རྡོ་རྗེ་ཕྲེང་བའི་དབང་བསྐུར་རྒྱས་པ།
རྡོ་རྗེ་ཕྲེང་བའི་དབང་བསྐུར་རྒྱས་པ་རྡོར་ཕྲེང་གཞུང་ལ་ཀྲི་ཡ་ས་མུཉྫ་དང་། ས་བཟང་འཕགས་པའི་གཞུང་གིས་ཁ་སབ་འདི་བདེ་མཆོག་འཁོར་ལོ་དྲུག་ལ་སྦྱར་བ་ཕྱག་ལེན་ཏེ། གུར་རིགས་བསྡུས་ལ་ཡང་སྦྱར་བ་ལེགས་ཤིང་། རྒྱས་པར་འདོད་ན་བླ་མེད་དཀྱིལ་འཁོར་ཐམས་ཅད་ལ་སྦྱར་ཏེ་ཕ་རྒྱུད་ལ་སྦྱར་ཚེ་སྤྱོད་པའི་བརྟུལ་ཞུགས་མི་བྱ་བ་མ་གཏོགས་ཁྱད་མེད།།
ན་མོ་གུ་རུ་བཛྲ་དྷ་ར་ཡེ། །འཁོར་ལོའི་མགོན་པོ་རྩ་བརྒྱུད་བླ་མ་དང་། །ཡི་དམ་ལྷ་ཚོགས་རྣམས་ལ་ཕྱག་འཚལ་ལོ། །བཀའ་ཡི་གནང་བ་སྩོལ་ལ་བྱིན་གྱིས་རློབས། །རྡོར་ཕྲེང་དབང་བསྐུར་ཕྱག་ལེན་རྒྱས་པ་ནི། །གཞུང་ལས། སློབ་མ་གཞུག་དང་དབང་བསྐུར་དང་། །རྗེས་ཀྱི་བྱ་བ་རྣམ་པ་གསུམ། །དང་པོ་ཡོན་འབུལ་གསོལ་བ་གདབ། །རྒྱུན་བཤགས་རིགས་ལྔའི་སྡོམ་བཟུང་བྱ། །ལྷ་བསྐྱེད་སྨད་གཡོགས་སྟོད་གཡོགས་དང་། །གཙུག་ཏོར་མིག་དར་མེ་ཏོག་འཕྲེང་། །སྦྱིན་པ་དང་བཅས་རྣམ་དྲུག་གིས། །ཆས་སུ་ཞུགས་ཤིང་བསང་གཏོར་བྱ། །གནས་གསུམ་བྱིན་རླབས་ཤར་སྒོར་བཞག །དྲིས་ལན་བྱ་ཞིང་སེམས་བསྐྱེད་ལ། །གསང་བར་
གདམས་པ་ཕྱིར་འཇུག་གོ་་།ནང་དྲུག་བསྐོར་བ་ཕྱག་དྲུག་འཚལ། །དམ་ལ་གཞུག་ཅིང་ཡེ་ཤེས་དབབ། །སྣང་བ་དྲི་ཞིམ་བསྐོར་བ་བྱ། །བདེན་པའི་བྱིན་རླབས་བྱ་བའོ། །མེ་ཏོག་གཏོར་ཞིང་ལྷ་རིགས་བསྟན། །དངོས་གྲུབ་མཚོན་བྱ་ཕྲེང་དབང་བསྐུར། །གདོང་གཡོགས་དཀྲོལ་ཞིང་དཀྱིལ་འཁོར་བསྟན། །སྤྲོ་བ་བསྐྱེད་ཅིང་དམ་ཚིག་བརྗོད། །འཇུག་པ་ཡི་ནི་ཆོ་གའོ། །ཞེས་གསུངས་པ་ལྟར་སྟ་གོན་བྱས་པའི་སློབ་མ་ཁྲུས་བྱས་མཎྜལ་ཕུལ། མེ་ཏོག་དང་བཅས་པའི་ཐལ་མོ་སྦྱར་ནས། སྐྱེ་རྒ་ན་འཆི་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བའི། །སྲིད་པའི་རྒྱ་མཚོར་བྱིང་བ་ལས། །འདོན་པར་བྱེད་པ་ཁྱོད་འབའ་ཞིག །དགའ་ཆེན་སྟོན་པ་ཁྱོད་གཅིག་པུ། །
བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ལན་གསུམ། ད་མདུན་གྱི་ནམ་མཁར་སྒེའི་དཀྱིལ་འཁོར་གྱི་ལྷ་ཚོགས་ལ། བླ་མ་བརྒྱུད་པ་ཡི་དམ་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་ཆོས་སྐྱོང་སྲུང་མའི་ཚོགས་དཔག་ཏུ་མེད་པས་བསྐོར་བ་མངོན་སུམ་ལྟ་བུར་བཞུགས་པའི་སྤྱན་སྔར་རྒྱུན་བཤགས་སྔོན་དུ་འགྲོ་བའི་ཐུན་མོང་གི་སྡོམ་པ་དང་། ཐུན་མོང་མ་ཡིན་པའི་སློབ་དཔོན་གྱི་སྡོམ་པ་གཟུང་བའི་ཕྱིར་རིགས་ལྔ་སྤྱི་དང་ཁྱད་པར་གྱི་དམ་ཚིག་རྣམས་བསྲུང་སྙམ་པའི་བསམས་པས། འདི་དག་གི་རྗེས་ཟློས་ལན་གསུམ་གསུམ་གསུང་བར་ཞུ། དཀོན་མཆོག་གསུམ་ལ་བདག་སྐྱབས་མཆི་། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །ཞེས་ལན་གསུམ་བརྗོད་དུ་གཞུག་གོ །ཕ་རྒྱུད་ལ། སངས་
རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། མ་རྒྱུད་ལ། སྲས་བཅས་སངས་རྒྱས་ཐམས་ཅད་བདག་ལ་དགོངས་སུ་གསོལ། བདག་ཟཆེ་གེ་མོ་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་ལྟར། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སྡོམ་པ་ཡིས་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་རྣལ་འབྱོར་སྡོམ་པ་ལ། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་མཆོག་ཏུ་བཟུང་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་
པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ལས་ཆེན་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། བདག་གིས་སྡོམ་པ་མ་ལུས་གཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ལན་གསུམ། ད་ཁྱེད་རང་རྣམས་དམིགས་པ་འདི་བཞིན་མཛོད། ༀ་ཞེས་བརྗོད་པས། ཁྱེད་རང་རྣམས་སྐད་ཅིག་གིས་རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་འཁོར་ལོ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ་རལ་པའི་ཐོར་ཅོག་དང་ཐོད་པའི་ཕྲེང་བའི་ཅོད་པན་ཅན། མ་རྒྱུད་ལ་རུས་པའི་རྒྱན། རྒྱུན་ཚོ་དྲུག་གིས་བརྒྱན་པ། ཞབས་གཡས་བསྐུམ་གཡོན་བརྐྱང་གི་སྟབས་ཀྱིས་བཞུགས་པའི་སྐུ་ཅན་དུ་ཀྲོང་གིས་གྱུར་པ་ལ། ལས་
སྔགས་བརྗོད། ལས་སྔགས་ཀྱིས་བྱིན་གྱིས་བརླབས་པའི་དར་ཁ་དོག་སྣ་ཚོགས་པའམ། དམར་པོའི་སྨད་གཡོགས་ཕུལ་བའི་མོས་པ་མཛོད། ཨོཾ་སརྦ་ཏ་ཐཱ་ག་ཏ་ཨ་དྷི་ཨ་ལཾ་ཀཱ་རོ་ཝསྟ་པཱུ་ཛ་མེ་གྷ་ས་མུ་དྲ་སྨྲ་ར་ཎ་ས་མ་ཡེ་ཧཱུྃ། ཞེས་སྨད་གཡོགས་བཀོན་ཚུལ་བྱ། སྟོད་གཡོགས་སྔོན་པོའམ་དམར་པོ་བཀོན་པའི་མོས་པ་གྱིས། ཨོཾ་བཛྲ་རཀྵ་ཧཾ༔ བཅོས་མའི་ཐོར་ཚུགས་སྦྱིན་པའི་མོས་པ་གྱིས། ཨོཾ་བཛྲ་ཨུཥཱི་ཥ་ཧཱུཾ་ཕཊ། ལས་སྔགས་བརྗོད་ཅིང་། དར་དམར་པོའམ་སེར་པོའི་མིག་རས་བཅིང་བའི་མོས་པ་གྱིས། ཨོཾ་ཙབྷནྡྷ་ཝ་ར་མ་ཎ་ཡ་ཧཱུཾ། མེ་ཏོག་གི་ཕྲེང་བ་ལག་ཏུ་གཏོད་པའི་མོས་པ་མཛོད། ཨ་ཁཾ་བཱི་ར་ཧཱུྃ། ལས་ཐམས་ཅད་ཀྱི་ཆུས་བསངས་ཏེ། དཀྱིལ་འཁོར་རང་རང་གི་ལས་སྔགས་བརྗོད། སློབ་མ་རྣམས་ལྷར་གསལ་བའི་སྙིང་གར་ཧཱུྃ་ལས་རྡོ་རྗེ་ནག་པོའི་ལྟེ་བར་ཉི་མ་ལ་ཧཱུྃ་ནག་པོ་དང་། མགྲིན་པར་ཨཱཿལས་པདྨ་དམར་པོ་འདབ་མ་བརྒྱད་པའི་ལྟེ་བར་ཉི་མ་ལ་ཨཱཿཋདམར་པོ་དཔྲལ་བར་ཨོཾ་ལས་འཁོར་ལོ་དཀར་པོའི་ལྟེ་བར་ཟླ་བ་ལ་ཨོཾ་དཀར་པོ། དེ་དག་ལས་འཕྲོས་པའི་འོད་ཟེར་གྱིས་སློབ་མའི་ལུས་ངག་ཡིད་གསུམ་གྱི་དྲི་མ་ཐམས་ཅད་བྱང་ཞིང་དག་པར་བྱ་
སྙམ་པའི་མོས་པ་གྱིས། ཧཱུྃ་ཞེས་བརྗོད་པས་དཀྱིལ་འཁོར་གྱི་ཤར་སྒོར་བཞག་པའི་མོས་པ་མཛོད། ཀྱེ། དགའ་བ་ལ་དགའ་བ་ཁྱེད་སུ་ཡིན། ཅི་ལ་དགའ། ད་འདིའི་རྗེས་ཟློ། བདེ་ཆེན་བདག་ནིསྐལ་བཟང་ལའོ། །ད་ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བར་བསྒོམས་ལ། ཀུན་རྫོབ་སེམས་བསྐྱེད་དང་དོན་དམ་སེམས་བསྐྱེད་ཟུང་འབྲེལ་དུ་ཉམས་སུ་བླང་བསམ་པ་གྱིས་ལ་སྔགས་འདིའི་རྗེས་ཟློས་ལན་གསུམ་མཛོད།་ཨོཾ་སརྦ་ཡོ་ག་ཙིཏྟ་ཨུཏཱ་ཏ་ཡཱ་མི། དེ་ལྟ་བུའི་སེམས་བསྐྱེད་པ་བརྟན་པར་བྱ་བའི་ཕྱིར་སྙིང་གར་རྡོ་རྗེ་དང་བཅས་པའི་མེ་ཏོག་བཞག་པའི་མོས་པ་མཛོད། ཨོཾ་སུ་ར་ཏེ་ས་མ་ཡ་ཧཱུཾ་ཧོཿ སིདྡྷི་བཛྲ་ཡ་ཐཱ་སུ་ཁཾ། དེ་ལྟ་བུའི་ཡེ་ཤེས་པ་དེ་སྣོད་མིན་ལ་གསང་བར་གདམས་པའི་ཕྱིར་མགོ་བོར་རྡོ་རྗེ་བཞག་པའི་མོས་པ་མཛོད་། འདི་རྣམས་ལ་ཉུང་ན་རྡོ་རྗེ་བཞག་ཅིང་མང་ནེ་བཞག་ཚུལ་བྱ་བས་འཐུས། དེང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར་གྱི། ཁྱོད་ཀྱིས་ཀྱང་དེ་བཞིན་
གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི། དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་། མ་དད་པ་ལ་ཡང་མི་བྱའོ། །དེ་ཡན་ཆད་ཕྱི་འཇུག་གི་ཆོ་གའོ། །ད་སློབ་དཔོན་གྱི་ལག་གི་རྡོ་རྗེ་འདི་ལ་འཇུས་ནས་ཡོལ་བའི་ནང་དུ་ཞུགས་པའི་མོས་པ་མཛོད། ཨོཾ་ཡ་མཱནྟ་ཀྲྀཏ་ཧཱུྃ། ཡོལ་བའི་ནང་དུ་བཅུག་པའི་མོས་པ་མཛོད། ཨ་ལཾ་བཱི་ར་ཧཱུཾ། ཡིད་ཀྱིས་སྐོར་བ་ལན་གསུམ་བྱས་པའི་མོས་པས་རྗེས་ཟློས་ལན་གསུམ་མཛོད། མ་ཧཱ་ར་ཏ་སུ་དྲི་ཌྷ་སུ་ཏོ་ཥྱ་སུ་སུ་ཁོ་བཛྲ་ས་ཏཱ་ཨཱཿདུ་སིད་རྒྱུ་ཚྭ། ཤར་སྒོ་ནས། མི་བསྐྱོད་པའི་ང་རྒྱལ་གྱིས་དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་ནས། བདག་ལ་བྱིན་གྱིས་བརླབ་ཏུ་གསོལ་སྙམ་པས་རྗེས་ཟློས། ཨོཾ་སརྦ་ཏ་ཐཱ་ག་ཏ་པཱུ་ཛོ་པསྠཱ་ནཱ་ཡ་ཨཱཿཏཱ་ནཾ་ནཱིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་སཏཱ་ཨ་དྷི་ཏིཥྛསཱ་ནཱཾ། ཡང་དེ་ཉིད་ནས་ཕྱག་འཚལ་ཏེ། བདག་ལ་རྣམ་སྣང་གིས་བྱིན་གྱིས་བརླབ་ཏུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་བུདྡྷ་པཱུ་ཛོ་པསྦྲ་ནཱ་ཡ་ཨཱཿཏྨ་ནཱི་ནཱིདྨ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་བེ་རོ་ཙ་ན་ཨ་དྷིཏིཥྛ་སྲ་མཱི། གཡས་བསྐོར་དུ་དེ་བཞིན་དུ་ལྷོ་སྒོ་ནས་ཕྱག་འཚལ་
བར་མོས་ཏེ། རིན་འབྱུང་གིས་བདག་ལ་དབང་བསྐུར་དུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཡ་ཨཱཿཏྨ་ནཱི་ནིརྨ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྟ་ཨ་བྷི་ཥཉྩམཾ།་ནུབ་སྒོ་ནས། འོད་དཔག་མེད་ཀྱི་བདག་ལ་ཆོས་ཀྱི་འཁོར་ལོ་བསྐོར་དུ་གསོལ་སྙམ་པས་རྗེས་ཟློས་མཛོད། ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་ཝརྟ་ནཱ་ཡ་ཨཱཿཏྨ་ནཱི་ནཱིརླ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨ་ཙཀྲ་པྲ་བརྟ་ཡ་མཱི། བྱང་སྒོ་ནས། དོན་གྲུབ་ཀྱིས་བདག་ལ་ལས་ཀྱི་དངོས་གྲུབ་མ་ལུས་པ་བསྩལ་དུ་གསོལ་སྙམ་པས་རྗེས་ཟློས། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ཎེ་ཨཱཿཏྨ་ནཾ་ནིརྱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀ་རུ་ཚྭ། སླར་ཡང་ཤར་སྒོ་ནས་སློབ་དཔོན་གྱི་ཞབས་ལ་ཕྱག་འཚལ་བར་མོས་ལ་སེམས་ཅན་ཐམས་ཅད་ཀྱི་དོན་འགྲུབ་པར་མཛད་དུ་གསོལ་སྙམ་པས་རྗེས་ཟློས། ༀ་གུ་རུ་ཙ་ར་ཎ་པཱུ་ཛ་ཨུ་པསྦྲ་ནཱ་ཡ་ཨཱཿཏྨ་ནཱི་ནཱིརྨ་ཏ་ཡཱ་མི། ཨོཾ་སརྦ་སཏྲ་པཱ་རི་པྲ་ཎ་ཊཾ་ཨཱཿཏྨ་ནཱི་ནཱིརྱ་ཏ་ཡཱ་མི། ནང་དུ་འཇུག་པའི་ཆོ་གའོ། །དེ་ནས་དམ་བཞག་བཞི་ནི་རྡོ་རྗེ་གདེང་ལ་མགོར་བཞག་པའམ་མང་ན་བཞག་ཚུལ་གྱིས་ཆོག །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། དེ་བས་ན་ངས་ཁྱོད་ལ་རྡོ་རྗེའི་
ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་རྣམས་ཀྱང་ཐོབ་པར་འགྱུར་ན། དངོས་གྲུབ་གཞན་རྣམས་ལྟ་སྨོས་ཀྱང་ཅི་དགོས། ཁྱོད་ཀྱིས་འདིར་དཀྱིལ་འཁོར་འདི་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། ཁྱོད་དམ་ཚིག་ཉམས་པར་གྱུར་ཏ་རེ། ཕན་ཡོན་གྱི་སྒོ་ནས་དམ་ལ་བཞག་པའོ། །རྡོ་རྗེ་མགོར་བཞག་པའམ། མང་ན་བཞག་ཚུལ་བྱ་ཞིང་དྲིལ་བུ་འཁྲོལ་ལ། ཨོཾ། འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱི་དམ་ཚིག་རྡོ་རྗེ་འདི། །གལ་ཏེ་ཁྱོད་ཀྱིས་འགའ་ཞིག་ལ། །འདི་སྨྲས་ན་ནི་སྤྱི་བོ་འགེམ། །ཉེས་དམིགས་གི་སྒོ་ནས་དམ་བཞག་གོ །སྙིང་གར་རྡོ་རྗེ་བཞག་པའམ། བཞག་ཚུལ་བྱས་ལ། ཨོཾ། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱིས་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་བྲལ་ཏེ་གཤེགས། །ཞེས་བཀའ་བསྒོ་བའོ། །དུང་ཆོས་ཀྱི་ཆུ་རྣམ་རྒྱལ་གྱི་ཆུས་བྲན་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འཐུང་ཞིག །ཨོཾ་པཉྩ་ཨ་མྲྀ་ཏ་ཨུ་ད་ཀ་ཁཱ། ཞེས་དམ་ཆུ་བླུད། མང་ན་མཆོད་གཡོག་པས་བཀྱེ་ཡང་རུང་། རྡོ་རྗེ་མགོར་
བཞག་པའམ་མང་ན་བཞག་ཚུལ་བྱ་ཞིང་། དེང་རིང་ཕྱིན་ཆད་བུ་ཁྱོད་ཀྱི། དཀྱིལ་འཁོར་གང་ཡིན་གྱི་གཙོ་བོའི་མཚན་བརྗོད་ལ། ང་ཡིན་གྱིས་ངས་འདི་གྱིས་ཤིག་ཅེས་གང་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མི་བྱ་སྟེ། བྱས་ན་ཁྱོད་ཡ་ང་བ་མ་སྤངས་པར་དུས་ཀྱི་བྱ་བ་བྱས་ནས་དམྱལ་བར་ལྟུང་བར་འགྱུར་ཏ་རེ། བླ་མའི་བཀའ་ཉན་པའི་དམ་བཞག་གོ །ད་ཡེ་ཤེས་པ་འབེབས་པའི་དོན་དུ་མཎྜལ་ཕུལ། ས་གཞི་སྤོས་སོགས། རྗེས་ཟློས་མཛོད། དེ་བཞིན་གཤེགས་པ་ཐམས་ཅད་དང་དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ཤིག །ཎིའི་ལྷ་ཚོགས་རྣམས་བདག་ལ་དབབ་པར་མཛད་དུ་གསོལ། ལན་གསུམ། ད་ངེད་རང་རྣམས་ཡིད་མ་ཡེངས་པར་དམིགས་པ་འདི་བཞིན་དུ་མཛོད་ཅིག་ཨ་ཞེས་བརྗོད་པས་ཁྱེད་རང་རྣམས་སྐད་ཅིག་གིས་འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་པདྨ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ་རལ་པའི་ཐོར་ཅོག་དང་། ཐོད་པའི་ཕྲེང་བའི་ཅོད་པན་ཅན་ཕྱག་རྒྱ་དྲུག་གིས་བརྒྱན་པ། རྐང་པ་གཉིས་བསྒྲད་པའི་ཚུལ་གྱིས་བཞུགས་པ། དེའི་སྙིང་གར་ལཾ་ལས་ས་
ཡི་དཀྱིལ་འཁོར་སེར་པོ་གྲུ་བཞི་ཡི་གྲྭ་བཞིར་རྡོ་རྗེས་མཚན་པའི་ཉི་མ་ལ་ཧཱུཾ་སྔོན་པོ། མགོ་བོར་པཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པར་ཟླ་བ་ལ་ཧ་དཀར་པོ། མགྲིན་པར་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གཡོ་བ་གཉིས་ཀྱིས་མཚན་པར་ཟླ་བ་ལ་ཨཱཿ༔དམར་པོས་བརྒྱན་པ། རང་གི་སྙིང་ཁའི་ས་བོན་གྱི་འོད་ཟེར་གྱིས་སྐུ་གསུང་ཐུགས་རྡོ་རྗེའི་ལྷ་ཚོགས་སྤྱན་དྲངས་ཏེ་ཡིག་འབྲུ་རྣམས་ལ་ཐིམ་པས་སྐུ་གསུང་ཐུགས་རྡོ་རྗེའི་རང་བཞིན་དུ་གྱུར། ཛཿཧཱུྃ་བཾ་ཧོཿ སློབ་མ་འོད་དཔག་མེད་དུ་གསལ་བའི་རྐང་པ་གཉིས་ཀྱི་འོག་ཏུ་ཡཾ་ལས་རླུང་གི་དཀྱིལ་འཁོར་གཡོ་བའི་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ་རཾ་གྱིས་མཚན་པའི་ནང་དུ་ཡི་གེ་ཛཱི་དམར་པོ་མེ་འབར་བ། དེའི་འོད་ཟེར་རྐང་པའི་བུ་ག་གཉིས་ནས་ཡར་ཞུགས་པས་མེའི་འོད་ཟེར་གྱིས་ལུས་ཀྱི་ནང་ཐམས་ཅད་གང་། ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་བྱས། དེའི་ཚེ་ལུས་ཀྱི་བུ་ག་ནས་མེའི་འོད་ཟེར་དཔག་ཏུ་མེད་པ་འཕྲོས་པ་དང་། སློབ་དཔོན་དང་
མདུན་བསྐྱེད་ཀྱི་ཐུགས་ཀ་ནས་ཀྱང་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་ཁྱད་པར་དུ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ་བས་དེ་རྣམས་ཀྱི་སྐུ་གསུང་ཐུགས་རྡོ་རྗེའི་རང་བཞིན་དཀྱིལ་འཁོར་ལྷ་ཚོགས་རྣམས་ཀྱི་རྣམ་པ་ཅན་དཔག་ཏུ་མེད་པ་སྤྱན་དྲངས་ཏེ་རང་གི་ལུས་ལ་ཆར་བབ་པ་བཞིན་སིབ་སིབ་ཐིམ་པས་རྒྱུད་བྱིན་གྱིས་བརླབ་པའི་མོས་པ་མཛོད། སྤོས་དུད་རོལ་ཆེན་བྱ། གཙོ་བོའི་སྔགས་མཇུག་ཏུ། ཨཱཿ་ཝེ་ཤ་ཡ་སྟམྦྷ་ཡ་ར་ར་ར་ར་ཙཱ་ལ་ཡ། ཙཱ་ལ་ཡ་ཧཱུྃ་ཧ་ཨ། ཛྷེ༔ ཏིཥྛ་མ་ཧཱ་ཀྲོ་དྷ་ཨཱཿ་ཝེ་ཤ་ཡ་སྟམྦྷ་ཡ། ར་ར་ར་ར་ཙཱ་ལ་ཡ། ཙཱ་ལ་ཡ་ཧཱུྃ་ཧ་ཨ། ཛྷཻ། ཅེས་མང་དུ་བརྗོད། དེས་ཡེ་ཤེས་པ་ཕེབས་སམ་མ་ཕེབས་ཀྱང་རུང་སྟེ་སྤོག་ཆོག་ལ་དམིགས་པ་འདི་བཞིན་དུ་མཛོད། སློབ་དཔོན་དཀྱིལ་འཁོར་གྱི་གཙོ་བོར་གསལ་བ་ལ་མོས་གུས་དྲག་པོ་བྱས་པས། དེའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་་ཆུབ་སེམས་དཔའ་ཐམས་ཅད་དང་།། ཁྱད་པར་དུ་དཀྱིལ་འཁོར་ལྷ་ཚོགས་རྣམས་ཀྱི་ཐུགས་རྒྱུད་བསྐུལ་བས། །དེ་རྣམས་ཀྱི་སྐུ་གསུང་ཐུགས་རྡོ་རྗེའི་རང་བཞིན་དཀྱིལ་འཁོར་ལྷ་
ཚོགས་རྣམས་ཀྱི་རྣམ་པ་ཅན་དཔག་ཏུ་མེད་པ་སྤྱན་དྲངས་ཏེ། ཁྱེད་རང་གི་ལུས་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། རྡོ་རྗེ་གསོར་དྲིལ་བུ་གསིལ་ཞིང་། འདི་ཁྱོད་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཞེས་སུ་བརྗོད། །རྡོ་རྗེ་ཡེ་ཤེས་བླ་ན་མེད། །དེ་རིང་ཁྱོད་ལ་ཕེབས་པར་མཛོད། །ཨོཾ་བཛྲ་ཨཱཿ་བེ་ཤ་ཡ་ཨ་ཨ་ཨ་ཨ། ཡེ་ཤེས་པ་ཕེབས་པ་དེ་རྣམས་བརྟན་པར་བྱ་བའི་ཕྱིར་མགོ་བོར་རྡོ་རྗེ་རྒྱ་གྲམ་དུ་བཞག་པའི་མོས་པ་མཛོད། ཏིཥྛ་བཛྲ། ད་ཁྱེད་རང་རྣམས་དཀྱིལ་འཁོར་གྱི་ཕྱོགས་སུ་ལྟོས། མིག་ལམ་ན་ཇི་ལྟར་སྣང་། དཀར་པོ་མཐོང་ན་ཞི་བ། སེར་པོ་རྒྱས་པ། དམར་པོ་དབང་། ནག་པོ་མངོན་སྤྱོད། ཁྲ་བོ་དང་ལྗང་གུ་མཐོང་ན་ལས་སྣ་ཚོགས་འགྲུབ་པར་འགྱུར་རོ། །སློབ་དཔོན་གྱིས་ཕྱག་གཡས་ཀྱིས་རྡོ་རྗེ་དང་བཅས་པས་སློབ་མའི་གཙོ་བོ་ཞིག་གི་མཐེ་བོང་གཉིས་ནས་བཟུང་སྟེ། ཁྱེད་རང་རྣམས་ཀྱིས་བསྐོར་བ་ལན་གསུམ་བྱས་པར་བསྒོམས། །ཨོཾ་ཨཱཿབིགྷན་ཏ་ཀྲྀཏ་ཧཱུཾ། ལས་སྔགས་ལན་གསུམ་བརྗོད། དཀྱིལ་འཁོར་གྱི་ལྷ་ལ་གསོལ་བ་བཏབ་ཅིང་། བདེན་སྟོབས་བརྗོད། རྡོར་དྲིལ་འཛིན། །ཡང་དག་པ་ཡི་དཀྱིལ་འཁོར་འདིར། །བདག་གི་
སློབ་མ་གཞུག་པ་འདིའི། །ལྷ་རྣམས་ཀྱིས་ནི་རིམ་པ་ནི། །བསོད་ནམས་ཇི་ལྟར་དེ་ལྟར་ཤོག །འདི་ཡིས་དངོས་གྲུབ་ཅི་འདྲར་འགྱུར། །རིགས་ནི་གང་གི་སྣོད་དུ་འགྱུར། །བསོད་ནམས་མཐུ་ཡང་ཅི་འདྲ་བར། །དེ་འདྲར་དཀྱིལ་འཁོར་དུ་གྱུར་ཅིག །གསུམ་བརྗོད། ཀྲྀ་ཊཾ་ཏྲ་སྔར་བྱིན་པའི་མེ་ཏོག་གིས་ཕྲེང་བ་ཡི་གེ་ཧཱུྃ་གྱིས་སྔགས་པ་ལས་ཡངས་ཤིང་མ་རྙིང་པའི་མེ་ཏོག་གཅིག་བཏོན་ལ་ལག་པ་ཐལ་མོ་སྦྱར་བའི་བར་དུ་བཟུང་སྟེ། སློབ་མ་རྣམས་ཀྱི་གནས་གསུམ་དུ་ཨོཾ་ཨཱཿ༔ཧཱུྃ་གི་ཡི་གེ་རྣམས་ལས་འཕྲོས་པའི་འོད་ཟེར་གྱིས། ལུས་ཐམས་ཅད་གང་བས་སྒོ་གསུམ་དྲི་མ་རྣམས་བཀྲུས་ཤིང་དག་པར་མོས་ལ། བླ་མས་ཀྱང་དེ་ལྟར་བྱིན་གྱིས་བརླབས་པས་གུས་པ་སྔོན་དུ་འགྲོ་བས་དཀྱིལ་འཁོར་པ་དང་བཅས་པའི་དཀྱིལ་འཁོར་གྱི་དབང་ཕྱུག་མདུན་ལ་གནས་བཞིན་དུ་དམིགས་པ་ལ་དཀྱིལ་འཁོར་དེར་ཡིད་ཀྱིས་ཞུགས་ཏེ་གཙོ་བོའི་དབུ་ལ་མེ་ཏོག་དོར་བའི་མོས་པས་རྗེས་ཟློས་མཛོད། ཨོཾ་ཏིཥྛ་བཛྲ་དྲི་རྣོ་མེ་བྷ་བ། ཤཱ་ཤྭ་ཏོ་མེ་བྷ་བ། ཧྲཱིཿ་ད་ཡམྨེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུཾ། ཧ་ཧ་ཧ་ཧ་ཧོཿ ཨ་ཁཾ་བཱི་ར་ཧཱུཾ། པྲ་ཏིཙྪ་ཀུ་སུ་མཱཉྫལི་ནཱི་ཐ་ཧོཿ མེ་ཏོག་དེ་ཉིད་གང་དུ་
བབ་པ་ཁྱེད་རང་གི་ཚེ་རབས་ལས་ཀྱི་ལྷ་ཡིན་པས་དེའི་དངོས་གྲུབ་ཐོབ་གཉིས་ཀྱི་བར་དུ་ལྟུང་ན་གང་ཉེ་བ་དང་། མཉམ་ན་གཉིས་ཀའི་དངོས་གྲུབ་ཆོ་ག་འགྲུབ། ཕྱིའི་རྡོ་རྗེ་ཕྲེང་བའི་ནང་དུ་ལྟུང་ན་ཚེགས་ཆེན་པོ་དང་ཕྱི་རོལ་དུ་སོང་ན་དངོས་གྲུབ་མེད་པ་སྟེ། ད་རེས་དཀྱིལ་འཁོར་གྱི་དབུས་སུ་བབ་པའི་མེ་ཏོག་གི་ཕྲེང་བ་ཁྱེད་རང་རྣམས་ཀྱི་མགོར་བཅིངས་ནས་ཕྲེང་བའི་དབང་བསྐུར་བའི་མོས་པ་མཛོད།་ཨོཾ་པྲ་ཏི་སྲྀཧཱ་ཧཱུཾ། ཨི་མཾ་སཏཱ་མ་ཧཱ་བ་ལ། སློབ་མ་རྣམས་ཀྱི་སྙིང་གར་ཟླ་བ་ལ་བདག་པོའི་ས་བོན་ཨཱཿའམ་ཧཱུྃ་དང་། དཔྲལ་བར་རཾ། མིག་གཉིས་སུ་ཨོཾ་ཡིག་འབར་བ་རེ་རེ་བསམས་ནས། ཨོཾ། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཐམས་ཅད་སྤྱན་ནི་དབྱེ་བར་མཛོད། །ཨོཾ་ཛྙཱ་ན་ཙཀྵ་ཧཱུྃ་ཨཱཿསཱ་ཧཱ། གདོང་གཡོགས་བསལ། ཧེ་བཛྲ་པ་། རྒྱས་པར་དཀྱིལ་འཁོར་དང་ལྷ་སོ་སོའི་མཚན་བརྗོད། རྒེའི་དཀྱིལ་འཁོར་རྟེན་བརྟེན་པ་དང་བཅས་པ་མངོན་སུམ་དུ་མཐོང་བའི་མོས་པ་མཛོད།་ད་ནི་དད་པའི་ཤུགས་ཀྱིས་སུ། །དཀྱིལ་འཁོར་འདི་དེ་ཉིད་ལ་ལྟོས། །ཁྱོད་ནི་སངས་རྒྱས་
རིགས་སུ་སྐྱེས། །ཕྱག་རྒྱུ་སྔགས་ཀྱི་བྱིན་གྱིས་བརླབས། །དངོས་གྲུབ་ཀུན་གྱི་ཕུན་སུམ་ཚོགས། །དམ་ཚིག་མཆོག་ཏུ་ཁྱོད་འགྱུར་གྱིས། །རྡོ་རྗེ་པདྨ་རྩེ་རོལ་པས། །གསང་སྔགས་རྣམས་ལ་བསྒྲུབ་པ་གྱིས། །ད་ནས་ཆེད་དུ་བརྗོད་པ་འདིའི་རྗེས་ཟློས་མཛོད། ཨོཾ་རྡོ་རྗེའི་དཀྱིལ་འཁོར་དཀྱིལ་འཁོར་ཆེན་པོར་བདག་ཞུགས་སོ། །ཨོཾ་རྣལ་འབྱོར་དཀྱིལ་འཁོར་དཀྱིལ་འཁོར་ཆེན་པོ་བདག་གིས་མཐོང་། །ཨོཾ་གསང་བའི་དཀྱིལ་འཁོར་དཀྱིལ་འཁོར་ཆེན་པོར་བདག་དབང་བསྐུར། །ས་མ་ཡཧོ་ཧོ་ཧོཿ དངོས་གཞི་དང་པོ་རང་དོན་ཕུན་སུམ་ཚོགས་པ་རྡོ་རྗེ་སློབ་མའི་དབང་ཞུ་བའི་ཕྱིར་མཎྜལ་ཕུལ། ས་གཞི་སྤོས་སོགས། ཐལ་མོ་སྦྱར་བས་རྗེས་ཟློས། བྱང་ཆུབ་རྡོ་རྗེ་སངས་རྒྱས་ལ། །མཆོག་ཆེན་ཇི་ལྟར་བསྩལ་བ་ལྟར། །བདག་ཀྱང་རབ་ཏུ་བསྒྲལ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་ལན་གསུམ་གྱིས་གསོལ་བ་བཏབ་ནས། སློབ་དཔོན་བརྡ་སྤྲོད་འདི་ལྟར་བྱ་སྟེ། ཁྱེད་རང་རྣམས་རྩ་བའི་དཀྱིལ་འཁོར་གྱི་ཤར་ཕྱོགས་དུར་ཁྲོད་ཡངས་པའི་སར། དབང་སྟེགས་ཀྱི་དཀྱིལ་འཁོར་གྲུ་བཞི་པ་སྒོ་གཅིག་ནུབ་ཏུ་ཕྱོགས་པ། དཀར་དམར་ནག་པའི་ར་བ་རིམ་པ་
གསུམ་མམ་རིམ་པ་གཅིག་གང་རུང་དང་ལྡན་པ། དེ་ཡི་ལྷ་སྣམ་རིམ་པ་གཉིས་ལ་གཡས་ཕྱོགས་སུ་ཆུ་བཞི་དང་། གཡོན་ཕྱོགས་སུ་ཉེར་སྤྱོད་ལྔ། མདུན་དུ་བཟེད་ཞལ་དང་སྦྱར་བའི་ཡོ་བྱད་དུ་མ་དང་བཅས་པས་བསྐོར་བའི་ནང་དུ། པདྨ་དཀར་པོ་འདབ་མ་བརྒྱད་པ་བཀྲ་ཤིས་པའི་རྟགས་བརྒྱད་དམ། ཡང་ན་ཕྱོགས་བཞིར་རིགས་བཞིའི་མཚན་མ་དང་། དབུས་སུ་ཤིང་གདན་ལ་ཟླ་བའམ་ཉི་མའི་དཀྱིལ་འཁོར་གྱི་སྟེང་དུ་ཁྱེད་རང་རྣམས། སྤྱི་ཁྱབ་ཏུ་རྡོ་རྗེ་སེམས་དཔའ། བྱེ་བྲག་ཏུ་རང་གི་དཀྱིལ་འཁོར་གྱི་གཙོ་བོའི་རྣམ་པར་གནས་པའི་སྟེང་དུ་བླ་བྲེ། གཡས་སུ་གདུགས་དཀར་པོ་གསེར་གྱི་ཡུ་བ་ཅན། གཡོན་དུ་རྒྱལ་མཚན་དང་བ་དན་ལ་སོགས་པ་མཆོད་པའི་ཚོགས་དང་བཅས་ཏེ་བཞུགས་པའི་མོས་པ་མཛོད། ཁྱེད་རང་དང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས། རང་བཞིན་གྱི་གནས་ནས་དེ་བཞིན་གཤེགས་པ་རིགས་ལྔ་ལ་སོགས་པ་དང་དབང་ལྷ་གདན་གསུམ་ཚང་བའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་སྤྱན་དྲངས་ཨོཾ་བཛྲ་ས་མཱ་ཛཿ ཨོཾ་སརྦ་ཏ་ཐཱ་
ག་ཏ་ཨབྷཾ་སོགས་ཀྱིས་མཆོད་ནས། རྡོར་དྲིལ་འཛིན་པས། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས། གཙོ་བོའི་ཐུགས་ཀ་ནས་བྱེ་བའི་བདུད་རྩི་འཁྱིལ་པ་བྱོན་ཏེ། ལས་ཀྱི་རྡོ་རྗེ་དང་དབྱེར་མེད་དུ་གྱུར་ནས། ཁྱེད་རང་རྣམས་ལ་སྦྱང་བ་བྱས་པའི་མོས་པ་མཛོད། ཨོཾ་ཨཱཿབིགྷན་ཏ་ཀྲྀཏ་ཧཱུྃ། ལས་ཀྱི་རྡོ་རྗེ་ནི་མཆོད་གཡོག་པ་ཡིན་པས། སྦྱང་བའི་རྫས་དྲུག་གིས་སྦྱང་བ་བྱ་ཞིང་། སློབ་དཔོན་གྱིས་སྔགས་བརྗོད་རྒྱུ་ཡིན་ནའང་། སློབ་མ་ཉུང་ན་སློབ་དཔོན་རང་གིས་བྱེད་སྲོལ་ཏེ། དེ་ཙམ་མི་ལྕོགས་ན་ཙཀླུ་གཅིག་ལ་རྫས་དྲུག་ཀ་བྲིས་ནས་དམིགས་པ་སྤྱོད་ཅིང་སྔགས་བརྗོད་དེ་སློབ་མའི་གཡས་གཡོན་དུ་བསྐོར་བའི་ཚུལ་ཙམ་བྱའོ། །ཁྱེད་རང་རྣམས་ཀྱི་གཡས་སུ་ཁམ་ཕོར་མེས་བཀང་བ་དང་། གཡོན་དུ་ཆུ་གཙང་བཞག་པས་ལས་ཀྱི་རྡོ་རྗེས་མཐེབ་སྲིན་གཉིས་ཀྱིས་ཡུངས་དཀར་དང་ཏིལ་ནག་བསྲེས་པ་བཟུང་སྟེ། ཁུ་ཚུར་གཡས་ཀྱིས་གཡས་ནས་བསྐོར་། གཡོན་གྱིས་གཡོན་ནས་བསྐོར། གཤིབ་སྟེ་གཉིས་ཀ་ནས་བསྐོར་ཏེ། བགེགས་དང་སྡིག་པ་སྦྱོང་བའི་ཕྱིར། མེ་དང་ཆུར་དོར་བའི་མོས་པ་མཛོད། ཨོཾ་སརྦ་པཱ་པཾ་
ད་ཧ་ན་བཛྲ་ཡེ་བཛྲ་སཏྭ་སྱ་སརྦ་པཱ་པཾ་ད་ཧ་ན་སྭཱ་ཧཱ། ཁུ་ཚུར་གཉིས་སུ་ཆུ་གཙང་བླུགས་ནས་སྔོན་ལྟར་བསྐོར་ཏེ་མེ་ཆུར་དོར་བའི་མོས་པ་མཛོད། ༀ་ཧཱུཾ་ཌཱ་ཌི་ཏ་སོ་མ་བཏང་བའི་ཁམ་ཕོར་དཀར་པོ་མཐེབ་སྲིན་གྱིས་བླངས་ཏེ་སྔར་ལྟར་བསྐོར་ནས་སྣོད་གཅིག་ཏུ་བཞག་པའི་མོས་པ་མཛོད། ཨོཾ་སརྦ་སཾ་ཤོ་དྷ་ནི་སྭཱ་ཧཱ། བ་ཡི་ལྕི་བའི་ཆངས་བུ་དང་དུར་བའི་མྱུ་གུ་སྔར་ལྟར་བསྐོར་ཞིང་སྣོད་གཅིག་ཏུ་བཞག་པའི་མོས་པ་མཛོད། ཨོཾ་སརྦ་མཱ་ལ་ཨཎ་བི་ཤྭ་དྷ་ནི་སྭཱ་ཧཱ། ཟན་ཆངས་དང་ཏིང་ལོ་འབར་བཞིན་པ་སྔར་ལྟར་བསྐོར་ནས་སྣོད་དུ་བཞག་པའི་མོས་པ་མཛོད། ཨོཾ་པུཎྱ་ཛྙཱ་ན་དྷ་རོད་སཾ་བྷོར་དྷ་ཀ་ཡེ་སྭཱ་ཧཱ། ཕྱིང་རས་དཀར་པོ་སྔར་ལྟར་བཟུང་ནས་བསྐོར་ཞིང་སྣོད་དུ་བཞག་པའི་མོས་པ་མཛོད། །ཨོཾ་སརྦ་སཾ་ཤཱ་དྷ་ནི་སྭཱ་ཧཱ། སློབ་མ་རྣམས་ཀྱི་དབང་པོ་དྲུག་གི་གླུད་སྦྱོང་བའི་རྫས་དྲུག་པོའི་སྣོད་དེ་མཆོད་གཡོག་པས་སློབ་མ་རྣམས་ལ་ལན་གསུམ་བསྐོར་ཞིང་ཕྱི་རོལ་དུ་དོར་བས་བགེགས་རྣམས་ཕྱིར་བསྐད་པར་སྒོམས་ཤིག །རྡོ་རྗེ་གསོར་ཞིང་དྲིལ་བུ་འཁྲོལ། གཙོ་བོའི་སྔགས་དང་ལས་སྔགས་དྲག་ཏུ་བརྗོད། གཞན་རྣམས་རོལ་ཆེན་བྱའོ། །དེ་ནས་འབག་བཙོག་སྦྱོང་བའི་ཉེ་རེག་
བྱ་བ་ནི། ངེད་རང་ཐམས་ཅད་ཀྱིས་ལག་པ་གཡས་ཀྱི་གུང་སྲིན་གྱིས་ཆུ་འདི། ཁའི་ཟེའུ་འབྲུ་ལ་ལན་གསུམ་བྱུག །དེ་ནས་མིག་གཉིས། རྣ་བ་གཉིས། །སྣ་བུག་གཉིས། མཆུ་གཉིས། ལག་པའི་མཁྲིག་མ་གཉིས། མགོ་བོའི་སྟེང་ལྟོ་བ་ལ་བྱབ་པའི་ཚུལ་བྱས་ཤིང་མཐར་ཁ་བཤལ་ནས་ཕྱིར་ཕོས་ཏེ་ལག་པ་གཉིས་ཀྱིས་ཁུ་ཚུར་གྱི་རྒྱབ་ཀྱིས་ཁ་ཡིས་གཤེར་རྣམས་གཡས་གཡོན་དུ་ཕྱིས་པས་འབག་བཙོག་སྦྱོང་བའི་མོས་པ་མཛོད། སློབ་དཔོན་རང་གི་ལག་པ་གཡོན་དུ་ཆུ་བླུགས་ནས་ཙོག་པུར་བསྡད་པའི་པུས་མོའི་བར་དུ་བཟུང་ནས། ཨོཾ་སརྦ་སཾ་ཤཱ་དྷ་ནི་སྭཱ་ཧཱ། ཞེས་མང་དུ་བཟླས་ཤིང་སྔོན་དུ་སྨྲས་པ་ཐམས་ཅད་རང་གིས་བྱའོ། །སློབ་དཔོན་གྱིས་རྡོ་རྗེ་དང་བཅས་པའི་འཐོར་གཡབ་ཀྱིས།་གཡོན་གྱི་དུང་ཕོར་ནས་དྲི་བཟང་གི་ཆུ་བླངས་ཏེ། སློབ་མ་རྣམས་ཀྱི་སྙིང་གར་འཐོར་ཞིང་། ཨོཾ་བཛྲ་གྷནྡྷེ་ཧཱུྃ། མེ་ཏོག་འཐོར་ཞིང་། ཨོཾ་བཛྲ་པུཥཱ་ཧཱུཾ། གཡས་པས་དྲི་བཟང་གིས་གང་བའི་དུང་ཆུས། གཡོན་པད་སྡེར་དུ་ཕྱག་ཏུ་མཆོད་ཡོན་ཕུལ་བའི་ཚུལ་གྱིས་ནར་ཙམ་བླུག་ཅིང་། ཨོཾ་ཧྲཱིཿཔྲ་ཝ་ར་སཏཱ་ར་ཨཧཱུྃ་པྲ་ཏིཙྪ་ཡེ་སྭཱ་ཧཱ། མར་མེ་འབར་བཞིན་པ་སློབ་མའི་མདུན་རྒྱབ་ནས་བསྐོར་བའི་མོས་པ་མཛོད། ཨོཾ་བཛྲ་དྷི་པཾ་ཧཱུཾ། སརྫ་རསྔའི་བདུག་པ་ཞེས་པ་སྤོས་དཀར་དང་མར་
དཀར་སྦྱར་བ་སྤོས་ཕོར་རྡོ་རྗེའི་ཐག་པས་དཀྲིས་ཏེ་སློབ་མ་རྣམས་ཀྱི་མདུན་ནས་འགྲིམ་པའི་མོས་པ་མཛོད། ཧཱུཾ་ཧཱུཾ་ཧཱུྃ། དེ་ལྟར་སྤོས་དང་མཆོད་པ་ལྔས་སྦྱང་བ་སྟེ་དབང་བསྐུར་བའི་སྔོན་འགྲོའོ། ཁྱེད་རང་རྣམས་དམིགས་པ་འདི་བཞིན་མཛོད། །དཀྱིལ་འཁོར་རང་རང་གི་ལས་སྔགས་དང་ལས་བུམ་གྱི་ཆུ་སློབ་མ་རྣམས་ལ་གཏོར་བས་བགེགས་བསངས་ཤིང་༔ བླ་མ་དཀྱིལ་འཁོར་གྱི་གཙོ་བོར་མོས་པའི་ཐུགས་ཀ་ནས་འོད་ཟེར་སྔོན་པོ་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས། ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྦྱངས་ཏེ། དྲི་མ་ཐམས་ཅད་དང་བྲལ་བའི་རང་བཞིན་སློབ་དཔོན་གྱི་ཞལ་དུ་ཞུགས་ཐུགས་ཀར་རྗེས་སུ་ཆགས་པའི་མེས་འོད་དུ་ཞུ་ནས་སྐུའི་དབྱིབས་བརྒྱུད། རྡོ་རྗེ་ལམ་ནས་བྱུང་བའི་བྱང་ཆུབ་སེམས་ཀྱི་ཐིག་ལེ་ལྷ་མོའི་པདྨར་བབ་པ་དེ་ཉིད། ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་མི་བསྐྱོད་སྔོན་པོ་རྡོ་རྗེ་དང་དྲིལ་བུ་འཛིན་པ་རང་འདྲ་བའི་ཡུམ་མཱ་མ་ཀཱི་དང་མཉམ་པར་སྦྱོར་བ། དེའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་ཕྱོགས་
བཅུའི་རིགས་ལྔ་ཡབ་ཡུམ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་ཨཱཿ༔རཱུ་པ་བཛྲ་ཧཱུྃ། ལ་སོགས་པའི་རྡོ་རྗེ་མ་ལྔས་མཆོད་ལ། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་བཞིན་འདི་ལ་བསྩལ་དུ་གསོལ། །ཞེས་གསོལ་བ་བཏབ་པས། རིགས་ལྔ་ཡབ་ཡུམ་སྙོམས་པར་ཞུགས་པས་འདོད་ཆགས་ཆེན་པོའི་མེས་ཞུ་ནས། སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཁུ་བས། སློབ་མ་མི་བསྐྱོད་པར་གསལ་བ་ལས་དབང་བསྐུར་བ་དང་ཡེ་ཤེས་པ་དང་འདྲེས་པ་དུས་གཅིག་ལ་བྱས་ལ།་ཛཿཧཱུྃ་བཾ་ཧོཿ ཧཱུྃ་ཞེས་པས་ལྷ་མོའི་པདྨ་ནས་ཕྱིར་ཐོན་ནས་དབང་སྟེགས་ཀྱི་སྟེང་དུ་འཁོད་པར་བསྒོམས། དབང་རྫས་ལྷར་བསྐྱེད་པ་ནི། ཉི་མ་གཅིག་ལ་དཀྱིལ་འཁོར་གཅིག་གམ་གཉིས་སམ་གསུམ་བཞི་ལ་སོགས་པ་དབང་བསྐུར་གང་བྱེད་ཀྱི་རྣམ་རྒྱལ་བུམ་ཆུ་ལ་དམིགས་པ་རང་རང་གིས་ལས་སྔགས་ཀྱིས་བསངས། སྭ་བྷ་ཝས་སྦྱངས། རྣམ་རྒྱལ་བུམ་ཆུ་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ལས་རྡོ་རྗེ་ཧཱུྃ་གིས་མཚན་པ་དེ་
ལས་འོད་ཟེར་འཕྲོས། འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། རྣམ་རྒྱལ་བུམ་ཆུ་མི་བསྐྱོད་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་གཡོན་དེས་མཚན་པའི་དྲིལ་བུ་འཛིན་པ། ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པ། རང་འདྲའི་རིག་མ་དང་ལྷན་ཅིག་ཏུ་སྙོམས་པར་འཇུག་པའི་སྐུ་ཅན་དུ་གྱུར། ཕ་རྒྱུད་རྣམས་ལ་རིན་པོ་ཆེའི་རྒྱན་དང་། མ་རྒྱུད་རྣམས་ལ་རུས་པའི་རྒྱན་དུ་བསྒོམས། དེའི་དཔྲལ་བར་ཨོཾ་དཀར་པོ་མགྲིན་པར་ཨཱཿཙྪདམར་པོ་ཐུགས་ཀར་ཧཱུཾ་སྔོན་པོ་ཐུགས་ཀའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མི་བསྐྱོད་པ་ཡབ་ཡུམ་གྱི་རྣམ་པར་སྤྱན་དྲངས་ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུངས་ཤིང་དབང་རྫས་ཀྱི་ལྷ་ལ་དབང་བསྐུར། དབང་ཐམས་ཅད་ཐོབ། དྲི་མ་ཐམས་ཅད་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན། དབང་རྫས་ཀྱི་མི་བསྐྱོད་པ་ཡབ་ཡུམ་སྙོམས་པར་ཞུགས་པ་ཞུ་བ་ལས་བྱུང་བའི་དབང་རྫས་དང་བུམ་ཆུའི་རང་བཞིན་དུ་
གྱུར། ནམ་མཁར་བཞུགས་པའི་དེ་བཞིན་གཤེགས་པ་དང་སློབ་དཔོན་དང་དཀྱིལ་འཁོར་ལ་བཞུགས་པའི་ལྷ་དང་བཅས་པ་ལ་གསོལ་བ་འདེབས་པའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བར་བསྩལ་དུ་གསོལ། ཞེས་གསོལ་བ་བཏབ་པས་ནམ་མཁར་བཞུགས་པའི་དེ་བཞིན་གཤེགས་པ་ཐམས་ཅད་ཀྱིས་ཁྱེད་རང་རྣམས་ཀྱི་རྒྱུད་བྱིན་གྱིས་རླབས་ཏེ། དབང་བསྐུར་བའི་ཏིང་ངེ་འཛིན་ལ་སྙོམས་པར་ཞུགས། སློབ་དཔོན་དང་རིག་མ་རྣམས་ཀྱིས་བུམ་པ་དཀར་པོ་བྱང་ཆུབ་ཀྱི་སེམས་ཀྱིས་གང་བ་ཅུང་ཟད་ཡོ་བ་དང་བཅས་པས་དབང་བསྐུར། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད། ཁྲོ་བོ་ཁྲོ་མོ་རྣམས་ཀྱིས་བགེགས་བསྐདེ། མཆོད་པའི་ལྷ་མོ་རྣམས་ཀྱིས་མཆོད་བཞིན་པས་ཁྱེད་རང་རྣམས་ཀྱི་རྒྱུད་ལ་དབང་གི་ཡེ་ཤེས་སྐྱེ་བའི་རྟེན་འབྲེལ་བསྒྲིགས་པའི་མོས་པ་མཛོད། དེ་ནས་དཀྱིལ་འཁོར་གསུམ་བཞི་ལ་སོགས་པའི་དབང་བསྐུར་དུས་གཅིག་ལ་བྱེད་ན། རྣམ་རྒྱལ་བུམཔ་གཞན་གྱི་ཆུ་གཙོ་བོས་བུར་པར་བླུགས་ཏེ་ལས་ཀྱི་རྡོ་རྗེས་བུམ་པ་བཏེག་ལ་སློབ་མའི་ཕྱོགས་སུ་བཟུང་ཞིང་། སློབ་དཔོན་གྱིས་རྡོར་དྲིལ་འཛིན་པས་མེ་ཏོག་འཐོར་ཞིང་། བཀྲ་ཤིས་གང་ཞིག་སེམས་
ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་དམ་པའི་རིགས་རྣམས་ཀྱི་ནི་རྗེ། །མ་ལུས་སེམས་ཅན་སྐྱེད་བྱེད་བདེ་བ་ཆེན་པོ་སྟེ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །ཞེས་དང་། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པ་འདབ་འདྲའི་སྤྱན་མངའ་བའི། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པའི། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མིན་དག་གིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་རྡོ་རྗེའི་རིགས་དང་ལྡན། །སྡང་བས་ཟིལ་མནན་སྐྱེ་བོ་རྣམ་པར་སྦྱོང་མཛད་པ། །མི་བསྐྱོད་མགོན་པོ་ཞེས་བྱར་མཚན་གསོལ་དེ་
ཡི་ནི། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མཐའ་དག་འཁོར་ལོའི་རིགས་དང་ལྡན། །རྣམ་པར་སྣང་མཛད་འཁོར་བའི་སྡུག་བསྔལ་རྟག་འཕྲོག་ཅིང་། །རྨོངས་པས་ཟིལ་མནན་སྐྱེ་བོ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་རིན་ཆེན་རིགས་དང་ལྡན། །ཕོངས་པའི་སྡུག་བསྔལ་གྲོལ་བར་ཡོངས་སུ་རབ་བརྩོན་ཞིང་། །ཁེངས་པས་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་པདྨའི་རིགས་དང་ལྡན། །འཇིག་རྟེན་དབང་ཕྱུག་སྲིད་པའི་དྲྭ་བ་འཇོམས་པ་པོ། །ཆགས་པས་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །།བཀྲ་ཤིས་གང་ཞིག་མ་ལུས་ལས་ཀྱི་རིགས་དང་ལྡན། །བརྩེ་བའི་བདག་ཉིད་ལོག་པར་ལྟ་བ་ངེས་པར་སྤྱོད། །དེ་སྦྱོང་ཐབས་སྟོན་དེ་ནི་ཀུན་ནས་སེལ་མཛད་པ། །བཀྲ་ཤིས་དེས་ནི་དེང་འདིར་ཁྱོད་ལ་དབང་རབ་བསྐུར། །ཨོཾ་མ་ཧཱ་སུ་ཁ་བཛྲ་སཏྭ་ཨ་བྷི་ཥེ་ཀ་ན་ཧཱུཾ། ཨ་བྷི་
ཥིཉྩམི་སརྦ་ཏ་ཐཱ་ག་ཏ་ཨ་དྷི་པ་ཏེ་ཏཱ་ནོ་པ་ཌི་ལྷོ་མེ་བྷ་ཝ། སློབ་དཔོན་གྱིས་རྡོ་རྗེ་དང་བཅས་པས་རྣམ་རྒྱལ་བུམ་པ་བཟུང་ལ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་ཨཱཿབཛྲ་ཨུ་ད་ཀ་ཨ་བྷི་ཥིཉྩ་ཧཱུཾ། སུ་ར་ཏེ་སྟེ་ཨ་ཧཾ། ཉུང་ན་བུམ་པ་མགོར་བཞག་བུམ་ཆུ་བླུད། མང་ན་མཆོད་གཡོག་པ་གཉིས་ཀྱིས་བུམ་ཆུ་དེ་བསྲེས་པའི་ཆུ་བུམ་པ་གཞན་དུ་བླུགས་ལ། སློབ་མ་རྣམས་ཀྱི་ལག་པར་བླུག་ཅིང་བཀྲུ་འཇུག །གཞན་གཅིག་གིས་ཁྲུས་གཞོང་ཡང་མཉམ་དུ་འགྲིམ། མཆོད་གཡོག་པ་དེ་དབུ་རྒྱན་སོགས་ཀྱིས་བརྒྱན་པ་ཞིག་གིས་གདུགས་དཀར་པོ་གཅིག་དེ་རྣམས་ཀྱི་སྤྱི་བོར་འགྲིམ། མ་རྫོགས་བར་དུ་རོལ་ཆེན་བྱ།་ཁྱེད་རང་རྣམས་ཁྲུས་ཀྱི་དཀྱིལ་འཁོར་ལས་བབ་སྟེ། གོས་དམར་པོ་གསར་པ་གྱོན་རིན་པོ་ཆེའི་རྒྱན་གྱིས་བརྒྱན། རྡོ་རྗེའི་གླུ་ལེན་ཅིང་དཀྱིལ་འཁོར་ལ་བསྐོར་བ་ལན་གསུམ་བྱས་པའི་མོས་པ་མཛོད། མཆོད་གཡོག་པས་དཀྱིལ་འཁོར་ལ་བསྐོར་བ་ལན་གསུམ་བྱ་བའམ་བྱ་བའི་ཚུལ་བྱ། སློབ་དཔོན་གྱིས་ཚིགས་བཅད་འདི་དག་དབྱངས་འདྲ་བ་བྱ། བདེ་བ་ཆེན་པོ་འདོད་ཆགས་ཆེ། །རྡོ་རྗེ་ཆེན་པོ་ནོར་ཆེ་བ། །ཤེས་རབ་ཆེན་པོ་ཡེ་ཤེས་ཆེ། །རྡོ་རྗེ་སེམས་དཔའ་།
དེང་བདག་སྒྲུབས། །སངས་རྒྱས་ཀུན་གྱི་རྡོ་རྗེ་ཆེ། །དངོས་གྲུབ་ཀུན་གྱི་བདེ་སྟེར་བ། །ཀུན་གྱི་དབང་བསྐུར་བསྐུར་དོན་དུ། །རྡོ་རྗེའི་དབང་བསྐུར་བླ་ན་མེད། །ཨེ་མ་ཧོཿ དང་པོའི་སངས་རྒྱས་སྐུ་ཅན་རྣམ་པར་རྒྱལ། །ཐར་པ་ནོར་ཆོས་འདོད་པ་སྟེར་མཛད་རྒྱལ། །ཡེ་ཤེས་ལྷ་དང་དགའ་ལྡན་རང་བཞིན་རྒྱལ། །མགོན་པོ་བདེ་ཆེན་ཕྱག་ན་རྡོ་རྗེ་རྒྱལ། །དེ་ལྟར་བུམ་པའི་ཆུས་སྤྱི་བོ་ནས་དབང་བསྐུར་བས། ལུས་ཐམས་ཅད་ཡེ་ཤེས་ཀྱི་ཆུ་རྒྱུན་གྱིས་གང་། དྲི་མ་ཐམས་ཅད་དག །དབང་ཐམས་ཅད་ཐོབ་ཆུའི་ལྷག་མ་ཡར་ལུད་པ་ལས། སྤྱི་བོར་མི་བསྐྱོད་པས་དབུར་བརྒྱན། དེ་ལྟར་ཁྱེད་རྣམས་མི་བསྐྱོད་པའི་རང་བཞིན་དུ་གྱུར་པ་ལ། བདག་གིས་མཆོད་པ་འབུལ་བར་མོས། ཨོཾ་ཨཀྵ་བྷུ་ས་པཱ་རི་ཝཱ་ར་ཨརྒྱུ་སོགས་ནས། ཤབྡའི་བར་གྱིས་མཆོད། དེ་ལྟར་ཁྱེད་རྣམས་ལ་མི་བསྐྱོད་པའི་སྒོ་ནས་ཆུའི་དབང་ཐོབ། ཉོན་མོངས་པ་ཞེ་སྡང་དག །རྣམ་པར་ཤེས་པའི་ཕུང་པོ་གནས་འགྱུར། ཆོས་དབྱིངས་ཡེ་ཤེས་མངོན་དུ་བྱས། མི་བསྐྱོད་པའི་ས་བོན་དང་བག་ཆགས་རྒྱུད་ལ་བཞག་པ་ཡིན། ད་གཉིས་པ་ཅོད་པན་གྱི་དབང་ལ་ལས་སྔགས་ཀྱིས་བསངས། ལས་བུམ་གྱི་
ཆུ་སློབ་མ་རྣམས་ལ་གཏོར་བས་བགེགས་བསངས་ཤིང་། བླ་མ་དཀྱིལ་འཁོར་གྱི་གཙོ་བོར་མོས་པའི་ཐུགས་ཀ་ནས་འོད་ཟེར་སེར་པོ་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས། ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྦྱངས་ཏེ། དྲི་མ་ཐམས་ཅད་དང་བྲལ་བའི་རང་བཞིན་སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་འོད་དུ་ཞུ་ནས་སྐུའི་དབྱིབས་བརྒྱུད། རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཐིག་ལེ་ལྷ་མོའི་པདྨར་བབ་པ་དེ་ཉིད། ཨོཾ་ལས་རིན་པོ་ཆེ་ཨོཾ་གྱིས་མཚན་པ་ལས་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་རིན་པོ་ཆེ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ་རང་འདྲ་བའི་ཡུམ་རིན་ཆེན་སྒྲོལ་མ་དང་མཉམ་པར་སྦྱོར་བའི་སྐུར་གྱུར། དེའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་ཕྱོགས་བཅུའི་རིགས་ལྔ་ཡབ་ཡུམ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་ཨཱཿརཱུ་པ་བཛྲ་ཧཱུྃ། ལ་སོགས་པའི་རྡོ་རྗེ་མ་ལྔས་མཆོད་ལ། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་
དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས། རིགས་ལྔ་ཡབ་ཡུམ་སྙོམས་པར་ཞུགས་པས་འདོད་ཆགས་ཆེན་པོའི་མེས་ཞུ་ནས། སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཁུ་བས། སློབ་མ་རིན་འབྱུང་དུ་གསལ་བ་ལ་དབང་བསྐུར་བ་དང་ཡེ་ཤེས་པ་འདྲེས་པ་དུས་གཅིག་ལ་བྱས་ལ། ཛཿཧཱུྃ་བཾ་ཧོཿ ཧཱུྃ་ཞེས་པས་ལྷ་མོའི་པདྨ་ནས་ཕྱིར་ཐོན་ནས་དབང་སྟེགས་ཀྱི་སྟེང་དུ་འཁོད་པར་བསྒོམས། ལས་བུམ་གྱི་ཆུ་སློབ་མ་དང་དབང་རྫས་ལ་གཏོར་ཞིང་རང་རང་གི་ལས་སྔགས་ཀྱིས་བསངས། ཨོཾ་སྭ་བྷ་ཝ་ཤུདྡྷསརྦ་དྷིསྭ་བྷ་ཝ་ཤུདྡྷོཉཧཾ། །ཁྱེད་རང་རྣམས་ཀྱི་ཉོན་མོངས་པའི་ང་རྒྱལ་སེར་སྣ་དང་ཚོར་བའི་ཕུང་པོ་དང་དབང་རྫས་དབུ་རྒྱན་རྣམས་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཨོཾ་ལས་རིན་པོ་ཆེ་ཨོཾ་གྱིས་མཚན་པ་དེ་ལས་འོད་ཟེར་འཕྲོ་འདུས་གཅིག་ཏུ་གྱུར་པ་ལས། ཁྱེད་རང་རྣམས་ཀྱི་ཉོན་མོངས་པ་ང་རྒྱལ་སེར་སྣ་དང་། །ཚོར་བའི་ཕུང་པོ་དང་། དབང་རྫས་རིན་པོ་ཆེའི་དབུ་རྒྱན་
གཉིས་ཀ་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གཅིག་ཕྱག་གཉིས་པ། གཡས་རིན་པོ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲ་བའི་ཡུམ་རིན་ཆེན་སྒྲོལ་མ་དང་མཉམ་པར་སྦྱོར་བའི་སྐུར་གྱུར། དེ་གཉིས་ཀའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། ཐུགས་ཀའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིན་ཆེན་འབྱུང་ལྡན་ཡབ་ཡུམ་གྱི་རྣམ་པར་སྤྱན་དྲངས་ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཁྱེད་རང་དང་དབང་རྫས་ཀྱི་ལྷ་ལ་གཉིས་སུ་མེད་པར་ཐིམ། ནམ་མཁར་བཞུགས་པའི་དབང་ལྷ་རྣམས་ཀྱིས་ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། ཞེས་གསུངས་ཤིང་དབང་རྫས་ཀྱི་ལྷ་ལ་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱིས་དབུར་བརྒྱན། དབང་རྫས་ཀྱི་རིན་ཆེན་འབྱུང་ལྡན་ཡབ་ཡུམ་སྙོམས་པར་ཞུགས་པ་ཞུ་བ་ལས་བྱུང་བའི་དབང་རྫས་དབུ་རྒྱན་དང་དར་དཔྱངས་སུ་གྱུར། དེ་ནས་ཁྱེད་རང་རྣམས་ཡན་ལག་བཞི་རྫོགས་སུ་བསྒྲུབ་པའི་ཕྱིར། ནམ་མཁར་བཞུགས་པའི་དབང་ལྷ་རྣམས་ལ་གསོལ་བ་བཏབ་པའི་རྗེས་
ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་ཅོད་པན་གྱི་དབང་བསྐུར་དུ་གསོལ། དེ་ལྟར་གསོལ་བ་བཏབ་པས་ནམ་མཁར་གནས་པའི་དེ་བཞིན་གཤེགས་པ་རྣམས་ཀྱིས་རིན་པོ་ཆེའི་ཅོད་པན་སྤྱི་བོ་ལ་སོགས་པའི་གནས་ལྔར་བཅིང་བའི་མོས་པ་མཛོད། རྡོ་རྗེ་དབྱིངས་ཀྱི་དབང་ཕྱུག་ལ་སོགས་པའི་སེམས་མ་བཞིའི་ཕྱག་རྒྱ་དང་། ཨོཾ་བཛྲ་དྷ་ཏི་ཤྭ་རི་ཨ་བྷི་ཥིཉྩཧཱུྃ། ཨོཾ་སརྦ་ཏ་ཐཱ་ག་ཏ་སཏཱ་བཛཱི་ཨ་བྷི་ཥིཉྩ་ཧཱུཾ། ཨོཾ་རཏྣ་བཛཱི་ཨ་བྷི་ཥིཉྩ་ཨཱཿ ཨོཾ་དྷརྨ་བཛཱི་ཨ་བྷི་ཥིཉྩ་ཧི༔ ཨོཾ་ཀརྨ་བཛཱི་ཨ་བྷི་ཥིཉྩ་ཧཱུཾ། སྔགས་དང་ཕྱག་རྒྱ་གནས་ལྔར་བཞུགས་པར་མོས་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་ཀྱི་ཕྱག་རྒྱ་ཕ་རྒྱུད་བཞི་ལ་བྱའོ། །གཞན་རྣམས་ལ་བྱ་མི་དགོས་འོག་མ་རྣམས་ལ་ཡང་སྦྱང་ཞིང་དབང་རྫས་སོགས་རིགས་བསྲེས་ཏེ་ཤེས་པར་བྱའོ། ༈ །རལ་པའི་ཐོར་ཙུགས་རྒྱན་པ་ཡི། །རིན་པོ་ཆེ་ཡི་དབུ་རྒྱན་དང་། །དར་དཔྱངས་ཅོད་པན་དག་གིས་དབང་། །དེ་རིང་ཁྱོད་ལ་བསྐུར་བར་བྱ། །ཨོཾ་བཛྲ་རཏྣ་མུ་གུ་ཧཱུྃ་ཨ་བྷི་ཥིཉྩ་མཾ། བཛྲ་རཀ་ཏ་ཤ་མི་ཧོཿ ཨ་བྷི་ཥིཉྩ། ཕ་རྒྱུད་ལ་ཁ་དོག་སྣ་ལྔའི་དར་དཔྱངས་དང་། མ་རྒྱུད་རྣམས་ལ་དཔའ་བོའི་དར་དཔྱངས་སྦྱིན། ཨོཾ་ཧཱུྃ་ཧཱུྃ་ཧཱུྃཨཱཿ ཨོཾ་བཛྲ་ཏུ་ཥྛ་ཧོ། དབང་དེ་བརྟན་པའི་ཡན་ལག་
ཏུ། ཨོཾ་ཨཱཿབཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་སྭཱ་ཨ་ཧཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག་ཆུ་ཡི་ལྷག་མ་ཡར་ལུད་པ་ལས། རིན་ཆེན་འབྱུང་ལྡན་གྱིས་དབུར་བརྒྱན། དེ་ལ་མཆོད་པའི་ཕྱིར། རཏྣ་སཾ་བྷ་ཝ་པུཔྤེ་ནས་ཤབྡའི་བར་གྱིས་མཆོད། དེ་ལྟར་ན་རིན་ཆེན་འབྱུང་ལྡན་གྱི་སྒོ་ནས་ཅོད་པན་གྱི་དབང་བསྐུར་བ་ཐོབ། ང་རྒྱལ་དང་སེར་སྣ་དག །ཚོར་བའི་ཕུང་པོ་གནས་འགྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རིན་ཆེན་འབྱུང་ལྡན་གྱི་ས་བོན་དང་བག་ཆགས་རྒྱུད་ལ་བཞག་པ་ཡིན། གསུམ་པ་རྡོ་རྗེའི་དབང་ལས་སྔགས་ཀྱིས་བསངས། ལས་བུམ་གྱི་ཆུ་སློབ་མ་རྣམས་ལ་གཏོར་བས་བགེགས་བསངས་ཤིང་། བླ་མ་དཀྱིལ་འཁོར་གྱི་གཙོ་བོར་མོས་པའི་ཐུགས་ཀ་ནས་འོད་ཟེར་དམར་པོ་འཕྲོས་ཁྱེད་རང་རྣམས་ཀྱི་ལུས་ལ་ཕོག་པས། ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྦྱངས་ཏེ། དྲི་མ་དང་བྲལ་བའི་རང་བཞིན། སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་འོད་དུ་ཞུ་ནས། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཐིག་ལེ་ལྷ་མོའི་པདྨར་
བབ་པ་དེ་ཉིད་ཧྲཱིཿ༔ལས་པདྨ་དྭིས་མཚན་པ་ལས། འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ་གཡས་པདྨ་གཡོན་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲ་བའི་ཡུམ་གོས་དཀར་མོ་དང་མཉམ་པར་སྦྱོར་བའི་སྐུར་གྱུར། དེའི་དཔྲལ་བར་ཨོཾ་མགྲིན་པར་ཨཱཿ༔ཐུགས་ཀར་ཧཱུཾ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་ཕྱོགས་བཅུའི་རིགས་ལྔ་ཡབ་ཡུམ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་ཨཱཿ༔རཱུ་པ་བཛྲ་ཧཱུྃ། ལ་སོགས་པའི་རྡོ་རྗེ་མ་ལྔས་མཆོད་ལ། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས་རིགས་ལྔ་ཡབ་ཡུམ་སྙོམས་པར་ཞུགས་པས་འདོད་ཆགས་ཆེན་པོས་མེས་ཞུ་ནས་སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཁུ་བས། སློབ་མ་འོད་དཔག་མེད་པར་གསལ་བ་ལ་དབང་བསྐུར་བ་དང་ཡེ་ཤེས་པ་འདྲེས་པ་དུས་གཅིག་ལ་བྱས། ཛཿཧཱུྃ་བཾ་ཧོཿ ཧཱུྃ་ཞེས་པས་ལྷ་མོའི་པདྨ་ནས་ཕྱིར་ཐོན་ནས་དབང་སྟེགས་ཀྱི་སྟེང་དུ་འཁོད་པར་
གྱུར། ལས་སྔགས་ཀྱིས་བསངས། སྭ་བྷ་ཝས་སྦྱངས། སྟོང་པའི་ངང་ལས་པདྨ་དང་ཉི་མའི་སྟེང་དུ་ཧཱུྃ་ལས་པདྨ་དྭིས་མཚན་པ་ལས་འོད་ཟེར་འཕྲོ་འདུས་གཅིག་ཏུ་གྱུར་པ་ལས་ཁྱེད་རང་རྣམས་ཀྱི་ཉོན་མོངས་པ་འདོད་ཆགས་དང་འདུ་ཤེས་ཕུང་པོ་དང་། དབང་རྫས་རྡོ་རྗེ་གཉིས་ཀ་འོད་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ། གཡས་པདྨ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲ་བའི་ཡུམ་གོས་དཀར་མོ་དང་མཉམ་པར་སྦྱོར་བའི་སྐུར་གྱུར། དེ་གཉིས་ཀའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། ཐུགས་ཀའི་ས་བོན་ལས་འོད་ཟེར་འཕྲོས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འོད་དཔག་མེད་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཁྱེད་རང་དང་དབང་རྫས་ཀྱི་ལྷ་ལ་གཉིས་སུ་མེད་པར་ཐིམ། ནམ་མཁར་བཞུགས་པའི་དབང་ལྷ་རྣམས་ཀྱིས་ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་དབང་རྫས་ཀྱི་ལྷ་ལ་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་འོད་དཔག་མེད་ཀྱིས་དབུར་བརྒྱན། དབང་རྫས་ཀྱི་འོད་དཔག་མེད་ཡབ་ཡུམ་
སྙོམས་པར་ཞུགས། ཞུ་བ་ལས་བྱུང་བའི་དབང་རྫས་རྡོ་རྗེར་གྱུར། ཁྱེད་རང་རྣམས་ཡན་ལག་བཞི་རྫོགས་སུ་བསྒྲུབ་པའི་ཕྱིར། ནམ་མཁར་བཞུགས་པའི་དབང་ལྷ་རྣམས་ལ་གསོལ་བ་བཏབ་པའི་རྗེས་ཟློས། དེ་བཞིན་གཤེགས་པ་ཐམས་ཀྱིས་བདག་ལ་རྡོ་རྗེའི་དབང་བསྐུར་བར་བསྩལ་དུ་གསོལ། །ཞེས་གསོལ་བ་བཏབ་པས་ནམ་མཁར་བཞུགས་པའི་དབང་ལྷ་རྣམས་ཀྱིས།་སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །འདི་དེ་སངས་རྒྱས་ཐམས་ཅད་ཉིད། །རབ་ཏུ་བསྒྲུབ་ཕྱིར་རྡོ་རྗེ་ཟུང་། །ཨོཾ་མ་ཧཱ་སུ་ཁ་བཛྲ་ཧཱུྃ་ཞེས་བརྗོད་ཅིང་། རྡོ་རྗེ་སློབ་མའི་སྙིང་ཁ་དང་། མགྲིན་པ་དང་སྤྱི་བོ་རྣམས་སུ་རེག་ཅིང་ལག་པ་གཡས་སུ་བྱིན་པའི་མོས་པ་མཛོད། དབང་བརྟན་པའི་ཡན་ལག་ཏུ། ཨོཾ་ཨཱཿབཛྲ་ཨུ་ད་ཀ་ཨ་བྷི་ཥིཉྩ་ཧཱུཾ། སུ་ར་ཏེ་སྟེ་ཨ་ཧཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ཡུད་པ་སྤྱི་བོར་འོད་དཔག་མེད་ཀྱིས་དབུར་བརྒྱན། དེ་ལ་མཆོད་པའི་ཕྱིར་ཨ་མི་ཏ་བྷ་པུལླེ་སོགས་ནས་ཤབྡའི་བར་གྱིས་མཆོད། དེ་ལྟར་ན་འོད་དཔག་མེད་རྡོ་རྗེའི་དབང་བསྐུར་བ་ཐོབ།
འདོད་ཆགས་དག་འདུ་ཤེས་ཕུང་པོ་གནས་འགྱུར་སོར་རྟོག་ཡེ་ཤེས་མངོན་དུ་བྱས། འོད་དཔག་མེད་ཀྱི་ས་བོན་དང་བག་ཆགས་རྒྱུད་ལ་བཞག་པ་ཡིན། བཞི་པ་དྲིལ་བུའི་དབང་ལས་སྔགས་ཀྱིས་བསངས། ལས་བུམ་གྱི་ཆུ་སློབ་མ་རྣམས་ལ་གཏོར་བས་བགེགས་བསངས་ཤིང་། བླ་མ་དཀྱིལ་འཁོར་གྱི་གཙོ་བོར་མོས་པའི་ཐུགས་ཀ་ནས་འོད་ཟེར་ལྗང་ཁུ་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས། ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྦྱངས་ཏེ། དྲི་མ་དང་བྲལ་བའི་རང་བཞིན་སློབ་དཔོན་གྱི་ཞལ་དུ་ཞུགས། ཐུགས་རྗེས་ཆགས་པའི་མེས་འོད་དུ་ཞུ་ནས། སྐུའི་དབྱིབས་བརྒྱུད་རྡོ་རྗེ་ལམ་ནས་བྱུང་བའི་བྱང་ཆུབ་སེམས་ཀྱི་ཐིག་ལེ་ལྷ་མོའི་པདྨར་བབ་པ་དེ་ཉིད། ཁཾ་ལས་རལ་གྲི་ཁཾ་གིས་མཚན་པ་ལས་མི་གྲུབ་པ་སྐུ་མདོག་ལྗང་ཁུ་ཞལ་གཅིག་ཕྱག་གཉིས་པ། གཡས་རལ་གྲི་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲ་བའི་ཡུམ་དམ་ཚིག་སྒྲོལ་མ་དང་མཉམ་ར་བའི་སྐུར་གྱུར། དེའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་ཕྱོགས་བཅུའི་
རིགས་ལྔ་ཡབ་ཡུམ་འཁོར་དང་བཅས་པ་ཨོཾ་བཛྲ་ས་མཱ་ཛཿ ཨོཾ་ཨཱཿ༔རཱུ་པ་བཛྲ་ཧཱུྃ། ལ་སོགས་པ་རྡོ་རྗེ་མ་ལྔས་མཆོད། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས། རིགས་ལྔ་ཡབ་ཡུམ་སྙོམས་པར་ཞུགས་པ་འདོད་ཆགས་ཆེན་པོའི་མེས་ཞུ་ནས། སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། རྡོ་རྗེའི་ལམ་ནས་བྱོན་པའི་བྱང་ཆུབ་སེམས་ཀྱི་ཁུ་བས། སློབ་མ་དོན་ཡོད་གྲུབ་པར་གསལ་བ་ལ། དབང་བསྐུར་བ་དང་ཡེ་ཤེས་པ་འདྲེས་པ་གཅིག་ཏུ་བྱས། ཛཿཧཱུྃ་བཾ་ཧོཿ ཧཱུྃ་ཞེས་པས་ལྷ་མོའི་པདྨ་ནས་ཕྱིར་ཐོན་ནས་དབང་སྟེགས་ཀྱི་སྟེང་དུ་འཁོད་པར་གྱུར། བསངས་སྦྱངས། སྟོང་པའི་ངང་ལས་པཾ་ལས་པདྨ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཁཾ་ལས་རལ་གྲི་ཁཾ་གིས་མཚན་པ་ལས། འོད་ཟེར་འཕྲོ་འདུས་གཅིག་ཏུ་གྱུར་པ་ལས། ཁྱེད་རང་རྣམས་ཀྱི་ཉོན་མོངས་པ། ཕྲག་དོག་དང་འདུ་བྱེད་ཀྱི་ཕུང་པོ་དང་། དབང་རྫས་དྲིལ་བུ་གཉིས་ཀ་དོན་ཡོད་གྲུབ་པ་སྐུ་མདོག་ལྗང་ཁུ་ཞལ་གཅིག་ཕྱག་གཉིས་པ། གཡས་རལ་གྲི་དང་གཡོན་དེས་ཡུ་བ་
བྱས་པའི་དྲིལ་བུ་འཛིན་པ། རང་འདྲ་བའི་ཡུམ་དམ་ཚིག་སྒྲོལ་མ་དང་མཉམ་པར་སྦྱོར་བའི་སྐུར་གྱུར། དེ་གཉིས་ཀའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དོན་ཡོད་གྲུབ་པ་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཚེ། ཛཿ ཛཿཧཱུྃ་བཾ་ཧོཿ ཁྱེད་རང་དང་དབང་རྫས་ཀྱི་ལྷ་ལ་གཉིས་སུ་མེད་པར་ཐིམ། ནམ་མཁར་བཞུགས་པའི་དབང་ལྷ་རྣམས་ཀྱིས། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུྃ། ཞེས་གསུངས་ཤིང་དབང་རྫས་ཀྱི་ལྷ་ལ་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས། དོན་ཡོད་གྲུབ་པས་དབུར་བརྒྱན། དབང་རྫས་ཀྱི་དོན་ཡོད་གྲུབ་པ་སྙོམས་པར་ཞུགས་པ་ཞུ་བ་ལས་བྱུང་བའི་དབང་རྫས་དྲིལ་བུར་གྱུར། ཁྱེད་རང་རྣམས་ཡན་ལག་བཞི་རྫོགས་སུ་བསྒྲུབ་པའི་ཕྱིར། ནམ་མཁར་བཞུགས་པའི་དབང་ལྷ་རྣམས་ལ་གསོལ་བ་བཏབ་པའི་རྗེས་ཟློས། དེ་བཞིན་གཤེགས་པ་ཐམས་ཅད་ཀྱིས་བདག་ལ་དྲིལ་བུའི་དབང་བསྐུར་བར་བསྩལ་དུ་གསོལ། དེ་ལྟར་གསོལ་བ་བཏབ་པས་ནམ་མཁར་གནས་པའི་དེ་
བཞིན་གཤེགས་པ་རྣམས་ཀྱིས་དྲིལ་བུ་ལག་པ་གཡོན་པར་བྱིན་པའི་མོས་པ་མཛོད། ཆོས་ཉིད་དྲིལ་བུ་བླ་ན་མེད། །སྟོང་ཉིད་ཡེ་ཤེས་སྒྲ་སྒྲོགས་པས། །ཐམས་ཅད་སྟོང་ཉིད་དོན་སྟོན་པ། །དྲིལ་བུའི་དབང་བསྐུར་སྦྱིན་པར་བྱ། །ཨོཾ་བཛྲ་ཨ་དྷི་པ་ཏི་སིཾ། ཨ་བྷི་ཥིཉྩ་མི། ཏིཥྛ་བཛྲ་ས་མ་ཡ་ཧཱུཾ། སྔར་བྱིན་པའི་རྡོ་རྗེ་དང་ལྷན་ཅིག་འཁྱུད་པའི་སྟངས་ཀ་བྱས་ལ། བྱང་ཆུབ་ཀྱི་སེམས་བདེ་བ་དང་སྟོང་པ་ཟུང་དུ་ཆུད་པའི་རང་བཞིན་དུ་བསྒོམས་ལ། རྡོ་རྗེ་འཆང་གི་ང་རྒྱལ་བྱ་ཞིང་། ལུས་གནས་པར་མོས་ལ་འདི་ཡི་རྗེས་ཟློས། བཅོམ་ལྡན་བཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད། །དབང་དེ་བརྟན་པའི་ཡན་ལག་ཏུ། ཨོཾ་ཨཱཿབཛྲ་ཨུ་ད་ཀ་ཨ་བྷི་ཥིཉྩ་ཧཱུཾ། སུ་ར་ཏེ་ཙཱ་ཨ་ཧཾ། ཞེས་གསུངས་ཤིང་བུམ་པའི་ཆུས་སྤྱི་བོ་དབང་བསྐུར་སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུར་བརྒྱན། དེ་ལྟར་ཁྱེད་རྣམས་ཡན་ལག་རྫོགས་སུ་བྱས་པ་ལ་མཆོད་པའི་ཕྱིར། ཨོཾ་ཨ་མོ་གྷ་སིདྡྷི་ས་པཱ་རི་ཝཱ་ར་ཨནྡྷཾ་སོགས། དེ་ལྟར་ཁྱེད་རྣམས་ཀྱི་དོན་ཡོད་གྲུབ་པའི་སྒོ་ནས་དྲིལ་བུའི་དབང་ཐོབ། ཕྲག་དོག་དག་འདུ་བྱེད་ཀྱི་ཕུང་པོ་གནས་
འགྱུར། བྱ་བ་གྲུབ་པའི་ཡེ་ཤེས་མངོན་དུ་བྱས། དོན་ཡོད་གྲུབ་པའི་བག་ཆགས་དང་ས་བོན་རྒྱུད་ལ་བཞག་པ་ཡིན། ལྔ་པ་མིང་གི་དབང་ལ་ལས་སྔགས་ཀྱིས་བསངས། ལས་བུམ་གྱི་ཆུ་སློབ་མ་རྣམས་ལ་གཏོར་བགེགས་བསངས་ཤིང་། བླ་མ་དཀྱིལ་འཁོར་གྱི་གཙོ་བོར་མོས་པའི་ཐུགས་ཀ་ནས་འོད་ཟེར་དཀར་པོ་འཕྲོས། ཁྱེད་རང་རྣམས་ཀྱི་ལུས་ལ་ཕོག་པས་ཚེ་ལྷོ། ཐོག་མ་མེད་པ་ནས་བསགས་པའི་སྡིག་སྒྲིབ་སྦྱངས་ཏེ། དྲི་མ་དང་བྲལ་བའི་རང་བཞིན་སློབ་དཔོན་གྱི་ཞལ་དུ་ཞུགས་ཐུགས་ཀར་རྗེས་སུ་ཆགས་པའི་མེས་འོད་དུ་ཞུ་ནས་སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཐིག་ལེ་ལྷ་མོའི་པདྨར་བབ་པ་དེ་ཉིད། ཧཱུཾ་ལས་འཁོར་ལོ་བྷཾ་གྱིས་མཚན་པ་ལས། རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ། གཡས་འཁོར་ལོ་གཡོན་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲ་བའི་ཡུམཾ་སྤྱན་མ་དང་མཉམ་པར་སྦྱོར་བའི་སྐུར་གྱུར། དེའི་དཔྲལ་བར་ཨོཾ༔ མགྲིན་པ་ཨཱཿ༔ ཐུགས་ཀར་ཧཱུཾ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་རང་བཞིན་གནས་ནས་ཕྱོགས་བཅུའི་རིགས་ལྔ་ཡབ་ཡུམ་འཁོར་དང་བཅས་པ་ཨོཾ་བཛྲ་ས་
མཱ་ཛཿ ཨོཾ་ཨཱཿརཱུ་པ་བཛྲ་ཧཱུྃ། ལ་སོགས་པ་རྡོ་རྗེ་མ་ལྔས་མཆོད་ལ། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །ཞེས་གསོལ་བ་བཏབ་པས། རིགས་ལྔ་ཡབ་ཡུམ་སྙོམས་པར་ཞུགས་པས་འདོད་ཆགས་ཆེན་པོའི་མེས་ཞུ་ནས་སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཁུ་བས། སློབ་མ་རྣམ་སྣང་དུ་གསལ་བ་ལ་དབང་བསྐུར་བ་དང་། ཡེ་ཤེས་པ་འདྲེས་པ་དུས་གཅིག་ལ་བྱས། ཛཿཧཱུྃ་བཾ་ཧོཿ ཧཱུྃ་ཞེས་པས་ལྷ་མོའི་པདྨ་ནས་ཕྱིར་ཐོན་དབང་སྟེགས་ཀྱི་སྟེང་དུ་འཁོད་པར་གྱུར། བསངས་སྦྱངས། ཁྱེད་རང་རྣམས་ཀྱི་ཉོན་མོངས་པ་གཏི་མུག་དང་གཟུགས་ཀྱི་ཕུང་པོ་མི་དམིགས་ཏེ་སྟོང་པར་གྱུར། སྟོང་པའི་ངང་ལས་པཾ་ལས་པདྨ་དང་ཨཱཿལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་འཁོར་ལོ་བྷཾ་གྱིས་མཚན་པ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས་ཚུར་འདུས། བྷཾ་དང་འཁོར་ལོ་ལ་ཐིམ་ཡོངས་སུ་གྱུར་པ་ལས།་ཁྱེད་རང་རྣམས་ཀྱི་ཉོན་མོངས་པ་གཏི་མུག་དང་གཟུགས་ཀྱི་ཕུང་པོ་དེ་ཉིད།
རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་འཁོར་ལོ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ། རང་འདྲ་བའི་ཡུམ་སངས་རྒྱས་སྤྱན་མ་དང་མཉམ་པར་སྦྱོར་བ། དེའི་དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། རང་དང་སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྣམ་པར་སྣང་མཛད་ཡབ་ཡུམ་གྱི་རྣམ་པར་ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ ཁྱེད་རང་རྣམས་ལ་དབྱེར་མེད་དུ་ཐིམ། ཡན་ལག་བཞི་རྫོགས་སུ་བསྒྲུབ་པའི་ཕྱིར། གསོལ་བ་བཏབ་པའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མིང་གི་དབང་བསྐུར་བར་བསྩལ་དུ་གསོལ། དེ་ལྟར་གསོལ་བ་བཏབ་པས་ནམ་མཁར་བཞུགས་པའི་སངས་རྒྱས་རྣམས་ཀྱིས་མིང་གི་དབང་བསྐུར་བའི་མོས་པ་མཛོད། སློབ་དཔོན་གྱིས་སློབ་མའི་སྤྱི་བོར་རྡོ་རྗེ་དྲིལ་བུ་དཀྲོལ་ཞིང་། རྡོ་རྗེ་མིང་གིས་དབང་བསྐུར་བས། །དེང་ནས་བྱང་ཆུབ་སྙིང་པོའི་བར། །ཅིས་ཀྱང་མི་ཤིགས་མི་གཡོ་བའི། །མིང་གི་དབང་འདི་ཁྱོད་ཀྱིས་ལོངས། །ཨོཾ་བཛྲ་སཏཱ་སིཾ་ཨ་བྷི་ཥིཉྩ་མི།
བཛྲ་ནཱ་མ་ཨ་བྷི་ཊི་ཀ་ཏ། ཀྱི་དཔལ་ཆེ་ཞེས་བྱ་བའི་དེ་བཞིན་གཤེགས་པའོ། །སྐྱེས་པ་རྣམས་ལ་རིགས་ལྔ་དང་རྗེས་སུ་འབྲེལ་བའི་མིང་དང་། བུད་མེད་རྣམས་ལ་ཡུམ་བཞི་དང་། རྡོ་རྗེ་མ་ལྔ་དང་འབྲེལ་བའི་མེ་ཏོག་གང་ལ་ཕོག་པའི་ལྷ་ལས་དྲས་ཏེ་མིང་བཏགས་པར་བྱའོ། །ཁྱེད་རང་རྣམས་རྣམ་སྣང་ཡན་ལག་བཞི་རྫོགས་སུ་བསྒྲུབ་པའི་ཕྱིར། རྣམ་རྒྱལ་བུམ་ཆུ་གཏོར་ཞིང་། ཨོཾ་ཨཱཿ༔བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ༔ སུ་ར་ཏེ་ཙཱ་ཨ་ཧཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་མ་ཡར་ལུད་པ་ལས། ཁྱེད་རང་རྣམས་ཀྱི་སྤྱི་བོར་རྣམ་པར་སྣང་མཛད། འོད་ཀྱི་ཡུམ་དང་བཅས་པ་རེ་རེས་དབུར་བརྒྱན། དེ་ལ་མཆོད་པའི་ཕྱིར། ཨོཾ་བེ་རོ་ཙ་ན་ཨབྷཾ་སོགས། དེ་ལྟར་ན་ཁྱེད་རྣམས་ཀྱི་རྣམ་སྣང་མིང་གི་དབང་བསྐུར་བ་ཐོབ། གཏི་མུག་དག་གཟུགས་ཀྱི་ཕུང་པོ་གནས་འགྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། རྣམ་པར་སྣང་མཛད་ཀྱི་བག་ཆགས་དང་ས་བོན་རྒྱུད་ལ་བཞག་པའོ། །ཞེས་རྟོགས་པ་བསྐྱེད་མིང་གི་དབང་ངོ་། །དེ་ལྟར་རིག་པའི་དབང་ལྔ་ཐོབ་པས། སྤང་བྱ་གང་སྤང་ཞིང་། ཡོན་ཏན་གང་སྐྱེ་བ་དང་། གཞན་དོན་ཇི་ལྟར་བྱེད་པ་ལ་དབང་བའི་ཚུལ་
ནི། བཤད་རྒྱུད་རྡོ་རྗེ་ཕྲེང་བ་ལས། །དབང་ལྔ་ཐོབ་པའི་རྒྱུད་ལ་ནི། །རྣམ་དག་སངས་རྒྱས་ལྔ་འདི་དག །མ་རིག་བྲལ་བའི་རིག་པ་ལ། །ཡེ་ཤེས་ལྔ་ནི་ཐོབ་པར་འགྱུར། །ཞེས་གསུངས་སོ། །གཉིས་པ་རྡོ་རྗེ་སློབ་དཔོན་གྱི་དབང་ཞུ་བའི་ཕྱིར་མཎྜལ་ཕུལ། ས་གཞི་སྤོས་ཆུས༔ ཐལ་མོ་སྦྱར་ལ་རྗེས་ཟློས། གང་གི་བདག་ནི་ཁྱོད་དྲིན་ལས། །རང་དང་གཞན་དོན་ནུས་པ་ཡིས། །རྡོ་རྗེ་སློབ་དཔོན་གྱིས་ནི་དབང་། །ཐུགས་རྗེའི་གཏེར་གྱི་བདག་ལ་སྩོལ། །གསུམ། ཁྱེད་རང་རྣམས་སྔར་བཤད་པའི་དབང་སྟེགས་ཀྱི་སྟེང་དུ་གཙོ་བོའམ། གཙོ་མོ་རྐྱང་པ་ལ་རིགས་བདག་ཏུ། འཁོད་པར་བསྒོམས། ལས་བུམ་གྱི་ཆུས་བསངས་སྦྱངས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། །ཁྱེད་རང་གི་ལུས་ལ་ཕོག །ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་སྦྱངས། དྲི་མ་དང་བྲལ་བའི་རང་བཞིན་སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་འོད་དུ་ཞུ། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་བའི་བྱང་ཆུབ་སེམས་ཀྱི་ཁུ་བ། ལྷ་མོའི་པདྨར་བབ་སྟེ་དེ་ཉིད་ཧཱུཾ་ལས་རྡོ་རྗེ་ཧཱུྃ་གིས་མཚན་པ་དེ་ཡོངས་སུ་
གྱུར་པ་ལས། རིགས་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོ། སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ་དར་སྣ་ཚོགས་ཀྱི་་ན་བཟའ་དང་། རིན་པོ་ཆེའི་རྒྱན་རྣམས་དང་རུས་པའི་རྒྱན་ཐམས་ཅད་ཀྱིས་བརྒྱན་པ། རང་འདྲ་བའི་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་དང་མཉམ་པར་སྦྱོར་བའི་སྐུ་ཅན་དུ་གྱུར་། དེའི་དཔྲལ་བར་ཨོཾ། མགྲིན་པ་ཨཱཿ ཐུགས་ཀར་ཧཱུཾ། སློབ་དཔོན་གྱི་ཐུགས་ཀའི་ས་བོན་ལས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་ཐམས་ཅད་རིགས་ལྔ་ཡབ་ཡུམ་གྱི་རྣམ་པར་སྤྱན་དྲངས་ཨོཾ་བཛྲ་ས་མཱ་ཛཿ རྡོ་རྗེ་མ་ལྔའི་ཕྱག་རྒྱ་དང་བཅས་པས། ཨོཾ་ཨཱཿ༔རཱུ་པ་བཛྲ་ཧཱུྃ་ནས་ཤརྡ་སྤྱནེ་སོགས་མཆོད། རྡོ་རྗེ་ཅན་གྱི་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩོལ། །དེ་ལྟར་འདི་ལ་གནང་བར་ཞུ། །གསོལ་བ་བཏབ་ནས་རིགས་ལྔ་ཡབ་ཡུམ་སྙོམས་པར་ཞུགས། འདོད་ཆགས་ཆེན་པོའི་མེས་འོད་དུ་ཞུ་བར་གྱུར་པའི་བྱང་ཆུབ་ཀྱི་ཁུ་བ་སློབ་དཔོན་གྱི་སྤྱི་གཙུག་རྣམ་སྣང་གི་སྒོ་ནས་ཞུགས། སྐུའི་དབྱིབས་བརྒྱུད་རྡོ་རྗེའི་ལམ་ནས་བྱུང་བའི་བྱང་ཆུབ་ཀྱི་སེམས་
ཀྱིས་ཁུ་བ་ཁྱེད་རང་རྣམས་ཡུམ་གྱི་པདྨར་རྡོ་རྗེ་འཆང་ཆེན་པོའི་རྣམ་པར་གནས་པའི་སྤྱི་བོ་ནས་དབང་བསྐུར་བ་དང་ཡེ་ཤེས་པ་འདྲེས་པ་དུས་གཅིག་ལ་བྱས་ནས། ཧཱུྃ་ཞེས་བརྗོད་པས་ཡུམ་གྱི་པདྨ་ནས་ཕྱིར་ཐོན་ཏེ་སྔར་བཤད་པའི་དབང་སྟེགས་ཀྱི་སྟེང་དུ་འཁོད་པའི་མོས་པ་མཛོད་ལ། གསོལ་བ་འདེབས་པ་འདིའི་རྗེས་ཟློས། ནམ་མཁར་བཞུགས་པའི་དབང་གི་ལྷ་རིགས་ལྔ་འཁོར་དང་བཅས་པ་ཐམས་ཅད་ཀྱིས་བདག་ལ་དམ་ཚིག་གསུམ་དང་ལྡན་པའི་སློབ་དཔོན་དུ་བསྒྲུབ་པའི་ཕྱིར། སྐུ་གསུང་ཐུགས་རྡོ་རྗེའི་དམ་ཚིག་གི་ངེས་དོན་དང་བཅས་པ་བསྩལ་དུ་གསོལ། ཞེས་བརྗོད་ནས་སློབ་དཔོན་གྱིས། ཧཱུྃ་ལས་སྐྱེས་པའི་རྡོ་རྗེ་སེམས་དཔའ་ཞུ་བ་ལས་བྱུང་བའི་རྡོ་རྗེ་ཚད་དང་མཚན་ཉིད་དང་ལྡན་པ་ལག་པ་གཡས་པར་བྱིན་པའི་མོས་པ་མཛོད། འདི་དེ་སངས་རྒྱས་ཐམས་ཅད་ཀྱིས། །རྡོ་རྗེ་སེམས་དཔའ་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཟུང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཛཿ ཏིཥྛ་ཨེ་ཥ་ཧཱུྃ། དྷ་ར་ཡ་མི་བཛྲ་སཏྭ་ཧི་ཧི་ཧི་ཧཱུཾ། རྡོ་རྗེ་དེ་ཉིད་སྙིང་ག་དང་མགྲིན་པ་དང་། དཔྲལ་བ་གསུམ་དུ་
རེག་པར་མོས། དམ་ཚིག་འཛིན་པའི་གནས་སྙིང་གར་ཡིན་པས་རྡོ་རྗེ་སྙིང་གར་བཟུང་བའི་མོས་པས་རྗེས་ཟློས་མཛོད། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་མའི་བདག་པོའི་བདག །བཅོམ་ལྡན་དཔལ་མཆོག་གི་དང་པོའི་སྐྱེས་བུ་ལའོ། །ༀ་མ་ཧཱ་བཛྲ་ཧཱུྃ། ཞེས་པ་ནི་རྡོ་རྗེ་ཐུགས་ཀྱི་དམ་ཚིག་དང་དེའི་ངེས་དོན་སྦྱིན་པའོ། །ཨ་ལས་སྐྱེས་པའི་རྡོ་རྗེ་སྙེམས་མ་ཞུ་བ་ལས་བྱུང་བའི་དྲིལ་བུ་ཚད་དང་མཚན་ཉིད་དང་ལྡན་པ་སློབ་མའི་ལག་གཡོན་པར་བྱིན་པར་བསྒོམས། འདི་དེ་སངས་རྒྱས་ཐམས་ཅད་ཀྱིས། །ཤེས་རབ་དབྱངས་ཀྱིས་རྗེས་འགྲོར་བཤད། །ཁྱེད་ཀྱིས་ཀྱང་ནི་རྟག་ཏུ་ཟུང་། །བྱང་ཆུབ་མཆོག་ཏུ་རྒྱལ་བས་བཞེད་། །བཛྲ་གནྡྷེ་ཨཱཿ ཞེས་དྲིལ་བུ་གསིལ་ཞིང་། དྲིལ་བུའི་སྒྲ་གྲག་སྟོང་ཡིན་པ་བཞིན་དུ། རང་གིས་དབང་དེ་བཞིན་དུ་ཤེས་པར་གྱིས་ལ་རྗེས་ཟློས་མཛོད། ཨ་སྲིད་པ་ངོ་བོ་ཉིད་ཀྱི་བདག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་ལྡན་པ། །སྲིད་པ་དམ་པ་བྱེད་པར་འགྱུར། །ཨོཾ་བཛྲ་གྷནྡྷེ་ཨཱཿ༔ དྲིལ་བུ་གསུང་གི་དམ་ཚིག་
དང་དེའི་ངེས་དོན་སྦྱིན་པའོ། །དེ་ནས་ཕྱག་རྒྱ་སྐུའི་དམ་ཚིག་གི་དོན་དུ་སློབ་མ་རྣམས་རྡོ་རྗེ་འཆང་ཆེན་པོ། རང་འདྲ་བའི་ཡུམ་ཤེས་རབ་རྡོ་རྗེ་དབྱིངས་ཀྱི་དབང་ཕྱུག་མ་དང་། སྙོམས་པར་འཇུག་པའི་བདེ་བ་ལ་སེམས་གཏད་ལ། ཡིད་ཀྱི་ལུས་བརྟེན་དེ་ཉིད་ཀྱིས། །ཕྱག་རྒྱའི་དམ་ཚིག་ཅེས་སུ་བརྗོད། །ལུས་ཀུན་བརྟེན་པར་བྱེད་པས་ན། །དེས་ན་ཕྱག་རྒྱ་རབ་ཏུ་བསྒྲགས། །ཡེ་ཤེས་ཕྱག་རྒྱས་བྱིན་བརླབས་ནས། །འདོད་པ་ཀུན་ལ་ལོངས་སྤྱོད་པས། །དངོས་གྲུབ་ཐམས་ཅད་བསྒྲུབ་པར་བྱ། །ཞེས་པས་དོན་གོ་བར་གྱིས་ལ། རྡོ་རྗེ་སེམས་དཔའི་སྐུ་དང་ཡེ་ཤེས་ཀྱི་ཕྱག་རྒྱ་ཁ་སྦྱོར་གྱི་རིམ་པས་བྱིན་གྱིས་བརླབ་ཏུ་བཅུག་ནས་འཁྱུད་པའི་ཚུལ་མཛོད། དེ་ཡང་མཆོག་གི་དང་པོའི་རྒྱུད་ལས། དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་ནས་ནི། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །ཞེས་གསུངས་ཏེ་ཕྱག་རྒྱ་སྐུའི་དམ་ཚིག་དང་དེའི་ངེས་དོན་སྦྱིན་པའོ། །དེ་ལྟར་དམ་ཚིག་གསུམ་སྦྱིན་པའི་སྒོ་ནས་གཞན་དོན་དུ་ཆོས་ཀྱི་འཁོར་ལོ་བསྐོར་བའི་རྡོ་རྗེ་སློབ་དཔོན་ཆེན་པོར་བསྒྲུབ་པའི་ཕྱིར།
ནམ་མཁར་གནས་པའི་དབང་ལྷ་རྣམས་ལ་གསོལ་བ་འདེབས་པ་འདི་ཡི་རྗེས་ཟློས་མཛོད། བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་བདག་ཉིད་ཅན་རྣམས་ཀྱིས། །ཁྱེད་ཀྱིས་བདག་ལ་དབང་མཆོག་སྩོལ། །ཞེས་གསོལ་བ་བཏབ་པས་ནམ་མཁར་བཞུགས་པའི་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་ཏིང་ངེ་འཛིན་ལ་སྙོམས་པར་ཞུགས། རིག་མ་རྣམས་ཀྱིས་བུམ་པ་དཀར་པོ་ཡུ་བ་དང་བཅས་པས་སྤྱི་བོ་ནས་དབང་བསྐུར། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་ཀྱི་ཚིགས་བཅད་བརྗོད། གཟུགས་རྡོ་རྗེ་མ་ལ་སོགས་ཀྱིས་མཆོད། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད་བཞིན་པའི་སྒོ་ནས་དབང་བསྐུར་བར་བསྒོམས། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཨཱཿཧཱུཾ། ཨོཾ་ཨཱཿ༔བཛྲ་ཨུ་ད་ཀ་ཨ་བྷི་ཥིཉྩ་ཧཱུྃ། སུ་ར་ཏེ་སྟེ་ཨ་ཧཾ༔ ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར་བས། ལུས་ཐམས་ཅད་ཡེ་ཤེས་ཀྱི་
བདུད་རྩིའི་ཆུ་རྒྱུན་གྱིས་གང་། དབང་ཐམས་ཅད་ཐོབ། དྲི་མ་ཐམས་ཅད་དག །ཆུ་ཡི་ལྷག་མ་ཡར་ལུད་པ་ལས། སྤྱི་བོར་རིགས་ཐམས་ཅད་ཀྱི་བདག་པོ་རྡོ་རྗེ་འཆང་། འོད་ཀྱི་ཡུམ་དང་བཅས་པས་དབུ་བརྒྱན། ནམ་མཁར་བཞུགས་པའི་དབང་ལྷ་ཐམས་ཅད་ཁྱེད་རང་རྣམས་ལ་གཉིས་སུ་མེད་པར་ཐིམ། ཛཿཧཱུྃ་བཾ་ཧོཿ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། དེ་རིང་རྡོ་རྗེ་སློབ་དཔོན་གྱུར། །སྔགས་དང་རྒྱུད་རྣམས་འཛིན་གྱུར་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀུན་གྱིས་མཐུན་པར་བཞེད། །ཅེས་གསུངས་སོ། །མེ་ཏོག་འཐོར་བཞིན་དུ། རིག་པ་འཛིན་འདི་རྣམས་ཀྱིས་ཟབ་མོ་སྔགས་ཀྱི་ཐེག་པའི་སྒོ་ནས་གཞན་དོན་དུ་ཆོས་ཀྱི་འཁོར་ལོ་བསྐོར་བའི་རྡོ་རྗེ་སློབ་པ་སོན་རེ་རེར་གྱུར་ནས་སེམས་ཅན་དཔག་ཏུ་མེད་པ་སྨིན་གྲོལ་གྱི་ལམ་ལ་འགོད་ནུས་པར་གྱུར་ཅིག །བཛྲ་དྷ་ར་ཨརྒྱུ་སོགས། དེ་ནས་རྟེན་དང་བརྟེན་པའི་དཀྱིལ་འཁོར་གྱི་དག་པ་བསྡུས་པ་ནི། གཞལ་ཡས་ཁང་པ་ནི་གཟུགས་ཀྱི་ཕུང་པོ་རྣམ་པར་དག་པརྣམ་པར་སྣང་མཛད་ཀྱི་རང་བཞིན་ཡིན་པའམ། ཡང་ན་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་
བདུན་རྣམ་པར་དག་པ་ཡིན་ལ། ལྷ་རྣམས་ལ་ནི། དཔལ་གསང་བ་འདུས་པའི་རྒྱུད་ལས། ཕུང་པོ་ལྔ་ནི་མདོར་བསྡུས་ན། །སངས་རྒྱས་ལྔ་ནི་རབ་ཏུ་གྲགས། །རྡོ་རྗེའི་སྐྱེ་མཆེད་ཉིད་དག་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་མ་ཞེས་བྱ་སྟེ། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་མ་ནི། །མེ་དང་རླུང་དུ་རབ་ཏུ་གྲགས། །ཞེས་གསུངས་ཤིང་། ཁྲོ་བོ་བཅུ་ཡང་ཚིགས་ཆེན་བཅུ་དང་། རྣམ་པར་དག་པའི་རང་བཞིན་དུ་བཤད་པས། ལྷ་རྣམས་ཀྱི་དེ་ཁོ་ན་ཉིད་རྣམ་པར་དག་པ་དང་དོན་དམ་པར་ན། དཀྱིལ་འཁོར་ལ་སོགས་པ་རྣམས་ནི་རིམ་པ་གཉིས་ཀ་ལ་ཡང་རང་བཞིན་མེད་པའི་བདག་ཉིད་ཅན་དེ་བཞིན་ཉིད་ཁོ་ནའི་དེ་ཁོ་ན་ཉིད་རྣམ་པར་དག་པ་ཡིན་ནོ། །ཞེས་གསུངས་སོ། །དེའི་རྗེས་སུ་ཀྲི་ཡ་ཕྱག་ལེན་གྱི་ཚེ། ལྷ་མཆོད་པའི་རྗེས་གནང་གི་དོན་དུ། དཔོན་སློབ་གཉིས་ཀས་སྒེག་སོགས་བརྒྱད་ཀྱི་ཕྱག་རྒྱ་བཅའ་ཞིང་། སློབ་དཔོན་གྱི་ངག་གིས། དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་པ་རྣམས་རོལ་ཞིང་། །རྡོ་རྗེ་སྙེམས་མི་ཚུལ་གྱིས་ནི། །དགའ་སྟོན་བདེ་གསལ་མཆོད་པར་བགྱི། ཨཱཿ༔ སྒེག་དང་བཅས་པས་ཕྲེང་
བ་འཕང་། །སངས་རྒྱས་ཐམས་ཅད་མཆོད་པར་བགྱི། །དེས་ནི་བཅོམ་ལྡན་འབྲལ་མི་འགྱུར། །ཕྲེང་བ་དེ་ཡི་རྒྱན་ཡིན་ནོ། །ཨོཾ། ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་བྱ། །དེ་ཡི་བདེ་གཤེགས་དངོས་གྲུབ་ནི། །ཤིན་ཏུ་བདེ་བ་ཐོབ་པར་འགྱུར། །གྷི། དེ་ཉིད་ཐལ་མོ་གར་གྱིས་ནི། །སངས་རྒྱས་ཆ་ཐམས་ཅད་འདུལ་བར་བྱ། །སངས་རྒྱས་འདུལ་བའི་ཕྲིན་ལས་ཀྱིས། །གར་མཁན་ཚུལ་དུ་བསྒྱུར་བར་བྱ། །ཏོ༔ རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་བཟང་པོས་འགྲོ་དོན་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། །ཧཱུྃ། སངས་རྒྱས་རྣམས་ལ་མེ་ཏོག་གཏོར། །བྱང་ཆུབ་ཡན་ལག་ཚོགས་གྱུར་པས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་འགྱུར། །ཧཱུཾ། ཆོས་ཀྱི་མེ་ནི་ལེགས་སྦྱར་བས། །རྡོ་རྗེ་ཆོས་དང་འདྲ་བ་རུ། །སེམས་ཅན་མ་རིག་ལྡོང་རྣམས་ལ། །ཡེ་ཤེས་སྒྲོན་མེས་གསལ་བར་གྱིས། །པྲ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཤེས་རབ་ཏིང་འཛིན་དང་། །རྣམ་གྲོལ་ཡེ་
ཤེས་མཐོང་བ་ཡི། །བྱང་ཆུབ་ལུས་ཅན་རྣམས་ལ་བསྒོས། །གྷ། ཁྱེད་རྣམས་ཀྱིས་དེང་ཕྱིན་ཆད་ལུས་ཀྱིས་སྒེག་སོགས་ཀྱི་སྦྱོར་བ་དང་། ངག་གིས་སྨྲ་བརྗོད་དང་། སེམས་ཀྱིས་བསམ་པ་ཐམས་ཅད་ལྷ་མཆོད་པའི་བསམས་པས་ཟིན་པར་མཛོད་ཅིག །ཅེས་བརྗོད་དོ།། ༈ ད་སྔགས་ཀྱི་བཟླས་ལུང་གི་དོན་དུ་མཎྜལ་ཕུལ། ས་གཞི་སྤོས༴ འདི་ཡི་རྗེས་ཟློས་མཛོད། སྔགས་ཀྱི་དབང་བསྐུར་ཡེ་ཤེས་ཆེ། །དངོས་གྲུབ་སྟེར་བ་བདག་ལ་སྩོལ། །གསུམ། དཔོན་སློབ་གཉིས་ཀ་དཔལ་སྒྲེའི་དཀྱིལ་འཁོར་གྱི་གཙོ་བོར་གསལ་བའི་ཐུགས་ཀར་ཟླ་བའམ་ཉི་མའི་དབུས་སུ་ས་བོན་དང་ཁྱད་པར་དུ་སློབ་དཔོན་གྱི་ཐུགས་ཀའི་ས་བོན་གྱི་མཐའ་སྐོར་དུ་སྔགས་ཀྱི་ཕྲེང་བ་སྒྲུབ་ཐབས་ལྟར་གཡས་བསྐོར་དུ་འཁོད་པར་བསམས་ལ། སྔགས་ཀྱི་བཟླས་ལུང་བསྩལ་དུ་གསོལ་སྙམ་པའི་མོས་གུས་དྲག་པོ་བྱས་ལ། སློབ་དཔོན་གྱི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་ས་བོན་སྔགས་ཕྲེང་དང་བཅས་པ་མར་མེ་གཅིག་ལས་གཉིས་མཆེད་ཀྱི་ཚུལ་གྱིས་སློབ་དཔོན་གྱི་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། སྙིང་ཁའི་ས་བོན་གྱི་མཐའ་བསྐོར་
དུ། དང་པོས་འཁོད། གཉིས་པས་བྱིན་གྱིས་བརླབས། གསུམ་པས་བརྟན་པར་བྱས་པར་བསྒོམས་ལ་སྔགས་ཀྱི་རྗེས་ཟློས་ལན་གསུམ་མཛོད། རྩ་སྔགས། དེ་ཡི་བྱིན་རླབས་ཐོབ་པ་ཡི། གཏང་རིག་ཏུ་མེ་ཏོག་འཐོར་ཞིང་རྗེས་ཟློས། བཅོམ་ལྡན་བདག་ལ་བསྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཞེས་གསོལ་བ་བཏབ་པས་སློབ་དཔོན་གྱིས། བཅོམ་ལྡན་འདི་ལ་བསྩལ་ལགས་ཀྱིས། །འདི་ལ་འགོ་བར་མཛད་དུ་གསོལ་སོགས། རིག་པ་འཛིན་པ་འདི་རྣམས་ལ་ཆེའི་ལྷ་ཚོགས་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་བྱིན་རླབས་དང་ཁྱད་པར་དུ་རིག་པ་གསང་སྔགས་ཀྱི་བྱིན་རླབས་ཐམས་ཅད་འཇུག་པར་གྱུར་ཅིག །ཅེས་མེ་ཏོག་གཏོར། ད་དངུལ་གྱི་ཀོང་བུར་མིག་སྨན་རྣམས་ཚུལ་བཞིན་དུ་སྦྱར་བ་ལག་པ་གཡོན་དུ་བཟུང་ཞིང་། གཡས་པས་གསེར་དྲུག་ལས་བྱས་པའི་ཐུར་མ་་་མེད་ན་རྡོ་རྗེའི་ཆོག་གོ་མཆན། བཟུང་སྟེ་མ་རིག་པའི་ལིང་ཏོག་བསལ་ནས་མིག་སྨན་བྱུག་པར་སྒོམས་ཤིག །སློབ་མའི་མིག་གཉིས་སུ་དེ་ཁོ་ན་
ཉིད། སྒྲིབ་བྱེད་མ་རིག་པའི་ལིང་ཏོག་ས་ཁམས་པའི་རང་བཞིན་པྲཾ་སེར་པོའི་རྣམ་པར་གནས་པ་ཕྱིར་བསལ་བར་བསྒོམས། ཐུར་ལྡན་སྨན་པའི་རྒྱལ་པོ་ཡིས། །ཇི་ལྟར་འཇིག་རྟེན་རབ་རིབ་བཞིན། །རྒྱལ་བ་རྣམས་ཀྱིས་བུ་ཁྱོད་ཀྱི། །མི་ཤེས་པ་ཡི་རབ་རིབ་བསལ། །ཨོཾ་བཛྲ་ནེ་ཏྲ་ཨ་བ་ཧ་ར་པ་ཏྲ་ལཾ་ཧྲཱིཿཔཾ༔ དེ་ནས་མེ་ལོང་ལ་ཨཱཿཙྪས་བསྔགས་པ་དེ་སློབ་མ་ལ་བསྟན། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང་། །རྡོ་རྗེ་སེམས་དཔའ་མེ་ལོང་བཞིན། །དེར་ནི་གསལ་དག་རྙོག་པ་མེད། །སངས་རྒྱས་ཀུན་བདག་རང་བཞིན་ནི། །བུ་ཁྱོད་ཀྱིས་ནི་སྙིང་ལ་བཞུགས། །རང་བཞིན་མེད་ཅིང་གནས་མེད་པར་། །ཆོས་རྣམས་དེ་ལྟར་ཤེས་ནས་ཁྱོད། །སེམས་ཅན་དོན་ནི་མཉམ་མེད་བྱོས། །སྐྱོབ་པ་རྣམས་ཀྱི་སྲས་སུ་སྐྱེ། །གང་ཡང་རིགས་ཐམས་ཅད་དང་།་དཀྱིལ་འཁོར་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་འདི་ཀུན་ཏུ་འགྲོ་བ་ཡིན་པ་ཤེས་པར་གྱིས། ཧོས་བསྔགས་པའི་ཐབས་ཀྱི་མདའ་དྲུག །ཤེས་རབ་ཀྱི་གཞུ་དང་བཅས་པ་ཕྱོགས་བཞི་
སྟེང་འོག་ཏུ་འཕང་། བདུད་བཞི་དང་ཉན་རང་གི་སེམས་ཡིད་ལ་བྱེད་པ་བཅོམ་པར་མོས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཡེ་སྭཱ་ཧཱ། མདའ་འཕེན་ཚུལ་དང་བཅས་ཏེ་འདིའི་རྗེས་ཟློས་མཛོད། དེ་བཞིན་གཤེགས་པ་ཐམས་ཅད་དང་རྗེས་སུ་ཆགས་པར་བྱའོ། །བུམ་དབང་གི་མཇུག་ཏུ། །ཇི་ལྟར་བལྟམས་པ་ཙམ་གྱིས་ནས་སོགས། ཨ་བྷི་ཥ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཞེས་བརྗོད་ཅིང་བུམ་ཆུ་གཏོར། དེ་རྣམས་ཀྱི་ཕྱི་དབྱིབས་རས་བྲིས་ཀྱི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ། ལུས་ཀྱི་དྲི་མ་དག །ལམ་བསྐྱེད་པའི་རིམ་པ་ཆ་ལག་དང་བཅས་པ་སྒོམ་པ་ལ་དབང་། །འབྲས་བུ་སྤྲུལ་པའི་སྐུའི་ས་བོན་དང་བག་ཆགས་རྒྱུད་ལ་བཞག་པའོ། །དེ་ནས་དབང་གོང་མ་གསུམ་ལས་གསང་བའི་དབང་ཞུ་མི་བའི་དོན་དུ་མཎྜལ་ཕུལ། རྗེས་ཟློས་མཛོད། ཁྱོད་ཞབས་པདྨོའི་བཀའ་དྲིན་གྱིས། །བདག་གི་བླ་མེད་བྱ་བ་ཐོབ། །དེ་ཕྱིར་གསང་བའི་དབང་གིས་ནི། །མགོན་པོས་རྗེས་སུ་བཟུང་བར་མཛོད། །གསུམ། མ་དད་པ་སོགས་བགག་པའི་དོན་དུ་གདོང་གཡོགས་ཆིངས་མཛོད། ཨོཾ་ཙཀ་བྷནྡྲ་སོགས། ཁྱེད་རང་རྣམས་དཀྱིལ་འཁོར་གྱི་གཙོ་བོར་སྒེའམ། མོ་རྐྱང་
རྣམས་ལ་རིགས་བདག་རྨི་བསྒོམས། སློབ་དཔོན་ཡང་དེ་ལྟ་བུ་ཡབ་ཡུམ་དུ་བསྒོམ་ལ་ཐབས་ཤེས་རབ་སྙོམས་པར་ཞུགས་པའི་སྒྱུ་མ་བདེ་བའི་སྒྲ་ལ། ཕྱོགས་བཅུ་ན་བཞུགས་པའི་རིགས་ལྔ་། ཡབ་ཡུམ་དཔག་ཏུ་མེད་པ་སྤྱན་དྲངས། སློབ་དཔོན་གྱི་ཞལ་དུ་ཞུགས། ཐུགས་ཀར་རྗེས་སུ་ཆགས་པའི་མེས་འོད་དུ་ཞུ་བ་དང་། སློབ་དཔོན་གྱི་ཕུང་ཁམས་སྐྱེ་མཆེད་ལྷའི་རང་བཞིན་དུ་བཞུགས་པ་འོད་དུ་ཞུ་བ་དང་ལྷན་ཅིག་རྡོ་རྗེའི་ལམ་ནས་ཡུམ་གྱི་མཁར་བབ་པས་བྱང་ཆུབ་ཀྱི་སེམས་བདེ་བ་ཆེན་པོའི་དཔལ་དང་ལྡན་པ། སངས་རྒྱས་ཐམས་ཅད་འདུས་པའི་ངོ་བོར་བསྒོམ། བཏུང་བ་རིན་ཆེན་དམ་པ་འདི། །ལུས་ལ་རྡོ་རྗེ་རབ་གསལ་བྱེད། །བུ་ཁྱོད་རྟག་ཏུ་ཤོང་ན་ཀྱེ། །ཡིད་ལས་བྱུང་བའི་ཆུ་འཐུངས་ཤིག །རང་རང་གིས་གཙོ་བོས་སྔགས་དང་། ཨོཾ་ཨཱཿ༔ཧཱུྃ་གིས་བྱིན་གྱིས་བརླབས་ལ། བདུད་རྩི་ལྕེ་ཐོག་ཏུ་བཞག་ལ། ཇི་ལྟར་རྡོ་རྗེ་འཆང་སོགས་ཀྱི། །ཇི་ལྟར་སངས་རྒྱས་སྲས་དབང་བསྐུར། །བྱང་ཆུབ་སེམས་ནི་བཟང་པོ་ཡི། །དེ་ལྟར་བུ་ཁྱོད་དབང་བསྐུར་རོ། །ཞེས་དང་། རང་རང་གི་གཙོ་བོའི་སྔགས་བརྗོད་ཅིང་སྦྱིན་ནོ། །སངས་རྒྱས་ཐམས་ཅད་འདུས་པའི་ངོ་བོར་བསྒོམས་ལ། རྟོགས་པ་མེད་པའི་
སེམས་ཀྱིས་འདི་ལ་རྗེས་ཟློས། ཨ་ཧོ་མ་ཧཱ་སུ་ཥ་ཧོ། ཤེས་རབ་ཀྱིས་ཀྱང་ལངས་ནས་ནི། རང་གི་ཆུ་སྐྱེས་ན་གནས་པའི་བྱང་སེམས་དེས་དབང་བསྐུར་བར་བསྒོམ༔ འདི་དེ་དཔའ་བོ་རྣལ་འབྱོར་མའི། །དམ་ཚིག་རྨད་བྱུང་ཆེན་པོ་སྟེ། །ཁམས་དང་ལྡན་པའི་རྟོགས་པ་བྱ། །བདེ་བ་དམ་པ་མྱང་བར་གྱིས། །ཨ་ཧོ་མ་ཧཱ་སུ་ཁ་ཧོཿ མགྲིན་པའི་གནས་སུ་བབས་པས་ལུས་ཐམས་ཅད་རྩ་ས་ཁྱབ་ཅིང་། དེར་བྱང་ཆུབ་སེམས་ཀྱིས་ཁྱབ། ཞུ་བདེ་མི་རྟོག་པའི་རྟོགས་པ་སྐྱེས་པའི་མོས་པ་མཛོད། ཀུན་རྫོབ་དབང་དེ་ཐོབ་པའི་བརྡར་གདོང་གཡོགས་དཀྲོལ་བར་ཞུ། དེ་ལྟར་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་བསྐུར་བ་ཐོབ། ངག་གི་དྲི་མ་དག །ལམ་སྲོག་རྩོལ་རླུང་གི་རྣལ་འབྱོར་དང་། གཏུམ་མོའི་རྣལ་འབྱོར་སོགས་སྒོམ་པ་ལ་དབང་། འབྲས་བུ་ལོངས་སྐུའི་ས་བོན་དང་། བག་ཆགས་རྒྱུད་ལ་བཞག་པ་གསང་བའི་དབང་། ཤེས་རབ་ཡེ་ཤེས་ཀྱི་དབང་གི་དོན་དུ་མཎྜལ་ཕུལ། ཁྱོད་ཞབས་པདྨའི་བཀའ་དྲིན་གྱིས། བདག་གིས་གསང་བའི་དབང་བསྐུར་ཐོབ། །ཤེས་རབ་ཡེ་ཤེས་དབང་བསྐུར་
ཡང་། །མགོན་པོས་རྗེས་སུ་བཟུང་བར་མཛོད། །གསུམ། ཕན་ཚུན་ངོ་ཚས་བཅིངས་ན་ཡེ་ཤེས་ངོ་མི་འཕྲོད་པས། དེའི་དོགས་པ་བགག་ཕྱིར་གདོང་གཡོགས་ཆིངས། ཨོཾ་ཙཀཱ་སོགས། ཁྱེད་རང་རྣམས་དཀྱིལ་འཁོར་ཀྱི་གཙོ་བོ་རྨེའམ། མོ་རྐྱང་རྣམས་ལ་རིགས་བདག་སྒེར་གསལ་བ་ལ། སློབ་དཔོན་གྱི་ཐུགས་ཀ་ནས་སྤྲོས་པའི་ཡེ་ཤེས་ཀྱི་ཕྱག་རྒྱ་མཚན་ཉིད་དང་ལྡན་པ་བྱིན་པར་བསྒོམ། གཟུངས་མ་ཡིད་འོང་འདི་ཁྱོད་ཀྱི། །བསྟེན་བྱར་སངས་རྒྱས་རྣམས་ཀྱིས་བརྟགས། །འཁོར་ལོའི་རིམ་པར་སྦྱོར་བ་ཡིས། །བདེ་བ་དམ་པ་མྱང་བར་གྱིས། །རྡོ་རྗེ་སྐྱིལ་ཀྲུང་གིས་སེམས་ནི། །ནོར་བུའི་ནང་དུ་གནས་ལྟ་བས། །ཞེས་དང་། དགའ་བའི་གནས་སྦྱིན་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཟུངས་ཤིག་ཟུངས་ཤིག་སེམས་དཔའ་ཆེ། །ཟུངས་ལ་མཆོད་པ་རྟག་ཏུ་གྱིས། །བཤང་གཅི་དག་ནི་ཟ་བ་དང་། །ཁྲག་དང་ཁུ་བ་དེ་བཞིན་དུ། །ཤ་ཆེན་བསྟེན་པར་བུ་སྤྲོ་འམ། །བུད་མེད་རྣམས་ལ་རྟག་གུས་པ། །བྷ་གའི་པདྨོར་འོ་བྱེད་པར། །བུ་ཁྱོད་ཅི་དགར་སྤྲོ་གྱུར་རམ། །ཞེས་པ་འདོད་དོན་ནི། མ་དག་པའི་ཤ་ལྔ། བདུད་རྩི་ལྔ་ལ་སྦྱང་རྟོག་
སྦྱར་གསུམ་བྱས་ནས། ཟག་མེད་ཀྱི་བདུད་རྩིའི་རྒྱ་མཚོ་ལྟ་བུ་དང་། དག་པའི་ཤེལ་ལྟར་རྟོགས་ཤིང་མང་དུ་སྤྲོས་པ་དང་། རང་རིགས་ཀྱི་ཕྱག་རྒྱ་ལ་མི་སྨོད་ཅིང་རྡོ་རྗེ་པདྨོའི་བྱས་པ་ལ་བརྟེན་ནས། འཛག་མེད་ལྷན་ཅིག་སྐྱེས་པའི་ཡེ་ཤེས་མངོན་དུ་བྱེད་པ་ལ། བུ་ཁྱོད་སྤྲོ་བ་ཡིན་ནམ། ཞེས་དྲིས་པས་སློབ་མས་ཀྱང་། སྔར་བཤད་པ་ལྟ་བུའི་ཡོན་ཏན་རང་ལ་ཡོད་ན། དངོས་སུ་སྤྲོ་ཞིང་མེད་ན་དེ་ལྟ་བུའི་ཡོན་ཏན་ཐོབ་པའི་ཚེ་སྤྲོ་ཞིང་། ད་ལྟ་ཡེ་ཤེས་ཀྱི་རིག་མ་ལ་བསྟེན་ནས། ལམ་ཉམས་སུ་ལེན་པར་སྤྲོ་སྙམ་པའི་བསམས་པས་རྗེས་ཟློས། བཤང་གཅི་དག་ནི་ཟ་བ་དང་། །ཁྲག་དང་ཁུ་བ་དེ་བཞིན་དུ། །ཤ་ཆེན་བསྟེན་པར་ཅིས་མི་སྤྲོ། །བདག་ནི་ཅི་དགར་སྤྲོ་གྱུར་ཏོ། །ཞེས་པའི་ལན་བཏབ་པས། ཕྱག་རྒྱ་དེས་ཀྱང་སྒྲུབ་པ་པོ་དམ་ཚིག་དང་ལྡན་པར་ཤེས་ནས། ལུས་གཅེར་བུར་བྱས། ཆུ་སྐྱེས་གུར་གུམ་ལ་སོགས་པའི། དྲི་ཞིམ་པར་བྱས་ཏེ། རྩ་མཆོག་ཏུ་གྱུར་པའི་པདྨ་རྒྱས་པ་བསྟེན་ཏེ། ཨེ་མ་ང་ཡི་པདྨ་འདི། །བདེ་བ་ཐམས་ཅད་ཡང་དག་ལྡན། །གང་ཞིག་ཆོ་གས་བརྟེན་བྱེད་པ། །དེ་ཡི་མདུན་དུ་བདག་གནས་སོ། །
སངས་རྒྱས་བསྟན་པ་ལ་སོགས་པ། །པདྨའི་བྱ་བ་ཇི་བཞིན་བྱེད། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་གནས། །བླུན་པོ་གང་ཞིག་འདི་སྤོང་པ། །དེ་ལ་མཆོག་གིས་དངོས་གྲུབ་མེད། །པདྨ་བྷཉྫམོཀྟ་ཧོཿ ཁྱེད་རང་རྣམས་དཀྱིལ་འཁོར་གྱི་གཙོ་བོ། རྒེའམ་མོ་རྐྱང་རིགས་བདག་ཏུ། གསལ་བ་དེ་ཉིད་རང་རིག་ཡེ་ཤེས་ཀྱི་རང་མདངས་དང་མཉམ་པར་སྤྱོད་པའི་ཡབ་ཀྱི་གསང་གནས་ཧཱུྃ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ། ནོར་བུ་ལ་ཨོཾ་དང་། བུ་གར་ཕཊ༔དམར་སེར་གྱིས་བཀག །ཡུམ་གྱི་མཁའ་ཨ་ལས་པདྨ་འདབ་མ་བརྒྱད་པ་ཟེའུ་འབྲུ་ལ་ཨས་མཚན་པ། ཆོས་ཀྱི་འདུ་ཤེས་ནི། ཐབས་འདི་ལྟ་བུ་ལ་བརྟེན་ནས་འཛག་མེད་ལྷན་ཅིག་ཡེ་ཤེས། བདེ་བ་ཆེན་པོ་རྡོ་རྗེ་འཆང་གི་སྐུ་མངོན་དུ་བྱའོ་སྙམ་པའི་བསམས་པས་འདིའི་རྗེས་ཟློས། ཨོཾ་ཧཱུཾ་ཧཱུཾ་ཧཱུཾ་ཧ་ཧ་ཧ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོཉཧཾ། ཞེས་ཡབ་ཡུམ་སྙོམས་པར་ཞུགས་པའི་རྒྱུ་མ་བདེ་བའི་སྒྲས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིགས་ལྔ་ཡབ་ཡུམ་གྱི་རྣམ་པར་སྤྱན་དྲངས། ཞལ་དུ་ཞུགས་པས་ལུས་ལ་བདེ་བ་དང་སེམས་
འོད་གསལ་གྱི་རང་བཞིན་དུ་བྱས། ལྟེ་བར་གཏུམ་མོའི་མེ་སྦར་བས་སྤྱི་བོའི་ཧཾ་ལ་ཕོག །དེ་ལས་བྱང་སེམས་མགྲིན་པར་བབ་པས་དགའ་བ། སྙིང་གར་བབ་པས་མཆོག་དགའ། ལྟེ་བར་བབ་པས་དགའ་བྲལ་གྱི་དགའ་བ། རྡོ་རྗེའི་ནོར་བུ་བར་དུ་བྱོན་པས། ལྷན་ཅིག་སྐྱེས་པའི་ཡེ་ཤེས་མངོན་དུ་བྱས། སླར་རླུང་གི་ནུས་པས་གྱེན་དུ་དྲངས་ཏེ། ལྟེ་བར་བྱོན་པས་དགའ་བ། སྙིང་ཁར་བྱོན་པས་མཆོག་དགའ། མགྲིན་པར་བྱོན་པས་དགའ་བྲལ་གྱི་དགའ་བ། སྤྱི་བོར་བྱོན་པས་མས་བརྟེན་གྱི་ལྷན་ཅིག་བྱས་པའི་ཡེ་ཤེས་མངོན་དུ་བྱས་པའི་མོས་པ་མཛོད། དེའི་ཚེ་ཁམས་ཞུ་བ་ལས་བྱུང་བའི་བདེ་བ་ཆེན་པོའི་ཡེ་ཤེས་དེ་མངོན་དུ་བྱས་པའི་མོས་པ་མཛོད། ཉིད་ཀྱི་ངོ་བོ་སྟོང་པ་ཉིད་ཟུང་དུ་འཇུག་པའི་ཡེ་ཤེས་ལ་སེམས་ཅུང་ཟད་གཏད་ལ་རང་གི་སེམས་བདེ་སྟོང་དུ་ཤར་བའི་སྟོབས་ཀྱིས་སྣང་བའི་ངོ་བོ་དངོས་པོ་ཐམས་ཅད་ཀྱང་། བདེ་སྟོང་ཟུང་འཇུག་ཏུ་གྱུར་པའི་མོས་པ་མཛོད། དཔེར་ན་ཟད་པར་མེ་དང་ཆུ་ལ་སོགས་པའི་ཏིང་འཛིན་རྣམ་དག་ལ་སྙོམས་པར་ཞུགས་པའི་གང་ཟག་གིས་སྣང་བའི་དངོས་པོ་ཐམས་ཅད་མེ་དང་ཆུ་ལ་སོགས་པའི་རྣམ་པར་
མངོན་སུམ་དུ་སྣང་བཞིན་ནོ། །དབང་དེ་ཐོབ་པའི་བརྡར་གདོང་གཡོགས་ཁྲོལ། །ཨ་ཁཾ་བི་ར་ཧཱུཾ། དེས་ནི་ཕྱག་རྒྱ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ། ཡིད་ཀྱི་དྲི་མ་དག །ལམ་མགྱོགས་བྱེད་ཕོ་ཉའི་ལམ་བསྒོམ་པ་ལ་དབང་། འབྲས་བུ་ཆོས་ཀྱི་སྐུའི་ས་བོན་དང་བག་ཆགས་རྒྱུད་ལ་བཞག་པ་དེ་ཤེས་རབ་ཡེ་ཤེས་ཀྱི་དབང་ངོ་། །དབང་བཞི་པ་ཞུ་བའི་དོན་དུ་མཎྜལ་ཕུལ། རྗེས་ཟློས་མཛོད། བདག་ཉིད་ཆེ་ཁྱོད་བཀའ་དྲིན་གྱིས། །ཤེས་རབ་ཡེ་ཤེས་དབང་བསྐུར་ཐོབ། །དེ་རིང་རིན་ཆེན་བཞི་པ་ཡང་། །མགོན་པོས་རྗེས་སུ་བཟུང་བར་མཛོད། །གསུམ། གདོང་གཡོགས་ཆིངས། དེའི་རྗེས་ཚིག་ཁོ་ནའི་དབང་བཞི་པ་སྦྱིན་པར་བྱའོ། །ཤེས་རབ་ཡེ་ཤེས་དེ་ཉིད་མྱུ་གུར་གྱུར་པའི་བྱང་ཆུབ་ཀྱི་སེམས་བསྒོམས་པས་རབ་ཏུ་འཕེལ་བཞིན་སྒྲིབ་པ་མེད་པ་ཉིད་དུ་གྱུར་པའི་དེ་ཁོ་ན་ཉིད་ཆོས་ཐམས་ཅད་བསམ་གྱིས་མི་ཁྱབ་པ་ཉིད་ཀྱི་རང་བཞིན་ཡན་ལག་བདུན་དང་ལྡན་པའི་ཕྱག་རྒྱ་ཆེན་པོའི་བདག་ཉིད་རྡོ་རྗེ་འཆང་ཆེན་པོའི་རང་བཞིན་ཅན་དབང་བཞི་པའི་ངོ་བོ་བརྗོད་པར་བྱའོ། །ཞེས་གསུངས་པ་ལྟར་རང་རང་གི་རྒྱུད་རྣམས་ལས། བཞི་པ་དེ་ཡང་དེ་
བཞིན་ནོ། །ཞེས་དང་། གསང་བ་འདུས་པའི་རྒྱུད་ལས། །དངོས་པོ་ཐམས་ཅད་དང་བྲལ་བ། །གཟུང་དང་འཛིན་པ་རྣམ་པར་སྤང་། །ཕུང་པོ་ཁམས་དང་སྐྱེ་མཆེད་རྣམས། །ཆོས་བདག་མེད་པ་མཉམ་པ་ཉིད། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་གསུངས་པའི་དོན་བཤད་པའམ། ཡང་བརྟག་གཉིས་ལས། ཡེ་ཤེས་འདི་ནི་མེ་ཕྲ་ཞིང་། །རྡོ་རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱེད་རང་ཡང་ནི་དེ་ཡི་ཕ། །ཞེས་གསུངས་པའི་དོན་བཤད་པའམ། །བདེ་མཆོག་ཉུང་ལས། དངོས་མེད་པ་ཡི་ཆོས་ཉིད་ཅན། །ནམ་མཁའ་ལྟ་བུར་དྲི་མ་མེད། །སྟོང་ཉིད་ཡེ་ཤེས་རྡོ་རྗེ་ནི། །སྟོང་པ་ཉིད་དུ་རྣམ་བསལ་བྱ། །ཞེས་གསུངས་པའི་དོན་རྣམས། བདེ་དགྱེས་གསང་གསུམ་གྱི་དཀྱིལ་ཆོག་ནས་བྱུང་བ་ལྟར། བཤད་ལ་ངོ་སྤྲོད་དོ། །མདོར་ན་སྔར་དབང་གསུམ་པའི་དུས་སུ་སྐྱེས་པའི་བདེ་སྟོང་གི་ཡེ་ཤེས་དེ་ཉིད་རང་རང་གི་དཀྱིལ་འཁོར་གྱི་གཙོ་བོ་ཡབ་ཡུམ་མམ། རིགས་བདག་ཡབ་ཡུམ་གྱི་རྣམ་པར་ནམ་མཁའ་ལ་འཇའ་ཚོན་ཤར་བ་ལྟར་ཁ་སྦྱོར་ཡན་ལག་བདུན་ལྡན་སྐུར་སྣང་ཞིང་། དེ་ལྟ་བུའི་སྐུ་དེ་ཡང་
བདེ་སྟོང་གི་ཡེ་ཤེས་ལས་མ་འདས་པས། བདེ་སྟོང་ཟུང་འཇུག་བདེ་བ་ཆེན་པོའི་ཡེ་ཤེས་འཛིན་མེད་ཀྱི་ངང་ལ་བློ་བཞག་པར་བྱའོ། །དབང་བཞི་པ་ཐོབ་པའི་བརྡར་གདོང་གཡོགས་ཁྲོལ་། དེ་ལྟར་ཁྱེད་རྣམས་ཀྱིས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཚིག་ཙམ་གྱི་སྒོ་ནས་ངོ་སྤྱད་པ་ཐོབ། ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་དག །ལམ་ཕྱག་རྒྱ་ཆེན་པོ་དེ་ཁོ་ན་ཉིད་བསྒོམ་པ་ལ་དབང་། འབྲས་བུ་ངོ་བོ་ཉིད་ཀྱི་སྐུ་མངོན་དུ་བྱས་སོ། །ཞེས་བརྗོད་པ་ནི་ཚིག་དབང་བཞི་པ་སྟེ། དབང་གོང་མ་གསུམ་བསྐུར་བའི་ཆོ་གའོ། །དེ་ནས་བརྟུལ་ཞུགས་གསུམ་གྱི་དང་པོ་རིག་མའི་བརྟུལ་ཞུགས་སྦྱིན་པ་ནི། སློབ་དཔོན་དང་ཁྱེད་རང་རྣམས་དཀྱིལ་འཁོར་གྱི་གཙོ་བོ། རྨེའམ། མོ་རྐྱང་རྣམས་ལ་རིགས་བདག་རྨི་བསྒོམ་པའི་ལག་པ་གཡས་པ་གྱེན་དུ་བཏེག་པར། སློབ་དཔོན་གྱི་ཕྱག་གཡོན་པས་རེག་པའི་ཚུལ་གྱིས། རིག་མ་གཏད་པར་བསྒོམས། གཡས་རྡོ་རྗེ་དང་བཅས་པས་སློབ་མའི་མགོར་བཞག་པར་བསྒོམ། ནམ་མཁར་བཞུགས་པའི་སངས་རྒྱས་རྣམས་དཔང་པོར་བྱས་ཏེ། འདིར་ནི་ཁྱེད་རྣམས་དཔང་པོ་ཡིན། །བདག་གིས་ཁྱོད་ལ་འདི་གཏད་དོ། །
གཟུང་མ་ཡིད་འོང་འདི་ཁྱོད་ཀྱིས། །བསྟེན་བྱར་སངས་རྒྱས་རྣམས་ཀྱིས་བསྔགས། །ཐབས་གཞན་གྱིས་ནི་སངས་མི་རྒྱ། །འགྲོ་གསུམ་འདི་ཡང་དག་པ་སྟེ། །དེ་ཕྱིར་འདི་དང་བྲལ་བར་ནི། །ཁྱོད་ཀྱིས་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱིས། །རིག་མའི་བརྟུལ་ཞུགས་བླ་ན་མེད། །རྨོངས་པ་གང་ཞིག་༔ འདའ་བྱེད་པ། །དེ་ལ་མཆོག་གི་དངོས་གྲུབ་མེད། །ཅེས་རིག་མའི་བརྟུལ་ཞུགས་ཆོ་གའོ། །དེ་ནས་རྡོ་རྗེའི་བརྟུལ་ཞུགས་སྦྱིན་པ་ནི། བསངས་སྦྱངས། སྟོང་པའི་ངང་ལས་སློབ་མ་རྣམས་ཀྱི་ཆོས་རྒྱུ་ཅན་ཉོན་མོངས་པ་ལྔ་དང་། ཕུང་པོ་ལྔའི་ཆོས་ཉིད་རྣམས་མི་དམིགས་ཏེ། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས། ཁྱེད་རང་རྣམས་ཀྱི་ཉོན་མོངས་པ་ལྔ་དང་ཕུང་པོ་ལྔའི་ཆོས་ཉིད་རྣམས། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་རྡོ་རྗེ། གཡོན་དེས་ཡུ་བ་བྱས་པའི་དྲིལ་བུ་འཛིན་པ། རལ་པའི་ཐོར་ཚུགས་ལ་སོགས་རྒྱན་ཐམས་ཅད་ཀྱིས་བརྒྱན་པ་རང་དང་འདྲ་བའི་ཡུམ་རྡོ་རྗེ་སྙེམས་མ་དང་སྙོམས་པར་ཞུགས་པའི་སྐུ་ཅན་གྱི་
དཔྲལ་བར་ཨོཾ། མགྲིན་པར་ཨཱཿ༔ ཐུགས་ཀར་ཧཱུཾ། ཐུགས་ཀའི་ས་བོན་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་རྡོ་རྗེ་སེམས་དཔའི་རྣམ་པར་སྤྱན་དྲངས། ཛཿཧཱུྃ་བཾ་ཧོཿ ཁྱེད་རང་རྣམས་ལ་གཉིས་སུ་མེད་པར་ཐིམ། ཧཱུྃ་ལས་བྱུང་བའི་རྡོ་རྗེ་ཚད་དང་མཚན་ཉིད་དང་ལྡན་པ་ཁྱེད་རང་རྣམས་ཀྱི་ལག་པ་གཡས་པར་བྱིན་པར་བསྒོམས། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཕྱག་ན་རྡོ་རྗེའི་བརྟུལ་ཞུགས་བརྟེན། །ཁྱོད་ཀྱིས་ཀྱང་ནི་རྟག་ཏུ་ཟུང་། །བརྟུལ་ཞུགས་འཛིན་པའི་གནས་སྤྱི་བོ་ཡིན་པས་སྤྱི་བོར་བཟུང་བའི་མོས་པ་མཛོད། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། ཏིཥྛ་ཨེ་ཥ་ཡ་ཧཱུཾ་དྷ་ར་ཡཱ་མི་བཛྲ་སཏྭ་ཧཱུཾ། ཧི་ཧི་ཧི་ཧི་ཧཱུྃ། ཞེས་བརྗོད་པ་ནི། རྡོ་རྗེ་བརྟུལ་ཞུགས་འཛིན་པའི་ཆོ་གའོ། །ཕ་རྒྱུད་ཀྱི་དཀྱིལ་འཁོར་བཞི་ལ་སྤྱོད་པའི་བརྟུལ་ཞུགས་མི་དགོས། ལུང་བསྟན་མན་ཆད་བྱའོ། །མ་རྒྱུད་ཀྱི་སངས་རྒྱས་ཐོད་པ་དང་། བདེ་མཆོག་དང་དགྱེས་པ་རྡོ་རྗེ་ལ་སོགས་པ་རྣམས་ལ་སྤྱོད་པའི་བརྟུལ་ཞུགས་ཇི་ལྟར་བྱེད་པའི་ཚུལ་ནི། སློབ་དཔོན་གྱིས། སློབ་མ་རྣམས་དཀྱིལ་འཁོར་གྱི་གཙོ་བོར་ཡབ་ཡུམ་ཆ་ར་སྐད་ཅིག་གིས་གསལ་བ་ལ། ཡེ་ཤེས་ཀྱི་
འཁོར་ལོ་སྤྱན་དྲངས། ཛཿཧཱུྃ་བཾ་ཧོཿ ད་ཁྱེད་རང་རྣམས་ལྷའི་རང་བཞིན་དུ་གསལ་བ་ལ། སྙིང་པོ་ལན་གསུམ་གྱིས་བསྔགས་པའི་ལག་པ་གཡས་སུ་ཌ་མ་རུ། ལྷགཡོན་དུ་ཐོད་པ། གྲུ་མོར་ཁ་ཊཾ་ག སྤྱི་བོར་ཚངས་པའི་སྐུད་པ་རྣམས་བྱིན་པའི་མོས་པ་མཛོད། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །དེས་ན་ཁ་ཊཾ་ཅང་ཏེའུ་སྣོད། །སྦྱིན་པ་དཔའ་མོས་བཟུང་བར་གྱིས། །ཞེས་འདི་སྐབས་སུ། སྙིང་པོ་ཚར་གསུམ་བརྗོད་པ་གལ་ཆེ། ད་མི་རུས་ལས་བྱས་པའི་འཁོར་ལོ་མི་བསྐྱོད་པ་སྔོན་པོ་ས་གནོན་མཉམ་བཞག་ཅན། རྣ་རྒྱན་འོད་དཔག་མེད་དམར་པོ་མཉམ་བཞག་ཅན། མགུལ་རྒྱན་རིན་ཆེན་འབྱུང་ལྡན་སེར་པོ་མཆོག་སྦྱིན་མཉམ་བཞག་ཅན། གདུབ་བུ་དྲུག་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན། སྐེད་རྒྱན་དོན་ཡོད་གྲུབ་པ་ལྗང་ཁུ་སྐྱབས་སྦྱིན་མཉམ་བཞག་ཅན། ཐལ་ཆེན་དང་མཆོད་ཕྱིར་ཐོགས་དང་ཚངས་སྐུད་གསུམ་པོ་གང་རུང་། རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ། ཐམས་ཅད་ཀྱང་ལོངས་སྤྱོད་རྫོགས་པའི་སྐུ་ཅན་དུ་གསལ་བ་ལ། ཁྱེད་རང་རྣམས་དང་སློབ་དཔོན་གྱི་ཐུགས་ཀ་
ནས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རིགས་ལྔ་དང་རྡོ་རྗེ་སེམས་དཔའི་རྣམ་པར་སྤྱན་དྲངས། དབྱེར་མེད་དུ་ཐིམ། ཛཧཱུྃ་ཐཾ་ཧོཿ དེ་དག་ཞུ་བ་ལས་བྱུང་བའི་འཁོར་ལོ་དང་རྣ་རྒྱན་སོགས་ཚད་དང་མཚན་ཉིད་དང་ལྡན་པར་གྱུར་པ། སོ་སོའི་སྔགས་གསུམ་གསུམ་གྱིས་བྱིན་གྱིས་བརླབས་ནས་གནས་སོ་སོར་ཐིམ་པ་བཞིན་དུ་བྱིན་པའི་མོས་པ་མཛོད། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །སྤྱི་བོར་འཁོར་ལོ་མི་བསྐྱོད་པ། །སྦྱིན་པ་དཔའ་མོས་བཟུང་བར་གྱིས། །ཨོཾ་དྷ་ར་དྷ་ར་དྷ་ར་ཡ་དྷ་ར་ཡ་མར་དྷ་མར་དྷ་བཛྲ་དྷིཀ་ཕཊསྭཱ་ཧཱ། གསུམ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །ན་ཆའི་བདག་ཉིད་འོད་དཔག་མེད། །སྦྱིན་པ་དཔའ་མོས་བཟུང་བར་གྱིས། །ཨོཾ་བཛྲ་དྷརྨཱ་ས་མ་ཡ་སཏྭ་ཧཱུཾ་ཧུ་ལུ་ཧུ་ལུ་ཨ་རོ་ལིཀ་ཕཊསྭཱ་ཧཱ། གསུམ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །མགུལ་གྱི་ཕྲེང་བ་རིན་ཆེན་བདག །སྦྱིན་པ་དཔའ་མོས་བཟུང་བར་གྱིས། །ཨོཾ་བཛྲ་སཱུརྨ་ཏཱ་མོ། བི་དྷ་མ་ཧཱ་ས་མ་ཡ་ཙཱ་ཨ་ཧཾ།
རཏྣ་དྷིཀ་ཕཊ་སྭཱ་ཧཱ། གསུམ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །གདུ་བུ་རྣམ་པར་སྣང་མཛད་ཉིད། །སྦྱིན་པ་དཔའ་་མོས་བཟུང་བར་གྱིས། །ཨོཾ་ཤ་ཤཱ་ཏ་པ་ར་མ་ཤ་ཤྭ་ཏ་ཨེ་ཧྱ་ཧི་ཛི་ན་ཛིཀ་ཕཊ༔སྭཱ་ཧཱ། གསུམ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །སྐེ་རགས་ལ་ནི་དོན་ཡོད་གནས། །སྦྱིན་པ་དཔའ་མོས་བཟུང་བར་གྱིས། །ཨོཾ་ཕུ་ཕུ་ཕུ་ཧི་ཧི་ཧི་པྲཛྙཱ་དྷིཀ་ཕཊསྭཱ་ཧཱ། གསུམ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །ལུས་ཀུན་ལ་ནི་ཐལ་ཆེན་རྒྱ། །སྦྱིན་པ་དཔའ་མོས་བཟུང་བར་གྱིས། །ཨོཾ་བཛྲ་སཏྭ་ཧཱུྃ། འཁོར་ལོ་བསྒྱུར་བ་དྲུག་ལ་སྦྱར་བའི་ཚེ། སྔར་གྱི་ཕྱག་རྒྱ་དྲུག་གི་སྟེང་དུ། མི་མགོ་ལྔ་བཅུའི་དོ་ཤལ་དང་། རྒྱབ་ཏུ་གླང་ལྤགས་སྨད་དུ་སྟག་ལྤགས་ཀྱི་ཤམ་ཐབས། རོའམ་རོ་རས་ཀྱི་གདན་རྣམས་གཙོ་བོ་རྡོ་རྗེ་སེམས་དཔའི་སྔགས་ཀྱི་བྱིན་གྱིས་བརླབས་ནས་བྱིན་པའི་མོས་པ་མཛོད། ཨོཾ་བཛྲ་སཏྭ་ཧཱུཾ། གསུམ། རྡོ་རྗེ་སེམས་དཔའི་ཕྱག་རྒྱ་འདི། ཕྱི་དང་ནང་དང་ཡང་དག་གནས། །མགོ་ཕྲེང་གླང་ལྤགས་སྟག་ཤམ་སོགས། །སྦྱིན་པ་
དཔའ་མོས་བཟུང་བར་གྱིས། །ཨོཾ་བཛྲ་སཏྭ་ཧཱུཾ། གིས་སྦྱིན་པ་ནི་ཀྲི་ཡའི་ཁྱད་པར་རོ། །ཀྲི་ཡའི་གཞུང་ལས་མི་མགོའི་ཕྲེང་བ་དང་སྟག་ཤམ་གཉིས་ལས་མ་གསུངས་ཀྱང་འདིར་བླ་མའི་ཕྱག་ལེན་བཞིན་བྲིས་པ་ཡིན་ནོ། །བརྟུལ་ཞུགས་གསུམ་སྦྱིན་པའི་ཆོ་གའོ། །དེ་ནས་སྣམ་སྦྱར་གྱི་ཞབས་ནས་གཡོན་པས་ཆོས་གོས་ཀྱི་སྣེ་གཉིས་སེང་གེ་བག་ཕེབ་པའི་རྣ་བ་ལྟར་བཟུང་། གཡས་པས་སྐྱབས་སྦྱིན་བྱས་ལ། སློབ་དཔོན་ཨོཾ་ལས་སྤྲུལ་སྐུ་ཤཱཀྱ་ཐུབ་པར་བསྒོམས་ལ། དབང་འདི་ཐོབ་ཅིང་ཉམས་སུ་བླང་བ་ལ་བརྟེན་ནས་མ་འོངས་པ་ན་ཁྱེད་རྣམས་གསང་མཚན་བཏགས་པ་དང་མཚུངས་པའི་མཚན་འཛིན་པའི་དེ་བཞིན་གཤེགས་པར་འགྱུར་རོ། །ཞེས་ལུང་བསྟན་པའི་མོས་པ་མཛོད། འདིར་ནི་ཁྱོད་ལ་ངས་ལུང་བསྟན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་རྣམ་པར་དག །སྲིད་པའི་ངན་འགྲོ་རྣམས་ལས་བཏོན། །ཀྱེ་དཔལ་རྗེ་ཞེས་བྱ་བའི་དེ་བཞིན་གཤེགས་པའོ། །སིདྡྷི་ས་མ་ཡ་བྷུསླུ་བསྭཱ། གང་ལ་ངས་ལུང་བསྟན་པ་འདིའི་བླ་མ་དང་དཀྱིལ་འཁོར་ལྷ་ཚོགས་ཐམས་ཅད་ཀྱིས་བྱང་ཆུབ་ཆེན་པོར་མགྲིན་གཅིག་ཏུ་ལུང་བསྟན་པར་མཛད་དེ། སྔགས་འདི་དང་ཕྱག་རྒྱ་འདི་ཡི་མཐུ་ཡིན་ནོ། །ཞེས་ཁྱེད་རང་རྣམས་དང་
བ་བསྐྱེད་པར་བྱའོ། །ལུང་བསྟན་ཆོ་གའོ། །རྒྱུད་ལས། བྱང་ཆུབ་སེམས་ཀྱི་དབང་བསྐུར་བས། །སློབ་མ་སྡིག་དང་བྲལ་བ་ལ། །རྗེས་སུ་གནང་བ་དེ་ནས་སྦྱིན་། །ཞེས་གསུངས་པས། ཁྱེད་རང་རྣམས་ཀྱི་མདུན་དུ་བློ་ལས་སྐྱེས་པའི་འཁོར་ལོ་དང་། ༀ་བཛྲ་ཧེ་ཏུ་ཚྭ། ལག་གཡས་སུ་ཨོཾ་བཛྲ་བྷ་ཥ་རཾ། ཡི་གེ་ཨཱཿལས་སྐྱེས་པའི་དུང་དང་། གཡོན་དུ་དབྱངས་དང་པོ་ལས་སྐྱེས་པའི་པོ་ཏི་དང་ཨཱཿ༔ དབྱངས་ཐ་མ་ལས་སྐྱེས་པའི་དྲིལ་བུ་རྣམས། རང་རང་གིས་སྔགས་བརྗོད་ཅིང་བྱིན་པས་དྲིལ་བུ་དཀྲོལ་བའི་མོས་པ་གྱིས། སློབ་དཔོན་གྱིས། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ནི་མཉམ་སྦྱོར་བས། །ཀུན་མཆོག་མཉམ་པ་ཉིད་དུ་གསལ། །དེང་ནས་བརྩམས་ཏེ་སེམས་བསྐྱེད་པ། །བརྩམས་ཏེ་ཆོས་ཀྱི་འཁོར་ལོ་བསྐོར། །དེ་རིང་ཕན་ཆད་འཇིག་རྟེན་ལ། །ཆོས་ཀྱི་དུང་ནི་བླ་མེད་པ། །ཀུན་ནས་ཡོངས་སུ་བཀང་ནས་ནི། །ཆོས་ཀྱི་འཁོར་ལོ་བསྐོར་བར་གྱིས། །དེ་ནས་རིགས་ལྔའི་ཕྱག་མཚན་ཡོད་ན་གཏད་པའམ། མེད་ན་བསྒོམས་པས་ཆོག་སྟེ། ཁྱེད་རང་རྣམས་རྣམ་པར་སྣང་མཛད་དུ་
སྒོམས་ཤིག །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །ཆོས་ཀྱི་འཁོར་ལོ་རབ་ཏུ་བསྐོར། །ཛ་ཡ་ཛ་ཡ་སརྦ་ཏ་ཐཱ་ག་ཏ་ཨ་དྷཱིཔ་རི་པྲ་ཝརྟ་ཡ་དྷམཱ་ཙཀྲ་ག །ཁྱེད་རང་རྣམས་རིན་ཆེན་འབྱུང་ལྡན་དུ་སྒོམས་ཤིག །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །སངས་རྒྱས་རིན་ཆེན་རབ་ཏུ་སྟོན། །ཨོཾ་བཛྲ་རཏྣ་དྷརྨཱ་སརྦ་དྷརྨཱ་བི་ཤུདྡྷེ་ཛྙཱ་ན་ཨ་བྷི་ཥེ་ཀ་པྲ་ཝརྟ་ཡ་ཨཻ་ཨོཾ་ཨོཾ།་ད་ཁྱེད་རང་རྣམས་སྣང་བ་མཐའ་ཡས་སུ་སྒོམས་ཤིག །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །འདོད་ཆགས་དག་པར་རབ་ཏུ་སྟོན། །ཨོཾ་བཛྲ་དྷམ་སརྦ་དྷམ་བི་ཤུདྡྷེ་ཛྙཱ་ན་དྷ་ག་པདྨ་ལ་སྭ་བྷཱ་ཝ་ཧཱུྃཨཱཿ ད་ཁྱེད་རང་རྣམས་དོན་ཡོད་གྲུབ་པར་སྒོམས་ཤིག །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་གྱུར་པའི། །རྡོ་རྗེའི་མཆོད་པ་རབ་ཏུ་བསྐོར། །ཨོཾ་བཛྲ་ཀརྨ་སརྦ་དྷམ་བི་ཤུདྡྷེ་ཛྙཱ་ན་སརྦ་པཱུ་ཛ་སྭ་བྷཱ་ཝ་ཨཱཿ ཁྱད་པར་
ཀྲི་ཡའི་རྒྱ་གཞུང་ལས། སླར་ཡང་རྣམ་པ་སྣ་ཚོགས་ལས་བྱས་པའི། རིན་ཆེན་བདུན་ཡང་གཏད་པར་བྱ། །གྲི་གུག་ཁཊཾ་བགྲང་ཕྲེང་དང་། །གླེགས་བམ་ཐོད་ལེ་སམ་ཕོ་ར། །གྱོ་མོ་རྣལ་འབྱོར་དབྱུག་པ་དང་། །པདྨའི་ལག་པའི་ལྷམ་དང་ནི། །རྣལ་འབྱོར་པ་ཡི་སྒོམ་ཐག་རྣམས། །ལེགས་པར་དགའ་བའི་བསམ་པ་ཡིས། །སྔགས་ཅན་དེ་ཡིས་སྦྱིན་པར་བྱ། །ཞེས་གསུངས་པ་ལྟར། རྒྱལ་སྲིད་སྣ་བདུན་དང་གྲི་གུག་ལ་སོགས་པའི་རྫས་རྣམས་རིན་པོ་ཆེའི་སྣོད་མེ་ཏོག་སིལ་མས་བཀང་བའི་ནང་དུ་བཞག་ནས། ཁྱེད་རང་རྣམས་ཀྱི་ལག་པ་གཉིས་སུ་རིམ་བཞིན་དུ་བྱིན་པའི་མོས་པ་གྱིས། རྒྱལ་སྲིད་སོགས་ཙཀླུ་རྣམས་རིམ་པར། མ་འོངས་པ་ན་ཐུབ་པའི་དབང་པོ་ཡི། །གོ་འཕང་ཐོབ་ཕྱིར་འཇིག་རྟེན་འཇིག་རྟེན་ལས། །འདས་པའི་དབང་ཕྱུག་བླ་མེད་ཐོབ་ཕྱིར་དུ། །རིན་ཆེན་སྣ་བདུན་རྗེས་གནང་སྦྱིན་པར་བྱ། །ཨོཾ་སབྟ་རཏྟ་ཨ་བྷི་ཥིཉྩ་མཱི། མ་རིག་གཟུང་འཛིན་རྣམ་རྟོག་གཅད་པའི་ཕྱིར། །གྲི་གུག་རྗེས་གནང་རབ་ཏུ་སྦྱིན་བྱ་ཞིང་། །ཞི་རྒྱས་དབང་དང་མངོན་སྤྱོད་ལ་སོགས་པའི། །ཕྲིན་ལས་བསྒྲུབ་ཕྱིར་ཁ་ཊཾ་བགྲང་ཕྲེང་སྦྱིན། །
ཨོཾ་ཀི་དྷ་ཀ་ཁ་ཊཾ་ཁ་མ་ལ་ཨ་བྷི་ཥིཉྩ་མཱི། ཕྱི་ནང་གསང་བ་དེ་ཁོ་ན་ཡི་ཆོས། །བསམ་པ་ཇི་བཞིན་གཞན་ལ་སྟོན་བྱའི་ཕྱིར། །རང་རང་རྒྱུད་ཀྱི་གླེགས་བམ་དག་དང་ནི། །ཐོད་ལེ་ཀོར་དང་སམ་བྷོ་ར་རྣམས་སྦྱིན། །ཨོཾ་པུཏྟ་ཀ་ཁ་ཊཾ་ཀ་སཾ་བྷོ་ར་ཨ་བྷི་ཥིཉྩ་མཱི། རྒྱལ་སྲིད་ལ་སོགས་སྲིད་པའི་བདེ་བ་ལ། །ཆགས་པ་སྤང་སྟེ་བསོད་སྙོམས་འཚོ་བ་ལ། །གནས་ནས་མི་བསྐྱོད་བསམ་གཏན་བྱ་ཕྱིར་དུ། །གྱོ་མོའི་སྣོད་དང་རྣལ་འབྱོར་དབྱུག་པ་དང་། །ལྷུམ་དང་སྒོམ་ཐག་རྣམས་ཀྱང་སྦྱིན་པར་བྱ། །ཨོཾ་ག་ཡ་ད་ར་ཡོ་ག་ག་ན་ཌ།་ཡ་ཏ་ཀ་པ་ཊ་ཀཾ། ཨ་བྷི་ཥིཉྩ་མཱི། དེ་ནས། ཐེ་ཚོམ་མེད་པའི་བསམ་པ་ཡིས། །ཁྱོད་འདིར་བློ་གྲོས་ངན་མི་བྱ། །གསང་སྔགས་སྤྱོད་པའི་ཚུལ་མཆོག་འདི། །མཉམ་མེད་རང་གིས་རབ་གསལ་བྱ། །དེ་ལྟར་བྱས་ན་སངས་རྒྱས་ལ། །ཕན་བཏགས་བྱས་པས་གཟོ་བར་འགྱུར། །རྡོ་རྗེ་འཛིན་པ་དེ་ཀུན་ཡང་། །ཁྱེད་ལ་རྟག་ཏུ་ཀུན་སྲུང་མཛོད། །ཤེས་རབ་ཐབས་ཀྱིས་རང་བཞིན་བདག །ཡིད་བཞིན་ནོར་བུ་ལྟར་མཐོང་བས། །སྐྱོན་མེད་དོགས་དང་བྲལ་བ་ཡིས། །དེ་ལྟར་སེམས་ཅན་དོན་གྱིས་ཤིག །ཅེས་བརྗོད་པ་ནི།
རྗེས་སུ་གནང་བའི་ཆོ་གའོ། །དབུགས་དབྱུང་ནི། ད་སློབ་མ་གཞོན་པ་གཅིག་ལ་ཆོས་གོས་བཀོན་ནས། རུས་པ་དང་རིན་པོ་ཆེའི་རྒྱན་དྲུག་གིས་བརྒྱན་ཅིང་། དེས་དཀྱིལ་འཁོར་ལ་སྐོར་བ་བྱེད་པ་དང་མཉམ་དུ་ཁྱེད་རང་རྣམས་ཀྱིས་བྱས་པར་བསྒོམས་ལ་རྗེས་ཟློས། མ་ཧཱ་ར་ཏ་སུ་ཌི་ཏ་སུ་ཏཱ་ཥ་བཛྲ་སཏཱ་ཨརྱ་སིདྡྷ་ནཱཾ། སྤྱི་བོ་རུ་ནི་གདུགས་བཟུང་ཞིང་། །སྐོར་བ་བྱེད་དུ་བཅུག་ནས་ནི། །དཀྱིལ་འཁོར་ཤར་སྒོར་ཐལ་སྦྱར་བ། །གདུགས་བཅས་དབབ་ཅིང་འདི་སྐད་བརྗོད། །ཅེས་གསུངས་པས། ཁྱེད་རང་རྣམས་ཀྱི་སྤྱི་བོར་གཞན་ཞིག་གིས་གདུགས་བཟུང་། དཀྱིལ་འཁོར་གྱི་ཤར་སྒོ་ནས་ཕྱག་གསུམ་འཚལ་ནས། ཁྱེད་རང་རྣམས་ཀྱི་ལུས་ལོངས་སྤྱོད་དགེ་བའི་དངོས་པོ་དང་བཅས་པ་ཐམས་ཅད་དཀྱིལ་འཁོར་གྱི་ལྷ་ལ་འབུལ་བསམ་ཞིང་། དཀྱིལ་འཁོར་ལ་མགོ་བོ་འདུད་པ་རེ་གྱིས། སྔགས་དང་རྒྱུད་རྣམས་འཛིན་གྱུར་པའི། །སློབ་མ་འདི་ནི་འབུལ་བ་ལགས། །ད་ཁྱེད་རང་རྣམས་ཤར་སྒོ་ནས་ཕྱག་གསུམ་འཚལ་ཏེ་པུས་བཙུགས་ཐལ་མོ་སྦྱར་བས་ཉོན། ཐམས་ཅད་ཀྱི་སྙིང་ལ་འབབ་པའི་གཏམ་འདིར་བརྗོད་པ་ལ་གསན་པས་ཁྱབ་པར་གདའ། །
དེ་ནི་ཁྱེད་རྣམས་དཀྱིལ་འཁོར་གྱིས། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་དག་ཀྱང་དགོངས་པར་འགྱུར། །སེམས་ཅན་ཀུན་ལ་བརྩེ་དོན་དུ། །ཁྱེད་ཀྱི་དཀྱིལ་འཁོར་ཆོ་ག་བཞིན། །རབ་ཏུ་འབད་དེ་བྲི་བར་བྱ། །སྒྲུབ་པ་པོ་རྣམས་རྒྱུད་ལ་སྦྱོར། །མཆོག་ཏུ་གསང་བ་དམ་པ་ཡིས། །དཀྱིལ་འཁོར་མཐོང་ཞིང་ཞུགས་པས་ན། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཁྱོད་ལ་མེད། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་མཐའ་གྲུབ་བོ། །སངས་རྒྱས་རྡོ་རྗེ་ཅན་ཀུན་གྱི། །དེ་རིང་ཚེ་ལྡན་དབང་བསྐུར་རོ། །ཁམས་གསུམ་ཀུན་གྱི་རྒྱལ་སྲིད་ཆེ། །བདག་པོ་ཉིད་དུ་ཁྱོད་ངེས་སོ། །འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་ཉིད། །ཁྱོད་ཀྱིས་ནམ་ཡང་མི་བྱའོ། །འདོད་པ་ཀུན་ལ་སྤྱོད་པ་ཁྱོད། །གང་ལའང་འཇིགས་མེད་སྤྱད་པར་གྱིས། །ཤ་ལྔ་བདུད་རྩི་ལྔ་བཟའ་ཟ། །འདི་ལས་གཞན་ཡང་དམ་ཚིག་བསྲུང་། །
སྲོག་ཆགས་བསད་པར་མི་བྱ་ཞིང་། །སློབ་དཔོན་སྤང་བར་མི་བྱ་སྟེ། །དམ་ཚིག་ཤིན་ཏུ་འདའ་བར་དཀལ། །ཤེས་རབ་ཐབས་ཀྱི་བསམ་པ་ཡིས། །མི་བྱ་ཅུང་ཟད་ཡོད་མ་ཡིན། །མ་འཇིགས་ཁྱོད་ལ་སྡིག་པ་མེད། །དེ་བཞིན་གཤེགས་པའི་གསུང་ཇི་བཞིན། །འདི་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གིས་དམ་ཚིག་མི་བཟད་བདེ་སྟེར་བསྟེན་པར་གྱིས། །འགྲོ་བ་བདེ་བ་མྱོང་ལ་རྡོ་རྗེ་སེམས་དཔའ་དང་། །མཚུངས་པའི་རྟག་པ་ཉིད་དུ་ཁྱོད་རྣམས་ཕྱིན་པར་འགྱུར། །གཞན་ཡང་གང་དག་ཆོ་ག་ཇི་ལྟ་བ་བཞིན་དབང་བསྐུར་བ་ལ་དགེ་བའི་ཕྱིར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས། སྡུག་པའི་བུ་དང་འདྲ་བར་ཐུགས་དངས་བས་ཡང་དག་པར་དགོངས་པ་མཛད་པ་འདི་ནི་ཆོས་ཐམས་ཅད་ཀྱི་ཆོས་ཉིད་ཡིན་ནོ། །དབུགས་དབྱུང་ཆོ་གའོ། །དབང་བསྐུར་རྗེས་ཀྱི་ཆོ་ག་ནི། །ཁས་བླང་དོན་བསྒྲུབ་སྤྲོ་བ་བསྐྱེད། །ཡོན་འབུལ་དེང་ནས་བརྩམས་སོགས་བརྗོད། །ཅེས་གསུངས་པ་ལྟར། དེ་ལྟར་ཁྱེད་རང་རྣམས་ཀྱི་རྗེའི་དཀྱིལ་འཁོར་དུ་དབང་བཞི་རྫོགས་པར་ཐོབ་པས། དེ་དག་གི་སྐབས་སུ་ཁས་བླངས་བའི་དམ་ཚིག་དང་
སྡོམ་པ་ཚུལ་བཞིན་དུ་བསྲུང་སྙམ་པས་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །དེ་ལྟར་དབུགས་ཕྱིན་པའི་སློབ་མ་རྣམས་ཀྱིས། རང་གཞན་གྱི་དོན་རྒྱ་ཆེན་པོ་འགྲུབ་པ་ལ་དགའ་ཞིང་སྤྲོ་བའི་ཕྱིར།། རྗེས་ཟློས་མཛོད། དེང་བདག་སྐྱེ་བ་འབྲས་བུར་བཅས། །བདག་ནི་གསོན་པའང་འབྲས་བུར་བཅས། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་དེང་བདག་འགྱུར། །འོ་དེ་ལྟར་རྨེའི་དཀྱིལ་འཁོར་དུ་དབང་བསྐུར་བ་རྫོགས་པར་ཐོབ་པའི་གཏང་རག་ཏུ་མཎྜལ་ཕུལ། ས་གཞི་སྤོས༔ འདི་ཡི་རྗེས་ཟློས། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང་། །ཆ་ཤས་ཀྱང་ནི་སྤྱད་དུ་གསོལ། །གསུམ། དེ་ལྟར་རྡོ་རྗེ་ཕྲེང་བའི་ནང་ནས་སྒྲེའི་དཀྱིལ་འཁོར་དུ་དབང་བསྐུར་བ་ཐོབ་པའི་བླ་མ་བརྒྱུད་པ་ནི། རྡོ་རྗེ་འཆང་། ཡེ་ཤེས་ཀྱི་མཁའ་འགྲོ་མ།་སློབ་དཔོན་ཆེན་པོ་ཨ་བྷ་ཀ་ར་གུཔྟ། ཨ་ནུ་པདྨ་རཀི་ཏ། པཎྜི་ཏ་བིཀྟ་དེ་ཝ། པཎ་ཆེན་ཤཱཀྱ་ཤྲཱི། དེ་སོགས་བརྒྱུད་པ་འགའ་ཟུང་ལས་བྱུང་བའི་དབང་
བསྐུར་བ་རྣམ་པར་དག་པ་ཐོབ་པ་ཡིན་པས། རང་གཞན་གྱི་དོན་རྒྱ་ཆེན་པོ་མཛོད། གཞུང་ལས། དེ་ལྟར་བླ་མེད་དཀྱིལ་འཁོར་སོ་དྲུག་པོ་ཐམས་ཅད་ལ་སྦྱར་བར་བྱེད་ན། ཀྲི་ཡ་ས་མུཉྩཡི་རྒྱ་གཞུང་ནས་བཤད་པའི་ཆོ་ག་དང་། ས་བཟང་གཞོན་ནུ་བློ་གྲོས་ཀྱིས་མཛད་པའི་དཀྱིལ་ཆོག་གིས་དབང་བསྐུར་ཆོ་ག་རྒྱས་པ་དང་མཐུན་པའི་ཕྱག་ལེན་ཡིན་ཞིང་། རྡོ་རྗེ་ཕྲེང་བའི་དབང་བསྐུར་རྒྱས་པ་དང་མཐུན་པའི་ཕྱག་ལེན་གྱི་སྟེང་དུ། བདེ་མཆོག་འཁོར་ལོས་བསྒྱུར་དྲུག་དང་གུར་རིགས་བསྡུས་ལ་སྦྱར་ཏེ། དབང་བསྐུར་ཉིན་གཅིག་ལ་མཛད་པ་དེ་ལ། ཡེ་ཤེས་དབབ་པའི་སྤོག་ཆོག་ནས་བརྩམས་ཏེ། ཀྲི་ཡའི་ཁྱད་པར་གྱི་ཆོས་རྣམས། ཕྲེང་བ་རྒྱས་པའི་དབང་བསྐུར་ཕྱིན་གྱི་སྟེང་དུ་བསྣན་པ་ནི། དབང་བསྐུར་རྒྱས་པའི་ཕྱག་ལེན་ཡིན་ལ། ཞེས་གསུངས་པ་ལྟར། རཱ་ག་ཨ་སྱས་བསྒྲིགས་པ་ལ། ཉེས་པ་མེད་པས་བཤགས་བྱ་མ་མཆིས། ཡི་གེ་པ་ནི་དགེ་སློང་བརྩོན་འགྲུས་ཀྱིས་བགྱིས་སོ། །འདི་ལྟར་བགྱིས་པའི་དགེ་བའི་རྩ་བས་བདག་གཞན་འབྲེལ་པ་ཐོགས་ཚད་བདེ་བ་ཅན་གྱི་ཞིང་ཁམས་སུ་སྐྱེ་བའི་རྒྱུར་གྱུར་ཅིག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།