ཉམས་ཆག་སྐོང་བྱེད་ཡང་དག་གི་དབང་།
ཉམས་ཆག་སྐོང་བྱེད་ཡང་དག་གི་དབང་བཞུགས་སོ།།
ན་མོ་ཧེ་རུ་ཀ་ཡེ། གནས་ཆོས་དགོངས་གཏེར་བཀའ་གཏེར་ཟུང་འཇུག་ཡང་དག་གི་དབང་ནི། འདབ་བརྒྱད་དམ་འབྲུའི་ཚོམ་བུའི་སྟེང་དུ་བུམ་པ་མཆོད་གཏོར་སྤྱི་ལྟར་བཤམས། རང་ཉིད་དང་མདུན་བསྐྱེད་ཡང་དག་སྐུ་མདོག་མཐིང་ནག་ཏུ་འདུག་པ། ཕྱག་བཞིའི་གཡས་གཉིས་རྡོ་རྗེ་དང་རྗེའུ་ཆུང་། །གཡོན་གཉིས་སྡིགས་མཛུབ་དང་ཞགས་པ་འཛིན་པ། ཁྲོ་བོའི་ཆས་རྫོགས་པ་མེ་དཔུང་གི་ཀློང་དུ་བཞུགས་པ། ཡུམ་སྔོ་སྐྱ་གྲི་ཐོད་ཅན་གྱིས་འཁྱུད་པར་བསྐྱེད། བདག་མདུན་གཉིས་ཀའི་ཤར་དུ་ཀེའུ་རི་དཀར་མོ་ཞིང་དབྱུག་འཛིན་པ། ལྷོར་ཙོའུ་རི་སེར་མོ་མདའ་གཞུ་འགེངས་པ།
ནུབ་ཏུ་པྲ་མོ་ཧ་དམར་མོ་ཆུ་སྲིན་གྱི་རྒྱལ་མཚན་ཕྱར་བ། བྱང་དུ་བེ་ཏ་ལི་ལྗང་གུ་ཐོད་ཁྲག་འཛིན་པ། ཤར་ལྷོར་པུཀྐཱ་ཙ་སེར་མོ་རྒྱུ་ཞགས་ཟ་བ། ལྷོ་ནུབ་ཏུ་གྷསྨ་རཱི་ལྗང་གུ་དུང་ཁྲག་འཐུང་བ། ནུབ་བྱང་དུ་ཙཎྜ་ལཱི་སེར་མོ་བ་སུ་ཏ་ཟ་བ། བྱང་ཤར་དུ་སྨེ་ཤ་ནི་མཐིང་ནག་བམ་རོ་ཟ་བར་བསྐྱེད། །རྣམ་རྒྱལ་བུམ་པའི་ནང་དུ་བཛྲ་ཧེ་རུ་ཀ་སྐུ་མདོག་མཐིང་ནག་ཞལ་གསུམ་ཕྱག་དྲུག་གྱད་ཀྱི་འདོར་ཐབས་སུ་བསྐྲད་པ། ཞལ་གཡས་དཀར་བ། གཡོན་དམར་བ། དབུས་མཐིང་བ། གཡས་ཀྱི་དང་པོ་ན་རྡོ་རྗེ། བར་མ་ན་བནྡྷ། ཐ་མས་དགྲ་ལྟ།
གཡོན་གྱི་དང་པོས་རལ་གྲི། བར་མས་བྷན་དམར། ཐ་མས་ཐོང་གཤོལ་བསྣམས་པ། ཡུམ་བཛྲ་ཀྲོ་ཏཱི་ཤྭ་རཱི་མ་མཐིང་ནག་གཡས་རྡོ་རྗེ་འཛིན་ནས་ཡབ་ཀྱི་མགུལ་ནས་འཁྱུད་ཅིང་། གཡོན་པས་དུང་དམར་ཡབ་ལ་སྟོབས་པ། གཏོར་མ་ཡང་ཞལ་གསུམ་ཕྱག་དྲུག་ཡུམ་དཀར་འཁྱུད་པ། གཙོ་བོ་བཞི་ཡི་ཐུགས་ཀའི་ཧཱུྃ་ལ་སྔགས་ཀྱིས་བསྐོར་བ་ལས་འོད་ཟེར་འཕྲོས་པས་ཡང་དག་ཐུགས་ཀྱི་ལྷ་ཚོགས་ཆར་བཞིན་བབས་ནས་བདག་མདུན་བུམ་པའི་ལྷ་ལ་ཐིམ་པར་གྱུར། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུཾ། ཞེས་བརྒྱ་རྩ་བརྒྱད་ཡན་ཅི་འགྲུབ་བཟླ། ཨོ་བཛྲ་ཧེ་རུ་ཀ་ཨབྷཾ་སོགས། ཨ་མྲྀ་ཏ་བ་ལིཾ་ཏ་རཀྟ་ཁཱ་ཧི། ཧཱུཾ། ཐུགས་མཆོག་བཛྲ་ཧེ་རུ་ཀ༔ ཡུམ་ཆེན་ཁྲོ་མོ་དཔལ་འབར་མ༔ ཀེའུ་རི་མ་མོ་བརྒྱད་དང་བཅས༔ ཡི་དམ་ལྷ་འོ༔ ལ་ཕྱག་འཚལ་བསྟོད༔ དེ་ནས་སློབ་མར་ཁྲུས་བྱས་མཎྜལ་ཕུལ། འོ་ན་ད་ལམ་ཁྱེད་རྣམས་ལ་ཡང་དག་ཐུགས་མཆོག་བཛྲ་ཧེ་རུ་ཀའི་དབང་བསྐུར་བ་ཡིན་ཏེ། ལྷ་འདིའི་ངོ་བོ་ནི་གསར་མའི་དགྱེས་རྡོར་དང་གཅིག་ཡིན་ཏེ། དགྱེས་རྡོར་ལྷ་དགུ་དང་། ཡང་དག་མར་མེ་དགུ་པ་ཡང་དོན་གཅིག །དེ་ཡང་དཔལ་ཀུན་ཏུ་བཟང་པོ་ཧེ་རུ་ཀའི་སྐུར་བཞེངས་ནས། ཧེ་
རུ་ཀ་གལ་པོའི་མདོ་དང་། ཐུགས་པུཎྜ་རཱི་ཀའི་རྒྱུད་མདོ་དང་། ཡང་དག་རོལ་པའི་རྩ་རྒྱུད་སོགས་འདིའི་རྒྱུད་མང་དུ་གསུངས་པས། གསང་བའི་བདག་པོས་བཀའ་ཡི་བསྡུ་བ་བྱས་ཏེ། མཁའ་འགྲོ་མ་ལས་ཀྱི་དབང་མོ་ཆེ་ལ་གཏད། དེས་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་སོ། །དེ་ཡང་ཐུབ་པ་ཆེན་པོའི་ཞལ་ནས། ང་ནི་མྱ་ངན་འདས་འོག་ན། །ལོ་ནི་ལྔ་བརྒྱ་བདུན་ཅུ་ན། །ཞིང་པ་ལྔ་ཐུབ་ཅན་གྱི་བུ། །ཤྲཱི་ཧཱུྃ་ཀ་ར་ཞེས་འབྱུང་། །ཞེས་ལུང་བསྟན་པ་ལྟར། ཨོ་རྒྱན་རིན་པོ་ཆེ་དགེ་སློང་ཤཱཀྱ་དེ་ཝ་ཞེས་བྱ་བར་སྤྲུལ། བལ་འབངས་ཀཱ་ལ་སིདྡྷི་ཕྱག་རྒྱ་མར་ཁྲིད་ནས། རྔ་ཐུབ་ཅན་གྱི་ཡུལ་དུ་བྱོན་ནས་ནགས་གསེབ་གཅིག་ཏུ་བཞུགས་པ་ན། ཞིང་པ་རྔ་ཐུབ་ཅན་གྱི་བུ་གཞོན་ནུ་གསོ་ལེགས་ཞེས་བྱ་བ་ཞིག་གིས། ཉིན་བཞིན་རྒྱུན་དུ་ནོར་ཕྱུགས་འཚོ་བར་འོང་ནས་འོ་མ་བཞོས་ཏེ་ཕུལ་ལོ། །དེ་ལ་རྡོ་རྗེ་སེམས་དཔའི་དབང་ལུང་གནང་དུས་། ཁོ་ཡི་དཔྲལ་བར་ཧཱུྃ་གཅིག་གཟིགས་པས་ཧཱུྃ་ཀ་ར་བཏགས། ཁོས་རྫི་བོ་བྱེད་ཅིང་བསྒོམས་པས་གྲུབ་པ་ཐོབ་སྟེ་སྤྱི་བོར་རྟ་མགྲིན། ཐུགས་ཀར་རྡོ་རྗེ། དཔྲལ་བར་གཡུ་
ཡི་རྡོ་རྗེ་རྒྱ་གྲམ། བུ་ག་དགུ་ནས་འོད་ཟེར་སྣ་ཚོགས་འཕྲོ་བ། རྐང་མགྱོགས་འགྲུབ་ཅིང་གྲུ་གང་ས་ལ་མ་རེག་པར་འབྱོན་པ་བྱུང་། ཡུལ་མི་རྣམས་ཀྱིས་རྡོ་རྗེ་སེམས་དཔའ་དངོས་ཀྱི་སྐུར་མཐོང་ནས་ཆོས་ཞུས་པས་ཐམས་ཅད་ཆོས་ལ་བཙུད། དེ་ནས་དུར་ཁྲོད་བསིལ་བ་ཚལ་དུ་བྱོན་པས། མཆོད་རྟེན་བདེ་བྱེད་བརྩེགས་པ་ནས་ཡང་དག་གི་རྒྱུད་རྣམས་གཏེར་ནས་ཐོན། ཁོང་ལ་ཨོ་རྒྱན་རིན་པོ་ཆེས་ཀྱང་དེ་རྣམས་གསན་པས། བླ་མར་གྱུར་ནས། ཡང་དག་ཐུགས་ཀྱི་རིག་འཛིན་ཧཱུཾ་ཆེན་ཀ་ར་ཞེས་གྲགས་སོ། །དེ་ནས་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་ལོ་ཙཱ་བ་ལྔ་ཆོས་ཚོལ་དུ་བཏང་བས། སློབ་དཔོན་ཀུ་མ་རཱ་ཙས་ལུང་བསྟན་པས། གསེར་བྲག་བྱ་སྐྱིབས་ཀྱི་ཚལ་དུ་སློབ་དཔོན་ཧཱུཾ་ཆེན་ཀ་ར་དང་མཇལ། སློབ་དཔོན་གྱིས་ཧཱུཾ་ཧཱུཾ་གསུངས་པས་ཤངས་ནས་འོད་ཟེར་ཚྭ་ཚྭ་འཕྲོས། ལོ་ཙཱ་བ་ལྔ་བརྒྱལ་ནས་འགྱེལ། བརྒྱལ་སངས་པ་དང་ཕྱག་འཚལ། གསེར་གྱི་མཎྜལ་ཕུལ་ནས། ངེད་རྣམས་བོད་ཀྱི་ལྷ་འདྲེ་གདུག་པ་མིན། བོད་ཀྱི་རྒྱལ་པོས་གསང་སྔགས་ཀྱི་ཆོས་ཚོལ་དུ་བཏང་། ཚེ་འདི་ཉིད་ལ་རིག་འཛིན་སར་འགྲོ་བའི་ཆོས་སློབ་དཔོན་གྱིས་
གནང་དགོས། ཞུ་རྟེན་གསེར་འདི་ལགས། ཆོས་མ་རྙེད་ན་ངེད་ཚོ་ཁྲིམས་ལ་གཏུགས། ཚེ་གཅིག་སངས་རྒྱས་འགྲུབ་པའི་ཆོས་ཐུགས་རྗེས་ཟུངས། །ཞུས་པས་ཡང་དག་ཐུགས་ཀྱི་ལྷ་ཚོགས་རྣམས་ཞལ་མངོན་སུམ་དུ་བསྟན་ནས་དབང་བསྐུར། ནམ་མཁའི་སྙིང་པོས་ལོ་གཅིག་བསྒྲུབས་པས་མར་མེ་རང་འབར། གཏོར་མ་ཞག་ཏུ་འཁྱིལ། བྷན་དང་བུམ་པ་ཁོལ། དཔལ་ཆེན་ཡབ་ཡུམ་ཞལ་མཇལ། མཆོག་ཐུན་མོང་གི་དངོས་གྲུབ་ཐོབ། དེ་ནས་བོད་དུ་བྱོན་ནས། རྒྱལ་པོ་བསྙུང་བ་ལ་བྱིན་བརླབས་བྱས་པ་ཙམ་གྱིས་ཕན། རྒྱལ་པོས་ཡང་དག་གི་ཆོས་སྐོར་རྣམས་ཞུས། བླ་མར་བཀུར་བ་ལ་བློན་པོ་རྣམས་ཀྱིས་རྒྱལ་པོས་གཡོག་པོ་ལ་ཕྱག་འཚལ་བ་མི་འཐད། བནྡེ་མཐུ་ཆེན་འདིས་རང་རེ་ལ་མཐུ་བྱེད་འོང་བས་བསད་དགོས་ཟེར་ནས་གྲོས་འཚམས། བློན་པོ་རྣམས་ཀྱིས་མདའ་རྩེ་མདུང་རྩེ་བརྡར་ཏེ། རྗེ་རྒྱལ་པོ་ནི་སྤྱང་ཀི་ལྟར་འདར་ཕྲད་ཕྲད་མཛད་པ་དང་སློབ་དཔོན་གྱིས་ག་ཏ་ཤ་གསུངས་ནས་དཔྲལ་བར་ཐལ་མོ་སྦྱར་བར་བློན་པོའི་ལག་ནས་མཚོན་ཆ་ཐམས་ཅད་ས་ལ་བྲུལ་ཏེ། ཧད་ཧད་ལུས་པ་དང་། སློབ་དཔོན་ནམ་
མཁའི་སྙིང་པོ་བཞེངས་ནས་མ་མགོན་གཉིས་ཀྱི་དྲུང་ནས་ཞབས་ཀྱིས་རྡོག་ཐོག་རེ་བརྒྱབ་སྟེ་ཁྱེད་གཉིས་ཕར་ལོང་ལ་ད་འགྲོ་ན་ནི་འགྲོ་གསུངས་པས། ལྷ་མོ་དང་མགོན་པོ་གཉིས་ཆགས་ཕྱིར་བྱུང་བ་དང་། སློབ་དཔོན་གྱིས་ཧཱུྃ་ཧཱུྃ་ཞེས་ཐང་གསུམ་དྲག་ཏུ་བརྗོད་པས། ཐོག་ཕབ་ནས་བྱུང་སྟེ། སྡིགས་མཛུབ་ཀྱི་རྩེ་ལ་དྲིལ་ནས་བར་སྣང་དུ་དམར་ཧྲིལ་གྱིས་བྱུང་སྟེ་འོ་འཇང་གི་བྲག་ལ་བརྒྱབས་པས་བྲག་ཀྱང་ཤིག་ཆོ་ལོ་ལོ་ཙམ་དུ་བཏང་སྐད་དོ། །དེའི་ཚེ་མི་ཀུན་ཀྱང་བརྒྱལ་བ་དང་རེངས་པར་གྱུར་ཏེ། སློབ་དཔོན་གྱིས་རྗེ་ལ་མ་བརྙས་ལགས་སམ། ཞུས་པས་རྒྱལ་པོས། འཇིགས་དང་འཇིགས་ཆེན་གནམ་ལྕགས་ཐོག་ཆེན་པས། བན་དེའི་ཧཱུཾ་སྐད་དེ་ལ་འཇིགས། བློན་པོ་ནག་པོ་འདི་ཀུན་ལ་ད་རེས་དེ་རེ་ཚིམ་ཞེས་གསུངས་པའི་ཚེ། སློབ་དཔོན་ནམ་མཁའི་སྙིང་པོ་ནམ་མཁར་ལ་ཕར་འཕུར་ཚུར་འཕུར་མཛད་པས། རྒྱལ་པོ་ཤིན་ཏུ་ཐུགས་དགྱེས་ཏེ་ཕྱག་གཡས་ཀྱིས་འཚལ་ལོ། །གཞན་ཡང་ཉི་ཟེར་ལ་ཆིབས་པ་དང་། བྲག་ལ་ཕུར་པ་འདེབས་པ་སོགས་མཛད་པས་བོད་ཀྱི་གྲུབ་ཐོབ་མི་དགུའི་ནང་ནས་ཡང་དག་ཐུགས་ཀྱི་གྲུབ་ཐོབ་ནམ་མཁའི་སྙིང་པོ་ཞེས་
ཡོངས་སུ་གྲགས་སོ། །དེ་ལ་རྒྱལ་པོས་དབང་ཞུས་པའི་ཞོར་ལ། ཆོས་བློན་ཤུད་པུ་དཔལ་གྱི་སེང་གེས་ཀྱང་ཞུས་ནས་ཉམས་སུ་བླངས་ནས་གྲུབ་པ་ཐོབ་སྟེ་། སྡིགས་མཛུབ་ཀྱིས་ཡར་ཁྱབ་གཙང་པོ་ཞག་གསུམ་གྱེན་དུ་བཟློག་པ་དང་། ནམ་མཁའ་ལ་སྐྱིལ་ཀྲུང་གིས་བཞུགས་ཆོག་པ་བྱུང་། དུས་ཕྱིས་ཤུད་པུ་དཔལ་གྱི་སེང་གེའི་སྐྱེ་མཐའ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་སྤྲེལ་ལོ་བྱ་ཟླ་བའི་དམར་པོའི་ཚེས་བཅུ་ལ། དཔལ་ཆེན་ཉིད་ཀྱིས་ཡང་དག་གཙོ་རྐྱང་གི་སྒྲུབ་པ་གནང་། དགུང་ལོ་བཅུ་བདུན་གླང་གི་ལོ་སྔོན་ཤུད་པུ་དཔལ་སེང་དུས་ཀྱི་བག་ཆགས་དྲན་ནས། ཡང་དག་དབུ་དགུ་དང་ཀེའུ་རི་མ་བརྒྱད་ཀྱི་སྒྲུབ་ཐབས་དབང་དང་བཅས་པ་རྩ་ཚིག་དགོངས་གཏེར་ལས་ཕབ་པ་ཡིན་ཏེ། བརྒྱུད་པ་ཉེ་ཞིང་བྱིན་རླབས་ཀྱི་ངད་མ་ཡལ་བའོ། །གཞན་ཡང་རཏྣའི་གཏེར་ཁ་སོགས་ཀྱང་ཐོབ་ཅིང་། དེ་ཉིད་ལས། བཅོམ་ལྡན་དཔལ་ཆེན་བཛྲ་ཧེ་རུ་ཀ །ཐུགས་ཀྱི་ལྷ་མཆོག་ཤིན་ཏུ་གསལ་ཞིང་གཉན། །བདག་ཉིད་སྒྲུབ་པ་མཐར་ཕྱིན་རྣལ་འབྱོར་པ། །བདག་འདྲ་གནུབས་བན་ནམ་མཁའི་སྙིང་པོ་ལ། །ཐུགས་ཀྱི་གསང་སྒྲུབ་མན་
ངག་ཟབ་ཏུ་དྲིལ། །སྐལ་ལྡན་སྐྱེས་བུ་འདི་ལ་སུས་འབད་པ། །དངོས་གྲུབ་ལོ་ཟླ་ཙམ་གྱིས་ཐོབ་པར་འགྱུར། །གྲངས་ཀྱི་བསྙེན་པ་བདུན་འབུམ་ཉི་ཁྲིས་འགྲུབ། །གསང་སྔགས་འདི་ལ་སུས་བརྩོན་པ། །ཁྱད་པར་རྩ་བ་ཡན་ལག་དམ་ཚིག་རྣམས། །སྡོམ་གསུམ་ཚུལ་ཁྲིམས་ཉམས་སོགས་མ་ལུས་པ། །ཐམས་ཅད་འདི་ཡིས་སོར་ཆུད་ཉམས་ཆག་བསྐང་། །དངོས་གྲུབ་རྣམ་གཉིས་ཡེ་ནས་ངེས་ཐོབ་ཅིང་། །ཁྱད་པར་ཉམས་ཆག་བསྐང་བའི་མཐར་ཐུག་གོ །རིག་འཛིན་ཚེ་ཡི་མཆོག་ཀྱང་འདིས་འགྲུབ་བོ། །ཅི་ཕྱིར་ཞེ་ན་གསང་བ་ཐུགས་སྒྲུབ་ཡིན། །ཟབ་མོ་ཐུགས་ཀྱི་སྒྲུབ་པ་བླ་མེད་འདི། །ཡང་དག་ཐུགས་ཀྱི་སྒྲུབ་པ་ཕྱོགས་གཅིག་དྲིལ། །ཟབ་དོན་ཉུང་དྲིལ་ཉམས་སུ་བླང་བར་བདེ། །འདི་ལས་ཟབ་པའི་ཐུགས་སྒྲུབ་མཐར་ཐུག་པ། །འཇིག་རྟེན་འབྱུང་བར་ག་ལ་སྲིད། །ཚེ་སྔོན་བསོད་ནམས་བསགས་པའི་ལས་འཕྲོ་ཡིས། །འདི་དང་ཕྲད་པར་གྱུར་པ་མ་ལགས་པ། །བཙལ་བས་འཇིག་རྟེན་ཁམས་ནས་ག་ལ་རྙེད། །དེ་ཕྱིར་འདི་ལ་བརྩོན་པ་རྟག་ཏུ་བསྐྱེད། །དངོས་གྲུབ་གཞན་ལས་མྱུར་རམ་སྒྲུབ་ལ་ལྟོས། །ཞལ་མཇལ་ལུང་སྟོན་
ཐུགས་རྒྱུད་བྱིན་གྱིས་བརླབས། །ཉི་ཤར་བྲག་རིར་འཛེག་ཅིང་གཅེར་ཁྲུས་བྱེད། །རབ་ཏུ་དར་ཆེན་ཕྱར་རམ་དུང་ཆེན་འབུད། །མི་མང་ཁྲོམ་ཚོགས་འདུ་དང་དགེ་བ་བསྐུལ། །དེ་སོགས་རྟགས་ཀྱི་རིམ་པ་བསམ་མི་ཁྱབ། །བདག་འདྲ་ནམ་མཁའི་སྙིང་པོའི་ཐུགས་བཅུད་འདི། །མ་འོངས་ཐུགས་ཀྱི་སྲས་དང་ཕྲད་པར་ཤོག །ཅེས་གསུངས་པས། སྡིག་པ་དང་ཉམས་ཆག་དག་པའི་དབང་ཞུ་བའི་ཕྱིར་རྗེས་ཟློས་མཛོད། །དུས་གསུམ་སངས་རྒྱས་ཐམས་ཅད་དང་། །ཡང་དག་ཐུགས་ཀྱི་ལྷ་ཚོགས་ལ། །གསོལ་བ་འདེབས་སོ་དབང་བསྐུར་སྩོལ། །དེ་ནི་ལན་གསུམ་བརྗོད་པའོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་གཉིས་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་
སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་མྱུར་ཐོབ་ཤོག །ད་སློབ་མ་ཡང་དག་མཐིང་ནག་དབུ་དགུ་མཐིང་ནག་ཏུ་འདུག་པ། ཕྱག་བཞིའི་གཡས་གཉིས་རྡོ་རྗེ་དང་རྗེའུ་ཆུང་༔ གཡོན་གཉིས་སྡིགས་མཛུབ་དང་ཞགས་པ་འཛིན་པ། ཁྲོ་བོའི་ཆས་རྫོགས་པ་མེ་དཔུང་གི་ཀློང་ན་བཞུགས་པ། ཡུམ་གྲི་ཐོད་ཅན་གྱིས་འཁྱུད་པ། བླ་མས་རྡོ་རྗེ་དྲིལ་བུ་བྱིན་གྱིས་བརླབ་ཅིང་གསལ་བཏབ་སྟེ། ཧཱུྃ་ལས་རྡོ་རྗེ་ཐབས་ཀྱི་རང་བཞིན། ཨོཾ་བཛྲ་ཏིཥྛ་ཛྷཱ་ན་ས་མ་ཡེ་ཧཱུྃ། ཨཾ་ལས་དྲིལ་བུ་ཤེས་རབ་ཀྱི་རང་བཞིན། ཨོཾ་ཧེམཾ་གུ་ལན་རི་ཥ་ཏ་ཧཱུྃ། །གཡོན་དྲིལ་བུ་འཁྲོལ་ལ་གཡས་ཀྱི་རྡོ་རྗེས་སློབ་མའི་ཐད་དུ་དབུ་དགུ་བཅོས་ཤིང་བྲི་བའི་ཚུལ་བྱ་ཞིང་ཚིག་དང་དམིགས་པས་གསལ་གདབ་ཅིང་ཧཱུྃ་དབྱངས་རེ་བྱ། དམ་ཚིག་ཉམས་ཆག་བསྐང་བའི་ཕྱིར། །བླ་མ་ཀུན་བཟང་ཧེ་རུ་ཀས། །སློབ་མ་འདི་ལ་བྱིན་བརླབ་ཅིང་། །ཡང་དག་ཧེ་རུ་ཀ་ཡི་དབང་ཡང་བསྐུར། །རྩ་ཞལ་མཐིང་ནག་རབ་ཏུ་རྔམ་པར་གསལ། །ཧཱུྃ། གཡས་ཞལ་དཀར་མཐིང་བཞད་པར་གསལ། །ཧཱུྃ། གཡོན་ཞལ་མཐིང་དམར་རབ་ཏུ་གཤེ་བར་གསལ། །ཧཱུཾ། བར་གྱི་རྩ་ཞལ་མཐིང་ནག་ཐོད་དཀར་གཟིགས། །ཧཱུཾ། གཡས་ཞལ་
དཀར་མཐིང་གྱེན་དུ་གཟིགས། །ཧཱུཾ། གཡོན་ཞལ་མཐིང་དམར་སྤྱན་གསུམ་ཐུར་དུ་གཟིགས། །ཧཱུྃ། སྟེང་གི་རྩ་ཞལ་མཐིང་ནག་རབ་ཏུ་ཁྲོས། །ཧཱུྃ༔ སྟེང་གི་གཡས་ཞལ་མཐིང་དཀར་རབ་ཏུ་བཞད། །ཧཱུྃ། སྟེང་གི་གཡོན་ཞལ་མཐིང་དམར་རབ་ཏུ་རྔམ། །ཧཱུཾ། ཀུན་ཀྱང་དབུ་སྐྲ་དམར་སེར་གྱེན་དུ་འབར། །ཐོད་སྐམ་རིན་ཆེན་རྩེ་བྲན་ལྔ་ལྔས་སྤྲས། །ཧཱུཾ་ཧཱུཾ་ཧཱུཾ། ཧཱུཾ་ཧཱུཾ། དེ་ནས་སློབ་དཔོན་གྱིས་ཕྱག་གཡོན་དྲིལ་བུས་ཕྱག་བཅོལ་པའི་ཚུལ་བྱ་ཞིང་། ཕྱག་བཞི་གཡས་ཀྱི་དང་པོས་རྡོ་རྗེ་བསྣམས་བྷྱོ༔ ཕྱག་བཞི་གཡོན་གྱི་དང་པོས་སྡིགས་མཛུབ་བསྒྲེང་ཕྱག་བཞི་གཡས་ཀྱི་འོག་མས་རྗེའུ་ཆུང་བསྣམས་བྱོ༔ ཕྱག་བཞི་གཡོན་གྱི་འོག་མས་ཞགས་པ་འཛིན་བཱོ༔ ཡིད་ཀྱིས་ཞབས་བཅོལ་ཞིང་། ཞབས་གཡས་བསྐུམས་པས་ཕོ་བདུད་དྲེགས་པ་མནན་དྷ། ཞབས་གཡོན་བརྐྱངས་བས་མོ་བདུད་དྲེགས་པ་མནན་དྷ། ཞེས་བྱས། དེ་ནས་ཡུམ་ཡང་དམིགས་པས་གསལ་གདབ་སྟེ།། ཡུམ་ནི་སྔོ་སྐྱ་གྲི་ཐོད་ཅན་གྱིས་འཁྱུད། འོ་དེ་ལྟར་ཁྱེད་རང་རྣམས་དམ་ཚིག་གི་ཧེ་རུ་ཀར་གསལ་བའི་གནས་གསུམ་ཡི་གེ་གསུམ་ལས་འོད་ཟེར་འཕྲོས། ཡེ་ཤེས་པ་དཔག་ཏུ་མེད་
པ་སྤྱན་དྲངས་སིབ་སིབ་ཐིམ་པར་གྱུར། ཧཱུྃ། ཡང་དག་ཐུགས་ཀྱི་ལྷ་ཚོགས་མ་ལུས་རྣམས། །གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ། །སྐལ་ལྡན་དད་ལྡན་འདི་ལ་དབང་མཆོག་བསྐུར། །ལོག་འདྲེན་ཚེ་ཡི་བར་ཆད་བསལ་དུ་གསོལ། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། བཛྲ་ཨཱ་ཝེ་ཤ་ཡ་ཨ་ཨཱཿ རྡོ་རྗེ་སྤྱི་བོར་བཞག །ཏིཥྛ་བཛྲ། བུམ་པ་ཐོགས་ལ། ཧཱུྃ༔ བུམ་པ་འདི་ནི་རིན་ཆེན་ཁང་། །ཡང་དག་འཁོར་བཅས་བཞུགས་པ་ཡི། །དབང་བཞི་ཡོངས་རྫོགས་ཐོབ་པར་ཤོག །ཨོཾ་སརྦ་ཏ་ཐཱ་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཆས་བཅུ་ནི། ཧཱུྃ། ང་རྒྱལ་མ་སྤངས་སྐུ་ལྔས་འགྲོ་དོན་མཛད། །ཡེ་ཤེས་ལྔ་ལྡན་ཐོད་ཕྲེང་དབང་བསྐུར་རོ། །ཨོཾ་ཨཱཿཧཱུྃ་ཧཱིབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛ༔ཛཨ་བྷི་ཥིཉྩ་སྭཱ་ཧཱ།། ཧཱུྃ༔ གཏི་མུག་མ་སྤུངས་ཤེས་རབ་འགྲོ་དོན་མཛད། །སྤྲོས་བྲལ་གླང་ཆེན་ཀོ་རློན་དབང་བསྐུར་རོ། །ཨོཾ་ཨཱཧཱུྃ་ཧཱུྃ༔བཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ། ཞེ་སྡང་མ་སྤངས་ཐབས་ཀྱིས་འགྲོ་དོན་མཛད། །ཀུན་གྲོལ་སྦྲུལ་གྱི་ཆུན་པོས་དབང་བསྐུར་རོ། །ཨོཾ་ཨཱཿཧཱུྃ། ཧིབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ། ཕྲག་དོག་མ་
སྤངས་ཚད་མེད་འགྲོ་དོན་མཛད། །ཕྲིན་ལས་བཞི་ལྡན་ཞིང་ཀོས་དབང་བསྐུར་རོ། །ཨོཾ་ཨཱཿཧཱུྃ་ཧཱིབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛ༔ཛཨ་བྷི་ཥིཉྩ་སྭཱ་ཧཱ། ཧཱུྃ། འདོད་ཆགས་མ་སྤངས་དཔའ་བས་འགྲོ་དོན་མཛད། །ཁམས་གསུམ་སྒྲོལ་མཛད་སྟག་ཤམ་དབང་བསྐུར་རོ། །ཨོཾ་ཨཱཿཧཱུྃ་ཧྲིབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ༔ མཁའ་དབྱིངས་རྣམ་དག་རཀྟས་གདུག་པ་སྒྲོལ། །ཁམས་གསུམ་དབང་སྡུད་ཁྲག་ཆེན་དབང་བསྐུར་རོ། །ཨོཾ་ཨཱཧཱུཾ་ཧཱུཾབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ༔ བསོད་ནམས་ཚོགས་ཆེན་རྒྱུ་དྲུག་འཁོར་བའི་བཅུད། །བྱང་ཆུབ་ཞག་གི་ཟོ་རིས་དབང་བསྐུར་རོ། །ཨོཾ་ཨཱཧཱུྃ་ཧཱིབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ། སྐྱེ་ཤི་རྩད་གཅོད་འཁོར་བ་སྒྲོལ་མཛད་པའི། །གདུག་པ་ཀུན་འདུལ་ཐལ་ཆེན་དབང་བསྐུར་རོ། །ཨོཾ་ཨཱཿཧཱུྃ་ཧཱུྃབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ། མི་འགྱུར་མི་ཤིགས་སྲིད་གསུམ་འཇོམས་མཛད་པའི། །ཅེས་ཀྱང་མི་ཚུགས་གོ་ཁྲབ་དབང་བསྐུར་རོ། །ཨོཾ་ཨཱཧཱུཾ་ཧཱུཾབཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ། ཡེ་
ཤེས་མེ་འབར་འཁོར་བའི་རྒྱ་མཚོ་སྐེམ། །མ་རིག་མུན་སེལ་མེ་དཔུང་དབང་བསྐུར་རོ། །ཨོཾ་ཨཱཧཱུྃ་ཧཱུྃ༔བཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། ཧཱུྃ། ཕར་ཕྱིན་དྲུག་ལྡན་ཤེས་རབ་ཡུམ་དགུའི་བརྒྱན། །རུས་པའི་རྒྱན་དྲུག་གཟིག་ཤམ་དབང་བསྐུར་རོ། །ཨོཾ་ཨཱཿཧཱུྃ་ཧཱུྃ༔བཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛཨ་བྷི་ཥིཉྩ་སྭཱ་ཧཱ། དེ་ནས་དུར་ཁྲོད་ཀྱི་ཆས་བརྒྱད་ཁྲོ་བོའི་ཆས་རྣམས་གསོལ་ཞེས་པའི་དོན་ནོ། །དེ་ནས་ལྷ་དགུ་པོའི་སྐུ་ཙཀླུའམ་ཕྱག་མཚན་ཐོགས་ལ། ཨཱཿ དམ་ཚིག་ཉམས་ཆག་བསྐང་བའི་ཕྱིར། །བཅོམ་ལྡན་བཛྲ་ཧེ་རུ་ཀས། །སློབ་མ་འདི་ལ་བྱིན་བརླབ་ཅིང་། །ཡང་དག་ཧེ་རུ་ཀ་ཡི་དབང་ཡང་བསྐུར། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨཱཿ དམ་ཚིག་ཉམས་ཆག་བསྐང་བའི་ཕྱིར། །ཀེའུ་རུ་དཀར་མོ་ཞིང་དབྱུག་འཛིན། །སློབ་མ་འདི་ལ་བྱིན་བརླབ་ཅིང་། །ཀེའུ་རི་དཀར་མོའི་དབང་ཡང་བསྐུར། །ཨོཾ་བཛྲ་ཀེའུ་རི་ཊེ་ཏྲི་ཊི་མ་དུ་བྱོ༔ ཨཱཿ དམ་ཚིག་ཉམས་ཆག་བསྐང་བའི་ཕྱིར། །ཙོའུ་རི་སེར་མོ་མདའ་གཞུ་འགེངས། །སློབ་མ་འདི་ལ་བྱིན་བརླབ་ཅིང་། །ཙོའུ་རི་སེར་མོའི་དབང་ཡང་བསྐུར། །ཨོཾ་བཛྲ་ཙོའུ་རི་ཤལྤ་ཤལྤ་རྒྱུག་ནི་རྒྱུག་ནི་བྷྱོ༔ ཨཱཿ དམ་
ཚིག་ཉམས་ཆག་བསྐང་བའི་ཕྱིར། །པྲ་མོ་དམར་མོ་ཆུ་སྲིན་རྒྱལ་མཚན་ཕྱར། །སློབ་མ་འདི་ལ་བྱིན་བརླབ་ཅིང་། །པྲ་མོ་དམར་མོའི་དབང་ཡང་བསྐུར་། །ཨོཾ་བཛྲ་པྲ་མོ་ཧ་ཧི་ལི་ཧི་དུ་དྷུ་རུ་མུ་ཙུག་གུ་བྷྱོ། ཨ་དམ་ཚིག་ཉམས་ཆག་བསྐང་བའི་ཕྱིར། །བེ་ཏ་ལྗང་གུ་ཐོད་ཁྲག་འཛིན། །སློབ་མ་འདི་ལ་བྱིན་བརླབ་ཅིང་། །བེ་ཏ་ལྗང་གུའི་དབང་ཡང་བསྐུར། །ཨོཾ་བཛྲ་བེ་ཏ་ལཱི་ཤ་ཏང་ཏང་ཁྲག་ལ་ཁྲུ་བྷྱོ༔ དམ་ཚིག་ཉམས་ཆག་བསྐང་བའི་ཕྱིར། །པུཀྐ་སེར་མོ་རྒྱུ་ཞག་ཟ། །སློབ་མ་འདི་ལ་བྱིན་བརླབ་ཅིང་། །པུཀྐ་སེར་མོའི་དབང་ཡང་བསྐུར། །ཨོཾ་བཛྲ་པུཀྐ་ཙ་ཏ་བྷྱོ་བྷྱོ་མ་ཏྲི་མ་དྲི་དུ་རུ་བྷྱོ༔ ཨཱཿ དམ་ཚིག་ཉམས་ཆག་བསྐང་བའི་ཕྱིར། །གྷསྨ་ལྗང་གུ་དུང་ཁྲག་འཐུང་། །སློབ་མ་འདི་ལ་བྱིན་བརླབ་ཅིང་། །གྷསྨ་ལྗང་གུའི་དབང་ཡང་བསྐུར། །ཨོཾ་བཛྲ་གྷསྨཱ་རི་ཤ་ཡེར་ཤ་ཡེར་དུ་ནི་བྷྱོ། ཨཱཿ དམ་ཚིག་ཉམས་ཆག་བསྐང་བའི་ཕྱིར། །ཙཎཱ་སེར་མོ་རྒྱུ་མ་ཟ། །སློབ་མ་འདི་ལ་བྱིན་བརླབ་ཅིང་། །ཙཎྜ་སེར་མོའི་དབང་ཡང་བསྐུར། །ཨོཾ་བཛྲ་ཙཎྜ་དུ་ན་བུ་བུ། ཤེལ་བུ་སྙིང་ལ་བྷྱོ། དམ་ཚིག་ཉམས་ཆག་
བསྐང་བའི་ཕྱིར། །སྨེ་ཤ་མཐིང་ནག་བམ་རོ་ཟ། །སློབ་མ་འདི་ལ་བྱིན་བརླབ་ཅིང་། །སྨེ་ཤ་མཐིང་ནག་དབང་ཡང་བསྐུར། །ཨོཾ་བཛྲ་སྨེ་ཤ་ནི་ལམ་བྷ་ར་ཨི་ཧུ་ལུ་ཧུ་ལུ་སྦྱོ༔ ད་གཏོར་མ་འདི་ཉིད། ཐུགས་ཀྱི་ཡང་དག་སྐུ་མདོག་སྔོ། །རྡོ་རྗེ་རིགས་ཀྱི་ལྷ་རྣམས་འདུས། །ཞལ་གསུམ་གཡས་ཞལ་དཀར་བ་ཡིས། །ལྷ་རྣམས་ཡིད་འཕྲོག་གཡོན་ཞལ་དམར། །ཀླུ་རྣམས་ཡིད་འཕྲོག་ཕྱག་དྲུག་གིས། །གཡས་པས་རྡོ་རྗེས་བདུད་བཞི་བཅོམ། །གཡོན་པས་སྡིགས་མཛུབ་ཡེ་ཤེས་ལྡན། །འོག་གཡས་རྡེའུ་ཆུང་འཁོར་བར་འདས། །འོག་གཡོན་ཌ་རུས་བགེགས་རྣམས་མྱོས། །འོག་གཡས་མེ་དཔུང་གཉིས་འཛིན་བསྲེགས། །འོག་གཡོན་ཞགས་པས་རྣམ་རྟོག་འཆིང་། །ཡུམ་དཀར་འཁྱུད་པས་བདེ་བ་བསྐྱེད། །པད་ཉིར་བཞུགས་པས་རང་རྟགས་ལྡན། །དུར་ཁྲོད་ཆས་རྫོགས་འཇིགས་ཚུལ་སྟོན། །ཐུགས་ཀར་ཧཱུྃ་ནག་ས་བོན་ཚུལ། །དེ་ལ་སྔགས་ཀྱིས་བསྐོར་བར་བསྒོམ། །དེའི་སྟེང་གི་ཆ་ལ་བརྒྱུད་པའི་བླ་མ། བར་གྱི་ཆ་ལ་ཡང་དག་ཐུགས་ཀྱི་ལྷ་ཚོགས་སྤྲིན་འཁྲིགས་པ་བཞིན་དུ་སྤྱི་བོར་བྱོན། འོད་དུ་ཞུ། ཁྱེད་རང་རྣམས་ལ་ཐིམ་པར་
སྒོམས། གཏོར་མ་ཐོགས་ལ། ཧཱུྃ། གཏོར་མ་འདི་ནི་ཡང་དག་ཡིན། །མ་ལུས་འཁོར་བཅས་ལྷམ་མེར་བཞུགས། །བུ་ཁྱོད་ལ་ནི་དབང་བསྐུར་བས། །དབང་བཞི་ཡོངས་སུ་རྫོགས་ཐོབ་ཤོག །ཆོས་སྐུ་ཀུན་ཏུ་བཟང་པོ། དྲུག་པ་རྡོ་རྗེ་འཆང་ཆེན།། གསང་བདག་ཕྱག་ན་རྡོ་རྗེ། མཁའ་འགྲོ་མ་ལས་ཀྱི་དབང་མོ་ཆེ། སློབ་དཔོན་ཧཱུཾ་ཆེན་ཀ་ར། གནུབས་བན་ནམ་མཁའི་སྙིང་པོ། ཤུད་པུ་དཔལ་གྱི་སེང་གེ མི་འགྱུར་རྡོ་རྗེ་བདུད་འདུལ་རོལ་པ་རྩལ་ལ་སོགས་པ་རིག་འཛིན་བརྒྱུད་པའི་བླ་མ་རྣམས་དང་། ཡང་དག་ཐུགས་མཆོག་བཛྲ་ཧེ་རུ་ཀ །ཀེའུ་རི་མ་མོ་བརྒྱད་དང་བཅས་པས། སྐུ་གསུང་ཐུགས་ཀྱི་སྒོ་ནས་བྱིན་གྱིས་བརླབ་པ་དང་། དབང་བསྐུར་བར་མཛད་དུ་གསོལ་། རྡོ་རྗེའི་སློབ་མ་འདི་རྣམས་ཀྱིས་འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་བར། བཅས་པ་དང་རང་བཞིན་ཁ་ན་མ་ཐོ་བའི་སྡིག་པ་དང་། ལྟུང་བ་དང་། ཕྱི་སོ་སོར་ཐར་པའི་སྡོམ་པ་དང་འགལ་བ། ནང་བྱང་ཆུབ་སེམས་དཔའི་བསླབ་བྱ་དང་འགལ་བ། གསང་བ་རྡོ་རྗེ་ཐེག་པའི་དམ་ཚིག་དང་འགལ་བ། སྒྲིབ་གསུམ་བག་ཆགས་དང་
བཅས་པ་ཐམས་ཅད་ད་ལྟ་ཉིད་དུ་བྱང་ཞིང་དག་པར་བྱིན་གྱིས་རློབས་ཤིག །མི་སྒྲིབ་ཚངས་པ་ཆེན་པོའི་དངོས་གྲུབ་སྩལ་དུ་གསོལ། ཨོཾ་ཨཱཧཱུྃ་ཧཱུྃ༔ བཛྲ་ཧེ་རུ་ཀ་ཙིཏྟ་ཧྲིང་ཧྲིང་ཛཛསྭཱ་ཧཱ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུཾ། ཀཱ་ཡ་ཝཱཀ་ཙིཏྟ་བ་ལིཾ་ཏ་ཨ་བྷི་ཥིཉྩ་མཱི། འོ་དེས་ཡང་དག་ཐུགས་ཀྱི་དབང་ལེགས་པར་ཐོབ་པ་ཡིན་པས། རཏྣའི་གཏེར་ཁ་ནས་བྱུང་བ་ལྟར་གཙོ་རྐྱང་གི་མངོན་རྟོགས་འདོན་ཞིང་། རུ་ལུ་འབྲུ་བརྒྱད་ལ་བསྙེན་པ་བྱེ་བ་གསུམ་ཙམ་བཟླས་ན། དམ་ཚིག་ཉམས་ཆག་ཅི་བྱུང་ཡང་དག་ཅིང་། བདུན་འབུམ་ཉི་ཁྲི་ཙམ་བཟླས་ན་སྡིག་སྒྲིབ་དག་ནས་ཉམས་རྨི་ལམ་དུ་དག་སྣང་འཆར། མངོན་རྟོགས་དྲན་རྫོགས་སུ་བསྒོམ་ནས། ཕྲེང་སྐོར་ཙམ་རྒྱུན་ཁྱེར་བྱས། སྡོམ་པ་དམ་ཚིག་ཉེས་ལྟུང་ཕྲ་ཞིབ་རྣམས་དག་པར་འགྱུར་བས། དེ་ལྟར་བྱ་སྙམ་པས་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །ས་གཞི་སྤོས་སོགས་བརྗོད་པར་བྱའོ། །ཞེས་པ་ཡང་དག་ཐུགས་ཀྱི་སྒྲུབ་པ་འདི་གསང་སྔགས་རྙིང་མའི་གཞུང་ཆེ་ཤོས་ཡིན་ཀྱང་དུས་ཕྱིས་ནུབ་ནས་སྒྲ་མ་གྲག་པར་འདུག་པས་དགོངས་གཏེར་གནམ་ཆོས་དང་གཏེར་རྙིང་དང་གབ་སྤྲད་ནས། གསང་སྔགས་སྔ་འགྱུར་གྱི་བསྟན་
པ་གསོ་བ་དང་། ཕྱི་རབས་ཀྱི་གང་ཟག་དམ་ཚིག་ཆག་ཉམས་ཅན་རྣམས་ངན་སོང་གི་སྡུག་བསྔལ་ལས་སྐྱོབ་པའི་ཕྱིར། སྔགས་འཆང་རཱ་ག་ཨ་སྱས་ཞེས་བྱ་བས་བསྒྲིགས་པའི་ཡི་གེ་པ་ནི་དགེ་སློང་བརྩོན་འགྲུས་ཏེ། འདི་ལ་ཉེས་འགལ་མཆིས་ན་ཆོས་བདག་སྲུང་མའི་ཚོགས་ལ་བཤགས་ཤིང་དགེ་བས་འདི་དང་འབྲེལ་པ་ཐོགས་ཚད་སྡིག་ལྟུང་གི་དྲི་མ་སྐད་ཅིག་ལ་དག་པར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།