དབང་རྡོ་རྗེ་ཕྲེང་བའི་སློབ་མ་རྗེས་འཛིན་དང་སློབ་མ་སྟ་གོན་ཁྱེར་བདེ།
དབང་རྡོ་རྗེ་ཕྲེང་བའི་སློབ་མ་རྗེས་འཛིན་དང་སློབ་མ་སྟ་གོན་ཁྱེར་བདེ་བ་བཞུགས་སོ།།
ན་མོ་བཛྲ་དྷ་ར་ཡེ། རིགས་ཀུན་ཁྱབ་བདག་དཔལ་ལྡན་བླ་མ་དང་། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་ལོ། །བཀའ་ཡི་གནང་བ་སྩོལ་ལ་བྱིན་གྱིས་རློབས། །རྡོར་ཕྲེང་ཡོངས་རྫོགས་དབང་སྐུར་བྱེད་པའི་ཚེ། །ཐོག་མར་སློབ་མ་རྗེས་འཛིན་ཆོ་ག་ནི། །མདུན་དུ་སློབ་མ་འཚོགས་ལ་འདི་ལྟར་བརྗོད། །འདིར་སྐབས་སུ་བབ་པ་སློབ་མ་ལ་དབང་བསྐུར་བའི་ཆོ་ག་ལ། སློབ་མ་རྗེས་སུ་བཟུང་བ་དང་། ཆོ་ག་དངོས་གཉིས་སོ། །དང་པོ་ནི་དཔལ་རྡོ་རྗེ་ཕྲེང་བའི་དཀྱིལ་འཁོར་ཆེན་པོ་རྣམས་སུ་དབང་བསྐུར་དོན་དུ་གཉེར་བའི་སློབ་མས། གསོལ་བ་འདེབས་པའམ་གཙུག་ལག་ཁང་ལ་སོགས་པའི་རབ་གནས་ཞུ་བ་
བྱུང་ན། རབ་གནས་ཀྱི་རྒྱུད་ལས། དབང་བསྐུར་དང་ནི་རབ་གནས་དག་།ཡར་གྱི་ངོ་ལ་བརྩམ་པར་བྱ། །གཟའ་དང་སྐར་མ་འཛོམས་གྱུར་ན། །མར་གྱི་ངོ་ལའང་ཉེས་པ་མེད། །ཉི་ཤུ་དགུ་དང་གནམ་སྟོང་ལ། །ཁྱད་པར་དུ་ནི་བྱ་བ་མིན། །ཞེས་པ་ལྟར། ཟླ་བ་ཡར་ངོ་སོགས་ལ་ཚེས་དང་གཟའ་དང་རྒྱུ་སྐར་དང་དུས་སྦྱོར་དང་བྱེད་པ་བཟང་པོ་རྣམས་འཛོམས་པའི་དུས་སུ་སློབ་མ་རྗེས་སུ་བཟུང་བ་ལ་སོགས་པའི་ཆོ་ག་བརྩམ་པར་བྱའོ། །དབང་སྐུར་རྒྱུན་གཅིག་ལ་བྱེད་ན། ཉི་ཤུ་དགུ་དང་གནམ་སྟོང་ལ་ཡང་ཉེས་པ་མེད་དོ། །དེ་ཡང་སློབ་དཔོན་གྱི་
འབྲེལ་བ་ཡོངས་སུ་བརྟགས་པའི་སློབ་མས་ཡི་དམ་ལྷའི་བསྙེན་པ་སོང་ཞིང་དཀྱིལ་འཁོར་གྱི་ཆོ་ག་ལ་མཁས་པ་ལ་སོགས་པ་མཚན་ཉིད་དང་ལྡན་པའི་བླ་མ་ལ་ཕྱག་དང་མཎྜལ་སྔོན་དུ་འགྲོ་བས། ཀུན་མཁྱེན་ཡེ་ཤེས་ཕུང་པོ་ཅན། །སོགས༔ སློབ་དཔོན་དགོངས་སུ་གསོལ་ལོ། །སློབ་དཔོན་ཁྱེད་ཀྱིས་བདག་ལ་དཔལ་རྡོ་རྗེ་ཕྲེང་བའི་དཀྱིལ་འཁོར་ཆེན་པོ་རྣམས་སུ་དབང་བསྐུར་བ་རྣམ་པར་དག་པ་བསྩལ་དུ་གསོལ། །ཞེས་ལན་གསུམ་གྱིས་གསོལ་བ་བཏབ་པས། སོ་སོར་ཐར་པ་རིགས་བདུན་གང་རུང་གི་སྡོམ་པ་དང་། བྱང་སེམས་ཀྱི་སྡོམ་པ་ལེན་དུ་གཞུག་གོ་གསུངས། རྒྱས་པར་སྐྱབས་སྡོམ་དང་བྱང་སྡོམ་འབོགས་པར་བྱའོ། །བསྡུ་ན། སངས་རྒྱས་ཆོས་ཚོགས་མ་ལན་གསུམ་རྗེས་ཟློས་བཅུག་པས་འཐུས། སློབ་མ་རྗེས་སུ་བཟུང་བ་དངོས་ནི། བླ་མ་དང་སློབ་མ་གཉིས་ཀས། ཡིད་མ་ཡེངས་པར་དམིགས་པ་འདི་བཞིན་དུ་བསྒོམ། བླ་མ་ལྷག་པའི་ལྷའི་ང་རྒྱལ་བརྟན་པོ་དང་ལྡན་པས། ཁྱེད་རང་རྣམས་ཀྱི་ལྟེ་བར་ཉི་མའི་དཀྱིལ་འཁོར་ལ་གནས་པའི་ཧཱུཾ་གི་འོད་ཟེར་གྱིས། སྙིང་གར་གནས་པའི་ཀཾ་ལས་བྱུང་བའི་སྡིག་པ་ཤ་ཟ་ལྟར་གནག་ཅིང་གཟུགས་རྣམ་པར་གྱུར་པ། གཅེར་བུ་འབྲས་བུ་འཕྱང་བ་
སྐྲ་གྱེན་དུ་བསྒྲེང་བ། སྣ་རྩེ་ནས་ཕྱུང་ལ་ལྟེ་བའི་ཧཱུཾ་ཡིག་སྙིང་ཁར་འདུས་ནས། ཧཱུྃ་དེ་ཡོངས་སུ་གྱུར་པ་ལས་འཆད་པར་གྱུར་པའི་ཁྲོ་བོ་ཆེན་པོ་རྡོ་རྗེ་ཧཱུྃ་མཛད་ཀྱི་། རྣམ་པར་གྱུར་པ་སྣ་བུག་ནས་ཐོན་ཏེ་སྡིག་པའི་གཟུགས་ཀྱི་མདུན་དུ་བྱོན་ཏེ། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ༔ ཨོཾ་ཧྲཱིཿནྣ་ཀྲྀཧྥ་ཧཱུྃ་ཧཱུྃ་ཕཊ༔ ཨོཾ་མྲྀཏྟཱ་པ་ཡ་གྲིདྡྷཱ་པ་ཡ་ཧཱུྃ་ཧཱུྃ་ཕཊ༔ ཨོཾ་ཨཱཿ་ན་ཡ་ཧོ་བྷ་ག་ཝན་བིཅུ་རཱ་ཛ་སློབ་མ་རྣམས་ཀྱི་སརྦ་པ་པཾ་ན་ཤ་ཡ་ཧཱུྃ་ཧཱུྃ་ཕཊ་སྭ་ཧཱ། ཕྱག་ན་གནས་པའི་རྡོ་རྗེས་མདུན་གྱི་སྡིག་པ་རྡུལ་ཕྲན་ཙམ་དུ་བཅོམ་ནས་སྟོང་པར་བསམ་མོ། །ཡང་རྡོ་རྗེ་ཧཱུྃ་མཛད་ཀྱི་ཕྱག་ན། སྟོད་བདུད་རྩི་འཁྱིལ་བའི་གཟུགས་ལ། སྨད་ཕུར་བུའི་རྣམ་པ་ཅན་གྱི་སློབ་མའི་སེམས་ལས་འབྱུང་བའི་བགེགས་ཀྱི་སྤྱི་བོ་ནས་ཏིང་ངེ་འཛིན་གྱི་ཕུར་བུས་སྟོབ་པར་གྱུར། ཨོཾ་བཛྲ་ཀཱི་ལི་ཀཱི་ལ་ཡ༔ ཨསྱ་སརྦ་བིགྷཱ་ནཾ་བྷནྡྷ་བྷནྡྷ་ཧཱུྃ་ཧཱུྃ་ཕཊ་ཕཊ༔ ཅེས་བརྗོད་པས་ཕུར་པའི་འོད་ཟེར་གྱིས། སྡང་བའི་བགེགས་རྣམས་བསྐྲད་པར་གྱུར། དེ་ནས་ཁྱེད་རང་རྣམས། པཾ་ལས་ཀུན་ཏུ་བཟང་པོའི་གཟུགས་སུ་སྒོམས་ཤིག །བསྲུང་བའི་དོན་དུ་སྙིང་གར་ཨ་ལས་སྐྱེས་པའི་ཟླ་བའི་དཀྱིལ་འཁོར་དབྱངས་ཐ་མ་
ལས་བྱུང་བའི་སྣ་ཚོགས་རྡོ་རྗེས་མཚན་པ་དང་། མགོ་བོར་ཟླ་བ་ལ་གནས་པའི་ཧཱུྃ་ལས་བྱུང་བའི་རྡོ་རྗེ་རྩེ་ལྔ་པ་གྱེན་དུ་བགྲེང་བའི་ལྟེ་བར་བཞུགས་པར་གྱུར། དེའི་ཐུགས་ཀར་ཟླ་བ་ལ་གནས་པའི་རྡོ་རྗེའི་ལྟེ་བའི་ནང་དུ་ཚུད་པའི་སྔགས་ཀྱི་ཕྲེང་བ་ལས་བྱུང་བའི་རྡོ་རྗེ་སེར་པོ་ཕྲ་མོའི་འོད་ཟེར་འཕྲོས་ཏེ་ལུས་ཐམས་ཅད་ཁྱབ་པས་གོ་ཆ་བགོས་ཤིང་སྔགས་འདིས་བསྲུང་བར་སྒོམས་ཤིག །ཨོཾ་ཨོཾ་ཧཱུྃ་ཀ་རོ་ཤཱནྟི་ཀ་རེ་གྷ་ཊ་གྷ་ཊ་གྷ་ཊ་ནི་གྷ་ཏ་ཡ་གྷ་ཏ་ཡཱ་གྷི་ཌི་ནི་སློབ་མ་རྣམས་ཁ་དཀར་རཀྵ་སྭཱ་ཧཱ། ཧཱུྃ། སློབ་མ་རྣམས་ཀྱི་བར་ཆད་བསྲུང་བའི་དོན་དུ་ལས་སྔགས་ཀྱི་ལུང་སྦྱིན་པ་འདི་ཡི་རྗེས་ཟློས་མཛོད། ཨོཾ་ཨཱཿབིགྷཱན་ཀྲྀཏ་ཧཱུྃ་ཕཊ༔ དེ་ལྟར་བྱས་པས་འདི་ལ་བགེགས་རྣམས་མི་ཚུགས་ཤིང་མཁོ་བའི་ཡོ་བྱད་རྣམས་ཀྱང་བདེ་བར་རྙེད་པར་འགྱུར་རོ། །སློབ་མ་བསྡུ་བའི་རྗེས་སུ་བཟུང་བའི་ཆོ་གའོ། །ཆོ་ག་དངོས་ལ། རྡུལ་ཚོན་ཡིན་ན་འདིར་ས་ཆོག་དགོས་ཀྱང་འདིར་རས་བྲིས་ཡིན་པས་མི་དགོས། སློབ་མ་སྟ་གོན་ལ། སློབ་མ་ལྷ་གནས་སྡོམ་ཚིག་ནི། །ཁྲུས་བྱ་ངེས་འབྱུང་བསམ་པ་བསྐྱེད། །ནང་དབང་བསྐུར་དང་གསོལ་བ་གདབ། །སྤྲོ་བ་བསྐྱེད་ནས་སྡོམ་པ་སྦྱིན། །སྲུང་དང་སྐུ་གསུང་ཐུགས་བྱིན་
རློབས། །དེ་ལ་མཆོད་དང་སོ་ཤིང་དོར། །ཁྱོར་ཆུ་སྦྱིན་དང་སྲུང་སྐུད་གདག །སྐུ་ཤ་སྦྱིན་ཞིང་ཆོས་བཤད་བྱ། །རྨི་ལམ་བརྟག་དང་སྲུང་བའོ། །ཞེས་པ་ལྟར་། སློབ་མ་སྟ་གོན་ལ། ཆོས་བཅུ་བཞི་ཡོད་པ་ལས། དང་པོ་ཁྲུས་ལ་སོགས་པ་བྱ་བ་ནི། ང་རྒྱལ་ལ་སོགས་པའི་སྐྱོན་དྲུག་དང་བྲལ་བ། དགེ་བསྙེན་ལ་སོགས་བསླབ་པ་ལ་གནས་པ་རྒྱུད་ཡོངས་སུ་སྦྱོང་ཞིང་གུས་པ་དང་ལྡན་པས་རྡོ་རྗེ་སེམས་དཔའི་སྡོམ་པ་བཟུང་བར་ནུས་པ་རྡོ་རྗེ་ཐེག་པ་ལས། སྟོན་པ་གཞན་མི་ཚོལ་བ་ལ་སོགས་པའི་མཚན་ཉིད་དང་ལྡན་པའི་སློབ་མ་རྣམས་ཁྲུས་བྱས་ནས། ཕྱག་དང་མཎྜལ་ཕུལ་ལ། པུས་མོ་ས་ལ་བཙུགས། མེ་ཏོག་དང་བཅས་པས་ཐལ་མོ་སྦྱར་ཏེ་ཉོན། བླ་མས། ཁྱེད་རྣམས་དལ་འབྱོར་གྱི་མི་ལུས་ཐོབ་ཅིང་། །སངས་རྒྱས་ཀྱི་བསྟན་པ་དང་མཇལ་ནས། གསང་སྔགས་ཀྱི་སྒོར་ཞུགས་ཏེ། དབང་ཟབ་མོ་ཞུ་བར་འདོད་པ་དེ་ཤིན་ཏུ་ལེགས། དེ་ཡང་སེམས་ཅན་ཐམས་ཅད་གདོད་མ་ནས་རང་བཞིན་གྱིས་དོན་དམ་པའི་སངས་རྒྱས་ཀྱི་སྙིང་པོ་ཅན་ཡིན་ཡང་གནས་སྐབས་སུ་ཀུན་རྫོབ་གློ་བུར་གྱི་དྲི་མ་མ་རིག་པ་ལ་སོགས་པ་དོར་བར་དཀའ་
བའི་འཆིང་བ་རྒྱུད་མོས་བཅིངས་ཏེ། ལྡོག་པར་དཀའ་བའི་ལས་ཀྱི་རླུང་ཤུགས་ཀྱིས་འཕངས་ནས། སྐྱབས་མེད་པའི་ངན་སོང་གསུམ་དང་། བདེ་འགྲོ་གཉིས་ཀྱི་འཁོར་བའི་རྒྱ་མཚོ་ཆེན་པོར། སྡུག་བསྔལ་དྲག་པོ་ཤིན་ཏུ་བརྒལ་དཀའ་བ་རྣམས་སུ་ཡང་ནས་ཡང་དུ་ལྟུང་ཞིང་ཐོབ་དཀའ་བས། དལ་བའི་སྐབས་ཅུང་ཟད་ཀྱང་མེད་ཅིང་། རང་དབང་མེད་པར་ལུས་ལེན་པ་ཤིན་ཏུ་སྙིང་རྗེ་བའི་གནས་ཡིན་པས། དེ་རྣམས་ཀྱི་དོན་དུ་ཐམས་ཅད་མཁྱེན་པའི་གོ་འཕང་ཐོབ་པར་བྱེད་པ་ལ། དམ་པའི་ཆོས་ཉམས་སུ་བླང་དགོས་ཤིང་ཆོས་རྣམས་ཀྱི་ནང་ནས་མཆོག་ཏུ་གྱུར་པ་ཐེག་པ་ཆེན་པོ་ཡིན་ལ། དེའི་མཐར་ཐུག་སྙིང་པོར་གྱུར་པ་གསང་སྔགས་ཡིན་པས། དེ་ཡི་ལམ་རིམ་པ་གཉིས་ཀྱི་དོན་དུ་རྣལ་འབྱོར་སྒྲུབ་པའི་སྔོན་དུ་དབང་བསྐུར་བ་འགྲོ་དགོས་པས། དེ་ཡི་ཕྱིར་ད་ལན་འདིར་དངོས་གྲུབ་བརྙེས་པའི་སློབ་དཔོན་ཆེན་པོ་ཨ་བྱཱ་ཀ་ར་ལ། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་དང་། རྗེ་བཙུན་རྡོ་རྗེ་རྣལ་འབྱོར་མས། སཾ་བྷུ་ཊི་ལ་སོགས་པ་རྒྱུད་མང་པོའི་འགྲེལ་པ་དང་། ཕྲེང་བ་སྐོར་གསུམ་ལ་སོགས་པའི་དཀྱིལ་འཁོར་མང་པོའི་ཆོ་ག་དང་། སྒྲུབ་
ཐབས་རྒྱ་མཚོ་ལ་སོགས་པའི་རྒྱུད་སྡེ་མང་པོ་ནས་གསུངས་པའི་ཡི་དམ་གྱི་ལྷ་མང་པོའི་རྗེས་སུ་གནང་བ་རྣམས་ཕྱོགས་གཅིག་ཏུ་བསྡེབས་པའི་གླེགས་བམ་གྱིས་ཤིག་ཅེས་བཀའ་གནང་ཞིང་བྱིན་གྱིས་བརླབས་པ་ལ་བརྟེན་ནས་མཛད་པའི་གཞུང་ལུགས་མང་དུ་ཡོད་པ་ལས། འདིར་རྒྱུད་སྡེ་བཞི་ཀའི་ལྷ་མང་པོའི་སྒྲུབ་ཐབས་གསལ་བར་བྱེད་པ། རྣལ་འབྱོར་རྫོགས་ཕྲེང་དང་སློབ་དཔོན་ལ་ཉེ་བར་མཁོ་བའི་ཆོ་ག་དོན་ཚན་ལྔ་བཅུ་ཐམ་པས་བསྡུས་པ་དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བའི་སྒོ་ནས་སྐལ་ལྡན་གྱི་གདུལ་བྱ་ལ་དབང་སྐུར་བར་བྱེད་པ་ལ། སློབ་མ་སྟ་གོན་གྱི་སྐབས་ཡིན་ཞིང་། དེ་ཡང་བཅོམ་ལྡན་འདས་ཀྱི་ཕྱེད་དང་བཞི་བརྒྱ་པ་ཡི་རྒྱུད་ལས། གཟུགས་ངན་ཡན་ལག་མ་ཚང་དང་། །དམན་པའང་ལྷག་པར་གནས་པར་བྱ། །རང་རང་བསླབ་ལྡན་འཁོར་བཞི་པོ། །ཐེག་ཆེན་བླ་མེད་རྣམས་ལ་ནི། །དེ་བཞིན་གཤེགས་པས་གསུངས་པ་ཡིན། །ཡང་དག་ཆོ་ག་རྗེས་སུ་གནང་། །ཞེས་གསུངས་པ་ལྟར། སློབ་དཔོན་གྱི་འབྲེལ་པ་བརྟགས་ནས། དབང་བསྐུར་བར་འོས་པའི་སློབ་མ་གསུམ་ལ་སོགས་པ་གྲངས་ཤིན་ཏུ་མང་བ་ལ་ཡང་རུང་སྟེ། ཡིད་མ་ཡེངས་
པར་མེ་ཏོག་དང་བཅས་ཏེ་ཐལ་མོ་སྦྱར་བས་ཉོན། གཉིས་པ་ངེས་འབྱུང་གི་བསམ་པ་བསྐྱེད་པའི་ཕྱིར། སྔགས་ཀྱི་ཚུལ་སྐལ་པ་དང་ལྡན་པ་རྣམས་ནི། འཇིག་རྟེན་འདི་ཉིད་ཀྱི་མངོན་པར་མཐོ་བ་དོན་དུ་གཉེར་བའི་ཕྱིར་ཡང་མ་ཡིན། འཇིག་རྟེན་ཕ་རོལ་གྱི་མངོན་པར་མཐོ་བ་དོན་དུ་གཉེར་བའི་ཕྱིར་ཡང་མ་ཡིན་མོད་ཀྱི། འོན་ཀྱང་དེ་བཞིན་གཤེགས་པའི་སྐུ་གསུམ་གྱི་ཕུན་སུམ་ཚོགས་པ་འཐོབ་པར་བྱ་བའི་ཕྱིར། དཔལ་རྡོ་རྗེ་ཕྲེང་བའི་དཀྱིལ་འཁོར་ཆེན་པོ་རྣམས་སུ་འཇུག་པར་བྱའོ། །དེ་ལྟར་ན་མངོན་པར་མཐོ་བ་གཞན་གཉིས་ཀྱང་ཞོར་ལ་འགྲུབ་པར་འགྱུར་བ་ཉིད་དོ། །ཞེས་བརྗོད་ཅིང་དེའི་དོན་རྒྱས་པར་བཤད་པར་བྱའོ། །གསུམ་པ་ནང་དབང་བསྐུར་བ་ནི། ལྷ་ཐོར་བུར་བསྐུར་ནས་དཀྱིལ་འཁོར་གང་ཡིན་གྱི་གཙོ་བོར་བསྒོམ་རྒྱུ་ཡིན་ཀྱང་། རྡོ་རྗེ་ཕྲེང་བར་བཤད་པའི་བླ་མེད་རྒྱུད་ཀྱི་དཀྱིལ་འཁོར་རྣམས་ཀྱི་སྤྱི་ཁྱབ་ཏུ་དམིགས་ནས། བྱེད་རྒྱུ་ཡིན་པས། སློབ་དཔོན་དཀྱིལ་འཁོར་ཐམས་ཅད་ཀྱི་རིགས་བདག་རྡོ་རྗེ་འཆང་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོ། སློབ་མ་རྣམས་ཀྱི་ལུས་ལ་ཕོག་པས་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་བསྲེགས་ཏེ་བྱང་ཤིང་དག་པར་བྱས་ནས། ལུས་འོད་ཀྱི་རང་བཞིན་དུ་གྱུར་
པ་དེ་ཉིད་སློབ་དཔོན་གྱི་ཞལ་དུ་རིམ་གྱིས་ཞུགས། ཐུགས་ཀར་རྗེས་སུ་ཆགས་པའི་མེས་འོད་དུ་ཞུ། སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་རྡོ་རྗེ་དབྱིངས་ཀྱི་དབང་ཕྱུག་མའི་མཁར་བབ་པ་ལས། སློབ་མ་རྣམས་དཀྱིལ་འཁོར་ཐམས་ཅད་ཀྱི་རིགས་ཀྱི་བདག་པོ་རྡོ་རྗེ་འཆང་སྔོན་པོ་རྡོ་རྗེ་དང་དྲིལ་བུ་འཛིན་པའི་སྐུར་གྱུར་པར་བསྒོམ། །སླར་ཡང་སློབ་དཔོན་ལ་མོས་གུས་དྲག་པོ་བྱས་པའི་རྐྱེན་གྱིས། དེའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་ཏེ། ཕྱོགས་བཅུའི་སངས་རྒྱས་ཐམས་ཅད་རིགས་ལྔ་ཡབ་ཡུམ་གྱི་རྣམ་པར་བྱས་ཏེ། སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་འོད་དུ་ཞུ། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཁུ་བ་བདེ་བ་ཆེན་པོའི་རང་བཞིན་དུ་གྱུར་པ་དེ་ཁྱེད་རང་རྣམས་རྡོ་རྗེ་འཆང་དུ་གསལ་བའི་སྤྱི་བོ་ནས་ཞུགས་ཏེ། ཡེ་ཤེས་པ་འདྲེས་པ་དང་དབང་སྐུར་བ་དུས་གཅིག་ལ་བྱས་པས་བདེ་བ་ཆེན་པོའི་རང་བཞིན་དུ་གྱུར་པ་དེ་ཉིད་སླར་ཡང་ཧཱུྃ་ཞེས་བརྗོད་པས་ཡུམ་གྱི་མཁའ་ནང་ནས་ཕྱིར་ཐོན་ཏེ་རང་རང་གི་གྲལ་ལ་འཁོད་པའི་མོས་པ་མཛོད། ཆོ་ག་འདི་ཡི་དགོས་པ་ནི། སྐྱེ་
བོ་འདོད་ཆགས་ཅན་རྣམས་གསང་སྔགས་ལ་ཞུགས་པའི་ཕྱིར་དང་། སློབ་མ་བུར་སྒྲུབ་པའི་ཕྱིར་དང་། དབང་སྐུར་གཏན་ནས་མ་ཐོབ་པ་ཞིག་ཡིན་ཀྱང་། སློབ་དཔོན་ལ་གསང་སྒྲོགས་སུ་མི་འགྱུར་ཞིང་། སློབ་མ་སྔགས་ཀྱི་སྣོད་ལྡན་དུ་བྱ་བའི་ཕྱིར་ཡིན་ནོ། །རྡོ་རྗེ་ཕྲེང་བའི་དཀྱིལ་འཁོར་རེ་རེ་གཉིས་རེ་ཙམ་གྱི་དབང་སྐུར་བྱེད་པ་ཡིན་ན། རང་རང་གི་གཙོ་བོ་ཡབ་ཡུམ་མམ། ཡུམ་རྐྱང་གི་དཀྱིལ་འཁོར་རྣམས་ལ། རིགས་བདག་ཡབ་ཡུམ་གྱི།་ང་རྒྱལ་གྱི་ནང་དབང་བསྐུར་བར་བྱའོ། །བཞི་པ་གསོལ་བ་བཏབ་པ་ནི། སྔར་མཎྜལ་མ་ཕུལ་ན་འདིར་ཕུལ། ཐལ་མོ་སྦྱར་ཏེ་རྗེས་ཟློས་མཛོད། སྐྱེ་རྒ་འཆི་བ་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བའི། །སྲིད་པའི་རྒྱ་མཚོར་བྱིངས་བ་ལ། །འདོན་པར་མཛད་པ་ཁྱོད་འབའ་ཞིག །དགའ་ཆེན་སྟོན་པ་ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོར་བདག་ཕྱག་འཚལ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་
པའི་བར་དོན་དྲན་བཞིན་པས་གསུམ་བརྗོད་དུ་གཞུག་གོ །ལྔ་པ་སྔགས་ཀྱི་ལམ་ཟབ་མོ་ལ་འཇུག་པའི་སྐལ་པ་དང་ལྡན་པ་རེ་དགའ་སྙམ་པའི་བློས་ཉོན། སྤྲོ་བ་བསྐྱེད་པ་ནི། བུ་ཚུར་ཤོག་ཅིག་ཐེག་ཆེན་པོ། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པ། །གང་གིས་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེན་པོ་སྟོབས་ཆེན་བཅོམ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་གསུངས་པས། དེའི་དོན་ནི་འདི་ཡིན་ཏེ། ནང་དབང་བསྐུར་ནས། སློབ་མ་བུར་སྒྲུབ་པ་ཡིན་པས། དེ་ཡི་ཕྱིར་བུ་ཚུར་ཤོག་ཅིག །ཁྱོད་ནི་ཚུལ་ཆེན་གསང་སྔགས་རྡོ་རྗེ་ཐེག་པའི་སྣོད་དུ་གྱུར་པ་ཡིན་ལ། གསང་སྔགས་རྡོ་རྗེ་ཐེག་པའི་ལམ་འདི་ནི། འདས་མ་འོངས་ད་
ལྟ་དུས་གསུམ་གྱི་སངས་རྒྱས་ཐམས་ཅད་ཀྱིས་བགྲོད་པ་གཅིག་པའི་ལམ་ཡིན་ཞིང་། ད་ལྟར་གྱི་སྟོན་པ་ཤཱཀྱའི་རྒྱལ་པོ་འདི་ཡང་། གསང་སྔགས་རྡོ་རྗེ་ཐེག་པའི་ལམ་ལ་བརྟེན་ནས་སྲོད་ལ་བདུད་བཏུལ་ཐོ་རེངས་མངོན་པར་རྫོགས་པར་སངས་རྒྱས་ཏེ། རང་ཉིད་ཀྱིས་ཉམས་སུ་བླང་བའི་གསང་སྔགས་རྡོ་རྗེ་ཐེག་པའི་ལམ་འདི་གདུལ་བྱ་རྣམས་ཀྱིས་ཀྱང་ཉམས་སུ་བླངས་ན་འབྲས་བུ་སངས་རྒྱས་མྱུར་དུ་ཐོབ་པར་སྔགས་ཀྱི་ལམ་ཟབ་མོ་ལ་འཇུག་ཏུ་རུང་བ་ལ། དགའ་སྤྲོ་ཁྱད་པར་ཅན་སྐྱེད་ཅིག །ཅེས་བརྗོད་དོ། །དྲུག་པ་ནི་མདུན་གྱི་ནམ་མཁར་རྩ་བ་དང་བརྒྱུད་པར་བཅས་པའི་བླ་མ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་ཐུན་མོང་དང་ཐུན་མོང་མ་ཡིན་པའི་སྡོམ་པ་བཟུང་སྙམ་པའི་བསམ་པས་འདི་ཡི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སོགས་འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག་གི་བར་ལན་གསུམ། སློབ་མའི་དབང་ཙམ་ལས་མི་བསྐུར་ན་འདི་ཡི་ཆོག །རིགས་ལྔའི་སྡོམ་བཟུང་མི་དགོས་སོ། །རྡོ་རྗེ་སློབ་དཔོན་གྱིས་དབང་བསྐུར་ཡིན་ན། མཎྜལ་ཕུལ། འཁོར་ལོ་ཕྱིར་མི་ལྡོག་པའི་
དབང་། །དམ་པས་བདག་ལ་བསྩལ་ནས་ཀྱང་། །མགོན་པོས་འཁོར་ལོ་ལྷ་དག་གི །དེ་ཉིད་སློབ་དཔོན་ཕྲིན་ལས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་པ་གསང་མཆོག་བཤད་དུ་གསོལ། །སེམས་ཅན་ཀུན་གྱི་དོན་བྱའི་ཕྱིར། །རྟག་ཏུ་བདག་ནི་སློབ་དཔོན་བགྱིད། །ཅེས་ལན་གསུམ་གྱིས་ཁྱད་པར་གྱི་དོན་དུ་གསོལ་བ་འདེབས་སུ་བཅུག་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་རྗེ་ཞེས་བགྱི་བ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། སོགས། །སེམས་ཅན་མྱ་ངན་འདས་ལ་འགོད། །ཀྱི་བར་དོན་དྲན་བཞིན་གྱིས་ལན་གསུམ་བརྗོད་དུ་བཅུག་གོ །བདུན་པ་སྟ་གོན་གྱི་དངོས་གཞི་ལྟ་བུ། སློབ་མའི་ལུས་ངག་ཡིད་གསུམ་ལ། སངས་རྒྱས་ཀྱི་སྐུ་གསུང་ཐུགས་ཀྱི་ས་བོན་བཞག་པའི་ཕྱིར་བྱིན་གྱིས་བརླབ་པ་ནི། ཨོཾ་ཨཱཿབིགྷཱནྟ་ཀྲྀཏ་ཧཱུྃ། ཞེས་བརྗོད་དཀྱིལ་འཁོར་གང་ཡིན་གྱི་ལས་སྔགས་ལན་གསུམ་བཟླས་པས་སློབ་མའི་ལུས་ངག་ཡིད་གསུམ་གྱི་བར་ཆད་བསྲུང་ལ། ཁྱེད་རང་རྣམས་ཀྱི་སྙིང་གར་རྡོ་རྗེའི་སྟེང་དུ་ཉི་མ་ལ་གནས་པའི་ཧཱུྃ་ནག་པོ། མགྲིན་
པར་པདྨའི་སྟེང་དུ་ཉི་མ་ལ་ཨཱཿདམར་པོ། དཔྲལ་བར་འཁོར་ལོའི་སྟེང་དུ་ཟླ་བ་ལ་ཨོཾ་དཀར་པོ་རྣམས་བསྒོམ། སློབ་དཔོན་གྱི་རྡོ་རྗེ་དང་བཅས་པའི་དྲི་ཆུས་སྙིང་ཁ་དང་མགྲིན་པ་སྤྱི་བོར་རེག་པར་བསྒོམ། ཧཱུྃ་ཨཱཿཨོཾ། དེ་དག་ལས་འཕྲོས་པའི་འོད་ཟེར་གྱིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་གསུང་སྐུ་ཡི་ཡེ་ཤེས་པ་རྣམས་སྤྱན་དྲངས་ཏེ། ཕྱག་མཚན་ཡིག་འབྲུ་དང་བཅས་པ་ལ་ཐིམ་པས། དེ་རྣམས་འོད་དུ་ཞུ་ནས། སློབ་མའི་ལུས་ངག་ཡིད་གསུམ་ལྷག་པའི་ལྷ་ཡི་སྐུ་གསུང་ཐུགས་སུ་གྱུར་པར་བསྒོམ། །ཛཿཧཱུྃ་བཾ་ཧོཿ དེ་ལ་མཆོད་པའི་ཕྱིར། མགོ་བོར་མེ་ཏོག །ཤངས་ལ་བདུག་སྤོས། མར་མེ་སྤྱན་ལམ་དུ། དྲི་ཆབ་ཐུགས་ཀར་ཕུལ་བར་སྒོམས་ཤིག །ཨོཾ་བཛྲ་པུཥྤེ༴ དྷུ་པེ༴ དྷི་པཾ༴ གྷནྡྷེ་པྲ་ཏིཙྪ་ཡེ་སྭཱ་ཧཱ། མཆོད་པ་འདི་ནི་གྲུབ་ཆེན་ཀུ་ཀུ་རི་པས། མ་ཧཱ་མཱ་ཡཱའི་དཀྱིལ་ཆོག་ལས། སེམས་ནི་དང་པོ་བསྐྱེད་པ་ལ། །སངས་རྒྱས་རྣམས་ཀྱིས་མཆོད་པ་ལྟར། །གནས་གསུམ་བྱིན་རླབས་བྱས་སློབ་ལ། །སློབ་དཔོན་གྱིས་ཀྱང་མཆོད་པར་བྱ། །ཞེས་གསུངས་པ་དང་མཐུན་ནོ། །དགུ་པ་སོ་ཤིང་སྦྱིན་པ་ནི། གསང་
བ་སྤྱི་རྒྱུད་ལས། སོ་ཤིང་ཨུ་དུམ་ཝ་ར་དང་། །ཨ་ཤུད་ཐ་ནི་རྨ་མེད་པ། །སོར་གྲངས་བཅུ་གཉིས་ཚད་དུ་བྱ། །མ་ཡོ་མ་གས་སྲོག་ཆགས་མེད། །རྩེ་མོར་མེ་ཏོག་བཅས་པ་སྦྱིན། །དྲི་ཡི་ཆུས་ནི་བརླན་པར་བྱ། །རང་གི་ལྷ་འམ་ལྷ་གཞན་གྱི། །སྙིང་པོ་ལན་མང་བཟླས་ནས་ནི། །ཐལ་མོ་སྦྱར་བའི་བར་དུ་སྦྱིན། །ཤར་རམ་བྱང་དུ་ཁ་ཕྱོགས་ནས། །སོ་ཤིང་ལྟོས་པ་མེད་པར་དོར། །ཞེས་གསུངས་པའི་སོ་ཤིང་ཚད་དང་མཚན་ཉིད་དང་ལྡན་པ། བསངས་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་སོ་ཤིང་སློབ་མ་རང་རང་གི་དངོས་གྲུབ་ཇི་ལྟར་འགྲུབ་པའི་རྟེན་འབྲེལ་དང་མཐུན་པའི་སོ་ཤིང་དུ་བསྒོམ། གཙོ་བོའི་སྔགས་དང་། ༀ་ཛི་ཧོ་སམྦྷ་ར་དྷ་ནི་ཡེ་སྭཱ་ཧཱ། སོ་ཤིང་འདི་ཐལ་མོ་ཁ་ཕྱེ་བའི་བར་དུ་ཟུངས་ལ་སྨན་པ་མཁས་པས་སྐྱུག་སྨན་བཏང་བ་བཞིན། སྡིག་སྒྲིབ་ཐམས་ཅད་ཕྱིར་སྐྱུག་པར་བསྒོམས་ལ། དྲི་ཡི་མཎྜལ་ཚོམ་བུ་དགུ་བཀོད་པའི་སྟེང་དུ་དོར་ཞིང་རྗེས་ཟློས་མཛོད། ཨོཾ་བཛྲ་ཧཱ་ས་ཧ། རྩེ་མོ་ཤར་བྱང་ནུབ་ལྷོ་སྟེང་འོག་རྣམས་སུ་བསྟན་ན། ཞི་རྒྱས་དབང་དྲག་དང་། རིག་འཛིན་དང་ས་འོག་གི་དངོས་གྲུབ་འགྲུབ་བོ།
མཚམས་རྣམས་སུ་བསྟན་ན་དངོས་གྲུབ་སྣ་ཚོགས་པ་དང་། རང་དང་བླ་མ་ལ་བསྟན་ན་ཕྱག་རྒྱ་ཆེན་པོ་མཆོག་གི་དངོས་གྲུབ་འགྲུབ་པར་འགྱུར་རོ། །ཞེས་ལུང་བསྟན་ཏོ། །བཅུ་པ་ཁྱོར་ཆུ་ནི་ལས་བུམ་ཆུ་དང་དུང་ཆོས་ཆུ་ལ་དྲི་བཟང་པོ་སྦྱར་ཏེ་བསངས་སྦྱངས། སྟོང་པའི་ངང་ལས་བཾ་ལས་བྱུང་བའི་ཁྱོར་ཆུ་མཚན་ཉིད་དང་ལྡན་པར་གྱུར། ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་ཨཱཿཁཾ་ཧཱུྃ། བྱིན་གྱིས་བརླབས་པའི་ཆུ་འདི་ཁྱེད་རང་རྣམས་ཀྱི་ཁྱོར་བ་གཡས་པར་ལན་གསུམ་བླུགས་པས་སྡིག་སྒྲིབ་དག་པར་སྒོམས། ཨོཾ་ཧྲཱིཿབི་ཤུདྡྷཾ། སརྦ་དྷར༔སརྦ་པཱ་པཾ་ནི་ཙེ་ཨསྱ་སཾ་ཤོ་དྷ་ཡཱ་སརྦ་བི་ཀལྤན་ཨ་པ་ནཱ་ཡ་ཧཱུྃ། ཞེས་བརྗོད་དོ། །བཅུ་གཅིག་པ་བར་ཆད་བསྲུང་བའི་ཕྱིར། སྲུང་སྐུད་གདག་པ་ནི། སྐུད་པ་དམར་པོ་སློབ་མའི་ལུས་ཚད་དང་མཉམ་པ་སུམ་བསྒྲིལ་དུ་བྱས་པ་ལ་གཙོ་བོའི་སྔགས་དང་ལས་སྔགས་བཟླ་ཞིང་རྡོ་རྗེའི་མདུད་པ་གསུམ་བྱས་ལ། བསངས་སྦྱངས། སྟོང་པའི་ངང་ལས་ཧཱུྃ་ལས་བྱུང་བའི་སྲུང་སྐུད་ཚད་དང་མཚན་ཉིད་དང་ལྡན་པ། སློབ་མ་རྣམས་ཀྱི་ལུས་ངག་ཡིད་གསུམ་གྱི་བར་ཆད་སྲུང་བའི་ནུས་པ་དང་ལྡན་པར་གྱུར། ཁྱེད་རང་སྐྱེས་པ་རྣམས་ཀྱི་དཔུང་པ་གཡོན་དང་། བུད་མེད་ཀྱི་གཡས་པར་ལན་གཉིས་དཀྲིས་ཏེ། སྐུད་པའི་སྣེ་མོ་འོག་ནས་བླང་
སྟེ་སྟེང་དུ་གདག །རྡོ་རྗེའི་མདུད་པ་དང་ལྡན་པར་བྱས་པ་ལ། ལས་བུམ་གྱི་ཆུས་བྱུག་རྡོ་རྗེ་རྒྱ་གྲམ་གྱིས་མཚན་པའི་མོས་པ་མཛོད། ཨོཾ་བུདྡྷ་མེ་ཏྲ་རཀྵ་རཀ་སརྦན་སྭཱ་ཧཱ། བཅུ་གཉིས་པ་ལམ་བསྟན་ལྷ་གནས་ཀྱི་དོན་དུ་ཀུ་ཤ་སྦྱིན་པ་ནི། རྨི་ལམ་འཁྲུགས་ཤིང་བསལ་བར་བྱ་བའི་ཕྱིར། བསངས་སྦྱངས། ཧཱུྃ་ལས་བྱུང་བའི་སྐུ་ཤ་སྔོ་ལྗང་མ་འཁྲུགས་ཤིང་རྩེ་མོ་མ་ཉམས་པར། སློབ་མའི་རྨི་ལམ་ལ་སྔགས་དང་རྟགས་དང་། དངོས་གྲུབ་འགྲུབ་པའི་ནུས་པ་དང་ལྡན་པར་གྱུར། དྷིས་སྔགས་པའི་ཀུ་ཤ་ཆུང་བ་ལག་པ་གཡས་དང་། ཧས་སྔགས་པའི་སྐུ་ཤ་ཆེ་བ་ལག་པ་གཡོན་དུ་བྱིན་པའི་མོས་པ་གྱིས།་ཨོཾ་བཛྲ་ཏིཀཱ་པཾ། འདི་དག་རང་གིས་མ་ལྕོགས་ན་མཆོད་གཡོག་པ་ལ་འགྲིམ་བཅུག་པས་ཆོག །སོ་ཤིང་ཁྱོར་ཆུ་དཔུང་སྐུད་ཀུ་ཤ་འདི་རྣམས་ནི། བུམ་དབང་ལ་སོགས་པ་དབང་བཞིའི་སྔོན་འགྲོ་ཡང་ཡིན་པས། གོ་རིམ་འདི་བཞིན་བྱེད་དགོས་ཤིང་གནས་སྐབས་སུ་དངོས་གྲུབ་ཀྱི་མཚན་ལྟས་སུ་བརྟག་པ་དང་། ཁ་གཙང་ཞིང་དག་པར་བྱ་བ་དང་། བར་ཆད་བསྲུང་བ་དང་། རྨི་ལམ་གསལ་པོར་འབྱུང་བའི་ཕྱིར་ཡིན་ལ། མཐར་ཐུག་སངས་རྒྱས་པའི་ཚེ། བྱང་ཆུབ་ཀྱི་ཤིང་གདན་ཐོབ་པ་
དང་། ཐུབ་པའི་དབང་པོ་ལ། ཞིང་པའི་བུ་མོ་ལེགས་སྐྱེས་མས་འོ་ཐུག་ཕུལ་བ་ལྟར། རང་གིས་ཀྱང་འོ་ཐུག་གི་བཏུང་བ་ཐོབ་པ་དང་། འཚང་རྒྱ་ཁར་བྱམས་པའི་འོད་ཟེར་གྱིས། བདུད་དཔུང་འཁོར་དང་བཅས་པ། འཆིང་བ་ལྔས་བཅིང་བར་བྱེད་པ་དང་། །བྱང་ཆུབ་ཀྱི་ཤིང་དྲུང་དུ་རྩྭ་ཀུ་ཤ་བཀྲམ་པའི་སྟེང་དུ། སྐྱིལ་ཀྲུང་བཅས་ཏེ་བཞུགས་པས་ནང་དུ་ཏིང་ངེ་འཛིན་མི་འཁྲུགས་པ་སྐྱེས་པ་ལ་བརྟེན་ནས། ཐོ་རངས་མངོན་པར་རྫོགས་པར་སངས་རྒྱས་པའི་རྟེན་འབྲེལ་ཡོད་དོ། །རྒྱས་པར་ནི་བླ་མ་མཁས་པའི་ངག་དང་། གཞུང་ལུགས་རྣམ་དག་ལས་ཤེས་པར་བྱའོ། །བཅུ་གསུམ་པ་ཟབ་མོའི་ཆོས་བཤད་པའི་སྒོ་ནས་སྤྲོ་བ་བསྐྱེད་པ་ནི། འཇིག་རྟེན་དུ་ནི་ཀུན་མཁྱེན་རྣམས། །རེས་འགའ་འབྱུང་དང་མི་འབྱུང་སྲིད་། །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ཡང་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྡིག་པ་བགྱིས་པར་གྱུར་པ་གང་། །དེ་ཀུན་དཀྱིལ་
འཁོར་འདི་འདྲ་བ། །མཐོང་བས་བྱང་བར་འགྱུར་ལགས་ན། །གྲགས་པ་མཐའ་ཡས་སྔགས་བརྗོད་པའི། །ཚུལ་ལ་གནས་ནི་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །དེ་དག་ཀུན་གྱི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ལྟར་ཁྱེད་རྣམས་ཐེག་ཆེན་ལ། །ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བ་ན། །རང་བྱུང་སྐལ་བ་ཆེན་པོ་པ། །དེ་བཞིན་གཤེགས་པ་ཉིད་དུ་གྱུར། །ཞེས་པའི་དོན། འཇིག་རྟེན་ན་གང་དཀོན་ན། ཨུ་དུམ་ཝ་རའི་མེ་ཏོག་དཀོན་པ་ལྟར། སངས་རྒྱས་འཇིག་རྟེན་དུ་འབྱུང་བ་ཤིན་ཏུ་དཀོན་ཞིང་། དེའང་སངས་རྒྱས་རྒྱལ་རིགས་ལས་འབྱུང་ན། ཨུ་
དུམ་ཝ་རའི་མེ་ཏོག་དཀར་པོ་འབྱུང་། བྲམ་ཟེའི་རིགས་ལས་འབྱུང་ན། ཨུ་དུམ་ཝ་རའི་མེ་ཏོག་དམར་སེར་འབྱུང་བར་བཤད་པས། རྒྱལ་བ་ཤཱཀྱ་ཐུབ་པ་རྒྱལ་རིགས་དང་བྱམས་པ་བྲམ་ཟེའི་རིགས་ལས་འབྱུང་བར་གསུངས་པས། ཨུ་དུམ་ཝ་རའི་མེ་ཏོག་ཀྱང་དཀར་པོ་དང་དམར་སེར་དུ་འབྱུང་བར་ཤེས་པར་བྱའོ། །སངས་རྒྱས་འབྱུང་བ་ལས་ཀྱང་། གསང་སྔགས་རྡོ་རྗེ་ཐེག་པ་འབྱུང་བ་ཤིན་ཏུ་དཀོན་ཏེ། དཔལ་གསང་བ་འདུས་པའི་རྒྱུད། གསང་སྔགས་རྡོ་རྗེ་ཐེག་པའི་ལམ་འདི་ནི། ཐུབ་པ་ཆེན་པོ་མར་མེ་མཛད་ནས། འོད་སྲུང་གི་བར་གྱིས་ཀྱང་མ་གསུངས། བྱམས་པ་ནས་མོས་པ་ལ་ཐུག་གི་བར་གྱིས་ཀྱང་གསུང་བར་མི་འགྱུར་ཞིང་། ད་ལྟར་གྱི་སྟོན་པ་ཤཱཀྱ་ཐུབ་པ་འདིའི་སྨོན་ལམ་གྱི་སྟོབས་ཀྱིས་གསུངས་པས། ཤིན་ཏུ་དཀོན་པར་གསུངས་སོ། །འོ་ན་དཀོན་པས་ཅི་སྐྱོན་རི་བོང་གི་རྭ་དང་མོ་གཤམ་གྱི་བུ་དང་། ནམ་མཁའི་པདྨོ་ཡང་དཀོན་ནོ་སྙམ་ན། དེ་དཀོན་མོད། དེ་ལྟ་བུ་ནི་དཀོན་ཞིང་དོན་ཆུང་བ་ཡིན་ལ། གསང་སྔགས་རྡོ་རྗེ་ཐེག་པ་འདི་ནི་དཀོན་ལ་ཕན་ཡོན་ཆེ་བ་སྟེ། དཀྱིལ་འཁོར་དུ་འཇུག་པའི་ཆོས་རྣམས་སྔོན་དུ་སོང་ནས། དཀྱིལ་འཁོར་
ཚོན་རྩི་མཐོང་བ་ཙམ་གྱིས་ཀྱང་། བསྐལ་པ་བྱེ་བར་བསགས་པའི་སྡིག་སྒྲིབ་དག་པར་འགྱུར་བ་ཡིན་ན། དབང་སྐུར་ཐོབ་ནས། ལམ་རིམ་པ་གཉིས་སམ་མཚན་བཅས་དང་མཚན་མེད་ཀྱི་རྣལ་འབྱོར་སྒོམ་པ་ལ་འབད་པར་བྱས་ན། དེ་བཞིན་གཤེགས་པ་ཉིད་ཐོབ་པར་འགྱུར་བར་ངེས་པ་ཡིན་ནོ། །གལ་ཏེ་དུས་ཡུན་རིང་པོར། སྐལ་པ་བྱེ་བར་བསགས་པའི་སྡིག་སྒྲིབ་རྣམས་དཀྱིལ་འཁོར་གྱི་ཚོན་རྩི་མཐོང་བ་ཙམ་གྱིས་ཟད་པར་མི་རིགས་སྙམ་ན། དེ་རིགས་པ་ཡིན་ཏེ། དཔེར་ན་བྲག་ཕུག་ཁ་བྱང་བསྟན་ལ།་སྣང་བའི་ངོ་བོ་གཏན་ནས་འོང་མ་མྱོང་བའི་མུན་ཁུང་དེར་སྒྲོན་མེ་ཆུང་དུ་བཏེག་ཙམ་གྱིས། མུན་པ་དེ་རྣམས་ན་རེ། ངེད་རྣམས་བུང་ཆེ་ཞིང་ཡུན་དུ་བསྡད་པ་ཡིན་པས་མི་འགྲོ་མི་ཟེར་བར། བྲག་ཕུག་གི་ནང་གསལ་བར་བྱེད་པ་བཞིན་ནོ། །འོ་ན་དབང་བསྐུར་བ་དང་ལམ་བསྒོམ་པ་སོགས་ལ་འབད་མི་དགོས་པར་འགྱུར་ཏེ། དཀྱིལ་འཁོར་ཚོན་རྩི་མཐོང་བ་ཙམ་གྱིས་སྡིག་སྒྲིབ་ཟད་པར་འགྱུར་བའི་ཕྱིར་སྙམ་ན། དེ་ནི་མ་ཡིན་ཏེ། སྒྲོན་མེ་ཆུང་ངུ་བཏེག་པས། མུན་པ་རགས་པ་དེང་བར་བྱས་པ་ཡིན་གྱི། རྩིག་གསེབ་ཀྱི་མུན་པ་ཕྲ་
མོ་དེང་བར་བྱས་པ་མིན་པ་ལྟར། དཀྱིལ་འཁོར་གྱི་ཚོན་རྩི་མཐོང་བས་ཀྱང་སྒྲིབ་པ་རགས་པ་ཟད་པར་བྱས་པ་ཡིན་གྱི་སྒྲིབ་པའི་ས་བོན་དང་བག་ཆགས་སྦྱང་བ་ལ་ནི། དབང་བསྐུར་བ་དང་ལམ་བསྒོམ་པ་ངེས་པར་དགོས། ཞེས་བཤད་པར་བྱའོ།། ། །བཅུ་བཞི་པ་རྨི་ལམ་བརྟགས་ཤིང་ངན་ན་བསྲུང་བ་བྱ་བ་ནི། སློབ་མ་རྣམས་བདུད་རྩི་འཁྱིལ་པའི་སྔགས་ཀྱིས་བསྲུངས་ནས། ཨོཾ་ཨ་མྲྀ་ཏེ་ཧཱུཾ་ཕཊ༔ སློབ་མ་རྣམས་བཛྲ་རཀྵ་རཀྵ༔ བདུན། ད་ཁྱེད་རང་རྣམས་ཀྱི་ནངས་པར་གྱི་བར་ལ་སྔགས་འདི་ཐོན། ཨོཾ་ཨ་མྲྀ་ཏེ་ཧཱུྃ་ཕཊ༔ ད་ལྟར་ཡང་དེ་འུར་འདོན་གྱིས། བུ་ཀྱི་སང་ནི་དཀྱིལ་འཁོར་དག །མཐོང་བ་འགྱུར་རོ་ཉོལ་ཅིག་དང་། །རྨི་ལམ་མཐོང་བ་གང་ཡིན་རྣམས། །དེ་ཀུན་དྲང་པོ་རང་ལ་སྨོས། །ཞེས་ཀུ་ཤའི་གདན་ལ་འདོད་ཆགས་ལ་སོགས་པ་ཉོན་མོངས་པའི་རྣམ་རྟོག་སྤངས་ཏེ་ལྷ་དང་བླ་མ་ཡིད་ལ་བྱེད་ཅིང་སེང་གེའི་ཉལ་སྟབས་ཀྱིས་ཉོལ་ཅིག་ཅེས་བསྒོའོ། །གསང་བ་སྤྱི་རྒྱུད་ལས། ཐོས་ནས་བཟང་ངན་མི་བཟད་པ། །ཐེ་ཚོམ་མེད་པར་བཤད་པར་བྱ། །རྨི་ལམ་ཐམས་ཅད་བདེན་མིན་ཡང་། །དེ་ལ་མ་དད་རིགས་མ་ཡིན། །ཞེས་གསུངས་པ་ལྟར། རྨི་ལམ་བཟང་ངན་གཉིས་ཏེ། དང་པོ་ནི། གསང་བ་སྤྱི་རྒྱུད་
ལས། རྨི་ལམ་སངས་རྒྱས་མཐོང་ན་ནི། །ཡོན་ཏན་རྒྱ་མཚོ་མངོན་སུམ་བཞིན། །ཞེས་གསུངས་པ་ལྟར། རྨི་ལམ་བཟང་འབྲིང་ཐ་མ་གསུམ་ལས། དངོས་གྲུབ་མཆོག་འབྲིང་ཐ་མ་གསུམ་ཐོབ་པར་འགྱུར་བས། ཞེན་པ་མེད་པའི་ཚུལ་གྱིས་དགའ་བ་སྒོམས་ཤིག །གཉིས་པ་ངན་པ་ནི། རྒྱུ་སྐེག་གི་རི་ལ་འཛེགས་པ། ཆུ་ཡིས་ཁྱེར་བའི་བར་རྨིས་ན་ངན་ནོ། །དོ་དགོང་དཀྱིལ་འཁོར་གྱི་ཕྱོགས་སུ་མགོ་བོ་སྟོན་ལ་ཉོལ་ཅིག །རྨི་ལམ་རྟོག་ཅིག །ཅེས་མཎྜལ་ཕུལ། གྲོལ་ལོ། །དེ་ནས་སློབ་དཔོན་རང་ཉིད་དཀྱིལ་འཁོར་གྱི་ཁང་པར་ཞུགས་ནས། སྲུང་བའི་དོན་དུ་བདུད་རྩི་འཁྱིལ་པའི་སྔགས་བཟླས་པར་བྱའོ། །ནངས་པར་སློབ་མ་རྣམས་ལ་རྨི་ལམ་དྲིས་ལ། རྨི་ལམ་ངན་པ་རྣམས་བཟློག་པའི་ཕྱིར། གཞུང་གཞན་ནས་གསུངས་པ་ལྟར། སངས་རྒྱས་སྤྱན་མའི་ལུང་བསྟན་སྦྱིན་པའམ། འདིར་གསུངས་པའི། ཨོཾ་ཨཱཿ༔ བིགྷན་ཀྲྀཏ་ཧཱུྃ་དང་། དཀྱིལ་འཁོར་གང་ཡིན་གྱི་ལས་སྔགས་ཀྱི་ལུང་སྦྱིན་པར་བྱ། ཞེས་གསུངས་པས་ལས་སྔགས་འུར་འདོན་གཅིག་བྱས་ན་ལེགས། རྨི་ལམ་ཤིན་ཏུ་ངན་ན། ཁོ་རང་དེ་ལ་དབང་ཞུ་ཚེ་བདུད་རྩི་འཁྱིལ་བ་སོགས་ལས་སྔགས་བསྙེན་བཅུག །རྨི་ལམ་བཟང་ན་དངོས་གྲུབ་འབྱུང་བའི་ལྟས་སོ། །རིགས་པས་དཔྱད་ལ་ལུང་བསྟན་ཏོ། །དཔལ་རྡོ་རྗེ་ཕྲེང་བའི་དཀྱིལ་འཁོར་གྱི་ཆོ་ག་དབང་གི་
ཆར་འབེབས། ཞེས་བྱ་བ་མཁས་པ་ཆེན་པོ། ཚུལ་ཁྲིམས་འོད་ཟེར་གྱིས་མཛད་པ་ལས། རཱ་ག་ཨ་སྱས་ཁོལ་དུ་ཕྱུང་བ་ལ། ཉེས་འགལ་མཆིས་ན་བཤགས་ཤིང་། དགེ་བས་འགྲོ་བ་དཔག་ཏུ་མེད་པ་སྨིན་ཅིང་གྲོལ་བར་གྱུར་ཅིག །ཡི་གེ་པ་ནི་བརྩོན་འགྲུས་སོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།