བཀའ་གཏེར་ཟུང་འཇུག་ཕྱག་སྟོང་སྤྱན་སྟོང་གི་དབང་ཁྱེར་བདེ་བཀོད་པ།
བཀའ་གཏེར་ཟུང་འཇུག་ཕྱག་སྟོང་སྤྱན་སྟོང་གི་དབང་ཁྱེར་བདེ་བཀོད་པ་ཡོད༔
ན་མོ་གུ་རུ་ལོ་ཀེ་ཤྭ་རཱ་ཡ༔ བཀའ་གཏེར་ཟུང་འཇུག་ཕྱག་སྟོང་སྤྱན་སྟོང་གི མགྱོགས་དབང་བསྐུར་ཐབས་མདོར་བསྡུས་འདིར་བརྗོད་ཀྱི༔ རྩ་གསུམ་ལྷ་ཡིས་བཀའ་གནང་བྱིན་གྱིས་རློབས༔ ཟླུམ་སྐོར་དབུས་སུ་འདབ་བརྒྱད་བྲིས་པའམ༔ ཡང་ན་འབྲུ་ཡི་ཚོམ་བུ་བཀོད་པའི་སྟེང་༔ བུམ་པ་གཏོར་མ་མཆོད་པ་སྤྱི་ལྟར་བཤམས༔ བླ་མེད་ཡིན་ཕྱིར་སྐད་ཅིག་དྲན་རྫོགས་བསྒོམ༔ བདག་མདུན་བུམ་གསུམ་མངོན་རྟོགས་གཅིག་ཆོག་བསྐྱེད༔ ན་མོ༔་དཀོན་མཆོགས་གསུམ་དང་རྩ་བ་གསུམ༔ སྐྱབས་གནས་རྣམས་ལ་སྐྱབས་སུ་མཆི༔ འགྲོ་ཀུན་སངས་རྒྱས་ལ་འགོད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ ཀ་དག་ཀློང་ནས་སྤྲུལ་པ་ཡི༔
གནམ་ས་གང་བའི་མཆོད་པའི་སྤྲིན༔ ཉེར་སྤྱོད་འདོད་ཡོན་མཆོད་རྫས་ཀྱི༔ ཟད་མེད་གྱུར་ཅིག་པཱུ་ཛ་ཧོ༔ བདག་དང་མདུན་དང་གཏོར་མ་དང་༔ བུམ་ལྷ་ཐུགས་རྗེ་ཆེན་པོ་ནི༔ སྐུ་མདོག་དཀར་པོ་འདི་ལྟ་སྟེ༔ གཡས་ཞལ་ལྗང་ལ་གཡོན་ཞལ་དམར༔ དབུས་ཞལ་དཀར་ལ་དེ་སྟེང་ཞལ༔ ལྗང་སྟེ་གཡས་ཞལ་དམར་གཡོན་ཞལ༔ དཀར་བའི་ཞལ་ཏེ་དེ་སྟེང་ཞལ༔ དམར་པོ་གཡས་དཀར་གཡོན་ལྗང་བ༔ དེ་སྟེང་ཁྲོ་ཞལ་དེ་སྟེང་ནི༔ སྣང་བ་མཐའ་ཡས་དབུ་ཡི་ཞལ༔ ཕྱག་བརྒྱད་དང་པོ་གཉིས་ཀྱིས་ནི༔ ཐལ་མོ་སྦྱར་ཏེ་དེ་འོག་གཉིས༔ ཕྲེང་བ་
པདྨ་འཛིན་པའོ༔ དེ་འོག་འཁོར་ལོ་མདའ་གཞུ་འཛིན༔ དེ་འོག་མཆོག་སྦྱིན་སྤྱི་བླུགས་འཛིན༔ དེ་དང་བཅས་པའི་གཡས་ལྔ་བརྒྱ༔ དེ་བཞིན་གཡོན་པའང་ལྔ་བརྒྱ་ཡིན། ཐུགས་ཀར་ཟླ་སྟེང་ཧྲིལ་ཡིག་དྲུག་དང་༔ གཟུངས་རིང་གཡས་སུ་འཁོར་ལས་འོད་ཟེར་འཕྲོས་པོ་ཊ་ལ་ནས་ཕྱག་སྟོང་སྤྱན་སྟོང་སྐུ༔ དཔག་མེད་སྤྱན་དྲངས་བདག་མདུན་བུམ་ལྷར་ཐིམ༔ བུམ་ལྷར་བདུད་རྩིའི་རྒྱུན་བབས་བུམ་པ་གང་༔ ན་མོ་རཏྣ་ཏྲ་ཡཱ་ཡ༔ ན་མོ་ཨརྱ་ཛྙཱ་ན་སཱ་ག་ར༔ བེ་རོ་ཙ་ན་བྷི་ཧ་རཱ་ཛཱ་ཡ༔ ཏ་ཐཱ་ག་ཏཱ་ཡ༔ ཨདྷ་ཏེ་སཾམྱཀཾ་བུདྡྷ་ཡ༔ ན་མ༔སརྦ་ཏ་ཐཱ་ག་ཏེ་བྷ༔ ཨདྷ་ཏེ་བྷུ༔ སཾམྱཀཾ་བུདྡྷེ༔ ན་མ་ཨཱརྱ་ཨ་ཝ་ལོ་ཀི་ཏེ་ཤྭ་རཱ་ཡ༔ བོ་དྷི་ས་ཏྭ་ཡ༔ མ་ཧཱ་ས་ཏྭ་ཡ༔ མ་ཧཱ་ཀཱ་རུ་ཎི་ཀཱ་ཡ༔ ཏདྱ་ཐཱ༔ ཨོཾ་དྷ་ར་དྷ་ར༔ དྷི་རི་དྷི་རི༔ དྷུ་རུ་དྷུ་རུ༔ ཨཊྚེ་ཝཊེ༔ ཙ་ལེ་ཙ་ལེ༔ པྲ་ཙ་ལེ་པྲ་ཙ་ལེ༔ ཀུ་སུ་མེ་ཀུ་སུ་མ་ཝ་རེ༔ ཨི་ལི་མི་ལི་ཙི་ཏི་ཛྭ་ལ་མ་པ་ན་ཡེ་སྭཱ་ཧཱ༔ གཟུངས་དེ་གསུམ་བདུན་ལ་སོགས་ཅི་ལྕོགས་དང་༔ ཨོཾ་མ་ཎི་པདྨེ་ཧཱུྃ༔ ཞེས་པ་བརྒྱ་རྩ་ཡན་ཆད་ཅི་འགྲུབ་བཟླ༔ ཨཱ་ལོ་ཀེ་ཤྭ་ར་ཨརྒྱུ་སོགས༔ སངས་རྒྱས་ཀུན་གྱིས་རབ་ཏུ་བསྔགས༔ ཡོན་ཏན་
ཀུན་གྱི་གཏེར་གྱུར་ཅིང་༔ སྤྱན་རས་གཟིགས་ཞེས་མཚན་གསོལ་བའི༔ རྟག་པར་བརྩེ་ལ་ཕྱག་འཚལ་བསྟོད༔ ལས་བུམ་ནང་དུ་སྐད་ཅིག་རྟ་མགྲིན་གསལ༔ ཨོཾ་ཧ་གྲཱི་ཝ་པ༔ ཧཱུྃ་ཕཊ༔ ཅི་འགྲུབ་བཟླས་རྗེས་སློབ་མ་འདུས་ཁྲུས་བྱས༔ མཎྜལ་ཕུལ་ལ༔ འོ་ན་ད་ལམ་ཁྱེད་རྣམས་ལ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་དབང་མདོར་བསྡུས་ཤིག་བསྐུར་བ་ལ༔ ཐོག་མར་ལོ་རྒྱུས་ཅུང་ཟད་གཅིག་ཞུ་ན༔ ཞལ་བཅུ་གཅིག་པ་ཇི་ལྟར་བྱུང་ཚུལ༔ དེའི་གཟུངས་དང་རྒྱུད་ཇི་ལྟར་གསུངས་ཚུལ༔ དེའི་མན་ངག་གང་ལས་བརྒྱུད་པ་ཕན་ཡོན་དགོས་ཆེད་བསྟན་པ་དང་གསུམ་ལས༔ དང་པོ་ནི་སྔོན་བསྐལ་པ་མང་པོའི་གོང་དུ་ཐུགས་རྗེ་ཆེན་པོ་སྤྱན་རས་གཟིགས་སངས་རྒྱས་འོད་དཔག་མེད་ལ་སོགས་པ་སངས་རྒྱས་བྱེ་བ་ཕྲག་བཅུ་གཅིག་དྲུང་དུ་འགྲོ་དོན་བྱེད་པར་སེམས་བསྐྱེད་དེ་བདག་གི་བ་སྤུའི་བུ་ག་རེ་རེ་ནས་ཀྱང་དུས་གསུམ་གྱི་སངས་རྒྱས་ཀྱིས་མཛད་པ་དང་༔ རྣམ་པར་སྤྲུལ་པ་བསམ་གྱིས་མི་ཁྱབ་པ་གང་ལ་གང་འདུལ་དུ་སྤྲུལ་ནས༔ སེམས་ཅན་གཅིག་ཀྱང་མ་ལུས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འགོད་བར་བྱའོ༔ དེ་ལ་མ་འཁོད་ཀྱི་བར་དུ་རང་ཞི་བདེའི་བློ་
བྱུང་ན་ངའི་མགོ་ཨརྫ་ཀའི་རྡོག་པོ་བཞིན་དུ་ཚལ་པ་བཅུར་འགས་པར་གྱུར་ཅིག༔ ལུས་དུམ་བུ་སྟོང་དུ་འགས་པར་གྱུར་ཅིག ཅེས་སྨོན་ལམ་བཏབ་པས༔ སངས་རྒྱས་རྣམས་ཀྱིས་ལེགས་སོ་གསུངས་ནས་སྤྲུལ་པ་དཔག་ཏུ་མེད་པས་གང་ལ་གང་འདུལ་དུ་སྤྲུལ་ནས༔ འགྲོ་བ་རིགས་དྲུག་གི་གནས་ལན་གསུམ་སྟོངས་པར་མཛད༔ དེ་དྲངས་ནས་རི་རབ་ཀྱི་རྩེར་བྱོན་ཏེ་ཡེ་ཤེས་ཀྱི་སྤྱན་གྱིས་གཟིགས་པས༔ སེམས་ཅན་གྱི་ཁམས་ལ་སྐྱེ་འབྲི་མེད་པའི་སྟེང་དུ་དུས་སྙིགས་མར་སོང་བས༔ སེམས་ཅན་རྣམས་ཉོན་མོངས་པ་རགས་སུ་སོང་ཚེ༔ འདུག་པས༔ ངས་སེམས་ཅན་གྱི་ཁམས་ལ་ཟད་པ་མེད་པར་འདུག བདག་གིས་ལན་གསུམ་རིགས་དྲུག་སྟོངས་པར་དྲངས་ཀྱང་སེམས་ཅན་ཉུང་དུ་མ་སོང་༔ འཁོར་བ་མ་སྟོངས་བར་འདུག་སེམས་ཅན་གྱི་དོན་མི་འགྲུབ་པར་འདུག་པས། ང་རང་མྱ་ངན་ལས་འདས་པ་སངས་རྒྱས་ཀྱི་ས་ལ་གནས་པར་བྱའོ་དགོངས་པས་དམ་བཅའ་ཉམས་པས་དབུ་ཚལ་པ་བཅུར་གས་སོ༔ སྐུ་ལུས་དུམ་བུ་སྟོང་དུ་གས་ནས་ན་ཚ་མ་བཟོད་ནས་སངས་རྒྱས་རྣམས་ལ་གསོལ་བ་བཏབ་པས༔ སངས་རྒྱས་བྱེ་བ་ཕྲག་བཅུ་གཅིག་བྱོན་ནས་སངས་རྒྱས་
འོད་དཔག་མེད་ཀྱིས་སྐུའི་དུམ་བུ་རྣམས་སྙེ་མའི་ཆུན་པོ་ལྟར་བསྡུས་ནས་དབུ་ཚལ་པ་བརྒྱར་སོང་བ་ཞིལ་དགུར་བྱིན་གྱིས་བརླབས་སོ༔་ཞི་བས་མི་ཐུལ་བ་ལ་ཕྱག་རྡོར་གྱི་ཞལ་བསྣན་ཏེ་བརུ༔ དེ་སྟེང་རིགས་བདག་འོད་དཔག་མེད་ཀྱི་ཞལ་བཞག་པ་དང་བཅུ་གཅིག་ཏུ་བྱིན་གྱིས་བརླབས་སོ༔ དེ་ནས་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་གྱིས་ཤིག་ཅེས་བཀའ་སྩལ་པ་དང་༔ སྤྱན་རས་གཟིགས་ཀྱིས་སྨྲས་པ༔ བདག་གིས་སེམས་ཅན་གྱི་དོན་འཁོར་བ་མ་སྟོངས་ཀྱི་བར་དུ་འགྲུབ་པར་གྱུར་ན༔ བདག་ལག་པ་སྟོང་མིག་སྟོང་དང་ལྡན་པར་གྱུར་ལ༔ ལག་པ་སྟོང་འཁོར་ལོས་སྒྱུར་བའི་རྒྱལ་པོ་སྟོང་དུ་གྱུར་ཅིག མིག་སྟོང་སྐལ་པ་བཟང་པོའི་སངས་རྒྱས་སྟོང་དུ་གྱུར་ལ་གང་ལ་གང་འདུལ་གྱིས་འགྲོ་དོན་བྱེད་པར་གྱུར་ཅིག༔ ཅེས་གསུངས་པས་སྐད་ཅིག་དེ་ཉིད་ལ་ཕྱག་སྟོང་གི་མཐིལ་དུ་སྤྱན་སྟོང་ཡོད་པའི་བཅུ་གཅིག་ཞལ་དུ་གྱུར་ཏོ༔ དེའི་ཚེ་སངས་རྒྱས་བྱེ་བ་ཕྲག་བཅུ་གཅིག་གིས་དབྱངས་གཅིག་དང་ཚིག་གཅིག་ཏུ་ཞལ་བཅུ་གཅིག་པའི་གཟུངས་འདི་ཡང་གསུངས་ཤིང་བྱིན་གྱིས་བརླབས་སོ༔ དེ་ནས་སྤྱན་རས་གཟིགས་དེ་ཡང་སྤྲུལ་པ་དཔག་ཏུ་
མེད་པས་འགྲོ་བའི་དོན་མཛད་དེ་རྒྱུད་སྡེ་རྣམས་གསུང་བ་པོ་དང་ཉན་པ་པོའི་འཁོར་དང་བཀའི་བསྡུ་བ་པོ་དང་༔ དེ་འཛིན་ཅིང་གཞན་ལ་སྟོན་པ་པོ་རྣམས་ཐུགས་རྒྱུད་གཅིག་སྟེ་ལྷ་དེ་ཉིད་དམ་སྟོན་པ་དེ་ཉིད་ཀྱི་སྤྲུལ་པར་བཤད་པ་དང་མཐུན་པར་བསྐལ་པ་གངྒའི་ཀླུང་བཅུའི་བྱེ་མ་སྙེད་ཀྱི་སྔ་རོལ་ལས་ཆེས་སྔ་རོལ་དུ་སངས་རྒྱས་མནྡ་རའི་དྲི་ཞེས་བྱ་བ་བྱོན་པས་བཅུ་གཅིག་ཞལ་གྱི་གཟུངས་འདི་གསུངས་པའི་ཚེ༔ སྤྱན་རས་གཟིགས་ཀྱི་སྤྲུལ་བ་ཁྱིམ་བདག་དྲག་པོ་ཞེས་བྱ་བས་གཟུངས་འདི་བཟུང་སྟེ༔ སེམས་ཅན་དཔག་ཏུ་མེད་པ་བསྐལ་པ་བཞི་ཁྲིའི་འཁོར་བ་ཕྱིར་བསྙིལ་ལོ༔ དེ་ནས་བསྐལ་པ་གངྒའི་ཀླུང་གི་བྱེ་མ་སྙེད་ཀྱི་ཡང་སྔ་རོལ་ན་སངས་རྒྱས་པདྨའི་རྒྱའི་སྤྱན་གཙུག་གི་ཆགས་པའི་དུས་འཛོམ་པའི་འོད་ཟེར་གྱི་རྒྱལ་པོ་་ཞེས་བྱ་བས་བཅུ་གཅིག་ཞལ་གྱི་གཟུངས་འདི་གསུངས་པས༔ དེར་སྤྱན་རས་གཟིགས་ཀྱི་སྤྲུལ་པ་དྲང་སྲོང་ཞིག་ཡོད་པས་གཟུངས་འདི་ཐོས་མ་ཐག་ཏུ་ཕྱོགས་བཅུའི་སངས་རྒྱས་ཐམས་ཅད་མངོན་དུ་གྱུར་ཏོ༔ དེ་རྗེས་བསྐལ་པ་གངྒའི་ཀླུང་གཅིག་གི་བྱེ་མ་སྙེད་ཀྱི་སྔ་རོལ་ན་སངས་རྒྱས་ཐོགས་མེད་པདྨའི་སྤྱན་གཙུག་ཏོར་ཡོན་ཏན་རབ་རྒྱས་འོད་ཀྱི་རྒྱལ་པོ་ཞེས་
བྱ་བས་བཅུ་གཅིག་ཞལ་གྱི་གཟུངས་འདི་གསུངས་པས༔ སྤྱན་རས་གཟིགས་ཀྱི་སྤྲུལ་པ་དྲང་སྲོང་གི་བདག་པོ་བྱེ་བ་གཅིག་ཡོད་པ་དེས་རིག་སྔགས་འདི་བསྒྲུབས་པས་ཕྱོགས་བཅུའི་སངས་རྒྱས་ཞལ་མཐོང་ཞིང་སྐྱེ་མེད་ཆོས་ལ་བཟོད་པ་ཐོབ་པའི་ཚུལ་བསྟན་ཏོ༔ དེ་རྗེས་བསྐལ་པ་བྱེ་བ་ཕྲག་བརྒྱའི་སྔ་རོལ་དུ་སངས་རྒྱས་ཚེ་དཔག་མེད་ཅེས་བྱ་བ་བྱོན་ཏེ་དེས་ཞལ་བཅུ་གཅིག་པའི་གཟུངས་འདི་གསུངས་པས་འཕགས་པ་སྤྱན་རས་གཟིགས་ཀྱིས་གསན་པས༔ ཕྱོགས་བཅུའི་སངས་རྒྱས་ཐམས་ཅད་ཀྱིས་སྤྱན་རས་གཟིགས་ཉིད་ལ་འགྲོ་བ་འདྲེན་པའི་དབང་བསྐུར་ནས༔ འཕགས་པ་སྤྱན་རས་གཟིགས་ཁྱེད་ལ་སྔོན་སངས་རྒྱས་བྱེ་བ་ཕྲག་བཅུ་གཅིག་གིས་འགྲོ་བ་འདྲེན་པའི་དབང་བསྐུར་བ་ཐོབ་པ༔ དེའི་རྣམ་པར་སྨིན་པས་སངས་རྒྱས་ཀྱི་ཞིང་རབ་ཏུ་མང་པོར་འཕགས་པ་སྤྱན་རས་གཟིགས་ཁྱེད་ཀྱི་སྤྲུལ་པ་ཡང་དང་ཡང་དུ་འབྱུང་ཞིང་མ་འོངས་ཕྱི་མའི་དུས་ན་མི་མཇེད་འཇིག་རྟེན་གྱི་ཁམས་ན་འདྲེན་པ་ཤཱཀྱ་ཐུབ་པ་ཞེས་བྱ་བ་བྱོན་ཏེ་མི་ཡུལ་ལས་ཁྱད་པར་པྲ་ཏ་ཡི་དྭགས་ཀྱི་རིགས་བྱང་ཕྱོགས་ཁ་བ་ཅན་ན༔ མི་རྣམས་སངས་རྒྱས་ཀྱི་བསྟན་པ་ལ་དད་འདུན་འཕེལ་ཕྱིར་ཞལ་
བཅུ་གཅིག་པ་ཕྱག་སྟོང་དང་ལྡན་པའི་སྐུ་རང་བྱོན་དུ་འབྱུང་བར་ལུང་བསྟན་ཏེ༔ དེའི་ཚེ་བཅུ་གཅིག་ཞལ་གྱི་སྐུ་ལ་དད་འདུན་བྱེད་པ་དང་མཚན་ནས་བརྗོད་པ་དང་༔ གཟུངས་སྔགས་འདི་འདོན་པ་རྣམས་འཇིག་རྟེན་ན་གང་འདོད་པའི་དོན་འགྲུབ་ཅིང་ཕྱི་མ་ཡེ་ཤེས་གཉིས་ཐོབ་པར་ལུང་བསྟན་ཏོ༔ དེ་དག་ནི་རྒྱས་པར་པདྨ་དྲྭ་བ་ཅན་གྱི་རྒྱུད་ཆེན་པོ་ལས་གསུངས་ཤིང་༔ བསྟན་པ་འདི་ལ་ནི་བཅོམ་ལྡན་འདས་ཤཱཀྱ་ཐུབ་པ་རི་མ་ལ་ཡ་ཙནྡན་གྱི་ནགས་ཚལ་ཆེན་པོར་བཞུགས་པའི་ཚེ༔ འཕགས་པ་སྤྱན་རས་གཟིགས་ཉིད་ཀྱིས་ཐུབ་པ་དཔང་པོར་བཞག་སྟེ་བཅུ་གཅིག་ཞལ་གྱི་གཟུངས་དང་༔ པདྨ་དྲྭ་བ་ཅན་གྱི་རྒྱུད་ལ་སོགས་པ་དང་༔ ཕྱག་སྟོང་སྤྱན་སྟོང་གི་གཟུངས་ལ་སོགས་པ་བཤད་དོ༔ དེར་ཐུབ་པས་ཀྱང་ལེགས་སོ་བརྗོད་ཅིང་བྱིན་གྱིས་བརླབས་སོ༔ དེ་དག་ནི་བྱ་སྤྱོད་ཀྱི་རྒྱུད་ཡིན་ཅིང་༔ རྣལ་འབྱོར་རྒྱུད་པདྨ་ཅོད་པན་གྱི་རྒྱུད་ནི༔ བཅོམ་ལྡན་འདས་ལྷ་ཡུལ་ན་ལོངས་སྤྱོད་རྫོགས་པའི་སྐུར་སངས་རྒྱས་ནས་བཞུགས་པའི་ཚེ༔ སྐུའི་འོད་ཟེར་གྱིས་སངས་རྒྱས་ཐམས་ཅད་མཆོད་ཅིང་ཚུར་འདུས་པས་བཅུ་གཅིག་ཞལ་ཕྱག་སྟོང་དང་ལྡན་པའི་སྐུར་བཅོམ་ལྡན་འདས་
ཉིད་བཞེངས་ཏེ༔ དེར་ཡང་སྤྱན་རས་གཟིགས་བྱང་ཆུབ་སེམས་དཔའི་སྐུར་སྤྲུལ་ནས་བཞུགས་པས་ཞུས་པ་ལ་བརྟེན་ནས༔ བཅུ་གཅིག་ཞལ་འདིའི་གཟུངས་དང་༔ བསྡུས་པ་ཡི་གེ་དྲུག་པ་དང་༔་ལས་ཚོགས་མཐའ་ཡས་པ་གསུངས་སོ༔ དེས་ལྷའི་ངོ་བོ་ཇི་ལྟར་བྱོན་ཚུལ་དང་གཟུངས་དང་རྒྱུད་གསུངས་ཚུལ་སོང་ནས༔ དེའི་མན་ངག་བྱུང་ཚུལ་ནི༔ བོད་དུ་སྤྲུལ་པའི་ཆོས་རྒྱལ་སྲོང་བཙན་སྒམ་པོས་ལོ་ཙཱ་བ་ཐོན་མི་སཾ་བྷ་ཊ་རྒྱ་གར་དུ་བཏང་ནས་ཕྱག་སྟོང་སྤྱན་སྟོང་གི་གཟུངས་ལ་སོགས་པ་མདོ་རྒྱུད་ཉི་ཤུ་རྩ་གཅིག་བོད་དུ་བསྒྱུར༔ བལ་པོའི་པཎྜི་ཏ་མཉྫ་ཤཱི་གདན་དྲངས་ནས་དབང་ལུང་རྣམས་ཞུས༔ སླར་ཡང་ཐུགས་རྗེ་ཆེན་པོ་ཉིད་ཀྱིས་དབང་ལུང་གནང་བ་དོན་བརྒྱུད་དང་༔ དེའི་ཚེ་ཨུ་རྒྱན་པདྨ་རྫུ་འཕྲུལ་གྱིས་བྱོན་ནས་རྒྱལ་པོ་ཉིད་ལ་དབང་ལུང་རྣམས་ཞུས༔ ཕྱིས་ཨུ་རྒྱན་དངོས་སུ་ཕེབས་དུས་ལྷ་ས་ན་རྒྱལ་པོས་གཏེར་དུ་སྦས་པ་རྣམས་ཀྱང་བཏོན༔ ཁྲི་སྲོང་ལྡེའུ་བཙན་ལ་དབང་ལུང་རྣམས་གནང་ནས་སླར་གཏེར་དུ་སྦས་པ༔ དེ་དུས་དེ་རྣམས་ཀྱི་ནང་ནས་བསྡུས་ཏེ་སློབ་དཔོན་ཉིད་ཀྱིས་མང་དུ་མཛད་པ་རྣམས་གཏེར་དུ་སྦས་པ༔ ཕྱིས་
གཏེར་སྟོན་རྣམས་ཀྱིས་རིམ་པར་བཏོན་པ་ལས་འཇའ་ཚོན་པས་ངན་སོང་རང་གྲོལ༔ གཏེར་བཞེད་སྙིང་པོས་ནམ་མཁའ་རྒྱལ་པོ་སོགས་བཏོན་པ་ཡང་ལེགས་པར་ཐོབ་ཅིང་། ཁྱད་པར་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་མེ་སྤྲེའུ་གྲོ་ཞུན་ཟླ་བའི་ཡར་ཚེས་བཅུའི་ནང་ཞོགས་ཉམས་ཀྱི་སྣང་བར་ཨུ་རྒྱན་སྤྲུལ་སྐུའི་ཆ་ལུགས་ཅན་གཅིག་གིས་དངོས་སུ་གསུངས་པའོ༔ འདི་ལྟར་དངོས་སུ་གསུངས་པའི་སྒྲུབ་ཐབས་རྒྱས་བསྡུས་གསུམ་བྱུང་བ་ནི་སྙན་བརྒྱུད་ཡིན་ནོ༔ འདིར་གཏེར་མ་དང་སྙན་བརྒྱུད་གཉིས་ཀ་ཟུང་འཇུག་ཡིན་འདིའི་ཕན་ཡོན་དགོས་ཆེད་ནི༔ ཞལ་བཅུ་གཅིག་པའི་གཟུངས་ལས༔ ལན་གཅིག་བརྗོད་པས་རྩ་བའི་ལྟུང་བ་བཞི་པོ་དག་ཅིང་བྱང་བར་འགྱུར་རོ༔ མཚམས་མེད་པ་ལྔ་པོ་དག་ཀྱང་མ་ལུས་པར་བྱང་བར་བགྱིད་པར་འགྱུར༔ ཞེས་དང་༔ ལན་བདུན་བཟླས་བརྗོད་བགྱིས་ན་ལས་ཀྱི་སྒྲིབ་པ་བྱང་བར་བགྱིའོ༔ ཞེས་དང་༔ རྒྱུད་ཀྱི་རྒྱལ་པོ་ཆེན་པོ་པདྨ་དྲ་བ་ཅན་ལས༔ སངས་རྒྱས་བྱེ་བ་ཕྲག་བཅུ་གཅིག་གི༔ གྲངས་སྙེད་ཞལ་ནས་གསུངས་པ་ཡི༔ རིག་སྔགས་སྙིང་པོ་གདོང་བཅུ་གཅིག༔ མཐུ་ཆེན་ཐོགས་པ་མེད་པ་སྟེ༔ འགྲོ་
ལ་རྟེན་ཅིང་བདེ་བ་དང་༔ ནད་ཀུན་སེལ་བྱེད་སྡིག་ཀུན་སྦྱོང་༔ བཀྲ་མི་ཤིས་པ་ཀུན་ཟློག་ཅིང་༔ རྨི་ལམ་མཚན་མ་ངན་ཀུན་སེལ༔ དུས་མིན་འཆི་དང་ངན་སེམས་ཟློག༔ རྟག་ཏུ་དཔལ་དང་སེམས་བདེ་ཐོབ༔ མྱ་ངན་སྡུག་བསྔལ་ངལ་བ་སེལ༔ རྩོད་འཁྲུགས་ཐམས་ཅད་ཞི་བ་དང་༔ བདུད་དང་གདོན་བགེགས་ཞི་བར་འགྱུར་འཇིག་རྟེན་སྨོན་པ་ཀུན་འགྲུབ་ཅིང་༔ བདུད་དང་བར་ཆད་མཚོན་ཆ་དང་༔ དབྱུག་པས་རྡེག་དང་བཅིངས་པ་དང་༔ བཙོན་རར་བཅུག་དང་མཚོན་ཆའི་ཚལ༔ གསོད་སར་ཁྲིད་དང་ཡན་ལག་བཅད༔ མིག་འབྲུ་མཚོན་གྱིས་བཅད་པ་དང་༔ ཆུ་དང་མེ་དང་རླུང་ས་གཡོས༔ དུག་དང་བྱད་སྟེམས་རོ་ལངས་དང་༔ ཆོམ་རྐུན་མི་མ་ཡིན་ཀུན་གདོན༔ སྔོན་གྱི་ལས་དྲག་ཡོད་པ་ཡང་༔ རིག་སྔགས་འདི་ཡིས་སྲུང་བ་དང་༔ ལེན་དང་འཛིན་དང་བྲི་བ་དང་༔ ཀློག་དང་ཁ་ཏོན་བཤད་སོགས་རྣམས༔ བརྩོན་ལ་འཇིག་རྟེན་ལྷར་བཅས་དང་༔ བདུད་དང་ཚངས་པ་དགེ་སྦྱོང་དང་༔ བྲམ་ཟེར་བཅས་པས་གནོད་པ་མེད༔ སྔོན་གྱི་ལས་དྲག་ཡོད་པ་ཡང་༔ བྱང་ཞིང་སྲབ་སྟེ་མེད་པར་འགྱུར༔ ངེས་པའི་དངོས་པོ་
འདི་ལགས་པས༔ རིག་གནས་མངོན་སུམ་ཡིད་ཆེས་པར༔ རྣམ་པར་རྟོག་མེད་སེམས་ཀྱིས་བླང་༔ དེ་སླད་སྐྱབས་དང་སྐྱོབ་པ་དང་། གསུང་དབུགས་འབྱིན་དང་དཔལ་མགོན་དང་༔ གླིང་དང་ཁང་ཁྱིམ་འདི་ཉིད་ཡིན༔ ཉེ་རིང་ས་ཕྱོགས་ཇི་སྲིད་བར༔ མཚམས་བཅད་ནས་ནི་རིག་སྔགས་དང་༔ འབྱུང་པོ་རྣམས་ཀྱི་འཚེ་བ་མེད༔ གང་གིས་སངས་རྒྱས་ཕྱག་འཚལ་མཆོད༔ སྐྱབས་སུ་འགྲོ་ཞིང་སྡིག་པ་བཤགས༔ མངོན་པར་དགའ་ཞིང་གཟུངས་སྔགས་འདི༔ ཉི་ཤུ་རྩ་གཅིག་བརྗོད་པ་ལ༔ ཕྱོགས་བཅུའི་སངས་རྒྱས་མ་ལུས་པ༔ མཚུངས་པར་ཡི་རངས་ལེགས་པ་སྦྱིན༔ རྩ་བ་བཞི་དང་མཚམས་མེད་ལྔ༔ མ་ལུས་སྡིག་ཀུན་བྱང་བར་འགྱུར༔ གནོད་སྦྱིན་སྲིན་པོ་སོགས་སྣང་ཡང་། བཟུང་ནས་བྱམས་པ་སྙིང་རྗེའི་སེམས༔ དང་པོ་བསྐྱེད་ནས་བླ་མེད་ཀྱི༔ བྱང་ཆུབ་སེམས་མཆོག་ས་ལ་འགོད༔ གངྒཱའི་ཀླུང་བརྒྱས་སངས་རྒྱས་ཀྱི༔ མཚན་ནས་བརྗོད་ཅིང་བསྟོད་པ་བས༔ རིགས་ཀྱི་བུའམ་བུ་མོ་གང་༔ བདག་གི་མིང་བརྗོད་དྲན་བྱེད་ཅིང་༔ རིག་སྔགས་རྒྱུན་དུ་བརྗོད་ན་མེད༔ མྱུར་དུ་མཆོག་དགའི་ས་ཐོབ་ཅིང་༔ ལག་པའི་
མཐིལ་ནས་མཐོང་བ་ལྟར༔ བླ་མེད་བྱང་ཆུབ་མྱུར་དུ་འབྱུང་༔ ཞེས་དང་༔ པདྨ་ཅོད་པན་གྱི་རྒྱུད་ལས་ཀྱང་གཟུངས་སྔགས་འདི་གསུངས་ནས༔ སྔགས་འདི་འདོན་པར་བྱེད་པའི་རིགས་ཀྱི་བུའམ༔ རིགས་ཀྱི་བུ་མོའི་ལན་གཅིག་བརྗོད་དམ་དྲན་ཅིང་ཡིད་ལ་བྱས་སམ༔ ལུས་ལ་བཅངས་ན་མཚམས་མེད་པ་ལྔ་དང་དེ་དང་ཉེ་བའི་ལས་འབྱོང་ཞིང་སེམས་ཅན་དམྱལ་བ་དང་ཡི་དྭགས་དང་དུད་འགྲོའི་སྐྱེ་གནས་སུ་མི་སྐྱེ་ཞིང་༔ མི་ཁོམ་པ་བརྒྱད་སྡུག་བསྔལ་དང་བཅས་པར་མི་འགྱུར་རོ༔ གཅན་གཟན་དང་སྲིན་པོ་དང་མི་དང་མི་མ་ཡིན་པ་དང་ནད་དང་འཇིགས་པ་ཐམས་ཅད་ལས་གྲོལ་བར་འགྱུར་རོ༔ ཨོཾ་རཀྵ་རཀྟ་ཞེས་པས་ཀྱང་བསྲུང་བར་བྱའོ༔ ཞེས་དང་༔ དེ་རྣམས་བསྡུས་པའི་སྔགས་ནི༔ ཨོཾ་མ་ཎི་པདྨེ་ཧཱུཾ་ཞེས་སོ༔ འདིས་ནི་རིགས་གསུམ་གྱི་བདག་པོར་འགྱུར་ཏེ་ཕན་ཡོན་ནི་དེའོ༔ ཆོས་སྐུ་དང་གཟུགས་སྐུ་ཐུགས་རྗེ་ཆེན་པོ་མཐོང་བར་འགྱུར་རོ་ཞེས་གསུངས་སོ༔ དེ་ལྟ་བུའི་ཕན་ཡོན་མཐའ་ཡས་པའི་དབང་ཞུ་བའི་ཕྱིར་འདིའི་རྗེས་ཟློས་མཛོད༔ དུས་གསུམ་སངས་རྒྱས་ཐམས་ཅད་དང་༔ ཁྱད་པར་ཕྱག་སྟོང་སྤྱན་སྟོང་ལ༔ གསོལ་བ་
འདེབས་སོ་དབང་བསྐུར་སྩོལ༔ ལན་གསུམ་ཞུས་ནས་དེ་ནས་ནི༔ འདི་ཡི་རྗེས་ཟློས་གྱིས་སྨྲའོ༔ དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་གཉིས་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱི་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་མྱུར་ཐོབ་ཤོག །དང་པོ་ལས་བུམ་ཆུ་གཏོར་ཞིང་༔ ཨོ་བྱ་ཤྲཱི་བ་ཧཱུྃ་ཕཊ༔ ཅེས་བགེགས་བསྐྲད༔ ཨོཾ་སྭ་བྷཱ་ཝ་སོགས། སྟོང་པ་ཉིད་དུ་གྱུར༔ དེའི་ངང་ལས་པདྨ་དང་ཟླ་བའི་སྟེང་དུ་ཁྱེད་རང་རྣམས་ཀྱི་རྣམ་པར་ཤེས་པ་དྷཱི༔ཡིག་དཀར་པོ་ལས་འོད་འཕྲོས་སེམས་ཅན་གྱི་དོན་བྱས་ཚུར་འདུས་པདྨ་གསེར་མདོག་ས་མཚན་པར་གྱུར༔ སླར་ཡང་དེ་ལས་འོད་ཟེར་ལྕགས་ཀྱུ་ཞགས་པ་ལྟ་བུ་འཕྲོས༔ ཕྱོགས་བཅུའི་སངས་རྒྱས་བྱང་སེམས་རྣམས་སྤྱན་དྲངས་ནས་ཐིམ་པས་འོད་དུ་
ཞུ་བ་ལས༔ ཁྱེད་རང་རྣམས་འཕགས་པ་སྤྱན་རས་གཟིགས་སྐུ་མདོག་དཀར་ལ་འཚེར་བ༔ ཞལ་བཅུ་གཅིག་གི་འོག་མ་དཀར་ལྗང་དམར་བའི་ཞལ་གསུམ༔ དེ་སྟེང་ལྗང་དམར་དཀར་བའི་ཞལ་གསུམ༔ དེ་སྟེང་དམར་དཀར་ལྗང་བའི་ཞལ་རྣམས་ཞི་ཞིང་མཛེས་པ༔ དེ་སྟེང་ཁྲོ་ཞལ་ནག་པོ་སྤྱན་གསུམ་མཆེ་བ་གཙིགས་པ༔ དེ་སྟེང་ཞི་ཞལ་དམར་པོ་གཙུག་ཏོར་དང་བཅས་པ་རྒྱུན་སྤངས་པ་མགུལ་པ་དང་བཅས་པའོ༔ རྩ་ཕྱག་བརྒྱད་ཀྱི་དང་པོ་གཉིས་ཐུགས་ཀར་ཐལ་སྦྱར༔ གཉིས་པ་གཉིས་བགྲང་ཕྲེང་དང་པདྨ་གསུམ་པ་གཉིས་མཆོག་སྦྱིན་དང་སྤྱི་བླུགས༔ བཞི་པ་གཉིས་འཁོར་ལོ་དང་མདའ་གཞུ་འཛིན་པ༔ ལྷག་མ་དགུ་བརྒྱ་དང་དགུ་བཅུ་རྩ་གཉིས་མཆོག་སྦྱིན་མཛད་པ༔ དེ་ལྟར་ཕྱག་སྟོང་གི་མཐིལ་དུ་སྤྱན་རེ་རེས་མཚན་ཅིང་༔ དར་གྱི་སྟོད་གཡོགས་དང་དར་དཔྱངས༔ ཀ་ཤི་ཀའི་རས་ཀྱི་ཤམ་ཐབས་དང་རི་དྭགས་ཀྲྀཥྛ་ཤ་རའི་པགས་པས་ནུ་མ་གཡོན་བཀབ་པ༔ ནོར་བུ་རིན་པོ་ཆེ་སྣ་ཚོགས་ཀྱི་དབུ་རྒྱན་དང་ཕྱག་གདུབ་ཞབས་གདུབ་སྐུ་རེགས་དོ་ཤལ་ཅན༔ ཞབས་གཉིས་མཉམ་པའི་སྟབས་ཀྱིས་བཞེངས་པ༔ འོད་ཟེར་དཀར་པོ་འཕྲོ་
བའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ༔ ཐུགས་ཀའི་དབུས་སུ་ཧྲིདེ་ལས་འོད་ཟེར་འཕྲོས་པས་པོ་ཊ་ལ་ནས་བསྒོམས་པ་ལྟ་བུའི་ཡེ་ཤེས་པ་དཔག་ཏུ་མེད་པ་སྤྱན་དྲངས༔ ཁྱེད་རང་རྣམས་ལ་སིབ་སིབ་ཐིམ་པར་སྒོམས་ཤིག དབྱངས་རོལ་མོ་དང་བཅས༔ ཧཱུྃ༔ དགོངས་ཤིག་དེ་ཐུགས་རྗེ་ཆེན་པོའི་ལྷ་ཚོགས་དགོངས༔ བཞེངས་ཤིག་དེ་ཐུགས་རྗེ་ཆེན་པོའི་ལྷ་ཚོགས་བཞེངས༔ ལྷོ་ཡི་དེ་གནས་ཆེན་ངོ་མཚར་ཅན་ནས་བཞེངས༔ འཁོར་དང་དེ་བཅས་པ་ཐམས་ཅད་འདིར་བྱོན་ཅིག༔ དབུ་སྐྲ་དེ་ཐོར་གཙུག་ལྡེམས་སེ་ལྡེམ༔ རིན་ཆེན་གྱི་རྒྱན་ཆ་དེ་ཉི་ལི་ལི༔ གླུ་ལེན་དེ་གར་བྱེད་རོལ་མོ་སྒྲོག༔ བྱིན་གྱིས་དེ་བརླབ་པ་བསམ་མི་ཁྱབ༔ དངོས་གྲུབ་དེ་སྟེར་བ་རྩིས་མི་ལང་ཕབ་པ་ངོ་མཚར་ཆེ༔ ཐུགས་རྗེ་དེ་འཛིན་པ་དཔག་ཏུ་མེད༔ གསོལ་བ་དེ་རྩེ་གཅིག་འདེབས་པ་ཡི༔ མི་འདི་ལ་དེ་བྱིན་གྱིས་བརླབ་ཏུ་གསོལ༔ མི་འདི་ལ་དེ་དངོས་གྲུབ་ཐམས་ཅད་སྩོལ༔ མི་འདི་ལ་དེ་བྱིན་ཆེན་དབབ་ཏུ་གསོལ༔ མི་འདི་ལ་དེ་ཐུགས་རྗེས་འཛིན་པར་ཞུ༔ བྱིན་གྱིས་དེ་རློབས་ཤིག་སྤྱན་རས་གཟིགས༔ དངོས་གྲུབ་དེ་སྩོལ་ཅིག་སྤྱན་
རས་གཟིགས༔ བྱིན་ཆེན་དེ་ཕོབ་ཅིག་སྤྱན་རས་གཟིགས༔ ཐུགས་རྗེ་དེ་ཟུངས་ཤིག་སྤྱན་རས་གཟིགས༔ ཕ་བླ་མ་དེ་ཐུགས་རྗེ་ཆེན་པོ་ཁྱེད་ཉིད་ལ༔ མི་བདག་གིས་དེ་རྩེ་གཅིག་གསོལ་བཏབ་ན༔ ཁྱེད་ཀྱི་དེ་ཐུགས་དམ་ད་མཛོད་ཅིག རྒྱས་པར་ན་གཟུངས༔ བསྡུ་ན་ཡིག་དྲུག་ཆོག ཨོ་ལོ་ཀེ་ཤཱ་ར་བཛྲ་ཨཱ་ཝེ་ཤ་ཡ་ཨ༔ ཨཱཿ རྡོ་རྗེ་སྤྱི་བོར་བཞག་གམ་བཞག་ཚུལ་བྱ་ཞིང་༔ བརྟན་པར་བྱས་ཏེ་མང་ན་ནས་གཏོར༔ ཏིཥྛ་བཛ྄༔ བུམ་པ་ཐོགས་ལ༔ ཧྲཱིཿབཀྲ་ཤིས་བུམ་པ་ལྷ་ཡི་གཞལ་ཡས་ཁང་༔ ཐུགས་རྗེ་ཆེན་པོའི་ལྷ་ཚོགས་བཞུགས་པའི་གནས༔ གཉིས་སུ་མེད་པའི་བྱང་ཆུབ་སེམས་ཀྱི་ཆུས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ལུས་ངག་ཡིད་གསུམ་བག་ཆགས་སྒྲིབ་བྱང་ནས༔ ལྷ་ཡི་སྐུ་གསུང་ཐུགས་སུ་འགྲུབ་པར་ཤོག༔ ཨོཾ་མ་ཎི་པདྨེ་ཧཱུྃ༔ ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཨཱཿ དབུ་རྒྱན་ཐོགས་ལ༔ ཧཱུྃ༔ རིན་ཆེན་རིགས་ཀྱི་དབང་བསྐུར་བས༔ ང་རྒྱལ་རྣམ་པར་དག་པ་ཡི༔ མཉམ་ཉིད་ཡེ་ཤེས་དབང་ཐོབ་ནས༔ ཡོན་ཏན་མཆོག་ནི་ཐོབ་པར་ཤོག༔ ཨོཾ་མ་ཎི་པདྨེ་ཧཱུྃ༔ རཏྟ་ཨ་བྷི་ཥིཉྩ་མཱི༔ རྡོ་རྗེ་ཐོགས་ལ༔ ཧཱུྃ༔ པདྨ་རིགས་ཀྱི་དབང་བསྐུར་
བས༔ འདོད་ཆགས་རྣམ་བར་དག་པ་ཡི༔ སོར་རྟོག་ཡེ་ཤེས་དབང་ཐོབ་ནས༔ ཤེས་རབ་མཆོག་ནི་ཐོབ་པར་ཤོག༔་ཨོཾ་མ་ཎི་པདྨེ་ཧཱུྃ༔ བཛྲ་སཏྭ་ཧཱུྃ༔ དྲིལ་བུ་ཐོགས་ལ༔ ཧཱུྃ༔ ལས་ཀྱི་རིགས་ཀྱི་དབང་བསྐུར་བས༔ ཕྲག་དོག་རྣམ་པར་དག་པ་ཡི༔ བྱ་གྲུབ་ཡེ་ཤེས་དབང་ཐོབ་ནས༔ ཕྲིན་ལས་གྲུབ་པའི་དབང་ཐོབ་ཤོག༔ ཨོཾ་མ་ཎི་པདྨེ་ཧཱུྃ༔ འཛྲ་རྡོར་དྲིལ་ཐོགས་ལ༔ ཧཱུྃ༔ བདེ་གཤེགས་རིགས་ཀྱི་དབང་བསྐུར་བས༔ ཞེ་སྡང་རྣམ་པར་དག་པ་ཡི༔ ཆོས་དབྱིངས་ཡེ་ཤེས་དབང་ཐོབ་ནས༔ ཏིང་འཛིན་མཆོག་ཏུ་འགྱུར་བར་ཤོག༔ ཨོཾ་མ་ཎི་པདྨེ་ཧཱུྃ༔ བུདྡྷ་ཨ་བྷི་ཥིཉྩཱམཱི༔ ཀྱེ༔ ཐུགས་རྗེའི་དབང་ཕྱུག་ཅེས་བྱའོ༔ དེ་རྣམས་ཀྱིས་མ་རིག་པ་ལྔ་དག་ནས་ཡེ་ཤེས་ལྔ་རྒྱུད་ལ་སྐྱེ་རིགས་ལྔ་ལམ་དུ་བྱས་པས་རིག་པའི་དབང་ཞེས་བྱའོ༔ སྐུ་གཟུགས་སྤྱི་བོར་བཞག་ལ་ཧཱུྃ༔ བདེ་གཤེགས་འདུས་པ་ལྷ་ཡི་དབང་༔ དེ་རིང་ཁྱོད་ལ་བསྐུར་བར་བྱ༔ རིགས་འདུས་ཐུགས་རྗེ་ཆེན་པོ་ཡི༔ སྐུ་གསུང་ཐུགས་ཀྱི་དབང་ཐོབ་ཤོག༔ མ་ཧཱ་ཀཱ་རུ་ཎི་ཀ་ཀཱ་ཡ་ཨ་བྷི་ཥིཉྩ་མཱི༔ དུས་གསུམ་བདེ་བར་གཤེགས་པ་ཆོས་ཀྱི་སྐུ༔ འགྲོ་དྲུག་སེམས་
ཅན་རྣམས་ལ་སྤྱན་རས་གཟིགས༔ ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ༔ གཟི་བརྗིད་འོད་དཔག་མེད་པའི་སྐུ་ཡི་བཀྲ་ཤིས་ཤོག༔ དེས་ལུས་ཀྱི་སྒྲིབ་པ་དག སྐུའི་དབང་ཐོབ༔ ཕྱག་སྟོང་སྤྱན་སྟོང་གི་སྐུ་བསྒོམ་པར་དབང་༔ འབྲས་བུ་སྤྲུལ་སྐུའི་ས་བོན་ཐོབ་པའོ༔ དེ་ནས་ཡི་གེ་དྲུག་པ་སོ་སོར་བྲིས་པའམ༔ ཡང་ན་ཕྱོགས་གཅིག་ཏུ་དངུལ་གྱིས་བྲིས་པ་ཐོགས་ལ་སངས་རྒྱས་ཀུན་གྱིས་བསྔགས་གྱུར་བས༔ དམ་ཆོས་མ་ལུས་འདུས་པའི་བཅུད༔ འགྲོ་བ་ཡོངས་ཀྱི་དཔལ་དུ་ཤར༔ ཡི་གེ་དྲུག་པའི་དབང་ཞིག་བསྐུར༔ སངས་རྒྱས་ཀུན་གྱི་སྙིང་པོའི་དབང་༔ དེ་རིང་ཁྱོད་ལ་བསྐུར་བར་བགྱི༔ སངས་རྒྱས་ཐམས་ཅད་འདུས་ནས་ནི༔ རིག་སྔགས་རྒྱལ་པོའི་དབང་ཞིག་བསྐུར༔ ཨོ་ནི་སྦྱིན་པའི་ཕ་མེ་རོལ་ཕྱིན༔ སེར་སྣ་མེད་པའི་བཅོམ་ལྡན་འདས༔ སངས་རྒྱས་ཀུན་འདུས་ཆོས་ཀྱི་སྐུ༔ དབང་བསྐུར་བྱིན་གྱིས་བརླབ་ཏུ་གསོལ༔ མ་ནི་བཟོད་པའི་ཕ་རོལ་ཕྱིན༔ ཁྲོ་བ་མེད་པའི་བཅོམ་ལྡན་འདས༔ བདེ་བ་ཆེན་པོའི་ལོངས་སྤྱོད་རྫོགས༔ དབང་བསྐུར་བྱིན་གྱིས་བརླབ་ཏུ་གསོལ༔ ཎི་ནི་ཚུལ་ཁྲིམས་ཕ་རོལ་ཕྱིན༔ ཉོན་མོངས་སྐྱོན་བྲལ་བཅོམ་
ལྡན་འདས༔ སྐུ་གསུམ་ལྷུན་གྲུབ་སྤྲུལ་པའི་སྐུ༔ དབང་བསྐུར་བྱིན་གྱིས་བརླབ་ཏུ་གསོལ༔ པད་ནི་བསམ་གཏན་ཕ་རོལ་ཕྱིན༔ རྣམ་གཡེང་མེད་པའི་བཅོམ་ལྡན་འདས་ཤེས་བྱ་ཐམས་ཅད་མཁྱེན་པའི་སྐུ༔ དབང་བསྐུར་བྱིན་གྱིས་བརླབ་ཏུ་གསོལ༔ མེ་ནི་བརྩོན་འགྲུས་ཕ་རོལ་ཕྱིན༔ ལེ་ལོ་མེད་པའི་བཅོམ་ལྡན་འདས༔ མཁྱེན་བརྩེས་འགྲོ་བ་ཁྱབ་པའི་གསུང་༔ དབང་བསྐུར་བྱིན་གྱིས་བརླབ་ཏུ་གསོལ༔ ཧཱུྃ་ནི་ཤེས་རབ་ཕ་རོལ་ཕྱིན༔ ཕྲིན་ལས་ཀུན་འདུས་བཅོམ་ལྡན་འདས༔ མཐུ་སྟོབས་གཅིག་ཏུ་བསྡུས་པའི་ཐུགས༔ དབང་བསྐུར་བྱིན་གྱིས་བརླབ་ཏུ་གསོལ༔ གསུང་ཡི་གེ་དྲུག་པ་རྡོ་རྗེའི་སྒྲ༔ སངས་རྒྱས་ཀུན་གྱི་བྱིན་བརླབས་པས༔ ཆོས་ཀྱི་སྙིང་པོ་བླ་ན་མེད༔ དབང་བསྐུར་བྱིན་གྱིས་བརླབ་ཏུ་གསོལ༔ མགྲིན་པར་བཞག༔ རྒྱས་པར་ན་གཟུངས་རིང་༔ འབྲིང་གཟུངས་ཐུང་༔ བསྡུས་པ་ཡིག་དྲུག་རྗེས་ཟློས་ལན་གསུམ་བཅུག དུས་གསུམ་བདེ་བར་གཤེགས་པ་ཆོས་ཀྱི་སྐ་འགྲོ་དྲུག་སེམས་ཅན་རྣམས་ལ་སྤྱན་རས་གཟིགས༔ ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ༔ གཟི་བརྗིད་འོད་དཔག་མེད་པའི་གསུང་གི་བཀྲ་ཤིས་ཤོག༔ དེས་ངག་གི་
སྒྲིབ་པ་དག༔ གསུང་གི་དབང་ཐོབ༔ ཕྱག་སྟོང་སྤྱན་སྟོང་གི་གཟུངས་སྔགས་བཟླ་བར་དབང་༔ འབྲས་བུ་ལོངས་སྐུ་འགྲུབ་པའི་སྐལ་པ་དང་ལྡན་ནོ༔ སྦ་ལྕག་གམ་ཤེལ་ལམ་མེ་ལོང་མེད་ན་རྡོ་རྗེ་སྙིང་གར་བཞག་ཅིང་༔ ཧཱུྃ༔ རང་བྱུང་ཆོས་སྐུ་སྐྱེ་བ་མེད་པ་ལས༔ སྣ་ཚོགས་འཆར་བ་རིག་པའི་རྩལ་ཡིན་ཏེ༔ དབང་པོ་ཚོགས་དྲུག་ཡུལ་དྲུག་དབྱིངས་ནས་གསལ༔ ཉོན་མོངས་དྲུག་ནི་སྐུ་དྲུག་ཡེ་ཤེས་དྲུག རང་ཤར་རང་གྲོལ་ཆོས་ཉིད་རོལ་པའི་ངང་༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ རིག་པ་རྩལ་གྱི་དབང་མཆོག་ཐོབ་བར་ཤོག༔ ཨོཾ་མ་ཎི་པདྨེ་ཧཱུྃ༔ ཙིཏྟ་ཨ་བྷི་ཥིཉྩ་ཧཱུྃ༔ དུས་གསུམ་བདེ་བར་གཤེགས་པ་ཆོས་ཀྱི་སྐུ༔ འགྲོ་དྲུག་སེམས་ཅན་རྣམས་ལ་སྤྱན་རས་གཟིགས༔ ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ༔ གཟི་བརྗིད་འོད་དཔག་མེད་པའི་ཐུགས་ཀྱི་བཀྲ་ཤིས་ཤོག༔ དེས་སེམས་ཀྱི་སྒྲིབ་པ་དག༔ ཐུགས་ཀྱི་དབང་ཐོབ༔ ཏིང་ངེ་འཛིན་བསྒོམ་པར་དབང་༔ འབྲས་བུ་ཆོས་སྐུ་འགྲུབ་པའོ༔ དེ་ནས་བཀྲ་ཤིས་རྫས་བརྒྱད་ཀྱི་དབང་བསྐུར་བ་ནི༔ ཧཱུྃ༔ མེ་ལོང་ཡེ་ཤེས་རྒྱ་མཚོ་ཆེན་པོ་སྟེ༔ ཀུན་མཁྱེན་ཀུན་གཟིགས་ཆོས་ལ་
དབང་ཐོབ་ཤོག༔ ཨ་དརྨ་ཨ་བྷི་ཥིཉྩ་ཧཱུྃ༔ ཧཱུྃ་ལི་ཁྲི་མཚལ་ཆེན་དབང་གི་རང་བཞིན་ཏེ༔ ཁམས་གསུམ་སྐྱེ་འགྲོ་དབང་དུ་འདུ་བར་ཤོག པདྨ་ལི་ཁྲི་ཨ་བྷི་ཥིཉྩ་ཧཱུྃ༔ ཧཱུྃ༔ གི་ཝཾ་དུག་གསུམ་སེལ་བའི་སྨན་གྱི་མཆོག༔ རྒྱུ་འབྲས་ནད་རྣམས་ཞི་བའི་དབང་ཐོབ་ཤོག༔ དུཁ་ཤཱནྟཾ་ཀུ་རུ་སྭཱ་ཧཱ༔ ཨ་བྷི་ཥིཉྩ་ཧཱུྃ༔ ཧཱུྃ༔ ཡུངས་ཀར་དྲག་པོའི་རྫས་མཆོག་དམ་པ་ནི༔ བར་ཆད་གདོན་བགེགས་ཞི་བའི་དབང་ཐོབ་ཤོག༔ ཛ་ཐུམ་ཨ་བྷི་ཥིཉྩ་ཧཱུྃ༔ ཧཱུྃ༔ རྩྭ་མཆོག་དཱར་ཝས་ཚེ་ཡི་དངོས་གྲུབ་སྟེར༔ འཆི་མེད་བསོད་ནམས་ཚེ་ཡི་དབང་ཐོབ་ཤོག༔ ཨཱ་ཡུ་ཥེ་ཨ་བྷི་ཥིཉྩ་ཧཱུྃ༔ ཧཱུྃ༔ འོ་མ་ཞོ་ནི་བཅུད་མཆོག་དམ་པ་སྟེ༔ ཡོན་ཏན་ཀུན་གྱི་སྙིང་པོ་ལོན་པར་ཤོག༔ ཧྲི་ད་ཡ་ཨ་བྷི་ཥིཉྩ་ཧཱུྃ༔ ཧཱུྃ༔ ཆོས་དུང་དཀར་པོ་སྙན་པས་ས་གསུམ་གཡོ༔ དམ་ཆོས་སྒྲ་ཆེན་ཡོངས་ལ་ཁྱབ་བར་ཤོག༔ ན་མ༔སརྦ་ཨ་བྷི་ཥིཉྩ་ཧཱུྃ༔ ཧཱུྃ༔ མཆོད་རྫས་བིལ་ཝར་བཀྲ་ཤིས་རྫས་འདུས་ཏེ༔ དངོས་གྲུབ་རྣམ་གཉིས་ཚེ་འདིར་ཐོབ་པར་ཤོག༔ བི་ཛ་པཱུ་ར་ཨ་བྷི་ཥིཉྩ་ཧཱུྃ༔ དེ་ལྟར་བཀྲ་ཤིས་རྫས་བརྒྱད་ཀྱི་དབང་བསྐུར་བས་རྒྱལ་བུ་རྒྱལ་སར་ཁྲི་སྟོན་བྱེད་པ་ལྟར་འགྱུར་རོ༔ གཏོར་མ་ཐོགས་ལ༔ ཧཱུྃ༔
གཏོར་མ་ཕྱག་སྟོང་སྤྱན་སྟོང་ཡིན༔ མ་ལུས་འཁོར་བཅས་ལྷམ་མེར་བཞུགས༔ བུ་ཁྱོད་ལ་ནི་དབང་བསྐུར་བས༔ དབང་བཞི་ཡོངས་སུ་རྫོགས་ཐོབ་ཤོག །གཏོར་མ་ཙཀྐི་དང་བཅས་པ་ཐུགས་རྗེ་ཆེན་པོའི་ལྷ་ཚོགས་དངོས་སུ་གསལ་བ་ཁྱེད་རང་རྣམས་ཀྱི་སྤྱི་བོར་བྱོན༔ སྐུ་ལས་འོད་ཟེར་ཁ་དོག་སྣ་ཚོགས་ཆིལ་ཆིལ་བྱོན་ནས་ཁྱེད་རང་རྣམ་ལ་ཐིམ་པས་བྱིན་གྱིས་བརླབས་པར་སྒོམས༔ བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་བྱེ་བ་ཕྲག་བཅུ་གཅིག་མགོན་པོ་སྤྱན་རས་གཟིགས་དགེ་སློང་མ་དཔལ་མོ༔ པཎྜི་ཏ་ཡེ་ཤེས་བཟང་པོ༔ པཎྜི་ཏ་ཟླ་བ་བཟང་པོ༔ པཎྜི་ཏ་ཟླ་བ་གཞོན་ནུ༔ ཇོ་བོ་རྗེ་ཨ་ཏི་ཤ ལྷ་བླ་མ་ཡེ་ཤེས་འོད༔ པེ་ཉ་བ་བྱང་ཆུབ་སེམས་དཔའ་ཟླ་བ་རྒྱལ་མཚན་ལ་སོགས་པ་གསར་མ་བརྒྱུད་པའི་བླ་མ་རྣམས་དང་༔ ཆོས་སྐུ་སྣང་བ་མཐའ་ཡས༔ ལོངས་སྐུ་ཐུགས་རྗེ་ཆེན་པོ༔ སྤྲུལ་སྐུ་སྲོང་བཙན་སྒམ་པོ༔ སློབ་དཔོན་པདྨ་འབྱུང་གནས༔ ཇོ་མོ་མཁར་ཆེན་མཚོ་རྒྱལ༔ ཆོས་རྒྱལ་ཁྲི་སྲོང་ལྡེའུ་བཙན༔ རིག་འཛིན་འཇའ་ཚོན་སྙིང་པོ༔ གཏེར་བཞེད་སྙིང་པོ༔ མི་འགྱུར་རྡོ་རྗེ་བདུད་འདུལ་རོལ་པ་
རྩལ༔ གཏེར་སྟོན་བརྒྱ་དང་རྩ་བརྒྱད་ལ་སོགས་པ་རྙིང་མ་བརྒྱུད་པ་རྣམས་དང་༔ ཇོ་བོ་ཐུགས་རྗེ་ཆེན་པོ་བཅུ་གཅིག་ཞལ༔ ནམ་མཁའ་རྒྱལ་པོ༔ ངན་སོང་རང་གྲོལ༔ ཕྱག་སྟོང་སྤྱན་སྟོང་གི་ལྷ་ཚོགས་ཐམས་ཅད་ཀྱིས་བྱིན་གྱིས་རློབས་ཤིག༔ ནད་གདོན་སྡིག་སྒྲིབ་བཀྲ་མི་ཤིས་པའི་ཕྱོགས་ཐམས་ཅད་ཞི་བར་མཛད་དུ་གསོལ༔ བསོད་ནམས་དང་ཡེ་ཤེས་བཀྲ་ཤིས་དང་བདེ་ལེགས་ཐམས་ཅད་འཕེལ་བར་མཛད་དུ་གསོལ༔ འཁོར་བ་དང་ངན་སོང་གི་སྐྱེ་སྒོ་ངན་པ་ཐམས་ཅད་ཆོད་པར་མཛད་དུ་གསོལ༔ ཐར་པ་དང་བྱང་ཆུབ་ཀྱི་ལམ་སྒོ་ཐམས་ཅད་འབྱེད་པར་མཛད་དུ་གསོལ༔ ནམ་འཆི་བའི་ཚེ་བདེ་བ་ཅན་གྱི་ཞིང་དུ་སྐྱེས་ནས་མངོན་པར་རྫོགས་པར་འཚང་རྒྱ་བར་མཛད་དུ་གསོལ༔ རྒྱས་པར་ན་གཟུངས་རིང་དང་༔ བསྡུ་ན་ཡིག་དྲུག་ཤམ་དུ༔ ཀཱ་ཡ་ཝཱཀ་ཙིཏྟ་བ་ལིཾ་ཏ་ཨ་བྷི་ཥིཉྩ་མཱི་དུས་གསུམ་བདེ་བར་གཤེགས་པ་ཆོས་ཀྱི་ས༔ འགྲོ་དྲུག་སེམས་ཅན་རྣམས་ལ་སྤྱན་རས་གཟིགས༔་ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ༔ གཟི་བརྗིད་འོད་དཔག་མེད་པའི་སྐུ་གསུང་ཐུགས་ཀྱི་བཀྲ་ཤིས་ཤོག་དེས་བཀའ་མ་དཔལ་མོ་ལུགས་ཀྱི་བཅུ་གཅིག་ཞལ་དང་༔
འཇའ་ཚོན་སྙིང་པོའི་གཏེར་མ་ཐུགས་རྗེ་ཆེན་པོ་ངན་སོང་རང་གྲོལ་དང་༔ བདུད་འདུལ་རྡོ་རྗེའི་གཏེར་མ་ནམ་མཁའ་རྒྱལ་པོ་དང་༔ གནམ་ཆོས་ཕྱག་སྟོང་སྤྱན་སྟོང་གི་སྒྲུབ་ཐབས་རྒྱས་བསྡུས་གསུམ་བྱུང་བ༔ དེ་རྣམས་ཀྱི་དབང་གཅིག་ཏུ་བསྡུས་པ་ལེགས་པར་ཐོབ་པ་ཡིན་པས༔ ད་ཕྱིན་ཆད་འཛམ་གླིང་བྱེ་བ་ཕྲག་བརྒྱ་ན་རང་ཉིད་ཕྱག་སྟོང་སྤྱན་སྟོང་བྱེ་བ་ཕྲག་བརྒྱ་བསྐྱེད༔ དེ་རྣམས་ཀྱི་ཞལ་ནས་ཡི་གེ་དྲུག་པ་གསུངས་པས༔ སེམས་ཅན་ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས་ཡི་གེ་དྲུག་པ་འུར་དི་རི་རི་བཟླ་བར་བསྒོམས་ལ༔ ཡི་གེ་དྲུག་པ་ཕྲེང་སྐོར་གཅིག་བཟླས་ཀྱང་འཕགས་པ་གྲུབ་པའི་གདམས་ངག་ཡིན་པས༔ དེ་ལྟར་རྒྱུན་དུ་ཉམས་སུ་ལེན་སྙམ་པས་རྗེས་ཟློས་མཛོད༔ གཙོ་བོས་ཇི་ལྟར་བཀའ་སྩལ་པ༔ དེ་དག་ཐམས་ཅད་བདག་གིས་བགྱི༔ ཞེས་པ་འདི་ནི་གནམ་ཆོས་ཀྱི་ཆགས་ཕྱི་ལ་དམིགས་ནས་གཏེར་བློན་རཱ་ག་ཨ་སྱས་བསྒྲིགས་པའི་ཡི་གེ་པ་ནི་དགེ་སློང་བརྩོན་འགྲུས་ཏེ༔ འདི་ལ་ཉེས་འགལ་མཆིས་ན་ལྷ་ལ་བཤགས་ཤིང་༔ དགེ་བས་འདི་དང་འབྲེལ་བ་ཐོགས་ཚད་འཕགས་པ་ཐུགས་རྗེ་ཆེན་པོས་རྗེས་སུ་འཛིན་པར་གྱུར་ཅིག༔ མངྒ་ལཾ༔ ༔
ཤོག་སྟོང་།