ཕུར་པ་ཡང་གསང་བླ་མེད་ཀྱི་རིག་འཛིན་བརྒྱུད་བསྐང་བྱིན་རླབས་དངོས་གྲུབ་རྒྱ་མཚོའི་སྤྲིན་ཕུང་།
ཕུར་པ་ཡང་གསང་བླ་མེད་ཀྱི་རིག་འཛིན་བརྒྱུད་བསྐང་བྱིན་རླབས་དངོས་གྲུབ་རྒྱ་མཚོའི་སྤྲིན་ཕུང་བཞུགས་སོ།། ༈ ན་མོ་ཤྲཱི་ཀུ་མཱ་རཱ་ཡ།་རིག་འཛིན་བརྒྱུད་བསྐང་སྤྲོ་ན།་ཧཱུྃ། དང་པོའི་སངས་རྒྱས་འོད་མི་འགྱུར། །ཀུན་ཏུ་བཟང་པོའི་ཐུགས་དམ་བསྐང་། །ཡེ་ཤེས་ལྔ་ཡི་རོལ་པ་ལས། །རྒྱལ་བ་རིགས་ལྔའི་ཐུགས་དམ་བསྐང་། །རིགས་དང་དཀྱིལ་འཁོར་ཀུན་ཁྱབ་བདག །རྡོ་རྗེ་འཆང་ཆེན་ཐུགས་དམ་བསྐང་། །གསང་བ་ཀུན་གྱི་བདག་པོ་སྟེ། །ལག་ན་རྡོ་རྗེའི་ཐུགས་དམ་བསྐང་། །མཁའ་འགྲོ་ཀུན་གྱི་གཙོར་གྱུར་པའི། །ལས་ཀྱི་དབང་མོའི་ཐུགས་དམ་བསྐང་། །གྲུབ་པ་བྱེ་བའི་ཅོད་པན་མཆོག །པྲ་བྷ་ཧསྟིའི་ཐུགས་དམ་བསྐང་། །རྒྱལ་ཀུན་ངོ་བོ་ཐུགས་རྗེའི་གཏེར། །པདྨ་ཐོད་ཕྲེང་ཐུགས་དམ་བསྐང་། །འཕགས་བོད་མཁས་དང་གྲུབ་པའི་གཙོ། །བི་མ་མི་ཏྲའི་ཐུགས་དམ་བསྐང་། །ཕུར་པ་བསྒྲུབ་ཅིང་མཆོག་བརྙེས་པ། །ཤཱི་ལ་མཉྫའི་ཐུགས་དམ་བསྐང་། །ཕྲིན་ལས་བཀའ་བབས་ཌཀི་མ། །ཡེ་ཤེས་མཚོ་རྒྱལ་ཐུགས་དམ་བསྐང་། །གཡོ་མེད་ཏིང་འཛིན་མི་གཡོ་བརྙེས། །ཁྲི་སྲོང་ལྡེའུ་བཙན་ཐུགས་དམ་བསྐང་། །དྲག་སྔགས་མཐུ་ཡི་
དངོས་གྲུབ་བརྙེས། །སངས་རྒྱ་ཡེ་ཤེས་ཐུགས་དམ་བསྐང་། །གསང་བའི་བདག་པོའི་རྣམ་པར་རོལ། །ཤུད་པུ་དཔའ་སེང་ཐུགས་དམ་བསྐང་། །གདུལ་དཀའ་འདུལ་བའི་མཐུ་སྟོབས་ཅན། །དཔལ་གྱི་དབང་ཕྱུགས་ཐུགས་དམ་བསྐང་། །ཕུར་བུ་བསྒྲུབ་ཅིང་དངོས་གྲུབ་བརྙེས། །ཀླུ་ཡི་དབང་པོའི་ཐུགས་དམ་བསྐང་། །རྩོད་མེད་ལོ་ཙཱ་སིདྡྷི་བརྙེས་། །ཀླུ་ཡི་རྒྱལ་མཚན་ཐུགས་དམ་བསྐང་། །བདེ་བ་ཆེན་པོའི་ཡེ་ཤེས་བརྙེས། །ཨརྱ་ས་ལེའི་ཐུགས་དམ་བསྐང་། །གུ་རུའི་ཐུགས་སྲས་རིག་པ་འཛིན། །གཉན་ཆེན་དཔལ་དབྱངས་ཐུགས་དམ་བསྐང་། །ལང་གྲོའི་རིགས་ལས་འཇིག་རྟེན་མིག །དཀོན་མཆོག་འབྱུང་གནས་ཐུགས་དམ་བསྐང་། །ཟབ་གཏེར་མཛོད་འཆང་བསྟན་པའི་བརྒྱན། །རཏྣ་གླིང་པའི་ཐུགས་དམ་བསྐང་། །པདྨའི་རྒྱལ་ཚབ་འགྲོ་བ་འདུལ། ཆོས་རྗེ་གླིང་པའི་ཐུགས་དམ་བསྐང་། །རྡོ་རྗེའི་ཚེ་བརྙེས་རྒྱལ་བའི་སྲས། །ཚེ་དབང་གྲགས་པའི་ཐུགས་དམ་བསྐང་། །ཆོས་ཀྱི་བདག་པོ་རིག་སྔགས་འཆང་། །བསོད་ནམས་བཀྲ་ཤིས་ཐུགས་དམ་བསྐང་། །བཀའ་རྙིང་བསྟན་པ་དར་མཛད་པའི། །ཀརྨ་ཆགས་མེད་ཐུགས་དམ་
བསྐང་། །ཟབ་ཆོས་སྤེལ་ཞིང་འགྲོ་འདུལ་མཆོག །བརྒྱུད་པའི་བླ་མའི་ཐུགས་དམ་བསྐང་། །ཡོངས་རྫོགས་བསྟན་པའི་མངའ་བདག་མཆོག །ཆོས་ཀྱི་འབྱུང་གནས་ཐུགས་དམ་བསྐང་། །སྔ་འགྱུར་རིང་ལུགས་རྟག་འཛིན་པའི། །བདུད་འདུལ་རྒྱལ་པོའི་ཐུགས་དམ་བསྐང་། །རིས་མེད་བསྟན་པ་གསལ་བའི་ཉི། །པདྨ་གར་དབང་ཐུགས་དམ་བསྐང་། །བཀའ་དྲིན་མཉམ་མེད་འཁོར་ལོའི་མགོན། །རྩ་བའི་བླ་མའི་ཐུགས་དམ་བསྐང་། །ཐུགས་དམ་བསྐང་བའི་དམ་རྫས་ནི། །མེ་ཏོག་བདུག་སྤོས་སྐྱེ་མར་མེ་དང་། །དྲི་ཆབ་ཞལ་ཟས་རོལ་མོའི་རིགས། །སྨན་དང་རཀ་གཏོར་ཆེན་དང་། །ཚོགས་ཀྱི་མཆོད་པས་དགྱེས་པ་བསྐང་། །འདོད་པའི་ཡོན་ཏན་རྣམ་པ་ལྔ། །རྒྱལ་སྲིད་བཀྲ་ཤིས་རྫས་རྟགས་དང་། །དགྱེས་པའི་མཐུན་རྫས་སྣ་ཚོགས་ཀྱིས། །ཐུགས་དམ་གཉན་པོ་བསྐང་གྱུར་ཅིག །གཡར་དམ་གཉན་པོ་སོར་ཆུད་ཤོག །བདག་ནི་མ་རིག་དབང་གྱུར་པས། །སོ་སོར་ཐར་དང་བྱང་ཆུབ་སེམས། །སྔགས་ཀྱི་དམ་ཚིག་ཉམས་པ་རྣམས། །གནོངས་ཤིང་འགྱོད་པས་མཐོལ་ལོ་བཤགས། །སྣང་སྲིད་ལྷ་ཡི་དཀྱིལ་འཁོར་
སྒྲ་ཀུན་གཞོམ་མེད་སྔགས་ཀྱི་སྐད། །ཅི་ཤར་ཆོས་དབྱིངས་བདེ་བ་ཆེ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཅེས་པ་ཕུར་པ་ཡང་གསང་བླ་མེད་ཀྱི་རིག་འཛིན་བརྒྱུད་བསྐང་འདི་ཡང་དཔལ་སྤུངས་ཕུར་པ་སྒྲུབ་མཁན་བླ་མ་ཀརྨ་ཕྲིན་ལས་ཀྱིས་གསུང་ངོར། རྡོ་རྗེ་དྲག་པོའི་ཕུར་ཁང་དུ་སྐྱབས་མགོན་མཆོག་གི་སྐུ་རིམ་སྐབས་སུ་སྦྱར་བ་དགེ་བར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །