ཐུགས་རྗེ་ཆེན་པོའི་སྙན་བརྒྱུད་གཙུག་རྒྱན་ནོར་བུའི་ལྷ་མོ་གདུགས་དཀར་མོ་ཅན་གྱི་དབང་བཀའ་གཏེར་ཟུང་འཇུག
ཐུགས་རྗེ་ཆེན་པོའི་སྙན་བརྒྱུད་གཙུག་རྒྱན་ནོར་བུའི་ལྷ་མོ་གདུགས་དཀར་མོ་ཅན་གྱི་དབང་བཀའ་གཏེར་ཟུང་འཇུག་བཞུགས་སོ༔
ན་མོ་ཨུཥྞཱི་ཥ་ཡེ༔ འཇའ་ཚོན་པའི་གཏེར་ཁ་ལྷ་མོ་གཙུག་རྒྱན་མའི་ཟིན་བྲིས་ནི༔ འདི་ལ་དབང་གུད་དུ་མ་གསུངས་ཀྱང་༔ རྙིང་མ་བཀའ་མའི་དབང་རྒྱུན་ལེགས་པར་ཐོབ་པ་དང་གཞན་ཡང་ཕྱག་དྲུག་མ་ཕྱག་གཉིས་མ་སོགས་ཐོབ་པས༔ འདི་ཉིད་ལྟར་བསྐུར་ཆོག་པར་ངེས་སོ༔ དང་པོ་དཀོན་མཆོག་སྤྱི་འདུས་བཏོན་ནས་ཅུང་ཟད་བསྙེན་རྗེས༔ རང་ཉིད་སྐད་ཅིག་གནས་འགྱུར་ནས༔ རང་ཉིད་བཅོམ་ལྡན་འདས་ཤཱཀྱ་ཐུབ་པར་གསལ་བའི་དབུ་གཙུག་དང་བུམ་ལྷ་གཏོར་མ་དྲན་རྫོགས་སུ་གདུགས་དཀར་མོ་ཕྱག་སྟོང་མངའ་བ༔ དབུ་སྟོང་མངའ་བ༔ སྤྱན་བྱེ་བ་ཕྲག་མེ་ལྕེ་འབར་བའི་མཚན་རྟགས་དང་ལྡན་པ༔ དེའི་གནས་གསུམ་ཡི་གེ་གསུམ་དང་
ཐུགས་ཀར་ཟླ་བའི་གདན་ལ་ཨོཾ་ཡིག་གི་མཐར་སྔགས་ཀྱིས་བསྐོར་བ་ལས་འོད་ཟེར་ཕྱོགས་བཅུར་འཕྲོས་པས་སངས་རྒྱས་ཐམས་ཅད་ཀྱི་དབུ་གཙུག་ནས་གདུགས་དཀར་མོ་དཔག་ཏུ་མེད་པ་སྤྱན་དྲངས༔ བདག་མདུན་བུམ་ལྷ་ལ་ཐིམ༔ བུམ་ལྷ་ལས་བདུད་རྩིའི་རྒྱུན་བབ་བུམ་པ་གང་བར་གྱུར༔ ཨོཾ་སརྦ་ཏ་ཐཱ་ག་ཏ་ཨུཥཱི་ཥ་ཧཱུྃ་ཕཊ༔ ཧཱུྃ་ཡུཾ་ཧཱུཾ་ནི་སྭཱ་ཧཱ༔ སྙིང་པོ་དང་༔ ཨོཾ་མ་མ་ཧཱུཾ་ནི་སྭཱ་ཧཱ་ཅི་འགྲུབ་བཟླས་རྗེས༔ སྐྱོབ་པ་ཤཱཀྱ་སེང་གེ་ཡི༔ གཙུག་ཏོར་འོད་ཀྱི་འཕྲོ་འདུ་ལས༔ བྱུང་བའི་ལྷ་མོ་སྟོབས་ཆེན་མོ༔ རིག་པའི་རྒྱལ་མོར་ཕྱག་འཚལ་བསྟོད༔ དེ་ནས་སློབ་
མར་ཁྲུས་བྱས་མཎྜལ་ཕུལ་ལ༔ འོ་ན་ལྷ་འདིའི་ལོ་རྒྱུས་ནི༔ སྔོན་གྱི་དུས་ན་ལྷ་དབང་ཕྱུག་ཆེན་པོ་དང་ལྷ་མོ་ཨུ་མའི་སྲས་གཤིན་རྗེ་མ་ཧཱ་ཀཱ་ལ་དང་༔ སྲིན་མོ་ཙ་མུན་ཏི་གཉིས་འཁྲུངས༔ ཁོང་ལྕམ་དྲལ་དུར་ཁྲོད་བརྒྱད་དུ་རེས་མོས་སུ་བཞུགས་པ་ལ་མཁའ་འགྲོ་མ་རྣམས་ཀྱིས་མིའི་ཤ་ཁྲག་གིས་མཆོད་པ་རྒྱུན་དུ་བྱེད་དགོས་པས་ཤ་ཁྲག་གིས་མ་སྐྱོལ་ནས་མཁའ་འགྲོ་མ་རྣམས་ཀྱིས་མི་ལ་ནད་ཀྱི་ཁ་རླངས་བཏང་སྟེ༔ རྒྱ་གར་དུ་ནད་ཡམས་རྒྱུན་མི་ཆད་པར་འབྱུང་༔ བཅོམ་ལྡན་འདས་ཤཱཀྱ་ཐུབ་པ་ལ་ནད་ཡམས་དེ་བཅད་པར་ཞུས་པས༔ བཅོམ་ལྡན་འདས་ཀྱིས་དབུའི་གཙུག་ཏོར་ནས་ལྷ་མོ་གདུགས་དཀར་མོ་ཅན་དབུ་སྟོང་ཕྱག་སྟོང་མངའ་བ༔ གཟི་བརྗིད་ཚད་མེད་པ་སྤྲུལ་ཏེ༔ ཧཱུྃ་ཧཱུྃ་གྱི་སྒྲ་དང་བཅས་པས་མ་མགོན་གྱི་ཐད་ཀྱི་ནམ་མཁའ་ལ་བཞུགས་པ༔ དེའི་གཟི་བརྗིད་མ་བཟོད་ནས་བཅོམ་ལྡན་འདས་ཀྱི་དྲུང་དུ་འོང་སྟེ་ཕྱག་འཚལ་སྲོག་སྙིང་ཕུལ་བསྟན་པ་སྲུང་བར་ཁས་བླངས་པས་ཆོས་སྐྱོང་མ་མགོན་ལྕམ་དྲལ་ཞེས་གྲགས་སོ༔ དེ་ལྟར་མ་མགོན་འདུལ་བའི་ལྷ་ནི་གདུགས་དཀར་ཡིན་པས༔ འདིའི་དབང་ཐོབ་ན་བྱད་ཁ་དང་ཕུར་ཁ་དང་ལྷ་འདྲེ་ཞུགས་པའི་
གནོད་པ་ཐམས་ཅད་ཞི་བ་དང་སྲུང་བའི་མཆོག་ཡིན༔ བོད་དུ་མཐའ་དབུས་ཀྱི་མཁས་པ་བརྒྱད་རྩ་བརྒྱད་ཞལ་འཛོམ་དུས་རྒྱལ་པོ་ཁྲི་སྲོང་གི་སྐུ་རིམ་ལ་བཀའ་བསྟན་འགྱུར་ནང་ནས་གང་ཟབ་པའི་མདོ་བཅུ་བཏུས་ཏེ་འདོན་པའི་སྲོལ་བཙུགས་པ་ལ་གདུགས་དཀར་མོ་ཅན་ཕྱིར་ཟློག་པའི་མདོ་ཞེས་བྱུང་བས་བཀའ་བསྟན་འགྱུར་ནང་ན་ཡང་འདི་ལས་ཟླཟབ་པའི་ཟློག་པ་མེད་པ་ཡིན་སྐད༔ འདི་རྒྱས་པ་ལྷ་ཡུལ་མ༔ འབྲིང་པོ་མཆོག་གྲུབ་མ་བསྡུས་པ་གཙུག་རྒྱན་མ་དང་གསུམ་ལས་བསྡུས་པ་འདི་འཇའ་ཚོན་པའི་གཏེར་ཁ་ཡིན༔ འདིའི་དབང་བརྒྱུད་ནི༔ སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་སྙིང་པོ་བཀའ་མ་ལས་བྱུང་བ་ཡིན༔ འདིའི་ཕན་ཡོན་ནི་ནད་ཀྱི་རིགས་ཐམས་ཅད་ཞི་བ་དང་༔ གདོན་གྱི་རིགས་ཐམས་ཅད་བསྲུང་བ་དང་༔ བྱད་ཁའི་རིགས་ཐམས་ཅད་ཟློག་པ་དང་༔ སྡིག་སྒྲིབ་ཐམས་ཅད་དག་པ་དང་༔ ཕྱི་མ་བདེ་བ་ཅན་དུ་སྐྱེ་བ་སོགས་ཕན་ཡོན་རྒྱ་ཆེར་མདོ་ལས་གསུངས་སོ༔ དེ་ལྟ་བུའི་དབང་ཞུ་བའི་ཐོག་མར་སྐྱབས་འགྲོ་སེམས་བསྐྱེད་འདིའི་རྗེས་ཟློས་མཛོད༔ ཨོཾ་ཨཱཿཧཱུྃ༔ སྐྱབས་གནས་དམ་པ་རྣམས་ལ་སྐྱབས་སུ་
མཆི༔ རྒྱུད་དྲུག་འཁོར་བར་འཁྱམས་པའི་ཕ་མ་རྣམས༔ བཟོད་མེད་གདུང་བས་སངས་རྒྱས་ཐོབ་བྱའི་ཕྱིར༔ ཀུན་ཀྱང་བྱང་ཆུབ་མཆོག་ཏུ་སེམས་བསྐྱེད་དོ༔ ལན་གསུམ༔ ད་གསོལ་བ་འདེབས་པ་འདིའི་རྗེས་ཟློས་མཛོད༔ ཨེ་མ་ཧོ༔ གཙུག་ཏོར་གཟི་བརྗིད་ཆེན་མོ་ནི༔ རིག་སྔགས་ཀུན་བདག་ཆེ་བའི་མཆོག༔ དཔའ་བོ་ཆེན་མོས་རྗེས་སུ་བཟུང་༔ དབང་གི་སྨིན་གྲོལ་དངོས་གྲུབ་སྩོལ༔ ལན་གསུམ་དང་༔ དམ་ཆུ་སྦྱིན་ཞིང་༔ དེ་ལྟར་ཡིན་ན་ཧེ་རུ་ཀའི༔ དལ་དུ་སུ་ཞུགས་སྨིན་པར་བྱ༔ བླ་མེད་ཡང་གསང་བྱིན་རླབས་ལས༔ གནས་ཁང་འདི་ཡི་ཕྱི་རོལ་དུ༔ དམ་མེད་པ་ལ་སྨྲ་མི་རུང་༔ དེ་ཕྱིར་སྙིང་ནས་བྲོ་བོར་ཞིག༔ བཛྲ་རཀྵ་སི་ཧཱུྃ༔ ས་མ་ཡ༔ ཨི་དན་ན་ར་ཀན༔ ད་ཁྱེད་རང་ལྷར་བསྐྱེད་པ་འདི་ལྟར་སྒོམས་ཤིག༔ ཨཱཿ ཆོས་རྣམས་སྨྲ་བསམ་བརྗོད་མེད་སྟོང་པ་ཉིད༔ ཨོཾ་གྱིས་མཚན་པའི་གདུགས་དཀར་ཡོངས་གྱུར་ལས༔ དྲན་རྫོགས་དམ་ཡེ་དབྱེར་མེད་རང་བཞིན་ནི༔ དབུ་སྟོང་མདུན་ཞལ་སྒེག་པ་ཞལ་ཉིས་བརྒྱ༔ གཡས་ཞལ་ཉིས་བརྒྱ་འཇིགས་རུང་རྒོད་པ་སེར༔ རྒྱབ་ཞལ་ཉིས་བརྒྱ་དམར་པོ་གཤེ་དང་རྔམས༔ གཡོན་ཞལ་ལྗང་
གུ་ཉིས་བརྒྱ་སྙིང་རྗེ་ཞི༔ སྟེང་ཞལ་སྔོན་པོ་ཉིས་བརྒྱ་དྲག་ཏུ་གཟིགས༔ དབུ་རེར་རྡོ་རྗེའི་མཚན་རྟགས་སྤྱན་གསུམ་གསུམ༔ སྐུ་མདོག་དཀར་ཞིང་སྤྱན་མིག་བྱེ་བ་འབུམ༔ ཟུར་མིག་བགྲད་དང་གློག་འགྱུ་དྲག་ཏུ་གཟིགས༔ གཡས་ཕྱག་ལྔ་བརྒྱ་གཡོན་ཕྱག་ལྔ་བརྒྱ་ཡིས༔ ཐམས་ཅད་བསམ་གཅོད་རལ་གྲི་འབར་བ་ཕྱར༔ ཞབས་གཡས་ལྔ་བརྒྱ་བརྐྱངས་པས་འཇིགས་ཀུན་མནན༔ ཞབས་གཡོན་ལྔ་བརྒྱ་བསྐུམས་པས་གདོན་ཀུན་མནན༔ སངས་རྒྱས་བྱེ་བ་ཕྲག་བདུན་ཅོད་པན་འཆང་༔ དབུ་གཙུག་གདུགས་དཀར་བདུན་ནི་བརྩེགས་མར་འཁོར༔ བ་སྤུ་ཐམས་ཅད་ཡེ་ཤེས་འོད་ཟེར་འབར༔ ལྷ་རྫས་ན་བཟའ་ཞི་ཁྲོའི་རྒྱན་དང་ལྡན༔ དཔྲལ་བར་རྣམ་སྣང་ཐུགས་ཀར་ཨོ་དཀར་པོ༔ མགྲིན་པར་སྣང་མཐའི་ཐུགས་ཀར་ཨཱཿདམར་པོ༔ ཐུགས་སྨད་རྡོར་སེམས་ཐུགས་ཀར་ཧཱུྃ་མཐིང་ནག་ཐུགས་དབུས་ཟླ་སྟེང་ཨོཾ་ཡིག་དཀར་པོའི་མཐར༔ སྔགས་ཀྱིས་བསྐོར་བ་ལས་འོད་ཟེར་ཕྱོགས་བཅུར་འཕྲོས་པས་སངས་རྒྱས་ཐམས་ཅད་ཀྱི་དབུའི་གཙུག་ཏོར་ནས་གཙུག་ཏོར་གདུགས་དཀར་མོ་ཅན་གྱི་སྐུ་ཆེ་ཕྲ་ཅི་རིགས་པའི་ཚོགས་ཁ་བ་བུ་
ཡུག་ལྟར་སྤྱན་དྲངས༔ སློབ་མ་ལ་སིབ་སིབ་ཐིམ་པར་གྱུར༔ ཧཱུྃ༔ བྱིན་ཆེན་ངོ་མཚར་མཆོག་གི་གནས༔ ལྷུན་གྲུབ་དབྱིངས་ཀྱི་དཀྱིལ་འཁོར་ནས༔ སྐུ་གསུང་ཐུགས་ཡོན་ཕྲིན་ལས་འདུས༔ གཙུག་ཏོར་ལྷ་ཚོགས་བྱིན་ཕོབ་ཅིག༔ ཨོཾ་སརྦ་ཏ་ཐཱ་ག་ཏ་ཨུཥཱི་ཥ་བཛྲ་ཨཱ་ཝེ་ཤ་ཡ་ཨ་ཨཱཿ བདུན༔ རྡོ་རྗེ་མེ་ཏོག་མགོར་བཞག་ལ༔ ཏིཥྛ་བཛྲ་དེ་ནས་དབང་རྫས་དཀོན་མཆོག་སྤྱི་འདུས་ལྟར་ལས༔ དབང་བུམ་བསྒོམས་ལ༔ བུམ་པ་འདིའང་ཕྱི་རིན་པོ་ཆེ་སྣ་ཚོགས་ལས་གྲུབ་པ༔ ནང་ཐར་པ་ཆེན་པོའི་ལྷའི་གཞལ་ཡས་ཁང་གི་དབུས་སུ་སྔར་སྨོས་མ་ཐག་པའི་གཙུག་ཏོར་གདུགས་དཀར་མོ་ཅན་དུ་གསལ་བའི་དཔྲལ་བ་ནས་འོད་ཟེར་དཔག་ཏུ་མེད་པ་འཕྲོས༔ གདུགས་དཀར་མོའི་སྐུ་ཆེ་བ་རི་རབ་དང་ཆུང་བ་ཉུངས་འབྲུ་དང་ཏིལ་འབྲུ་ཙམ་དཔག་ཏུ་མེད་པ་ཁྱེད་རང་རྣམས་ལ་ཐིམ་པའི་མོས་པ་མཛོད༔ ཧྲི༔ གཙུག་ཏོར་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་མཆོག་རིན་པོ་ཆེ༔ བྱིན་རླབས་ཀློང་ཡངས་རང་བཞིན་འབར༔ ཨོ་ཨཱཧཱུྃ༔ སྐུ་ཡི་སྨིན་མཚམས་ཨོ་དཀར་ལས༔ འོད་ཟེར་སྐར་མདའ་ཆད་པ་ལྟར༔ སྐལ་ལྡན་ལུས་
ལ་གཉིས་མེད་ཐིམ༔ བུམ་དབང་ཐོབ་ནས་སྣང་སྟོང་བསྒོམས༔ གཙུག་ཏོར་གདུགས་དཀར་སྐུ་ཡི་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་ཨུཥཱི་ཥ་ཧཱུཾ་ཕཊ༔ ཀཱ་ཡ་ཨ་བྷི་ཥིཉྩ་ཨོ༔ སྤྱི་བོར་བསྐུར༔ དེས་སྐུའི་དབང་ཐོབ་པས་ལུས་ཀྱི་སྒོ་ནས་བསགས་པའི་སྡིག་སྒྲིབ་དག་ནས༔ ཉམས་ལེན་དུ་ལུས་ལྷ་བསྒོམ་པ༔ ངག་སྔགས་བཟླ་བ༔ སེམས་ཏིང་ངེ་འཛིན་བསྒོམ་པ་ལ་དབང་༔ འབྲས་བུ་སྤྲུལ་པའི་སྐུ་འགྲུབ་པའི་སྐལ་བ་བྱས་བྱུང་བསམ་པའི་མོས་པ་མཛོད༔ དེ་ནས་ཡང་མདུན་བསྐྱེད་ཀྱི་མགྲིན་པ་ནས་གསུང་ཡིག་འབྲུའི་རྣམ་པ༔ རྒྱ་ཡིག་བོད་ཡིག༔ ཨཱ་ལི་ཀཱ་ལི་ལ་སོགས་གསུང་ཡིག་འབྲུའི་ཚོགས་དཔག་ཏུ་མེད་པ་ངག་ལ་ཐིམ་པའི་མོས་པ་མཛོད༔ ཧྲི༔ གཙུག་ཏོར་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་མཆོག་རིན་པོ་ཆེ༔ བྱིན་རླབས་ཀློང་ཡངས་རང་བཞིན་འབར༔ ཨོ་ཨཧཱུྃ༔ གསུང་གི་ལྗགས་སྟེང་ཨཱདམར་ལས༔ འོད་ཟེར་མར་མེའི་རྩེ་མོ་ལྟར༔ སྐལ་ལྡན་ལྕེ་ལ་གཉིས་མེད་ཐིམ༔ གསུང་དབང་ཐོབ་ནས་སྔགས་རླུང་བསྒོམ༔ གཙུག་ཏོར་གདུགས་དཀར་གསུང་གི་དབང་
ཐོབ་ཤོག༔ ཨོཾ་སརྦ་ཏ་ཐཱ་ག་ཏ་ཨུཥཱི་ཥ་ཧཱུཾ་ཕཊ༔ ཝཀྐ་ཨ་བྷི་ཥིཉྩ་ཨཱཿ མགྲིན་པར་བསྐུར༔ དེས་གསུང་གི་དབང་ཐོབ་པས་ངག་གི་སྒོ་ནས་བསགས་པའི་སྡིག་སྒྲིབ་དག་ནས༔ ཉམས་ལེན་དུ་གནས་པ་རྩ་སྦྱང་བ་གཡོ་བ་རླུང་བཟུང་བ༔ བཀོད་པ་བྱང་ཆུབ་ཀྱི་སེམས་སྒོམ་པ་ལ་དབང་༔ འབྲས་བུ་ལོངས་སྤྱོད་རྫོགས་པའི་སྐུ་འགྲུབ་པའི་སྐལ་བ་ཅན་དུ་བྱས་བྱུང་བསམ་པའི་མོས་པ་མཛོད༔ དེ་ནས་ཡང་མདུན་བསྐྱེད་ཀྱི་ཐུགས་ཀ་ནས༔ ཐུགས་ཕྱག་མཚན་གྱི་རྣམ་པ་རྡོ་རྗེ་དྲིལ་བུ་པདྨ་ཁ་ཊཾ་འཁོར་ལོ་ལ་སོགས་དཔག་ཏུ་མེད་པ་ཐུགས་ཀར་ཐིམ་པའི་མོས་པ་མཛོད༔ གཙུག་ཏོར་སྤྱི་འདུས་རིགས་ཀྱི་བདག༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་མཆོག་རིན་པོ་ཆེ༔ བྱིན་རླབས་ཀློང་ཡངས་རང་བཞིན་འབར༔ ཨོཾ་ཨཱཿཧཱུྃ༔ ཐུགས་ཀྱི་ཧཱུྃ་སྔོན་འོད་འབར་ལས༔ འོད་ཟེར་སྤོས་རེངས་དུ་བ་ལྟར༔ སྐལ་ལྡན་སེམས་ལ་གཉིས་མེད་ཐིམ༔ ཤེས་རབ་ཡེ་ཤེས་གསལ་སྟོང་བསྒོམ༔ གཙུག་ཏོར་གདུགས་དཀར་ཐུགས་ཀྱི་དབང་ཐོབ་ཤོག༔ ཨོཾ་ཨཱཿཧཱུྃ༔ སརྦ་ཏ་ཐཱ་ག་ཏ་ཨུཥཱི་ཥ་ཧཱུཾ་ཕཊ༔ ཙིཏྟ་ཨ་བྷི་ཥིཉྩ་ཧཱུྃ༔ དཀར་ནག་མཚམས་སུ་
བསྐུར༔ དེས་ཐུགས་ཀྱི་དབང་ཐོབ་པས༔ ཡིད་ཀྱི་སྒོ་ནས་བསགས་པའི་སྡིག་སྒྲིབ་དག་ནས༔ ཉམས་ལེན་དུ་ལུས་སྣང་སྟོང་ངག་གྲག་སྟོང་སེམས་གསལ་སྟོང་བསྒོམ་པ་ལ་དབང་༔ འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས་བྱུང་བསམ་པའི་མོས་པ་མཛོད༔ དེ་ནས་ཡང་མདུན་བསྐྱེད་ཀྱི་གནས་ལྔ་ལས་འོད་ཟེར་ཁ་དོག་སྣ་ཚོགས་འཕྲོས་ནས་གནས་ལྔ་ལ་ཐིམ་པའི་མོས་པ་མཛོད༔ ཧཱུྃ༔ གཙུག་ཏོར་སྤྱི་འདུས་སྐུ་གསུང་ཐུགས༔ ཡོན་ཏན་ཕྲིན་ལས་འདུས་པའི་འོད་ཟེར་ནི༔ ནམ་མཁའ་ཆུ་ལ་འཇའ་ཤར་ལྟར་སྐལ་ལྡན་གནས་ལྔར་གཉིས་མེད་ཐིམ༔ དབང་བཞི་ཡེ་ཤེས་རྫོགས་ཆེན་པོ༔ གཙུག་ཏོར་སྤྱི་འདུས་རང་བཞིན་དབང་ཐོབ་ཤོག༔ ཨོཾ་སརྦ་ཏ་ཐཱ་ག་ཏ་ཨུཊྛི་ཥ་ཧཱུཾ་ཕཊ༔ སརྦ་དྷརྨ་ཨ་བྷི་ཥིཉྩ་ཧོ༔ དེས་བཞི་པའི་དབང་གི་ལུས་ངག་ཡིད་གསུམ་ཐ་དད་དུ་འཛིན་པའི་སྒྲིབ་པ་དག་ནས༔ ཉམས་ལེན་དུ་བལྟ་བྱ་ལྟ་བྱེད་བསྒོམ་བྱ་སྒོམ་བྱེད་དང་བྲལ་བ་རང་བཞིན་རྫོགས་པ་ཆེན་པོའི་ངང་ལ་གནས་ནས་འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་བྱུང་བསམ་པའི་མོས་པ་མཛོད༔ ད་དབང་གི་མཐའ་རྟེན་ནི༔ ལྷ་མོའི་གནས་
བརྒྱད་ནས་བཀྲ་ཤིས་པའི་རྟགས་བརྒྱད་ཆར་བཞིན་དུ་བབས་ནས་ཁྱེད་རང་རྣམས་ཀྱི་ལུས་ཀྱི་གནས་བརྒྱད་དུ་ཐིམ་པས་བཀྲ་ཤིས་བདེ་ལེགས་ཕུན་སུམ་ཚོགས་པར་བསྒོམ༔ དེ་ནས་ཞི་ཁྲོའི་ནང་གི་བཀྲ་ཤིས་རྟགས་བརྒྱད་སབ༔ ད་གཏོར་མ་འདི་ཉིད་གདུགས་དཀར་མོ་སྔར་སྨོས་མ་ཐག་པའི་མཚན་ཉིད་ཅན་སྟེང་གི་ཆ་ལ་བརྒྱུད་པའི་བླ་མ་དང་བཅས་པ་སྤྲིན་འཁྲིགས་པ་ལྟར་སྤྱི་བོར་བྱིན་གྱིས་བརླབ་པ་དང་དབང་བསྐུར་ནས༔ འོད་དུ་ཞུ་ནས་ཁྱེད་རང་རྣམས་ལ་ཐིམ་པར་སྒོམས་ཤིག༔ བཅོམ་ལྡན་ཤཱཀྱ་ཐུབ་པ༔ རྗེ་བཙུན་འཇམ་པའི་དབྱངས༔ སློབ་དཔོན་འཇམ་དཔལ་བཤེས་གཉེན༔ གུ་རུ་པདྨ་འབྱུང་གནས༔ མཁའ་འགྲོ་ཡེ་ཤེས་མཚོ་རྒྱལ༔ ཉང་ཏིང་འཛིན་བཟང་པོ༔ སྔགས་འཆང་ཧཱུྃ་ནག་མེ་འབར་ལ་སོགས་པའི་བླ་མ་རྣམས་ཀྱིས་བྱིན་གྱིས་རློབས་ཤིག༔ ཧཱུྃ༔ རྡོ་རྗེ་གཙུག་ཏོར་ཕྱིར་ཟློག་པ་ཆེན་མོ༔ ཕྱག་སྟོང་མངའ་བ་ཆེན་མོ༔ དབུ་སྟོང་མངའ་བ་ཆེན་མོ༔ སྤྱན་བྱེ་བ་བརྒྱ་སྟོང་མངའ་བ་ཆེན་མོ༔ རྡོ་རྗེ་མི་ཕྱེད་འབར་བའི་མཚན་རྟགས་ཅན༔ རྡོ་རྗེ་ཡངས་པ་ཆེན་མོ་ས་གསུམ་གྱི་དཀྱིལ་འཁོར་ལ་མངའ་མཛད་མས་སློབ་མ་འདི་རྣམས་ལ་དབང་
བསྐུར་བ་དང་བྱིན་གྱིས་བརླབ་ཏུ་གསོལ༔ ལུས་ངག་ཡིད་གསུམ་མནན་པ་དང་༔ བཅིངས་པ་ཐམས་ཅད་ཕྱེས་ཕྱེས་ཁྲོལ་ཁྲོལ༔ བྱད་ཁ་ཕུར་ཁ་རྦད་འདྲེ་དྲོད་གཏོང་༔ བན་བྱེད་བོན་བྱད་ཐམས་ཅད་སྲུངས་ཤིག༔ ཨོཾ་ཨ་ན་ལེ་ཨ་ན་ལེ༔ བི་ཤད་དེ་བི་ཤད་དེ༔ བེ་ར་བེ་ར༔ བཛྲ་དྷ་རི་བྷན་དྷ་བྷན་དྷ་ནི༔ བཛྲ་པཱ་ཎི་ཧཱུྃ་ཕཊ༔ ཧཱུྃ་ཧཱུྃ་ཕཊ༔ ཕཊ༔ སྭཱ་ཧྭ་ཧུཾ་ཧཱུྃ་ཕཊ༔ བྷནྡྷ་ཕཊ་ཕཊ༔ མ་མ་རཀྵ་རཀྵ་སྭཱ་ཧཱ༔ བསྡུ་ན་རྩ་སྔགས་ལ་རཀྵ་སྦྱར་ཡང་ཆོག༔ ད་མེ་ཏོག་དཀར་པོའི་ཕྲེང་བ་ཞིག་ཕུལ་བའི་མོས་པས་རྗེས་ཟློས་མཛོད༔ ལྷ་མོ་བདག་གིས་བཟུང་ལགས་ཀྱིས༔ བདག་ལ་འགོ་བར་མཛད་དུ་གསོལ༔ སློབ་དཔོན་དང་མདུན་བསྐྱེད་ཀྱི་ཐུགས་ཀ་ནས་སྔགས་ཕྲེང་མུ་ཏིག་གི་ཕྲེང་བ་ལྟར་འཕྲོས༔ ཁྱེད་རང་རྣམས་ཀྱི་ཞལ་དུ་ཞུགས༔ ཐུགས་ཀར་ཨོྃ་གྱི་མཐར་འཁོད་པའི་མོས་པས་རྗེས་ཟློས༔ ཨོཾ་སརྦ་ཏ་ཐཱ་ག་ཏ་ཨུཥཱི་ཥ་ཧཱུྃ་ཕཊ༔ ཧཱུྃ་ཧུཾ་ཧཱུཾ་ནི་སྭཱ་ཧཱ༔ སྙིང་པོ་འདི་ལན་གསུམ་ཡང་མ༔ ཨོཾ་མ་མ་ཧཱུཾ་ནི་སྭཱ་ཧཱ༔ སྔགས་ཕྲེང་དེ་ཉིད་མེ་ཏོག་གི་ཕྲེང་བར་གྱུར་ནས་ཁྱེད་རང་རྣམས་ཀྱི་སྤྱི་བོར་བཅིངས་པའི་མོས་པ་མཛོད༔ རྡོ་རྗེ་མེ་ཏོག་སྤྱི་བོར་བཞག་ལ་ལྷ་མོ་
འདི་ལ་སྩལ་ལགས་ཀྱིས༔ འདི་ལ་འགོ་བར་མཛད་དུ་གསོལ༔ སློབ་མ་འདི་རྣམས་གདུགས་དཀར་མོ་ཅན་གྱི་རིག་སྔགས་ཀྱི་ནུས་པས་བྱིན་རླབས་ཐམས་ཅད་འཇུག་པར་གྱུར་ཅིག༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ མེ་ཏོག་འཐོར་ཞིང་༔ ཨེ་མ་ཧོ༔ ཤེས་བྱའི་དོན་ལ་མ་རྨོངས་པའི༔ བླ་མ་དམ་པའི་བཀྲ་ཤིས་ཤོག༔ གང་ལ་བསམ་པ་དེ་ཡིས་འགྲུབ༔ ཡི་དམ་ལྷ་ཡི་བཀྲ་ཤིས་ཤོག༔ སྐུ་གསུང་ཐུགས་ཀྱི་བྷ་ག་ལ༔ ཕྱག་རྒྱ་ཆེན་པོའི་བཀྲ་ཤིས་ཤོག༔ ཅེས་བཀྲ་ཤིས་བརྗོད༔ སྤྲོ་ན་ལྷ་མོ་གཙུག་རྒྱན་མའི་མདོའི་ལུང་བྱ༔ དེས་ལྷ་མོ་གདུགས་དཀར་མོ་ཅན་གྱི་དབང་ལེགས་པར་ཐོབ་པ་ཡིན་པས་འབྱོར་པ་ཡོད་ན་མདོ་ཉུང་ངུ་འདི་ཁྲི་ར་ཆེན༔ རང་གིས་འདོན་ནམ་གཞན་ལ་འདོན་བཅུག་ན་སྐུ་རིམ་མཆོག་ཏུ་རང་གིས་མདོ་འདི་ཆག་མེད་དམ་ཡང་ན་སྔགས་འབྲུ་བདུན་པ་བྱེ་བ་བདུན་སོགས་བཏོན་ན་བྱད་བཟློག་གི་མཆོག་དམ་པ་ཡིན་པས་འདི་ལ་ཡི་དམ་བྱ་སྙམ་པས་རྗེས་ཟློས་མཛོད༔ གཙོ་བོས་ཇི་ལྟར་བཀའ་སྩལ་པ༔་དེ་དག་ཐམས་ཅད་བདག་གིས་སོགས། དབང་ཐོབ་པའི་སྐུ་དྲིན་གཏང་རག་གི་མཎྜལ་ཕུལ། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་རྒྱན་
སོགས། མདུན་བུམ་གྱི་ཡེ་ཤེས་པ་རྟེན་ལ་ཐིམ་པར་བསམ༔ ཞེས་བླ་མ་ཨུ་རྒྱན་བློ་གྲོས་ཀྱིས་བསྐུལ་ངོར། རཱ་ག་ཨ་སྱས་ངག་ནས་སྨྲས་པ༔ པདྨ་ཀུན་དགས་ཡི་གེར་བཀོད་པ་ལ༔ ཉེས་འགལ་མཆིས་ན་ལྷ་ལ་དགེ་བས་སེམས་ཅན་ཐམས་ཅད་ལ་ཕན་ཐོགས་རྒྱ་ཆེན་པོ་འབྱུང་བར་གྱུར་ཅིག༔ མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།