་སྔགས་ཀྱི་གཡས་སུ་བསྐོར་བ་ལ་ཕོག་པས༔ སྔགས་གཡས་སུ་དྲག་ཏུ་འཁོར་བས་ཐུགས་རྒྱུད་བསྐུལ༔ དེ་ལས་འོད་ཟེར་ཕྱོགས་བཅུར་འཕྲོས་པས༔ རང་བཞིན་གྱི་གནས་དང་བྱང་ཕྱོགས་ལྕང་ལོ་ཐོ་ཅན་ནས་ཞང་བློན་དཔག་ཏུ་མེད་པ་སྤྱན་དྲངས་ནས་མདུན་བསྐྱེད་ལ་ཐིམ་པར་བསྒོམ་པ་ནི་བསྙེན་པ་དང་འབོད་པ། སླར་རང་གི་ཞལ་ནས་འོད་ཟེར་འཕྲོས་ཞང་བློན་གྱི་ཞལ་དུ་ཞུགས་པས་མཆོད་པར་གྱུར་ནས་ཐུགས་མཉེས༔ ཐུགས་ཀའི་སྔགས་ཕྲེང་ལ་ཐིམ་པས་ཐུགས་རྒྱུད་བསྐུལ་ཏེ༔ དེ་ལས་འོད་ཟེར་ཕྱོགས་ཐམས་ཅད་དུ་འཕྲོས་པས་འཇིག་རྟེན་ཁམས་ཀྱི་དངོས་གྲུབ་ཐམས་ཅད་དང་༔ ལྷ་སྲིན་སྡེ་བརྒྱད་ཀྱི་མཐུ་སྟོབས་ནུས་པ་ཐམས་ཅད་འོད་ཁ་དོག་སྣ་ཚོགས་ཀྱི་རྣམ་པར་ཞང་བློན་ལ་ཐིམ༔ ཞང་བློན་གྱི་བྱིན་རླབས་དངོས་གྲུབ་མཐུ་སྟོབས་
ཐམས་ཅད་འོད་ལྔའི་རྣམ་པར་ཐུགས་ཀ་ནས་ཚུར་བྱུང་རང་ལ་ཐིམ་པས༔ མཐུ་སྟོབས་གཟི་བརྗིད་རྒྱས་པར་བསྒོམ་པ་ནི་སྒྲུབ་པ་སྟེ༔ ཨོཾ་མ་ཧཱ་ཀ་ལ་ཙིཏྟ་རཱ་ག་རཱ་ག་ཧཱུྃ་ཕཊ༔ ཅེས་པ་གནམ་ཆོས་ལུགས་ཀྱི་སྙིང་པོ་དང་༔ ཨོཾ་བཛྲ་རཏྣ་ཙིཏྟ་རཱ་ག་རུ་གེ་ཧཱུྃ་ཕཊ་སྭཱ་ཧི༔ ཞེས་བཀའ་མའི་ལུགས་ཏེ༔ སྔགས་གང་འདོད་ལ་བསྙེན་པ་ཅི་ནུས་བྱའོ༔ མཚམས་ཡིན་ན་ལས་བྱང་སོགས་ཐུན་བཞིར་བྱའོ༔ དེ་ནས་ལས་སྦྱོར་གང་འདོད་བྱ་བ་ནི༔ ཞང་བློན་སྐད་ཅིག་ལ་སྐུ་མདོག་སེར་པོ་གསེར་བཙོ་མ་ལྟ་བུར་གྱུར་ཅིང་སྐུ་ལ་རིན་པོ་ཆེ་སྣ་ཚོགས་ཀྱིས་བརྒྱན་པའི་ཐུགས་ཀ་ནས་འོད་ཟེར་སེར་པོ་འཕྲོས་པས༔ འཇིག་རྟེན་གྱི་བསོད་ནམས་ལོངས་སྤྱོད་དངོས་གྲུབ་ཐམས་ཅད་བསྡུས་ནས་བདག་ལ་བསྟིམ་ཞིང་༔ འོད་ཟེར་གྱི་སྣ་ལས་རིན་པོ་ཆེའི་ཆར་སི་ལི་ལི་བབ་པར་བསྒོམས་ལ༔ ཨོཾ་མ་ཧཱ་ཀཱ་ལ་རཏྣ་སིདྡྷི་ཧཱུྃ༔ ཞེས་བཟླས་གཏོར་མ་བཟང་དུ་བྱས་པས་ནོར་སྒྲུབ་ལོངས་སྤྱོད་ནོར་འཕེལ་ལོ༔ ཚོང་ལེགས་པར་འདོད་ན་གསོལ་ཀ་བྱ་གཏོར་མ་ཕུལ་ནས༔ ཨོཾ་མ་ཧཱ་ཀཱ་ལ་སིདྡྷི་ཨ་ཏི་ཧ་ཏི་ཧཱུྃ་ཕཊ༔ ཅེས་མང་དུ་བཟླས་པས་ཚོང་ལེགས་སོ། །ཡང་སྐུ་མདོག་དམར་པོ་བྱི་རུ་ལྟ་བུར་གྱུར་པ་ལས་འོད་ཟེར་དམར་པོ་ལྕགས་ཀྱུ་ལྟ་བུར་གྱུར་པས་སྣང་སྲིད་དབང་དུ་བསྡུས་པར་བསྒོམ་གཏོར་མ་ཕུལ། འདོད་
གསོལ་བྱ་ཞིང་༔ ཨོཾ་མ་ཧཱ་ཀཱ་ལ་ལོ་ཀ་པ་ཤཾ་ཀུ་རུ་སྭཱ་ཧཱ༔ ཞེས་བཟླས་པས་དབང་དུ་འདུས་སོ༔ བསད་ལས་འདུག་པ་ཉེས་པར་འགྲོ་དོགས་པས་མ་བྲིས་སོ༔ ཡང་འདིའི་སྒོ་ནས་རང་གཞན་གྱི་ཚེའི་བར་ཆད་སེལ་བའི་ཚེ་ཆོག་ནི༔ བུམ་པ་ལ་རྒྱན་དང་བཅས་པའི་ནང་དུ་ཆང་ངམ་ཇ་སོགས་བུམ་ཆུ་དང་བུམ་རྫས་བཏབ་པ་དང་༔ གཏོར་མ་ཚེ་བུམ་གྱི་གཟུགས་ཚེ་རིལ་གྱིས་བསྐོར་བ༔ ཚེ་མདའ་རྒོད་སྒྲོ་དར་སྣ་བཏགས་པ་བཤམས༔ རོང་སྨན་བླར་བསྒོམ༔ བུམ་པ་རིན་པོ་ཆེ་གཞལ་ཡས་ཁང་དུ་གྱུར་པའི་ནང་དུ་ཞང་བློན་གོང་ལྟར་བསྒོམས་ལ་ལས་བྱང་བཏང་སྟེ༔ རང་གི་ཐུགས་ཀ་ནས་འོད་ཟེར་འཕྲོས་པས་བུམ་བསྐྱེད་ཀྱི་ཐུགས་ཀར་ཉི་མའི་སྟེང་དུ་ཧཱུྃ་མཐིང་ག་ལ་སྔགས་ཀྱིས་བསྐོར་བ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས་པས༔ འཇིག་རྟེན་དང་འཇིག་རྟེན་ལས་འདས་པའི་ཚེའི་དངོས་གྲུབ་འབྱུང་བ་ལྔ་དང་ཉི་ཟླ་ནོར་བུའི་བཅུད༔ ལྷ་ཀླུ་མིའི་ཚེ་བསོད་ནམས་འོད་ཟེར་གྱི་རྣམ་པར་བསྡུས་ནསཿ རང་དང་བསྲུང་བྱ་དང་བུམ་ཆུ་ཚེ་རིལ་ལ་ཐིམ་པར་བསྒོམ་ཞིང་༔ ཨོཾ་བཛྲ་རཏྣ་ཙིཏྟ་རཱ་ག་རུ་གེ་ཧཱུྃ་ཕཊ་སྭཱ་ཧཱ༔ ཨཱ་ཡུ་ཚེ་ཡུ་ཛྙཱ་ན་མིན་དྷུ༔ ཨ་པ་རི་མི་ཏ་ཚེ་ཧཱུྃ༔ ཞེས་བཟླ་སྟེ་རྒྱུན་ཁྱེར་ཡིན་ན་ཐུན་རེ་ལ་བརྒྱ་སྟོང་ཅི་འགྲུབ༔ མཚམས་བྱེད་ན་ཞག་བདུན་ཙམ་ཐུན་བཞིར་འབད་པསཿ ཉི་ཟླ་
ཤར་བ་དང་བདུད་རྩི་འཐུང་བ་འབྲུ་དང་ཤིང་ཐོག་ཟ་བ་སོགས་རྟགས་འབྱུང་ངོ་༔ དེ་ནས་བུམ་ལྷ་གཤེགས་བུམ་ཆུ་འཐུང་ཚེ་རིལ་ཚེ་གཏོར་དངོས་གྲུབ་ཏུ་རོལ་ལོ༔ རྟོགས་ཐོན་པར་བསྒྲུབས་ན་ཚེ་ལོ་སྟོང་དུ་གནས་པར་འདིའི་རྒྱུད་ཆེན་པོ་ནས་གསུངས་ཏེ་བཀའ་མའི་ལུགས་ཡིན་ནོ༔ ༈ འདིར་གནམ་ཆོས་རླུང་སྒྲུབ་ཀྱི་དོན་གསལ་བར་བཀོད་ན་རླུང་སྒྲུབ་ཅེས་པ་མྱུར་བའི་སྐད་ཡིན་ཏེ༔ ཅུང་ཞིག་དྲག་པོ་ཡིན་ནོ༔ དེ་ལ་ཟངས་ལྕགས་ཀྱི་སྣོད་དུ་དམར་གཏོར་ཆེ་བ་གཅིག་ལ་ཆུང་བ་བརྒྱད་ཀྱིས་བསྐོར༔ ཤ་དང་ལིངྒས་བརྒྱན༔ རྩེ་ལ་མར་རྒྱན་མེ་ལྕེའི་གཟུགས་གཅིག་ཁོ་ན་བྱ༔ དེ་ཕུད་རྒོད་ཀྱིས་བྲན་ལ་རང་ཉིད་སྨན་བླའི་བདག་བསྐྱེད་ཚར་ནསཿ ན་མོ༔ དྲང་སྲོང་རིག་འཛིན་བརྒྱུད་པའི་བླ་མ་རྣམས་ཀྱི་བདེན་པ་དང༔ ཡི་དམ་བདེ་གཤེགས་སྨན་གྱི་ལྷ་ལ་སོགས་དཀོན་མཆོག་གསུམ་གྱི་བདེན་པ་དང་༔ བསྟན་སྲུང་མ་ཧཱ་ཀཱ་ལ་རྡོ་རྗེ་བདུད་འདུལ་འཁོར་དང་བཅས་པའི་བདེན་པ་དང་མཐུ་སྟོབས་ཀྱིས༔ སྤྱིར་སངས་རྒྱས་བསྟན་པའི་སྤྱི་དགྲོ༔ ཁྱད་པར་དུ་བདག་ཅག་བསྲུང་བྱ་མི་ནོར་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་ཐམས་ཅད་ཀྱི་བླ་སྲོག་གཏོར་མ་དང་ལིངྒ་འདི་ལ་ཁུག་ཅིག་ཛཧཱུྃ་བཾ་ཧོ༔ ལན་གསུམ། གཏོར་མའི་ངོ་བོ་གནོད་བྱེད་ཀྱི་ཤ་ཁྲག་ལ་རྣམ་པ་བདུད་རྩིའི་རྒྱ་མཚོ་
མཆོད་སྒྲུབ་བསྐང་བའི་རྫས་འདོད་པའི་ཡོན་ཏན་ལྔ་དང་ལྡན་པར་གྱུར༔ ཨོཾ་ཨཱཿཧཱུྃ་ཧ་ཧོ་ཧཱུྃསྭཱ་ཧཱ༔ མདུན་དུ་རྡོ་རྗེ་བདུད་འདུལ་ནི༔ སྐུ་མདོག་ནག་པོ་ཞལ་གཅིག་པ༔ ཕྱག་གཉིས་གཡས་པས་རུ་མཆེན་ཏེ༔ གཡོན་པས་ལྕགས་པར་རྟ་ནག་ཆིབས༔ སྐུ་ལ་བེར་ནག་བརྗིད་པ་གསོལ༔ དེ་ཡི་མདུན་དུ་ཀུན་སྡུག་མ༔ དམར་མོ་ཞལ་གཅིག་ཕྱག་གཉིས་མ༔ གཡས་པས་གྲི་གུག་གཡོན་ཐོད་ཁྲག༔ དེ་རྒྱབ་ལྷ་སྲིན་སྡེ་བརྒྱད་ཀྱང་༔ ལྷ་རྒྱལ་གཡག་གི་མགོ་ཅན་སོགས༔ མགོ་ཅན་བརྒྱད་ཀྱིས་བསྐོར་བར་གྱུར༔ རང་རང་གནས་ནས་སྤྱན་དྲངས་ཐིམ༔ རྒྱས་པར་སྤྲོ་ན་གོང་གི་སྤྱན་འདྲེན་ནས་བསྟོད་པའི་བར་ལས་བྱང་འདིར་སབ་བོ༔ མ་བྱས་ཀྱང་ཆོག་སྟེ༔ བཀའ་བརྒྱུད་ནས་གསུངས་པའི་བསྟོད་བསྐུལ་ནི༔ ཧཱུྃ༔ ༔ བན་ཆེན་རྡོ་རྗེ་བདུད་འདུལ་ནི༔ རཱུ་ཏྲ་ཡོངས་ཀྱི་སྡེ་དཔོན་ཡིན༔ སྡེ་དཔོན་ཆེན་པོ་སྐུ་བཞེངས་ཤིག༔ ཡི་གེ་ཧཱུྃ་ལས་སྐུ་བསྐྱེད་པ༔ སྔགས་པ་ལྟ་བ་ལོག་པ་སྟེ༔ རཱུ་ཏྲ་ནག་པོའི་རིགས་སུ་སྐྱེས༔ སྐུ་མདོག་དམར་ནག་འབར་བ་ལ༔ ན་བཟའ་མཐིང་ནག་བེར་ཆེན་གསོལ༔ རལ་པ་ནག་པོ་མུན་ལྟར་གཏིབས༔ ཕྱག་ན་ཁྲག་དང་ཡུངས་དཀར་གྱི༔
དགྲ་ལ་བུ་ཡུག་འཚུབས་སེ་འཚུབ༔ ཆིབས་སུ་དྲེའུ་རྟ་ཁམ་ནག་ཆིབས༔ ཁྱོད་ཀྱི་ཆོ་འཕྲུལ་བསྟན་པ་ནི༔ གཡས་ན་རལ་ནག་གྱོན་པ་མང་པོ་ཕོ་ཉར་འགྱེད༔ གཡོན་ན་ཞིང་ལྤགས་རྡེབ་པ་མང་པོ་ལས་ལ་འཛུད༔ འཁོར་དུ་སྣང་སྲིད་རུ་ཏྲས་བསྐོར༔ ཁྱོད་ཀྱི་སྲོག་སྙིང་ང་ལ་ཡོད༔ བསྐྱེད་ཀྱང་ཡི་གེ་ནི་ལས་བསྐྱེད༔ བསྡུ་ཡང་ཡི་གེ་ཚྭ་ལ་བསྡུ༔ རཱུ་ཏྲ་ནྲྀ་ཞེས་བྱ་བ་ནི༔ རཱུ་ཏྲ་ཡོངས་ཀྱི་སྲོག་སྙིང་ཡིན༔ སྲོག་གི་སྙིང་པོའི་ཐུགས་དམ་རྒྱུད་བསྐུལ་ལོ༔ འཁོར་དང་བཅས་པ་འདིར་བྱོན་ལ༔ མཐུན་པའི་དམ་རྫས་འདི་བཞེས་ཤིག༔ སངས་རྒྱས་བསྟན་པ་ཁྱོད་ཀྱིས་སྲུངས༔ དཀོན་མཆོག་དབུ་འཕང་གཉན་པོ་བསྟོད༔ རྣལ་འབྱོར་སྐུ་དགྲ་ཁྱོད་ཀྱིས་སྒྲོལ༔ འགྲས་པའི་དགྲ་བགེགས་མྱུར་དུ་སོད༔ རྡོ་རྗེ་བདུད་འདུལ་འཁོར་བཅས་རྣམས༔ མཆོད་སྦྱིན་གཏོར་མས་ཐུགས་དམ་བསྐང་༔ མཆོད་གཏོར་འདི་བཞེས་དལ་ཁ་ཆིངས༔ ཕོ་བདུད་དལ་ཁ་གཡས་སུ་སྒྱུར༔ མོ་བདུད་།དལ་ཁ་གཡོན་དུ་སྒྱུརཿ སྤྱི་བདུད་དལ་ཁ་མཁའ་ལ་སྒྱུར༔ དགྲ་དང་བགེགས་ཀྱི་གནོད་པ་ཟློག༔ དམ་ཉམས་དགྲ་ལ་ལྟས་ངན་ཐོངས༔ མཐུན་པའི་རྫས་ཀྱིས་ཐུགས་དམ་
བསྐང་༔ ཐུགས་དམ་བསྐང་ལ་རྐྱེན་རྣམས་ཟློག༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་བརྗོད་ནས་མདུན་བསྐྱེད་ལ་བཀའ་བསྒོ་བའི་ཚུལ་དུ། ཨོཾ་མ་ཧཱ་ཀཱ་ལ་བཛྲ་ཙིཏྟ་རཱ་ག་ཧཱུྃ་ཕཊ༔ ཅེས་བསྙེན་པ་ཅི་ནུས་བྱས་ལ༔ གནམ་ཆོས་ལུགས་ཀྱི་འཁོར་གྱི་ཆ་ལུགས་གཏེར་སྟོན་ཉིད་ཀྱི་ཞལ་ཁྲིད་ལྟར་རྒྱུད་དང་བསྟུན་ནས་བདག་གིས་འདོན་ཆར་ཕབ་པ་ནི༔ ཧཱུྃ༔ སྔོན་གྱི་བསྐལ་པ་དང་པོ་ལ༔ དགལ་བ་ཚལ་གྱི་དུར་ཁྲོད་དུ༔ གནོད་སྦྱིན་རྒྱལ་པོ་མིག་པོ་ཆེ༔ ཀླུ་མོ་མཛེས་ལྡན་བཤོས་པའི་སྲས༔ གནོད་སྦྱིན་ནག་པོ་ཁྲག་རལ་ཅན༔ ཞང་བློན་ཆེན་པོ་ཞེས་སུ་གྲགས༔ ཡུམ་ནི་བདུད་མོ་ཀུན་སྡུག་མ༔ གནོད་སྦྱིན་སྟོང་གི་འཁོར་དང་བཅས༔ སེམས་ཅན་ཀུན་ལ་གནོད་ཅིང་འཚེ༔ ཤ་ཁྲག་སྲོག་ལ་ལོངས་སྤྱོད་བྱེད༔ དེ་ཚེ་བཅོམ་ལྡན་ཤཱཀྱ་ཐུབ༔ མངོན་པར་སངས་རྒྱུས་རིང་མ་ལོན༔ ཝཱ་རཱ་ཎ་སིའི་གནས་མཆོག་ནས༔ རྒྱ་གར་ལྷོ་ཕྱོགས་གཤེགས་པའི་ཚེ༔ གནོད་སྦྱིན་འདུལ་བའི་དུས་སུ་མཁྱེན༔ འདུལ་སྐལ་ཕྱག་ན་རྡོ་རྗེ་ལ༔ བྱིན་གྱིས་རླབས་ཏེ་གཉེན་པོར་བསྐོས༔ གསང་བདག་དུར་ཁྲོད་དེར་བྱོན་ནས༔ སྐུ་ནི་འཇིགས་པའི་ཆ་ལུགས་བསྟན༔ གསུང་ནི་དྲག་སྔགས་
འབྲུག་ལྟར་ལྡིརཿ གནོད་སྦྱིན་འཁོར་བཅས་སྐྲག་ཅིང་བསྔངས༔ བཀའ་ཉན་གསུང་སྡོད་སྲོག་སྙིང་ཕུལ༔ སྤྱི་བོར་དམ་ཚིག་རྡོ་རྗེ་བཞག༔ ཤཱཀྱའི་བསྟན་པ་བསྲུང་བ་དང་༔ སེམས་ཅན་དབུལ་ཕོངས་སེལ་བ་ཡི༔ དབང་བསྐུར་དམ་བཅས་ཐ་ཚིག་བཞག༔ གནོད་སྦྱིན་ཡཀྵ་ཀུ་ཝེ་རས༔ ཞུས་པས་ཞང་བློན་ཆེན་པོའི་རྒྱུད༔ ཡིད་བཞིན་གཏེར་གྱི་རྒྱུད་ཅེས་པ༔ ལེའུ་བཅོ་བརྒྱུད་བཀའ་ཡང་སྩལ༔ གསང་མཚན་རྡོ་རྗེ་བདུད་འདུལ་བཏགས༔ བརྒྱན་པའི་མཆོད་གཏོར་འདི་བཞེས་ལཿ ཕྱག་རྡོར་སྤྱན་སྔར་ཁས་བླངས་པའི༔ དམ་ཚིག་དུས་འདིར་དྲན་མཛོད་ལ་བར་ཆད་སོལ་ལ་ལོངས་སྤྱོད་སྤེལཿ འཁོར་ལོས་སྒྱུར་བའི་རྒྱལ་པོ་ལྟར༔ ཅི་འདོད་ཕུན་སུམ་ཚོགས་པར་མཛོད༔ དེ་ནས་བར་གྱི་་བསྐལ་པ་ལ༔ ཡར་ལུང་ཤེལ་གྱི་བྲག་ཕུག་ཏུ༔ སློབ་དཔོན་པདྨ་འབྱུང་གནས་ཀྱིས༔ བཀའ་འདུས་དཀྱིལ་འཁོར་ཞལ་ཕྱེས་ནས༔ སྣང་སྲིད་ལྷ་འདྲེ་ཐམས་ཅད་ལ༔ ལོ་གསུམ་ཆོས་གསུངས་དབང་བསྐུར་ཚེ༔ ཞང་བློན་རྡོ་རྗེ་བདུལ་འདུལ་ཁྱོད༔ གསོ་རིག་རྒྱུད་ཀྱི་སྲུང་མར་བསྐོསཿ གསོ་རིག་མི་ནུབ་དར་བ་དང་༔ སྨན་པ་ཀླུང་རྟ་དར་བ་ཡིས་
ཕྲིན་ལས་སྒྲུབ་པའི་དམ་བཅའ་ཕུལ༔ སྔོན་གྱི་དམ་ཚིག་དྲན་མཛོད་ལ༔ བཀའ་ཡི་གཏོར་མ་འདི་ལོངས་ལ༔ གསོ་རིག་བཤད་སྒྲུབ་འཕེལ་བ་དང་༔ བདག་ཉིད་གཞན་ཕན་རྒྱ་ཆེན་པོ་འགྲུབ་པའི་ཕྲིན་ལས་དུས་ལ་བབ༔ དེ་འོག་བར་གྱི་བསྐལ་པ་ལ༔ སྐ་བ་དཔལ་བརྩེགས་སྐྱེ་བའི་མཐརཿ གཏེར་སྟོན་གྲྭ་པ་མངོན་ཤེས་ཀྱིས་བསམ་ཡས་གཙུག་ལག་ཀ་བ་ནསཿ རྒྱུད་བཞི་གནོད་སྦྱིན་སྒྲུབ་སྐོར་བཅས༔ གཏེར་བཏོན་གཏེར་སྒྲུབ་བྱས་པའི་ཚེ༔ གནོད་སྦྱིན་ཁྱོད་ཀྱིས་རང་གཟུགས་བསྟན༔ བསྟན་པ་སྤེལ་བའི་གཡར་དམ་བཅས༔ བརྒྱན་པའི་གཏོར་མ་འདི་བཞེས་ལ༔ གསོ་རིག་བསྟན་དང་བསྟན་འཛིན་རྣམས༔ འཕེལ་ཞིང་རྒྱས་པའི་ཕྲིན་ལས་མཛོད༔ དེ་འོག་བསྐལ་པ་ཕྱི་མ་ལ་ཨོ་རྒྱན་ཐུགས་སྤྲུལ་གཡུ་ཐོག་པ༔ རྒྱ་གར་ཡུལ་དུ་བྱོན་པའི་ཚེ༔ སྨན་གྱི་ལྷ་མོ་དཔལ་ཕྲེང་མ༔ ལྷ་ལྕམ་མནྡ་ར་བ་དངོས༔ ཞལ་མཇལ་གསོ་རིག་གདམས་པ་གནང་༔ དེ་ཚེ་གནོད་སྦྱིན་འཁོར་བཅས་ལཿ བསྟན་པ་སྲུང་བར་བཀའ་བསྒོས་པས༔ ཞང་བློན་སྡེ་དགུའི་ཆོ་ག་བརྩམསཿ རིག་འཛིན་བརྒྱུད་པའི་བཀའ་བཞིན་དུ༔ བརྒྱན་
པའི་གཏོར་མ་འདི་བཞེས་ལ༔ གསོ་རིག་བསྟན་པ་རྒྱས་པ་དང་༔ སྨན་པའི་མངའ་ཐང་འཕེལ་བར་མཛོད༔ ད་དུས་ལྔ་བརྒྱའི་ཐ་མ་ལ༔ བྱ་ལོ་ས་གའི་ཉི་ཤུ་ཉིན༔ རིག་འཛིན་ཏིཥྛ་བཛྲ་ལ༔ རྡོ་རྗེ་བདུད་འདུལ་འཁོར་བཅས་ཀྱིས༔ རང་རང་གཟུགས་མཆོག་དངོས་སུ་བསྟན༔ སྒྲུབ་ཐབས་ལས་ཚོགས་ལུང་བསྟན་པའི༔ དགོས་ཆེད་འབྲས་བུ་དུས་ལ་བབ༔ བརྒྱན་པའི་གཏོར་མ་འདི་བཞེས་ལ༔ བདག་གི་ཡིད་ལ་གང་འདོད་པ༔ དེ་ནི་མྱུར་དུ་འགྲུབ་པར་མཛོད༔ ཨོཾ་མ་ཧཱ་ཀཱ་ལ་བཛྲ་ཙིཏྟ་རཱ་ག་ཧཱུྃ་ཕཊ༔ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ སརྦ་པུཙྪ་ཁཱ་ཧི༔ ཨ་མི་ཏ་རཀྟ་ཁཱ་ཧི༔ ཞེས་ཆད་མདོ་ཡིན་པས་ནམ་ཡང་རུང་ལ༔ ཁྱད་པར་གནམ་ཆོས་ལུགས་ཀྱི་གཙོ་འཁོར་བསྟོད་བསྐུལ་ནི༔ ཧཱུྃ༔ རི་རབ་ཆེན་པོའི་བྱང་གི་ཕྱོགས༔ གསེར་གྱི་རི་བདུན་རྩེ་མོ་ན༔ གཉའ་ཤིང་འཛིན་གྱི་རྩེ་མོ་ན༔ གནོད་སྦྱིན་ཀུན་གྱི་འདུ་ས་ན༔ རྒྱལ་པོའི་ཕོ་བྲང་ལྕང་ལོ་ཅན༔ རིན་ཆེན་སྣ་ཚོགས་གཞལ་ཡས་ཁང་༔ དེ་ནི་ཁྱོད་ནི་བཞུགས་གནས་སོ༔ ཕྱག་ན་རྡོ་རྗེའི་ཐུགས་ཀྱི་སྲས༔ རྣམ་ཐོས་བུ་ཡི་དམག་དཔོན་ཏེ༔ སྡེ་དཔོན་སུམ་ཅུའི་ཡ་གྱལ་བ༔ གནོད་
སྦྱིན་སྡེ་དཔོན་ཁྲག་རལ་ཅན༔ ལན་གཅིག་བལ་པོའི་ཡུལ་དུ་བྱོན༔ ཨ་སུ་ར་ཡི་བྲག་ཕུག་ཏུ༔ སློབ་དཔོན་པདྨས་དམ་ལ་བཏགས༔ བལ་པོའི་རྒྱལ་པོས་མུ་སྟེགས་བསྟེན༔ ཁྱོད་ཁྲོས་མ་བཞུགས་བོད་དུ་བྱོན༔ འོར་དུ་བྱམས་པའི་བཀའ་སྲུང་མཛད༔ སྨར་ཁམས་སྟོད་སྨད་ཀུན་ལ་གནས༔ ཞང་བློན་ཡེ་བརྫུ་ཞེས་སུ་གྲགསཿ བརྒྱན་པའི་གཏོར་མ་འདི་བཞེས་ལཿ ཆུས་སྲིད་དབང་ཐང་དངོས་གྲུབ་སྩོལ༔ ཧཱུྃ༔ ཞང་བློན་རྡོ་རྗེ་བདུད་འདུལ་ནི༔ སྐུ་མདོག་མཐིང་ནག་འབར་བ་ལ༔ ཞལ་གཅིག་རབ་ཁྲོས་མཆེ་བ་གཙིགས༔ སྤྱན་གསུམ་དམར་ཟླུམ་མེ་ལྟར་འབར༔ དགུ་སྐྲ་དམར་སེར་གྱེན་དུ་བཅིངས༔ རིན་ཆེན་སྲོག་ཞུ་དར་དཔྱངས་འཕུརཿ ཕྱག་གཡས་དར་ནག་རུ་མཚོན་ཕྱར༔ གནོད་སྦྱིན་དམག་ཚོགས་དབང་དུ་སྡུད༔ གཡོན་པས་ལྕགས་ཀྱི་པར་བུ་བསྣམས༔ བདུད་རྩི་སྨན་གྱི་བཅུད་རྣམས་སྡུད༔ སྐུ་ལ་ལྗང་ནག་བེར་གྱི་སྟེང་༔ གསེར་སྐྱེད་རིན་ཆེན་སྐེད་ལ་བཅིངས༔ ཙནྡན་བེང་ཆེན་སྐྱེད་ལ་བཅུག༔ དར་ནག་བེར་ཆེན་བརྗིད་པ་གསོལ༔ ཞབས་ལ་སག་ཏི་རྒྱ་ལྷམ་མནབས༔ ཆིབས་སུ་རྟ་ནག་རྟིང་དཀར་
ཆིབས༔ སྐུ་ལས་བསྐལ་པའི་མེ་ཆེན་འབར༔ འཁོར་བཅས་འདིར་པགཤེགས་པ་གཏོར་མ་བཞེས༔ བར་ཆད་ཀུན་སོལ་དངོས་གྲུབ་སྩོལཿ མདུན་དུ་ཡུམ་ཆེན་ཀུན་སྡུག་མ༔ དམར་མོ་ཁྲོ་འཛུམ་གཅེར་བུ་མ༔ དར་དང་རིན་ཆེན་དུ་མས་བརྒྱན༔ ཕྱལག་ན་གྲི་གུག་ཐོད་ཁྲག་བསྣམསཿ འགྱིང་བག་གར་སྟབས་སྣ་ཚོགས་བསྒྱུར༔ བརྒྱན་པའི་གཏོར་མ་འདི་བཞེས་ལ༔ ཁམས་གསུམ་དབང་དུ་སྡུད་པ་དང་༔ ཚེ་དང་རིགས་རྒྱུད་དངོས་གྲུབ་སྩོལ༔ བཀའ་ཉན་ལྷ་སྲིན་སྡེ་བརྒྱད་ནི༔ ཤར་དུ་ལྷ་ཡི་གཙོ་བོ་སྟེ༔ ལྷ་རབ་ཡར་ལྷ་ཤམ་པོ་ནི༔ མི་དཀར་གཡག་དཀར་མགོ་བོ་ཅན༔ སྐུ་ལ་དར་དཀར་བེར་ཆེན་གསོལ༔ ཕྱག་ན་ཤེལ་གྲི་མདུང་དར་དཀར༔ ལྷ་དམག་འབུམ་གྱི་འཁོར་དང་བཅས་བརྒྱན་པའི་གཏོར་མ་འདི་བཞེས་ལ༔ ལྷ་ཡི་རྩུབ་རིམས་བཟློག་ཏུ་གསོལཿ ཕྱི་ནང་འཁྲུག་རྩོད་ཞི་བར་མཛོད༔ ལྷོ་ཕྱོགས་གཤིན་རྗེ་ཆོས་རྒྱལ་ནི༔ མཐིང་མདོག་མ་ཧེ་ཁྲོས་པའི་ཞལ༔ སྐུ་ལ་སྟག་ལྤགས་རློན་པ་གསོལ༔ ཕྱག་ན་བེ་ཅོན་དབྱུག་ཏོ་བསྣམས༔ གཤིན་རྗེ་འབུམ་གྱི་འཁོར་དང་བཅསཿ བརྒྱུན་པའི་གཏོར་མ་འདི་བཞེས་ལ༔ གཤིན་
རྗེའི་ཁྲམ་ཁ་བཟློག་ཏུ་གསོལ༔ དུས་མིན་འཆི་བ་མེད་པར་མཛོད༔ ནུབ་ཕྱོགས་སྲིད་པའི་རྒྱལ་མོ་དཀརཿ གཡུ་འབྲུག་མགོ་ཅན་དར་དཀར་གསོལ༔ ཕྱག་ན་མདའ་དར་མེ་ལོང་བསྣམས༔ མ་མོ་འབུམ་གྱི་འཁོར་དང་བཅས༔ བརྒྱན་པའི་གཏོར་མ་འདི་བཞེས་ལཿ མ་མོའི་དལ་ཡམས་བཟློག་ཏུ་གསོལ༔ རིམས་ནད་རྐྱེན་ཁ་ཞི་བར་མཛོད༔ བྱང་ཕྱོགས་རྐོས་རྗེ་དྲང་དཀར་ནི༔ མི་ནག་རྟ་ནག་མགོ་ཅན་ལ༔ སྐུ་ལ་དར་ནག་བེར་ཆེན་གསོལ༔ ཕྱག་ན་དགྲ་སྟ་ཁྲམ་ཤིང་བསྣམས༔ བདུད་དམག་འབུམ་གྱི་འཁོར་དང་བཅས༔ བརྒྱན་པའི་གཏོར་མ་འདི་བཞེས་ལ༔ བདུད་ཀྱི་ཞགས་པ་འདེབས་པ་ཟློག༔ ཚེ་ཡི་བར་ཆད་ཞི་བར་མཛོད༔ ཤར་ལྷོར་སྲོག་གཟན་དམར་པོ་ནི༔ རྟ་དམར་མགོ་ཅན་བེར་དམར་གསོལ༔ ཕྱག་ན་དར་དམར་མདའ་གཞུ་བསྣམས༔ བཙན་དམག་འབུམ་གྱི་འཁོར་དང་བཅས༔ བརྒྱན་པའི་གཏོར་མ་འདི་བཞེས་ལ༔ བཙན་གྱི་སྐྱ་རྒྱུག་བཟློག་ཏུ་གསོལ༔ གློ་བུར་ཡེ་འདྲོག་ཞི་བར་མཛོད༔ ལྷོ་ནུབ་སྲོག་བདག་སེང་གེའི་མགོ༔ སྐུ་ལ་ངུར་སྨྲིག་ཆོས་གོས་གསོལ༔ ཕྱག་ན་འཁར་གསིལ་ལྷུང་བཟེད་
བསྣམས༔ དཀོར་བདག་འབུམ་གྱི་འཁོར་དང་བཅས༔ བརྒྱན་པའི་གཏོར་མ་འདི་བཞེས་ལཿ རྒྱལ་འགོང་སྨྱོ་འབོག་བཟློག་ཏུ་གསོལ༔ འགོང་པོའི་བར་ཆད་ཞི་བར་མཛོད༔ ནུབ་བྱང་གནོད་སྦྱིན་སྟག་གི་མགོ༔ སྐུ་ལ་དར་ལྗང་ཕོད་ཁ་གསོལ༔ ཕྱག་ན་རལ་གྲི་ནོར་བུ་བསྣམས༔ གནོད་སྦྱིན་འབུམ་གྱི་འཁོར་དང་བཅས༔ བརྒྱན་པའི་གཏོར་མ་འདི་བཞེས་ལ༔ གནོད་སྦྱིན་གཟེར་ནད་བཟློག་ཏུ་གསོལ༔ གོད་ཁ་སྙིང་སྟོང་ཞི་བར་མཛོད༔ བྱང་ཤར་ཀླུ་བདུད་ཆུ་སྲིན་མགོ༔ སྐུ་ལ་དུག་སྦྲུལ་པགས་པ་གསོལ༔ ཕྱག་ན་སྦྲུལ་ཞགས་ནད་རྐྱལ་བསྣམས༔ ཀླུ་གཉན་ས་བདག་འབུམ་དང་བཅས༔ བརྒྱན་པའི་གཏོར་མ་འདི་བཞེས་ལ༔ ཀླུ་ནད་མཛེ་རིགས་བཟློག་ཏུ་གསོལ༔ ཀླུ་ནད་ཐམས་ཅད་ཞི་བར་མཛོད༔ ཕྱི་འཁོར་གནོད་སྦྱིན་སྟོང་སྡེའི་ཚོགས༔ བསྲེ་ཁྲབ་རྨོག་ཞུ་ཡ་ལད་གསོལ༔ ཕྱག་ན་མདུང་དར་ནེའུ་ལེ་ཐོགས༔ སྟོབས་ཆེ་དཔུང་ཆེ་སྡེ་བོ་ཆེ༔ གཞན་གྱིས་མི་ཐུབ་དྲག་ཤུལ་ཆེ༔ བརྒྱན་པའི་གཏོར་མ་འདི་བཞེས་ལ༔ གཙོ་བོའི་བཀའ་བཞིན་ལས་རྣམས་སྒྲུབས༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་པ་ནི་གནམ་ཆོས་ཀྱི་
ཁ་བཀང་དུ་རཱ་ག་ཨ་སྱས་སྦྱར་བ་སྟེ་གལ་ཆེ་དུས་མ་གཏོགས་རྒྱུན་དུ་མི་འདོན་སྡེ་བརྒྱད་འདི་གཉན་ནོ༔ དེ་ནས་ཨོ་རྒྱན་གྱི་གཏེར་རྙིང་ལས་བྱུང་བའི་ཟློག་པ་འདི༔ འབྲུག་ལུགས་ཀྱི་མགོན་མང་ཀར་ལུགས་ཀྱི་ཞི་སྐྱོང་ལ་སྦྱར་འདུག༔ ཆོས་སྐྱོང་གང་ལ་ཡང་སྦྱར་ཆོག་པས་ད་རིས་འདིར་སྦྱར་ཏེ༔ ཧཱུྃ༔ གནོད་སྦྱིན་མགོན་པོ་ཞང་བློན་འཁོར་བཅས་ཀྱི༔ རྣམ་དག་ཐུགས་ཀྱི་རེ་བ་ཡོངས་བསྐང་ཞིང་༔ ཉེས་པའི་ཚོགས་རྣམས་མི་འཆབ་བཤགས་བགྱིད་པས༔ བདག་ཅག་འཁོར་དང་བཅས་ལ་གནོད་པ་ཡི༔ སྲིད་པའི་ཁྲམ་ཁ་ཐམས་ཅད་དགྲ་ལ་སྒྱུར༔ ལྷ་འདྲེའི་དམག་ཚོགས་མ་ལུས་དགྲ་ལ་དྲོངས༔ ཕ་རོལ་བསམ་སྦྱོར་ངན་པའི་ལས་བརྩམས་པ༔ བྱད་ཁ་ཕུར་ཁ་དྲོད་གཏོང་དྲག་པོ་དང་༔ མཚེ་ཟོར་རྦད་འདྲེ་ཡུངས་ཟོར་འཕེན་པ་ཟློག༔ ས་བདག་ཀླུ་ཡི་བྱད་དུ་བཅུག་པ་དང་༔ ཐེའུ་རང་འགོང་པོའི་སྲིས་རྐུན་ཐམས་ཅད་ཟློག༔ གཤིན་རྗེའི་འཁོར་ལོ་བདུད་ཀྱི་ཁྲམ་འདེབས་དང་༔ མུ་སྟེགས་ངན་པའི་བར་ཆད་བྱེད་པ་ཟློག༔ རྒྱལ་བསེན་རྣམས་ཀྱི་སྨྱོ་འབོག་གཏོང་བ་དང་༔ དྲང་སྲོང་གཟའ་དང་ཀླུ་གདོན་གནོད་པ་ཟློག༔ ཞང་ཞུང་ཇོ་བོར་སུམ་པའི་གླང་ཟོར་དང་༔ བོན་པོ་རྣམས་ཀྱི་གཏོར་ཟོར་འཕེན་པ་
ཟློག༔ བན་དེའི་སྔགས་ཟོར་སྐྱེས་པའི་མདའ་ཟོར་དང་༔ བུད་མེད་རྣམས་ཀྱི་དམོད་ཟོར་འཕེན་པ་ཟློག༔ བདུད་ཀྱི་གཤེད་བཞི་རོ་ལངས་འབྱུང་པོ་དང་༔ མ་མོ་རྣམས་ཀྱི་ཁྲག་ཟོར་འཕེན་པ་ཟློག༔ མོ་རྩིས་ངན་དང་རྨི་ལམ་མཚན་མ་ངན༔ ལྟས་ངན་མི་རུང་བརྒྱད་ཅུ་རྩ་གཅིག་ཟློག༔ བཞི་བརྒྱ་རྩ་བཞིའི་ནད་རྣམས་མ་ལུས་དང་༔ གདོན་རིགས་ཉི་ཁྲི་ཆིག་སྟོང་ཚོགས་རྣམས་ཟློག༔ སྟོང་ཕྲག་བརྒྱད་ཅུའི་བགེགས་རྣམས་མ་ལུས་དང༔ ཡེ་འདྲོགས་ཆེན་པོ་སུམ་བརྒྱ་དྲུག་ཅུ་ཟློག༔ གདོན་ཆེན་བཅོ་ལྔ་ལོ་ཟླ་ཞག་དུས་སྐག༔ མི་མཐུན་ཕྱོགས་རྣམས་དགྲ་བོའི་སྟེང་དུ་ཟློག༔ དུས་མིན་འཆི་བའི་འཇིགས་པ་བརྒྱད་རྣམས་དང་༔ ལྟས་ངན་ཆོ་འཕྲུལ་དགྲ་བོའི་སྟེང་དུ་ཟློག༔ ཞང་བློན་རྡོ་རྗེ་བདུད་འདུལ་དྲག་རྩལ་ཅན༔ ཡབ་ཡུམ་མི་སྲུན་སྡེ་བརྒྱད་དམག་ཚོགས་རྣམས༔ ཕྲིན་ལས་དྲག་པོ་ཤིན་ཏུ་མི་བཟད་པས༔ སོད་ཅིག་ཐུལ་ཅིག་དགྲ་དང་བགེགས་ཀྱི་ཚོགསཿ གཏད་དོ་གཉེར་རོ་སྲུང་མ་མཐུ་རྩལ་ཅན༔ ལེ་ལོ་བཏང་སྙོམས་གཡེལ་བ་མ་མཛད་པར༔ རྟགས་དང་མཚན་མ་མྱུར་དུ་སྟོན་མཛོད་ཅིག༔ རྣལ་འབྱོར་བདག་གི་བཅོལ་བའི་ཕྲིན་ལས་རྣམས་
ད་ལྟ་ཉིད་དུ་འགྲུབ་པར་མཛད་དུ་གསོལ༔ ཞེས་ཚར་གསུམ་ལྔ་བདུན་དགུ་སོགས་དང་༔ དེའི་བར་མཚམས་སུ་སྔགས་འདིས་ཐུན་སོགས་སྔགས་ལ༔ གཏོར་མར་མེ་རུ་བཙུགས་ལ་ཕྱོགས་གཙང་སའི་གོམ་པ་བདུན་ཅུའི་ཕ་རོལ་དུ་བསྐུར་ལ་ཕུལ་བཅུག༔ སྔགས་དྲག་ཏུ་བརྗོད་ཅིང་ཁྱིམ་དུ་ཐུན་བྲབ༔ དམིགས་པ་ཞང་བློན་གྱི་དམག་གིས་གདོན་ཐམས་ཅད་རྒྱ་མཚོའི་ཕར་འགྲམ་དུ་བདས་པར་སྒོམས་ཤིང་། ཨོཾ་རཏྟཱ་ཙིཏྟི་རཱ་ག་རཱ་ཏི་ཡཀྵ༔ སརྦ་ཨེ་ཀཱི་ལ་ཡ་མཱ་ར་ཡ་ཕཊ༔ ཚིནྡྷ་ཚིནྡྷ་རཱ་ཙ་མཱ་ར་ཡ་ཕཊ༔ བྷིནྡྷ་བྷིནྡྷ་ཏྲི་ཏྲིའུ་མཱ་ར་ཡ་ཕཊ༔ སྤོ་ཊ་སྤྲོ་ཊ་འབྱུང་པོ་ཨུ་ཙ་ཏ་ཡ་མཱ་ར་ཡ་ཕཊ༔ ཅེས་པ་བཟླས་ཤིང་གནོད་སྦྱིན་འཁོར་བཅས་ཀྱིས་འབྱུང་པོ་རྡུལ་དུ་བརླག་པར་བསྒོམས་ནས༔ གནོད་བྱེད་གདོན་ཐམས་ཅད་སྐད་ངན་ཙེ་རེ་རེ་བྲོས་པར་རྒྱུད་ནས་གསུངས་ཏེ༔ རྒྱལ་འགོང་ལོ་འདྲེ་གདོན་འཁྱམ་མོ་གདོན་གཤེད་ཁ་ཐམས་ཅད་འདིས་ཐུབ་བོ༔ རང་ནུས་པ་ཆེ་ན་ནད་པ་གདོན་ཆེན་ལ་གཏོར་མ་བརྒྱབ་ཀྱང་རུང་ངོ་༔ འདི་གནོད་སྦྱིན་གྱི་རིགས་ཀྱི་མགོན་པོ་དྲེགས་པའི་སྡེ་དཔོན་སུམ་ཅུའི་གཅིག་ཡིན་པས་སྟོབས་ཆེ༔ ཡེ་བརྫུའི་སྒྲུབ་ཐབས་ཡིག་རྙིང་རྣམས་ནས་འདིའི་སྤྲུལ་པ་ཡེ་བརྫུ་ཡིན་པར་གསུངས་པས་རྣོ་མྱུར་ཚེ༔ འོན་ཀྱང་ནོར་ལྷའི་རིགས་ཡིན་པས་རྒྱུད་འཇམ་འཁུ་ལྡོག་མེད༔ མངོན་སྤྱོད་མངའ་ཐང་ཤུགས་ལ་རྒྱས་པས་ཆོས་སྐྱོང་གི་མཆོག་ཡིན༔ ཁྱད་པར་དམ་ཚིག་གི་དབང་གིས་སྨན་པ་རྣམས་ལ་མགོན་ནོ༔ རྟགས་ནི་
ཚོང་དཔོན་དང་ཚོང་པ་དཔོན་རིགས་ཆེས་བཟང་བཙུན་པ་ཆོས་བཟང་སྙན་གྲགས་དང་༔ དཀར་གསུམ་བྱིན་པ་ཉི་ཟླ་ཤར་བ་བར་ཆད་ཞི་རྟགས༔ གོ་ཁྲུབ་བྱིན་པ་གྱོན་པ་སྲུང་རྟགས༔ གོས་བཟང་གྱོན་ཁྲི་ལ་འདུག་ལོ་ལེགས་རིན་པོ་ཆེའི་རིགས་རྙེད་པ་བསོད་ནམས་རྒྱུས་རྟགས༔ མི་མང་ཕྱག་འཚལ་དར་ཕྱར་དུང་འབུད་པ་དབང་དུ་འདུ་རྟགས༔ མགོ་དང་ནང་གྲོལ་བྱིན་པ་བསད་པ་དགྲ་གདོན་ཐུབ་པའི་རྟགས་སོ༔ སྤྲང་པོ་བྱུང་ན་གཏོར་མ་བཟང་དུ་བྱའོ༔ ཞེས་པ་འདི་སྙིས་སྐྱོ་ལྷ་ཆུང་གིས་བསྙེན་པ་འདོད་ཟེར་ནས་རཱ་ག་ཨ་སྱས་བྲིས་པ་སྟེ༔ གཞན་ཡང་འཚོ་མཛད་གསར་བུ་འགའ་ལ་ཕན་པར་གྱུར་ཅིག་མངྒ་ལཾ༔ འདིའི་རྒྱུད་ཕྱག་རྡོར་གྱིས་གསུངས་པ༔ གནོད་སྦྱིན་ཆེན་པོ་ཡིད་བཞིན་གཏེར་གྱི་རྒྱུད་ཅེས་བྱ་བ་ལེའུ་བཅོ་བརྒྱད་པ་ལསཿ ཕྱི་ལྟར་བསྒྲུབས་པས་ཟས་ནོར་སྒྲུབས༔ ནང་ལྟར་བསྒྲུབ་ནི་བར་ཆད་བསལ༔ གསང་བ་སྒྲུབ་ནི་དགྲ་སྲོག་བཅད༔ དེ་ལྟར་བསྒྲུབ་ལ་མཉམ་དུ་བསྐུལ༔ གྲོགས་ལྟར་བརྟེན་ལ་ཐ་ཚིག་བསྲེ༔ བྲན་ལྟར་བརྟེན་ལ་ལས་ལ་བཀོལ༔ ཞེས་དང་༔ གང་སྒྲུབ་འཁོར་ལོས་སྒྱུར་རྒྱལ་འདྲ༔ ཅི་འདོད་ཕུན་སུམ་ཚོགས་པ་འགྲུབ༔ བསྟན་པ་བསྲུང་བའི་ལས་བསྒྲུབ་ཅིང་༔ ཉི་ཤུ་རྩ་གཅིག་ཞག་གྲངས་ཀྱིས༔ སྲིད་པ་གསུམ་གྱི་སེམས་ཅན་སྒྲོལ༔ དགྲ་བོ་མངོན་དུ་སྒྲོལ་བར་བྱེད༔ ཅེས་གསུངས་པས་ཕན་ཡོན་དགོས་ཆེད་ནི་དེ་ལྟར་རོ༔ བྷ་ཝནྟུ༔ ཡང་སྨན་བླའི་བདག་མདུན་སྔགས་བཟླས་པས་ཚེ་འདི་ཡང་ནད་དང་སྡུག་བསྔལ་ཞི་བ་དང་༔ གཞན་གྱིས་བྱད་ཁ་དང་བསམ་
ངན་མི་ཚུགས་པ་དང་༔ བསོད་ནམས་ལོངས་སྤྱོད་འཕེལ་བ་དང་༔ ཕྱི་མ་ངན་སོང་མི་ལྟུང་ཞིང་༔ བདེ་འགྲོ་མཐོ་རིས་སུ་ཇེ་མཐོར་སྐྱེས་ནས་རིམ་གྱིས་སངས་རྒྱས་ཐོབ་པར་བཤད་ཅིང་༔ སྨན་བླ་མཆེད་བདུན་གྱི་གྲར་ལ་བཞུགས་པའི་དེ་བཞིན་གཤེགས་པ་ཆོས་སྒྲགས་རྒྱ་མཚོའི་དབྱངས་སྤྱི་བོར་བསྒོམ་ཞིང་དེའི་མཚན་བརྗོད་པས༔ ཚེ་འདིར་ཡང་དགྲ་དང་ཁ་མཆུ་ཞི་ཞིང་འཐབ་རྩོད་དང་མཚོན་གྱིས་འཆི་བར་མི་འགྱུར་བ་སོགས༔ སངས་རྒྱས་དེ་གཉིད་ཀྱི་ཕན་ཡོན་རྒྱ་ཆེར་སྨན་མདོ་རྒྱས་བསྡུས་གཉིས་ནས་བཅོམ་ལྡན་འདས་ཐུབ་པའི་དབང་པོས་བཀའ་སྩལ་པའོ༔ སྨན་བླ་དངཞང་བློན་སྔར་གྱི་བཀའ་མའི་དབང་ལུང་གི་རྒྱུན་དང་༔ དུས་ཕྱིས་གནམ་ཆོས་ལུགས་གཉིས་ཀ་ཐོབ་པས༔ སྔར་གྱི་དེ་ཕུགས་ཆེ༔ གནམ་ཆོས་བརྒྱུད་པ་ཉེ་བ་མྱུར་ཏེ༔ བདག་ལ་སྨན་བླའི་དབང་དང་༔ ཞང་བློན་བཀའ་གཏད་ཐོབ་ཚད་ཀྱིས་འདི་འདོན་ཆོག་ལོགས་སུ་འདིའི་དབང་ལུང་ཞུ་མི་དགོས་ཏེ༔ དབང་དང་བཀའ་གཏད་འཐུས་ཡོད་དོ༔ འདི་ཉམས་སུ་བླངས་ན་འཚོ་མཛད་རྣམས་ལ་འདི་ཕྱིས་དོན་ཆེན་པོར་འགྱུར་རོ༔ ཞེས་རཱ་ག་ཨ་སྱས་བྲིས་སོ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།