མཁའ་འགྲོ་སེང་གདོང་མའི་སྒྲུབ་ཐབས་དངོས་གྲུབ་ཀུན་འབྱུང་།
རྒྱ་གར་སྐད་དུ། ཊཀྐི་སེང་ཧ་མུ་ཁ་ས་དྷ་ན་མ། བོད་སྐད་དུ། མཁའ་འགྲོ་མ་སེང་གེའི་གདོང་པ་ཅན་གྱི་སྒྲུབ་ཐབས་ཞེས་བྱ་བ་མཁའ་འགྲོ་སེང་གདོང་མའི་བདག་བསྐྱེད་སྲུང་འཁོར་དང་བཅས་པ་སྟེ། ཕྱི་སྒྲུབ་བསྙེན་པའི་ལས་རིམ་བལྟས་ཆོག་བཞུགས་སོ། །དངོས་གྲུབ་ཀུན་འབྱུང་ཞེས་བྱ་བ་སྟེ་རྩ་བའི་མན་ངག་གོ །སེང་གེ་ཁ་འཐབ་ལ་སོགས་གཞན་དུ་ཤེས་སོ། །
ན་མོ་བཛྲ་ཌཀྐི་ཡེ། གནས་གསུམ་མཁའ་འགྲོའི་ཚོགས་ལ་ཕྱག་འཚལ་ནས། །ཡེ་ཤེས་ཌཱཀྐིའི་སྒྲུབ་ཐབས་གསལ་བཀོད་བྱ་། །ཌཱཀྐིའི་ཚོགས་ཀྱིས་བཀའ་གནང་བྱིན་གྱིས་རློབས། །དེ་ལ་རྟེན་གྱི་གང་ཟག་འདི་ཡི་དབང་ཐོབ་ཅིང་། གསང་སྔགས་ཀྱི་དམ་ཚིག་སྤྱི་དང་ཁྱད་པར་དུ་འདི་ཞུས་པའི་སློབ་དཔོན་ལ་སྐུར་པ་ཅུང་ཟད་ཙམ་མི་གདབ་ཅིང་ཐུགས་དང་མི་འགལ་བ་གལ་ཆེ། སློབ་དཔོན་དང་འགལ་ན། མཁའ་འགྲོའི་བཀའ་ཆད་ཀྱིས་རང་སྲོག་གཅོད་དོ། །དྲེའུ་དང་བོང་བུའི་ཤ་མི་ཟ་བ་དམ་ཚིག་ཡིན་ནོ། །དེ་ནས་གནས་དབེན་པར་མཆོད་པའི་མཎྜལ་བྱས་པའི་སྟེང་དུ། ཐོད་པའམ་ཟངས་ལྕགས་ཀྱི་སྣོད་དུ། གཏོར་མ་ཟུར་གསུམ་རྩེ་མོ་རྣོ་བ་ཉི་ཤུ་རྩ་གཅིག་གིས། མཐར་
མཐེབ་ཀྱུས་བཅད་ཁ་བཞི་ཡིས་བསྐོར། དཀར་དམར་གྱིས་བརྒྱན་ཅིང་། མཐར་མཆོད་པ་རྣམ་ལྔ་དང་སྨན་རཀ་བཤམས། རང་ཉིད་སྟན་བདེ་བ་ལ་འདུག་ཅིང་། ཌཱ་དྲིལ་མདུན་དུ་བཀོད། དེ་ནས་གནས་བདག་ལ་དཀར་གཏོར་བྱིན་ལ། མ་སྒྲིག་མ་བསྔངས་བར་བདག་གི་གྲོགས་གྱིས་ཤིག །ཅེས་བཀའ་བསྒོའོ། །བགེགས་ལ་གཏོར་མ་བྱིན་ལ། སུ་བྷས་བསྐྲད། དེ་ནས་མཆོད་པ་རྣམས། ཨོཾ་བྷི་ཤྭ་ཌཱ་ཀི་ནི་ཧཱུཾ་ཕཊ། ཅེས་བསངས། ཨོཾ་སྭ་བྷ་ཝས་སྦྱང་། སྟོང་པ་ཉིད་དུ་གྱུར། སྟོང་པའི་ངང་ལས་ཨ་ལས་ཐོད་པའི་སྣོད་རྣམས་སུ་ཧཱུཾ་ལས་བྱུང་བའི་མཆོད་རྫས་ཀུན་ཏུ་བཟང་པོའི་མཆོད་སྤྲིན་ལྟ་བུར་གྱུར། ཨོཾ་བཛྲ་སྤ་ར་ཎ་ཁཾ། བདག་དང་སེམས་
ཅན་ཐམས་ཅད། ཕ་དྲིན་ཅན་རྩ་བརྒྱུད་བླ་མ་རྣམས་ལ་སྐྱབས་སུ་མཆིའོ། །ཡི་དམ་རྒྱུད་སྡེ་བཞིའི་ལྷ་ཚོགས་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །མ་ཆོས་སྐུ་ཡེ་ཤེས་ཀྱི་མཁའ་འགྲོ་མ་ལ་སྐྱབས་སུ་མཆིའོ། །ལོངས་སྐུ་ཡེ་ཤེས་ཀྱི་མཁའ་འགྲོ་མ་ལ་སྐྱབས་སུ་མཆིའོ། །སྤྲུལ་སྐུ་ཡེ་ཤེས་ཀྱི་མཁའ་འགྲོ་མ་ལ་སྐྱབས་སུ་མཆིའོ། །མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཚེ་གཅིག་ལུས་གཅིག་ལ་ཟུང་འཇུག་རྡོ་རྗེ་འཆང་ཆེན་པོའི་གོ་འཕང་འགོད་པར་བྱ། དེའི་ཆེད་དུ་བདག་གིས་བཅོམ་ལྡན་འདས་མ་རྡོ་རྗེ་མཁའ་འགྲོ་མ་བསྒྲུབ་པར་བྱའོ། །རང་ཐ་མལ་པར་གནས་པའི་སྤྱི་བོར་པད་ཟླའི་གདན་ལ་ཧཱུྃ་དཀར་པོ་ལས་འོད་ཟེར་འཕྲོས་པས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་གནས་གསུམ་གྱི་དཔའ་བོ་ཌཀིའི་ཚོགས་ཐམས་ཅད་སྤྱན་དྲངས་ཧཱུྃ་ལ་ཐིམ་ཡོངས་སུ་གྱུར་པ་ལས། བླ་མ་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་ཅིང་རོལ་པའི་སྟབས་ཀྱིས། ཡུམ་རྡོ་
རྗེ་སྙེམས་མ་དཀར་མོ་གྲི་གུག་དང་ཐོད་པ་འཛིན་པ་ལ་འཁྱུད་པ་དར་དང་རིན་པོ་ཆེའི་རྒྱན་གྱིས་བརྒྱན་པའི་ཐུགས་ཀར་ཧཱུྃ་ལ་ཡི་གེ་བརྒྱ་པའི་སྔགས་ཕྲེང་མུ་ཏིག་གི་ཕྲེང་བ་ལྟར་འཁོད་པ་ལས་བདུད་རྩིའི་རྒྱུན་བབས་རང་གི་ཚངས་བུག་ནས་ཞུགས་ཤིང་ལུས་ཀྱི་ཕྱི་ནང་གཉིས་ཀ་བཀྲུས་པས་སྡིག་སྒྲིབ་ཉམས་ཆག་ཐམས་ཅད་བྱང་ཞིང་དག །ལུས་ཤེལ་སྒོང་གཡའ་དག་པ་ལྟར་གྱུར་པར་བསམས་ལ། ཨོཾ་བཛྲ་སཏཱ་ས་མ་ཡ་སོགས་ཡི་གེ་བརྒྱ་པ་ཅི་ནུས་བཟླའོ། །རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་པས་ནད་གདོན་སྡིག་སྒྲིབ་དག་།གདོས་བཅས་ཤ་ཁྲག་གི་ལུས་འདི་ལྕགས་ལ་གསེར་འགྱུར་གྱི་རྩིས་རེག་པ་ལྟར་སྐད་ཅིག་གིས་རང་ཉིད་ཏྟཀི་སེང་གདོང་མའི་སྐུར་གྱུར་པའི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་འོག་མིན་མཁའ་སྤྱོད་ཀྱི་གནས་ནས་མཁའ་འགྲོ་མ་སེང་གེའི་གདོང་པ་ཅན་ལ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་སྤྱན་དྲངས། བཛྲ་ས་མཱ་ཛ་ཛཿ གུ་རུ་དྷེ་ཝ་ཌཀྐི་ནཱི་སེང་ཧ་མུ་ཁ་ཨནྡྷཾ་སོགས་ནས། ཤབྡ་པྲ་ཏིཙྪ་ཡེ་སྭཱ་ཧཱ། སངས་རྒྱས་ཀུན་གྱི་རང་བཞིན་སྐུ། །སློབ་
དཔོན་ལ་ནི་བདག་སྐྱབས་མཆི། །དང་པོར་མེ་ཏོག་ཕོག་པའི་ལྷ། །དཀྱིལ་འཁོར་ལྷ་ཚོགས་རྣམས་ལ་འདུད། །དཔལ་ལྡན་རྡོ་།དྲག་མོ་སེང་གེའི་གདོང་པ་ཅན། །ཡེ་ཤེས་མེ་ཡི་འོད་ཟེར་འཕྲོ། །སེང་གེའི་གདོང་ཅན་ལྷ་མོར་འདུད། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་བྷྱོ ཕྱིར་། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱི་ཞིང་། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབསྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །སྤྲོ་ན་རིགས་ལྔའི་སྡོམ་བཟུང་ཡང་བྱའོ། །ཚོགས་ཞིང་རྣམས་རང་གི་སྙིང་གར་ཐིམ་པར་གྱུར། །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ཚད་མེད་བཞི་བསྒོམ། ཨོཾ་སྭ་བྷ་ཝ༔ ཆོས་ཐམས་ཅད་སྟོང་ཞིང་བདག་མེད་པའི་སྟོང་པ་ཉིད་དུ་
གྱུར། སྟོང་པའི་ངང་ལས་རང་གི་རྣམ་པར་ཤེས་པའི་ངོ་བོ་ཡི་གེ་ཧཱུྃ་མཐིང་ནག་ཅིག་ཏུ་གྱུར། ཧཱུཾ་དེ་ལས་འོད་ཟེར་ཁ་དོག་སྣ་ཚོགས་རིམ་པ་ལྟར་འཕྲོས་པ་ལས། །གནམ་ལྕགས་ཀྱི་འཁོར་ལོ་གུར་ཐབས་རྩིབས་སྟོང་རྣོ་བའི་ངར་དང་ལྡན་པ། དེ་ཡི་ཕྱི་རོལ་དུ་སྣ་ཚོགས་རྡོ་རྗེ་ཁ་གདེངས་བ་གསོར་ལོ་ལྟར་འཁོར་བ་བར་མཚམས་མེད་པའི་གུར། དེ་ཡི་ཕྱི་རོལ་དུ་ལས་བྱེད་ཀྱི་མཁའ་འགྲོ་མ་སྐུ་མདོག་སྣ་ཚོགས་འཇིགས་སུ་རུང་བ་ཞལ་ཕྱིར་གཟིགས་ནས་ཧཱུྃ་ཕཊ་དང་མཱ་ར་ཡའི་སྒྲ་འབྲུག་ལྟར་སྒྲོག་ཅིང་མཚོན་ཆ་སྣ་ཚོགས་ཐོགས་པས་བར་མཚམས་མེད་པར་གཏམས་པའི་གུར། དེ་ཡི་ཕྱི་རོལ་དུ་རྡོ་རྗེའི་གྲི་གུག་འབར་བ་སོ་འཐབས་པས་དགྲ་བགེགས་ཐམས་ཅད་དམྱལ་དམྱལ་གཏུབ་པར་བྱེད་པའི་གུར་ཁང་། དེ་ཡི་ཕྱི་རོལ་དུ་སྐུ་སྟོད་མཁའ་འགྲོ་མ་སེངྒེའི་གདོང་པ་ཅན་གྲི་གུག་ཐོད་པ་འཛིན་པ་སྐུ་སྨད་གནམ་ལྕགས་ཀྱི་ཕུར་པ་རྣོ་དབལ་དང་ལྡན་པ་དྲག་པོའི་ཚྭ་ཚྭ་འཁོར་བ། དེ་ལྟ་བུའི་བར་མཚམས་མེད་པས་གཏམས་པའི་གུར་ཁང་། དེ་ཡི་ཕྱི་རོལ་དུ་དགྲ་སྟ་འབར་བ་སོ་འཐབ་པའི་བར་དུ་དགྲ་བགེགས་བྱད་མ་ཐམས་ཅད་རྦད་རྦད་གཅོད་པར་བྱེད་པའི་གུར་ཁང་། དེ་
ཡི་ཕྱི་རོལ་དུ་ཁ་ཊཾ་འབར་བ་རྩེ་ཕྱིར་བསྟན་པའི་གུར། དེ་ཡི་ཕྱི་རོལ་དུ་རལ་གྲི་བསམ་ཆོད་འབར་བའི་གུར། དེ་ཡི་ཕྱི་རོལ་དུ་ཡེ་ཤེས་ཀྱི་མེ་རི་མེ་དཔུང་དམར་ནག་འུ་རུ་རུ་འབར་བ་དུམ་བུ་གཅིག་ཏུ་གྱུར་པའོ། །དེ་ལྟར་གུར་ཁང་དགུ་རིམ་གྱི་དབུས་སུ་འཁོར་ལོའི་ལྟེ་བར་གནམ་ལྕགས་འབར་བའི་གཞལ་ཡས་ཁང་གྲུ་བཞི་སྒོ་མེད་པ་རྒྱ་ཆེ་བ་དཔངས་མཐོ་བ་ལྕགས་སྲེག་འབར་བའི་རང་བཞིན་དམར་བ་ལེ་འདུག་པ་ལ། དྲག་པོའི་ཚྭ་ཚྭ་དང་མེ་དཔུང་འཕྲོ་བས་བྱད་མ་གནོད་བྱེད་ཐམས་ཅད་གཞོབ་བུན་བུན་སྲེག་པར་བྱེད་པ། དེ་ཡི་ནང་དུ་གནམ་ལྕགས་ལས་གྲུབ་པའི་བདུད་འདུལ་མཆོད་རྟེན་ཁྲི་འཕང་དགུ་པ་འོད་ཟེར་འཕྲོ་བ། དེ་ཡི་ནང་དུ་གསེར་གྱི་རྡོ་རྗེ་ཡར་རྩེ་ལྷ་གནས་སུ་སླེབ་པ། མར་རྩེ་དབང་ཆེན་གསེར་གྱི་ས་གཞི་ལ་ཟུག་པའི་ལྟེ་བ་ཡངས་ཤིང་རྒྱ་ཆེ་བའི་ནང་དུ། སྟེང་ཟླ་བ་འོག་ཉི་མ་གཉིས་ཁ་སྦྱོར་བའི་གུར་ཁང་། དེ་ཡི་ནང་དུ་འོད་ཟེར་ལྗང་ཁུ་དང་དམར་པོ་དང་སེར་པོ་དང་དཀར་པོ་དང་མཐིང་གའི་གུར་ཁང་ལྔ་རིམ། དེ་ཡི་ནང་དུ་ཨེ་ལས་ཆོས་ཀྱི་འབྱུང་གནས་གྲུ་གསུམ་པ་རྩ་བ་ཕྲ་བ་ཐུར་དུ་ཟུག་པ་ཁ་གདེངས་ཆེ་བ་གྱེན་དུ་བསྟན་པ་ཕྱི་དཀར་ལ་ནང་
མཐིང་ནག་ཡངས་ཤིང་རྒྱ་ཆེ་བའི་གཞལ་ཡས་ཁང་གི་དབུས་སུ་པཾ་ལས་སྣ་ཚོགས་པདྨ་དང་། ཨ་ལས་ཟླ་བ། རཾ་ལས་ཉི་མའི་སྟེང་དུ་དགྲ་བགེགས་ཕོ་མོ་བསྣོལ་བ་དང་ཨུ་མ་བསྐྱེལ་བའི་སྙིང་ཁར་རང་གི་རྣམ་པར་ཤེས་པའི་ངོ་བོ་རྒྱུའི་ཡི་གེ་ཧཱུྃ་མཐིང་ནག་བབ་ཅིང་། དེ་ལས་འོད་ཟེར་དམར་ནག་འཕྲོས། དགྲ་བགེགས་བྱད་མ་སྡེ་དཔུང་བཅས་པ་བསྒྲལ་ནས་རྒྱལ་བའི་ཡུམ་གྱི་གོ་འཕང་ལ་བཀོད། མཁའ་འགྲོ་ཆོས་སྐྱོང་ལྷ་སྲིན་དྲེགས་པ་ཅན་ཐམས་ཅད་ཀྱི་མཐུ་སྟོབས་བསྡུས་ཧཱུྃ་ལ་ཐིམ། དེ་འོད་དུ་ཞུ་ཡོངས་སུ་གྱུར་པ་ལས། རང་ཉིད་སྐད་ཅིག་གིས་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་སྐུ་མདོག་མཐིང་ནག་མི་བཟད་པའི་འོད་ཟེར་འཕྲོ་བ། སེང་གེའི་ཞལ་ཟླ་བ་ལྟར་དཀར་བ་གཡས་སུ་ཕྱོགས་པ་ལ་གཡུ་རལ་སྤྲིན་ལྟར་གཏིབས་པ། དམར་ལ་ཟླུམ་པའི་སྤྱན་གསུམ་མེ་སྟག་ཕུང་པོ་ལྟར་བསྒྲུད་ཅིང་སྡང་མིག་ཏུ་གཟིགས་པས་དགྲ་བགེགས་ཀྱི་ཚོགས་སྐྲག་པར་བྱེད་པ། ཟླ་ཚེས་ལྟར་མཆེ་བ་གཙིགས་ཤིང་ལྗགས་གློག་ལྟར་འཁྱུག་པ། ཞལ་ནས་དུག་གི་ཁ་རླངས་འཕྱུར་ཞིང་སེང་གེའི་ང་རོས་སྲིད་པ་གསུམ་གཡོ་བར་བྱེད་པ་ཕྱག་གཡས་རྡོ་
རྗེས་མཚན་པའི་གྲི་གུག་ནམ་མཁའ་ལ་འཕྱར་བའི་འོད་ཀྱིས་འཇིག་རྟེན་གསལ་ཞིང་། གཡོན་བདུད་བཞིའི་ཁྲག་གིས་བཀང་བའི་ཐོད་པ་ཐུགས་ཀར་འཛིན་པ། ཞབས་གཡས་བསྐུམ་པའི་རྟིང་པས་བྷ་ག་མནན་ཞིང་། གཡོན་བརྐྱངས་བས་ཨུ་མའི་སྙིང་ཁར་མནན་པ། གྲུ་མོ་གཡོན་ན་ཡབ་ཧེ་རུ་ཀ་མཚོན་པའི་ཁ་ཊཾ་ག་གྱེན་དུ་བསྒྲེངས་པ་ལ་ཌ་མ་རུ་དང་དར་སྣ་ལྔ་ཡི་ཅོད་པན་དང་གཡེར་ཁ་འཆང་བ། རིན་པོ་ཆེའི་རྩེ་བྲན་དང་བཅས་པའི་ཐོད་སྐམ་ལྔ་ཡི་དབུ་རྒྱན་དང་། རྒྱུ་མས་སྦྲེལ་ཞིང་ཁྲག་འཛག་པའི་ཐོད་རློན་ལྔ་བཅུའི་ཕྱེ་རལ་ཁར་འཕྱང་བ། སྦྲུལ་དང་རིན་པོ་ཆེའི་གདུ་བུ་དང་། དོ་ཤལ་དང་། རུས་པའི་རྒྱན་ཆ་ལྔས་བརྒྱན་པ། རྡོ་རྗེའི་གོ་ཁྲབ་དང་། ཞིང་ལྤགས་དང་། གླང་ཀོའི་སྟེང་ན་དར་ནག་གི་གོ་ཟུ་གསོལ་ཞིང་སྟག་གི་པགས་པ་རློན་པས་སྨད་དཀྲིས་པ། གཞོན་ཚུལ་བདེ་བའི་ཉམས་དུ་མ་དང་ལྡན་ཞིང་ཁམས་གསུམ་ལས་རྣམ་པར་རྒྱལ་བའི་སྐུ་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པར་གྱུར། ཕུང་ཁམས་སྐྱེ་མཆེད་ཀྱི་ལྷ་དེ་དག་དེ་དང་དེ་ཡིན་བསམ་པ་ཙམ་གྱིས་ཆོག །དེ་ཡི་དཔྲལ་བར་གཟུགས་ཀྱི་ཕུང་པོ་དང་ནམ་མཁའི་ཁམས་རྣམ་པར་དག་པ།
སངས་རྒྱས་རིགས་ཀྱི་སེང་གདོང་མ་དཀར་མོ་འཁོར་ལོས་མཚན་པའི་གྲི་ཐོད་འཛིན་ཅིང་རྣམ་སྣང་གི་དབུ་རྒྱན་ཅན། །མགྲིན་པར་འདུ་ཤེས་ཀྱི་ཕུང་པོ་དང་མེ་ཁམས་རྣམ་པར་དག་པ། པདྨ་རིགས་ཀྱི་སེང་གདོང་མ་དམར་མོ་པདྨས་མཚན་པའི་གྲི་ཐོད་འཛིན་ཅིང་སྣང་མཐའི་དབུ་རྒྱན་ཅན། སྙིང་ཁར་རྣམ་ཤེས་ཀྱི་ཕུང་པོ་དང་། ཆུ་ཁམས་རྣམ་པར་དག་པ། རྡོ་རྗེ་རིགས་ཀྱི་སེང་གདོང་མ་མཐིང་ཀ་རྡོ་རྗེས་མཚན་པའི་གྲི་ཐོད་འཛིན་ཅིང་མི་བསྐྱོད་པའི་དབུ་རྒྱན་ཅན། ལྟེ་བར་ཚོར་བའི་ཕུང་པོ་དང་། ས་ཁམས་རྣམ་པར་དག་པ། རིན་ཆེན་རིགས་ཀྱི་སེང་གདོང་མ་སེར་མོ། རིན་པོ་ཆེའི་མཚན་པའི་གྲི་ཐོད་འཛིན་ཅིང་རིན་འབྱུང་གི་དབུ་རྒྱན་ཅན། གསང་བར་འདུ་བྱེད་ཀྱི་ཕུང་པོ་དང་རླུང་ཁམས་རྣམ་པར་དག་པ་ལས་ཀྱི་རིགས་ཀྱི་སེང་གདོང་མ་ལྗང་མོ། རྒྱ་གྲམ་གྱིས་མཚན་པའི་གྲི་ཐོད་འཛིན་ཅིང་དོན་གྲུབ་ཀྱི་དབུ་རྒྱན་ཅན། མིག་ཏུ་གཟུགས་རྡོ་རྗེ་མ་དཀར་མོ་སེང་གེའི་གདོང་པ་ཅན། རྣ་བར་སྒྲ་རྡོ་རྗེ་མ་ནག་མོ་སེང་གེའི་གདོང་པ་ཅན། སྣ་ལ་དྲི་རྡོ་རྗེ་མ་སེར་མོ་སེང་གེའི་གདོང་པ་ཅན། ལྕེ་ལ་རོ་རྡོ་རྗེ་མ་དམར་མོ་སེང་གེའི་གདོང་པ་ཅན། དཔྲལ་
བར་རེག་རྡོ་རྗེ་མ་ལྗང་མོ་སེང་གེའི་གདོང་པ་ཅན། བ་སྤུ་ཐམས་ཅད་ཀྱང་སྤྲུལ་པ་ཡང་སྤྲུལ་གྱི་མཁའ་འགྲོ་མ་སེང་གེའི་གདོང་པ་ཅན་ཡུངས་ཀར་གྱི་འབྲུ་ཙམ་པ། དེ་དག་ཐམས་ཅད་ཀྱི་ཁ་ཊཾ་དང་གྲི་གུག་ཐོད་ཁྲག་བསྣམས་པ། གཡས་སུ་ཡེ་ཤེས་ཀྱི་མཁའ་འགྲོ་མ་སྟག་གི་གདོང་པ་ཅན། གཡོན་དུ་ཡེ་ཤེས་ཀྱི་མཁའ་འགྲོ་མ་དོམ་གྱི་གདོང་པ་ཅན། དེ་གཉིས་ཀྱང་ཁྲོ་རྔམ་དང་ལྡན་པས་ཕྱག་གཉིས་ཉི་ཟླའི་ཆ་ལང་རྡེབ་པ། ཤར་དུ་རྡོ་རྗེ་མཁའ་འགྲོ་མ་བདེ་ཆེན་དཀར་མོ་སེང་གེའི་གདོང་པ་ཅན། ལྷོར་རིན་ཆེན་མཁའ་འགྲོ་མ་སེར་མོ་དོན་འགྲུབ་སེང་གེའི་གདོང་པ་ཅན། ནུབ་ཏུ་པདྨ་མཁའ་འགྲོ་མ་དམར་མོ་སྒྲ་སྒྲོགས་སེང་གེའི་གདོང་པ་ཅན། བྱང་དུ་ལས་ཀྱི་མཁའ་འགྲོ་མ་སྣ་ཚོགས་མཐར་ཕྱིན་ལྗང་མོ་སེང་གེའི་གདོང་པ་ཅན། འཁོར་རང་དང་འདྲ་བའི་མཁའ་འགྲོ་མ་གྲི་གུག་དང་ཐོད་ཁྲག་འཛིན་པ་བྱེ་བ་འབུམ་དང་བཅས་པའོ། །བདག་ཉིད་ཀྱི་དཔྲལ་བར་སྐུ་རྡོ་རྗེའི་ངོ་བོ་ཨོཾ་དཀར་པོ། མགྲིན་པར་གསུང་རྡོ་རྗེའི་ངོ་བོ་ཨཱདམར་པོ། ཐུགས་ཀར་ཐུགས་རྡོ་རྗེའི་ངོ་བོ་ཧཱུྃ་མཐིང་ནག །ཐུགས་ཀའི་ཧཱུཾ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་མཁའ་སྤྱོད་དག་པའི་
གནས་དང་། ཨོ་རྒྱན་གྱི་ཡུལ་རབ་ཏུ་འབར་བ་འཁྲིགས་པའི་དུར་ཁྲོད་ནས་མ་ཡེ་ཤེས་ཀྱི་ཌཱཀྐི་སེང་གེའི་གདོང་ཅན་མའི་ལྷ་ཚོགས་སྤྱན་དྲངས། རྐང་གླིང་ཌཱ་དྲིལ་རོལ་མོ་བསྒྲོགས། ཧཱུྃ་བྷྱོ༔ འོག་མིན་མཁའ་སྤྱོད་ཞིང་ཁམས་ཨོ་རྒྱན་ཡུལ། །རབ་ཏུ་འབར་བ་འཁྲིགས་པའི་དུར་ཁྲོད་ནས། །རྒྱལ་བའི་བསྐྱེད་ཡུམ་ཌཀྐི་སེང་གདོང་མ། །རྣལ་འབྱོར་བྱིན་གྱིས་བརླབ་ཕྱིར་གཤེགས་སུ་གསོལ། །ཨོཾ་བཛྲ་ཌཱཀྐི་སེང་ཧ་མུ་ཁ་བཛྲ་ས་མཱ་ཛཿ ཨརྒྷཾ་སོགས། ཛཿཧཱུྃ་བཾ་ཧོཿ དམ་ཚིག་པ་དང་དབྱེར་མེད་དུ་གྱུར། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས། དབང་ལྷ་རིགས་ལྔ་སྤྱན་དྲངས། བཛྲ་ས་མཱ་ཛཿ ཕྱག་ན་ཡེ་ཤེས་ཀྱི་བདུད་རྩིས་གང་བའི་བུམ་པས་སྤྱི་བོ་ནས་དབང་བསྐུར་བས། སྒོ་གསུམ་གྱི་དྲི་མ་དག །ཆུའི་ལྷག་མ་ཡར་ལུད་པ་ལས། མི་བསྐྱོད་པ་གཙོ་བོར་གྱུར་པའི་རིགས་ལྔས་དབུ་བརྒྱན་པར་གྱུར། རང་གི་ཐུགས་ཀར་པདྨ་དམར་པོ་འདབ་མ་བཅུ་བཞིའི་ལྟེ་བར། ཉི་མའི་དཀྱིལ་འཁོར། དེའི་སྟེང་དུ་འཁོར་ལོ་དམར་པོ་རྩིབས་བཅུ་བཞིའི་ལྟེ་བར། ཧཱུྃ་མཐིང་ནག་རྩིབས་རྣམས་ཀྱི་སྟེང་དུ་མ་རེག་པའི་ཚུལ་དུ་མདུན་ནས་གཡས་སུ་
བཀོད་དེ། ཨ༔ཀ༔ར༔མ༔ཤ༔ད༔ར༔ས༔མ༔ར༔ཡ༔ཕཊ༔ ཅེས་པ་རྣམས་ཁ་དོག་མཐིང་ནག་དམར་མདངས་ཆགས་པའོ། །དང་པོའི་ཡིག་འབྲུ་དེ་དག་ཀློག་པའི་ཚུལ་དུ་ཅུང་ཟད་བཟླས་ཏེ། རྣམ་བཅད་ཡོད་པའི་ཕྱིར་དྲག་པོར་བཅད་དེ་འབྲུ་རེ་རེ་དུམ་བུར་བཀླག་གོ །དེ་ནས་ཡིག་འབྲུ་དེ་རྣམས་ལས་འོད་ཟེར་ཁ་དོག་ལྔ་ལྡན་འཇའ་ཚོན་ལྟ་བུར་བྱུང་སྟེ། འོད་ཟེར་གཡོན་དུ་ཀྱི་ལི་ལི་འཁོར་བར་གྱུར། ཡིག་འབྲུ་བཅུ་བཞི་ཅུང་ཟད་བཟླས། སླར་ཡང་ཐུགས་སྲོག་ཧཱུྃ་ཡིག་མི་གཡོ་ཞིང་། སྔགས་ཕྲེང་རྣམས་གཡོན་དུ་ཀྱི་ལི་ལི་འཁོར་ཞིང་དེ་ལས་འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཐམས་ཅད་མཆོད་ཅིང་སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད་བསྡུས་ནས་རང་ཉིད་ལ་བསྟིམ། །སྔགས་བདུན་ཕྲག་ཙམ། ཡང་འོད་ཟེར་མཐིང་ནག་དམར་མདངས་ཅན་ཚ་ལ་རྩུབ་པ་འཕྲོས། བདུད་དང་ལོག་འདྲེན་བྱེད་མ་གནོད་བྱེད་ཐམས་ཅད་ཚར་བཅད་ཅིང་དེ་དག་གི་མཐུ་སྟོབས་ནུས་པ་ཐམས་ཅད་ཚུར་བསྡུས་ནས་རང་ཉིད་ལ་བསྟིམ། ཡང་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས་སངས་རྒྱས་ཀྱི་གོ་འཕང་ལ་བཀོད། འཇིག་
རྟེན་ཁམས་ཀྱི་ཚེ་བསོད་དཔལ་འབྱོར་ཐམས་ཅད་འོད་ཟེར་གྱི་རྣམ་པར་བསྡུས་ནས་རང་ཉིད་ལ་ཐིམ་པས་གཟི་བརྗིད་ནུས་མཐུ་ཕུན་སུམ་ཚོགས་པར་གྱུར། དེ་ལྟར་དམིགས་པ་དང་ལྡན་པས་བསྙེན་པ་བྱའོ། །དེ་ནས་ཐུན་མཇུག་ཏུ་རྫོགས་རིམ་བསྒོམ་པ་ནི། རང་ཉིད་ཡེ་ཤེས་ཀྱི་མཁའ་འགྲོ་མར་གསལ་བའི་ལུས་ཀྱི་ནང་སྟོང་ཞིང་སྒྲིབ་པ་མེད་པའི་ནང་དུ། རྩ་གསུམ་འཁོར་ལོ་བཞི་ལྡན་གསལ་བའི་སྤྱི་བོར་སེང་གདོང་མ་དཀར་མོ་ཚོན་གང་བ་ལ། ལྟེ་འོག་སུམ་མདོར་སེང་གདོང་མ་དམར་མོ་ཚོན་གང་བ་ལ་རླུང་བཟུང་བས་རོ་རྐྱང་ནས་བརྒྱུད་དབུ་མའི་ནང་དུ་ཞུགས་པས་མེ་ལ་སྦྱད་པ་རྒྱབ་པ་ལྟར་སེང་གདོང་མ་དམར་མོ་ལས་མེ་ལྕེ་ནར་གྱིས་འབར། རྩ་གནས་ཐམས་ཅད་མེ་ཡིས་གང་བས་དྲོད་སྐྱེས། སྤྱི་བོར་སེང་གདོང་མ་དཀར་མོ་ལས་བདུད་རྩི་བྱང་སེམས་དཀར་པོའི་རྒྱུན་བྱུང་མགྲིན་པར་གང་བས་དགའ་བའི་ཡེ་ཤེས་སྐྱེས། སྙིང་ཁར་བབས་པས་མཆོག་གི་དགའ་བ། ལྟེ་བར་བབས་པས་དགའ་བྲལ་གྱི་དགའ་བ། ལུས་ཀྱི་སྤྱི་བོ་ནས་རྐང་མཐིལ་གྱི་བར་ཐམས་ཅད་གང་བས་ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས། བདེ་བ་དང་སྟོང་པ་དབྱེར་མེད་པའི་རྟོགས་པ་ཁྱད་པར་
ཅན་རྒྱུད་ལ་སྐྱེས་པར་གྱུར། ཞེས་རླུང་བཟུང་ནས་ཅི་ནུས་སུ་བསྒོམ། བཟའ་བཏུང་གི་ཆེ། སྟོང་པའི་ངང་ལས་ཐོད་པའི་སྣོད་དུ་བཟའ་བཏུང་ཤ་ལྔ་བདུད་རྩི་ལྔ་ཞུ་བའི་ཡེ་ཤེས་ཀྱི་བདུད་རྩིར་གྱུར༔ རང་ཉིད་སེང་གདོང་མར་གསལ་ཞིང་། གཏུམ་མོའི་མེ་སྦར་བས་རྩ་གནས་ལྔར་སེང་གདོང་མ་རིགས་ལྔ་གསལ་བ་ཁ་ཐབ་ཁུང་ལག་པ་དགང་གཟར་བླུགས་སུ་ཡེ་ནས་གནས་པས་སྦྱིན་སྲེག་བྱས་པས་བསོད་ནམས་ཀྱི་ཚོགས་འཕེལ་བར་འགྱུར། ཨོཾ་ཨཱཧཱུྃ་ཧ་ཧོ་ཧི༔ ཞེས་བརྗོད་ཅིང་ལོངས་སྤྱོད་ལ། རང་ལུས་རྒྱལ་བའི་དཀྱིལ་འཁོར་སོགས། བསྔོ་བ་བྱ། ཐུན་མཚམས་སུ་གཏོར་མ་བྲན་ལ། ཨོཾ་བི་ཤྭ་ཌཱཀྐི་ནཱི་ཧཱུྃ་ཕཊ། ཨོཾ་སྭ་བྷཱ་ཝ་སོགས། སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་ལས་རླུང་། རཾ་ལས་མེ། ཀཾ་ལས་ཐོད་སྐྱེད་གསུམ་གྱི་སྟེང་དུ། ཨ་ལས་ཀ་པཱ་ལ་ཡངས་ཤིང་རྒྱ་ཆེ་བ། ཤ་ལྔ་བདུད་རྩི་ལྔ་ས་བོན་དང་བཅས་པ། རླུང་གཡོས་མེ་སྦར་ཐོད་པ་དྲོས་རྫས་རྣམས་ཞུ་བས་དམ་ཚིག་གི་བདུད་རྩི་དང་འོག་མིན་ནས་ཡེ་ཤེས་ཀྱི་བདུད་རྩི་སྤྱན་དྲངས་ནས་གཉིས་སུ་མེད་པར་གྱུར། ཨོཾ་ཨཱཧཱུཾ། རང་གི་ཐུགས་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་གཏོར་མགྲོན་རྣམས་སྤྱན་དྲངས་པར་གྱུར། ཧཱུཾ་བྷྱོ༔ འོག་མིན་གནས་དང་འཐུག་པོ་
བཀོད། །མངོན་དགའི་ཞིང་དང་དཔལ་ལྡན་ཞིང་། །བདེ་བ་ཅན་དང་རྔ་སྒྲ་ཅན། །མཁའ་སྤྱོད་ཞིང་དང་ཨོ་རྒྱན་གནས། །ཤམ་བྷ་ལ་དང་དུར་ཁྲོད་བརྒྱུད། །ཡུལ་ཆེན་ཉི་ཤུ་རྩ་བཞི་ནས། །རིག་འཛིན་བརྒྱུད་པའི་བླ་མ་རྣམས། །ཡེ་ཤེས་ཌཱཀྐི་སེང་གདོང་མ། །སྐུ་གསུང་ཐུགས་ཀྱི་འཁོར་ལོ་ནས། །རི་རབ་སོ་གཉིས་རྡུལ་མཉམ་པའི། །མཁའ་འགྲོའི་ཚོགས་རྣམས་མ་ལུས་ཀུན། །སྐལ་ལྡན་བྱིན་གྱིས་བརླབ་པ་དང་། །མཆོད་པ་འབུལ་ཞིང་བཞེས་སླད་དུ། །མཁའ་ལ་རང་བཞིན་ཤུགས་ཀྱིས་ནི། །གློག་ལྟར་མྱུར་བའི་རྫུ་འཕྲུལ་གྱིས། །སྐད་ཅིག་ཙམ་གྱིས་གཤེགས་སུ་གསོལ། །ཞེས་མཐེབ་མཛུབ་གཉིས་ལུ་གུ་རྒྱུད་དུ་བྱས་ལ་རྩེ་སྦྱར་ལྷག་མ་འབར་བར་ལྟར་བྱས་པ་དཔྲལ་བར་གཡོན་དུ་བསྐོར་ཞིང་མིག་གིས་ནམ་མཁར་བལྟས་ཤིང་རྐང་པ་གཡས་པས་གཡོན་པ་མནན་ལ། ཕོ་ལེ་ཝེ། བཛྲ་ཨཱ་ར་ལི་ཧོཿ ཛཿཧཱུྃ་བཾ་ཧོཿ བཛྲ་ཌཱཀྐི་ནི་ས་མ་ཡ་སྟེ། དྲྀ་ཤྱ་ཧོ༔ བཛྲ་ཨནྡྷཾ་སོགས། ན་མོ་རཏྣ་གུ་རུ་ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཤྲཱི་བཛྲ་ཌཱཀྐི་སེང་ཧ་མུ་ཁ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བུདྡྷ་ཌཱཀྐི་ནཱི། བཛྲ་ཌཀྐི་ནཱི། རཏྣ་ཊཱཀྐི་ནཱི། པདྨ་ཌཱཀྐི་ནཱི། ཀརྨ་ཊཱཀྐི་ནཱི། བི་ཤྭ་ཌཱཀྐི་
ནི། ལོ་ཀ་ཌཀྐི་ནཱི། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཤྲཱི་བཛྲ་ཌཱཀྐི་སེང་ཧ་མུ་ཁ་ས་པཱ་རི་ཝཱ་ར་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ཞེས་བདུད་རྩི་མཆོད། དེ་ནས་བདུད་རྩི་མཆོད་པ་དང་། གཏོར་བསྔོས་གཉིས་ཀ་མཉམ་དུ་བྱ་སྟེ། ཨོཾ་ཨཱཧཱུཾ། རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །དཔལ་མགོན་ཀླུ་སྒྲུབ་བྲམ་ཟེ་ཨཱརྱ་དེ། །པདྨ་འབྱུང་གནས་པཎ་ཆེན་རྡོ་རྗེ་གདན། །བ་རི་བ་སོགས་རིང་བརྒྱུད་བླ་མ་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །ཡེ་ཤེས་མཁའ་འགྲོ་རྡོ་རྗེ་གདན་པ་དང་། །བ་རི་ལོ་ཙཱ་ས་ཆེན་ཀུན་དགའ་སྙིང་། །བསོད་ནམས་རྩེ་མོ་གྲགས་པ་རྒྱལ་མཚན་ཞབས། །ས་པཎ་ལ་སོགས་ཉེ་བརྒྱུད་བླ་མ་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །ཡེ་ཤེས་མཁའ་འགྲོ་བླ་མ་བཻ་རོའི་ཞབས། །དུས་གསུམ་མཁྱེན་པ་ཀཾ་ཚང་དོན་གྱི་བརྒྱུད། །རྒྱལ་བ་ཀུན་དངོས་ཆོས་ཀྱི་དབང་ཕྱུག་ཞབས། །ཐུགས་རྗེ་མཚུངས་མེད་རཱ་ག་ཨ་སྱ་སོགས། །བཀའ་བབས་བྱིན་རླབས་བརྒྱུད་པའི་བླ་མ་ལ། །དམ་རྫས་བདུད་རྩི་
གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །ཀུན་བཟང་ཡབ་ཡུམ་མཁའ་འགྲོ་སེང་གདོང་མ། །པད་འབྱུང་སངས་རྒྱས་མགོན་པོ་ཀུན་དགའ་དར། །བྱམས་པ་ཆོས་ཉིད་པདྨ་གར་དབང་སོགས། །ཞལ་གཟིགས་རིག་འཛིན་བརྒྱུད་པའི་བླ་མ་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །བཅོམ་ལྡན་རྡོ་རྗེ་ཕག་མོ་གསང་བའི་བདག །ལས་ཀྱི་དབང་མོ་ཆེ་དང་པདྨ་འབྱུང་། །མཚོ་རྒྱལ་རཏ་གླིང་འཇའ་ཚོན་སྙིང་པོ་སོགས། །ཟབ་གཏེར་བརྒྱུད་པའི་བླ་མ་ཐམས་ཅད་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །དུས་གསུམ་རྒྱལ་བ་མ་ལུས་བསྐྱེད་པའི་ཡུམ། །ནམ་མཁའི་མདོག་ཅན་གནས་གསུམ་མཁའ་འགྲོའི་གཙོ། །བརྟན་དང་གཡོ་བའི་བདག་ཉིད་བདེ་ཆེན་སྐུ། །རྡོ་རྗེ་མཁའ་འགྲོ་སེང་གེའི་གདོང་ཅན་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །སྐུ་ལས་
སྤྲུལ་པའི་རབ་གཏུམ་སྟག་གདོང་མ། །གསུང་ལས་སྤྲུལ་པའི་རབ་འཇིགས་དོམ་གདོང་མ། །རིགས་བཞིའི་མཁའ་འགྲོ་སེང་གེའི་གདོང་ཅན་བཞི། །ཕྱོགས་བཞི་མཚམས་བཞི་སྟེང་འོག་མཁའ་འགྲོ་མ། །རང་འདྲའི་འཁོར་ཚོགས་འབུམ་ཕྲག་བཅས་རྣམས་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །དམ་ཚིག་མཁའ་འགྲོ་འཇིག་རྟེན་མཁའ་འགྲོ་དང་། །སྣ་ཚོགས་མཁའ་འགྲོ་ཐམས་ཅད་མཁའ་འགྲོ་རྣམས། །སེང་གེའི་གདོང་ཅན་རང་འདྲ་འབུམ་དང་བཅས། །སྒོ་མ་བཞི་དང་ཕྲ་མེན་བཅུ་བཞི་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་བྱིན་རླབས་དངོས་གྲུབ་སྩོལ། །ཕྱི་ནང་གསང་བའི་ཌཱཀྐི་སེང་གདོང་མ། །རི་རབ་སོ་གཉིས་རྡུལ་མཉམ་ཌཱཀྐིའི་ཚོགས། །བཀའ་སྡོད་སྲིད་པའི་མ་མོ་བྱེ་བ་འབུམ། །གནས་དང་ཡུལ་གྱི་ཌཱཀྐི་ཐམས་ཅད་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །གནོད་སྦྱིན་ཆེན་པོ་རྡོ་རྗེ་རྒྱལ་མཚན་དང་། །ཨེ་ཀ་ཙ་ཏི་ཤན་
པ་དམར་ནག་དང་། །དགེ་བསྙེན་སྨྱོ་ཁ་མཁའ་རི་ལྕམ་དྲལ་སོགས། །ཆོས་བདག་བཀའ་སྲུང་དམ་ཅན་རྒྱ་མཚོ་ལ། །དམ་རྫས་བདུད་རྩི་གཏོར་མའི་མཉེས་མཆོད་འབུལ། །དམ་ཚིག་རྗེས་བསྐང་ཕྲིན་ལས་རྣམ་བཞི་བསྒྲུབ། །ཌཀྐི་སེང་གེའི་གདོང་ཅན་འཁོར་བཅས་ཀྱིས། །དམ་རྫས་བདུད་རྩི་གཏོར་མ་འདི་བཞེས་ལ། །བདག་ཅག་དཔོན་སློབ་བསྲུང་བྱ་འཁོར་བཅས་ལ། །ལུས་ངག་ཡིད་གསུམ་སྲུང་ཞིང་སྐྱོབ་པ་དང་། །ནད་གདོན་འཇིགས་པ་བརྒྱད་སོགས་ཞི་བར་མཛོད། །ཚེ་དང་བསོད་ནམས་དཔལ་འབྱོར་རྒྱས་པ་དང་། །ཁམས་གསུམ་སྲིད་གསུམ་དབང་དུ་འདུ་བར་མཛོད། །དགྲ་བགེགས་བྱད་མ་ལོག་ལྟ་བསྒྲལ་བར་མཛོད། །མཆོག་ཐུན་དངོས་གྲུབ་རྒྱ་ཆེན་སྩོལ་བར་མཛོད་། །འཁོར་འདས་སྣང་སྲིད་དབང་དུ་འདུ་བ་དང་། །འདུ་བ་རྣམ་གསུམ་མྱུར་དུ་འདུ་བར་མཛོད། །ཚུགས་པ་རྣམ་གསུམ་མྱུར་དུ་ཚུགས་པར་མཛོད། །བྱད་ཀ་དྲོད་གཏོང་གནོད་པ་ཟློག་པ་དང་། །བདག་ལ་སྡང་བའི་དགྲ་བགེགས་ཚར་གཅོད་མཛོད། །བདག་དང་མཐའ་ཡས་སེམས་ཅན་མ་ལུས་པ། །ཡེ་ཤེས་ཌཱཀིས་རྟག་ཏུ་རྗེས་བཟུང་ལ། །
རང་རིག་སྐྱེ་མེད་ཆོས་སྐུའི་དོན་རྟོགས་ནས། །འཇའ་ལུས་མཁའ་སྤྱོད་ཚེ་འདིར་འགྲུབ་པར་མཛོད། །ནམ་ཞིག་འཕོས་ཚེ་གནས་གསུམ་ཌཀྐི་ཡིས། །བདེ་ཆེན་དག་པའི་ཞིང་དེར་ལམ་སྣ་དྲོངས། །དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། ཅེས་ཕུལ། དེ་ནས་བསྟོད་པ་ནི། ཨེ་མ་ཧོ༔ ཆོས་སྐུ་སྐྱེ་བ་མེད་པ་ལ། །གང་འདུལ་སྒྱུ་མའི་བཀོད་པ་ཅན། །དུས་གསུམ་རྒྱལ་བའི་ཕྲིན་ལས་མཛད། །རྩ་བརྒྱུད་བླ་མར་ཕྱག་འཚལ་བསྟོད། །རྒྱལ་དང་རྒྱལ་སྲས་ཀུན་གྱི་ཡུམ། ། འཁོར་འདས་སྣང་སྲིད་ཀུན་གྱི་གཞི། །ཆོས་སྐུ་ཡེ་ཤེས་མཁའ་འགྲོ་མ། །སེང་གེའི་གདོང་ཅན་ཕྱག་འཚལ་བསྟོད། །འཇའ་ཚོན་ལྟ་བུའི་སྐུ་གཟུགས་ཀྱི། །ཧེ་རུ་ཀ་དཔལ་ལྔ་དང་སྦྱོར། །ལོངས་སྐུ་ཡེ་ཤེས་མཁའ་འགྲོ་མ། །སེང་གདོང་མཁའ་འགྲོར་ཕྱག་འཚལ་བསྟོད། །ཨོ་རྒྱན་སྤྲུལ་པའི་ཞིང་ཁམས་ནས། །གནས་གསུམ་མཁའ་འགྲོའི་གཙོ་མོ་མཛད་། །སྤྲུལ་སྐུ་ཡེ་ཤེས་མཁའ་འགྲོ་མ། །ཕྱག་འཚལ་སེང་གདོང་ལྷ་མོ་ལ། །འབྱུང་བཞི་གནས་དག་ཡེ་ཤེས་བཞི། །ཕྲིན་ལས་རྣམ་བཞིས་འགྲོ་བ་འདུལ། །འཁོར་ནི་བྱེ་
བ་བསམ་མཐའ་ཡས། །རིགས་བཞི་མཁའ་འགྲོར་ཕྱག་འཚལ་བསྟོད། གཙོ་མོའི་བཀའ་ཉན་དམ་ཚིག་ཅན། །དུར་ཁྲོད་འགྲིམ་ཞིང་རྣལ་འབྱོར་སྐྱོང་། །ལེགས་ཉེས་ཀུན་གྱི་སྟངས་འཛིན་མཁན། །ཕྱག་འཚལ་སྲུང་མ་རྒྱ་མཚོ་ལ། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་བསྟོད། །མ་འབྱོར་པ་དང་ཉམས་པ་དང་སོགས་ཡིག་བརྒྱ་བརྗོད། གཏོར་མགྲོན་གྱི་ཡེ་ཤེས་པ་རང་ཉིད་ལ་ཐིམ། འཇིག་རྟེན་པ་རྣམས་རང་གནས་སུ་བཛྲ་མུཿ དེ་ནས་ཐུན་བསྡུ་བ་ནི། ་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་སྣོད་བཅུད་ཞུ་ནས་སྲུང་འཁོར་ལ་ཐིམ། དེ་ཡང་རིམ་བཞིན་ཕྱི་མ་ནང་མ་ལ་ཐིམ། མཐར་རང་ཉིད་ཐུགས་ཀའི་ཧཱུཾ་ལ་ཐིམ། དེ་ཡང་ཞབས་ཀྱུ་ནས་གྱེན་དུ་ཡལ་ཏེ་སྐུ་ཡི་རྩེ་མོ་བརྒྱར་གཤགས་པ་ཙམ་དང་། དེ་ཡང་མི་དམིགས་པ་སྟོང་གསལ་ནམ་མཁའ་གཡའ་དང་བྲལ་བ་ལྟ་བུར་གྱུར། ཞེས་གསལ་གདབ་ནས། བཟོ་བཅོས་མེད་པར་ལྷུག་པར་བཞག་གོ །ཉལ་བའི་ཚེ་ཡང་དེ་ལྟ་བུའི་ངང་ནས་ཉལ་བས་འོད་གསལ་ཟིན་པར་བཤད་ཅིང་། འཆི་ཚེ་ཡང་དེ་ལྟ་བུའི་ངང་ནས་འཆི་བཅུག་པས་
གཞིའི་འོད་གསལ་ཟིན་པར་གསུངས་སོ། །དེ་ནས་ཐུན་མཚམས་སུ། འདི་ལྟར་བསྐྱེད་རྫོགས་སྒོམ་བཟླས་བྱས་པ་དང་། །དུས་གསུམ་བསགས་པའི་དགེ་བ་ཅི་མཆིས་པ། །ནམ་མཁའི་མཐའ་ཀླས་གྱུར་པའི་འགྲོ་བ་རྣམས། །ཟུང་འཇུག་རྡོ་རྗེ་འཆང་གི་སྐུ་འགྲུབ་ཤོག །སྒྲུབ་པ་པོ་ལ་རྟག་ཏུ་བུ་བཞིན་བརྩེ། །མཆོག་དང་ཐུན་མོང་དངོས་གྲུབ་ཆར་ལྟར་འབེབས། །རྒྱལ་བའི་ཡུམ་གཅིག་མཁའ་འགྲོ་སེང་ཞལ་ཅན། །གནས་གསུམ་ཌཱཀྐིའི་ཚོགས་ཀྱི་བཀྲ་ཤིས་ཤོག །ཅེས་བརྗོད་ལ། སྟོང་པའི་ངང་ལས་ཟུང་འཇུག་སྒྱུ་མ་ལྟ་བུའི་སྐུ་སེང་གདོང་མ་རྒྱན་སྤངས་པ་ཅིག་ཏུ་གྱུར་ནས་འགྲོ་བའི་དོན་བྱའོ། །ཞེས་སྤྱོད་ལམ་ལ་འཇུག་གོ །དེ་ལྟ་བུའི་ཐུན་དང་ཐུན་དུ་བཅད་ཅིང་། བསྙེན་པ་མི་ཚིག་གིས་བར་མ་ཆོད་པར་བཟླས་ཏེ། དུས་ནི་རབ་ཟླ་བ་དྲུག་གམ་གསུམ། འབྲིང་ཟླ་བ་གཅིག་གམ་ཞག་ཉེར་གཅིག །ཐ་མ་ཞིག་པོ་བཅུའམ་བདུན་ནོ། །གྲངས་ནི་རབ་འབུམ་ཕྲག་བཅུ་བདུན་ནམ་བཅུ་བཞི། འབྲིང་འབུམ་ཕྲག་བཅུའམ་གསུམ། ཐ་མ་འབུམ་ཕྲག་གཉིས་སམ་གཅིག །ཡང་ཐ་སྟོང་ཕྲག་སུམ་ཅུ་བཟླས་པས་ལས་སྦྱོར་རུང་གསུངས་སོ། །རྟགས་ནི་རབ་དངོས་འབྲིང་ཉམས་སྣང་། ཐ་ན་རྨི་ལམ་དུ་འབྱུང་སྟེ། ཞལ་མཇལ་ལུང་སྟོན་དབང་བསྐུར་བ། མ་སྲིང་དང་བུད་མེད་ཆས་བཟང་མང་པོ་འདུ་བ། གླུ་ལེན་བྲོ་འཁྲབ། བདུད་རྩི་དང་
དཀར་གསུམ་བྱིན་པ། གསང་ཚིག་སྨྲ་བ། བརྡ་སྟོན་པ། པོཏི། རྡོ་དྲིལ། ཌཱ་མ་རུ། ཐོད་པ། གྲི་གུག་རྣམས་བྱིན་པ་རྙེད་པ། ཕྱག་མཚན་དང་། རྒྱན་དྲུག་རྙེད་པ། གོ་ཆ་གྱོན་པ། མཚོན་ཐོགས་པ། རྫོང་བརྩེགས་པ། གོ་ཁྲབ་གྱོན་པ། ལུས་ལས་རྣག་ཁྲག་འཛག་པ། ཆུ་བོ་ལས་བརྒལ་བ། ནམ་མཁའ་ལ་འཕུར་བ་ལ་སོགས་འབྱུང་ངོ་། །ཡང་བུད་མེད་ལ་མཛེ་བྱུང་བ། དུ་བ་རྒྱན་ཆ་བཏོག་པ། བྲང་བརྡུང་བ་སོགས་བྱུང་བ། དམ་སེལ་དང་བར་ཆད་ཡོད་པས། རྡོར་སེམས་སྒོམ་བཟླས་ལ་འབད། ཚོགས་དང་བསྐང་བ་བྱའོ། །བུད་མེད་ཁ་ཤོ་མ་བྱུང་ན་གྲུབ་པའི་རྟགས་མཚན་གཞན་ལ་མི་སྨྲ་བར་གསང་ངོ་། །ཡང་འདི་སྒྲུབ་དུས་སྔགས་འདི་རྩུབ་པས། སྙིང་མི་དགའ་བ་ཡོང་སྲོལ་ཡོད་པས། སྐབས་སུ་རང་གི་སྙིང་གའི་དཀྱིལ་དུ་ཁཾ་ཡིག་དཀར་པོ་ལས་བདུད་རྩིའི་རྒྱུན་བབ་པས་ལུས་ཐམས་ཅད་ཁེངས་པར་བསྒོམས་པས་སེལ་ལོ། །ཡང་ན་གོང་དུ་བཤད་པའི་ཐིག་ལེ་དབབ་པའི་དམིགས་པ་འདི་ལ་འབད་ཅིང་། ཚོགས་དང་གཏོར་མ་བསྐང་གསོ་ལ་བརྩོན་པར་བྱའོ། །ཨེ་མ་ཧོ༔ ཡེ་ཤེས་མཁའ་འགྲོ་སེང་གདོང་སྒྲུབ་པའི་ཐབས། །བཀའ་གཏེར་གཞུང་དང་མན་ངག་རྒྱ་མཚོའི་བཅུད། །དོན་གསལ་ཁྱེར་བདེ་ཆ་ལག་མ་ཚང་མེད། །བསྙེན་པའི་རིམ་པ་བལྟས་ཆོག་གསལ་བཀོད་འདི། །རང་དང་གཞན་ལ་ཕན་པའི་བསམས་པས་བཀོད། །འོན་ཀྱང་འགལ་འཁྲུལ་ཉེས་པའི་ཆ་མཆིས་ན། །ཡེ་ཤེས་ཌཱཀྐི་འཁོར་དང་བཅས་ལ་བཤགས། །འདི་ཕྱི་
སྒྲིབ་མེད་ཚངས་པའི་དངོས་གྲུབ་སྩོལ། །འདི་བྲིས་དགེ་བས་འདི་ཉིད་ཉམས་བླངས་པ། །བདག་དང་སློབ་མ་བརྒྱུད་པར་བཅས་པ་དང་། །དེ་ལ་འཚོ་བ་སྦྱོར་བའི་སྦྱིན་བདག་རྣམས། །བར་ཆད་བདུད་བགེགས་བྱད་ཁས་མི་ཚུགས་ཤིང་། །མཆོག་དང་ཐུན་མོང་དངོས་གྲུབ་མྱུར་ཐོབ་ནས། །ནམ་ཞིག་འཕོས་ཚེ་ནུབ་ཕྱོགས་བདེ་བ་ཅན། །གནས་གསུམ་ཌཱཀྐིའི་ཚོགས་ཀྱིས་བསུ་བར་ཤོག །དེ་སྐད་སྨྲ་བ་རཱ་གའི་མིང་འཛིན་པའི། །དགེ་སྦྱོང་ཚུལ་འཆང་རིག་སྔགས་མཁན་དེས་བྲིས། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།