རྡོ་རྗེ་གོ་མཚོན་གྱི་ཐལ་མོ་བརྡབ་ཆོག་གི་གཏོར་སྐུལ་གྱི་ཟློག་པའི་འདོན་འགྲིགས།
རྡོ་རྗེ་གོ་མཚོན་གྱི་ཐལ་མོ་བརྡབ་ཆོག་གི་གཏོར་སྐུལ་གྱི་ཟློག་པའི་འདོན་འགྲིགས་བཞུགས་སོ།།
དེ་ནས་དམར་གཏོར་ཕུད་རྒོད་དམ་ཆུ་གཙང་གིས་བྲན་ལ། ཨོཾ་བི་ཤྭ་ཌཱཀི་ནི་ཨོཾ་སྭ་བྷ་ཝ༴ སྟོང་པ་ཉིད་དུ་གྱུར། སྟོང་པའི་ངང་ལས་སྐད་ཅིག་གིས་ཐུན་གཏོར་གནམ་ལྕགས་ལས་གྲུབ་པའི་ཏྲི་ཤུ་ནག་པོ་ཁ་གྱེན་དུ་བལྟ་བ། རྩ་བ་རབ་ཏུ་བརྟན་པ། །དེའི་མགུལ་དུ་གནམ་ལྕགས་ལས་གྲུབ་པའི་འཁོར་ལོ་ནག་པོ་རྩིབས་བརྒྱད་པ། རྣོ་བའི་ངར་དང་ལྡན་པ། གཅོད་པའི་དབལ་དང་ལྡན་པ། གཡོན་དུ་སྒ་ར་ར་འཁོར་བའི་རྩིབས་བར་དུ་དགྲ་བགེགས་བྱད་མ་ཐམས་ཅད་མངོན་སུམ་དུ་གསལ་བར་གྱུར། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་
མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཆོས་ཉིད་དེ་བཞིན་ཉིད་ཀྱི་བཀའ་བདེན་པ་དང་། མ་ཡེ་ཤེས་ཀྱི་མཁའ་འགྲོ་སེང་གེའི་གདོང་པ་ཅན་འཁོར་རི་རབ་སུམ་ཅུ་སོ་གཉིས་ཀྱི་རྡུལ་གྱི་གྲངས་དང་མཉམ་པའི་མཁའ་འགྲོ་མ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུས། སྤྱིར་སངས་རྒྱས་ཀྱི་བསྟན་པ་བཤིག་པ།
དཀོན་མཆོག་གི་དབུ་འཕང་སྨད་པ། བླ་མའི་སྐུ་ལ་བསྡོ་བ། རིག་འཛིན་གྱི་བརྒྱུད་པ་གཅོད་པ། དགེ་འདུན་གྱི་སྡེ་བཤིག་པ། དབེན་རི་གཉན་པོ་བཅོམ་པ། མཚམས་མེད་པ་ལྔ་ལ་སྤྱོད་པ། མི་དགེ་བ་བཅུ་ལ་རྔམ་པ། ཁྱད་པར་དུ་ཡང་རྣལ་འབྱོར་པ་བདག་ཅག་འཁོར་དང་བཅས་པ་རྣམས་ལ། ཕོད་བཙུགས་པ། དོ་བསྡོ་བ། འགྲས་ཚོལ་བ། །གླགས་ལྟ་བ། ཡ་བོ་བཟུང་བ། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་ལང་བའི་དགྲ་བགེགས་བྱད་མ་རྦོད་གཏོང་དང་བཅས་པའི་བླ་སྲོག་རྣམ་པར་ཤེས་པ་སྲིད་པ་གསུམ་གང་དུ་གནས་ཀྱང་སྐད་ཅིག་རང་དབང་མེད་པར་དྲག་པོ་དམར་གྱི་གཏོར་མ་འདི་ལ་ཁུག་ཅིག །བཛྲ་ཨཾ་ཀུ་ཤ་ཛཿ བཛྲ་པཱ་ཤ་ཧཱུྃ། བཛྲ་སྤོ་ཊ་ཐཾ༔ བཛྲ་གནྡྷེ་ཧོ༔ ལན་གསུམ་དང་ཞེས་པས་བཀུག་ལ། དེ་ཡི་སྙིང་གར་པདྨ་འདབ་མ་བརྒྱད་པའི་འདབ་མ་རྣམས་ལ་ཤ་ལྔ་བདུད་རྩི་ལྔ་ས་བོན་དང་བཅས་པ་བསམ་ལ། མཁའ་འགྲོ་མའི་ཤངས་ནས་ཧཱུྃ་འཕྲོས། བསྒྲུབ་བྱའི་དྲི་འཛིན་ལས་ཞུགས་ཁོལ་ཏེ་སྙིང་གར་པདྨའི་ལྟེ་བར་གྲི་གུག་གི་འཁོར་ལོར་གྱུར་པས་དུམ་བུར་གཏུབ་ཅིང་སྔགས་ལས་གྲུབ་པའི་མཚོན་
ཆས་ཕྱི་ནང་གཏུབས་པས། ཁྲག་ཁོལ་ཏེ་ཁྲག་གི་རྒྱ་མཚོ། ཤ་རུས་ཏིལ་ཙམ་དུ་ཞུ་བ་དམ་ཚིག་གི་བདུད་རྩི་དང་། སྙིང་གི་ཤ་ལྔ་བདུད་རྩི་ལྔ་ས་བོན་དང་བཅས་པ་ཞུ་ཞིང་འདྲེས་པའི་ཡེ་ཤེས་ཀྱི་བདུད་རྩི་དབྱེར་མེད་དུ་གྱུར་པས་མཁའ་འགྲོ་མ་འཁོར་དང་བཅས་པས་གསོལ་བར་བསམ། ཡང་བསྡུས་པ་ནི། གཏོར་མར་བསྒྲུབ་བྱ་བཀུག་ལ་རྣམ་ཤེས་སྤར་བ། ཕྱག་གཡོན་པའི་ཐོད་པར་བཅུག །གཡས་ཀྱི་གྲི་གུག་གིས་གཏུབས་ནས་ཤ་ཁྲག་གི་རྒྱ་མཚོར་གྱུར་པ་མཁའ་འགྲོ་མ་རྣམས་ཀྱིས་གསོལ་བར་བསམ་ཞིང་། ཨོཾ་ཌཀི་ནཱི་སེང་ཧ་མུ་ཁ་ས་པཱ་རི་ཝཱ་ར་གནོད་བྱེད་དགྲ་བགེགས་བྱད་མའི་མ་ཧཱ་ནཱཾ་ས་ལ་ཁ་རཾ་ཁཱ་ཧི། དེ་བཞིན་དུ། རཀྟ༔ ཙིཏྟ གོ་རོ་ཙ་ན༔ བ་ལི་ཏ༔ ཀིང་ནི་རི་ཏི་ལ༴ ཞེས་ཞིང་སྐྱོང་ཡུམ་དང་ཐུགས་རྒྱུད་གཅིག་པའི་ཕྱིར། །དཔའ་བོ་རྣམ་རོལ་ནང་གི་ཟློག་པ་སྦྱར། ཧཱུཾ། མཁའ་འགྲོ་སེང་གེའི་གདོང་ཅན་འཁོར་བཅས་ཀྱིས། །ཤ་ཁྲག་དམར་གྱི་གཏོར་མ་འདི་བཞེས་ལ། །བདག་ཅག་འཁོར་དང་བཅས་ལ་གནོད་པ་ཡི། །སྲིད་པའི་ཁྲམ་ཁ་ཐམས་ཅད་དགྲ་སྒྱུར། །ལྷ་འདྲེའི་དམག་ཚོགས་མ་ལུས་དགྲ་ལ་དྲོངས། །ཕ་རོལ་བསམ་སྦྱོར་ངན་
པའི་ལས་བརྩམས་པ། །བྱད་ཁ་ཕུར་ཁ་རྦོད་གཏོང་དྲག་པོ་དང་། །ཚེ་ཟོར་རྦད་འདྲེ་ཡུངས་ཟོར་འཕེན་པ་ཟློག །ས་བདག་ཀླུ་ཡིས་བྱེད་དུ་བཅུག་པ་དང་། །ཐེའུ་རང་འབྱུང་པོའི་སྲི་རྐུན་ཐམས་ཅད་ཟློག །གཤིན་རྗེའི་འཁོར་ལོ་བདུད་ཀྱིས་ཁྲམ་འདེབས་དང་། །མུ་སྟེགས་ངན་པས་བར་ཆད་བྱེད་པ་ཟློག །རྒྱལ་བསེན་རྣམས་ཀྱི་སྨྱོ་འབོག་གཏོང་བ་དང་། །དྲང་སྲོང་གཟའ་དང་ཀླུ་གདོན་གནོད་པ་ཟློག །ཞང་ཞུང་ཇོ་ཟོར་སུམ་པའི་གླང་ཟོར་དང་། །བོན་པོ་རྣམས་ཀྱིས་བརྡ་ཟོར་འཕེན་པ་ཟློག །བནེའི་སྔགས་ཟོར་སྐྱེས་པའི་མདའ་ཟོར་དང་། །བུད་མེད་རྣམས་ཀྱིས་དམོད་ཟོར་འཕེན་པ་ཟློག །བདུད་ཀྱི་གཤེད་བཞི་རོ་ལངས་འབྱུང་པོ་དང་། །མ་མོ་རྣམས་ཀྱིས་ཁྲག་ཟོར་འཕེན་པ་ཟློག །མོ་རྩིས་ངན་དང་རྨི་ལམ་མཚན་མ་ངན། །ལྟས་ངན་མི་རུང་བརྒྱད་ཅུ་རྩ་གཅིག་ཟློག །བཞི་བརྒྱ་རྩ་བཞིའི་ནད་རྣམས་མ་ལུས་དང་། །གདོན་རིགས་ཉི་ཁྲི་ཆིག་སྟོང་ཚོགས་རྣམས་ཟློག་སྟོང་ཕྲག་བརྒྱད་ཅུའི་བགེགས་ཚོགས་མ་ལུས་དང་། །ཡེ་འདྲོགས་ཆེན་པོ་སུམ་བརྒྱ་དྲུག་ཅུ་ཟློག །གདོན་ཆེན་བཅོ་ལྔ་ལོ་ཟླ་ཞག་དུས་སྐགེ །མི་མཐུན་ཕྱོགས་རྣམས་
དགྲ་བགེགས་སྟེང་དུ་ཟློག །དུས་མིན་འཆི་བའི་འཇིགས་པ་བརྒྱད་རྣམས་དང་། །ལྟས་ངན་ཆོ་འཕྲུལ་དགྲ་བོའི་སྟེང་དུ་ཟློག །རྡོ་རྗེ་གར་གྱི་སྐག་ཟློག་མ། །ཤར་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །རིན་ཆེན་གར་གྱི་སྐག་ཟློག་མ། །ལྷོ་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །པདྨ་གར་གྱི་སྐག་བཟློག་མ། །ནུབ་ཕྱོགས་གདོན་གྱི་སྐག་སྒྱུར་ཅིག ། བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །ལས་ཀྱི་གར་གྱི་སྐག་ཟློག་མ། །བྱང་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །གཞན་གྱིས་ཕུར་ཟོར་འཕེན་པ་ཟློག །མཆེ་ཟོར་ཡུངས་ཟོར་འཕེན་པ་ཟློག །གཤིན་རྗེས་འཁོར་ལོ་བསྐོར་བ་ཟློག །བདུད་ཀྱི་ཁྲམ་ལ་བཏབ་པ་ཟློག །མ་མོས་ཐུན་ཟོར་འཕེན་པ་ཟློག །ཀླུ་ཡི་བྱད་དུ་བཅུག་པ་ཟློག །ཕོ་ཉས་བླ་སྲོག་འཕྲོག་པ་ཟློག །ཐེའུ་རང་ཚེ་ལ་བརྐུབ་ཟློག །མུ་སྟེགས་
ངན་སྔགས་བྱེད་པ་ཟློག །ཞང་ཞུང་ཇོ་དམར་འཕེན་པ་ཟློག །བོན་པོས་སྔགས་ལོག་སྒྲུབ་པ་ཟློག །སུམ་པས་གླང་ཟོར་འཕེན་པ་ཟློག །སྐྱེས་པས་མདའ་ཟོར་ཟོར་འཕེན་པ་ཟློག་བུད་མེད་དམོད་ཟོར་འཕེན་པ་ཟློག །ལྟས་ངན་བརྒྱད་ཅུ་རྩ་གཅིག་ཟློག །ཡེ་འདྲོགས་སུམ་བརྒྱ་དྲུག་ཅུ་ཟློག །བགེགས་རིགས་སྟོང་ཕྲག་བརྒྱད་ཅུ་ཟློག །བྱིས་པའི་གདོན་ཆེན་བཅོ་ལྔ་ཟློག །བཟློག་གོ་དམར་ཆེན་གཏོར་མས་ཟློག །བ་བསྒྱུར་རོ་ལྟས་ངན་དགྲ་ལ་སྒྱུར། །སྐག་ཟློག་གོ །འདི་ནི་སྲིན་མོ་ཟ་ལམ་དོན་བསྡུས་ཏེ། །གཏོར་ཟློག་ཀུན་ལ་སྦྱར་དུ་རུང་བ་ཡིན། །དེས་ན་རྒྱུ་ལྡོག་འགྲིགས་ན་ཟོར་དུ་འཕང་། །གཏོར་མ་ཕྱིར་ཁྱེར་བཅུག་ལ། །བྷྱོ། ཡེ་ཤེས་མཁའ་འགྲོའི་ཚོགས་ལ་ཕྱག་འཚལ་ལོ། །འགྲོ་མགོན་སྐྱོབ་པ་རྣམས་ཀྱི་བཀའ་བཞིན་དུ། །ཕྲིན་ལས་ཚུལ་བཞིན་སྒྲུབ་པའི་བཀའ་ཉན་མ། །རྫུ་འཕྲུལ་སྟོབས་དང་ལྡན་ཞིང་མ་ཐོགས་པར། །ཕྲིན་ལས་སྣ་ཚོགས་སྒྲུབ་པའི་ལས་མཛོད་ཅིག །དཔེར་ན་རྔོན་པས་རི་དྭགས་བཤོར་བ་བཞིན། །བསད་པ་དོན་དུ་གཉེར་བའི་ལས་མཛད་མ། །གསོད་པ་དོན་དུ་གཉེར་བའི་ལས་མཛོད་ཅིག །ཨོཾ་ཧཱུྃ་ཏྲིག་ཁྲོ་བྷྱོ༔ མ་ནི་མཱ་ར་ནི་བྷྱོ མཱ་ར་དུ་ན་
བྷྱོ༔ རཀྵ་རཀཱན་བྷྱོ ཏིང་ཡ་རཀྵ་བྷྱོ༔ དགྲ་བགེགས་བྱད་མ་མཱ་ར་ཡ། ཡ་མ་རཱ་ཛ་ཀཱི་ལ་ཡ་བྷྱོ༔ ཞེས་སོགས་བརྗོད་ལ་འཕང་། རྒྱུ་ཕྱོགས་མ་འགྲིགས་ན་ནི་འབུལ་རྒྱུ་བསྐུར། །དེ་ནས་དམིགས་མེད་སྟོང་པའི་རྒྱ་ཡིས་གདབ། །རྡོ་རྗེའི་གོ་མཚོན་ཟློག་པ་རྒྱས་པ་ཡིན། །ཕག་ལོ་ཆོ་འཕྲུལ་ཆེན་པོའི་ཡར་ཚེས་གཉིས་ཀྱི་སྔ་དྲོའི་ཉིན་ཚེར་ཡོད་ཆོག་བྱད་མ་འབུམ་རྡུགས་ཀྱི་བཟློག་པའི་ཟིན་བྲིས་བཅས། ༢ སྔགས་རྒན་རཱ་ག་ཨ་སྱས་སྨྲས་ལྟར། བརྒྱུད་འཛིན་བུ་ཡིས་ལེགས་པར་བྲིས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
ཤོག་སྟོང་།