བཀའ་གཏེར་ཟུང་འཇུག་གཤིན་རྗེ་ཚེ་བདག་གི་དབང་རྡོ་རྗེའི་གོ་ཁྲབ།
བཀའ་གཏེར་ཟུང་འཇུག་གཤིན་རྗེ་ཚེ་བདག་གི་དབང་རྡོ་རྗེའི་གོ་ཁྲབ་བཞུགས་སོ།།
ན་མོ་གུ་རུ་ཡ་མཱནྟ་ཀ་ཡེ། ཚེ་བདག་མགྱོགས་དབང་རྗེས་གནང་གསལ་བཀོད་བྱ། །ཆོས་བདག་སྲུང་མས་བཀའ་གནང་བྱིན་གྱིས་རློབས། །འདབ་བརྒྱད་དལ་ནི་འབྲུ་ཡི་ཚོམ་བུའི་སྟེང་། །བུམ་པ་གཏོར་མ་ལ་སོགས་དབང་ཆས་བཤམས། །མངོན་རྟོགས་གཅིག་གིས་བདག་མདུན་བུམ་པ་དང་། གཏོར་མ་ལྷ་བསྐྱེད་དྲན་རྫོགས་རྙིང་མའི་ལུགས། །དམིགས་པ་གསལ་བས་གྱེར་བསྒོམ་ཉིད་ཀྱིས་འཐུས། །བླ་མ་འཇམ་པའི་དབྱངས་ལ་སྐྱབས་སུ་མཆི། །འགྲོ་བའི་དོན་དུ་འཇམ་དཔལ་བསྒྲུབ་པར་བྱ། །ཨེ་ཆོས་རྣམས་ཡེ་ནས་བདག་མེད་རྫོགས་པ་ཆེ། །དེ་ལྟར་མ་རྟོགས་འགྲོ་ལ་སྙིང་རྗེའི་མདངས། །རྒྱུ་ཡི་ཡི་གེ་ཧཱུཾ་ལས་འོད་འཕྲོས་
པས། །གནམ་ལྕགས་རྡོ་རྗེ་འཁོར་ལོ་དབྱུག་ཏོ་དང་། །རལ་གྲི་ཕུར་པ་མེ་དཔུང་འབར་བའི་གུར། །དེ་ནང་གཤིན་རྗེ་གླང་རྒོད་ཟུང་བཞིའི་སྟེང་། །པདྨ་ཉི་ཟླའི་སྟེང་དུ་ཧཱུཾ་དེ་བབ། །གནམ་ལྕགས་རྡོ་རྗེ་ཧཱུྃ་གིས་མཚན་པར་གྱུར། །འོད་འཕྲོས་དོན་གཉིས་བྱས་ནས་ཡོངས་གྱུར་ལས། །ༀ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུཾ་ཕཊ། བདག་མདུན་བུམ་ལྷ་གཏོར་མ་གཤིན་རྗེའི་གཤེད། །མཐིང་ནག་ཞལ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་སྤྱན་དགུ་བགྲད། །ཞལ་གདངས་ལྗགས་འདྲིལ་ཨཱ་ར་ལི་སྒྲ་སྒྲོག །སྙན་
གོང་སྦྲུལ་ནག་རུས་རྒྱན་ཁྲོ་ཆས་རྫོགས། །གཡས་གསུམ་འཁོར་ལོ་རལ་གྲི་རྡོ་རྗེ་ཕྱར། །གཡོན་གསུམ་ལྕགས་ཀྱུ་གཏུན་ཤིང་སྡིགས་མཛུབ་མེ། །ཞབས་བཞི་གཡས་བསྐུམ་གཡོན་བརྐྱང་འདོར་ཐབས་བཞེངས། །ཐོད་སྐམ་དབུ་བརྒྱན་ནང་དུ་ཁྲག་འཐུང་ལྔ། །སྤྱི་གཙུག་ཁྱུང་ནག་དུག་སྦྲུལ་དཀར་ནག་ཟ། །དུར་ཁྲོད་དཔལ་ཆས་ཡོངས་རྫོགས་མེ་དཔུང་ནང་། །སྤྲུལ་པའི་གཤིན་རྗེའི་ཕོ་ཉ་བསམ་མི་ཁྱབ། །ཐུགས་ཀར་གསེར་གྱི་འཁོར་ལོ་རྩིབས་བཞི་ཡི། །རྩིབས་བཞིར་འཇམ་དཔལ་གསེར་མདོག་ཞལ་གཅིག་པ། །ཕྱག་གཉིས་རལ་གྲི་ཨུཏྤལ་པོ་ཏིས་མཚན། །རྡོ་རྗེའི་སྐྱིལ་ཀྲུང་གིས་བཞུགས་ནང་གཟིགས་སྲུང་བར་མཛད། །ལྟེ་བར་པད་ཟླ་ཉི་སྟེང་རིན་པོ་ཆེ། །སྣ་ཚོགས་ལས་གྲུབ་མཆོད་རྟེན་འོད་ཟེར་འཕྲོ། །བུམ་ནང་པདྨ་ཉི་ཟླའི་གདན་ལ་ཧཱུྃ། །དེ་ལས་གསེར་གྱི་རྡོ་རྗེ་རྩེ་ལྔ་པ། །ཡར་གྱི་རྭ་ལྔ་རྒྱལ་བ་རིགས་ལྔ་དང་། །མར་གྱི་རྭ་ལྔར་ཡུམ་ལྔས་མཚན་པ་ཡི། །ལྟེ་བར་དབྱངས་གསལ་ལས་གྲུབ་ཉི་ཟླ་ཡི། །གའུའི་ནང་དུ་ཧཱུཾ་ཡིག་ལྟེ་བ་རུ། །ཧཱུཾ་མཐིང་མཐའ་མར་ཨེ་ཀ་ཡ་མས་བསྐོར། །ཧཱུྃ་གི་ཀླད་ཀོར་ནང་དུ་བླ་མ་དང་། །ཁོག་
པར་བསྲུང་བྱ་ཞབས་ཀྱུར་ནོར་རྫ་ས་གསལ། །བདག་ཉིད་ཐུགས་ལས་འོད་ཟེར་བྷྱོ་སྨུག་ནག །གཡོན་དུ་འཕྲོས་པས་ཁྲོ་མོ་ཁྲག་མིག་མ། །སྨུག་ནག་ཞལ་གཅིག་གཅེར་བུ་རྒྱན་མེད་པ། །ཕྱག་གཉིས་ལྕགས་ཀྱུ་ཕྱར་ཞིང་ཐོད་ཁྲག་འཛིན། །འདོར་ཐབས་གཟིག་ཤམ་མ་མོ་བྱེ་བས་བསྐོར། །མེ་དཔུང་ནང་བཞུགས་ཐུགས་ཀར་བྷྱོ་སྨུག་མཐར། །ཨེ་ཀ་ཡ་མ་དུ་རུའི་སྔགས་ཀྱིས་བསྐོར། །ཐུགས་ལས་འོད་ཟེར་དམར་ནག་གཡས་སུ་འཕྲོས། །ཡ་མ་རཱ་ཙ་དམར་ནག་ཞལ་གཅིག་པ། །བཤའ་གྲི་དམར་པོ་ཕྱར་ཞིང་ཙིཏྟ་བསྒྲད། །གཡང་གཞི་གསོལ་ཞིང་སྟག་ལྤགས་ཤམ་ཐབས་ཅན། །མེ་འབར་ཞབས་བརྡེགས་སྡེ་བརྒྱད་འཁོར་དང་བཅས། །ཐུགས་ཀར་ཡལས་བཟླ་བྱའི་སྔགས་ཀྱིས་བསྐོར། །ལྷ་གསུམ་གནས་གསུམ་འཁོར་པད་རྡོ་རྗེའི་ལྟེར། །འབྲུ་གསུམ་མཚན་ལས་འོད་ཟེར་འཕྲོས་པ་ཡིས། །འཇམ་དཔལ་ཡབ་ཡུམ་སྲས་གསུམ་སྲུང་འཁོར་བཅས་།མདུན་གྱི་ནམ་མཁར་སྤྱན་དྲངས་བཛྲ་ས་མཱ་ཛ༔ །ཛཧཱུྃ་བཾ་ཧོས་གཉིས་སུ་མེད་པར་གྱུར། །ཐུགས་ལས་འོད་འཕྲོས་བླ་མ་ཡི་དམ་དང་། །སངས་རྒྱས་བྱང་སེམས་
དཔའ་བོ་མཁའ་འགྲོའི་ཚོགས། །ཆོས་སྐྱོང་ལྷ་སྲིན་དྲེགས་པའི་མཐུ་སྟོབས་དང་། །ལྷ་མིའི་ཚེ་བསོད་འབྱུང་བའི་བཅུད་རྣམས་བསྡུས། །བདག་ཅག་བསྲུང་བྱ་ལ་ཐིམ་བཀྲག་མདངས་རྒྱས། །ཨོ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུཾ་ཕཊ། མ་མ་རཀྵ་རཀྵ་སྭཱ་ཧཱ། ཞེས་དང་། ཨོ་ཨེ་ཀ་ཡ་མ་དུ་རུ་ཙཀྲས་སྲུངས། ཧེ་ཀ་ཡ་མ་དུ་རུ་ཙཀྲས་སྲུངས། བྷཾ་མ་ཡ་མ་དུ་རུ་༧ཙཀྲས་སྲུངས། སརྦ་ཙིཏྟ་གཟེར་ཐུམ་བིག་ནཱན་ཏྲིག་ནན་ཆད་ཡ་བཟློག་ཡ། སཾ་གྷི་བ་རི་ནི་ཧཱུཾ་ཧཱུྃ་ཛ༔ བདག་ཅག་མི་ནོར་འཁོར་དང་བཅས་པ་ལ་རཀྵ་སྭཱ་ཧཱ། ཞེས་ཅི་མང་བཟླས་རྗེས། ཡ་མཱནྟ་ཀ་ས་པ་རི་ཝཱ་ར་ཨརྒྱུ་སོགས་ནས། མ་ཧཱ་པཉྩ་ཨ་མྲྀ་ཏ་བ་ལིཾ་ཏ་རཀྟ་ཁཱ་རཾ་ཁཱ་ཧི། ཚེ་བདག་ཡབ་ཡུམ་སྤྲུལ་པ་ཡང་སྤྲུལ་དང་། །བཀའ་སྡོད་ཕོ་ཉར་བཅས་ལ་ཕྱག་འཚལ་བསྟོད། །ཕྱི་ནང་གསང་མཆོད་འབུལ་གྱིས་དགྱེས་པར་རོལ། །ཉེས་ལྟུང་ཉམས་ཆག་ཀུན་བཤགས་བསྙེན་ཅིང་བསྒྲུབས། །ཞི་རྒྱས་དབང་དྲག་ཕྲིན་ལས་མ་ལུས་པ། །དམ་ལྡན་སྔགས་འཆང་བདག་གིས་སྒྲུབ་མཛད་གསོལ། །བུམ་ལྷ་འོད་དུ་ཞུ་བས་བདུད་རྩིར་གྱུར། །ལས་བུམ་གྱི་ནང་དུ་སྐད་ཅིག་གིས་བདུད་རྩི་འཁྱིལ་པ་གསལ་བར་གྱུར། ཨོཾ་
ཨ་མྲྀ་ཏེ་ཧཱུཾ་ཕཊ། བསྙེན། ལས་བུམ་གྱི་ཁྲོ་བོས་བར་ཆད་ཀྱི་བགེགས་རྣམས་ཟློག་པའི་ཕྲིན་ལས་མཛོད། དེ་ནས་སློབ་མ་འདུས། ཁྲུས་བྱས་མཎྜལ་ཕུལ། འོ་ན། ད་ལམ་ཁྱེད་རྣམས་ལ་བཅོམ་ལྡན་འདས་འཇམ་དཔལ་གཤིན་རྗེའི་གཤེད་ཚེ་བདག་ནག་པོའི་དབང་བསྐུར་བ་ཡིན་ཏེ། ཁྲོ་བོ་ཐམས་ཅད་ཀྱི་ནང་ནས་འདི་མཐུ་སྟོབས་ཆེ་བ་ཡིན་ཏེ། རྒྱུད་ལས། ཁྲོ་བོའི་ནང་ནས་གཤིན་རྗེའི་གཤེད། །དེ་མཐོང་ནས་ནི་ཁྲོ་བོ་གཞན། །ཐམས་ཅད་ཀུན་ཀྱང་ལག་ཆ་འཆོར། །ཞེས་གསུངས་སོ། །དེ་ཡང་ཆོས་དབྱིངས་རྣམ་པར་དག་པའི་ཀློང་། ཡེ་ཤེས་ལྷུན་གྲུབ་ཀྱི་གཞལ་ཡས་ཁང་ན་སངས་རྒྱས་ཐམས་ཅད་ཀྱི་ངོ་བོ་རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ལྷ་དང་མཁའ་འགྲོ་རིག་འཛིན་དྲེགས་པའི་འཁོར་རྣམས་དང་ཐབས་གཅིག་ཏུ་བཞུགས་པའི་ཚེ། རྡོ་རྗེ་སྙིང་པོ་མ་གཏོགས་སེམས་ཅན་ཐུགས་རྗེས་བསྒྲལ་བར་ཞུས་པས། ཕྱག་རྒྱ་ཆེན་པོའི་ཟིལ་གྱིས་གནོན་པའི་ཏིང་ངེ་འཛིན་ལ་བཞུགས་ནས། སྤྱི་སྤྱི་སྤྱི་ཨ་ཀྲོ་ཏེ་ཀ །ཞེས་སོགས་དྲག་པོའི་སྔགས་གསུངས་པས། ནམ་མཁའ་མཐིང་ནག་གྲུ་གསུམ་དུ་གྱུར། རླུང་རྡོ་རྗེ་རྒྱ་གྲམ་ཕྱོགས་
བཅུར་འཐོར། རཀྟའི་རྒྱ་མཚོ་འཁྲུགས། འཇིག་རྟེན་གྱི་ཁམས་ཐམས་ཅད་འཁྲུགས། འུར་འུར་ཆེམ་ཆེམ་མེར་མེར་ཡོམ་ཡོམ་རབ་ཏུ་འགུལ་ཞིང་ལྡེག་གོ །འཁོར་རྣམས་བརྒྱལ་ཏེ་ལུས་ས་ལ་སྡེབ་ཅིང་དྲན་པའི་དབང་པོ་ཉམས་སོ། །དེ་ནས་བཅོམ་ལྡན་འདས་དབུགས་དབྱུང་བའི་ཏིང་ངེ་འཛིན་ལ་བཞུགས་པས། འཁོར་རྣམས་བརྒྱལ་སངས་ནས་རང་རང་གི་སྲོག་སྙིང་མཐུ་རྩལ་ཕུལ་ནས་སྐུ་ལ་འཁྲིལ་ལོ། །དེ་ནས་རྡོ་རྗེ་སྙིང་པོས་ལྔ་བརྒྱ་ཐ་མའི་སྙིགས་མ་ལྔའི་དུས། འཆི་བདག་གི་བདུད་ཁོང་ནས་འཁྲུགས་ཏེ་མཚམས་མེད་ལྔའི་ལས་ངན་སྤྱོད་ཅིང་། ཉི་མ་ཤར་ཕྱོགས་ནས་བདུད་དགའ་རབ་དབང་ཕྱུག་གིས་བསྟན་པ་འཇིགས་པར་བྱེད་པས་སངས་རྒྱས་པའི་ཚུལ་དུ་བཅོས་ཏེ་མུ་སྟེགས་སྤྱོད་པས་ངན་སྔགས་དུག་དབལ་འབྱུང་བ་འདུལ་ཕྱིར། སྡིག་པ་ནག་པོ་སྙིང་ལ་རུ་འཛིང་པའི་འཁྲུལ་འཁོར་བཤད་པར་ཞུས་པས། ཆོས་ཀྱི་དབྱིངས་ཀྱི་བྷ་ག་ལ་སྙོམས་པར་ཞུགས་ནས། ཡེ་ཤེས་བཞི་ལས་ཡ་མ་རཱ་ཙ་དང་། མྱོས་བྱེད་འབར་བ་དང་། ཨརྱ་དམར་པོ་དང་། རལ་བ་ཚར་དགུ་དང་བཞིར་སྤྲུལ། དྲེགས་པ་འདུལ་ཞིང་ཟིལ་གྱིས་གནོན་པའི་ཕྱིར།
སྐུ་གསུང་ཐུགས་ལས། ཡ་མ་རཱ་ཙ་དང་། ཕྱག་ན་རྡོ་རྗེ་དང་། རུས་སྦལ་མི་ཟན་དང་། ཡེ་ཤེས་བྱ་ཁྱུང་དང་བཞིར་གྱུར། སྐུ་ཡི་སྤྲུལ་པ་འཆི་བདག གསུང་ལས་སྲོག་བདག །ཐུགས་ལས་ཚེ་བདག་སྤྲུལ་ནས་གདུག་པ་ཅན་འདུལ་བར་གྱུར། གཤེད་ཆེན་སྡེ་བཞི་ལས། ལས་ཀྱི་མོན་པ་བཞིར་སྤྲུལ་ཏེ་ཕོ་གཤེད་སུམ་བརྒྱ་དྲུག་ཅུ་ལ་དབང་བསྒྱུར། མོ་གཤེད་ཀྱི་བདུད་མོ་བཞིས་མོ་གཤེད་སུམ་བརྒྱ་དྲུག་ཅུ་ལ་དབང་བསྒྱུར། དེ་ལྟར་ལོ་གཅིག་ལ་རྒྱུ་བའི་གཤེད་ཆེན་བདུན་བརྒྱ་ཉི་ཤུ་ལ་སོགས་འཇིག་རྟེན་པའི་དྲེགས་པ་ཅན་ཐམས་ཅད་ཡ་མཱནྟ་ཀའི་འཁོར་དུ་བསྐོར་རོ། །དེའི་ཚེ་སྡིག་པ་སྙིང་འབྱིན་གསང་བའི་རྒྱུད་ལེའུ་བཅོ་ལྔ་གསུངས། དེ་ལ་སོགས་པའི་གཞན་ཡང་རྒྱུད་མང་དུ་གསུངས་ཏེ། རྒྱལ་པོ་བཱ་སུ་དྷ་ར་དང་། གནུབས་སངས་རྒྱས་ཡེ་ཤེས་ཀྱིས་བསྒྱུར། བདག་འདྲ་སྔགས་འཆང་པདྨ་ཡིས། །གཤིན་རྗེའི་རྒྱུད་ལུང་ཀུན་གྱི་བཅུད། །ཡང་ཟབ་ཐུགས་ཀྱི་སྤུ་གྲི་འདིས། །གང་ལ་དམིགས་པ་རླག་པར་བྱེད། །བཀའ་འདས་སྲིད་པ་གསུམ་ཡང་བསྲེགས། །དབང་ལྡན་དམ་ཅན་ཡེ་ཤེས་ཆེ། །འདི་འདྲ་ལོ་ཀའི་
ཁམས་ན་དཀོན། །མ་སྤེལ་སྙིང་ཁྲག་བཞིན་དུ་ཆོངས། །འདི་ཡིས་བསྟན་པ་སྲུང་བར་འགྱུར། །ཕུར་ཐོགས་སྟོང་གིས་བྲུབ་ཀྱང་བདག་ནི་གནམ་ལྕགས་ཀྱི་མཁར་དང་འདྲ་ཞིང་། བྱད་མ་ཁོ་རང་ཕུང་ཞིང་ཐ་མ་བརླག་པར་གདོན་མི་ཟའོ། །ཞེས་གསུངས་པས། འབྲུག་ར་ལུང་བ། འབྲུག་པ་ཐམས་ཅད་མཁྱེན་པ། འབྲི་གུང་ཞབས་དྲུང་གོང་འོག །རྡོ་རྗེ་གྲགས་པ། རྒྱལ་བ་ཐམས་ཅད་མཁྱེན་པ་སོགས་དབུས་གཙང་གི་བླ་ཆེན་རྣམས་ཀྱིས་བྱད་ཟློག་གི་ཕུག་འདི་ལ་གཏད་པར་སྣང་། དེའི་དོན་གྱིས་དབུས་གཙང་ན་ཚེ་བདག་མ་ཤེས་ན་སྔགས་པའི་མིང་མེད་ཟེར་སྐད་དོ། །འདིའི་དབང་ཐོབ་ན་བྱད་ཁ་དང་། ཟོར་ཁ་དང་། ཕུར་ཁ་དང་། ལྷ་འགྲས་སོགས་ཟློག་པའི་མཆོག་དམ་པ་ཡིན། །འདིའི་ཆོས་སྐོར་ལྕགས་སྡིག་དང་། ལྕགས་འདྲ་ཞེས་པའི་པོ་ཏི་གཉིས་བྱུང་། དབང་ལ་ཡང་དཀྱིལ་འཁོར་གྱི་དབང་དང་རྗེས་གནང་གཉིས་ལས། འདི་རྗེས་གནང་རྒྱས་པ་ཡིན། འདིའི་བརྒྱུད་པ་ནི། བཀའ་གཏེར་གཉིས་ལས་བཀའ་མ་ནི། རྡོ་རྗེ་འཆང་། རྡོ་རྗེ་སེམས་དཔའ། ཡ་མ་རཱ་ཛ། ཕྱག་ན་རྡོ་རྗེ། དགའ་རབ་རྡོ་རྗེ། འཇམ་དཔལ་
བཤེས་གཉེན། གཙུག་ལག་དཔལ་དགེ །ཤཱནི་གནྡྷ། དཱ་ན་དྷ་ལ། ཁྲག་འཐུང་ནག་པོ། བཱ་སུ་དྷ་ར། སངས་རྒྱས་ཡེ་ཤེས། དམ་པ་རྒྱ་སྟོན། ཡོན་ཏན་རྒྱ་མཚོ། ཡེ་ཤེས་རྒྱ་མཚོ། རོང་སྟོན་ལྕགས་པོ། སློབ་དཔོན་ལྷ་བསྒོམ། བླ་མ་གོང་པ། རྒྱལ་བ་གཡུང་སྟོན། རྒྱལ་བ་རྡོ་རྗེ། དར་མ་འབུམ། །རྣལ་འབྱོར་དབང་ཕྱུག །སྟོན་པ་སངས་རྒྱས་མགོན། བླ་མ་ཁམས་པ། ནམ་མཁའ་ལེགས་པ། རཏྭཱའི་མཚན་ཅན། རིན་ཆེན་དཔལ། སངས་རྒྱས་རིན་ཆེན། རིག་འཛིན་ཆོས་ཀྱི་གྲགས་པ། དཀོན་མཆོག་ཕྲིན་ལས་རྣམ་རྒྱལ། ཀརྨ་རབ་གསལ། དེས་བདག་རཱ་ག་ཨ་སྱ་ལའོ། །གཏེར་མ་བརྒྱུད་པ་ནི། གཙུག་ལག་དཔལ་དགེ་ཡན་ཆད་འདྲ་ལ། སློབ་དཔོན་པདྨ། བཱ་སུ་དྷ་ར། སངས་རྒྱས་ཡེ་ཤེས། རྒྱ་ཞང་ཕྲོམ། ལྷ་རྗེ་གནུབས་ཆུང་། ཚུལ་སྟོན་རིན་ཆེན། རྡོ་རྗེ་སྐུ་ཞང་དཔལ་ལྡན། ཚུལ་ཁྲིམས་རིན་ཆེན། བྱང་ཆུབ་མགོན་པོ། ནམ་མཁའི་མཚན་ཅན། ཚུལ་ཁྲིམས་མཚན་ཅན། ནམ་མཁའ་ལེགས་པ་སོགས་གོང་ལྟར་རོ། །རྡོ་རྗེ་འཆང་། འཇམ་དཔལ་བཤེས་
གཉེན། ཤཱནྟི་གར་བྷ། ཁྲག་འཐུང་ནག་པོ། གཙུག་ལག་དཔལ་དགེ བཱ་སུ་དྷ་ར། སངས་རྒྱས་ཡེ་ཤེས། རྒྱུ་ཞང་ཕྲོམ། གནུབས་ལྕགས་གཏུན་ནག་པོ། གནུབས་སྟོན་ཆོས་གྲགས། གནུབས་བྱ་བྲལ། བཛྲ་རཱ་ཛ། དྷརྨཱ་ཀེ་ཏུ། ཆོས་ཀྱི་བློ་གྲོས། ནམ་མཁའ་དཔལ་ལྡན་རྒྱ་མཚོ། བདུད་འཇོམས་རྡོ་རྗེ། སངས་རྒྱས་རིན་ཆེན། །རྒྱལ་དབང་ཆོས་དབྱིངས་རང་གྲོལ། དཀོན་མཆོག་ཕྲིན་ལས་རྣམ་རྒྱལ། ཀརྨ་རབ་གསལ། བདག་རཱ་ག་ཨ་སྱ་ལའོ། །ཡང་ལུགས་གཅིག་ལ། སངས་རྒྱས་ཡེ་ཤེས་ཡན་གོང་དང་འདྲ། རྒྱ་ཞང་ཕྲོམ། རྒྱལ་བ་གཡུང་སྟོན། བལ་པོ་སྨོན་ལམ་སེངྒེ་། འོད་ཟེར་སེངྒེ་། ཆོས་རྗེ་དཔལ་བཟང་། རྗེ་བཙུན་དངོས་གྲུབ་ལྡིང་པ། ཆོས་ཀྱི་བློ་གྲོས་། ནམ་མཁའ་རྒྱ་མཚོ། བདུད་འཇོམས་རྡོ་རྗེ། སངས་རྒྱས་རིན་ཆེན། ཆོས་དབྱིངས་རང་གྲོལ། དཀོན་མཆོག་ཕྲིན་ལས་རྣམ་རྒྱལ། དེས་བདག་རཱ་ག་ཨ་སྱ་ལའོ། །གཞན་ཡང་རཏྣའི་གཏེར་ཁ་དང་། གནམ་ཆོས་ལུགས་ཀྱང་ཐོབ་པས་བྱིན་རླབས་ཀྱི་བརྒྱུད་པ་གཅིག་ཏུ་འདྲེས་པ་ཡིན་ནོ། །དེ་ལྟ་བུའི་དབང་ཞུ་བའི་ཕྱིར་རྗེས་ཟློས་
མཛོད། སྐྱོན་དག་ཡོན་ཏན་མ་ལུས་རྫོགས། །མཁྱེན་བརྩེར་ལྡན་རྣམས་དགོངས་སུ་གསོལ། །བདག་གཞན་སེམས་ཅན་ཐམས་ཅད་ཀྱི། །སྡིག་སྒྲིབ་ཉེས་ལྟུང་གནོང་འགྱོད་བཤགས། །བླ་མེད་མགོན་ལ་སྐྱབས་སུ་མཆི། །བྱང་ཆུབ་མཆོག་ཏུ་སེམས་བསྐྱེད་དོ། །བསོད་ནམས་ཡེ་ཤེས་ཚོགས་མཆོག་བསགས། །སྡོམ་པ་མ་ལུས་བརྟན་པོར་བཟུང་། །ཀུན་ཀྱང་བྱང་ཆུབ་ཆེན་པོར་བསྔོ། །ལན་གསུམ། ཀྱེ་ཧོ༔ རྒྱལ་བ་ཐམས་ཅད་ཀྱི། །སྐུ་གསུང་ཐུགས་ཀྱི་གསང་འཛིན་པའི། །སློབ་དཔོན་བདག་སོགས་བརྩེར་དགོངས་ལ། །ཚད་མེད་ཐུགས་རྗེའི་ལྕགས་ཀྱུ་ཡིས། །སྡུག་བསྔལ་མཚོ་ལས་བསྒྲལ་དུ་གསོལ། །སྐུ་མཆོག་འཇམ་དཔལ་ལྷ་ཚོགས་ཀྱི། །དབང་མཆོག་དམ་པ་བསྐུར་དུ་གསོལ། །ཞེས་ལན་གསུམ། དེ་ནས་སློབ་དཔོན་གྱིས། ཐར་པ་ཆེན་པོའི་གྲོང་ཁྱེར་གང་། །སྐུ་གསུང་ཐུགས་མཆོག་རྒྱལ་བའི་དཀྱིལ་འཁོར་འདིར། །སུ་ཡིན་འཇུག་པའི་སྐལ་མེད་ཀྱི། །ཁྱོད་ཀྱིས་དམ་ཚིག་བསྲུང་ནུས་སམ། །ཞེས་བརྗོད་ལ། སློབ་མས་རྗེས་ཟློས། བར་མཚམས་མེད་པར་སྡུག་བསྔལ་བའི། །ཆུ་བོ་ཆེ་ལས་རབ་བསྒྲལ་ཏེ། །རྣམ་
གྲོལ་ཐར་གྲོང་གྲོལ་གྱུར་ནས། །དམ་ཚིག་སྲོག་ལ་བབ་ཀྱང་སྲུང་། །སློབ་དཔོན་གྱིས། ལོག་པའི་ལམ་དང་དམན་པའི་ལམ། །མ་རྫོགས་ལམ་དང་ཁྱད་འཕགས་པ། །ཚེ་འདིར་ངེས་པར་འཚང་རྒྱའི་ལམ། །བླ་ན་མེད་པའི་བྲོ་གར་བྱོས། །ཞེས་བརྗོད་པར་སྤྲོ་བ་བསྐྱེད། ཧཱུྃ། འདའ་ཀ་དམ་ཚིག་རྡོ་རྗེའི་ཆུ། །ཁྱོད་ལ་ངས་སྦྱིན་སྙིང་དཀྱིལ་དབབ། །ཡེ་ཤེས་སེམས་དཔའ་དེར་གྱུར་ནས། །མཆོག་ཐུན་དངོས་གྲུབ་མྱུར་ཐོབ་ཤོག་།དམ་ཚིག་བཀའ་ལས་ཁྱེད་འདས་ན། །འཆི་བདག་སྡིག་པ་མགོ་དགུར་གྱུར། །སྙིང་ཁྲག་འཇིབ་ཅིང་དམྱལ་བར་འགྲོ། །དེ་བས་དམ་ཚིག་སྲོག་ལྟར་སྲུངས། །ས་མ་ཡ་རཀྵ་ཁ་ཐམ། ཞེས་བརྗོད་རྡོ་རྗེའི་བདུད་རྩི་སྦྱིན། ཡེ་ཤེས་སེམས་དཔའ་སྙིང་ལ་བསྟིམ། སློབ་བུས། ས་མ་ཡ་ཨི་དན་དུ་ན་ར་ཀན། ད་ཁྱེད་རང་སློབ་མ་ལྷར་བསྐྱེད་པའི་དོན་དུ། ཨོཾ་སྭ་བྷ་ཝ༔ ཆོས་ཐམས་ཅད་རང་བཞིན་གྱིས་སྟོང་ཞིང་བདག་མེད་པར་གྱུར། དྷརྨ་དྷ་ཏུ་ཨ་ཞེས་བརྗོད་པས་ཀུན་ལ་ཁྱབ་པའི་སྙིང་རྗེ་ཆེན་པོར་བསྒོམ། བོ་དྷི་ཙིཏྟ་ཧཱུྃ། རང་སེམས་ཆོས་ཉིད་ངང་ལས་རིག་པའི་ངོ་བོ་ཧཱུྃ་མཐིང་ནག་དེ་ལས་འོད་ཟེར་འཕྲོས་པས། རཾ་ཡཾ་ཁཾ་ཞེས་དངོས་འཛིན་
ཐམས་ཅད་བསྲེགས་གཏོར་བཀྲུས་ནས་སྦྱངས་བར་བྱས། ཧཱུྃ་ལས་ཨེ་ཆད་ནས་ནམ་མཁོར་གྱུར། ཡཾ་ལས་རྡོ་རྗེ་རྒྱ་གྲམ་གྱི་ལྟེ་བར་རཾ་ལས་མེའི་དཀྱིལ་འཁོར། བཾ་ལས་ཆུའི་དཀྱིལ་འཁོར། ལཾ་ལས་གསེར་གྱི་ས་གཞིའི་སྟེང་དུ་ཧཱུཾ་ལས་མཆོད་རྟེན་དཀར་པོ་འོད་ཟེར་ཁ་དོག་ལྔ་ལྡན་འཕྲོ་བའི་ཕྱི་རྒྱུད་ལ་ཨཱ་ལི་ཀཱ་ལི་ལས་གྲུབ་པའི་ངོ་བོ་རྡོ་རྗེ་ཕ་ལམ། རྣམ་པ་བྱང་ཆུབ་ཆེན་པོའི་མཆོད་རྟེན་གདན་ཁྲི་བང་རིམ་གསུམ་པ། རི་རབ་བང་རིམ་བཞི་པ། །བུམ་པ་བྲེ་ཆོས་འཁོར་གདུགས་ཏོག་ཉི་ཟླ་ནོར་བུ་དང་བཅས་།པ། འོད་དང་འོད་ཟེར་ཕྱོགས་བཅུར་འཕྲོ་བ་སྟོང་གསུམ་ཁེངས་པར་གྱུར། བུམ་པའི་ནང་དུ་ཧཱུྃ་ལས་གསེར་གྱི་རྡོ་རྗེ་རྒྱ་གྲམ་གྱི་དྲ་མིག་རྣམས་སུ་རྡོ་རྗེའི་ཚྭ་ཚྭ་སི་ལི་ལི་ཁོལ་བ། ནང་དུ་གའུ་ཁ་སྦྱོར་གྱི་རྣམ་པར་ཡོད་པ། པད་ཟླ་ཉི་མའི་སྟེང་དུ་ཤེལ་གྱི་རྡོ་རྗེ་རྩེ་ལྔ་པ་འོད་ཟེར་ཀུན་ཏུ་འཕྲོ་བའི་ལྟེ་བར་ཧཱུྃ། དེ་ལས་འོད་ཟེར་འཕྲོས་པས། ཡ་མ་ཏི་ར་བཾ་ཞེས་པས་གཤིན་རྗེའི་ཕོ་མོའི་གདན། དེའི་སྟེང་དུ་མ་ཧེ་གླང་རྒོད་ཕོ་མོའི་གདན་ལ་ཉི་ཟླ་པདྨ་སུམ་བརྩེགས་ཀྱི་སྟེང་དུ། རྒྱུའི་ཡི་གེ་ཧཱུྃ་མཐིང་ནག་ལས་འོད་ཟེར་ཁ་དོག་སྣ་ལྔ་དང་ལྡན་
པར་ཆད། གནས་པ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། གནམ་ལྕགས་ཀྱི་རྡོ་རྗེ་རྩེ་དགུ་པ་ཧཱུྃ་ཡིག་མཐིང་གས་མཚན་པར་གྱུར། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། ཨོ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུཾ་ཕཊ། སློབ་མ་འཇམ་དཔལ་གཤིན་རྗེའི་གཤེད་སྐུ་མདོག་མཐིང་ནག་ཞལ་གསུམ་ཕྱག་དྲུག །ཞབས་བཞི་འདོར་ཐབས་སུ་བགྲད་པ། གཡས་ཞལ་དཀར་ལ་བཞད་པ། གཡོན་ཞལ་དམར་ལ་གཤེ་བ། དབུས་ཞལ་མཐིང་ལ་རྔམས་པ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། སྙན་གོང་གཡས་གཡོན་ན་སྦྲུལ་ནག་རེ་རེས་བརྒྱན་པ། ཁྲོ་གཉེར་སྨིན་མཚམས་སུ་བསྡུས་པ། ཤངས་དེ། གཉེར་ཞིང་ཞལ་གདངས་ལྗགས་འདྲིལ་བ། མཆེ་བ་བཞི་གཙིགས་པ། ཨཱ་ར་ལིའི་སྒྲ་སྒྲོག་པ། སྨིན་མ་དང་སྨ་ར་དམར་སེར་འཁྲུགས་པ། དབུ་སྐྲ་ཁམ་སེར་གྱེན་དུ་བརྗེས་པ། ཕྱག་གཡས་དང་པོས་འཁོར་ལོ་རྩིབས་བརྒྱད་རྣོ་བའི་ངར་ཅན། བར་པ་ན་རལ་གྲི། ཐ་མ་ན་རྡོ་རྗེ་རྩེ་དགུ་པ། གཡོན་གྱི་དང་པོ་ན་ལྕགས་ཀྱུ། བར་པ་ན་གཏུན་
ཤིང་། ཐ་མ་ན་སྡིགས་མཛུབ་མཛད་པ་ལས་མེ་འབར་བ། ཞབས་བཞི་གཡས་བསྐུམ་གཡོན་བརྐྱང་བའི་གར་གྱིས་བཞེངས་པ། ཐོད་སྐམ་ལྔས་དབུ་བརྒྱན་པའི་ནང་དུ་ཁྲག་འཐུང་རིགས་ལྔས་མཚན་པ། དེའི་སྤྱི་གཙུག་ཏུ་ཡེ་ཤེས་ཀྱི་བྱ་ཁྱུང་ནག་པོ་ཁྲོ་ཞལ་ཅན་རྡོ་རྗེའི་མཆུ་དང་ཉི་ཟླའི་སྤྱན་ལྡན། གནམ་ལྕགས་ཀྱི་རྭ་དབུ་སྐྲ་ཁམ་ནག་འཁྱིལ་བ་ནོར་བུས་མཚན་པ། རྐང་ལག་ལྕགས་ཀྱི་སྡེར་མོས་སྦྲུལ་དཀར་ནག་གཉིས་བཟུང་ནས་མགོ་ཞལ་དུ་གསོལ་བ། སྒྲོ་གཤོག་སྤུ་གྲི་འབར་བ་ལ་བསྐལ་པའི་མེ་འབར་བ་རྡེབས་པ། སྤུ་ཕྲན་མཚོན་ཆ་ཅན་གཅིག་ལྡིང་བ། བ་སྤུའི་བུ་ག་ཐམས་ཅད་དུ་ཁྱུང་ནག་མེའི་གཤོག་པ་ཅན་རྡོ་རྗེ་རྩེ་ལྔ་པས་གཏམས་པ་ལས་མེ་སྟག་འཕྲོ་བ། ཐོད་པ་ར་རིད་ཉི་ཤུ་རྩ་གཅིག་གིས་མགུལ་རྒྱན་བྱས་པ། ཐོད་རློན་ཁྲག་འཛག་པ་ལྔ་བཅུས་སེ་རལ་ཁར་བརྒྱན་པ། སྐུ་སྟོད་ལ་གླང་ཆེན་གྱི་ཀོ་རློན་གསོལ་བ། སྐུ་སྐེད་ལ་ཞིང་ལྤགས་ཀྱི་གཡང་གཞི་བཅིངས་པ། སྐུ་སྨད་ལ་སྟག་ལྤགས་ཀྱི་ཤམ་ཐབས་དཀྲིས་པ། སྦྲུལ་རིགས་ལྔ་ལས་དཀར་ཁྲས་དབུ་སྐྲ་བཅིངས་ཤིང་། སེར་ཁྲས་སྒོ་རིགས་བྱས་པ། ལྗང་གུས་ཞབས་
གདུབ་དང་། ནག་ཁྲས་སེ་རལ་ཁར་བརྒྱན་པ། ཐལ་ཆེན་གྱི་ཚོམ་བུས་སྨིན་མཚམས་དང་སྐུའི་སུལ་བྱུགས་པ། རཀྟའི་ཐིག་ལེས་མཁུར་ཚོས་དཔྲལ་བར་བརྒྱན་པ། ཞག་གི་ཟོ་རིས་ཀྱིས་ལྐོག་མ་བྲང་ཤལ་བ། སྐུ་ལས་སྤྲུལ་པའི་ཕོ་ཉ་འཕྲོ་བ། འཁོར་ལེས་ཀྱི་གཤིན་རྗེ་བསམ་གྱིས་མི་ཁྱབ་པས་བསྐོར་བ། རང་ལུས་ལས་འཕྲོས་པའི་མེ་རི་མེ་དཔུང་ཚྭ་ཚྭ་འཕྲོ་བའི་ནང་ན་བཞུགས་པ། དེའི་ཐུགས་ཀར་གསེར་གྱི་འཁོར་ལོ་རྩིབས་བཞི་པའི་རྩིབས་རྣམས་ལ་འཇམ་དཔལ་གསེར་བཙོ་མའི་མདོག་ཅན་ཞལ་གཅིག་ཕྱག་གཉིས་པ། གཡས་ཤེས་རབ་ཀྱི་རལ་གྲི་དཔུང་པའི་ཐད་སོར་འཛིན་ཅིང་། །གཡོན་པའི་མཐེབ་སྲིན་གྱིས་ཨུཏྤ་ལའི་ཡུ་བ་ཐུགས་ཀར་འཛིན་ཅིང་སྙན་གྱི་ཐད་ཀར་ཁ་བྱེ་བའི་སྟེང་དུ་ཤེས་རབ་ཀྱི་ཕ་རོལ་དུ་ཕྱིན་པའི་པོ་ཏི་བསྣམས་པ། ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་ཤིང་། དར་དང་རིན་པོ་ཆེས་བརྒྱན་པ། ཞི་ཞིང་འཛུམ་པའི་མདངས་དང་ལྡན་པ། རལ་པའི་ཟུར་ཕུད་ལྔ་དང་ལྡན་པ། ཞལ་ནང་དུ་གཟིགས་ནས་བསྲུང་བའི་ལས་མཛད་པར་གྱུར། འཁོར་ལོའི་ལྟེ་བར་པདྨ་ཟླ་ཉི་སྟེང་དུ་རིན་པོ་ཆེ་སྣ་ཚོགས་ལས་གྲུབ་པའི་མཆོད་རྟེན་འོད་ཟེར་སྣ་
ཚོགས་འཕྲོ་བ། བུམ་པའི་ནང་དུ་པདྨ་ཉི་ཟླའི་གདན་ལ་ཧཱུཾ་མཐིང་ནག་ལས་གསེར་གྱི་རྡོ་རྗེ་རྩེ་ལྔ་པ། ཡར་གྱི་རྭ་ལྔ་ལ་རིགས་ལྔ་ཡབ་ལྔ། མར་གྱི་རྭ་ལྔ་ལ་རིགས་ལྔ་ཡུམ་ལྔས་མཚན་པའི་ལྟེ་བ་རུ། ཨཱ་ལི་ཀཱ་ལི་ལས་གྲུབ་པའི་ཉི་ཟླའི་གའུ་ཁ་སྦྱོར་གྱི་ནང་དུ་ཧཱུཾ་ཡིག་གི་མཐར་ཧཱུྃ་མཐིང་ནག་འབར་བ་གཅིག་བསམ། དེའི་མཐར་ཨེ་ཀ་ཡ་མ་དུ་རུ་ཙཀྲས་བསྐོར་བ། དེ་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་བྱང་སེམས་བླ་མ་ཡི་དམ་ཐམས་ཅད་ཚེ་བདག་འབར་བའི་རྣམ་པར་སྤྱན་དྲངས། ཁྱེད་རང་རྣམས་ལ་སིབ་སིབ་ཐིམ་པར་སྒོམས་ཤིག །ཧཱུཾ། ཆོས་དབྱིངས་མཁའ་ལྟར་རྟོག་བྲལ་ངང་ཉིད་ལས། །ལོངས་སྤྱོད་རྫོགས་དང་མཆོག་གི་སྤྲུལ་པའི་སྐུ། །སྤྲིན་དང་ཆར་ལྟར་འགྲོ་བའི་རེ་འདོད་སྐོང་། །བདེ་གཤེགས་སྐུ་མཆོག་ཡོངས་རྫོགས་ལྷ་ཚོགས་རྣམས། །སྤྱན་འདྲེན་ཐུགས་དམ་དབང་གིས་བརྩེ་བས་གཤེགས། སྒྲུབ་མཆོག་བདག་ལ་ཁྱེད་ཀྱི་ཐུགས་རྗེས་གཟིགས། །དབང་བསྐུར་བྱིན་རླབས་དམ་པ་སྩལ་དུ་གསོལ། །དཀྱིལ་འཁོར་ཆེན་པོ་འདི་ལ་བྱིན་ཕོབ་ཅིག །ཨོཾ་ཨཱཿཧཱུྃ་གུ་རུ་ཡ་མཱནྟ་ཀ་དྷ་ཀི་ནཱི་ས་མ་ཡ་ཨཱ་ཝེ་ཤ་
ཡ་ཨ་ཨཱཿ རྡོ་རྗེ་མགོར་བཞག་ལ། ཏིཥྛ་བཛྲ། དེ་ནས་བུམ་པས་དབང་བསྐུར་བ་ནི། བུམ་པ་ཐོགས་ལ། ཧཱུྃ། བློ་འདས་ཆོས་སྐུའི་ངོ་བོ་བུམ་པའི་ཀློང་། །རང་བཞིན་ལོངས་སྤྱོད་རྫོགས་སྐུ་བུམ་པའི་ལྷ། །བུམ་པའི་ཐུགས་རྗེའི་འགྲོ་འདུལ་སྤྲུལ་པའི་སྐུ། །སྐྱོན་དག་ཡོན་ཏན་ཡོངས་རྫོགས་དབང་བསྐུར་རོ། །ༀ་བཛྲ་ཀ་ལ་ཤ་ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཧཱུྃ། སུ་ར་ཏི་སྟེ་ཨ་ཧཾ། དབུ་རྒྱན་བཀོན། རྡོར་དྲིལ་གཏད་ལ། ཧཱུྃ། རང་དང་དམ་ཚིག་སྐལ་ལྡན་བུ་ཁྱོད་ལ། །བདེ་གཤེགས་རྒྱལ་བ་རིགས་ལྔས་དབུ་བརྒྱན་ཅིང་། །ཡེ་ཤེས་ལྔ་ལྡན་རྡོ་རྗེ་སངས་རྒྱས་ཀྱི། །གསུང་གི་རྗེས་འགྲོ་དྲིལ་བུ་འདི་བྱིན་པས། །དུག་ལྔ་གནས་དག་སྐུ་ལྔ་མངོན་གྱུར་པའི། །ཟུང་འཇུག་ཐབས་ཤེས་སྤྱོད་ལམ་དབང་ཐོབ་ཤོག །ཨོཾ་ཨཱཿཧཱུྃ་སྭཱ་ཧཱ་བཛྲ་མ་ཧཱ་གུ་རུ་ཨཱཿ ཛྷཱ་ན་བཛྲ་ཧཱུྃ། གཎྜ་པ་ལ་ཨཱཿ ཨ་བྷི་ཥིཉྩ་ཧཱུྃ། སློབ་མས། ཨ་ཏི་པ་ཏི་ཧོ༔ ཨ་བྷི་ཥིཉྩ་མ་ཐ་བཛྲ་ས་མ་ཡ་ཨཱཿ ཞེས་རྡོ་རྗེ་གསོར། དྲིལ་བུ་འཁྲོལ། དེས་གསང་སྔགས་ལ་སྤྱོད་པར་རུང་ཞིང་སྤྱོད་པའི་དབང་ཐོབ་པར་བསམ། སློབ་མ་ཚེ་བདག་ཏུ་གསལ་བ་ལ་མངའ་གསོལ་བའི་ཕྱིར་དཔལ་གྱི་ཆས་བཅུས་བརྒྱན་པར་བསམ།
ཧཱུྃ། ཐོད་པ་སྐམ་རློན་ཕྲེང་བ་གླང་ཆེན་ལྤགས། །སྦྲུལ་ཆུན་ཞིང་ལྤགས་སྟག་ཤམ་ཁྲག་ཞག་ཐལ། །གོ་ཁྲབ་མེ་དཔུང་རུས་རྒྱན་གཟིག་ཤམ་སྟེ། །དཔལ་ཆེན་ཡབ་ཡུམ་སྲས་ཀྱིས་དབང་བསྐུར་བས། །ང་རྒྱལ་གཏི་མུག་འདོད་ཆགས་ཞེ་སྡང་ཕྲག་དོག་སོགས། །མ་སྤངས་རང་གྲོལ་དཔའ་བས་འགྲོ་དོན་མཛད། །དབྱིངས་དག་འཁོར་བཅུ་སྒྲོལ་མཛད་མ་རིག་སེལ། །མི་ཤིགས་ཕྱིན་དྲུག་ཡུམ་དོན་རྟོགས་དབང་ཤོག །ཤྲཱི་ཧེ་རུ་ཀ་ཨ་བྷི་ཥིཉྩས་མ་ཡ་ཤྲཱི་ཡེ་ཧཱུྃ་སྭཱ་ཧཱ། ༈ དྷརྨཱ་དྷ་ཏུ་ཛྙཱ་ན་ཨ་བྷི་ཥིཉྩ་ཨཱཧཱུྃ། །ཝཱི་ཧཱུྃ༔ རྡོ་རྗེ་འཁོར་ལོ་མེ་འབར་བས། །སྐལ་ལྡན་ཁྱོད་ལ་དབང་བསྐུར་བས། །རྣམ་པར་རྟོག་པའི་དགྲ་འཇོམས་པའི། །དབང་མཆོག་དམ་པ་ཐོབ་པར་ཤོག །ཨོཾ་ཙཀྲ་ཨ་བྷི་ཥིཉྩ་ཨཱཧཱུྃ། ཧཱུྃ། ཤེས་རབ་རལ་གྲི་མེ་འབར་བས། །སྐལ་ལྡན་ཁྱོད་ལ་དབང་བསྐུར་བས། །བདག་འཛིན་རྩད་ནས་གཅོད་པ་ཡི། །དབང་མཆོག་དམ་པ་ཐོབ་པར་ཤོག །ཨོ་ཏིཀྵ་ཎ་ཨ་བྷི་ཥིཉྩ་ཨཱཧཱུཾ། ཧཱུཾ། རྡོ་རྗེ་རྩེ་དགུ་མེ་འབར་བས། །སྐལ་ལྡན་ཁྱོད་ལ་དབང་བསྐུར་བས། །ཕུང་པོའི་བདུད་རྣམས་འཇོམས་པ་ཡི། །དབང་མཆོག་
དམ་པ་ཐོབ་པར་ཤོག །བཛྲ་ཨ་བྷི་ཥིཉྩཨཱཧཱུྃ། ཧཱུཾ། རྡོ་རྗེ་ལྕགས་ཀྱུ་མེ་འབར་བས། །སྐལ་ལྡན་ཁྱོད་ལ་དབང་བསྐུར་བས། །གཏི་མུག་དགྲ་རྣམས་འཇོམས་པ་ཡི། །དབང་མཆོག་དམ་པ་ཐོབ་པར་ཤོག །ཨོཾ་བཛྲ་ཨང་ཀུ་ཤ་ཛཨ་བྷི་ཥིཉྩ་ཧཱུཾ། ཧཱུཾ། རྡོ་རྗེ་གཏུན་ཤིང་མེ་འབར་བས། །སྐལ་ལྡན་ཁྱོད་ལ་དབང་བསྐུར་བས། །ཞེ་སྡང་དགྲ་རྣམས་འཇོམས་པ་ཡི། །དབང་མཆོག་དམ་པ་ཐོབ་པར་ཤོག །ཨོཾ་བཛྲ་ཨརྐོ་ཊ་ཨ་བྷི་ཥིཉྩ་ཧཱུཾ། ཧཱུཾ། རྡོ་རྗེ་སྡིགས་མཛུབ་མེ་འབར་བས། །སྐལ་ལྡན་ཁྱོད་ལ་དབང་བསྐུར་བས། །གཉིས་འཛིན་དགྲ་རྣམས་འཇོམས་པ་ཡི། །དབང་མཆོག་དམ་པ་ཐོབ་པར་ཤོག །ཨོཾ་བཛྲ་ཛྭ་ལ་ཨ་བྷི་ཥིཉྩ་ཧཱུྃ། གཏོར་མ་ལག་ཏུ་ཐོགས་ལ། ད་གཏོར་མ་འདི་ཉིད་ཚབདག་ཏུ་གསལ་བའི་དཔྲལ་བ་ནས་སྐུའི་ཚེ་བདག་དཀར་པོ་སྐུ་ཆུང་ལ་ཡན་ལག་དོད་པའི་ཚོགས་འཕྲོས། ཁྱེད་རང་གི་དཔྲལ་བར་ཐིམ་པར་སྒོམས། ཧཱུྃ། ཚེ་བདག་འབར་བ་གཤིན་རྗེའི་གཤེད། །ཁྲོ་བོ་ཆེན་པོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་བཟང་བསྟན་པ་དང་། །སྐུ་གསུང་ཐུགས་ཀྱི་དངོས་གྲུབ་
སྩོལ། །སྐུ་ཡི་དབང་མཆོག་ཐོབ་པར་ཤོག །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། ཀཱ་ཡ་ཨ་བྷི་ཥིཉྩ་ཨོཾ། ཡང་གཏོར་མ་ཚེ་བདག་ཏུ་གསལ་བའི་མགྲིན་པ་ནས་གསུང་གི་ཚེ་བདག་དམར་པོ་སྐུ་ཆུང་ལ་ཡན་ལག་དོད་པའི་ཚོགས་འཕྲོས། ཁྱེད་རང་རྣམས་ཀྱི་མགྲིན་པར་ཐིམ་པར་སྒོམས། ཧཱུྃ། ཚེ་བདག་འབར་བ་གཤིན་རྗེའི་གཤེད། །ཁྲོ་བོ་ཆེན་པོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་བཟང་བསྟན་པ་དང་། །སྐུ་གསུང་ཐུགས་ཀྱི་དངོས་གྲུབ་སྩོལ། །གསུང་གི་དབང་མཆོག་ཐོབ་པར་ཤོག །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། ཝཱཀ་ཨ་བྷི་ཥིཉྩ་ཨཱཿ ཡང་གཏོར་མ་ཚེ་བདག་ཏུ་གསལ་བའི་ཐུགས་ཀ་ནས་ཐུགས་ཀྱི་ཚེ་བདག་མཐིང་གེ ནག་སྐུ་ཆུང་ལ་ཡན་ལག་དོད་པའི་ཚོགས་འཕྲོས། ཁྱེད་རང་རྣམས་ཀྱི་ཐུགས་ཀར་ཐིམ་པར་སྒོམས། ཧཱུྃ། ཚེ་བདག་འབར་བ་གཤིན་རྗེའི་གཤེད། །ཁྲོ་བོ་ཆེན་པོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་བཟང་བསྟན་པ་དང་། །སྐུ་གསུང་ཐུགས་ཀྱི་དངོས་གྲུབ་སྩོལ། །ཐུགས་ཀྱི་དབང་མཆོག་ཐོབ་པར་
ཤོག །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། ཙིཏྟ་ཨ་བྷི་ཥིཉྩ་ཧཱུཾ། ཡང་གཏོར་མ་ཚེ་བདག་ཏུ་གསལ་བའི་ལྟེ་བ་ནས་ཡོན་ཏན་གྱི་ཚེ་བདག་སེར་པོ་གསེར་གྱི་མདོག་ཅན་སྐྱ་ཆུང་ལ་ཡན་ལག་དོད་པའི་ཚོགས་འཕྲོས། ཁྱེད་རང་གི་ལྟེ་བར་ཐིམ་པར་སྒོམས་ཤིག །ཧཱུྃ། ཚེ་བདག་འབར་བ་གཤིན་རྗེའི་གཤེད། །ཁྲོ་བོ་ཆེན་པོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་བཟང་བསྟན་པ་དང་། །སྐུ་གསུང་ཐུགས་ཀྱི་དངོས་གྲུབ་སྩོལ། །ཡོན་ཏན་དབང་མཆོག་ཐོབ་པར་ཤོག །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུཾ་ཕཊ། སརྦ་ཨ་བྷི་ཥིཉྩ་ཧྲཱིཿ དེ་ནས་གཏོར་མ་ཚེ་བདག་ཏུ་གསལ་བའི་གསང་བ་ནས་ཕྲིན་ལས་ཀྱི་ཚེ་བདག་སྐུ་མདོག་ལྗང་ནག་སྐུ་ཆུང་ལོ་ཡན་ལག་དོད་པའི་ཚོགས་འཕྲོས། ཁྱེད་རང་གི་གསང་བའི་གནས་སུ་ཐིམ་པར་སྒོམས་ཤིག །ཧཱུྃ། ཚེ་བདག་འབར་བ་གཤིན་རྗེའི་གཤེད། །ཁྲོ་བོ་ཆེན་པོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་བཟང་བསྟན་པ་དང་། །སྐུ་གསུང་ཐུགས་ཀྱི་དངོས་གྲུབ་སྩོལ། །ཕྲིན་ལས་དབང་མཆོག་ཐོབ་པར་ཤོག །ཨོཾ་ཨ་ཀྲོ་ཏེ་ཀ་ཡ་མཱན་ཀ་ཧཱུཾ་
ཕཊ། ཀརྨ་ཨ་བྷི་ཥིཉྩ་ཧཱ། ད་གཏོར་མ་འདི་ཉིད། ཚེ་བདག་ནག་པོ་ཞལ་གཅིག་པ། ཕྱག་བཞི་ཕྱག་མཚན་འདི་ལྟར་རོ། །རལ་གྲི་བེ་ཅོན་ཞགས་པ་དང་། །བྷནྡྷ་འཛིན་ཏེ་ཞབས་གཉིས་བགྲད། །ཡུམ་ནི་ལྗང་སྔོན་གཡས་ནས་འཁྱུད། །དེའི་འཁོར་དུ་ཞལ་གསུམ་ཕྱག་དྲུག་པ་དང་། ཞལ་གཅིག་ཕྱག་གཉིས་པ་དང་། །ཆེ་བདག་གི་རིགས་ཐམས་ཅད་ཀྱིས་བསྐོར་ནས་བཞུགས་པ། དེའི་སྟེང་གི་ཆ་ལ་བརྒྱུད་པའི་བླ་མ་དང་བཅས་པ་སྤྲིན་འཁྲིགས་པ་བཞིན་དུ། ཁྱེད་རང་གི་སྤྱི་བོར་བྱོན། འོད་དུ་ཞུ་ནས་ཁྱེད་རང་ལ་ཐིམ་པར་སྒོམས་ཤིག །ཆོས་སྐུ་དྲུག་པ་རྡོ་རྗེ་འཆང་ཆེན་པོ། རྡོ་རྗེ་སེམས་དཔའ། ཡ་མ་རཱ་ཛ། ཕྱག་ན་རྡོ་རྗེ། དགའ་རབ་རྡོ་རྗེ། འཇམ་དཔལ་བཤེས་གཉེན། གཙུག་ལག་དཔལ་དགེ །ཤཱནྟཾ་གནྡྷ། དཱ་ན་དྷ་ལ། ཁྲག་འཐུང་ནག་པོ། བཱ་སུ་དྷ་ར། སངས་རྒྱས་ཡེ་ཤེས། དམ་པ་རྒྱ་སྟོན། ཡོན་ཏན་རྒྱ་མཚོ། ཡེ་ཤེས་རྒྱ་མཚོ། རོང་སྟོན་ལྕགས་པོ། སློབ་དཔོན་ལྷ་བསྒོམ། བླ་མ་གང་པ། རྒྱལ་བ་གཡུང་སྟོན། རྒྱལ་བ་རྡོ་རྗེ། དར་མ་འབུམ། རྣལ་འབྱོར་དབང་ཕྱུག །སྟོན་
པ་སངས་རྒྱས་མགོན། བླ་མ་ཁམས་པ། ནམ་མཁའ་ལེགས་པ། རཏྣའི་མཚན་ཅན། རིན་ཆེན་དཔལ། སངས་རྒྱས་རིན་ཆེན། རིག་འཛིན་ཆོས་ཀྱི་གྲགས་པ། དཀོན་མཆོག་ཕྲིན་ལས་རྣམ་རྒྱལ། ཀརྨ་རབ་གསལ་ལ་སོགས་པ་བཀའ་མ་བརྒྱུད་པ་རྣམས་དང་། ་གཞན་ཡང་གཙུག་ལག་དཔལ་དགེ །སློབ་དཔོན་པདྨ། བཱ་སུ་དྷ་ར། ངས་རྒྱས་ཡེ་ཤེས། རྒྱ་ཞང་ཕྲོམ་ལ་སོགས་པ་གཏེར་མ་བརྒྱུད་པ་རྣམས་དང་། སློབ་དཔོན་འཇམ་དཔལ་བཤེས་གཉེན། གུ་རུ་པདྨ་འབྱུང་གནས། སྤྲུལ་སྐུ་མི་འགྱུར་རྡོ་རྗེ་འདུལ་རོལ་པ་རྩལ་ལ་སོགས་པ་རིག་འཛིན་བརྒྱུད་པའི་བླ་མ་རྣམས་དང་། བཅོམ་ལྡན་འདས་འཇམ་དཔལ་གཤིན་རྗེའི་གཤེད་ཚེ་བདག་ནག་པོ་ཞལ་གསུམ་ཕྱག་དྲུག་པ། ༈ ཞལ་གཅིག་ཕྱག་གཉིས་པ་ལ་སོགས་ཚེ་བདག་གི་རིགས་ཐམས་ཅད་ཀྱིས་སློབ་མ་འདི་རྣམས་ལ་བྱིན་གྱིས་བརླབ་པ་དང་། དབང་བསྐུར་བར་མཛད་དུ་གསོལ། བྱད་ཁ་ཕུར་ཁ་རྦད་འདྲེ་དྲོད་གཏོང་ཆག་ཆེ་ཉམ་ངའི་གནོད་པས་མི་ཚུགས་པར་སྲུངས་ཤིག །སྦྱིན་སྲེག་དང་། རླུང་འཁོར་དང་། ཕྲ་མེན་དང་། ངག་མནན་ཀླུ་གཏད་དང་། སེལ་ནག་
དང་། བསྐྲད་འཁོར་དང་། རླུང་རྟ་ཁ་སྦུབ་ལ་སོགས་པའི་གནོད་པ་ཐམས་ཅད་ཞི་བར་མཛོད་ཅིག །གཏོར་ཁ་དང་། ཟོར་ཁ་དང་། ཁྲམ་ཁ་དང་། རྨི་ལྟས་དང་། མཚན་མ་ངན་པ་ཐམས་ཅད་ཕྱིར་ཟློག་པའི་ཕྲིན་ལས་མཛོད་ཅིག །དུས་འདི་ནས་བཟུང་སྟེ་ཇི་སྲིད་སངས་མ་རྒྱས་ཀྱི་བར་དུ་བཅོམ་ལྡན་འདས་འཇམ་དཔལ་གཤིན་རྗེའི་གཤེད་ཚེ་བདག་ནག་པོས། རྡོ་རྗེའི་སློབ་མ་འདི་ཡི་ལུས་ངག་ཡིད་གསུམ་བསྲུང་བ་དང་བསྐྱབ་པར་མཛད་དུ་གསོལ། ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། མ་མ་རཀྵ་རཀྵ་སྭཱ་ཧཱ། ཨོ་ཨེ་ཀ་ཡ་མ་དུ་རུ་ཙཀྲས་སྲུངས། ཧེ་ཀ་ཡ་མ་དུ་རུ་ཙཀྲས་སྲུངས། བྷཾ་མ་ཡ་མ་དུ་རུ་ཙཀྲས་སྲུངས། སརྦ་ཙིཏྟ་གཟེར་ཐུམ། བིག་ནཱན། ཁྲིག་ནན། རྦད་ཡ་བཟློག་ཡ། སཾ་གྷི་ཝ་རི་ནཱི་ཧཱུཾ་ཧཱུྃ་ཛ༔ རྡོ་རྗེའི་སློབ་མ་འདི་རྣམས་ལ་སྲུངས་ཤིགབཛྲ་རཀྵ་རཀྵ་སྭཱ་ཧཱ། སྐུ་གསུམ་བླ་མ་རྣམས་ཀྱི་བཀྲ་ཤིས་ཤོག །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །མཁའ་འགྲོ་ཆོས་སྐྱོང་ནོར་ལྷའི་བཀྲ་ཤིས་ཤོག །བསྟན་སྲུང་དམ་ཅན་རྒྱ་མཚོའི་བཀྲ་ཤིས་ཤོག །འོ། དེས་བཀའ་གཏེར་ཟུང་འཇུག་གཤིན་རྗེ་ཚེ་བདག་གི་
དབང་ལེགས་པར་ཐོབ་པ་ཡིན་པས་འདི་ཡི་དམ་དུ་བཟུང་སྙམ་པས་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །མཎྜལ་ཕུལ། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་དུ་སྤྱོད་པར་ཤོག །ཅེས་པ་འདི་ནི་བཀའ་གཏེར་ཟུང་འཇུག་ཚེ་བདག་གི་རྗེས་གནང་གི་དབང་རྒྱུན་ཡང་ཐོབ་ཅིང་། རཏྣ་ལུགས་དང་གནམ་ཆོས་ལུགས་ཀྱང་ཐོབ་པས་སྦྱིན་བདག་བྱེད་ཁ་ཆེ་བ་རྣམས་ཀྱིས་གཤིན་རྗེ་ཚེ་བདག་གི་དབང་དགོས་ཟེར་མཁན་མང་ཞིག་འོང་དོ་བས། །དེ་དག་གི་རེ་འདོད་བཀང་བའི་ཕྱིར་རཱ་ག་ཨ་སྱས་བསྒྲིགས་པའི་ཡི་གེ་པ་ནི་པདྨ་བརྩོན་འགྲུས་ཏེ། འདི་ལ་ཉེས་འགལ་མཆིས་ན་ཆོས་བདག་སྲུང་མའི་ཚོགས་ལ་བཤགས་ཤིང་དགེ་བས་འབྲེལ་པ་ཐོགས་ཚད་ཀྱི་བར་ཚད་སེལ་བར་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།