སེང་གདོང་མའི་ཆད་བསྟན་དང་རྗེས་ཆོག
ཅེས་རྗེས་ཆོག་སྤྱི་ལྟར་བྱའོ་གསུངས་པ་ལྟར་འདི་མན་ཡོད་པར་གོ་ནས་ལྷར་སབ་པ་ཡིན། དེ་ནས་ཆད་མདོ་འདི་ལྟར་བསྒྲགས་ལ་དཔལ་འབར་འཛུགས་ཤིང་འདི་སྐད་དོ། ། ཧཱུྃ་བྷྱོ༔ བསྐལ་པ་བརྒྱད་ཁྲི་བཞི་སྟོང་སྔོན་རོལ་དུ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །སྤྲོས་བྲལ་བདེ་ཆེན་ཀུན་ཏུ་བཟང་མོ་ཡིས། །བྱ་རྩོལ་བྲལ་བ་ཡིད་ཆེས་བསྟན་པའི་ཚེ། །རིགས་ལྔ་བདེ་ཆེན་མཁའ་དབྱིངས་བཀོད་པའི་ཚོགས། །ཇི་ལྟར་ཁས་བླངས་དམ་ཚིག་ཕོག་ནས་སུ། །བཀའ་ཡི་གཏོར་མ་ལེན་པར་མ་ཆད་དམ། །ཡོན་བདག་བར་ཆད་བཟློག་༣ པར་མ་ཆད་དམ། །ཇི་ལྟར་ཁས་བླངས་བཞིན་དུ་གཏོར་མ་ལོངས། །དེ་ལྟར་དམ་བཅའ་བཞིན་དུ་ཕྲིན་ལས་བཛོད། །ཧཱུྃ་བྷྱོ༔ དེ་འོག་སྙིགས་མའི་དུས་ལ་བབ་པའི་ཚེ། །དུད་ཁྲོད་རོ་ལངས་བསིལ་བའི་ཚལ་ཆེན་དུ། །མཁའ་འགྲོའི་གཙོ་མོ་ལས་ཀྱི་དབང་མོ་ཆེ། །གསང་སྔགས་རྒྱུད་སྡེ་གཏེར་དུ་སྦས་པའི་ཚེ། །སྣང་སྲིད་འཇིག་རྟེན་ལྷ་སྲིན་སྡེ་བརྒྱད་ཀྱི། །སོ་སོའི་སྐུ་གསུང་ཐུགས་མཆོག་བསྟན་ནས་ཀྱང་། །སངས་རྒྱས་བསྟན་པ་བསྲུང་བར་མ་ཆད་དམ། །དཀོན་མཆོག་དབུ་འཕང་བསྟོད་པར་མ་ཆད་དམ། །བླ་མའི་
ཐུགས་དགོངས་བསྒྲུབ་པར་མ་ཚད་དམ། །རྣལ་འབྱོར་སྐུ་ཚེ་བསྲིང་བར་མ་ཆད་དམ། །དམར་ཆེན་གཏོར་མ་ལེན་པར་མ་ཆད་དམ། །སྔོན་ཚེ་ཞལ་བཞེས་དམ་བཅའ་དེ་བཞིན་དུ། །མཆོད་གཏོར་བཞེས་ནས་ཕྲིན་ལས་བསྒྲུབ་པར་མཛོད། ། ཧཱུྃ་བྷྱོ༔ དེ་འོག་གཅོད་པའི་དུས་ལ་བབ་པའི་ཚེ། །མཆོད་རྟེན་ཆེན་པོ་བདེ་བྱེད་བརྩེགས་པའི་ཚར། །གྲུབ་པ་བརྙེས་པའི་རིག་འཛིན་བརྒྱུད་རྣམས་ཀྱི། །གུང་ཐང་དགོངས་པ་མཛད་ནས་གཟིགས་པའི་ཚེ། །མཁའ་འགྲོ་ཤུགས་འགྲོའི་གཏེར་སྒོམ་གཏད་ནས་ཀྱང་། །སོ་སོའི་སྐུ་གསུང་ཐུགས་མཆོག་བསྟན་ནས་ཀྱང་། །སངས་རྒྱས་བསྟན་པ་བསྲུང་བར་མ་ཆད་དམ། །དཀོན་མཆོག་དབུ་འཕང་བསྟོད་པར་མ་ཆད་དམ། །བླ་མའི་ཐུགས་དགོངས་བསྒྲུབ་པར་མ་ཟ ཆད་དམ། །རྣལ་འབྱོར་སྐུ་ཚེ་བསྲིང་བར་མ་ཆད་དམ། །དམར་ཆེན་གཏོར་མ་ལེན་པར་མ་ཆད་དམ། །སྔོན་ཚེ་ཞལ་བཞེས་དམ་བཅའ་དེ་བཞིན་དུ། །མཆོད་གཏོར་བཞེས་ནས་ཕྲིན་ལས་བསྒྲུབ་པར་མཛོད། ། ཧཱུྃ་བྷྱོ༔ དེ་འོག་འདུལ་བའི་དུས་ལ་བབ་པའི་ཚེ། །བོད་ཡུལ་ཁ་བ་ཅན་གྱི་ཡུལ་ལྗོངས་སུ། །སློབ་དཔོན་ཆེན་པོ་པདྨ་བྱོན་པའི་ཚེ། །
བོད་ཀྱི་ལྷ་སྲིན་སྡེ་བརྒྱད་འཁོར་དང་བཅས། །རང་རང་སོ་སོའི་གཟུགས་མཆོག་བསྟན་ནས་ཀྱང་། །སངས་རྒྱས་བསྟན་པ་བསྲུང་བར་མ་ཆད་དམ། །དཀོན་མཆོག་དབུ་འཕང་བསྟོད་པར་མ་ཆད་དམ། །བླ་མའི་ཐུགས་དགོངས་བསྒྲུབ་པར་མ་ཚད་དམ། །རྣལ་འབྱོར་སྐུ་ཚེ་བསྲིང་བར་མ་ཆད་དམ། །དམར་ཆེན་གཏོར་མ་ལེན་པར་མ་ཆད་དམ། །སྔོན་ཚེ་ཞལ་བཞེས་དམ་བཅའ་དེ་བཞིན་དུ། །མཆོད་གཏོར་བཞེས་ནས་ཕྲིན་ལས་བསྒྲུབ་པར་མཛོད། །ཧཱུྃ་བྷྱོ༔ ད་དུས་སྙིགས་མ་ལྔ་བདོའི་དུས་འདི་རུ། །པདྨའི་ཡང་སྤྲུལ་གཏེར་སྟོན་ཆེན་པོ་ཡིས། །ཟབ་གཏེར་མཐའ་དག་གཏེར་ནས་བཏོན་པའི་ཚེ། །བོད་ཀྱི་ལྷ་སྲིན་གདུག་པ་ཅན་རྣམས་ཀྱིས། །རང་རང་སོ་སོའི་གཟུགས་མཆོག་བསྟན་ནས་ཀྱང་། །སངས་རྒྱས་བསྟན་པ་བསྲུང་བར་མ་ཆད་དམ། །དཀོན་མཆོག་དབུ་འཕང་བསྟོད་པར་མ་ཆད་དམ། །བླ་མའི་ཐུགས་དགོངས་བསྒྲུབ་པར་མ་ཆད་དམ།། རྣལ་འབྱོར་སྐུ་ཚེ་བསྲིང་བར་མ་ཆད་དམ། །དམར་ཆེན་གཏོར་མ་ལེན་པར་མ་ཆད་དམ། །སྔོན་ཚེ་ཞལ་བཞེས་དམ་བཅའ་དེ་བཞིན་དུ། །མཆོད་གཏོར་བཞེས་ནས་ཕྲིན་ལས་
བསྒྲུབ་པར་མཛོད། །ཧཱུྃ་བྷྱོ ད་ལྟ་བསྒྲུབ་པའི་རྣལ་འབྱོར་བདག་ཅག་གིས། །མཁའ་འགྲོ་དམ་ལ་འདུལ་བའི་གནས་མཆོག་ཏུ། །ཚེ་འདིར་སངས་རྒྱས་སྐུ་གསུམ་བསྒྲུབ་པའི་ཕྱིར། །མ་རྒྱུད་མཁའ་འགྲོའི་དཀྱིལ་འཁོར་ཞལ་ཕྱེས་ཚེ། །བཀའ་ཡི་སྲུང་མ་དམ་ཅན་རྒྱ་མཚོ་ཡིས། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །སངས་རྒྱས་བསྟན་པ་བསྲུང་བར་མ་ཆད་དམ། །དཀོན་མཆོག་དབུ་འཕང་བསྟོད་པར་མ་ཆད་དམ། །བླ་མའི་ཐུགས་དགོངས་བསྒྲུབ་པར་མ་ཆད་དམ། །རྣལ་འབྱོར་སྐུ་ཚེ་བསྲིང་བར་མ་ཆད་དམ། །དམར་ཆེན་གཏོར་མ་ལེན་པར་མ་ཆད་དམ། །ཇི་ལྟར་ཁས་བླངས་དམ་བཅས་དེ་བཞིན་དུ། །མཆོད་གཏོར་བཞེས་ལ་ཕྲིན་ལས་འགྲུབ་པར་མཛོད། །དེ་ནས་གཏོར་ཞལ་སློབ་དཔོན་མདུན་ལ་བསྟན་ནས་ཕུལ། དང་པོ་ཐུགས་དམ་གནད་ནས་བསྐུལ་བ་ནི། གཏོར་ཟོར་ལ་དཔལ་འབར་འཛུགས་ལ་རཀྟས་བྲན་ལ་ཡི་དམ་མཁའ་འགྲོའི་ང་རྒྱས་གྱིས་སྐད་དོ།། ཧཱུྃ། བཞེངས་ཤིག་ཆོས་ཀྱི་དབྱིངས་ནས་བཞེངས། །ཡི་དམ་རྒྱལ་བ་སྐུ་བཞེངས་ཤིག །བསྐུལ་ལོ་ཐུགས་དམ་གནད་ནས་བསྐུལ། །མཛོད་ཅིག་སེམས་ཅན་དོན་མཛོད་ཅིག །བྷྱོ༔ བཞེངས་ཤིག་
མཁའ་འགྲོ་དབྱིངས་ནས་བཞེངས། །རྒྱལ་ཡུལ་གཙོ་མོ་སེང་གདོང་མ། །མཐུ་དང་ནུས་པ་བསམ་མི་ཁྱབ། །སྐུ་མདོག་མཐིང་ནག་གར་སྟབས་རོལ། །སྤྱན་གསུམ་སྡང་མིག་ཧྲིགས་སེ་ཧྲིག །གཡུ་ཡི་རལ་པ་ཤ་ར་ར། །ཐུན་དང་དུག་རླངས་ཆི་ལི་ལི། །ཞལ་ནས་སྦྱོ་བཟློག་ཏི་རི་རི། །རུ་ལུའི་སྒྲ་སྐད་འུ་རུ་རུ། །བསྐུལ་ལོ་མཁའ་འགྲོ་ལས་ལ་བསྐུལ། །དམ་ཉམས་དགྲ་ལ་ར་མདའ་མཛོད། །དམར་གྱི་གཏོར་མ་འདི་བཞེས་ལ། །ཤར་ཕྱོགས་དཀར་མོ་སེང་གདོང་མ། །ཡུལ་འཁོར་དྲུག་གི་བཀའ་སྒྱུར་མ། །དྲི་ཟའི་དམག་ཚོགས་དགྲ་ལ་སྒྱུར། །ནད་ཡམས་དལ་ཁ་ཤར་དུ་སྒྱུར། །ལྷོ་ཕྱོགས་སེར་མོ་སེང་གདོང་མ། །འཕགས་སྐྱེས་པོ་ཡི་བཀའ་སྒྱུར་མ། །གཤིན་རྗེའི་དམག་ཚོགས་དགྲ་ལ་སྒྱུར། །ནད་ཡམས་དལ་ཁ་ལྷོ་རུ་སྒྱུར། །ནུབ་ཕྱོགས་དམར་མོ་སེང་གདོང་མ། །སྤྱན་མི་བཟང་གིས་བཀའ་སྒྱུར་མ། །ཀླུ་གདོན་དམག་ཚོགས་དགྲ་ལ་སྒྱུར། །ནད་ཡམས་དལ་ཁ་ནུབ་ཏུ་སྒྱུར། །བྱང་ནས་ལྗང་མོ་སེང་གདོང་མ། །རྣམ་ཐོས་སྲས་ཀྱི་བཀའ་སྒྱུར་མ། །གནོད་སྦྱིན་དམག་ཚོགས་དགྲ་ལ་སྒྱུར། །ནད་ཡམས་དལ་ཁ་
བྱང་དུ་སྒྱུར། །ཁྲོ་མོའི་སྤྲུལ་པའི་མཁའ་འགྲོ་ནི། །སྤྲུལ་པ་ཡང་སྤྲུལ་བསམ་མི་ཁྱབ། །ཤུགས་འགྲོ་བྲན་གཡོག་འཁོར་དང་བཅས། །ཐམས་ཅད་རུ་མཚོན་རངས་སེ་རང་། མ་མོའི་དཔུང་ཚོགས་ཉི་ལི་ལི། །བདག་དང་རྒྱུ་སྦྱོར་འཁོར་དང་བཅས། །བྱད་ཁ་ཕུར་ཁ་བཟློག་ཏུ་གསོལ། །ཆག་ཆེ་ཉམ་ང་བཟློག་ཏུ་གསོལ། །བར་ཆད་འགལ་རྐྱེན་བཟློག་ཏུ་གསོལ། །དལ་ཁ་ཡམས་ཁ་བཟློག་ཏུ་གསོལ། །རྦོད་གཏོང་རྦད་འདྲེ་བཟློག་ཏུ་གསོལ། །བྱད་ཁ་ཟོར་ཁ་བཟློག་ཏུ་གསོལ། །གཏད་ཁ་ཕུང་སེལ་ཐམས་ཅད་བཟློག་ཏུ་གསོལ། །ཕྲ་མེན་རླུང་འཁོར་ཐམས་ཅད་བཟློག་ཏུ་གསོལ། །རྨི་ལྟས་མཚན་ངན་ཐམས་ཅད་བཟློག་ཏུ་གསོལ། ། བྷྱོ༔ ད་ནི་འཇིག་རྟེན་གཡོ་ཞིང་འགུལ། །ད་ནི་སྲིད་གསུམ་ཁྱོམ་ཞིང་ལྡེག །སྣང་སྲིད་ཐམས་ཅད་གཡོ་ཞིང་འགུལ། །མ་བདུད་ཆེན་མོ་སྐུ་བཞེངས་ཤིག །ཟོར་བདག་ཆེན་མོ་བསྐྱོད་པའི་ཚེ། །འཁོར་གྱི་མ་མོ་ཅི་ལ་སྡང་། །རྣལ་འབྱོར་ཡོན་མཆོད་འཁོར་བཅས་ཀྱིས། །བྱད་ཁ་ཕུར་ཟོར་ཐམས་ཅད་དང་། །མ་མོ་ཁྱོད་ཀྱིས་ད་ཤུལ་ལ། །དྲག་པོའི་ཟོར་དང་བཅས་ནས་ནི། །སྡང་བའི་དགྲ་དང་
བགེགས་ལ་འཕེན། །ཟ་བའི་འདྲེ་དང་སྲི་ལ་འཕོངས། །བརྣག་པའི་དགྲ་བགེགས་སྟེང་དུ་འཕོངས། །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །བཟློག་གོ་བསྒྱུར་རོ་ས་མ་ཡཱ། །བྷྱོ་བྷྱོ་ཐུན་ཐུན་དགྲ་ལ་བྷྱོ། རྦད་རྦད་ཐུན་ཐུན་དགྲ་ལ་རྦད། །ཅེས་ཡེ་ཤེས་པ་ནམ་མཁའ་ལ་བཏེག་ནས་བཞུགས། འཇིག་རྟེན་པ་འོད་དུ་ཞུ་ནས་གཏོར་མ་དུག་གི་སྡོང་པོ། མཚོན་ཆ་མེའི་ཕུང་པོས་དགྲ་བགེགས་རྩི་སྐྱ་ལ་ཐོག་ཕོག་པ་ལྟར་དམིགས་མེད་དུ་གྱུར་པར་བསམ། དེ་ནས་བརྟན་མ་སྐྱོང་ལ་བག་ཡོད་ཁས་བླངས་དགོངས་པ་ལྟར་ལ། བྷྱོ ཡུལ་གྱི་མིང་ནི་གདོང་དམར་བོད། །དཀར་ཕྱོགས་སྐྱོང་བའི་བརྟན་མ་ནི། །རྡོ་རྗེ་ཀུན་བཟང་ཀུན་གྲགས་མ། །ཡ་མ་སྐྱོང་དང་བགེགས་ཀྱི་གཙོ། །སྤྱན་གཅིག་ཀླུ་མོ་དཔལ་གྱི་ཡུམ། །གྲགས་མོ་རྒྱལ་དང་བོད་ཁམས་སྐྱོང་། །སྨན་གཅིག་གཟུགས་ལེགས་དབྱར་མོ་བསིལ། །རེ་རེའང་འཁོར་ནི་སྨན་བཙུན་འབུམ། །ལྷབ་ལྷུབ་སིལ་སྙན་སྒྲ་དང་བཅས། །སྔོན་ཚེ་རྒྱལ་བའི་བཀའ་ལུང་བཞིན། །གཏོར་མ་བཤལ་ཆུ་འདི་བཞེས་ལ། །བཀའ་བརྒྱུད་བསྟན་པ་ཡུན་དུ་གནས། །བོད་ཁམས་བདེ་ལ་འགོད་པའི་ཕྱིར། །རྣལ་འབྱོར་བཅོལ་
བའི་ཕྲིན་ལས་མཛོད། །དེ་ནས་གཏོར་མ་ཕུལ་ནས་གཏོར་གཞུང་ཐམས་ཅད་ཁ་མར་བསྐོར། འོག་ཏུ་བྱེད་མ་དམ་སྲི་ཚུད་ནས་རི་རབ་ཀྱིས་མནན། སྟེང་དུ་ཁྲོ་བོ་ཁྲོ་མོའི་བྲོ་འཁྲབ་ལ་མི་ཐར་བར་བསམ་ལ། ཧཱུྃ་གཏེར་བུ་ཁྲོས་ནག་སེང་གེའི་གདོང་། །ཕྱག་མཚན་གྲི་ཁུག་ཐོད་ཁྲག་དང་། །ཁ་ཊཾ་ལྕགས་ཀྱུའི་བརྒྱན་པ་རྣམས། །ལྕགས་རལ་གསེབ་ནས་ཕུར་ཆར་འབེབས། །རང་འདྲ་མཁའ་འགྲོ་བརྒྱ་དང་བཅས། །ཀུན་ཀྱང་བྲོ་རྡུང་ཁྲིགས་སེ་ཁྲིག །དམ་སྲི་ཐལ་བ་རྡུལ་དུ་རློགས། །རི་རབ་གླིང་བཞིའི་འོག་ཏུ་མནན། །འགྱུར་བ་མེད་པའི་རྒྱས་གདབ་བོ། །ཕཊ་ཡརམསརདཏ༔མ༔རམས༔ཀཨ༔ ཤ་ཏྲི་ཛནི་ཏྲི་ཁུག །དགྲ་བགེགས་འབྱུང་པོའི་སེམས་དང་བག་ཆགས་ངན་པ་མཱ་ར་ཡ་ནན། ཛཾ་བྷ་ཡ་ནན། ཙཱ་བྷ་ཡ་ནན། ཞེས་ཕྲིན་འགེབ་ལྟར་བྱའོ། །དང་པོ་གཏོར་གཞུང་ཁ་ཡར་ཟེད་ལ་མེ་ཏོག་འཐོར། དེ་ནས་གཏང་རག་གི་མཆོད་བསྟོད་ནི། ཧཱུྃ་བྷྱོ༔ དངོས་སུ་འབྱོར་དང་ཡིད་ལས་བྱུང་བ་ཡི། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོའི་བྱེ་བྲག་ཅི་མཆིས་པ། །ནམ་མཁའ་གང་བ་སེམས་ཀྱིས་དངོས་སྤྲུལ་ནས། །སེང་གདོང་ཌཱ་ཀི་འཁོར་དང་བཅས་ལ་འབུལ། །མཁའ་འགྲོ་
འཁོར་བཅས་ཐུགས་དམ་བསྐང་གྱུར་ཅིག །ༀ་བཛྲ་ཌཱཀི་སེང་ཧ་མུ་ཁ་ས་པཱ་རི་ཝཱ་ར་ཨརྒྷཾ་ཨཱཧཱུྃ། སོགས་ནས། ཤཔྟ་ཨཱཎཱཧཱུཾ། བར་དང་། སརྦ་པཉྩ་ཨ་མྲྀ་ཏ་རཀྟ་བྷ་ལིང་ཏ་ཁ་རཾ་ཁཱ་ཧི། བསྟོད་པ་ནི། ཧཱུཾ་བྷྱོ༔ རྒྱལ་བ་ཀུན་གྱི་ཐུགས་ཀྱི་རྡོ་རྗེ་དངོས། །བསྟན་དང་གཡོ་བའི་ཁྱབ་བདག་བདེ་ཆེན་སྐུ། །ནམ་མཁའི་མདོག་ཅན་ཌཀི་བྱེ་བའི་གཙོ། །དཔལ་ལྡན་འཁོར་དང་བཅས་ལ་ཕྱག་འཚལ་སྟོད། །བསྟོད་པ་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། །ཡི་གེ་བརྒྱ་པ་བཟློས་ལ་བཟོད་གསོལ་ནི། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་རྩལ་བ། །དེ་ཀུན་མགོན་པོའི་བཟོད་པར་གསོལ། །དེ་ནས་དངོས་གྲུབ་ལེན་པ་ལ་གཙོ་གཏོར་དང་སྨན་རཀ་ཕྱག་ཏུ་ཐོགས་ནས། བྷྱོ༔ རང་བཞིན་གདོད་ནས་རྣམ་པར་དག །འཆི་མེད་རང་བྱུང་བདུད་རྩིའི་མཆོད། །གསང་བ་ཡོངས་རྫོགས་དངོས་གྲུབ་ཞུ། །ཁམས་གསུམ་དབང་བསྡུས་སྲིད་གསུམ་འགྲན་ཟླ་བྲལ། །གནས་གསུམ་ཌཱཀི་ཚོགས་ཀྱིས་དངོས་གྲུབ་སྩོལ། །
གཞན་གྱིས་མི་ཐུབ་མཐུ་རྩལ་དྲག་པོ་ནི། །དྲག་མོ་སེང་གདོང་ལྷ་མོའི་དངོས་གྲུབ་སྩོལ། །མདོ་སྔགས་རྒྱུད་འཛིན་གཞན་དོན་ལྷུན་གྲུབ་པའི། །ཚེ་ཡི་ལྷ་མོའི་དངོས་གྲུབ་བསྩལ་དུ་གསོལ། །ཨོཾ་ཨཱཧཱུྃཀཱ་ཡ་སིདྡྷི་ཧཱུཾ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུཾ། སརྦ་སིདྡྷི་ཧོ། དེ་ནས་བདུད་རྩིར་ལོངས་སྤྱོད་གཏོར་མ་རང་གི་གནས་བཞིར་འཇོག་དངོས་གྲུབ་ཐམས་ཅད་ཐོབ་སྙམ་པའི་མོས་གུས་བྱའོ། །དང་པོ་བཀྲ་ཤིས་བྱ་བ་ནི། ཉི་ཤུ་རྩ་བཞིའི་གནས་མཆོག་དང་། །ཁྱད་པར་ཨུ་རྒྱན་དབེན་གནས་སུ། །དམ་ཚིག་ཅན་རྣམས་སྐྱོང་མཛད་མ། །མཁའ་འགྲོ་མ་རྣམས་བཀྲ་ཤིས་ཤོག །དེ་ནས་བདག་བསྐྱེད་མདུན་བསྐྱེད་རྫོགས་རིམ་བསྡུས་པ་ནི། ཨོཾ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཀྲ་ཤིས་སྨོན་ལམ་གྱིས་རྒྱས་འདེབས་ཤིང་དགེ་བ་སེམས་ཅན་དོན་དུ་བསྔོ། ཞེས་ལས་ཀྱི་རིམ་པ་མ་རྒྱུད་ཌཀིའི་ཚོགས་ལས་འདི། མདོ་སྔགས་ཟུང་འཇུག་འདི་ནི། །བ་རི་ལུགས་ཀྱི་ལས་ཚོགས་སངས་རྒྱས་གླིང་པའི་གཏེར་ཁ་མཁའ་འགྲོ་ལྤགས་ཀྱི་སྨེ་བ་ཅན་གྱི་ལུགས་དང་། བླ་མ་རྒྱལ་ཚབ་པའི་ལུགས་འཇམ་དབྱངས་པདྨ་གར་དབང་ལུགས་ཀྱི་སྙན་བརྒྱུད་དང་། མངའ་བདག་མྱང་གི་གཏེར་ཁ་སོགས་
ཐམས་ཅད་ཀྱི་དོན་གཅིག་ཏུ་དྲིལ་བ་བྱས་ནས་ཕྱོགས་གཅིག་ཏུ་སབ་ཕྲི་གང་དགོས་སོགས་ནི་གོང་མ་རྣམས་ཀྱིས་མཛད་སྲོལ་ལྟར་དུ། མཁའ་འགྲོའི་བཀའ་གནང་ལ་བརྟེན་ནས། དོན་གསལ་ཁྱེར་བདེ་བ་ལག་ལེན་འགྲིགས་ཆགས་སུ་བཀོད་པ་བདག་འདྲ་རྨོངས་པ་རྣམས་ལ་ཕན་སྙམ་ནས་བཀོད། འདི་བྲིས་འགལ་འཁྲུལ་ཉེས་སྐྱོན་ཅི་མཆིས་པ་ཐམས་ཅད་བླ་མ་དང་ཡེ་ཤེས་མཁའ་འགྲོ་དབྱེར་མ་མཆིས་ཌཱཀིའི་ཚོགས་ཀྱི་བདག་མོ་འཁོར་དང་བཅས་པ་ཆོས་བདག་སྲུང་མའི་ལྷ་ཚོགས་འཁོར་དང་བཅས་པ་ལ་བཤགས་སོ། །དགེ་བས་འདི་ཉིད་ཉམས་སུ་ལེན་མི་དང་། །བདག་དང་བུ་སློབ་དམ་ཚིག་ལྡན་པ་དང་། །དེ་ལ་མཐུན་རྐྱེན་བསྒྲུབ་པའི་སྦྱིན་བདག་རྣམས། །རྐྱེན་ངན་བར་ཆད་དབང་དུ་མི་འགྲོ་ཞིང་། །སུན་མ་བྱད་ཁ་ཕུར་ཁས་མི་ཚུགས་ཤིག །ཅི་འདོད་འདོད་འཇོ་བ་ལས་བྱུང་བ་བཞིན། །མཆོག་ཐུན་དངོས་གྲུབ་ཚེ་འདིར་མྱུར་ཐོབ་ནས། །འབྱུང་བཞི་བསྡུས་ནས་ཚེ་འཕོས་གྱུར་པའི་ཚེ། །ནུབ་ཕྱོགས་ཞིང་ཁམས་བདེ་ཆེན་ཕོ་བྲང་ནས། །གནས་གསུམ་མཁའ་འགྲོའི་ཚོགས་ཀྱིས་བསུ་བར་ཤོག །ཞིང་དེར་ཆོས་འཁོར་བསྐོར་བསྐོར་ཞིང་བཞུགས་གྱུར་ཅིག །དེ་སྐད་སྨྲ་བ་སྔགས་འཆངས་ཨ་རཱ་པ། །རྣལ་འབྱོར་རིག་པ་འཛིན་དེས་བྲིས་པའོ། །མངྒ་ལཾ། ཤུ་བྷཾ། །
ཤོག་སྟོང་།