བཀའ་གཏེར་ཁྲོས་མ་ནག་མོའི་གཏོར་ཟློག་སྐབས་སུ་སྲི་མནན་བྱུང་གཏེར་ཁ་ཚར་བཏགས་པ་ཉེར་མཁོའི་གཅོད་ལུགས།
བཀའ་གཏེར་ཁྲོས་མ་ནག་མོའི་གཏོར་ཟློག་སྐབས་སུ་སྲི་མནན་བྱུང་གཏེར་ཁ་ཚར་བཏགས་པ་ཉེར་མཁོའི་གཅོད་ལུགས་བཞུགས་སོ།།
མ་གཅིག་ཁྲོས་མ་ནག་མོ་ལ་ཕྱག་འཚལ་ལོ། །འདི་ཉིད་སྒོ་ནས་སྲི་མནན་བྱེད་འདོད་ན། །ཤོག་བུ་གཙང་མར་ལིངྒ་སྤྱི་འཚམས་བྲི། །རྒྱས་པར་བྲི་ན་འདུལ་གཞུང་གསུངས་ལྟར་རོ། །ཡན་ལག་འབྲུ་བཞི་ཕྱི་རོལ་ཛཿཁྲམ་བསྐོར། །སྙིང་གར་ཛཡིག་ཁ་སྤྲོད་གཉིས་ཀྱི་བར། །ནི་ཏྲི་ཁུག་གསུམ་བརྩེགས་མར་བྲི་བར་བྱ། །ལྟོ་བའི་ནང་ལ་སྒྲུབ་ལ་བར་གཅོད་པའི། །དམ་སྲི་སྒབ་འདྲེ་གཤེད་གོད་འདྲེ་སོགས་སྲི། །སྲི་རིགས་ཀུན་གྱི་མིང་གཞུག་ཁུག་ནན་བྲི། །དྲི་མ་སོང་དོགས་ཡོད་ན་མེ་རླུང་འཕྱུར། །དེ་ལྟར་བྲི་བ་འབྲིང་པོའི་ལུགས་ཡིན་ནོ། །བསྡུ་ན་ནཱཾ་བྲི་ཟན་ལིང་ཙམ་ལ་རུང་། །མདུན་དུ་བཞག་ལ་ཆབ་བྲན་འདི་སྐད་བརྗོད། །ཧཱུྃ་བྷྱོ མ་གཡེལ་མ་གཡེལ་རིག་འཛིན་ཚོགས། །མ་གཡེལ་མ་
གཡེལ་ཡི་དམ་ཚོགས། །མ་གཡེལ་མ་གཡེལ་མཁའ་འགྲོའི་ཚོགས། །མ་གཡེལ་མ་གཡེལ་དམ་ཅན་ཚོགས། །ཐམས་ཅད་ཐུགས་དམ་གནད་ནས་བསྐུལ། །རང་རང་གནས་ནས་སྐུ་བཞེངས་འཚལ། །གསེར་སྐྱེམས་མཆོད་པ་འདི་བཞེས་ལ། །དེ་རིང་བདག་གི་དཔུང་རོགས་མཛོད། །སྲི་ངན་འགུགས་པའི་ལས་མཛོད་ཅིག །ཐུགས་དམ་གཉན་པོའི་དུས་ལ་བབ། །མཚན་མོ་སྒྲ་སྒྲོག་གཅེར་བུའི་ལུས། །གར་མཛད་དགྱེས་པའི་གད་རྒྱངས་ཅན། །དབང་སྡུད་མཁའ་འགྲོའི་སྐུ་ལ་ཕྱག་འཚལ་བསྟོད། །བསྐུལ་ལོ་མ་མོ་མཁའ་འགྲོའི་ཚོགས། །རྦད་དོ་ཤ་
ཟ་ཌཀྐི་མ། །བཅོལ་བའི་ཕྲིན་ལས་འགྲུབ་པར་མཛོད། །གསེར་སྐྱེམས་མཆོད་ནས་ཁྲོས་མའི་ཐུགས་ཀ་ནས་ལས་བྱེད་ཀྱི་ཌཱཀྐི་འཕྲོ་བ་ནི། ཧཱུཾ་བྷྱོ༔ མ་ཁྲག་འཐུང་ཁྲོས་མའི་ཐུགས་ཀ་ནས། །ལས་ཀྱི་མཁའ་འགྲོ་བྱེ་བ་འབུམ། །ཀུན་ཀྱང་སྲོག་དང་དབུགས་ཀྱི་བདག །སྙིང་ནས་ཟུངས་ཤིག་ལྕགས་ཀྱུ་མ། །མགུལ་ནས་ཆིངས་ཤིག་ཞགས་པ་མ། །ཡན་ལག་སྡོམས་ཤིག་ལྕགས་སྒྲོག་མ། །མྱོས་པར་གྱིས་ཤིག་དྲིལ་བུ་མ། །ལྷ་དང་ཕྲོལ་ཅིག་ཕྲ་མེན་མ། །སྐད་ཅིག་ཉིད་ལ་གཟུགས་ལ་ཕོབ། །ན་མོ༔ སངས་རྒྱས་ཆོས་དང་དགེ་འདུན་གསུམ། །བླ་མ་ཡི་དམ་མཁའ་འགྲོ་དང་། །ལབ་སྒྲོན་བདེ་གཤེགས་འདུས་པའི་སྐུ། །མ་གཅིག་ཁྲོས་ནག་ཊཱཀྐིའི་ཚོགས། །འཁོར་དང་བཅས་པའི་བདེན་པའི་མཐུས། །གནོད་ཅིང་འཚེ་བའི་དགྲ་དང་བགེགས། །བསམ་སྦྱོར་ངན་པའི་བྱད་མ་དང་། །དམ་སྲི་སྒབ་འདྲེ་ཕོ་མོའི་སྲི། །ཆུང་སྲི་གོད་སྲི་དགྲ་རྐུན་སྲི། །རང་དབང་མེད་པར་འདིར་ཁུག་ཅིག་ནི་ཏྲ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ དགུ་གསུམ་བདུན་སོགས་གལ་དང་བསྟུན། དེ་ནས་སྲི་ཤ་སྲི་ཆང་ཆངས་བུ་ཡོས་ཚིག་ཚོན་སྐུད་སྣ་ལྔ་ཡས་རྫས་ཐམས་ཅད་དམར་གཏོར། ལྕི་བ་སེར་སྐམ་རའི་ཤ་ཚིལ་མི་ཡི་
རྐང་། རྟ་རྐང་བསྲེགས་པའི་གསུང་དུད་བཅས་སྐྱེར་པའི་ཚེར་ཕུར་རཀྟ་ཡུངས་དཀར་ནག །གུ་གུལ་རེ་བ་ནག་པོ་སོ་སོའི་སྲི་ཐོད་གཡག་རུ་སོགས་གང་རྙེད་ཟན་ལིང་བཅས་འགུགས་གཞུག་ནི། ན་མོ། རྩ་བརྒྱུད་བླ་མ་དཀོན་མཆོག་གསུམ། །ཁྲོས་མའི་དཀྱིལ་འཁོར་ལྷ་ཚོགས་དང་། །མཁའ་འགྲོའི་དཀྱིལ་འཁོར་སྲུང་མ་བཅས། །མ་ལུས་བཀའ་ཡི་བདེན་པ་དང་། །ཆོས་ཉིད་རྣམ་དག་རྒྱུ་འབྲས་ཟབ། །ཕྱག་རྒྱ་ལྷ་སྔགས་ཏིང་འཛིན་མཐུས། །བསྟན་འགྲོ་གནོད་བྱེད་དགྲ་བོ་དང་། །དམ་སྲི་འབྱུང་པོ་གདོན་གྱི་རིགས། །ཁྱད་པར་བདུད་ཕོ་ཐོད་ཕྲེང་དང་། །མ་བདུད་གར་དབང་གཉིས་ཚོགས་བུ། །རྒྱལ་བློན་ཡུལ་ཁམས་ཕུང་བའི་སྲི། །དམ་སྲི་དགྲ་སྲི་རྐུན་སྲི་དང་། །རྒན་སྲི་ཆུང་སྲི་དུར་གྱི་སྲི། །གཡལ་མོའི་གོད་སྲི་སྟོང་པའི་སྲི། །ཆེ་ཆུང་ཞང་ཚ་ཆེ་ཁོལ་སྲི། །མ་བུ་ཕུ་ནུ་ལྕམ་དབལ་སྲི། །ཡོད་མེད་སྲི་སོགས་སྲི་ངན་གྱི། །བླ་སྲོག་རྣམ་ཤེས་རྟེན་འདི་ལ། །འགུགས་ཆིངས་སྡོམ་མྱོས་ལྷ་དང་དབྱེ། །དབྱེར་མེད་ངོ་བོ་གཅིག་ཏུ་གྱུར། ཕཊ ཕཊཕཊ༔ མནན་པའི་གཟེར་ཁ་ལྟ། ཆེ་སྲི་ཆུང་སྲི་དགྲ་སྲི་གོད་སྲི་ཕུང་སྲི་དུར་སྲི་མེ་སྲི་ཆུ་སྲི་མཚོན་སྲི་གྱོད་སྲི་ལ་སོགས་པའི་སྲི་
ཡི་རིགས་ཐམས་ཅད་སྐད་ཅིག་ཉིད་ལ་ཛཿ ཅི་མང་བཟླས་རྗེས་སྐབས་འདིར་མཛེས་རྒྱན་བྱུང་བ་རིན་ཆེན་ཀུན་འདུས་ལྟར། སྲིན་མོ་དགའ་ཡིན་དགའ་ཡིན་ཤོག །སྲིན་མོ་རྒོད་ཀྱིན་རྒོད་ཀྱིན་ཤོག །ལྕམ་མོ་འདུར་གྱིན་འདུར་གྱིན་ཤོག །དོ་ནུབ་ཙམ་ལས་དགའ་བ་མེད་དོ་ཤོག །དོ་ནུབ་ཙམ་ལས་གཞའ་བ་མེད་དོ་ཤོག །དགའ་བོ་གཞའ་བོ་ཡོད་དོ་ཤོག །བྲོ་རྡུང་གླུ་ལེན་བྱེད་དུ་ཤོག །རི་རབ་ཟས་སུ་ཟ་རུ་ཤོག །རྒྱ་མཚོ་སྐོམ་དུ་འཐུང་དུ་ཤོག །འཇའ་ཚོན་ལུས་ལ་གྱོན་དུ་ཤོག །འཕྲུལ་གྱི་མེ་ལོང་བལྟ་རུ་ཤོག །དུང་ཁང་ནང་དུ་འཛུལ་ལ་ཤོག །གཞལ་ཡས་ཁང་ལ་བལྟ་རུ་ཤོག །སྤོས་ཀྱི་དུད་པ་སྣོམ་དུ་ཤོག །གསུར་གྱི་དུད་པ་སྣོམ་དུ་ཤོག །སྲི་ཤ་ཁམ་གཅིག་ཟ་རུ་ཤོག །སྲི་ཟན་ཆང་གཅིག་ཟ་རུ་ཤོག །སྲི་ཆང་ཧུབ་གཅིག་འཐུང་དུ་ཤོག །སྲི་ཡོས་སུན་གཅིག་ཟ་རུ་ཤོག །སྲི་མཱ་ར་ཡ་མཱ་ར་ཡ་ཤོག །སརྦ་ཛ་ཏྲི་ནི་ཛ་ཤོག །སྲིན་མོ་གུང་གུང་ཤོག །ཀ་ཏྲི་ནི་ཛ་ཤོག་ཤན་ཏྲི་ནི་ཛ་ཤོག །ན་ཏྲི་ནི་ཛ་ཤོག །སུ་ཏྲི་ནི་ཛ་ཤོག །དུ་ཏྲི་ནི་ཛ་ཤོག །སྲིན་མོ་གུང་གུང་ཤོག །སྲི་མཱ་ར་ཡ་ཤོག །ཨོཾ་བཛྲ་ཝ་ར་ཧི་ཀྲོ་ཏི་ཀཱ་ལི་ཧ་རི་ནི་ས། །
དཔེར་ན་དགྲ་སྲི་ལྟ་བུར་མཚོན་ན། དགྲ་སྲི་སོགས་འགྲེས། ཛཿཧཱུྃ་བཾ་ཧོཿ སྲི་ངན་གྱི་བླ་ཤ་རེ་མ་ཏིས་འགྲིམས་འགྲིམས་ཤ་མ་དུ་ཏྲི་ཐུམ་ཐུམ་མྱོག་མྱོག་ཡེད་ཡེད་ཤ་མ་དུ་ཏྲི་ཁུག་ཁུག་་ལིང་མྱོག་ལིང་ཤག་ལིང་ཐུམ་ཙ་མུན་ཛཿཧཱུྃ་བཾ་ཧོཿ ཞེས་བླ་འགུགས་སྔགས་བྱས། དེ་ལྟར་འགུག་གཞུག་དང་བླ་འགུགས་སྔགས་སྤེལ་ལ། གསུམ་བདུན་ཙམ་བྱས་ལ། རྩ་བར་སྲི་རྣམས་ཞུམ་སྟེ་བྲེད་ནས་སློབ་དཔོན་ལ་ཕྱག་འཚལ་བར་བསམ་ལ། ཕཊ སེམས་དཔའ་སངས་རྒྱས་ཀུན་གྱི་གཙོ། །བདེ་ཆེན་འདུ་འབྲལ་མེད་པའི་ཐུགས། །དཀྱིལ་འཁོར་ལྷ་དང་སློབ་དཔོན་ལ། །ལུས་ངག་ཡིད་གསུམ་ཕྱག་བགྱིའོ། །དེའི་ལན་དུ། ཕུང་སྲི་བྱ་བའི་སྡིག་ཆེན་ཁྱོད། །ཚེ་རབས་སྔ་མའི་ལན་ཆགས་ཀྱིས། །དུས་འདི་ཉིད་ལ་སྲི་རྣམས་བྱུང་། །རྣལ་འབྱོར་ང་ཡི་གཤེད་མར་གྱུར། །ཁྱོད་ནི་བསྒྲལ་བའི་ཞིང་ཡིན་གྱི། །གསང་བའི་གནས་འདིར་འདུས་ཚོགས་ཤིག །ཏྲི་བཛྲ་ཨཾ་ཀུ་ཤ་ཛ་ཛཿ གནོད་པར་བྱེད་པའི་ཕུང་སྲི་འདི། །ཚེ་རབས་སྔོན་མའི་ལན་ཆགས་ཀྱིས། །དུས་འདི་ཉིད་དུ་སྲི་རྣམས་བྱུང་། །སངས་རྒྱས་བསྟན་པ་འདི་ཡིས་བཤིགས། །དཀོན་མཆོག་དབུ་འཕང་ཁྱོད་ཀྱིས་སྨད། །ཡོན་མཆོད་
རྣམས་ལ་གནོད་པའི་བདུད། །སྡང་བའི་དགྲ་དང་གནོད་པའི་བགེགས། །སྐད་ཅིག་ཙམ་གྱིས་འདུ་བར་བྱ། །གྲུ་གསུམ་འབར་བ་འདི་གསོལ་ལ། །ད་ལྟ་ཉིད་དུ་མཆིས་པར་གྱུར། །ནོར་གྱིས་དོགས་ནས་མིང་རུས་བྲིས། །བརླག་གིས་དོགས་ནས་ཐོད་པར་བཅུག །ཁྱོད་ཀྱི་རྫུ་འཕྲུལ་བརླག་བྱའི་ཕྱིར། །ད་ལྟ་ཉིད་དུ་འདིར་སོང་ཞིག །ཡང་འགུགས་གཞུག་སྔ་མ་ལྟར་ལས། ཡོད་མེད་སྲི་སོགས་སྲི་ངན་དང་། །ཕུང་སྲི་བྱ་བའི་སྡིག་ཅན་ཁྱོད། །སྙིང་ནས་ཁུག་ཅིག་བཛྲ་ཨཾ་ཀུ་ཤ་ཛ། །ཕུང་སྲི་བྱ་བའི་སྡིག་ཅན་ཁྱོད། །སྐེ་ནས་ཆིངས་ཤིག་བཛྲ་པཱ་ཤ་ཧཱུྃ། །ཕུང་སྲི་བྱ་བའི་སྡིག་ཅན་ཁྱོད། །ཡན་ལག་སྡོམས་ཤིག་བཛྲ་སྤོ་ཊ་པཾ། །ཕུང་སྲི་བྱ་བའི་སྡིག་ཅན་ཁྱོད། །མྱོས་པར་གྱིས་ཤིག་བཛྲ་གནྡྷེ་ཧོ་གུ་གུལ་གྱིས་བདུག་ཅིང་ཐུན་རྫས་རྣམས་ཀྱིས་བྲུབ་ཁུང་དུ་བསྟན་ཚུལ་བྱ་སྟེ། ཕཊ ཕཊཛཿ གུ་གུལ་སྦྱར་བའི་སྲི་བདུག་པས། །གནོད་པ་སྲི་ཡི་རྫུ་འཕྲུལ་ཉམས་པར་ཤོག །ཆང་དང་དུག་ཁྲག་སྣ་ཚོགས་པ། །དྲག་པོ་དམར་གཏོར་མཚོན་དབལ་བརྡར། །ལྕགས་ཟངས་མཁར་རྒང་སྐྱེ་ཚེ་དང་། །དཀར་ནག་ཡུངས་ཐུན་གྱིས་བྲབ་པས། །གནོད་པའི་སྲི་ཡི་རྫུ་འཕྲུལ་ཉམས་
པར་ཤོག །ཨོཾ་སརྦ་ཛཿཏྲི་ཧཱུྃ་ཛཿ ན་ཏྲི་སུ་ཏྲི་ནི་ཧཱུྃ་ཛཿ ཀ་ཏྲི་ནི་ན་ཏྲི་ནི་ཀྲུམ་ཀྲུམ་ཛཿཛཿཛཿཧཱུྃ། བཟླས་པ་འདི་ནན་ཏན་བྱའོ། །སྲི་ཆུང་འགུགས་འདྲེན་བྱ། སྡོང་གྲོགས་དང་བྲལ་བ་ལ་སོགས་བྱ་ཞིང་བཅུད་དབབ་བོ། །ཞེས་གསུངས། དགྲ་སྲི་ཁེར་རྐྱང་ཡིན་ན་ཁུག་རྟགས་བྱུང་ནས་སྙིང་ཉང་ལྟར་ལྷ་དབྱེ་ཚུལ་བཞིན་བྱ་ཞིང་། སྲི་གཞན་ལ་གུ་གུལ་གྱིས་བདུག་ལ་རིན་ཆེན་ཀུན་འདུས་ལྟར། ཧཱུྃ། དམ་ཉམས་དགའ་བྲལ་འགུག་པའི་ཕྱིར། །འགོ་བའི་ལྷ་དང་བྲལ་བའི་ཕྱིར། །གུ་གུལ་སྦྱར་བའི་དུད་པ་ཡིས། །དམ་སྲི་འབྱུང་པོའི་སྣར་བདུག་པས། །གནོད་པར་བྱེད་པའི་འབྱུང་པོ་དང་། །སྲི་ཅན་མཐུ་དང་རྫུ་འཕྲུལ་འཕྲོག །ཕཊ༔ཕཊ༔ ཅེས་བརྗོད་པ་ཙམ་གྱིས་འཐུས་པར་སེམས། འགུགས་སྔགས་བཟླས་དམིགས་ལྷན་ཐབས་སུ་བལྟ། སྔགས་འདི་འདྲ་མིན་མང་ཡང་འདི་ཕུར་པའི་ལུགས་ལྟར་བསྐོར་བ་ཡིན། མནན་པའི་གཟེར་ཁ་ལྟར་ན། ཨོཾ་སརྦ་ཏྲི་ནི་ཧཱུྃ་ཛཿ སུ་ཏྲི་ནི་ཧཱུྃ་ཛཿ ཤན་ཏཱི་ནི་ཧཱུྃ་ཛཿ ཀ་ཏྲི་ནི་ཧཱུྃ་ཛཿ ན་ཏྲི་ནི་ཧཱུྃ་ཛཿ གྲུམ་གྲུམ་གྲུམ་ཛ་ཛ་ཛཿ ཞེས་ཅུང་ཟད་བཟླས་ན་ལེགས། དེ་ནས་གསལ་བ་གསུམ་ལྡན་གྱི་ཏིང་ངེ་འཛིན་ངང་ནས་བསྒྲལ་བ་ནི། ངར་བཏགས་པའི་གྲི་གུག་ཐོགས་ནས་འདི་སྐད་དོ། ཧཱུྃ་བྷྱོ༔ བདེ་གཤེགས་ཀུན་འདུས་མཁའ་འགྲོའི་རྒྱལ། །ཁམས་
གསུམ་ཟ་བྱེད་ཕག་གི་གདོང་། །བདུད་ཀྱི་བུ་མོ་དྲག་ཤུལ་ཅན། །གསོད་ལ་དགའ་བའི་ཤན་པ་མོ། །སྲོག་ལ་རྔམས་པའི་ཤ་ཟ་མོ། །ཕྱག་ན་སྲོག་གཅོད་གྲི་གུག་བོསྣམས། །ཡར་རྩེ་རྡོ་རྗེ་རྩེ་ལྔ་ནི། །ཡེ་ཤེས་ལྔ་ཡི་དབང་རྟགས་ཡིན། །མར་གྱི་ཟངས་གྲི་འབར་བ་ནི། །དུག་ལྔ་འབྲེག་པའི་རྒྱ་ཟོར་ཡིན། །འཆང་བཟུང་ཆུ་སྲིན་རྒྱ་མདུད་ནི། །འཁོར་འདས་གཅིག་ཏུ་འདུས་པ་ཡིན། །བཏབ་ན་ལྷ་ཡང་རླག་པར་བྱེད། །དགྲ་དང་བགེགས་ལ་སྨོས་ཅི་དགོས། །ཡེ་ཤེས་ཌཱཀྐིའི་བཀའ་བྱུང་གིས། །ལས་མཁན་མཁའ་འགྲོས་ལས་མཛོད་ཅིག །སརྦ་ཌཱཀྐི་ནི་དྲི་མཱ་ར་ཡ་ཕཊ༔ ཅེས་གཏུབ་དེ་ནས་ཕུར་བུ་ཐལ་མོ་སྦྱར་བར་འདྲིལ་ཞིང་། ཧཱུྃ་བྷྱོ༔ གཅེར་བུ་ཁྲོས་ནག་ཕག་གི་གདོང་། །ཕྱག་གཉིས་ཉི་ཟླ་ཁ་སྦྱོར་བར་། །ཕུར་བུ་འདྲིལ་བས་དགྲ་བགེགས་འདུལ། །སྐུ་ལུས་སྤྱན་གྱིས་ཁེངས་པ་ལ། །དམར་ནག་ཁྲག་གི་མཆི་མ་ཟག །ལྕགས་རལ་སྤྲུགས་པའི་སྐྲ་གསེབ་ནས། །ཕུར་བུ་ཐོག་སེར་ཆར་དུ་འབེབས། །སྐུ་སྨད་རྡོ་རྗེའི་ཕུར་པ་ནི། །ཟུར་གསུམ་རྣོ་བའི་ངར་ལྡན་མ། །བརྒྱན་པའི་གཏོར་མ་འདི་བཞེས་ལ། །གནོད་བྱེད་དགྲ་བགེགས་རྡུལ་དུ་
རློགས། །བཅོལ་བའི་ཕྲིན་ལས་འགྲུབ་པར་མཛོད། །ཨོཾ་བཛྲ་བྷ་ར་ཧི་ཀྲོ་ཏི་ཀཱ་ལི་ཧ་རི་ནི་ས་བཛྲ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཕཊ༔ ཨ་ཧ་རི་ནི་ས་ཤ་ཏྲི་ཛནི་ཏྲི་ཁུག་དགྲ་བགེགས་འབྱུང་པོ་དམ་སྲི་སེམས་དང་བག་ཆགས་ངན་པ་ཐམས་ཅད་མཱ་ར་ཡ་ཕཊ༔ འོག་ཕྱོགས་བསད་ཁང་གྲུ་གསུམ་མེ་འབར་ནང་། །མཁའ་འགྲོས་བགེགས་བཀུག་མཚོན་ཆའི་ཆར་པ་ཕབ། །རྣམ་ཤེས་ནག་ཐུམ་བསད་ཅིང་ལུས་སྲོག་གཏུབས། །ཡ་མ་དུ་ཏྲི་ཧ་རི་ནི་ས་སོད། ཕཊ ཕཊཕཊ༔ དེ་ནས་ཞལ་བསྟབ་ནི། ཧཱུྃ་བྷྱོ༔ སྣང་སྲིད་བདག་མོ་ཊྛཀིའི་ཚོགས། །ཟ་བྱེད་ཆེན་མོ་ཕག་གི་གདོང་། །གནམ་ས་ཙམ་གྱི་ཞལ་ཕྱེས་ལ། །གངས་རི་ཙམ་གྱི་མཆེ་བ་གཙིགས། །གློག་དམར་ཙམ་གྱི་ལྗགས་བརྐྱངས་ལ། །སྟོང་གསུམ་ཙམ་གྱི་མིད་པ་རུ། །དགྲ་བགེགས་ཤ་ཁྲག་བླ་ཚེ་སྲོག །ལྷག་མ་མེད་པར་ཞལ་ཏུ་བསྟབ། །རིགས་བཞི་མཁའ་འགྲོའི་ཞལ་དུ་བསྟབ། །མཚམས་ཀྱི་ཌཱཀྐིའི་ཞལ་དུ་བསྟབ་། །སྒོ་བཞི་ཌཱཀིའི་ཞལ་དུ་བསྟབ། །དུར་ཁྲོད་ཌཱཀིའི་ཞལ་དུ་བསྟབ། །ཌཀི་བྱེ་བའི་ཞལ་དུ་བསྟབ། །མ་མོ་བྱེ་བའི་ཞལ་དུ་བསྟབ། །སྤྲུལ་པ་ཡང་སྤྲུལ་ཞལ་དུ་
བསྟབ། །ཤ་ལ་ཆོས་ཚེ་དགྱེས་པར་རོལ། །ཁྲག་ལ་ལྡིབ་ལྗིབ་དགྱེས་པར་རོལ། །རུས་ལ་ཁྲུམ་ཁྲུམ་དགྱེས་པར་རོལ། །ཞལ་དུ་བསྟབ་བོ་ཁཱ་རཾ་ཁཱ་ཧི། །མགུལ་དུ་བསྟིམ་མོ་ཨཱ་ར་ལི། །ལྷག་མ་མེད་པར་བཞེས་སུ་གསོལ། །རྣམ་ཤེས་མཁའ་སྤྱོད་གནས་སུ་དྲོངས། །འཁྲུལ་མེད་མངོན་སངས་རྒྱས་པར་མཛོད། ཨ་ཕཊ་ཕཊ་ཕཊ༔ ཨོཾ་བཛྲ་ཝ་ར་ཧི་ཀྲོ་ཏི་ཀཱ་ལི་ཧ་རི་ནི་ས་ས་པཱ་རི་ཝཱ་ར་དགྲ་བགེགས་ཀྱི་མ་ཧཱ་ནཱཾ་ས་ལ་ཁཱ་ཧི། རཀྟ་ལ་ཁཱ་ཧི། ཙིཏྟ་ལ་ཁཱ་ཧི། ཀིང་ནི་རི་ཏི་ལ་ཁ་ཁ་ཁཱ་ཧི་ཁཱ་ཧི། དེ་ནས་མནན་ཆས་བྱས་རིགས་ཚོན་སྣ་ལྔ་ཡི་སྐུད་པས་བཅིངས། གླང་ཁུང་ལ་ཐིམ་བརྒྱབ། མདུན་དུ་ཨེ་ཡིག་ནང་དུ་བཞག་རོལ་མོ་དྲག་བརྡུང་བྱས་ལ་འདི་སྐད་དོ། ཕཊ༔ སྔོན་གྱི་ལས་ངན་བསགས་པ་ལས། །ད་ལྟ་ལུས་ངན་བླངས་པ་ཡིན། །སྲི་ཅན་འཁོར་དང་བཅས་པ་འདི། །རིགས་ནི་ཡི་དྭགས་རྫུ་འཕྲུལ་ཅན། །ལས་ནི་ངན་དགུ་གདུག་རྩུབ་བྱེད། །ཐལ་བའི་མདོག་ལ་སྐུ་ཟིངས་སྐྱེས། །བོང་ཆུང་མགོ་ཆེ་བཞིན་མི་སྡུག །ལྟས་ངན་རྟགས་སུ་ཡ་སོ་རྟོལ། །སྔོན་ནས་སེམས་ལ་གདུག་རྩུབ་འཆང་། །ལས་ངན་བྱས་པས་གྲུབ་པ་ཡིན། །ཁྱོད་ཕ་མའི་སྲི་ལ་བུ་ཡི་སྲི། །ཆེ་བའི་སྲི་
ལ་ཆུང་བའི་སྲི། །ནོར་གྱི་སྲི་ལ་ཕྱུགས་ཀྱི་སྲི། །རྒྱལ་པོའི་སྲི་ལ་བློན་པོའི་སྲི། །བསྟན་པ་གཉན་པོ་ཁྱོད་ཀྱིས་བཤིགས། །དཀོན་མཆོག་དབུ་འཕང་ཁྱོད་ཀྱིས་འཕྲོག །རྡོ་རྗེ་སློབ་དཔོན་སྐུ་དགྲ་ཁྱོད། །ཐེག་ཆེན་ཆོས་ལ་ཁྱོད་ཀྱིས་སྨད། །སེམས་ཅན་ཡོངས་ལ་གནོད་པ་བྱས། ་།རྣལ་འབྱོར་པ་ཡི་ཚེ་བདུད་བྱས། །བསྒྲལ་བའི་ཞིང་བཅུ་ཁྱོད་ལ་ཚང་། །བརྗོད་ཀྱིས་དོགས་ནས་ལིང་ག་བྱས། །ནོར་གྱིས་དོགས་ནས་མིང་རུས་བྲིས། །ཁྲོས་ཀྱིས་དོགས་ནས་ལྕགས་སྒྲོག་བརྒྱབ། །མཚོན་ཆ་རྣམས་ཀྱིས་མཐའ་ནས་བསྐོར། །ཌཱཀི་རྣམས་ཀྱིས་འགུགས་འདྲེན་བྱས། །རཀྟ་ཁོལ་མའི་རྦ་ལ་གཡེངས། །ཡུངས་ཀར་སྦྱོར་བའི་ཐུན་གྱིས་བྲབ། །གུ་གུལ་དུད་པ་སྦྱར་བས་བདུག ། སྐྱེར་པའི་ཚེར་མས་སྙིང་ལ་གཟེར། །རེ་བ་ནག་པོའི་ཐུམ་གྱིས་བཏུམ། །ཚོན་སྐུད་སྣ་ལྔས་རྒྱ་ཆིངས་བྱས། །སོ་སོའི་སྲི་ཐོད་ནང་དུ་བཅུག །ཀླད་ཁུང་ལ་ཆའི་རྒྱ་ཡིས་བཏབ། །སྲི་ཁུང་གྲུ་གསུམ་ནང་དུ་བྲུབ། །འཇིག་རྟེན་ཁམས་འདི་མ་ཞིག་པར། །ནམ་ཡང་ཐར་བའི་སྐལ་པ་མེད། །ནམ་ཞིག་བྱང་ཆུབ་སེམས་བསྐྱེད་ནས། །ཡི་གེ་ཧཱུྃ་དུ་
བརྫུས་ནས་ཤོག །ཕཊ༔ ཅེས་བརྗོད། དེ་ནས་མནན་པའི་སར་ཕྱིན་ལ་ཕྱོགས་དེའི་གཞི་བདག་ལ་གཏོར་མ་སྦྱིན། བསྡུ་ན་ཕྱག་བཞེས་ལྟར་གསེར་སྐྱེམས་བཏང་བས་འཐུས། དེ་ནས་མནན་པའི་གཟེར་ཁ་ལས། མནན་༣ པའི་གནས་སོ་སོའམ་ལམ་རྒྱ་གྲམ་དུ་མནན་པས་ཐམས་ཅད་གནོན་པ་ཡིན། དེ་ནས་སློབ་དཔོན་གྱིས་གྲི་གུག་གམ་ཟོར་བས་ས་ལ་གྲུ་གསུམ་བྲིས་ལ། ཕཊ༔ རང་ཉིད་སྐད་ཅིག་མ་གཅིག་ཁྲོས་མའི་སྐུ། །ཞལ་གཅིག་ཕྱག་གཉིས་གྲི་གུག་ཐོད་ཁྲག་བསྣམས། །གཡས་བསྐུམ་གཡོན་བརྐྱང་བཻ་རོའི་སྟེང་ན་འགྱིང་། །སྤྱི་གཙུག་ཕག་ཞལ་དུར་ཁྲོད་ཆས་བརྒྱད་བརྒྱན། །ཁ་ཊཾ་གཡོན་བརྟེན་པད་ཟླ་མེ་ཀློང་བཞུགས། །གྲི་གུག་ས་ལ་བརྒྱབས་པས་ས་གོས་ནས། །རྒྱ་མཚོ་སྔོ་ཧར་བྱུང་བའི་དབུས་སུ་ནི། །གནམ་ལྕགས་ཁང་སྒྲོམ་འབར་བའི་ནང་ཉིད་དུ། །གནོད་བྱེད་དགྲ་བགེགས་ཐམས་ཅད་གསལ་བར་གྱུར། །ཛཿ དཀོན་མཆོག་གསུམ་དང་རྩ་བ་གསུམ། །ཐུགས་རྗེ་ཁྲོས་མའི་ལྷ་ཚོགས་བདེན་པའི་མཐུས། །བསྟན་པའི་སྤྱི་དགྲ་རྣལ་འབྱོར་སྒོས་ཀྱི་དགྲ། །བདག་དང་བསྲུང་བྱ་ལ་གནོད་གདོན་བགེགས་རྣམས། །ཕོ་སྲི་མོ་སྲི་གོད་སྲི་ཆུང་སྲི་རྣམས། །ཟ་འདྲེ་ཤི་གཤེད་དམ་སྲི་སྒབ་འདྲེ་བཅས། །ལིང་ག་འདི་
ལ་ཛཿཧཱུྃ་བཾ་ཧོས་ཁུག །ལན་གསུམ་བརྗོད་པ་རིམ་པ་དགུའི་སས་གཡོགས་ནས། སྡིགས་མཛུབ་ཀྱིས་འཁོར་ལོ་རྩིབས་བརྒྱད་བྲིས་ལ། ཕཊ༔ གནམ་ལྕགས་འཁོར་ལོ་རྩིབས་སྟོང་ལྡན་པ་གཉིས། །སྟེང་འོག་རྒྱུན་ཆད་མེད་པར་འཁོར་བའི་བར། །གནོད་བྱེད་དགྲ་བགེགས་དམ་སྲི་ཕོ་མོ་རྣམས། །རྩིབས་ལ་བསྐྱོན་པས་བསྐལ་པར་མི་ཐར་གྱུར། །དེ་ནས་ལྷ་འདྲེའི་འོ་དོད་འབོད་པ་ནི། ཕཊ༔ ཡུལ་འདིར་གནས་པའི་སྣང་སྲིད་ལྷ་འདྲེ་རྣམས། །གནོད་བྱེད་མནན་པ་འདི་རྣམས་ཁྱོད་ལ་གཏད། །མ་ཤོར་ཟུངས་ཤིག་མཐུ་རྩལ་ཅི་འདུག་ལྟ། །གལ་ཏེ་མ་ཉེས་གནོད་བྱེད་འདི་བྱུང་ན། །ངས་ནི་མ་གཅིག་ཁྲོས་མའི་དམག་ཚོགས་ཀྱིས། །ནམ་མཁའ་གདན་བཏིང་ས་གཞི་གུར་དུ་ཕུབ། །རི་ཆེན་རྦབ་བསྒྲིལ་རི་ཆུང་ཚོགས་པོར་འཕེན། །མཛེ་ཤའི་ཐང་བརྡལ་མཛེ་ཁྲག་རྒྱ་མཚོ་བསྐྱིལ། །དཀར་ཐབ་དམར་ཐབ་བརྗོག་ནས་ལྷ་འདྲེ་རྣམས། །རྩད་ནས་སྐམ་པའི་ལས་ལ་མ་ཐུག་གང་། །གནོད་བྱེད་འདི་རྣམས་མ་གཏོང་ཟུངས་ཤིག་ཆིངས། །སྡོམས་ཤིག་ནོན་ཅིག་དམ་ཚིག་ས་མཱ་ཡ། །རྐང་དུང་ལན་གསུམ་བུས། དེ་ནས་མ་ཧཱ་བྷ་ལ་ནི། ཨོཾ་ཨཱཧཱུཾ། ལན་གསུམ། རང་གི་
ཐུགས་ཀའི་ས་བོན་ལས་འོད་ཟེར་འཕྲོས་པས་བ་གླང་སྤྱོད་ནས་མ་ཧཱ་བྷ་ལ་བཛྲ་ས་མཱ་ཡ་ཛཿ ཛཿཧཱུྃ་བཾ་ཧོཿ ཨོཾ་མ་ཧཱ་བྷ་ལ་མ་ཧཱ་བ་ལ་ཧཱུྃ་ཕཊ༔ ཅེས་བརྒྱ་རྩ་དང་རྟེན་འབྲེལ་སྙིང་པོས་རབ་གནས་བྱ། རྩ་སྔགས་ཁཱ་ཧི་བཏགས་གཏོར་མ་སྦྱིན། ཨནྡྷཾ་སོགས་ཀྱིས་མཆོད། ཧཱུྃ། འཇིག་རྟེན་ལྷ་འདྲེ་ཀུན་གྱི་གཤེད་པོ་སྟེ། །ལས་ཀྱི་མཐུ་ལས་གྲུབ་པའི་བདུད་ཀྱི་བུ། །བ་གླང་སྤྱོད་ཀྱི་གླིང་ལ་དབང་བསྒྱུར་བ། །སྟོབས་ཆེན་མ་ཧཱ་བྷ་ལ་ཁྱོད་ལ་བསྟོད། །སྐུ་གཟུགས་འདི་དང་དབྱེར་མེད་བརྟན་བཞུགས་ལ། །ཁྱོད་ཀྱི་འདུལ་སྐལ་ཡིན་པས་འདྲེ་འདི་ནོན། །སྟོབས་ཆེན་ཁྱོད་ཀྱི་དམ་ཚིག་དུས་ལ་བབ། །ཤུགས་ཆེན་མི་ཡིས་བྱིས་པ་མནན་པ་ལྟར། །བྱམས་པ་མ་བྱོན་བར་དུ་མ་ལྡང་ཞིག །དེ་ནས་ལོངས་ལ་བྱང་ཆུབ་སེམས་བསྐྱེད་ཞུས། །དེ་བར་མ་ཧཱ་བྷ་ལས་མ་གཏོང་ཞིག །ས་མ་ཡ། རྒྱ་རྒྱ་རྒྱ། དེ་ནས་བྲོ་བརྡུང་བ་ནི། ཧཱུྃ། ཐུགས་རྗེ་ཁྲོས་མའི་གཟི་བརྗིད་ཀྱིས། །བགེགས་དང་དམ་སྲི་བར་ཆད་རྣམས་། །རི་རབ་ཆེན་པོའི་འོག་ཏུ་མནན། །ཌཱཀྐི་སྡེ་ལྔས་བྲོ་ར་བཙུགས། །དཔའ་བོའི་བྲོ་རྡུང་ཁྲིགས་སེ་ཁྲིག །དཔའ་མོའི་གར་བྱེད་ཁྱུགས་སེ་ཁྱུག །ཡེ་ཤེས་ལྔ་ཡི་བྲོ་
བརྡུངས་པས། །དུག་ལྔའི་ཕུང་པོ་གཏན་ནས་བརླག །བདུད་དགྲ་ཐལ་བ་རྡུལ་དུ་རློགས། །ༀ་ལཾ་ཨཱལཾ་ཧཱུཾ་ལཾ་སུཾ་བྷ་ཡ་ནན། སྟེང་དུ་ཐོ་ཆུང་བརྩེགས། ཡང་ན་ཚེར་ལྕག་ལ་སོགས་ཅི་བདེ་བྱ། །ཕཊ༔ ལྕགས་ཁང་སྟེང་དུ་གནམ་ལྕགས་མཆོད་རྟེན་ནི། བང་རིམ་དགུ་པ་མུན་པའི་ན་བུན་འཐིབ། །ཆེ་ལ་བརྗིད་པ་སྲ་ལ་བརྟན་པ་ཞིག །གཡོ་འགུལ་མེད་པ་ཞིག་གིས་མནན་པར་གྱུར། །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། བཀྲ་ཤིས་རྣམས་བརྗོད། དེ་ནས་མནན་ལ་ཕྱི་མིག་མི་ལྟ་བར་ཐག་རིང་པོ་ནས་དཀར་འགྱེད་དམར་འགྱེད་དམིགས་པ་བྱ། ཡུད་ཙམ་བསྡད། དེ་རྗེས་ཕྱི་ལམ་བཅད་པའི་དམིགས་པ་ནི། ཕཊ༔ སྐད་ཅིག་རང་ཉིད་ཁྲོས་མ་ནག་མོར་གྱུར། །ས་འདིར་གནས་པའི་ལྷ་འདྲེ་ཁྱོད་རྣམས་ཀྱིས། །ང་ཡི་རྗེས་སུ་འབྲང་བའི་གཉན་ས་ཡི། །ལྷ་འདྲེ་འབྱུང་པོ་རྗེས་ཁྱི་ཐམས་ཅད་ཀུན། །ང་ཡི་རྗེས་སུ་མ་གཏོང་ཁྱོད་ཀྱིས་ཟུངས། །གལ་ཏེ་ང་ཡི་རྗེས་སུ་ཤོར་བྱུང་ན། །ལེ་ལན་ཁྱོད་ལ་ལེན་ནས་རྡུལ་དུ་བརླག ། ཁྱོད་ལ་མཐུ་རྩལ་ཅི་འདུག་ད་རེས་བལྟ། །བཀའ་དང་དམ་ལས་མ་འདའ་ས་མ་ཡ། །ཕཊ་ཕཊ་ཕཊ༔ དེ་ནས་ས་མཚམས་སུ་ཅུང་ཟད་འོང་ལ་ཐོ་གཅིག་བྱ། ཕཊ༔ ཐོ་ནི་བྱ་ཁྱུང་མེ་འབར་
ཁ་གདང་བ། །མཆུ་སྡེར་བསྒྲད་ཅིང་རལ་གྲིའི་གཤོག་པ་བརྐྱངས། །འབྱུང་པོའི་རྗེས་ཁྱི་ཡོང་ལམ་བཅད་པར་གྱུར། ཕཊ་ཕཊཕཊ༔ དེ་ལྟར་ཁྲོས་མའི་ལས་སྦྱོར་མནན་པ་འདི། །གཅོད་ཡུལ་ཉམས་ལེན་བྱེད་པའི་གང་ཟག་ལ། །ཕན་པར་བསམས་ནས་བྱང་གཏེར་ལས་གཞུང་ནས། །སྔགས་ལུགས་ཁ་ཚར་བཏབ་ཅིང་ཅུང་ཟད་སབ། །གཅོད་འདུལ་མི་ཐུབ་སེམས་ཉམ་ཆུང་བ་དང་། །ཆུང་སྲི་དམ་སྲི་སེམས་ཅན་འཚེ་བ་ལ། །ཕན་སེམས་ཆེན་པོས་བསམ་པ་བརྟན་པོ་ཡིས། །རཱ་གའི་མིང་ཅན་བདག་གིས་བྲིས་པ་ཡི། །ཉེས་འགལ་མ་གཅིག་ཁྲོས་མའི་ཚོགས་ལ་བཤགས། །སེམས་ཅན་ཕན་བདེ་འབྱུང་བའི་རྒྱུར་གྱུར་ཅིག །བཀྲ་ཤིས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།