ཌཱཀི་སེང་གདོང་མའི་ཚོགས་མཆོད་བསྡུས་པ་བཟའ་བཏུང་ལམ་ཁྱེར།
ཌཱཀི་སེང་གདོང་མའི་ཚོགས་མཆོད་བསྡུས་པ་བཟའ་བཏུང་ལམ་ཁྱེར་བཞུགས་སོ།།
ན་མོ་ཌཱཀི་སེང་ཧ་མུ་ཁ་ཡེ། སེང་གདོང་ལྷ་མོའི་ཚོགས་འཁོར་བྱེད་འདོད་པས། རབ་ཏུ་ཚེ་བཅུད་ཚེ་ཟན་འབྱོར་ཚོགས་བསག །འབྲིང་དུ་ནམ་འདོད་ཤ་ཆང་ཟན་གསུམ་བསག །ཐ་མ་རྒྱུན་གྱི་ཟན་ལའང་རུང་བ་སྟེ། །རབ་ཏུ་བདག་མདུན་གཉིས་པོ་ཚང་བར་འདོན། །འབྲིང་དུ་བདག་བསྐྱེད་ཉིད་ལ་ཚོགས་འཁོར་སྦྱར། །ཐ་མ་བསྐྱེད་རིམ་སྐད་ཅིག་དྲན་རྫོགས་བསྒོམ། །དབྱངས་སྙན་རོལ་མོ་དང་བཅས་གྱེར་བསྒོམ་སྦྲག །ཧཱུྃ། རང་ཉིད་ཊཱཀིའི་སྐུར་གསལ་བའི། །ཐུགས་ཀ་ནས་རཾ་ཡཾ་ཁཾ་གསུམ་འཕྲོས་།ཚོགས་རྫས་ཀྱི་ཉེས་སྐྱོན་བསྲེགས་གཏོར་བཀྲུས། །སྣོད་དག་པ་ཡེ་ཤེས་ཀྱི་ཀ་པཱ་ལ། །བཅུད་དག་པ་ཤ་ལྔ་བདུད་རྩི་ལྔ། །དེ་ཨོཾ་
ཨཱཿཧཱུྃ་གིས་བྱིན་གྱིས་བརླབས། །ཡེ་ཤེས་ཀྱི་བདུད་རྩིའི་ཆར་རྒྱུན་འབེབས། །ཕུད་རླངས་ལ་མཆོད་པའི་ལྷ་མོ་སྤྲོས། །ཀུན་བཟང་གི་མཆོད་སྤྲིན་ནམ་མཁའ་ཁྱབ། །གནས་འོག་མིན་ཆོས་དབྱིངས་ཞིང་ཁམས་ནས། །ཕ་རྩེ་བརྒྱུད་ཀྱི་གྲུབ་ཐོབ་རྒྱ་མཚོ་རྣམས། །སྐུ་དགྱེས་པའི་གར་སྟབས་ལིངས་སེ་ལིང་། །གསུང་ཉམས་དབྱངས་ཀྱི་མགུར་མ་འུ་རུ་རུ། །ཐུགས་འོད་གསལ་གྱི་རྟོགས་པ་ས་ལ་ལ། །ཁྱེད་འདིར་བྱོན་ཚོགས་ཀྱི་མཆོད་པ་བཞེས། །ཆོས་ཕྱག་ཆེན་གྱི་དངོས་གྲུབ་གནང་ནས་ཀྱང་། །ཕ་ཁྱེད་དང་མཉམ་པར་བྱིན་གྱིས་རློབས། །གནས་
ཨོ་རྒྱན་གསང་བའི་དུར་ཁྲོད་ནས། །མ་ཡེ་ཤེས་ཌཱ་ཀི་སེང་གདོང་མ། །སྐུ་གར་གྱི་ཉམས་དགུ་ཁྱུགས་སེ་ཁྱུག །གསུང་ཧཱུྃ་ཕཊ་འབྲུག་སྒྲ་འུ་རུ་རུ། །ཐུགས་ཡེ་ཤེས་ལྔ་ལྡན་ཏ་ལ་ལ། །ཁྱེད་འདིར་བྱོན་ཚོགས་ཀྱི་མཆོད་པ་བཞེས། །མཆོག་ཐུན་མོང་དངོས་གྲུབ་གནང་ནས་ཀྱང་། །ཡུམ་ཁྱེད་དང་མཉམ་པར་བྱིན་གྱིས་རློབས། །གནས་ཕྱོགས་བཞི་འཇིགས་པའི་དུར་ཁྲོད་ནས། །མ་རིགས་བཞིའི་མཁའ་འགྲོ་སེང་གདོང་ཅན། །སྐུ་འགྱིང་བག་གར་སྟབས་ཁྱུགས་སེ་ཁྱུག །གསུང་གསང་སྔགས་ཆོས་སྒྲ་དི་རི་རི། །ཐུགས་ཐོགས་མེད་མངོན་ཤེས་ཧྲིགས་སེ་ཧྲིག །ཁྱེད་འདིར་བྱོན་ཚོགས་ཀྱི་མཆོད་པ་བཞེས། །ལས་རྣམ་བཞིའི་དངོས་གྲུབ་གནང་ནས་ཀྱང་། །མ་ཁྱེད་དང་མཉམ་པར་བྱིན་གྱིས་རློབས་། །ཡུལ་ཉི་ཤུ་རྩ་བཞིའི་གནས་མཆོག་ནས། །འཁོར་དཔའ་བོ་མཁའ་འགྲོ་བསམ་མི་ཁྱབ། །སྐུ་རྒྱན་ལྡན་འཇའ་འོད་ཁྱུགས་སེ་ཁྱུག །གསུང་མཁའ་འགྲོའི་བརྡ་སྐད་སངས་སེ་སང་། །ཐུགས་དམ་ཚིག་ཅན་ལ་དུངས་སེ་དུང་། །ཁྱེད་འདིར་བྱོན་ཚོགས་ཀྱི་མཆོད་པ་བཞེས། །བདག་འདོད་པའི་དངོས་གྲུབ་གནང་ནས་ཀྱང་། །རྐྱེན་བར་ཆད་ཞི་
བར་བྱིན་གྱིས་རློབས། །གནས་དམ་ཚིག་ཆེན་པོའི་ཕོ་བྲང་ནས། །དཔལ་མ་མགོན་ལྕམ་དྲལ་དམ་ཅན་ཚོགས། །སྐུ་འཇིགས་ཚུལ་མེ་འབར་ལམས་སེ་ལམ། །གསུང་དྲག་སྔགས་འབྲུག་སྒྲ་ཆེམས་སེ་ཆེམ། །ཐུགས་མི་བཟོད་ཆོ་འཕྲུལ་ཟིངས་སེ་ཟིང་། །ཁྱེད་འདིར་བྱོན་ཚོགས་ཀྱི་མཆོད་པ་བཞེས། །བསྟན་དར་བའི་དངོས་གྲུབ་གནང་ནས་ཀྱང་། །བདུད་དགྲ་བགེགས་ཞི་བར་བྱིན་གྱིས་རློབས། །དེ་ནས་རྒྱས་པར་ཚོགས་ཕུད་རིམ་གསུམ་ཕུལ། བསྡུ་ན་གཅིག་ཕུལ་བདུད་རྩིའི་བྲན་ནས་ཀྱང་། རྗེ་བླ་མ་ཡི་དམ་མཁའ་འགྲོ་ལ། །ཞལ་ཟས་ཀྱི་ཚོགས་ཕུད་ཡར་ལ་ཕུལ། །ཚེ་ཐོག་མེད་ནས་བསགས་སྡིག་ལྟུང་རྣམས། །རྒྱུ་ག་ཎ་ཙཀྲས་བསྐང་ཞིང་བཤགས། །མི་བདག་ལ་སྡང་བའི་དགྲ་དང་བགེགས། །དེ་སྤྱི་ཚོགས་སུ་རོལ་ཅིག་ཏྰཀི་མ། །ཨོཾ་ཨཱཿཧཱུྃ་ཧྲི༔ གུ་རུ་དེ་ཝ་ཌཱཀྐི་ནཱི་ག་ཎ་ཙཀྲ་པཱུ་ཛ་ལ་ཁ་ཁ་ཁཱ་ཧི་ཁཱ་ཧི། དེ་ནས་འདོན་བསྒོམ་སྦྲག་ལ་ཚོགས་ལ་རོལ། བདག་རྡོ་རྗེ་ལུས་ཀྱི་གནས་ཚུལ་ལ། །རྩ་འཁོར་ལོ་ལྔ་དབུས་ཌཀི་ལྔ། །རྩ་འཁོར་ཕྲན་གྲངས་མཉམ་ཌཀིའི་འཁོར། །ལུས་གནས་ཡུལ་རྩ་གནས་མཁའ་འགྲོའི་ཚོགས། །ཡེ་གདོད་ནས་དམ་ཡེ་དབྱེར་མི་
ཕྱེད། །ཕྱག་གཡས་སོར་མཆོད་པའི་ལྷ་མོ་ལྔ། །ཕྱག་གཡོན་སོར་འདོད་ཡོན་ལྷ་མོ་ལྔ། །ཚོགས་བདུད་རྩིའི་ལྷ་མོ་བདག་ལུས་མཆོད། །དོན་ཕྱི་ནང་གཞན་གསུམ་དབྱེར་མེད་ཕྱིར། །བདག་ཚིམ་པར་མཁའ་འགྲོ་ཐམས་ཅད་ཚིམ། །དེ་ཚིམ་པས་ཚོགས་རྫས་དངོས་གྲུབ་ཐོབ། །ཐབས་ཟབ་མོའི་མཆོད་པ་ཨ་ལ་ལ། །ཆོས་གསང་སྔགས་ལ་ཐེ་ཚོམ་མ་བྱེད་ཅིག །མ་ཧཱ་སིདྡྷི་ཧོ༔ དེ་ནས་ལྷག་མ་བཤམས་ལ་བདུད་རྩིས་བྲན། ཨཱ པད་སྣོད་ནང་དུ་ལྷག་མ་རྣམས། །ༀ་ཞུ་བས་ཟག་མེད་བདུད་རྩིར་གྱུར། །ཧཱུཾ་སེང་གདོང་ལྷ་མོའི་ལས་མཁན་མ། །ཡུལ་ཉི་ཤུ་རྩ་བཞིའི་ཕོ་ཉ་མ། །གནས་དུར་ཁྲོད་བརྒྱད་ཀྱི་ཤ་ཟ་མ། །གྲངས་བྱེ་བ་ས་ཡ་དུང་ཕྱུར་ཏེ། །མདོག་དཀར་སེར་དམར་ལྗང་མཐིང་དང་སྨུག །ལུས་མེ་བ་འབར་དུད་འཐུལ་རླུང་ནག་འཚུབ། །ངག་གླུ་དབྱངས་བཤུགས་གླུས་བླ་ཡིད་འཕྲོག །ཡིད་སྲིད་པ་གསུམ་པོ་ཞེ་ལ་གནོན། །མཐོ་དགུང་སྔོན་དབྱིངས་ནས་བྱ་ར་བྱེད། །གནས་གཉན་ས་དུར་ཁྲོད་ཀུན་ཏུ་རྒྱུག །ནད་བཞི་བརྒྱ་རྩ་བཞི་ཀུན་གྱི་བདག །གདོན་སྟོང་ཕྲག་བརྒྱད་ཅུ་འཁོར་དུ་བསྐོར། །ལས་བསྟན་པ་སྲུང་ཞིང་རྣལ་འབྱོར་སྐྱོང་། །སྲིང་ཁྱེད་
རྣམས་དགའ་བའི་ལྷག་གཏོར་འབུལ། །བདག་སྐལ་ལྡན་དགའ་བའི་དངོས་གྲུབ་བྱིན། །རྐྱེན་རིམས་ཁ་དལ་ཡམས་དགྲ་ལ་སྒྱུར། །བདག་མིང་པོས་ལས་བཅོལ་སྲིང་གིས་མཛོད། །ཨོཾ་ཨུཙྪིཥྛ་བྷ་ལིཏྟ་ཁཱ་ཧི། ཞེས་གཙང་སར་དོར་རོ། །རང་ལུས་རྒྱལ་བའི་དཀྱིལ་འཁོར་ལ། །ཚོགས་ཀྱི་འཁོར་ལོས་མཆོད་པ་ཡིས། སོགས་བསྔོ་བ་བྱ་ཞིང་། མདུན་བསྐྱེད་བྱས་ན་རྗེས་ཆོག་རྣམས་གཞུང་ལྟར་བྱ་ཞིང་། མདུན་བསྐྱེད་མེད་ན་འདི་བརྗོད་པས་འཐུས་སོ། །ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ཤལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །འདི་ལྟར་ཉམས་བླངས་ཚོགས་རྫོགས་ཉམས་ཆག་བསྐང་། །གྱུར རྒྱུད་གཞུང་མན་ངག་དུ་མའི་བཅུད་བླངས་ནས། །རང་བཟོའི་ཆོ་ག་ཡིན་པར་མི་དགོངས་འཚལ། །མི་དབང་ཆེན་པོའི་གསུང་གིས་བསྐུལ་བྱས་ནས། ༧། །རཱ་གའི་མིང་ཅན་རི་བོའི་ཁྲོད་གནས་པའི། །ཆུ་སྦྲུལ་ཟླ་བ་བཅུ་གཉིས་ཉིན་པར་བསྒྲིགས། །བརྩམས་ཉེས་ནོངས་པ་གང་མཆིས་ཌཱ་ཀིར་བཤགས། །དགེ་བས་འདི་ཉིད་མཐོང་ཐོས་འབྲེལ་ཐོགས་རྣམས། །ཚེ་འདིར་ཕྲིན་ལས་རྣམ་བཞི་ཐོགས་མེད་ཅིང་། །འཕོས་མ་ཐག་ཏུ་གནས་གསུམ་མཁའ་འགྲོ་ཡིས། །མཆོད་
པའི་སྤྲིན་གྱིས་བདེ་ཆེན་ཞིང་བགྲོད་ཤོག །ཞིང་དེར་ས་བཅུ་པོ་ལ་གནས་ནས་ཀྱང་། །བྱང་ཆུབ་སྤྱོད་པ་རྒྱ་ཆེན་སྤྱོད་གྱུར་ཅིག །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
རང་ལུས་རྒྱལ་བའི་དཀྱིལ་འཁོར་ལ། །བཟའ་བ་ཕུལ་བའི་བསོད་ནམས་ཀྱིས། །ཁ་དོག་སྟོབས་དང་ལྡན་གྱུར་ཏེ། །རོ་བརྒྱ་ལྡན་པའི་ཟས་རྙེད་ནས། །བསམ་གཏན་ཟས་ཀྱིས་འཚོ་བར་ཤོག །བཏུང་བ་ཕུལ་བའི་བསོད་ནམས་ཀྱིས། །ཉོན་མོངས་བཀྲེས་སྐོམ་སེལ་བ་དང་། །སྦྱིན་སོགས་ཡོན་ཏན་ལྡན་པ་ཡིས། །སྐོམ་དད་མེད་པར་སྐྱེ་བར་ཤོག །གང་གིས་སྦྱིན་པ་གང་ལ་སྦྱིན། །སྦྱིན་པ་ཇི་ལྟར་མི་རྟོག་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་དེ་ལ་ཡོངས་རྫོགས་ཤོག །རྒྱལ་པོ་སྦྱིན་༧ གཏོང་ཉིད་དང་ཡང་། །སེམས་ཅན་ཕོངས་པ་གཞན་དག་ཀྱང་། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་པར་ཤོག །བསོད་ནམས་སྟོབས་ཆེན་འདི་ཡི་= བྱས མཐུས། །སྦྱིན་བདག་འཁོར་དང་བཅས་རྣམས་ལ། །ཚེ་འདིར་བསམ་པའི་དོན་འགྲུབ་ཅིང་། །བར་ཆད་ཞི་ནས་བཀྲ་ཤིས་ལྡན། །བསམ་པ་ཆོས་ལྡན་འགྲུབ་གྱུར་ཅིག །བླ་མེད་བླ་མའི་ཐུགས་རྗེ་དང་། །རྒྱལ་དང་རྒྱལ་སྲས་རང་རྒྱལ་དང་། །དགྲ་བཅོམ་བདེན་པའི་བྱིན་རླབས་ཀྱིས། །ཇི་ལྟར་བསྔོ་བ་སྨོན་ལམ་འགྲུབ་གྱུར་ཅིག །བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྔོ་བ་དང་སྨོན་ལམ་ལ་ངེས་པར་དབང་བའི་རྒྱལ་པོ་ལ་ཕྱག་འཚལ་ལོ། ཨཱོཾ་དྷ་རེ་དྷ་རེ་བྷནྡྷ་རེ་སྭཱ་ཧཱ།། །།