ཡེ་ཤེས་ཌཱཀི་སེང་གདོང་མའི་རྩང་བསྟོད།
ཡེ་ཤེས་ཌཱཀི་སེང་གདོང་མའི་རྩང་བསྟོད་བཞུགས་པའི་དབུ་ཕྱོགས་ལགས་སོ། །ཧཱུྃ་བྷྱོ༔ སྣང་སྲིད་དབང་བསྒྱུར་ཌཱཀི་མ། །ཟློག་སྒྱུར་བྱེད་པའི་བདག་མོ་ཡིན། །ཉོན་ཅིག་སྣང་སྲིད་ལྷ་འདྲེ་ཉོན། །བྷྱོ༔ དྲག་པོ་རྩང་དང་ཕུར་པའི་ལྷ། །སྲིད་པ་ལས་ཀྱི་མདོས་བཤམས་ན། །ཐ་མ་ལྕགས་རི་མུ་ཁྱུད་ལ། །དྲག་པོ་ལས་ཀྱི་རྩང་ཕུར་བཙུགས། །ཞེ་སྡང་མཚོན་ཆར་བྱིན་གྱིས་བརླབས། །རྩང་སྟོད་མེ་འབར་ལྷབས་སེ་ལྷབ། །བཙན་གྱི་དམག་འགྱེད་ཤ་ར་ར། །རྩང་སྨད་མུན་ནག་ཐིབས་སེ་ཐིབ། །བདུད་དམག་བྲོ་རྡུང་ཁྲིགས་སེ་ཁྲིག །བདུད་བཙན་དམག་སྣ་དགྲ་ལ་འགྱེད། །སྐེད་པ་རྒྱ་མདུད་ཁོང་གསེང་ན། །ཁྲོས་པའི་འབྲུག་སྒྲ་འུ་རུ་རུ། །ལས་ཀྱི་རྩང་ཕུར་གཤེགས་སུ་གསོལ། །ཞེ་སྡང་རྩང་ཕུར་ཟུར་གསུམ་ལ། །ཛདང་བྷྱོཡི་ཡི་གེ་བྲིས། །གྲུ་གསུམ་མཐིང་ནག་ལྕགས་རི་ལ། །རྣལ་འབྱོར་སྔགས་འཆང་ལས་གྲུབ་པའི། །སྤྲུལ་པའི་ཕོ་ཉར་བྱིན་གྱིས་བརླབས། །ཁྲོ་མོ་ཆེན་པོ་ཡང་དག་པའི། །མཚོན་གྱིས་སྤྲུལ་པའི་ཕྱག་རྒྱ་གསལ། །གདུག་པ་འདུལ་ཕྱིར་དབལ་དང་ལྡན། །རྩེ་མོ་ཆོས་ཉིད་དབྱིངས་སུ་
འཕྱོ། །རྩ་བ་དུག་གསུམ་གནས་སུ་ཐུག །རྐེད་པར་ཕོ་ཉ་ལས་ལ་འགྱེད། །རྩེ་མོར་གྲི་ཁྲག་དམར་པོ་བྱུགས། །བསྐལ་པའི་མེ་འབར་ལྷབས་སེ་ལྷབ། །རྩ་བར་དུར་ཁྲོད་སོལ་བས་བྱུགས། །འཇིགས་པའི་མུན་ནག་ཐིབས་སེ་ཐིབ། །དེ་འདྲའི་རྩང་ཕུར་བཞེངས་སུ་གསོལ། །ཡར་གྱི་རྩེ་མོ་ལྷ་ཡི་གནས་སུ་འཕྱོ། །ལྷ་མ་ཡིན་གྱི་ཁ་རླངས་གཏོང་པ་དང་། །ལྷ་མ་ཡིན་གྱི་ཆོ་འཕྲུལ་བཟློག་ཏུ་གསོལ། །མར་གྱི་རྩེ་མོ་དུར་ཁྲོད་གནས་སུ་ཟུག །དུར་ཁྲོད་ཤ་ཟའི་གནོད་པ་གཏོང་བ་དང་། །ནད་སྣ་ཡམས་སྣ་དལ་སྣ་བཟློག་ཏུ་བྷྱོ།གསོལ། །མནག་པའི་དགྲ་བོ་མི་ནོར་ལ། །ཡུལ་མཁར་རྨིང་ལ་རྩང་ཕུར་ཡ། །སྒོ་ཡི་ནོར་ལ་རྩང་ཕུར་ཡ། །མཚན་གྱི་བུ་ལ་རྩང་ཕུར་ཡ། །དམ་ཉམས་དགྲ་བགེགས་རྡུལ་དུ་རློགས། །བཅོལ་བའི་ཕྲིན་ལས་འགྲུབ་པར་མཛོད། །ས༔ར༔ས༔མ༔ཙ༔ཨ༔ར༔ད༔ཡ༔ཀ༔མ༔ཕཊ༔ ཅེས་རཱ་ག་ཨ་སྱས་སྦྱར་བའོ།། །།