བཀའ་གཏེར་ཟུང་འཇུག་ཐུགས་རྗེ་ཆེན་པོ་ཡིད་བཞིན་འཁོར་ལོའི་དབང་།
བཀའ་གཏེར་ཟུང་འཇུག་ཐུགས་རྗེ་ཆེན་པོ་ཡིད་བཞིན་འཁོར་ལོའི་དབང་བཞུགས་སོ༔
ན་མོ་ལོ་ཀེ་ཤྭ་ར་ཡེ༔ ཡིད་བཞིན་འཁོར་ལོའི་དབང་སྒྲུབ་ནི༔ བུམ་པ་མཆོད་གཏོར་སྤྱི་ལྟར་བཤམ༔ ན་མོ༔ དཀོན་མཆོག་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ བདག་དང་མདུན་དང་བུམ་པའི་ནང་༔ འཕགས་པ་ཡིད་བཞིན་འཁོར་ལོ་ནི༔ སྐུ་མདོག་སྔོན་པོ་ཞལ་གཅིག་པ༔ ཕྱག་བཞི་ཕྲེང་བ་པདྨ་དང་༔ སྐྱབས་སྦྱིན་ཚེ་ཡི་བུམ་པ་འཛིན༔ དར་དང་རིན་པོ་ཆེ་ཡིས་བརྒྱན་ཞབས་གཉིས་རྡོ་རྗེའི་སྐྱིལ་ཀྲུང་གིས༔ པདྨ་ཟླ་བའི་གདན་ལ་བཞུགས༔
ཐུགས་ཀར་འཁོར་ལོ་རྩིབས་བརྒྱད་ཀྱི༔ ལྟེ་བར་ཧཱུྃ་དང་རྩིབས་བརྒྱད་ལ༔ ཨོཾ་སོགས་ཡིག་འབྲུ་བརྒྱད་ཀྱིས་བསྐོར༔ ཡིག་འབྲུ་མི་འཁོར་འཁོར་ལོ་ནི༔ གཡས་སུ་འཁོར་ལས་འོད་ཟེར་འཕྲོས༔ ལྷོ་ཡི་ཕྱོགས་ཀྱི་ཞིང་ཁམས་ནས༔ རང་འདྲ་དཔག་མེད་སྤྱན་དྲངས་བསྟིམ༔ བུམ་པ་བདུད་རྩིས་གང་བར་གྱུར༔ ཨོཾ་པདྨ་ཚིནྡྷ་མ་ཎི་ཛཱ་ལ་ཧཱུྃ༔ བརྒྱའམ་ཡན་ཆད་ཅི་འགྲུབ་བཟླ༔ ཨགྷཾ་སོགས། སངས་རྒྱས་ཀུན་གྱིས་རབ་ཏུ་བསྔགས། ཡོན་ཏན་ཀུན་གྱི་གཏེར་གྱུར་ཅིང་༔ སྤྱན་རས་གཟིགས་ཞེས་མཚན་གསོལ་བ༔ རྟག་པར་བརྩེ་ལ་ཕྱག་འཚལ་བསྟོད༔
བུམ་ལྷ་འོད་ཞུ་བུམ་ཆུར་གྱུར༔ སློབ་མ་འདུས་ནས་ཁྲུས་དང་མཎྜལ་ཕུལ༔ དེ་ཡང་ཐུགས་རྗེ་ཆེན་པོ་སྤྱན་རས་གཟིགས༔ རྩ་རྒྱུད་པདྨ་དྲྭ་བ་ལས༔ ལྷོ་ཡི་ཕྱོགས་ཀྱི་ཞིང་ཁམས་མཆོག༔ གྲངས་མེད་བདུན་གྱི་མཐའ་ཉིད་ཀྱི༔ ཞིང་ཁམས་རིན་ཆེན་བརྩེགས་པ་ན༔ སངས་རྒྱས་རིན་ཆེན་དཔལ་བཞུགས་པའི༔ དྲུང་དུ་བྱང་ཆུབ་སེམས་དཔའི་གཙོར༔ སྤྱན་རས་གཟིགས་དབང་ཡིད་བཞིན་གྱི༔ ནོར་བུ་འཁོར་ལོས་སྒྱུར་བ་ཆེ༔ གསེར་གྱི་རི་བོའི་མདོག་འདྲ་བ༔ བྱང་ཆུབ་སེམས་ཚོགས་བྱེ་བ་ཕྲག༔ བཅུ་དང་ལྷན་ཅིག་མཁའ་ལ་གཤེགས༔ གློག་འགྱུ་བཞིན་དུ་ཞིང་འདིར་བྱོན༔ བཅོམ་ལྡན་མགོན་པོ་ཐུབ་པ་ལ༔ ཕྱག་འཚལ་བསྐོར་བ་དུ་མ་བྱས༔ འདབ་མ་སྟོང་དང་ལྡན་པ་ཡི༔ རིན་ཆེན་གསེར་གྱི་མེ་ཏོག་ནི༔ རྒྱ་ཆེ་དུ་མ་འཐོར་བར་བྱེད༔ སྤྱན་གཟིགས་ཀྱིས་བཅོམ་ལྡན་ལ༔ ཡིད་བཞིན་འཁོར་ལོའི་གཟུངས་འདི་ཕུལ་ནས༔ བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོའམ༔ དགེ་སློང་ངམ༔ དགེ་སློང་མའམ༔ དགེ་བསྙེན་ནམ༔ དགེ་བསྙེན་མའམ༔ གང་སུ་ཡང་རུང་འབྲས་བུས་མོད་ལས་ཐོབ་པར་འཚལ་ན༔ ཡིད་
བཞིན་གྱི་ནོར་བུའི་ཕྱག་རྒྱ་ལ་མངོན་པར་བརྩོན་པར་བགྱིའོ༔ ཚེས་གྲངས་རྒྱུ་སྐར་སྦྱོར་མི་འཚལ༔ སྨྱུང་བའི་ཆོ་ག་བགྱི་མི་འཚལ༔ ཁྲུས་དང་གོས་སར་བགོ་མི་འཚལ༔ དེ་བཞིན་སྒྲུབ་པའི་ཆོ་ག་མེད་ཀློག་པ་ཉིད་ཀྱིས་ཀུན་འགྲུབ་སྟེ༔ བཟླས་བརྗོད་ཙམ་ནི་ཐེ་ཚོམ་མེད༔ ལས་ནི་སྟོང་དང་དེ་བཞིན་དུ༔ ལས་ནི་བརྒྱ་ཡང་བགྱིད་པར་འགྱུར་ཡིད་བཞིན་ནོར་བུ་ལྟ་བུ་ཡི༔ རིག་སྔགས་མཚུངས་པ་འགའ་མ་མཆིས༔ སྔོན་གྱི་སྒྲིབ་པ་བསགས་པ་ཡང་སྔོན་གྱི་སྒྲིབ་པ་ཟད་གྱུར་ཏེ༔ དེ་ཕྱིར་བཟླས་བརྗོད་བགྱིས་ཙམ་གྱིས༔ དོན་རྣམས་ཐམས་ཅད་འགྲུབ་པར་འགྱུར༔ བཏོན་པ་ཙམ་གྱིས་མནར་མེད་པ༔ འཆི་བའི་སྒྲིབ་པ་དག་པར་འགྱུར༔ མཚམས་མེད་ལྔ་ཡི་སྡིག་པ་དང་༔ སྒྲིབ་པ་ཡོངས་སུ་བྱང་ཞིང་གཏན་ནས་ཟད་པར་འགྱུར༔ ཐམས་ཅད་མ་ལུས་བྱང་བར་འགྱུར༔ ནད་རྣམས་ཐམས་ཅད་ལས་ཐར་བར་འགྱུར་ལགས་སོ༔ བཏོན་པ་ཙམ་གྱིས་རིམས་ཞག་གཅིག་པ་དང་༔ ཞག་གཉིས་པ་དང་༔ ཞག་གསུམ་པ་དང་༔ ཞག་བཞི་པ་དང་༔ རླུང་ལས་གྱུར་པ་དང་༔ མཁྲིས་པ་ལས་གྱུར་པ་དང་༔ བད་ཀན་ལས་
གྱུར་པ་དང་༔ འདུས་པ་ལས་གྱུར་པ་དང་༔ རྟག་པའི་རིམས་དང་༔ རིམས་ལྡང་དུབ་པ་དང་༔ མཚན་མོའི་རིམས་དང་༔ ཉིན་མོའི་རིམས་ཐམས་ཅད་ལས་ཡོངས་སུ་ཐར་བར་འགྱུར༔ མདའ་དུག་དང་༔ སྦྱར་བའི་དུག་དང་༔ བྱད་སྟེམས་ཐམས་ཅད་ཀྱིས་མི་ཚུགས་པ་ལགས་སོ༔ གཞན་ཡང་འབྲས་དང་༔ ཕོལ་མིག་དང་༔ ལྷོག་པ་དང་༔ རྐང་བུ་དང་༔ གཡེན་པ་དང་༔ མཛེ་དང་༔ ཤ་བཀྲ༔ རླུང་ནད་དག་གིས་མི་ཚུགས་པར་འགྱུར་ལགས་སོ༔ གཞན་ཡང་ནམ་ཡང་སོ་ན་བ་དང་༔ ཁ་ན་བ་དང་༔ ཡན་ལག་ན་བ་དང་༔ ཉིང་ལག་ན་བ་དང་༔ ལྟོ་བ་ན་བ་དང་༔ ཀླད་པ་ན་བ་དང་༔་གཞོག་ཕྱེད་ན་བས་མི་ཚུགས་པར་འགྱུར་རོ༔ ལུས་ལ་གདོན་གྱིས་མི་ཚུགས་པར་འགྱུར་གནོད་སྦྱིན་དང་༔ སྲིན་པོ་དང་འབྱུང་པོ་དང་༔ ཤ་ཟ་དང་༔ མཁའ་འགྲོ་མ་འདོད་དགུར་བསྒྱུར་བའི་གཟུགས་ཅན་དང་༔ བགེགས་དང་ལོག་འདྲེན་དང་༔ བདུད་ཀྱི་རིགས་རྣམས་ཀྱིས་ཀྱང་གླགས་རྙེད་པར་མི་འགྱུར་རོ༔ ལུས་ལ་མདའ་དུག་དང་༔ མཚོན་དང་༔ མེ་དང་༔ ཆུ་དང་༔ རླུང་དང་༔ ལྕེ་འབབ་པས་མི་ཚུགས་པར་འགྱུར༔
རྐུན་པོའི་འཇིགས་པ་དང་༔ ཆོམ་རྐུན་གྱི་འཇིགས་པ་དང་༔ རྒྱལ་པོའི་འཇིགས་པ་དང་༔ ཕ་རོལ་དམག་ཚོགས་ཀྱིས་འཇིགས་པ་དང་༔ ཕྱིར་རྒོལ་དང་༔ མེ་ཡི་འཇིགས་པ་དང་༔ དགྲ་ཡི་འཇིགས་པ་མི་འབྱུང་ངོ་༔ དུས་མ་ཡིན་པར་འཆི་བའི་འཇིགས་པ་མི་འབྱུང་ངོ་༔ རྨི་ལམ་ངན་པ་རྨི་བར་མི་འབྱུང་༔ སྡིག་པའི་འཇིགས་པ་དང་༔ སྦྲུལ་གདུག་པའི་འཇིགས་པ་དང་༔ སྲེད་མེད་ཀྱི་འཇིགས་པ་མི་འབྱུང་༔ གཅན་གཟན་ཁྲོ་བོའི་འཇིགས་པ་མི་འབྱུང་༔ འཐབ་མོ་དང་རྩོད་པ་དང་འགྱེད་པ་ཐམས་ཅད་ལན་ཐེབ་པར་འགྱུར༔ ཐམས་ཅད་དུ་ནི་གསལ་བར་འགྱུར་རོ༔ དེ་དག་ནི་བཏོན་པས་འགྲུབ་ཏེ་བཏོན་ནས་དེའི་མོད་ལ་དོན་ཐམས་ཅད་འགྲུབ་པར་འགྱུར་བ་ལགས་སོ། དེས་ནི་ལན་བརྒྱ་རྩ་བརྒྱད་བཟླས་བརྗོད་བགྱིད་པ་ཙམ་གྱིས༔ དེ་ཉིད་ཀྱི་ཉིན་མོར་འཕགས་པ་སྤྱན་རས་གཟིགས་དབང་ཕྱུག་གིས་སྐུ་མངོན་སུམ་དུ་སྟོན་པར་བགྱིད་དོ༔ དབུགས་འབྱིན་པར་བགྱིད་དོ༔ དངོས་གྲུབ་སྩོལ་བར་བགྱིད་དོ༔ དེ་བཞིན་གཤེགས་པ་ཐམས་ཅད་ཀྱང་སྐུར་སྟོན༔ བདེ་བ་ཅན་གྱི་འཇིག་རྟེན་གྱི་ཁམས་ལེགས་པར་བརྒྱན་པའི་གཞལ་
མེད་ཁང་ཐ་དག་མཐོང་བར་འགྱུར་རོ༔ འཇིག་རྟེན་ཁམས་བདེ་བ་ཅན་ན་གནས་པའི་བྱང་ཆུབ་སེམས་དཔའ་སོ་སོའི་འཁོར་གྱི་དཀྱིལ་འཁོར་མ་ལུས་རྣམས་ཀྱང་མཐོང་བར་འགྱུར་རོ༔ འཕགས་པ་སྤྱན་རས་གཟིགས་དབང་ཕྱུག་གི་གནས་གཞལ་མེད་ཁང་དང་རི་བོ་ཏ་ལ་མཐོང་བར་འགྱུར་རོ༔ རྒྱལ་ཁམས་ཐམས་ཅད་དུ་བཀུར་བར་འགྱུར་ལགས་སོ་འཇིག་རྟེན་ཐམས་ཅད་ཀྱིས་ཀྱང་མཐོང་ན་དགའ་བར་འགྱུར་རོ༔ སྡིག་པ་དང་སྒྲིབ་པ་ཐམས་ཅད་རྣམ་པར་བྱང་བར་འགྱུར་རོ༔ འཆི་བའི་ཚེ་འཕགས་པ་སྤྱན་རས་གཟིགས་དབང་ཕྱུག་མངོན་སུམ་དུ་མཐོང་བར་འགྱུར་རོ༔ གང་དང་གང་དུ་སྐྱེ་བ་དེ་དང་དེར་རྒྱན་ཐམས་ཅད་ཀྱིས་བརྒྱན་པ་པདྨ་ལ་བརྫུས་ཏེ་སྐྱེ་བར་འགྱུར༔ ཚེ་རབས་ཐམས་ཅད་སྐྱེ་བ་དྲན་པར་འགྱུར༔ ནམ་ཡང་ངན་སོང་དུ་འཆི་བར་མི་འགྱུར་རོ་སངས་རྒྱས་ཀྱི་གོ་འཕང་ཡོངས་སུ་ཐོབ་པར་འགྱུར་རོ༔ བཏོན་པ་ཙམ་གྱིས་སྡིག་པ་དང་སྒྲིབ་པ་ཐམས་ཅད་དག་པར་འགྱུར༔ བདེ་བར་གཤེགས་པའི་ལམ་རྣམ་པར་དག་པར་འགྱུར་ལགས་སོ༔ ཞེས་གསུངས་སོ༔ དེའི་མན་ངག་བྱུང་ཚུལ་དང་བརྒྱུད་རིམ་ནི༔ རྒྱ་གར་ལྷོ་ཕྱོགས་ཀོ་ས་ལའི་
རྒྱལ་པོ་རཏྟ་པྲ་བྷ་ཞེས་བྱ་བ་བླ་མཆོད་ཕྱི་ནང་གི་པཎྜི་ཏ་ལྔ་བརྒྱ་ཡོད་པ་ལས་དུས་རེ་ཞིག་ཚེ་ན་བཙུན་མོ་ཆེ་བ་ཨིན་མ་བྱ་བས༔ རྒྱལ་པོ་ལ་བླ་མཆོད་ཕྱི་ནང་གཉིས་མི་དགོས་གང་རུང་གཅིག་གིས་ཆོག་ཅེས་ནན་གྱིས་བསྐུལ་བས༔ རྒྱལ་པོས་ཕྱི་ནང་གི་བླ་མཆོད་རྣམས་བསོགས་ནས་ཁྱེད་གཉིས་ཀ་མི་དགོས༔ ཁྱེད་གཉིས་ནུས་པ་འགྲན་ལ་ནུས་གང་ཆེ་བ་གཅིག་ངའི་བླ་མཆོད་བྱེད་ཟེར་བ་ལ༔ མུ་སྟེགས་པས་ན་རེ༔ ནང་པ་རྣམས་ལ་ཡང་ན་ཁྱེད་ཀྱིས་མཐུ་གྱིས། ངེད་ཀྱིས་ཟློག་པ་བྱེད༔ ཡང་ན་ངེད་ཀྱིས་མཐུ་བྱེད༔ ཁྱེད་ཀྱིས་ཟློག་པ་གྱིས་འདོམ་ཟེར་བ་ལ། ནང་པས་ཟློག་པ་བྱེད་པར་བྱས༔ མུ་སྟེགས་པས་ཞག་བདུན་གྱི་མཐུ་དུས་བཏབ་པ་ལས༔ དེར་ནང་པའི་པཎྜི་ཏ་རྣམས་ཀྱིས་དཀོན་མཆོག་གསུམ་ལ་གསོལ་བ་བཏབ་པས༔ ངེད་ཅག་ལ་ནུས་པ་ཅི་ཡང་མེད༔ བསྟན་པ་ལ་བཞུགས་པས་ཁྱེད་རྣམས་ཐུགས་རྗེ་དང་ནུས་པ་ཡོད་ན་བྱེད་རན་ཞེས་གསོལ་བ་བཏབ་པས༔ དེ་ནུབ་པཎྜི་ཏ་ཆེ་བའི་རྨི་ལམ་ལ་སྤྱན་རས་གཟིགས་ཀྱིས་ཞལ་བསྟན་ནས༔ རིགས་ཀྱི་བུ་ཁྱོད་སྐྲག་མི་དགོས་ཀྱི༔ པདྨ་ཅོད་པན་གྱི་རྒྱུད་ནས་འབྱུང་བ་ལྟར༔
འཇིག་རྟེན་དབང་ཕྱུག་ཡིད་བཞིན་འཁོར་ལོ་སྒོམས་ལ་སྔགས་ཟློས་དང་༔ ཁྱེད་རྒྱལ་བར་འགྱུར་གྱི༔ ཞེས་ལུང་གནང་བ་དང་༔ ནང་པར་འཚོགས་པའི་གྲལ་དུ་དགེ་འདུན་རྣམས་ལ་བཤད་པས་ཐམས་ཅད་དགའ་བར་གྱུར་ཏེ༔ པདྨ་ཅོད་པན་གྱི་རྒྱུད་ཀློག་པས༔ དེ་ནས་ཇི་ལྟར་འབྱུང་བ་ལྟར་བསྒོམས་བཟླས་བྱས་པས༔ མུ་སྟེགས་པ་ཐམས་ཅད་བརྒྱལ་བ་དང་༔ སྨྱོ་བར་གྱུར་ནས་ཐམས་ཅད་ནང་པའི་བསྟན་པ་ལ་ཞུགས་ཏེ་སངས་རྒྱས་ཀྱི་བསྟན་པ་ནམ་ལངས་པ་ཉི་མ་ཤར་བ་བཞིན་དུ་གྱུར་ཏོ༔ དེ་ནས་པཎྜི་ཏ་ཆེ་བའི་མཚན་ནི་དགེ་སློང་དྲི་མ་མེད་པ་ཡིན་ལ༔ དེས་པཎྜི་ཏ་ཨ་བྱཱ་ཀ་ར་ལ༔ དེས་ཙ་མི་ལོ་ཙཱ་ལ༔ དེས་དཔལ་རྒ་ལོ་ཙཱ་ལ༔ དེས་བདེར་གཤེགས་ཕག་མོ་གྲུ་པ་ལ༔ དེས་ཆོས་རྗེ་རིན་པོ་ཆེ་སྟག་ལུང་ཐང་པ་ལ༔ དེས་རིན་པོ་ཆེ་རཏྣ་ནཱ་ཐཱ་ལ༔ དེས་བླ་མ་རིན་པོ་ཆེ་སངས་རྒྱས་ཡར་བྱོན་ལ༔ དེས་སངས་རྒྱས་དབོན་པོ་དཔལ་ལ༔ དེ་ནས་སྐུ་ཞང་ཀུན་དགའ་དཔལ་ཨོ་རྒྱན་མགོན་པོ༔ ཡོན་ཏན་རྒྱལ་མཚན༔ ཡོན་ཏན་འོད་ཟེར༔ བློ་གྲོས་རིན་ཆེན༔ དོན་འགྲུབ་རིན་ཆེན༔ ཆོས་དཔལ་བཟང་པོ༔ མཁར་དྲུང་མཚོ་སྐྱེས་
རྡོ་རྗེ༔ ཀུན་དགའ་བཀྲ་ཤིས༔ ངག་དབང་རྣམ་རྒྱལ༔ ངག་དབང་བཀྲ་ཤིས་དཔལ་གྲུབ༔ དེས་བདག་རཱ་ག་ཨ་སྱ་ལ༔ འདིའི་སྒྲུབ་ཐབས་ལོ་རྒྱུས་དང་བཅས་པའི་ལུང་གནང་༔ ཉེ་རྒྱུད་ནི་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་མེ་སྤྲེལ་ཐ་སྐར་ཟླ་བའི་ཚེས་བདུན་ནུབ༔ ཐུགས་རྗེ་ཆེན་པོ་ཡིད་བཞིན་འཁོར་ལོ་མངོན་རྟོགས་དང་མཚུངས་པ་གཅིག་དངོས་སུ་བྱོན་ནས༔ གདམས་པ་འདི་ཉིད་དངོས་སུ་བཀའ་སྩལ་ཏོ༔ དེས་དགེ་སློང་རཱ་ག་ཨ་སྱས་ལ་གནང་བའོ༔ དེ་ལྟ་བུའི་དབང་ཟབ་མོ་ཞུ་བའི་ཕྱིར་རྗེས་ཟློས་མཛོད༔ དུས་གསུམ་སངས་རྒྱས་ཐམས་ཅད་དང་༔ ཁྱད་པར་ཡིད་བཞིན་འཁོར་ལོ་ལ༔ གསོལ་བ་འདེབས་སོ་དབང་བསྐུར་སྩོལ༔ ཨོཾ་བཀའ་དུ༔ བཀའ་ཀྲ་སྱ་མྱ་ཧྱ༔ སྐྱབས་སེམས་འདིའི་རྗེས་ཟློས་མཛོད༔ དཀོན་མཆོག་གསུམ་ལ་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་དགེ་ལ་རྗེས་ཡི་རང་༔ སངས་རྒྱས་བྱང་ཆུབ་ཡིད་ཀྱིས་བཟུང་༔ སངས་རྒྱས་ཆོས་དང་ཚོགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་ཉི་རབ་བསྒྲུབ་ཕྱིར༔ བྱང་ཆུབ་སེམས་ནི་བསྐྱེད་པར་བགྱི༔
བྱང་ཆུབ་མཆོག་གི་སེམས་ནི་བསྐྱེད་བགྱིས་ནས༔ སེམས་ཅན་ཐམས་ཅད་བདག་གི་མགྲོན་དུ་གཉེར༔ བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི༔ འགྲོ་ལ་ཕན་ཕྱིར་སངས་རྒྱས་མྱུར་ཐོབ་ཤོག༔ གསུམ། ཁྱོད་ནི་རྣལ་འབྱོར་རིགས་སུ་སྐྱེས༔ ང་ཡིས་ཡེ་ཤེས་རྡོ་རྗེ་བྱིན༔ སྦྱིན་པས་དངོས་གྲུབ་མཆོག་ཐོབ་འགྱུར༔ ཏེ་ཐེ་ཚུ་ཧ་དྨ་ཧཱུྃ་ལྱཱ༔ བཙན་དུག་སྡོང་པོས་བདུད་རྩི་བསྒྲེས་པའི་དམ་ཆུ་སྦྱིན་པར་བསྒོམས་ལ༔ འདི་ནི་ཁྱོད་ཀྱི་དམྱལ་བའི་ཆུ༔ དམ་ཚིག་འདས་ན་སྲེག་པར་བྱེད༔ དམ་ཚིག་བསྲུང་ན་དངོས་གྲུབ་ནི༔ རྡོ་རྗེ་བདུད་རྩི་ཆུ་འདིས་འགྲུབ༔ ས་མ་ཡ་ཀ་ཧི་ཧ་ས་ཧཱུྃ༔ འདིའི་རྗེས་ཟློས་མཛོད༔ སངས་རྒྱས་ཀུན་གྱི་རང་བཞིན་སྐྱ༔ སློབ་དཔོན་ཁྱེད་ལ་བདག་སྐྱབས་མཆི༔ མི་བཟད་འཁོར་བའི་རྒྱ་མཚོ་ལས༔ གཙོ་བོ་ཁྱེད་ཀྱིས་བསྒྲལ་དུ་གསོལ༔ ཧ་ཧ་ཧ་ཧ་ཧ་ཧ་ཧ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ ད་སློབ་མ་ཁྱེད་རང་རྣམས༔ འཕགས་པ་ཡིད་བཞིན་འཁོར་ལོ་ནི༔ སྐུ་མདོག་སྔོན་པོ་ཞལ་གཅིག་པ༔ ཕྱག་བཞི་ཕྲེང་བ་པདྨ་དང་༔ སྐྱབས་སྦྱིན་ཚེ་ཡི་བུམ་པ་འཛིན༔ དར་དང་རིན་པོ་ཆེ་ཡིས་བརྒྱན༔ ཞབས་གཉིས་རྡོ་རྗེའི་སྐྱིལ་ཀྲུང་གིས༔ པདྨ་ཟླ་བའི་
གདན་ལ་བཞུགས༔ ཐུགས་ཀར་འཁོར་ལོ་རྩིབས་བརྒྱད་ཀྱི༔ ལྟེ་བར་ཧཱུྃ་དང་རྩིབས་བརྒྱད་ལ༔ ཨཱ་སོགས་ཡིག་འབྲུ་བརྒྱད་ཀྱིས་བསྐོར༔ ཡིག་འབྲུ་མི་འཁོར་འཁོར་ལོ་ནི༔ གཡས་སུ་འཁོར་ལས་འོད་ཟེར་འཕྲོས༔ ལྷོ་ཡི་ཕྱོགས་ཀྱི་ཞིང་ཁམས་ནས༔ འཕགས་པ་ཡིད་བཞིན་འཁོར་ལོ་ནི༔ སྤྲུལ་པ་ཡང་སྤྲུལ་དཔག་མེད་པ༔ མཚོ་ལ་ཆར་པ་བབས་བཞིན་དུ༔ ཁྱོད་ཉིད་ལ་ནི་ཐིམ་པར་གྱུར༔ དབྱངས་རོལ་མོ་དང་བཅས༔ ཧཱུྃ༔ དགོངས་ཤིག་དེ་ཐུགས་རྗེ་ཆེན་པོའི་ལྷ་ཚོགས་དགོངས༔ བཞེངས་ཤིག་དེ་ཐུགས་རྗེ་ཆེན་པོའི་ལྷ་ཚོགས་བཞེངས༔ ལྷོ་ཡི་དེ་གནས་མཆོག་ངོ་མཚར་ཅན་ནས་བཞེངས༔ འཁོར་དང་དེ་བཅས་པ་ཐམས་ཅད་འདིར་བྱོན་ཅིག༔ དབུ་སྐྲ་དེ་ཐོར་ཙུགས་ལྡེམས་སེ་ལྡེམ༔ རིན་ཆེན་གྱི་རྒྱན་ཆ་དེ་ཉི་ལི་ལི༔ གླུ་ལེན་དེ་གར་བྱེད་རོལ་མོ་སྒྲོག༔ བྱིན་གྱིས་དེ་བརླབས་པ་བསམ་མི་ཁྱབ༔ དངོས་གྲུབ་དེ་སྟེར་བ་རྩིས་མི་ལོངས༔ བྱིན་ཆེན་དེ་ཕབ་པ་ངོ་མཚར་ཅན༔ ཐུགས་རྗེས་དེ་འཛིན་པ་དཔག་ཏུ་མེད༔ གསོལ་བ་དེ་རྩེ་གཅིག་བཏབ་པ་ཡིས༔ མི་འདི་ལ་དེ་བྱིན་གྱིས་བརླབ་ཏུ་གསོལ༔ མི་བདག་ལ་དེ་དངོས་
གྲུབ་ཐམས་ཅད་སྩོལ༔ མི་བདག་ལ་དེ་བྱིན་ཆེན་དབབ་ཏུ་གསོལ༔ མི་བདག་ལ་དེ་ཐུགས་རྗེས་འཛིན་པར་བྱིན་གྱིས་དེ་རློབས་ཤིག་སྤྱན་རས་གཟིགས༔ དངོས་གྲུབ་དེ་སྩོལ་ཅིག་སྤྱན་རས་གཟིགས༔ བྱིན་ཅིག་དེ་ཕོབ་ཅིག་སྤྱན་རས་གཟིགས༔ ཐུགས་རྗེས་དེ་ཟུངས་ཤིག་སྤྱན་རས་གཟིགས༔ ཕ་བླ་མ་དེ་ཐུགས་རྗེ་ཆེན་པོ་ཁྱོད་ཉིད་ལ། བདག་གི་དེ་རྩེ་གཅིག་གསོལ་བཏབ་ནས༔ ཁྱེད་ཀྱི་དེ་ཐུགས་རྗེ་ད་མཛོད་ཅིག༔ ཨོཾ་པདྨ་ཚིནྡྷ་མ་ཎི་ཛཱ་ལ་ཧཱུྃ༔ བཛྲ་ཨཱ་ཝེ་ཤ་ཡ་ཨ་ཨཱཿ དེ་ནས་ཁྱོད་ལ་ཐིམ་པ་དེ༔ ཇི་སྲིད་བར་དུ་བརྟན་པར་བསྒོམས༔ རྡོ་རྗེ་སྤྱི་བོར་བཞག་ནས་ནི༔ ཏིཥྛ་བཛྲཿ ད་བུམ་པ་འདི་ཉིད་ཕྱི་བུམ་པ་ལ༔ ནང་རིན་པོ་ཆེའི་གཞལ་ཡས་ཁང་དུ་གྱུར་པའི་ནང་ན་ཡིད་བཞིན་འཁོར་ལོའི་ལྷ་ཚོགས་དངོས་སུ་བཞུགས་པའི་སྐུ་ལས་བདུད་རྩིའི་རྒྱུན་བབས༔ ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་ཞུགས་ཏེ༔ ལུས་ཀྱི་གནས་བཞི་གང་༔ སྒྲིབ་པ་བཞི་དག༔ དབང་བཞི་ཐོབ༔ སྐུ་བཞི་མངོན་དུ་བྱེད་པའི་སྐལ་བ་ཅན་དུ་གྱུར་པར་སྒོམས་ཤིག༔ ཧཱུྃ༔ བུམ་པ་འདི་ནི་གཞལ་ཡས་ཁང་༔ ཡིད་བཞིན་འཁོར་ལོ་འཁོར་
བཅས་བཞུགས་པ་ཡི༔ རིགས་ཀྱི་བུ་ལ་དབང་བསྐུར་བས༔ དབང་བཞི་ཡོངས་རྫོགས་ཐོབ་པར་ཤོག༔ ཀུམ་བྷ་པ་ནི་ཀ་ཡེ༔ འབའ་བུ་ཨ་ཡི་ཀ་ཀི་ཀ་ཀོ༔ ཨོཾ་པདྨ་ཚིནྡྷ་མ་ཎི་ཛཱ་ལ་ཧཱུྃ༔ ད་སྐུ་གཟུགས་འདི་ཉིད་ཡིད་བཞིན་འཁོར་ལོ་དངོས་སུ་གསལ་བའི་སྐུའི་གནས་རྣམས་ནས་རང་འདྲ་བའི་སྐུ་དཀར་སེར་དམར་ལྗང་མཐིང་གའི་ཚོགས་འཕྲོས་ནས༔ ཁྱེད་རང་རྣམས་ཀྱི་གནས་སོ་སོར་ཐིམ་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་ཡོངས་སུ་རྫོགས་པ་ཐོབ་པར་སྒོམས་ཤིག༔ ཧཱུྃ༔་ཡིད་བཞིན་འཁོར་ལོའི་སྐུ་གཟུགས་ལ༔ ཡིད་བཞིན་འཁོར་ལོའི་ལྷ་ཚོགས་རྫོགས༔ སློབ་མ་ཁྱོད་ལ་དབང་བསྐུར་བས༔ ཡིད་བཞིན་འཁོར་ལོའི་ལྷ་ཚོགས་ཀྱི༔ དབང་བཞི་ཡོངས་སུ་རྫོགས་ཐོབ་ཤོག༔ ལྷབ་ལྷབ་པ་ལྗིམ་པ་སྐྱ་ཧ་སྱ་ཡེ༔ ཧ་ཀྲྀ༔ ཀ་ལི་ཀི་ལི་ཀཱ་ཏཱཾ༔ པ་ལེ༔ པི་ཀ་ལ་ཏཾ༔ བ་ལེ་བ་ལི་ཀ་ཏཾ༔ ཧ་ཧཱུཾ་པ་ཏིམ་པ་ཏིམ༔ མར་མེ་ཕུལ་ནས་ཕྱག་གསུམ་འཚལ་བའི་མོས་པས་རྗེས་ཟློས་མཛོད༔ མ་ཧཱ་གུ་རུ་ཙིཏྟ༔ མ་མ་ཏ་རི་ཀྵ༔ ཥ་ཧ་ཅུ་ཧྱ༔ འབྲས་སྟེ་ཐོགས་ཏེ༔ ཧཱུྃ༔ འདི་ནི་རིན་ཆེན་འབྲས་སྙེ་སྟེ༔ ཁྱོད་ཀྱི་མགྲིན་
པར་བཞག་པ་ཡིས༔ ཡིད་བཞིན་འཁོར་ལོའི་གསུང་དབང་ཀུན༔ མ་ལུས་ཁྱོད་ཀྱིས་ཐོབ་པར་ཤོག་ཨ་ཀྲི་ཧ་ཀླུ་པ་ཌི་ཌིཀྐི༔ བི་གེ་ནཱ་ཧ༔ ཀྱེ་ཀྱེ་ཧེ་ཧེ༔ བྱེ་རྒྱ་ཀ་ཏི་ཀ་། ཀ་ཏི༔ དུང་དཀར་ཐོགས་ལ༔ ཧཱུྃ༔ དུས་གསུམ་རྒྱལ་བ་མ་ལུས་ཐམས་ཅད་ཀྱི༔ གཡས་འཁྱིལ་རྩ་རྗེས་ཡོངས་རྫོ་གས་དོད་པ་འདི༔ བུ་ཁྱོད་སྙིང་ཁར་བཞག་པའི་བྱིན་རླབས་ཀྱིས༔ ཡིད་བཞིན་འཁོར་ལོའི་ཐུགས་དབང་ཡོངས་རྫོགས་ཤོག༔ ཨ་ཨ༔ ཨ་ཨ༔ ཨ༔ དུམ་དུམ༔ དུམ་དུམ༔ དུམ་དུམ༔ ཧ་ཧ་ཧ༔ ཧ་ཧ་ཧ་ཧ༔ ཀ་ཏིམ་སྤུ་ན༔ ཀ་ཀོ་སེང་པ་ཏིམ༔ ཞིང་དབྱུག་དང་ཐོད་ཕྲེང་ཐོགས་ལ༔ ཧཱུྃ༔ སློབ་མ་རིགས་ཀྱི་བུ་ཁྱོད་ལ༔ ཞིང་དབྱུག་ཐོད་ཕྲེང་དབང་བསྐུར་བས༔ ཡིད་བཞིན་འཁོར་ལོའི་ལྷ་ཚོགས་ཀྱི༔ སྐུ་གསུང་ཐུགས་ཡོན་དབང་ཐོབ་ཤོག གྷི་ཧུ་ར་ཧ་སྱཱ༔ ཧེ་ཨ་ཧཱུྃ་ཧཱུྃ༔ རྫས་བརྒྱུད་རིམ་པར༔ ཡུངས་དཀར་རྡོ་རྗེ་རིགས་ཏེ་ཐམས་ཅད་འདུལ༔ བགེགས་རྣམས་མ་ལུས་རབ་ཏུ་འཇོམས་བྱེད་ཅིང་༔ མཐུ་སྟོབས་ཡོན་ཏན་ཕུན་སུམ་ཚོགས་གྱུར་པའི༔ བཀྲ་ཤིས་དེས་ཀྱང་བགེགས་རྣམས་ཞི་བར་ཤོག༔ ཨོཾ་སྭ་སྟི་པྲ་སྟི་པྲ་སྟི་དྷརྨ་ཧཱུཾ་ཧཱུཾ་ཧཱུཾ༔ ཨ་
བྷི་ཥིཉྩ་ཨཱཿ དྭར་བས་ཚེ་ནི་འཕེལ་བར་བྱེད་པ་ཡི༔ རྡོ་རྗེ་སེམས་དཔའི་ཚེ་ནི་རབ་བསྒྲུབ་སྟེ༔ ཉོན་མོངས་སྐྱེ་འཆིའི་རྒྱུན་ཆད་གྱུར་པ་ཡི༔ བཀྲ་ཤིས་དེས་ཀྱང་ཚེ་ནི་འཕེལ་གྱུར་ཅིག༔ ཨོཾ་སྭ་སྟེ་སྭ་སྟི་པྲ་སྟི་དྷརྨ་ཧཱུཾ་ཧཱུཾ་ཧཱུཾ༔ ཨ་བྷི་ཥིཉྩ་ཨཱཿ ལི་ཁྲི་དམར་པོ་དབང་གི་རང་བཞིན་ཏེ༔ ཆོས་རྣམས་མ་ལུས་དབང་དུ་འདུས་ནས་ཀྱང་༔ ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི༔ བཀྲ་ཤིས་དེས་ཀྱང་རྒྱལ་སྲིད་བརྟན་གྱུར་ཅིག༔ ཨོཾ་སྭ་སྟི་སྭ་སྟི་པྲ་སྟི་དྷརྨ་ཧཱུཾ་ཧཱུཾ་ཧཱུྃ༔ ཨ་བྷི་ཥིཉྩ་ཨཱཿ གྷི་ཝང་དུག་གསུམ་འཇོམས་པ་ནད་ཀྱི་སྨན༔ སྨན་མཆོག་ཆོས་ཉིད་རབ་ཏུ་རྟོགས་གྱུར་ནས༔ ཉོན་མོངས་ཟུག་རྔུ་མེད་པར་གྱུར་པ་ཡི༔ བཀྲ་ཤིས་དེས་ཀྱང་སྡུག་བསྔལ་ཞི་གྱུར་ཅིག༔ ཨོཾ་སྭ་སྟི་སྭ་སྟི་པྲ་སྟི་དྷརྨ་བྷཾ་ཧཱུཾ་ཧཱུཾ༔ ཨ་བྷི་ཥིཉྩ་ཨཱཿ ཞོ་ནི་ཀུན་གྱི་སྙིང་པོར་གྱུར་པ་སྟེ༔ སྙིང་པོ་རྣམ་དག་ཡེ་ཤེས་མཆོག་རྟོགས་ནས༔ ཡོན་ཏན་ཀུན་གྱི་དབྱིངས་སུ་གྱུར་པ་ཡི༔ བཀྲ་ཤིས་དེས་ཀྱང་དུག་གསུམ་ཞི་བར་ཤོག༔ ཨོཾ་སྭ་སྟི་སྭ་སྟི་སྭ་སྟི་དྷརྨ་བྷུ་བྷཾ༔ དྷྭཾ༔ ཨ་བྷི་ཥིཉྩ་ཨཱཿ མེ་ལོང་ཡེ་ཤེས་རྒྱ་མཚོ་ཆེན་པོ་ཡི༔ ཡེ་ཤེས་རྒྱ་མཚོ་མཆོག་ཏུ་བདག་གྱུར་ཏེ༔ རྣམ་དག་ཆོས་ལ་
ཐོགས་མེད་ལོངས་སྤྱོད་པའི༔ བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག༔ ཨོཾ་སྭ་སྟི་སྭ་སྟི་པྲ་སྟི་དྷརྨ་བྷཾ་བྷུ་བྷཾ༔ ཨ་བྷི་ཥིཉྩ་ཨཱཿ བིལ་བ་རྒྱུ་རྐྱེན་འབྲས་བུ་བཅས་པའི་ཆོས་འཇིག་རྟེན་འཇིག་རྟེན་འདས་པའི་སྤྱོད་པ་ཀུན༔ བྱང་ཆུབ་སྙིང་པོ་མཆོག་ཏུ་གྱུར་པ་ཡི༔ བཀྲ་ཤིས་དེས་ཀྱང་དོན་ཀུན་འགྲུབ་གྱུར་ཅིག༔ ཨོཾ་སྭ་སྟི་སྭ་སྟི་པྲ་སྟི་དྷརྨ་ཧཱུཾ་ཧཱུཾ་ཧཱུཾ༔ ཨ་བྷི་ཥིཉྩ་ཨཱཿ དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ༔ ཡེ་ཤེས་རྒྱ་མཚོ་ཉིད་དུ་བདག་གྱུར་ཏེ༔ ཆོས་རྣམས་མ་ལུས་ཡོངས་སུ་སྟོན་པ་ཡི༔ བཀྲ་ཤིས་དེས་ཀྱང་ཚིག་དབང་ཐོབ་པར་ཤོག༔ ཨོཾ་སྭ་སྟི་སྭ་སྟི་པྲ་སྟི་དྷརྨ་བྷཱུ་ཧཱུཾ་ཧཱུཾ༔ ཨ་བྷི་ཥིཉྩ་ཨཱཿ དེ་ནས་གཏོར་མའི་བྱིན་བརླབ་བྱ་བ་ནི༔ ཨོཾ་སྭ་བྷ་ཝ་སོགས། དེའི་ངང་ལས་ཧཱུཾ་ཧཱུཾ་འོད་དུ་ཞུ་བ་ལས༔ ས་ཕྱོགས་འདི་འཁོར་ལོ་རྩིབས་བཅུ་པ་སྲ་བ་མཁྲེགས་པ༔ རྩིབས་རྣོ་བ་གཅོད་པའི་ངར་དང་ལྡན་པ༔ ཕྱི་དཀར་ལ་ནང་དམར་བ༔ ཡངས་ཤིང་རྒྱ་ཆེ་བ་རྡོ་རྗེ་ཕ་ལམ་གྱི་རང་བཞིན་དུ་བསྒོམ༔ དེའི་དབུས་སུ་ཧཱིའོད་དུ་ཞུ་བ་ལས༔ གཏོར་མ་འདི་ཉིད་འཇིག་རྟེན་དབང་ཕྱུག་ཡིད་བཞིན་འཁོར་ལོ༔ སྐུ་མདོག་དཀར་ལ་དམར་བའི་མདངས་ཆགས་པ༔ ཞལ་
མ་དང་པོ་དཀར་ལ་འཛུམ་པའི་རང་བཞིན་ཅན༔ དེའི་སྟེང་ན་ཁྲོ་ཞལ་ནག་པོ་སྤྱན་གསུམ་མཆེ་བ་བཞི་གཙིགས་ཤིང་༔ དབུ་སྐུ་ཨག་ཚོམ་མེ་ལྟར་འབར་བ༔ ཝའི་ཞལ༔ སྤྲུལ་པའི་སྐུ་ཅན་བྷན་དུ་ཛི་ཀ་ལྟར་དམར་བ༔ ཕྱག་གཉིས་གཡས་པས་འཁོར་ལོ་ཕྱར་ཞིང་༔ གཡོན་པས་རིན་པོ་ཆེའི་བུམ་པ་དཀུར་བརྟེན་པ༔ ཞབས་གཉིས་པད་ཟླའི་གདན་ལས་བཞེངས་པ༔ ལྷ་རྫས་ཀྱི་ན་བཟའི་སྨད་གཡོགས་ཅན༔ རིན་པོ་ཆེས་བརྒྱན་པར་སྒོམས༔ བསྲུང་བྱ་རྣམས་འཁོར་ལོའི་ནང་དུ་སྒོམས༔ ཐུགས་ཀའི་ཧྲཱི༔ལས་འོད་ཟེར་འཕྲོས་པས་ལྷོའི་ཕྱོགས་ཀྱི་ཞིང་ཁམས་ནས་ཡིད་བཞིན་འཁོར་ལོའི་སྐུ་ཆེ་ཕྲ་དཔག་ཏུ་མེད་པ༔ གསུང་སྔགས་ཀྱི་ཕྲེང་བ༔ ཐུགས་པདྨ་དཀར་པོ་ཧཱིས་མཚན་པ་དཔག་ཏུ་མེད་པ་བྱོན་ནས་ཐིམ༔ དེ་ཡི་སྟེང་གི་ཆ་ལ་རིག་འཛིན་གྲུབ་ཐོབ་རྒྱ་མཚོ༔ བར་གྱི་ཆ་ལ་ཡི་དམ་རྒྱུད་སྡེ་དྲུག་གི་ལྷ་ཚོགས༔ འོག་གི་ཆ་ལ་ཡེ་ཤེས་ཀྱི་ཆོས་སྐྱོང་སྲུང་མའི་ལྷ་ཚོགས་སྤྲིན་འཁྲིགས་པ་ལྟ་བུ་ཁྱེད་རང་གི་སྤྱི་བོར་བྱོན་ཏེ༔ དེ་རྣམས་ཀྱི་སྐུ་གསུང་ཐུགས་ལས་འོད་ཟེར་ཁ་དོག་སྣ་ཚོགས་འཕྲོས་ཏེ༔ ཁྱེད་རང་རྣམས་
ལ་ཐིམ་པས༔ དབང་དང་བྱིན་རླབས་དངོས་གྲུབ་ཐམས་ཅད་ཐོབ་ཅིང་༔ ངེད་ཀྱིས་ཇི་ལྟར་གསོལ་བ་བཏབ་པ་བཞིན་དུ་བྱིན་རླབས་དངོས་གྲུབ་ཐམས་ཅད་ད་ལྟ་ཉིད་དུ་གནང་ཞིང་ཐོབ་བྱུང་སྙམ་པའི་མོས་པ་རྩེ་གཅིག་ཏུ་མཛོད་ཅིག༔ ཧཱུྃ༔ གཏོར་མ་འདི་ནི་ཡིད་བཞིན་འཁོར་ལོ་ཡིན༔ མ་ལུས་འཁོར་བཅས་ལྷམ་མེར་བཞུགས༔ བུ་ཁྱོད་ལ་ནི་དབང་བསྐུར་བས༔ དབང་བཞི་ཡོངས་རྫོགས་ཐོབ་པར་ཤོག༔ ཐུགས་རྗེ་ཆེན་པོ་སྤྱན་རས་གཟིགས༔ དགེ་སློང་དྲི་མ་མེད་པ༔ པཎྜི་ཏ་ཨ་བྷི་ཀ་ར༔ རྩྭ་མི་ལོ་ཙཱ་བ༔ དཔལ་ཆེན་རྒ་ལོ་ཙཱ་བ༔ བདེར་གཤེགས་ཞིག་ཕག་མོ་གྲུ་པ༔ སྟག་ལུང་ཐང་པ་ཆེན་པོ༔ རིན་ཆེན་རཏྣ་ནཱ་ཐ༔ སངས་རྒྱས་ཡར་བྱོན༔ སངས་རྒྱས་དབོན་པོ༔ ཀུན་དགའ་དཔལ༔ ཨོ་རྒྱན་མགོན་པོ༔ ཡོན་ཏན་རྒྱལ་མཚན་ཡོན་ཏན་འོད་ཟེར༔ བློ་གྲོས་རིན་ཆེན༔ དོན་གྲུབ་རིན་ཆེན༔ ཆོས་དཔལ་བཟང་པོ༔ མཚོ་སྐྱེས་རྡོ་རྗེ༔ ཀུན་དགའ་བཀྲ་ཤིས༔ ངག་དབང་རྣམ་རྒྱལ༔ བཀྲ་ཤིས་དཔལ་གྲུབ༔ དགེ་སློང་རཱ་ག་ཨ་སྱ་ལ་སོགས་པ་རིང་བརྒྱུད་ཀྱི་བླ་མ་རྣམས་དང་༔ ཐུགས་རྗེ་ཆེན་པོ་ཡིད་བཞིན་འཁོར་
ལོ༔ མི་འགྱུར་རྡོ་རྗེ་བདུད་འདུལ་རོལ་པ་རྩལ༔ རིག་འཛིན་ཀརྨ་ཆགས་མེད་ལ་སོགས་པ་ཉེ་བརྒྱུད་ཀྱི་བླ་མ་རྣམས་དང་༔ ཐུགས་རྗེ་ཆེན་པོ་ཡིད་བཞིན་འཁོར་ལོ་སྔོན་པོ་ཞལ་གཅིག་ཕྱག་བཞི་པ༔ དཀར་པོ་ཞལ་གསུམ་ཕྱག་གཉིས་པ༔ སེར་པོ་ཞལ་གཅིག་ཕྱག་གཉིས་པ༔ འཁོར་བྱང་ཆུབ་སེམས་དཔའི་བྱེ་བ་ཕྲག་བཅུ་དང་བཅས་པས༔ རྡོ་རྗེ་སློབ་མ་འདི་རྣམས་ལ་བྱིན་གྱིས་བརླབ་པ་དང་དབང་བསྐུར་བར་མཛད་དུ་གསོལ༔ འདི་རྣམས་ཀྱི་ལུས་ངག་ཡིད་གསུམ་ལ་གནོད་ཅིང་འཚེ་བར་བྱེད་པའི་སྟེང་གདོན་གཟའ་དང་རྒྱུ་སྐར༔ འོག་གདོན་ཀླུ་ས་བདག༔ བར་གདོན་གཉན་ཐེའུ་རང་ལ་སོགས་པའི་གདོན་རིགས་སྟོང་ཕྲག་བརྒྱད་ཅུའི་གནོད་པ་ཐམས་ཅད་ཉེ་བར་ཞི་བར་བྱིན་གྱིས་རློབས་ཤིག༔ རླུང་མཁྲིས་བད་ཀན་འདུས་པ་ལས༔ གྱུར་པ་ལ་སོགས་ནད་རིགས་བཞི་བརྒྱ་རྩ་བཞིའི་གནོད་པ་ཐམས་ཅད་ཉེ་བར་ཞི་བར་བྱིན་གྱིས་རློབས་ཤིག༔ ཚེ་བསོད་དཔལ་འབྱོར་ཡོན་ཏན་ཡེ་ཤེས་ཐམསས་ཅད་ཟླ་བ་ཡར་གྱི་ངོ་ལྟར་འཕེལ་ཞིང་རྒྱས་པར་བྱིན་གྱིས་རློབས་ཤིག༔ འཆི་མེད་ཚེ་ཡི་དངོས་གྲུབ་རླུང་སེམས་སྣང་བ་ཐམས་ཅད་དབང་དུ་འདུས་
པར་བྱིན་གྱིས་རློབས་ཤིག༔ བྱང་ཆུབ་སྒྲུབ་པའི་བར་ཆད་བདུད་བཞི་ལོག་འདྲེན་ཐམས་ཅད་ཚར་གཅོད་པར་བྱིན་གྱིས་རློབས་ཤིག སྐྱེ་བ་འདི་ནས་ཚེ་རབས་ཐམས་ཅད་དུ་ཐུགས་རྗེ་ཆེན་པོ་ཡིད་བཞིན་འཁོར་ལོའི་ལྷ་ཚོགས་རྣམས་ཀྱིས་རྡོ་རྗེའི་སློབ་མ་འདི་རྣམས་ཀྱི་ལྷག་པའི་ལྷ་མཛོད་ཅིག༔ ཉིན་གསུམ་གྱི་བྱ་ར་མཛོད་ཅིག༔ མཚན་གསུམ་གྱི་མེལ་ཚེ་མཛོད་ཅིག༔ དུས་མ་ཡིན་པའི་འཆི་བ་དང་༔ འཁོར་བ་དང་ངན་སོང་གི་སྡུག་བསྔལ་ལས་སྐྱོབས་པར་མཛད་དུ་གསོལ༔ ན་མོ་རཏྣ་ཏྲ་ཡཱ་ཡ༔ ན་མོ་ཨར་བ་ལོ་ཀི་ཤྭ་ར་ཡཱ༔ བྷྱོ་དྷི་སཏྭ་ཡ༔ མ་ཧཱ་སཏྭ་ཡ༔ མ་ཧཱ་ཀ་རུ་ཎི་ཀཱ་ཡ༔ ཏདྱ་ཐཱ༔ ཨོཾ་ཙཀྲ་ཝརྟི་ཚིནྡྷ་མ་ཎི་མ་ཧཱ་པདྨེ་རུ་རུ་ཏིཥྛ་ཛྭ་ལ་ཨཱ་ཀར་ཤ་ཡ་ཧཱུྃ་ཕཊ༔ ཨོཾ་པདྨ་ཚིནྡྷ་མ་ཎི་ཛཱ་ལ་ནི་ཧཱུྃ༔ ཨོ་བ་ར་ཏེ་པདྨེ་ཧཱུྃ༔ ཨོཾ་པདྨ་ཚིནྡྷ་མ་ཎི་ཛཱ་ལ་ཧཱུྃ༔ མ་ཉིམ་ཏ་ཡ་ཀ་དིམ་ཧུ༔ ཧ་སྱ་ལ་སྱ་ལེ་ཡེ༔ མྱ་ལྕེ་པྱ་རྒྱ་ཧཱུྃ་ཧྱ༔ དེས་ནི་ཐུགས་རྗེ་ཆེན་པོ་ཡིད་བཞིན་འཁོར་ལོའི་དབང་ལེགས་པར་ཐོབ་པ་ཡིན་པས་འདི་ཉིད་ཀྱི་དམ་ཚིག་ཏུ་འདི་ཡི་དམ་གྱི་ལྷར་བཟུང་སྙམ་པའི་རྗེས་ཟློས་མཛོད༔ གཙོ་བོ་ཁྱེད་ཀྱིས་ཅི་གསུངས་པ༔ གསུངས་བཞིན་མི་འཆུགས་བདག་
གིས་བསྒྲུབ༔ དེང་ནས་བཟུང་སྟེ་ཅི་སྲིད་དུ༔ གཙོ་བོའི་བཀའ་ལས་མི་འདའ་བསྒྲུབ༔ ས་མ་ཡ་ཀ་ཧི་ཧ་པ་ཧཱུྃ༔ ད་གཏང་རག་གི་མཎྜལ་ཕུལ༔ ས་གཞི་སྤོས་སོགས། ཞེས་པ་འདི་ནི་གཟུངས་སྔགས་ཕན་ཡོན་ཆེ་དྲགས་པས༔ འགྲོ་དོན་ཆེ་བར་བསམས་ནས་བཀའ་གཏེར་ཟུང་འཇུག་གི་ཚུལ་དུ་རཱ་ག་ཨ་སྱས་བསྒྲིགས་པའི་ཡི་གེ་པ་ནི་དགེ་སློང་བརྩོན་འགྲུས་ཏེ༔ འགལ་འཁྲུལ་གང་མཆིས་ལྷ་ལ་བཤགས་ཤིང་། དགེ་བས་འགྲོ་དོན་དཔག་ཏུ་མེད་པ་འབྱུང་བར་གྱུར་ཅིག༔ མངྒ་ལཾ༔ དགེའོ༔ ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།