དཔལ་དུས་ཀྱི་འཁོར་ལོའི་ཐུགས་ཀྱི་དཀྱིལ་འཁོར།
དཔལ་དུས་ཀྱི་འཁོར་ལོའི་ཐུགས་ཀྱི་དཀྱིལ་འཁོར་ནི། རྡོ་རྗེའི་གུར་ཡངས་ཤིང་རྒྱ་ཆེ་བའི་ནང་དུ། སྣ་ཚོགས་པདྨ་དང་ཉི་མ་ལ་གནས་པའི་འཁོར་ལོ་སེར་པོ་རྩིབས་བཅུ་པ། གཡས་སྐོར་དུ་འགྲོ་བ་མི་མངོན་པར་མགྱོགས་པར་འཁོར་བ་དེའི་རྩིབས་བཅུ་ལ། ཤར་དུ་བགེགས་མཐར་བྱེད་ནག་པོ། ནག་དཀར་དམར་བའི་ཞལ་ཅན། ཕྱག་དྲུག་གི་གཡས་ན་རལ་གྲི་དང་གྲི་གུག་རྩེ་གསུམ། གཡོན་ན་ཕུབ་དང་ཐོད་པ་དང་ཁཊཾ་ག་དཀར་པོ་འཛིན་པ། ལྷོར་ཤེས་རབ་མཐར་བྱེད་དམར་པོ། དམར་དཀར་ནག་པའི་ཞལ་ཅན། ཕྱག་དྲུག་གི་གཡས་ན་མེའི་མདའ་རྡོ་རྗེ་ལྕགས་ཀྱུ། སྒྲ་དང་བཅས་པའི་ཅང་ཏེའུ། གཡོན་ན་གཞུ་རྡོ་རྗེ་ཞགས་པ་རིན་པོ་ཆེ་ཆ་དགུ་པ་འཛིན་པ། བྱང་དུ་པདྨ་མཐར་བྱེད་དཀར་པོ། དཀར་ནག་དམར་བའི་ཞལ་ཅན། ཕྱག་དྲུག་གི་གཡས་ན་ཐོ་བ། མདུང་། རྩེ་གསུམ། གཡོན་ན་པད་དཀར་འདབ་བརྒྱད་པ། མེ་ལོང་བགྲང་ཕྲེང་འཛིན་པ། ནུབ་ཏུ་གཤིན་རྗེ་མཐར་བྱེད་སེར་པོ། སེར་དཀར་ནག་པའི་ཞལ་ཅན། ཕྱག་དྲུག་གི་གཡས་ནི་འཁོར་ལོ་དང་།་དབྱུག་པ་དང་འཇིགས་བྱེད་རྡོ་རྗེ། གཡོན་ན་དུང་རྡོ་རྗེ་ལྕགས་
སྒྲོག །དྲིལ་བུ་འཛིན་པ། ཤར་ལྷོར་དབྱུག་སྔོན་ཅན་ནག་པོ། ཞལ་གཅིག་ཕྱག་བཞི་པ། གཡས་གཉིས་ན་རལ་གྲི་དང་རྡོ་རྗེ། གཡོན་གཉིས་ན་ཕུབ་དང་སྦྲུལ་འཛིན་པ། ལྷོ་ནུབ་ཏུ་འདོད་རྒྱལ་དམར་པོ་ཞལ་གཅིག་ཕྱག་བཞི་པ། གཡས་གཉིས་ན་མདའ་དང་ལྕགས་ཀྱུ། གཡོན་གཉིས་ནི་གཞུ་དང་ཞགས་པ་འཛིན་པ། བྱང་ཤར་དུ་མི་གཡོ་བ་དཀར་པོ་ཞལ་གཅིག་ཕྱག་བཞི་པ། གཡས་གཉིས་ན་ཐོ་བ་དང་མདུང་། གཡོན་གཉིས་ན་པདྨ་དང་མེ་ལོང་འཛིན་པ། ནུབ་བྱང་དུ་སྟོབས་པོ་ཆེ་སེར་པོ་ཞལ་གཅིག་ཕྱག་བཞི་པ། གཡས་གཉིས་ན་འཁོར་ལོ་དང་དབྱུག་པ། གཡོན་གཉིས་ན་དུང་དང་རིན་པོ་ཆེ་འཛིན་པ། སྟེང་དུ་གཙུག་ཏོར་འཁོར་ལོས་སྒྱུར་བ་ལྗང་གུ། ལྗང་དམར་དཀར་བའི་ཞལ་ཅན། །ཕྱག་དྲུག་གི་གཡས་པ་རྣམས་ན་རྡོ་རྗེ་དང་གྲི་གུག་དང་དགྲ་སྟ། གཡོན་པ་རྣམས་ན་དྲིལ་བུ་དང་ཐོད་པ་དང་ཚངས་པའི་མགོ་བོ་འཛིན་པ། འོག་གི་རྩིབས་ལ་གནོད་མཛེས་སྔོན་པོ་སྔོ་དཀར་དམར་བའི་ཞལ་ཅན། ཕྱག་དྲུག་གི་གཡས་པ་རྣམས་ན་རྡོ་རྗེ་དང་གྲི་གུག་དང་དགྲ་སྟ། གཡོན་པ་རྣམས་ན་དྲིལ་བུ་དང་ཐོད་པ་དང་ཚངས་པའི་མགོ་བོ་འཛིན་
པ། ཁྲོ་བོ་བཅུ་པོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་པ། སྦྲུལ་རྒྱན་དང་ཕྱག་རྒྱ་དྲུག་གིས་བརྒྱན་པ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། གཡས་བརྐྱངས་ཀྱི་སྟབས་ཀྱིས་ཡེ་ཤེས་ཀྱི་མེ་རབ་དུ་འབར་བའི་དབུས་ན་བཞུགས་པ་། འཁོར་ལོ་ཡང་རྒྱུན་མི་འཆད་པར་དྲག་ཏུ་འཁོར་བས་བརྟན་པར་གནས་པ་ལྟ་བུ། འབར་བའི་ཚོགས་དཔག་ཏུ་མེད་པ་འཕྲོ་བ། དེ་ལྟ་བུའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་དུ་ནམ་མཁའི་ཁམས་ཐམས་ཅད་མཐའ་ཡས་པའི་རང་བཞིན་གྱི་ཆོས་འབྱུང་གི་ནང་དུ་ཡཾ་ལས་རླུང་གི་དཀྱིལ་འཁོར་ནག་པོ་དབུས་སུ་གཞུའི་རྣམ་པ་ཐད་དཀར་དཔག་ཚད་འབུམ་ཕྲག་བཞི་པ། སྟེང་འོག་ཏུ་ཧཱུྃ་ལས་སྐྱེས་པའི་སྣ་ཚོགས་རྡོ་རྗེ་གཉིས་དང་བཅས་པ་རྒྱལ་མཚན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་རྒྱར་དཔག་ཚད་འབུམ་ཕྲག་གསུམ་པ། སྟེང་འོག་ཏུ་ཧཱུྃ་ལས་སྐྱེས་པའི་སྣ་ཚོགས་རྡོ་རྗེ་གཉིས་དང་བཅས་པ་བཀྲ་ཤིས་ཀྱིས་མཚན་པ། དེའི་སྟེང་དུ་ཝཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་རྒྱར་དཔག་ཚད་འབུམ་ཕྲག་གཉིས་པ། སྟེང་འོག་ཏུ་ཧཱུྃ་
ལས་སྐྱེས་པའི་སྣ་ཚོགས་རྡོ་རྗེ་གཉིས་དང་བཅས་པ་པདྨས་མཚན་པ། དེའི་སྟེང་དུ་པཾ་ལས་སའི་དཀྱིལ་འཁོར་སེར་པོ་གྲུ་བཞི་པ་རྒྱར་དཔག་ཚད་འབུམ་ཕྲག་གཅིག་པ། སྟེང་འོག་ཏུ་ཧཱུྃ་ལས་སྐྱེས་པའི་སྣ་ཚོགས་རྡོ་རྗེ་གཉིས་དང་བཅས་པ་རྡོ་རྗེས་མཚན་པ། དེའི་སྟེང་དུ་མི་ལས་ལྷུན་པོ་ཆེན་པོ་རྡོ་རྗེའི་རང་བཞིན་འོག་གི་རྒྱར་དཔག་ཚད་སྟོང་ཕྲག་དྲུག་ཅུ་དང་། སྟེང་ལ་སྟོང་ཕྲག་ལྔ་བཅུ་པ། དེའི་དབུས་སུ་ཧཱུཾ་ལས་སྣ་ཚོགས་པདྨ་རི་རབ་ཀྱི་ཕྱེད་དང་མཉམ་པའི་སུམ་ཆ་ལྟེ་བ་ལ་ཡོད་ཅིང་། ལྟེ་བའི་སྟེང་དུ་ཧཱུྃ་ལས་ཟླ་བའི་དཀྱིལ་འཁོར་ལྟེ་བ་དང་མཉམ་པ། དེའི་སྟེང་དུ་ཚེག་དྲུག་ལས་ཉི་མའི་དཀྱིལ་འཁོར་ཟླ་བ་དང་མཉམ་པ། དེའི་སྟེང་དུ་ཐིག་ལེ་ནཱ་ད་ལས་སྒྲ་གཅན་གྱི་དཀྱིལ་འཁོར་ཁ་དོག་སྔོན་པོ་ཉི་མ་དང་མཉམ་པ། དེ་རྣམས་རོ་གཅིག་ཏུ་འདྲེས་པ་ལས་ཧྐྵྨླྭྲྱཱཾ་གི་ཡི་གེ །དེ་ལས་གྲུབ་པའི་འཇིག་རྟེན་ཁམས་རླུང་སོགས་ནས་སྒྲ་གཅན་བར་སྔ་མ་བཞིན་དུ་བསྐྱེད་ལ། དེའི་སྟེང་དུ་ཧཱུྃ་ཡིག་ལས་སྐྱེས་པའི་རྡོ་རྗེའི་གུར་གྱི་ནང་དུ་རྡོ་རྗེའི་ས་གཞི་ལ། ཨོཾ་ཡིག་ཡོངས་སུ་གྱུར་པ་ལས། ཐུགས་ཀྱི་དཀྱིལ་འཁོར་ནོར་བུའི་འོད་ཟེར་འཕྲོ་བ་ཅན་གྱི་ཕྱི་ནས་རིམ་པ་བཞིན། ནག་དམར་དཀར་བའི་རྩིག་པ་རིམ་པ་
གསུམ་དང་ལྡན་པ། གྲུ་བཞི་པ་སྒོ་བཞི་པ། ནོར་བུ་གསེར་གྱི་རང་བཞིན་གྱི་རྟ་བབས་བཞིས་བརྒྱན་པ། རྟ་བབས་སོ་སོ་ལ་ཀ་བ་བཞིའི་བར་དུ་ལྷ་མོའི་གནས་ང་གསུམ་གསུམ་དང་ལྡན་པའི་བརྩེ་གས་མ་གསུམ་པ། བརྩེགས་འོག་མ་ལ་གླང་པོ་ཆེའི་མགོར་སེང་གེས་མནན་པ། བར་མ་དང་། སྟེང་མ་ཤ་ལ་པཉྩི་ཀས་སྣམ་བུ་བཏེག་པ། སྣམ་བུ་སོ་སོའི་རྩེ་མོར་རྒྱལ་མཚན་བསྒྲེང་བ་རྔ་ཡབ་དང་། མེ་ལོང་དང་། དྲིལ་བུ་དང་། བ་དན་དཀར་པོ་རྣམས་འཁྱུད་པ། སྟེང་དུ་ཧར་མི་དེའི་སྟེང་དུ་དབུས་སུ་བུམ་པ་དང་། གཡས་གཡོན་དུ་རྒྱལ་མཚན་དང་། ཀ་བའམ་གཤམ་ནས་མྱོས་པ་བསྲུང་བའི་སྣམ་བུ་དམར་པོས་བསྐོར་བའོ། །རྩིག་པའི་སྟེང་དུ་རིན་པོ་ཆེའི་སྣམ་བུ་དམར་པོ། རིན་པོ་ཆེའི་འཆིང་བ་རྣམ་པར་བཀྲ་བ། དེའི་སྟེང་དུ་དོ་ཤལ་དང་། དོ་ཤལ་ཕྱེད་པ་དང་། མེ་ལོང་དང་། རྔ་ཡབ་དང་། དྲིལ་བུ་དང་། ཟླ་བ་ཕྱེད་པ་དང་། མེ་ཏོག་གི་ཕྲེང་བ་ལ་སོགས་པས་བརྒྱན་པ། བྱ་འདབ་ལས་འཕྱང་བའི་བ་ཀུ་ལི་དཀར་པོ་དང་། དེའི་སྟེང་དུ་ཀྲ་མ་ཤིར་ཥ་པདྨའི་འདབ་མ་ཕྱེད་པའི་དབྱིབས་ཀྱིས་བསྐོར་བའི་བར་བར་དུ་རྒྱལ་མཚན་
དང་། བ་དན་ལ་སོགས་པས་མཛེས་པར་བྱས་པ། འདོད་ཡོན་གྱི་སྣམ་བུ་དཀར་པོས་འགྲམ་སྟེགས་ཀྱི་རྣམ་པར་བསྐོར་ཞིང་། སྒོ་ཁྱུད་དང་ཀ་བའི་མཚམས་སུ་རིན་པོ་ཆེའི་སྤུས་པ། ཟུར་བཞིར་སྣ་ཚོགས་རྡོ་རྗེས་བརྒྱན་པ། དེའི་ནང་དུ་རྡོ་རྗེའི་ཕྲེང་བ་ནག་པོས་བསྐོར་བའི་ནང་དུ་གཙོ་བོའི་པདྨ་ལྗང་གུ། ཨོཾ་ལས་པདྨ་ཟླ་ཉིའི་གདན་དང་བཅས་པ། གཙོ་བོའི་པདྨའི་ལྟེ་བར། ཨོཾ་ཨཱཿཿ ཨ་ལས་ཟླ་བ་དང་། ཉི་མ་དང་། སྒྲ་གཅན་གྱི་གདན། གཞན་རྣམས་ལ་ཨ་ལས་ཟླ་བ་དང་། རཾ་ལས་ཉི་མའི་གདན། ཕྱི་རོལ་ན་མཆོད་པའི་ས་ལ་པདྨ་བུམ་སོགས་མཆོད་རྫས་དུ་མས་གང་བ། གཞལ་ཡས་ཁང་གི་ས་གཞི་དང་། སྟེང་འོག་ཐམས་ཅད་ཀྱི་དབུས་སྔོ་ཤར་ནག །ལྷོ་དམར། བྱང་དཀར། ནུབ་སེར་བ། ཕྱི་ནས་ས་ཆུ་མེ་རླུང་གི་འཁོར་ཡུག་བཞིས་བསྐོར་བའི་སའི་དཀྱིལ་འཁོར་གྱི་དབང་ལྡན་གྱི་མཚམས་སུ་ཨ་ལས་ཟླ་བའི་དཀྱིལ་འཁོར་འཆར་བཞིན་པ་དང་། བདེན་བྲལ་མཚམས་སུ་ཨོཾ་ལས་ཉི་མའི་དཀྱིལ་འཁོར་ནུབ་བཞིན་པ་དང་། མེ་དང་རླུང་གི་དབུས་སུ་དུར་ཁྲོད་ཆེན་པོ་བརྒྱད་ཀྱིས་བསྐོར་བ། ནམ་མཁའི་འཁོར་ཡུག་ལ་རྡོ་རྗེའི་རྭ་བ་དང་།
དེའི་ཕྱི་རོལ་དུ་འོད་ཟེར་འབར་བས་བསྐོར་བའོ། །དེའི་དབུས་སུ་ཟླ་ཉི་སྒྲ་གཅན་གྱི་གདན་གྱི་སྟེང་དུ། བདག་ཉིད་སྐད་ཅིག་གིས་བཅོམ་ལྡན་འདས་དུས་ཀྱི་འཁོར་ལོ་དྲི་མ་མེད་པའི་འོད་ཟེར་ལྔ་འཕྲོ་བ། སྐུ་མདོག་སྔོན་པོ། དབུས་ཀྱི་མགྲིན་པ་སྔོན་པོ། གཡས་པ་དམར་པོ། གཡོན་པ་དཀར་པོ་སྟེ། མགྲིན་པ་གསུམ་དང་ལྡན་པ། རྩ་ཞལ་ནག་པོ་དྲག་ཅིང་མཆེ་བ་གཙིགས་པ། གཡས་ཞལ་དམར་པོ་ཆགས་དང་བཅས་པ། རྒྱབ་ཞལ་སེར་པོ་ཏིང་ངེ་འཛིན་ལ་གནས་པ། གཡོན་ཞལ་དཀར་པོ་རབ་ཏུ་ཞི་བ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། རལ་པའི་ཅོད་པན་ལ་སྣ་ཚོགས་རྡོ་རྗེ་དང་ཟླ་བ་ཕྱེད་པ་དང་། རྡོ་རྗེ་སེམས་དཔའི་དབུ་རྒྱན་ཅན། རྡོ་རྗེ་ནོར་བུ་དང་། །རྡོ་རྗེ་ན་རྒྱན་དང་། རྡོ་རྗེ་མགུལ་རྒྱན་དང་། རྡོ་རྗེ་གདུབ་བུ་དང་། རྡོ་རྗེ་སྐེ་རགས་དང་། རྡོ་རྗེ་རྐང་གདུབ་དང་། རྡོ་རྗེ་དར་དཔྱངས་དང་། རྡོ་རྗེ་ཕྲེང་བ་དང་། སྟག་གི་པགས་པའི་ཤམ་ཐབས་གྲོལ་བ། གཡོན་གྱི་ཕྲག་པ་དང་པོ་སྔོན་པོ། གཉིས་པ་དམར་པོ། གསུམ་པ་དཀར་པོ་སྟེ། ཕྲག་པ་དྲུག །དཔུང་པ་བཅུ་གཉིས། ཕྱག་ཉི་ཤུ་
རྩ་བཞིའི་དང་པོ་བཞི་བཞི་ནག་པོ། གཉིས་པ་བཞི་བཞི་དམར་པོ། གསུམ་པ་བཞི་བཞི་དཀར་པོ། ཕྱག་ཐམས་ཅད་ཀྱི་མཐེ་བོང་སེར་པོ། མཛུབ་མོ་དཀར་པོ། གུང་མོ་དམར་པོ།། མིང་མེད་ནག་པོ། མཐེའུ་ཆུང་ལྗང་གུ། སོར་མོ་རྣམས་ཀྱི་ཚིགས་ཀྱི་འཕྲེང་བ་དང་པོ་ནག་པོ། གཉིས་པ་དམར་པོ། གསུམ་པ་དཀར་པོ་སྟེ། སོར་གདུབ་རྣམས་ཀྱིས་མཛེས་ཤིང་འོད་འཕྲོ་བ། གཡས་ཀྱི་ཕྱག་ནག་པོ་བཞིའི་དང་པོར་རྡོ་རྗེ། གཉིས་པར་རལ་གྲི། གསུམ་པར་རྩེ་གསུམ། བཞི་པར་གྲི་གུག །དམར་པོ་བཞིའི་དང་པོར་མེའི་མདའ། གཉིས་པར་རྡོ་རྗེ་ལྕགས་ཀྱུ། གསུམ་པར་སྒྲ་དང་བཅས་པའི་ཌ་མ་རུ། བཞི་པར་ཐོ་བ། དཀར་པོ་བཞིའི་དང་པོར་འཁོར་ལོ། གཉིས་པར་མདུང་། །གསུམ་པར་དབྱུག་པ། བཞི་པར་དགྲ་སྟ། གཡོན་གྱི་ནག་པོ་བཞིའི་དང་པོར་དྲིལ་བུ། གཉིས་པར་ཕུབ། གསུམ་པར་ཁཊཾ་ག་རྣམ་པར་རྒྱས་པ། བཞི་པར་ཁྲག་གིས་གང་བའི་ཐོད་པ། དམར་པོ་བཞིའི་དང་པོར་གཞུ། གཉིས་པར་རྡོ་རྗེ་ཞགས་པ། གསུམ་པར་རིན་པོ་ཆེ། བཞི་པར་པདྨ་དཀར་པོ་འདབ་བརྒྱད་པ། དཀར་པོ་བཞིའི་དང་པོར་
དུང་། གཉིས་པར་མེ་ལོང་། གསུམ་པར་རྡོ་རྗེ་ལྕགས་སྒྲོག །བཞི་པར་ཚངས་པའི་མགོ་གདོང་བཞི་པ་པདྨས་སྤྲས་པ་འཛིན་པ། ཤིན་ཏུ་རོལ་པའི་གཡས་བརྐྱངས་ཀྱི་སྟབས་ཀྱིས་བཞུགས་པའི་ཞབས་གཡས་པ་དམར་པོའི་འོག་ཏུ་འདོད་ལྷ་དམར་པོ་གདོང་གཅིག་པ། ལག་པ་བཞི་པ། ལག་ན་མེ་ཏོག་གི་མདའ་ལྔ་དང་། གཞུ་དང་། ཞགས་པ་དང་། ལྕགས་ཀྱུ་འཛིན་པ། གཡོན་པ་དཀར་པོའི་འོག་ཏུ་དྲག་པོ་དཀར་པོ་གདོང་གཅིག་པ། མིག་གསུམ་པ། ལག་པ་བཞི་པ། རྩེ་གསུམ་དང་། ཌཱ་མ་རུ་དང། ཐོད་པ་དང་། ཁཊཾ་ག་འཛིན་པ། བདུད་དང་དྲག་པོའི་ལྷ་མོ་དགའ་མ་དང་། ཨུ་མས་ཞབས་ཀྱི་མཐིལ་ལ་འཛིན་ཅིང་། གདོང་དམན་པར་བྱེད་བཞིན་པ། རྡོ་རྗེ་དང་དྲིལ་བུ་འཛིན་པའི་ཕྱག་གཉིས་ཀྱིས་ཡུམ་ལ་འཁྱུད་པའི་སྣ་ཚོགས་ཡུམ་གསེར་མདོག་ཅན། གཡས་སྐོར་གྱིས་སེར་དཀར་སྔོ་དམར་བའི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཕྱག་བརྒྱད་ཀྱི་གཡས་པ་རྣམས་ན་གྲི་གུག །ལྕགས་ཀྱུ། སྒྲ་དང་བཅས་པའི་ཌཱ་མ་རུ། བགྲང་ཕྲེང་། གཡོན་པ་རྣམས་ན་ཐོད་པ་དང་། ཞགས་པ། པདྨ་
དཀར་པོ་འདབ་མ་བརྒྱད་པ། རིན་པོ་ཆེ་རྣམས་བསྣམས་པ། རྡོ་རྗེ་སེམས་དཔའི་ཅོད་པན་ཅན། ཕྱག་རྒྱ་ལྔས་བརྒྱན་པ། གཡོན་བརྐྱངས་ཀྱི་སྟབས་ཀྱིས་བཅོམ་ལྡན་འདས་དང་སྙོམས་པར་འཇུག་པས་གནས་པ། ཤར་གྱི་ལེའུ་ཚེ་ལ་དོན་ཡོད་གྲུབ་པ་ནག་པོ། ནག་དཀར་དམར་བའི་ཞལ་ཅན། ཕྱག་གཡས་ན་རལ་གྲི་དང་། གྲི་གུག་དང་། རྩེ་གསུམ། གཡོན་ན་ཕུབ་དང་། ཐོད་པ་དང་། ཁཊཾ་ག་དཀར་པོ་འཛིན་པ། སྤྱན་མས་འཁྱུད་པ། ལྷོར་རིན་འབྱུང་དམར་པོ། དམར་དཀར་ནག་པའི་ཞལ་ཅན། ཕྱག་གཡས་ན་མེའི་མདའ། ལྕགས་ཀྱུ། སྒྲ་དང་བཅས་པའི་ཅང་ཏེའུ། གཡོན་ན་གཞུ། རྡོ་རྗེ་ཞགས་པ། རིན་པོ་ཆེ་ཆ་དགུ་པ་འཛིན་པ། མཱ་མ་ཀིས་འཁྱུད་པ། །བྱང་དུ་འོད་དཔག་མེད་དཀར་པོ། དཀར་ནག་དམར་བའི་ཞལ་ཅན། ཕྱག་གཡས་པ་གསུམ་ན། ཐོ་བ་མདུང་རྩེ་གསུམ། གཡོན་པ་གསུམ་ན་པད་དཀར་འདབ་བརྒྱད་པ། མེ་ལོང་། བགྲང་ཕྲེང་འཛིན་པ། གོས་དཀར་མོས་འཁྱུད་པ། ནུབ་ཏུ་རྣམ་སྣང་སེར་པོ། སེར་དཀར་དམར་བའི་ཞལ་ཅན། ཕྱག་གཡས་ན་འཁོར་ལོ་དང་། དབྱུག་པ་དང་། འཇིགས་
བྱེད་རྡོ་རྗེ། གཡོན་ན་དུང་དང་། རྡོ་རྗེ་ལྕགས་སྒྲོག་དང་། སྒྲ་དང་བཅས་པའི་དྲིལ་བུ་འཛིན་པ། སྒྲོལ་མས་འཁྱུད་པ། ཐམས་ཅད་ཀྱང་ཞལ་རེ་རེ་ལ་སྤྱན་གསུམ་གསུམ་དང་ལྡན་པ། པདྨ་དཀར་པོ་དང་། ཉི་མའི་སྟེང་དུ། རྡོ་རྗེ་སྐྱིལ་ཀྲུང་གིས་བཞུགས་པ་ལ། །ཡུམ་རྣམས་པདྨའི་གདན་གྱིས་འཁྱུད་པ། རལ་པའི་ཅོད་པན་ཅན། ཤར་ལྷོར་སྒྲོལ་མ་ལྗང་གུ་དོན་གྲུབ་ལྟ་བུ་ལ་རྣམ་སྣང་གིས་འཁྱུད་པ། ལྷོ་ནུབ་ཏུ་གོས་དཀར་མོ་རིན་འབྱུང་ལྟ་བུ་ལ་འོད་དཔག་མེད་ཀྱིས་འཁྱུད་པ། བྱང་ཤར་དུ་མཱ་མ་ཀཱི་འོད་དཔག་མེད་ལྟ་བུ་ལ་རིན་འབྱུང་གིས་འཁྱུད་པ། ནུབ་བྱང་དུ་སྤྱན་མ་རྣམ་སྣང་ལྟ་བུ་ལ་དོན་གྲུབ་ཀྱིས་འཁྱུད་པ། ཐམས་ཅད་ཀྱང་པདྨ་དམར་པོ་དང་། ཟླ་བའི་གདན་གྱི་སྟེང་དུ་པདྨའི་གདན་གྱིས་བཞུགས་པ་ལ། ཡབ་རྣམས་རྡོ་རྗེའི་གདན་གྱིས་འཁྱུད་པ། ཤར་སྒོར་པདྨ་དམར་པོ་དང་ཟླ་བའི་སྟེང་དུ། །བགེགས་མཐར་བྱེད་ལ་རེངས་བྱེད་མ་སྤྱན་མ་ལྟ་བུས་འཁྱུད་པ། ལྷོ་སྒོར་པདྨ་དཀར་པོ་དང་ཉི་མའི་སྟེང་དུ། ཤེས་རབ་མཐར་བྱེད་ལ་ཁེངས་བྱེད་མ་མཱ་མ་ཀཱི་ལྟ་བུས་འཁྱུད་པ། བྱང་སྒོར་པདྨ་དམར་པོ་དང་ཟླ་བའི་སྟེང་དུ། པདྨ་
མཐར་བྱེད་ལ་རྨུགས་བྱེད་མ་གོས་དཀར་མོ་ལྟ་བུས་འཁྱུད་པ། ནུབ་སྒོར་པདྨ་དཀར་པོ་དང་ཉི་མའི་སྟེང་དུ། གཤིན་རྗེ་མཐར་བྱེད་ལ་རབ་བརྩོན་མ་སྒྲོལ་མ་ལྟ་བུས་འཁྱུད་པ། ཁྲོ་བོ་རྣམས་གཡས་བརྐྱངས་ཀྱི་སྟབས་ཀྱིས་བཞུགས་པ་ལ། ཁྲོ་མོ་རྣམས་གཡོན་བརྐྱངས་ཀྱི་སྟབས་ཀྱིས་འཁྱུད་པ། དེ་ནས་སྣམ་བུ་ལ་ཤར་སྒོའི་གཡས་སུ་ནམ་མཁའི་སྙིང་པོ་དོན་གྲུབ་ལྟ་བུ་ལ་དྲི་རྡོ་རྗེ་མས་འཁྱུད་པ། ལྷོ་སྒོའི་གཡས་སུ་སའི་སྙིང་པོ་རིན་འབྱུང་ལྟ་བུ་ལ་གཟུགས་རྡོ་རྗེ་མས་འཁྱུད་པ། བྱང་སྒོའི་གཡས་སུ་འཇིག་རྟེན་དབང་ཕྱུག་སྣང་བ་མཐའ་ཡས་ལྟ་བུ་ལ་རོ་རྡོ་རྗེ་མས་འཁྱུད་པ། ནུབ་སྒོའི་གཡས་སུ་སྒྲིབ་པ་རྣམ་སེལ་རྣམ་སྣང་ལྟ་བུ་ལ་རེག་བྱ་རྡོ་རྗེ་མས་འཁྱུད་པ། ལྷོ་སྒོའི་གཡོན་དུ་ཕྱག་ན་རྡོ་རྗེ་མི་བསྐྱོད་པ་ལྟ་བུ་ལ་སྒྲ་རྡོ་རྗེ་མས་འཁྱུད་པ། ཤར་སྒོའི་གཡོན་དུ་ཀུན་ཏུ་བཟང་པོ་རྡོར་སེམས་ལྟ་བུ་ལ་ཆོས་དབྱིངས་རྡོ་རྗེ་མས་འཁྱུད་པ། ཐམས་ཅད་ཀྱང་པདྨ་དཀར་པོ་དང་ཉི་མའི་གདན་ལ་རྡོ་རྗེའི་སྐྱིལ་ཀྲུང་གིས་བཞུགས་པ་ལ། ཡུམ་རྣམས་པདྨའི་འདུག་སྟངས་ཀྱིས་འཁྱུད་པའོ། །མེར་རེག་བྱ་རྡོ་རྗེ་མ་སྒྲོལ་མ་ལྟ་བུ་ལ་སྒྲིབ་པ་རྣམ་སེལ་གྱིས་འཁྱུད་པ། བདེན་བྲལ་དུ་རོ་རྡོ་རྗེ་མ་
གོས་དཀར་མོ་ལྟ་བུ་ལ་འཇིག་རྟེན་དབང་ཕྱུག་གིས་འཁྱུད་པ། དབང་ལྡན་དུ་གཟུགས་རྡོ་རྗེ་མ་མཱ་མ་ཀཱི་ལྟ་བུ་ལ་ས་ཡི་སྙིང་པོས་འཁྱུད་པ། རླུང་དུ་དྲི་རྡོ་རྗེ་མ་སྤྱན་མ་ལྟ་བུ་ལ་ནམ་མཁའི་སྙིང་པོས་འཁྱུད་པ། བྱང་སྒོའི་གཡོན་དུ་སྒྲ་རྡོ་རྗེ་མ་ཀུན་བཟང་ལྟ་བུ་ལ་ཕྱག་རྡོར་གྱིས་འཁྱུད་པ། ནུབ་སྒོའི་གཡོན་དུ་ཆོས་དབྱིངས་རྡོ་རྗེ་མ་ཕྱག་རྡོར་ལྟ་བུ་ལ་ཀུན་ཏུ་བཟང་པོས་འཁྱུད་པ། ཐམས་ཅད་ཀྱང་པདྨ་དམར་པོ་དང་ཟླ་བའི་གདན་ལ་པདྨའི་འདུག་སྟངས་ཀྱིས་བཞུགས་པ་ལ། ཡབ་རྣམས་རྡོ་རྗེའི་གདན་གྱིས་འཁྱུད་པའོ། དཀྱིལ་འཁོར་གྱི་འདོད་ཡོན་ལ་མཆོད་པའི་ལྷ་མོ་བཅུ་གཉིས་གནས་པ་ནི། ཤར་སྒོའི་གཡོན་དང་གཡས་སུ་དྲི་ཆབ་མ་དང་ཕྲེང་བ་མ། ལྷོ་སྒོའི་གཡོན་དང་གཡས་སུ་སྤོས་མ་དང་མར་མེ་མ། བྱང་སྒོའི་གཡོན་དང་གཡས་སུ་ལྷ་བཤོས་མ་དང་འབྲས་བུ་མ། ནུབ་སྒོའི་གཡོན་དང་གཡས་སུ་སྒེག་མོ་མ་དང་བཞད་མ། སྟེང་དུ་རོལ་མོ་དང་གར་མ། འོག་ཏུ་གླུ་མ་དང་འདོད་མི་རྣམས་པདྨའི་འདུག་སྟངས་ཀྱིས་བཞུགས་པ། གཙོ་བོ་ལ་མི་བསྐྱོད་པ་སྤྲུལ་སྐུ། འཁོར་རྣམས་ལ་གཙོ་བོས་དབུ་བརྒྱན། དུས་ཀྱི་འཁོར་ལོ་ཤེས་རབ་མ་དང་བཅས་པའི་
སྔགས་ནི། ཨོཾ་ཧ་སྭཱ་ཧཱ། སྒྲུབ་ལེའུ་ལེའུ་ཉེར་གསུམ་པའི་འགྲེལ་པ་གང་གི་ཚེ་དུ་བ་མ་ལ་སོགས་པའི་ལྷ་མོ་བརྒྱད་དང་བུམ་པ་བརྒྱད་དང་ཆོས་ཀྱི་དུང་ལ་སོགས་རེས་འགའ་དོར་ནས། རྒྱལ་བའི་བདག་པོའི་པདྨ་དག་ལ་དཔལ་ལྡན་འཁོར་ལོ་ཐུགས་ཀྱི་་དཀྱིལ་འཁོར་ནི་སྙིང་པོའི་དབུས་སུ་མི་ཡི་བདག་པོ་ཉི་ཤུ་རྩ་ལྔའི་བདག་ཉིད་དུ་ཡང་འགྱུར་ཏེ། དེའི་བཅོམ་ལྡན་འདས་བསྐོར་བ་ཡང་དཔལ་འདུས་པ་ལྟ་བུ་འགྱུར་རོ། །ཞེས་གསུངས་པ་དང་། རྫོགས་ཕྲེང་ལས། འདིར་འདབ་མ་ལ་གནས་པའི་ལྷ་མོ་བརྒྱད་དང་བུམ་པ་རྣམས་དང་ཆོས་ཀྱི་དུང་ལ་སོགས་པ་སྤང་བར་གྱུར་པས་ཉི་ཤུ་རྩ་ལྔའི་བདག་ཉིད་ཅན་གྱི་ཐུགས་ཀྱི་དཀྱིལ་འཁོར་ཡང་བསྒོམ་པར་བྱའོ། །ཞེས་དང་། ཀཾ་ཚང་ལུགས་ཀྱི་རྡོར་ཕྲེང་ལས། ལྷ་ཉེར་ལྔའི་ཡབ་ཡུམ་ཕྱེ་ན་ལྔ་བཅུ་དང་། མཆོད་ལྷ་བསྣན་པས་རེ་གཉིས་པའི་ཐུགས་དཀྱིལ་རྐྱང་པ་ལ་བརྟེན་ཡང་རུང་སྟེ། ཐུགས་དཀྱིལ་ལ་བདེ་ཆེན་འཁོར་ལོའི་ལྷ་མོ་དང་མཚན་མ་རྣམས་སྤངས་པ་ནི་འདིའི་ཁྱད་སོ། །ཆོས་གསུངས།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།