གསོལ་འདེབས།
ཧཱུྃ། རྡོ་རྗེ་ཁྲོས་པས་ཞེ་སྡང་གཅོད། །རྡོ་རྗེ་གཞོན་ནུ་ཕུར་པའི་ལྷ། །པདྨ་ཐོད་ཕྲེང་རིག་པ་འཛིན། །ཡེ་ཤེས་མཚོ་རྒྱལ་རིག་པའི་བུ། །གསོལ་བ་འདེབས་སོ་བྱིན་གྱིས་རློབས། །སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བསྩལ་དུ་གསོལ། །རཏྣ་གླིང་པ་གཏེར་གྱི་བདག །ཚེ་དབང་གྲགས་པ་རིག་པ་འཛིན། །ངག་དབང་གྲགས་པ་ཐུགས་ཀྱི་སྲས། །ངག་དབང་ནོར་བུ་སྲས་མཆོག་རྗེ། །གསོལ་བ་འདེབས་སོ་བྱིན་གྱིས་རློབས།། །སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བསྩལ་དུ་གསོལ། །ནོར་བུ་ཡོངས་གྲགས་སྲས་བཅས་མཆོག །རཏྣ་སངས་རྒྱས་ཕུན་ཚོགས་སྲས། །བཀའ་བབས་ཀརྨ་དགེ་ལེགས་རྗེ། །ཐུགས་རྗེ་མཚུངས་མེད་རཱ་གའི་མཚན། །དྲིན་ཅན་རྩ་བའི་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བསྩལ་དུ་གསོལ། །ཧཱུྃ། དུས་གསུམ་བདེ་གཤེགས་ཐམས་ཅད་ཀྱི། །མཐུ་སྟོབས་ཕྲིན་ལས་ཀུན་གྱི་བདག །རྡོ་རྗེ་གཞོན་ནུ་ཡབ་ཡུམ་ལ། །གསོལ་བ་འདེབས་སོ་བྱིན་གྱིས་རློབས། །སྲིད་པའི་ཕུར་བུ་སྒྲུབ་
པ་དང་། །དབང་དང་དངོས་གྲུབ་བསྩལ་དུ་གསོལ། །ཕྱོགས་བཅུ་གདོན་བཅུའི་གདན་སྟེང་ན། །སྤྲུལ་པ་ཁྲ་ཐབས་བཅས་པ་ལ། །གསོལ་བ་འདེབས་སོ་བྱིན་གྱིས་རློབས། །སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བསྩལ་དུ་གསོལ། །ཞི་རྒྱས་དབང་དྲག་སྒྲུབ་བྱེད་པའི། །ཕུར་པ་ཀཱི་ལ་རིགས་བཞི་དང་། །ཕུར་སྲུང་སྒོ་མ་བཞི་དང་བཅས་། །ཕུར་པའི་དཀྱིལ་འཁོར་ལྷ་ཚོགས་ལ། །གསོལ་བ་འདེབས་སོ་བྱིན་གྱིས་རློབས། །སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བསྩལ་དུ་གསོལ། །བར་ཆད་དགྲ་དང་ལོག་འདྲེན་བགེགས། །མ་ལུས་ཞི་ཞིང་ཟློག་པ་དང་། །མཐུ་སྟོབས་ནུས་པའི་རྩལ་ལྡན་ནས། །ཕྲིན་ལས་ཐོགས་མེད་འགྲུབ་པར་ཤོག །བསྐྱེད་རྫོགས་མཐའ་རུ་ཕྱིན་པ་དང་། །དོན་གཉིས་ལྷུན་གྱིས་འགྲུབ་པ་དང་། །ཚེ་གཅིག་སངས་རྒྱས་སར་ཕྱིན་ཤོག །གཏེར་སྟོན་བདུད་རྡོ་རྗེས་ལུང་བྱང་ལས། ཁོ་བོ་ཕུར་པའི་ཆོས་བདག་ཡིན་གསུངས་པ་དང་། རང་གིས་དག་སྣང་དགའ་རེ་བྱུང་བ་ལ་བརྟེན་ནས། རཱག་ཨ་སྱས་སྨྲས་པའོ། །དགེ་ལེགས་འཕེལ།། །།