རྡོ་རྗེ་ཕྲེང་བའི་དབུ་འཛུགས་དབང་བཤད།
རྡོ་རྗེ་ཕྲེང་བའི་དབུ་འཛུགས་དབང་བཤད་བཞུགས་སོ།།
ན་མོ་གུ་རུ་ལོ་ཀི་ཤྭ་ར་ཡེ། རྩ་བརྒྱུད་བླ་མ་ཡི་དམ་ཀུན་འདུས་པ། །འཕགས་པ་སྤྱན་རས་གཟིགས་ལ་ཕྱག་འཚལ་ལོ། །རླབས་ཆེན་འགྲོ་དོན་ནུས་པར་བྱིན་གྱིས་རློབས། །རྡོར་ཕྲེང་ཞུ་འདོད་སློབ་མ་ཀུན་འཚོགས་ཏེ། །ཆབ་དང་མེ་ཏོག་བཀྱེ་སྟེ་མཎྜལ་ཕུལ། །འོ་ན་ད་ལམ་ཁྱེད་རྣམས་ཀྱི། དལ་འབྱོར་གྱི་མི་ལུས་རིན་པོ་ཆེ་ཐོབ་པའི་སྐབས་འདིར། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་ནས། རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པའི་ཕྱིར་དཔལ་རྡོ་རྗེ་ཕྲེང་བའི་དཀྱིལ་འཁོར་ཆེན་པོ་རྣམས་སུ་དབང་ཞུ་བར་འདོད་པ་དེ་ཤིན་ཏུ་ལེགས། དེ་ཡི་ལོ་རྒྱུས་བཤད་པ་ལ་ལྔ་སྟེ། བསྟན་བཅོས་
འདི་ཡི་མཚན་གང་ཡིན་པ། མཛད་པ་པོ་ཡི་སློབ་དཔོན་གང་ཡིན་པ་ངོས་བཟུང་ནས་དེའི་ཆེ་བའི་ཡོན་ཏན་བརྗོད་པ། གང་ཟག་གང་གི་དོན་དུ་མཛད་པ། གཞུང་གི་ཚད་གང་ཡིན་པ། མཛད་པའི་དགོས་པ་དང་ལྔའོ། །དང་པོ་ནི་དཔལ་རྡོ་རྗེ་ཕྲེང་བའི་དཀྱིལ་འཁོར་ཀྱི་ཆོ་ག་ཞེས་བྱའོ། །དེ་ལ་གཉིས་ཏེ། དྲང་དོན་ལྟར་ན་རྡོ་རྗེ་ཕྲེང་བ་ནི། གསང་སྔགས་ཀྱི་རྒྱུད་སྡེ་བཞི་རྣམས་སོ། །དཀྱིལ་འཁོར་ནི་ཕྱི་རྡུལ་ཚོན་གྱི་དཀྱིལ་འཁོར་ཉི་ཤུ་རྩ་བརྒྱད་ལ་སོགས་པའོ། །ཆོ་ག་ནི་ལྔ་བཅུ་འཁོར་དང་བཅས་པའོ། །ངེས་དོན་ལྟར་ན། རྡོ་རྗེ་ནི་སེམས་ཉིད་
གཉིས་སུ་མེད་པའི་ཡེ་ཤེས་ཡིན་ལ། ཕྲེང་བ་ནི་མ་རྟོགས་པ་རྟོགས་པར་བྱེད་པའི་ཆོ་གའི་རིམ་པའོ། །དཀྱིལ་འཁོར་ནི་སྙིང་པོ་ལེན་པས་ན། །ནང་ཡེ་ཤེས་ཀྱི་དཀྱིལ་འཁོར་ཏེ། །སྨིན་གྲོལ་གཉིས་ལ་བརྟེན་ནས་དེ་ཁོ་ན་ཉིད་ཀྱི་སྙིང་པོ་ལེན་པའོ། །ཆོ་ག་ནི་སྨིན་གྲོལ་གཉིས་ཉམས་སུ་ལེན་པའི་ཆོ་གའོ། །གཉིས་པ་མཛད་པ་པོ་ནི། སློབ་དཔོན་ཆེན་པོ་ཨ་བྷུ་ཀ་ར་གུསྟ་སྟེ། བོད་སྐད་དུ། འཇིགས་མེད་འབྱུང་གནས་སྦས་པ་ཞེས་བྱ་བས་མཛད་དོ། །དེའི་སྐུ་ཆེ་བའི་ཡོན་ཏན་ལ། ཆགས་ལོཙྩ་བའི་བཤད་པ་ནི། སློབ་དཔོན་འདི་རྒྱ་གར་ཤར་ཕྱོགས་པ་ཡིན་པ་ལ། ཕྱིས་མ་ག་དྷར་བྱོན་ནས་རིག་པའི་གནས་ལྔ་ལ་མཁས་པར་བསླབ་ཅིང་ཐུབ་པའི་བསྟན་པ་ལ་རབ་ཏུ་བྱུང་སྟེ་བསྙེན་པར་རྫོགས་པར་མཛད་ནས་ཤིན་ཏུ་མཁས་ཤིང་བཙུན་པར་བཞུགས་པ་ལ། དེའི་དུས་མ་ག་ཏའི་རྒྱལ་པོ་ཤིང་རྟ་ཅན་ཞེས་བྱ་བས་པཎྜི་ཏ་གཞན་རྣམས་ཀྱི་ནང་ནས་ཀྱང་དམ་པར་བཟུང་སྟེ་པཎྜི་ཏ་ཨན་ཨུ་ལི་ཞེས་བྱ་བའི་གནས་གཞི་གཙུག་ལག་ཁང་ཕུལ་ཞིང་། ཟས་གོས་ལོངས་སྤྱོད་ཐམས་ཅད་ཀྱིས་མཉེས་པར་བྱེད་དོ། །པཎྜི་ཏ་གཞན་རྣམས་ལ་ནི། ཟས་གོས་ཙམ་ལས་མི་འབུལ་སྐད་
དོ། །སློབ་དཔོན་དེའི་རྣམ་ཐར་ལས། ཉིན་པར་གྱི་ཐུན་གསུམ་གྱི་དང་པོ་གཉིས་ལ་བསྟན་བཅོས་རྩོམ། ཐུན་གཅིག་ལ་ཆོས་གསུང་། མཚན་མོའི་དུས་སུ་དུར་ཁྲོད་བསིལ་བའི་ཚལ་དུ་བྱོན་ནས་ནམ་ཕྱེད་ཀྱི་བར་དུ་ཐུགས་དམ་མཛད། ནམ་ཕྱེད་མན་ཆད་གཙུག་ལག་ཁང་དུ་བྱོན་ནས་བསྙེལ་བསོ་བ་དང་མནལ་མཛད་སྐད། དེ་ནས་སྔ་དྲོ་ཞིག་གི་ཚེ། བུད་མེད་ཤན་པ་མོའི་ཚུལ་བྱས་པ་ཞིག་གིས་བ་གླང་གི་ཤ་ཁྲག་འཛག་པ་ཞིག་ཁྱེར་ནས་དུར་ཁྲོད་དུ་བྱུང་བ་དང་། སློབ་དཔོན་གྱིས་ཡེ་ཤེས་མཁའ་འགྲོ་མ་ཡིན་པར་མ་རིག་པར། དེ་ནས་ཡར་མ་འོངས་བྱས་པས་ལོག་ནས་སོང་སྐད། དེ་ནས་ཅུང་ཟད་ཙམ་ཞིག་སོང་ཙམ་ན། སློབ་དཔོན་གྱི་ཐུགས་ལ་དེ་རང་མཁའ་འགྲོ་མ་ཡིན་སྲིད་སྙམ་ནས། དེའི་རྗེས་སུ་སོང་ནས་སྔར་རང་གི་སྒོ་ནང་ནས་བསྡམས་པ་ལྟར་མ་བྱེ་བར་འདུག་ཅིང་ཕྱོགས་ཀུན་ཏུ་བཙལ་ཡང་མ་རྙེད་དེར་འགྱོད་པ་སྐྱེས་ཏེ། ཞག་བདུན་དུ་ཟས་བཅད་ནས་གསོལ་བ་བཏབ་ཅིང་བཤགས་པ་བྱས་པས་སྔར་གྱི་བུད་མེད་དེ་བྱོན་ནས་བྱུང་བ་དང་བཟོད་པར་གསོལ་ཏེ་རྗེས་སུ་བཟུང་བར་ཞུས་པས། དེ་ན་རེ། ཁྱོད་སྔར་རྟོག་པ་མ་སྐྱེས་ན། ཚེ་
འདི་ཉིད་ལ་མཆོག་ཐོབ་པ་ཡིན། འོན་ཀྱང་བཤགས་པ་བྱས་པས་ད་བར་དོར་མཆོག་ཐོབ་པར་འགྱུར་བས། ད་ཁྱོད་ཀྱིས་སྤྱིར་ཡང་བསྟན་བཅོས་མང་དུ་རྩོམ། ཁྱད་པར་དུ་ཡང་དཀྱིལ་འཁོར་ཐམས་ཅད་ཀྱི་ཆོ་ག་ཡན་ལག་དང་བཅས་པ་དང་། དཔལ་ཁ་སྦྱོར་དང་། སངས་རྒྱས་ཐོད་པའི་རྒྱུད་ལ་འགྲེལ་བ་གྱིས་གསུངས་ནས་ལུང་བསྟན་ཏེ། སློབ་དཔོན་ཉིད་ཀྱི་མན་ངག་སྙེ་མ་ལས། མགོ་ནག་པོ་དེ་ཡི་ཕལ་ཆེར་བདག །བྱིན་གྱིས་བརླབས་པས་དེ་ཚིག་གིས། །ཤིན་ཏུ་གསལ་བར་དོན་སྨྲ་སྟེ། །དབུལ་པོ་ལ་ནི་མ་བཞིན་ནོ། །ཞེས་པ་དང་། གཞན་ཡང་རྡོ་རྗེ་བཙུན་མོ་ཡིས། །བསྐུལ་བའི་རྨི་ལམ་མཐོང་བ་ལས། །རིན་ཆེན་ཁ་སྦྱོར་ལྟ་བུ་ནི། །སེམས་ཅན་དོན་དུ་དབྱེ་བར་བྱ། །ཞེས་གསུངས་པ་དང་། སངས་རྒྱས་ཐོད་པའི་འགྲེལ་བ་ལས། རྡོ་རྗེ་བཙུན་མོས་བསྐུལ་བའི་ཕྱིར་ཞེས་གསུངས། །མཁའ་འགྲོ་མ་དེ་དུས་འཁོར་གྱི་ཡུམ་མམ། རྡོ་རྗེ་ཕག་མོ་ཡིན་པར་བཤད་དོ། །ཡང་ན་བླ་མ་ཞང་ལོ་ཙཱ་བ་གྲུབ་པ་བཟང་པོའི་བཞེད་པ་ནི་སློབ་དཔོན་འདི་ཡི་ཆེ་བའི་ཡོན་ཏན་ལ་གསུམ་སྟེ། སྦྱང་པ་ཡོན་ཏན་གྱི་ཆེ་བ་དང་། ལུང་བསྟན་
རྟོགས་པའི་ཆེ་བ་དང་། མཛད་པ་རྣམ་གྲོལ་གྱི་ཆེ་བའོ། །དང་པོ་ལ་གཉིས་ཏེ། བསྲུང་བྱ་བསླབ་པའི་ཆེ་བ་དང་། བཙལ་བྱ་ཐོས་པའི་ཆེ་བའོ། །དང་པོ་ལ་བཞི་ལས། དང་པོ་ནི་སེང་གེ་སྤྱོད་པའི་ཡུལ་དུ་སྤྲུལ་གྱིས་གདུགས་ཕུབ་པ་སྟེ། སེང་གེ་སྤྱོད་པའི་ཡུལ་ཞེས་པར་དེའི་རྒྱལ་པོས་ཆོམ་རྐུན་པ་ཁྲི་ཚོ་བཅུ་གཉིས་དོང་དུ་བཅུག་པའི་སྨྲེ་སྔགས་སློབ་དཔོན་གྱིས་གསན་ནས་དེ་རྣམས་བསླུ་བར་བརྩམས་པའི་ཚེ། ཡུལ་ཕྱོགས་དེ་འོད་ཟེར་གྱིས་ཁྱབ་ཅིང་སྤྲུལ་སེར་པོ་ཆེན་པོ་ཞིག་གིས་སློབ་དཔོན་གྱི་དབུ་ལ་གདུགས་ཕུབ་པ་ལྟར་བྱས་པས། རྒྱལ་པོ་སྐྲག་སྟེ་ཆོམ་རྐུན་པ་རྣམས་ཐར་བར་བྱས་སོ། །གཉིས་པ་ནི་གྲོང་ཁྱེར་བདེ་ལྡན་ཞེས་བྱ་བར་བདོག་པའི་དངོས་པོ་ཐམས་ཅད་བཏང་སྟེ་ཟད་པ་ན། ལྷུང་བཟེད་ནམ་མཁའ་ལ་བཟེད་པས་ཚོད་སྣ་དང་བཅས་པའི་བཟའ་བ་བྱུང་བས་སློང་མོ་པ་རྣམས་ཚིམས་པར་བྱས་སོ། །གསུམ་པ་ནི། ལྟེང་ཀ་ཅན་དུ་ཐུན་བཞིའི་ཡི་དམ་། ལ་བརྟན་པར་གནས་སོ། །བཞི་པ་ནི། སྡོམ་པ་གསུམ་ལ་ཉེས་པས་མ་གོས་པས་སྨོན་ལམ་ཇི་ལྟར་བཏབ་པ་ལྟར་འགྲུབ་པའོ། །གཉིས་པ་བཙལ་བྱ་ཐོས་པའི་ཆེ་བ་ལ་གསུམ་
ལས། དང་པོ་ནི། ཡུལ་ངེས་མེད་དུ་ཆོས་སྣ་ཚོགས་གསན་ནས་ཨོཾ་ཏནྟ་པུ་རིར་དུ་རུ་ཁའི་དམག་བྱུང་ནས། ཤར་ཕྱོགས་སུ་གཤེགས་པའི་ཚེ། དཔེ་ཆ་གླང་པོ་ཆེའི་ཁལ་སུམ་ཅུ་རྩ་གཉིས་བྱུང་སྐད། གཉིས་པ་ནི། སྒྲུབ་པ་ཤེས་རབ་ཀྱི་ཆེ་བ་སྟེ། ཐུགས་ལ་གཞུང་ཤོ་ལོ་ཀ་འབུམ་ཕྲག་བརྒྱད་བཞུགས་སྐད། གསུམ་པ་ནི། ཚལ་གྱི་ཉེ་འཁོར་དུ། ཡི་དམ་ལྷའི་ཞལ་གཟིགས་ཏེ་དངོས་སུ་ཆོས་གསན་སྐད་དོ། །གསུམ་པ་ལུང་དང་རྟོགས་པའི་ཆེ་བ་ལ་དྲུག་ལས། དང་པོ་མཁའ་སྤྱོད་བདེ་བའི་ལྷ་མོས། གཞུང་རྩོམས་ཤིག་ཅེས་ལུང་བསྟན་པ་དང་། གཉིས་པ་ནི་རྒྱལ་བའི་ཡུམ་བརྒྱད་སྟོང་པའི་འགྲེལ་བ་གནད་ཀྱི་ཟླ་འོད། གསུམ་པ་ནི། དུས་འཁོར་ལ་འཇུག་པ་དང་། རིམ་ལྔའི་འགྲེལ་བ་དང་། ཐུབ་པ་དགོངས་རྒྱན་དང་། དབུ་མའི་སྙེ་མ་ལ་སོགས་པ་བརྩམས་ཤིག་པར་ལུང་བསྟན་པ་དང་། །བཞི་པ་ནི། རྡོ་རྗེ་ཕྲེང་བའི་མཆོད་བརྗོད་བརྩམས་པ་ན། ལྷ་རྣམས་ཀྱིས་མེ་ཏོག་། གི་ཆར་ཕབ་པ་དང་། ལྔ་པ་ནི།་དཔལ་ཁ་སྦྱོར་གྱི་འགྲེལ་པ་མཛད་པའི་ཚེ། བདེ་མཆོག་དང་དཔལ་དུས་འཁོར་གྱིས་ཤིས་པ་བརྗོད་པ་དང་། དྲུག་པ་ནི། ཤེས་རབ་གསུམ་
ལ་གོམས་པས། ཐེག་པ་སྣ་ཚོགས་ཀྱི་ཆོས་གཅིག་ཆར་དུ་རྩོམ་པ་ལ་འཁྲུལ་པ་མི་མངའ་བའོ། །གསུམ་པ་མཛད་པ་རྣམ་གྲོལ་གྱི་ཆེ་བ་ལ་དགུ་ལས། དང་པོ་ནི་བསིལ་བའི་ཚལ་དུ་བུ་གཅིག་འཆི་བ་ལས་བསླང་བ་དང་། གཉིས་པ་ཡིད་འོང་དགེ་བའི་ལྡུམ་རར་ཆོམ་རྐུན་པ་བཅིང་བ་དང་། གསུམ་པ་རྩིས་ཀྱི་འབྲས་བུས་བྲམ་ཟེ་དབུལ་བ་སེལ་བའི་ཐབས་ནས་གཏེར་བཏོན་པ་དང་། བཞི་པ་སྔགས་ཀྱི་ནུས་པས་ཁྱིམ་བདག་ལ་སོགས་པའི་དུག་བསལ་བ་དང་། ལྔ་པ་བྱའི་འཁྲུལ་འཁོར་གྱིས་དམག་གི་དཔུང་བཟློག་པ་དང་། དྲུག་པ་ཡན་གར་ཞེས་པའི་གྲོང་ཁྱེར་འབུམ་ཚོ་གཉིས་ཡོད་པ་དེར། མེའི་གནོད་པ་ཞི་བར་བྱས་པ་དང་། བདུན་པ་ལྷའི་གནང་བ་ཐོབ་པས་གཞུང་སྣ་ཚོགས་ལ་འགྲེལ་པ་དང་། སྒྲུབ་ཐབས་དང་དཀྱིལ་འཁོར་གྱི་ཆོ་ག་དང་། སྦྱིན་སྲེག་ལ་སོགས་པ་མང་དུ་མཛད་པ་དང་། བརྒྱད་པ་ལུང་རིགས་ཀྱི་མཚོན་ཆས་རྒོལ་བ་ངན་པ་ཚར་བཅད་པ་དང་། །དགུ་པ་ཐོས་བསམ་སྒོམ་གསུམ་གྱིས་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་དོ། །ཡང་རྣལ་འབྱོར་གྱི་ཡི་གེ་རྙིང་པ་ཁ་ཅིག་ལས། སློབ་དཔོན་ཆེན་པོ་ཨ་བྱཱ་འདི། རྒྱ་
གར་ལྷོ་ཕྱོགས་ཀྱི་ཡུལ་ཨོཾ་ཀྲེ་ཞེས་བྱ་བ་ན། བྲམ་ཟེ་ཐམས་ཅད་རྒྱལ་པོའི་སློབ་དཔོན་རྒྱལ་རིགས་སུ་འཁྲུངས་པ་དྷརྨཱ་དི་ཀི་ཨ་ཏི་ཀི་ར་ནི་བྱ་བ་ལ། བུ་གཅིག་ཡོད་པ་དེས་ཕྱི་རོལ་པའི་སྒྲ་དང་ཚད་མ་ལ་སོགས་བསྟན་བཅོས་ཆེན་པོ་བཅོ་བརྒྱད་ཤེས་པ་ཞིག་ཡོད་དོ། །དེས་རང་གི་ཨ་མ་ལ་སོགས་པའི་སྐྱེད་མོས་ཚལ་དུ་སྒོ་ཐམས་ཅད་བསྡམས་ནས་ལྟ་རྟོག་མཛད་ཅིང་བཞུགས་པ་ལ། བུད་མེད་ལྷ་མོ་ལྟ་བུའི་མཛེས་མ་ཞིག་བྱུང་སྟེ། དེ་ལ་ཁྱོད་སུ་ཡིན་དྲིས་པས། ང་གདོལ་པ་མོ་ཡིན་ཟེར་རོ། །ཁྱོད་ཅི་ལ་འོངས་བྱས་པས། ཁྱོད་དང་ལྷན་ཅིག་རྩེ་བར་འདོད་ཟེར་རོ། །དེར་ཁོང་ན་རེ། ང་རིགས་བཟང་པོའི་མཐར་ཐུག་ཡིན་པས་གདོལ་པ་མོ་ཁྱོད་དང་ལྷན་ཅིག་རྩེ་ག་ན་རུང་། ཁྱོད་སོང་མ་སྡོད་ཅེས་སྨྲས་སོ། །གཞན་གྱིས་མཐོང་ན་སྐུར་པ་འདེབས་སུ་འོང་བྱས་པས། འོ་ན་ང་ཕྱིན་པས་ཆོག །སྐྱེ་བ་སྔ་མ་ལ་ཁྱོད་ཀྱིས་ང་ལ་བསྙེན་བཀུར་བྱས་ཡོད་པས། དེས་ན་ང་འོང་བ་ཡིན། ད་ཁྱོད་ང་ཡི་ཁ་ལ་ཉོན་ལ། རང་གི་ཡུལ་དུ་མ་སྡོད་པར་ནང་པ་སངས་རྒྱས་ཀྱི་བསྟན་ལ་དབང་བསྐུར་ཞུས་ལ་མ་ག་ཏར་སོང་གསུངས་ནས། བུད་མེད་དེ་མི་སྣང་བར་གྱུར་ཏོ། །དེར་
སློབ་དཔོན་ལ་རྟོག་པ་བྱུང་སྟེ། མི་ཡིན་ནམ། ལྷ་ཡིན་ནམ་སྙམ་པ་བྱུང་ནས་དེ་ལམ་གང་ལ་སོང་བལྟས་པས་སྒོ་ཐམས་ཅད་སྔར་བསྡམས་པ་བཞིན་འདུག་གོ ། དེ་ནས་མི་མ་ཡིན་པ་ཞིག་ཡིན་པ་འདུག་སྙམ་པའི་རྟོག་པ་བྱུང་སྟེ། དེའི་དུས་ན་རང་གི་ཡུལ་ན་གྲུབ་པ་ཐོབ་པ་དང་འདྲ་བའི་སྔགས་པ་མང་པོ་ཡོད་པས་གཅིག་གི་དྲུང་དུ་ཕྱིན་ནས། །དེའི་གོང་མ་ལ་སྨྲས་ནས་ང་ལ་དེ་ལྟ་བུ་ཞིག་བྱུང་། དེ་ཅི་ཡིན་དྲིས་པས། དེ་ན་རེ། ཨ་ཙ་མ། དེ་ནི་རྡོ་རྗེ་རྣལ་འབྱོར་མ་ཡིན། ཁྱེད་ཀྱིས་སྐྱེ་བ་སྔ་མ་ལ་མཆོད་པ་ལ་སོགས་པ་བྱས་པས། ཁྱེད་ཆོས་ལ་བསྐུལ་བ་ལ་བྱོན་པ་ཡིན། ཁྱེད་ཀྱིས་ཁོང་ལ་མ་ཉན་པ་དེ་མ་ལེགས། ཁོང་གི་བཀའ་ལ་ཉན་ན། ཏིང་ངེ་འཛིན་བཟང་པོ་སྐྱེས་ཏེ་འོང་། ཁྱེད་ལ་གསང་སྔགས་ཀྱི་རྒྱུས་མེད་པས་ལེན་པ་ཡིན། ད་ཁོང་གིས་སྨྲས་པ་བཞིན་གྱིས་ཟེར་རོ། །དེ་ནས་སློབ་དཔོན་གྲུབ་པ་ཐོབ་པ་ཞིག་གི་རྩ་རུ་དབང་བསྐུར་ཞུས་པས། ལྷན་ཅིག་སྐྱེས་པའི་ཏིང་ངེ་འཛིན་མངོན་སུམ་དུ་བྱུང་ནས་ཆོས་དང་སངས་རྒྱས་ཀྱི་བསྟན་པ་དང་། གསང་སྔགས་ལ་མཐར་ཐུག་པའི་དད་པ་སྐྱེས་སོ། །དེ་ནས་རང་གི་ལོངས་སྤྱོད་ཐམས་ཅད་
སྤངས་ཏེ། བྲི་ཀ་མ་ཤཱི་ལར་གཙུག་ལག་ཁང་དུ་བྱོན་ནས། དེར་དགེ་ཚུལ་མཛད་ནས་དེའི་དུས་སུ། དེ་ན་གྲུབ་ཐོབ་མང་པོ་ཡོད་པ་ལ། གསང་སྔགས་ལ་སོགས་པའི་ཆོས་མང་པོ་ཉན་པས། ཡང་བཅོམ་ལྡན་མ་དང་མཇལ་ཏེ་ཤཱི་ཀ་མ་པུ་རིའི་གནས་གཞིའི་གློ་འབུར་དུ་བཞུགས་ནས་སྒོམ་བྱས་པས། རྒན་མོ་ཞིག་བྱུང་བ་ལ། སློབ་དཔོན་གྱིས། ང་བཙུན་པའི་དྲུང་དུ་ཡོང་ག་ལ་རུང་བྱས་པས། དེ་གཟུགས་འགྱུར་ནས་ཤར་མོ་གཅིག་ཏུ་སོང་ངོ་། །བུ་མོ་ཁྱོད་ཅི་ལ་འོང་བྱས་པས། ཁྱོད་འདོད་ནས་འོང་བ་ཡིན། རྟག་ཏུ་ཁྱོད་ཀྱི་རྩར་འོང་ཟེར་རོ། །ང་རབ་ཏུ་བྱུང་བས་རང་གི་བྱ་བ་ཐམས་ཅད་ཀྱང་བོར་ན། ཁྱོད་ཀྱིས་ཅི་བྱེད་སོང་གསུངས་སོ། །དེ་ནས་བུ་མོ་ན་རེ། ཁྱོད་མི་འདོད་ན་ཕྱིན་པས་ཆོག ། ཁྱོད་འདིར་ཡུན་རིང་མ་སྡོད་པར་མ་ག་ཏར་སོང་ཟེར་ནས་བུད་མེད་དེ་མི་སྣང་བར་གྱུར་ཏོ། །དེ་ལ་ཡང་རྟོག་པ་སྐྱེས་ནས་སློབ་དཔོན་ཞིག་ལ་དྲིས་པས་ཁོང་ན་རེ། དེ་ཁྱོད་ཀྱི་ཡི་དམ་ཡིན། དེ་ཡི་བཀའ་བཅག་པ་མ་ལེགས་གསུངས་སོ། །དེ་ནས་མ་ག་ཏར་བྱོན་ནས་དེ་ཝི་ཀྲ་མ་ལི་ཡི་གཙུག་ལག་ཁང་དུ་བཞུགས་ཏེ། དེའི་དུས་སུ་དེ་ཝི་ཀྲ་མ་ལར་དགེ་
འདུན་པཎྜི་ཏ་མང་པོ་བཞུགས་པས། དེའི་དྲུང་དུ་ཚད་མ་དང་འདུལ་བ་དང་། ལུང་སྡེ་བཞི་དང་། སྡེ་སྣོད་གསུམ་དང་། དབུ་མ་དང་ཕ་རོལ་ཕྱིན་པ་མ་ལུས་པ་དག་དང་། གསང་སྔགས་ལ་སོགས་པ་མང་པོ་མཉན་ནས། དེར་དགེ་འདུན་གྱི་ཆོས་དཔོན་མཛད། ཚད་མ་ལ་སོགས་བསྟན་བཅོས་ཀྱི་བཤད་པ་མང་པོ་མཛད། དེ་ལྟར་མཛད་ཀྱང་གསང་སྔགས་རང་གིས་མི་ཤེས་པ་དང་མཐར་ཐུག་གི་གདམས་ངག་དང་གྲུབ་པའི་མཐའ་རྣམས་ཤེས་པར་བྱ་བའི་དོན་དུ། གྲོང་ཁྱེར་དཔེའུ་རིར་སློབ་དཔོན་རིན་ཆེན་འབྱུང་གནས་སྦས་པའི་དྲུང་དུ་བྱོན་ནས་བསོད་སྙོམས་མཛད་ཅིང་། སིནྡྷ་རའི་དུར་ཁྲོད་དུ་བཞུགས་ས་མཛད་ནས། རྒྱུད་རང་གིས་མི་ཤེས་པ་ཐམས་ཅད་དང་། མཐར་ཐུག་གི་གདམས་ངག་དཔག་ཏུ་མེད་པ་མཉན་ཏེ། དེ་ནས་དུར་ཁྲོད་དེའི་དགོན་པ་དེ་ལ་སྒོ་གསུམ་ཡོད་པས་དེ་གསུམ་ཀ་བསྡམས་ནས་སྒོམ་མཛད་ཅིང་བཞུགས་པའི་དུས་སུ་ཚེས་བརྒྱད་ལ་མུན་པའི་ནང་དུ་ཐུགས་དམ་སྒོམ་ཞིང་བཞུགས་པ་ལ། སློབ་དཔོན་རིན་ཆེན་འབྱུང་གནས་སྦས་པའི་གཡོག་བྱེད་པའི་དགེ་བསྙེན་མོ་ཞིག་ཆང་ལ་སོགས་པའི་ཚོགས་འཁོར་གྱི་རྫས་
ཁྱེར་ནས་སློབ་དཔོན་ཨ་བྷུའི་མདུན་དུ་བྱུང་ནས། དེ་ལ་སློབ་དཔོན་གྱིས་ཁྱོད་ག་ནས་འོང་བྱས་པས། བུ་མོ་ན་རེ། ཁྱེད་རང་གི་སློབ་དཔོན་གྱིས་ང་བཏང་བ་ཡིན། ད་ཁྱེད་དང་ལྷན་ཅིག་ཚོགས་གྱིས་གསུངས་ནས་འོང་བ་ཡིན་ཟེར་རོ། །དེ་ནས་བུ་མོས་སྣོད་ཆུང་ངུ་ཞིག་ནས་ཚོགས་འཁོར་གྱི་རྫས་བཏོན་ནས། ལྷའི་ཞལ་ཟས་ལྟ་བུ་དཔག་ཏུ་མེད་པས་ཁང་པ་གང་བར་བྱས་སོ། །བུ་མོ་དེ་ཡང་གཟུགས་འགྱུར་ནས། རྡོ་རྗེ་ཕག་མོ་ལྟ་བུར་གྱུར་ཏེ་དེའི་འོད་ཟེར་གྱིས་དགོན་པའི་མུན་པ་ཐམས་ཅད་བསལ་བར་གྱུར་ཏོ། །དེ་ནས་ཁོང་གིས་བུ་མོ་ལ་སྨྲས་པ། ང་དགེ་སློང་ཡིན་པས་ཚོགས་བྱེད་ག་ལ་རུང་། ཁྱོད་ཀྱིས་སློབ་དཔོན་གྱིས་ཚོགས་དཔོན་བྱེད་པ་གང་དུ་མཐོང་། ངས་ཚོགས་འཁོར་མི་བྱེད་གསུངས་བུ་མོ་ན་རེ། དེ་སྔ་མ་བྱས་ཀྱང་ད་བྱེད་པ་ལ་འགལ་བ་མེད་པས་ཚོགས་མཛོད་ཟེར་རོ། །དེ་ནས་སློབ་དཔོན་ན་རེ། བཙུན་པས་ཚོགས་བྱེད་པ་མི་ལེགས་གསུངས་ནས་མ་གནང་ངོ་། །དེ་ནས་བུ་མོ་ན་རེ། ཁྱོད་ཀྱིས་ང་ལ་སྐྱེ་བ་མང་པོར་བསྒོམས་པ་དང་། །མཆོད་པ་ཕུལ་བས་སྐྱེ་བ་འདི་ལ་ཁྱོད་ཀྱི་མདུན་དུ་ང་ལན་གསུམ་འཕྲོད་པ་ལ་འོང་བ་ཡིན།
ཁྱོད་རྒྱུད་ཉིས་བརྒྱ་ལ་སློབ་གཉེར་བྱས་ནས་དམ་ཚིག་རྫས་ལ་ཉན་ཐོས་ཀྱི་རྟོག་པ་བྱེད་ག་ལ་རུང་། ཟེར་ཀྱང་དེ་ལ་སྤྲོ་བ་མེད་པར་ཞལ་རོག་བཞུགས་སོ། །དེ་ནས་བུ་མོ་ན་རེ། ཁྱོད་ཀྱིས་ང་ཡི་ཁ་ལ་ཉན་ན་ལྷན་ཅིག་སྐྱེས་པའི་ཏིང་ངེ་འཛིན་མངོན་སུམ་དུ་ཁྱོད་ལ་འོང་བ་ཡིན་ཀྱང་། ཁྱོད་མི་འདོད་ན་ཅི་བྱ་ཞེས་སྨྲས་ནས་མི་སྣང་བར་གྱུར་ཏོ། །དེ་ནས་སློབ་དཔོན་ལ་རྟོག་པ་སྐྱེས་ནས། སློབ་དཔོན་གྱི་གཡོག་མོ་ཡིན་ནམ་སྙམ་ནས། སྒོ་གསུམ་ལ་བལྟས་པས་མ་ཕྱེ་བར་འདུག་གོ །དེ་ནས་སློབ་དཔོན་གྱི་རྩར་སོང་ཉི་མ་ཤར་ཙམ་ལ་ཕྱིན་ནས། སློབ་དཔོན་བུ་མོ་ཞིག་ལ་དམ་ཚིག་གི་རྫས་བསྐུར་ནས་བཏང་སམ་བྱས་པས། སློབ་དཔོན་གྱི་ཞལ་ནས། དྲོ་ཐོན་ནས་ང་ཡི་རྩ་རུ་འོང་ས་མེད་པས་ཁྱོད་ཀྱི་རྩར་ག་ནས་བཏང་། ཁྱོད་ཀྱིས་མདང་ཅི་མཐོང་ཟེར་བས། གོང་གི་ལོ་རྒྱུས་རྣམས་བཤད་དོ། །དེ་ནས་སློབ་དཔོན་གྱི་ཞལ་ནས། ཁྱོད་དེ་ལ་མཆོད་པ་དང་བསྒོམས་པ་བྱས་པའི་དོན་ཆེན་ཞལ་མཇལ་ལན་གསུམ་དུ་མངོན་སུམ་བྱོན་ཀྱང་བཀའ་བཅག་པ་ལས་ཚབ་ཆེ། ཚེ་སྔ་མ་ལས་ཅི་བྱས་པ་ཡིན་ནམ་གསུངས་པས། སློབ་དཔོན་ཨ་བྷ་རང་གི་
དགོན་པར་ཞག་དྲུག་རྟོག་པས་ཡི་མུག་ནས་འགྱོད་ཀྱིན་བཞུགས། དེ་ནས་ཞག་བདུན་པའི་རྨི་ལམ་དུ་ལུང་བསྟན་ནས། ལྟོགས་ཉལ་མ་བྱེད་ཁྱེད་མཁས་པ་ཡིན་པས། བསྟན་་བཅོས་རྩོམ་དང་སྔ་མའི་ལས་ངན་པ་ཟད་པར་འོང་གསུངས་པའི་ལུང་བསྟན་ཐོབ། དེ་ནས་སློབ་དཔོན་ན་རེ། ང་ལ་མཐར་ཐུག་པའི་ཏིང་འཛིན་མེད་པས་ང་ཡི་བསྟན་བཅོས་ལ་གཞན་དད་པ་སུ་ཡོང་གསུངས་པས། བཅོམ་ལྡན་འདས་མའི་ཞལ་ནས། ཁྱོད་ཀྱིས་བསྟན་བཅོས་རྩོམས་དང་། ངས་བྱིན་གྱིས་བརླབས་པས་བར་ཆད་མི་འོང་གི་གསུངས་སོ། །དེ་ནས་རྒྱལ་པོའི་བཙུན་མོ་ཞིག་གིས་སློབ་དཔོན་ཨ་བྷའི་སློབ་མ་བྱས་ནས། སོ་ཕག་གི་གློག་ཅིག་ཕུལ་ནས་དེར་བཞུགས་པས་སློབ་དཔོན་གྱི་མཚན་ཡང་སོ་ཕག་གི་གྲོང་པ་ཟེར་རོ། །དེར་སྐྱེད་མོས་ཚལ་ཡིད་དུ་འོང་བ་དང་། གློ་འབུར་མང་པོ་དང་ལྡན་པའི་དགོན་པ་ཞིག་བརྩེགས་ནས། དེར་སྒོམ་མཛད་ཅིང་བཞུགས་སོ། །དེར་ཏིང་འཛིན་རེ་རེ་ལ་ཟླ་བ་དྲུག་དྲུག་བཞུགས་པར་ནུས་སོ། །དེ་ལྟར་ཡོན་ཏན་དང་ལྡན་པའི་རྡོ་རྗེ་འཆང་ལྟ་བུ་ཡིན་ཏེ། །ཁོང་གི་མཚན་ཙམ་ཡང་བརྗོད་པར་མི་ནུས་པས། དགོན་པའི་མིང་ནས་བརྗོད་
པ། ཨ་ཌ་པུ་རིའི་པཎྜི་ཏ་པ་ཞེས་པ་རྒྱ་གར་པ་ཐམས་ཅད་དེ་སྐད་འབོད་དོ། །མཁན་པོ་རིན་ཆེན་འབྱུང་གནས་སྦས་པ་ཡིན་པས། སློབ་དཔོན་གྱི་མཚན་འཇིགས་མེད་འབྱུང་གནས་སྦས་པའོ། །དེ་ནས་སློབ་དཔོན་གྱི་གྲགས་པ་ཆེན་པོ་ཕྱོགས་ཐམས་ཅད་དུ་ཐོས་པས་ཡུལ་གཞན་གྱིས་བསྔགས་པ་དང་། རབ་ཏུ་བྱུང་བ་དང་། པཎྜི་ཏ་མང་པོ་བྱུང་ནས། ཕ་རོལ་ཏུ་ཕྱིན་པའི་གྲུབ་མཐའ་ལ། འཕགས་པ་རྣམ་གྲོལ་སྡེ་དང་། སེང་གེ་བཟང་པོ་ལ་སོགས་པའི་གྲུབ་མཐའ་དུ་མ་དང་མཐུན་པ་མཐོང་། ཕ་རོལ་ཏུ་ཕྱིན་པ་ཤེས་པའི་པཎྜི་ཏ་རྣམས་ཀྱིས་ཕ་རོལ་ཏུ་ཕྱིན་པའི་ལམ་གྱི་གདམས་ངག་མ་ནོར་བར་ཞུ་བྱས་པས་ཐུབ་པ་དགོངས་རྒྱན་དང་། འཕགས་པ་བརྒྱད་སྟོང་པའི་འགྲེལ་པ་གནད་ཀྱི་ཟླ་འོད་བརྩམས་སོ། །མངོན་པའི་མཁན་པོ་རྣམས་ཀྱིས་ཞུ་བ་ཕུལ་བས། མངོན་པའི་བསྟན་བཅོས་སྣོད་དང་སེམས་ཅན་གྱི་འཇིག་རྟེན་གྱིས་བསྡུས་པ་ཞེས་བྱ་བ་བརྩམས་སོ། འདུལ་བ་པ་རྣམས་ཀྱིས་ཞུ་བ་ཕུལ་བས། དགེ་སློང་གི་རིག་བྱེད་ཀྱི་འགྲེལ་བ་དང་། འདུལ་བ་སྣང་བ་ཞེས་བྱ་བ་བརྩམས་སོ། །དབུ་མ་པ་རྣམས་ཀྱིས་ཞུ་བ་ཕུལ་བས། དབུ་
མའི་སྙེ་མ་བརྩམས་སོ། །ཡོ་གའི་མཁན་པོ་རྣམས་ཀྱིས་ཞུ་བ་ཕུལ་བས། ཡོ་གའི་རྒྱུད་འགྲེལ་བ་མེད་པ་རྣམས་ལ་འགྲེལ་པ་བརྩམས་སོ། །སྔགས་པ་རྣམས་ཀྱིས་དཀྱིལ་འཁོར་ཐམས་ཅད་ཀྱི་ཆོ་ག་བསྡུ་བའི་བསྟན་བཅོས་ཀྱི་ཞུ་བ་ཕུལ་བས། རྡོ་རྗེ་ཕྲེང་བ་དང་རྣལ་འབྱོར་རྫོགས་པའི་ཕྲེང་བ་དང་། འོད་ཀྱི་སྙེ་མ་གསུམ་བརྩམས་སོ། །མ་རྒྱུད་པ་རྣམས་ཀྱིས་ཞུ་བ་ཕུལ་བས་མངོན་པར་རྟོགས་པ་གྲགས་པ་ཅན་དང་། རྒྱུད་མང་པོའི་རྒོལ་ལན་དང་། མན་ངག་ཐམས་ཅད་གསལ་བར་བྱེད་པའི་དོན་དུ་མན་ངག་གི་སྙེ་མ་དང་། སངས་རྒྱས་ཐོད་པའི་འགྲེལ་པ་དང་། ཨ་བྱཱའི་ལམ་རིམ་ལ་སོགས་པ་བརྩམས་སོ། །འཕགས་སྐོར་བ་རྣམས་ཀྱིས་ཞུ་བ་ཕུལ་བས། མདོར་བྱས་ཀྱི་འགྲེལ་པ་དང་། རིམ་ལྔའི་འགྲེལ་པ་ལ་སོགས་པ་བརྩམས་སོ། །དུས་འཁོར་བ་རྣམས་ཀྱིས་ཞུ་བ་ཕུལ་བས། རྩིས་ལ་འཇུག་པ་དང་། རྒྱུད་རྩ་འགྲེལ་གྱི་རྒོལ་ལན་དང་། གདམས་ངག་གསལ་བར་བྱ་བའི་དོན་དུ། དུས་འཁོར་གྱི་གསལ་བྱེད་བརྩམས་སོ། །ལོ་ཧི་པ་ལ་སྙན་བརྒྱུད་གདམས་ངག་མངོན་པར་རྟོགས་པ་དང་། ལྷན་སྐྱེས་དང་རྡོ་རྗེ་སེམས་དཔའ་སེར་པོ་ཡེ་ཤེས་
མཁའ་འགྲོ་མ་ཡི་སྒྲུབ་པ་དང་། སྒྲུབ་ཐབས་གྲགས་པ་ཅན་བཞི་དང་འཇམ་དཔལ་ལ་སོགས་པའི་སྒྲུབ་ཐབས་ཆེ་ཆུང་ཡང་བརྩམས་ཤིང་། དེར་ཁོང་གི་པོ་ཏི་ཆེ་ཆུང་འགྲེལ་པ་སུམ་ཅུ་རྩ་གསུམ་བརྩམས་སོ། །དེ་ལྟ་བུའི་ཡོན་ཏན་དཔག་ཏུ་མེད་པ་དང་ལྡན་པའི་མཁས་གྲུབ་ཆེན་པོ་སློབ་དཔོན་ཨ་བྱཱ་ཀ་ར་གུསྟ་ཞེས་བྱ་བ་དེས་མཛད་དོ། །གསུམ་པ་གང་ཟག་གང་གི་དོན་དུ་མཛད་པ་ནི་སྤྱིར་གསང་སྔགས་ལ་ཞུགས་པ་རྣམས་དང་། ཁྱད་པར་དུ་རྡོ་རྗེ་ཐེག་པ་ལ་བརྟེན་ནས་རང་གཞན་གྱི་དོན་རྒྱ་ཆེར་སྒྲུབ་པར་འདོད་པའི་རྡོ་རྗེ་སློབ་དཔོན་རྣམས་ཀྱི་ཆེད་དུ་མཛད་དོ། །བཞི་པ་གཞུང་གི་ཚད་དུ་ནི། བརྗོད་བྱའི་ཚད་ནི་རྡོ་རྗེ་སློབ་དཔོན་ལ་ཉེ་བར་མཁོ་བའི་ཆོ་ག་ལྔ་བཅུ་འཁོར་དང་བཅས་པ་དང་། རྗོད་བྱེད་ཀྱི་གཞུང་གི་ཚད་དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ལ་ཤོ་ལོ་ཀ་གཉིས་སྟོང་བདུན་བརྒྱ། སྒྲུབ་ཐབས་རྣལ་འབྱོར་རྫོགས་ཕྲེང་ལ་སྟོང་དང་སུམ་བརྒྱ། སྦྱིན་སྲེག་འོད་ཀྱི་སྙེ་མ་ལ་ཤོ་ལོ་ཀ་ཉིས་བརྒྱ་བདུན་ཅུ་རྩ་ལྔ་ཡོད་ཅིང་། འདི་གསུམ་ལ་ཕྲེང་སྐོར་གསུམ་ཞེས་གྲགས་སོ། །ལྔ་པ་དགོས་པ་ནི། གནས་སྐབས་སུ་དབང་བསྐུར་བས་རྒྱུད་སྣོད་རུང་བྱས་
ཏེ། ལམ་སྒོམ་པའི་སྐལ་པ་དང་ལྡན་པར་བྱེད་ལ། སྐུ་གཟུགས་ལ་སོགས་པ་རབ་གནས་བྱས་པའི་རྟེན་བསོད་ནམས་ཀྱི་ཞིང་ཁྱད་པར་དུ་བྱས་པས་མཆོད་པར་འོས་ཤིང་བྱིན་རླབས་འབྱུང་བར་བྱེད་ལ། མཐར་རིམ་གྱིས་ཞི་སོགས་ཀྱི་ལས་དང་། གྲུབ་ཆེན་བརྒྱད་ལ་སོགས་པའི་ཐུན་མོང་བ་དང་། ཚེ་འདི་དང་འཆི་ཀ་དང་བར་དོ་ལ་སོགས་པར་མཆོག་སྒྲུབ་པར་བྱེད་པའི་དགོས་པ་ཡོད་དོ། །དེ་ལྟར་འདི་ཡི་རྒྱ་གཞུང་ཨ་བྷུས་མཛད་པ་ལ་དངོས་བསྟན་དཀྱིལ་འཁོར་ཉི་ཤུ་རྩ་བརྒྱད་ལས་མེད་དོ། །དེའི་དབང་ཐོབ་ན། དཀྱིལ་འཁོར་ཞེ་གཉིས་དང་། གཙོ་བོ་འཕོ་བའི་དབང་དུ་བྱས་ནས། དཀྱིལ་འཁོར་ཞེ་ལྔ་དང་། ལྔ་བཅུ་རྩ་ལྔ་དང་། ལྔ་སྟོང་བརྒྱད་བརྒྱ་བཅུ་བདུན་དུ་ཡང་འགྱུར་རོ། །དེས་ན་འདིར་དངོས་སུ་གསུངས་པའི་རིགས་མཐུན་དཀྱིལ་འཁོར་ཉི་ཤུ་རྩ་བརྒྱད་པོ་རྣམས་སུ་དབང་ཐོབ་ཅིང་། དེ་དག་གི་ཆོ་ག་རྣམས་ཤེས་ན། དཀྱིལ་འཁོར་ལྔ་སྟོང་བརྒྱད་བརྒྱ་བཅུ་བདུན་པོ་རྣམས་ཀྱི་དབང་བསྐུར་བའི་ཆོ་ག་དང་། ལམ་བསྒོམ་པ་ལ་སོགས་པ་རྣམས་ལ་དབང་བ་ཡིན་ནོ། །ཞེས་གསུངས་སོ། །དེས་ན་དབང་འདི་ཐོབ་ནས། དོན་ལ་གསར་
མའི་ལུགས་ཀྱི་རྒྱུད་སྡེ་མཐའ་དག་གི་དབང་ཐོབ་པ་ཡིན་པས་ཤིན་ཏུ་ཕན་ཡོན་ཆེ་ལ། འདི་བསྐུར་བའི་ཕྱག་ལན་གཉིས་བྱུང་སྟེ། པཎ་ཆེན་ཤཱཀྱ་ཤྲཱི་ཕེབས་ནས་རྒྱུད་སྡེ་སོ་སོར་མ་ཕྱེ་བར་རྒྱ་གཞུང་ཉིད་ལྟར་ལན་གཅིག་བསྐུར། དེ་ལ་བོད་ཀྱི་དགེ་བཤེས་རྣམས་ཅུང་ཞིག་མ་མགུ་ནས་འདི་རྣམས་རྒྱུད་སྡེ་སོ་སོར་ཕྱེ་ནས་བསྐུར་ན་རུང་ངམ་ཞུས་པས་དེ་ཤིན་ཏུ་ལེགས་པར་གསུངས། སླར་ཡང་དེ་ལྟར་བསྐྱར་ནས་ལན་གཅིག་ཞུས། དེ་ལ་སྔ་ཕྱི་གཉིས་ཀྱི་ཕྱག་ལེན་རྒྱུན་གཉིས་དར། སྔ་མ་རྒྱུད་སྡེ་སོ་སོར་མ་ཕྱེས་པ་དཀྱིལ་འཁོར་ཉི་ཤུ་རྩ་བརྒྱད་པ། དེ་ལ་རྒྱུད་སྡེ་བཞི་བླ་མེད་ལྟར་ཉམས་སུ་ལེན་ཞིང་བླ་མེད་ལྟར་བསྐུར་བ་སྟེ། དེང་སང་ཁ་ཅིག་ལ་དར་བ་འདུག་ཀྱང་། བོད་ཀྱི་མཁས་པ་རྣམས་ཀྱིས། རྒྱ་གཞུང་ནས་དེ་ལྟར་གསུངས་པ་ནི། སློབ་དཔོན་བསྟེན་དགོས་པའི་གབ་རྐུང་ཡིན་ཏེ། དེ་ལྟར་བྱེད་པ་ནི་ཕྱག་ལེན་རྣམ་པར་མ་དག་པ་ཞེས་བཀག་པ་མཛད་པས། འདི་ནི་དེ་ཡི་ལུགས་མ་ཡིན་ཏེ། རྡོར་ཕྲེང་རྒྱ་གཞུང་གི་འགྲེལ་བ་དང་། རྒྱ་གར་གྱི་པཎྜི་ཏ་དར་པཎ་ཨ་ཙརླས་མཛད་པའི་ཀྲི་ཡ་པ་མུཉྩའི་རྒྱ་གཞུང་གིས་ཁ་སབ་སྟེ། ཕྱག་ལེན་ཞིབ་
ཅིང་རྒྱས་པ་འདི་ནི། ས་བཟང་འཕགས་པ་གཞོན་ནུ་བློ་གྲོས་དེ་ཉིད། དཀའ་བ་ཆེན་པོ་སྤྱད་དེ་བལ་པོར་བྱོན་ནས། ཡུན་རིང་བཞུགས་ནས། པཎྜི་ཏ་མ་ཧཱ་བྷོ་དྷི་མཉེས་པར་བྱས་ནས་ཕྱག་ལེན་ཞིབ་པར་བསླབ་པའི་ལུགས་འདི་ཡིན་པས། ཕྱག་ལན་འདི་ལ་འཁྲུལ་པ་མེད་པའོ། །ལ་ལ་དག་གི་དགེ་ལེགས་བྱེད་པའི་དཀྱིལ་འཁོར་གསུམ་པོ། །རྡོར་ཕྲེང་རྒྱ་གཞུང་ནས་མ་གསུངས་པས་མི་འཐད་ཟེར་ཡང་། པཎྜི་ཏ་དར་པན་ཨ་ཙརླའི་ཕྱག་ལེན་ཡིན་པས་རྡོར་ཕྲེང་འདི་ཡི་བཀའ་བབས་ས་བཟང་འཕགས་པ་དང་། ངོར་པ་རྡོ་རྗེ་འཆང་སོགས། བོད་ཀྱི་མཁས་པ་ཆེན་པོ་རྣམས་ཀྱིས་ངེས་པར་སྦྱར་བས། དཀྱིལ་འཁོར་བཞི་བཅུ་ཞེ་ལྔ་འདི་མཛད་པ་ཡིན། སྤྱིར་རྡོར་ཕྲེང་འདི་རྒྱ་བོད་དུ་ཉི་ཟླ་ལྟར་གྲགས་ན་། ཡང་། རྡོར་ཕྲེང་འདི་ལ་བཀའ་བབས་ཤིང་མངའ་བརྙེས་པ་ནི། ས་བཟང་འཕགས་པས་ཕྱག་ལེན་ཞིབ་པར་ཞུས་པ་དང་། ཨོ་རྒྱན་ཆེན་པོའི་ལུང་བསྟན་ལས། ཀུན་དགའི་མིང་ཅན་གཙང་གི་ཕྱོགས་སུ་འབྱུང་། །གསང་སྔགས་འགྱེལ་བ་རྨང་ནས་སློང་བར་བྱེད། །ཅེས་ལུང་བསྟན་པའི་རྡོ་རྗེ་འཆང་ཀུན་དགའ་བཟང་པོས་རྡོ་རྗེ་ཕྲེང་བའི་དབང་ལན་
གྲངས་དྲུག་ཅུ་ཐམ་པ་མཛད། བོད་འདིར་སྔགས་ཀྱི་བསྟན་པ་གསལ་བར་བྱེད་པ་ཀུན་མཁྱེན་བུ་རོང་གཉིས་ཞེས་ཉི་ཟླ་ལྟར་གྲགས་པས། རྡོར་ཕྲེང་གི་བསྟན་པ་དར་བར་མཛད། ཁྱད་པར་ཞྭ་དམར་ཅོད་པན་འཛིན་པ་བཞི་པ་ཆོས་ཀྱི་གྲགས་པ་རྡོར་ཕྲེང་སོགས་སྔགས་ལ་མཁས་པའི་ཚུལ་མཛད་དོ། །བྱང་ཡང་པ་ཅན་དུ་དཀྱིལ་འཁོར་བཅོ་བརྒྱད་ཀྱི་སྒྲུབ་མཆོད་བཙུགས། ཁོང་གིས་མཛད་པའི་དཀྱིལ་ཆོག་འགའ་ཞིག་རེ་དོལ་ཚལ་མིན་སོགས་ཇོ་ལྡན་གྱི་དགོན་རྣམས་སུ་ཡང་འདོན་དར། དེ་ཡང་ཅང་ཤེས་ཉི་མའི་སྙིང་པོའི་མདོ་ལས། བྱང་ཕྱོགས་ཁ་བ་ཅན་གྱི་རྒྱལ་ཁམས་སུ། །མི་ཡི་འདྲེན་པ་རྒྱལ་བ་ཆོས་ཀྱི་རྗེ། །རིན་ཆེན་དཔལ་ཞེས་བྱ་བ་འབྱུང་འགྱུར་ཏེ། །དགེ་འདུན་བྱེ་བ་ཕྲག་ནི་ས་ཡ་འབྱུང་། །ཞེས་གསུངས་པས། །ཡེ་ཤེས་ཡོངས་རྒྱས་མདོ་ལས་ཀྱང་། །བྱང་ཕྱོགས་ཁ་བ་ཅན་གྱི་རི་རྒྱུད་དུ། །།རིན་ཆེན་དཔལ་ཞེས་བྱ་བ་འབྱུང་འགྱུར་ཏེ། །མི་མཆོག་དེ་ནི་འཇིག་རྟེན་ཁམས་སུ་གྲགས། །ང་ཡི་བསྟན་ལ་བྱ་བ་བྱེད་པ་འབྱུང་། །དགེ་འདུན་ས་ཡ་ཕྲག་ནི་བརྒྱད་ཅུ་འབྱུང་། །འགྲོ་ལ་ཕན་ཕྱིར་སངས་རྒྱས་ཐོབ་པར་འགྱུར། །རྒྱས་
འབྲིང་གསུམ་དང་ས་ལུ་ལྗངས་པའི་མདོ། །མདོ་སྡེ་པད་དཀར་ཡེ་ཤེས་ཡོངས་རྒྱས་དང་། །དངོས་གྲུབ་བསྟན་གཟིགས་ལ་སོགས་རྒྱུད་སྡེ་དང་། །མདོ་རྒྱུ་ད་ཉི་ཤུའི་ནང་དུ་གསལ་བར་བསྟན་པ་ལྟར། །སྐྱོབ་པ་འཇིག་རྟེན་གསུམ་མགོན་མཚན། །རིན་ཆེན་དཔལ་ཞེས་བྱ་བ་ནས་བཟུང་སྟེ། །འབྲི་གུང་ཞབས་དྲུང་ན་རིམ་རྣམས། །སྤྱིར་གསང་སྔགས་བསྟན་པའི་བདག་པོར་གྱུར་ཅིང་། ཁྱད་པར་དུ་ཞབས་དྲུང་རིན་ཆེན་ཕུན་ཚོགས་དེ་ཉིད། ཡང་ཟབ་ཀྱི་ཆོས་སྐོར་གཏེར་ནས་བཏོན་པས། གཏེར་སྟོན་སྣ་ཚོགས་རང་གྲོལ་ཞེས་ཀྱང་བྱ། གནམ་ལྕགས་མེ་འབར་ཞེས་ཀྱང་བྱ། ལྷ་སྲས་སད་ན་ལེགས་ཀྱི་སྐྱེས་མཐར་གཏེར་ཁ་མང་པོ་ནས་ལུང་བསྟན་པ་དེ་ཉིད་ཞྭ་དམར་ཅོད་པན་འཛིན་པ་བཞི་པ་ལ་རབ་བྱུང་ཞུས། རྡོ་རྗེ་ཕྲེང་བའི་དབང་ཡང་ཞུས། ༼ཀ༽ དེའི་སྲས་ཆོས་རྒྱལ་ཕུན་ཚོགས་ཀྱིས་རྡོར་ཕྲེང་གི་ཆོས་སྒོར་སྐལ་ལྡན་འབུམ་ཕྲག་བཅུག་ཅེས་རྣམ་ཐར་ལས་འབྱུང་། ཨོ་རྒྱན་རིན་པོ་ཆེས་གསང་བ་ཡང་ཏིག་གི་ལུང་བྱང་ལས། ཟ་ཧོར་རྒྱལ་པོ་གཙུག་ལག་འཛིན། །ཚེ་འཕོས་རྒྱལ་སྲས་ལྷ་རྗེར་གྱུར། །དེ་ཉིད་སྐྱེ་བ་ཕྱི་མ་ལ། །སྤྲུལ་སྐུ་ཨོ་རྒྱན་གླིང་པ་
འབྱུང་། །ང་ཡི་ཟབ་གཏེར་མང་དུ་སྤྱོད། །དེ་ཡི་སྐྱེ་བ་ཕྱི་མ་ལ། །གཞོ་ཞེས་བྱ་བའི་ས་ཆ་རུ། །བཀྲ་ཤིས་མིང་ཅན་ལུག་ལོ་པ། །དེ་ཡི་དྲི་ནི་སུས་ཟོས་པ། །སྐྱེ་བདུན་ཕལ་གྱི་དོ་ཟླ་མིན། །དེ་ལ་གསུང་ཆོས་སུས་ཐོབ་པ། །ཨོ་རྒྱན་ང་དང་ཁྱད་པར་མེད། །ཅེས་དང་། ཐུགས་རྗེ་ཆེན་པོ་འཁོར་བ་ལས་སྒྲོལ་ལས། དབུས་རུ་ཀ་ཚལ་ས་དང་ཉེ་བ་རུ། །བཀྲ་ཤིས་མིང་བྱང་བརླ་གཡོན་སྨེ་བས་མཚན། །དེ་ལ་གདམས་པའི་གཏད་རྒྱ་བགྱིས་པ་ན། །དགེ་འདུན་སྡེ་འཕེལ་བསྟན་ལ་ཕན་པ་འབྱུང་། ཞེས་དང་། ཡང་ཟབ་ལུང་བསྟན་ཕྱི་ནང་གསང་གསུམ་ལས། །རིགས་དང་ཆོས་ཀྱི་སྲིད་འཛིན་གདུང་འཚོབ་པ། །ཆོས་ཀྱི་རྒྱལ་པོ་སྙིང་པོའི་བསྟན་པ་འཛིན། །ཅེས་དང་ལུང་བསྟན་གབ་རྒྱ་ཅན་ལས། ད་ལྟའི་དུས་ཀྱི་སྔགས་འཆང་མཆོག་གྲུབ་རྒྱལ། །སངས་རྒྱས་བླ་མ་སྟོད་གཏེར་བདག་པོ་དང་། །ཨོ་རྒྱན་གླིང་སོགས་སྐྱེ་མང་བླང་བའི་མཐར། །ཅེས་པའི་མིང་ནི་ནོར་བུ་བཏགས་པ་དེར། །མེ་མོ་ལུག་གི་ལོ་པ་པདྨའི་སྲས། །ཕྱི་ནང་རྟེན་འབྲེལ་དག་པ་འབེབས་པ་དང་། །ས་མོ་ལུག་ནས་མེ་མོ་ལུག་གི་བར། །གཟབ་
པར་བཅས་སོ་ཆོས་རྒྱལ་ལྷ་ཡི་རིགས། །གཏེར་ལུང་འདི་དང་རྟེན་འབྲེལ་གུང་འཛོམས་ཤིང་། །ལུང་ནས་བསྟན་པའི་རྟེན་འབྲེལ་ཀུན་བསྒྲུབ་ན། །ཆོས་ཀྱི་རྒྱལ་པོ་བར་ཆད་བདུད་ལས་རྒྱལ། །ཚེ་ཚད་རེ་བཞི་པ་ལ་ལྷག་སྲིད་དེ། །བོད་འབངས་བསྟན་པ་སྤྱི་ལ་ཕན་བདེ་འབྱུང་། །ལྷ་རིགས་རྒྱལ་སྲས་ཀུ་ཤ་དྲི་ཆུ་ནི། །གང་གི་ལྟོ་རུ་སོང་བའི་འགྲོ་བ་རྣམས། །སྐྱེ་བ་གཅིག་གིས་བདེན་པ་མཐོང་བར་འགྱུར། ཅེས་དང་། དེ་ལྟ་བུའི་ཡབ་ཆོས་རྒྱལ་ཕུན་ཚོགས་དེ་ཉིད་ཀྱི་དྲུང་ནས། སྲས་ཞབས་དྲུང་དཀོན་མཆོག་རིན་ཆེན་གྱིས་གསན་ཏེ། འདི་ནི་མཁན་པོ་བོ་དྷི་སཏཱ་སོགས་སྐྱེ་བ་དུ་མ་དྲན་པའི་སྐྱེས་བུ་དམ་པ་ཡིན། ཁོང་གིས་ཉིད་ཀྱི་མཆེད་ཡ་ཆེ་བ་ཅུང་ཏེ་ལོ་ཡི་སྤྲུལ་པར་གྲགས་པ་མཚན་གྲགས་པ་རྒྱལ་མཚན་དེ་ལ་ཡང་ཚར་གཅིག་གསན། ལུང་བསྟན་ཆེན་པོ་བཀའ་རྒྱ་མ་དང་། ཡང་ཟབ་ཀྱི་ལུང་བྱང་སྟེ། ཕྱག་ནས་ཕྱག་དཔེ་དཀྱིལ་འཁོར་རྣམས་རྒྱ་མ་བཤིག་པ་འདུག་པ་ང་ལ་གཏད་ནས་ཕྱག་དཔེ་པར་མ་སེར་མ་ཕོག་པ་ཞིག་འདུག་པ། ཡི་གེ་ཆེ་ཆུང་ཕྱེ་བའི་སེར་རྒྱབ་པ་དང་། དཀྱིལ་འཁོར་རྣམས་སོ་སོར་ཕྱེས་གསུངས། བདག་གིས་དེ་ལྟར་བྱས་
ནས་ཕྱག་ཏུ་བཏང་བས། སྔར་གཏན་ནས་གཟིགས་མ་མྱོང་བར་འདུག་ཀྱང་། དབང་བསྒྲུབ་ལུགས་བསྐུར་ལུགས་ཐམས་ཅད་ཅུང་ཟད་ཀྱང་མི་འཆུགས་པར་ཐོགས་པ་མེད་པར་གབ་འཕྲོད་པར་འདུག་པས། སྐྱེས་བུ་དམ་པ་ཆོས་ཀྱི་སྤྱན་ཅན་ཡིན་པར་འདུག་སྙམ་དུ་དད་པ་ལྷག་པར་འཕེལ། དེ་ཉིད་དབང་ཐོབ་ཚུགས་དེ་དགོང་བསྐྱེད་རིམ་དྲན་རྫོགས་སུ་བསྒོམས་ནས་འཕྲལ་དུ་བསྙེན་པ་ཡང་ཅི་འགྲུབ་རེ་བྱས། ལྷག་པར་ཟླ་བ་གཟའ་འཛིན་བྱུང་ནུབ་ཐོབ་ཚད་ཀུན་གྱི་བསྙེན་པ་མང་དུ་བྱས་པས། དབང་ཐོབ་པ་རྣམས་དྲངས།་ཕྱིས་ཞབས་དྲུང་ཆོས་ཀྱི་གྲགས་པས། འབྲི་གུང་བཀའ་བརྒྱུད་གསེར་ཕྲེང་གི་གྲལ། ལྷོ་རིན་པོ་ཆེ་འདི་བཞུགས་དགོས་པར་དགོངས་ནས་སྐུ་གཤེགས་ཁ་ཞལ་ཆེམས་ཀྱི་ཚུལ་དུ། རྡོར་ཕྲེང་གི་དབང་འདི་མགར་སྤྲུལ་སྐུ་ལ་ཁྱེད་ཀྱིས་ཐེང་བ་གྱིས་གསུངས་སྐད། ཁོང་དབུས་ནས་ཕེབས་སྐབས། བདག་རཱ་ག་ཨ་སྱས་ས་སྟོད་མི་ཆེན་ཟིལ་བཟང་དུ་མཇལ་སྐབས། ཕྱག་རྟེན་དགུ་ཚན་འགའ་ཟུང་དང་བཅས། རྡོར་ཕྲེང་གནང་བའི་སྙན་གསན་ཕབ་པས། དཔྱིད་སོ་གནང་བའི་ཞལ་བཞེས་བྱུང་། དཔྱིད་སོ་གྲུབ་ཆེན་སྲས་
སྡོང་སྒོམ་ཤུའི་སྒྲུབ་གནས་བྲག་རི་དུང་གི་ཁྲོ་བོ་རང་བྱུང་དུ་གསལ་བའི་སྒྲུབ་ཁང་དུ། མགར་དམ་པའི་སྤྲུལ་སྐུ་དང་། ཚབ་བཤི་བླ་མ་དང་། འབྲུག་པ་བསོད་ནམས་དགེ་བ་དང་། རྗེ་ཉིད་ཀྱི་ཉེ་གནས་གོ་རང་རྟོགས་ལྡན་དང་། བདག་རཱ་ག་ཨ་སྱ་དང་ངེད་ལྔ་ལ་མཚམས་ཁུང་ནས་གནང་། ཞབས་དྲུང་ཆོས་ཀྱི་གྲགས་པའི་གསུང་དང་། གནམ་ཆོས་ཀྱི་ལུང་བྱང་མཚུངས་པར། རྗེ་འབངས་སོག་པོ་ལྷ་དཔལ་གྱི་སྐྱེ་བར་ལུང་བསྟན་པའི་སྤྲུལ་པའི་སྐུ་དཀོན་མཆོག་ཕྲིན་ལས་རྣམ་རྒྱལ་དཔལ་བཟང་པོ་དེ་སྐུ་ན་ཕྲའུ་ཡི་དུས་སུ། ས་ལུགས་ཀྱི་བླ་མ་ཞིག་ལ་རྡོར་ཕྲེང་ཚར་གཅིག་གསན་པར་འདུག་སྟེ། དེའི་བརྒྱུད་རིམ་སོགས་བྲིས་པར་མི་འདུག །ཁམས་སུ་མགྱོགས་ཐབས་སུ་འབྱོན་ཁ་ཞག་མང་པོའི་གོང་ནས་དཀྱིལ་འཁོར་རྣམས་བཤམས་དབང་སྒྲུབ་རྣམས་བྱས་ནས། དབང་ཞུ་བ་ཉི་ཤུ་ཙམ་ལ་དཀྱིལ་འཁོར་བཞི་བཅུ་ཞེ་ལྔ་བསྡུས་པ་མ་ཡིན་པར་རྒྱས་པ་སོ་སོར་བསྐུར་བས། ཞག་ལྔ་ནས་རྫོགས་པར་བྱེད་པ་ནི། རྫུ་འཕྲུལ་གྱི་བཀོད་པ་ངོ་མཚར་བ་ཡིན་པར་སྣང་། དབང་ལུང་གཉིས་ཀ་ཚར་ནས་ཕྱག་དཔེ་དང་། དཀྱིལ་ཐང་བརྒྱ་ལྷག་གནང་བ་རྒྱུ་མ་བཤིག་པར་
སྤྱན་འཕྲལ་དུ་ཉམས་སུ་ལོན་པ་ངོ་མཚར་གསུངས། བླ་མ་ཡང་མཉེས། ཉེ་གནས་གོ་རང་རྟོགས་ལྡན་གྱིས་དཀྱིལ་འཁོར་མཐོ་ཐོག་དྲན་རྫོགས་སུ་བསྒོམས་ནས་བསྙེན་པ་བྱེད་ཚུལ་དེ་བྲིས་ལ་གཏོད་ཟེར་བས། བདག་གིས་བྲིས་ནས་ཕུལ་བས་ཐུགས་དམ་བྱེད་ར་ཡོད། དབང་སོ་སོར་དབང་སྒྲུབ་རྒྱས་པར་མཛད་ཚེ། ལུང་གི་ཚུལ་དུ་ངེད་སློབ་མ་རྣམས་ལ་ཡང་། ཉན་བཅུག་ནས། ཕྱག་ཁྲིད་ཞོར་ནས་འོང་བ་མཛད། ཉིན་རེ་དབང་གཉིས་རེ་དང་རེས་འགའ་གསུམ་རེ་ཙམ་ཡང་འགྲུབ་སྟེ། བཀའ་བརྒྱུད་ཀྱི་ཕ་ཆོས་ཡིན་གསུངས་ནས་རྔོག་དཀྱིལ་བདུན་ཡང་དེ་ལ་མཐུད་ནས་བསྐུར་བས། ཞག་ཉི་ཤུ་རྩ་དྲུག་རྩ་བདུན་ཙམ་འགོར། བདག་ལ་བད་སྣབ་སྐྱུག་པའི་ནད་རྙིང་ཅིས་ཀྱང་མི་ཕན་པ་ཞིག་ཡོད་པ་དེ། དབང་དེ་ཐོབ་ནས་ལོ་གཅིག་གི་བར་གཞི་མེད་དུ་ཕན་པས་བྱིན་རླབས་ཀྱང་ཆེ་བར་མཐོང་། འདི་ཡི་དཀྱིལ་འཁོར་གཅིག་གི་བསྙེན་པ་མཚམས་བྱས་ནས་རྫོགས་པར་བྱས། གཞན་འདི་ཡི་ལྷ་གྲངས་ཕལ་ཆེར་གྱི་བསྙེན་པ་ཡང་བྱས། དེས་ན་ཐོབ་པ་ཙམ་ལ་བཞག་པ་ཡང་མ་ཡིན་པ་འདི་ཡི་དབང་གི་འགྲིགས་ཆོག་སྔོན་གྱི་མཁས་པ་ཡོངས་
གྲགས་དུ་མས་མཛད་པ་ཡང་འདུག་ལ། སྔགས་གྲྭ་སློབ་དཔོན་ཀརྨ་ཕྲིན་ལས་གསུམ་པས་མཛད་པ་ནི། དེང་སང་ཀར་ལུགས་ཕལ་ཆེར་ལ་དར། བུ་སྟོན་གྱི་སློབ་རྒྱུད་དགེ་སློང་པྲཛྙཱ་ཤྲཱིས་མཛད་པ་ལ་ནི་མཆོག་དབང་སྐོར་གསུམ་མི་འབྱར། པདྨ་དཀར་པོས་མཛད་པ་ནི། སྟབས་བདེ་ཞིང་ཉུང་ན་ཡང་། ཧ་ཅང་བསྡུས་དྲགས། འདི་ནི་མངའ་རི་ཚུལ་ཁྲིམས་འོད་ཟེར་བས་བསྒྲིགས་ཤིང་། པར་དུ་འཁོད་པ་དེ་ཡི་ལུགས་ཡིན་པས། འདི་ནི་ཀུན་གྱི་ཚད་མར་འཛིན་ཅིང་མཆོག་ཏུ་གྱུར་པའི་ལོ་རྒྱུས་མང་དུ་ཐོས་སོ། །དེ་ལ་དབང་རྡོ་རྗེ་ཕྲེང་བ་འདི་གང་ལས་བརྒྱུད་པའི་རིམ་པ་ནི་གསུམ་སྟེ། རྡོ་རྗེ་འཆང་། རྡོ་རྗེ་རྣལ་འབྱོར་མ། ཨ་བྱཱ་ཀ་ར། པཎྜི་ཏ་དགེ་བའི་འབྱུང་གནས་སྦས་པ། རྣལ་འབྱོར་ལེགས་བསྐྱོད་ཞབས། པཎ་ཆེན་རཏྣ་རཀྵི་ཏ། ཆགས་ལོཙྪ་བ་ཆོས་རྗེ་དཔལ། གོ་ལུང་པ་གཞོན་ནུ་དཔལ། སྙེ་མདོ་བ་ཀུན་དགའ་དོན་གྲུབ། ཐམས་ཅད་མཁྱེན་པ་རང་བྱུང་རྡོ་རྗེ། ཆོས་ཀྱི་རྒྱལ་མཚན། བླ་མ་ཛྷཱ་ན་ཤྲི། རིན་ཆེན་བཟང་པོ། མཐོང་བ་དོན་ལྡན། དཔལ་འབྱོར་དོན་གྲུབ། སྤྱན་སྔ་ཆོས་ཀྱི་གྲགས་པ། འབྲི་ཁུང་རིན་ཆེན་ཕུན་
ཚོགས། ཡབ་ཆོས་རྒྱལ་ཕུན་ཚོགས། སངས་རྒྱས་དཀོན་མཆོག་རིན་ཆེན། དཀོན་མཆོག་ཕྲིན་ལས་རྣམ་རྒྱལ། རཱ་ག་ཨ་སྱའོ། །ཡང་རྡོ་རྗེ་འཆང་། ཡེ་ཤེས་མཁའ་འགྲོ། པཎ་ཆེན་ཨ་བྷྱ་ཀ་ར་གུཔྟ། ཨ་ནུ་པདྨ་རཀྵི་ཏ། པཎྜི་ཏ་བིཀཱ་དེ་ཝ། པཎ་ཆེན་ཤཱཀྱ་ཤྲཱི། པཎྜི་ཏ་བྷུ་མི་ཤི། བི་མ་ལ་ཤྲཱི་བྷ་དྲ། མང་དཀར་ལོཙྪ་བ་བྱང་ཆུབ་སེང་གེ་།ཀྱི་སྟོན་འཇམ་དབྱངས་གྲགས་པ་རྒྱལ་མཚན། ཀུན་མཁྱེན་དོལ་བུ་པ་ཤེས་རབ་རྒྱལ་མཚན། མ་ཏི་པཎ་ཆེན་བློ་གྲོས་རྒྱལ་མཚན། ས་བཟང་འཕགས་པ་གཞོན་ནུ་བློ་གྲོས། ངོར་ཆེན་རྡོ་རྗེ་འཆང་ཀུན་དགའ་བཟང་པོ། རྡོ་རྗེ་འཛིན་པ་གུ་ན་ཤི །མཁས་གྲུབ་བླ་མ་རྒྱལ་མཚན། ཞྭ་དམར་ཅོད་པན་འཛིན་པ་བཞི་པ། རྗེ་འབྲི་ཁུང་པ་རིན་ཆེན་ཕུན་ཚོགས། རྒྱལ་བའི་ཡབ་གཅིག་ཆོས་རྒྱལ་ཕུན་ཚོགས། སངས་རྒྱས་དཀོན་མཆོག་རིན་ཆེན། སྤྲུལ་སྐུ་དཀོན་མཆོག་ཕྲིན་ལས་རྣམ་རྒྱལ། བདག་དགེ་སློང་རཱ་ག་ཨ་སྱའོ། །ཡང་རྡོ་རྗེ་འཆང་། ཡེ་ཤེས་མཁའ་འགྲོ། ཨ་བྱཱ་ཀ་ར། ཨ་ནུ་པདྨ་རཀི་ཏ། པཎྜི་ཏ་བིཀྟ་དེ་ཝ། པཎ་ཆེན་ཤཱཀྱ་ཤྲཱི་བྷ་དྲ། མང་དཀར་ལོཙཱ་བ་བྱང་
ཆུབ་སེང་གེ །ཀྱི་སྟོན་འཇམ་དབྱངས་གྲགས་པ་རྒྱལ་མཚན། ཀུན་མཁྱེན་དོལ་བུ་པ། མ་ཏི་པཎ་ཆེན། ས་བཟང་འཕགས་པ། རྗེ་ཀུན་དགའ་བཟང་པོ། མཁས་གྲུབ་དཔལ་ལྡན་རྡོ་རྗེ། འཇམ་དབྱངས་བློ་གྲོས་རྒྱལ་མཚན། ངག་དབང་ཆོས་ཀྱི་གྲགས་པ། སྐུ་ཆེ་བ་མཚུངས་མེད་གྲགས་པ་རྒྱལ་མཚན། དཀོན་མཆོག་རིན་ཆེན། ལྷོ་རིན་པོ་ཆེ། རཱ་ག་ཨ་སྱའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།