མཁའ་འགྲོ་སེང་གེའི་གདོང་པ་ཅན་གྱི་ཟོར་ཟློག་དང་རྩང་གྱེར།
མཁའ་འགྲོ་སེང་གེའི་གདོང་པ་ཅན་གྱི་ཟོར་ཟློག་དང་རྩང་གྱེར་བཞུགས་པའི་དབུ་ཕྱོགས་ལགས་སོ།།
བྷྱོ༔ རྒྱལ་བའི་ཡུམ་ཆེན་དྲག་མོ་སེང་གདོང་མ། །སྐུ་མདོག་མཐིང་ནག་ཆོས་ཉིད་འགྱུར་བ་མེད། །མ་རིག་འཁོར་བའི་བག་ཆགས་བཟློག་ཏུ་གསོལ། །སེང་གེའི་ཞལ་གདངས་ངར་སྒྲ་སྒྲོག་པ་ཡིས། །བོན་དང་མུ་སྟེགས་དམག་ཚོགས་བཟློག་ཏུ་གསོལ། །ལོངས་སྤྱོད་རྫོགས་སྐུའི་ཆས་རྣམས་རྫོགས་པ་ཡིས། །མུ་སྟེགས་ལྟོག་འགོང་དབུལ་སྲི་བཟློག་ཏུ་གསོལ། །ཕྱག་གཡས་གྲི་གུག་ནམ་མཁར་ཕྱར་བ་ཡིས་། །ལས་བྱེད་སྲོག་གཅོད་དབུགས་ལེན་བཟློག་ཏུ་གསོལ། །གཡོན་པས་ཐོད་ཁྲག་ཐུགས་ཀར་འཛིན་པ་ཡིས། །མ་མོའི་ཁྲག་ནད་དལ་
ཡམས་བཟློག་ཏུ་གསོལ། །ཁ་ཊཾ་རྩེ་གསུམ་མཆན་དུ་བཅུག་པ་ཡིས། །དུག་གསུམ་ནད་གསུམ་གདོན་གསུམ་བཟློག་ཏུ་གསོལ། །རུས་རྒྱུན་མེ་ལོང་དྲིལ་བུ་གཡེར་ཁ་ཡིས། །དཔའ་བོ་ཌཱ་ཀིའི་སུན་མ་བཟློག་ཏུ་གསོལ། །ཡེ་ཤེས་མེ་དཔུང་སྐུ་ལ་འབར་བ་ཡིས། །གཟུང་འཛིན་མི་གཙང་དྲི་མ་བཟློག་ཏུ་གསོལ། །གར་སྟབས་པད་ཉི་རོ་སྟེང་འགྱིང་བ་ཡིས། །སྣང་ཞིང་སྲིད་པའི་གདོན་ཚོགས་བཟློག་ཏུ་གསོལ། །སྐུ་སྤྲུལ་མཁའ་འགྲོ་སེང་གདོང་དཀར་མོ་ཡིས། །བན་གྱི་བྱད་ཁ་རྒོད་གཏོང་བཟློག་ཏུ་གསོལ། །གསུང་སྤྲུལ་དམར་མོ་སྟག་གི་གདོང་ཅན་
གྱིས། །བོན་གྱི་ངན་སྔགས་བྱད་ཀ་བཟློག་ཏུ་གསོལ། །ཐུགས་སྤྲུལ་ནག་མོ་དོམ་གྱི་གདོང་ཅན་གྱིས། །མུ་སྟེགས་ངན་སྦྱོར་ངན་སྔགས་བཟློག་ཏུ་གསོལ། །ཕྲིན་ལས་སྤྲུལ་པ་། མ་མོ་འབུམ་སྡེ་ཡིས། །མ་མོའི་དལ་ཁ་རིམས་ཡམས་བཟློག་ཏུ་གསོལ། །ཡང་སྤྲུལ་རི་རབ་སོ་གཉིས་རྡུལ་མཉམ་གྲངས། །དགྲ་འདྲེ་ལྟས་ངན་ཡེ་འདྲོག་བཟློག་ཏུ་གསོལ། །ཧཱུཾ་བྷྱོ༔ ཡེ་ཤེས་མཁའ་འགྲོ་དྲག་མོ་སེང་གདོང་མའི། །ཕྱི་རིམ་ལྕགས་རིའི་དཀྱིལ་འཁོར་མུ་རན་ལ། །དམར་ནག་རྩང་ཕུར་ཉི་ཤུ་རྩ་བརྒྱད་བཀོད། །དངུལ་ལམ་དཀར་པོའི་ཚེ ཤིང་ལ་བྱས་པ་ཡི། །ཤར་ཕྱོགས་ཞི་བའི་ལས་མཛད་རྩང་ཕུར་བདུན། །ཞི་བའི་ལས་མཛད་རྩང་ཕུར་ཨ་ལོང་རིས། །ཡར་གྱི་རྩེ་ལ་དུང་སེང་རལ་པ་གསིགས། །མར་གྱི་རྩེ་ལ་ཆུ་སྲིན་མཆེ་བ་གཙིགས། །སྐེད་པ་རྒྱ་མདུད་ཟླུམ་པོའི་གཞལ་ཡས་ཁང་། །ཞི་བའི་ལས་མཛད་ཤར་གྱི་མ་བདུན་གནས། །ནད་གདོན་འཇིགས་པ་བརྒྱད་སོགས་ཞི་བ་དང་། །ཤར་གྱི་དགྲ་བགེགས་བཟློག་པའི་ཕྲིན་ལས་མཛོད། །གསེར་རམ་རྒྱས་པའི་ཤིང་ལས་བྱས་པ་ཡི། །རྒྱས་པའི་ལས་མཛད་ལྷོ་ཡི་རྩང་ཕུར་བདུན། །རྒྱས་པའི་རྩང་
ཕུར་གྲུ་བཞི་ཨ་ཁང་རིས། །ཡར་གྱི་རྩེ་ལ་རྒྱ་སྟག་འཛུམ་དྲུག་རྒྱས། །མར་གྱི་རྩེ་ལ་ཕག་རྒོད་མཆེ་བ་གཙིགས། །སྐེད་པ་རྒྱ་མདུད་གྲུ་བཞི་གཞལ་ཡས་ཁང་། །རྒྱས་པའི་ལས་མཛད་ལྷོ་ཡི་སྲིང་བདུན་བཞུགས། །ཚེ་བསོད་འབྱོར་པ་དྲུག་རྣམས་རྒྱས་པ་དང་། །ལྷོ་ཡི་དགྲ་བགེགས་བཟློག་པའི་ཕྲིན་ལས་མཛོད། །ཟངས་སམ་དབང་གི་ཤིང་ལ་བྱས་པ་ཡི། །དབང་གི་ལས་མཛད་ནུབ་ཀྱི་རྩང་ཕུར་བདུན། །དབང་གི་རྩང་ཕུར་ཟླ་ཕྱེད་ཟླ་གམ་རིས། །ཡར་གྱི་རྩེ་ལ་གཟིག་ཆེན་ཐིག་ལེ་རིས། །མར་གྱི་རྩེ་ལ་དོམ་ནག་མཆེ་བ་གཙིགས། །སྐེད་པ་རྒྱ་མདུད་ཟླ་གམ་གཞལ་ཡས་ཁང་། །དབང་གི་ལས་མཛད་ནུབ་ཀྱི་མ་བདུན་གནས། །སྣང་སྲིད་མ་ལུས་དབང་དུ་སྡུད་པ་དང་། །ནུབ་ཀྱི་དགྲ་བགེགས་བཟློག་པའི་ཕྲིན་ལས་མཛོད། །ལྕགས་སམ་དྲག་པོའི་ཤིང་ལ་བྱས་པ་ཡི། །དྲག་པོའི་ལས་མཛད་བྱང་གི་རྩང་ཕུར་བདུན། །དྲག་པོའི་རྩང་ཕུར་ཟུར་གསུམ་ཕུར་པ་རིས། །ཡར་གྱི་རྩེ་ལ་བསེ་ཡི་བྱ་གླག་འཛུམ། །མར་གྱི་རྩེ་ལ་ལྕགས་ཀྱི་ཕོ་རོག་གྲག །སྐེད་པ་རྒྱ་མདུད་གྲུ་གསུམ་གཞལ་ཡས་ཁང་། །དྲག་པོའི་ལས་མཛད་
བྱང་གི་བྲན་བདུན་གནས། །བདུད་བཞིའི་དམ་སྲི་དགྲ་བགེགས་བསྒྲལ་བ་དང་། །བྱང་གི་དགྲ་བགེགས་བཟློག་པའི་ཕྲིན་ལས་མཛོད། ། བྷྱོ༔ དཀྱིལ་འཁོར་མཐའ་སྐྱོང་དབང་མོ་ཉེར་བརྒྱད་ཀྱི། །རྩང་ཕུར་ཉེར་བརྒྱུད་འཚུབ་མ་རིས་སུ་བཙུགས། །ཡར་རྩེ་ཟུར་གསུམ་མཁའ་ལ་ཟངས་སེ་ཟང་། །སྟེང་ཕྱོགས་གཟའ་དང་རྒྱུ་སྐར་དེལ་ཟེར་ཟློག ། མར་རྩེ་ཟུར་གསུམ་ངན་སོང་སྙིང་ལ་གཟེར། །འོག་ཕྱོགས་ཀླུ་དང་ས་བདག་གནོད་པ་ཟློག །སྐེད་པ་རྒྱ་མདུད་བར་ན་ཁྲིགས་སེ་ཁྲིག །བར་ཕྱོགས་ལྷ་སྲིན་སྡེ་བརྒྱད་གདུག་པ་ཟློག །རྩང་སྟོད་དམར་པོ་མེ་འབར་ལྷབས་སེ་ལྷབ། །དམར་པོའི་བཙན་དམག་རྟ་རྒྱུག་ཤ་ར་ར། །བཙན་གྱི་གྲི་ཐབས་གཟེར་ནད་དགྲ་ལ་ཟློག །རྩང་སྨད་ནག་པོ་མུན་ནག་སེ ཐེབས་སེ་ཐེབ། །ནག་པོ་བདུད་དམག་བྲོ་རྡུང་ཁྲིགས་སེ་ཁྲིག །བདུད་ཀྱི་ཞགས་པ་ཡེ་འདྲོག་དགྲ་ལ་ཟློག །རྩང་སྐད་རྒྱ་མདུད་རྒྱ་གྲམ་ཁྲམ་ཤིང་རིས། །གཤིན་རྗེའི་ཁྲམ་ཐོགས་སྲོག་ལན་ཡེ་རེ་རེ། །འཆི་བདག་གཤིན་རྗེའི་ཁྲམ་ཁ་དགྲ་ལ་ཟློག །རྩང་ཕུར་སྤྱད་ནི་སྲིན་མོ་འགྲོས་སུ་བཙུགས། །སྲིན་མོ་བླ་རྐུན་ཚོགས་ནི་ཞུངས་སེ་ཞུང་། །མ་མོ་
སྲིན་མོའི་དལ་ཡམས་དྭགྲ་ལ་ཟློག །རྩང་སྐེད་དྲྭ་མིག་མཁའ་འགྲོ་དྲྭ་བར་བསྡམས། །དཔའ་བོ་ཌཱཀིས་གར་བྱེད་ཁྱུགས་སེ་ཁྱུག །གནས་དང་ཡུལ་གྱི་མཁའ་འགྲོའི་སུན་པ་ཟློག །རྩང་རྩེ་ཤ་དང་ལིངྒས་བརྒྱན་པ་ནི། །ཤ་ཟ་ཞིང་སྐྱོང་རྣམས་ཀྱི་དལ་ཁ་ཟློག །བ་སུ་ཏ་དང་སྔོ་དམར་ཞགས་པས་དཀྲིས། །རྒྱུ་གཟེར་ནད་དང་སྔོ་དམར་དགྲ་ལ་ཟློག །དམར་ནག་རྩང་གི་ཕུར་པ་ཉི་ཤུ་བརྒྱད། །དྲག་པོའི་རྩང་ཕུར་མདའ་ལ་ཉེ་རིང་མེད། །ཐུན་རྫས་ཡུངས་ཀར་བྲབ་ལ་གྱེན་ཐུར་མེད། །ཕོ་ཉ་བཀའ་སྡོད་ལས་ལ་༧ དཀའ་སླ་མེད། །དྲག་སྔགས་དམིགས་པའི་འབེན་ལ་ཆེ་ཆུང་མེད། །སྡང་བའི་དགྲ་བགེགས་འབྱུང་པོ་གནོད་བྱེད་རྣམས། །དྲག་པོ་རྩང་གི་ཕུར་པས་རྡུལ་དུ་རློགས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་རྒ་དབོན་པོས་བསྐུལ་ནས་ཨ་རཱ་གས་འཕྲལ་དུ་བྲིས་པ་ཉེས་འགལ་གང་མཆིས་ལྷ་དང་སྲུང་མ་ལ་བཤགས་ཤིང་། དགེ་བས་སྔགས་པ་རྣམས་ཀྱི་བསྟན་པ་དར་གྱུར་ཅིག། །
ཤོག་སྟོང་།