རྡོ་རྗེ་ཕྲེང་བའི་ངག་ཁྲིད་ཀྱི་ཞལ་ཤེས་ཟིན་བྲིས་སློབ་དཔོན་ཁྲོ་མེད།
རྡོ་རྗེ་ཕྲེང་བའི་ངག་ཁྲིད་ཀྱི་ཞལ་ཤེས་ཟིན་བྲིས་སློབ་དཔོན་ཁྲོ་མེད་བཞུགས་སོ།།
ན་མོ་བཛྲ་དྷ་ར་ཡེ། རྡོ་རྗེ་འཆང་དངོས་བླ་མའི་ཞབས་ལ་འདུད། དེ་ཡང་ཆོས་ཀྱི་བྱུང་ཁུངས་སྐུ་གསུམ་སྟོན་པའི་རྣམ་ཐར་དང་། དེས་གསུངས་པའི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ཐམས་ཅད་ཐེག་པ་ཆེ་ཆུང་གཉིས་སུ་འདུས་པ་དང་། ཐེག་དམན་ཡང་ཐེག་ཆེན་གྱི་ལམ་སྟེགས་ཡིན་པ་དང་། ཐེག་ཆེན་ལ་མདོ་སྔགས་གཉིས་ལས། མདོ་ལས་སྔགས་ཟབ་པ་དང་། སྔགས་ལ་ཡང་རྒྱུད་སྡེ་བཞི་ཡོད་པ་དང་།་རྒྱུད་སྡེ་དེ་དག་སོ་སོར་གསུང་ཚུལ་དང་། །རྒྱུད་ཀྱི་དབྱེ་བ་དང་། ལྷའི་རིགས་དང་ངོས་འཛིན་རྒྱས་པ་ནི་རྒྱུད་སྡེ་ཆེན་པོའི་རྣམ་བཞག་རྣམས་སུ་
ཤེས་པར་བྱ་ཞིང་། དེ་དག་མདོར་བསྡུས་པ་ནི། རྒྱུད་སྡེའི་དབང་བཤད་ལོགས་སུ་ཡོད་པ་དེར་གསལ། རྒྱུད་སྡེ་སོ་སོ་དང་ལྷ་སོ་སོའི་བརྒྱུད་ཚུལ་མང་དུ་ཡོད་པར་འདུག་ཅིང་། རྒྱུད་སྡེ་བཞིའི་དབང་ཕྱོགས་གཅིག་ཏུ་བསྒྲིགས་པ་ནི་སྔོན་ཆད་མེད་པ་ལ། འཕགས་པ་སྤྱན་རས་གཟིགས་ཀྱིས་བྱིན་གྱིས་བརླབས་ཤིང་ལུང་བསྟན་ནས། གྲུབ་ཆེན་མི་ཏྲ་ཛོ་ཀིས་མཛད་པའི་མི་ཏྲ་བརྒྱ་རྩ་དང་། རྡོ་རྗེ་གདན་པས་མཛད་པའི་རྡོར་ཕྲེང་གཉིས་མ་གཏོགས་མེད། མི་ཏྲ་བརྒྱ་རྩ་ནི་ཧ་ཅང་དར་སྲོལ་ཆེ་བ་ཡང་མ་བྱུང་། རྡོ་རྗེ་གདན་པ་ཆེ་ཆུང་གསུམ་ལས། ཆེ་བ་རཏྣ་ཨ་ཀ་
སོ་རི་པ་ར་གུཔ་ནི་འབྲིང་བའི་བླ་མ་ཡིན། ཆུང་བ་བུདྡྷ་ཀཱིརྟི་ཞེས་ཀྱང་བྱ། ཙ་མི་འཆི་མེད་ཅེས་ཀྱང་བྱ། དེ་འབྲིང་བའི་སློབ་མ་ཡིན། འབྲིང་བ་ཨ་བྱཱ་ཀ་ར་གུསྟ་ནི་འདི་མཛད་མཁན་ཡིན་ཏེ། བི་ཀྲ་མ་ལུ་རིང་པ། དུས་འཁོར་བ་འཇིགས་མེད་འབྱུང་གནས་སྦས་པ་ཡང་ཟེར། ཁོང་གིས་རྒྱ་གར་ཤར་ནུབ་ཀྱི་པཎ་གྲུབ་མང་པོ་ལ། སོ་སོར་དབང་ལུང་།དཔག་ཏུ་མེད་པ་གསན། དེ་དག་གི་བརྒྱུད་རིམ་རིང་བརྒྱུད་སོ་སོར་ཡོད་མོད་ཀྱང་། ཧ་ཅང་མང་ཆེས་པས་ཡི་གེར་འཁོད་མི་འདུག་།རྡོ་རྗེ་ཕག་མོས་ལུང་བསྟན་ཅིང་བྱིན་གྱིས་བརླབས་ནས། ལྷ་ཡན་གར་བ་ཡི་སྒྲུབ་ཐབས་དང་རྗེས་གནང་ཕྱོགས་གཅིག་ཏུ་བསྒྲིགས་པ་སྒྲུབ་ཐབས་རྒྱ་མཚོ་དང་། དཀྱིལ་འཁོར་ཀྱི་དབང་རྒྱས་པ་རྣམས་ཕྱོགས་གཅིག་ཏུ་བསྒྲིགས་པ་དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ལ། ཤོ་ལོ་ཀ་གཉིས་སྟོང་དང་བདུན་བརྒྱ། སྒྲུབ་ཐབས་རྣལ་འབྱོར་རྫོགས་ཕྲེང་ལ་ཤོ་ལོ་ཀ་སྟོང་དང་སུམ་བརྒྱ། སྦྱིན་སྲེག་འོད་ཀྱི་སྙེ་མ་ལ་ཤོ་ལོ་ཀ་ཉིས་བརྒྱ་དང་བདུན་ཅུ་རྩ་ལྔ་ཡོད་ཅིང་། འདི་གསུམ་ལ་ཕྲེང་བ་སྐོར་གསུམ་ཞེས་གྲགས་ཏེ། བརྒྱུད་རིམ་ཡང་ཉེ་བརྒྱུད་ཕག་མོ་ནས་ཨ་བྱཱ་ཀ་ར་ལ་བརྒྱུད་
དོ། །དེ་ཉིད་རྒྱ་གར་དང་བལ་པོ་དང་བོད་ཡུལ་དུ་དར་སྲོལ་ཤིན་ཏུ་ཆེ་བ་བྱུང་ན་ཡང་། དགེ་བའི་བཤེས་གཉེན་ཁ་ཅིག་གིས། རྒྱུད་སྡེ་བཞིའི་མཆོག་དམན་གྱི་ཁྱད་པར་མི་འབྱེད་པར། རྣལ་འབྱོར་རྫོགས་ཕྲེང་གི་དངོས་བསྟན་གྱི་གོ་རིམ་བཞིན་ཉམས་སུ་ལེན་ཞིང་། ཕྱི་དྲུག་གི་དཀྱིལ་འཁོར་ལ་ཡང་དབང་བཞི་རྫོགས་པར་བྱེད་པ་ཡོད་མོད། དེ་དག་ནི་མགྲོན་པོ་ཕྱོགས་བསླད་པ་ལྟར་རྣམ་པར་འཁྱམས་པ་ཡིན་ཏེ། རྒྱུད་དང་གྲུབ་ཆེན་གྱི་དགོངས་པ་མ་ཡིན་ཞིང་། བླ་མ་དམ་པའི་གདམས་ངག་དང་བྲལ་བའི་ཕྱིར་རོ། །དེས་ན་རྣལ་འབྱོར་རྫོགས་ཕྲེང་དང་། དཀྱིལ་ཆོག་རྡོ་རྗེ་ཕྲེང་བའི་ཐིག་དང་ཚོན་འགྱེད་པའི་སྐབས་སུ་བཤད་པའི་གོ་རིམ་ནི། སློབ་དཔོན་མེད་པར་རང་གར་འཇུག་པར་མ་གྱུར་ཅིག་སྙམ་དུ་དགོངས་ཏེ་གསུངས་པ་ཡིན་ནོ། །ཞེས་མཁས་པ་རྣམས་ཀྱིས་བཀག་པ་མཛད། དེ་ལ་གྲུབ་ཆེན་ཨ་བྷའི་རྗེས་འབྲང་དངོས་གྲུབ་བརྙེས་པའི་སློབ་དཔོན་ཆེན་པོ་གནས་ལྔ་རིག་པའི་པཎྜི་ཏ་དར་པཎ་ཨ་ཙཱརྱས། རྡོ་རྗེ་ཕྲེང་བའི་གཞུང་གི་དོན་དང་མཐུན་པར། དེའི་འགྲེལ་བའི་ཚུལ་དུ་ཀྲི་ཡ་ས་མུཉྩའི་རྒྱ་གཞུང་ཆེན་པོ་མཛད། དེའི་
རྗེས་འབྲང་བལ་པོའི་པཎྜི་ཏ་མཁས་པ་ཆེན་པོ་མ་ཧཱ་བོ་དྷི་བཞུགས་པ་ཐོས་ནས། ས་བཟང་འཕགས་པ་གཞོན་ནུ་བློ་གྲོས་དཀའ་བ་ཆེན་པོ་སྤྱད་ནས་དེར་བྱོན། བཀུར་སྟི་དང་སྒྲུབ་པའི་མཆོད་པས་མཉེས་པར་བྱས་ནས། དབང་སྒྲུབ་ཐབས་བཤད་པ་ལུང་དང་བཅས་པ་ཞུས་ནས་དེའི་དགོངས་འགྲེལ་བསྟན་ཆོས་གཞུང་ཆེན་པོ་ཡང་མཛད་དེ། རྡོ་རྗེ་འཆང་ཀུན་དགའ་བཟང་པོ་སོགས། བོད་དུ་སྔགས་ལ་མཁས་པའི་དགེ་བཤེས་ཕལ་ཆེར་གྱིས་ཀྱང་དེའི་ལུགས་གཙོ་བོར་བཟུང་། འདི་ཡང་དེའི་ལུགས་ཡིན་པས། ཕྱག་ལེན་ཞིབ་ཅིང་འཁྲུལ་པ་དང་བྲལ་བ་ཡིན་ནོ། །པཎ་ཆེན་ལུང་རིགས་ཉི་མའི་ཞལ་ནས། རྡུལ་ཚོན་དང་འབྲེལ་ན་ཀུ་ཤ་དཔུང་སྐུད་སོགས་སློབ་མ་སྟ་གོན་དགོས་ཀྱི། རས་བྲིས་ལ་དེ་མི་འབྱར་བས་བྱས་ན་མ་ཤེས་པ་ཡིན་གསུངས་ཀྱང་། འདིའི་གཞུང་ལས། རས་བྲིས་ལ་ཡང་བུམ་པ་དང་སློབ་མ་སྟ་གོན་དགོས་པར་བཤད་ཅིང་། རྡོར་ཕྲེང་ཚང་མ་བསྐུར་ན། ཐོག་མར་སྤྱི་ཁྱབ་ཏུ་གཅིག་གིས་ཆོག །དབང་ཞུ་བསྡོ་སློབ་མ་གཞན་དུ་འགྲོ་དགོས་བྱུང་ནས་དབང་འགའ་ཟུང་ཆགས་ནས་དེ་འཕྲོ་ཞུ་བ་བྱུང་ན། སློབ་མ་རྗེས་འཛིན་སྐྱར་མི་དགོས་ཏེ།
སློབ་མ་སྟ་གོན་སྐྱར་དགོས་གསུངས་པས། དབང་གི་མགོར་མ་སླེབས་པར་སྐེད་པ་ནས་ཞུ་བ་བྱུང་ན། སློབ་མ་རྗེས་འཛིན་དང་སློབ་མ་སྟ་གོན་གཉིས་ཀ་སྐྱར་དགོས་སོ། །རྡོར་ཕྲེང་ནང་གི་དབང་ཐོར་བུ་རེ་ཟུང་མགྱོགས་དབང་དུ་བསྐུར་ན། སློབ་མ་རྗེས་འཛིན་སྟ་གོན་གཉིས་ཀ་མི་དགོས་ཏེ། ཀུན་རིག་སོགས་དཀྱིལ་ཆོག་ཕལ་ཆེར་ནས། སློབ་མ་སྟ་གོན་བྱེད་མི་བྱེད་ཅེས་གཉིས་ཀ་གསལ་བར་གསུངས་ཏེ། ལུང་རིགས་ཉི་མས། ཀུན་རིག་ལ་ཡང་ཀུ་ཤ་དང་དཔུང་སྐྱེད་མེད་པ་ཕྱག་ལེན་དེ་ལྟར་ཡིན་གསུངས། རྒྱུད་སྡེ་ཐམས་ཅད་ནས། འབྱོར་པ་རབ་དང་དབང་པོ་ཐ་མ་ལ། རྡུལ་ཚོན་གྱི་དཀྱིལ་འཁོར་གསུངས་ཀྱང་། དེང་སང་ཕལ་ཆེར་འབྱོར་པ་ཆུང་བ་དང་། ས་ཐིག་ཆོག་སོགས་དཀའ་ཚེགས་ཆེ་ཞིང་ཡུན་འགོར་བ་དང་ཐིག་རྩ་ཡང་ཤེས་དཀའ་ཞིང་། ཚོན་གྱི་རི་མོ་ཕྲ་སྦོམ་དང་ཡ་ཡོ་ཀྱག་ཀྱོག་ལ་སྐྱོན་ཆེན་པོ་བཤད་པ་དང་། ཚད་དང་མི་ལྡན་དཀྱིལ་འཁོར་བྲི། །མཚམས་མེད་ལྔ་ལས་སྡིག་ཆེའོ། །ཞེས་གསུངས་པས། ཁེ་བས་ཉེན་ཆེ་ཕྱིར་འདིར་མ་བཤད་དོ། །རྒྱུད་སྡེ་རྣམས་ནས་དབང་པོ་རབ་དང་འབྱོར་པ་ཐ་མ་
ལ། ཚོམ་བུའི་དཀྱིལ་འཁོར་གསུངས་ཤིང་། རྗེ་རང་བྱུང་རྡོ་རྗེ་དང་། །བདུད་མོ་བཀྲ་ཤིས་འོད་ཟེར་དང་། དཔའ་བོ་གཙུག་ལག་ཕྲེང་བ་དང་། ཤར་དྭགས་པོའི་པཎྜི་ཏ་ཆོས་རྒྱལ་བསྟན་པ་སོགས་ཀྱིས། ཚོམ་བུ་ལ་བརྟེན་ནས་དཀྱིལ་འཁོར་དུ་དབང་བསྐུར་རུང་བར་བཤད་འདུག་ཀྱང་། གྲུབ་མཐའ་གཞན་གྱི་དགེ་བའི་བཤེས་གཉེན་ཁ་ཅིག་གི་ཞལ་ནས་། བསྐྱེད་རིམ་ལ་བརྟེན་པ་ཐོབ་པའི་གང་ཟག་གིས་དེ་རུང་གི །གཞན་གྱིས་མི་རུང་གསུངས་པས། རང་གི་ཉམས་ཚོད་དང་བསྟུན་པར་བྱའོ། །རྒྱུད་སྡེ་རྣམས་ནས་འབྱོར་པ་འབྲིང་དང་རྟོགས་པ་འབྲིང་ལ། རས་བྲིས་ཀྱི་དཀྱིལ་འཁོར་གསུངས་པ་ལྟར། བླ་མའི་ཕྱག་ལེན་ཡང་དེ་ཡིན། དགེ་བའི་བཤེས་གཉེན་ཕལ་ཆེར་གྱིས་ཀྱང་དེ་ཡིན། དེ་ལ་ཡང་དཀྱིལ་འཁོར་ཡོངས་རྫོགས་དང་འགྲིམ་དཀྱིལ་གཉིས་ཏེ། ཡོངས་རྫོགས་ནི་དཀྱིལ་ཐང་བཞི་བཅུ་ཞེ་ལྔ་དགོས་པས་ཕལ་ཆེར་གྱིས་འཛོམ་དཀའ། སྔར་གྱི་རྙིང་པ་རྣམས་ལ་ཡང་ཐིག་རྩ་ཚང་བ་དཀོན་པར་སྣང་། དེ་བས་དུར་ཁྲོད་ཡོད་མེད་ཀྱི་དཀྱིལ་འཁོར་སྟོང་པ་གཉིས་བྲིས་ལ། དབུས་ཀྱི་ལྷ་རྣམས་ཐིག་ལེའམ་ཕྱག་མཚན་ཤོག་བུ་ལ་བྲི། གྲུ་བཞི་
ཕྱོགས་མདོག་དང་བཅས་པ་མ་འཆུགས་པར་བྱས་ནས། རིམ་བཞིན་བརྗེ་ཞིང་བཤམ་པ་ནི། འགྲིམ་དཀྱིལ་ཞེས་བྱ་སྟེ། སྐྱེས་ཆེན་གཙུག་ལག་ཕྲེང་བས་ཀྱང་དེ་གསུངས་སོ། །དབང་སྒྲུབ་ལུགས་ལ། སྤྱིའི་ལུགས་ལ་བདག་མདུན་བུམ་གསུམ་སོ་སོར་སྒྲུབ་པ་དང་། བདག་བསྐྱེད་བྱས་རྗེས་མདུན་བུམ་དུས་གཅིག་སྒྲུབ་པ་དང་། །བདག་བསྐྱེད་བྱས་རྗེས་བདག་བསྐྱེད་བསྡུས་ཏེ། བདག་གཙོ་བོ་ཕྱག་གཉིས་པའི་ང་རྒྱལ་གྱིས། མདུན་གྱི་དཀྱིལ་འཁོར་གྱི་དབུས་སུ་ཞུགས་ནས། བདག་དང་དབྱེར་མེད་ཀྱི་དཀྱིལ་འཁོར་བསྒོམ། སྦྱོར་མཚམས་ནས་འཁོར་རྣམས་སྤྲོ། ཡབ་ཡུམ་སྙོམས་འཇུག་གི་སྒྲས་ཡེ་ཤེས་པ་སྤྱན་དྲངས། ཞལ་དུ་ཞུགས་བྱང་སེམས་དུ་ཞུ་བ་ཡུམ་གྱི་པདྨར་སྤྲོས། །སྦྱོར་མཚམས་ནས་དཀྱིལ་འཁོར་སྤྲོས་ཏེ་དམ་ཚིག་པ་ལ་བསྟིམ། སྟ་གོན་གྱི་ལྷ་ཡང་མཆོད་དེ་བསྟིམ། དེ་ནས་གཙོ་བོའི་ཐུགས་ཀ་ནས་བདག་ཉིད་གཙོ་བོ་རྐྱང་པར་བྱ་སྟེ། ཤར་སྒོའི་སྒོ་ཁང་དུ་འདུག་ནས། མཆོད་བསྟོད་དང་དབང་བསྐུར་སོགས་བྱེད་པ། གསར་མའི་བླ་མེད་ལུགས་ཀྱི་དཀྱིལ་ཆོག་སྤྱིའི་ལུགས་ཡིན་པས། དེ་ལྟར་བྱེད་ན་ཡང་ཆོ་ག་འདི་ལ་
བརྟེན་ནས་ཚིག་བསྒྱུར་འོས་བསྒྱུར་ཤེས་པར་བྱའོ། །སྒྱུ་འཕྲུལ་དྲྭ་བ་ལས། རྣམ་པ་ཀུན་གྱི་མཆོག་ལྡན་པ། །སྤྲོ་དང་བསྡུ་བའི་བྱེད་པ་པོ། །ཡེ་ཤེས་སྐད་ཅིག་གིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །ཞེས་དང་། སྡོམ་འབྱུང་ལས། རྣོན་པོ་སྐད་ཅིག་རྣམ་པ་ཡིས། །བསམ་གཏན་ཉིད་ཀྱི་དཀྱིལ་འཁོར་ཏེ། །སྐད་ཅིག་རྣམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམ་པར་བྱ། །ཞེས་དང་། །གྲུབ་ཆེན་དྲིལ་བུ་པས།་བརྫུས་ཏེ་སྐྱེས་པའི་སེམས་ཅན་བཞིན། །ས་བོན་མེད་པར་རྣམ་པར་བསྒོམ། །ཞེས་པའི་དགོངས་པ་ལྟར། སྐད་ཅིག་གིས་བསྐྱེད་པར་བཞེད་དོ། །བསྐྱེད་ཚུལ་འདི་ལ་ནི། ཟབ་མོའི་བསྐྱེད་རིམ་དང་། བརྟག་པའི་རྫོགས་རིམ་ཡང་ཟེར་ཏེ། །སྒྱུ་དྲ་དང་སྡོམ་འབྱུང་གི་ལུང་དྲང་མ་ཐག་པ་ལྟར་དང་། སྡོམ་འབྱུང་དཀའ་འགྲེལ་པདྨ་ཅན་ལས་ཀྱང་། སྐྱེ་གནས་བརྫུས་ཏེ་སྐྱེས་པ་ཁོ་ན་ལ་ཟབ་མོའི་བསྐྱེད་རིམ་དང་། །བརྟག་པའི་རྫོགས་རིམ་པ་ཞེས་བརྗོད་དོ། །ཞེས་གསུངས་པ་ལྟར་རོ། །བསྐྱེད་ཚུལ་འདི་དག་ལས་དང་པོ་པས་ཀྱང་རུང་སྟེ། མངོན་བརྗོད་ལེའུ་དྲུག་པ་ལས། ལས་དང་པོ་པ་ཡི་
བསྒོམ་རིམ་སྟེ། །སྐད་ཅིག་གཅིག་གིས་སྐུ་རྫོགས་པ། ཞེས་གསུངས། སྒྲུབ་ཐབས་འདི་ནི་རྟེན་བརྟེན་པ་དང་བཅས་པའི་དཀྱིལ་འཁོར་རྣམས་ས་བོན་ལས་མི་བསྐྱེད་པར་ཆུ་ལ་ཉ་ལྡང་བ་ལྟར་སྐད་ཅིག་ལ་བསྐྱེད་ཅིང་། དེ་ཡང་རྫོགས་ཕྲེང་གི་འཇམ་རྡོར་སྐབས་སུ། འདིར་རྫོགས་པའི་རྣལ་འབྱོར་ལ་མིག་ལ་སོགས་པ་བྱིན་གྱིས་རླབས་པ་དང་ཡེ་ཤེས་སེམས་དཔའ་དགུག་གཞུག་ལ་སོགས་པ་ནི་མ་བཤད་དོ། །ཞེས་པ་ལྟར་དྲན་རྫོགས་སུ་བསྐྱེད་ནས། མངོན་རྟོགས་ཀྱང་འདོན་མི་དགོས་པར། བསྙེན་པ་ཅི་འགྲུབ་བྱ་ཞིང་། མཆོད་བསྟོད་ཤོ་ལོ་ཀ་ཙམ་བྱས་པས་རྒྱུན་ཁྱེར་གྱི་ཉམས་ལེན་འཐུས་ཏེ། བསྐྱེད་རིམ་ལ་བརྟན་པ་མ་ཐོབ་པས། མངོན་རྟོགས་མི་འདོན་པར་དབང་བསྐུར་བ་སོགས་ནི་མི་བྱའོ། །མངོན་རྟོགས་ཚར་གཅིག་གིས་བདག་མདུན་བུམ་གསུམ་དུས་གཅིག་ལ་བསྐྱེད་ནས། མཆོད་བསྟོད་ཀྱང་ཚར་གཅིག་གིས་ཆོག་པ་ནི། རྙིང་མའི་ལུགས་ཡོངས་གྲགས་ཡིན་ཀྱང་། གསར་མའི་ལུགས་ལ་དེ་འདྲ་བྱེད་མཁན་མཐོང་ཐོས་མེད་པས་འདིར་མི་བྱའོ། །དེ་ལ་རྗེ་དཀོན་མཆོག་ཡན་ལག་གིས་རྡོར་ཕྲེང་གི་དབང་ཆོག་ལས། དེང་སང་འདི་
ན་གསང་སྔགས་སྤྱོད་པ་མང་མོད་ཀྱང་། །བསྐྱེད་རྫོགས་གང་ལ་ཡང་ཚུལ་བཞིན་སྤྱོད་པ་ཉིན་སྐར་ཙམ། །འོན་ཀྱང་མོས་པ་ཙམ་ཞིག་ལམ་དུ་བྱ་བའི་ཕྱིར། །བདག་གིས་འདིར་ཡང་མདོར་བསྡུས་ཆོ་ག་བརྗོད་པར་བྱ། །ཞེས་གསུངས་པ་ལྟར། ཆོ་ག་བསྡུས་པ་བདག་མདུན་ཐ་མི་དད་པ་འདི་ནི། མཁས་པ་ཆེན་པོ་བུ་སྟོན་གྱི་རྗེས་འབྲང་། ཛྙཱ་ན་ཤྲཱིས་བསྒྲིགས་པའི་རྡོར་ཕྲེང་གི་ཆོ་ག་ལས། ཁ་ཅིག་རྡུལ་ཚོན་བསྐྱེད་ཟིན་ནས་བདག་བསྐྱེད་ཀྱང་དེ་ལ་སྤྲོ་བར་བྱེད། དབང་བསྐུར་རིགས་བདག་གིས་རྒྱས་གདབ་པ་སྟེ་ཚུལ་གཉིས་བཞེད་དོ། །དེ་ལ་སྡོམ་འབྱུང་གི་འགྲེལ་པ་དང་། ཕྲེང་བ་དང་བྷི་བྷུ་ཏའི་དཀྱིལ་ཆོག་དང་། གསང་འདུས་ཀྱི་དཀྱིལ་ཆོག་ནག་པོ་པས་མཛད་པ་དང་། ཀླུ་སྒྲུབ་ཀྱིས་མཛད་པ་ལ་སོགས་པར་ཚུལ་འདི་གཉིས་ཀར་འབྲུ་མནན་ཐུབ་པའི་ཚིག་རྣམ་པ་མཐའ་དག་གཅིག་ཏུ་གསལ་བ་མ་ཡིན་པར་གསུངས། ཞེས་དང་། བདག་བསྐྱེད་རྡུལ་ཚོན་གཅིག་ཏུ་བྱེད་པ། གཙོ་བོའི་ཐུགས་ཀ་ནས་བདག་ཉིད་ཕྱག་གཉིས་པའི་རྣམ་པར་ཐོན་ནས། མཆོད་པ་ནས་སྦྱིན་སྲེག་གི་བར་དུ་བྱའོ། །ཞེས་དང་། རྗེ་མི་བསྐྱོད་ཞབས་ཀྱིས། གསང་སྔགས་བླ་
མེད་ཀྱི་དཀྱིལ་འཁོར་དུ་བདག་མདུན་ཐ་མི་དད་དང་ཐ་དད་དུ་བསྒྲུབ་ཚུལ་གཉིས་ཀ་གསུངས་པ་ཡོད་ཅིང་། བུམ་བསྐྱེད་ཀྱང་ལོངས་སྐབས་དང་སྦྱར་བའི་བདག་མདུན་དང་དཀྱུས་གཅིག་ཏུ་སྦྲེལ་མི་སྦྲུལ་གྱི་ལག་ལེན་གཉིས་ཀ་ཡོད་པ་དང་། ཁྱད་པར་རྡོ་རྗེ་ཕྲེང་བའི་ཕྱག་ལེན་ཁ་ཅིག་ཏུ་བདག་མདུན་བུམ་གསུམ་ཀ་དུས་གཅིག་ལ་བྱེད་པའི་ལུགས་སྣང་། ཞེས་ལུགས་དེ་ཡང་མི་འཐད་པར་མ་གསུངས་འཐད་པར་གསུངས་པ་དང་། རྗེ་དཀོན་མཆོག་ཡན་ལག་གིས་བཀའ་གནང་ནས་སྤུས་གང་ལོ་ཙཱ་བས་བསྒྲིགས་པའི་རྡོར་ཕྲེང་གི་ཆོ་ག །དེང་སང་ཀར་ལུགས་ལ་གྲགས་ཆེ་བ་དེ་ཉིད་ལས། དཀྱིལ་འཁོར་བསྒྲུབ་ན་ཡང་བདག་མདུན་དབྱེར་མེད་དུ་བསྐྱེད་ནས་མཆོད་བསྟོད་བསྡུས་པ་ཙམ་དང་། བདག་འཇུག་བླང་བ་དང་། སློབ་མ་གཞུག་པ་སོགས་ཀྱི་སྐབས་སུ་རང་གཙོ་བོ་ལས་མར་མེ་གཉིས་ཆད་ལྟར་བྱེ་ནས་བྱ་བ་དང་། བུམ་བསྐྱེད་སྐབས་སུ་དཀྱིལ་འཁོར་ཡོངས་རྫོགས་སམ་གཙོ་བོ་རྐྱང་པ་བསྐྱེད་པའང་རུང་ཞིང་། བཟླས་དུས་ཀྱི་དམིགས་པའང་ལྷའི་རྣལ་འབྱོར་ཤིན་ཏུ་གསལ་བའི་ངང་ནས་བཟླས་པ་མ་གཏོགས། དམིགས་པ་ཟུར་པ་མི་དགོས་པ་
རྣམས་སློབ་དཔོན་འདིའི་དགོངས་པ་མཐར་ཐུག་ཡིན་པས། སྤྲོས་པ་ལ་མི་དགའ་ན་འདི་ཁོ་ནས་གདོན་མི་ཟ་བར་འགྲུབ་ཅིང་། སྤྲོས་པ་ལ་དགའ་ན་རྡོ་རྗེ་ཕྲེང་བའི་ཕྱག་ལེན་གསལ་བྱེད་དུ་ཡེ་ཤེས་གཞུག་པ་དང་དབང་བསྐུར་བ་སོགས་བཤད་པ་ལྟར་ཉམས་སུ་བླང་ངོ་། །ཞེས་གསུངས་པ་དང་། ཡང་འགའ་ཞིག་གིས། ཕ་རྒྱུད་ལ་གསང་འདུས་འཇམ་རྡོར་དང་། ཀྱེ་རྡོར་གྱི་རིགས་ཐམས་ཅད་ལ་ཐོད་པ་ཅན་ལྷ་དགུ་དང་། བདེ་མཆོག་རིགས་ལ་ཞལ་བཞི་ཕྱག་བཅུ་གཉིས་པ་སོགས། རྩ་བའི་དཀྱིལ་འཁོར་གཅིག་གིས་བདག་བསྐྱེད་བསྒོམས་ནས། གཞན་དཀྱིལ་འཁོར་རྣམས་ལ་མདུན་བུམ་གཉིས་ཁོ་ན་བསྒྲུབས་པས་ཆོག་པའི་སྲོལ་ཡང་ཡོད་འདུག་སྟེ། མཁས་པ་རྣམས་ཀྱིས་དེ་ལ་བདག་བསྐྱེད་ཆད་པའི་སྐྱོན་ཡོད་གསུངས་ནས་བཀག །འདི་ལ་ནི་དེའི་སྐྱོན་ཡང་མེད། སྟག་ལུང་ངག་དབང་གྲགས་པས་ཀྱང་བདག་མདུན་ཐ་མི་དད་པའི་དཀྱིལ་འཁོར་འདི་ལྟར་མཛད་པ་འགའ་རེ་མཐོང་ཞིང་། མི་ཕམ་པདྨ་དཀར་པོས་ཀྱང་རྡོར་ཕྲེང་ལ་འདི་ལྟར་མཛད་པ་ཡིན་ཟེར་བ་ཐོས་པས། འདི་ལ་ཐེ་ཚོམ་མི་བྱའོ། །དེང་སང་དཀར་ལུགས་ཀྱི་རྡོར་ཕྲེང་གཞུང་ལ།
བུམ་པར་ལྷའི་འཁོར་ལོ་སྐད་ཅིག་ལ་བསྐྱེད་ཡེ་ཤེས་བསྟིམ་སྟེ། མཆོད་བསྟོད་བསྙེན་པས་ཆོག་པར་གསུངས་པ་དང་། སྟག་ལུང་ངག་དབང་གྲགས་པས་འོད་ཟེར་འཕྲོ་འདུས་སངས་རྒྱས་རྣམས་ཀྱི་བྱིན་རླབས་བསྡུས་ཏེ་བུམ་ཆུ་ལ་ཐིམ་པར་བསྒོམས་པས་ཆོག་པར་གསུངས་པ་དང་། མི་བསྐྱོད་རྡོ་རྗེས་རྣམ་གྲོལ་སྒོ་ཆེན་ལས་བུམ་པར་རྡོ་རྗེས་རེག་ནས་སྔགས་རྣམས་བརྗོད་པས་ཆོག་པར་གསུངས་པའི་ཕྱིར། བུམ་བསྐྱེད་བསྡུས་པ་འདི་ལ་ཡང་ཐེ་ཚོམ་མི་དགོས་སོ། །པཎ་ཆེན་ཨ་ཧྥུ་ཀ་ར་ཉིད་ཀྱི་ཞལ་ནས། ལྷ་ཐམས་ཅད་ངོ་བོ་གཅིག་པས་རང་གི་ལྷག་པའི་ལྷའི་བསྙེན་པ་ཚད་ལྡན་སྔོན་དུ་སོང་བས་འགྲུབ། ཅེས་གསུངས་པའི་ཕྱིར། རང་གི་ཡི་དམ་གང་ཡིན་གཅིག་གིས་བསྙེན་པ་ཚད་ལྡན་སྔོན་དུ་སོང་ཞིང་། འདིའི་དབང་ལུང་གི་རྒྱུན་ཐོབ་ནས། དབང་འདི་རྣམས་གཞན་ལའང་བསྐུར་རུང་ངོ་། །ཀརྨ་ཕྲིན་ལས་གསུམ་པས་མཛད་པའི་ཀཾ་ཚང་ལུགས་ཀྱི་རྡོར་ཕྲེང་ལས། བླ་མ་ལ་གསང་བསྒྲགས་ཀྱི་ཉེས་པ་དང་། སློབ་མ་ལ་དམ་ཚིག་མི་བསྲུང་བའི་ཉེས་པ་བཀག་པའི་ཕྱིར། ཟང་ཟིང་འབུལ་སྡུད་ཀྱི་ཆེད་དུ་ཁྲོམ་ཚོགས་བསྡུས་ཏེ་རྡོར་ཕྲེང་བཙུགས་པ་
ནི། མཚམས་མེད་དང་འདྲ་བའི་སྡིག་པ་རྔམ་པོ་ཆེ་ཡིན་གསུངས་ནས་བཀག །འོན་ཀྱང་དགོངས་གཅིག་ལས། ཉམས་ལས་མ་ཐོབ་ཉེས་པ་ཆེ་བས་དམ་པའི་ཆོས་ལ་འབྲེལ་པ་ཐོགས་། ཞེས་དང་ཁམས་གསུམ་རྣམ་རྒྱལ་གྱི་རྒྱུད་ལས། ཁམས་གསུམ་གྱི་སེམས་ཅན་ལ་དབང་བསྐུར་བར་བྱའོ། །འདིར་སྣོད་དང་ལྡན་པ་དང་མི་ལྡན་པ་ཡོངས་སུ་བརྟག་པར་མི་བྱའོ། །དེ་ཅིའི་ཕྱིར་ཞེ་ན་། དཀྱིལ་འཁོར་འདི་མཐོང་བ་ཙམ་གྱིས་བྱང་ཆུབ་ཐོབ་པའི་ཕྱིར་རོ། །ཞེས་གསུངས་པའི་ཕྱིར་ཁྲོམ་ལ་དབང་བསྐུར་ན་སྡིག་པར་འགྱུར་རམ་དགེ་བར་འགྱུར། སློབ་དཔོན་རང་གི་སེམས་བསྐྱེད་ལ་རག་ལས་སོ། །དེ་ལྟར་རྡོར་ཕྲེང་ཚང་མ་ཁྲོམ་མང་ལ་བསྐུར་དགོས་བྱུང་ན། མཆོག་དབང་སྐོར་གསུམ་གཏན་ནས་མི་བསྐུར་བའི་སྲོལ་ཡང་ཡོད་པར་སྣང་སྟེ། བུ་སྟོན་ལུགས་ཀྱི་རྡོར་ཕྲེང་གི་དབང་མཆོག་བཤད་པ་དང་བཅས་པ་ཤིན་ཏུ་རྒྱས་པ་ཡེ་ཤེས་དཔལ་གྱིས་མཛད་པ་ལ། མཆོག་དབང་སྐོར་གསུམ་གྱི་རྫི་ཡང་མ་བསྒྲིགས་པར་སྣང་། ཁྲོམ་དབང་བསྐུར་སྲོལ་ནི་སྔར་ནས་ཡོད་པར་འདུག་སྟེ། ཞབས་དྲུང་རིན་ཆེན་ཕུན་ཚོགས་ཀྱི་རྣམ་ཐར་ལས། རྡོར་ཕྲེང་གི་ཆོས་སྐོར་སྐལ་
ལྡན་འབུམ་ཕྲག་བཅུ་གསུངས་པས། སྐྱེས་བུ་དམ་པ་དེ་ལ་རྡོར་ཕྲེང་ཐོབ་པ་ནི་སྐལ་པ་དང་ལྡན་པ་ཡིན་མོད་ཀྱི། སྣོད་ལྡན་དམ་ཚིག་ཅན་འབུམ་ཕྲག་ག་ལ་ཡོད། དེས་ན་དགེ་བའི་བཤེས་གཉེན་རྣམས་ཀྱི་ཕྱག་ལེན་ལ། ཁྲོམ་ཉོབ་ཐམས་ཅད་རྡོར་ཕྲེང་ལ་མི་ཚུད། གཙོ་ཆེར་རབ་བྱུང་རྣམས་ལ་བསྐུར། མི་ནག་པ་ངོ་ཆེན་རྣམས་ལའང་། འབྱོར་པ་ཅན་ལ་འབུམ་བརྒྱ་བསྐལ་བརྒྱ་མདོ་བརྒྱ། ཆོས་བྲི་བ་ཞལ་ཐང་འགའ་ཟུང་བཞེངས་པ་སོགས་འབྱོར་པ་དང་བསྟུན། དར་ལྕོག་ཚེ་ཐར་མར་མེ་སོགས་གྲངས་ཀ་གང་མང་། འབྱོར་པ་མེད་ན་ཡིག་དྲུག་དུང་། དུང་གི་ཁ་བཀང་། ཐ་ན་ཡང་བྱེ་བ་བཅུ་ལས་མི་ཉུང་བ། བཙུན་པ་གྱ་མ་ཐོ་དང་། བཙུན་མ་རྣམས་ལ་བཛྲ་གུ་རུ། ཧཱུྃ་བཛྲ་ཕཊ༔ བདེ་མཆོག་ཡིག་བདུན་སོགས་སོ་སོའི་མོས་པ་དང་བསྟུན་ནས། གང་མོས་གཅིག་ལ་བྱེ་བ་བཅུ་འདོན་དགོས། དེ་མི་འདོན་ན་མི་ཚུད་ཅེས་དང་པོ་ནས་དམ་བགགས་སྲོལ་ཡོད་འདུག་པས་དེ་ལྟར་བྱས་ན་ལེགས། དེ་ལྟར་བྱས་ཚེ། བླ་མ་དང་དབོན་རིགས་དགེ་བཤེས་སོགས་ཡོན་ཏན་ཅན་ཡང་མང་ཞིག་ཡོད་པས། མཆོག་དབང་སྐོར་གསུམ་མ་བསྐུར་ན་
དབང་མ་ཚང་བར་ཤེས་ནས་མི་མགུ། གཞན་ལ་དབང་རྒྱུན་འཕེལ་ན་ཡང་དབང་ཕྱེད་པོ་རེད་པས་བསྟན་པ་ལ་གནོད། ཉུང་དབང་དུ་བསྐུར་ན་མང་མ་ཡིད་མི་ཚིམ་ཞིང་ལོང་སྐབས་ཀྱང་མེད། དེའི་ཚེ་བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །འགྲོ་བ་འདི་དག་ཐམས་ཅད་སངས་རྒྱས་ཉིད། །གར་མཁན་དང་ནི་རི་མོ་བཟང་ལྟར་གནས། །འདི་ན་སྣོད་མིན་འགྲོ་བ་སུ་ཡང་མེད། །ཅེས་གསུངས་པ་ལྟར་དཀྱིལ་འཁོར་ལྷ་ཚོགས་རྣམས་ཀྱི་ཐུགས་རྒྱུད། རྣལ་འབྱོར་པ་རང་གི་སེམས་ཉིད་དང་། སེམས་ཅན་ཀུན་གྱི་སེམས་ཉིད་དབྱེར་མེད་ཡེ་ནས་ཆོས་སྐུ་ཡིན་པར་ལྟ་བའི་གདེང་བསྐྱེད་དེ། རང་ལ་གསང་བསྒྲགས་ཀྱི་ཉེས་པ་མི་འབྱུང་། དབང་ཚིག་རྣམས་བཤད་པ་མི་བྱ་བར་ཧྲུག་ཧྲུག་བཏོན་པས། ཐ་མལ་པ་རྣམས་ལ་མ་གསང་རང་གསང་ཡིན་དོན་ཅི་ཡང་མི་གོ །ཡོན་ཏན་ཅན་རྣམས་ཀྱིས་དབང་བཞི་ཚང་བར་ཤེས་ནས་མགུ། ཐམས་ཅད་ཀྱིས་དབང་བཞི་ཡོངས་རྫོགས་ཐོབ་པས་། ཕན་ཡོན་ཆེ་ཞིང་སྐལ་པ་ཡང་བཟང་བ་ཡིན། འདིའི་རྡོར་ཕྲེང་གི་གཞུང་ལས་འདི་སྐད་དུ། རྒྱ་གཞུང་ལས། བུམ་པའི་གྲངས་མང་དུ་གསུངས་ཀྱང་། ཕྱག་ལེན་ལ་
ཉིན་རེ་ལ་དཀྱིལ་འཁོར་གཅིག་གིས་དབང་བསྐུར་བ་ལས་མི་མཛད་ན། རྣམ་རྒྱལ་བུམ་པ་གཅིག་དང་། ལས་བུམ་གཅིག་མཛད་ཅིང་། ཉིན་གཅིག་ལ་དཀྱིལ་འཁོར་བཞི་ལ་སོགས་པའི་དབང་སྐུར་བྱེད་ན། དཀྱིལ་འཁོར་རེ་རེ་ལ་རྣམ་རྒྱལ་བུམ་པ་རེ་རེ་དང་། ཐུན་མོང་དུ་ལས་བུམ་གཅིག་བཤམས་པ་ཡིན་པས། ཞེས་དང་། རེས་བྲིས་དང་རྡུལ་ཚོན་གང་ལ་བརྟེན་ཀྱང་རུང་སྟེ། སང་ཉིན་དཀྱིལ་འཁོར་མང་ཉུང་གང་བྱེད་ཀྱི། ལྷ་སྟ་གོན་བུམ་པ་སྟ་གོན་སྔོན་མའི་དཀྱིལ་འཁོར་གྱི་ཆོ་ག་རྫོགས་པའི་རྗེས་སུ་སང་ནངས་པར་དབང་སྐུར་བྱེད་འགྱུར་གྱི་ལྷ་སྟ་གོན་བུམ་པ་སྟ་གོན་བྱེད་དགོས་པས། ཞེས་དང་། དེ་ནས་བརྟག་གཉིས་ཀྱི་ཧེ་རུ་ཀ་བཞི་ལ་དངོས་གཞི་གཅིག་མཛད་པ་སོགས་འོག་ནས་རིམ་བཞིན་ཤེས་པར་བྱའོ། །ཞེས་དང་། དབང་རྫས་ལྷར་བསྐྱེད་པ་ནི། ཉི་མ་གཅིག་ལ་དཀྱིལ་འཁོར་གཅིག་གམ་གཉིས་སམ་གསུམ་བཞི་ལ་སོགས་པ་དབང་བསྐུར་གང་སྤྲུལ་བྱེད་ཀྱི་རྣམ་རྒྱལ་བུམ་ཆུ་ལ་དམིགས་ལ། རང་རང་གི་ལས་སྔགས་ཀྱིས་བསང་ཞེས་སོགས་དང་། དེ་ནས་དཀྱིལ་འཁོར་གསུམ་བཞི་ལ་སོགས་པའི་དབང་བསྐུར་དུས་གཅིག་ལ་
བྱེད་ན། རྣལ་རྒྱལ་བུམ་པ་གཞན་གྱི་ཆུ། གཙོ་བོའི་བུམ་པར་བསྡུས་ཏེ། ལས་ཀྱི་རྡོ་རྗེས་བུམ་པ་བཏེག་ལ། སློབ་མའི་ཕྱོགས་སུ་བཟུང་ཞིང་སློབ་དཔོན་རྡོ་རྗེ་དྲིལ་བུ་འཛིན། ཞེས་གསུངས་པའི་དོན། དཀྱིལ་འཁོར་གསུམ་བཞི་ལ་སོགས་པའི་དཀྱིལ་འཁོར་སྟ་གོན་དང་བུམ་པ་སྟ་གོན་སྔར་ནུབ་ལྟར་བྱས་ནས། ཕྱིར་ནངས་དང་པོ་རྩ་བའི་དཀྱིལ་འཁོར་གཅིག་བསྒྲུབ། གཙོ་བོའི་ཐུགས་ཀ་ནས་གཙོ་བོ་རྐྱང་པ་རང་བྱེ་ནས་དཀྱིལ་འཁོར་རྗེས་མ་བསྒྲུབས། དེ་མུས་ཀྱིས་དཀྱིལ་འཁོར་གསུམ་བཞི་ཙམ་ལེགས་པར་བསྒྲུབས་ནས་སླར་ཡང་དང་པོ་སྒྲུབ་པའི་དཀྱིལ་འཁོར་གཙོ་བོའི་ང་རྒྱལ་གྱིས། བདག་འཇུག་ལེན་པ་དང་སློབ་མ་ལ་དབང་བསྐུར་བར་བྱ་སྟེ། བདག་འཇུག་གཅིག་གིས་དཀྱིལ་འཁོར་བཞི་ཀའི་བདག་འཇུག་དུས་གཅིག་ལེན། སློབ་མ་ལ་ཡང་དབང་གཅིག་གིས་དཀྱིལ་འཁོར་བཞི་ཀའི་དབང་དུས་གཅིག་ལ་བསྐུར་ཏེ། མེ་ཏོག་དོར་དུས་དཀྱིལ་འཁོར་བཞི་ཀཾ་ལ་དོར་ལྷ་ངོ་སྟོན་དུས་ཡང་སོ་སོར་དཀྱིལ་འཁོར་བཞི་ཀའི་ལྷ་ངོ་སྟོན། བུམ་དབང་དུས་བུམ་ཆུ་རྣམས་རྩ་བའི་དཀྱིལ་འཁོར་གྱི་བུམ་པར་བསྡུས་ཏེ་བསྐུར། བཟླས་ལུང་དུས་དཀྱིལ་འཁོར་བཞི་
ཀའི་བཟླས་ལུང་སྦྱིན། དེ་ལྟར་དབང་བསྡོམས་ཏེ་ཐོབ་པའི་སློབ་མ་དེས། གཞན་ལ་དབང་སྐུར་ཚེ་ཕྲལ་ནས་ཀྱང་བསྐུར་ཆོག་སྟེ། དེའི་དོན་རྡོར་ཕྲེང་རྩ་བའི་དཀྱིལ་འཁོར་ཉེར་བརྒྱད་པ་ཐོབ་ནས། དེ་ལས་ཕྱེ་བའི་བཞི་བཅུ་ཞེ་གཉིས་པ་དང་། ཞེ་ལྔ་པ་དང་། ལྔ་བཅུ་ང་བརྒྱད་པ་དང་། དཀྱིལ་འཁོར་ལྔ་སྟོང་བརྒྱད་བརྒྱ་བཅུ་བདུན་རྣམས་ཀྱི་ཡང་དབང་བསྐུར་བའི་ཆོ་ག་དང་ལམ་སྒོམ་པ་སོགས་ལ་དབང་བ་ཡིན་ནོ། །ཞེས་པཎ་ཆེན་ཉིད་ཀྱིས་གསུངས་ཤིང་། དེ་ལ་རྒྱ་བོད་ཀྱི་མཁས་གྲུབ་ཐམས་ཅད་ཞལ་མཐུན་པས་ཐེ་ཚོམ་མེད་དོ། །དེ་ལ་གོ་རིམ་ནི་རྡོར་ཕྲེང་གི་དབང་ཆོག་རྣམས་སུ། དང་པོ་འཇམ་རྡོར་གྱིས་དབུ་བྱས་ཏེ་ཕ་རྒྱུད་ཀྱི་དཀྱིལ་འཁོར་བཞི། ཀྱེ་རྡོར་གྱི་ཕྱོགས་གཏོགས་དཀྱིལ་འཁོར་བཅུ་གསུམ། བདེ་མཆོག་གི་ཕྱོགས་གཏོགས་དཀྱིལ་འཁོར་བཅོ་བརྒྱད། དེ་ནས་དུས་ཀྱི་འཁོར་ལོ་སྟེ། བླ་མེད་ཀྱི་དཀྱིལ་འཁོར་སུམ་ཅུ་རྩ་དྲུག །དེ་ནས་རྣལ་འབྱོར་རྒྱུད་གསུམ། སྤྱོད་རྒྱུད་གཅིག །བྱ་རྒྱུད་གཉིས་ཏེ། དེ་ལྟར་ཞེ་གཉིས་ནི་རྡོར་ཕྲེང་དངོས་ཡིན་ལ། དེ་ལ་དེ་དག་ལོགས་སུ་བྱེད་པའི་དཀྱིལ་འཁོར་གསུམ་བསྣན་པས་ཞེ་ལྔ།
མངོན་རྟོགས་བཞུགས་པའི་གོ་རིམ་དང་དབང་བསྐུར་བའི་ཕྱག་ལེན་ཡང་དེ་ལྟར་མཛད་པར་སྣང་སྟེ། རྒྱུད་བརྟག་གཉིས་ལས། སོ་ཐར་དང་བྱང་སྡོམ་དང་། བྱ་སྤྱོད་རྣལ་འབྱོར་བླ་མེད་རྒྱུད་ལ། རིམ་གྱིས་ཡར་འཇུག་དགོས་པར་གསུངས་པས། དང་པོ་ཚེ་བསྲིང་ཕྱིར་རྣམ་རྒྱལ་མ། འཕྲལ་ཕུག་ཏུ་ལོངས་སྤྱོད་འདུ་བའི་ཕྱིར་ནོར་རྒྱུན་མ། བར་ཆད་གློ་བུར་བ་མི་འོང་ཕྱིར་གཟའ་ཡུམ། སྡིག་ཅན་དང་དམ་ཚིག་ཉམས་པ་དབང་གྲལ་དུ་མང་དུ་ཡོད་པས་དེའི་གྲིབ་རང་གཞན་ལ་མི་འགོ་ཞིང་སྣོད་མིན་གྱི་སྣོད་སྦྱང་ཕྱིར། རྡོར་སེམས་སྒོམ་བཟླས་ཀྱི་དམིགས་པ་སྤྱོད་ལ། བཛྲ་སཏཱ་འབུམ་ཐེར་གཅིག་ལས་མི་ཉུང་བ་དབང་ཞུ་རིང་ལ་བསྙེན་འཇུག །དེ་ནས་བྱ་རྒྱུད་དང་། སྤྱོད་རྒྱུད་དང་། རྣལ་འབྱོར་རྒྱུད་དང་། ཕ་རྒྱུད་དང་། ཀྱེའི་རྡོ་རྗེའི་སྐོར་དང་། དེ་ནས་བདེ་མཆོག་སྐོར་རྣམས་བསྐུར་ཏེ། མཱ་ཡཱའི་རྗེས་ནས་དུས་འཁོར་བསྐུར་ལ་གདན་བཞི་ཡབ་ཡུམ་གཉིས་རྗེས་སུ་བཞག་སྟེ། རྗེ་མར་པའི་མགུར་ལས་རྒྱུད་གཉན་པར་གྲགས་པའི་གདན་བཞི་ཞུས་གསུངས་པ་ལྟར། འདི་རྒྱ་བོད་ཀུན་ཏུ་ཤིན་ཏུ་གཉན་པར་གྲགས། སྤྲུལ་པའི་སྐུ་དཀོན་མཆོག་ཕྲིན་
ལས་རྣམ་རྒྱལ་ཡང་འདི་གནང་བའི་སྐབས་བསྙུངས། འདི་གཞན་ལ་དབང་རྒྱུན་སྤེལ་རེ་ཡོད་པ་རྣམས་ལ་ཉུང་དབང་བྱ། དེའི་ཚབ་ཏུ་མང་མ་ལ། གསང་་འདུས་འཇམ་པའི་རྡོ་རྗེ་གཙོ་བོ་འཕོ་བའི་རིགས་པས། གསང་འདུས་འཇིག་རྟེན་དབང་ཕྱུག་དང་། དུས་འཁོར་ཐུགས་དཀྱིལ་ལྟ་བུ་ཞིག་བསྐུར།་ཉུང་དབང་བྱེད་ཁ་ཡང་། དུད་སོལ་མ་དང་ཞལ་བཞི་པ་ལ་གཏོར་མ་འབུལ། དེ་ལྟར་བྱེད་པས་བར་ཆད་མི་འབྱུང་ཞིང་འཇམ་པར་འོང་། དབང་ཚར་རྗེས་སྔོན་དགེ་བ་ཁས་ལེན་བྱས་པ་རྣམས་ལ་ཡང་དོ་དམ་བྱ། དེ་ལྟར་ཉིན་རེ་སྔ་དྲོ་ཕྱི་དྲོ་དབང་གཉིས་རེ་བསྐུར་ན། དང་པོ་ཉིན་པར་སྟ་གོན་ཞག་གཅིག །རྗེས་བསྔོ་བ་སྨོན་ལམ་བཀྲ་ཤིས་ཞག་གཅིག་སྟེ། རྔོག་དཀྱིལ་སོགས་མཐུད་ན་ཟླ་གཅིག་ཙམ་འགོར་ལ། དབང་ཞུ་མི་ཉུང་ཞིང་། དབང་བཞི་རེ་ཙམ་སྤོམ་ནས་བསྐུར་ན། ཞག་བདུན་ཙམ་གྱིས་ཀྱང་རྫོགས་པར་འགྱུར་བས་དལ་ཁོམ་དང་བསྟུན། ཁྲོམ་སོགས་དབང་ཞུ་མང་ན། རྡོ་རྗེ་གནས་གསུམ་དུ་གཏུགས་པ་སོགས་ཀྱང་སྟོན་པ་ཙམ་དང་། དམ་ཆུ་ཡང་གཏོར་བ་ཙམ། དབང་རྫས་རྣམས་ཀྱང་སྟོན་པ་ཙམ་བྱ་སྟེ། རིག་པའི་
དབང་ལྔའི་མཇུག་ཏུ། བུམ་པ་དབུ་རྒྱན་ནང་དུ་བཅུག །རྡོ་རྗེ་དང་བཅས་པའི་ཕྱག་གིས་མགོར་བཞག་ཅིང་། གཡོན་དྲིལ་བུ་དང་བཅས་པས་རྡོར་དྲིལ་དར་ལ་བཏགས་པ་ལག་པས་རེག་ཙམ་བྱེད་འཇུག་རྗེས་རྗེས་ནས་མཆོད་གཡོག་པས་བུམ་ཆུ་བཀྱེ་ཞིང་འོང་། སློབ་དཔོན་དབང་གི་རྗེས་སུ་ཡང་དེ་ལྟར་བུམ་པ་དང་རྡོར་དྲིལ་ལན་གཅིག་འགྲིམ། མདའ་གཞུ་མིག་ཐུར་མེ་ལོང་སོགས་ཀྱང་། བུམ་པ་དང་མཉམ་དུ་ཙཀ་ལི་བཟུང་བའམ་མཆོད་གཡོག་པས་མཉམ་དུ་རྗེས་རྗེས་ནས་འགྲིམ། གསང་དབང་བྷནྡ་བསྟན་ཙམ་བྱས་ལ་བདུད་ཚེརྩི་མཆོད་གཡོག་པས་བཀྱེ། མཐའ་བསྟན་ཙཀ་ལི་རྣམས་དུས་གཅིག་འགྲིམ་པས་འཐུས། དེ་ལྟར་བསྡུ་འཚམས་མ་ཤེས་ན་ཁྲོམ་ལ་དཀྱིལ་འཁོར་གྱི་དབང་རྫོགས་པའི་མཐའ་མེད། དེ་ལྟར་ཆོག་པ་ཡང་བཀའ་དགོངས་ཞི་ཁྲོ་ཐུགས་རྗེ་ཆེན་པོ་སངས་རྒྱས་སྟོང་དབང་སོགས་ཀྱི་ཕྱག་ལེན་གྱིས་གསལ། དབང་ཞུ་བ་བདུན་ལས་མི་མང་བ་ཡིན་ན། རྡོ་རྗེ་གནས་སོ་སོར་གཏུགས་པ་དང་དམ་ཆུ་བླུད་པ་དང་དབང་རྫས་སོ་སོར་འགྲིམ་པ་གཞུང་ལྟར་བྱ་སྟེ། བླ་མས་གནང་དུས་ཀྱང་དེ་ལྟར་མཛད་དེ། རྡོར་ཕྲེང་འདིའི་གཞུང་གི་རྩ་ཚིག་
ལས། གཉིས་པ་རས་བྲིས་ཀྱི་དཀྱིལ་འཁོར་ལ་བརྟེན་པའི་ཆོ་ག་འདིར་བཤད་པར་བྱ་བ་ལ། དཀྱིལ་འཁོར་བསྒྲུབ་པའི་ཐོག་མ་རུ། །སྔོན་འགྲོ་གཏོར་མ་གནས་ཡོ་བྱད། །བྱིན་གྱིས་བརླབ་ཅིང་ཞུ་འབུལ་བྱ། །སྐྱབས་འགྲོ་སེམས་བསྐྱེད་ཡིག་བརྒྱ་བཟླ། །ཚོགས་གཉིས་བསགས་ནས་སྲུང་འཁོར་སོགས། །མངོན་རྟོགས་བསྒོམས་ནས་བཟླས་པ་བསྡུ། །མདུན་བསྐྱེད་བདག་བསྐྱེད་ཆ་འདྲ་བསྒོམ། །རང་ཉིད་མདུན་བསྐྱེད་གཙོ་བོ་དང་། །དབྱེར་མེད་བསྒོམ་པའི་མཁའ་ནང་ནས། །དཀྱིལ་འཁོར་སྤྲོས་ཏེ་མདུན་ལ་བསྟིམ། །སྟ་གོན་དཀྱིལ་འཁོར་དགུག་གཞུག་བྱ། །དེ་རྗེས་གནས་གསུམ་བྱིན་བརླབས་ནས། །དབང་གི་ལྷ་རྣམས་སྤྱན་དྲངས་མཆོད། །དབང་བསྐུར་རིགས་བདག་རྒྱས་གདབ་བོ། །ཡུམ་རྐྱང་རྣམས་དང་ཕྱི་དྲུག་གི །དཀྱིལ་འཁོར་བསྒྲུབ་ཚུལ་འོག་ནས་ཤེས། །མཆོད་པ་ཕྱི་མཆོད་བསྟོད་པ་དང་། །ནང་མཆོད་ཕུལ་ནས་གཏོར་མ་གཏོང་། །ནང་དུ་འདས་པའི་ལྷ་མཆོད་པའོ། །དེ་རྗེས་ཕྱི་རོལ་གཏོར་མ་བྱ། །ནང་དུ་ལོག་ནས་ཉེ་རེག་དང་། །བསྐོར་བ་སྒོ་དབྱེ་ཕྱག་བྱའོ། །ཞེས་པ་ལྟར་རོ། །ཞེས་
བདག་མདུན་ཐ་མི་དད་བྱས་པ་མ་གཏོགས། འདིའི་དབང་སྒྲུབ་རྣམས་རྩ་ཚིག་དེ་ཇི་ལྟ་བ་ཡིན་པས། ཆོ་ག་རྣམ་པར་དག་པ་སྟེ།་འདི་ལ་བརྟེན་ནས་འདིའི་བསྙེན་སྒྲུབ་བྱ་བར་། འདོད་ན་ཡང་། ཆོ་ག་ཉུང་ངུ་འདི་ལ་བརྟེན་ནས་བྱས་པས་ཆོག་།དེ་ཡང་རིག་པ་མཆོག་གི་རྒྱུད་ལས། རིག་སྔགས་སྒྲུབ་ལ་བགེགས་མང་པོ་ཡོད་པར་གསུངས་པས། རང་གིས་གུང་ཚིགས་དུས་ཕུད་མཆོད་ཀྱི་གྲ་ལ་ཕུད་གཅིག་བཞག་ལ། ཁྲོ་བོ་བདུད་རྩི་འཁྱིལ་པ་ལ་འབུལ། ཉི་མ་ཤར་དུས་ཉི་མ་ལ་ཁ་བལྟས་ལ། ཆུ་འཁྱོར་གང་ལ་བདུད་རྩི་འཁྱིལ་པའི་སྔགས་ལན་བདུན་བཟླས་ལ།་བདག་མིང་འདི་ཞེས་པས། རིག་སྔགས་རྗེ་བསྒྲུབ་ཀྱིས།་ཁྱེད་ཡིད་དགའ་བར་གྱིས་ཤིག །ཅེས་བརྗོད་ལ་གཏོར། དེ་རྒྱུན་དུ་བྱས་ན་བར་ཆད་མི་བྱེད་པར་བགེགས་རྣམས་དགའ་ཞིང་དངོས་གྲུབ་སྟེར་རོ། །ཡང་སྒྲུབ་པ་བྱེད་ཀ་ནངས་པར་ཉི་མའི་ངོས་ལ་ཁ་བལྟས་ཐལ་མོ་སྦྱར་ནས་སྔགས་བརྗོད་ལ། བདག་མིང་། འདི་ཞེས་བྱ་བས། རིག་སྔགས་རྗེ་ཞིག་བསྒྲུབ་ཀྱིས། ཁྱེད་ཡིད་དགའ་བར་གྱིས་ཤིག །ཅེས་བརྗོད་པས་བགེགས་ཐམས་ཅད་འདིར་འདུའོ། །དེ་ནས་ཁྲོ་བར་བྱས་ལ།
ཁྱོད་མ་འགུལ་ཅིག །ཅེས་བརྗོད་པས་བགེགས་དེ་དག་ཐམས་ཅད་ཀྱང་བཅིངས་ཤིང་གཟིར་བར་འགྱུར་རོ། །སྒྲུབ་པ་ཚར་ནས་ཡིད་ཀྱིས་དཀྲོལ་ལོ། །མེ་། ཏོག་འབུལ་དུས་སྔགས་བརྗོད་ཅིང་མེ་ཏོག་བླངས། སྤོས་འབུལ་ཁ་ལག་པ་གཡོན་པས་མར་ཅུང་ཟད་བླངས་ལ། ཁམ་ཕོར་ནང་དུ་མེར་བསྲེགས་དེ་ལ་སྔགས་བཟླ་ཞིང་སྤོས་མ་བདུག །མར་མེ་འབུལ་ཁ་མར་མེ་ཆུང་ངུ་གཅིག་དང་གཉིས་སྦར་ལ། ཆུང་ངུ་མགོ་ཐུར་བསྒྱུར་ཏེ་བཟུང་ནས་སྔགས་བརྒྱ་རྩ་བརྒྱད་བཟླ། དེས་མཆོད་པའི་བགེགས་གསུམ་གྱིས་ཕྱིན་ཆད་མི་གནོད་ཅིང་དངོས་གྲུབ་ཐོབ། སྒྲུབ་པ་ཐམས་ཅད་ཀྱི་ཐོག་མར་དེ་དག་བྱའོ་གསུངས་སོ། །དེ་ལ་བདག་བསྐྱེད་ཐུན་བཞི་དང་། ཐུན་མཚམས་སུ་གཏོར་མ་བསྔོ་བ། །སྤྱིའི་ལུགས་ལྟར་འདོད་ན་ཡང་ཚིག་ཟུར་བསྒྱུར་ཤེས་པར་བྱ་ཞིང་། ཆོ་ག་འདིའི་རང་ལུགས་ཀྱི་བསྙེན་སྒྲུབ་གཅིག་ཆོག་ཡིན་ཏེ། དབང་བསྐུར་དུས་ལྟར་དཀྱིལ་འཁོར་བུམ་པ་མཆོད་གཏོར་བཤམས། རྗེས་ཆོག་མ་གཏོགས་པའི་ཆོ་ག་ཐུན་བཞིར་གཏོང་། འདིའི་གཞུང་ལས། དེ་ནས་བཟླས་པ་ནི་མན་ངག་ལྡན་པས་སྤྲོ་བསྡུའི་ཚུལ་གྱིས། ཞེས་
གསུངས་པའི་དོན། བདག་མདུན་ཐ་མི་དད་གཙོ་བོའི་ཐུགས་ཀར། ཞི་བ་ལ་ཟླ་བ་དང་ཁྲོ་བོ་ལ་ཉི་མའི་དཀྱིལ་འཁོར་གྱི་སྟེང་དུ། ཡེ་ཤེས་སེམས་དཔའ་རང་འདྲ་བ། དེའི་ཐུགས་ཀར་ཟླ་བའམ་ཉི་མའི་དབུས་སུ། ཏིང་འཛིན་སེམས་དཔའ་ཕྱག་མཚན་ས་བོན་གྱིས་མཚན་པ། དེའི་མཐར་སྔགས་ཕྲེང་། བདེ་མཆོག་དང་ལྷ་མོའི་རིགས་རྣམས་ལ་གཡོན་བསྐོར། ཕོ་རིགས་རྣམས་ལ་གཡས་བསྐོར་ཏེ། དང་པོ་བཀོད། དེ་ནས་འོད་ཟེར་འཁོར། དེ་ནས་ཡིག་འབྲུ་དལ་བུས་འཁོར། དེ་ནས་ཇེ་མགྱོགས་སུ་འཁོར། དེ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས་པས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ་མཆོད་པའི་སྤྲིན་དཔག་ཏུ་མེད་པར་གྱུར་ནས་མཆོད། དེ་ཐམས་ཅད་ལྷ་གང་ཡིན་དེའི་སྐུ་དང་སྔགས་ཕྲེང་དང་ཕྱག་མཚན་དུ་གྱུར་ནས་ཆར་ལྟར་བབས་ནས་རང་ལ་སིབ་སིབ་ཐིམ་པར་བསྒོམ། ཡང་ཆོ་གའི་གཞུང་ནས་བཤད་པ་ལྟར་དཀྱིལ་འཁོར་གྱི་ལྷ་ཚོགས་དཔག་མེད་སྤྲོས་ནས། སེམས་ཅན་རྣམས་ལ་ཆོས་སྟོན་པ་སོགས་ནས། བདག་ཉིད་ལ་ཐིམ་པའི་བར་གཞུང་ལྟར་བསྒོམ། དམིགས་པ་དེ་གཉིས་ནི་རྒྱུད་སྡེ་བཞི་ཀ་ལ་
སྦྱར་རུང་བ་ཡིན་ལ། ཁྱད་པར་བློ་མེད་ལ་ནི་འོད་ཟེར་འཕྲོས་པས་སྣོད་ཀྱི་འཇིག་རྟེན་གཞལ་ཡས་ཁང་དང་། བཅུད་ཀྱི་སེམས་ཅན་ཐམས་ཅད་ཡི་དམ་ལྷའི་སྐུར་གྱུར་ནས། སྔགས་བཟླ་གྲོགས་བྱེད་པར་བསྒོམ་པ་དང་། ཡབ་ཡུམ་ཞལ་སྦྱོར་ཅན་ལ། རང་གི་ཐུགས་ཀའི་ས་བོན་གྱི་རྩེ་ནས། སྔགས་མང་པོ་འབྲེལ་བའི་ཕྲེང་བ་སྤྲོས་ཏེ་ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད་བྷ་ག་ནས་ཐོན། རྡོ་རྗེའི་སྒྲུབ་ནས་ཐུགས་ཀར་ཐིམ། དེ་ལྟར་སྔགས་ཕྲེང་རྒྱུན་དུ་འཁོར་བར་བསྒོམ་སྟེ། སྔགས་ཕྲེང་ལྷའི་ཁ་དོག་ལ། ཁ་དོག་སྣ་ལྔའི་འོད་ཟེར་འཕྲོ་བ་དང་པོ་བསྒོམ། དེ་ནས་ནད་གདོན་སྡིག་སྒྲིབ་ཞི་བར་འདོད་ན་དཀར་པོ་དང་། ཚེ་བསོད་ནམས་ཉམས་རྟོགས་རྒྱས་པ་ལ་སེར་པོ་དང་། རླུང་སེམས་སྣང་བ་དབང་དུ་སྡུད་པ་ལ་དམར་པོ་དང་། དགྲ་བགེགས་ཚར་གཅོད་པ་ལ་མཐིང་ནག་དང་།་ལས་སྣ་ཚོགས་འགྲུབ་པར་འདོད་ན་ལྗང་ཁུར་བསྒོམ། །འཁོར་ལུགས་དེ་བྱས་པས་རླུང་སེམས་ལ་བརྟན་པ་ཐོབ་པ་དང་། ཡང་རང་གི་གསང་སྦྱབ་ནས་ཡུམ་གྱི་བྷ་གར་ཞུགས། ཡུམ་གྱི་ཞལ་ནས་རང་གི་ཞལ་དུ་ཚུར་འཁོར་བར་བསྒོམ་
ན། བདེ་སྟོང་གི་ཉམས་སྐྱེ། ཡབ་ཡུམ་ཞལ་གྱི་བར་དུ་འཁོར་ཚེ། འོད་ཟེར་ཕྱོགས་བཅུར་འཕྲོས་པས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་འོད་ཟེར་དེས་། མཆོད་ནས། དེ་ཐམས་ཅད་ཀྱི་སྐུ་གསུང་ཐུགས་ཀྱི་བྱིན་རླབས། སྐུ་དང་སྔགས་ཕྲེང་དང་ཕྱག་མཚན་གྱི་རྣམ་པར་ཆར་བཞིན་བབས་ནས་རང་ལ་ཐིམ་པར་བསྒོམ་མོ། །དེ་དག་ཀྱང་རབ་སྟོང་ཉིད་ཉམས་ལེན་གྱི་གཤིས་དང་མ་བྲལ་བར་བྱ། ཐ་ན་ཡང་མཇུག་ཏུ་ཉམས་ལེན་ལ་ཐུན་རེ་བཞག །ཐུན་མཚམས་སུ་འཇིག་རྟེན་འདས་གཏོར་གཞུང་ལྟར་བསྔོ། །དེ་ནས་རང་གི་ཆོས་སྐྱོང་གཙོ་བོ་གང་ཡིན་ནམ། དཀྱིལ་འཁོར་དེ་དང་འབྲེལ་གང་ཆེའི་ཆོས་སྐྱོང་གི་གཏོར་བསྔོས་བསྡུས་པའམ། ཐ་ན་སྔགས་བསྔོས་ཙམ་བྱ་སྟེ་ཕ་རྒྱུད་ལ་ཞལ་བཞི་པ། ཀྱེ་རྡོར་སྐོར་ལ་གུར་དང་དུད་སོལ་མ། བདེ་མཆོག་སྐོར་ལ་ཕྱག་བཞི་པ། གདན་བཞི་ལ་ཞལ་བཞི་པ་དང་དུད་སོལ་མ། ཡང་ན་རྒྱུད་སྡེ་བཞི་ཀའི་སྲུང་མ་ཡིན་པར་གསུངས་པས། བེར་ཡབ་ཡུམ་དང་རྣམ་སྲས་ལ་བསྔོ། དེ་ནས་མཁའ་འགྲོ་སྤྱི་གཏོར་བསྔོ་སྟེ། ཐུན་མཚམས་སུ་ངག་གཏོང་དགོས་བྱུང་ན་གཏོང་། སླར་ཡང་ཐུན་གཅིག་བཟུང་
སྟེ། སྔོན་འགྲོ་གཏོར་མ་ནི་མི་དགོས་སོ། །གཞན་སྔར་ལྟར་རོ། །དེ་ལྟར་ཞོགས་པ་དང་ཉིན་གུང་དང་དགོང་མོ་སྟེ་ཐུན་གསུམ། དགོང་མོའི་ཐུན་ལ་ཕྱི་རོལ་གཏོར་མ་འབུལ། བྱ་སྤྱོད་རྣལ་འབྱོར་རྒྱུད་ལ་ཆ་གསུམ་ཕུལ། ཐུན་མཚམས་རྣམས་སུ་ཆག་མེད་ཀྱི་རིགས་ཐུགས་དམ་གང་དགོས་བྱ། མཚན་ལ་ཡང་ཐུན་གཅིག་བཟུང་། ཐུན་མཇུག་གཏོར་བསྔོས་ཚར་ནས།་བྱ་སྤྱོད་རྣལ་འབྱོར་རྒྱུད་ལ་རྗེས་ཆོག་བྱ། བླ་མེད་ལུགས་ལ་རྗེས་ཆོག་མ་བྱས་ན་རྟགས་གསལ། ཐུགས་ཀའི་ཡེ་ཤེས་སེམས་དཔའ་ལ་སེམས་གཏད་ནས་ཉལ་བས་འོད་གསལ་ཟིན། དེ་ལྟར་དུས་ཀྱི་བསྙེན་པ་ལ་རབ་ཟླ་བ་དྲུག །འབྲིང་གསུམ། ཐ་མ་ཞག་ཉེར་གཅིག །ཡང་མཐའ་ཞག་བདུན་ཡན་ཆད། དེ་ལ་དབང་པོའི་གོ་རིམ་གྱིས་གོ་བཟློག་སྟེ། རབ་ལ་བདུན་ནམ་ཉེར་གཅིག །འབྲིང་ཟླ་གསུམ། ཐ་མ་ཟླ་དྲུག་གོ །གྲངས་ཀྱི་བསྙེན་པ་ནི། གསར་མ་སྤྱིའི་ལུགས། གཙོ་བོ་འབུམ་འཁོར་ཁྲི། དེ་དུས་ཀྱི་དབང་གིས་བཞི་འགྱུར་བཟླས་པས་བསྙེན་པ་རྫོགས་པར་བཤད་དོ། །གཞུང་འདིར་འཁོར་ལྷའི་སྔགས་མེད་པས། འཁོར་གྱི་སྔགས་བཟླ་འདོད་
ན། དཀྱིལ་ཆོག་རྡོར་ཕྲེང་ལ་སོགས་པ་རང་རང་གི་གཞུང་རྣམས་ལས་ཤེས་པར་བྱའོ། །མདོར་བསྡུ་ན། དཀྱིལ་འཁོར་རང་གི་གཙོ་བོའི་སྔགས་མང་དུ་བཟླས་པས་སྐབས་དོན་འགྲུབ་སྟེ། རྒྱུད་ལས་འདི་ཀུན་གཙོ་བོའི་ཡན་ལག་བྱར། །གཙོ་བོའི་བསྙེན་པ་འགྲུབ་པར་འགྱུར། །ཞེས་གསུངས་ཤིང་། རྣལ་འབྱོར་རྫོགས་ཕྲེང་གི་སམ་བྷུ་ཊིའི་རྡོར་སེམས་ཀྱི་སྐབས་ནས། རྫོགས་པའི་རིམ་པའི་རྣལ་འབྱོར་པ་ལ་ནི། འཁོར་ལོའི་གཙོ་བོའི་སྙིང་པོ་སྔགས་ཀྱིས་ལྷ་གཞན་རྣམས་ཀྱི་སྙིང་པོའི་སྔགས་ཀྱི་བསྒྲུབ་བྱ་ཡང་འགྲུབ་པར་འགྱུར་བས། དེ་རྣམས་ནི་མ་བྲིས་ཏེ་གཞུང་མང་བས་འཇིགས་པས་སོ། །ཞེས་གསུངས་པས། གཙོ་བོའི་སྔགས་ཁོ་ནས་ཆོག་གོ །སངས་རྒྱས་ཐོད་པའི་རྒྱུད་ལས། བསོད་ནམས་ལྡན་པ་ཁྲི་ཡིས་འགྲུབ། །ཅེས་དང་། སློབ་དཔོན་པདྨའི་ཞལ་ནས། སྒྲུབ་པ་ཞག་གཅིག་ལ་འགྲུབ་པའི་རྟགས་རྣམས་བྱུང་ན་ཡང་། བསྙེན་པ་རྫོགས་པ་ཡིན་པས་ལས་སྦྱོར་རུང་གསུངས། ཡུན་རིང་ཡང་རྟགས་མེད་པ་ནི་ཡེངས་བའི་སྐྱོན་ཡིན་ཏེ། སློབ་དཔོན་དབྱིག་གཉེན་གྱི་ཞལ་ནས། བཟླས་བརྗོད་དག་ནི་དཀའ་ཐུབ་དག །ཡུན་རིང་དུས་སུ་
སྤྱད་བྱས་ཀྱང་། །སེམས་གཞན་ཡེངས་བས་བྱས་པ་ཡིས། །དེ་དག་འབྲས་བུ་དོན་མེད་ཡིན། །ཞེས་གསུངས་སོ། །གྲངས་ནི་བསྙེན་པ་ཐེམ་ནས་ལས་སྦྱོར་རུང་བ་ཙམ་ཡིན་གྱིས། རྟགས་གཙོ་ཆེ། རབ་མངོན་སུམ་མམ་ཉམས་སྣང་དུ། དཀྱིལ་འཁོར་གྱི་གཙོ་བོའམ་འཁོར་གྱི་ལྷ་མཐོང་བ་དང་། སྔགས་ཀྱི་ཡིག་འབྲུ་ནམ་མཁའ་ལའམ་བར་སྣང་ལ་འཆར་བ་དང་། སེམས་ལ་ཉམས་རྟོགས་བཟང་པོ་སྐྱེ་བ་སོགས། ཐ་མ་རྨི་ལམ་དུ་འབྱུང་སྟེ། ལས་འཕྲོ་ཅན་ཡིན་ན། དབང་ཞུ་ཁ་སྟ་གོན་རྨི་ལམ་བརྟག་ནུབ་འབྱུང་། སྒྲིབ་པ་སྲབ་པའི་རིགས་ལ་དབང་ཞུ་ཚེའམ་དབང་རྫོགས་ནུབ་འབྱུང་། ཤིན་ཏུ་བློ་དམན་ཅིང་སྒྲིབ་པ་ཆེ་བའི་རིགས་ཡིན་ཀྱང་། མཚམས་བསྡམས་ནས་བསྙེན་སྒྲུབ་བྱེད་སྐབས། རྨི་ལམ་གྱི་དག་སྣང་འགའ་རེ་ཙམ་མི་འབྱུང་མི་སྲིད། འདི་ལ་སློབ་མ་སྟ་གོན་རྨི་ལམ་བརྟག་ནུབ་ཀྱི་བཤད་པ་ཡིན་པས། འདི་ཡིད་ལ་བཟུང་ནས་སློབ་མ་ལ་ཡང་བཟང་ངན་ལུང་བསྟན། བསྙེན་པའི་དུས་ཀྱི་རྟགས་བཟང་ངན་དང་ཡང་དོན་གཅིག་པ་ཡིན་པས། དེ་འང་གསང་བ་སྤྱི་རྒྱུད་ལས། དེ་ནས་ནངས་པར་ནམ་ལངས་ནས། །
རྨི་ལམ་ཅི་མཐོང་དྲི་བར་བྱ། །ཐོས་ནས་བཟང་ངམ་མི་བཟང་བ། །ཐེ་ཚོམ་མེད་པར་བཤད་པར་བྱ། །རྨི་ལམ་སངས་རྒྱས་མཐོང་བ་ནི། །ཡོན་ཏན་རྒྱ་མཚོ་མངོན་སུམ་བཞིན། །མཆོད་རྟེན་དང་ནི་སྐུ་གཟུགས་མཐོང་། །དེ་ལ་མཆོད་པ་བརྩམ་པ་དང་། །དགེ་སློང་དག་ལ་ཆོས་ཉན་ནམ། །ཡང་ན་གཞན་ལ་ཉན་ཡང་རུང་། །ཆོས་ནི་རྣམ་པར་ང་། །དེ་བཞིན་གླེགས་བམ་ཀློག་པ་དང་། །རྨི་ལམ་དགེ་འདུན་མཐོང་བ་དང་། །དེ་བཞིན་ཕ་མ་བླ་མ་དང་། །ཟླ་བོ་རྣམ་པ་སྣ་ཚོགས་རྣམས། །རྨི་ལམ་དུ་ནི་མཐོང་ན་ཤིས། །རིག་སྔགས་དག་གིས་དངོས་གྲུབ་ཐོབ། །དེ་བཞིན་བསླབ་པ་འཛིན་པ་དང་། །ཀུན་དགའ་ར་བོ་སྣ་ཚོགས་པ། །འབབ་ཆུ་རྣམས་དང་རྒྱ་མཚོ་དང་། །རི་དང་གླང་པོ་ཆེ་དག་དང་། །མཐོང་ན་ཡང་ནི་བཟང་བར་བསྒྲགས། །རྒྱལ་པོ་དག་ནི་མཐོང་ན་ཤིས། །བདེ་གཤེགས་སྤྱོད་དང་མཐུན་པ་ཡི། །དཀའ་ཐུབ་ཅན་དང་བྲམ་ཟེ་དང་། །ཕྱུག་པོ་སྐྱེས་བུ་དམ་པ་དང་། །བ་དང་རྟ་དང་ངང་པ་དང་། །སེང་གེ་དང་ནི་རི་དྭགས་རྣམས། །རྨི་ལམ་དུ་ནི་མཐོང་ན་ཤིས། །བཀྲ་ཤིས་པ་ཡི་བྱ་དག་དང་། །
གསེར་དག་དང་ནི་གཏེར་རྣམས་དང་། །རིན་པོ་ཆེ་དང་དངུལ་དག་དང་། །ནོར་ནི་རྣམ་པ་སྣ་ཚོགས་དང་། །མདོར་ན་འབྱུང་ཁུངས་རྣམ་པ་དང་། །མཚོན་ཆ་རྣམས་ནི་འབྲུ་རྣམས་དང་། །འབྲས་བུ་རྣམས་ནི་མེ་ཏོག་དང་། །རྒྱན་ནི་རྣམ་པ་སྣ་ཚོགས་དང་། །བྱིས་པ་དང་ནི་གཞོན་ནུ་དང་། །བུད་མེད་གཟུགས་ནི་བཟང་པོ་དག་རྨི་ལམ་དུ་ནི་མཐོང་ན་བཟང་། །ཡང་ན་ཐོས་ཤིང་རེག་སྨྲ་དང་། །རྨི་ལམ་ན་ནི་དབང་བསྐུར་དང་། །རྒྱལ་པོར་འགྱུར་ཞིང་འབྱོར་པ་དང་། །དམག་དཔོན་དུ་ནི་གྱུར་པ་དང་།གཡུལ་ལས་རྒྱལ་ཞིང་དགྲ་གསོད་དང་། །གཉེན་དང་ལྷན་ཅིག་འགྲོགས་པ་དང་་། །ལྷ་རྣམས་ཀྱང་ནི་མཐོང་བ་དང་། །ཐེག་པ་དང་ནི་ཤིང་རྟ་ཞོན། །དེ་ཕྱིར་རི་དང་ཁང་ཐོག་འཛེགས། །ངོ་མཚར་རྣམ་པ་སྣ་ཚོགས་དག །རྨི་ལམ་དུ་ནི་མཐོང་ན་དགེ །ཡམ་ཤིང་མེ་ལ་སྦྱིན་སྲེག་བྱེད། །བྱ་བ་བཟང་པོ་དག་ལ་འཇུག །ཆུ་ལས་བསྒྲལ་ཞིང་རེམ་ལས་བསྒྲལ། །རྐུན་པ་དག་ནི་ཚར་གཅོད་དང་། །སྟོབས་འགྱེད་པ་ལས་རྒྱལ་བ་དང་། །གྱད་སྟོབས་བཟློག་ཅིང་འགྱིལ་བ་དང་། །རྩེད་མོ་སྣ་ཚོགས་སྨིན་པ་
དང་། །དེ་ནི་རྩལ་དང་དཔུང་བསྐྱེད་དང་། །བཀྲ་ཤིས་དག་ནི་ཐམས་ཅད་དག །མཐོང་ན་རབ་ཏུ་དགེ་བར་བཤད། །གསང་སྔགས་ཆོ་ག་ཉན་པ་དང་། །དགའ་སྟོན་འགྱེད་པ་མཐོང་བ་དང་། །སྒྲུབ་པ་ཟབ་མོ་བརྩམ་པ་དང་། །དེ་ལ་སོགས་པའི་ལྟས་རྣམས་ནི། །དགེ་བ་རྣམ་པ་དུ་མ་དག །བློ་ཡི་རྣམ་པར་དཔྱད་བྱ་ཞིང་། །དེ་ལས་ཟློག་པ་སྤང་བར་བྱ། །དགེ་བ་རྣམས་ནི་འགྲུབ་པར་འགྱུར། །མི་དགེ་བ་དག་མི་འགྲུབ་བོ། །མི་དགེ་བ་དང་ཤེས་ནས་སུ། །དེ་དག་མཁས་པས་སྤང་བར་བྱ། །དགེ་བ་ཡི་ནི་ལྟས་རྣམས་ནི། །རབ་དང་འབྲིང་དང་ཐ་མ་ལས། །གསང་སྔགས་དངོས་གྲུབ་རྣམ་གསུམ་པོ། །རབ་དང་འབྲིང་དང་ཐ་མ་འགྲུབ། །མི་དགེ་བ་ལ་ཞི་བ་ཡི། །སྦྱིན་སྲེག་ཞི་བའི་གསང་སྔགས་ཀྱིས། །བ་ཡི་མར་ལ་བརྒྱ་རྩ་བརྒྱད། །ཆོ་ག་བཞིན་དུ་ཞི་བ་བྱ། །ཞེས་དང་། མི་དགེ་བའི་ལྟས་ཀྱང་རྒྱ་སྐྱེག་གིས་རི་ལ་འཛེགས་པ་དང་། ཀ་ར་བི་རའི་མེ་ཏོག་རྒྱས་པ་དང་། མཆོད་སྡོང་ངམ་བྱེ་མའམ་ཐལ་བའི་རི་ལ་འཛེགས་པ་དང་། བོང་བུ་ཞོན་ནས་ལྷོ་ཕྱོགས་སུ་སོང་ནས་མ་ལོག་པ་དང་། སྤྲེའུ་ལ་ཞོན་ནས་ལྷོ་ཕྱོགས་སུ་འགྲོ་
བའམ། བུད་མེད་ནག་མོ་རབ་ཏུ་ཁྲོས་པའམ། བུད་མེད་ནག་མོ་གོས་ཅན་དག་ལ་འདོད་པ་སྤྱོད་ཅིང་། ཀ་ར་བི་རའི་ཕྲེང་བ་བཅིང་བ་དང་། གཡང་ས་དང་གཅོང་རོང་དུ་འཇུག་པ་དང་། ཤིང་ལས་ལྟུང་བ་དང་། ཤིང་ལྗོན་པ་འབྲས་བུ་མེད་པའི་སྐམ་པོ་མཐོང་བ་དང་། ཁྱི་དང་ཁྲ་དང་སྲིན་པོ་ལ་སོགས་པས་ཟོས་པ་དང་། ཕག་དང་རྨང་དང་མ་ཧེ་ལ་ཞོན་པ་དང་། མི་ནག་པོ་ལྕགས་ཀྱི་དབྱུག་པ་ཐོགས་པས་བསྡིག་པ་དང་། ལུས་ཏིལ་མར་གྱིས་བྱུགས་ནས་ཕྲེང་བ་དམར་པོ་བཅིང་བ་དང་།་སྐྲ་བྲེག་ནས་ཕྲེང་བ་དམར་པོ་བཅིང་བ་ལ་སོགས་པ་རྣམས་ནི་མི་དགེ་བའི་ལྟས་སོ། །དེ་ལྟར་དབང་དུས་ངན་པ་རྨིས་མཁན་མང་བར་འདུག་ན། ཞི་བའི་སྦྱིན་སྲེག་བྱ། མ་གྲུབ་ན་དབང་ལ་འཚོགས་ཞོར་བདུད་རྩི་འཁྱིལ་པའི་སྔགས་འུར་འདོན་རེ་བྱ། རེ་ཟུང་གི་རྨི་ལམ་ངན་ན། སོ་སོར་བདུད་རྩི་འཁྱིལ་པའི་དམིགས་པ་སྤྱོད་ལ་བསྙེན་པ་བྱེད་འཇུག །ནང་མཆོད་ལ་བདུད་རྩི་རིལ་བུ་སྦྱར་བར་བླུད། སྒྲུབ་པ་དུས་རྨི་ལམ་ངན་ན། རྡོར་སེམས་སྒོམ་བཟླས་སྐབས་སུ་ཡིག་བརྒྱ་མང་བར་བཟླ། ཐུན་སྐབས་སུ་བསྐང་ཐུང་བརྒྱ་རྩ་བསོགས། རང་
གི་ཆོས་སྐྱོང་གང་ཡིན་ལ་གཏོར་མ་ཕུལ་ནས་བར་ཆད་སོལ་ཞེས་བཀའ་བསྒོ། དགོང་མོ་མདོ་སྒྲུབ་དང་སེང་གདོང་མའི་ཟློག་པ་ཐུན་རེ་བྱ། ཉལ་ཁ་ཐུན་བསྡུས་ལ་ཀུ་སུ་ལིའི་ཚོགས་གསོགས་རེ་བྱ། རྨི་ལམ་བཟང་བ་ལ་ཧ་ཅང་དགའ་བྲོད་མི་བྱ་བར། གཞན་ལ་གསང་ཞིང་ལྷ་དང་བླ་མ་དང་ཆོས་ལ་ངེས་ཤེས་བསྐྱེད། དེ་ནས་དུས་གྲངས་རྟགས་གསུམ་གང་རུང་གི་བསྙེན་པ་ཚར་རྗེས། བདག་འཇུག་ལེགས་པར་བླངས། ལས་བཞི་ཀའམ་སྒྲིབ་སྦྱོང་ཞི་བའི་སྦྱིན་སྲེག་བླུག །སྦྱིན་སྲེག་མི་ཤེས་ན། རྒྱུན་དུ་ཟས་ཟ་དུས། ཁ་ཐབ་ཁུང་དང་ལག་པ་དགང་གཟར་བླུགས། ལྟོ་བའི་མེ་དྲོད་ཡེ་ཤེས་ཀྱི་མེ་ཡིན་པ་དྲན་པར་བྱ། ཟས་ཁམ་བུ་རེ་རེ་ཞིང་སྙིང་ཁའི་ཡེ་ཤེས་སེམས་དཔའ་ལ་སྦྱིན་སྲེག་འབུལ་བར་དམིགས། སྔགས་ཡིད་འདོན་བྱས་པས་ནང་གི་སྦྱིན་སྲེག་སྟེ། སྦྱིན་སྲེག་གི་གོ་ཆོད་གསུངས། བླ་མེད་ཡིན་ན་དགའ་སྟོན་གྱི་ཚོགས་འཁོར་བྱ་སྟེ། བདེ་མཆོག་ཕག་མོ་རྒྱལ་བ་རྒྱ་མཚོ་སོགས། རང་གི་རྩ་བའི་ཡི་དམ་གང་ཡིན་གྱི་ཚོགས་བྱ་སྟེ། ཚོགས་ཕུད་ཀྱིས་འདས་གཏོར་གསོས་ལ། ཆོ་གའི་གཞུང་གི་འདས་གཏོར་དེས་བསྔོ། དེ་ནས་ལྷག་མ་
འབུལ། རྗེས་ཆོག་བསྔོ་སྨོན་བཀྲ་ཤིས་སོགས་དབང་ཆོག་གཞུང་ལྟར་རོ། །དེ་ལྟར་དཀྱིལ་འཁོར་ཐམས་ཅད་ཀྱི་བསྙེན་པ་མ་གྲུབ་ཀྱང་། གསང་འདུས་རིགས་གཉིས་གང་འདོད་གཅིག །ཀྱེ་རྡོར་རིགས་གཉིས་ལྷ་དགུ་གང་འདོད་གཅིག །བདེ་མཆོག་དྲུག་ཅུ་པ་ཞལ་ཕྱག་ཡོངས་རྫོགས། ཐོད་པ་རིགས་གཉིས་གང་འདོད་གཅིག །གདན་བཞི་རྣལ་འབྱོར་ནམ་མཁའ་མ་ཧཱ་མཱ་ཡ། དུས་འཁོར་ཡོངས་རྫོགས་སམ་ཐུགས་ཀྱི་དཀྱིལ་འཁོར་གང་འདོད་གཅིག །དེ་ལྟར་བླ་མེད་ཀྱི་དཀྱིལ་འཁོར་ཆེན་པོ་དེ་བདུན་ཙམ་གྱི་བསྙེན་པ་འགྲུབ་ན་ཤི་ཡང་འགྱོད་མེད་ཀྱི་བྱ་བ་ཁམས་ཆེན་འགྲུབ་པ་ཡིན་ནོ། །ཡང་གོ་བ་ཤེས་རབ་ལེགས་པར་ཡོད་ཀྱང་མཚམས་སྒྲུབ་མི་ཁོམ་པའི་རིགས་ཡིན་ན། དཀྱིལ་འཁོར་དྲན་རྫོགས་སུ་བསྒོམས་ནས། ནུབ་མོ་གཏོར་བསྔོས་ཀྱི་གྲལ་སྔགས་བསྔོས་ཁཱ་ཧི་སྦྱར། ངག་བཅད་པ་དང་མ་བཅད་པ་སུམ་ལོག་རྩི་བ་ཡིན་པས། འབུམ་ཕྲག་བཅུ་དྲུག་ལས་མི་ཉུང་བ་རྒྱུན་བསྙེན་བསོགས་ནས། རྟགས་རྣམས་ཀྱང་རིམ་གྱིས་འོང་ཞིང་བསྙེན་པའི་གོ་ཆོད་དེ། དུས་བསྙེན་ཟླ་གྲངས་ཡང་རྩི་རུང་། སྐྱེ་འགྲོ་ཐམས་ཅད་ཡི་དམ་གྱི་ལྷ་དང་སྒྲ་སྐད་
ཐམས་ཅད་སྔགས་ཀྱི་སྒྲ་དང་སྣོད་ཀྱི་འཇིག་རྟེན་གཞལ་ཡས་ཁང་དུ་བསྒོམས་པས། བསྐྱེད་རིམ་གསལ་ན་མཚམས་ཀྱི་གོ་ཡང་ཆོད། ཡང་ཚེ་བསྲིང་བར་འདོད་པས་རྣལ་རྒྱལ་མ། ལོངས་སྤྱོད་འདོད་པས་ནོར་རྒྱུན་མ། དགྲ་ཁ་མཆུའི་འཇིགས་སྐྲག་ལ་འོད་ཟེར་ཅན། གཟའ་ནད་ཡོད་ན་གཟའ་ཡུམ། བགེགས་དང་བར་ཆད་མང་ན་བདུད་རྩི་འཁྱིལ་པ། དེ་དག་རེ་རེའི་བསྙེན་པ་ཐེམས་ན་ཡང་། བར་ཆད་དེ་དག་སེལ་བའི་མཆོག་དམ་པ་ཡིན། ཡང་ནམ་འཆི་ཆ་མེད་པས། འཕྲལ་གྱི་རྐྱེན་ཟློག་པ་དང་། ཕྱི་མའི་བརྒྱགས་ཕྱེ་ཞིག་བསམ་ན། རང་གིས་རང་ལ་རྡོར་ཕྲེང་གི་དབང་བཙུགས་པའི་ཚུལ་གྱིས་དང་པོ་ཉིན་པར་སློབ་མ་རྗེས་འཛིན་དང་སྟ་གོན་རྣམས་བྱ། དེ་ནས་ཉིན་རེ་བཞིན་དུ་དབང་རེ་རེའི་དབང་སྒྲུབ་བྱས་ལ། དེ་ཉིན་བསྙེན་པ་ཅི་འགྲུབ་བྱ། དགོང་མོ་བདག་འཇུག་རྒྱས་པ་རེ་བླང་། རྗེས་ཆོག་རྫོགས་པར་བྱ། མུན་རུབ་ནས་རྒྱུན་གྱི་ཐུགས་དམ་ཚིག་མེད་གང་དགོས་བྱ་དེ་ལྟར་ཞག་བཞི་བཅུ་ཞེ་དྲུག །དེ་ནས་ཞག་གཉིས་ལ་སྔ་དྲོ་དགོང་མོ་སྦྱིན་སྲེག་གཉིས་རེ་བླུག་པ་ལས་བཞིའི་སྦྱིན་སྲེག་བྱ། དེ་ནས་ཞེ་དགུ་ཉིན་པར་ཚོགས་འཁོར་དང་།
གསར་བསྐང་རྡོ་རྗེའི་ཕྲེང་བ་དང་། བཀའ་བརྒྱུད་སྤྱི་བསྐང་བདེ་མཆོག་རིན་ཆེན་ཕྲེང་བ། ཕག་མོའི་བསྐང་བ་སོགས་འདོན། དེ་དག་མེད་ན་བསྐང་ཐུང་བརྒྱ་ཚར་བསོག །དེ་ནས་བསྔོ་བ་སྨོན་ལམ་བཀྲ་ཤིས་རྣམས་རྒྱས་པར་བྱ་སྟེ། དེ་ལྟར་ཞག་ཞེ་དགུར་རང་གི་གསོན་དགོངས་བཟུང་བའི་ཚུལ་བྱས་ན། ད་གང་གི་རྐྱེན་ཟློག་དང་ཕྱི་མའི་ལམ་སེལ་ལ་དེ་བས་ལྷག་བྱ་ཐབས་མེད་དོ། །ཡང་ཕྱི་མ་བདེ་བ་ཅན་དུ་སྐྱེ་བར་འདོད་པ་དག་གིས། གསང་འདུས་འོད་དཔག་མེད་དང་། བདེ་མཆོག་པདྨ་མཁའ་འགྲོ་དང་། ཀྱེ་རྡོར་སྣང་བ་མཐའ་ཡས་དང་། དུས་འཁོར་འོད་དཔག་མེད་དང་། རྣམ་རྒྱལ་མ་ལ་སོགས་གཙོ་རྐྱང་དྲན་རྫོགས་སུ་བསྒོམས་ནས་བསྙེན་པའམ་རྒྱུན་བསྙེན་བྱས་ན། །འདིར་ཚེ་རིང་ཞིང་ཕྱི་མ་བདེ་བ་ཅན་དུ་སྐྱེ་བར་ངེས་ཏེ། དེ་དག་བྱ་ཚུལ་ལོགས་སུ་བཀོད་པ་ཡང་ཡོད་དོ། །རྡོར་ཕྲེང་གི་དབང་ཆོག་གྲུབ་མཐའ་སོ་སོའི་དགེ་བའི་བཤེས་གཉེན་རྣམས་ཀྱིས་མང་དུ་བསྒྲིགས་པ་སྣང་ཡང་། སློབ་དཔོན་ངག་ཁྲིད་ཞུ་ཞིང་བློ་ལ་བཟུང་བའི་དབང་དུ་མཛད་ནས། འགྲེས་དང་འཁྲུགས་མང་དྲགས་པས། །རང་གི་ཆོ་ག་སྒྲུབ་པ་
དང་གཞན་ལ་དབང་བསྐུར་ན་ཡང་དཔེ་ཐོག་ནས་གབ་འཕྲོད་ཤིན་ཏུ་དཀའ་བར་སྣང་ཡང་། འདིར་གབ་འཁྲུགས་རྣམས་བསྒྲིགས་འགྲེས་རྣམས་བཤང་ནས་དཔེ་ཁྱེར་ཆོག་པར་བྱས་པའོ། །འོ་ན་ཆོ་ག་དང་དབང་དཔེ་ཆོག་བྱེད་པ་རྙིང་མ་པའི་ལུགས་ཡིན་གྱིས། གསར་མ་ལ་དེ་ལྟར་བྱེད་པའི་མཐོང་ཐོས་ཡོད་དམ་རུང་ངམ་ཞེ་ན། རྗེ་བཙུན་ཏ་ར་གུ་རུ་དང་། ངོར་མཁན་པོ་དང་། ཆོས་རྗེ་བཅོ་བརྒྱད་པ་རྣམས་ཀྱིས། འབུལ་སྐྱེལ་བ་རྣམས་ལ་ལོ་རེ་ཡང་རྡོར་ཕྲེང་ཚར་འགའ་ཟུང་བཙུགས་དགོས་པས། ཐུགས་ལ་བཟུང་ནས་ཡོད་སྐད། རྗེ་ཆོས་ཀྱི་དབང་ཕྱུག་གིས་གདན་ས་མཐིལ་དུ་ལན་གཅིག་གནང་བ། ནངས་པར་གནང་རྒྱུ་དེ་དོ་དགོང་མོ་མར་མེའི་འོད་ལ་ཐུགས་ལ་ཟིན་པ་ཡིན་སྐད། པཎ་ཆེན་ལུང་རིགས་ཉི་མ་དང་འབྲུག་པ་བསོད་ནམས་རྒྱ་མཚོས་ནི། དབང་སྒྲུབ་དཔེ་ཐོག་ནས་མཛད། དབང་གི་གཞུང་ཐུགས་ཐོག་ནས་གསུངས། བར་བར་དཀྱིལ་འཁོར་མི་འདྲ་བའི་ཁྱད་པར་རྣམས་དཔེ་ལ་གཟིགས་པ་ཡིན་སྐད། འབྲི་ཁུང་ཞབས་དྲུང་གིས་ཀྱང་དཔེ་ཐོག་ནས་གནང་བ་ཡིན་འདུག །སྟག་ལུང་ཞབས་དྲུང་དང་ལྷོ་རིན་པོ་ཆེ་རྣམས་ཀྱིས་ནི། རྡོར་ཕྲེང་སྨོས་ཅི་
དགོས། དཀྱིལ་འཁོར་ཐོར་བུ་རྣམས་ཀྱང་ཕྱག་དཔེ་ཐོག་ནས་བསྒྲུབ་ཅིང་གནང་བ་མཐོང་། དེ་ཡང་ཀུན་མཁྱེན་མི་བསྐྱོད་རྡོ་རྗེའི་ཞལ་ནས། དེང་སང་ཁ་ཅིག་གིས་དབང་བསྐུར་བའི་ཚེ་དཔེ་ཁྱེར་ལ་བརྟེན་ནས་བསྐུར་བས་དབང་བསྐུར་མི་ཐོབ་བོ་ཞེས་སྨྲ་བའང་མི་འགྲུབ་སྟེ་ཚིག་དང་དོན་གྱི་གཟུངས་ཐོབ་པ་དག་གིས་འཆད་རྩོད་རྩོམ་པ་སོགས་འདོན་སྒོམ་ཅི་བྱེད་རུང་བ་གླེགས་བམ་ལ་མ་ལྟོས་པར་འཆད་ནུས་ཀྱང་། གདུལ་བྱ་དབང་རྟུལ་ཤེས་རབ་དམན་པ་རྗེས་སུ་བཟུང་བའི་སླད་ཀྱིས་བསྟན་པ་ཡུན་དུ་གནས་པར་བྱ་བའི་ཕྱིར། རྒྱུད་དང་བསྐྱེད་རྫོགས་ཀྱི་སྒྲུབ་དཀྱིལ་ཐམས་ཅད་གླེགས་བམ་དུ་འཁོད་པར་མཛད་ཅིང་། གཞན་སྨིན་གྲོལ་དུ་འགོད་པ་ན་ཡང་གླེགས་བམ་དེའི་ནང་ནས་ཇི་ལྟར་འབྱུང་བ་ལྟར། གླེགས་བམ་དེ་ཉིད་ཀྱི་སྟེང་ནས་རྒྱུད་འཆད་པ་སོགས་རུང་བ་ཉིད་ཀྱི་ཕྱིར་ན་གླེགས་བམ་དེ་ཉིད་ཀྱི་སྟེང་ནས་བསྒྲུབ། དལ་སོགས་ཀྱི་འདོན་བསྒོམ་བྱར་རུང་བའི་རྒྱུ་མཐུན་སྦྱར་བ་ལས། རྒྱུད་འགྲེལ་ཚད་ལྡན་གང་ནས་ཀྱང་གླེགས་བམ་གྱི་སྟེང་ནས་སྒྲུབ་དཀྱིལ་འདོན་བསྒོམ་བྱར་མི་རུང་ཞེས་དམིགས་བསལ་དུ་གསུངས་པའི་ཡི་གེ་ན་གཅིག་ཀྱང་མེད་
དོ། །ཞེས་དང་། གསང་སྔགས་ཀྱི་རྒྱུད་རབ་འབྱམས་ལ་སྒྲུབ་དཀྱིལ་མཐའ་ཡས་པས་དེ་ལས་དང་པོ་པས་གང་ཐོབ་བློ་ལ་འཛིན་མི་ནུས་པའི་ཕྱིར། གསང་སྔགས་ཀྱི་ཆོས་གང་ཐོབ་རྣམས་བློ་ལ་འཛིན་མ་ནུས་པའི་སྒྲུབ་དཀྱིལ་རྣམས་དཔེ་ལ་བརྟེན་ནས་འདོན་བསྒོམ་བྱ་བ་ནི་རྒྱ་བོད་ཀྱི་བརྒྱུད་པ་བར་མ་ཆད་པའི་སྲོལ་ཡིན་པས། ཕྱིས་ཀྱི་གང་ཟག་ཁ་ཅིག་གིས་དབང་བློ་ཐོག་ལུང་དཔེ་ཐོག་ནས་མ་བྱས་ན་དབང་ལུང་རྣམ་དག་ཏུ་རྒྱུ་མི་འགྱུར་རོ། །ཞེས་ཟེར་བ་ནི་བརྗོད་པ་ཙམ་ལས་སྒྲུབ་བྱེད་ཅི་ཡང་མི་སྣང་ངོ་། །ཞེས་གསུངས་པའི་ནང་དུ་ཐམས་ཅད་འདུས་པར་སྣང་། ཡང་མང་དབང་གི་སྐབས་སུ་བུམ་ཆུ་དང་། དབང་རྫས་འགའ་ཞིག་མཆོད་གཡོག་པས་འགྲིམ་པ་འདི་རུང་ངམ་ཞེ་ན། ཡང་རྒྱལ་བ་མི་བསྐྱོད་རྡོ་རྗེའི་ཞལ་ནས། དཀྱིལ་འཁོར་གྱི་འཁོར་ལོར་སློབ་མ་བཅུག་སྟེ་དབང་བསྐུར་ན་བླ་མེད་དུ་དབང་བསྐུར་བའི་ཚུལ་བཞི་ཙམ་གསུངས་ཏེ། ཕྲེང་བ་མཁན་པོས་རྡོ་རྗེ་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་དབང་ལྷ་སྤྱན་དྲངས་ཏེ་དབང་ལྷས་དབང་བསྐུར་བ་དང་། ཀྱེ་རྡོར་སོགས་ལས་རྡོ་རྗེ་སློབ་དཔོན་དང་དཀྱིལ་འཁོར་གྱི་གཙོ་བོ་ཐ་མི་དད་པའི་
ཐུགས་ཀ་ནས་ལས་ཀྱི་རྡོ་རྗེ་གཉིས་པ་ཞིག་བྱེ་ནས་དེས་དབང་རྫས་ཐོགས་ཏེ་དབང་བསྐུར་བ་དང་། བདེ་མཆོག་སོགས་ལས་དཀྱིལ་འཁོར་གྱི་གཙོ་བོ་ཧེ་རུ་ཀ་རྣམས་ཀྱིས་དབང་བསྐུར་བའི་དགོངས་པ་མཛད། དངོས་སུ་རྡོ་རྗེ་ཕག་མོ་སོགས་ཡུམ་ལྔས་དབང་བསྐུར་བ་དང་། དུས་འཁོར་ལས་འཇིག་རྟེན་ལས་འདས་པའི་དབང་བསྐུར་བ་ན་དབང་བསྐུར་བ་པོའི་དབང་རྟེན་བུམ་འཛིན་གྱི་གཞོན་ནུ་མ་ཁྱིམ་པ་མ་ལ་གཉིས་། དགེ་བསྙེན་ལ་བཞི། དགེ་ཚུལ་ལ་དྲུག །དགེ་སློང་ལ་བཅུའི་གྲངས་ཀྱིས་དབང་བསྐུར་སྦྱིན་པར་གསུངས་པས། དེ་ལྟར་ན་དབང་བསྐུར་བའི་ཚེ་རྡོ་རྗེ་སློབ་དཔོན་གྱིས་དབང་རྫས་ཐོགས་ཏེ་དབང་བསྐུར་བ་མེད་མི་རུང་གི་ཡན་ལག་ཏུ་མ་ཡིན་པས་གྲུབ་པ་ལ་དགོངས་ནས། །རྒྱ་བོད་ཀྱི་རྡོ་རྗེ་སློབ་དཔོན་མཚན་ཉིད་དང་ལྡན་པ་མང་པོས་དཀྱིལ་འཁོར་པ་སྒྲུབ་གྲོགས་ཀྱིས་སྒོའི་སློབ་དཔོན་གྱི་དབང་རྫས་ཐོགས་ནས་དབང་བསྐུར་བ་བརྒྱུད་པའི་ཕྱག་ལེན་ལ་མཐོང་སྟེ། དར་པན་ཨ་ཙརླའི་བྱ་བསྡུས་ལས། སྒོའི་སློབ་དཔོན་བཞི་སོགས་ཀྱིས་བསྐོས་ཏེ་དེ་དག་གིས་དཀྱིལ་འཁོར་སྒྲུབ་པ་དང་བགེགས་ལ་བཀའ་བསྒོ་བ་དང་། དབང་
རྫས་ཐོགས་ནས་ལས་ཀྱི་སློབ་དཔོན་ནམ་ལས་ཀྱི་རྡོ་རྗེར་བྱས་ཏེ། སློབ་མ་ལ་དབང་བསྐུར་སྦྱིན་པར་གསུངས་པའི་ཕྱིར། དབང་རྫས་ལས་ཀྱི་རྡོ་རྗེས་ཐོགས་པ་ཙམ་གྱིས་ལས་ཀྱི་སློབ་དཔོན་དེའི་རྡོ་རྗེ་སློབ་དཔོན་དུ་ཡང་འགྱུར་མི་དགོས་ཏེ། དེས་ན་འཁོར་ལོས་སྒྱུར་བའི་རྒྱལ་པོ་རྒྱལ་སྲིད་ལ་ཡབ་རྒྱལ་པོས་དབང་བསྐུར་བ་ན། བྲམ་ཟེ་མདུན་ན་འདོན་གྱིས་གསེར་གྱི་རིལ་བའི་ཆུས་སྨེར་འདོན་ཞིང་རྒྱལ་སྲིད་ལ་དབང་བསྐུར་བའི་ཚེ་རྒྱལ་སྲིད་སྦྱིན་པ་པོ་ཡབ་རྒྱལ་པོ་ལས་བྲམ་ཟེར་མི་འཇོག་པ་བཞིན་ཆོས་དང་སྲིད་ཀྱི་རྒྱལ་སར་དབང་བསྐུར་བློབའི་རྫས་དང་ཡོ་བྱད་སུས་ཐོགས་ནས་དབང་བསྐུར་བའི་ཆོ་ག་བྱས་ཀྱང་རུང་། དབང་གང་ལ་ཐོབ་པ་ནི་དབང་སྟེར་བ་པོ་ཉིད་ལས་ཐོབ་པར་འགྱུར་བ་ལ་དབང་རྫས་ཐོགས་པ་པོ་སོགས་ལས་ཐོབ་པ་མ་ཡིན་པར་རླུང་ལྟར་དུ་གྲགས་སོ། །ཞེས་གསུངས་སོ། །དེ་ལྟར་དབང་བསྐུར་ཆོ་ག་ཕྱག་ལེན་དང་བཅས་པ་འདི་ནི་མཁས་པ་ཆེན་པོ་ཚུལ་ཁྲིམས་འོད་ཟེར་གྱིས་མཛད་པ། གླིང་ཡུལ་རྫ་དགོན་གྱི་པར་མ་འདི། དབུས་གཙང་དུའང་འདི་ཕྱག་ལེན་ཞིབ་ཅིང་རྒྱས་ལ་ལེགས་པ་ཡིན་ཞེས་གྲགས་ཆེ་ལ། རང་གིས་ཀྱང་པར་མ་དེའི་སྟེང་
ནས་ཐོབ་པ་ལྟར་ཕྱག་ལེན་མཐོང་བ་བརྒྱུད་པ་དང་། བླ་མ་རྣམས་ཀྱི་ཞལ་ཤེས་གསུང་རྒྱུན་དང་། གཞན་མན་ངག་འགའ་ཞིག་གིས་ཁ་བཀང་སྟེ། རྒྱུད་རིགས་མཐུན་སོ་སོ་དང་། བླ་མེད་རྒྱུད་ཀྱི་དབང་ལ་ཡང་རྒྱས་འབྲིང་བསྡུས་གསུམ་སོ་སོར་ཕྱེས་ཏེ། ཕྱི་རབས་ཀྱི་བླ་མ་གསར་བུ་རྣམས་ལ་ཕན་པའི་ཕྱིར་དུ་བཀོད་པ་ཡིན་པས། །ཕྱོགས་ངའི་ཁོང་སྲན་དང་། རང་ཆེའི་ཨང་འདིར་མེད་ཅིང་། བློ་གཟུ་བོར་གནས་པ་རྣམས་ཀྱིས། འདི་ལ་བརྟེན་ནས་རང་གཞན་གྱི་དོན་རྒྱ་ཆེན་པོ་སྒྲུབ་པར་རིགས་སོ། །དེ་ལྟར་རྡོར་ཕྲེང་གི་ཆོ་ག་འདི། བྲི་བསམ་པའང་མེད་ཅིང་། སྔར་བདག་གིས་རྡོར་ཕྲེང་ཚར་གཉིས་བསྐུར་བ་ནི། ཚུལ་ཁྲིམས་འོད་ཟེར་གྱིས་མཛད་པ་དེའི་སྟེང་ནས་བསྐུར་བ་ཡིན། གབ་ཀྱང་འཕྲོད་པར་བྱུང་། ད་ནི་མཚམས་ཡིན་པ་དང་ན་སོ་རྒས་པས་རྡོར་ཕྲེང་འཛུགས་རེ་ཡང་མེད། བསྒྲིགས་ན་སློབ་མ་དང་དབོན་པོ་སོགས་ལ་ཕན་སྲིད་དེ། ཁོ་བོ་བྱ་བྲལ་གཉོམ་ཆུང་ཡིན་པས། བསྟན་པ་སྤྱིའི་གཞུང་ཆེན་པོ་འདི་ལྟ་བུ་ལ། རྩོམ་དང་བསྒྲིགས་ཆོག་སོགས་བྱེད་པ་བབ་ཐོབ་མེད་སྙམ་ནས་སྤྲོས་པ་སྐྱུངས། དེའི་ཚེ་རྡོ་རྗེ་
འཛིན་པ་བླ་མ་ཀརྨ་ཕྲིན་ལས་ཕེབས་བྱུང་བ་ན་རེ། རྡོ་རྗེ་ཕྲེང་བ་འདི་ཡུ་གུ་ཚང་ལ་བཀའ་བབས་ཡིན་པས། འདིའི་གབ་འཁྲུགས་རྣམས་བསལ་ནས། སྟབས་བདེ་ཞིང་དཔེ་ཁྱེར་ཆོག་པའི་བལྟས་ཆོག་ཞིག །ཅེས་ཀྱང་བསྒྲིགས་དགོས་ཟེར་ནས་ནན་ཏན་ཆེན་པོ་བྱས། དེ་ལ་བདག་གིས་སྨྲས་པ་ཧམ་པ་མ་ཆེ། ཡུ་གུ་ཚང་སྤྲང་པོ་བྱ་བྲལ་བྱ་ཤོ་ཡིན་པ། །རྡོར་ཕྲེང་གི་བཀའ་བབས་ཙམ་ག་ན་ཡིན། རྡོར་ཕྲེང་བཀའ་བབས་པ་ནི། རྒྱ་གར་ན་པཎྜི་ཏ་དར་པན་ཨ་ཙརྱ་དང་། བོད་དུ་ས་བཟང་འཕགས་པ་གཞོན་ནུ་བློ་གྲོས་དང་། བུ་སྟོན་པ་རིན་ཆེན་གྲུབ་དང་། ས་སྐྱ་པའི་ནང་ནས་ངོར་པ་རྡོ་རྗེ་འཆང་དང་། ཀར་ལུགས་ལ་སྤྱན་སྔ་ཆོས་ཀྱི་གྲགས་པ་དང་། སྟག་ལུང་པ་ལ་ངག་དབང་གྲགས་པ་དང་། འབྲུག་ལུགས་ལ་པདྨ་དཀར་པོ་དང་། འབྲི་ཁུང་པ་ལ་ཞབས་དྲུང་ཆོས་རྒྱལ་ཕུན་ཚོགས་དང་། དགེ་ལུགས་ལ་གཡག་སྡེ་ལོཙྪ་བ་ཙམ་ཡིན་སྐད། ཁོ་བོ་བྱ་བྲལ་ཁུར་ཙམ་ཞིག་བསྟན་པའི་གཞུང་ཆེན་པོ་རྡོར་ཕྲེང་བརྩམས་པའི་བབ་ཐོབ་ག་ན་ཡོད། འཇིག་རྟེན་ཁ་ངག་ལ། མ་བཅོས་བུ་མོའི་ལ་གཅིན་ཟེར་བའི་དཔེ། བྲིས་ཀྱང་སུས་ཚད་མར་
མི་འཛིན་འཕྱ་རྟེན་འོང་སྨྲས་པས། ཐམས་ཅད་ཀྱིས་ཚད་མར་མ་འཛིན་ན་ཡང་བཟོད། དགེ་བཤེས་ཆེན་པོས་མཛད་པ་རྣམས་ཀྱང་། ཀུན་གྱི་ཚད་མར་མི་འཛིན་ཀྱང་རང་རང་གི་ཆོས་བརྒྱུད་དེས་ཚད་མར་འཛིན་པ་ཡིན། ཁྱེད་ལ་ཡང་དབང་ལུང་གསན་པའི་བླ་མ་ཆེན་པོ་ཡང་འགའ་ཞིག་ཡོད། སློབ་མར་གྱུར་པའི་ངེད་བླ་བྲན་ཡང་མང་བས། ཅིས་ཀྱང་རྩོམ་དགོས་ཟེར། ད་ང་གཅོང་ནད་ཀྱིས་ཟིན་པས་ལུས་ཀྱང་མི་བདེ། འདི་རྒྱུད་སྡེ་བཞིའི་སྙིང་པོ་ཡིན་པས་བཀའ་ཡང་གཉེན། ང་མཚམས་པ་ཡིན་ཀྱང་རྣམ་གཡེང་ཤིན་ཏུ་ཆེ། ཤོག་བུ་ཡང་མེད་སྨྲས་ནས་ཁས་མ་བླངས། དེ་ནས་ཟླ་བ་འགའ་ཞིག་སོང་ཙམ་ན། བླ་མ་ཕྲིན་ལས་ཀྱིས་གྱིང་ཐང་ནས་ཡི་གེ་བསྐུར་ཏེ། རྡོར་ཕྲེང་བསྒྲིགས་པའི་ཞུ་རྟེན་དང་། བདག་འཁོར་བཅས་ཀྱི་ཚོགས་བརྒྱ། མར་མེ་བརྒྱ་རྩ། མཎྜལ་བརྒྱ་རྩ། ཕྱག་སྟོང་ཕྲག་རྣམས་འབུམ་འགྱུར་ཟླ་བའི་ནང་དུ་ཐོན་པར་བྱེད། དངུལ་ཐིག་དང་ཤོག་བུ་ཁ་ལྔ་བཅུ་ཕུལ། བྲི་སའི་ཤོག་པོད་འཛིན་བརྡུངས་བྱས་པ་དང་། དྲུང་ཡིག་པ་ལ་བྱི་རུ་སྤོས་ཤེལ་སོགས་ལྔ་ཚན་དང་བཅས་ཏེ་ཕུལ་ཟེར་བྱུང་། དེ་རྩོམ་ན་ཅི་འདྲ་
བསམས་ཤིང་ཡོད་ཚེ་རྨི་ལམ་དུ། གྲུབ་མཐའ་གཞན་གྱིས་བརྗེ་འགའ་ཟུང་གིས། ང་ཡིས་རྩོམ་པའི་དཔེ་ཆ་ཞིག་ལ་ལྟ་ཞིང་། ཁོ་བྱ་བྲལ་ཆུང་ཆུང་གིས། བསྟན་པ་སྤྱིའི་སྡོམ་ཆེན་པོ་འདི་འདྲ་རྩོམ་པའི་བབ་ཐོབ་ཨེ་ཡོད་དམ་ཟེར་ནས་འཕྱ་བ་གཅིག་རྨིས་པས། ད་བྲིས་ཀྱང་འཕྱ་རྟེན་ལས་འགྲོ་དོན་མི་འོང་བ་འདྲ་སྙམ། ཞག་གཉིས་གསུམ་ཚོགས་དང་མཎྜལ་ཕུལ་ནས་གནང་བ་ཞུས་ཤིང་། བྲིས་ན་རུང་ངམ་མི་རུང་འགྲོ་དོན་འོང་ངམ་མི་འོང་བརྟགས་པས། གཉིད་པ་མ་ཡིན་ཉམས་ཀྱི་སྣང་བ་ལ། འགྲོ་དོན་དཔག་ཏུ་མེད་པ་འབྱུང་ཟེར་བའི་སྒྲ་ཞིག་ཐོས། ཕྱིར་ཉིན་དབོ་ཟླ་བའི་ཉི་ཤུ། སྐར་མ་བཟང་བ་དང་ཐུག་འདུག་པས་དབུ་བཙུགས། དེ་ནས་སྐབས་སྐབས་སུ་མཎྜལ་བརྒྱ་རྩ། བསྐང་ཐུང་བརྒྱ་རྩ། ཚོགས་འཁོར་ལ་སོགས་པ་ལན་མང་དུ་ཕུལ་ཞིང་གསོལ་བ་བཏབ་ནས་བྲིས་པས། རྣམ་གཡེང་མང་བའི་སྟབས་ཀྱིས་ཡུན་རིང་འགོར། གཞུང་གི་དབང་བསྡུས་པ་དུས་འཁོར་ལ་སྦྱར་རྒྱུ་དེ་བྲི་སྐབས། ཉམས་དང་རྨི་ལམ་འདྲེས་པའི་སྐབས་སུ། བྱང་ཆུབ་སེམས་དཔའ་སྤྱན་རས་གཟིགས་དེ་ཡིད་ཡུལ་དུ་ལམ་མེར་གསལ་བས། བདག་འཇུག་ལེན་
དུས། བླ་མ་དང་ཐུགས་རྗེ་ཆེན་པོ་མདུན་བསྐྱེད་དབྱེར་མེད་དུ་བསྒོམ། གསུངས་པའི་ལུང་བསྟན་གསལ་པོར་ཐོས་པས། འགྲིགས་ཆོག་འདི་ཡང་བདག་གི་ཤེས་རབ་ཀྱི་སྟོབས་ཀྱིས་གྲུབ་པ་མ་ཡིན་ཏེ། ཡི་དམ་ཐུགས་རྗེ་ཆེན་པོའི་བྱིན་རླབས་ཀྱི་མཐུ་ལས་བྱུང་བ་ཡིན་པར་གོ །དེའི་ཕྱིར་དབང་ཆོག་འདི་ལ་བྱིན་རླབས་ཡོད་པར་ངེས་སོ། །ཡང་རྡོར་ཕྲེང་གི་བདེ་མཆོག་གི་ལྷ་གྲངས་དྲུག་ཅུ་རྩ་གཉིས་རྣམས་ཞེ་རྩིས་བྱེད་ཅིང་ཡོད་ཙ། གཉིད་པ་ཡང་མ་ཡིན་མངོན་སུམ་དུ། དེ་འདྲ་རེ་རེའི་འཁོར་དུ་དཔའ་བོ་དང་རྣལ་འབྱོར་མ་ས་ཆེན་པོའི་རྡུལ་གྱི་གྲངས་ཙམ་ཡོད། ཆོས་སྐྱོང་ཡང་ཡོད་ཟེར་བའི་སྒྲ་ཞིག་གྲག་པ་ཐོས་པས། སེམས་ལ་དད་གུས་ཆེན་པོ་རང་དབང་མེད་པར་སྐྱེ་བ་ཞིག་བྱུང་བས། འདི་ལ་ལྷ་དང་སྲུང་མ་ཡང་འཁོར་བར་ཡོད་དོ། །དེ་ནས་སྣོན་ཟླ་བའི་ཚེས་བརྒྱད་ལ། བརྩམ་དོན་ཅུང་ཟད་མ་གཏོགས་འགྲུབ་པས། བསྔོ་བ་སྨོན་ལམ་གྱིས་རྒྱས་གདབ། འདི་ཡི་འགྲོ་དོན་དང་འཕེལ་སྒོ་འབྱུང་ངམ་བརྟགས་པས། ཉམས་ཀྱི་སྣང་བར་འདི་ཡི་འགྲོ་དོན་འབྱུང་ཚུལ་རྣམས་ཞིབ་ཅིང་རྒྱས་པ་ཡིད་ཡུལ་དུ་གསལ་བ་ཞིག་བྱུང་
ནའང་། ཕྱིར་ནངས་ནས་ཐམས་ཅད་བརྗོད། མ་བརྗེད་གསལ་བ་ལ། དུས་ཀྱི་མཐའི་བར་དུ་དཔེ་ཆ་འདི་ཚར་ལྔ་བརྒྱ་འཕེལ། འདིའི་དཀྱིལ་འཁོར་མཐོ་ཐོག་གིས་བསྙེན་པ་ཐེམས་པ་ཁྲི་ཕྲག་གཅིག་འབྱུང་བ་ཡིད་ལ་གསལ་པོར་ཤར། དེས་ན་འདི་དག་རང་གར་རྩོམ་པར་མ་དགོངས་པར། སྣོན་ཕྲི་མེད་པར་འདི་ཇི་ལྟ་བར་བྲིས་ཤིག །དབང་སྒྲུབ་བྱེད་ཚེ་རང་གཅིག་པུའམ་སློབ་དཔོན་འགའ་ཟུང་ལས་མེད་པའི་ཕྱིར། དཔེ་ཆོག་བྱ་ཕྱིར་དཔེ་ཆ་ཉིད་བྲི་བ་དང་དབང་བསྐུར་བྱ་ནི་དབང་ཙཀ་དུ་འདི་ལྟར་བྲི་བ་ལེགས་ཏེ། ཁྲོམ་མང་ལ་དཔེ་ཆ་རང་ཁྱེར་བ་མི་མཛེས་ཤིང་། དབང་ཙཀ་དར་རས་ཀྱིས་དཀྲིས་ནས་བླ་ཆེན་ཡིན་ན་བེར་དང་། མེད་ཀྱང་ཆོས་གོས་ཀྱི་ནང་སྐུ་པང་དུ་བཞག་པས། དབང་ཐུགས་ཐོག་ནས་མཛད་པ་འདྲ་བ་ཞིག་འོངས། ཨོ་རྒྱན་གྱི་གསུང་རྣམས་ལ་ཡང་། དབང་ཙཀ་རྒྱབ་ཡིག་བྱོས་ལ་ཀློག །ཅེས་གསུངས་པ་ལྟར། དབུས་གཙང་ཁམས་གསུམ་གྱི་རྙིང་མ་བ་ཐམས་ཅད་ཀྱིས་དབང་ཙཀ་སྟེང་ནས་དབང་བསྐུར་བ་ཕྱག་སྲོལ་ཡིན། ས་ལུགས་ཀྱི་ཀུན་རིག་སོགས་ཀྱི་དབང་ཙཀ་ལ་ནར་མོ་དཔེ་ཆ་འདྲ་བ་ཞིག་རེད་ནའང་། དབང་ཙཀ་གྲུ་བཞི་
བྱེད་པ་འདི་རྙིང་མ་པའི་ཁྱད་ཆོས་ཕྱག་ལེན་ལེགས་པར་རྩི། ཅུང་ཞིག་གཟེབ་ཐབས་སུ་ཐུར་དུ་བྲི་བ་ནི། ཀཿཐོག་པའི་ཕྱག་ལེན་ཁྱད་ཆོས་ཡིན་ཟེར་ཏེ། དབང་ཙཀ་ཡང་དཔེ་ཆ་མི་བྱེད་པར་འདི་ལྟར་མ་འདྲ་གྱིས་ལ་བྲིས་ཤིག །བདེ་མཆོག་རྒྱུད་ཀྱི་བཀའ་སྲུང་ཕྱག་བཞི་པ་དང་། ཀྱེ་རྡོར་རྒྱུད་ཀྱི་བཀའ་སྲུང་གུར་མགོན་དང་། གདན་བཞིའི་བཀའ་སྲུང་དུད་སོལ་མ་དང་། མ་རྒྱུད་སྐོར་བཞིའི་བཀའ་སྲུང་བེར་ཆེན་ཡབ་ཡུམ་དང་། གསང་འདུས་ཀྱི་བཀའ་སྲུང་ཞལ་བཞི་པ་དང་། བྱ་སྤྱོད་རྣལ་འབྱོར་རྒྱུད་ཀྱི་བཀའ་སྲུང་དཔལ་མགོན་བདུན་ཅུ་རྩ་ལྔ་རྣམས་ཀྱིས།། སྔོན་གྱི་དམ་ཚིག་རྗེས་སུ་དྲན་པར་མཛོད་ལ། འདིའི་དཔེ་རྒྱུན་དབང་རྒྱུན་ལུང་རྒྱུན་རྣམས་འཕེལ་ཞིང་རྒྱས་པའི་ཕྲིན་ལས་མཛོད་ཅིག །ཁྱད་པར་འདི་བརྩམས་ཚར་ལ་ཁད་ཀྱི་སྐབས་སུ། ཁོང་ལྕམ་དྲལ་གཉིས་ཀྱིས་འདིའི་བཀའ་སྲུང་བྱེད་འདོད་ཆེ་བའི་རྨི་ལྟས་མང་དུ་བྱུང་བས་བཙན་རིགས་སུམ་བརྒྱ་དྲུག་ཅུའི་ཕ་རྒན། འཕེན་ཡུལ་སྒོ་མོ་བྲག་དམར་ན་གནས་བཅས་ཤིང་། ཡུལ་གླིང་རེ་ན་ཕོ་བྲང་རེ་ཡོད་པས་གནས་བོད་ཡུལ་ཀུན་ལ་ཁྱབ་པ། །བཙན་རྒྱལ་སྐྱེས་བུ་ལུང་བཙན་
དང་། དེའི་ལྕམ་སྲིང་རྡོ་རྗེ་གཡུ་སྒྲོན་མ་གཉིས་ཀྱིས་འདིའི་བཀའ་སྲུང་མཛོད་ལ། འདི་ཉིད་འཕེལ་ཞིང་རྒྱས་པ་དང་། ཡི་གེའི་ཐོབ་ཆ་དང་འབྲུ་ཆད་ཙམ་ནི་བཅོས་ཆོག་གཞན་བཅོས་བསླད་སྣོན་ཕྲི་བྱེད་མཁན་བྱུང་ན་ཆད་པ་ཆོད་ཅིག །འདི་ཉིད་བྲི་བ་དང་རང་གཞན་གྱི་དོན་བྱེད་པ་རྣམས་ལ་ཁ་འཛིན་སྡོངས་གྲོགས་མཛོད་ཅིག །ཅེས་ངག་ཁྲིད་བརྩམ་དོན་དང་བཅས་པ། རཱ་ག་ཨ་སྱས་ངག་ནས་སྨྲས་པ་ལྟར། དགེ་སློང་བརྩོན་འགྲུས་ཀྱིས་ཡི་གེར་བཀོད་པ། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།