སྒྲོལ་མ་ཉེར་གཅིག་གི་བྲི་ཡིག་གོ་བདེ་བའི་ངག་འདོན།
སྒྲོལ་མ་ཉེར་གཅིག་གི་བྲི་ཡིག་གོ་བདེ་བའི་ངག་འདོན་བྱ་བའོ། །འདི་ནི་གྲུབ་ཆེན་ཉི་མ་སྦས་པའི་རྒྱ་གཞུང་དང་། མི་ཏྲ་ཛ་ཀིའི་དཀྱིལ་ཆོག་རྒྱ་གཞུང་དེ་རྣམས་ཀྱི་དོན་གཞུང་མཐོང་བས་རབ་གསལ་ཞེས་བྱ་བ་བཞུགས་སོ།།
ན་མོ་ཨཱརྱ་ཏཱ་རེ། བཅོམ་ལྡན་འཕགས་པ་འཇིག་རྟེན་དབང་ཕྱུག་གིས། །འགྲོ་དྲུག་སྡུག་བསྔལ་གཟིགས་ལ་ཐུགས་བརྩེ་ནས། །སྤྱན་ཆབ་བསིལ་ལ་མེ་ཏོག་པདྨ་གཉིས། །ཁ་བྱེའི་ནང་ནས་ལྷ་མོ་གཉིས་བྱུང་སྟེ། །འཇིག་རྟེན་དག་ན་འཇིགས་པས་སུ་སྐྲག་པ། །ང་ཡིས་སྐྱབས་ཞེས་གསུང་གི་ཐོག་མར་སྨྲས། །གང་དུ་འཇིགས་པ་བརྒྱད་དང་བཅུ་དྲུག་པོ། །གང་དེར་བྱུང་དེར་ལྷ་མོ་དེར་ཕེབས་ཏེ། །གང་གིས་སྐྱབས་ཞུས་ངེས་པར་སྐྱོབ་པ་ཞེས། །དམ་བཅའ་ཐུགས་དམ་གཡེལ་མེད་ལྷ་མོ་མཆོག །དཀར་དང་ལྗང་བའི་ཁ་དོག་འཛིན་པ་སྟེ། །ངོ་བོ་གཅིག་ལ་སྤྲུལ་པ་ཉི་ཤུ་
གཅིག །སྒྲོལ་མ་ཉི་ཤུ་རྩ་གཅིག་མཚན་འཆང་བ། །སྙིགས་དུས་བདག་སོགས་འགྲོ་རྣམས་འཇིགས་པས་མནར། །ལྷ་མོ་ཁྱོད་ལ་བདག་གིས་གསོལ་འདེབས་ན། །སྐད་ཅིག་གློག་ལྟར་མྱུར་བས་འདིར་བྱོན་ལ། །མདུན་གྱི་ནམ་མཁའི་པད་ཟླའི་གདན་ལ་བཞུགས། །ལུས་ངག་ཡིད་གསུམ་གུས་པས་ཕྱག་འཚལ་ལོ། །འཇིག་རྟེན་འདིའམ་འཇིག་རྟེན་གཞན་དག་གིས། །ལྷ་མའི་དཔལ་འབྱོར་བློ་ཡིས་བླངས་ཏེ་འབུལ། །འགྲོ་ཀུན་ཚོགས་གཉིས་རྫོགས་ཕྱིར་བཞེས་སུ་གསོལ། །ཐོག་མེད་དུས་བསགས་སྡིག་ལྟུང་ཉེས་ཀུན་བཤགས། །དུས་གསུམ་དགེ་བསགས་ཀུན་ལ་རྗེས་
ཡི་རང་། །ཡང་ཟབ་རྒྱ་ཆེན་ཆོས་འཁོར་རབ་བསྐོར་ཞིང་། །གཟུགས་སྐུ་གཡོ་མེད་བཞུགས་པར་གསོལ་བ་འདེབས། །དུས་གསུམ་དགེ་བ་མཁའ་མཉམ་ཡོངས་ལ་བསྔོ། །མཚམས་སྦྱར་བའོ།། ༈ སངས་རྒྱས་ཀུན་གྱི་སྤྱི་གཟུགས་ཐུགས་རྗེའི་བདག །སྟོན་ཟླའི་མདོག་ཅན་ཞལ་གཅིག་ཕྱག་བཞི་པ། །ཐལ་སྦྱར་ཕྲེང་བ་པད་དཀར་ཕྱག་ན་བསྣམས། །དར་དང་རིན་ཆེན་རྒྱན་སྤྲས་སྐྱིལ་ཀྲུང་བཞུགས། །སྤྲུལ་གཞི་སྤྱན་རས་གཟིགས་ལ་ཕྱལ་འཚལ་ལོ། ༈ །ཚེ་དཔག་མེད་ཀྱི་ཡུམ་མཆོག་གོས་དཀར་མོ། །དཀར་གསལ་ཞི་འཛུམ་སྐུ་ལུས་དྲང་པོར་བསྲང་། །དཔྲལ་བའི་གསུམ་དང་ཕྱག་ཞབས་མཐིལ་དུ་སྤྱན། །གཡས་པས་མཆོག་སྦྱིན་གཡོན་པས་ཨུཏྤལ་དཀར། །རྩེ་མོ་གསུམ་ལྡན་འབྲས་བུ་མེ་ཏོག་ནི། །ཁ་མ་བྱེ་བ་དུས་གསུམ་སངས་རྒྱས་མཚོན། །དར་དང་རིན་ཆེན་རྒྱུན་ལྡན་རྡོར་སྐྱིལ་གྱིས། །ཟླ་བ་པད་གདན་ལ་བཞུགས་ཟླ་བ་ཡི། །རྒྱབ་ཡོལ་མངའ་བའི་ལྷ་མོ་ཚེ་འཕེལ་མ། །ཁྱེད་ཀྱི་སྐུ་གཟུགས་སྟོང་སོགས་བྲིས་པ་ནི། །ཚེ་ཟད་འཆི་བ་བཟློག་པར་ཞལ་གྱིས་བཞེས། །ཁྱོད་ལ་ཕྱག་འཚལ་མཆོད་འབུལ་སྐྱབས་སུ་མཆི། །དུས་མིན་འཆི་བའི་བར་ཆད་བསལ་དུ་གསོལ། །
ལྗང་སྔོན་ཞལ་གཅིག་ཕྱག་གཉིས་འཛུམ་པའི་ཞལ། །གཡས་པས་མཆོག་སྦྱིན་གཡོན་པས་ཨུཏྤལ་འཛིན། །ཞབས་གཡོན་བསྐུམ་ཞིང་གཡས་པ་ཅུང་ཟད་བརྐྱངས། །རོལ་སྟབས་འགྱིང་བག་པདྨ་ཟླ་བའི་སྟེང་། །དར་དང་རིན་ཆེན་སྣ་ཚོགས་རྒྱན་ལྡན་མ། །འཇིགས་པ་ཀུན་སྐྱོབ་སེང་ལྡེང་ནགས་ཀྱི་ནི། །སྒྲོལ་མ་ཁྱེད་ལ་ཕྱག་འཚལ་མཆོད་པ་འབུལ། །སྐྱབས་སུ་མཆིའོ་འཇིགས་པ་ཐམས་ཅད་སོལ། ༼༢༽ །རབ་ཏུ་དཔའ་བའི་སྒྲོལ་མ་མཚལ་གྱི་མདོག །ཞལ་གཅིག་ཞི་འཛུམ་ཞབས་གཉིས་རྡོར་སྐྱིལ་བཞུགས། །ཕྱག་བརྒྱད་དང་པོ་རྡོ་དྲིལ་སྤྱི་བོར་བསྣོལ། །དེ་འོག་གཉིས་ཀྱི་མདའ་གཞུ་བཀང་བ་འཛིན། །དེ་འོག་འཁོར་ལོ་ཕྱིར་ཞིང་དུང་ཐུགས་ཀར། །བཞི་པས་རལ་གྲི་འདེབས་ཚུལ་ཞགས་པ་བསྣམས། །དར་དང་རིན་ཆེན་སྣ་ཚོགས་རྒྱུན་ལྡན་ཞིང་། །གསེར་མདོག་པདྨ་དང་ནི་ཟླ་སྟེང་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །འཇིགས་པ་ཀུན་སོལ་དངོས་གྲུབ་རྣམ་གཉིས་སྩོལ། ༼༣༽ །དཀར་མོ་ཟླ་མདོག་སྒྲོལ་མ་སྐུ་མདོག་དཀར། །ཞལ་གསུམ་གཡས་སྔོ་གཡོན་སེར་ཞི་བའི་ཞལ། །ཕྱག་ནི་བཅུ་གཉིས་དང་པོ་མཉམ་བཞག་མཛད། །གཉིས་
པ་གཉིས་ན་ཁ་ཊཾ་སྤྱི་བླུགས་འཛིན། །གསུམ་པ་གཉིས་ན་འཁོར་ལོ་ཨུཏྤལ་ལ། །བཞི་པ་གཉིས་ན་ནོར་བུ་བུམ་པ་སྟེ། །ལྔ་པ་གཉིས་ན་རྡོ་རྗེ་དྲིལ་བུ་འཁྲོལ། །དྲུག་པ་མེ་ཏོག་ཕྲེང་བ་པོ་ཏི་འཛིན། །པད་ཟླའི་སྟེང་ན་སྐྱིལ་ཀྲུང་ཞི་ཆས་རྫོགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །མིག་ནད་ལ་སོགས་འཇིགས་པ་ཐམས་ཅད་སོལ། །ཐུན་མོང་མཆོག་གི་དངོས་གྲུབ་བསྩལ་དུ་གསོལ། ༼༤༽ །གསེར་མདོག་ཅན་གྱི་སྒྲོལ་མ་སྐུ་མདོག་སེར། །ཞལ་གཅིག་ཞི་འཛུམ་ཞི་བའི་རྒྱན་སྐུ་རྫོགས། །རྡོ་རྗེའི་སྐྱིལ་ཀྲུང་སྣ་ཚོགས་པད་ཉིའི་སྟེང་། །ཕྱག་བཅུ་དང་པོའི་གཡས་གཡོན་ཕྱག་གཉིས་ན། །ཕྲེང་བ་དང་ནི་དར་དཔྱངས་ཐུགས་ཀར་འཛིན། །གཉིས་པ་གཉིས་ན་རལ་གྲི་ཞགས་པ་སྟེ། །གསུམ་པ་གཉིས་ན་མདའ་གཞུ་སོ་སོར་འཛིན། །བཞི་པ་གཉིས་ན་རྡོ་རྗེ་དྲིལ་བུ་འཁྲོལ། །ལྔ་པ་གཉིས་ན་དབྱུག་གུ་པདྨ་བསྣམས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །འདོད་དགུ་ཀུན་སྩོལ་འཇིགས་པ་ཐམས་ཅད་སོལ། ༼༥༽ །གཙུག་ཏོར་རྒྱལ་བའི་སྒྲོལ་མ་གསེར་གྱི་མདོག །ཞལ་གཅིག་ཞི་འཛུམ་ཞི་བའི་རྒྱན་ཀུན་རྫོགས། །ཕྱག་གཉིས་སྐྱབས་སྦྱིན་པདྨ་སེར་
པོ་བསྣམས། །ཡང་ན་ཕྱག་བཞི་དང་པོ་གཉིས་ན་ནི། །མཆོག་སྦྱིན་གཡས་རྡོར་དབྱུག་པ་ལྟེ་ཐད་འཛིན། །འོག་གཉིས་བགྲང་ཕྲེང་རིན་ཆེན་བེ་ཅོན་བསྣམས། །ཞབས་གཉིས་ཟླ་བའི་སྟེང་དུ་ཞབས་འོག་གཉིས། །ཅུང་ཟད་བསྣོལ་མ་ཙམ་གྱི་སྐྱིལ་ཀྲུང་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །བར་ཆད་ཀུན་སོལ་དངོས་གྲུབ་མྱུར་དུ་སྩོལ། ༦༽ །རྣམ་པར་རྒྱལ་བའི་སྒྲོལ་མ་སྐུ་མདོག་དམར། །ཞལ་གཅིག་ཞི་འཛུམ་དར་དང་རཏྣས་བརྒྱན། །ཕྱག་བཞི་གཡས་གཉིས་རྡོ་རྗེ་རལ་གྲི་ཕྱར། །གཡོན་པ་གཉིས་ན་སྡིགས་མཛུབ་ཞགས་པ་བསྣམས། །སེམས་དཔའི་སྐྱིལ་ཀྲུང་ཉི་མའི་དཀྱིལ་འཁོར་དང་། །པདྨ་དམར་པོའི་གདན་ལ་བཞུགས་མཛད་མ། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །འཇིགས་པ་ཀུན་ལས་རྒྱལ་ཞིང་དངོས་གྲུབ་སྩོལ། ༼༧༽ །རྒོལ་བ་འཇོམས་པའི་སྒྲོལ་མ་ཁྲོ་མོ་མཐིང་། །དབུ་སྐྲ་གྱེན་བརྫེས་སྦྲུལ་དང་རིན་ཆེན་བརྒྱན། །ཕྱག་ཞབས་གདུབ་བུ་རྣམས་ཀྱང་རིན་པོ་ཆེ། །ཕྱག་བཞི་གཡས་གཉིས་འཁོར་ལོ་རལ་གྲི་ཕྱར། །གཡོན་གྱི་ཞགས་པ་གསང་གནས་ཐད་དུ་འཛིན། །འོག་མ་སྡིགས་མཛུབ་རབ་ཏུ་གདེངས་
བའོ། །སྟོད་གཡོགས་དར་དཔྱངས་སེར་ཞིང་སྟག་ཤམ་ཅན། །གཡས་བསྐུམ་གཡོན་བརྐྱང་ཉི་མའི་གདན་ལ་ནི། །པདྨ་སེར་པོའི་སྟེང་ན་འགྱིང་མཛད་མ། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །ཕ་རོལ་རྒོལ་བ་ཐམས་ཅད་བཟློག་ཏུ་གསོལ། ༼༨༽ །དབང་མཆོག་སྟེར་བའི་སྒྲོལ་མ་གསེར་གྱི་མདོག །ཞལ་གཅིག་ཁྲོ་གཉེར་ལྡན་ཞིང་ཕྱག་བཞི་ཡི། །དང་པོ་མྱ་ངན་མེད་ཤིང་པདྨ་དང་། །འོག་མ་གཉིས་ན་རིན་ཆེན་བུམ་པ་འཛིན། །པདྨ་དམར་དང་ཆུ་སྲིན་གདན་སྟེང་ན། །སྐྱིལ་ཀྲུང་ཕྱེད་པས་བཞུགས་ཤིང་ཞི་ཆས་རྫོགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །མངའ་ཐང་དབང་ཐང་འཕེལ་བར་མཛད་དུ་གསོལ། ༼༩༽ །མྱ་ངན་མེད་པའི་སྒྲོལ་མ་སྐུ་མདོག་དམར། །ཞལ་གཅིག་ཞི་འཛུམ་དར་དང་རིན་ཆེན་བརྒྱན། །ཕྱག་བཞི་དང་པོས་སྤྱི་བོར་ཐལ་མོ་སྦྱར། །འོག་གཉིས་རལ་གྲི་མྱ་ངན་མེད་པ་འི་ཤིང་། །རོལ་པའི་སྟབས་ཀྱིས་ཟླ་བའི་དཀྱིལ་འཁོར་དང་། །པདྨ་དམར་པོའི་སྟེང་ན་བཞུགས་མཛད་མ། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །མྱ་ངན་སྡུག་བསྔལ་ཐམས་ཅད་མེད་པར་མཛོད། ༼༡༠༽ །འགྲོ་བ་
འགུགས་པའི་སྒྲོལ་མ་སྐུ་མདོག་ནག །ཕྱག་གཉིས་ལྕགས་ཀྱུ་དང་ནི་ཞགས་པ་བསྣམས། །འགྱིང་བག་ཞབས་གཡས་ཅུང་ཟད་སྐྱོང་མཛད་དེ། །གཡོན་པ་བསྐུམ་པའི་རོལ་པ་ཉི་མ་དང་། །པདྨ་དམར་པོའི་གདན་ལ་བཞུགས་མཛད་དེ། །ཁྲོ་འཛུམ་དར་དང་རིན་ཆེན་ཞི་ཆས་བརྒྱན། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །ཕོངས་པ་ཀུན་སོལ་ནོར་གྱི་དངོས་གྲུབ་སྩོལ། ༼ ༡༡༽ །བཀྲ་ཤིས་སྣང་བའི་སྒྲོལ་མ་སྐུ་མདོག་སེར། །ཞི་འཛུམ་ཞལ་གཅིག་དར་དང་རིན་ཆེན་སྤྲས། །ཕྱག་བརྒྱད་དང་པོ་ཁ་ཊཾ་ནོར་བུ་སྟེ། །གཉིས་པ་གཡས་གཡོན་ལྕགས་ཀྱུ་ཞགས་པ་བསྣམས། །གསུམ་པ་རྡོ་རྗེ་དང་ནི་དབྱུག་པ་སྟེ། །བཞི་པ་གཉིས་ཀྱིས་རལ་གྲི་བུམ་པ་བསྣམས། །ཟླ་ཚེས་དབུ་བརྒྱན་རྡོ་རྗེ་སྐྱིལ་ཀྲུང་གིས། །སྣ་ཚོགས་པདྨ་ཟླ་བའི་གདན་ལ་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །བཀྲ་ཤིས་བདེ་ལེགས་ཐམས་ཅད་བསྩལ་དུ་གསོལ། ༼༡༢༽ །སྨིན་བྱེད་སྒྲོལ་མ་དམར་མོ་ཞལ་གཅིག་མ། །ཁྲོ་བོའི་ཞལ་སྟེ་ཕྱག་བཞི་དང་པོ་གཉིས། །རལ་གྲི་འཁོར་ལོ་འོག་གཉིས་མདའ་དང་གཞུ། །བཞེངས་ཏེ་གཡས་བརྐྱང་གཡོན་བསྐུམ་འདོར་ཐབས་
ཀྱིས། །མེ་དཔུང་ནང་བཞུགས་དར་དང་རིན་ཆེན་བརྒྱན། །པདྨ་དམར་དང་ཉི་མའི་གདན་ལ་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །ཕ་རོལ་དགྲ་ཡི་དཔུང་ཚོགས་བཟློག་ཏུ་གསོལ། ༼༡༣༽ །ཁྲོ་གཉེར་གཡོ་བའི་སྒྲོལ་མ་མཐིང་ནག་འབར། །ཞལ་གསུམ་རབ་ཁྲོས་གཡས་དཀར་གཡོན་དམར་ཞལ། །ཐོད་པ་སྐམ་རློན་རིན་ཆེན་རྒྱན་དང་ལྡན། །ཕྱག་དྲུག་གཡས་གསུམ་རོལ་གྲི་དབྱུག་ཐོ་ལྕགས་ཀྱུ་དང་། །གཡོན་གསུམ་ཐོད་ཁྲག་ཞགས་པ་ཚངས་པའི་མགོ། །གཡས་བརྐྱང་གཡོན་བསྐུམ་མི་རོའི་གདན་དང་ནི། །པདྨ་དམར་དང་ཉི་མའི་གདན་ལ་འགྱིང་། །ཐོད་ཁྲག་ནང་ནས་མི་རྒྱུ་ཞལ་དུ་འདྲེན། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །དགྲ་དང་བགེགས་ཀྱི་གནོད་པ་བཟློག་ཏུ་གསོལ། ༼༡༤༽ །བདེ་ལེགས་ཞི་བའི་སྒྲོལ་མ་དུང་ལྟར་དཀར། །ཞལ་གཅིག་ཞི་འཛུམ་དར་དང་རིན་ཆེན་བརྒྱན། །པད་དཀར་ཟླ་སྟེང་རྡོ་རྗེའི་སྐྱིལ་ཀྲུང་བཞུགས། །ཕྱག་དྲུག་གཡས་ཀྱི་ཕྲེང་བ་ཐུགས་ཀར་འཛིན། །གཉིས་པ་མཆོག་སྦྱིན་གསུམ་པ་དབྱུག་གུ་འཛིན། །གཡོན་པས་པདྨ་དང་ནི་རིལ་བ་དང་། །ཨུཏྤལ་སྟེང་དུ་པོ་ཏི་ཞགས་པ་འཛིན། །ཁྱེད་ལ་
ཕྱག་འཚལ་མཆོད་འབུལ་སྐྱབས་སུ་མཆི། །སྡིག་པ་གང་མཆིས་ཐམས་ཅད་དག་པར་མཛོད། ༼༡༥༽ །ཆགས་པ་འཇོམས་པའི་སྒྲོལ་མ་བྱི་རུའི་མདོག །ཞལ་གཅིག་སྤྱན་གསུམ་ཞི་བའི་ཚུལ་ཅན་ལ། །ཕྱག་གཡས་ཁ་ཊཾ་རྩེ་གསུམ་ཐུགས་ཀར་འཛིན། །གཡོན་པས་སྡིགས་མཛུབ་འབྲས་བུས་ངད་ཅན་ཤིང་། །ཕྱར་བའི་སྟབས་འཛིན་དར་དང་རིན་ཆེན་སྤྲས། །སེམས་དཔའི་སྐྱིལ་ཀྲུང་ཉི་མའི་དཀྱིལ་འཁོར་དང་། །པདྨ་དམར་སེར་གདན་ལ་བཞུགས་མཛད་མ། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །གང་་འདོད་དངོས་གྲུབ་སྩོལ་ལ་དགྲ་རྣམས་བཟློག ༼༡༦༽ །བདེ་བ་བསྒྲུབ་པའི་སྒྲོལ་མ་དམར་སེར་ཏེ། །ཞལ་གཅིག་ཞི་འཛུམ་དར་དང་རིན་ཆེན་སྤྲས། །ཕྱག་གཉིས་ཐུགས་ཀར་མཐེབ་སྲིན་བར་དུ་ནི། །ཟླ་བའི་དཀྱིལ་འཁོར་ཉ་རྒྱས་འཛིན་པར་མཛད། །པད་དཀར་ཉི་མའི་དཀྱིལ་ན་སེམས་སྐྱིལ་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །བདེ་སྐྱིད་ཕུན་སུམ་ཚོགས་པའི་དངོས་གྲུབ་སྩོལ། ༼༡༧༽ །རྣམ་པར་རྒྱལ་མའི་སྒྲོལ་མ་སྐུ་མདོག་དཀར། །ཞལ་གཅིག་ཞི་འཛུམ་དར་དང་རིན་ཆེན་བརྒྱན། །ཕྱག་བཞི་དང་པོ་
གཉིས་ནི་སྤྱི་བོར་ན། །སྒྲོལ་བའི་སྟབས་ཀྱིས་ལྕགས་ཀྱུ་གཅིག་ལ་འཛིན། །འོག་གཉིས་མཆོག་སྦྱིན་ཨུཏྤལ་པོ་ཏི་མཚན། །པད་དཀར་ཟླ་བ་ཆུ་བྱ་ངང་པའི་སྟེང་། །སེམས་དཔའི་སྐྱིལ་མོ་ཀྲུང་གིས་བཞུགས་མཛད་མ། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །སྦྱར་དུག་ལ་སོགས་དུག་རིགས་གནོད་པ་སོལ། ༼༡༨༽ །སྡུག་བསྔལ་སེལ་བའི་སྒྲོལ་མ་སྟོན་ཟླའི་མདོག །ཞི་འཛུམ་དར་དང་རིན་ཆེན་རྒྱན་གྱིས་བཀླུབས། །ཕྱག་གཉིས་ཐུགས་ཀར་མེ་ཐབས་མེ་འབར་འཛིན། །པད་དཀར་ཉི་སྟེང་སེམས་སྐྱིལ་གཡོན་ཅུང་བརྐྱང་། །འགྱིང་བག་སྐུ་ལ་འོད་ཟེར་དཀར་དམར་འཕྲོ། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །འགྲོ་བའི་སྡིག་དང་སྡུག་བསྔལ་བསྲེག་པར་མཛོད། ༼༡༩༽ །དངོས་གྲུབ་འབྱུང་བའི་སྒྲོལ་མ་ལི་ཁྲིའི་མདོག །ཞི་འཛུམ་ཞལ་གཅིག་ཞི་བའི་རྒྱུན་ཀུན་ལྡན། །ཕྱག་གཉིས་ཐུགས་ཀར་གསེར་གྱི་བུམ་པ་འཛིན། །པད་དཀར་ཟླ་སྟེང་སེམས་པའི་སྐྱིལ་ཀྲུང་བཞུགས་། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །ཡིད་ཀྱིས་ཅི་འདོད་དངོས་གྲུབ་ཐམས་ཅད་སྩོལ། ༼༢༠༽ །ཧཱུཾ་སྒྲ་སྒྲོག་པའི་སྒྲོལ་མ་གསེར་གྱི་མདོག །ཞལ་
གཅིག་ཞི་ཞལ་དར་དང་ཞི་ཆས་རྫོགས། །ཕྱག་གཡས་སྐྱབས་སྦྱིན་གཡོན་པ་པདྨ་སེར། །པད་ཟླའི་གདན་ལ་རྡོ་རྗེའི་སྐྱིལ་ཀྲུང་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །དགྲ་བགེགས་བར་ཆད་གཡུལ་ལས་རྒྱལ་བར་མཛོད། ༼༢༡༽ །ཡོངས་རྫོགས་སྒྲོལ་མ་དཀར་མོ་ཞལ་གཅིག་པ། །སྤྱན་གསུམ་ཞལ་གདངས་དབུ་སྐྲ་དམར་སེར་འབར། །ཕྱག་གཡས་ཁ་ཊཾ་གཡོན་པས་མེ་ཏོག་འཕྲེང་། །དར་དང་རིན་ཆེན་རྒྱན་ལྡན་སྟག་ཤམ་བཅིངས། །པད་ཟླ་མ་ཧེའི་སྟེང་ན་ཕྱེད་སྐྱིལ་བཞུགས། །ཁྱེད་ལ་ཕྱག་འཚལ་མཆོད་འབུལ་སྐྱབས་སུ་མཆི། །བསམ་པའི་དོན་ཀུན་གེགས་མེད་མཐར་ཕྱིན་མཛོད། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྒྲོལ་མ་ཉེར་གཅིག་སྐུ་ལས་འོད་ཟེར་འཕྲོས། །རང་ལ་ཐིམ་པས་དངོས་གྲུབ་ཐོབ་པར་བསྒོམ། །འདི་ལྟར་སྒྲོལ་མ་ཉི་ཤུ་རྩ་གཅིག་གི །བཀོད་པ་བྲིས་ནས་བར་ཆད་ཀུན་ཞི་ཞིང་། །གང་འདོད་དངོས་གྲུབ་མ་ལུས་འབྱུང་བ་དང་། །ཁྱད་པར་བྱང་ཆུབ་སེམས་དང་ལྡན་པ་ཡི། །སྡེ་ཆེན་བླ་དཔོན་ཀུན་གྱིས་སྐུ་རིམ་ལ། །མཆོག་ཏུ་བསྔགས་ཕྱིར་བྲི་སྲོལ་ཆེ་བ་ལགས། །ནོར་དང་རིགས་རྒྱུད་འདོད་པའི་བུད་མེད་ཀྱིས། །
བཞེངས་ན་ཡིད་ལ་འདོད་པ་འབྱུང་བར་བཤད། །གྲུབ་ཆེན་ཉི་མ་སྦས་པའི་རྒྱ་གཞུང་དང་། །མི་ཏྲ་ཛཱ་ཀིའི་དཀྱིལ་ཆོག་རྒྱ་གཞུང་དང་། །སྔར་གྱི་ཞལ་ཐང་གོང་མ་གོ་བསྟུན་ཏེ། །གོ་ཏྟཱ བར་སླ་ཞིང་ངག་འདོན་བྱ་ཆོག་པའི། །སྒྲོལ་མ་ཉེར་གཅིག་བཀོད་པའི་ཡི་གེ་འདི། །བུ་སློབ་དད་པ་ཅན་གྱིས་བསྐུལ་བྱས་པས། །དགེ་སློང་༧རཱ་ག་ཨ་སྱས་བཀོད་པ་ཡིན། །དབུས་སྒྱུ་མའི་གཙུག་ཏུ་རིགས་བདག་འོད་དཔག་མེད། །སྤྲུལ་གཞི་སྤྱན་རས་གཟིགས་དང་སྒྲོལ་དཀར་དང་། །སྦྱིན་བདག་རང་གི་གཟུགས་ཀྱིས་མཆོད་འབུལ་ཚུལ། །ལྷ་གྲངས་ཉི་ཤུ་རྩ་ལྔ་ལེགས་པའོ། །སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།