སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་མགྱོགས་དབང་གི་ཆོ་ག་གཞན་ཕན་རྒྱ་མཚོ།
སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་མགྱོགས་དབང་གི་ཆོ་ག་གཞན་ཕན་རྒྱ་མཚོ་ཞེས་བྱ་བ་བཞུགས་སོ།། ཤུ་བྷཾ།།
ན་མོ་གུ་རུ་སརྦ་བིད་ཡེ། ཐམས་ཅད་ཀུན་མཁྱེན་དཔལ་ལྡན་བླ་མ་དང་། །དཀྱིལ་འཁོར་བཅུ་གཉིས་ལྷ་ལ་ཕྱག་འཚལ་ནས། །དེ་ཡི་མགྱོགས་དབང་བསྐུར་ཐབས་སྟབས་བདེར་བརྗོད། །བཀའ་ཡི་གནང་བ་སྩོལ་ལ་བྱིན་གྱིས་རློབས། །རས་བྲིས་འགྲིམ་དཀྱིལ་ཚོམ་བུ་གང་འབྱོར་ཀུན་རིག་ལྟར་བཤམས། སྔོན་འགྲོ་བྱེད་ན་ཀུན་རིག་ལྟར་རམ། མ་བྱས་པར་ཆོག་པ་རྫོགས་ཕྲེང་གསུངས། མཆོད་པ་བྱིན་བརླབ་ནི། ཨོཾ་བཛྲ་ཡཀྵ་ཧཱུཾ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ཨོཾ་སྭ་བྷཱ་ཝ་ཤུདྡྷསརྦ་དྷར༔སྭ་བྷཱ་ཤུདྡྷོཉཧཾ། གིས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་
ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཡིག་དཔག་ཏུ་མེད་པ་ལས་བྱུང་བའི་རྡོ་རྗེའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས་རོལ་མོ་ལ་སོགས་པའི་མཆོད་རྫས་དངས་ཤིང་ཐོགས་པ་མེད་པ་འཕགས་པ་ཀུན་ཏུ་བཟང་པོའི་རྣམ་ཐར་ལས་བྱུང་བའི་མཆོད་པའི་སྤྲིན་ལས་ཀྱང་ཆེས་ཆེར་ལྷག་པ་རབ་འབྱམས་ནམ་མཁའི་མཐའ་ཀླས་པ་རྒྱས་པར་འགེངས་ཤིང་འཁོར་བ་ཇི་སྲིད་མ་སྟོང་གི་བར་དུ་རྒྱུན་མི་འཆད་པར་འབྱུང་བས་འཕགས་པ་རྣམས་མཉེས་པར་བྱེད་པའི་རང་བཞིན་ཅན་དུ་གྱུར། ཐལ་མོ་ཁོང་སྟོང་སྦྱར་བ་ནམ་མཁའ་མཛོད་
ཀྱི་རྒྱས། ཨོཾ་སརྦ་བིད་པཱུ་ར་པཱུ་ར་སཱུ་ར་སཱུ་ར་ཨཱཿ་ཝརྟ་ཨཱཿ་ཝརྟ་ཡ་ཧོཿ ཨོཾ་བཛྲ་སྤ་ར་ཎ་ཁཾ། ཨོཾ་སརྦ་བིད་ཨརྒྷཾ་ཨཱཿ༔ཧཱུཾ། པཱདྱཾ། པུཥྤེ། དྷུ་པེ། ཨཱཿ་ལོ་ཀེ། གྷནྡྷེ། ནཻ་ཝི་དྱ། ཤབྡ་ཨཱཿ༔ཧཱུྃ། སྐྱབས་སེམས་ནི། བདག་དང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོར་གྱུར་པ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པར་བྱ་བའི་ཆེད་དུ་བཅོམ་ལྡན་འདས་ཀུན་རིག་གི་ཆོ་ག་ཉམས་སུ་བླང་བར་བྱའོ། །རང་ཉིད་སྐད་ཅིག་གིས་བཅོམ་ལྡན་འདས་སྨྲེ་མོ་གསལ་བའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་
ས་བོན་རང་མདོག་ལས་འོད་ཟེར་འཕྲོས། རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་བཅོམ་ལྡན་འདས་ཎེའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁའི་གནས་སུ་ཨོཾ་བཛྲ་ས་མཱ་ཛཿ ན་མོ་གུ་རུ་བྷུན་མསརྦ་ཏ་ཐཱ་ག་ཏ་མཎྜལ་ས་པཱ་རི་ཝཱ་ར་བྷྱོཿ ཨོཾ་སརྦ་ཏ་ཐཱ་ག་ཏ་མཎྜལ་ས་པཱ་རི་ཝཱ་ར་ཨབྷཾ་སོགས། དབང་མེད་བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་ན་བགྱིད་རྩལ་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟ་མ་ལུས་སོ་སོར་བཤགས། །བདེ་གཤེགས་སྲས་ཀྱི་ཚོགས་གཉིས་ཟབ་པ་དང་། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་ལ་ཡང་། །རྟག་ཏུ་བདག་ནི་རྗེས་སུ་ཡི་རང་ངོ་། །ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིང་། །བློས་གྲོས་སྡིག་བྲལ་གཏི་མུག་ཚོགས་ཀུན་བཅོམ། །མ་ལུས་རིགས་ཀྱི་པདྨའི་ནང་བཞུགས་པའི། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པས་འཇིགས་པ་རྣམས་ཀྱི་རྒྱལ་བྱེད་ཚལ། །
སྲིད་པའི་འབྱོར་པ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་ལ་སོགས་སྦྲུལ་གྱིས་དུག་བཅོམ་ཞིང་། །བློ་གྲོས་རྣམ་དག་།ཐུགས་རྗེ་ལྡན་པ་ཡི། །བརྟུལ་ཞུགས་དབང་པོའི་ཚོགས་ལ་སྐྱབས་མཆི་ཞིང་། །སྲིད་དང་བྲལ་བ་རྣམས་ལའང་བདག་ཕྱག་འཚལ། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་གྱུར་པའི། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་ཉིད་བྱང་ཆུབ་སེམས་ནི་བསྐྱེད་པར་བགྱི། །སེམས་ཅན་རྣམས་ནི་ཡོངས་སུ་སྨིན་པའམ། །ཡང་ན་ཡོངས་སུ་བསྐྱབ་པར་བྱ་ཕྱིར་རམ། །རང་གི་སེམས་ནི་དག་པར་བྱ་བའི་ཕྱིར། །འདི་དག་ཐམས་ཅད་རྩ་སོགས་བཞིན་དུ་བཏང་། །དེ་བཞིན་ཚུལ་ཁྲིམས་བཟོད་པ་བརྩོན་འགྲུས་དང་། །བསམ་གཏན་ཤེས་རབ་བླ་ན་མེད་པ་ནི། །བདག་དང་གཞན་རྣམས་དག་པར་བྱ་བའི་ཕྱིར། །སྐད་ཅིག་རེ་རེར་ཞིང་ཡང་བསྒོམ་པར་བགྱི། །བདེ་བར་གཤེགས་པ་སྔགས་ལ་མཁས་པ་ཡི། །ཆོས་རྒྱལ་རྟག་ཏུ་ལྷུན་གྱིས་གྲུབ་པ་ནི། །འགྲོ་བ་འདི་ཡིས་ཐོབ་པར་བྱ་བའི་ཕྱིར། །ཁྱད་འཕགས་གནས་
ལ་བདག་ནི་གནས་པར་བགྱི། །བཛྲ་མུཿ ཚོགས་ཞིང་རང་བཞིན་གྱི་གནས་སུ་གཤེགས། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་ཡུན་རིང་དུ་གནས་པར་གྱུར་ཅིག །ཨོཾ་ཤུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོཉཧཾ། སྟོང་པའི་ངང་ལས་འོག་ཏུ་སྲ་ཞིང་མཁྲེགས་ལ་དུམ་བུ་གཅིག་ཏུ་གྱུར་པའི་རྡོ་རྗེའི་ས་གཞི་དང་། དེའི་འོག་ཏུ་རྡོ་རྗེའི་རྭ་བ་དང་། སྟེང་དུ་རྡོ་རྗེའི་མདའི་དྲྭ་བ་དང་། དེའི་འོག་ཏུ་རྡོ་རྗེའི་བླ་བྲེ་དང་། ཕྱི་རོལ་ཐམས་ཅད་དུ་ཡེ་ཤེས་ཀྱི་མེ་རབ་ཏུ་འབར་བ་དང་བཅས་པའི་རྡོ་རྗེའི་གུར་ཡངས་ཤིང་རྒྱ་ཆེ་བའི་ནང་དུ་། ཀུན་རིག་གི་ཕྱི་ཆ་ལ། ཨ་ཀཱ་རོ་མུ་བརྗོད། ཆོས་ཐམས་ཅད་སྟོང་པ་ཉིད་དུ་གྱུར། སྟོང་པའི་ངང་ལས་ཡཾ་རཾ་བཾ་ལཾ་སུཾ་ལས་རླུང་མེ་ཆུ་ས་རི་རབ་རྣམས་རིམ་བརྩེགས་ཀྱི་སྟེང་དུ། རྡོར་བསྡམས་བརྐྱངས་བ་ཁ་སྦུབ་པ་བཞག །ཨོཾ་བཛྲ་དྲིནྟོ་མེ་བྷ་ཝ་བྷནྡཱ་རཀྟ་སརཾ་སྭཱ་ཧཱ། སྣ་ཚོགས་རྡོ་རྗེ་རྩེ་མོ་བཅུ་གཉིས་པའི་
ལྟེ་བར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཀྱི་ཁང་པ་ཕྱི་ནང་གཉིས་ནི་གྲུ་བཞི་སྒོ་བཞི། དཀར་སྔོ་དམར་ལྗང་སེར་བས་རྩིག་པ་རིམ་པ་ལྔ་ལྔ་དང་ལྡན་པའི་སྟེང་དུ་རིན་པོ་ཆེའི་ཕ་གུ་སེར་པོ། དེའི་སྟེང་དུ་རིན་པོ་ཆེའི་བྲེ་ཕུལ་གྱིས་བཏེག་པའི་རིན་པོ་ཆེའི་དྲྭ་བ་དྲྭ་ཕྱེད་འཕྱངས་བ་ལ་ཤར་བུ་དང་མདའ་ཡབ་ཀྱིས་མཛེས་པ། སྒོ་བཞི་སོ་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཅུ་གཅིག་བཅུ་གཅིག་དང་ལྡན་པའི་སྟེང་དུ་པདྨ་ལ་གནས་པའི་ཆོས་འཁོར་དང་གདུགས་དང་གཡས་གཡོན་དུ་རི་དྭགས་ཕོ་མོ། རྟ་བབས་ཀྱི་སྣམ་བུ་སོ་སོ་དང་། གཞལ་ཡས་ཁང་གི་ལོགས་དང་ཟུར་རྣམས་སུ་གདུགས་དང་རྒྱལ་མཚན་དང་འཕན་དང་གོས་དང་མེ་ཏོག་གི་ཕྲེང་བ་དང་། ཟླ་བ་རླུང་གིས་བསྐྱོད་པ་དང་རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་བརྒྱན་ཅིང་འཇིག་རྟེན་པའི་འཁོར་ཡུག་དང་། རྡོ་རྭ་འོད་ཟེར་གྱི་ཕྲེང་བ་དང་བཅས་པས་བསྐོར་བའི་རྩ་བའི་དཀྱིལ་འཁོར་གྱི་ལྟེ་བ་ལེའུ་ཚེ་དགུ་པའི་ཕྱོགས་བཞི་ནས་རྡོ་རྗེ་རིན་པོ་ཆེ་པདྨ་སྣ་ཚོགས་རྡོ་རྗེས་མཚན་པའི་ཀ་བ་བརྒྱད་ཀྱིས་བཏེག་པའི་རྡོ་རྗེའི་གདུང་ཟླུམ། དེའི་སྟེང་དུ་གདུང་བཞི་མིག་མང་རིས་སུ་བྲིས་
པས་མཛེས་པར་ཕུབ་པའི་དབུས་ཕྱུར་བུར་གྱུར་པའི་རྩེ་མོར་ནོར་བུ་ཏོག་གིས་སྤྲས་པ། ཕྱི་ནང་གཉིས་ཀའི་སྟེང་འོག་ཐམས་ཅད་ཤར་སྔོ། ལྷོ་སེར། ནུབ་ཡིདམར། བྱང་ལྗང་། དབུས་དཀར་བའི་དབུས་སུ་ཆོས་ཀྱི་འཁོར་ལོ་སྔོན་པོ་རྩིབས་བཅུ་དྲུག་པའི་ལྟེ་བ་རེའུ་མིག་དགུ་པའི་དབུས་སུ་སོ་ལས་སེང་གེ །ཤར་དུ་གོ་ལས་གླང་ཆེན། །ལྷོར་པཾ་ལས་རྟ་མཆོག །ནུབ་ཏུ་མཾ་ལས་རྨ་བྱ། བྱང་དུ་ཨོཾ་ལས་མཁའ་ལྡིང་གི་ཁྲི། ལྷ་ཐམས་ཅད་ཀྱི་གནས་སུ་ཧཱུྃལས་སྣ་ཚོགས་པདྨ་ཨ་ལས་ཟླ་བའི་དཀྱིལ་འཁོར་གདན་དབུས་མའི་སྟེང་དུ་ཨཱཿ་ལི་གཡོན་བསྐོར་ཞུ་བ་ལས་ཤེས་རབ་ཀྱི་ཟླ་བའི་སྟེང་དུ་ཀཱ་ལི་གཡས་བསྐོར་ཞུ་བ་ལས་ཐབས་ཀྱི་ཟླ་བ་དེ་གཉིས་ཀྱང་འོད་དུ་ཞུ་བ་ལས། ཨོཾ་ཤོ་དྷ་ནེ་སོགས། ཡིག་འབྲུ་དེ་རྣམས་ལས་འོད་ཟེར་འཕྲོས།། མཛད་པ་བཅུ་གཉིས་ཀྱི་སྒོ་ནས་འགྲོ་དོན་མཛད། འོད་ཟེར་ཚུར་འདུས་ཡིག་འབྲུ་ལ་ཐིམ་ཡོངས་སུ་གྱུར་པ་ལས་དང་པོའི་རྡོ་རྗེ་རྩེ་ལྔ་པ་དེ་ལས་རང་ཉིད་བཅོམ་ལྡན་འདས་ཀུན་རིག་དུང་དང་ཀུན་དའི་ཟླ་བའི་མདོག་ཅན་ཞལ་བཞི་དཀར་བ་ཞི་བས་གཟིགས་པ། ཕྱག་གཉིས་ཏིང་ངེ་འཛིན་གྱི་ཕྱག་རྒྱས་རྡོ་རྗེ་དཀར་པོ་རྩེ་ལྔ་
པ་བསྣམས་ཤིང་དར་ལའི་སྟོད་གཡོགས་དང་སྨད་གཡོགས་ཅན། རིན་པོ་ཆེའི་བརྒྱན་དང་མཚན་དང་དཔེ་བྱད་ཀྱིས་སྤྲས་པ་འཁོར་ལོས་སྒྱུར་བའི་ཆ་བྱད་ཅན། རྡོ་རྗེ་སྐྱིལ་ཀྲུང་གིས་བཞུགས་པ་ཉི་མའི་རྒྱབ་ཡོལ་མངའ་བར་གྱུར། དེའི་ཐུགས་ཀར་ཟླ་བའི་གདན་ལ་རྩ་རིག་གི་དབུས་སུ་ཧཱུྃ་ཧཱུྃ་ཧཱུྃཨཱཿཋརྣམས་ལས་འོད་འཕྲོས། འགྲོ་དོན་བྱས་འདུས་པ་ལས་སྦྱོང་བའི་རྒྱལ་པོ་དཀར་དམར་ས་གནོན་མཉམ་བཞག་མཛད་པ། རྒྱལ་མཆོག་རིན་ཆེན་སྔོན་པོ་མཆོག་སྦྱིན་མཉམ་བཞག་མཛད་པ། ཤཱཀྱ་རིགས་དབང་དམར་སེར་མཉམ་བཞག་མཛད་པ། མེ་ཏོག་ཆེར་རྒྱས་ལྗང་གུ་སྐྱབས་སྦྱིན་མཉམ་བཞག་མཛད་པ་སྟེ་དེ་བཞིན་གཤེགས་པ་བཞི་ཞི་བའི་གཟིགས་སྟངས་ཅན་དར་དང་རིན་པོ་ཆེའི་བརྒྱན་པ། ཨོཾ་ཤོ་དྷ་ནི་ཤོ་དྷ་ཡ་སརྦ་ཨ་པཱ་ཡ་ཧཱུྃ། དེ་བཞིན་དུ། ཧཱུྃ་ཧྲཱིཿཝཨཱཿ༔ ཐུགས་ཀ་ནས་ཕྱུང་ཤར་ལ་སོགས་པའི་ཕྱོགས་བཞིར་ཉི་མའི་རྒྱབ་ཡོལ་ལ་བརྟེན་ནས་རྡོ་རྗེའི་སྐྱིལ་ཀྲུང་གིས་འཁོད། ཐུགས་ཀའི་ཧཱུཾ་ཧཱུཾ་jཨཱཿརྣམས་ལས་འོད་འཕྲོས།་འདུས་པ་ལས་སྤྱན་མ་དཀར་མོ། མཱ་མ་ཀཱི་སྔོན་མོ། གོས་དཀར་མོ་དམར་མོ། སྒྲོམ་མ་ལྗང་གུ་སྟེ་ཡུམ་བཞི་གཡས་འཁོར་ལོ་རྡོ་རྗེ་པདྨ་ཨུཏྤལ་
ཐུགས་ཀར་འཛིན་ཅིང་གཡོན་གདན་ལ་བརྟེན་པ། སྒེག་ཅིང་ཆགས་པའི་ཉམས་ཅན་ནུ་འབུར་ཟུང་གིས་མཛེས་པ། ཨོཾ་ཤོ་དྷ་ནེ་ཧཱུྃ། དེ་བཞིན་དུ། ཏྲཱཾ་ཧྲཱི༔ཨཱཿ༔རྣམས་ཐུགས་ཀ་ནས་ཕྱུང་། མེ་ལ་སོགས་པའི་མཚམས་བཞིར་སེམས་དཔའི་སྐྱིལ་ཀྲུང་གིས་འཁོད། ཐུགས་ཀའི་ཧཱུྃ་ཛཧོ་དྷུ་ཏྲ་ཏྱཾ་ཧཱུཾ་ཧཱཧཱིདྷིཧཱུྃ་བྷ་ཀཾ་རོ་ཀྵ་སཾ་རྣམས་ལས་འོད་འཕྲོས། །འདུས་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་ཐུགས་ཀར་འཛིན་ཅིང་དྲིལ་བུ་དཀུར་བརྟེན་པ། རྡོ་རྗེ་རྒྱལ་པོ་སེར་པོ་ལྕགས་ཀྱུ་འཛིན་པ། རྡོ་རྗེ་ཆགས་པ་དམར་པོ་མདའ་གཞུ་འགེང་པ། རྡོ་རྗེ་ལེགས་པ་ལྗང་གུ་ཐུགས་ཀར་སེ་གོལ་གཏོགས་པ། རྡོ་རྗེ་རིན་ཆེན་སེར་པོ་གཡས་རིན་པོ་ཆེ་དཔྲལ་བར་འཛིན་ཅིང་གཡོན་དྲིལ་བུ་དཀུར་བརྟེན་པ། རྡོ་རྗེ་གཟི་བརྗིད་ཉི་མའི་མདོག་ཅན་གཡས་ཉི་མ་ཐུགས་ཀར་འཛིན་པ། རྡོ་རྗེ་རྒྱལ་མཚན་སྔོན་པོ་གཡས་རྒྱལ་མཚན་ཕྲག་པར་འཕྱར་བ། རྡོ་རྗེ་བཞད་པ་དཀར་པོ་གཡས་སོ་ཡི་ཕྲེང་བ་ཁ་འགྲམ་གཡས་སུ་འཛིན་ཅིང་དེ་གསུམ་གྱི་ཕྱག་གཡོན་གདན་ལ་བརྟེན་པ། །རྡོ་རྗེ་ཆོས་དཀར་དམར་གཡོན་པདྨ་དཀུར་འཛིན་ཅིང་གཡས་དེའི་ཁ་འབྱེད་པ། རྡོ་རྗེ་རྣོན་པོ་སྔོ་བསངས་
གཡས་རལ་གྲི་ཕྱར་ཞིང་གཡོན་པོ་ཏི་ཐུགས་ཀར་འཛིན་པ། རྡོ་རྗེ་རྒྱུ་གསེར་མདོག་གཡས་ཀྱི་གུང་མོའི་རྩེར་འཁོར་ལོ་འཛིན་པ། རྡོ་རྗེ་སྨྲ་བ་ཟངས་ཀྱི་མདོག་ཅན་གཡས་རྡོ་རྗེའི་མཚན་པའི་ལྕེ་འཛིན་ཅིང་དེ་གཉིས་ཀྱི་ཕྱག་གཡོན་གདན་ལ་བརྟེན་པ། རྡོ་རྗེ་ལས་སྣ་ཚོགས་མདོག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། རྡོ་རྗེ་བསྲུང་བ་སེར་པོ་གོ་ཆ་བཀོན་པའི་ཚུལ་དུ་འཛིན་པ། རྡོ་རྗེ་གནོད་སྦྱིན་ནག་པོ་ལྟོ་བ་ཡངས་ཤིང་ཕྱག་གཉིས་ཀྱི་མཆེ་བ་ཞལ་གྱི་གྲྭ་གཉིས་སུ་འཛིན་པ། རྡོ་རྗེ་ཁུ་ཚུར་སེར་པོ་ཁུ་ཚུར་གཉིས་ཀྱིས་དཀུ་གཡོན་དུ་རྡོ་རྗེ་འཚེར་བ་སྟེ་སེམས་དཔའ་བཅུ་དྲུག །ཨོཾ་སརྦ་བིད་བཛྲ་སཏྭ་ཧཱུྃ། དེ་བཞིན་དུ། ཛཧོ་དྷ་ཏྲ་རྱ་བྷོ་ཧཱ་ཧྲཱིཿདྷིཀྲུ་བྷཱ་ཀཾ་རཾ་ཀྵ་སཾ། ཐུགས་ཀ་ནས་ཕྱུང་འཁོར་ལོའི་རྩིབས་བཅུ་དྲུག་ལ་ཤར་ནས་གཡས་བསྐོར་དུ་སེམས་དཔའི་སྐྱིལ་ཀྲུང་གིས་འཁོད། ཐུགས་ཀའི་ཧཱུྃ་ཏྲཱཾ་ཧྲཱི༔ཨཱཿ༔ཧཱུྃ་ཏྲཱཾ་ཧྲཱི༔ཨཱཿ༔ཛཧཱུྃ་བཾ་ཧོརྣམས་ལས་འོད་འཕྲོས། འདུས་པ་ལས་སྒེག་མོ་དཀར་པོ་རྡོ་རྗེ་གཉིས་དཀུར་འཛིན་པ། ཕྲེང་བ་མ་སེར་མོ་ཕྲེང་བ་འཛིན་པ། ཀླུ་མ་དཀར་དམར་པི་ཝཾ་འཛིན་པ། གར་མ་སྣ་ཚོགས་མདོག་གར་མཛད་པ། བདུག་
སྤོས་མ་དཀར་མོ་སྤོས་སྣོད་འཛིན་པ། མེ་ཏོག་མ་སེར་མོ་གཡོན་མེ་ཏོག་གི་སྣོད་འཛིན་ཅིང་གཡས་ཀྱིས་འཐོར་བ། མར་མེ་མ་དམར་སྐྱ་མར་མེ་འཛིན་པ། བྱུག་པ་མ་སྣ་ཚོགས་མདོག་གཡོན་དྲིའི་སྣོད་འཛིན་ཅིང་གཡས་ཀྱིས་མཆོད་པ། རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ་སྟེ་སྒེག་སོགས་བརྒྱད་དང་སྒོ་བ་བཞི། ཨོཾ་བཛྲ་ལཱ་སྱེ་ཧཱུྃ༔ དེ་བཞིན་དུ། མཱ་ལེ་ཧཱུཾ། ཧཱིརྟི་ཧི༔ ནཱིརྟི་ཨཱཿ དྷུ་པེ་ཧཱུཾ། པུཔྤེ་ཧཱུྃ། ཨ་ལོ་ཀེ་ཧི༔ གནྡྷེ་ཨཱཿ༔ ཨཾ་ཀུ་ཤ་ཛཿ པཱ་ཤ་ཧཱུྃ། སྤྲོ་ཊ་ཐཾ། ཨ་ཝེ་ཤ་ཡ་ཧོཿ ཐུགས་ཀ་ནས་ཕྱུང་འཁོར་ལོའི་ཕྱི་ཡི་གྲྭ་ཕྱི་ནང་དང་སྒོ་བཞི་མེ་དང་ཤོར་ནས་གཡས་བསྐོར་དུ་སེམས་དཔའི་སྐྱིལ་ཀྲུང་གིས་འཁོད། ཐུགས་ཀའི་ཨོཾ་སརྦ་སཾ་སྐ་རི་པ་རི་ཤུདྡྷ་དྷརྨ་ཏེ་ག་ག་ན་ས་མུཏྤ་ཏེ་སྭ་བྷ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ། སྔགས་ཕྲེང་དེ་ལས་འོད་འཕྲོས་འདུས་པ་ལས་བྱམས་པ། འཇམ་དཔལ། སྤོས་ཀྱི་གླང་པོ། ཡེ་ཤེས་ཏོག་བཞི་སྔོན་པོ་རྡོ་
དྲིལ་འཛིན་པ། བཟང་སྐྱོང་། མཐོང་བ་དོན་ཡོད། བློ་གྲོས་མི་བཟད་པ། སྤོབས་པ་བརྩེགས་པ་བཞི་སེར་པོ་རིན་ཆེན་དྲིལ་བུ་འཛིན་པ། མཐུ་ཆེན་ཐོབ། ངན་སོང་ཀུན་འདྲེན་། མྱ་ངན་མུན་འཇོམས། དྲ་བ་ཅན་གྱི་འོད་བཞི་དམར་པོ་པདྨ་དྲིལ་བུ་འཛིན་པ། ཟླ་འོད། བདུད་རྩི་འོད། ནམ་མཁའ་མཛོད། ཀུན་ཏུ་བཟང་པོ་བཞི་ལྗང་གུ་སྣ་ཚོགས་རྡོ་རྗེ་དང་དྲིལ་བུ་འཛིན་པ་སྟེ་བསྐལ་བཟང་གི་སེམས་དཔའ་བཅུ་དྲུག །ཨོཾ་སརྦ་སཾ་སྐ་རི་པ་རི་ཤུདྡྷ་དྷརྨ་ཏེ་ག་ག་ན་ས་མུཏྟ་ཏེ་སྭ་བྷ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ། ཐུགས་ཀ་ནས་ཕྱུང་། །ཕྱིའི་དཀྱིལ་འཁོར་གྱི་ལྷ་སྣམ་དང་པོར་ཤར་ནས་གཡས་བསྐོར་དུ་སེམས་དཔའི་སྐྱིལ་ཀྲུང་གིས་འཁོད། ཐུགས་ཀའི་ཨོཾ་བོ་དྷི་སཏཱ་སརྦ་སཾ་སྐ་རི་པཱ་རི་ཤུདྡྷ་དྷརྨ་པ་ཏེ་ག་ག་ན་ས་མུཏྤ་ཏེ་སྭཱ་ཧཱ། སྔགས་ཕྲེང་དེ་ལས་འོད་འཕྲོས་འདུས་པ་ལས། ངན་སོང་སྦྱོང་བ། མུན་པ་སེལ་བ། སྡུག་བསྔལ་འཇོམས་པ། སྲིད་མཚོ་སྒྲོལ་བ་བཞི་དཀར་པོ་རྡོ་རྗེ་དཀར་པོ་འཛིན་པ། རིན་ཆེན་མཛོད། དགེ་བའི་བློ་གྲོས། དོན་མཐུན་ཡིད་འོང་། དྲན་ཐོབ་མཆོག་བཞི་སྔོན་པོ་རིན་ཆེན་སྔོན་པོ་འཛིན་པ། དགེ་བའི་འབྱུང་
གནས། ལེགས་པའི་ཏོག །ཐམས་ཅད་སྒྲོལ། བདེ་བའི་འབྱུང་གནས་བཞི་དམར་པོ་པདྨ་དམར་པོ་འཛིན་པ། བརྩོན་འགྲུས་མི་ལྡོག་པ། ཡོན་ཏན་མཛོད་ཐེ་ཚོམ་ཡིད་མྱུར། ང་རོ་སྙན་པ་བཞི་ལྗང་གུ་སྣ་ཚོགས་རྡོ་རྗེ་འཛིན་པ་སྟེ་དཔེ་བྲལ་གྱི་སེམས་དཔའ་བཅུ་དྲུག །ཨོཾ་བོ་དྷི་སཏཱ་སརྦ་སཾ་སྐ་རི་པཱ་རི་ཤུདྡྷ་དྷརྨ་ཏེ་ག་ག་ན་ས་མུཏྒ་ཏེ་སྭཱ་ཧཱ། ཐུགས་ཀ་ནས་ཕྱུང་། ལྷ་རྣམ་གཉིས་པར་ཤར་ནས་གཡས་བསྐོར་དུ་སེམས་དཔའི་སྐྱིལ་ཀྲུང་གིས་འཁོད་པར་གྱུར། ལྷ་རྣམ་གསུམ་པར་ཨོཾ་སརྦ་མུ་ནེ་བྷུཔ་རི་ཤུདྡྷེ་དྷརྨཱ་ཏེ་ག་ག་ན་ས་མ་ནཾ་སྭཱ་ཧཱ། བཅུ་དྲུག་ལས་ཤར་ནས་གཡས་བསྐོར་དུ་། དགའ་བོ། སྒྲ་གཅན་འཛིན། ཤཱ་རིའི་བུ། མོའུ་འགལ་བུ། རབ་འབྱོར། འཆར་ཀ །མ་འགག་པ། ཀོ་ཎྜི་ནྱ། ཉེ་བར་འཁོར། རྟ་ཐུལ། བ་ལང་བདག །ཀུན་དགའ་བོ། མིང་ཆེན། ནོར་འཛིན། གང་པོ། འོད་སྲུང་སྟེ་ཉན་ཐོས་བཅུ་དྲུག་དང་། ལྷ་སྣམ་བཞི་པའི་ཕྱོགས་མཚམས་རྣམས་སུ། ཨོཾ་ན་མོ་བུདྡྷ་བྱ་ཝ་ལོ་ཀི་ཏེ་ཤུདྡྷེ་ས་མ་ཡེ་སྭཱ་ཧཱ། བཅུ་གཉིས་ལས་ཤར་ནས་གཡས་བསྐོར་དུ། གདུང་བ་སེལ་བ། སྣང་
བ་བརྩེགས་པ། འཇིག་པ་མེད་པ། དཔའ་བོ་འདུལ་བ། ཤེས་རབ་མགྱོགས་ཆེན། རི་བོའི་རྒྱལ། སྨྲ་བའི་སྒྲ་གཅན། བསེ་རུ་ལྟ་བུ། དུག་ཆེན་འཛོམས། རྫུ་འཕྲུལ་ཆེར་སྟོན། སེང་གེའི་སྒྲ། ཡིད་མྱུར་བ་སྟེ་རང་རྒྱལ་བཅུ་གཉིས་དབུའི་གཙུག་ཏོར་ཅུང་ཟད་འབུར་བ། ཉན་རང་ཐམས་ཅད་ཀྱང་སྐུ་མདོག་མ་ངེས་ཤིང་ཆོས་གོས་གསུམ་གྱིས་བཀླུབས་པ། ལྷུང་བཟེད་འཁར་གསིལ་པོ་ཏི་འཛིན་ཅིང་སེམས་དཔའི་སྐྱིལ་ཀྲུང་གིས་བཞུགས་པ། ཕྱི་རོལ་གྱི་སྒོ་བཞིའི་གཡས་གཡོན་དུ་ཡེ་ཤེས་ཀྱི་མེ་འབར་བའི་དབུས་ན་པད་ཉིའི་གདན་ལ་ཨོཾ་ཏྲེ་ལོཀྱ་ཀི་ར་ཧཱུྃ་ཕཊ། དེ་བཞིན་དུ། ཨོཾ་ཏྲེ་ལོཀྱ་ད་མ་ཀ་༴ ཨོཾ་ཏྲེ་ལོཀྱ་ནཱ་ཤ་༴ ཨོཾ་ཏྲེ་ལོཀྱ་ཨནྟ་༴ ཨོཾ་ཨ་མྲྀ་ཏེ༴ ཨོཾ་ཀཱ་ལ་དཎྜ༴ ཨོཾ་ཀ་ལ་ཧ་ནི༴ ཨོཾ་ཧྲཱིཿཧཱུྃ་ཕཊ་རྣམས་ལས་ཤར་ནས་གཡས་བསྐོར་དུ་འཇིག་རྟེན་གསུམ་སྣང་རྡོ་རྗེ་འཛིན་པ། འཇིག་རྟེན་གསུམ་འདུལ་དབྱུག་ཏོ་འཛིན་པ་གཉིས་དཀར་པོ། འཇིག་རྟེན་གསུམ་འཇིགས་རྩེ་གསུམ་འཛིན་པ། འཇིག་རྟེན་གསུམ་མཐར་བེ་ཅོན་འཛིན་པ་གཉིས་སྔོན་པོ། བདུད་རྩི་འཁྱིལ་བ་སྣ་ཚོགས་རྡོ་རྗེ་འཛིན་པ། དབྱུག་སྔོན་ཅན་རལ་གྲི་འཛིན་པ་གཉིས་
དམར་པོ། མི་གཡོ་བ་རལ་གྲི་འཛིན་པ། རྟ་མགྲིན་པདྨ་འཛིན་པ་གཉིས་ལྗང་གུ་སྟེ་ཁྲོ་བོ་བརྒྱད་སྦྲུལ་དང་མི་སྡུག་པའི་རྒྱན་དང་སྟག་ལྤགས་ཀྱི་སྨད་དཀྲིས་ཅན་གཡས་བསྐུམ་གཡོན་བརྐྱང་གིས་བཞུགས་པར་གྱུར། དེའི་ཕྱི་རོལ་གྱི་མུ་རན་དཀར་པོ་སོ་སོའི་གདན་གྱི་སྟེང་དུ། ན་མོ་བྷ་ག་ཝ་ཏེ་སོགས་རྩ་རིག་བརྗོད། རེ་རེ་ལས་ཤར་དུ་བརྒྱ་བྱིན་དང་ལྷ་དབང་དམར་སེར། ལྷོར་ཚངས་པ་དང་གཤིན་རྗེ་ནག་པོ། ནུབ་ཏུ་དབང་ཕྱུག་དང་ཆུ་ལྷ་དཀར་པོ། བྱང་དུ་ཁྱབ་འཇུག་དང་གནོད་སྦྱིན་སེར་པོ། མེར་མེ་ལྷ་དམར་པོ། སྲིན་པོར་བདེན་བྲལ་དམར་ནག །རླུང་དུ་རླུང་ལྷ་སྔོན་པོ། དབང་ལྡན་དུ་འབྱུང་པོ་ཐལ་མདོག་རྣམས་རང་རང་གི་འཁོར་དུ་མ་དང་བཅས་པའི་བར་བར་གྱི་ཤར་དུ། པ་སངས་དང་མིག་དམར་ལ་སྨིན་དྲུག་སོགས་བདུན་གྱིས་བསྐོར་བ། ལྷོར་ཕུར་བུ་དང་ཉི་མ་ལ་མཆུ་སོགས་བདུན་གྱིས་བསྐོར་བ། ནུབ་ཏུ་ཟླ་བ་དང་སྒྲ་གཅན་ལ་ལྷ་མཚམས་སོགས་བདུན་གྱིས་བསྐོར་བ། བྱང་དུ་གཟའ་ལྷག་དང་སྤེན་པ་ལ་མོན་གྲེ་སོགས་བདུན་གྱིས་བསྐོར་བ། སླར་ཡང་ཤར་དུ་རབ་བརྟན་སོགས་ལྟོ་འཕྱེ་རྣམས་དང་། ལྷོར་གཉེའུ་ཐུང་
སོགས་འདྲེ་རྣམས་དང་། ནུབ་ཏུ་གསེར་མིག་སོགས་མཁའ་ལྡིང་རྣམས་དང་། བྱང་དུ་བརྗེད་བྱེད་སོགས་བགེགས་རྣམས་དང་། གཞན་ཡང་འབྱུང་བ་བཞིའི་ལྷ་དང་ཁྱིམ་དང་རི་དང་ཀུན་ར་དང་ནགས་ཚལ་དང་དུར་ཁྲོད་དང་གྲོང་ཁྱེར་གྱི་ལྷ་དང་རྒྱལ་པོ་ཆེན་པོ་བཞི་འཁོར་དང་བཅས་པ་དང་། སྲིང་མོ་བཞི་དང་། རིག་སྔགས་འཆང་བའི་ཚོགས་རྣམས་དང་། འཁོར་ཡུག་གི་སྟོང་རྣམས་ཀྱི་མེར་དམྱལ་བ་ཆེན་པོ་བརྒྱད། བདེན་བྲལ་དུ་ཡི་དྭགས་ཀྱི་གྲོང་ཁྱེར། རླུང་དུ་བྱོལ་སོང་སྣ་ཚོགས། དབང་ལྡན་དུ་མིའི་འགྲོ་བ་སོགས་ཡོངས་སུ་གསལ་བར་གྱུར། ། ཤཱཀྱ་ཐུབ་པའི་སྐུའི་དཀྱིལ་འཁོར་ནི། དབུས་སུ་འཁོར་ལོ་སྔོན་པོའམ་སེར་པོ་རྩིབས་བརྒྱད་པའི་ལྟེ་བར།་སེང་གེའི་ཁྲི་ལ་པདྨ་དང་ཟླ་བའི་། གདན་གྱི་སྟེང་དུ། ཨོཾ་སརྦ་པཱ་པཾ་ད་ཧ་ན་བཛྲ་ཧཱུྃ་ཕཊ་ཀྱིས་ཤཱཀྱ་ཐུབ་པ་བསྐྱེད། རྩིབས་རྣམས་སུ་པད་ཟླ་ལ། ཨོཾ་སརྦ་ཨ་པཱ་ཡ་བི་ཤོ་དྷ་ན་བཛྲ་ཧཱུྃ་ཕཊ་ཀྱིས་ཤར་དུ་ཕྱག་ན་རྡོ་རྗེ། །ཨོཾ་སརྦ་ཀརྨ་ཨཱཿ་བ་ར་ཎ་ནི་བྷསྨིན་ཀུ་རུ་ཧཱུྃ་ཕཊ་ཀྱིས་ལྷོར་རྒྱལ་བའི་གཙུག་ཏོར། ཨོཾ་བྷཱ་བི་ནཱ་ཤ་ཡ་ཨཱཿ་ཝ་ར་ཎ་ནི་ཧཱུཾ་ཕཊ་ཀྱིས་ནུབ་ཏུ་འཁོར་ལོས་སྒྱུར་བ། ཨོཾ་ཧཱུྃ་བི་ཤྭ་དྷ་ཡ་སརྦ་ཨཱཿ་ཝ་
ར་ཎ་ནི་ཧཱུཾ་ཕཊ་ཀྱིས་བྱང་དུ་རྣམ་པར་རྒྱལ་བ། ༀ་ཛྭ་ལ་ཛཱ་ལ་དྷ་ཀ་དྷ་ཀ་ཧ་ན་ཧ་ན་སརྦ་ཨཱཿ་བ་ར་ཎ་ནི་ཧཱུཾ་ཕཊ་ཀྱིས་ཤར་ལྷོར་གཙུག་ཏོར་གཟི་བརྗིད་ཕུང་པོ། ཨོཾ་སྲུང་ས་ར་ས་ར་པྲ་ས་ར་པྲ་ས་ར་སརྦ་ཨཱཿ་བ་ར་ཎཱ་ནི་ཧཱུཾ་ཕཊ་ཀྱིས་བྱང་ཤར་དུ་གཙུག་ཏོར་གདུགས་དཀར་པོ། ཨོཾ་ཧཱུཾ་ཧ་ར་ཧ་ར་སརྦ་ཨཱཿ་བ་ར་ཎ་ནི་ཧཱུཾ་ཕཊ་ཀྱིས་ནུབ་བྱང་དུ་གཙུག་ཏོར་རྣམ་པར་འཐོར་བ། ཨོཾ་ཧཱུྃ་ཕཊ་སརྦ་ཨཱཿ་བ་ར་ཎ་ནི་བི་སྤོ་ཊ་ཡ་ཧཱུྃ་ཕཊ་ཀྱིས་ལྷོ་ནུབ་ཏུ་གཙུག་ཏོར་རྣམ་པར་འཇོམས་པ་སྟེ། སྐུ་མདོག་སེར་པོ་ཞལ་གཅིག་ཕྱག་གཉིས་པ་ཞབས་རྡོ་རྗེ་སྐྱིལ་ཀྲུང་ཅན་སྡིག་པ་སྲེག་པའི་ཕྱག་རྒྱ་མཛད་པ། དར་དང་རིན་པོ་ཆེའི་རྒྱན་སྣ་ཚོགས་པས་བརྒྱན་པ་ཆོས་གོས་ངུར་སྨིག་སྐུ་ལ་གསོལ་ཞིང་སྤྲུལ་སྐུའི་ཆ་ལུགས་ཅན། ཧཱུཾ་ཏྲཱཾ་ཧྲཱི༔ཨཱཿ༔ ཛཿཧཱུྃ་བཾ་ཧོཿ རྣམས་ལས་གྲྭ་བཞི་དང་སྒོ་བཞིར། བདུག་སྤོས་མ་དཀར་མོ་སྤོས་སྣོད་འཛིན་པ། མེ་ཏོག་མ་སེར་མོ་གཡོན་མེ་ཏོག་གི་སྣོད་འཛིན་ཅིང་གཡས་ཀྱིས་འཐོར་བ། མར་མེ་མ་དམར་སྐྱ་མར་མེ་འཛིན་པ། བྱུག་པ་སྣ་ཚོགས་མདོག་གཡོན་དྲི་ཡི་སྣོད་འཛིན་ཅིང་གཡས་ཀྱིས་མཆོད་པ། རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་
ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ་སྟེ་ལྷ་མོ་བཞི་དང་སྒོ་བ་བཞི། མཐེའུ་ཆུང་དང་མཐེ་བོང་སོ་སོར་བསྣོལ་ལ་ལྷག་མ་སོ་སོར་བརྐྱང་བའི་སྡིག་པ་སྲེག་པའི་ཕྱག་རྒྱ་སྟེ་གཙོ་འཁོར་དགུ་པོ་དེས་ཆོག །མཆོད་ལྷ་སྒོ་བ་ཀུན་རིག་བཞིན་ནོ། །ཚེ་དཔག་མེད་གསུང་གི་དཀྱིལ་འཁོར་ནི། ནང་དུ་འཁོར་ལོ་སྔོན་པོ་རྩིབས་བཞི་པའི་ལྟེ་བར་སེང་གེའི་ཁྲི་དང་པད་ཟླ་ལ། ཨོཾ་པུཎེ་པུཎྱེ་མ་ཧཱ་པུཎེ་ཨ་པ་ར་མི་ཏ་ཨཱཿ་ཡུ་པུཎྱ། ཛྙཱ་ན་སཾ་བྷཱ་རོ་པ་ཙི་ཏེ་སྭཱ་ཧཱ། དེ་བཞིན་གཤེགས་པ་ཚེ་དང་བསོད་ནམས་དང་ཡེ་ཤེས་ཀྱི་ཚོགས་དང་གཟི་བརྗིད་ཚད་མེད་པའི་རྒྱལ་པོ་ཞལ་གཅིག་ཕྱག་གཉིས་ཏིང་ངེ་འཛིན་གྱི་ཕྱག་རྒྱ་ཅན། ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། རྩིབས་བཞིར་པད་ཟླ་ལ། ཨོཾ་ཧཱུྃསྭཱ་ཧཱ། ཨོཾ་ཧཱུྃ་སྭཱ་ཧཱ། ཨོཾ་སྭཱ་ཧཱ། ཨོཾ་ཧཱུྃ་སྭཱ་ཧཱ། ཞེས་པ་ནས། བཞི་པ་ཕྱག་ན་རྡོ་རྗེ་དཀར་པོ་རྡོ་རྗེ་ཐུགས་ཀར་འཛིན་ཅིང་དྲིལ་བུ་དཀུར་བརྟེན་པ། ནམ་མཁའི་སྙིང་པོ་སེར་པོ་གཡས་རིན་པོ་ཆེ་དཔྲལ་བར་འཛིན་ཅིང་གཡོན་དྲིལ་བུ་དཀུར་བརྟེན་པ། ཀུན་
ཏུ་སྤྱན་རས་གཟིགས་དཀར་དམར་གཡོན་པདྨ་དཀུར་འཛིན་ཅིང་གཡས་དེའི་ཁ་འབྱེད་པ། རྡོ་རྗེ་ཁྲོ་བོ་སྣ་ཚོགས་མདོག་གཡས་རྡོ་རྗེ་ཐུགས་ཀར་འཛིན་ཅིང།། གཡོན་དྲིལ་བུ་དཀུར་བརྟེན་པ། ཧཱུྃ་ཧཱུྃ་ཧཱུྃཨཱཿཛཿཧཱུྃ་བཾ་ཧོཿ རྣམས་ལས་གྲྭ་བཞི་དང་སྒོ་བཞིར། བདུག་སྤོས་མ་དམར་མོ་སྤོས་སྣོད་འཛིན་པ། མེ་ཏོག་མ་སེར་པོ་གཡོན་མེ་ཏོག་གི་སྣོད་འཛིན་ཅིང་གཡས་ཀྱིས་འཐོར་བ། མར་མེ་མ་དམར་སྐྱ་མར་མེ་འཛིན་པ། བྱུག་པ་སྣ་ཚོགས་མདོག་གཡོན་དྲི་ཡི་སྣོད་འཛིན་ཅིང་གཡས་ཀྱིས་མཆོད་པ། རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ་སྟེ་ལྷ་མོ་བཞི་དང་སྒོ་མ་བཞི། ཕྱག་རྒྱ་ནི་རྡོ་རྗེའི་ཕྱག་རྒྱ་དང་རིགས་བཞིའི་ཕྱག་རྒྱ་སོགས་ཀུན་རིག་ལྟར་རོ། །འདིའི་གཙོ་བོའི་འོད་ཀྱི་དཀྱིལ་འཁོར་དུ་པཚེའི་སྔགས་སོ། །ཨོཾ་བྷོ་སྭཱ་ཧཱ། ཨོཾ་བྷིསྭཱ་ཧཱ། ཨོཾ་ཧཱུྃ་སྭཱ་ཧཱ། ཨོཾ་དྲི་སྭཱ་ཧཱ། ཨོཾ་ཧྲཱིཿསཱ་ཧཱ། ཞེས་པའི་ཉེ་སྙིང་ཕྲ་ཞིང་སྤྱན་འདྲེན་པ་ནས་སྔགས་དང་ལྷ་ལྷན་ཅིག་ཏུ་སྤྱན་དྲོངས་ལ་བསྟིམ། ཕྱག་རྒྱ་ནི། གཙོ་བོ་ལ་པདྨའི་ཕྱག་རྒྱ་
དང་། གཞན་བཞི་ལ་རྡོ་རྗེ་སེམས་དཔའ་དང་རྡོ་རྗེ་རིན་ཆེན་དང་རྡོ་རྗེ་ཆོས་དང་རྡོ་རྗེ་ལས་རྣམ་བཞིའོ།། ། ཕྱག་ན་རྡོ་རྗེ་ཐུགས་ཀྱི་དཀྱིལ་འཁོར་ནི། དབུས་སུ་འཁོར་ལོའི་རྩིབས་བཞི་པའི་ལྟེ་བར་སེངྒེའི་ཁྲི་དང་པད་ཟླའི་སྟེང་དུ། ཨོཾ་པུཎེ་པུཎེ་མ་ཧཱ་པུཎྱེ་ཨ་པ་རི་མི་ཏཱ་ཨཱཿ་ཡུཔུཎྱ་ཛྙཱ་ན་སཾ་བྷཱ་རོ་པ་ཙི་ཏེ་ཀ་རི་ཎི་སྭཱ་ཧཱ། བཀོད་པ་ལས་འོད་འཕྲོས་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། ཕྱག་ན་རྡོ་རྗེ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་པས་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་དེ་བསྣམས་པ། དར་གྱི་ན་བཟའ་དང་རིན་པོ་ཆེའི་རྒྱན་ཅན། ཨོཾ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲེ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་ཨཱཿ་ཝ་ར་ཎ།་པ་རཾ་པཱ་ར་ཎི་མེ་སརྦ་སཏྭཱ་ནཉྩ་སྭཱ་ཧཱ། ཨོཾ་རཏེ་རཏེ་མ་ཧཱ་རཀྵེ་རཏ་སཾ་བྷ་ཝ། རཏཱ་ཀཱི། རཏྣ་མཱ་ལ་བི་ཤུདྡྷེ། ཤོ་དྷ་ཡ། སརྦ་པཱ་པཾ་ཧཱུྃ་ཕཊ། ཨོཾ་ཨ་མི་ཏེ་ཨ་མི་ཏེ། ཨ་མི་ཏོད་བྷ་ཝེ། ཨ་མི་ཏ་སཾ་བྷ་ཝེ། ཨ་མི་ཏ་བི་ཀྲནྟེ། ཨ་མི་ཏ་བི་ཀྲན། གཱ་མི་ནི་སརྦ་ཀརྨ་ཀེ་ཤ་
ཀྵ་ཡཾ་ཀ་རི་སྭཱ་ཧཱ། ཨོཾ་ཨ་མོ་གྷ། ཨ་པྲ་ཏི་ཧ་ཏ། སརྦ་ཨཱཿ་ཝ་ར་ཎ། བི་ནཱ་ཤ་ནི་ཧ་ར་ཧ་ར་ཧཱུྃ་ཕཊ། ཅེས་པ་བཞིས། ཤར་ལ་སོགས་པའི་རྩིབས་རྣམས་སུ་དེ་བཞིན་གཤེགས་པ་དང་མི་བསྐྱོད་པ་རིན་ཆེན་འབྱུང་ལྡན་དང་། ཆུ་སྐྱེས་པདྨ་དང་། གདོན་མི་ཟ་བར་གྲུབ་པའི་སྟེ་བཞི་ཀ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་གཡས་མཆོག་སྦྱིན་དང་གཡོན་སྐྱབས་སྦྱིན། རྡོ་རྗེ་སྐྱིལ་ཀྲུང་གིས་པདྨ་དང་ཟླ་བའི་གདན་ལ་བཞུགས་པ། དར་དང་རིན་པོ་ཆེའི་བརྒྱུན་པ། ཧཱུྃ་ཧཱུྃ་ཧཱུྃཨཱཿ༔ ཛཿཧཱུྃ་བཾ་ཧོཿ རྣམས་ལ་གྲྭ་བཞི་དང་སྒོ་བཞིར། བདུག་སྤོས་མ་དཀར་མོ་སྤྲོས་སྣོད་འཛིན་པ། མེ་ཏོག་མ་སེར་མོ་གཡོན་མེ་ཏོག་གི་སྣོད་འཛིན་ཅིང་གཡས་ཀྱིས་འཐོར་བ། མར་མེ་མ་དམར་སྐྱ་མར་མེ་འཛིན་པ། བྱུག་པ་མ་སྣ་ཚོགས་མདོག་གཡོན་དྲི་ཡི་སྣོད་འཛིན་ཅིང་གཡས་ཀྱིས་མཆོད་པ། རྡོ་རྗེ་ལྕགས་ཀྱུ་དཀར་མོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་མོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ་སྟེ་ལྷ་མོ་བཞི་དང་། སྒོ་བ་བཞི་ཁྲོ་
བོའི་ཆ་ལུགས་སོ། །འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་ནི༔ དབུས་སུ་འཁོར་ལོ་སྔོན་པོ་རྩིབས་བཞི་པ་དང་། དེའི་ཕྱི་ལྷ་སྣམ་རིམ་པར་དགུར་གནས་པའི་ལྟེ་བ་ལས་སེང་གེའི་ཁྲི་དང་པད་ཟླ་ལ། ཨོཾ་བཛྲ་ཧཱུཾ་ཧཱུཾ་བཛྲ་པཱ་ཎི་དྲི་ཌྷ་ཏིཥྛཧཱུཾ། ཨོཾ་ཨཱཿཧཱུྃ་ཨཱཿ༔ ལས་ཀུན་ཏུ་བཟང་པོ་སེར་པོ་ཕྱག་གཡས་མཆོག་སྦྱིན་གཡོན་རིན་པོ་ཆེའི་སྙེ་མ་འཛིན་པ་ཞབས་རྡོ་རྗེ་སྐྱིལ་ཀྲུང་ཅན། དར་དང་རིན་པོ་ཆེའི་བརྒྱན་པ། རྩིབས་བཞི་ལ་ཨོཾ་ཧཱུྃ་ཕཊ། ཨོཾ་ཌི་དྷ་བཛྲ་ཧཱུཾ་ཕཊ། ཨོཾ་བཛྲ་ཧཱུཾ་ཕཊ། ཨོཾ་བཛྲ་ཧཱུྃ་ཨཱཿ༔ རྣམས་ལས་ཤར་དུ་ཕྱག་ན་རྡོ་རྗེ་དཀར་པོ་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ལྷོར་ཕྱག་ན་རྡོ་རྗེ་སེར་པོ་གཡས་རིན་པོ་ཆེ་དཔྲལ་བར་འཛིན་ཅིང་གཡོན་དྲིལ་བུ་དཀུར་བརྟེན་པ། ནུབ་ཏུ་རྣམ་པར་གསལ་བ་དམར་པོ་གཡོན་པདྨ་དཀུར་འཛིན་ཅིང་གཡས་དེའི་ཁ་འབྱེད་པ། བྱང་དུ་ཕྱག་ན་རྡོ་རྗེ་སྣ་ཚོགས་མདོག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ལྷ་སྣམ་དང་པོའི་ཕྱོགས་མཚམས་བརྒྱད་དུ། དེ་
བཞིན་གཤེགས་པ་རིན་ཆེན་གཙུག་ཏོར་ཅན་དང་། དེ་བཞིན་གཤེགས་པ་མེ་ཏོག་ཡང་དག་པར་བསྐྱེད་པའི་དབང་པོའི་རྒྱལ་པོ་དང་། པདྨའི་གཙུག་ཏོར་དང་། །སྤྱན་བཟང་པོ་དང་། མཉེན་པར་དཀའ་བ་དང་། རྣམ་པར་སྣང་མཛད་དང་། སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་དང་། སྡུག་བསྔལ་ཐམས་ཅད་ཞི་བར་བྱེད་པའི་སྨན་གྱི་རྒྱལ་ས་སྤྲུལ་པའི་སྐུ་གཙུག་ཏོར་དང་ཆོས་གོས་ཅན་སྐུ་མདོག་སེར་པོ་ཆོས་འཆད་ཀྱི་ཕྱག་རྒྱ་མཛད་པ། གཉིས་པ་སེམས་དཔའ་བཅུ་དྲུག་ཕྱོགས་རེ་རེར་བཞི་བཞི། གསུམ་པ་ལ་བསྐལ་བཟང་བཅུ་དྲུག་ཕྱོགས་རེ་རེར་བཞི་བཞི། བཞི་པ་ལ་ཉན་ཐོས་བཅུ་དྲུག །རང་རྒྱལ་བཅུ་གཉིས་རྣམས་ཕྱོགས་རེ་རེར་བདུན་བདུན། ལྔ་པ་ལ་ལྷ་ཆེན་བརྒྱད། དྲུག་པ་ལ་གཟའ་བརྒྱད་རྒྱུ་སྐར་དང་བཅས་པ། བདུན་པ་ལ་རྒྱལ་ཆེན་བཞི། བརྒྱད་པ་ལ་ཕྱོགས་སྐྱོང་བཅུ་རྣམས་སྐུ་མདོག་ཕྱག་མཚན་རྒྱན་ཆ་ལུགས་དང་བཅས་པ། དགུ་པ་ལ་ཤར་དུ་འདོད་ཆགས་ཕུག་རོན། ལྷོར་གཏི་མུག་ཕག །ནུབ་ཏུ་ཞེ་སྡང་སྦྲུལ། བྱང་དུ་ང་རྒྱལ་བཙན། བར་རྣམས་སུ་ཚ་དམྱལ། གྲང་དམྱལ། ཉེ་ཚེ། ཉེ་འཁོར་བ་སྒོ་བ་བཞི་
དང་བཅས་པའོ། །ཕྱག་རྒྱ་ནི་ཐལ་མོ་སྦྱར་ནས། མཐེ་བོང་གཉིས་བརྐྱང་། མཐེའུ་ཆུང་གཉིས་ཀུག །མཛུབ་མོ་གཉིས་དང་སྲིན་ལག་པད་འདབ་ལྟར་བྱའོ། །གུང་མོ་གཉིས་གཤིབ་སྟེ་སྒྲེང་བ་ནི་ཀུན་ཏུ་བཟང་པོའོ། གཞན་སེམས་དཔའ་ནི་ཚེ་དཔག་མེད་ལྟར། གཡོན་སྐྱབས་སྦྱིན་དང་གཡས་མཆོག་སྦྱིན་སངས་རྒྱས་བརྒྱད་དོ། །གཞན་རྣམས་ཀུན་རིག་ལྟར་རོ། །ལྷ་སྣམ་དགུ་པ་རྣམས་མི་བཅོས། །མེ་ལྟར་འབར་བའི་ཕྲིན་ལས་ཀྱི་དཀྱིལ་འཁོར་ནི། ནང་དུ་འཁོར་ལོ་རྩིབས་བཅུ་གཉིས་པའི་ལྟེ་བར་སེང་གེའི་ཁྲི་དང་པད་ཉི་ལ་གདུག་པ་ཅན་བསྐྱེལ་བའི་སྙིང་ཁར། ཨོཾ་བཛྲ་སཏཱ་ཀྲོ་དྷ་ཨ་ན་ལརྐ་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་ཝ་བི་དྲ་ཝ་སརྦ་ཨ་པཱ་ཡ་ནཱ་ཤ་ཡ་ཧ་ར་ཧ་ར་པྲ་ཎཾ་ཧཱུྃ་ཕཊ། ཁྲོ་བོ་མེ་ལྟར་འབར་བ་སྐུ་མདོག་སྔོན་པོ་དབུ་དང་ཕྱག་མཐའ་ཡས་པ། སྦྲུལ་དང་མི་སྡུག་པའི་བརྒྱན་དང་། སྟག་ལྤགས་ཀྱི་ཤམ་ཐབས་ཅན། རྩ་བའི་ཕྱག་གཉིས་ཧཱུྃ་མཛད་ཀྱི་ཕྱག་རྒྱུ། ལྷག་མའི་གཡས་རྣམས་མཚོན་ཆ་སྣ་ཚོགས། གཡོན་རྣམས་མགོ་ཐོད་ཤས་གང་བ་བསྣམས་པ། མ་རུངས་པའི་རྒྱུ་མ་དྲང་སྟེ་གསོལ་བ། གཡས་བསྐུམ་གཡོན་བརྐྱང་གིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། རྩིབས་བཅུ་གཉིས་སུ་པད་ཉི་ལ་གདུག་པ་ཅན་
བསྐྱེལ་བའི་སྙིང་གར་ཨོཾ་ཏྲེ་ལོཀྱ་ཨཱཿ་ལོ་ཀེ་ཀི་ར་ཧཱུཾ་ཕཊ་ཀྱིས་ཤར་གྱི་རྩིབས་ལ་ཁྲོ་བོ་འཇིག་རྟེན་གསུམ་དང་། ཨོཾ་ཏྲེ་ལོཀྱ་ད་མ་ཀ་ཧཱུྃ་ཕཊ་ཀྱིས་ལྷོར་འཇིག་རྟེན་གསུམ་འདུལ། ཨོཾ་ཏྲེ་ལོཀྱ་བྷནྡྷ་ཧཱུྃ་ཕཊ་ཀྱིས་ནུབ་ཏུ་འཇིག་རྟེན་གསུམ་འཛིན། ཨོཾ་ཏྲེ་ལོཀྱ་ནཱ་ཤ་ཧཱུཾ་ཕཊ་ཀྱིས་བྱང་དུ་འཇིག་རྟེན་གསུམ་འཇིགས། ཨོཾ་ཨ་མྲྀ་ཏེ་ཧཱུཾ་ཕཊ་ཀྱིས་ཤར་གྱི་རྩིབས་བྱང་མར་བདུད་རྩི་འཁྱིལ་པ། ཨོཾ་ཀཱ་ལ་དཎྜཱི་ཧཱུྃ་ཕཊ་ཀྱིས་ལྷོའི་རྩིབས་ཤར་མར་དབྱུག་པ་སྔོན་པོ། ཨོཾ་ཀ་ལ་ཧ་ནི་ཧཱུཾ་ཕཊ་ཀྱིས་ནུབ་ཀྱི་རྩིབས་ལྷོར་མི་གཡོ་བ། ཨོཾ་ཧྲཱིཿདྷི་ཧཱུྃ་ཕཊ་ཀྱིས་བྱང་གི་རྩིབས་ནུབ་མར་རྟ་མགྲིན། ཨོཾ་ཀཱ་ལ་རཀྵ་སི་ཧཱུྃ་ཕཊ་ཀྱིས་ཤར་གྱི་རྩིབས་ལྷོར་མར་དུས་ཀྱི་སྲིན་མོ། ཨོཾ་ཀཱ་ལ་དཎྜ་ཧཱུཾ་ཕཊ་ཀྱིས་ལྷོའི་རྩིབས་ནུབ་མར་དུས་ཀྱི་དབྱུག་པ་མ། ཨོཾ་ཀཱ་ལ་ར་ཏྲི་ཧཱུྃ་ཕཊ་ཀྱིས་ནུབ་ཀྱི་རྩིབས་བྱུང་མར་དུས་མཚན་མོ། ཨོཾ་ཀཱ་ལ་ཡཀྲི་ཧཱུྃ་ཕཊ་ཀྱིས་བྱང་གི་རྩིབས་ཤར་མར་དུས་ཀྱི་གནོད་སྦྱིན་མོ། བརྒྱད་པོ་ཐམས་ཅད་དབུ་མཐའ་ཡས་པ་སོགས་གཙོ་བོ་ལྟ་བུ་དང་། ཁྲོ་བོ་བཞི་ཕྱག་གཉིས་པ་གྲི་ཐོད་ཅན། ཨོཾ་ཀཱ་ལ་ཨངྐུ་ཤ་ཧཱུཾ་ཕཊ། ཨོཾ་ཀཱ་ལ་པཱ་ཤ་ཧཱུྃ་ཕཊ། ཨོཾ་ཀཱ་ལ་བྷནྡྷ་ཧཱུྃ་ཕཊ། ཨོཾ་ཀཱ་ལ་
གྷ་ཧཱུྃ་ཕཊ། བཞིས་སྒོ་བཞིར་པད་ཉི་ལ་སྒོ་མ་བཞི་ནག་པོ་ཁྲོ་བོའི་ཆ་ལུགས་གཡས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན་ཅིང་གཡོན་གདན་ལ་བརྟེན་པ། ཁྲོ་བོ་དགུའི་ཕྱག་རྒྱ་ཀུན་རིག་ལྟར་དང་། སོར་མོ་རྣམས་རྩེ་སྤྲད་ཨ་ཚིགས་རྣམས་བཅག་པ་མགོ་ཐོད་ཀྱི་ཕྱག་རྒྱ་ཁྲོ་མོ་བཞིའོ། །འཇིག་རྟེན་པའི་འཁོར་གྱིས་བསྐོར་བ་ལ། རྒྱལ་པོ་ཆེན་པོ་བཞིས་བསྐོར་བའི་དཀྱིལ་འཁོར་ནི། ནང་ལིང་ཚེ་དབུས་དང་ཕྱོགས་བཞིར་དེ་དག་གི་མདོག་དང་མཐུན་པའི་དཀྱིལ་འཁོར་ཟླུམ་པོ་ལྔ་གནས་པའི། དབུས་མའི་སྟེང་དུ་སེང་གེའི་ཁྲི་དང་པད་ཟླ་ལ་ཨོཾ་པུཎེ་པུཎེ་མ་ཧཱ་པུཎེ་ཨ་པ་ར་མི་ཏ་ཨཱཿ་ཡུ་པུཎྱ། ཛྙཱ་ན་སཾ་བྷཱ་རོ་པ་ཙི་ཏེ་སྭཱ་ཧཱ་ལས་ཕྱག་ན་རྡོ་རྗེ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་ཏེ་བསྣམས་པ། དར་གྱི་ན་བཟའ་དང་རིན་པོ་ཆེའི་བརྒྱན་ཅན། ཕྱོགས་བཞིར་པད་ཟླ་ལ་དྷི་བྷི་ཀ་བེ་བཞི་རིམ་བཞིན་བྱང་དུ་རྣམ་ཐོས་སྲས་སེར་པོ་སྐུ་སྦོམ་ཞིང་བརྗིད་པ། སེང་གེའི་གདན་ལ་བཞུགས་པ་གསེར་གྱི་མདོག་ཅན་གཟི་བརྗིད་ལྡན་པ། ཕྱག་གཡས་པས་ནོར་བུའི་
རྒྱལ་མཚན་དང་། གཡོན་པས་ནེའུ་ལེ་བསྣམས་པ། བུམ་པ་བཟང་པོ་དང་དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་དང་། རིན་པོ་ཆེའི་རི་དང་འདོད་འཇོའི་བ་དང་མ་རྨོས་པའི་ལོ་ཏོག་གིས་བསྐོར་བ། སྐུ་ལས་རིན་པོ་ཆེའི་ཆུ་བོ་འབབ་པ་དང་། ཤར་དུ་ཡུལ་འཁོར་སྲུང་ལྗང་གུ་པི་ཝཾ་འཛིན་པ། ལྷོར་ལུས་འཕགས་སྔོན་པོ་རལ་གྲི་འཛིན་པ། ནུབ་ཏུ་མིག་མི་བཟང་དམར་པོ་རྡོ་རྗེའི་ཞགས་པ་འཛིན་པ། དབུ་ལ་སྦྲུལ་མགོའི་གདེངས་ཀ་བདུན་གྱིས་བསྐོར་བ། མིག་དམར་ཞིང་ཤིན་ཏུ་འབར་བ། སྒོ་བཞིར་ཛཧཱུྃ་བཾ་ཧོལས། རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ། གཙོ་བོའི་ཕྱག་རྒྱ་ཀུན་རིག་ལྟར་རོ། །འཇིག་རྟེན་པ་སྤྱིའི་ཕྱག་རྒྱ་ཀུན་རིག་ཏུ་གསུངས་པ་ལྟར་བྱའོ། །ཡང་ན་ལག་པ་གཡས་གཡོན་ནེའུ་ལེ་འཛིན་པའི་ཁུ་ཚུར་མཐེ་བོང་བརྐྱངས་པ་དང་། གཡོན་པི་ཝཾ་འཛིན་པའི་གཡས་ཀྱིས་གྲྭ་བྱེད་པའི་ཚུལ་དང་། རྡོ་རྗེ་ཁུ་ཚུར་ལས་གུང་མཛུབ་གཉིས་གཤིབས་པ་རལ་གྲི་ལྟ་བུ་དང་། རྡོ་རྗེ་ཁུ་ཚུར་ལས་གུང་མོ་བརྐྱང་བའི་སྟེང་དུ་མཛུབ་མོ་
བཞག་པ་ལྟ་བུ་རྣམས་རིམ་པའོ། །ཕྱོགས་སྐྱོང་བཅུས་བསྐོར་བའི་དཀྱིལ་འཁོར་ནི། ནང་དུ་ལིང་ཚེ་དགུར་གནས་པའི་དབུས་སུ་སེང་གེའི་ཁྲི་པད་ཟླ་ལ། ཨོཾ་པེུ་པུཎྱེ་མ་ཧཱ་པུཎེ་ཨ་པ་ར་མི་ཏ་ཨཱཿ་ཡུ་པུཎྱ། ཛྙཱ་ན་སཾ་བྷཱ་རོ་པ་ཙི་ཏེ་སྭཱ་ཧཱ་ལས་ཕྱག་ན་རྡོ་རྗེ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་སྐྱིལ་ཀྲུང་གིས་བཞུགས་པ། ཕྱག་གཡས་པས་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ། གཡོན་དེས་ཡུ་བ་བྱས་པའི་དྲིལ་བུ་དཀུར་བརྟེན་ཏེ་བསྣམས་པ། དེའི་མདུན་གཡས་ཟུར་དུ་ཨ་ཨ་སྭཱ་ཧཱ། ཉི་མ་དམར་པོ་རྟ་བདུན་གྱིས་འདྲེན་པའི་ཤིང་རྟ་ལ་ཞོན་པ། ཕྱག་གཉིས་ཀྱིས་པདྨ་ལ་གནས་པའི་ཉི་མ་འཛིན་པ། གཡོན་ཟུར་ཨོཾ་བྷ་སྭཱ་ཧཱ། ས་བདག་ཕག་སེར་པོ་ཕག་མགོ་ཅན་པི་ཝཾ་བསྒྲེང་བ། བྱང་ཤར་ལ་སོགས་པའི་ལིང་ཚེ་རྣམས་ལ་ཨོཾ་ཨི་སྭཱ་ཧཱ། ཨོཾ་ཨི་སྭཱ་ཧཱ། ཨོཾ་ཨ་སྭཱ་ཧཱ། ཨོཾ་ཡ་སྭཱ་ཧཱ། ཨོཾ་ནི་སྭཱ་ཧཱ། ཨོཾ་ཁཾ་སྭཱ་ཧཱ། ཨོཾ་ཡཾ་སྭཱ་ཧཱ། ཨོཾ་ཀུ་སྭཱ་ཧཱ། རྣམས་ལས་རིམ་པ་བཞིན་། བྱང་ཤར་དུ་དབང་ལྡན་དཀར་པོ། མགྲིན་པ་སྔོ་བ་གླང་ལ་ཞོན་ཅིང་གཡས་རྩེ་གསུམ་དང་གཡོན་ཐོད་པ་འཛིན་པ། རལ་པའི་ཐོད་ཅན་ལ་ཐོད་ཕྲེང་དང་ཟླ་ཕྱེད་ཀྱིས་
།བརྒྱན་པ། སྦྲུལ་གྱིས་མཆོད་ཕྱིར་ཐོགས་པ་ཅན། ཤར་དུ་བརྒྱ་བྱིན་སེར་པོ་གླང་པོ་ཆེ་ས་སྲུང་དཀར་པོ་ལ་ཞོན་ཞིང་གཡས་རྡོ་རྗེ་དང་གཡོན་ནུ་མ་འཛིན་པ། ཤར་ལྷོར་མེ་ལྷ་དམར་པོ་ར་ལ་ཞོན་ཞིང་དགང་གཟར་དང་བླུག་གཟར་དང་སྤྱི་བླུགས་འཛིན་པ། ལྷོར་གཤིན་རྗེ་ནག་པོ་མ་ཧེ་ལ་ཞོན་པ་དབྱུག་པ་དང་རྡོ་རྗེ་རྩེ་གཅིག་པ་འཛིན་པ། ལྷོ་ནུབ་ཏུ་སྲིན་པོ་སྔོན་པོ་རོ་ལངས་ལ་ཞོན་པ་རལ་གྲི་དང་ཕུབ་འཛིན་པ། ནུབ་ཏུ་ཆུ་ལྷ་དཀར་པོ་ཆུ་སྲིན་ལ་ཞོན་པ་སྦྲུལ་ཞགས་དང་དུང་དཀར་འཛིན་པ། སྦྲུལ་མགོའི་གདེངས་ཀ་བདུན་དང་ལྡན་པ། ནུབ་བྱང་དུ་རླུང་ལྷ་སྔོན་པོ་ཤ་བ་ལ་ཞོན་པ་རླུང་རེས་འཛིན་པ། བྱང་དུ་ལུས་ངན་སེར་པོ་མི་ལ་ཞོན་པ་ལྕགས་ཀྱུ་དང་དབྱུག་ཏོ་འཛིན་པ། བརྒྱད་པོ་ཐམས་ཅད་ཕྱག་བཞི་པ་སྟེ་ཕྱག་འོག་མ་གཉིས་སྤྱི་བོར་ཐལ་མོ་སྦྱར་ཏེ་གཙོ་བོ་ལ་འདུད་པ། སྒོ་བཞིར་ཛཧཱུྃ་བཾ་ཧོལས་རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་པས་དྲིལ་བུ་གཡོན་གདན་ལ་བརྟེན་པ། ཕྱག་རྒྱུ་ནི་གཙོ་བོའི་ཕྱག་རྒྱ་
སྔར་བཞིན་དང་། ཕྱོགས་སྐྱོང་རྣམས་རིམ་པ་བཞིན་དུ་ལག་པ་གཉིས་ཁ་སྦྱར་ཏེ་འཁོར་ལོ་ལྟར་བྱས་པ་དང་། ལག་པ་གཉིས་སོར་མོ་རྣམས་བཀུག་སྟེ་རྩེ་སྦྱར་ནས་བུམ་པ་བཞིན་བྱས་པ་སྙིང་ཁར་བཟུང་བ་དང་། གཡོན་སྙིང་གར་ཐོད་པ་འཛིན་པའི་ཚུལ་བྱས་ཤིང་གཡས་མཐེའུ་ཆུང་མཐེ་བོང་གི་མགོ་ནས་སོར་མོ་དབུས་མ་གསུམ་རྩེ་གསུམ་གྱི་ཕྱག་རྒྱ་བྱས་པ་ཕྲག་པའི་ཐད་དུ་བཟུང་བ་དང་། ལག་གཉིས་རྩེ་གསུམ་གྱི་ཚུལ་དུ་བྱས་ནས་གཡོན་དཀུར་བརྟེན་ཞིང་གཡས་སྙིང་གར་བཟུང་བ་དང་། རྡོ་རྗེ་མེའི་ཕྱག་རྒྱ་དང་། ལག་པ་གཉིས་ཁུ་ཚུར་བྱས་ཏེ་གུང་མོ་དབྱུག་པ་ལྟར་བསྒྲེང་བ་གཡོན་སྙིང་གར་བཟུང་ཞིང་གཡས་ཕྱར་སྟབས་སུ་བྱས་པ་དང་། སྙིམ་པ་གཟེན་པ་ཁའི་ཐད་དུ་བཟུང་བ་དང་། ལག་པ་གཉིས་ཀྱི་སོར་མོ་རྣམས་རྩེ་མོ་གཅུས་ཏེ་སྦྲུལ་མགོ་ལྟར་བྱས་པ་ཐོད་ཐད་དུ་བཟུང་བ་དང་། གཡོན་ཁུ་ཚུར་སྙིང་གར་བཟུང་ཞིང་གཡས་པའི་སོར་མོ་རྣམས་བཤིབ་སྟེ་བརྐྱང་བ།་འཕྲག་པའི་ཐད་དུ་བ་དན་ལྟར་གསོར་བར་འཛིན་པ་དང་། གཡས་ཁུ་ཚུར་གྱི་གུང་མོ་དབྱུག་པ་ལྟར་བསྒྲེང་བ་འཕྲོག་པར་འཕྱར་ཞིང་གཡོན་ཁུ་ཚུར་མཐེ་བོང་བརྐྱང་པ་ནེའུ་ལེ་འཛིན་པ་ལྟར་བྱས་པ་རྣམས་སོ།། ། གཟའ་བརྒྱད་ཀྱིས་བསྐོར་བའི་སྙིང་པོའི་དཀྱིལ་འཁོར་ནི། ནང་དུ་ལིང་ཚེ་དགུར་གནས་པའི་དབུས་སུ་སེངྒེའི་ཁྲི་དང་པད་ཉིའི་སྟེང་དུ། ཨོཾ་བཛྲ་སཏཱ་ཀྲོ་དྷ་ཨ་ན་ལན་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་ཝ་བི་དྲ་ཝ་སརྦ་ཨ་པཱ་ཡ་ནཱ་ཤ་ཡ་ཧ་ར་ཧ་ར་པྲ་ཎཾ་ཧཱུྃ་ཕཊ་
ལས་བདག་ཉིད་ཁྲོ་བོ་འཇིག་རྟེན་གསུམ་རྒྱལ་སྐུ་མདོག་སྔོན་པོ་དབུ་དང་ཕྱག་མཐའ་ཡས་པ། །སྦྲུལ་དང་མི་སྡུག་པའི་བརྒྱན་དང་སྟག་ལྤགས་ཀྱི་ཤམ་ཐབས་ཅན། རྩ་བའི་ཕྱག་གཉིས་ཧཱུྃ་མཛད་ཀྱི་ཕྱག་རྒྱ། ལྷག་མའི་གཡས་རྣམས་མཚོན་ཆ་སྣ་ཚོགས། གཡོན་རྣམས་མགོ་ཐོད་ཤས་གང་བ་བསྣམས་པ། མ་རུངས་བའི་རྒྱུ་མ་དྲངས་ཏེ་གསོལ་བ། གཡས་བསྐུམ་གཡོན་བརྐྱང་གིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། དེའི་ཕྱོགས་བཞིར་རིགས་བཞིའི་མཚན་མ་བཞི་དང་། ཕྱོགས་མཚམས་ཀྱི་རེ་མིག་ལ། ཤར་དུ་ཨོཾ་ཁྱི་སྭཱ་ཧཱས་པདྨ་ལ་པ་ཝ་སངས་དཀར་པོ་ཕྲེང་བ་དང་གཡོན་སྤྱི་བླུགས་འཛིན་པ། ལྷོར་ཨོཾ་བྲི་སྭཱ་ཧཱས་ཐོད་པའི་སྦལ་པ་ལ་ཕུར་བུ་དཀར་པོ་གཡས་ཕྲེང་བ་དང་གཡོན་སྤྱི་བླུགས་འཛིན་པ། ནུབ་ཏུ་ༀ་སྭ་སྭཱ་ཧཱས་ངང་པ་ལ་ཟླ་བ་དཀར་པོ་ཕྱག་གཉིས་ཀྱི་ཀུ་མུད་ཏ་ལ་གནས་པའི་ཟླ་བ་འཛིན་པ། བྱང་དུ་ཨོཾ་བུ་སྭཱ་ཧཱས་པདྨ་ལ་ལྷག་པ་སེར་པོ་མདའ་གཞུ་འཛིན་པ། ཤར་ལྷོར་ཨོཾ་ཨང་སཱ་ཧཱས་ར་ལ་མིག་དམར་གཡས་གྲི་གུག་དང་གཡོན་མི་མགོ་ཟ་བའི་ཚུལ་དུ་བྱེད་པ། ལྷོ་ནུབ་ཏུ་ཨོཾ་ར་སྭཱ་ཧཱས་སྤྲིན་ལ་སྒྲ་གཅན་དམར་ནག་གཡས་
ཉི་མ་གཡོན་ཟླ་བ་འཛིན་པ། ནུབ་བྱང་དུ་ཨོཾ་ཨ་སྭཱ་ཧཱས་རྟ་བདུན་གྱིས་གྲངས་པའི་ཤིང་རྟ་ཉི་མ་དམར་པོ་ཕྱག་གཉིས་ཀྱི་པདྨ་ལ་གནས་པའི་ཉི་མ་འཛིན་པ། བྱང་ཤར་དུ་ཨོཾ་ས་སྭཱ་ཧཱས་རུ་སྦལ་ལ་གནས་པའི་སྤེན་པ་ནག་པོ་ཕྱག་གཉིས་ཀྱི་དབྱུག་པ་འཛིན་པ། སྒོ་བཞིར་ཛཿཧཱུྃ་བཾ་ཧོཿལས་རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ། ཕྱིའི་འཁོར་ཡུག་ལ་ཕྱོགས་བཞིར་སྐར་མ་བདུན་བདུན་ཏེ། བྱང་ཤར་ནས་རིམ་པ་བཞིན། ཐ་སྐར་དཀར་པོ། བྲ་ཉེ་ལྗང་གུ། སྨིན་དྲུག་སྔོན་པོ། སྣར་མ་དམར་སྐྱ། མགོ་ནག་པོ། ལག་སེར་པོ། ནབས་སོ་སེར་པོ། རྒྱལ་སྔོ་བསངས། སྐག་དཀར་པོ། མཆུ་སེར་པོ། གྲེ་ལྗང་སེར། སྦོ་ལྗང་གུ། མེ་བཞི་དཀར་པོ། ནག་པོ་ལྗང་གུ། ས་རི་སེར་པོ། ས་ག་ནག་པོ། ལྷ་མཚམས་ལྗང་གུ། སྣོན་དམར་སྐྱ། ལྡེའུ་སེར་པོ། ཆུ་སྟོད་ནག་པོ། ཆུ་སྨད་དཀར་པོ། བྱི་བཞིན་སྔོ་བསངས། གྲོ་ཞུན་དཀར་སེར། མོན་
གྲེ་ནག་པོ།་མོན་གྲུ་སེར་པོ། ཁྲུམས་སྟོད་ལྗང་གུ། ཁྲུམས་སྨད་སེར་པོ། ནམ་གྲུ་དཀར་སེར་ཏེ། ལྷ་མོ་དེ་རྣམས་ཐལ་མོ་སྦྱར་ནས་པདྨ་བསྣམས་ཤིང་སྟོད་གཡོགས་དམར་པོ་དང་བཅས་པའོ། །ཕྱག་རྒྱུ་གཙོ་བོ་ཀུན་རིག་བཞིན་ནོ། །དེ་རྣམས་མཉམ་གཞག་དང་བཅས་པས་གཡས་མཐེ་བོང་དང་མཛུབ་མོ་སྦྱར་ཏེ། གནས་འདྲེན་པའི་ཚུལ་དང་། ལག་པ་གཉིས་ཁ་སྦྱར་ཏེ་འཁོར་ལོ་ལྟར་བྱས་པ་དང་། ལག་པ་གཉིས་སེ་གོལ་གཏོགས་པ་དང་། ཐལ་མོ་དམ་དུ་སྦྱར་བ་དང་། གླང་པོ་རིན་པོ་ཆེའི་ཕྱག་རྒྱ་དང་། ཡང་འཁོར་ལོའི་ཕྱག་རྒྱ་དང་། གཡས་ཁུ་ཚུར་གྱི་གུང་མོ་བསྒྲེང་པ་རྣམས་གཟའ་བརྒྱད་ཀྱིའོ། །སོར་མོ་རྣམས་གཅིག་ཏུ་བསྡུས་ཤི་ང་ཕྱིར་འགྱེད་པ་ལན་གསུམ་བྱས་པ་ནི་རྒྱུ་སྐར་རྣམས་སོ། །ཀླུ་བརྒྱད་ཀྱིས་བསྐོར་བའི་དཀྱིལ་འཁོར་ནི། ནང་དུ་པདྨ་དཀར་པོ་འདབ་མ་བརྒྱད་པའི་ལྟེ་བར་སེང་གེའི་ཁྲི་དང་པད་ཟླའི་སྟེང་དུ། ཨོཾ་པུཎེ་པུཎེ་མ་ཧཱ་པུཎྱེ་ཨ་པ་ར་མི་ཏ་ཨཱཿ་ཡུ་པུཎྱ། ཛྙཱ་ན་སཾ་བྷ་རོ་པ་ཙི་ཏེ་སྭཱ་ཧཱ་ལས་འོད་འཕྲོས་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། ཕྱག་ན་རྡོ་རྗེ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་པ་རྡོ་རྗེ་རྩེ་ལྔ་པ་ཐུགས་ཀར་བསྟོད་དེ་འཛིན་པ། གཡོན་དེས་
ཡུ་བ་བྱས་པའི་དྲིལ་བུ་དཀུར་བརྟེན་ཏེ་བསྣམས་པ། དར་གྱི་ན་བཟའ་དང་རིན་པོ་ཆེས་བརྒྱན་པ། སྦྲུལ་མགོ་མཐའ་ཡས་པའི་གདེངས་ཀ་ཅན་སྦྲུལ་གྱིས་བརྒྱན་པ། འདབ་མ་བརྒྱུད་ལ་ཟླ་བའི་སྟེང་དུ་ཨོཾ་སྭཱ་ཧཱ། ཨོཾ་ཕ་སྭཱ་ཧཱ། ཨོཾ་པུཾ་སྭཱ་ཧཱ། ཨོཾ་ཝཱ་སྭཱ་ཧཱ། ཨོཾ་ཕི་སྭཱ་ཧཱ། ཨོཾ་ཡེ་སྭཱ་ཧཱ། ཨོཾ་ཡེ་སྭཱ་ཧཱ། ཨོཾ་ཕོ་སྭཱ་ཧཱ། ཞེས་པ་རྣམས་ལས་རིམ་པ་བཞིན་དུ་ཤར་དུ་མཐའ་ཡས། ལྷོར་འཇོག་པོ། ནུབ་ཏུ་ཀར་ཀོ། བྱང་དུ་རིགས་ལྡན། ཤར་ལྷོར་ནོར་རྒྱས་ཀྱི་བུ། ལྷོ་ནུབ་ཏུ་དུང་སྐྱོང་། ནུབ་བྱང་དུ་པདྨ། བྱང་ཤར་དུ་ཆུ་ལྷ་རྣམས་སྐུ་མདོག་དཀར་པོ་སྦྲུལ་མགོའི་གདེངས་ཀ་བདུན་དང་ལྡན་པ། སྐུ་སྨད་སྦྲུལ་མཇུག་ཏུ་འཁྱིལ་བ། སྐུ་སྟོད་ལྷའི་བུ་ཞལ་གཅིག་ཕྱག་གཉིས་པ་རང་འདྲའི་ཡུམ་གཡོན་ན་གནས་པའི་མགུལ་ནས་འཁྱུད་ཅིང་ཐལ་མོ་སྦྱར་བ། རིན་པོ་ཆེའི་བརྒྱན་ཅན་ནོ། །སྤྱན་འདྲེན་ལ་ལག་པ་གཉིས་ཀྱི་སོར་མོ་རྣམས་རྩེ་མོ་གཅུས་ཏེ་སྦྲུལ་མགོ་ལྟར་བྱས་པ་ཐམས་ཅད་ཐ་དད་དུ་བཟུང་བས་ཀླུ་རྣམས་སྤྱན་དྲངས་སོ། །ཕྱག་རྒྱ་ནི་གཙོ་འཁོར་སྔར་གྱི་ཕྱག་རྡོར་བཞིན་ནོ། །ལག་པ་གཉིས་སྟེང་འོག་ཏུ་བཞག་པ་སྟེང་འོག་བསྒྱུར་ཞིང་སྤྲིན་འཁྱུག་པ་བཞིན་བྱེད་པ་ནི་ཀླུའི་འོ། །འཇིགས་བྱེད་ཆེན་མོ་དགུས་བསྐོར་བའི་
དཀྱིལ་འཁོར་ནི། ནང་དུ་འཁོར་ལོ་སྔོན་པོ་རྩིབས་བརྒྱད་པའི་ལྟེ་བར་སེང་གེའི་ཁྲི་དང་པད་ཉིའི་སྟེང་དུ་ཨོཾ་བཛྲ་སཏཱ་ཀྲོ་དྷ་ཨ་ན་ལན་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་ཝ་བི་དྲ་ཝ་སརྦ་ཨ་པཱ་ཡ་ནཱ་ཤ་ཡ་ཧ་ར་ཧ་ར་པྲ་ཎཾ་ཧཱུྃ་ཕཊ་ལས་བདག་ཉིད་ཁྲོ་བོ་ཁམས་གསུམ་རྣམ་རྒྱལ་སྐུ་མདོག་སྔོན་པོ་དབུ་དང་ཕྱག་མཐའ་ཡས་པ། སྦྲུལ་དང་མི་སྡུག་པའི་བརྒྱན་དང་། སྟག་ལྤགས་ཀྱི་ཤམ་ཐབས་ཅན། རྩ་བའི་ཕྱག་གཉིས་ཧཱུྃ་མཛད་ཀྱི་ཕྱག་རྒྱ་ལྷག་མའི་གཡས་རྣམས་མཚོན་ཆ་སྣ་ཚོགས། གཡོན་རྣམས་མགོ་ཐོད་ཤས་གང་བ་བསྣམས་པ། མ་རུངས་བའི་རྒྱུ་མ་དྲངས་ཏེ་གསོལ་བ། གཡས་བསྐུམ་གཡོན་བརྐྱང་གིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། དེའི་ཞབས་དྲུང་དུ་པདྨ་དང་ཉི་མ་ལ། ཨོཾ་བྷཻ་ར་ཨོཾ་བྷཻ་ར་བྷི་སྭཱ་ཧཱ། འཇིགས་བྱེད་ཀྱི་བདག་པོ་ཆེན་པོ་ཁྲོས་པ་འཇིགས་བྱེད་མ་དང་བཅས་པ།་་་་སྟག་ལུང་ལུགས་ལ་སྐུ་མདོག་མཐིང་ག་ཞལ་གཅིག་ཕྱག་གཉིས་གྲི་ཐོད། སྤྱན་གསུམ་མཆེ་བ་གཙིགས་པ་གླང་ཀོ་གྱོན་པ། དབུ་ལ་ཐོད་པ་དང་ཟླ་ཚེས་ཀྱིས་བརྒྱན་པ། མཚན་མ་བསྒྲེང་བ་བཙུན་མོ་ལ་སྟོན་པ། དེའི་གཡོན་དུ་ཡུམ་དཀའ་ཐུབ་བཟློག་ཚུལ་ཡབ་ལྟ་བུའོ། །རྩིབས་བརྒྱད་ལ་པདྨ་དང་ཉི་མ་ལ།
རྩིབས་ཤར་དུ་ཨོཾ་བྷ་སྭཱ་ཧཱས་དབང་ཕྱུག་འཇིགས་བྱེད། ལྷོར་ཨོཾ་བྷི་སྭཱ་ཧཱས་དབང་པོ་འཇིགས་བྱེད། ནུབ་ཏུ་བྷུ་སྭཱ་ཧཱས་ཚངས་པ་འཇིགས་བྱེད། བྱང་དུ་ཨོཾ་བྷཻ་སྭཱ་ཧཱས་ཁྱབ་འཇུག་འཇིགས་བྱེད། ཤར་ལྷོར་ཨོཾ་བྷཻ་སྭཱ་ཧཱས་འདོད་པའི་དབང་ཕྱུག་འཇིགས་བྱེད། ལྷོ་ནུབ་ཏུ་ཨོཾ་བྷོ་སྭཱ་ཧཱས་ཚོགས་བདག་འཇིགས་བྱེད། ནུབ་བྱང་དུ་ༀབྷཾ་སྭཱ་ཧཱས་བྷངྒི་རི་ཏི་འཇིགས་བྱེད། བྱང་ཤར་དུ་ཨོཾ་བྷ་སྭཱ་ཧཱས་གཞོན་ནུ་གདོང་དྲུག་འཇིགས་བྱེད་རྣམས་ཀྱང་རང་རང་གི་ཆུང་མ་དང་བཅས་པ། ཡབ་ཡུམ་བཅོ་བརྒྱད་པོ་ཐམས་ཅད་ཀྱང་སྐུ་མདོག་ནག་པོ་གླང་པོ་ཆེའི་ཀོ་རློན་གྱོན་པ་རབ་ཏུ་ཁྲོས་པ་མཆེ་བ་གཙིགས་པ་སྤྱན་གསུམ་དམར་བ། གཡས་གྲི་གུག་དང་གཡོན་ཐོད་པ་ཁྲག་གིས་བཀང་བ་འཛིན་པ། ཡབ་ཀྱི་གཡོན་ན་ཡུམ་གནས་པའི་མགུལ་ནས་ཡབ་ཀྱི་གཡོན་པས་འཁྱུད་ཅིང་ཡུམ་གྱི་གཡས་པས་ཡབ་ཀྱི་མགུལ་ནས་འཁྱུད་པ། སྒོ་བཞིར་ཛཿཧཱུྃ་བཾ་ཧོལས་རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། །ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ་བཞི་
ཀའང་ཁྲོས་པའོ། །ཕྱག་རྒྱུ་ནི་གཙོ་བོ་སྔར་བཞིན་ནོ། །གཡས་རྡོ་རྗེ་ཁུ་ཚུར་གྱི་མཐེའུ་ཆུང་གྲི་གུག་ལྟར་བྱས་པ། གཡོན་ཐོད་པ་འཛིན་པའི་ཚུལ་སྙིང་གར་བཟུང་བ་འཁོར་ཡུག་གི་དགུ་པོ་དང་། ལྷ་བརྒྱད་ཀྱིས་བསྐོར་བའི་དཀྱིལ་འཁོར་ནི། ནང་དུ་འཁོར་ལོ་སྔོན་པོ་རྩིབས་བརྒྱད་པའི་ལྟེ་བར་སེང་གེའི་ཁྲི་དང་པད་ཟླའི་སྟེང་དུ། ཨོཾ་བཛྲ་སཏཱ་ཀྲོ་དྷ་ཨ་ན་ལརྐ་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་ཝ་བི་དྲ་ཝེ་སརྦ་ཨ་པཱ་ཡ་ནཱ་ཤ་ཡ་ཧ་ར་ཧ་ར་པྲ་ཎཾ་ཧཱུྃ་ཕཊ་ལས་བདག་ཉིད་ཁྲོ་བོ་འཇིག་རྟེན་གསུམ་རྒྱལ་སྐུ་མདོག་སྔོན་པོ་དབུ་དང་ཕྱག་མཐའ་ཡས་པ། ཆ་ལུགས་དང་སྡུག་པའི་རྒྱན་དང་། སྟག་ལྤགས་ཀྱི་ཤམ་ཐབས་ཅན། རྩ་བའི་ཕྱག་གཉིས་ཧཱུྃ་མཛད་ཀྱི་ཕྱག་རྒྱ། ལྷག་མའི་གཡས་རྣམས་མཚོན་ཆ་སྣ་ཚོགས། གཡོན་རྣམས་མགོ་ཐོད་ཤས་གང་བ་བསྣམས་པ། མ་རུངས་པའི་རྒྱུ་མ་དྲངས་ཏེ་གསོལ་བ། ཞབས་གཡས་བསྐུམ་གཡོན་བརྐྱང་གིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གྱུར། ཨོཾ་རུ་སྭཱ་ཧཱས་ཤར་དུ་དབང་ཕྱུག་ཆེན་པོ་དཀར་པོ་མགྲིན་པ་སྔོ་བ་གླིང་ལ་ཞོན་ཞིང་གཡས་རྩེ་གསུམ་དང་གཡོན་ཐོད་པ་འཛིན་པ་རིལ་པའི་ཐོར་ཅོག་ལ་ཐོད་ཕྲེང་དང་ཟླ་ཕྱེད་ཀྱིས་བརྒྱན་པ། སྦྲུལ་
གྱིས་མཆོད་ཕྱིར་ཐོགས་པ་ཅན། ཨོཾ་ཨི་སྭཱ་ཧཱས་ལྷོར་ལྷའི་དབང་པོ་སེར་པོ་གླང་པོ་ཆེ་ས་སྲུང་དཀར་པོ་ལ་ཞོན་ཞིང་གཡས་རྡོ་རྗེ་དང་གཡོན་ནུ་མ་འཛིན་པ། ཨོཾ་ཨོཾ་སྭཱ་ཧཱས་ནུབ་ཏུ་ངང་པ་ལ་ཚངས་པ་སེར་པོ་ཞལ་གཅིག་ཕྱག་གཉིས་པ། གཡས་དང་པོས་བགྲང་ཕྲེང་དང་། གཡོན་དང་པོས་པདྨ། གཡས་འོག་མས་དབྱུག་པ་དང་། གཡོན་འོག་མས་སྤྱི་བླུགས་བཟུང་ནས་ཐལ་མོ་སྦྱར་བ། ཨོཾ་བྷི་སྭཱ་ཧཱས་བྱང་བྱ་ཁྱུང་ལ་ཁྱབ་འཇུག་ནག་པོ་ཕྱག་བཞིའི་དང་པོ་གཉིས་ཀྱིས་འཁོར་ལོ་དང་དུང་། འོག་མ་གཉིས་ཀྱིས་མདུང་ཐུང་དང་སཱ་རང་གའི་གཞུ་བཟུང་ནས་ཐལ་མོ་སྦྱར་བ། ཨོཾ་ཀ་སྭཱ་ཧཱས་ཤར་ལྷོར་པད་ཉི་ལ་འདོད་པའི་དབང་ཕྱུག་དམར་པོ་མདའ་གཞུ་འཛིན་པ། ཨོཾ་ག་སྭཱ་ཧཱ་དང་ལྷོ་ནུབ་ཏུ་བྱི་བ་ཚོགས་བདག་དཀར་པོ་གླང་པོ་ཆེའི་གདོང་པ་ཅན། ཕྱག་བཞི་གཡས་གཉིས་ཀྱིས་རྩེ་གསུམ་དང་ལ་དུ། གཡོན་གཉིས་ཀྱིས་དགྲ་སྟ་དང་ལ་ཕུག་འཛིན་པ། སྦྲུལ་གྱིས་མཆོད་ཕྱིར་ཐོགས་གསོལ༔ ཨོཾ་ཤྲཱི་སྭཱ་ཧཱས་ནུབ་བྱང་དུ་པདྨ་ཤྲཱིངྒི་རེ་ཏི་ནག་པོ་ཤིན་ཏུ་སྐེམ་པ་ཕྱག་བཞི་དང་པོ་གཉིས་ཀྱིས་ཕྲེང་བ་དང་སྤྱི་བླུགས་འཛིན་ཅིང་། འོག་མ་གཉིས་ཀྱིས་ཐལ་མོ་སྦྱར་བ།
ཨོཾ་ཀ་སྭཱ་ཧཱས་བྱང་ཤར་དུ་རྨ་བྱ་ལ་གདོང་དྲུག་དམར་པོ་ཞལ་དྲུག་ཕྱག་དྲུག་པ་གཡས་དང་པོ་གཉིས་ཀྱིས་ཤག་ཏི་དང་རྡོ་རྗེ། གཡོན་དང་པོ་གཉིས་ཀྱིས་ཁྱིམ་བྱི་དང་དྲིལ་བུ་འཛིན་པ། འོག་མ་གཉིས་སྤྱི་བོར་ཐལ་མོ་སྦྱར་བ། བརྒྱད་པོ་ཐམས་ཅད་ཀྱང་རང་འདྲའི་ཡུམ་གཡོན་ན་གནས་པ་དང་བཅས་པའོ། །སྒོ་བཞིར་ཛཧཱུྃ་བཾ་ཧོལས་རྡོ་རྗེ་ལྕགས་ཀྱུ་དཀར་པོ་ལྕགས་ཀྱུ་འཛིན་པ། རྡོ་རྗེ་ཞགས་པ་སེར་པོ་ཞགས་པ་འཛིན་པ། རྡོ་རྗེ་ལྕགས་སྒྲོག་དཀར་དམར་ལྕགས་སྒྲོག་འཛིན་པ། རྡོ་རྗེ་འབེབས་པ་སྣ་ཚོགས་མདོག་གཡས་དྲིལ་བུ་གཡོན་གདན་ལ་བརྟེན་པ། ཕྱིའི་འཁོར་ཡུག་ལ་ཤར་དུ་སྟོབས་བཟང་དཀར་པོ་རལ་གྲི་དང་ཐོང་གཤོལ་འཛིན་པ། ལྷོར་བྱ་ཀོ་ཀི་ལའི་ཤིང་རྟ་ལ་སྐྱལ་བར་བྱེད་པ་ལྗང་གུ་ཕྱག་བཞི་གཡས་གཉིས་ན་མེ་ཏོག་གི་ཕྲེང་བ་དང་མདའ། གཡོན་གཉིས་ན་བཏུང་བའི་སྣོད་དང་གཞུ་འཛིན་པ། ནུབ་ཏུ་རྩེ་ནའི་ཤིང་རྟ་ལ་སྦྲང་རྩིར་བྱེད་པ་དཀར་པོ་ཕྱག་བཞི་གཡས་གཉིས་ཀྱིས་ཆུ་སྲིན་གྱི་རྒྱལ་མཚན་དང་མདའ་གཡོན་གཉིས་ན་བཏུང་བའི་སྣོད་དང་གཞུ་འཛིན་པ། བྱང་དུ་སྤྲེའུ་ལ་སྤྱོད་ཀྱི་ལྷ་དཀར་པོ་ཕྱག་བཞིའི་གཡས་གཉིས་ཀྱིས་
མདའ་དང་རལ་གྲི། གཡོན་གཉིས་ན་བཏུང་བའི་སྣོད་དང་གཞུ་འཛིན་པའོ། །ཕྱག་རྒྱ་ནི་གཙོ་བོ་སྔར་བཞིན་ནོ། །གཡོན་སྙིང་གར་ཐོད་པ་འཛིན་པའི་ཚུལ་བྱས་ཤིང་གཡས་པའི་མཐེའུ་ཆུང་མཐེ་བོས་མནན་པས་སོར་མོ་དབུས་མ་གསུམ་རྩེ་གསུམ་གྱི་ཚུལ་དུ་བྱས་པ་ཕྲག་པའི་ཐད་དུ་བཟུང་བ་དང་། ལག་པ་གཉིས་རྩེ་གསུམ་གྱི་ཚུལ་དུ་བྱས་ནས་གཡོན་དཀུར་བརྟེན་པ་གཡས་སྙིང་གར་བཟུང་བ་དང་། གཡས་ཁུ་ཚུར་མཐེ་བོང་བསྒྲེང་བའི་སྟེང་དུ་གཡོན་པའི་སོར་མོ་རྣམས་བསྡུས་པ་པདྨ་ཁ་སྦུབ་པའི་གཟུགས་བཞག་པ་དང་། གཡོན་པའི་སོར་མོ་ཕྲལ་ཏེ་བརྐྱང་པ་འཁོར་ལོའི་ཚུལ་ལྟར་བྱ། གཡས་རྩེ་གསུམ་ལྟར་དབྱུག་གུ་གསུམ་པར་བྱས་པ་དང་། གཞུ་འགེངས་པའི་ཚུལ་དང་། གཡས་རྩེ་གསུམ་གྱི་ཕྱག་རྒྱ་དང་། ལག་པ་གཡས་པས་ཕྲེང་བ་འཛིན་པའི་ཚུལ་ཐུར་དུ་བརྐྱང་བ་དང་། གཡོན་པའི་གུང་མོ་གཉིས་བརྐྱང་མདའི་ཚུལ་གྱིས་སྟེང་དུ་མཐེ་བོང་དང་མཛུབ་མོ་རྩེ་སྤྲད་པ་གཞུའི་ཚུལ་དུ་བཞག་པ་རྣམས་ལྷ་བརྒྱད་ཀྱིས་སོ། །སྟོབས་བཟང་ལ་སོགས་པ་འཇིག་རྟེན་པ་སྤྱིའི་ཕྱག་རྒྱའོ། །རྒྱུད་ལས་ཕྱག་རྒྱ་འདི་རྣམས་མ་གསུངས་པས་མ་བྱས་ཀྱང་ཆོག །བུམ་པ་གཉིས་ལ་བསངས་ཆུ་གཏོར་ནས། ལས་སྔགས་ཀྱིས་བསང་། ཨོཾ་སྭ་བྷ་ཝས་སྦྱངས། །སྟོང་པའི་ངང་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཧཱུཾ་ལས་རིན་པོ་ཆེའི་བུམ་པ་གཉིས། ལྟོ་བ་ཡངས་ཤིང་རྒྱ་ཆེ་བ་མགྲིན་པ་རིང་བ་མཆུ་འཕྱང་བ། ལྷ་
རྫས་ཀྱི་གོས་ཀྱིས་མགྲིན་པ་དཀྲིས་པ། དཔག་བསམ་ཤིང་གིས་ཁ་བརྒྱན་པ། ལྔ་ཕྲག་ལྔ་ཡི་རྫས་དང་། ཡན་ལག་བརྒྱད་ལྡན་ཆུས་སུམ་གཉིས་གང་བར་གྱུར། ཨོཾ་ཏཔེ་ཏཔེ་མ་ཧཱ་ཏཔེ་སྭཱ་ཧཱ། ལན་གསུམ་བརྗོད་པ་དང་། ལྷའི་ཆུ་བོ་གངྒཱ་ནས་ཆུ་རྒྱུན་བབས་པས། བུམ་པའི་ནང་གི་ཆུ་ལ་ཐིམ་པས་འདྲེས་ཤིང་དབུས་སུ་གཙོ་བོ་ཐམས་ཅད་ཀྱི་གནས་སུ་སྣ་ཚོགས་པདྨ་དང་། ཞི་བ་རྣམས་ལ་ཟླ་བ་དང་ཁྲོ་བོ་རྣམས་ལ་ཉི་མའི་གདན་རྣམས་ཀྱི་སྟེང་དུ། སྐད་ཅིག་གིས་སྒྲེའི་ལྷ་ཚོགས་ཞལ་ཕྱག་རྒྱན་ཆ་ལུགས་སྔར་སྨོས་མ་ཐག་པའི་མཚན་ཉིད་ཅན་དང་། ལས་བུམ་དུ་ཀཱི་ལས་རྡོ་རྗེ་གནོད་སྦྱིན་ནག་པོ་ལྟོ་བ་ཡངས་ཤིང་རྒྱ་ཆེ་བ་ཕྱག་གཉིས་ཀྱི་མཆེ་བ་ཞལ་གྱི་གྲྭ་གཉིས་སུ་འཛིན་པ་ལྷ་ཚོགས་ཐམས་ཅད་ཀྱི་དཔྲལ་བར་ཨོཾ་དཀར་པོ་མགྲིན་པར་ཨཱཿ༔དམར་པོ་ཐུགས་ཀར་ཧཱུཾ་སྔོན་པོ། སླར་རང་རང་གི་ཐུགས་ཀ་ནས་འོད་ཟེར་འཕྲོས་པས་རྗེའི་དཀྱིལ་འཁོར་གྱི་ལྷ་ཚོགས་བཛྲ་ས་མཱ་ཛཿ ཧཱུྃ། མ་ལུས་སེམས་ཅན་ཀུན་གྱིས་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་
བཅས་གནས་འདིར་གཤེགས་སུ་གསོལ། །ཞེས་དང་། འཇིག་རྟེན་པའི་དཀྱིལ་འཁོར་རིགས་དྲུག་ལ། དེའི་རྗེས་སུ། མགོན་པོ་ཀུན་གཤེགས་ཐུགས་དམ་ཅན། །ད་ལྟ་སྙིགས་མ་ལྔ་ཡི་གཟིགས་ཤིང་གཤེགས་པའི་གནས་ངན་ཀྱང་། །འདྲེན་པའི་བསྟན་པ་སྲུང་བ་དང་། །སེམས་ཅན་ཀུན་ལ་ཕན་གདག་ཅིང་། །དམ་ཚིག་ཅན་ལ་ཐུགས་རྩེ་བས། །ཚེ་འཁོར་བཅས་གཤེགས་སུ་གསོལ། །ཛཿཧཱུྃ་བཾ་ཧོཿ བྷ་ག་ཝན། ཨེ་ཧྱ་ཧི་མ་ཧཱ་ཀ་རུ་ཎི་ཀ་ཌི་ཤ་ཡ་ཧོཿ ས་མ་ཡ་ཧཱུཾ། ཞེས་པས་འཁོར་བཅས་སྤྱན་དྲངས། །ཨོཾ་བཛྲ་ཡཀྵ་ཧཱུྃ། །ཟློགིས་སྔགས་རྒྱས་བགེགས་བསྐྲད་ནས། ཨོཾ་སརྦ་ཏ་ཐཱ་ག་ཏ་ཨརྒྱུ་སོགས་ཀྱིས་མཆོད། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་པ། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་སརྦ་ཏ་ཐཱ་ག་ཏ་པདྨ་ཀ་མ་ལཱ་ཡེ་སྟེ། སླར་ཡང་དབང་ལྷ་རིགས་ལྔ་འཁོར་བཅས་སྤྱན་དྲངས་ནས་དབང་བསྐུར་བར་གྱུར་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་
བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། དབང་བསྐུར་སྐུ་གང་དྲི་མ་དག་ཆུ་ཡི་ལྷག་མ་ཡར་ལུད་པ་ལས། གཙོ་བོ་ལ་རིགས་ལྔ། ཕྱོགས་རྣམས་ལ་རང་རང་གི་གཙོ་བོས་དབུ་བརྒྱན་པར་གྱུར། གཙོ་བོ་རྣམས་ཀྱི་ཐུགས་ཀར་ཟླ་བའི་གདན་ལ་ས་བོན་ལ་རང་རང་གི་སྔགས་ཀྱིས་བསྐོར་བ་ལས། འོད་ཟེར་རིམ་པ་ལྔ་ལྔ་མཛོད་སྤུའི་སྒོ་ནས་ཐོན་བདག་དང་སེམས་ཅན་ཐམས་ཅད་ཀྱི་སྒྲིབ་པ་སྦྱང་བ་དང་། བསོད་ནམས་སྤེལ་བ་སོགས་ཕྲིན་ལས་གང་འདོད་འགྲུབ། བུམ་ལྷའི་སྐུ་ལས་བདུད་རྩིའི་རྒྱུན་བབ་བུམ་པ་གང་བར་གྱུར་པར་བསམས་ལ་བཟླ། ཞེས་འདས་དཀྱིལ་དྲུག་ལ་གཙོ་བོ་ཅི་མང་འཁོར་ཅུང་ཟད་བཟླས། འཇིག་རྟེན་པའི་དཀྱིལ་འཁོར་དྲུག་ལ་གཙོ་བོ་ཅུང་ཟད་དང་འཁོར་ཅི་མང་བཟླས། ཨོཾ་ཨཱཿ༔ཧཱུྃ། རང་ཉིད་དཀྱིལ་འཁོར་གྱི་གཙོ་བོའི་ལྷོཐུགས་ཀ་ནས་བྱེ་བའི་གཙོ་བོ་རྐྱང་པའི་སྐུར་དཀྱིལ་འཁོར་གྱི་ཤར་སྒོའི་ནང་དུ་འདུག་ནས། མདུན་བུམ་ལ་མཆོད་བསྟོད་བདག་འཇུག་པ་དང་། གཞན་ལ་དབང་བྱེད་པ་རྣམས་གསལ་བར་གྱུར། དེ་ནས་རྒྱས་པར་ནི་རབ་འབྱམས་མ་དང་། སྒེག་སོགས་བརྒྱད། དཔག་མེད་རྒྱལ་སྲིད་སྣ་བདུན། ཁ་དོག་མ་རྣམས་ཀྱིས་མཆོད། ཀུན་རིག་ལ་ཆོས་དབྱིངས་ཡེ་ཤེས་མ། སྐུ་གསུང་ཐུགས་ཡོན་ཏན་ཕྲིན་
ལས་བཞི་ལ་མཉམ་མེད་མ། ཕྱག་རྡོར་གཙོ་བོ་ཡིན་པ་ལ་ཆོས་ཉིད་སྟོང་པ་མས་བསྟོད། བསྡུ་ན་རབ་འབྱམས་མ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་ཆབ་དང་། །ཞལ་ཟས་རོལ་མོ་ཡོད་པ་དང་། །བདག་གིས་གུས་པས་བཤམས་པ་འདི། །ཇི་སྙེད་རྒྱལ་བ་སྲས་དང་བཅས། །དེ་སྙེད་རྣམས་ལ་བདག་འབུལ་ན། །ཐུགས་རྗེའི་མངའ་བ་ཁྱེད་རྣམས་ཀྱིས། །ཅི་བདེ་བར་ནི་བཞེས་ནས་ཀྱང་། །སེམས་ཅན་དོན་ཀུན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཨབྷཾ་པཱཏྱཾ་པུཊྚེ་དྷཱ་པེ་ཨཱཿ་ལོ་ཀེ་གནྡྷེ་ནེ་ཝི་ཏྱཱ་ཤབྟ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། ཞིང་འདིར་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བསྐང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེ་ཤེས་རིབ་ཅན་གྱིས་དབུལ། །ཨོཾ་སརྦ་ཏ་ཐཱ་ག་ཏ་སབྷ་པཱུ་ཛི་ཏེ་ཨཱཿཧཱུྃ། ཕྱོགས་དུས་ཀུན་ན་གཟུགས་སྒྲ་དྲི་རོ་རེག །འདོད་ཡོན་ཁྱད་པར་འཕགས་པ་ཅི་མཆིས་པ། །མོས་བློས་དཀྱིལ་འཁོར་ལྷ་ལ་བདག་འབུལ་ན། །བཞེས་ནས་བླ་མེད་གྲུབ་མཆོག་བསྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་རཱུ་པ་ཤབྷ་གྷནྡྷེ་རྭ་ས་སྤརེ་ཀ་མ་གུ་ན་བཛྲ་
པཱུ་ཛི་ཏེ་ཨཱཿ༔ཧཱུྃ། རྣམ་པར་སྣང་མཛད་རིགས་བཞི་ཡུམ་དང་བཅས། །སེམས་དཔའ་བཅུ་དྲུག་སྒེག་སོགས་སྒོ་བ་བཞི། །བསྐལ་བཟང་དཔེ་བྲལ་ཉན་རང་ཁྲོ་བོའི་ཚོགས། །ཕྱི་ཡི་འཁོར་ཡུག་ལ་གནས་ཕྱག་འཚལ་བསྟོད། །ཅེས་རྩ་བའི་དཀྱིལ་འཁོར་དང་། ཤཱཀྱའི་བདག་པོ་དགྱེས་མཛད་པའི། །ཐུབ་པའི་གཙོ་ལ་ཕྱག་འཚལ་བསྟོད། །ལག་ན་རྡོ་རྗེ་འཁོར་ལོས་སྒྱུར། །རྒྱལ་བའི་གཙུག་ཏོར་རྣམ་པར་རྒྱལ། །གཟི་བརྗིད་ཕུང་པོ་གདུགས་དཀར་པོ། །རྣམ་པར་འཐོར་དང་རྣམ་པར་འཇོམས། །ལྷ་མོ་བཞི་དང་སྒོ་མ་བཞི། །དཀྱིལ་འཁོར་ལྷ་ལ་ཕྱག་འཚལ་བསྟོད། །ཅེས་སྐུ་དཀྱིལ་དང་། དེ་བཞིན་གཤེགས་པ་ཚེ་དཔག་མེད། །ཕྱག་རྡོར་ནམ་སྙིང་སྤྱན་རས་གཟིགས། །རྡོ་རྗེ་ཁྲོ་བོ་ལྷ་མོ་བཞི། །སྒོ་བ་བཞི་ལ་ཕྱག་འཚལ་བསྟོད། །ཅེས་གསུང་དཀྱིལ་དང་། ཕྱག་ན་རྡོ་རྗེ་སྟོབས་པོ་ཆེ། །མགོན་པོ་མི་བསྐྱོད་རིན་ཆེན་ཏོག །ཆུ་སྐྱེས་པདྨ་གདོན་མི་ཟ། །མཆོད་ལྷ་སྒོ་བ་རྣམས་ལ་ཕྱག་འཚལ་བསྟོད། །ཅེས་ཐུགས་དཀྱིལ་དང་། འཁོར་ལོས་སྒྱུར་བ་ཀུན་ཏུ་བཟང་། །ཕྱག་རྡོར་ལ་སོགས་སེམས་དཔའ་བཞི། །རྣམ་གཟིགས་ལ་སོགས་སངས་རྒྱས་
བདུན་། །སེམས་དཔའི་བཅུ་དྲུག་བསྐལ་བཟང་སེམས། །ལྷ་བརྒྱད་གཟའ་བརྒྱད་རྒྱུ་སྐར་དང་། །རྒྱལ་ཆེན་ཕྱོགས་སྐྱོང་ཕྱག་འཚལ་བསྟོད། །ཅེས་ཡོན་ཏན་གྱི་དཀྱིལ་འཁོར་དང་། འཇིག་རྟེན་གསུམ་སྣང་ཁྲོ་བོ་ཆེ། །ཁྲོ་བོ་བརྒྱད་དང་སྲིན་མོ་བཞི། །གནོད་སྦྱིན་མོ་དང་སྒོ་བ་བཞི། །མེ་ལྟར་འབར་ལ་ཕྱག་འཚལ་བསྟོད། །ཅེས་ཕྲིན་ལས་ཀྱི་དཀྱིལ་འཁོར་དང་། ཕྱག་ན་རྡོ་རྗེ་འགྱིང་བཅས་པ། །ངལ་བསོ་དགེ་བ་གསེར་མདོག་ཅན། །གནས་སྲུང་ལྗང་གུ་པི་ཝཾ་བསྒྲེངས། །དཔའ་བོ་ལུས་འཕགས་རལ་གྲི་མགོས། །རྡོ་རྗེ་ཞགས་འཛིན་མིག་མི་བཟང་། །སྒོ་བ་བཞི་དང་བཅས་ལ་བསྟོད། །ཅེས་པ་དང་། ཕྱག་ན་རྡོ་རྗེ་སྟོབས་པོ་ཆེ། །བཀའ་འཁོར་ཕྱོགས་བཅུ་སྐྱོང་བ་ཡི། །གདོན་གྱི་རྒྱལ་པོ་ཕྱོགས་སྐྱོང་བཅུ། །སྒོ་བ་ཟབཞི་དང་བཅས་ལ་བསྟོད། །ཅེས་པ་དང་། མེ་ལྟར་འབར་བ་ཁྲོ་བོའི་རྒྱལ། །དྲག་ཤུལ་ཅན་གྱི་གཟའ་ཆེན་བརྒྱད། །རྒྱུ་སྐར་ལྷ་མོ་ཉི་ཤུ་བརྒྱད། །སྒོ་བ་བཞི་དང་བཅས་ལ་བསྟོད། །ཅེས་པ་དང་། མཐུ་སྟོབས་ཆེན་པོ་གསང་བའི་བདག །མཐའ་ཡས་འཇོག་པོ་སྟོབས་ཀྱི་རྒྱུ། །རིགས་ལྡན་ནོར་རྒྱས་དུང་སྐྱོང་དང་། །པདྨ་ཆུ་ལྷ་ཡུམ་དང་བཅས། །
ཀླུ་བརྒྱད་དཀྱིལ་འཁོར་ལྷ་ལ་བསྟོད། །ཅེས་དང་། མེ་ལྟར་འབར་བ་ཁྲོ་བོ་ཆེ། །འཇིག་རྟེན་འདི་ན་དབང་ཆེ་བ། །འཇིགས་བྱེད་དགུ་པོ་ཡུམ་དང་བཅས། །སྒོ་བ་བཞི་དང་བཅས་ལ་བསྟོད། །ཅེས་པ་དང་། མེ་ལྟར་འབར་བ་ཁྲོ་བོའི་རྒྱལ། །དབང་ཕྱུག་ཚངས་པ་བརྒྱ་བྱིན་དང་། །ཁྱབ་འཇུག་འདོད་ལྷ་ཚོགས་ཀྱི་བདྭག །བྷིང་གི་གདོང་དྲུག་སྟོབས་བཟང་དང་། །གིང་ཐོགས་ནག་པོ་དབང་ཕྱུག་དང་། །སྒོ་བ་བཞི་དང་བཅས་ལ་བསྟོད། །ཅེས་པ་ནས་ཆ་གསུམ་རྒྱས་པའམ།་བསྡུས་པ་ནི། ཨོཾ་ལས་རིན་ཆེན་སྣོད་དུ་གཏོར་མ་རྣམས། །ཨོཾ་ཡིག་ལས་བྱུང་བདུད་རྩིའི་རྒྱ་མཚོ་གྱུར། །ཨོཾ་ཨཱཿཧཱུཾ། དབང་པོ་ལ་སོགས་ཕྱོགས་བཅུ་སྐྱོང་བ་བཅུ། །རང་རང་བཙུན་མོ་བློན་པོ་འབངས་འཁོར་བཅས། །འདིར་གཤེགས་དགྱེས་པའི་གདན་ལ་བཞུགས་ནས་ཀྱང་། །སྔོན་གྱི་དམ་ཚིག་རྗེས་དགོངས་མཆོད་གཏོར་བཞེས། །ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་གྲིདྨ་དཾ་བ་ལི་བྱ་སྭཱ་ཧཱ། སརྦ་པཱུ་ཛ་པྲ་ཏིཙྪ་སྭཱ་ཧཱ། ཕྱོགས་བཅུ་སྐྱོང་བའི་དབང་པོ་ཆེན་པོ་བཅུ། །ཕྱོགས་བཅུའི་གདོན་གྱི་ཚོགས་དང་བཅས་པ་ལ། །མཆོད་ཅིང་བསྟོད་དེ་ཕྱག་འཚལ་
གཏོར་མ་འབུལ། །སོ་སོར་དགྱེས་པའི་ཡིད་ཀྱིས་བཞེས་ནས་ཀྱང་། །རང་རང་ཕྱོགས་རྣམས་ལེགས་པར་སྐྱོང་བ་དང་། །དངོས་གྲུབ་སྩོལ་ཞིང་བགེགས་རྣམས་ཞི་བར་མཛོད། །ཨོཾ་ད་ཤ་དིཀ་ལོ་ཀ་པཱ་ལ་གཙྪ། སྡེ་བརྒྱད་ལ་སོགས་གདོན་གྱི་རིགས་རྣམས་དང་། །གང་དག་འབྱུང་པོ་མཐུ་ཆེན་རྫུ་འཕྲུལ་ཅན། །འཁོར་གཡོག་བུ་སྨད་བཅས་པ་ཐམས་ཅད་ཀུན། །ཕན་པའི་སེམས་ཀྱིས་འདིར་གཤེགས་མཆོད་གཏོར་བཞེས། །ཨོཾ་སརྦ་ལོ་ཀ་པཱ་ལ་གྲིཉྩ་དཾ་བ་ལིཾ་ཏྱཱ་སྭཱ་ཧཱ། སརྦ་པཱུ་ཛ་པྲ་ཏཱིཙྪ་སྭཱ་ཧཱ། འབྱུང་པོ་གང་དག་ས་འོག་ས་སྟེང་དང་། །ཆུ་དང་བར་སྣང་ཁམས་ན་གནས་པ་རྣམས། །མགུ་བར་གྱིས་ལ་མཆོད་སྦྱིན་འདི་སྣོམས་ལ། །ལས་རྣམས་འགྲུབ་ཅིང་བར་ཆད་ཞི་བར་མཛོད། ཨོཾ་སརྦ་བྷུ་ཏ་གཙྪ། རང་ཉིད་རྡོ་རྗེ་ཁྲོ་བོ་གསལ་བར་གྱུར། །བླ་མ་དཀོན་མཆོག་གསུམ་གྱི་བདེན་པའི་མཐུས། །གནོད་བྱེད་བགེགས་གྱི་ཚོགས་རྣམས་འདིར་ཁུག་ཅིག །ཊཱཀྐི་ཧཱུཾ་ཛཿ སརྦ་བིགྷ་ནཱན་གྲིཉྩ་དཾ་བ་ལིཾ་ཏྱཱ་སྭཱ་ཧཱ། སརྦ་པཱུ་ཛ་པྲ་ཏཱིཙྪ་སྭཱ་ཧཱ། གནོད་བྱེད་ལན་ཆགས་བགེགས་ཀྱི་ཚོགས་རྣམས་ཀུན། །གཏོར་མ་འདི་ཁྱེར་གནོད་འཚེའི་བསམ་པ་སྤོང་། །ལུས་ལ་
གནོད་པའི་ནད་དེ་ཕྱུང་ནས་སུ། །གདོན་ཁྱོད་རང་གི་གནས་སུ་ད་སོང་ཞིག །སརྦ་བིགྷཱན་གཙྪ། མཐར་བུམ་ལྷ་འོད་དུ་ཞུ་བ་བྱང་སེམས་ཀྱི་ངོ་བོ་རོ་གཅིག་པར་གྱུར། རྡོ་རྗེ་གནོད་སྦྱིན་གྱི་དཀྱིལ་འཁོར་ཆེན་པོའི་བྱ་བ་མཐར་མ་ཕྱིན་བར་བགེགས་རྣམས་བཟློག་པའི་ཕྲིན་ལས་མཛད་དུ་གསོལ། དེ་ནས་བདག་འཇུག་རྒྱས་བསྡུས་གང་རུང་བླངས་ལ། རྡོ་རྗེ་བསྡམ་ཏྲི་གཉིས་གཤིབ་རྡོ་རྗེ་འཛིན་པའི་རྒྱས། ཨོཾ་བཛྲ་དྷ་ར། རཏྣ་དྷ་ར། པདྨ་དྷ་ར། བི་ཤོ་དྷ་ར་ཏ་ཐཱ་ག་ཏ་ས་མ་ཡ་མཱ་ཏི་ཀྲ་མ་ཏི་ཏ་ཐཱ་ག་ཏ་དྷ་ར་ས་མ་ཡོཉཧཾཿ བྱབ་ཁྲུས་གདོན་ཁྲོལ་སྦྱིན་སྲེག །ཕྱིར་བཟློག་སོགས་ཕྲིན་ལས་གང་དགོས་བྱའོ། །རྗེས་ཆོག་ནི། མཆོད་བསྟོད་ཅི་རིགས་བྱས་ལ། དཀོན་མཆོག་རིན་ཆེན་གསུམ་ལ་ཕྱག་འཚལ་ལོ། །དགེ་བ་འདི་ཡིས་ཉེ་བར་མཚོན་ནས་ནི། །སེམས་ཅན་རྣམས་ཀྱིས་དུས་གསུམ་བསགས་པ་ཡི། །ཟག་བཅས་ཟག་མེད་ཟུང་འཇུག་དགེ་བ་རྣམས། །བླ་མེད་བྱང་ཆུབ་ཆེན་པོར་བསྔོ་བར་བགྱི། །འགྲོ་ཀུན་ཐམས་ཅད་མཁྱེན་པ་ཐོབ་པར་ཤོག །ཆོས་དབྱིངས་བྱང་ཆུབ་སེམས་ཀྱི་དཀྱིལ་འཁོར་དུ། །བདག་སོགས་སེམས་ཅན་ཐམས་ཅད་ཀྱིས། །དུས་གསུམ་བསགས་དང་རྟོགས་པ་ཡིས།
འགྲོ་དྲུག་སེམས་ཅན་མ་ལུས་པ། །སྐུ་ལྔ་ཡོངས་རྫོགས་སངས་རྒྱས་མྱུར་ཐོབ་ཤོག །སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་བཏབ་བསྔོ་བ་སྨོན་ལམ་འགྲུབ་པར་ཤོག །དེ་ལྟར་འགྲུབ་པ་ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་འགྲུབ་པར་གྱུར་ཅིག །དཀོན་མཆོག་གསུམ་ལ་ཕྱག་འཚལ་ལོ། །ཏདྱ་ཐཱ། པཉྩནྡྲི་ཡ་ཨ་བ་བོ་དྷ་ནེ་སྭཱ་ཧཱ། སྨོན་ལམ་ཟབཏབ། ལྷ་ཐམས་ཅད་ཀྱི་དམ་རྒྱ་སོ་སོའི་སྔགས་ཀྱི་མཐར། བཛྲ་མུཿ ཞེས་བཀྲོལ་ལ་སེ་གོལ་གཏོགས། རྡོ་རྗེ་འཛིན་པའི་རྒྱ་བཅིངས་ཏེ་དཀྱིལ་འཁོར་ལ་བསྐོར་བ་ལན་གསུམ་བྱ་ཞིང་ཡི་གེ་བརྒྱ་པས་ལྷག་ཆད་ཁ་བཀང་། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་བགྱིད་བརྩལ་བ། །དེ་ཀུན་མགོན་པོས་བཟོད་པར་གསོལ། །ཨོཾ། ཁྱེད་ཀྱིས་སེམས་
ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ བདག་མདུན་བུམ་པའི་ཡེ་ཤེས་པ་རྣམས་རང་བཞིན་གྱི་གནས་སུ་གཤེགས། སྤྲུལ་པའི་དམ་ཚིག་པ་རྣམས་རང་གི་ལུས་ལ་ཞུགས་པར་གྱུར། བསྡུ་བའི་ཕྱག་རྒྱས་རས་བྲིས་ཡིན་ན་གཤེགས་གསོལ་མི་བྱ་ཞིང་བརྟན་བཞུགས་བྱ་ཞིང་ཤེས་པ་བརྗོད། ཅེས་ཨ་རཱ་གས་བསྒྲིགས་པའི་ཡེ་གེ་པ་ནི་བརྩོན་འགྲུས་སོ།། ཨོཾ་ན་མོ་བྷ་ག་ཝ་ཏེ། སརྦ་དུརྒ་ཏེ་པ་རི་ཤུ་དྷ་ནི་རཱ་ཛ་ཡ། ཏ་ཐཱ་ག་ཏ་ཡ། །ཨདྷ་ཏེ་སམྱཀཾ་བུདྡྷ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨ་ཨ་ཝ་ར་ཎ་བི་ཤོ་དྷ་ནེ་སྭཱ་ཧཱ། སྦྱོངས་ཤིག་སྦྱོངས་ཤིག །སྡིག་པ་ཐམས་ཅད་སྦྱོངས་ཤིག་རྣམ་པར་དག་པ། ལས་ཀྱི་སྒྲིབ་པ་ཐམས་ཅད་སྦྱོང་བའི་གཞི་ཚུགས་ཤིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།