སྒྲོལ་མའི་བསྟོད་པ།
ན་མོ་ཨརྱ་ཏཱ་རེ་ཡེ། བདེ་བ་ཅན་གྱི་ཞིང་ཁམས་དང་། །པོ་ཊ་ལ་ཡི་གནས་མཆོག་ནས། །འཕགས་པའི་སྤྱན་ཆབས་ལས་འཁྲུངས་ཤིང་། །དུས་གསུམ་རྒྱལ་ཚོ་བའི་ཕྲིན་ལས་མ། །ཡིད་བཞིན་འཁོར་ལོས་གཙོར་བྱས་པའི། །སྒྲོལ་མ་ཉི་ཤུ་རྩ་གཅིག་པོ། །གནས་འདིར་མྱུར་དུ་གཤེགས་སུ་གསོལ། །བདག་དང་བསྲུང་བྱ་ཐམས་ཅད་ཀྱི། །ནམ་མཁར་པད་ཟླའི་གདན་ལ་བཞུགས། །ལུས་དང་ལོངས་སྤྱོད་དགེ་རྩར་བཅས། །འཕགས་མའི་ཚོགས་ལ་མཆོད་པ་འབུལ། །འཇིགས་པ་ཀུན་ལས་བསྐྱབ་ཏུ་གསོལ། །སྟོན་ཟླའི་མདོག་ཅན་ཞལ་གཅིག་མ། །ཕྱག་གཉིས་མཆོག་སྦྱིན་ཨུཏྤལ་བསྣམས། །ཁྱེད་ལ་ཕྱག་འཚལ་གསོལ་བ་འདེབས། །དམར་མོ་ཞལ་གཅིག་ཕྱག་བརྒྱད་མ། །རྡོར་དྲིལ་སྤྱིར་བསྣམས་མདའ་གཞུ་དང་། །འཁོར་ལོ་རལ་གྲི་དུང་ཞིགས་བསྣམས། །རབ་ཏུ་དཔའ་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །དཀར་སེར་དམར་བའི་ཞལ་གསུམ་མ། །བཅུ་གཉིས་ཕྱག་གི་མཉམ་བཞག་དང་། །ཁ་ཊཾ་འཁོར་ལོ་ནོར་བུ་དང་། །རྡོ་རྗེ་མེ་ཏོག་ཕྲེང་བ་གཡས། །རིལ་བ་ཨུཏྤལ་དྲིལ་བུ་
དང་། །བུམ་པ་པོ་ཏི་གཡོན་ན་བསྣམས། །དཀར་མོ་ཟླ་མདངས་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །མདོག་སེར་པདྨ་ཉི་མའི་སྟེང་། །ཕྱག་བཅུར་ཐུགས་ཀར་ཕྲེང་བ་དང་། །རལ་གྲི་མདའ་དང་རྩེ་ལྔ་དང་། །དབྱུག་གུ་གཡས་ན་བསྣམས་པ་དང་། །དར་དཔྱང་ཞགས་པ་པདྨ་དང་། །དྲིལ་བུ་གཞུ་ནི་གཡོན་ན་བསྣམས། །གསེར་མདོག་ཅན་གྱི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །གསེར་མདོག་ཕྱག་ནི་བཅུ་གཉིས་ཀྱི། །དང་པོ་གཉིས་ནི་མཉམ་བཞག་སྟེ། །ཁ་ཊཱ་འཁོར་ལོ་ནོར་བུ་དང་། །རྡོ་རྗེ་གཡས་ན་བསྣམས་པ་སྟེ། །མེ་ཏོག་ཕྲེང་བ་སྤྱི་བླུགས་དང་། །ཨུཏྤལ་དྲིལ་བུ་བུམ་པ་དང་། །པུ་སྟི་གཡོན་པའི་ཕྱག་ན་བསྣམས། །གཙུག་ཏོར་རྒྱལ་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །གསེར་མདོག་ཞལ་གཅིག་ཕྱག་གཉིས་མ། །སྐྱབས་སྦྱིན་པདྨ་སེར་པོ་འཛིན། །མ་རུངས་འདུལ་ཞིང་ཧཱུཾ་སྒྲ་སྒྲོག ། གསེར་གྱི་མདངས་ལྡན་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །ཆུ་སྐྱེས་དམར་དང་ཉི་མའི་སྟེང་། །རཱ་གའི་མདོག་ཅན་ཕྱག་བཞི་མ། །རལ་གྲི་ཞགས་པ་སྡིག་
མཛུབ་ཞགས། །རྣམས་པར་གསལ་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །ཁྲོ་མོ་ནག་མོ་ན་བཟའ་སེར། །ཕྱག་བཞི་འཁོར་ལོ་རལ་གྲི་དང་། །ཞགས་པ་སྡིགས་མཛུབ་རིབ་ཏུ་གདེངས། །སྦྲུལ་གྱི་བརྒྱན་ཅིང་འདོར་སྟབས་བསྒྲད། །རྒོལ་བ་འཇོམས་པའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །པདྨ་དམར་དང་ཆུ་སྲིན་སྟེང་། །གསེར་མདོག་སྐྱིལ་ཀྲུང་ཕྱེད་པས་བཞུགས། །ཁྲོ་མོའི་ཕྱག་ནི་བཞི་པ་ནི། །མྱ་ངན་མེད་པའི་ཡལ་ག་དང་། །རིན་ཆེན་པདྨ་བུམ་པ་འཛིན་། །དབང་མཆོག་སྟེར་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །ལྗང་མོ་ཞལ་གཅིག་ཕྱག་གཉིས་མ། །མཆོག་སྦྱིན་སྐྱབས་སྦྱིན་ཨུཏྤལ་བསྣམས། །བརྐྱང་བསྐུམ་རོལ་སྟབས་པད་ཟླར་བཞུགས། །སེང་ལྡེང་ནགས་ཀྱི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །དམར་མོ་ཞལ་གཅིག་ཕྱག་བཞི་མ། །དང་པོ་སྤྱི་བོར་ཐལ་མོ་སྦྱར། །རལ་གྲི་མྱ་ངན་མེད་ཤིང་འོག །རོལ་སྟབས་ཟླ་བ་པད་དམར་སྟེང་། །མྱ་ངན་མེད་པའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །མདོག་
ནག་ཁྲོ་མོ་ཞལ་གཅིག་མ། །ཕྱག་གཉིས་ལྕགས་ཀྱུ་ཞགས་པ་བསྣམས། །པདྨ་ཉི་སྟེང་གཡས་བརྐྱང་འགྱིང་། །འགྲོ་བ་འགུགས་པའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །གསེར་མདོག་ཞལ་གཅིག་རྡོལ་སྐྱིལ་བཞུགས། །ཕྱག་བརྒྱད་རྩེ་གསུམ་ལྕགས་ཀྱུ་དང་། །རྡོ་རྗེ་རལ་གྲི་གཡས་ན་བསྣམས། །ནོར་བུ་ལྕགས་ཀྱུ་དབྱུག་བུམ་གཡོན། །བཀྲ་ཤིས་སྣང་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །མདོག་དམར་ཞལ་གཅིག་ཕྱག་བཞི་མ། །རལ་གྲི་འཁོར་ལོ་མདའ་གཞུ་བསྣམས་། །ཁྲོ་མོ་མེ་འབར་ཉི་མའི་སྟེང་། །སྨིན་པར་བྱེད་པའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །ནག་མོ་གཡས་བརྐྱང་མི་རོ་མནན། །གཡས་དཀར་གཡོན་དམར་རྒྱུ་མ་གསོལ། །རལ་གྲི་དབྱུག་གུ་ལྕགས་ཀྱུ་གཡས། །ཐོད་པ་ཞགས་པ་ཚངས་པའི་བུ། །གཡོན་བསྣམས་ཁྲོ་མོའི་ཆ་ལུགས་རྫོགས། །ཁྲོ་གཉེར་གཡོ་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །ཟླ་མདོག་རྡོ་རྗེའི་སྐྱིལ་ཀྲུང་བཞུགས། །ཞལ་གཅིག་ཕྱག་ནི་དྲུག་མ་སྟེ། །བགྲང་ཕྲེང་མཆོག་སྦྱིན་དབྱུག་གུ་
གཡས། །པདྨ་དྲིལ་བུ་ཨུཏྤལ་ཏེ། །པོ་ཏི་འཛིན་ཅིང་པད་ཟླར་བཞུགས། །བདེ་ལེགས་ཞི་བའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །མདོག་དམར་ཞལ་གཅིག་སྤྱན་གསུམ་མ། །ཕྱག་གཉིས་ཤིང་འབྲས་སྡིགས་མཛུབ་ཕྱར། །དམར་སེར་པདྨ་ཉི་མའི་གདན། །སེམས་དཔའི་སྐྱིལ་ཀྲུང་བཅས་མཛད་མ། །ཆགས་པ་འཇོམས་པའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །དམར་གསལ་ཞལ་གཅིག་ཕྱག་གཉིས་མ། །ཕྱག་གཉིས་འཇིགས་པའི་ཕྱག་རྒྱ་ཡིས། །ཟླ་བ་ཐུགས་ཀར་རབ་ཏུ་བསྣམས། །བདེ་བ་ཀུན་སྒྲུབ་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །པད་དཀར་ཟླ་བ་ངང་པའི་སྟེང་། །དུང་མདོག་སེམས་དཔའི་སྐྱིལ་ཀྲུང་བཞུགས། །ཕྱག་གཉིས་སྤྱི་བོར་ལྕགས་ཀྱུ་འཛིན། །མཆོག་སྦྱིན་གཡོན་པས་ཨུཏྤལ་སྟེང་། །པོ་ཏི་འཛིན་ཅིང་རྒྱན་དང་བཅས། །རྣམ་པར་རྒྱལ་བའི་སྒྲོལ་མ་ལ། ། གསོལ་བ་འདེབས་སོ་ཐུགས་རྗེས་ཟུང་། །པད་དཀར་ཉི་སྟེང་སེམས་སྐྱིལ་བཞུགས། །མདོག་དཀར་ཕྱག་གཉིས་ཐུགས་ཀ་རུ། །མེ་ཐབ་བསྣམས་པས་སྡུག་བསྔལ་བསྲེགས། །
སྡུག་བསྔལ་སྲེག་པའི་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །ཁྱུ་མཆོག་པདྨ་ཟླ་བའི་སྟེང་། །ཕྱེད་སྐྱིལ་རོལ་སྟབས་སྐུ་མདོག་དཀར། །སྤྱན་གསུམ་སྟག་ཤམ་དུར་ཁྲོད་ཆས། །རྩེ་གསུམ་མེ་ཏོག་ཕྲེང་བ་བསྣམས། །ཡོངས་སུ་རྫོགས་བྱེད་སྒྲོལ་མ་ལ། །གསོལ་བ་འདེབས་སོ་ཐུགས་རྗེས་ཟུང་། །གཙོ་བོ་ཡིད་བཞིན་འཁོར་ལོ་དང་། །སྒྲོལ་མ་ཉི་ཤུ་རྩ་གཅིག་ལ། །གསོལ་བ་འདེབས་སོ་ཐུགས་རྗེས་ཟུང་། །སྤྱིར་དུ་སེམས་ཅན་ཐམས་ཅད་དང་། །ཁྱད་པར་བདག་ཅག་བརྒྱུད་པར་བཅས། །འཁོར་བའི་སྡུག་བསྔལ་ཐམས་ཅད་དང་། །ཁྱད་པར་དུས་ངན་སྙིགས་མ་ཡི། །འཇིགས་པ་བརྒྱུད་དང་བཅུ་དྲུག་ལས། །སྐྱོབ་པར་མཛོད་ཅིག་ཐུགས་རྗེ་ཅན། །འཇིག་རྟེན་མགོན་པོའི་སྤྱན་ཆབ་ལས། །ལྷ་མོ་ཁྱོད་ནི་འཁྲུངས་མ་ཐག །གང་དག་འཇིགས་པས་སུས་སྐྲག་པ། །ང་ཡིས་སྐྱོབས་ཞེས་ཞལ་བཞེས་པའི། །ཐུགས་དམ་ཞལ་བཞེས་མ་གཡེལ་བར། །ད་ནི་ཐུགས་རྗེས་བསྐྱབ་ཏུ་གསོལ། །ཞེས་པ་ཞག་བདུན་ལ་སྒྲོལ་དཀར་བསྙེན་དུས་རྨི་ལམ་དུ་མདུན་བསྐྱེད་ནམ་མཁར་སྒྲོལ་མ་དཀར་མོ་སྒྲོལ་མ་ཉེར་གཅིག་གིས་བསྐོར་བ་གསལ་བཏབ་ལ། ཡིད་རྩེ་གཅིག་ཏུ་གཏད་ནས་ཞགས་
པས་བཅིངས་པ་ལ་སོགས་པ་འཇིགས་པ་ཐམས་ཅད་ལས་ཐར་ཟེར་བའི་སྒྲ་གྲགས་པས་རྟེན་འབྲེལ་བྱས་ནས་བྲིས་སོ། །བླ་མ་དོན་གྲུབ་ཀྱིས་གཏོར་བསྔོས་བྲིས་ཟེར་ནས་ཤོག་དྲིལ་གཏད་པས་ཤོག་ལྷག་བྱུང་བས་ཀརྨ་ཨ་རཱ་གས་བྲིས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།