རྡོ་རྗེ་ཕྲེང་བའི་བྱ་སྤྱོད་ཀྱི་དཀྱིལ་འཁོར་དྲུག་གི་དབང་བསྐུར་བལྟས་ཆོག་ཏུ་བཀོད་པ།
རྡོ་རྗེ་ཕྲེང་བའི་བྱ་སྤྱོད་ཀྱི་དཀྱིལ་འཁོར་དྲུག་གི་དབང་བསྐུར་བལྟས་ཆོག་ཏུ་བཀོད་པ་བཞུགས་པའི་དབུའོ།།
ན་མོ་གུ་རུ་བོ་དྷི་སཏཱ་ཡ། རིགས་གསུམ་མགོན་པོ་རྩ་བརྒྱུད་བླ་མ་དང་། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་ནས། །བྱ་སྤྱོད་དཀྱིལ་འཁོར་དྲུག་གི་དབང་བྱང་བཀོད། །བཀའ་ཡི་གནང་བ་སྩོལ་ལ་བྱིན་གྱིས་རློབས། །སྟ་གོན་བྱས་པའི་སློབ་མ་མདུན་དུ་འཚོགས། །ཁྲུས་བྱས་མེ་ཏོག་ནས་བཀྱེ་མཎྜལ་བཀོད། །མྨེའི་དཀྱིལ་འཁོར་དུ་དབང་ཞུ་བའི་ཕྱིར་རྗེས་ཟློས་མཛོད། སྐྱེ་རྒ་ན་འཆི་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བའི། །སྲིད་པའི་རྒྱ་མཚོར་བྱིང་བ་ལས། །འདོན་པར་བྱེད་པ་ཁྱོད་འབའ་ཞིག །དགའ་ཆེན་སྟོན་པ་ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་
ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ལན་གསུམ། ད་མདུན་གྱི་ནམ་མཁར་རྨེའི་དཀྱིལ་འཁོར་གྱི་ལྷ་ཚོགས་ལ། བླ་མ་བརྒྱུད་པ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་ཆོས་སྐྱོང་སྲུང་མའི་ཚོགས་དཔག་ཏུ་མེད་པས་བསྐོར་བ་མངོན་སུམ་ལྟ་བུར་བཞུགས་པའི་སྤྱན་སྔར་རྒྱུན་བཤགས་སྔོན་དུ་འགྲོ་བའི་ཐུན་
མོང་གི་སྡོམ་པ་དམ་ཚིག་རྣམས་བསྲུང་སྙམ་པའི་བསམས་པས། འདི་དག་གི་རྗེས་ཟློས་ལན་གསུམ་གསུམ་གསུང་བར་ཞུ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །ལན་གསུམ། ཁྱེད་རང་རྣམས་དམིགས་པ་འདི་བཞིན་མཛོད། ཨོཾ་ཞེས་བརྗོད་པས། ཁྱེད་རང་རྣམས་རྣམ་སྣང་དཀར་པོ་ཞལ་གཅིག་ཕྱག་གཉིས་པ་རྒྱན་གྱིས་བརྒྱན་པར་བསྒོམས། ལས་སྔགས་ཀྱིས་བྱིན་གྱིས་བརླབས་པའི་དར་ཁ་དོག་སྣ་ཚོགས་པའམ། དམར་པོའི་སྨད་གཡོགས་ཕུལ་བའི་མོས་པ་མཛོད། ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་བོ་ངྷི་ཨ་ལཾ་ཀཱ་ར་ཝསྦ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། ཞེས་སྨད་གཡོགས་བཀོན་ཚུལ་བྱ། སྟོད་གཡོགས་སྔོན་པོའམ། དམར་པོ་བཀོན་པའི་མོས་པ་གྱིས། ཨོཾ་བཛྲ་རཀྵ་ཧཾ། བཅོས་མའི་ཐོར་ཚུགས་སྦྱིན་པའི་མོས་པ་གྱིས། ཨོཾ་བཛྲ་ཨུཥཱི་ཥ་ཧཱུཾ་ཕཊ།་ལས་སྔགས་བརྗོད་ཅིང་། དར་དམར་པོའམ་སེར་པོའི་མིག་རས་བཅིང་བའི་མོས་པ་གྱིས། ཨོཾ་ཙཀྵུརྦྷནྡྷ་ཝ་ར་མ་ཎ་ཡ་ཧཱུྃ། མེ་ཏོག་གི་ཕྲེང་བ་ལག་ཏུ་གཏད་པའི་མོས་པ་
མཛོད། ཨ་ཁཾ་བཱི་ར་ཧཱུྃ། ལས་ཐམས་ཅད་ཀྱི་ཆུས་བསངས་ཏེ། དཀྱིལ་འཁོར་རང་རང་གི་ལས་སྔགས་བརྗོད། སློབ་མ་རྣམས་ལྷར་གསལ་བའི་སྙིང་གར་ཧཱུྃ་ལས་རྡོ་རྗེ་ནག་པོའི་ལྟེ་བར་ཉི་མ་ལ་ཧཱུྃ་ནག་པོ་དང་། མགྲིན་པར་ཨཱཿལས་པདྨ་དམར་པོ་འདབ་མ་བརྒྱད་པའི་ལྟེ་བར་ཉི་མ་ལ་ཨཱཿ༔དམར་པོ། དཔྲལ་བར་ཨོཾ་ལས་འཁོར་ལོ་དཀར་པོའི་ལྟེ་བར་ཟླ་བ་ལ་ཨོཾ་དཀར་པོ། དེ་དག་ལས་འཕྲོས་པའི་འོད་ཟེར་གྱིས་སློབ་མའི་ལུས་ངག་ཡིད་གསུམ་གྱི་དྲི་མ་ཐམས་ཅད་བྱང་ཞིང་དག་པར་བྱ་སྙམ་པའི་མོས་པ་གྱིས། ཧཱུྃ་ཞེས་བརྗོད་པས་དཀྱིལ་འཁོར་གྱི་ཤར་སྒོར་བཞག་པའི་མོས་པ་མཛོད། ཀྱེ། དགའ་བ་ལ་དགའ་བ་ཁྱེད་སུ་ཡིན། ཅི་ལ་དགའ། ད་འདིའི་རྗེས་ཟློས། བདེ་ཆེན་བདག་ནི་སྐལ་བཟང་ལའོ། །ད་ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བར་བསྒོམས་ལ། ཀུན་རྫོབ་སེམས་བསྐྱེད་དོན་དམ་སེམས་བསྐྱེད་ཟུང་འབྲེལ་དུ་ཉམས་སུ་བླང་བསམ་པ་གྱིས་ལ་སྔགས་འདིའི་རྗེས་ཟློས་ལན་གསུམ་མཛོད། ཨོཾ་སརྦ་ཡོ་ག་ཙིཏྟ་
ཨུཏྤ་ཏ་ཡཱ་མི། དེ་ལྟ་བུའི་སེམས་བསྐྱེད་པ་བརྟེན་པར་བྱ་བའི་ཕྱིར་སྙིང་གར་རྡོ་རྗེ་དང་བཅས་པའི་མེ་ཏོག་བཞག་པའི་མོས་པ་མཛོད། ཨོཾ་སུ་ར་ཏེ་ས་མ་ཡ་ཧཱུཾ་ཧོཿ སིདྡྷི་བཛྲ་ཡ་ཐཱ་སུ་ཁཾ། དེ་ལྟ་བུའི་ཡེ་ཤེས་པ་དེ་སྣོད་མིན་ལ་གསང་བར་གདམས་པའི་ཕྱིར་མགོ་བོར་རྡོ་རྗེ་བཞག་པའི་མོས་པ་མཛོད། འདི་རྣམས་ལ་ཉུང་ན་རྡོ་རྗེ་བཞག་ཅིང་མང་ན་བཞག་ཚུལ་བྱ་བས་འཐུས། དེང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རླབས་པར་འགྱུར་གྱི། ཁྱོད་ཀྱིས་ཀྱང་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི། དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་། མ་དད་པ་ལ་ཡང་མི་བྱའོ། །དེ་ཡན་ཆད་ཕྱི་འཇུག་གི་ཆོ་གའོ། །ད་སློབ་དཔོན་གྱི་ལག་གི་རྡོ་རྗེ་འདི་ལ་འཇུས་ནས་ཡོལ་བའི་ནང་དུ་ཞུགས་པའི་མོས་པ་མཛོད། ཨོཾ་ཡ་མཱནྟ་ཀྲིཏ་ཧཱུཾ། ཡོལ་བའི་ནང་དུ་བཅུག་པའི་མོས་པ་མཛོད། ཨ་ཁཾ་བཱི་ར་ཧཱུྃ། ཡིད་ཀྱིས་སྐོར་བ་ལན་གསུམ་བྱས་པའི་མོས་པས་རྗེས་ཟློས་ལན་གསུམ་མཛོད། མ་ཧཱ་ར་ཏ་སུ་དྲི་ཌྷ་སུ་ཏོ་ཥྱ་སུ་སུ་ཁོ་བཛྲ་སཏྭ་ཨཱཿརྱ་སིད་རྒྱ་ཚྭ། ཤར་སྒོ་ནས། མི་བསྐྱོད་པའི་ང་རྒྱལ་གྱིས་དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་
ནས། བདག་ལ་བྱིན་གྱིས་བརླབ་ཏུ་གསོལ་སྙམ་པས་རྗེས་ཟློས། ཨོཾ་སརྦ་ཏ་ཐཱ་ག་ཏ་པཱུ་ཛོ་པསྦྲ་ནཱ་ཡ་ཨཱཿཏྨ་ནཱ་ནཱིརླ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏཱ་ཨ་དྷི་ཏིཥྛ་སྭ་ནཱཾ། ཡང་དེ་ཉིད་ནས་ཕྱག་འཚལ་ཏེ། བདག་ལ་རྣམ་སྣང་གིས་བྱིན་གྱིས་བརླབ་ཏུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་བུདྡྷ་པཱུ་ཛོ་པསྦྲ་ནཱ་ཡ་ཨཱཿཏྨ་ནཱི་ནིརྨ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་བེ་རོ་ཙ་ན་ཨ་དྷི་ཏི་སྭཱ་མཱི། གཡས་བསྐོར་དུ་དེ་བཞིན་དུ་ལྷོ་སྒོ་ནས་ཕྱག་འཚལ་བར་མོས་ཏེ། རིན་འབྱུང་གིས་བདག་ལ་དབང་བསྐུར་དུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཡ་ཨཱཿཏཱ་ནཾ་ནིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྟ་ཨ་བྷི་ཥཉྩལཾ།། ནུབ་སྒོ་ནས། འོད་དཔག་མེད་ཀྱིས་བདག་ལ་ཆོས་ཀྱི་འཁོར་ལོ་བསྐོར་དུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་ཝརྟ་ནཱ་ཡ་ཨཱཿཏྨ་ནཱི་ནཱིདྨ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨཱ་ཙཀྲ་པྲ་བརྟ་ཡ་མཱི། བྱང་སྒོ་ནས། དོན་གྲུབ་ཀྱིས་བདག་ལ་ལས་ཀྱི་དངོས་གྲུབ་མ་ལུས་པ་བསྩལ་དུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ཎེ་ཨཱཿཏཱ་ནཱི་ནཱིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀ་
རུ་ཚྭ། སླར་ཡང་ཤར་སྒོ་ནས་སློབ་དཔོན་གྱི་ཞབས་ལ་ཕྱག་འཚལ་བར་མོས་ལ་སེམས་ཅན་ཐམས་ཅད་ཀྱི་དོན་འགྲུབ་པར་མཛད་དུ་གསོལ་སྙམ་པས་རྗེས་ཟློས་མཛོད། ཨོཾ་གུ་རུ་ཙ་ར་ཎོ་པཱུ་ཛ་པསྠཱ་ནཱ་ཡ་ཨཱཿཏཱ་ནཱི་ནཱིརྱ་ཏ་ཡཱ་མི། ཨོཾ་སརྦ་སཏཱ་པཱ་རི་པྲ་ཎ་ནཱཾ་ཨཱཿཏྨ་ནཱི་ནཱིདྨ་ཏ་ཡཱ་མི། ནང་དུ་འཇུག་པའི་ཆོ་གའོ། །དངོས་ནི། ད་ཡེ་ཤེས་པ་འབེབས་པའི་དོན་དུ་མཎྜལ་ཕུལ། ས་གཞི་སྤོས་ཆུས་བྱུག་ཅིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་དུ་སྤྱོད་པར་ཤོག །རྗེས་ཟློས་མཛོད། དེ་བཞིན་གཤེགས་པོ་ཐམས་ཅད་དང་དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ཤིག །སྒེའི་ལྷ་ཚོགས་རྣམས་བདག་ལ་དབབ་པར་མཛད་དུ་གསོལ། ལན་གསུམ། ད་ཡིད་མ་ཡེངས་པར་ཁྱེད་རང་རྣམས་སྐད་ཅིག་གིས་ཨ་ལས་བྱུང་བའི་འོད་དཔག་མེད་དམར་པོ་ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱའི་སྟེང་ན་པདྨ་དམར་པོ་འདབ་མ་བཅུ་དྲུག་པ་འཛིན་པ། སྐྱིལ་ཀྲུང་གིས་བཞུགས་པའི་འོག་ཏུ་ཡཾ་ལས་རླུང་གི་དཀྱིལ་འཁོར་སྔོ་སྐྱ། རྒྱལ་མཚན་གྱིས་མཚན་པས་ལུས་འདེག་
བཞིན་པ། དེའི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ།་ཨ་ཡིག་དམར་པོ་འོད་འབར་བ་དང་བཅས་པ་གཉིས་ཀས་བསམས་ལ། སློབ་དཔོན་ལ་མོས་གུས་དྲག་པོ་བྱས་པས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་ཞབས་འོག་གི་རླུང་ལ་ཕོག་པས། ལུས་རླུང་གི་སྟེང་དུ་འདར་ཡེད་ཡེད་གནས་པ་ལ། སྙིང་ཁའི་ས་བོན་ལས་འོད་འཕྲོས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་དཀྱིལ་འཁོར་ལྷ་ཚོགས་དཔག་ཏུ་མེད་པ་ཆད་དེ། སྙིང་གར་ཐིམ་པའི་མོས་པ་མཛོད། གཙོ་བོའི་སྔགས་བརྗོད། དཀྱིལ་འཁོར་ལས་ཀྱང་དེ་འདྲ་བ་ཆད་དེ་སྙིང་གར་ཐིམ། སླར་ཡང་འོད་འཕྲོས་པས་ཕྱོགས་བཅུའི་སངས་རྒྱས་བྱང་སེམས་སྤྱན་དྲངས་ཏེ། ཁྱེད་རང་རྣམས་ཀྱི་ལུས་ལ་སིབ་སིབ་ཐིམ་པའི་མོས་པ་མཛོད། སློབ་དཔོན་གྱིས་རྡོ་རྗེ་བསྡམས་པས་སློབ་མ་རྣམས་ཀྱི་སྙིང་གར་བཞག་པའམ། རྡོ་རྗེ་དྲིལ་བུ་དཀྲོལ་བཞིན་དུ། འདི་ཁྱོད་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཞེས་བྱར་གྲགས། །ཡེ་ཤེས་རྡོ་རྗེ་བླ་མེད་པ། །དེ་རིང་ཁྱོད་ལ་དབབ་པར་མཛོད། །ཨོཾ་བཛྲ་ཨཱཿ་ཝེ་ཤ་ཡ་ཨ་ཨ། མང་དུ་བརྗོད་ཅིང་། སྤོས་དུད་རོལ་ཆེན་བྱ། གཙོ་བོའི་སྔགས་དང་། ཨཱཿ་
ཝེ་ཤ་ཡ་སྟམྦྷ་ཡ་ར་ར་ར་ར་ཙཱ་ལ་ཡ། ཙཱ་ལ་ཡ་ཧཱུྃ་ཧ་ཨཿ ཛྷཻ༔ ཏིཥྛ་མ་ཧཱ་ཀྲོ་དྷ་ཨཱཿ་ཝེ་ཤ་ཡ་སྟམྦྷ་ཡ་ར་ར་ར་ར་ཙཱ་ལ་ཡ། ཙཱ་ལ་ཡ་ཧཱུྃ་ཧ་ཨཿ ཛྷཻ༔ ཅེས་མང་དུ་བརྗོད། དེས་ཡེ་ཤེས་པ་ཕེབས་སམ་མ་ཕེབས་ཀྱང་རུང་སྟེ་སྤོག་ཆོག་ལ་དམིགས་པ་འདི་བཞིན་དུ་མཛོད། སློབ་དཔོན་དཀྱིལ་འཁོར་གྱི་གཙོ་བོར་གསལ་བ་ལ་མོས་གུས་དྲག་པོ་བྱས་པས། དེའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། ཁྱད་པར་དུ་དཀྱིལ་འཁོར་ལྷ་ཚོགས་རྣམས་ཀྱི་ཐུགས་རྒྱུད་བསྐུལ་བས། དེ་རྣམས་ཀྱི་སྐུ་གསུང་ཐུགས་རྡོ་རྗེའི་རང་བཞིན་དཀྱིལ་འཁོར་ལྷ་ཚོགས་རྣམས་ཀྱི་རྣམ་པ་ཅན་དཔག་ཏུ་མེད་པ་སྤྱན་དྲངས་ཏེ། ཁྱེད་རང་གི་ལུས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། རྡོ་རྗེ་གསོར་དྲིལ་བུ་གསིལ་ཞིང་། འདི་ཁྱོད་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཞེས་སུ་བརྗོད། །རྡོ་རྗེ་ཡེ་ཤེས་བླ་ན་མེད། །དེ་རིང་ཁྱོད་ལ་ཕེབས་པར་མཛོད། །ཨོཾ་བཛྲ་ཨཱཿ་བེ་ཤ་ཡ་ཨ་ཨ་ཨ་ཨ། ཡེ་ཤེས་པ་ཕེབས་པ་དེ་རྣམས་བརྟན་པར་བྱ་བའི་ཕྱིར་མགོ་བོར་རྡོ་རྗེ་རྒྱ་གྲམ་དུ་བཞག་པའི་མོས་པ་མཛོད། ཏིཥྛ་བཛྲ།
ད་ཁྱེད་རང་རྣམས་དཀྱིལ་འཁོར་གྱི་ཕྱོགས་སུ་ལྟོས། མིག་ལམ་ན་ཇི་ལྟར་སྣང་། དཀར་པོ་མཐོང་ན་ཞི་བ། སེར་པོ་རྒྱས་པ། དམར་པོ་དབང་། ནག་པོ་མངོན་སྤྱོད། །ཁྲ་བོ་དང་ལྗང་ཁུ་མཐོང་ན་ལས་སྣ་ཚོགས་འགྲུབ་པར་འགྱུར་རོ། །སློབ་དཔོན་གྱིས་ཕྱག་གཡས་ཀྱིས་རྡོ་རྗེ་དང་བཅས་པས་སློབ་མའི་གཙོ་བོ་ཞིག་གི་མཐེ་བོང་གཉིས་ནས་བཟུང་ཞིང་། བསྐོར་བ་ལན་གསུམ་བྱས་པའི་མོས་པ་མཛོད། ལས་བུམ་གྱི་སྔགས་གང་ཡིན་བརྗོད། རྡོར་དྲིལ་འཛིན་པས། ཡང་དག་པ་ཡི་དཀྱིལ་འཁོར་འདིར། །བདག་གི་སློབ་མ་གཞུག་པ་འདིའི། །ལྷ་རྣམས་ཀྱིས་ནི་རིམ་པ་ནི། །བསོད་ནམས་ཇི་ལྟར་དེ་ལྟར་ཤོག །འདི་ཡིས་དངོས་གྲུབ་ཅི་འདྲར་འགྱུར། །རིགས་ནི་གང་གི་སྣོད་དུ་འགྱུར། །བསོད་ནམས་མཐུ་ཡང་ཅི་འདྲ་བར། །དེ་འདྲར་དཀྱིལ་འཁོར་དུ་གྱུར་ཅིག །གསུམ་བརྗོད། མེ་ཏོག་གི་ཕྲེང་བ་ཏྭཾ་གྱིས་སྔགས་པ་ཐལ་མོའི་བར་དུ་བཟུང་། ཁྱེད་རང་རྣམས་ཀྱི་གནས་གསུམ་དུ་ཨོཾ་ཨཱཿཧཱུྃ་གི་ཡི་གེ་རྣམས་ལས་འཕྲོས་པའི་འོད་ཟེར་གྱིས། ལུས་ཐམས་ཅད་གང་བས་སྒོ་གསུམ་དྲི་མ་རྣམས་བཀྲུས་ཤིང་དག་པར་མོས་ལ། དཀྱིལ་འཁོར་དེར་ཡིད་ཀྱིས་ཞུགས་ཏེ་གཙོ་བོའི་དབུ་ལ་
མེ་ཏོག་དོར་བའི་མོས་པས་རྗེས་ཟློས་མཛོད། ཨོཾ་ཏིཥྛ་བཛྲ་དྲི་ལྷོ་མེ་བྷ་བ། ཤཱ་ཤུ་ཏོ་མེ་བྷ་བ། ཧྲཱིཿ་ད་ཡམྨེ་ཨ་དྷི་ཏི་སརྦ་སིདྡྷི་མྨེ་པྲ་ཡཙྪ་ཧཱུཾ། ཧ་ཧ་ཧ་ཧ་ཧོཿ ཨ་ཁཾ་བཱི་ར་ཧཱུཾ། པྲ་ཏིཙྪཀུ་སུ་མ་ཨཉྫ་ལི་ནཱི་ཐ་ཧོཿ མེ་ཏོག་དེ་གཙོ་བོའི་དབུ་ཐོག་ཏུ་བབ་པ། མེ་ཏོག་གི་ཕྲེང་བ་ཁྱེད་རང་རྣམས་ཀྱི་སྤྱི་བོར་བཅིངས་པའི་མོས་པ་མཛོད། ཨོཾ་པྲ་ཏི་སྲྀཏྣ་ཏ་ཨི་མཾ་སཏཱ་མ་ཧཱ་བ་ལ།་ཕྲེང་བའི་དབང་བསྐུར་བའོ། །ད་ཁྱེད་རང་རྣམས་ཀྱི་སྙིང་གར་ཟླ་བ་ལ་བདག་པོའི་ས་བོན་ཨཱཿའམ་ཧཱུྃ་དང་། དཔྲལ་བར་རཾ། མིག་གཉིས་སུ་ཨོཾ་ཡིག་འབར་བ་རེ་རེ་སྒོམས་ཤིག །ཨོཾ། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཐམས་ཅད་སྤྱན་ནི་དབྱེ་བར་མཛོད། །ཨོཾ་ཛྙཱ་ན་ཙཀྵ་ཧཱུྃ་ཨཱཿཛྫསྭཱ་ཧཱ། ཞེས་བརྗོད་ཅིང་གདོང་གཡོགས་བསལ་བར་བྱའོ། །ཧེ་བཛྲ་པ་ཤྩ། ད་བཅོམ་ལྡན་འདས་རྨེ་ཞེས་རྒྱས་པར་མཚན་སོ་སོ་ནས་བརྗོད་དོ། །བསྡུ་ན། དཀྱིལ་འཁོར་རྟེན་བརྟེན་པ་དང་བཅས་པ་མངོན་སུམ་དུ་མཐོང་བའི་མོས་པ་མཛོད། ད་ནི་དད་པའི་ཤུགས་ཀྱིས་སུ། །དཀྱིལ་འཁོར་འདི་དེ་ཉིད་ལ་ལྟོས། །ཁྱོད་ནི་སངས་རྒྱས་རིགས་སུ་སྐྱེས། །ཕྱག་རྒྱ་སྔགས་ཀྱི་
བྱིན་གྱིས་རློབས། །དངོས་གྲུབ་ཀུན་གྱི་ཕུན་སུམ་ཚོགས། །དམ་ཚིག་མཆོག་ཏུ་ཁྱོད་འགྱུར་གྱིས། །གསང་སྔགས་རྣམས་ལ་སྒྲུབ་པ་གྱིས། །ད་ཆེད་དུ་། བརྗོད་པ་འདིའི་རྗེས་ཟློས་མཛོད། ཨོཾ་རྡོ་རྗེའི་དཀྱིལ་འཁོར་དཀྱིལ་འཁོར་ཆེན་པོར་བདག་ཞུགས་སོ། །ཨོཾ་རྣལ་འབྱོར་དཀྱིལ་འཁོར་དཀྱིལ་འཁོར་ཆེན་པོ་བདག་གིས་མཐོང་། །ཨོཾ་གསང་བའི་དཀྱིལ་འཁོར་དཀྱིལ་འཁོར་ཆེན་པོར་བདག་དབང་བསྐུར། །ས་མ་ཡཿཧོ་ཧོ་ཧོཿ དཀྱིལ་འཁོར་དུ་ཞུགས་པའི་ཆོ་གའོ། །ད་རང་དོན་ཕུན་སུམ་ཚོགས་པ་རྡོ་རྗེ་སློབ་མའི་དབང་ཞུ་བའི་ཕྱིར་མཎྜལ་ཕུལ། ས་གཞི་སྤོས་ཆུས་བྱུག་ཅིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་དུ་སྤྱོད་པར་ཤོག །བྱང་ཆུབ་རྡོ་རྗེ་སངས་རྒྱས་ལ། །མཆོག་ཆེན་ཇི་ལྟར་བསྩལ་བ་ལྟར། །བདག་ཀྱང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །གསུམ། ཁྱེད་རང་རྣམས་རྩ་བའི་དཀྱིལ་འཁོར་གྱི་ཤར་ཕྱོགས་དབང་སྟེགས་དཀྱིལ་འཁོར་གྲུ་བཞི་པ། སྒོ་གཅིག་ནུབ་ཏུ་ཕྱོགས་པ་དཀར་དམར་ནག་པའི་ར་བ་རིམ་
པ་གསུམ་མམ་རིམ་པ་གཅིག་གང་རུང་དང་ལྡན་པ། དེ་ཡི་ལྷ་སྣམ་རིམ་པ་གཉིས་ལ་གཡོས་ཕྱོགས་སུ་ཆུ་བཞི་དང་། གཡོན་ཕྱོགས་སུ་ཉེར་སྤྱོད་ལྔ། མདུན་དུ་བཟེད་ཞལ་དང་སྦྱར་བའི་ཡོ་བྱད་དུ་མ་དང་བཅས་པས་བསྐོར་བའི་ནང་དུ། པདྨ་དཀར་པོ་འདབ་མ་བརྒྱད་པ་བཀྲ་ཤིས་ཀྱི་རྟགས་བརྒྱད་དམ། ཡང་ན་ཕྱོགས་བཞིར་རིགས་བཞིའི་མཚན་མ་དང་དབུས་སུ་ཤིང་གདན་ལ་ཟླ་བའམ་ཉི་མའི་དཀྱིལ་འཁོར་གྱི་སྟེང་དུ་ཁྱེད་རང་རྣམས། སྤྱི་ཁྱབ་ཏུ་རྡོ་རྗེ་སེམས་དཔའ་འམ། དཀྱིལ་འཁོར་གྱི་གཙོ་བོའི་རྣམ་པར་གནས་པའི་སྟེང་དུ་བླ་བྲེ། །གཡས་སུ་གདུགས་དཀར་པོ་གསེར་གྱི་ཡུ་བ་ཅན། གཡོན་དུ་རྒྱལ་མཚན་དང་བ་དན་ལ་སོགས་པ་མཆོད་པའི་ཚོགས་དང་བཅས་ཏེ་བཞུགས་པའི་མོས་པ་མཛོད། ཁྱེད་རང་དང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་བ་ནས་ནས་དེ་བཞིན་གཤེགས་པ་རིགས་ལྔ་ལ་སོགས་པ་དབང་ལྷ་གདན་གསུམ་ཚང་བའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་སྤྱན་དྲངས། ཨོཾ་བཛྲ་ས་མཱ་ཛཿ ཨོཾ་སརྦ་ཏ་ཐཱ་ག་ཏ་ཨནྡྷཾ་སོགས་ཀྱིས་མཆོད་ནས་རྡོར་དྲིལ་འཛིན་པས།
རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས། གཙོ་བོའི་ཐུགས་ཀ་ནས་བྱེ་བའི་བདུད་རྩི་འཁྱིལ་པ་བྱོན་ཏེ། ལས་ཀྱི་རྡོ་རྗེ་དང་དབྱེར་མེད་དུ་གྱུར་ནས། ཁྱེད་རང་རྣམས་ལ་སྦྱང་བའི་མོས་པ་མཛོད། ལས་ཀྱི་རྡོ་རྗེ་ནི་མཆོད་གཡོག་པ་ཡིན་ལ། སྦྱོང་བའི་རྫས་དྲུག་གིས་སྦྱོང་བ་བྱ་ཞིང་། སློབ་དཔོན་གྱིས་སྔགས་བརྗོད་རྒྱུ་ཡིན་ནའང་། སློབ་མ་ཉུང་ན་སློབ་དཔོན་རང་གིས་བྱེད་སྲོལ་ཏེ། དེ་ཙམ་མི་ལྕོགས་ན་ཙཀྲི་གཅིག་ལ་རྫ་ས་དྲུག་ཀ་བྲིས་ནས་་དམིགས་པ་སྤྱོད་ཅིང་སྔགས་བརྗོད་དོ། །སློབ་མ་ལ་གཡས་གཡོན་དུ་བསྐོར་བའི་མོས་པ་བྱའོ། །ཁྱེད་རང་རྣམས་ཀྱི་གཡས་སུ་ཁམ་ཕོར་མེས་བཀང་བ་དང་། གཡོན་དུ་ཆུ་གཙང་བཞག་པས་ལས་ཀྱི་རྡོ་རྗེས་མཐེབ་སྲིན་གཉིས་ཀྱིས་ཡུངས་ཀར་དང་ཏིལ་ནག་བསྲེས་པ་བཟུང་སྟེ། ཁུ་ཚུར་གཡས་ཀྱིས་གཡས་ནས་བསྐོར། གཡོན་གྱིས་གཡོན་ནས་བསྐོར། གཤིབ་སྟེ་གཉིས་ཀ་ནས་བསྐོར་ཏེ། བགེགས་དང་སྡིག་པ་སྦྱོང་བའི་ཕྱིར། མེ་དང་ཆུར་དོར་བའི་མོས་པ་མཛོད། ཨོཾ་སརྦ་པཱ་པཾ་ད་ཧ་ན་བཛྲ་ཡེ་བཛྲ་སཏཱ་སྱ་སརྦ་པཱ་པཾ་ད་ཧ་ན་སྭཱ་ཧཱ། རྡོ་རྗེའི་ཁུ་ཚུར་
གཉིས་སུ་ཆུ་གཙང་བླུགས་ནས་སྔོན་ལྟར་བསྐོར་ཏེ་མེ་ཆུར་དོར་བའི་མོས་པ་མཛོད། ༀ་ཧཱུྃ་ཌ་ཌི་ཏ་ཕཊ༔ སོ་མ་བཏང་བའི་ཁམ་ཕོར་དཀར་པོ་མཐེབ་སྲིན་གྱིས་བླངས་ཏེ་སྔར་ལྟར་བསྐོར་ནས་སྣོད་གཅིག་ཏུ་བཞག་པའི་མོས་པ་མཛོད། ཨོཾ་སརྦ་སཾ་ཤོ་དྷ་ནི་སྭཱ་ཧཱ། བ་ཡི་ལྕི་བའི་ཆངས་བུ་དང་དུར་བའི་མྱུ་གུ་སྔར་ལྟར་བསྐོར་ཞིང་སྣོད་གཅིག་ཏུ་བཞག་པའི་མོས་པ་མཛོད། ཨོཾ་སརྦ་མཱ་ལ་ཨཎ་བི་ཤྭ་དྷ་ནི་སྭཱ་ཧཱ། ཟན་ཆངས་དང་ཏིང་ལོ་འབར་བཞིན་པ་སྔར་ལྟར་བསྐོར་ནས་སྣོད་དུ་བཞག་པའི་མོས་པ་མཛོད། ཨོཾ་པུཎྱེ་ཛྙཱ་ན་དྷ་རོད་སཾ་བྷོར་དྷ་ཀ་ཡེ་སྭཱ་ཧཱ། ཕྱིང་རས་དཀར་པོ་སྔར་ལྟར་བཟུང་ནས་བསྐོར་ཞིང་སྣོད་དུ་བཞག་པའི་མོས་པ་མཛོད། ཨོཾ་སརྦ་སཾ་ཤཱ་དྷ་ནི་སྭཱ་ཧཱ། སློབ་མ་རྣམས་ཀྱི་དབང་པོ་དྲུག་གི་གླུད་སྦྱོང་བའི་རྫས་དྲུག་པོའི་སྣོད་དེ་མཆོད་གཡོག་པས་སློབ་མ་རྣམས་ལ་ལན་གསུམ་བསྐོར་ཞིང་ཕྱི་རོལ་དུ་དོར་བས་བགེགས་རྣམས་ཕྱིར་བསྐྲད་པར་སྒོམས་ཤིག །རྡོ་རྗེ་གསོར་ཞིང་དྲིལ་བུ་འཁྲོལ།་གཙོ་བོའི་སྔགས་དང་ལས་སྔགས་དྲག་ཏུ་བརྗོད། གཞན་རྣམས་རོལ་ཆེན་བྱའོ། །དེ་ནས་འབག་བཙོག་སྦྱོང་བའི་ཉེ་རེག་བྱ་བ་ནི། ངེད་རང་ཐམས་ཅད་ཀྱིས་ལག་པ་གཡས་ཀྱི་གུང་སྲིན་གྱིས་ཆུ་འདི།
ཁའི་ཟེའུ་འབྲུ་ལ་ལན་གསུམ་བྱུག །དེ་ནས་མིག་གཉིས། རྣ་བ་གཉིས། སྣ་བུག་གཉིས། མཆུ་གཉིས། ལག་པའི་མཁྲིག་མ་གཉིས། མགོ་བོའི་སྟེང་ལྟོ་བ་ལ་བྱབ་པའི་ཚུལ་བྱས་ཤིང་མཐར་ཁ་བཤལ་ནས་ཕྱིར་ཕོས་ཏེ་ལག་པ་གཉིས་ཀྱི་ཁུ་ཚུར་གྱི་རྒྱབ་ཀྱིས་ཁ་ཡིས་གཤེར་རྣམས་གཡས་གཡོན་དུ་ཕྱིས་པས་འབག་བཙོག་སྦྱོང་བའི་མོས་པ་མཛོད། སློབ་དཔོན་རང་གི་ལག་པ་གཡོན་དུ་ཆུ་བླུགས་ནས་ཙོག་པུར་བསྡད་པའི་པུས་མོའི་བར་དུ་བཟུང་ནས། ཨོཾ་སརྦ་སཾ་ཤཱ་དྷ་ནི་སྭཱ་ཧཱ། ཞེས་མང་དུ་བཟླས་ཤིང་སྔོན་དུ་སྨྲས་པ་ཐམས་ཅད་རང་གིས་བྱའོ། །སློབ་དཔོན་གྱིས་རྡོ་རྗེ་དང་བཅས་པའི་འཐོར་གཡབ་ཀྱིས། གཡོན་གྱི་དུང་ཕོར་ནས་དྲི་བཟང་གི་ཆུ་བླངས་ཏེ། སློབ་མ་རྣམས་ཀྱི་སྙིང་གར་འཐོར་ཞིང་། ཨོཾ་བཛྲ་གྷནྡྷེ་ཧཱུྃ། མེ་ཏོག་འཐོར་ཞིང་། ཨོཾ་བཛྲ་པུཋེ་ཧཱུྃ། གཡས་པས་དྲི་བཟང་གིས་གང་བའི་དུང་ཆུས།་གཡོན་པད་སྡེར་དུ་ཕྱག་ཏུ་མཆོད་ཡོན་ཕུལ་བའི་ཚུལ་གྱིས་ནར་ཙམ་བླུགས་ཤིང་། ཨོཾ་ཧིཔྲ་ཝ་ར་སཏྟ་ར་ཨཧཱུྃ་པྲ་ཏིཙྪ་ཡེ་སྭཱ་ཧཱ། མར་མེ་འབར་བཞིན་པ་སློབ་མའི་མདུན་རྒྱབ་ནས་བསྐོར་བའི་མོས་པ་མཛོད། ཨོཾ་བཛྲ་དྷི་པཾ་ཧཱུཾ། སརྫ་རསྔའི་བདུག་པ་ཞེས་པ་སྤོས་དཀར་དང་མར་དཀར་སྦྱར་བ་སྤོས་ཕོར་མེས་བཀང་བར་བླུགས་ནས། སློབ་དཔོན་
གྱིས་སྤོས་ཕོར་རྡོ་རྗེའི་ཐག་པས་དཀྲིས་ཏེ་སློབ་མ་རྣམས་ཀྱི་མདུན་ནས་འགྲིམ་པའི་མོས་པ་མཛོད། ཧཱུཾ་ཧཱུཾ་ཧཱུཾ། དེ་ལྟར་སྤོས་དང་མཆོད་པ་ལྔས་སྦྱང་བ་སྟེ། དབང་བསྐུར་བའི་སྔོན་འགྲོའོ། །སློབ་མ་དང་དབང་རྫས་རྣམས་ལས་བུམ་གྱི་ཆུ་དང་ལས་སྔགས་ཀྱིས་བསངས། སློབ་དཔོན་དཀྱིལ་འཁོར་གྱི་གཙོ་བོར་གསལ་བ་ལ་མོས་གུས་དྲག་པོ་བྱས་པས། དེའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས། ཚེ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་སྦྱངས་ཏེ། ལུས་འོད་ཀྱི་རང་བཞིན་ནས་སྟོང་པ་ཉིད་དུ་གྱུར། སྟོང་པའི་ངང་ལས་པད་ཟླའི་སྟེང་དུ་ཧཱུྃ་ལས། རྡོ་རྗེ་ཧཱུྃ་གིས་མཚན་པ་ལས། རྡོ་རྗེ་སེམས་དཔའ་སྐུ་མདོག་དཀར་པོ་གཡས་རྡོ་རྗེ་ཐུགས་ཀར་དང་། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང་། མཚན་དང་དཔེ་བྱད་ཀྱིས་བརྒྱན་པ། དར་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། དཀྱིལ་འཁོར་རེ་རེའི་དབང་བྱེད་ན་དེའི་གཙོ་བོ་བསྐྱེད་དོ། །སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས།
རང་བཞིན་གྱི་གནས་ནས་ཕྱོགས་བཅུའི་རིགས་ལྔ་ཡབ་ཡུམ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་བཛྲ་ཨནྡྷཾ་སོགས། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་བཞིན་འདི་ལ་བསྩལ་དུ་གསོལ། །ཞེས་གསོལ་བ་བཏབ་པས། སློབ་མ་རྡོ་རྗེ་སེམས་དཔར་གསལ་བ་ལ་དབང་བསྐུར་བ་དང་། ཡེ་ཤེས་པ་འདྲེས་པ་དུས་གཅིག་ཏུ་བྱས། ཛཿཧཱུྃ་བཾ་ཧོཿ ཧཱུྃ་ཞེས་དབང་སྟེགས་ལ་འཁོད་པར་གྱུར། བསངས། སྭ་བྷ་ཝས་སྦྱངས། ཁྱེད་རང་རྣམས་ཀྱི་ཕུང་པོ་དང་། ཁམས་དང་སྐྱེ་མཆེད་རྣམས་དང་དབང་རྫས་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་གླང་པོ་ཆེ་དང་། རྟ་མཆོག་དང་། རྨ་བྱ་དང་། མཁའ་ལྡིང་དང་། སེང་གེས་བཏེག་པའི་རིན་པོ་ཆེའི་ཁྲི། སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ། ཧཱུྃ་ལས་རྡོ་རྗེ་ཧཱུྃ་གིས་མཚན་པ། ཧཱུྃ་ལས་རིན་པོ་ཆེ་ཏྭཾ་གྱིས་མཚན་པ། ཧཱི༔ལས་པདྨ་འདབ་མ་བཅུ་དྲུག་པ་ཧྲཱིཿས་མཚན་པ། ཨཱཿལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཨཱཿས་མཚན་པ། ༀ་ལས་འཁོར་ལོ་ཨོཾ་གྱིས་མཚན་པ། དེ་རྣམས་
ལས་འོད་ཟེར་དཔག་ཏུ་མེད་པ་འཕྲོས་འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། ཁྱེད་རང་རྣམས་དང་དབང་རྫས་བུམ་ཆུ་དབུ་རྒྱན་རྡོ་རྗེ་དྲིལ་བུ་རྣམས་རིགས་ལྔ་སོ་སོའི་སྐུར་གྱུར་པ་ནི། མི་བསྐྱོད་པ་སྔོན་པོ་གཡས་རྡོ་རྗེ་དང་བཅས་པའི་ས་གནོན། གཡོན་མཉམ་བཞག་གི་ཕྱག་རྒྱ། རིན་འབྱུང་སེར་པོ་གཡས་རིན་པོ་ཆེ་ཆ་དགུ་པ་དང་བཅས་པའི་མཆོག་སྦྱིན། གཡོན་མཉམ་བཞག །འོད་དཔག་མེད་དམར་པོ་མཉམ་བཞག་གི་ཕྱག་རྒྱ་མཛད་པའི་སྟེང་ན་པདྨ་དམར་པོ་འདབ་མ་བཅུ་དྲུག་པ་འཛིན་པ། དོན་ཡོད་གྲུབ་པ་ལྗང་ཁུ་གཡས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་དང་བཅས་པའི་སྐྱབས་སྦྱིན། གཡོན་མཉམ་བཞག །རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་མཛད་པའི་རྩེ་མོར་ཆོས་ཀྱི་འཁོར་ལོ་རྩིབས་བཅུ་དྲུག་པ་བསྣམས་པ་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་དང་དཔེ་བྱད་ཀྱིས་བརྒྱན་ཅིང་། དབུ་སྐྲ་རལ་པའི་ཐོར་ཅོག་ཏུ་བྱས་པ་ལ་དར་སྣ་ཚོགས་ཀྱི་ན་བཟའ་དང་། རིན་པོ་ཆེའི་རྒྱན་གྱིས་བརྒྱན་པ། དེ་རྣམས་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿཋདམར་པོ།་ཐུགས་ཀར་ཧཱུཾ་སྔོན་པོ་ཐུགས་ཀའི་ས་
བོན་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིགས་ལྔའི་རྣམ་པར་སྤྱན་དྲངས། ཁྱེད་རང་རྣམས་དང་དབང་རྫས་ཀྱི་ལྷ་ལ་གཉིས་སུ་མེད་པར་ཐིམ། ཛཿཧཱུྃ་བཾ་ཧོཿ དབང་རྫས་ཀྱི་ལྷ་ལ་བུམ་ཆུ་འཐོར་ཞིང་། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་བུམ་པའི་ཆུས་དབང་རྫས་ཀྱི་ལྷ་རྣམས་ལ་དབང་བསྐུར་སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས། མི་བསྐྱོད་པ་ལ་སོགས་རིགས་སོ་སོའི་དབུ་བརྒྱན། དབང་རྫས་ཀྱི་རིགས་ལྔ་ཞུ་བ་ལས་བྱུང་བའི་བུམ་པའི་ཆུ། ཅོད་པན། རྡོ་རྗེ། དྲིལ་བུ་རྣམས་སུ་གྱུར། ནམ་མཁར་བཞུགས་པའི་དེ་བཞིན་གཤེགས་པ་དང་སློབ་དཔོན་དང་དཀྱིལ་འཁོར་ལ་བཞུགས་པའི་ལྷ་དང་བཅས་པ་ལ་གསོལ་བ་འདེབས་པའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས། བདག་ལ་མངོན་པར་དབང་བསྐུར་བར་བསྩལ་དུ་གསོལ། ནམ་མཁར་བཞུགས་པའི་དེ་བཞིན་གཤེགས་པ་རྣམས་ཀྱིས། དབང་བསྐུར་བའི་ཏིང་ངེ་འཛིན་ལ་མཉམ་པར་བཞག །སྤྱན་མ་སོགས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པས་དབང་བསྐུར། བྱང་ཆུབ་
སེམས་དཔའ་རྣམས་ཀྱིས་བཀྲ་ཤིས་བརྗོད། ཁྲོ་བོ་རྣམས་ཀྱིས་བགེགས་བསྐྲད། གཟུགས་རྡོ་རྗེ་མ་རྣམས་ཀྱིས་མཆོད་བཞིན་དུ་དབང་བསྐུར་བའི་མོས་པ་མཛོད། ལས་ཀྱི་རྡོ་རྗེས་བུམ་པ་བཏེག་ལ། སློབ་མའི་ཕྱོགས་སུ་བཟུང་ཞིང་། སློབ་དཔོན་གྱིས་རྡོར་དྲིལ་འཛིན་པས་མེ་ཏོག་འཐོར་ཞིང་། །བཀྲ་ཤིས་གང་ཞིག་མ་ལུས་རྡོ་རྗེའི་རིགས་དང་ལྡན། །སྡང་བས་ཟིལ་མནན་སྐྱེ་བོ་རྣམ་པར་སྦྱོང་མཛད་པ། །མི་བསྐྱོད་མགོན་པོ་ཞེས་བྱ་མཚན་གསོལ་དེ་ཡི་ནི། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མཐའ་དག་འཁོར་ལོའི་རིགས་དང་ལྡན། །རྣམ་པར་སྣང་མཛད་འཁོར་བའི་སྡུག་བསྔལ་རྟག་འཕྲོག་ཅིང་། །རྨོངས་པས་ཟིལ་མནན་སྐྱེ་བོ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་རིན་ཆེན་རིགས་དང་ལྡན། །ཕོངས་པའི་སྡུག་བསྔལ་གྲོལ་བར་ཡོངས་སུ་རབ་བརྩོན་ཞིང་། །ཁེངས་པས་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་པདྨའི་རིགས་དང་ལྡན། །འཇིག་རྟེན་དབང་ཕྱུག་སྲིད་
པའི་དྲྭ་བ་འཇོམས་པ་པོ། །ཆགས་པས་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་ལས་ཀྱི་རིགས་དང་ལྡན། །བརྩེ་བའི་བདག་ཉིད་ལོག་པར་ལྟ་བ་ངེས་པར་སྤྱོད། །དེ་སྦྱོང་ཐབས་སྟོན་དེ་ནི་ཀུན་ནས་སེལ་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །ཨོཾ་མ་ཧཱ་སུ་ཁ་བཛྲ་སཏྭ་ཨ་བྷི་ཊི་ཀ་ན་ཧཱུཾ། ཨ་བྷི་ཥིཉྩ་མི་སརྦ་ཏ་ཐཱ་ག་ཏ་ཨ་དྷི་པ་ཏེ་ཏཱ་ནོ་པ་ཌི་རྣོ་མེ་བྷ་ཝ། སློབ་དཔོན་གྱིས་རྡོ་རྗེ་དང་བཅས་པས་རྣམ་༧རྒྱལ་བུམ་པ་བཟུང་ལ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་ཨཱཿ༔བཛྲ་ཨུད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་སྟེ་ཨ་ཧཾ། ཉུང་ན་བུམ་པ་མགོར་བཞག་བུམ་ཆུ་བླུད། མང་ན་མཆོད་གཡོག་པ་གཉིས་ཀྱིས་བུམ་ཆུ་དེ་བསྲེས་པའི་ཆུ་བུམ་པ་གཞན་དུ་བླུགས་ལ། སློབ་མ་རྣམས་ཀྱི་ལག་པར་བླུག་ཅིང་བཀྲུ་འཇུག །གཞན་གཅིག་གིས་ཁྲུས་གཞོང་ཡང་མཉམ་དུ་འགྲིམ། །མཆོད་གཡོག་པ་དེ་དབུ་རྒྱན་སོགས་ཀྱིས་བརྒྱན་པ་ཞིག་གིས་གདུགས་དཀར་པོ་ཞིག་དེ་རྣམས་ཀྱི་སྤྱི་བོར་འགྲིམ། མ་རྫོགས་བར་དུ་རོལ་ཆེན་བྱ། ཁྱེད་
རང་རྣམས་ཁྲུས་ཀྱི་དཀྱིལ་འཁོར་ལས་བབ་སྟེ། གོས་དམར་པོ་གསར་པ་གྱོན་རིན་པོ་ཆེའི་རྒྱན་གྱིས་བརྒྱན། རྡོ་རྗེའི་གླུ་ལེན་ཅིང་དཀྱིལ་འཁོར་ལ་བསྐོར་བ་ལན་གསུམ་བྱས་པའི་མོས་པ་མཛོད། མཆོད་གཡོག་པས་དཀྱིལ་འཁོར་ལ་བསྐོར་བ་ལན་གསུམ་བྱ་བའམ་བྱ་བའི་ཚུལ་བྱ། སློབ་དཔོན་གྱིས་ཚིགས་བཅད་འདི་དག་དབྱངས་འདྲ་བ་བྱ། བདེ་བ་ཆེན་པོ་འདོད་ཆགས་ཆེ། །རྡོ་རྗེ་ཆེན་པོ་ནོར་ཆེ་བ། །ཤེས་རབ་ཆེན་པོ་ཡེ་ཤེས་ཆེ། །རྡོ་རྗེ་སེམས་དཔའ་དེང་བདག་སྒྲུབས། །སངས་རྒྱས་ཀུན་གྱི་རྡོ་རྗེ་ཆེ། །དངོས་གྲུབ་ཀུན་གྱི་བདེ་སྟེར་བ། །ཀུན་གྱི་དབང་བསྐུར་བསྐུར་དོན་དུ། །རྡོ་རྗེའི་དབང་བསྐུར་བླ་ན་མེད། །ཨེ་མ་ཧོཿ དང་པོའི་སངས་རྒྱས་དོན་དམ་སྐུ་ཅན་རྒྱལ། །ཐར་པ་ནོར་ཆོས་འདོད་པ་སྟེར་མཛད་རྒྱལ། །ཡེ་ཤེས་ལྷ་དང་དགའ་ལྡན་རང་བཞིན་རྒྱལ། །མགོན་པོ་བདེ་ཆེན་ཕྱག་ན་རྡོ་རྗེ་རྒྱལ། །དེ་ལྟར་བུམ་པའི་ཆུས་སྤྱི་བོ་ནས་དབང་བསྐུར་བས། ལུས་ཐམས་ཅད་ཡེ་ཤེས་ཀྱི་ཆུ་རྒྱུན་གྱིས་གང་། དྲི་མ་ཐམས་ཅད་དག །དབང་ཐམས་ཅད་ཐོབ་ཆུའི་ལྷག་མ་ཡར་ལུད་པ་ལས། སྤྱི་བོར་མི་བསྐྱོད་པས་དབུར་བརྒྱན། དེ་ལྟར་ཁྱེད་རྣམས་མི་བསྐྱོད་པའི་རང་བཞིན་དུ་
གྱུར་པ་ལ། བདག་གིས་མཆོད་པ་འབུལ་བར་མོས། ཨོཾ་ཨཀྵ་བྷུ་ས་པཱ་རི་ཝ་ར་ཨབྷཾ་སོགས། ཤབྡའི་བར་གྱིས་མཆོད། དེ་ལྟར་ཁྱེད་རྣམས་ལ་མི་བསྐྱོད་པ་ཆུའི་དབང་བསྐུར་བའོ། །ནམ་མཁར་བཞུགས་པའི་དབང་ལྷ་རྣམས་ལ་གསོལ་བ་འདེབས་པའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་ཅོད་པན་གྱི་དབང་བསྐུར་དུ་གསོལ། དེ་ལྟར་གསོལ་བ་བཏབ་པས་ནམ་མཁར་གནས་པའི་དེ་བཞིན་གཤེགས་པ་རྣམས་ཀྱིས་རིན་པོ་ཆེའི་ཅོད་པན་སྤྱི་བོ་ལ་སོགས་པའི་གནས་ལྔར་བཅིང་བའི་མོས་པ་མཛོད། དབུ་རྒྱན་ཐོགས་ལ། རལ་པའི་ཐོར་ཚུགས་རྒྱན་པ་ཡི། །རིན་པོ་ཆེ་ཡི་དབུ་རྒྱན་དང་། །དར་དཔྱངས་ཅོད་པན་དག་གིས་དབང་། །དེ་རིང་ཁྱོད་ལ་བསྐུར་བར་བྱ། །ཨོཾ་བཛྲ་རཏྣ་མུ་གུ་ཊ་ཨ་བྷི་ཥིཉྩནྟཾ། བཛྲ་ར་ཏ་ཀ་ཏ་ཤ་ལི་ཧོཨ་བྷི་ཊི། ཁ་དོག་སྣ་ལྔའི་དར་དཔྱངས་བཏགས་པའི་མོས་པ་མཛོད། ༀཧཱུྃཏཾ༔ཧཱིཝཨཱཿ༔ ཨོཾ་བཛྲ་ཏུ་ཤྱ་ཧོཿ དབང་དེ་བརྟན་པའི་ཡན་ལག་ཏུ་བུམ་ཆུས་དབང་བསྐུར་བར་བསྒོམ། ཨོཾ་ཨཱཿ༔བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་ཧཱུཾ་ཨ་ཧཱུྃ༔ ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་
བསྐུར་། སྐུ་གང་དྲི་མ་དག་ཆུའི་ལྷག་མ་ཡར་ལུད་པས་རིན་ཆེན་འབྱུང་ལྡན་གྱིས་དབུར་བརྒྱན། དེ་ལ་མཆོད་པའི་ཕྱིར། རཏ་སཾ་བྷ་ཝ་པུཊྚེ་ནས་ཤརྡའི་བར་གྱིས་མཆོད། དེ་ལྟར་ཁྱེད་རྣམས་ལ་རིན་ཆེན་འབྱུང་ལྡན་དབུ་རྒྱན་གྱི་དབང་བསྐུར་བའོ། །ནམ་མཁར་བཞུགས་པའི་དབང་ལྷ་རྣམས་ལ་གསོལ་བ་འདེབས་པའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་རྡོ་རྗེའི་དབང་བསྐུར་བར་བསྩལ་དུ་གསོལ། ཞེས་གསོལ་བ་བཏབ་པས། ནམ་མཁར་བཞུགས་པའི་དབང་ལྷ་རྣམས་ཀྱི་ཕྱག་གི་རྡོ་རྗེས་ཁྱེད་རང་རྣམས་ཀྱི་སྙིང་ཁ་དང་མགྲིན་པ་དང་སྤྱི་བོར་རེག་ཅིང་ལག་གཡས་སུ་བྱིན་པའི་མོས་པ་མཛོད། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །འདི་དེ་སངས་རྒྱས་ཐམས་ཅད་ཉིད། །རབ་ཏུ་བསྒྲུབ་ཕྱིར་རྡོ་རྗེ་ཟུང་། །ཨོཾ་མ་ཧཱ་སུ་ཥ་བཛྲ་ཧཱུྃ། དབང་དེ་བརྟན་པའི་ཡན་ལག་ཏུ་བུམ་ཆུས་དབང་བསྐུར་བར་བྷཻ། ཨོཾ་ཨཱཿ༔ བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་སྟེ་ཨ་ཧཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས། སྤྱི་བོར་འོད་དཔག་མེད་
ཀྱིས་དབུར་བརྒྱན། ཨ་མི་ཏ་བྷ་པུལླེ་སོགས། དེ་ལྟར་འོད་དཔག་མེད་རྡོ་རྗེའི་དབང་བསྐུར་བའོ། །ནམ་མཁར་བཞུགས་པའི་དབང་ལྷ་རྣམས་ལ་གསོལ་བ་འདེབས་པའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་དྲིལ་བུའི་དབང་བསྐུར་བ་བསྩལ་དུ་གསོལ། དེ་ལྟར་གསོལ་བ་བཏབ་པས་ནམ་མཁར་བཞུགས་པའི་དེ་བཞིན་གཤེགས་པ་རྣམས་ཀྱིས་དྲིལ་བུ་ལག་པ་གཡོན་པར་བྱིན་པའི་མོས་པ་མཛོད། ཆོས་ཀྱི་དྲིལ་བུ་བླ་ན་མེད། །སྟོང་ཉིད་ཡེ་ཤེས་སྒྲ་སྒྲོགས་པས། །ཐམས་ཅད་སྟོང་ཉིད་དོན་སྟོན་པ། །དྲིལ་བུའི་དབང་བསྐུར་སྦྱིན་པར་བྱ། །ཨོཾ་བཛྲ་ཨ་དྷི་པ་ཏི་སྟེ་ཨ་བྷི་ཥིཉྩནྟཾ། ཏིཥྛ་བཛྲ་ས་མ་ཡ་སྟྭཾ། སྔར་བྱིན་པའི་རྡོ་རྗེ་དང་ལྷན་ཅིག་ཏུ་ཐུགས་ཀར་བསྣོལ་ཏེ། བྱང་ཆུབ་ཀྱི་སེམས་བདེ་བ་དང་སྟོང་པ་ཟུང་དུ་ཆུད་པའི་རང་བཞིན་རྡོ་རྗེ་འཆང་དུ་བསྒོམ་ལ་རྗེས་ཟློས་མཛོད། བཅོམ་ལྡན་གཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད། །དབང་དེ་བརྟན་པའི་ཡན་ལག་ཏུ། བུམ་ཆུས་དབང་བསྐུར་བའི་མོས་པ་མཛོད། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་ཙཱ་ཨ་ཧཾ། དེ་ལྟར་དབང་བསྐུར་
བས་ལུས་ཐམས་ཅད་ཡེ་ཤེས་ཀྱི་བདུད་རྩིའི་ཆུ་རྒྱུན་གྱིས་གང་། དྲི་མ་ཐམས་ཅད་དག །དབང་ཐམས་ཅད་ཐོབ་ཆུའི་ལྷག་མ་ཡར་ལུད་པ་ལས། དོན་ཡོད་གྲུབ་པས་དབུར་བརྒྱན། དེ་ལ་མཆོད་པའི་ཕྱིར་ཨོཾ་ཨ་མོ་གྷ་སིདྡྷི་པུལླེ་སོགས། དེ་ལྟར་ཁྱེད་རྣམས་ལ་དོན་ཡོད་གྲུབ་པ་དྲིལ་བུའི་དབང་བསྐུར་བའོ། །ནམ་མཁར་བཞུགས་པའི་དེ་བཞིན་གཤེགས་པ་དང་སློབ་དཔོན་དང་དཀྱིལ་འཁོར་ལ་བཞུགས་པའི་ལྷ་དང་བཅས་པ་ལ་གསོལ་བ་འདེབས་པའི་རྗེས་ཟློས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མིང་གི་དབང་བསྐུར་བ་བསྩལ་དུ་གསོལ། དེ་ལྟར་གསོལ་བ་བཏབ་པས་ནམ་མཁར་བཞུགས་པའི་སངས་རྒྱས་རྣམས་ཀྱིས་མིང་གི་དབང་བསྐུར་བར་སྒོམས་ཤིག །རྡོར་དྲིལ་སྤྱི་བོར་དཀྲོལ་ཚུལ་བྱ་ཞིང་། རྡོ་རྗེ་མིང་གི་དབང་བསྐུར་བས། །དེང་ནས་བྱང་ཆུབ་སྙིང་པོའི་བར། །ཅིས་ཀྱང་མི་ཤིགས་མི་གཡོ་བའི། །མིང་གི་དབང་འདི་ཁྱོད་ཀྱིས་ལོངས། །ཨོཾ་བཛྲ་སཏཱ་སྟེ། ཨ་བྷི་ཥིཉྩ་མི་བཛྲ་ནཱ་མ་ཨ་བྷི་ཥེ་ཀ་ཏ་ཀྱི་དཔལ་ཎི་རྡོ་རྗེ་ཞེས་བྱ་བའི་དེ་བཞིན་གཤེགས་པའོ། །མེ་ཏོག་ཕོག་པའི་ལྷ་ལས་དྲས་ཏེ་མིང་འདོགས། བསྡུ་ན་སྐྱེས་པ་ཐམས་ཅད་ལ་སེམས་དཔའ་རྡོ་རྗེ། བུད་མེད་ཐམས་ཅད་
ལ་སེམས་མ་རྡོ་རྗེ་བཏགས། ཁྱེད་རང་རྣམས་ཡན་ལག་བཞི་རྫོགས་སུ་བསྒྲུབ་པའི་ཕྱིར། རྣམ་རྒྱལ་བུམ་ཆུ་གཏོར་ཞིང་། ཨོཾ་ཨཱཿ༔བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་སྭཱ་ཨ་ཧུཾ་ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་ཁྱེད་རང་རྣམས་ཀྱི་སྤྱི་བོར་རྣམ་པར་སྣང་མཛད་ཀྱིས་དབུར་བརྒྱན་པ་ལ། ཨོཾ་བེ་རོ་ཙ་ན་ཨནྡྷཾ་སོགས། དེ་ལྟར་ཁྱེད་རང་རྣམས་ལ་རྣམ་པར་སྣང་མཛད་མིང་གི་དབང་བསྐུར་བའོ། །དེ་ལྟར་རིག་པའི་དབང་ལྔ་ཐོབ་པའི་ཕན་ཡོན། ཞེ་སྡང་ལ་སོགས་པ་ཉོན་མོངས་པ་ལྔ་འཁོར་དང་བཅས་པ་བྱུང་ཞིང་། གཉེན་པོ་ཡོན་ཏན་ཡེ་ཤེས་ལྔ་ལ་སོགས་པ་སངས་རྒྱས་ཀྱི་ཡོན་ཏན་ཐམས་ཅད་ཐོབ་པར་འགྱུར་རོ། །བཤད་རྒྱུད་རྡོ་རྗེ་ཕྲེང་བ་ལས་དབང་ལྔ་ཐོབ་པའི་རྒྱུད་ལ་ནི། །རྣམ་དག་སངས་རྒྱས་ལྔ་འདི་དག །མ་རིག་བྲལ་བའི་རིག་པ་ལས། །ཡེ་ཤེས་ལྔ་ནི་ཐོབ་པར་འགྱུར། །ཞེས་གསུངས་པས། བྱ་བ་དང་སྤྱོད་པའི་རྒྱུད་ཉན་པ་དང་། བཤད་པ་དང་སྔགས་སྒྲུབ་པ་རྣམས་ལ་དབང་བར་འགྱུར་རོ། །ནམ་མཁར་བཞུགས་པའི་དབང་ལྷ་རྣམས་ཁྱེད་རང་རྣམས་ལ་གཉིས་སུ་མེད་
པར་ཐིམ། ཛཿཧཱུྃ་བཾ་ཧོཿ ཁྱེད་རྣམས་ལ་བྱ་སྤྱོད་ཀྱི་དབང་བསྐུར་བ་དང་། རྒྱུད་འཆད་པ་ལ་སོགས་པའི་སྒོ་ནས་གཞན་དོན་སྒྲུབ་པའི་ཐེག་པ་རང་ལུགས་ཀྱི་རྡོ་རྗེ་སློབ་དཔོན་དུ་གྱུར་པའི་མོས་པ་མཛོད། སུ་པྲ་ཏིཥྛ་བཛྲ་ཡེ་སྭཱ་ཧཱ། ཞེས་མེ་ཏོག་འཐོར། ད་རྟེན་བརྟེན་པའི་དཀྱིལ་འཁོར་གྱི་དག་པ་མདོར་བསྡུས་པ་ནི། གཞལ་ཡས་ཁང་ནི་ལམ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པ་ཡིན་ལ། ལྷ་རྣམས་ལ་ནི། དཔལ་གསང་བ་འདུས་པའི་རྒྱུད་ལས། ཕུང་པོ་ལྔ་ནི་མདོར་བསྡུས་ན། །།སངས་རྒྱས་ལྔ་ནི་རབ་ཏུ་གྲགས། །རྡོ་རྗེའི་སྐྱེ་མཆེད་ཉིད་དག་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་མ་ཞེས་བྱ་སྟེ། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །ཞེས་གསུངས་ཤིང་། ཁྲོ་བོ་བཅུ་ཡང་ཚིགས་ཆེན་བཅུ་དང་། རྣམ་པར་དག་པའི་རང་བཞིན་དུ་བཤད་པས། ལྷ་རྣམས་ཀྱི་སྙིང་པོ་དེ་ཁོ་ན་ཉིད་རྣམ་པར་དག་པ་དང་དོན་དམ་པར་ནི། དཀྱིལ་འཁོར་ལ་སོགས་པ་རྣམས་ནི་རང་བཞིན་མེད་པའི་བདག་ཉིད་ཅན་དེ་བཞིན་ཉིད་ཁོ་ནའི་དེ་ཁོ་ན་ཉིད་རྣམ་པར་དག་པ་ཡིན་
ནོ། །ད་ལྷ་མཆོད་པའི་རྗེས་གནང་གི་ཆེད་དུ་ངེད་ཀྱིས་སྒེག་སོགས་བརྒྱད་ཀྱི་ཕྱག་རྒྱ་བྱེད་པ་འདི་ཁྱེད་རང་རྣམས་ཀྱིས་ཤེས་ན་གྱིས། མ་ཤེས་ན་ཡང་བྱས་ཡོད་སྙམ་པ་གྱིས། དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་པ་རྣམས་རོལ་ཞིང་། །རྡོ་རྗེ་སྙེམས་མི་ཚུལ་གྱིས་ནི། །དགའ་སྟོན་བདེ་གསལ་མཆོད་པར་གྱིས། །ཨཿ སྒེག་དང་བཅས་པས་ཕྲེང་བ་འཕང་། །སངས་རྒྱས་ཐམས་ཅད་མཆོད་པར་བྱ། །དེས་ནི་བཅོམ་ལྡན་འབྲལ་མི་འགྱུར། །ཕྲེང་བ་དེ་ཡི་རྒྱན་ཡིན་ནོ། །ཨོཾ། ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་བྱ། །དེ་ཡི་བདེ་གཤེགས་དངོས་གྲུབ་ནི། །ཤིན་ཏུ་བདེ་བ་ཐོབ་པར་འགྱུར། །གྷི། དེ་ཉིད་ཐལ་མོ་གར་གྱིས་ནི། །སངས་རྒྱས་ཐམས་ཅད་འདུལ་བར་བྱ། །སངས་རྒྱས་འདུལ་བའི་ཕྲིན་ལས་ཀྱིས། །གར་མཁན་ཚུལ་དུ་བསྒྱུར་བར་བྱ། །ཏོ༔ རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་བཟང་པོས་འགྲོ་དོན་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། །ཧཱུྃ། སངས་རྒྱས་རྣམས་ལ་མེ་ཏོག་
གཏོར། །བྱང་ཆུབ་ཡན་ལག་ཚོགས་གྱུར་པས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་འགྱུར། །བྷྲཱུཾ། ཆོས་ཀྱི་མེ་ནི་ལེགས་སྤྱར་བས། །རྡོ་རྗེ་ཆོས་དང་འདྲ་བ་རུ། །སེམས་ཅན་མ་རིག་ལྡོང་རྣམས་ལ། །ཡེ་ཤེས་སྒྲོན་མེས་གསལ་བར་གྱིས། །པྲ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཤེས་རབ་ཏིང་འཛིན་དང་། །རྣམ་གྲོལ་ཡེ་ཤེས་མཐོང་བ་ཡི། །བྱང་ཆུབ་ལུས་ཅན་རྣམས་ལ་བསྒོས། །གྷ། ཁྱེད་རྣམས་ཀྱིས་དེང་ཕྱིན་ཆད་ལུས་ཀྱིས་སྒེག་སོགས་ཀྱི་སྦྱོར་བ་དང་། ངག་གིས་སྨྲ་བརྗོད་དང་། སེམས་ཀྱི་བསམ་པ་ཐམས་ཅད་ལྷ་མཆོད་པའི་བསམས་པས་ཟིན་པར་མཛོད་ཅིག །ད་སྔགས་ཀྱི་བཟླས་ལུང་གི་དོན་དུ་མཎྜལ་ཕུལ། ས་གཞི་སྤོས༔ འདི་ཡི་རྗེས་ཟློས་མཛོད། སྔགས་ཀྱི་དབང་བསྐུར་ཡེ་ཤེས་ཆེ། །དངོས་གྲུབ་སྟེར་བ་བདག་ལ་སྩོལ། །གསུམ། དཔོན་སློབ་གཉིས་ཀ་དཔལ་ཆེའི་དཀྱིལ་འཁོར་གྱི་གཙོ་བོར་གསལ་བའི་ཐུགས་ཀར་ཟླ་བའམ་ཉི་མའི་དབུས་སུ་ས་བོན་དང་ཁྱད་པར་དུ་སློབ་དཔོན་གྱི་ཐུགས་ཀའི་ས་བོན་གྱི་མཐའ་སྐོར་དུ་སྔགས་ཀྱི་ཕྲེང་བ་སྒྲུབ་ཐབས་ལྟར་གཡས་བསྐོར་དུ་འཁོད་པར་
བསམས་ལ། སྔགས་ཀྱི་བཟླས་ལུང་བསྩལ་དུ་གསོལ་སྙམ་པའི་མོས་གུས་དྲག་པོ་བྱས་ནས། སློབ་དཔོན་གྱི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་ས་བོན་སྔགས་ཕྲེང་དང་བཅས་པ་མར་མེ་གཅིག་ལས་གཉིས་མཆེད་ཀྱི་ཚུལ་གྱིས་སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་ཁའི་ས་བོན་གྱི་མཐའ་བསྐོར་དུ། དང་པོས་འཁོད། གཉིས་པས་བྱིན་བརླབས། གསུམ་པས་བརྟན་པར་བྱས་པར་མོས་ལ་སྔགས་ཀྱི་རྗེས་ཟློས། ལན་གསུམ། དེའི་བྱིན་རླབས་ཐོབ་པའི་གཏང་རག་ཏུ་མེ་ཏོག་འཐོར་ཞིང་རྗེས་ཟློས། བཅོམ་ལྡན་བདག་ལ་བསྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཞེས་གསོལ་བ་བཏབ། སློབ་དཔོན་གྱིས། བཅོམ་ལྡན་འདི་ལ་བསྩལ་ལགས་ཀྱིས་སོགས། རིག་པ་འཛིན་པ་འདི་རྣམས་ལ་སྒྲོའི་ལྷ་ཚོགས་རྣམས་ཀྱིས་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་དང་ཁྱད་པར་དུ་རིག་པ་གསང་སྔགས་ཀྱི་བྱིན་རླབས་ཐམས་ཅད་འཇུག་པར་གྱུར་ཅིག །ཅེས་མེ་ཏོག་གཏོར། ད་
དངུལ་གྱི་ཀོང་བུར་མིག་སྨན་རྣམས་ཚུལ་བཞིན་དུ་སྦྱར་བ་ལག་པ་གཡོན་དུ་བཟུང་ཞིང་། གཡས་པས་གསེར་དྲུག་ལས་བྱས་པའི་ཐུར་མ་བཟུང་སྟེ་མ་རིག་པའི་ལིང་ཏོག་བསལ་ནས་མིག་སྨན་བྱུག་པར་སྒོམས་ཤིག །སློབ་མའི་མིག་གཉིས་སུ་དེ་ཁོ་ན་ཉིད། སྒྲིབ་བྱེད་མ་རིག་རྩའི་ལིང་ཏོག་ས་ཁམས་པའི་རང་བཞིན་པྲཾ་སེར་པོའི་རྣམ་པར་གནས་པ་ཕྱིར་བསལ་བར་བྷ། ཐུར་ལྡན་སྨན་པའི་རྒྱལ་པོ་ཡིས། །ཇི་ལྟར་འཇིག་རྟེན་རབ་རིབ་བཞིན། །རྒྱལ་བ་རྣམས་ཀྱིས་བུ་ཁྱོད་ཀྱི། །མི་ཤེས་པ་ཡི་རབ་རིབ་བསལ། །ཨོཾ་བཛྲ་ནེ་ཏྲ་ཨ་བ་ཧ་ར་པ་ཏྲ་ལཾ་ཧྲཱིཿདེ་ནས་མེ་ལོང་ཨཱཿཡིས་སྔགས་ཏེ་སློབ་མ་ལ་བསྟན། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོགས་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང་། །རྡོ་རྗེ་སེམས་དཔའ་མེ་ལོང་བཞིན། །དེར་ནི་གསལ་དག་རྙོག་པ་མེད། །སངས་རྒྱས་ཀུན་བདག་རང་བཞིན་ནི། །བུ་ཁྱོད་ཀྱི་ནི་སྙིང་ལ་ཞུག། །རང་བཞིན་མེད་ཅིང་གནས་མེད་པར། །ཆོས་རྣམས་དེ་ལྟར་ཤེས་ནས་ཁྱོད། །སེམས་ཅན་དོན་ནི་མཉམ་མེད་བྱོས། །སྐྱོབ་པ་རྣམས་ཀྱི་སྲས་སུ་སྐྱེ། །གང་ཡང་
རིགས་ཐམས་ཅད་དང་། དཀྱིལ་འཁོར་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་འདི་ཀུན་ཏུ་འགྲོ་བ་ཡིན་པ་ཤེས་པར་གྱིས་ཤིག །ཧོས་བསྔགས་པའི་ཐབས་ཀྱི་མདའ་དྲུག །ཤེས་རབ་ཀྱི་གཞུ་དང་བཅས་པ་ཕྱོགས་བཞི་སྟེང་འོག་ཏུ་འཕངས། བདུད་བཞི་དང་ཉན་རང་གི་སེམས་ཡིད་ལ་བྱེད་པ་བཅོམ་པར་མོས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཡེ་སྭཱ་ཧཱ། མདའ་འཕེན་ཚུལ་དང་བཅས་པའི་འདིའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་དང་རྗེས་སུ་ཆགས་པར་བྱའོ། །བུམ་ཆུ་གཏོར་ཞིང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། དེ་རྣམས་ཀྱི་ཕྱི་དབྱིབས་རས་བྲིས་ཀྱི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ། ལུས་ཀྱི་དྲི་མ་དག །ལྷའི་དཀྱིལ་འཁོར་ཆ་ལག་དང་བཅས་པ་སྒོམ་པར་དབང་། ཀྱི་འབྲས་བུ་སྤྲུལ་པའི་སྐུའི་ས་བོན་དང་བག་ཆགས་རྒྱུད་ལ་བཞག་པའོ། །བསངས་སྦྱངས། ཁྱེད་རང་རྣམས་ཀྱི་ཆོས་ཅན་ཉོན་མོངས་པ་ལྔ་དང་། ཕུང་པོ་ལྔའི་ཆོས་ཉིད་རྣམས་མི་
དམིགས་ཏེ། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུྃ་ལས་རྡོ་རྗེ་ཧཱུཾ་གིས་མཚན་པ་ལས། ཁྱེད་རང་རྣམས་ཀྱི་ཉོན་མོངས་པ་ལྔ་དང་ཕུང་པོ་ལྔའི་ཆོས་ཉིད་རྣམས། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་རྡོ་རྗེ། གཡོན་དེས་ཡུ་བ་བྱས་པའི་དྲིལ་བུ་འཛིན་པ། རལ་པའི་ཐོར་ཚུགས་ལ་སོགས་རྒྱན་ཐམས་ཅད་ཀྱིས་བརྒྱན་པའི་སྐུ་ཅན་གྱི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་རྡོ་རྗེ་སེམས་དཔའི་རྣམ་པར་སྤྱན་དྲངས། ཛཿཧཱུྃ་བཾ་ཧོཿ ཁྱེད་རང་རྣམས་ལ་གཉིས་སུ་མེད་པར་ཐིམ། ཧཱུྃ་ལས་བྱུང་བའི་རྡོ་རྗེ་ཚད་དང་མཚན་ཉིད་དང་ལྡན་པ་ཁྱེད་རང་རྣམས་ཀྱི་ལག་པ་གཡས་སུ་བྱིན་པ། བརྟུལ་ཞུགས་འཛིན་པའི་གནས་སྤྱི་བོར་བཟུང་བའི་མོས་པ་མཛོད། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཕྱག་ན་རྡོ་རྗེའི་བརྟུལ་ཞུགས་བརྟེན། །ཁྱོད་ཀྱིས་ཀྱང་ནི་རྟག་ཏུ་ཟུང་། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། ཏིཥྛ་ཨེ་ཥ་ཡ་ཧཱུཾ་དྷ་ར་ཡཱ་མི་བཛྲ་སཏྭ་ཧཱུཾ། ཧི་ཧི་ཧི་ཧི་ཧཱུཾ། རྡོ་རྗེ་
བརྟུལ་ཞུགས་འཛིན་པའི་ཕྱག་རྒྱའི་ཆོ་གའོ། ། །ཁྲོ་བོའི་ཆས་འདི་འབྱུང་འདུལ་མ་གཏོགས་གཞན་དཀྱིལ་འཁོར་ལྔ་པོ་ལ་མི་བྱ། ཧཱུཾ་བཛྲ་ཕཊ༔ ཨོཾ་བཛྲ་སཏྭ་ཧཱུྃ་གིས་བྱིན་གྱིས་བརླབས་པའི་མི་མགོ་ལྔ་བཅུའི་དོ་ཤལ་དང་། རྒྱབ་ཏུ་གླང་ལྤགས་སྨད་དུ་སྟག་ཤམ་རོའམ་རོ་རས་ཀྱི་གདན་རྣམས་རིམ་པར་བྱིན་པའི་མོས་པ་མཛོད། རྡོ་རྗེ་སེམས་དཔའི་ཕྱག་རྒྱུ་འདི། །ཕྱི་དང་ནང་དུ་ཡང་དག་གནས། །མགོ་ཕྲེང་གླང་ལྤགས་སྟག་ཤམ་སོགས། །སྦྱིན་པ་དཔའ་བོས་བཟུང་བར་གྱིས། །ཨོཾ་བཛྲ་སཏྭ་ཧཱུཾ། གཞུང་ནས་དེ་བས་མ་གསུངས་ཀྱང་། །ཚིག་གིས་ཕྱེ་ནས་སོ་སོར་གཏད་རུང་། དེ་ནས་སྣམ་སྦྱར་གྱི་ཞབས་ནས་གཡོན་པས་ཆོས་གོས་ཀྱི་སྣེ་སེང་གེ་བག་ཕེབ་པའི་རྣ་བ་ལྟར་བཟུང་། གཡས་པས་སྐྱབས་སྦྱིན་བྱས་ལ། སློབ་དཔོན་ཨོཾ་ལས་སྤྲུལ་སྐུ་ཤཱཀྱ་ཐུབ་པར་བསྒོམས་ལ། དབང་འདི་ཐོབ་ཅིང་ཉམས་སུ་བླང་བ་ལ་བརྟེན་ནས་མ་འོངས་པ་ན་ཁྱེད་རྣམས་གསང་མཚན་བཏགས་པ་དང་མཚུངས་པའི་མཚན་འཛིན་པའི་དེ་བཞིན་གཤེགས་པར་འགྱུར་རོ། །ཞེས་ལུང་བསྟན་པའི་མོས་པ་མཛོད། འདིར་ནི་ཁྱོད་ལ་ངས་ལུང་བསྟན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་པས་ན། །སྲིད་པའི་
ངན་འགྲོ་རྣམས་ལས་བཏོན། །ཀྱེ་དཔལ་རྨེ་ཞེས་བྱ་བའི་དེ་བཞིན་གཤེགས་པའོ། །སིདྡྷི་ས་མ་ཡ་བྷུནྡྷ་བས། གང་ལ་ངས་ལུང་བསྟན་པ་འདིའི་བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས་བྱང་ཆུབ་ཆེན་པོར་མགྲིན་གཅིག་ཏུ་ལུང་སྟོན་པར་མཛད་དེ། སྔགས་འདི་དང་ཕྱག་རྒྱ་འདི་ཡི་མཐུ་ཡིན་ནོ། །ཞེས་ཁྱེད་རྣམས་དང་བ་བསྐྱེད་པར་བྱའོ། །ལུང་བསྟན་ཆོ་གའོ། །རྒྱུད་ལས་བྱང་ཆུབ་སེམས་ཀྱི་དབང་བསྐུར་བས། །སློབ་མ་སྡིག་དང་བྲལ་བ་ལ། །རྗེས་སུ་གནང་བ་དེ་ནས་སྦྱིན། །ཞེས་གསུངས་པས། ཁྱེད་རང་རྣམས་ཀྱི་མདུན་དུ་ཧཱུྃ་ལས་སྐྱེས་པའི་འཁོར་ལོ་དང་། ཨོཾ་བཛྲ་ཧེ་ཏུ་ཚྭ། ལག་གཡས་སུ་ཨོཾ་བཛྲ་བྷ་ཥ་རཾ། ཡི་གེ་ཨཱཿལས་སྐྱེས་པའི་དུང་དང་། གཡོན་དུ་དབྱངས་དང་པོ་ལས་སྐྱེས་པའི་པོ་ཏི་དང་དབྱངས་ཐ་མ་ལས་སྐྱེས་པའི་དྲིལ་བུ་རྣམས། རང་རང་གིས་སྔགས་བརྗོད་ཅིང་བྱིན་པས་དྲིལ་བུ་དཀྲོལ་བའི་མོས་པ་མཛོད། སློབ་དཔོན་གྱིས། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ནི་མཉམ་སྦྱོར་བས། །ཀུན་མཆོག་མཉམ་པ་ཉིད་དུ་གསལ། །དེང་ནས་བརྩམས་ཏེ་སེམས་
བསྐྱེད་པ། །བརྩམས་ཏེ་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །ཆོས་ཀྱི་དུང་ནི་བླ་མེད་པ། །ཀུན་ནས་ཡོངས་སུ་བཀང་ནས་ནི། །ཆོས་ཀྱི་འཁོར་ལོ་བསྐོར་བར་གྱིས། །དེ་ནས་རིགས་ལྔའི་ཕྱག་མཚན་ཡོད་ན་གཏད་པའམ། མེད་ན་བསྒོམས་པས་ཆོག །ཁྱེད་རང་རྣམས་རྣམ་པར་སྣང་མཛད་དུ་སྒོམས་ཤིག་།སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །ཆོས་ཀྱི་འཁོར་ལོ་རབ་ཏུ་བསྐོར། །ཛ་ཡ་ཛ་ཡ་སརྦ་ཏ་ཐཱ་ག་ཏ་ཨ་ཧྲཱིཿཔ་རི་པྲ་ཝརྟ་ཡ་དྷརྨཱ་ཙཀྲ་ག །ཁྱེད་རང་རྣམས་རིན་ཆེན་འབྱུང་ལྡན་དུ་སྒོམས་ཤིག །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །སངས་རྒྱས་རིན་ཆེན་རབ་ཏུ་སྟོན། །ཨོཾ་བཛྲ་རཏྣ་སརྦ་དྷརྨཱ་བི་ཤུདྡྷེ་ཛྙཱ་ན་ཨ་བྷི་ཥེ་ཀ་པྲ་ཝཏྟ་ཡ་ཨོཾ་ཨོཾ་ཨོཾ། ད་ཁྱེད་རང་རྣམས་སྣང་བ་མཐའ་ཡས་སུ་སྒོམས་ཤིག། སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །འདོད་ཆགས་དག་པར་རབ་ཏུ་སྟོན། །ཨོཾ་བཛྲ་དྷརྨཱ་སརྦ་དྷརྨ་
བི་ཤུདྡྷེ་ཛྙཱ་ན་དྷ་ག་པདྨ་སྭ་བྷཱ་ཝ་ཧྲཱིཿ༔ཨཱཿ༔ ད་ཁྱེད་རང་རྣམས་དོན་ཡོད་གྲུབ་པར་སྒོམས་ཤིག །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །རྡོ་རྗེའི་མཆོད་པ་རབ་ཏུ་བསྐོར། །ཨོཾ་བཛྲ་ཀརྨ་སརྦ་དྷརྨཱ་བི་ཤུདྡྷེ་ཛྙཱ་ན་སརྦ་པཱུ་ཛ་སྭ་བྷཱ་ཝ༔ཨཱཿ༔ ཁྱད་པར་ཀྲི་ཡའི་རྒྱ་གཞུང་ལས། སླར་ཡང་རྣམ་པ་སྣ་ཚོགས་ལས་བྱས་པའི། རིན་ཆེན་བདུན་ཡང་གཏད་པར་བྱ། །གྲི་གུག་ཁཊཾ་བགྲང་ཕྲེང་དང་། །གླེགས་བམ་ཐོད་ལེ་སམ་ཕོ་ར། །གྱོ་མོ་རྣལ་འབྱོར་དབྱུག་པ་དང་། །པདྨའི་ལག་པའི་ལྷམ་དང་ནི། །རྣལ་འབྱོར་པ་ཡི་སྒོམ་ཐག་རྣམས། །ལེགས་པར་དགའ་བའི་བསམ་པ་ཡིས། །སྔགས་ཅན་དེ་ཡིས་སྦྱིན་པར་བྱ། །ཞེས་གསུངས་པ་ལྟར། རྒྱལ་སྲིད་བདུན་དང་གྲི་གུག་ལ་སོགས་པའི་རྫས་རྣམས་རིན་པོ་ཆེའི་སྣོད་མེ་ཏོག་སིལ་མས་བཀང་བའི་ནང་དུ་བཞག་ནས། ཁྱེད་རང་རྣམས་ཀྱི་ལག་པ་གཉིས་སུ་རིམ་བཞིན་བྱིན་པའི་མོས་པ་གྱིས། རྒྱལ་སྲིད་སོགས་ཙཀླུ་རྣམས་རིམ་པར། མ་འོངས་པ་ན་ཐུབ་པའི་དབང་པོ་ཡི། །གོ་འཕང་ཐོབ་ཕྱིར་འཇིག་རྟེན་འཇིག་རྟེན་ལས། །འདས་པའི་དབང་ཕྱུག་བླ་མེད་
ཐོབ་ཕྱིར་དུ། །རིན་ཆེན་སྣ་བདུན་རྗེས་གནང་སྦྱིན་པར་བྱ། །ཨོཾ་སརྟ་རཏྣ་ཨ་བྷི་ཥིཉྩནྟཾ། མ་རིག་གཟུང་འཛིན་རྣམ་རྟོག་བགེགས་བསྐྲད་ཕྱིར། །གྲི་གུག་རྗེས་གནང་རབ་ཏུ་སྦྱིན་པར་བྱ། །ཞི་རྒྱས་དབང་དང་མངོན་སྤྱོད་ལ་སོགས་པའི། །ཕྲིན་ལས་བསྒྲུབ་ཕྱིར་ཁ་ཊཾ་བགྲང་ཕྲེང་སྦྱིན། །ཨོཾ་ཀི་དྷ་ཀ་ཁ་ཊཾ་ཁ་མ་ལ་ཨ་བྷི་ཥིཉྩནྟཾ། ཕྱི་ཚུནང་གསང་བ་དེ་ཁོ་ན་ཡི་ཆོས། །བསམ་པ་ཅི་བཞིན་གཞན་ལ་སྟོན་བྱེད་ཕྱིར། །རང་རང་རྒྱུད་ཀྱི་གླེགས་བམ་དག་དང་ནི། །ཐོད་ལེ་ཀོར་དང་སམ་བྷོ་ར་རྣམས་སྦྱིན། །ཨོཾ་པུ་ཏི་ཀ་ཁ་ཏྲི་ཀ་སཾ་བྷོ་ར་ཨ་བྷི་ཥིཉྩ་མཱི། རྒྱལ་སྲིད་ལ་སོགས་སྲིད་པའི་བདེ་བ་ལ། །ཆགས་པ་སྤང་སྟེ་བསོད་སྙོམས་འཚོ་བ་ལ། །གནས་ནས་མི་བསྐྱོད་བསམ་གཏན་བྱ་ཕྱིར་དུ། །གྱོ་མོའི་སྣོད་དང་རྣལ་འབྱོར་དབྱུག་པ་དང་། །ལྷམ་དང་སྒོམ་ཐག་རྣམས་ཀྱང་སྦྱིན་པར་བྱ། །།ཨོཾ་ག་ཡ་ད་ར་ཡོ་ག་ག་ན་ཌ། ཡ་ཏ་ཀ་པ་ཊ་ཀཾ། ཨ་བྷི་ཥིཉྩ་མཱི། དེང་རྒྱུནས་ཐེ་ཚོམ་མེད་པའི་བསམ་པ་ཡིས། །ཁྱོད་འདིར་བློ་གྲོས་ངན་མི་བྱ། །གསང་སྔགས་སྤྱོད་པའི་ཚུལ་མཆོག་འདི། །མཉམ་མེད་རང་གིས་རབ་གསལ་བྱ། །དེ་ལྟར་བྱས་ན་
སངས་རྒྱས་ལ། །ཕན་བཏགས་བྱས་པས་གཟོ་བར་འགྱུར། །རྡོ་རྗེ་འཛིན་པ་དེ་ཀུན་ཡང་། །ཁྱེད་ལ་རྟག་ཏུ་ཀུན་བསྲུང་མཛད། །ཤེས་རབ་ཐབས་ཀྱིས་རང་བཞིན་བདག་ཡིད་བཞིན་ནོར་བུ་ལྟར་མཐོང་བས། །སྐྱོན་མེད་དོགས་དང་བྲལ་བ་ཡིས། །དེ་ལྟར་སེམས་ཅན་དོན་གྱིས་ཤིག །རྗེས་གནང་ཆོ་གའོ། །དབུགས་དབྱུང་ནི་སློབ་མ་གཞོན་པ་གཅིག་ལ་ཆོས་གོས་བཀོན་ལ། རུས་པ་དང་རིན་པོ་ཆེའི་རྒྱན་དྲུག་གིས་བརྒྱན་ཅིང་། ཁོང་གིས་བསྐོར་བ་ལན་གསུམ་བྱེད་པ་ལྟར་ཁྱེད་རང་རྣམས་ཀྱིས་ཀྱང་བྱེད་པར་བསྒོམས་ལ་རྗེས་ཟློས་ལན་གསུམ་མཛོད།་མ་ཧཱ་ར་ཏ་སུ་ཊི་ཏ་སུ་ཏཱ་ཥ་བཛྲ་སཏྭ་ཨརྱ་སིདྡྷ་ནཱཾ། སྤྱི་བོ་རུ་ནི་གདུགས་བཟུང་ཞིང་། །སྐོར་བ་བྱེད་དུ་བཅུག་ནས་ནི། །དཀྱིལ་འཁོར་ཤར་སྒོར་ཐལ་སྦྱར་བ། །གདུགས་བཅས་དབབ་ཅིང་འདི་སྐད་བརྗོད། །ཅེས་གསུངས་པས། ཁྱེད་རང་རྣམས་ཀྱི་སྤྱི་བོར་གཞན་ཞིག་གིས་གདུགས་བཟུང་། དཀྱིལ་འཁོར་གྱི་ཤར་སྒོ་ནས་ཕྱག་གསུམ་འཚལ་ནས། ཁྱེད་རང་རྣམས་ཀྱི་ལུས་ལོངས་སྤྱོད་དགེ་བའི་དངོས་པོ་དང་བཅས་པ་ཐམས་ཅད་དཀྱིལ་འཁོར་གྱི་ལྷ་ལ་འབུལ་བསམ་ཞིང་། དཀྱིལ་འཁོར་ལ་མགོ་བོ་འདུད་པ་རེ་
གྱིས། སྔགས་དང་རྒྱུད་རྣམས་འཛིན་གྱུར་པའི། །སློབ་མ་འདི་ནི་འབུལ་བ་ལགས། །ད་ཁྱེད་རང་རྣམས་ཤར་སྒོ་ནས་ཕྱག་གསུམ་འཚལ་ཏེ་པུས་བཙུགས་ཐལ་མོ་སྦྱར་བས་ཉོན། ཐམས་ཅད་ཀྱི་སྙིང་ལ་འབབ་པའི་གཏམ་འདིར་བརྗོད་པ་ལ་གསན་པས་ཁྱབ་པར་གདའ། །ད་ནི་ཁྱེད་རྣམས་དཀྱིལ་འཁོར་གྱིས། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་དག་ཀྱང་དགོངས་པར་འགྱུར། །སེམས་ཅན་ཀུན་ལ་བརྩེ་དོན་དུ། །ཁྱེད་ཀྱི་དཀྱིལ་འཁོར་ཆོ་ག་བཞིན། །རབ་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །མཆོག་ཏུ་གསང་བ་དམ་པ་ཡིས། །དཀྱིལ་འཁོར་མཐོང་ཞིང་ཞུགས་པས་ན། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཁྱོད་ལ་མེད། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་མཐའ་གྲུབ་བོ། །སངས་རྒྱས་རྡོ་རྗེ་ཅན་ཀུན་གྱི། །དེ་རིང་ཚེ་ལྡན་དབང་བསྐུར་རོ། །ཁམས་གསུམ་ཀུན་གྱི་རྒྱལ་སྲིད་ཆེ། །བདག་པོ་ཉིད་དུ་ཁྱོད་ངེས་སོ། །འདོད་།
ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་ཉིད། །ཁྱོད་ཀྱིས་ནམ་ཡང་མི་བྱའོ། །འདོད་པ་ཀུན་ལ་སྤྱོད་པ་ཁྱོད། །གང་ལའང་འཇིགས་མེད་སྤྱད་པར་གྱིས། །སློབ་དཔོན་སྤང་བར་མི་བྱ་སྟེ། །དམ་ཚིག་ཤིན་ཏུ་འདའ་བར་དཀའ། །ཤེས་རབ་ཐབས་ཀྱི་བསམ་པ་ཡིས། །མི་བྱ་ཅུང་ཟད་ཡོད་མ་ཡིན། །མ་འཇིགས་ཁྱོད་ལ་སྡིག་པ་མེད། །དེ་བཞིན་གཤེགས་པའི་གསུང་ཇི་བཞིན། །འདི་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གིས་དམ་ཚིག་མི་བཟད་བདེ་སྟེར་བསྟེན་པར་གྱིས། །འགྲོ་བ་བདེ་བ་མྱོང་ལ་རྡོ་རྗེ་སེམས་དཔའ་དང་། །མཚུངས་པའི་རྟག་པ་ཉིད་དུ་ཁྱོད་རྣམས་ཕྱིན་པར་འགྱུར། །གཞན་ཡང་གང་དག་ཆོ་ག་ཇི་ལྟ་བ་བཞིན་དབང་བསྐུར་བ་ལ་དགེ་བའི་ཕྱིར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས། སྡུག་པའི་བུ་དང་འདྲ་བར་ཐུགས་དངས་བས་ཡང་དག་པར་དགོངས་པ་མཛད་པ་འདི་ནི་ཆོས་རྣམས་ཀྱི་ཆོས་ཉིད་ཡིན་ནོ། །དབུགས་དབྱུང་ཆོ་གའོ། །དབང་བསྐུར་རྗེས་ཀྱི་ཆོ་ག་ནི། །ཁས་བླང་དོན་བསྒྲུབ་སྤྲོ་བ་བསྐྱེད། །ཡོན་འབུལ་དེང་ནས་བརྩམས་སོགས་
བརྗོད། །ཞེས་གསུངས་པ་ལྟར། དེ་ལྟར་ཁྱེད་རྣམས་ཀྱིས་ཆེའི་དཀྱིལ་འཁོར་དུ་དབང་རྫོགས་པར་ཐོབ་པས་དེ་དག་གིས་སྐབས་སུ་ཁས་བླང་བའི་དམ་ཚིག་དང་སྡོམ་པ་བསྲུང་སྙམ་པས་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །དེ་ལྟར་དབུགས་ཕྱིན་པའི་སློབ་མ་རྣམས་ཀྱིས། རང་གཞན་གྱི་དོན་རྒྱ་ཆེན་པོ་འགྲུབ་པ་ལ་དགའ་ཞིང་སྤྲོ་བའི་ཕྱིར། རྗེས་ཟློས་མཛོད། དེང་བདག་སྐྱེ་བ་འབྲས་བུར་བཅས། །བདག་གིས་གསོན་པའང་འབྲས་བུར་བཅས་་་།དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་དེང་བདག་གྱུར། །འོ་དེ་ལྟར་རྗེའི་དཀྱིལ་འཁོར་དུ་དབང་བསྐུར་བ་རྫོགས་པར་ཐོབ་པའི་གཏང་རག་ཏུ་ཡབ་མཎྜལ་ཕུལ། འདི་ཡི་རྗེས་ཟློས། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང་། །ཆ་ཤས་ཀྱིས་ནི་སྤྱད་དུ་གསོལ། །གསུམ། དེ་ལྟར་དཔལ་རྡོ་རྗེ་ཕྲེང་བའི་ནང་ནས་རྗེའི་དཀྱིལ་འཁོར་དུ་དབང་བསྐུར་བ་ཐོབ་པའི་བླ་མ་བརྒྱུད་པ་ནི། རྡོ་རྗེ་འཆང་། ཡེ་ཤེས་ཀྱི་མཁའ་འགྲོ་མ། སློབ་
དཔོན་ཆེན་པོ་ཨ་བྱཱ་ཀ་ར་གུལྟ། ཨ་ནུ་པདྨ་རཀྵི་ཏ། པཎ་ཊི་ཏ་བིཀྟ་དེ་ཝ། པཎ་ཆེན་ཤཱཀྱ་ཤྲཱི། དེ་སོགས་བརྒྱུད་པ་འགའ་ཟུང་ལས་བྱུང་བའི་དབང་བསྐུར་བ་རྣམ་པར་དག་པ་ཐོབ་པ་ཡིན་པས། རང་གཞན་གྱི་དོན་རྒྱ་ཆེན་པོ་མཛོད། ཅེས་པ་རྡོ་རྗེ་ཕྲེང་བའི་རྒྱ་གཞུང་ལས། ཀྲྀ་ཡ་ས་མུཉྩའི་རྒྱ་གཞུང་ནས་བཤད་པའི་ཆོ་ག་དང་། ས་བཟང་འཕགས་པ་གཞོན་ནུ་བློ་གྲོས་ཀྱིས་མཛད་པའི་དབང་བསྐུར་རྒྱས་པའི་ལུགས་འདི་ནི་བླ་མ་ཀརྨ་ཕྲིན་ལས་པས་བསྐུལ་ནས་དགེ་སློང་བརྩོན་འགྲུས་ཀྱིས་ཡི་གེ་པ་བྱས་ཏེ། དགེ་སློང་རཱ་ག་ཨ་སྱས་བསྒྲིགས་པ་ལ། ཉེས་འགལ་མཆིས་ན་ལྷ་ལ་བཤགས་ཤིང་། དགེ་བས་འདི་ལ་འབྲེལ་བ་ཐོགས་ཚད་བདེ་བ་ཅན་དུ་སྐྱེ་བའི་རྒྱུར་གྱུར་ཅིག །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།