སྦྱོང་རྒྱུད་ཀྱི་སྤྱི་དོན་བསྡུས་པ།
སྦྱོང་རྒྱུད་ཀྱི་སྤྱི་དོན་བསྡུས་པ་བཞུགས་ལགས་སོ།།
བྷུདྡྷ་སརྦ་བིད་ན་མ་ཡེ། འདིར་སྦྱོང་རྒྱུད་ཀྱི་སྤྱི་དོན་ཅུང་ཟད་བཤད་ན། དེ་ཡང་རྒྱུད་སྡེ་རིན་པོ་ཆེ་རྣམས་ཕུན་སུམ་ཚོགས་པ་ལྔའི་སྒོ་ནས་འཆད་དགོས་པ་ལས། གནས་ཕུན་སུམ་ཚོགས་པ་རི་རབ་ཀྱི་རྩེ་སུམ་ཅུ་རྩ་གསུམ་ལྷའི་གནས། རྣམ་པར་རྒྱལ་བའི་ཁང་བཟང་གི་ཕྱོགས་བཞི་ན་ཚལ་ཆེན་པོ་བཞི་ཡོད་པ་ལས། བྱང་ཕྱོགས་སུ་ལྷ་རྣམས་རྩེ་ཞིང་དགའ་བར་བྱེད་པས་ན་དགའ་བའི་ཚལ་ཞེས་བྱ་བ་སྟེ། གནས་དེ་ན་རྒྱུད་འདི་གསུངས་སོ། །དུས་ཕུན་སུམ་ཚོགས་པ་ནི་ལྷའི་བུ་ནོར་བུ་དྲི་མ་མེད་པ་སུམ་ཅུ་རྩ་གསུམ་ནས་ཚེ་འཕོས་ནས་ཞག་བདུན་ལོན་པའི་དུས་
སུ་གསུངས་སོ། །སྟོན་པ་ཕུན་སུམ་ཚོགས་པ་ནི་རྒྱུད་འདིའི་བརྟག་པ་དང་པོ་སྤྲུལ་སྐུ་ཤཱཀྱ་ཐུབ་པས་གསུངས་སོ། །བརྟག་པ་གཉིས་པ་ལ་དཀྱིལ་འཁོར་བཅུ་གཅིག་ཡོད་པ་ལས། བཅུ་པ་ཕྱག་ན་རྡོ་རྗེ་ཞི་བའི་ཚུལ་གྱིས་གསུངས་སོ། །དཀྱིལ་འཁོར་བཅུ་གཅིག་པོ་ནི་ཕྱག་ན་རྡོ་རྗེ་ཞི་བ་དེ་ཉིད་ཁྲོ་བོ་འཇིག་རྟེན་གསུམ་རྒྱལ་དུ་བསྒྱུར་ནས་གསུངས་པས་སྟོན་པ་གསུམ་དུ་བཞེད་དོ། །འཁོར་ཕུན་སུམ་ཚོགས་པ་ནི། །བྱང་ཆུབ་སེམས་དཔའ་བྱེ་བ་ཁྲག་ཁྲིག་རྣམས་དང་ལྷ་མ་སྲིན་སྡེ་བརྒྱད་རྣམས་སོ། །ཆོས་ཕུན་སུམ་ཚོགས་པ་ནི་ངན་སོང་ཐམས་ཅད་སྦྱོང་བའི་རྒྱུད་
ཀྱི་རྒྱལ་པོ་བརྟག་གཉིས་བམ་པོ་གསུམ་དང་ཤོ་ལོ་ཀ་སྟོང་ཡོད། ཞུ་བ་པོ་བརྒྱ་བྱིན་ཏེ་དགོས་ཆེད་དུས་དེར་ལྷའི་བུ་དྲི་མ་མེད་པ་ངན་སོང་ལས་ཐར་བ་དང་། ཕྱིས་ནས་མཐའ་ཡས་པའི་སེམས་ཅན་ཐམས་ཅད་ངན་སོང་ལས་ཐར་བའི་ཕྱིར་གསུངས་སོ། །རྒྱུད་འདིའི་བརྗོད་བྱ་ནི། དངོས་བསྟན་རྡུལ་ཚོན་གྱི་དཀྱིལ་འཁོར་བཅུ་གཉིས་ཞོར་ལ་རས་བྲིས་ཀྱི་དཀྱིལ་འཁོར་བཅུ་གཉིས་དང་། ཞི་རྒྱས་དབང་དྲག་གི་ཐབ་བཞི་རོ་སྲེག་གི་ཧཾ་ཁུང་དང་བཅུ་བདུན། སྡིག་པ་སྦྱོང་བའི་སྒོ་དགུའམ་བདུན། རང་དོན་གཞན་དོན་གཉིས་སོགས་ནི་བརྗོད་བྱའོ། །དེ་ལ་སྡིག་པ་སྦྱོང་བའི་སྒོ་བདུན་ནི། དབང་བསྐུར། ཕྱིར་བཟློག །སྦྱིན་སྲེག །རོ་སྲེག །སཱཙྪ། བཟླས་བརྗོད། རྟེན་མེད་ན་མིང་བྱང་ལ་བརྟེན་པ་དང་བདུན་ཏེ། གཙོ་བོ་དབང་བསྐུར་ཡིན་ཞིང་། རང་དོན་ལས་གཞན་དོན་གཙོ་ཆེ། ཚེ་ལྡན་ལས་ཚེ་འདས་གཙོ་ཆེ་བའོ། །རྒྱུད་འདི་དག་གི་རྣལ་འབྱོར་མི་གསལ་བས་སྤྱོད་རྒྱུད་ཡིན་ཟེར་བ་བྱུང་ན་ཡང་། ཐམས་ཅད་ཟོས་ཤིང་ཀུན་བྱས་ཀྱང་། །འགྲུབ་འགྱུར་ཞེས་སོགས་ཅི་བདེ་བར་འགྲུབ་པར་གསུངས་པས་རྣལ་འབྱོར་རྒྱུད་དུ་ངེས་སོ། །རྣལ་འབྱོར་
རྒྱུད་ལ་ཡང་རྩ་རྒྱུད་བཤད་རྒྱུད་ཆ་མཐུན་རྒྱུད་རྣམས་སུ་ཡོད་པ་ལས། འདིར་ཁ་ཅིག་གིས་ཆ་མཐུན་རྒྱུད་དུ་འདོད་ཀྱང་། རྩ་རྒྱུད་དེ་ཉིད་བསྡུས་པའི་དུམ་བུ་གསུམ་པ་ཁམས་གསུམ་རྣམ་རྒྱལ་གྱི་ངན་འགྲོ་འགུགས་པའི་སྐབས་ནས་འཕྲོས་པས། འཕྲོས་པའི་རྒྱུད་ཡིན་ནོ། །འདིའི་མཇུག་མེ་ལྟར་འབར་བའི་དྲག་པོའི་སྦྱིན་སྲེག་ཡོད་པ་ལ། སྔོན་གྱི་རྒྱལ་བློན་རྣམས་ཀྱིས་སྔགས་པས་མངོན་སྤྱོད་བྱེད་དགོས་ནས། མ་སྒྱུར་གསུངས་ནས་མ་བསྒྱུར་བ་ཡིན་ཏེ་ལི་ཡུལ་གྱི་རྒྱ་དཔེ་ལ་དྲག་པོའི་སྦྱིན་སྲེག་ཡོད་སྐད་དོ། །རྒྱུད་འདི་རྒྱ་གར་དུ་དར་ཚུལ་ནི་ཕྱག་ན་རྡོ་རྗེས་རྒྱལ་པོ་རབ་གསལ་ཟླ་བ་ལ་གནང་། དེས་སྒྲ་གཅན་འཛིན། སཱ་ཏི་ཕ་ལ། པྲཛཱ་སིདྡྷི། ཡེ་ཤེས་རྡོ་རྗེ་བཞི་ལ་གནང་། དེ་བཞི་ཀ་ལས་སློབ་དཔོན་ཀུན་དགའ་སྙིང་པོས་གསན་ནས། རྩ་རྒྱུད་དེ་ཉིད་འདུས་པར་འགྲེལ་པ་དེ་ཉིད་སྣང་བ་དང་། རྡོར་དབྱིངས་ཀྱི་དཀྱིལ་ཆོག་རྡོ་རྗེ་འབྱུང་བ་དང་། ཀུན་རིག་གི་སྒྲུབ་ཐབས་རྣམས་མཛད་པས། ཚིག་དོན་གཉིས་ཀ་ལ་མཁས་པ་ཀུན་དགའ་སྙིང་པོ་ཞེས་གྲགས། ཚིག་ལ་མཁས་པ་ཤཱཀྱ་བཤེས་གཉེན་གྱིས་རྩ་རྒྱུད་དེ་ཉིད་འདུས་པ་ལ་
འགྲེལ་པ་ཀོ་ས་ལའི་རྒྱུད་མཛད་ཅིང་རྣམ་སྣང་མི་བཞི་རྒྱབ་སྤྲོད་ལྟ་བུར་བཞེད། དོན་ལ་མཁས་པ་སངས་རྒྱས་གསང་བ་སྟེ་དེ་ཉིད་དེའི་གསུང་ལ་ཟིན་བྲིས་བྱས་པ། སྦྱོང་རྒྱུད་ཀྱི་འགྲེལ་པ་འབྲུ་འགྲེལ་རྒན་པོ་ཞེས་བྱ་བ་ཞིག་ཡོད། དེ་གསུམ་ལ་ཡོ་གར་མཁས་པའི་མི་གསུམ་དུ་གྲགས་སོ། །དེ་དག་ལས་བརྒྱུད་པ་རྒྱ་གར་དུ་དར་རོ། །བོད་དུ་སྔར་རྒྱལ་པོ་ཁྲི་སྲོང་གི་ཡབ་མེས་ཨག་ཚོམ་གྱི་དུས་སངས་རྒྱས་གསང་བ་གངས་ཏི་སེར་ཕེབས་པ་གདན་འདྲེན་ཞུས་ཀྱང་མ་ཕེབས། སངས་རྒྱས་གསང་བའི་སློབ་མ་བི་མ་མི་ཏྲ་ཁྲི་སྲོང་ལྡེའུ་བཙན་གྱིས་གདན་དྲངས་ནས་ཡོ་ག་ཅུང་ཟད་ཞུས། ཁྱད་པར་དུ་ཤཱཀྱ་བཤེས་གཉེན་གྱི་སློབ་རྒྱུན་ཨ་ཙཱརྱ་དྷརྨ་ཀཱིརྟི་བོད་དུ་བྱོན་ནས། རྒྱལ་པོ་ལ་ཡོ་ག་གནང་བས་དད་པར་གྱུར་ནས། བུ་ཚབ་གསེར་ཁོང་རྡོར་དབྱིངས་དང་། བསམ་ཡས་དབུ་རྩེར་ཀུན་རིག་བློས་བསླང་གི་ཚུལ་དུ་བཞེངས་ནས་རྣམ་སྣང་མི་བཞི་རྒྱབ་སྤྱོད་ཀྱི་ཚུལ་དུ་མཛད། དེ་དུས་ཡོ་གའི་སྐོར་ཤཱཀྱ་བཤེས་གཉེན་གྱི་ལུགས་གཙོ་ཆེ་བས་རྣམ་སྣང་རྒྱབ་སྤྱད་དུ་མཛད་ཅིང་། སངས་རྒྱས་གསང་བའི་ལུགས་དབང་རྒྱུན་ཅུང་ཟད་བི་མ་ལ་ནས་ཡོད་སྲིད་ཙམ་ཡིན་གསུངས། ཁྲི་ལྡེ་སྲོང་
ལྡེའུ་བཙན་དུས་སུ་པཎྜི་ཏ་ཞི་བ་སྙིང་པོ་དང་། ལོ་ཙཱ་བ་ཀ་བ་དཔལ་བརྩེགས་སོགས་སད་མི་བདུན་གྱིས་བསྒྱུར་བ་ལས། ཁྲི་རལ་དུས་རྨ་རིན་ཆེན་མཆོག་གིས་སྐད་གསར་བཅད་ཀྱིས་བཅོས་ཏེ་གཏན་ལ་ཕབ་པའི་རྒྱུད་འབུམ་ཕལ་ཆེར་ན་བཞུགས་ལ། དུས་ཕྱིས་ལོ་ཙཱ་བའི་འགྱུར་དང་འཇམ་རལ་གྱི་འགྱུར་སོགས་མང་དུ་བྱུང་ངོ་། །སྦྱོང་རྒྱུད་ཀྱི་འགྲེལ་ཆེན་གཞུང་སྟོང་ཕྲག་བཅུ་གཉིས་པ་ཞིག་སློབ་དཔོན་ཀུན་དགའ་སྙིང་པོས་མཛད་པ་ནི་བོད་དུ་མ་འགྱུར་ལ། ཡེ་ཤེས་འོད་འཕྲོས་མཛད་པའི་ཀུན་རིག་དཀྱིལ་ཆོག་དང་། ཀུན་རིག་དཀྱིལ་ཆོག་སློབ་དཔོན་ཀུན་དགའ་སྙིང་པོས་མཛད་པ་ལས་ཇོ་བོ་སྨྲ་ཏིའི་མཛད་ཟེར་བ་ཞིག་དང་། ཆགས་མེད་རྒྱལ་པོས་མཛད་པའི་ཞི་བའི་སྦྱིན་སྲེག་དང་ཞི་བ་སྙིང་པོས་མཛད་པའི་མཆོག་ཆེན་གདབ་པའི་ཆོ་ག་དང་། ཀུན་སྙིང་གིས་མཛད་པའི་སྒྲུབ་ཐབས་སྤྱི་ཏིས་བསྒྱུར་བ་དང་། ཀུན་སྙིང་གིས་མཛད་པའི་རོ་སྲེག །གཞན་ཡང་དྷརྨ་ཀཱིརྟིས་མཛད་པ་དང་། སྐལ་བཟང་དགའ་བས་མཛད་པ་སོགས་རྒྱ་གཞུང་ཚད་ལྡན་མང་པོ་བོད་དུ་འགྱུར་རོ། །སྦྱོང་རྒྱུད་ཀྱི་འགྲེལ་པ་ནི་རྒྱ་འགྲེལ་ཡིན་པ་ལ་བོད་འགྲེལ་དུ་འདོད་པ་ལ་ལས་
གཟི་བརྗིད་བཤད་པ་ཞེས་མཛད་བྱང་མེད་པ་ཞིག་དང་། མཛེས་པའི་རྒྱན་ཞེས་ཀུན་སྙིང་གིས་མཛད་པར་འཁྱམས་ལོ་ཙཱ་བས་མཛད་པ་ཡིན་ཡང་ཟེར་བ་དང་། དེ་ཉིད་སྣང་བའི་རྒྱན་ཞེས་ཀུན་སྙིང་གིས་མཛད་པ་ལ་ལས་སྲས་ལི་ཅུང་གིས་བྱས་པ་ཡིན་ཡང་ཟེར་བ་དང་། ཟང་དཀར་གྱིས་བྱས་པ་དང་འགྲེལ་ཆེན་བཞི་འདི་ས་ལུགས་ཀྱིས་ཅུང་ཟད་མ་དག་པར་འདོད་ཀྱང་རྗེ་ཆོས་གྲགས་རྒྱ་མཚོའི་ཚད་མར་མཛད་དོ། །ཀུན་སྙིང་གིས་མཛད་ཟེར་བའི་གསལ་སྒྲོན་དང་། རང་ཟོམ་ཆོས་བཟང་གིས་མཛད་པ་དང་། འབྲུ་འགྲེལ་ཞེས་བྱ་བ་རྣམས་འགྲེལ་པ་རྙིང་པ་ཡིན་ལ། ཕྱིས་མི་བསྐྱོད་ཞབས་སོགས་གྲུབ་མཐའ་སོ་སོའི་བླ་མ་མང་པོས་འགྲེལ་པ་སོ་སོར་མཛད་དོ། །དེ་ཡང་བསྟན་པ་སྔ་དར་དུས་སངས་རྒྱས་གསང་བའི་གསུང་ལ་ཟིན་བྲིས་བྱས་པ་འབྲུ་འགྲེལ་རྒན་པོ་ཞེས་པའི་རྗེས་སུ་འབྲང་བའི་བཤད་སྲོལ་ཡང་འབྱུང་། བསྟན་པ་ཕྱི་དར་དུས་མངའ་རིས་སྟོད་དུ་བོད་ཆོས་རྒྱལ་གྱི་རྒྱལ་བརྒྱུད་ལྷ་བླ་མ་ཡེ་ཤེས་འོད་དང་བྱང་ཆུབ་འོད་གཉིས་ཀྱི་སྐུ་རིང་ལ། སྔགས་པ་རྣམས་སྔགས་ལུགས་ཡིན་ཟེར་ནས་སྤྱོད་པ་བག་མེད་བྱས་པ་ལ་རྒྱལ་པོ་སྔགས་ལ་ཡིད་མ་ཆེས་ནས། ཁྱེའུ་ཉི་
ཤུ་རྩ་གཅིག་ལོ་ཙཱ་བསླབ་ལ་གསེར་མང་པོ་བསྐུར་ནས་ཁ་ཆེར་བརྫངས་ནས། སྔགས་རྩད་གཅོད་ལ་བཏང་ནས་ལོ་ཆེན་རིན་ཆེན་བཟང་པོ་དང་། ལོ་ཆུང་ལེགས་པའི་ཤེས་རབ་གཉིས་མ་གཏོགས་ཐམས་ཅད་ཚད་པས་ཤི། ལོ་ཆེན་གྱིས་པཎྜི་ཏ་པདྨ་ཀ་ར་ཝརྨ་དང་སངས་རྒྱས་ཞི་བ་སོགས་ལས་གསན་ནས། ཡོ་གའི་སྐོར་མང་དུ་བསྒྱུར། པཎྜི་ཏ་ཤདྷ་ཀ་ར་ཝརྨ་བོད་དུ་སྤྱན་དྲངས་ནས་ཡོ་གའི་སྐོར་ཤིན་ཏུ་དར་བར་མཛད། འོན་ཀྱང་དེ་དུས་ཀུན་སྙིང་གིས་མཛད་པའི་འགྲེལ་པ་དེ་ཉིད་སྣང་བའི་རྒྱ་དཔེ་མ་རྙེད་ནས། འགྲེལ་པ་ཤཱཀྱ་བཤེས་གཉེན་གྱི་ཀོ་ས་ལའི་རྒྱན་དང་བསྟུན། ཕྱག་ལེན་དཀྱིལ་ཆོག་ནི་རྡོ་རྗེ་འབྱུང་བ་ལ་བྱེད་ཅིང་བརྒྱུད་པ་ནི་ཀུན་དགའ་སྙིང་པོ་ནས་འདེད། རྣམ་སྣང་མི་བཞི་རྒྱབ་སྤྲོད་དུ་བྱེད་ཅིང་ཆུ་དབང་གི་དག་པ་རྣམས་སུ་འཆད་པ་སོགས་ཤཱཀྱ་བཤེས་གཉེན་དང་ཀུན་སྙིང་གི་ལུགས་གཉིས་འདྲེས་པས། ལོ་ཆེན་གྱི་སྐུ་ཚེའི་སྟོད་ཡིན་ཀྱང་ལུགས་ཅུང་ཟད་མི་ལེགས་པ་དང་། དབུས་གཙང་སྨད་ངོས་སུ་དར་བའི་ཡོ་ག་སྨད་ལུགས་ཟེར། དེ་ནས་རེ་ཞིག་ན་བལ་པོའི་ཚང་ཕ་ལས་འགྲེལ་པ་དེ་ཉིད་སྣང་བའི་རྒྱ་དཔེ་བྱུང་སྟེ། རྒྱ་གར་ཤར་ཕྱོགས་པཎྜི་
ཏ་དྷརྨ་པ་ལ་ཚད་པས་བསྙུང་བ་ལ། གངས་རི་ཡོད་སར་བྱོན་ན་ཕན་པར་སྨན་པས་ལུང་བསྟན་པས། གངས་ཏི་སེར་བྱོན་ཞོར་མངའ་རིས་སུ་ཕེབས་ཏེ། ལོ་ཆེན་རིན་ཆེན་བཟང་པོས་ཀུན་སྙིང་ལུགས་ཀྱི་གདམས་པ་ཕྱག་ལེན་རྫོགས་པར་ཞུས། འགྲེལ་པ་ཡང་དེ་ཉིད་སྣང་བ་ལ་མཛད་དེ། རྣམ་སྣང་ཞལ་བཞི་པར་བཞེད། འདི་ལོ་ཆེན་གྱི་སྐུ་ཚེའི་སྨད་ཡིན་ཀྱང་ཀུན་སྙིང་ལུགས་སོར་བཞག་པ་ཡིན་པས་ལེགས་པ་དང་སྟོད་མངའ་རིས་སྐོར་གསུམ་དུ་དར་བས་ཡོ་ག་སྟོད་ལུགས་ཟེར། འགའ་ཞིག་གིས་སྨད་ལུགས་ལེགས་པས་སྟོད་ལུགས་མི་ལེགས་པས་སྨད་ལུགས་ཡིན་ཡང་ཟེར་རོ། །ཇོ་བོ་རྗེའི་བཤད་སྲོལ་གནུབས་ལུགས་སུ་གྲགས་པ་དང་། རིན་ཆེན་བཟང་པོའི་བཤད་སྲོལ་དང། མནའ་མཆེན་གྱི་བཤད་པ་དང་གསུམ་བྱུང་སྟེ། རྩིང་ཞིབ་ཅུང་ཟད་ཆོ་ག་གོང་འོག་མ་གཏོགས་དོན་ལ་འདྲའོ། །དེ་ཡང་བོད་འདིར་སྦྱོང་རྒྱུད་ཀྱི་ཆོ་ག་རྒྱུད་འགྲེལ་སྒྲུབ་ཐབས་སྨྲི་ཏིས་བསྒྱུར་བའི་གཙོ་བོར་གཞུང་གཙོ་བོ་བྱ། སྦྱོང་རྒྱུད་ཀྱི་འགྲེལ་པ་སྣང་རྒྱན་དང་མཛེས་རྒྱན་གཉིས། ཀུན་སྙིང་གིས་མཛད་པར་གྲགས་པའི་གསལ་སྒྲོན། གཞན་ཡང་རྒྱ་འགྲེལ་འགའ་ཞིག་དང་།
དཀྱིལ་ཆོག་རྣམས་ལ་ཆོ་ག་ཞིབ་མོས་འགྲེལ་པ་དང་། རྡོར་དབྱིངས་ནས་ཀྱང་ཁ་བཀང་། གཤིན་དོན་གྱི་ཆོ་ག་རྣམས་ཀུན་སྙིང་གི་རོ་སྲེག་ཆོ་ག་དང་། དྷརྨ་ཀིརྨིས་མཛད་པ་དང་། སྐལ་བཟང་དགའ་བས་མཛད་པ་གསུམ་གཙོ་བོར་བྱས། ཀཱ་མ་དྷེ་ནུ་དང་། རབ་འབྱོར་སྐྱོང་གི་ཆོ་ག་རྣམས་ལའང་གཏུགས་ནས་ཀུན་རིག་ཆེན་མོ་མཛད་པ་ལ་རྒྱས་བསྡུས་མཚལ་སེར་ཕྱེ་རྒྱུ་ཡོད་པ་ལས།་མི་བསྐྱོད་ཞབས་ཀྱིས་བསྡུས་པའི་དེ་ཟུར་དུ་བཀོད་ནས་དགེ་བའི་བཤེས་གཉེན་བྱམས་པ་གླིང་པས་མཛད་པའི་མན་ངག་གིས་ཁ་རྒྱན་པར་མཛད་ནས། ཕྱིས་སྐུ་གཤེགས་ཁ་རྗེ་མི་བསྐྱོད་རྡོ་རྗེའི་ཞལ་ནས། རྗེ་ཆོས་གྲགས་རྒྱ་མཚོས་མཛད་པའི་ཀུན་རིག་གི་ཆོ་ག་འདི་ལ་རྒྱས་འབྲིང་བསྡུས་གསུམ་བྱེད་རྒྱུ་འདུག་པའི་བསྡུས་པ་དེ་ཟུར་དུ་བཀོལ་བའི་ཆོ་ག་བསྒྲིགས་པ་ངེད་རང་གིས་བརྩམས་པ་སྔ་མ་འདིའི་མཛད་བྱང་སྤོས་པ་ཞིག་མཛད་གསུངས་པའི་བཀའ་ཡོད་པ་བཞིན་དུ། ཀུན་རིག་ཆོ་ག་རྣམ་གྲོལ་སྒོ་ཆེན་མི་བསྐྱོད་ཞབས་ཀྱིས་བརྩམས་པའི་ཆོག་བསྒྲིགས་དེ་དཀོན་མཆོག་ཡན་ལག་གིས་མཛད་ནས་པར་དུ་བསྒྲུབས། དེས་ན་རྣམ་གྲོལ་སྒོ་ཆེན་འདི་ཡབ་སྲས་གཉིས་ཀའི་
དགོངས་པ་གཅིག་ཏུ་གཏད་ནས་བརྩམས་པ་ཡིན་པས་བྱིན་རླབས་ཆེའོ། །འདི་ཡོ་ག་སྟོད་ལུགས་སྨད་ལུགས་གཉིས་ཀ་དང་མི་འགལ་ཞིང་། དངོས་བསྟན་ནི་ཡོ་ག་སྟོད་ལུགས་གཙོ་ཆེ་སྟེ་རྣམ་སྣང་སྐུ་གཅིག་ཞལ་བཞི་ཡིན་པའི་ཕྱིར་རོ། །ཀུན་སྙིང་གིས་མཛད་པའི་སྒྲུབ་ཐབས་སྤྱི་ཏིས་བསྒྱུར་བའི་རྒྱ་གཞུང་ཚད་ལྡན་ཡིན་མིན་ཐེ་ཚོམ་ཟེར་མཁན་འགའ་རེ་བྱུང་ཡང་། ཀུན་སྙིང་གི་རོ་སྲེག་ཆོ་ག་དང་རྒྱས་འདེབས་སོགས་ཕལ་ཆེར་ཚིགས་བཅད་གཅིག་པར་སྣང་ཞིང་། ཀུན་སྙིང་དང་སངས་རྒྱས་གསང་བ་དང་ཨ་ནན་ས་ར་ཧ་སོགས་ཀྱིས་མཛད་པའི་གཙུག་དགུའི་ཆོ་ག་ལ་སོགས་དང་ཡང་ཚིགས་བཅད་མཐུན་པའི་ཕྱིར་རྒྱ་གཞུང་རྣམས་གསུངས་སོ། །བརྒྱུད་པ་ནི་ཨ་ཏི་ཤ་ནས་བརྒྱུད་པ་དང་། ལོ་ཆེན་རིན་ཆེན་བཟང་པོ་ནས་བརྒྱུད་པ་དང་། ཁ་ཆེ་པཎ་ཆེན་ནས་བརྒྱུད་པ་དང་། ཆགས་ལོ་ཙཱ་བ་ཆོས་རྗེ་དཔལ་ནས་བརྒྱུད་པ་རྣམས་ལས། དང་པོ་ནི་རྫོགས་སངས་རྒྱས་རྣམ་པར་སྣང་མཛད། ཕྱག་ན་རྡོ་རྗེ། རྒྱལ་པོ་རབ་གསལ་ཟླ་བ། རབ་འབྱོར་སྐྱོང་། ཀུན་དགའ་སྙིང་པོ། ཤེས་རབ་སྙིང་པོ། གོ་མའི་དགེ་བསྙེན། ཤཱཀྱ་ཡེ་ཤེས། ཇོ་བོ་རྗེ། གོ་མི་བྷོ་
ཆེན། སྐྱི་ནོར་ཛྷཱ་ན། གཉལ་པ་ཉི་མ་འབུམ། སྣུར་ཉི་མ་འོད་ཟེར། རྩ་སྐྱ་པ་སྟོན་གྲགས། ཤཱཀྱ་འབུམ། འཇམ་པ་རིན་ཤེ། ལོ་མཆོག་དཔལ་ལྡན་སེང་གེ །བུ་སྟོན་ལག་ན་སྣང་མཛད། ཕྱག་རྡོར། རབ་གསལ་ཟླ་བ། སྒྲ་གཅན་འཛིན། ཀུན་སྙིང་། པྲཛྙཱ་པ་མི་ཏི། མུ་སྟེགས་ཀོ་ཥ། དྷརྨ་པ་ལ། ཇོ་བོ་རྗེ། དེ་པ་བྷཻ་ཆེན། སྐྱི་ནོར་ཛྷཱ་ན། གཉལ་པ་ཉི་ཤེ། སྣུར་ཉི་མ། གཤིན་རྡོར་སེང་གེ །གླན་ཆོས་འབྱུང་པ། སུམ་སྟོན་ཤཱཀྱ་འབུམ། འཇམ་པ་རིན་ཤེ། ཡང་རྩེ་བ་རིན་སེང་། ཀུན་མཁྱེན་བུའོ། །དེ་གཉིས་ཇོ་བོ་ནས་བརྒྱུད་པ་ཡིན་ལ། ལོ་ཆེན་རིན་ཆེན་བཟང་པོ་ནས་བརྒྱུད་པ་ནི། ཀུན་སྙིང་ཡན་གོང་ལྟར་ལས། དེ་བཞིན་གཤེགས་པའི་རྡོ་རྗེ། ཤདྷ་ཀ་ར་ཝརྨ། ལོ་ཆེན་རིན་ཆེན་བཟང་པོ། ལོ་ཆུང་ལེགས་པའི་ཤེས་རབ། གྲགས་པ་འབྱོར་ཤེས། བུམ་སྟོན་མེ་འབར། གཉེན་ཚུལ་འབར། ཐོད་པ་དབེན་ཚ་གྲགས། རི་ལུང་ཁུག་པ་ཆོས་མགོན། བླ་མ་བློ་ལྡན་སེང་གེ །ཀུན་ཆེན་འཕགས་འོད། བུ་སྟོན་རིན་པོ་ཆེ། ཁ་ཆེ་པཎ་ཆེན་ནས་བརྒྱུད་པའི། བྱང་ཆུབ་སེམས་
དཔའ་སྤྱན་རས་གཟིགས། སློབ་དཔོན་དཔའ་མཛད་མཚོ། རིན་འབྱུང་ཁིད་བ། བྷ་ཀ་ར་ཚད་ཚད། རྡོ་རྗེ་གདན་པ། ཝིཀཱ་ར་དྷེ་ཝ། ཁ་ཆེ་པཎ་ཆེན་ཤཱཀྱ་ཤྲཱི། བི་བྷུ་དྷེ་ཙཎྜ། གཡག་སྡེ་ལོ་ཙཱ་བ། ལོ་ཙཱ་བ་མཆོག་ལྡན། རོང་པ་དཔལ་ལྡན་སེང་གེ །ཀུན་མཁྱེན་བུ་སྟོན། ཆགས་ལོ་ཙཱ་ནས་བརྒྱུད་པ་ནི། བཅོམ་ལྡན་འདས་རྣམ་པར་སྣང་མཛད། སློབ་དཔོན་ཛི་ཏ་རི། སློབ་དཔོན་ཀུན་དགའ་སྙིང་པོ། རབ་འབྱོར་སྐྱོང་། ནཱ་ཡཱ་ཀཾ། མེ་ཏྲི་པ། རྡོ་རྗེ་གདན་པ། ནི་པ་ལོ། ཀ་ལམ་ག་དེ་ན། རེ་ཝཎྜ། ཚགས་ཆོས་རྗེ་དཔལ། གཡག་སྡེ་ལོ་ཙཱ་བ། ལོ་ཙཱ་བ་མཆོག་སྟོན། དཔལ་ལྡན་སེང་གེ །བུ་སྟོན་རིན་ཆེན་གྲུབ། དེ་ལྟར་བུ་སྟོན་རིན་པོ་ཆེ་ལ་བརྒྱུད་པ་ལྔ་འདུས་པ་ལས། དེ་ནས་ཐུགས་སྲས་ལོ་ཙཱ་བ་རིན་ཆེན་རྣམ་རྒྱལ། ཞ་ལུ་ལོ་ཙཱ་བ་སྟེ་སློབ་དཔོན་ཙཎཱ་པ་ཞེས་ཀྱང་བྱའོ། །དེས་ཀརྨ་པ་མཐོང་བ་དོན་ལྡན། འཇམ་དཔལ་བཟང་པོ། ཆོས་གྲགས་རྒྱ་མཚོ། སངས་རྒྱས་མཉན་པ་རས་ཆེན། མི་བསྐྱོད་རྡོ་རྗེ། དཀོན་མཆོག་ཡན་ལག །རྒྱལ་ཚབ་གྲགས་པ་དོན་གྲུབ། སི་ཏུ་ཆོས་ཀྱི་རྒྱལ་མཚན། ངག་
དབང་འཇིགས་མེད་གྲགས་པ། དེས་ཨ་རཱ་ག་ལའོ། །ཡང་ཆོས་གྲགས་རྒྱ་མཚོ་ནས། སི་ཏུ་བཀྲ་ཤིས་དཔལ་འབྱོར། རྗེ་ཀརྨ་ཕྲིན་ལས་པ། མི་བསྐྱོད་རྡོ་རྗེ༔ དཀོན་མཆོག་ཡན་ལག །དབང་ཕྱུག་རྡོ་རྗེ། ཆོས་ཀྱི་དབང་ཕྱུག །བླ་མ་ཝོལ་ཝ་པ། དེས་བདག་ཨ་རཱ་ག་ལའོ། །ཡང་ཀརྨ་ཕྲིན་ལས། གཙུག་ལག་ཕྲེང་བ། དཀོན་མཆོག་འབངས། རྗེ་དབང་ཕྱུག་རྡོ་རྗེ། གར་དབང་ཆོས་ཀྱི་དབང་ཕྱུག །བླ་མ་ཝ་རྒན། དེས་བདག་ཨ་རཱ་ག་ལའོ། །ཡང་སི་ཏུ་ཆོས་ཀྱི་རྒྱལ་མཚན། རྩ་བའི་བླ་མ་ལའོ། །ཆོ་གའི་ལུང་རྒྱུན་ནི་གོང་ལྟར་ལས། དབང་ཕྱུག་རྡོ་རྗེ། ཟུར་རི་དྲུང་པ་བདེ་མཆོག །རྩ་བའི་བླ་མའོ། །ཨེ་མ་གཟི་བརྗིད་རྒྱལ་པོ་བརྟག་པའི་དོན། །རྒྱ་གཞུང་བོད་གཞུང་མང་པོ་ཀུན་གྱི་བཅུད། །མཁས་གྲུབ་བླ་མ་རྣམས་ཀྱི་ཕྱག་ལེན་རྒྱུན། །གཅིག་ཏུ་བསྡེབས་པ་རྣམ་གྲོལ་སྒོ་ཆེན་ལ། །ཉེ་བར་མཁོ་བའི་སྤྱི་དོན་བསྡུས་པ་འདི། མཁས་མཆོག་རྣམས་ལ་དགྱེས་པ་བསྐྱེད་མ་ནུས། །འོན་ཀྱང་ཁུང་བུ་ཆུང་ངུར་འཇུག་པའི་ཚེ། །བྱ་རྒྱལ་ཁྱུང་ལས་བྱེ་མ་ལེབ་ཉིད་མཆོག །དེ་བཞིན་བདག་འདྲ་རྨོངས་པའི་གང་
ཟག་ལ། །འགྲེལ་ཆེན་མཐོང་བ་གླེགས་བམ་མཐོང་ནས་སྐྱག །གོ་བ་མི་ཐོབ་ཚར་གཅིག་ཀློག་མི་ནུས། །འོན་ཀྱང་རྒྱུད་དོན་ལོ་རྒྱུས་ཤེས་ནི་འདོད། །དེ་ཕྱིར་སྦྱོང་རྒྱུད་གསུང་ཚུལ་ངོས་འཛིན་པ། །རྒྱ་དང་བོད་དུ་ཇི་ལྟར་བརྒྱུད་པའི་ཚུལ། །རྒྱ་གཞུང་བོད་གཞུང་ཆོ་གའི་བརྩམ་ལུགས་དང་། །ཡོ་ག་སྟོད་ལུགས་སྨད་ལུགས་ངོས་འཛིན་དང་། །དབང་ལུང་བརྒྱུད་རིམ་རབ་ཏུ་གསལ་བ་འདི། །བདག་འདྲའི་རྨོངས་པ་གཞན་ལའང་ཕན་སྲིད་སྙམ། །ཚིག་ཉུང་དོན་འདུས་གོ་བདེའི་ཚིག་གིས་བྲིས། །འདི་ལ་འགལ་འཁྲུལ་ནོངས་པ་ཅི་མཆིས་པ། །མ་གྱུར་འགྲོ་བའི་སྡིག་དང་ལྷན་ཅིག་བཤགས། །དགེ་འབྲས་མཆིས་ན་མ་གྱུར་སེམས་ཅན་རྣམས། །བདེ་ཆེན་དག་པའི་ཞིང་དུ་སྐྱེ་ཕྱིར་བསྔོ། །དེ་སྐད་སྨྲ་བ་རྭ་གའི་མིང་ཅན་ནོ། །བཀྲ་ཤིས་པར་ཤོག། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།