ཕུར་པ་ཡང་གསང་བླ་མེད་དོན་གྱི་སྙིང་པོ་ལས་ཁྱུང་ཟློག་དང་གཏོར་ཟློག་དང་དབལ་མདོས་སོ་སོར་སྦྲག་མའི་སྒོ་དབྱེ་དང་སྨད་ཆ་ཟོར་ལས་རྣམས།
ཕུར་པ་ཡང་གསང་བླ་མེད་དོན་གྱི་སྙིང་པོ་ལས༔ ཁྱུང་ཟློག་དང་༔ གཏོར་ཟློག་དང་༔ དབལ་མདོས་སོ་སོར་སྦྲག་མའི་སྒོ་དབྱེ་དང་སྨད་ཆ་ཟོར་ལས་རྣམས་བཞུགས་སོ༔
ཁྲོ་ག་རུ་ཊ་ཧཱུྃ་ཕཊ༔ ཧཱུྃ་བྷྱོ༔ ཁྲོཾ་བྷྱོ༔ ཧཱུྃ༔ ཁྲོ་རྒྱལ་ཀུན་འདུས་རྡོ་རྗེ་གཞོན་ནུ་ཆེ༔ དབུ་གསུམ་ཕྱག་དྲུག་འཇིགས་པའི་སྐུ༔ དུར་ཁྲོད་ཆོས་བརྒྱད་སྐུ་ལ་བརྒྱན་༔ ཕྱག་དྲུག་གདུག་པའི་མཚོན་ཆ་བསྣམས༔ ཁྲོ་ཆུང་ཉེར་གཅིག་སྐུ་ལ་ས་སྤྲུལ་སངས་རྒྱས་ཐམས་ཅད་འདུས་པའི་སྐུ༔ སྤྲུལ་པའི་ཁྱུང་ཆེན་སྟོབས་པོ་ཆེ༔ དབུ་ཡི་སྟེང་ན་བརྗིད་པར་བརྒྱན་༔ ལྕགས་ཀྱི་རྭ་དང་མཆུ་སྡེར་ཅན༔ སྤུ་གྲིའི་གཤོག་ཅན་དམར་ཟླུམ་སྤྱན༔ ཁྲོ་བོའི་སྤྱན་གྱིས་སྡང་མིག་གིས༔ དྲེད་མོང་རལ་འཛིངས་ལྟས་ངན་ཟློག་༔ གཡས་གཤོག་དང་པོ་བརྡབས་
པ་ཡིས༔ འབྲུག་སེང་འཐབས་པའི་ལྟས་ངན་ཟློག༔ གཡས་གཤོག་གཉིས་བརྡབས་པ་ཡིས༔ སྟག་སེང་འཛིངས་བའི་ལྟས་ངན་ཟློག༔ གཡས་གཤོག་གསུམ་པ་བརྡབས་པ་ཡིས༔ བུད་མེད་རལ་འཛིངས་ལྟས་ངན་ཟློག༔ གཡས་གཤོག་བཞི་པ་བརྡབས་པ་ཡིས༔ དབྱིག་གི་ནོར་བུའི་ལྟས་ངན་ཟློག༔ གཡས་གཤོག་ལྔ་པ་བརྡབས་པ་ཡིས༔ ལྕི་བ་ཟས་ཀྱི་ལྟས་ངན་ཟློག༔ གཡོན་གཤོག་དང་པོ་བརྡབས་པ་ཡིས༔ མེ་ཏོག་བཅུད་ཉམས་ལྟས་ངན་ཟློག༔ གཡོན་གཤོག་གཉིས་པ་བརྡབས་པ་ཡིས༔ ལྡི་བས་སྐྱོད་པའི་ལྟས་ངན་ཟློག༔ གཡོན་གཤོག་
གསུམ་པ་བརྡབས་པ་ཡིས༔ གཏེར་གྱི་བཅུད་ཉམས་ལྟས་ངན་ཟློག༔ གཡོག་གཤོག་བཞི་པ་བརྡབས་པ་ཡིས༔ སེང་གེ་ངུ་འབོད་ལྟས་ངན་ཟློག༔ གཡོན་གཤོག་ལྔ་པ་བརྡབས་པ་ཡིས༔ རྣོ་དབལ་མཚོན་གྱི་ལྟས་ངན་ཟློག༔ རྨ་བྱ་གཡེང་བའི་ལྟས་ངན་ཟློག༔ གཡུ་སྒོང་སྔོན་པོ་ཡར་བ་ཟློག༔ ལྕགས་ཀྱི་སེར་བ་འབེབས་པ་ཟློག༔ ཤེལ་སྒོང་ནང་དུ་དུག་གཡོས་ཟློག༔ ཟངས་སྒོང་དམར་པོ་འདྲིལ་བ་ཟློག༔ ཉི་མ་སྤྲིན་གྱིས་འཁྲུགས་པ་ཟློག༔ འཚུབ་མ་མང་པོ་སྙིང་བཏགས་ཟློག༔ སེང་གེ་གངས་ནས་ལྷུང་བ་ཟློག༔ ཤེལ་གྱི་སྒོ་ང་ཡར་བ་ཟློག༔ སྤྲིན་ཆེན་ཡར་བའི་ལྟས་ངན་ཟློག༔ བོང་བུའི་བཅུད་ཟན་ཟག་པ་ཟློག༔ དབང་མོ་ཉི་ཤུ་རྩ་བརྒྱད་ཀྱི༔ ལྟས་ངན་བཅུ་གསུམ་སླར་ལ་ཟློག༔ ཁྱུང་གི་མཇུག་སྒྲོ་འབར་བ་ཡིས༔ སྤུ་སྡུག་ཉམས་པའི་ལྟས་ངན་ཟློག༔ རྒྱལ་མོ་བཞི་དང་བློན་མོ་བཞི༔ སྤྲུལ་པའི་འོད་ཕྲེང་ལྟས་ངན་ཟློག༔ ཧཱུྃ༔ ཁྲོ་རྒྱལ་ཁམས་གསུམ་ཧཱུཾ་སྒྲ་སྒྲོགས༔ ཟངས་ཁྲབ་གསོལ་ནས་མདུང་དམར་ཐོགས༔ བ་དན་རྩེ་གསུམ་གཡབ་པའི་ཚེ༔ ལྷ་སྲིན་དབང་སྡུད་དགྲ་བགེགས་གསོད༔ བདུད་དཔུང་འཇོམས་ཤིང་སྲོག་
དབུགས་དབང་༔ མདུང་དམར་དབལ་གྱིས་ལོག་འདྲེན་སྒྲོལ༔ དགྲ་བགེགས་ཐམས་ཅད་བཟློག་ཏུ་གསོལ༔ བྷྱོ་བྷྱོ་སྡང་བའི་དགྲ་ལ་བྷྱོ༔ ཟློག་ཟློག་གནོད་པའི་བགེགས་ལ་ཟློག༔ མདུན་བསྐྱེད་དབུ་ལ་ཁྱུང་གིས་བརྒྱན་པ་ལས་ཁྱུང་མང་པོ་འཕྲོས་པས༔ ལྟས་ངན་གཏད་སེལ་ཐམས་ཅད་གཤོག་པས་བརྡབ༔ རྭ་ཡིས་རྡུང་༔ མཆུ་ཟོས་ནས་བརླག་པར་སྒོམས༔ སྐབས་འདིར་ལྷག་མ་ཕུལ་ལ་རྩང་གྱེར་འདོན༔ ཅུང་གྱེར་མེད་ཀྱང་ཆོག་སྟེ་གཞུང་ནས་མ་གསུངས་སོ༔ དེ་ལྟར་ཞག་དུ་བྱེད་ལ་བཟློག་གཞུང་ཚར་རེའི་ཆོག༔ ཐུན་བཞིའམ་དྲུག་ལ་སོགས་ལ༔ ཐུན་མགོར་བསྙེན་པ་ཅི་ནུས་བྱེད༔ བདག་མདུན་གྱི་ལྷ་ཐམས་ཅད་ཀྱིས་སྔགས་སྒྲ་དི་རི་རི་སྒྲོག་པར་བསྒོམས་ལ༔ སྟོང་ཕྲག་གམ་ཅི་རིགས་དང་༔ ཐུན་མཇུག་ཏུ་ཟློག་སྔགས་འདི་ཉེར་གཅིག་གམ་བདུན་ཙམ་བརྗོད༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཧཱུྃ༔ བདུད་པྲ་མཱ་ར་ཡ་ཆད་ནན༔ ཁ་ལ་ཛ་མ་ལི་རྦད་ནན༔ རཱ་ཙ་དུ་ལིང་ཤག་རྦད་ནན༔ ཤིག་ཤིག་དུ་དུ་ཟད་ནན༔ ཚལ་པ་ཚལ་པ་ཟད་ནན༔ ཁྲོ་ཁྲོ་བྷྱོ་རྦད་ནན༔ རྨུགས་རྨུགས་ཆད་ནན༔ ཏིར་ཏིར་རྦད་ནན༔ ཚལ་ཚལ་རྦད་ནན༔ དེ་ནས་ཐུན་མཚམས་སུ་དམར་གཏོར་ཆུང་ངུ་བྲན་ལ༔ སྟོང་ཚིག་གིས་མཆོད་པ་བྱེད༔ ཧཱུྃ༔ ཡེ་ཤེས་ཕུར་པའི་ལྷ་ཚོགས་གནས་འདིར་གཤེགས༔
འཛབ་དགོངས་གྲངས་ཐེམས་སྨན་རཀ་གཏོར་མཆོད་འབུལ༔ སྐུ་གསུང་ཐུགས་ཡོན་ཕྲིན་ལས་རྫོགས་ལ་བསྟོད༔ རྩ་བ་ཡན་ལག་དམ་ཚིག་ཉམས་ཆག་བཤགས༔ རང་སེམས་དཔང་བཙུགས་བཀའ་བཞིན་བསྒྲུབས་ལགས་ན༔ སྐུ་གསུང་ཐུགས་ཡོན་དངོས་གྲུབ་མ་ལུས་སྩོལ༔ ཧཱུྃ༔ སྟོང་གསུམ་སྟོང་གི་འཇིག་རྟེན་འདིར༔ མཐུ་རྩལ་ཅན་རྣམས་དགོངས་སུ་གསོལ༔ དེ་ལྟར་བསྐྱངས་བསྐངས་གསོལ་གསོལ་ནས༔ ད་ནི་ཟློག་པའི་ཕྲིན་ལས་མཛོད༔ རྣལ་འབྱོར་བདག་ཅག་འཁོར་བཅས་ལ༔ ཡས་ཀྱི་བདུད་གཡོས་ཕྱིར་ལ་ཟློག༔ མས་ཀྱི་སྲི་ལངས་ཕྱིར་ལ་ཟློག༔ ཉེ་བའི་བྱོལ་གཏོ་ཕྱིར་ལ་ཟློག༔ ཆོད་གཏོང་རྦད་འདྲེ་ཕྱིར་ལ་ཟློག༔ ཕུར་ཁ་གཏད་ཁྲམ་ཕྱིར་ལ་ཟློག༔ ཕ་ཚན་རྒྱབ་འདྲེ་ཕྱིར་ལ་ཟློག༔ དར་ཚན་སྟོང་འདྲེ་ཕྱིར་ལ་ཟློག༔ གཤིན་རྗེའི་འཁོར་ལོ་ཕྱིར་ལ་ཟློག༔ མ་མོའི་དལ་ཡམས་ཕྱིར་ལ་ཟློག༔ བདུད་ཀྱི་ཁྲམ་ཁ་ཕྱིར་ལ་ཟློག༔ བཙན་གྱི་རྒྱན་ཁ་ཕྱིར་ལ་ཟློག༔ ཁྲག་ཟོར་ནད་ཟོར་ཕྱིར་ལ་ཟློག༔ ས་བདག་གདུག་བྱེད་ཕྱིར་ལ་ཟློག༔ རྒྱལ་པོའི་སྨྱོ་འདྲེ་ཕྱིར་ལ་ཟློག༔ གཟའ་ཡི་ཀིང་ཀང་ཕྱིར་ལ་ཟློག༔ མུ་སྟེགས་ངན་
སྔགས་ཕྱིར་ལ་ཟློག༔ ཐེའུ་རང་སྲི་རྐུན་ཕྱིར་ལ་ཟློག༔ ནད་ཁ་རིམས་ཁ་ཕྱིར་ལ་ཟློག༔ ལོ་ཀག་ཟླ་ཀག་ཕྱིར་ལ་ཟློག༔ མོ་ངན་རྨིས་ངན་ལྟས་ངན་ཟློག༔ ལྟས་ངན་བརྒྱད་ཅུ་རྩ་གཅིག་ཟློག༔ ཡེ་འདྲོགས་སུམ་བརྒྱ་དྲུག་ཅུ་ཟློག༔ གློ་བུར་དགུ་བཅུ་རྩ་གཅིག་ཟློག༔ དུས་མིན་འཆི་བ་རྣམ་བརྒྱད་ཟློག༔ གཡས་ནས་ཕོ་བརྒྱས་མདའ་འཕེན་ཟློག༔ གཡོན་ནས་མོ་བརྒྱས་དུག་གཡོས་ཟློག༔ མི་ནག་སྐྱེ་བོའི་ཡ་ཁ་ཟློག༔ བྲན་གཡོག་ངན་པའི་དམོད་ཁ་ཟློག༔ དགྲ་ལ་བློ་ཟློག་བསྒྲལ་དུ་གསོལ༔ བགེགས་ལ་བློ་ཟློག་རྡུལ་དུ་རློགས༔ ཞེས་གཏོར་ཆུང་མདོས་ནང་དུ་ཕུལ་ཞིང་ཐལ་མོ་བརྡབ་བོ༔ དེ་ལྟར་ཞག་བདུན་ནམ་དགུ་སོགས་བྱས་ན་གཏོར་སྒྲུབ་བསྙེན་སྒྲུབ་ཀྱི་གོ་ཡང་ཆོད་དེ༔ རྨི་ལམ་དུ་གནས་དང་རི་ལ་མེ་འབར་བ༔ ཕུར་པ་དང་༔ རྡོ་རྗེ༔ ཁཊཾ་སོགས་ཕྱག་མཚན་རྙེད་པ༔ མེ་ཏོག་སྔོན་པོ་ཐུ་བ༔ ནམ་མཁའ་ལ་འཕུར་བ༔ ཆུ་བོ་བརྒལ་བ༔ མཚོ་ཆེན་གཤགས་པ༔ གླང་གཡག་ཞོན་པ༔ ཞལ་མཇལ་ལུང་སྟོན་མར་མེ་འཛིན་པ༔ གཏོར་མ་དབྱར་མི་རུལ་དགུན་མི་འཁེངས༔ ནང་མཆོད་ཡོན་ཆབ་འཕྱུར་བ་སོགས་ལྷ་རྟགས་དང་༔ མཁར་བརྩེགས་པ་བཙན་ས་བཟུང་བ་གོ་ཁྲབ་གྱོན་པ༔ ར་བ་རིབ་ལ་སོགས་བསྲུང་བའི་རྟགས༔ དམག་དང་རྦབ་དང་སེར་བ་ཟློག་པ༔ ཕུར་པ་
དང་ཟོར་བཅག་པ༔ དཔའ་སེམས་སྐྱེ་བ་བཟློག་རྟགས༔ སེམས་ཅན་བསད་བརྡུང་བཅིངས་ཁ་བསྡམ་པ༔ ངུ་བ་ཕྱག་འཚལ་སྲོག་སྙིང་འབུལ་བ་ཐུལ་རྟགས་རྣམས་ཅི་རིགས་པ་འབྱུང་ངོ་༔ ཡང་དགུ་གཏོར་ལ་ཐེབ་དྲག་པོ་སོགས་ལ་ཉིན་རྫོགས་བྱེད་ནའང་ཆོག་སྟེ༔ གལ་ཆེ་ན་མདུན་བསྐྱེད་བསྒྲལ་ལས་བསྟབས་པ་ཞིག་བྱས་ལ༔ མཐེབ་སྐྱུས་གསོ་ཞིང་བྲན་ནས་བཟློག་གཞུང་དངོས་ཚར་གསུམ་སོགས་ཅི་ཐོན་འདོན་ནོ༔ དེ་ནས་ཟོར་འཕེན་ན༔ མདའ་ཡོད་ན་འུག་སྒྲོ་སོགས་གཞུང་ལྟར༔ མེད་ནའང་མདའ་དྲུག་གཞུ་དང་བཅས་པ༔ ཀོང་ཐོར་གཅིག༔ ཐོད་ཟོར་གཅིག༔ ཟོར་ཆེན་རུ་ཊའི་སྙིང་ཟོར་དང་དགུ་བཅའ་འོ༔ རས་སམ་བལ་གྱིས་ཟོར་རྣམས་བཀབ་ལ་བཞག༔ གཞུའི་མཆོག་གཉིས་ཆང་ཟུང་དང་གསུམ་ལ་དར་རམ་རས་བཏགས་སོ༔ གཏོར་རྫོངས་རྒྱུའི་གཏོར་ཆུང་སུམ་རྱ༔ དཀར་གཏོར་ཆད་མདོ༔ བརྟན་སྐྱོང་༔ ལྡང་ལྷ་གསུམ་དམར་གཏོར༔ གཞན་ཆོས་སྐྱོང་ཡོད་ན་གཏོར་འབུལ་རྒྱུ་བཅ༢༔ འབུལ་ཉིན་གཏོར་ཟློག་སྔ་ཚེ་ནས་ཚར་གཅིག་འདོན་ཚར་བ་དང་༔ ཟ་ལམ་སོགས་ཀྱང་བཀའ་བརྒྱུད་གཞུང་ལས་བླངས་སོ༔ ཞེས་གསུངས་པས༔ སྒོ་དབྱེ་ནི་སྒོ་རྩང་བཞི་ཤུབ་ཅིང་༔ ཧཱུྃ༔ ཤར་གྱི་ཕྱོགས་ཀྱི་སྒོ་མ་ནི༔ ཁྲོ་མོ་རྡོ་རྗེ་ལྕགས་ཀྱུ་མ༔ ཐུགས་རྗེའི་ཐབས་ཀྱི་ལྡེའུ་མིག་དང་༔ རྡོ་རྗེ་ལྕགས་ཀྱུའི་ཕྱག་རྒྱ་ཡིས༔ ཤར་ཕྱོགས་དུང་སྒོ་དཀར་པོ་ཕྱེས༔ སྒོ་མ་ཁྱོད་ཀྱི་དུས་ལ་བབ༔ གཏོར་མའི་ཟོར་
ལམ་དགྲ་ལ་བྷྱོ༔ ཛཿབཛྲ་པྲ་ཝེ་ཤ་ཡ་ཕཊ༔ ཧཱུྃ༔ ལྷོ་ཡི་ཕྱོགས་ཀྱི་སྒོ་མ་ནི༔ ཁྲོ་མོ་རྡོ་རྗེ་ཞགས་པ་མ༔ ཐུགས་རྗེའི་ཐབས་ཀྱི་ལྡེའུ་མིག་དང་༔ རྡོ་རྗེ་ཞགས་པའི་ཕྱག་རྒྱ་ཡིས༔ ལྷོ་ཕྱོགས་གསེར་སྒོ་སེར་པོ་ཕྱེས༔ སྒོ་མ་ཁྱོད་ཀྱི་དུས་ལ་བབ༔ གཏོར་མའི་ཟོར་ལམ་དགྲ་ལ་བྱོ༔ ཧཱུཾ་རཏྣ་པྲ་ཝེ་ཤ་ཡ་ཕཊ༔ ཧཱུྃ༔ ནུབ་ཀྱི་ཕྱོགས་ཀྱི་སྒོ་མ་ནི༔ ཁྲོ་མོ་རྡོ་རྗེ་ལྕགས་སྒྲོག་མ༔ ཐུགས་རྗེའི་ཐབས་ཀྱི་ལྡེའུ་མིག་དང་༔ རྡོ་རྗེ་ལྕགས་སྒྲོག་ཕྱག་རྒྱ་ཡིས༔ ནུབ་ཕྱོགས་ཟངས་སྒོ་དམར་པོ་ཕྱེས༔ སྒོ་མ་ཁྱོད་ཀྱི་དུས་ལ་བབ༔ གཏོར་མའི་ཟོར་ལམ་དགྲ་ལ་བྷྱོ༔ པཾ་པདྨ་པྲ་ཝེ་ཤ་ཡ་ཕཊ༔ ཧཱུྃ༔ བྱང་གི་ཕྱོགས་ཀྱི་སྒོ་མ་ནི༔ ཁྲོ་མོ་རྡོ་རྗེ་དྲིལ་བུ་མ༔ ཐུགས་རྗེའི་ཐབས་ཀྱི་ལྡེའུ་མིག་དང་༔ རྡོ་རྗེ་དྲིལ་བུའི་ཕྱག་རྒྱ་ཡིས༔ བྱང་ཕྱོགས་ལྕགས་སྒོ་ནག་པོ་ཕྱེས༔ སྒོ་མ་ཁྱོད་ཀྱི་དུས་ལ་བབ༔ གཏོར་མའི་ཟོར་ལམ་དགྲ་ལ་བྷྱོ༔ ཧོཀརྨ་པྲ་ཝེ་ཤ་ཡ་ཕཊ༔ དེ་ནས་གསེར་སྐྱེམས་གཅིག་འདིར་མཆོད་དེ༔ ཕུར་པ་རང་གཞུང་ངམ་གང་རུང་ལྟར་བྱ༔ དེ་ནས་མདོས་ཞལ་ཕྱིར་བསྒྱུར་ལ་གཏོར་ཆུང་སུམ་ཅུས་བསྐོར་ལ་བཤམས་ནས་རེ་རེ་ནས་བཟུང་སྟེ༔ ཕུར་པའི་བསྟོད་པ་ཟུར་འགེབས་གཙོ་བོ་ཡབ་
ཡུམ་གཉིས༔ ཁྲོ་བོ་སྤྱི༔ ཁྲོ་བོ་བཅུ༔ སྲས་མཆོག་ཕུར་སྲུང་བཅུ་དྲུག་གི་བསྟོད་པའི་མཇུག་ཏུ༔ ཕྱག་འཚལ་བསྟོད༔ དམ་རྫ་ས་བརྒྱན་པའི་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཅེས་བཏགས་ལ་གཏོར་མའི་བརྫོངས་བ་བྱས་ནས༔ ༈ ཧཱུྃ༔ རྡོ་རྗེ་གཞོན་ནུའི་རིག་འཛིན་རྣམས༔ སྲིད་པ་རྡོ་རྗེར་གྲུབ་མཛོད་ཅིག༔ སྲིད་པ་རྡོ་རྗེ་ཕུར་པའི་ལྷ༔ ཡེ་ཤེས་ཁྲོ་བོ་འགྲུབ་པར་མཛོད༔ དེང་སང་སྐྱ་རེངས་དང་པོ་ཤར༔ རྡོ་རྗེ་སྲིན་པོའི་ནམ་ཡང་ལངས༔ ལྷག་པའི་ལྷ་ཁྱོད་ཡར་ལ་བཞེངས༔ སྐུ་གསུང་ཐུགས་ཡོན་ཕྲིན་ལས་དང་༔ མཆོག་དང་ཐུན་མོང་དངོས་གྲུབ་སྩོལ༔ ཐུགས་མཆོག་དཔལ་གྱི་བེའུ་ནས༔ ཡེ་ཤེས་གསལ་བའི་ཉི་མ་ཤར༔ སྒྲུབ་མཆོག་རྣལ་འབྱོར་བདག་ཅག་གི༔ ལུས་ངག་ཡིད་ལ་སིདྡྷི་ཧཱུྃ༔ བཛྲ་ཀུ་མཱ་ར་ཀཱི་ལ་ཡ༔ ཀཱ་ཡ་སིདྡྷི་ཨོ༔ ཝཱཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱིཿ མ་ཏི་ཀྲ་མ་ཏི༔ ལྷ་ཚོགས་ཐམས་ཅད་ནམ་མཁར་བཏེག་ནས་བཞུགས་ཏེ༔ ཐུགས་རྗེའི་འོད་ཟེར་ཉི་མ་ཤར་བ་ལྟར་བདག་དང་ཡོན་བདག་ལ་ཕོག་པས་བར་ཆད་བསལ༔ དངོས་གྲུབ་ཐམས་ཅད་ཐོབ་པར་བསྒོམས་ནས་གཏོར་ཟློག་གོམ་པ་བདུན་གྱི་སར་དཔག་ལ་རཀྟས་བྲན་ནས༔ གཞུང་ནས་ཟ་ལམ་འདོན་
གསུངས་པ་ལྟར་སྲིན་མོ་ཟ་ལམ་འདོན་ནོ༔ ༈ དེ་ནས་འབུལ་ལུགས་བསྡུས་པ་གཏོར་སྐྱོང་ལུགས་དང་༔ འབྲིང་པོ་མདོས་ལུགས༔ རྒྱས་པར་ཟོར་ཐབས་དང་གསུམ་སྟེ༔ ཟོར་ཐབས་ལའང་ཟོར་དང་གཏོར་རྒྱབ་གཉིས་སོ༔ དང་པོ་སྨད་ཆ་ཟོར་ལས་འདོན༔ ཕྱོགས་གཙང་སར་འབུལ་རྒྱུ་བསྐུལ་ལ༔ དེ་ཚེ་བཟློག་སྔགས་འདོན་ལ་རྔ་རྡུང་༔ ཚུར་སླེབས་རྩ་རྟ་བྲོ་འདོན་པ་གཏོར་སྐྱོང་ལུགས་ཏེ་འཇམ༔ དེ་ཡང་གོམ་པ་བདུན་ཅུ་ལས་མི་ཉེ་བར་བསྐྱལ་ལོ༔ ཉེ་ན་འཁོར་ལ་གནོད༔ གཉིས་པ་ཕྱོགས་གཙང་སར༔ སྔོན་དུ་དཀར་བགེགས་ཁྱེར༔ དེ་ནས་ཆོས་སྐྱོང་གཏོར་མ་རྣམས༔ དེ་ནས་མདོས༔ དར་ནག་ཁྱེར༔ ཐང་ལ་བཞག༔ གསེར་སྐྱེམས་དཀར་གཏོར་འབུལ༔ དེ་ནས་ཟོར་འཕེན༔ ཟོར་ལིང་བསྲེགས་ཐལ་དམར་གཏོར་ཚོ་ལ་བཏབ༔ ཚད་མདོ༔ བརྟན་སྐྱོང་༔ ལྡང་ལྷ༔ ཆོས་སྐྱོང་གང་ཡོད་གཏོར་མ་རིམ་པར་འབུལ༔ དེ་ནས་མདོས་བཀྱག་ལ་ཐུན་གཏོར་ཟློག་ཐུང་འདོན༔ དེ་ནས་ཐང་ལ་བཞག་རྩང་ཤབ་ཅིང་༔ རྩེ་ཕར་བསྟན་ལ་གཏོར་ཟློག་འབུལ༔ གཏོར་མ་རྣམས་དངོས་གྲུབ་ཚུལ་དུ་བླངས༔ རྟ་བྲོ་བྱའོ༔ དེ་ནི་མདོས་འབུལ་ལུགས་སོ༔ ཟོར་ཐབས་ནི་གཞན་འདྲ་ལ༔ ཟོར་གྱི་རྗེས་ནས་ཟློག་པའི་མཐའ་སྐོར་གཏོར་ཆུང་རྩང་ཡོད་པ་ཉེར་གཅིག་དེ༔ དུག་མདའ་ནག་པོའི་ནང་༔ དབང་ཕྱུག་སྤྱི་ལ་གཅིག༔ བདུན་རེ་ལ་རེ་རེ་བྱས་པས་བཞི༔ དེ་ནས་བསྟོད་པའི་མཇུག་ཕུར་སྲུང་བཅུ་དྲུག་དང་ཉེར་གཅིག༔ སོ་སོའི་བསྟོད་བསྐུལ་བྱས་
ལ་རེ་རེ་ནས་འཕངས་ཏེ༔ སྤུ་གྲིའི་སྔགས་ཁོ་ནས་འཕང་ངོ་༔ དེ་ནས་གཏོར་འབུལ་རྣམས་བྱ༔ དེ་ནས་མདོས་བཀྱག་ལ་ཟློག་ཐུང་འདོན་ནས་ཕར་རྫོགས༔ གཏོར་རྒྱབ་ནི་ནད་པ་གདོན་ཆེན་ལ་བྱ་སྟེ༔ ཟོར་མི་འཕེན་པར་དཀར་གཏོར་གསེར་སྐྱེམས་འབུལ༔ རང་ཕྱོགས་གཙང་སར་ཞལ་གྱུ༔ མདུན་དུ་ནད་པ་ཉལ༔ སྲུང་འཁོར་བཀྲོལ༔ ནད་པའི་རྣམ་ཤེས་ཚེ་བསོད་ཐིག་ལེ་དཀར་པོ་ནམ་མཁར་ཡི་དམ་ཐུགས་ཀར་བསྟིམས༔ སྲུང་འཁོར་བསྒོམ་པར་བྱ་སྟེ༔ ལུས་ཧོམ་ཁུང་དུ་གྱུར་པའི་ནང་དུ་ནད་གདོན་གནོད་བྱེད་བྷི་ལ༔ གཏོར་མ་མེ་དཔུང་དུ་གྱུར་པ་བརྒྱབས་པས༔ གཞོབ་ཐུན་ཐུན་དུ་སོང་བར་ལྷོ་ཞིང་༔ ཆད་མདོ་སོགས་གཏོར་འབུལ་ཐམས་ཅད་རིམ་པར་བརྒྱབ་སྟེ༔ དམག་འཐབ་སྟེ་ལྷ་དྲགས་དྲགས་རྗེས་ནས་འདོན༔ དེ་ནས་གོང་ལྟར་གཏོར་ཆུང་ཉེར་གཅིག་བརྒྱབ༔ དེ་ནས་ཁྲོ་བཅུའི་མཚམས་གཅོད་དེ་འདོན་ཞིང་གཏོར་མ་བཅུ་པོ་བརྒྱབ༔ དེ་ནས་གཙོ་བོའི་བསྟོད་བསྐུལ་འདོན་ལ༔ གཙོ་བོའི་གཏོར་མ་ནད་པའི་སྟེང་དུ་ཕར་ཕུལ་ལོ༔ དེ་ནས་རྣམ་ཤེས་ཐིག་ལེ་མར་བསྟིམས་ནས་སྲུང་འཁོར་བསྒོམ་པར་བྱ་སྟེ༔ ནད་རིམས་ཚད་པ་གཉན་ལ་མི་རུང་ངོ་༔ གདོན་གཟའ་དང་མ་མོ༔ ཀླུ་གདོལ་བ་ལའང་མི་རུང་ངོ་༔ ནད་རླུང་ནད་སྲོག་རླུང་གཅོང་ནད༔ གདོན་རྒྱལ་འགོང་ཐེའུ་རང་འདྲེ་མོ་ཆུང་སྲི་ཤི་སྒབ་གཅོད་པ་ལ་ཟབ་བོ༔ གལ་ཏེ་ཟོར་འཕེན་ན༔ གསེར་སྐྱེམས་ཕྱོགས་དེར་གཏོར་ཞིང་༔ ཟོར་ལམ་ཕྱེ་བ་ནི༔ ཧཱུྃ༔ གཟུ་དང་དཔང་དུ་དཀོན་མཆོག་བཞུགས༔ མ་
ཉེས་ཞལ་ལྕེ་ལྷ་འདྲེས་ཆོད༔ རྣལ་འབྱོར་དབང་ཕྱུག་ཟོར་འཕེན་ནོ༔ དགྲ་བགེགས་མ་གཏོགས་སྐུ་བཟུར་ཅིག༔ ཕྱོགས་བཞི་མཚམས་བརྒྱད་སྟེང་འོག་ན༔ སྣང་སྲིད་ལྷ་འདྲེ་བཞུགས་པ་རྣམས༔ མཐོ་བ་རྣམས་ཀྱིས་ཞབས་སྡུས་ཤིག༔ དམའ་བ་རྣམས་ཀྱིས་དབུ་ཆུམས་ཤིག༔ བར་ན་བཞུགས་པའི་སྐུ་བཟུར་ཅིག༔ དབུ་ཞབས་ཀུན་ལ་ཕོག་པར་སྲིད༔ སོ་སོའི་ཕོ་བྲང་སྒོ་སྡོམས་ཤིག༔ སྟེང་གི་ལྷ་ལ་ཟོར་མི་འཕེན༔ ཚངས་པ་བརྒྱ་བྱིན་སྐུ་བཟུར་ཅིག༔ འོག་གི་ཀླུ་ལ་ཟོར་མི་འཕེན༔ དགའ་བོ་འཇོག་པོ་སྐུ་བཟུར་ཅིག༔ བར་སྣང་གཉན་ལ་ཟོར་མི་འཕེན༔ གཉན་ཆེན་ཐམས་ཅད་སྐུ་བཟུར་ཅིག༔ ལྷ་སྲིན་སྡེ་བརྒྱད་ཐམས་ཅད་ཀྱང་༔ གསེར་སྐྱེམས་དམ་པ་འདི་གསོལ་ལ༔ དཔལ་གྱི་གཏོར་ཟོར་ལམ་ཕྱེས་ཤིག༔ ཁྲག་ཐུན་ཕུར་པ་གཏོར་མ་བཅས༔ སྡང་དགྲ་གནོད་བགེགས་རྣམས་ལ་འཕེན༔ ཟ་འདྲེ་ཕུང་སྲི་རྣམས་ལ་འཕེན༔ ཕར་འཕེན་ཚུར་ལ་མ་ལྡོག་ཅིག༔ རྣལ་འབྱོར་བསམ་པ་འགྲུབ་པར་མཛོད༔ དེ་ནས་ཟོར་གཞུ་ལག་ཏུ་ཐོགས་ལ༔ མཐེབ་ཆུང་གཞུ་སྐུད་སྤྲེང་སྒྲ་བསྒྲགས་ལ༔ ཧཱུྃ༔ གཞུ་ནི་གནམ་ལྕགས་ཞུན་མ་ལ༔ ཟངས་ལྕགས་ཞུན་
མའི་རྒྱུན་ཐག་སྟེ༔ གང་གང་ཚུམས་ཆུམས་རྣོ་དྲག་བཞེས་སུ་གསོལ༔ རི་བོང་གི་མགོ་ཡོད་དམ་མེད་ན་ས་ལ་རི་བོང་གི་མགོ་བཟོས་པའི་ཁར་ལིངྒ་བཅུག་ལ་དེ་ལ་མདའ་ཟོར་བརྡེག་གོ༔ མདའ་གསིལ་ཞིང་༔ ཧཱུྃ༔ མདའ་ནི་ལྕགས་མཚོན་དྲག་པོ་ལ༔ མཛེས་པའི་གནམ་ལྕགས་རྡོ་རྗེའི་མདའ༔ ཐབས་ཀྱི་གཤོག་འབར་བཞི་ཡིས་སྒྲོན༔ མདའ་གཞི་གློག་ལྟར་འཁྱུགས་པའི་མདའ༔ དྲག་འཕང་གནོད་བྱེད་ཙིཏྟ་འབིགས༔ དེ་ནས་རྩེ་སྟོང་སྤྲད་ཅིང་༔ ཧཱུྃ༔ མིང་པོ་རྡོ་རྗེས་གོ་གྱོན་ལ༔ སྲིང་མོ་རྡོ་རྗེས་མཚོན་ཐོགས་ཤིག༔ མིང་པོ་རྡོ་རྗེས་གཡུལ་ཤོམས་ཤིག ། སྲིང་མོ་རྡོ་རྗེས་དམག་སྣ་དྲོངས༔ དགྲ་བོའི་ཡུལ་དུ་དམག་སྣ་དྲོངས༔ དགྲ་བླའི་རྒྱལ་པོ་དམག་ལ་འདུས༔ བདུད་ཀྱི་ཡུལ་དུ་ཟོར་འཕེན་ན༔ དམག་གི་རྒྱལ་མོས་ཟོར་སྣ་དྲོངས༔ ད་ནི་འཕངས་པའི་དུས་ལ་བབས༔ སྟེང་གི་ལྷ་ལ་ཟོར་མི་འཕེན༔ སྟེང་གི་ལྷ་ཡང་དཔང་མཛོད་ཅིག༔ འོག་གི་ཀླུ་ལ་ཟོར་མི་འཕེན༔ འོག་གི་ཀླུ་ཡང་དཔང་མཛོད་ཅིག༔ བར་གྱི་ལྷ་སྲིན་རྣམས་ལ་ཟོར་མི་འཕེན༔ བར་གྱི་ལྷ་སྲིན་རྣམས་ཀྱང་དཔང་མཛོད་ཅིག༔ ཕོ་ལྷ་གཉན་ལ་ཟེར་མི་འཕེན༔ ཕོ་ལྷ་གཉན་ཡང་དཔང་མཛོད་ཅིག༔ དགྲ་
ལྷ་གཉན་ལ་ཟོར་མི་འཕེན༔ དགྲ་ལྷ་གཉན་ཡང་དཔང་མཛོད་ཅིག༔ བར་གྱི་གཉན་ལ་ཟེར་མི་འཕེན༔ བར་གྱི་གཉན་ཡང་དཔང་མཛོད་ཅིག༔ འགོ་བའི་ལྷ་ལ་ཟོར་མི་འཕེན༔ འགོ་བའི་ལྷ་ཡང་དཔང་མཛོད་ཅིག༔ གཅེས་པའི་སྲུང་མ་རྣམས་ལ་ཟོར་མི་འཕེན༔ གཅེས་པའི་སྲུང་མ་རྣམས་ཀྱང་དཔང་མཛོད་ཅིག༔ ཕྱུགས་ལྷ་རྨ་གཡང་རྣམས་ལ་ཟོར་མི་འཕེན༔ ཕྱུགས་ལྷ་རྨ་གཡང་རྣམས་ཀྱང་དཔང་མཛོད་ཅིག༔ ཡུལ་ལྷ་གཞི་བདག་རྣམས་ལ་ཟོར་མི་འཕེན༔ ཡུལ་ལྷ་གཞི་བདག་རྣམས་ཀྱང་དཔང་མཛོད་ཅིག༔ ཟོར་འཕེན་སྡང་བའི་དགྲ་ལ་འཕེན༔ ཟོར་འཕེན་གནོད་པའི་བགེགས་ལ་འཕེན་དམིགས་པའི་དགྲའ་བོ་འདི་ལ་འཕེན༔ བསྲེ་ཡི་ཐག་པ་ལ༔ གསེར་གྱི་བྲུལ་ཞིག་བཏང་༔ ལྕགས་ཀྱི་མཆོག་མ་ལ༔ ཟངས་ཀྱི་སྣལ་མས་བསྡམས༔ འབྲོང་རྒོད་རྒྱུས་ཀྱིས་སྦས༔ དབང་གི་ཟོར་གཞུ་བྱས༔ ལྷོ་ཁ་མོན་ཡུལ་ནས༔ བསྲེ་སྨྱུག་ལྡེམ་པ་བཏུས༔ ལྕགས་བྲག་གསེར་ཤོད་ནས༔ གནམ་ལྕགས་མདེལ་གྱིས་མཐུད༔ བྲག་བྱ་འུག་པ་དང་༔ རིག་པ་ཕོ་རོག་བསད༔ མདའ་ལ་སྒྲོ་ཡིས་བསྒྲོན༔ འབྲོང་བུའི་སྤྱན་
གྱིས་བསྡམས༔ གདུག་ཤིང་ཚེར་མ་ཅན༔ ཟུར་གསུམ་རྣོ་པོར་བཞོགས༔ མདའ་ཡི་མདེའུ་བཙུགས༔ བསྲེ་མདའ་རྒྱུས་པས་དཀྲིས༔ བསྲེ་ཡི་སྐྱེས་བུའི་ཕྱག་ཏུ་གཏད༔ མདའ་ཟོར་འཕང་བའི་དུས་ལ་བབ༔ སྡང་བར་བྱེད་པའི་དགྲ་ལ་ཡ༔ གནོད་པར་བྱེད་པའི་བགེགས་ལ་ཡ༔ དམིགས་པའི་དགྲ་བགེགས་འདི་ལ་ཡ༔ མདེའུ་རྩེ་ལ་བཅིངས་སམ༔ གྲོ་ག་ལ་མེ་སྦར་བ་མདེའུ་ལ་བཅིངས་ཏེ༔ ཁཱ་ཁཱ་རཀཱ་མ་མ་བྷྱོ་བྷྱོ༔ བཛྲ་ནག་ཁྲིད་དུཏྟཾ་བྷྱོ༔ ཞེས་འཕང་༔ ཁ་ཤར་དུ་རྒྱུ་མདའ་རྒོད་སྒྲོ་མ་བཀང་ལ་ཧཱུྃ༔ ནམ་མཁའི་འོད་ཀྱི་དཀྱིལ་འཁོར་རྟོ་ནས༔ རྒོད་ཀྱི་མགོ་སྟེ་ཕྲ་མེན་མ༔ ཀྲོ་ཏ་ཧ་ཧ་བརྗོད་ནས་ཀྱང་༔ ཤར་གྱི་ཕྱོགས་སུ་ཁ་བལྟས་ནས༔ རླུང་ཤུགས་དྲག་པོའི་བསྐྱོད་པ་འདི༔ དཀར་ནག་མཚམས་སུ་བརྒྱབས་པ་ཡིས༔ དྲན་པ་མེད་པར་འཆི་བར་ངེས༔ ཤར་དུ་བཀང་ལ་མདུན་གྱི་ལིང་ལ་བརྒྱབ༔ ཀྲི་ཏ་མུ་ཁ་ཛཆུད༔ ཁ་ལྷོར་བལྟས་འུག་སྒྲོ་མ་བཀང་ལ༔ ཧཱུྃ༔ ལྕགས་སྟོང་འབར་བའི་དཀྱིལ་འཁོར་ནས༔ བསྲེ་མདའ་འུག་པའི་མགོ་བོ་ཅན༔ ཧེ་ཧེ་ཐང་གསུམ་བརྗོད་ནས་ཀྱང་༔ ལྷོ་ཡི་ཕྱོགས་སུ་ཁ་བལྟས་ནས༔ གསེར་མིག་གསལ་བའི་མིག་བཙུམས་ནས༔
རཱ་ཙ་ཞེས་པའི་སྔག་བཟླས་ནས༔ ལྟོང་དམར་འུག་པས་བསྒྲོན་པའི་མདའ༔ གང་ལ་དམིགས་ཏེ་འཕངས་བྱས་ནས༔ ཐེ་ཚོམ་མེད་པར་འཆི་བར་འགྱུར༔ ལྷོར་བཀང་ནས་ལིངྒར་བརྒྱབ༔ ཧུ་ལུ་མུ་ཁ་མཱ་ར་ཡ་ཧཱུྃ་ཕཊ༔ ནུབ་ཏུ་ཁ་བལྟས་ལ་ཁྲ་སྒྲོ་མ་རྩེ་སྟོང་སྤྱད་ལ༔ ཧཱུྃ༔ ཞེ་སྡང་འབར་བའི་དཀྱིལ་འཁོར་ནས་ལྕགས་ཀྱི་བྱ་ཁྲ་འབར་བ་ལ༔ ནུབ་ཀྱི་ཕྱོགས་སུ་ཁ་བལྟས་ནས༔ སྟོང་དམར་ཁྲ་ཡི་སྒྲོ་བསྒྲོན་འདིས༔ སྡང་དགྲ་གནོད་བྱེད་གང་ཡང་རུང་༔ མཁལ་མ་སྙིང་དང་ནང་ཁྲོལ་རྣམས༔ ཞེ་སྡང་བསྐྱེད་ནས་ལེན་པར་བྱེད༔ ནུབ་ཏུ་བཀང་ནས་ལིངྐར་བརྒྱབ༔ རྭ་ཙ་མུ་ཁ་མཱ་ར་ཡ་ཕཊ་ཆད༔ བྱང་ཏུ་ཁ་བལྟས་བྱ་རོག་སྒྲོ་རྩེ་ལྟོང་སྤྲད་ལ༔ ཧཱུྃ༔ མཐིང་ནག་འབར་བའི་དཀྱིལ་འཁོར་ནས༔ བྱ་རོག་གདོང་སྟེ་ཕྲ་མེན་མ༔ ཀྲོག་སྒྲ་ཐང་གསུམ་བྱས་ནས་ནི༔ བྱང་གི་ཕྱོགས་སུ་ཁ་བལྟས་ནས༔ དང་རུ་གཡས་པས་བསྒྲོན་པའི་མདའ༔ སྡང་བའི་དགྲ་ལ་འཕངས་པའི་ཚེ༔ མཱ་ར་ཡ་ཡི་སྔགས་བཟླས་ཤིང་༔ ཀླད་པའི་སྟེང་དུ་བརྒྱབ་པའི་ཚེ༔ སྨྲ་ཉམས་མེད་པར་འཆི་བར་འགྱུར༔ བྱང་ཏུ་བཀང་ནས་ལིངྒར་བརྒྱབ༔ ཁྭ་ཁ་མུ་ཁ་མཱ་ར་ཡ་ཐུན་ཡ༔ དེ་དག་གི་ཚེ་མདའ་དེ་དག་ཕྲ་
མེན་དེ་དག་ཏུ་གྱུར་ནས་ཟང་ཟང་བྱུང་བ་དགྲ་བོའི་སྟེང་དུ་སོང་བར་བསྒོམ་མོ༔ དེ་ནས་མདའ་གཅིག་རྩེ་སྟོང་སྤྲད་ལ༔ བྷྱོ༔ ད་ནི་འཕེན་པའི་དུས་ལ་བབ༔ སྐྱེས་བུ་ཆེན་པོའི་དུས་ལ་བབ༔ དགྲ་བོའི་སྙིང་ལ་མདའ་ཟོར་ཡ༔ བསྲེ་ཡི་སྐྱེས་བུ་གདུག་པ་ཅན༔ ཆིབས་སུ་བསྲེ་རྟ་དམར་པོ་ཆིབས༔ སྐུ་ལ་བསྲེ་ཁྲབ་སྨུག་པོ་གསོལ༔ དབུ་ལ་བསྲེ་ཡི་རྨོག་ཞུ་གསོལ༔ ཕྱག་ན་བསྲེ་ཡི་མདུང་དམར་བསྣམས༔ ཁེངས་པར་བཀང་ལ་ཕོག་པ་རྒྱོབ༔ རྣམ་ཤེས་བརྒྱད་ལ་གཟེར་ཆེན་རྒྱོབ༔ གཞུ་མོའི་རྒྱུད་དུ་བརྡུང་བའི་མདའ༔ དམ་ཉམས་སྙིང་ལ་གཟེར་ཆེན་ཕོབ༔ དེ་ཡི་ཡུམ་ཆེན་གཏུམ་མོ་ནི༔ ནག་མོ་ཁ་ལ་དབང་ཕྱུག་གཙོ༔ རི་རབ་ངོས་ལ་སྐུ་བརྟེན་མ༔ ཕྱག་ནི་སྟོང་ཁམས་ཀུན་ཏུ་ཉུལ༔ ཚེ་དང་སྲོག་གི་བདག་མོ་བྱེད༔ ཞབས་ནི་རྒྱ་མཚོའི་གཏིང་ན་བརྐྱངས༔ ཀླུ་བྲན་རྣམས་དང་དགྱེས་སྡེ་མོ༔ ཁྱོད་ཀྱི་ཐུགས་དམ་དུས་ལ་བབ༔ དམ་ཉམས་དགྲ་བོ་ལས་ངན་གྱི༔ སྙིང་གི་དཀྱིལ་དུ་མདའ་ཟོར་རྒྱོབ༔ བྷྱོ༔ ཞེ་སྡང་རྡོ་རྗེ་མཐུ་མ་ཆུང་༔ འཕྲུལ་གྱི་མེ་ལོང་སྤྱན་མ་བརྟུལ༔ ཕྱག་གཡས་དེ་ནི་ཐེབ་མ་ཞན༔ བསྲེ་ཡི་ལག་འབྲས་བང་མ་བྲེལ༔ སྒང་ནན་སྒང་ཆུང་ནན་
མོ་ཆུང་༔ ཡུངས་ཀར་རྒྱལ་པོ་མཐུ་མ་ཆུང་༔ གདུག་པའི་ཟོར་མདའ་རྩལ་མ་ཞན༔ བསྲེ་ཡི་གཞུ་སྒྲ་འུ་རུ་རུ༔ ལྕགས་ཀྱི་མདའ་སྒྲ་ཤ་ར་ར༔ གཞུ་རྒྱུད་རྒྱུན་དུ་མ་ཆད་ཅིག༔ མདའ་འཕངས་སླར་ལ་མ་ལྡོག་ཅིག༔ མདེལ་གྱི་རྩེ་ལ་མེ་འབར་བས༔ གཟུགས་ཀྱི་ཕུང་པོ་གཏིང་ནས་སྲེགས༔ སྡང་བའི་དགྲ་ལ་མདའ་ཟོར་ཡ༔ བསམ་པར་བྱེད་པ་སྙིང་ཡིན་པས༔ སྙིང་གི་དཀྱིལ་དུ་མདའ་ཟོར་ཡ༔ ལྟ་བའི་མིག་ལ་མདའ་ཟོར་ཡ༔ ཉན་པའི་རྣ་བར་མདའ་ཟོར་ཡ༔ སྣོམ་པའི་སྣ་ལ་མདའ་ཟོར་ཡ༔ འགྲོ་བྱེད་རྐང་ལ་མདའ་ཟོར་ཡ༔ ཉུལ་བྱེད་ལག་ལ་མདའ་ཟོར་ཡ༔ སྲིད་པའི་ལྟེ་བའི་ནང་དུ་རྒྱོབ༔ ཆགས་པའི་གཞི་མ་དྲུངས་ནས་ཕྱུང་༔ དཔྲལ་བར་སྐུ་ཡི་མཚམས་སུ་རྒྱོབ༔ ཚེ་ཡི་ཕུང་པོ་གཏིང་ནས་ཤིག༔ སྟེང་གི་ཁྱོ་ལ་མདའ་ཟོར་ཡ༔ འོག་གི་ཆུང་མར་མདའ་ཟོར་ཡ༔ ཡུལ་མཁར་ཞིང་ལ་མདའ་ཟོར་ཡ༔ ཁྱད་པར་དམིགས་པའི་དགྲ་བགེགས་འདི་ལ་མདའ་ཟོར་ཡ༔ མཱ་ར་ཡ་བྷྱོ་བྱད་ཁ་ཕུར་ཁ་ཐམས་ཅད་ཟློག་ཅིག༔ ཅེས་རྒྱབ་བོ༔ དེ་ནས་ཀོང་ཟོར་ཐོགས་ལ༔ ཧཱུྃ༔ ང་ནི་རྡོ་རྗེ་གཞོན་ནུ་ཆེ༔ འཁོར་འདས་ཀུན་ལ་དབང་སྒྱུར་
ཞིང་༔ ང་ལས་ཆེ་བཙན་སུ་ཡང་མེད༔ སྟེང་འོག་ཕྱོགས་མཚམས་གནས་པ་ཡི༔ སྡེ་རྒྱད་ལྷ་ཀླུ་གཞི་བདག་རྣམས༔ ཀོང་ཟོར་མཚོན་ཆའི་ཟེར་འཕྲོས་པས༔ ལུས་སེམས་དེ་ནི་བརླག་པར་མཆིས༔ ཟོར་ལམ་ཕྱེས་ལ་སྐུ་བཟུར་ཅིག༔ བརྣག་པའི་དགྲ་བགེགས་མ་གཏོགས་པ༔ སེམས་ཅན་ཀུན་ལ་ཟེར་མི་འཕེན༔ ཀུན་ཀྱང་གྲོགས་མཛོད་དམག་དཔུང་བསྐྱེད༔ དམག་དཔུང་སྐྱེད་ལ་རུ་མཚོན་ཕྱོར༔ ཉམས་པའི་དམ་ཉམས་དགྲ་བགེགས་འདི༔ རྡུལ་ཕྲན་བཞིན་དུ་བརླག་པར་མཛོད༔ ཨོཾ་བཛྲ་ཙན་སརྦ་དུཥྚ་ཨེ་ཛ་བྷྱོ་ཧཱུྃ༔ ཞེས་འཕང་ངོ་༔ ཡོད་ན་ཕུར་པ༔ རྡོ་ཟོར༔ མཚེ་ཡུངས༔ ཁྲག་ཟོར་རྣམས་སོ་སོར་འཕངས༔ མེད་ན་གང་རུང་ཞིག་གིས་ཆོག༔ ཧཱུྃ༔ ང་ནི་རྡོ་རྗེ་གཞོན་ནུ་ཆེ༔ ང་ནི་ཁྲོ་རྒྱལ་ཀུན་གྱི་རྗེ༔ ང་ནི་ཁམས་གསུམ་སྙིང་རྗེའི་བདག༔ ང་ནི་གཤིན་རྗེ་ཀུན་གྱི་གཤེད༔ ང་ནི་མ་མོ་ཀུན་གྱི་ཡབ༔ ང་ལས་ཆེ་བཙན་སུ་ཡང་མེད༔ བཀའ་སྡོད་ཕོ་ཉ་ཡོངས་རྫོགས་རྣམས༔ དམག་དཔུང་བསྐྱེད་ལ་རུ་མཚོན་ཕྱོར༔ དམག་སྣ་དགྲ་བོའི་ཡུལ་དུ་དྲོངས༔ དམ་ཅན་དམག་དཔུང་ཉི་ལི་ལི༔ མཚོན་རྩེ་ཕུར་རྩེ་རངས་སེ་རང་༔ གཏོར་ཟོར་རྫོབ་ཏུ་ཉི་ལི་ལི༔ མཚེ་
ཡུངས་མདའ་ལྟར་ཤ་ར་ར༔ དུག་ཐུན་ཁྲག་རླངས་ཆི་ལི་ལི༔ སྲུང་མ་རྔམས་སྟབས་ཁྱུགས་སེ་ཁྱུག༔ གིང་རྣམས་བཤུག་པ་དི་རི་དི་རི༔ མ་མོའི་ཧབ་སྒྲ་ལྷབས་སེ་ལྷབ༔ ཐམས་ཅད་རུ་མཚོན་ལྷུབས་སེ་ལྷུབ༔ དགྲ་བགེག་སྙིང་ལ་ཕུར་རྡོ་མཆེ་ཡུངས་དུག་ཁྲག་ཟོར་རྒྱོབ༔ ཉམས་པའི་ལྔ་ཕུང་རྡུལ་དུ་རློགས༔ སྤུ་གྲིའི་སྔགས་ཤམ་དུ༔ ཧཱུྃ་ཧཱུྃ་སྤ་ར་བིགྷན་ཚིནྡྷ་ཚིན་ཧཱུྃ་ཕཊ༔ བྷནྡྷ་བྷནྡྷ་ཧཱུྃ་ཕཊ༔ གྷོཥྛ་བྷཾཏྟ་ཧཱུྃ་ཕཊ༔ ཧ་ན་ཧ་ན་ཧཱུྃ་ཕཊ༔ པ་ཙ་པ་ཙ་ཧཱུྃ་ཕཊ༔ བྷནྡྷ་བྷནྡྷ་ཧཱུྃ་ཕཊ༔ དགྲ་བགེག་གནོད་བྱེད་དམ་སྲི་ཧུར་ཐུམ་ཛམཱ་ར་ཡ་རྦད་རྦད༔ བྷྱོ་བྷྱོ༔ ཞེས་འཕང་ངོ་༔ དེ་ནས་ཟློག་མདོས་འདབས་ཀྱི་གཏོར་ཆུང་ཉེར་གཅིག༔ རྒྱས་པར་སོ་སོའི་བསྐུལ་འདོན་ཞིང་འཕངས༔ བསྡུ་ན་སྤུ་གྲིའི་སྔགས་འདོན་ཞིང་འཕང་ངོ་༔ དེ་ནས་ཟོར་ཆེན་ཐོགས་ལ༔ ཀྱེ༔ ཟོར་མེད་ངེས་པའི་རྣལ་འབྱོར་པ༔ བདག་ནི་རིག་འཛིན་སྒྲུབ་པ་པོ༔ འགྲོ་དོན་བྱང་ཆུབ་སྒྲུབ་པ་ལ༔ དམ་ཉམས་དགྲ་་བགེགས་བདུད་ཀྱིས་བརྙས༔ འདི་ཡི་དཔང་དང་གྲོགས་མཛོད་ཅིག༔ རྒྱལ་བ་ཐུགས་དམ་མ་གཡེལ་ཞིག༔ དམ་ཅན་མཐུ་རྩལ་མ་ཆུང་ཞིག༔ སངས་རྒྱས་བསྟན་པ་བཤིག་པ་
དང་༔ དཀོན་མཆོག་དབུ་འཕང་སྨད་པ་དང་༔ རྡོ་རྗེ་སློབ་དཔོན་མཆེད་ལྕམ་ལ༔ འཁུ་ཞིང་སྡང་བའི་དགྲ་དང་དང་བགེགས༔ བསྒྲལ་བའི་ཞིང་བཅུ་འདི་དག་ཀུན༔ དུས་འདིར་བརླག་པར་མ་བསྒྲལ་ན༔ རྒྱལ་བ་ཐུགས་རྗེ་མ་ཆུང་ངམ༔ དམ་ཅན་ནུས་མཐུ་མ་ཆུང་ངམ༔ རྣལ་འབྱོར་ཡི་ཡང་མི་ཆད་དམ༔ གནད་ནས་བསྐུལ་ལོ་ཐུགས་དམ་ཅན༔ དུས་ལ་བབ་བོ་ས་མ་ཡ༔ ཧཱུྃ༔ སྐུ་གསུམ་དག་པའི་ཕོ་བྲང་ནས༔ སྐུ་གསུམ་བཀའ་བརྒྱུད་བླ་མ༔ རྒྱལ་བ་དགོངས་པ་བརྒྱུད་པ༔ རིག་འཛིན་བརྡའི་བརྒྱུད་པ༔ གང་ཟག་སྙན་ཁུང་བརྒྱུད་པ༔ གཏེར་ཆོས་སྨོན་ལམ་བརྒྱུད་པ༔ མཁའ་འགྲོ་གཏད་རྒྱ་བརྒྱུད་པ༔ ཐམས་ཅད་ཐུགས་དམ་གནད་ནས་བསྐུལ་ལོ༔ དམ་ཉམས་དགྲ་བགེགས་སྒྲོལ་གི༔ པོའི་ཕྲིན་ལས་མཛོད་ཅིག༔ ཧཱུྃ༔ བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུ་ཡབ་ཡུམ་སྲས་བཞི་ཁྲོ་བཅུ་ཡབ་ཡུམ༔ ཟ་གསོད་ཕྲ་མེན་སྲུང་མ་བཅུ་གཉིས༔ ཕྱག་བརྙན་དང་བཅས་པ༔ ཕུར་པའི་ལྷ་ཚོགས་བདུན་ཅུ་རྩ་བརྒྱད་རྣམས་ཀྱང་༔ ཐུགས་དམ་གནད་ནས་བསྐུལ་ལོ༔ དམ་ཉམས་དགྲ་བགེགས་སྒྲོལ་
ཅིག༔ མངོན་སྤྱོད་དྲག་པོའི་ཕྲིན་ལས་མཛོད་ཅིག༔ སངས་རྒྱས་ཀྱི་བསྟན་པ་སྲུང་བར་ཞལ་གྱིས་བཞེས་པའི༔ ཕྱི་ཡི་ལྷ་མ་སྲིན་སྡེ་བརྒྱད༔ ནང་གི་ལྷ་མ་སྲིན་སྡེ་བརྒྱད༔ གསང་བའི་ལྷ་མ་སྲིན་སྡེ་བརྒྱད༔ སྦས་པའི་ལྷ་མ་སྲིན་སྡེ་བརྒྱད༔ ཡང་གསང་གི་ལྷ་མ་སྲིན་སྡེ་བརྒྱད༔ ལས་མྱུར་མགྱོགས་ཀྱི་ལྷ་སྲིན་སྡེ་བརྒྱད༔ དྲག་པོ་སྔགས་ཀྱི་ལྷ་སྲིན་སྡེ་བརྒྱད༔ བསྟན་པ་སྲུང་བའི་ལྷ་སྲིན་སྡེ་བརྒྱད༔ བཏགས་ཤིང་ཆགས་པའི་ལྷ་སྲིན་སྡེ་བརྒྱད༔ དྲག་པོ་སྔགས་ཀྱི་ལྷ་སྲིན་སྡེ་བརྒྱད༔ བསྟན་པ་སྲུང་བའི་ལྷ་སྲིན་སྡེ་བརྒྱད༔ བཏགས་ཤིང་ཆགས་པའི་ལྷ་སྲིན་སྡེ་བརྒྱད༔ གནོད་སྦྱིན་བྱེ་བྲག་གི་ལྷ་སྲིན་སྡེ་བརྒྱད༔ བླ་མ་བརྒྱད་པའི་སྲུང་མ༔ སློབ་དཔོན་བརྒྱུད་ཀྱི་སྲུང་མ༔ ཕ་མྱེས་བརྒྱུད་ཀྱི་སྲུང་མ༔ དབེན་གནས་གསར་རྙིང་གི་སྲུང་མ༔ ཉ་སྟོང་དུས་དྲུག་གི་སྲུང་མ༔ རིན་ཆེན་གཏེར་གྱི་སྲུང་མ༔ བརྟེན་བསྒྲུབས་མཆོད་ནས་ཆགས་པ༔ རང་བཞིན་ཤུགས་ཀྱིས་ཆགས་པ༔ སྐྱེ་བ་སྔོན་ནས་འབྲེལ་བའི་དམ་ཅན་གྱི་ཚོགས་ཐམས་ཅད༔ ཐུགས་དམ་གནད་ནས་བསྐུལ་ལོ༔ ་དམ་ཚིག་དུས་ལ་བབ་བོ༔ དམ་ཉམས་དགྲ་བགེགས་སྒྲོལ་ཅིག༔ བཅོལ་བའི་ཕྲིན་ལས་མཛོད་ཅིག༔ བསྒྲུབས་པའི་རྟགས་ཕྱུང་ཞིག༔ སྙན་པའི་སྒྲ་སྒྲོགས་ཤིག༔ སུ་ལ་མི་
རེ་ཁྱོད་ལ་རེའོ༔ སུ་ལ་མི་ལྟོས་ཁྱོད་ལ་ལྟོས་སོ༔ རྒྱལ་མཚན་དུ་ཁྱེད་འཛུགས་སོ༔ དཔའ་དར་དུ་ཁྱེད་ཕྱིར་རོ༔ སྡང་བའི་དགྲ་ཐུལ་ཞིག༔ གནོད་པའི་བགེགས་ཆོམས་ཤིག༔ རྣལ་འབྱོར་པ་དམ་ལྡན་བདག་གི་ཡུལ་དུ་འཁོར་སྲུངས་ཤིག༔ བྱེས་སུ་རྐྱེན་ཟློག་ཅིག༔ བསམ་པ་སྒྲུབས་ལ་རེ་བ་སྐོངས་ཤིག༔ སྤོ་ལ་དར་ཕྱོར་ཅིག༔ ཁྲོམ་དུ་དུང་བུས་ཤིག༔ མི་ནོར་ཕྱུགས་གསུམ་སྲུངས་ཤིག༔ ཆག་ཆེ་ཉམ་ང་ཟློག་ཅིག༔ ཆོད་གཏོང་རྦད་འདྲེ་ཟློག་ཅིག༔ རྨི་ལམ་རྟགས་དང་མཚན་མ་ངན་པ་ཟློག་ཅིག༔ རྣལ་འབྱོར་བདག་གི་འདོད་དོན་རེ་བ་ཡིད་བཞིན་དུ་སྒྲུབས་ཤིག༔ ༈ གཞན་ཡང་སངས་རྒྱས་ཀྱི་བསྟན་པ་བཤིག་པ༔ དཀོན་མཆོག་གི་དབུ་འཕང་སྨད་པ༔ རྡོ་རྗེ་སློབ་དཔོན་གྱི་སྐུ་དགྲ༔ མཆེད་དང་ལྕམ་དྲལ་གྱི་སྤྱི་དག༔ རྣལ་འབྱོར་པ་བདག་གི་སྒོས་དགྲ༔ སྔ་དགྲ་དར་བ༔ ད་དགྲ་བསྡོ་བ༔ ཕྱི་དགྲ་སེམས་པ༔ གཟུགས་ཅན་གྱི་དགྲ༔ གཟུགས་མེད་ཀྱི་བགེགས༔ བསྟན་པ་བཤིག་པའི་དགྲ་བགེགས་ཐམས་ཅད་ཐལ་བ་རྡུལ་དུ་རློགས་ཤིག༔ རྣལ་འབྱོར་པ་བདག་ཅག་འཁོར་དང་བཅས་པས་ནི་ཁ་ཡིས་མ་ལེན་ནོ༔ ལག་
གིས་མ་ཉེས་སོ༔ དམ་ཉམས་པའི་དགྲ་བགེགས་འདི་རྣམས་ཀྱིས༔ ཆོས་མཛད་ཡོངས་ཀྱི་སྐུ་ལ་བསྡོས་སོ༔ རིགས་ལ་བསྙགས་སོ༔ བསྟན་པ་བཤིག་་གོ༔ དམ་ཉམས་གནོད་བྱེད་དགྲ་བགེགས་འདི༔ ལས་ཀྱི་རླུང་གིས་རྒྱབ་ནས་ཕུལ་ཞིག༔ འཇིགས་པའི་མུན་ནག་གིས་མདུན་ནས་སུས་ཤིག༔ ཚེ་སྲོག་བསོད་ནམས་ཀྱི་ཀླུང་རྟ་སྦུབ་ཅིག༔ ཁ་རུ་ལག་ཆུག་ཅིག༔ ཁོང་ནས་སྙིང་ཕྱུང་ཞིག༔ སྲོག་རྩ་དམར་པོ་ཆོད་ཅིག༔ ལྟག་ནས་བདུད་ཆོད་ཅིག༔ གདོང་ནས་འོད་འཕྲོག་ཅིག༔ གནམ་གྱི་འཇུ་་ཐག་སྟེང་ནས་ཆོད་ཅིག༔ ས་ཡི་རྟེན་ཕུར་འོག་ནས་ཕྱུང་ཞིག༔ དཀོན་པའི་ཚེ་སྲོག་གཉིས་དང་ཕྲོལ་ཞིག༔ ཚེའི་འདུ་བྱེད་སྟུངས་ཤིག༔ ཡར་གྱི་སྲོག་སྒོ་ཕྱེས་ཤིག༔ མར་གྱི་དབུགས་སྒོ་ཕྱེས་ཤིག༔ སྟོད་ནས་ཚ་བ་མེ་ལྟར་འབར་དུ་ཆུག་ཅིག༔ སྨད་ནས་གྲང་བ་ཆུ་ལྟར་ཁོལ་དུ་ཆུག་ཅིག༔ ཚ་གྲང་རླུང་གསུམ་འཐབ་ཏུ་ཆུག་ཅིག༔ རླུང་མཁྲིས་བད་ཀན་འཁྲུགས་སུ་ཆུག་ཅིག༔ ཕོ་ལྷོག་དང་གཟེར་ནད་ཐོང་ཞིག༔ བལ་ནད་དང་གླང་ཐབས་ཐོང་ཞིག༔ མཛེ་ཤུ་དང་ཕོ་མིག་ཐོང་ཞིག༔ འབྲུམ་ནད་དང་ཀླད་གཟེར་ཐོང་
ཞིག༔ གག་ལྷོག་དང་འབྲས་གསུམ་ཐོང་ཞིག༔ འདུ་བ་རྣམ་བཞི་ཁོང་ནས་སློངས་ཤིག༔ དུག་གསུམ་གྱི་ཨར་ལ་གཏོད་ཅིག༔ མདའ་གྲི་དང་མདུང་གྲིས་སོད་ཅིག༔ འཐིབས་གྲི་དང་ལྕེབས་གྲིས་སོད་ཅིག༔ རྟ་གྲི་དང་རྦབ་གྲིས་སོད་ཅིག༔ སྨྱོ་འབོག་དང་བརྒྱལ་ནད་ཐོང་ཞིག༔ འོ་དོད་གནམ་དུ་འབོད་དུ་ཆུག་ཅིག༔ ལག་གཉིས་བྲང་ལ་རྒྱབ་ཏུ་ཆུག་ཅིག༔ སྨྲེ་སྔགས་ཆོ་ངེ་འདེབས་སུ་ཆུག་ཅིག༔ ལུས་ལ་མཚོན་གྱི་བསྐལ་པ་ཕོབ་ཅིག༔ མི་རུང་སྣ་དགུ་འཛོམ་དུ་ཆུག་ཅིག༔ ཁ་ཡི་སོ་རྣམས་སིལ་བུར་ཐོང་ཞིག༔ མིག་འབྲས་གཉིས་ཐང་ལ་ལྷུང་དུ་ཆུག་ཅིག༔ སྙིང་ཁྲག་དྲོན་མོ་ཐང་ལ་ཕོས་ཤིག༔ ཀླད་ཁྲག་དྲོན་མོ་ཞོ་ལྟར་བཞོས་ཤིག༔ འཁོར་ཤིག་ཚང་བྲུས་ཤིག༔ སྒོ་ཡི་ནོར་དང་ཕྲོལ་ཞིག༔ མཆན་གྱི་བུ་དང་ཕྲོལ་ཞིག༔ ཡུལ་གྱི་ཁང་ཁྱིམ་ཞིག་ཅིག༔ ཞིང་གི་སྐྱེ་རྒྱུད་ཆོད་ཅིག༔ ཡར་གྱི་ཕོ་རྒྱུད་རྩད་ནས་ཆོད་ཅིག༔ མར་གྱི་མོ་རྒྱུད་མངལ་ནས་སྐེམ་ཞིག༔ མིག་ལ་གཟའི་བསོར་རྡོ་གྱིས་ཤིག༔ སོ་ལ་ཐེའུ་རང་གིས་ཤཱ་རྡེལ་གྱིས་ཤིག༔ སྙིང་ལ་ཆོས་སྐྱོང་གིས་རྔམས་ཟས་གྱིས་ཤིག༔ གློ་མཆིན་ལ་བདུད་ཀྱིས་ཇུར་མིད་གྱིས་ཤིག༔ རྒྱུ་
མ་ལ་བཙན་གྱིས་ཞགས་པ་གྱིས་ཤིག༔ མཁལ་མ་ལ་འདྲེས་སྲང་རྡོ་གྱིས་ཤིག༔ པགས་པ་ལ་གིང་གིས་གཡང་གཞི་གྱིས་ཤིག༔ རུས་པ་ལ་སྡེ་དཔོན་གྱིས་ཁྲམ་མཁར་གྱིས་ཤིག༔ རྐང་པ་ལ་གཤིན་རྗེའི་དབྱུག་པ་གྱིས་ཤིག༔ ཐོད་པ་ལ་བདུད་པོའི་ཁ་ཕོར་གྱིས་ཤིག༔ རྩད་ནས་ཆོད་ལ་དྲུངས་ནས་ཕྱུང་ཞིག༔ ལྟས་ངན་དང་ཆོ་འཕྲུལ་ཐོང་ཞིག༔ མི་ཁ་དང་སྟབས་སྣོལ་ཐོང་ཞིག༔ ལོ་དང་ཟླ་བར་མ་བཞག༔ ཞག་དང་ཟ་མར་མ་བཞག༔ རྟགས་དང་མཚན་མ་ད་ལྟ་ཕྱུང་ཞིག༔ ནམ་མཁའ་སྟོང་པ་ལ་ཚད་མ་འཛུགས༔ ཚེ་ཕྱི་མ་ལ་དུས་མ་འདེབས༔ སྐྱེ་ཤི་གཉིས་ལ་ཁུང་མ་འབྱིན༔ ལས་ཀྱི་དབང་བཙན་ཞེ་སྙད་མ་འདོགས་པར༔ མྱུར་དུ་རྟགས་དང་མཚན་མ་སྟོན་ཅིག༔ ཁྱེད་ལ་གཏང་རག་གཉན་པོ་གཏང་ངོ་༔ རྣལ་འབྱོར་པ་བདག་གིས་བཅོལ་བའི་ཕྲིན་ལས་གཉན་པོ་མཛོད་ཅིག༔ སྤུ་གྲིའི་སྔགས་བཟླས་ཏེ་ཟོར་ཆེན་འཕངས༔ བཞེས་བཀྱག༔ དར་ནག་བརྡབ༔ ཤིང་ཏུ་གཉན་པས་གར་ཆེ་དུས་ལན་རེ་ཙམ་ལས་མི་རུང་༔ ཡིད་བཞིན་དུ་སྒྲུབས་ཤིག༔ ཡན་གྱིས་ཆོག་གོ༔ དེ་ནས་རལ་གྲི་ཐོགས་ལ༔ རང་ཉིད་ཁྲོ་བོ་བཅུའི་མི་གཡོ་མགོན་པོའི་ང་རྒྱལ་དུ་འཕོས་ཏེ༔ རལ་གྲི་སོ་ལ་ཛཿབྲིས་སམ་
བསྒོམས་ལ༔ ཧཱུྃ༔ ང་ནི་མི་གཡོ་མགོན་པོ་སྟེ༔ ཡེ་ཤེས་གློག་གི་རལ་གྲི་འདིས༔ སྐྱེ་ཤི་འཁོར་བ་རྒྱུན་བཅད་ནས༔ བླ་མེད་གནས་སུ་བསྒྲལ་བར་བྱ༔ ཏིག་ཏིག་ཚིན་ཚིན༔ མཱ་ར་ཡ་ཧཱུྃ་ཕཊ༔ ཅེས་རི་བོང་མགོ་དེ་དུམ་བུ་གསུམ་དུ་གཏུབས༔ ཤོག་ལིང་ཡོད་ན་བསྲེགས་ལ་ཐལ་བ་དམར་གཏོར་ཀུན་ལ་གཏོར༔ མགོ་དུམ་བུ་གཅིག་གཏོར་ཟློག་ནང་དུ་འབུལ༔ དུམ་བུ་གཅིག་དུམ་བུ་མང་དུ་བྱས་ལ་དམར་གཏོར་ཀུན་གྱི་ནང་དུ་ཕུལ༔ དུམ་བུ་གཅིག་ས་ལ་དོང་བྲུས་པར་སྦས་ལ་སྟེང་དུ་ས་ལ་རྡོ་རྗེ་རྒྱ་གྲམ་བྲིས་པས་མནན༔ རྗེས་ལ་དེའི་སྟེང་དུ་གཏོར་སྣོད་སྦུབ་ལ་རྟ་བྲོ་བྱའོ༔ རི་བོང་མགོ་དངོས་སམ་ཟན་ནམ་འཇིམ་པ་ལ་བཅའ་བས་ཆོག་གོ༔ དེ་ནས་གཏོར་ཟློག་བཀྱག་ནས༔ ཟློག་ཐུང་ཐུན་གཏོར་དེ་འདོན་ནས༔ གཏོར་མ་རྣམས་རྩེ་ཕར་བསྟན་ལ་བསྒྱེལ་ལོ༔ དེ་ནས་གཏོར་སྣོད་ཐམས་ཅད་སྤྲུབ་པའི་སྟེང་དུ༔ དར་ནག་སྦྲེལ་ལ་བཙུགས༔ གནོད་བྱེད་དམ་སྲི་སྒབ་འདྲེ་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག༔ ཛཿཧཱུྃ་བཾ་ཧོཿ ཧཱུྃ༔ ང་ནི་དཔལ་ཆེན་ཧེ་རུ་ཀ༔ བཅོམ་ལྡན་རྡོ་རྗེ་གཞོན་ནུའི་སྐུ༔ འཁོར་ལོ་རྒྱས་འདེབས་ཡུམ་དང་རོལ༔ ཕྱོགས་བཅུའི་ཁྲོ་རྒྱལ་ཡབ་ཡུམ་བཅས༔ ཕྱག་བརྙན་ཁྲ་ཐབས་སྒོ་མ་དང་༔ སྤྲུལ་པ་ཡང་སྤྲུལ་དཔག་མེད་བསྐོར༔ གཏུམ་ཆེན་དུས་མཐའི་
མེ་ལྟར་འབར༔ ཡེ་ཤེས་ཚྭ་ཚྭ་སྐར་ལྟར་འཁྲུགས༔ ཞལ་གསུམ་ཕྱག་དྲུག་ཞབས་བཞི་བསྒྲད༔ སྐུ་ལ་དུར་ཁྲོད་ཆས་རྣམས་རྫོགས༔ རྡོ་རྗེའི་གཤོག་པ་ཕྱོགས་བཅུར་གདེངས༔ ཧཱུྃ་གི་འབྲུག་སྒྲ་དི་རི་དི་རི༔ ཕཊ་ཀྱི་རྐན་སྒྲ་ཆེམས་སེ་ཆེམ༔ ཁྲོ་བོའི་གར་སྟབས་ཤིགས་སེ་ཤིག༔ རྡོ་རྗེའི་འགྲོས་སྟབས་ལམས་སེ་ལམ༔ གཡས་སུ་བསྐོར་ཏེ་དགྲ་ལ་བརྡུང་༔ དགྲ་ནི་དུམ་བུར་གཏུབས་པའི་བྲོ༔ གཡོན་དུ་བསྐོར་ཏེ་བགེགས་ལ་བརྡུང་༔ བདུད་བགེགས་ཕྱེ་མར་འཐགས་པའི་བྲོ༔ གཡས་གཡོན་ཐབས་ཤེས་སྲི་ལ་བརྡུང་༔ དམ་སྲི་ཐལ་བར་བརླག་པའི་བྲོ༔ བདུད་སྡེ་དཔུང་དང་དྲེགས་པའི་ཚོགས༔ གཞོབ་རྒོད་རྡོག་པས་བརྫིས་པ་བཞིན༔ ཐལ་བ་རྡུལ་དུ་བརླག་པར་བྱ༔ བསྐལ་པའི་མཐའ་རུ་ནྟཾ་བྷ་ཡ༔ ཨོཾ་སུཾ་བྷ་ནི་སོགས་ཧཱུྃ་བཞི་སྔགས་ཀྱི་མཐར། ཨོཾ་ལཾ་ཧཱུཾ་ལཾ་སྟེ་བྷ་ཡ་རཀྟ་མཱ་ར་ཡ་ནཱན༔ དེ་ནས་སློབ་དཔོན་རྗེས་ལ་བསྡད་ཅིང་ཕྱི་མིག་མི་ལྟ་བར་འོང་༔ ཡེ་ཤེས་ཀྱི་བྱ་ཁྱུང་རབ་ཏུ་ཁྲོས་པས་རྗེས་བཅད་པར་གྱུར་པར་བསྒོམ། ཨོཾ་ཁྲོ་གྷ་རུ་ཊ་ཙ་ལེ་ཙ་ལེ་ཧཱུྃ་ཕཊ༔ ཅེས་བརྗོད་ཅིང་ནང་དུ་འོང་༔ རྒྱས་པར་གྱུར་ན་དགའ་སྟོན་གྱི་ཚོགས་འཁོར་རང་གཞུང་ངམ༔ གཞན་གང་
རུང་ལྟར་ཚེ་འགུགས་དང་བཀྲ་ཤིས་བརྗོད༔ སྲུང་འཁོར་སྒོམ༔ རྗེས་ཆོག་བསྔོ་བ་སྨོན་ལམ་སོགས་སྤྱི་ལྟ་བྱ་ཞིང་༔ སྟོང་ཉིད་ཀྱི་ཉམས་ལེན་ཐུན་གཅིག་སྐྱོང་༔ ཞེས་བྱ་བ་འདི་ནི་ཕུར་ཟློག་ཁྲོ་རྒྱལ་སྟོབས་འདུས་དང་ཕུར་པའི་དབལ་ཟློག་ཟོར་ཐབས་སུ་བཅའ་བའི་ལུགས་ཡིན་ལ༔ དེ་གཉིས་གང་བྱེད་ཀྱང་གཞུང་གཅིག་པོ་དེ་བསྒྱུར་བ་མ་གཏོགས་འདྲ༔ དབལ་མདོས་མདོས་ཐབས་སུ་བཅའ་ནའང་བཅའ་ཚོགས་གཞུང་འདིའི་ཡིག་ཆུང་ལྟར་སོ་སོར་ཡིན་ཀྱང་འདོན་ལུགས་འདྲ༔ འདི་ལ་འདོན་ཆ་ས་ཕུར་སོགས་དང་༔ གཏེར་ཁ་གཞན་མ་བསྲེས་པར༔ རཏྣའི་རང་གཞུང་བསླད་མེད་ཡིན་པར༔ བཀའ་བརྒྱད་ནས་སབ་དགོས་གཞུང་ན་ཁ་འཕང་བ་ཡང་བཙུད་དེ༔ བལྟས་ཆོག་ཁྱེར་བདེ་བ་ནག་པོ་འགྲོ་ཤེས་སུ་བཀོད་པ་ཡིན་ལ༔ འདི་ཡི་བསྒྲལ་ཆོག་སོགས་གབ་འཁྲུགས་ཆེ་བས་བསྒྲིག་གལ་ཆེ་བར་སྣང་ཡང་༔ བསྒྲིགས་མ་ཁོམ་པར་ལུས༔ ཡོས་ལོ་སྣོན་ཟླ་བའི་ནང་དུ་ཤོར་ལུང་སྔགས་ཆུང་གསར་བུ་པུའི་མིང་ཅན་གྱིས་ཕུར་པ་དོན་དུ་གཉེར་བས༔ ཐག་རིང་ནས་ལན་གཉིས་བྱུང་ཞིང་ནན་གྱིས་བསྐུལ་བ་ལ་བརྟེན་ནས་བསྒྲིག་པ་ལ༔ འགལ་འཁྲུལ་ཉེས་པ་གང་མཆིས་བཤགས་ཤིང་༔ དགེ་བས་འགྲོ་ཀུན་རྡོ་རྗེ་གཞོན་ནུའི་གོ་འཕང་ཐོབ་པའི་ཕྱིར་དུ་བསྔོའོ༔ ཞེས་སྙིགས་དུས་ཀྱི་རིག་སྔགས་འཆང་བའི་རྣལ་འབྱོར་པ་༧ རཱ་ག་ཨ་སྱས་སོ༔ སརྦ་མངྒ་ལཾ། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།