སྲུང་འཁོར་གྱི་ཟིན་བྲིས།
སྲུང་འཁོར་གྱི་ཟིན་བྲིས་བཞུགས་སོ། ན་མོ་ཀརྨ་ཊཱཀི་སེང་ཧ་མུ་ཁ་ཡེ། རྡོ་རྗེའི་གོ་མཚོན་ལས་སྦྱོར་ཅུང་ཞིག་བྲི། །ཆོས་བདག་མཁའ་འགྲོ་སྲུང་མས་བཀའ་གནང་སྩོལ། །དང་པོ་དབང་ལུང་མན་ངག་རྫོགས་པར་ཞུས། །ཞུས་པའི་སློབ་དཔོན་ཐུགས་དང་མ་འགལ་བྱ། །འགལ་བ་མཁའ་འགྲོའི་བཀའ་ཆད་རང་སྲོག་གཅོད། །རྟེའུ་བོང་བུའི་ཤ་ནི་ཟ་མི་རུང་། །དེ་རྣམས་དམ་ཚིག་ཡིན་པས་ཐུབ་པར་སྲུངས། །དེ་ནས་འདི་ཡི་བསྙེན་སྒྲུབ་ཐེམ་པར་བྱ། །བསྙེན་སྒྲུབ་མ་ཐེམ་ལས་སྦྱོར་དོན་མི་འགྲུབ། །ལྷ་དང་སྔགས་ལ་ལོག་ལྟ་དམ་སྲི་ཞུགས། །དབང་ཐོབ་དམ་ལྡན་བསྙེན་སྒྲུབ་ཐེམ་པའི་མིས། །ལས་སྦྱོར་གང་བྱས་འབྲས་བུ་སྔོན་དུ་འབྱིན། །གལ་ཏེ་མ་འགྲུབ་ལན་གསུམ་བསྐྱར་ལ་བསྒྲུབ། །འདིས་མ་འགྲུབ་ན་ལོག་ལྟ་མི་བྱ་སྟེ། །ལས་ཀྱི་རྣམ་པར་སྨིན་པ་ཟློག་ཐབས་མེད། །ཐུབ་པས་གསུངས་པ་དེ་ཉིད་ཡིད་ལ་བྱ། །འདི་ཡི་ལས་སྦྱོར་མི་འདྲ་མཐའ་ཡས་ཀྱང་། །ལས་སྦྱོར་གཙོ་བོ་སྲུང་ཟློག་གཉིས་པོ་ཡིན། །སྲུང་ཟློག་གཉིས་པོ་མི་འདྲ་གྲངས་མང་ཡང་། །སྔགས་དང་དམིགས་པའི་སྲུང་ཟློག་གཙོ་བོ་ཡིན། །སྔ་དྲོའི་ཆ་ལ་བསྲུང་བ་བྱ་བ་སྟེ། །རྡོ་རྗེའི་གོ་མཚོན་བདག་
བསྐྱེད་ཚར་གཅིག་བཏོན། །དེ་ནས་སྔགས་བཟླས་སྲུང་འཁོར་རྒྱས་བསྡུས་བསྒོམ། །རང་གི་སྐུ་ལས་འཕྲོས་པའི་འོད་ཟེར་ལས། །ཕྱི་རོལ་ཡེ་ཤེས་མེ་རི་ཁ་དོག་ལྔ། །འབར་བ་དུམ་བུ་གཅིག་ཏུ་གྱུར་པའི་གུར། །དེ་ནང་རལ་གྲི་བསམ་གཅོད་འབར་བའི་གུར། །དེ་ནང་ཁ་ཊཾ་རྩེ་མོ་ཕྱིར་བསྟན་གུར། །དེ་ནང་དགྲ་སྟ་འབར་བ་སོ་འཐབ་གུར། །དེ་ནང་སྐུ་སྟོད་མཁའ་འགྲོ་གྲི་ཐོད་ཅན། །སྐུ་སྨད་ཕུར་བུ་རྣོ་ངར་ལྡན་པའི་གུར། །དེ་ནང་གྲི་གུག་སོ་འཐབ་དགྲ་སྟ་གུར། །དེ་ནང་མཁའ་འགྲོ་འཇིགས་གཟུགས་སྣ་ཚོགས་མདོག །མཚོན་ཐོགས་ཕྱིར་གཟིགས་ཧཱུཾ་ཕཊ་སྒྲ་སྒྲོག་གུར། །དེ་ནང་སྣ་ཚོགས་རྡོ་རྗེ་ཁ་གདེངས་པ། །གསོར་ལྟར་འཁོར་བ་བར་མཚམས་མེད་པའི་གུར། །དེ་ནང་གནམ་ལྕགས་འཁོར་ལོ་གུར་ཐབས་ནི། །རྩིབས་སྟོང་རྣོ་དབལ་ངར་དང་ལྡན་པའི་གུར། །དེ་ནང་གནམ་ལྕགས་འབར་བའི་གཞལ་ཡས་ཁང་། །གྲུ་བཞི་སྒོ་མེད་མེ་འབར་ཚྭ་ཚྭ་འཕྲོ། །དེ་ནང་གནམ་ལྕགས་བདུད་འདུལ་མཆོད་རྟེན་ནི།། །།ཁྲི་འཕང་དགུ་པ་དེ་ཡི་བུམ་པའི་ནང་། །གསེར་གྱི་རྡོ་རྗེ་ཡར་རྩེ་ལྷ་གནས་སླེབས། །རྩེ་མོ་གསེར་གྱི་ས་གཞི་ལ་ཟུག་པའི། །ལྟེ་བ་ཡངས་ཤིང་རྒྱ་ཆེ་དེ་ཡི་ནང་། །སྟེང་
དུ་ཟླ་བ་འོག་ཏུ་ཉི་མ་གཉིས། །གའུ་ཁ་སྦྱོར་ཡངས་ཤིང་རྒྱ་ཆེའི་ནང་། །འོད་ཟེར་ལྗང་གུ་དམར་པོ་སེར་པོ་དང་། །དཀར་པོ་མཐིང་གའི་གུར་ཁང་ལྔ་རིམ་ནང་། གཞུང་ནས་གསུངས་པའི་ཆོས་འབྱུང་གྲུ་གསུམ་ནང་། །ཕྱི་ནས་མེ་འབར་ངན་སྔགས་གནོད་པ་བསྲེགས། །ཕྱི་ཡི་འཁོར་ལོ་རྩིབས་སྟོང་ནང་དུ་ནི། །སེང་གདོང་དཀར་མོ་སྟོང་གི་ཞལ་ཕྱིར་གཟིགས། །བསྲུང་བྱ་ཐམས་ཅད་སྲུང་བའི་དགོངས་པ་གཏད། །ཆོས་འབྱུང་ནང་དུ་རིགས་བཞི་མཁའ་འགྲོ་བཞི། །སེང་གེའི་དབུ་ཅན་འབུམ་ཕྲག་ཚོ་བཞི་ཡིས། །ནང་དུ་ཞལ་འི གཟིགས་སྲུང་སྔགས་དི་རི་རི། །རང་ཉིད་གཙོ་མོ་སྐུ་མདོག་དཀར་མོ་ལ། །གསེར་གྱི་གྲི་གུག་བདུད་རྩིའི་ཐོད་པ་འཛིན། །དེ་ཡི་ཐུགས་ཀར་ཉི་མའི་གའུ་ནང་། །རང་སྙིང་པདྨ་དམར་པོ་འདབ་བརྒྱད་པའི། །འདབ་མ་བརྒྱད་ལ་སྲུང་སྔགས་ཡིག་འབྲུ་བརྒྱུད། །གཡོན་དུ་བཀོད་ནས་གཡས་སུ་འཁོར་བ་ཡིན། །པདྨའི་ལྟེ་བར་ཡི་གེ་དཀར་པོ་ནི། །སྔོ་བའི་མདངས་ཆགས་འོད་ཟེར་སྣ་ལྔ་འཕྲོས། །ཧཱུྃ་ཡིག་ཤན་མཆུ་གཞུག་ལྟར་སྦུབས་སྟོང་པ། །ཐིག་ལེའི་ནང་དུ་བླ་མ་རྡོ་རྗེ་འཆང་། །དེ་ལ་བསྲུང་བྱ་བླ་མ་རྣམས་ཀྱིས་བསྐོར། །ཟླ་ཚེས་
ནང་དུ་རང་གི་ཡི་དམ་རྣམས། །འ་འདོགས་ནང་དུ་རང་གི་ཆོས་སྐྱོང་རྣམས། །དེ་ནི་ལྷ་དབྱེའི་གནོད་པས་མི་ཚུགས་གནད། །ཧ་ཁོག་ནང་དུ་རང་གི་ཐ་མལ་ལུས། །རིན་ཆེན་སྣ་ཚོགས་ལས་ནི་གྲུབ་པར་བསམ། །དེ་ཡི་གཡས་སུ་བསྲུང་བྱ་ཕོ་རིགས་རྣམས། །གཡོན་དུ་མོ་རིགས་རྒྱབ་ཏུ་ཞིང་ཁང་སྦ། །མདུན་དུ་ནོར་ཕྱུགས་བྲན་གཡོག་གལ་ཆེའི་རིགས། རང་ལ་ངོ་ལོག་བྱ་དོགས་མེད་རྣམས་བསྒོམ། །རང་ཉིད་མཁའ་འགྲོ་གཡས་གཡོན་ཆོས་འབྱུང་ནང་། །གཡས་སུ་ཕོ་རིགས་གཡོན་དུ་མོ་རིགས་དང་། །རྒྱབ་ཏུ་ཞིང་ཁང་སྦྲ་ཁྱིམ་མདུན་དུ་ནི། །བྲན་དང་ནོར་ཕྱུགས་བསྲུང་བྱར་གྱུར་རྣམས་བསྒོམ། །རང་གི་ཐུགས་ལས་འོད་ཟེར་སྣ་ཚོགས་འཕྲོས། །བླ་མ་ཡི་དམ་སངས་རྒྱས་བྱང་སེམས་དང་། །མཁའ་འགྲོ་ཆོས་སྐྱོང་རྣམས་ཀྱི་བྱིན་རླབས་དང་། །ལྷ་སྲིན་སྡེ་བརྒྱད་འཇིག་རྟེན་སྐྱོང་རྣམས་ཀྱི། །མཐུ་སྟོབས་འབྱུང་བ་ལྔ་དང་རིན་ཆེན་བཅུད། །སྐྱེས་བུའི་བསོད་ནམས་དཔལ་འབྱོར་ཐམས་ཅད་ཀུན། །འོད་ཀྱི་རྣམ་པར་བསྡུས་ནས་རང་ལུས་དང་། །བསྲུང་བྱ་ལ་ཐིམ་བཀྲག་མདངས་གཟི་བརྗིད་འབར། །དམིགས་པ་དེ་ཙམ་རྒྱས་པར་མ་ཟིན་ན། །ཕྱི་རོལ་རྩིབས་སྟོང་སེང་གདོང་དཀར་
མོ་སྟོང་། །ཕྱི་རོལ་རྡོ་ར་མེ་རི་བསྒོམས་པས་འཐུས། །བློ་ཆུང་དེ་ཡང་བསྒོམ་པར་མ་ཐུབ་ན། །གཞུང་ནས་བཤད་པའི་ཆོས་འབྱུང་མེ་འབར་བསྒོམ། །དེ་ལྟར་རྒྱས་བསྡུས་གང་བསྒོམ་ཡང་། །བཟླ་བྱའི་སྔགས་ནི་སྲུང་སྔགས་འབྲུ་བརྒྱད་རེ། །ཨ༔ཀ༔ས༔མ༔ར༔ཙ༔ཕཊ༔ཅེས། ཅི་ལྕོགས་བཟླས་རྗེས་ཐུན་མཚམས་གཏོར་མ་བསྔོ། །བྱད་ཁ་ཟུབ་ཟུག་རྐྱེན་ཁ་ཆོད་དུས་སུ། །ཞག་ནི་གསུམ་ལྔ་བདུན་སོགས་མཚམས་བྱས་བསྒྲུབ། །གོ་ཆ་གྱོན་དང་རྫོང་བརྩེགས་ཉི་ཟླ་ཤར། །རང་ཉིད་བཙན་པའི་མཁར་དང་ཕྲག་ན་འདུག ། གཞན་གྱི་སྲོག་སྐྱབས་བྱ་རྨིས་འགྲུབ་པའི་རྟགས། །རྒྱུན་ཁྱེར་ལ་ནི་སྔ་དྲོ་ཐུན་རེས་ཆོག །རྡོ་རྗེའི་གོ་མཚོན་སྲུང་བའི་མན་ངག་འདི། །གསེར་ཆོས་ཟབ་མོ་སྤེལ་བར་ཕོངས་པ་སྟེ། །རིན་ཐང་རང་གི་སྲོག་དང་མཉམ་པ་ཡིན། །ཨི་ཐི་གུ་བྱ་དྷ་ཐིམ་ས་མ་ཡ། །དེ་ཡང་ཕག་ལོ་རྒྱལ་ཟླའི་བཅུ་གསུམ་གྱི། །ཕྱི་དྲོའི་ཆ་ལ་རཱ་ག་ཨ་སྱས་སྨྲས། །དགེ་བའི་མིང་ཅན་དགེ་སློང་དེ་ཡིས་བྲིས། །ཉེས་འགལ་མཆིས་ན་བཤགས་ཤིང་དགེ་བ་འདིས། །བྱང་ཆུབ་སྒྲུབ་ལ་བར་ཆད་མེད་པར་ཤོག །མངྒ་ལཾ།། །།
ཤོག་སྟོང་།