མདུན་བསྐྱེད་སེང་ལྡེང་ནགས་ཀྱི་སྒྲོལ་མ་གཙོ་མོ་སྒྲོལ་མ་ཉེར་གཅིག་གིས་བསྐོར་བ་སྐད་ཅིག་དྲན་རྫོགས་ཀྱི་ཏིང་འཛིན།
མདུན་བསྐྱེད་སེང་ལྡེང་ནགས་ཀྱི་སྒྲོལ་མ་གཙོ་མོ་སྒྲོལ་མ་ཉེར་གཅིག་གིས་བསྐོར་བ་སྐད་ཅིག་དྲན་རྫོགས་ཀྱི་ཏིང་འཛིན་ནི། ཨོཾ་བཛྲ་ཨ་མྲྀ་ཏ་སོགས། ཨོཾ་ཤུ་ནྱ་ཏ་སོགས། སྟོང་པའི་ངང་ལས་འབྱུང་བ་རིམ་བརྩེགས་སྟེང་། །སོགས་ནས། བདུད་རྩིའི་རྒྱ་མཚོ་པདྨ་ཟླ་བའི་སྟེང་། །ཏཱཾ་ཡིག་ལྗང་གུའི་འོད་ཀྱིས་འཕགས་པ་མཆོད། །སེམས་ཅན་དོན་བྱས་ཚུར་འདུས་ཡོངས་གྱུར་ལས། །བཅོམ་ལྡན་སྒྲོལ་མ་ལྗང་གུ་འཛུམ་ཞལ་གཅིག །ཕྱག་གཉིས་གཡས་པས་མཆོག་སྦྱིན་གཡོན་པ་ཡི། །མཐེབ་སྲིན་སྦྱར་བས་ཨུཏྤལ་སྔོན་པོ་འཛིན། །བཅུ་དྲུག་ལོན་པའི་ལང་ཚོ་རབ་ཏུ་རྒྱས། །པདྨའི་འདབ་ལྟར་ཡངས་བའི་སྤྱན་དང་ལྡན། །དབུ་སྐྲ་མཐོན་མཐིང་སྤྱི་བོར་བཅིངས་ཤིང་གྲོལ། །རིན་ཆེན་དབུ་རྒྱན་ལོངས་སྤྱོད་ཆོས་ཀུན་རྫོ་གས། །དབང་པོའི་གཞུ་འདྲའི་ལྷ་རྫས་ཤམ་ཐབས་དང་། །དར་གྱི་སྟོད་གཡོགས་ཞབས་གཉིས་གཡས་བརྐྱང་བའི། །སྐྱིལ་ཀྲུང་ཕྱེད་པའི་སྟབས་ཀྱིས་བཞུགས་པ་ཡི། །མཐའ་སྐོར་པད་མའི་འདབ་མ་ཉི་ཤུ་ལ། །ཟླ་བའི་དཀྱིལ་འཁོར་རེ་རེའི་གདན་གྱི་སྟེང་། །མྱུར་ཞིང་དཔའ་དང་ཟླ་མདངས་གསེར་མདོག་ཅན། །གཙུག་ཏོར་རྒྱལ་མ་ཧཱུཾ་སྒྲོག་ཁམས་གསུམ་རྒྱལ། །རྒོལ་
འཇོམས་དབང་མཆོག་སྟེར་དང་འཁོར་ལོས་སྒྱུར། །འདོད་སྟེར་མྱ་ངན་སེལ་དང་འགྲོ་བ་འགུགས། །བཀྲ་ཤིས་སྦྱིན་མ་སྨིན་བྱེད་ཁྲོ་གཉེར་ཅན། །ཞི་བ་དགེ་དང་ཆགས་འཇོམས་བདེ་བ་བསྒྲུབས། །རྣལ་འབྱོར་རྒྱལ་མ་སྡུག་བསྔལ་ཐམས་ཅད་བསྲེགས། །དངོས་གྲུབ་འབྱུང་གནས་ཡོངས་སུ་རྫོགས་བྱེད་སོགས། །རང་རང་སྐུ་མདོག་ཕྱག་མཚན་སྣ་ཚོགས་ཅན་། རྒྱན་དང་ཆ་ལུགས་གཙོ་མོ་དང་མཚུངས་པའི། །སྒྲོལ་མ་ཉེར་གཅིག་བསྐོར་བའི་གནས་གསུམ་དུ། །སོགས་གཞུང་གི་ཚིག་ལ་འཇུག །བསྙེན་དམིགས་ནི། ལྷ་ཚོགས་ཐུགས་ཀར་ཟླ་སྟེང་ཧཱུྃ་ཡིག་མཐར། །སོ་སོའི་སྔགས་ཀྱིས་བསྐོར་ལས་འོད་ཟེར་འཕྲོས། །འཕགས་པ་རྣམས་མཆོད་འགྲོ་བའི་སྒྲིབ་གཉིས་སྦྱངས། །འཇིགས་པ་ཀུན་ཞི་ཚེ་དཔལ་ཉམས་རྟོགས་རྒྱས། །ཀུན་ཀྱང་རྗེ་བཙུན་སྒྲོལ་མའི་གོ་འཕང་ཐོབ། །དོན་གཉིས་མཐའ་དག་ལྷུན་གྱིས་གྲུབ་པར་གྱུར། །བསྙེན་པ་བཟླས། །