རྡོ་རྗེ་གོ་མཚོན་གྱི་ཟློག་པ་ཡོད་པས་ཆོག་པ་བྱེད་མ་འབུམ་རྡུགས་བྱད་ཟློག་གི་ཟིན་བྲིས།
རྡོ་རྗེ་གོ་མཚོན་གྱི་ཟློག་པ་ཡོད་པས་ཆོག་པ་བྱེད་མ་འབུམ་རྡུགས་བྱད་ཟློག་གི་ཟིན་བྲིས་བཞུགས་སོ།།
ན་མོ་གུ་རུ་ཌཱཀྐི་ནཱི་ཡེ། བླ་མ་ལྷ་དང་མཁའ་འགྲོའི་ཚོགས་ལ་ཕྱག་འཚལ་ནས། །རྡོ་རྗེ་གོ་མཚོན་ཟློག་པའི་ཟིན་བྲིས་བཀོད། །ཆོས་བདག་མཁའ་འགྲོའི་ཚོགས་ཀྱིས་བཀའ་གནང་སྩོལ། །འདི་ལ་རྒྱས་འབྲིང་བསྡུས་གསུམ་ཡང་ཟློག་བཞི། །དུས་ནི་དགོང་ཆུང་སྤྲེའུ་དུས་ཚོད་ནས་། །སྲོད་ཀྱི་དུས་བར་ནམ་ཡང་རུང་བ་སྟེ། །ཁ་ནི་ནུབ་བམ་གནོད་པའི་ཕྱོགས་སུ་གྱུ། །མདུན་དུ་དམར་གཏོར་གཅིག་ཀྱང་བཤམས་ལ་བཞག ། རྡོ་རྗེའི་གོ་མཚོན་མངོན་རྟོགས་ཚར་གཅིག་འདོན། །ཕྱི་རོལ་འཁོར་ལོའི་རྩིབས་སྟོང་ནང་དུ་ནི། །རང་འདྲ་སྟོང་གིས་ཕྱིར་གཟིགས་ཟློག་སྔགས་
གསུང་། །རང་གི་རལ་པ་ཤིང་ལོ་རྒྱུས་ལྟར་སྤྲུག །དེ་ལ་རང་འདྲའི་སྤྲུལ་པས་འཇིག་རྟེན་གང་། །དེ་ཀུན་འབྲུག་སྟོང་ལྡིར་བཞིན་སྔགས་བཟླས་ནས། །རྒྱ་མཚོ་ཁྲོམ་ཁྱོམ་རི་རབ་ལྡིག་ལྡིག་འགུལ། །འུར་སྒྲ་ཐུག་ཆོམ་ས་ཡང་རྣམ་དྲུག་གཡོས། །འཇིག་རྟེན་དྲེགས་པ་ཐམས་ཅད་འདར་ཞིང་བསྔང་། །ཐལ་སྦྱར་བཀའ་ཉན་གསུང་སྡོད་ཟེར་བ་བསྒོམ། །མཁའ་འགྲོ་རྣམས་ཀྱིས་བྱད་མ་ལྷ་སྲུང་བཅས། །གནོད་བྱེད་ཐམས་ཅད་བསད་བཅད་ཤ་ཁྲག་རོལ། །འགའ་ཞིག་བཀུག་ནས་སྲུང་འཁོར་མཚོན་ཆའི་བར། །བསྐུལ་ནས་མཚོན་ཆ་གཡོན་དུ་དྲག་ཏུ་འཁོར། །ཤ་ཁྲག་ཕྱེ་
མར་གཏུབ་རྣམས་མཁའ་འགྲོས་གསོལ། །སྲུང་འཁོར་མེ་དཔུང་གཡོན་དུ་འཁྱིལ་ཞིང་འབར། །ཐུགས་ཀའི་སྔགས་ཕྲེང་གཡོན་དུ་འཁོར་བསྒོམ་ཞིང་། །ཡི་གེ་བཅུ་བཞི་གཏུམ་གཅོད་དྲག་ཏུ་གཅོད། །ལག་གཡས་མཛུབ་མོ་གནམ་ལྕགས་ལྡན་པའི་སྟེང་། །མཐེ་བོང་ཟངས་ཀྱི་སྤུ་གྲི་འབར་བ་ཡིས། །བྱེད་མའི་སྐྱེ་ནི་རྡོག་རྡོག་བཅད་པར་བསྒོམ། །ཕྲེང་རྡོག་ཕར་ལ་བཅད་ཅིང་བགྲང་བའི་ཚེ། །མདུན་དུ་ས་དོང་གྲུ་གསུམ་གཏིང་ཟབ་པ། །དམྱལ་བའི་ཡུལ་དུ་ཟུག་པའི་ནང་དེ་ནས། །ལས་ཀྱི་གཤིན་རྗེའི་ལྟོ་བ་རི་རབ་ཙམ། །ཁ་གདངས་མཆེ་གཙིགས་ལྗགས་ནི་བརྐྱང་པའི་ནང་། །དགྲ་མགོ་ཧྲུག་ཧྲུག་སོང་བར་བསྒོམ་ཞིང་བཟླས། །ཕྲེང་སྐོར་རྫོགས་ནས་རང་གི་ལག་གཡས་མཐིལ། །མེ་ཡི་དཀྱིལ་འཁོར་རྩིབས་སྟོང་ལྟེ་བ་ལ། །ཉི་མས་མཚན་ཞིང་བསྐལ་པའི་མེ་དཔུང་འབར། །ལག་གཡོན་ཆུ་ཡི་དཀྱིལ་འཁོར་ཟླ་བས་མཚན། །བསྐལ་པའི་ཆུ་བོ་རབ་ཏུ་འཁྲུགས་པར་བསྒོམ། །རང་གི་སྣ་བུག་གཡས་ནས་རླུང་བུས་པས། །ནད་ཡམས་རླུང་དམར་འཚུབ་མར་གྱུར་ཏེ་སོང་། །བྱད་མ་ལྷར་བཅས་རང་དབང་མེད་པར་བཀུག །རང་གི་ལག་པའི་བར་དུ་གནས་པར་བསྒོམ། ༈
ན་མོ་བླ་མ་སངས་རྒྱས་ཆོས་ཚོགས་ནས། །རབ་ཏུ་ཞི་བར་གྱུར་ཅིག་བར་བརྗོད་ནས། །ཐལ་མོ་ལན་གསུམ་བརྡབས་པར་བྱས་པའི་ཚེ། །བྱད་མ་ལྷ་བཅས་སྲུང་མ་མཐུ་ནུས་བཅས། །མེས་བསྲེགས་ཆུས་བཀྲུས་པ་ཡི་ཐལ་འཇིམ་དེ། །མདུན་འོག་གྲུ་གསུམ་གཤིན་རྗེའི་ཁར་སོང་བས། །གཤིན་རྗེ་ཚིམས་ནས་ཁ་བསྡམ་དམྱལ་ཡུལ་སོང་། །རླུང་མེ་ཆུ་ས་ཆགས་པའི་དོང་ཡང་གསུབ། །དེ་ནས་དམར་གཏོར་དེ་ཉིད་བྲན་བྱས་ལ། །མགོན་པོའི་ཐུན་གཏོར་འགུག་གཞུག་དེ་བྱ་སྟེ། །དེ་བཞིན་ཉིད་ཀྱི་བདེན་པ་དང་མཚམས་ལ། །ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གྱི་འཁོར་རི་རབ་སུམ་ཅུ་སོ་གཉིས་ཀྱི་རྡུལ་གྲངས་དང་མཉམ་པའི་མཁའ་འགྲོ་མ་རྣམས་ཀྱི་བདེན་པ་དང་། །ཞེས་པ་སྦྱར་ལ་བཀུག་གཞུག་བྱས་པའི་རྗེས། ཨོཾ་ཤྲཱི་བཛྲ་ཌཱ་ཀི་ནཱི་སེང་ཧ་མུ་ཁ་ས་པཱ་རི་ཝཱ་ར་གནོད་བྱེད་དགྲ་བགེགས་བྱད་མའི། མ་ཧཱ་མཾ་ས་ལ་ཁ་རཾ་ཁཱ་ཧི་ནས་བསྐང་བའི་མཇུག་ལྟར་ཁ་རཾ་ཁཱ་ཧི། ཞེས་ཞིང་སྐྱོང་ཡུམ་དང་ཐུགས་རྒྱུད་གཅིག་པའི་ཕྱིར། དཔའ་བོ་རྣམ་རོལ་ནང་གི་ཟློག་པ་སྦྱར། ༈ མཁའ་འགྲོ་སེང་གེའི་གདོང་ཅན་འཁོར་བཅས་ཀྱིས། །ཤ་ཁྲག་དམར་གྱི་གཏོར་མ་འདི་
བཞེས་ལ། །བདག་ཅག་འཁོར་དང་བཅས་ལ་གནོད་བྱེད་པའི། །སྲིད་པའི་ཁྲམ་ཁ་ཞེས་པ་ནས་བཟུང་སྟེ། །ཆོ་འཕྲུལ་དགྲ་བོའི་སྟེང་དུ་བཟློག་བར་འདོན། །དེ་ནས་རྡོ་རྗེ་གར་གྱི་། ཝཱ་སྐག་ཟློག་སྦྱར། །འདི་ནི་སྲིན་མོ་ཟ་ལམ་དོན་བསྡུས་ཏེ། །གཏོར་ཟློག་ཀུན་ལ་སྦྱར་དུ་རུང་བ་ཡི། །དེ་ནས་རྒྱུ་དུས་འགྲིགས་ན་ཟོར་དུ་འཕང་། ༈ ། བྷྱོ༔ ཡེ་ཤེས་མཁའ་འགྲོའི་ཚོགས་ལ་ཕྱག་འཚལ་ལོ། །འགྲོ་མགོན་སྐྱོབ་པ་ཞེས་སོགས་བརྗོད་ལ་འཕང་། །རྒྱུ་ཕྱོགས་མ་འགྲིགས་ན་ནི་འབུལ་རྒྱུ་བསྐུར། །དེ་ནས་དམིགས་མེད་སྟོང་པའི་རྒྱ་ཡིས་གདབ། །རྡོ་རྗེའི་གོ་མཚོན་ཟློག་པ་རྒྱས་པ་ཡིན། །འབྲིང་ནི་མངོན་རྟོགས་ད་ནངས་ཚང་བས་འཐུས། །སྲུང་འཁོར་དམིགས་པ་ཡང་ནི་ཟིན་མི་དགོས། །དྲན་རྫོགས་རང་ཉིད་མཁའ་འགྲོ་སེང་གདོང་མ། །སྐུ་ནི་རི་རབ་ཀྱང་ནི་སུམ་འགྱུར་ཆེ། །གསུང་ནི་སྔགས་སྒྲ་འབྲུག་སྟོང་ལྡིར་བ་ཙམ། །གར་སྟབས་བསྒྱུར་ནས་སྟོང་གསུམ་ཤིག་ཤིག་གཡོ། །རལ་པ་སྤྲུགས་པས་རང་འདྲས་འཇིག་རྟེན་གང་། །ལག་གཡས་གནམ་གྱི་དཀྱིལ་དུ་ཉི་མ་དང་། །གཡོན་པས་ས་ཡི་མཐིལ་དུ་ཟླ་བས་མཚན། །གནམ་ས་བརྡབ་པའི་བར་དུ་གནོད་བྱེད་རྣམས། །
སྒོ་ང་ལྤགས་བཅིར་དམར་ཆར་སོང་བར་བསྒོམ། །ཡང་ན་ལག་གཡས་གསེར་དང་གཡོན་པ་ཟངས། །འཁོར་ལོ་རྩིབས་སྟོང་བརྡབ་པར་བསྒོམ་ཡང་འདྲ། ༈ ན་མོ་བླ་མ་སངས་རྒྱས་ཆོས་ཚོགས་སོགས་ཞེས་པ་ནས། །ཞི་གྱུར་ཅིག་བར་བརྗོད་ལ་ཐལ་མོ་བརྡབ། །རྡོ་རྗེའི་གོ་མཚོན་ཟློག་པ་འབྲིང་པོ་ཡིན། ༈ །ད་ནངས་མངོན་རྟོགས་བཏོན་རུང་མ་བཏོན་རུང་། །རང་ཉིད་དྲན་རྫོགས་སེང་གདོང་མར་གསལ་བའི། །ཕྱག་གཉིས་ཉི་ཟླའི་ཆ་ལང་ཕྱར་ཐབས་འཛིན། །ཉི་ཟླ་བརྡབས་པས་གནོད་བྱེད་དགྲ་བགེགས་ཀུན། །དམར་དང་ཆལ་ཆལ་སོང་བསྒོམ་ཐལ་མོ་བརྡབ། །བདེན་བདར་ཡང་ནི་མཆོད་བསྟོད་ནང་ལྟར་ཆོག །རྣམ་ཤེས་ཆོས་ཀྱི་དབྱིངས་སུ་སྒྲོལ་ཟེར་དུས། །དམིགས་པ་སྒོམ་མཁན་སེམས་ཀྱི་ངོ་བོ་བལྟ། །སྔགས་གྲངས་བརྒྱའམ་ཉེར་གཅིག་བདུན་གྱིས་ཆོག །ཤིན་ཏུ་རྐྱེན་ཁ་ཆེ་ན་སྟོང་རེ་བྱ། །ཕ་རོལ་ནུས་པ་ཅན་གྱི་སྔགས་ནག་དང་། །ཁ་ཆད་སྤར་བའི་མཐུ་འདྲེན་ཡོད་ན་ནི། །དགོང་མོ་རེ་ལ་བརྒྱ་ཚོ་ཉེར་གཅིག་བཟླས། །ཟློག་སྔགས་ཞག་རེར་དེ་བས་མང་མི་རུང་། །རྐྱེན་ཆག་ཆེའམ་བྱད་ཁ་རྒྱུན་ཡོད་ན། །རྒྱུན་དུ་ཆག་མེད་བརྒྱ་རེ་
བྱ་བ་དང་། །ཐེབས་ཆེན་ཡོད་ཅིང་རྒྱུ་ལྡོག་འགྲིག་པའི་དུས། །དམར་གཏོར་བསྐུལ་དང་བཅས་ཏེ་དགྲ་ཕྱོགས་འཕང་། །གཞུང་གི་ཡིག་འབྲུ་བཅུ་བཞི་གོ་ལྡོག་འདི། །སྔགས་པ་ནང་བྷ འགྲས་བྱུང་ན་བྱ་རྒྱུ་ཡིན། །དེ་མིན་ཕལ་པར་བྱ་བ་མ་བཤད་དེ། །འོན་ཀྱང་ཕ་རོལ་སྔགས་པས་ཤེས་སྲིད་པས། །བརྒྱ་རེའི་མཇུག་ཏུ་བདུན་རེ་སྦྱར་སྲོལ་འདུག །ཧ་ཀྱང་མང་ན་རུང་བ་མ་ཡིན་ཏེ། །དེ་ཚེ་སྔགས་མཆིལ་ཁོག་ཏུ་འགྲོ་མི་རུང་། །མཐུ་འདྲེན་ཡོད་དམ་རྐྱེན་ཆག་ཆེ་བའི་དུས། །བཟློག་རྟགས་མ་བྱུང་བར་དུ་འབད་བྱ་སྟེ། །རྒྱུན་དུ་སྔགས་འབྲུ་བདུན་རེས་ཆོག་པར་བཤད། །རྟགས་ནི་དངོས་སུ་དོན་མེད་དཔའ་སེམས་སྐྱེ། །ཉམས་དང་རྨི་ལམ་མེ་ཆེར་བསད་པ་དང་། །བཤའ་དང་ཆུ་བསྒྱུར་ཟིབ་དང་སེར་བ་བཟློག །ཟོར་དང་དམར་གཏོར་བཤིག་དང་ཕུར་པ་བཅག །མདའ་གཞུ་བཙག་དང་རང་ཉིད་གཡུལ་ལས་རྒྱལ། །དུད་འགྲོའི་ཁ་བཅིང་མཆེ་བ་རྭ་ཅོ་བཅག །དེ་ལྟར་བཟློག་པའི་རྟགས་མཚན་གསལ་གྱུར་ན། །དམིགས་པ་ལྷོད་ཅིང་སྔགས་གྲངས་ཇེ་ཉུང་བྱ། །དེ་ལྟར་རྡོ་རྗེའི་གོ་མཚོན་ཟིན་བྲིས་འདི། །བདུད་མོ་ཀརྨ་དར་རྒྱས་ཀྱིས་བསྐུལ་བས། །ཚོགས་དང་མཎྜལ་མང་པོ་
ཕུལ་བྱས་ཤིང་། །ཕྱི་ནང་གསང་གསུམ་སྲུང་འཁོར་ཡན་ཆད་བྲིས། །དེ་ཚེ་མཁའ་འགྲོ་འདུ་བའི་རྨིས་ལྟས་བྱུང་། །དེ་ནས་ཕྱིར་ནངས་ཟློག་པ་བྲི་བསམ་ཛ། །མཁའ་འགྲོས་མ་གནང་བཀག་པའི་རྨི་ལྟས་བྱུང་། །ཞུ་བ་པོ་ཉིད་བསྙུང་བའང་ཤིན་ཏུ་ཐུ། །དེ་ཕྱིར་ཞག་པོ་བཅུ་ལྷག་ཙམ་ཞིག་བསྒྱུར། །ཚོགས་འཁོར་ལན་མང་ཕུལ་ཞིང་གནང་བ་ཞུས། །དེ་ནས་ཟློག་པ་ལ་སོགས་ལས་ཚོགས་བྲི། །རྡོ་རྗེའི་གོ་མཚོན་ནང་གི་ཚིག་རིས་ལ། །ཆོས་འབྱུང་ཕྱི་ཡི་གྲྭ་ཟུར་རྩེ་མོར་བཞག །ཞེས་སོགས་ཚིག་འབྲུ་དྲུག་ནི་དོན་བཀྲོལ་ནས་། །བསད་ལས་ཐོགས་མེད་གནམ་ལྕགས་ཐོག་འདྲ་བ། །སྔགས་འབྲུ་བཅུ་བཞི་གོ་ལྡོག་འདི་ཡི་དོན། །པང་ཟློག་བྱད་མ་མཐུ་ཆེན་བསྒྲལ་བའི་ཐབས། །བེར་ནག་ཅན་གྱི་སྒྲོལ་གིང་ནག་པོ་ནི། །སྔ་དྲོ་བྱས་ན་ཕྱི་དྲོ་རྟགས་འབྱུང་ཐབས། །དེ་གསུམ་ཟིན་བྲིས་ལག་ཏུ་ལོན་ངེས་ཤིག །བྲིས་ན་རུང་ངམ་བརྟག་པ་བྱས་པའི་ནུབ། །གཉིད་པ་མ་ཡིན་ཉམས་ཀྱི་སྣང་བ་ལ། །རྡོ་རྗེ་དམྱལ་བར་སྐྱེ་འོ་ཟེར་བའི་སྒྲ། །གསལ་པོར་ཐོས་པས་བྲི་བའི་སྤོབས་པ་ཟད། །རྡོ་རྗེ་དམྱལ་བར་སྐྱེས་ན་ཅི་ཚུགས་བྱེད། །གཅིག་རྒྱུད་ངག་ཁྲིད་ཙམ་ཡང་མི་སྨྲ་
བའི་། །ཞེ་བཅད་དམ་བཅའ་རང་གིས་རང་ལ་བྱས། །བཟློག་དམིགས་འདི་ཚོ་ཤིན་ཏུ་བཙོག་འདུག་སྟེ། །ཉེ་བར་མཁོ་ཞིང་གཞུང་དོན་མི་ཚང་དོགས། །བྲི་བར་ཡིད་འདོད་བཞིན་དུ་བྲིས་པ་ཡིན། །བསྟན་པའི་ཆགས་ཕྱིར་རང་ལ་བློ་གཏད་པའི། །རང་དང་འདྲ་བ་འགའ་རེ་མ་གཏོགས་པ། །མང་དུ་སྤེལ་ན་མཁའ་འགྲོའི་བཀའ་ཆད་འབྱུང་། །དོན་ཆུང་ལས་ཀྱིས་རང་ཉིད་དམྱལ་བར་འཕེན། །དེ་ནས་གདམས་ངག་ངོམས་འདོད་མ་ཆེ་བར། །རྐུན་ནོར་བཞིན་དུ་ཕུགས་སུ་སྦ་བར་གྱིས། །ཞེས་པ་ཕག་ལོ་ཆོ་འཕྲུལ་ཆེན་པོ་ཡི། །ཡར་ཚེས་གཉིས་ཀྱི་སྔ་དྲོའི་ཉིན་གྱི་ཚེ། །སྔགས་ནག་རཱ་ག་ཨ་སྱས་སྨྲས་པ་ལྟར། །བསྟན་པ་འཛིན་པའི་བུ་ཡིས་ལེགས་པར་བྲིས། །སྦ་འོས་གསལ་བར་བཀོད་པའི་ཉེས་པ་རྣམས། །ཌཱ་ཀི་བྱེ་བ་འབུམ་གྱི་དྲུང་དུ་བཤགས། །དགེ་བས་སངས་རྒྱས་བསྟན་དང་བསྟན་འཛིན་ལ། །བར་དུ་གཅོད་པའི་དགྲ་བགེགས་ཀུན་བཟློག་ནས། །བསྟན་འཛིན་རྣམས་ནི་བསྙུང་བྲལ་སྐུ་ཚེ་བསྟན། །སྒྲུབ་བརྒྱུད་བསྟན་པའི་ཉི་མ་གསལ་བར་ཤོག །མངྒ་ལཾ།། །།