རྡོ་རྗེའི་གོ་མཚོན་གྱི་སྲུང་བ་མན་ངག་གསེར་ཆོས་ཟབ་མོའི་ལས་སྦྱོར།
རྡོ་རྗེའི་གོ་མཚོན་གྱི་སྲུང་བ་མན་ངག་གསེར་ཆོས་ཟབ་མོའི་ལས་སྦྱོར་བཞུགས་སོ།།
ན་མོ་ཀརྨཌཀི་སེང་ཧ་མུ་ཁ་ཡེ། རྡོ་རྗེའི་གོ་མཚོན་ལས་སྦྱོར་ཅུང་ཞིག་བྲི། །ཆོས་བདག་མཁའ་འགྲོ་སྲུང་མས་བཀའ་གནང་སྩོལ། །དང་པོ་དབང་ལུང་མན་ངག་རྫོགས་པར་ཞུས། །ཞུ་བའི་སློབ་དཔོན་ཐུགས་དང་མ་འགལ་བྱ། །འགལ་ན་མཁའ་འགྲོའི་བཀའ་ཆད་རང་སྲོག་གཅོད། །དྲེའུ་བོང་བུའི་ཤ་ནི་ཟ་མི་རུང་། །དེ་རྣམས་དམ་ཚིག་ཡིན་པས་ཐུབ་པར་སྲུངས་། །དེ་ནས་འདི་ཡི་བསྙེན་པ་ཐེམས་པར་བྱས། །བསྙེན་སྒྲུབ་མ་ཐེམ་ལས་སྦྱོར་དོན་མི་འགྲུབ། །ལྷ་དང་སྔགས་ལ་ལོག་ལྟ་དམ་སེལ་ཞུགས། །དབང་ཐོབ་དམ་ལྡན་བསྙེན་སྒྲུབ་ཐེམ་པའི་མིས། །ལས་
སྦྱོར་གང་བྱས་འབྲས་བུ་སྔོན་དུ་འབྱིན། །གལ་ཏེ་མ་འགྲུབ་ལན་གསུམ་བསྐྱར་ལ་བསྒྲུབ། །དེས་མ་འགྲུབ་ན་ལོག་ལྟ་མི་བྱ་སྟེ། །ལས་ཀྱི་རྣམ་པར་སྨིན་པ་བཟློག་ཐབས་མེད། ༈ །ཐུབ་པས་གསུང་པ་དེ་ཉིད་ཡིད་ལ་བྱ། །འདི་ཡི་ལས་སྦྱོར་མི་འདྲ་མཐའ་ཡས་ཀྱང་། །ལས་སྦྱོར་གཙོ་བོར་སྲུང་ཟློག་གཉིས་པོ་ཡིན། །སྲུང་ཟློག་གཉིས་པོ་མི་འདྲ་གྲངས་མང་ཡང་། །སྔགས་དང་དམིགས་པའི་གཙོ་བོ་སྲུང་ཟློག་ཡིན། །སྔ་དྲོའི་ཆ་ལ་སྲུང་བ་བྱ་བ་སྟེ། ༈་།རྡོ་རྗེའི་གོ་མཚོན་བདག་བསྐྱེད་ཚར་གཅིག་འདོན། །དེ་ནས་སྔགས་བཟླས་སྲུང་འཁོར་རྒྱས་བསྡུས་
བསྒོམ། །རང་གི་སྐུ་ལས་འཕྲོས་པའི་འོད་ཟེར་ལས། །ཕྱི་རོལ་ཡེ་ཤེས་མེ་རི་ཁ་དོག་ལྔ། །འབར་བ་དུམ་བུ་གཅིག་ཏུ་གྱུར་པའི་གུར། །དེས་ནང་རལ་གྲི་བསམ་ཆོད་འབར་བའི་གུར། །དེ་ནང་ཁཊཾ་རྩེ་མོ་ཕྱིར་བསྟན་གུར། །དེ་ནང་དགྲ་སྟ་འབར་བ་སོ་འཐབ་གུར། །དེ་ནང་སྐུ་སྟོད་མཁའ་འགྲོ་གྲི་ཐོད་ཅན། །སྐུ་སྨད་ཕུར་པ་རྣོ་དབལ་ལྡན་པའི་གུར། །དེ་ནང་གྲི་གུག་སོ་འཐབ་དགྲ་སྟུའི་གུར། །དེ་ནང་མཁའ་འགྲོ་འཇིགས་གཟུགས་སྣ་ཚོགས་མདོག །མཚོན་ཐོགས་ཕྱིར་གཟིགས་ཧཱུྃ་ཕཊ་སྒྲ་སྒྲོག་གུར། །དེ་ནང་སྣ་ཚོགས་རྡོ་རྗེ་ཁ་གདེངས་བ། །གསོར་ལྟར་འཁོར་ནས་བར་མཚམས་མེད་པའི་གུར། །དེ་ནང་གནམ་ལྕགས་འཁོར་ལོ་གུར་ཐབས་ནི། །རྩིབས་སྟོང་རྣོ་དབལ་ངར་དང་ལྡན་པའི་གུར། །དེ་ནང་གནམ་ལྕགས་འབར་བའི་གཞལ་ཡས་ནི། །གྲུ་བཞི་སྒོ་མེད་མེ་འབར་ཚྭ་ཚྭ་འཕྲོ། །དེ་ནང་གནམ་ལྕགས་བདུད་འདུལ་མཆོད་རྟེན་ནི། །ཁྲི་འཕང་དགུ་པ་དེ་ཡི་བུམ་པའི་ནང་། །གསེར་གྱི་རྡོ་རྗེ་ཡར་རྩེ་ལྷ་གནས་སླེབ། །མར་རྩེ་གསེར་གྱི་ས་གཞི་ལ་ཟུག་པའི། །ལྟེ་བ་ཡངས་ཤིང་རྒྱ་ཆེ་དེ་ཡི་ནང་། །སྟེང་དུ་ཟླ་བ་འོག་ཏུ་ཉི་མ་གཉིས། །གཱའུ་ཁ་སྦྱོར་ཡངས་ཤིང་རྒྱ་ཆེའི་
ནང་། །འོད་ཟེར་ལྗང་གུ་དམར་པོ་སེར་པོ་དང་། །དཀར་པོ་མཐིང་ཀའི་གུར་ཁང་ལྔ་རིམ་ནང་། །གཞུང་ནས་གསུང་པའི་ཆོས་འབྱུང་གྲུ་གསུམ་གྱི། །ཕྱི་ནས་མེ་འབར་ངན་སྔགས་གནོད་པ་སྲེག །ཕྱི་ཡི་འཁོར་ལོ་རྩིབས་སྟོང་ནང་དུ་ནི། །སེང་གདོང་དཀར་མོ་སྟོང་གི་ཞལ་ཕྱིར་གཟིགས། །བསྲུང་བྱ་ཐམས་ཅད་སྲུང་བའི་དགོངས་པ་གཏད། །ཆོས་འབྱུང་ནང་དུ་རིགས་བཞི་མཁའ་འགྲོ་བཞི། །སེང་གེའི་དབུ་ཅན་འབུམ་ཕྲག་ཚན་བཞི་ཡིས། །ནང་དུ་ཞལ་གཟིགས་སྲུང་སྔགས་ཏི་རི་རི། །རང་ཉིད་གཙོ་མོ་སྐུ་མདོག་དཀར་མོ་ལ། །གསེར་གྱི་གྲི་གུག་བདུད་རྩི་ཐོད་པ་འཛིན། །དེ་ཡི་ཐུགས་ཀར་ཉི་ཟླའི་གྲྭའུ་ནང་། །རང་ཉིད་པདྨ་དམར་པོ་འདབ་བརྒྱད་པའི། །འདབ་མ་བརྒྱད་ལ་སྲུང་སྔགས་ཡིག་འབྲུ་བརྒྱད་། །གཡོན་དུ་བཀོད་ནས་གཡས་སུ་འཁོར་བ་ཡིན། །པདྨའི་ལྟེ་བར་ཧཱུྃ་ཡིག་དཀར་པོ་ནི། །སྔོ་བའི་མདང་ཆགས་འོད་ཟེར་སྣ་ལྔ་འཕྲོ། །ཧཱུྃ་ཡིག་ཤན་མཆུ་བཀུག་ལྟར་ནང་སྟོང་པ། །ཐིག་ལེའི་ནང་དུ་བླ་མ་རྡོ་རྗེ་འཆང་། །དེ་ལ་བསྲུང་བྱ་བླ་མ་རྣམས་ཀྱིས་བསྐོར། །ཟླ་ཚེས་ནང་དུ་རང་གི་ཡི་དམ་རྣམས། །འ་འདོགས་ནང་དུ་རང་གི་ཆོས་སྐྱོང་རྣམས། །
དེ་ནི་ལྷ་དབྱེའི་གནོད་པ་མི་ཚུགས་གནད། །ཧ་ཁོག་ནང་དུ་རང་ཉིད་ཐ་མལ་ལུས། །རིན་ཆེན་སྣ་ཚོགས་ལས་ནི་གྲུབ་པར་བསམ། །དེ་ཡི་གཡས་སུ་བསྲུང་བྱ་ཕོ་རིགས་རྣམས། །གཡོན་དུ་མོ་རིགས་རྒྱབ་ཏུ་ཞིང་ཁང་སྦྲ། །མདུན་དུ་ནོར་ཕྱུགས་བྲན་གཡོག་གལ་ཆེ་རིམ། །རང་ལ་ངོ་ལོག་བྱེད་དོགས་མེད་རྣམས་བསྒོམ། །རང་ཉིད་མཁའ་འགྲོས་གཡས་གཡོན་ཆོས་འབྱུང་ནང་། །གཡས་སུ་ཕོ་རིགས་གཡོན་དུ་མོ་རིགས་རྣམས། །རྒྱབ་ཏུ་ཞིང་ཁང་སྦྲ་ཁྱིམ་མདུན་དུ་ནི། །བྲན་དང་ནོར་ཕྱུགས་བསྲུང་བྱར་གྱུར་རྣམས་བྷེ། །རང་གི་ཐུགས་ལས་འོད་ཟེར་སྣ་ཚོགས་འཕྲོས། །བླ་མ་ཡི་དམ་སངས་རྒྱས་བྱང་སེམས་དང་། །མཁའ་འགྲོ་ཆོས་སྐྱོང་རྣམས་ཀྱི་བྱིན་རླབས་དང་། །ལྷ་སྲིན་སྡེ་བརྒྱད་འཇིག་རྟེན་སྐྱོང་རྣམས་ཀྱི། །མཐུ་སྟོབས་འབྱུང་བ་ལྔ་དང་རིན་ཆེན་བཅུད། །སྐྱེས་བུའི་བསོད་ནམས་དཔལ་འབྱོར་ཐམས་ཅད་ཀུན། །འོད་ཟེར་རྣམ་པར་བསྡུས་ནས་རང་ལུས་དང་། །བསྲུང་བྱ་ལ་ཐིམ་བཀྲག་མདངས་གཟི་བརྗིད་འབར། །དམིགས་པ་དེ་ཙམ་རྒྱས་པར་མ་ཟིན་ན། །ཕྱི་རོལ་རྩིབས་སྟོང་སེང་གདོང་དཀར་མོ་སྟོང་། །ཕྱི་རོལ་རྡོ་ར་མེ་རི་བསྒོམས་པས་འཐུས། ༈ །བློ་ཆུང་དེ་
ཡང་བསྒོམ་པར་མ་ཐུབ་ན། །གཞུང་ནས་བཤད་པའི་ཆོས་འབྱུང་མེ་འབར་བསྒོམ། །དེ་ལྟར་རྒྱས་བསྡུས་གསུམ་པོ་གང་བསྒོམས་ཀྱང་། །བཟླ་བྱའི་སྔགས་ནི་སྲུང་སྔགས་འབྲུ་བརྒྱད་དེ། །ཨ༔ཀ༔ས༔མ༔ར༔ཙ༔ཤ༔ཕཊ༔ ཅི་ལྕོགས་བཟླས་རྗེས་ཐུན་མཚམས་གཏོར་མ་བསྔོ། །བྱད་ཁ་ཟུག་གམ་རྐྱེན་ཁ་ཆེ་དུས་སུ། །ཞག་ནི་གསུམ་ལྔ་བདུན་སོགས་མཚམས་བྱས་བསྒྲུབ། །གོ་ཆ་གྱོན་དང་རྫོང་བརྩེགས་ཉི་ཟླ་ཤར། །རང་ཉིད་བཙན་པོའི་མཁར་དང་བྲག་ལ་འདུག །གཞན་གྱི་སྲོག་སྐྱབས་བྱས་རྨིས་འགྲུབ་པའི་རྟགས། །རྒྱུན་ཁྱེར་ལ་ནི་སྔ་དྲོ་ཐུན་རེས་ཆོག །རྡོ་རྗེའི་གོ་མཚོན་སྲུང་བའི་མན་ངག་འདི། །གསེར་ཆོས་ཟབ་མོ་སྤེལ་བར་འཕང་བ་སྟེ། །རིན་ཐང་རང་གི་སྲོག་དང་མཉམ་པ་ཡིན། སྤྱི་གུ་ཧྱ་དྷ་ཐིམ་ས་མཱ་ཡ༔ འདི་ཡང་ཕག་ལོ་རྒྱལ་ཟླའི་བཅུ་གསུམ་ཉིན། །ཕྱི་དྲོའི་ཆ་ལ་རཱ་ག་ཨ་སྱས་མཛད་པ་ལ། །བསྟན་པའི་བརྩས་སུ་ཟིན་བྲིས་འདི་ཉིད་བྲིས། །ཉེས་འགལ་མཆིས་ན་བཤགས་ཤིང་དགེ་བ་འདིས། །བྱང་ཆུབ་བསྒྲུབ་པའི་བར་ཆད་མེད་པར་ཤོག །མངྒ་ལཾ།།
ཤོག་སྟོང་།