སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་གི་སྤྱི་བཤད་མཐོང་བ་དོན་གསལ།
སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་གི་སྤྱི་བཤད་མཐོང་བ་དོན་གསལ་ཞེས་བྱ་བ་བཞུགས་པའི་དབུའི་གཟིགས་ཕྱོགས་ལགས་སོ།།
འོ་ན་ད་ལམ་ཁྱེད་རྣམས་ལ། དབང་བསྐུར་བའི་ཐོག་མར་ལོས་རྒྱུས་ཟུར་ཙམ་ཞིག་ཞུ་ན། བཅོམ་ལྡན་འདས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཐམས་ཅད་ཐེག་པ་ཆེ་ཆུང་གཉིས་སུ་འདུས་པ་ལས། འདི་ཐེག་པ་ཆེན་པོ་ཡིན། དེ་ལས་རྒྱུ་འབྲས་ཀྱི་ཐེག་པ་གཉིས་ལས་འདི་འབྲས་བུའི་ཐེག་པ་ཡིན། དེ་ལ་རྒྱུད་སྡེ་བཞི་ཡོད་པ་ལས་འདི་རྣལ་འབྱོར་རྒྱུད་ཡིན། འདི་ཡི་ལུགས་ལ་བདག་ཅག་གི་སྟོན་པ་བཅོམ་ལྡན་འདས་ཤཱཀྱ་ཐུབ་པ་དེ།། དང་པོར་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་པ་གྲངས་མེད་གསུམ་དུ་སྐྱེ་བ་སྣ་ཚོགས་བཞེས་
ནས་བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་ཏེ། ཚོགས་སྦྱོར་ནས་བཟུང་སྟེ་ས་བཅུ་རིམ་གྱིས་བསྒྲོད་ནས། ས་བཅུ་པའི་གནས་སྐབས་སུ་སངས་རྒྱས་ཐམས་ཅད་ཀྱི་འོད་ཟེར་ཆེན་པོས་དབང་བསྐུར་བ་ཐོབ་ནས་སྙོམས་འཇུག་དགུ་ལ་རིམ་པར་སྙོམས་པར་ཞུགས་པས། ཚོགས་ཡོངས་སུ་རྫོགས་ནས་བྱང་ཆུབ་སེམས་དཔའ་དོན་ཐམས་ཅད་འགྲུབ་པ་ཞེས་བྱ་བར་འགྱུར། དེ་ནས་སངས་རྒྱས་ཚུལ་ལ་ལུགས་གཉིས་ཏེ། སློབ་དཔོན་ཤཱཀྱ་བཤེས་གཉེན་གྱི་ལུགས་ལ། དགའ་ལྡན་དུ་དམ་པ་ཏོག་དཀར་དུ་སྐྱེ་བ་བཞེས་དེ་ནས་ཟས་གཙང་གི་སྲས་སུ་
འཁྲུངས་ནས། དགུང་ལོ་ཉི་ཤུ་རྩ་དགུའི་བར་དུ་ཁབ་ཏུ་བཞུགས། དེ་ནས་རབ་ཏུ་བྱུང་སྟེ་རྣམ་སྨིན་གྱི་ལུས་ཆུ་བོ་ནེ་རཉྫ་ནའི་འགྲམ་དུ་བཞག །ཡེ་ཤེས་ཀྱི་སྐུ་འོག་མིན་དུ་བྱོན་ནས། ཆོས་ཉིད་འོད་གསལ་དང་གདན་པདྨ་དང་། གསུང་ཡིག་འབྲུ་དང་། ཐུགས་ཕྱག་མཚན་དང་། སྐུ་ཡོངས་རྫོགས་ཏེ་མངོན་པར་བྱང་ཆུབ་པ་ལྔའི་ཚུལ་གྱིས་ཆོས་སྐུ་མངོན་དུ་མཛད་ན། ལོངས་སྐུའི་གཟུགས་ཀྱིས་རི་རབ་ཀྱི་རྩེར་རྣལ་འབྱོར་གྱི་རྒྱུད་གསུངས་ནས། སླར་ཡེ་ཤེས་ཀྱི་སྐུ་རྣམ་སྨིན་ལུས་ལ་ཞུགས་ཏེ། སངས་རྒྱས་ཀྱི་མཛད་པ་ཚོརྣམས་བསྟན་པར་བཞེད། སློབ་དཔོན་ཀུན་དགའ་སྙིང་པོའི་ལུགས་ལ། བྱང་ཆུབ་སེམས་དཔའ་དོན་ཐམས་ཅད་གྲུབ་པ་དེ་འོག་མིན་དུ་སྐྱེ་བ་བཞེས་ནས་སངས་རྒྱས་ལས་དར་དཔྱང་གི་དབང་ཐོབ་སྟེ། མི་གཡོ་བའི་ཏིང་ངེ་འཛིན་ལ་བཞུགས་ཏེ། སངས་རྒྱས་ཐམས་ཅད་ཀྱིས་ཨོཾ་བཛྲ་ཨུད་ཏིཥྛ་གསུངས་ནས་བསླང་སྟེ། འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་པའི་སྐུ་ཏིལ་གྱི་གང་བུ་ཁ་བྱེ་བ་ལྟར་གཟིགས་པས། གདམས་ངག་བསྟན་ཏེ། ཉིད་ཀྱི་ཐུགས་ཀར་ཀུན་རྫོབ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་ཉ་གང་བའི་
སྟེང་དུ། དོན་དམ་བྱང་ཆུབ་སེམས་ཀྱི་རྡོ་རྗེ་རྩེ་ལྔ་པ་མཐོང་བ་ནས་བཟུང་སྟེ། རྡོ་རྗེ་དབྱིངས་ཞེས་མིང་གི་དབང་དང་། དབང་རྣམས་རིམ་གྱིས་བསྐུར་ནས་འོག་མིན་དུ་སངས་རྒྱས་ཏེ། རི་རབ་ཀྱི་རྩེར་བྱོན་ཏེ་རྩ་རྒྱུད་གསུངས། སླར་དམ་པ་ཏོག་དཀར་དུ་སྐྱེ་བ་བཞེས། དེ་ནས་ཟས་གཙང་སྲས་སུ་འཁྲུངས་ནས་ཛམ་བུའི་གླིང་དུ་སངས་རྒྱས་ཚུལ་བསྟན་པར་བཞེད་དོ། །རྩ་བའི་རྒྱུད་ནི་དེ་ཉིད་བསྡུས་པ་ཡིན་ལ། དེ་ཉིད་བསྡུས་པ་དང་། དེའི་རྒྱུད་ཕྱི་མ་དང་། ཕྱི་མའི་ཕྱི་མ་དང་། བཤད་པའི་རྒྱུད་རྡོ་རྗེ་རྩེ་མོ་དང་། ཐམས་ཅད་གསང་བ་གཉིས། ཆ་མཐུན་གྱི་རྒྱུད། དཔལ་མཆོག་དང་པོ་དང་། འཕྲོས་པའི་རྒྱུད་ལ་རྡོ་རྗེ་སྙིང་པོ་རྒྱན་གྱི་རྒྱུད། གསང་བ་ནོར་བུ་ཐིག་ལེའི་རྒྱུད། ངན་སོང་སྦྱོང་བ་བརྟག་པ་ཕྱོགས་གཅིག་པ་གཙུག་དགུའི་རྒྱུད། ཤེས་རབ་ཀྱི་ཕ་རོལ་ཕྱིན་པ་ཚུལ་བརྒྱ་ལྔ་བཅུ་པ། ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་བརྟག་པ་རྣམས་སུ་ཡོད་པ་ལས། འདི་ནི་རྩ་རྒྱུད་ཀྱི་དུམ་བུ་ཁམས་གསུམ་རྣམ་རྒྱལ་གྱི་ངན་འགྲོ་འགུགས་པའི་སྐབས་ནས་འཕྲོས་པའི་རྒྱུད་ཡིན། ཐབས་ཅིག་ཏུ་པདྨའི་གདན་ལ་སྦྱོང་རྒྱུད་
འདི་ནི་སྟོན་པ་རྣམ་སྣང་ཆེན་པོ་སུམ་ཅུ་རྩ་གསུམ་ལྷའི་གནས་དགའ་བའི་ཚལ་གྱི་གཞལ་ཡས་ཁང་ཆེན་པོ་ན་བཞུགས། བྱང་ཆུབ་སེམས་དཔའ་ལྷའི་ཚོགས་དཔག་ཏུ་མེད་པས་བསྐོར་བའི་ཚེ། ངན་སོང་སྦྱོང་བའི་ཏིང་ངེ་འཛིན་ལ་བཞུགས་ནས་མཛོད་སྤུ་ནས་འོད་ཟེར་སྤྲོ་བས་སེམས་ཅན་ཉོན་མོངས་པའི་འཆིང་བ་ལས་སྒྲོལ་ནས་བདེ་བ་སོ་སོར་ཐོབ་ཅིང་དགའ་བའི་ཚལ་ཐམས་ཅད་སྣང་བར་བྱས། དེར་ལྷ་རྣམས་ཀྱིས་བཅོམ་ལྡན་འདས་ལ་མཆོད་ཅིང་ཕྱག་འཚལ་ནས་ཆེད་དུ་བརྗོད། དེར་བརྒྱ་བྱིན་གྱིས་ལྷའི་བུ་ནོར་བུ་དྲི་མ་མེད་གར་སྐྱེས་ཞུས་པས། མནར་མེད་དུ་སྐྱེས་པ་སོགས་ངན་སོང་གི་སྡུག་བསྔལ་མྱོང་ཚུལ་གསུངས། དེ་ལ་སྐྲག་ནས་སྐྱབས་པར་ཞུས་པས། ངན་སོང་སྦྱོང་བའི་དལ་ལས་ཚོགས་ཕན་ཡོན་དང་བཅས་པ་གསུངས་པས། ལྷའི་བུ་ནོར་བུ་དྲི་མ་མེད་པ་ངན་སོང་ལས་ཐར་ཏེ་དགའ་ལྡན་ལྷའི་གནས་སུ་སྐྱེས། དེ་ལ་ངོ་མཚར་སྐྱེས་ནས་ལྷ་རྣམས་ཀྱིས་བསྟན་པ་བསྲུང་བར་ཁས་བླངས། དེ་ནི་ཀུན་རིག་རྩ་བའི་དལ་ཡིན་ལ། བརྟག་པ་དང་པོ་དང་། དེ་ནས་སངས་རྒྱས་ཀྱི་མཐུས་བྱང་ཆུབ་སེམས་དཔའ་ཕྱག་ན་རྡོ་རྗེས་བརྟག་པ་ཕྱི་མ་བཤད་དེ། ཤཱཀྱ་
ཐུབ་པ་སྐུའི་དཀྱིལ་འཁོར་དང་། ལྷའི་བུ་ནོར་བུ་དྲི་མ་མེད་ཀྱི་སྐྱེས་རབས་གསུངས་པས་ལྷ་རྣམས་ཀྱིས་ཕྱག་ན་རྡོ་རྗེ་ལ་མིང་བཅུའི་སྒོ་ནས་བསྟོད་པ་བྱས་ནས། །སེམས་ཅན་ཚེ་ཐུང་རྣམས་ལ་ཕན་པའི་ཐབས་ཞུས་པས། ཕྱག་ན་རྡོ་རྗེ་འཆི་བདག་འཇོམས་པ་ཐུགས་ཀྱི་དལ་གསུངས། དེ་ནས་རྒྱལ་པོ་བཞིས་སྙིང་པོ་ཕུལ་ནས་ཞུས་པས་ཕྱག་རྡོར་ལ་རྒྱལ་ཆེན་བཞིས་བསྐོར་བའི་དཀྱིལ་འཁོར་དང་། དེ་ནས་གཟའ་བརྒྱད་རྒྱུ་སྐར་དང་བཅས་པས་སྙིང་པོ་ཕུལ་ནས་ཞུས་པས་ཕྱག་རྡོར་གཟའ་བརྒྱད་ཀྱིས་བསྐོར་བའི་དལ་དང་། །དེ་ནས་ཀླུ་བརྒྱད་ཀྱིས་སྙིང་པོ་ཕུལ་ནས་ཞུས་པའི་ཕྱག་རྡོར་ཀླུ་བརྒྱད་ཀྱིས་བསྐོར་བའི་དཀྱིལ་འཁོར་དང་། དེ་ནས་འཇིགས་བྱེད་ཆེན་པོ་དགུ་ཆུང་མ་དང་བཅས་པས་སྙིང་པོ་ཕུལ་ནས་ཞུས་པས་ཕྱག་རྡོར་འཇིགས་བྱེད་དགུས་བསྐོར་བའི་དལ་དང་། དེ་ནས་ཚངས་པ་ལ་སོགས་ལྷ་བརྒྱད་ཀྱིས་སྙིང་པོ་ཕུལ་ནས་ཞུས་པས་ཕྱག་རྡོར་ལྷ་བརྒྱད་ཀྱིས་བསྐོར་བའི་དལ་གསུངས། དེ་ནས་ཕྱག་ན་རྡོ་རྗེས་འཁོར་གྱི་དལ་ལ་གཟིགས་ནས་འཛུམ་པ་མཛད་པས། ཐམས་ཅད་གཡོ་བ་དང་། འགུལ་བ་དང་། འབར་བ་སོགས་ཡ་མཚན་དུ་མ་བསྟན་
ནས། ཚེ་དཔག་མེད་གསུང་གི་དལ་གསུངས། དེ་ནས་འཁོར་ལོས་སྒྱུར་བ་ཡོན་ཏན་གྱི་དལ་གསུངས་ནས་ཕྱག་ན་རྡོ་རྗེ་རྡོ་རྗེ་སེམས་དཔའི་སྐུར་བཞུགས་ཏེ་མེ་ལྟར་འབར་བ་ཕྲིན་ལས་ཀྱི་དཀྱིལ་འཁོར་གསུངས། དེ་ལྟར་ཕྱག་རྡོར་གཙོ་བོར་གྱུར་བའི་དཀྱིལ་འཁོར་བདུན་ཏེ། འཇིག་རྟེན་ལས་འདས་པའི་དལ་དྲུག །འཇིག་རྟེན་པའི་དལ་དྲུག་དང་བཅུ་གཉིས་ཡིན། དེ་ལ་ཐུགས་ཀྱི་དལ་ལ་གཙོ་བོ་འཕོ་བའི་རིག་པས། མི་འཁྲུགས་པའི་དཀྱིལ་འཁོར་ཡང་མཛད་འདུག་པ་དང་། ཡོན་ཏན་གྱི་དལ་ལ་རྡོ་རྗེ་སེམས་དཔའ་བདེ་བ་ཆེན་པོ་ཀུན་ཏུ་བཟང་པོ་གསུམ་གང་རུང་གཙོ་བོ་བྱེད་པར་གསུངས་པས། དཀྱིལ་འཁོར་ཉི་ཤུ་རྩ་གཉིས་སུ་ཡང་འགྱུར་བར་སྣང་། སེམས་དཔའ་བཅུ་དྲུག་གཙོ་རྐྱང་རེ་རེ་ནས་ལས་ཚོགས་བསྒྲུབ་པར་གསུངས་པས་ཞིབ་པར་ཕྱེས་ན་མཐའ་ཡས་སོ། །དེ་ལ་ཡོ་ག་རྣལ་འབྱོར་གྱི་རྒྱུད་འདི་རྣམས་བཅོམ་ལྡན་འདས་ཀྱིས་གཟུགས་ཁམས་འོག་མིན་དུ་གསུངས། དེ་ནས་སུམ་ཅུ་རྩ་གསུམ་དང་བྱང་ཕྱོགས་ལྕང་ལོ་ཅན་དུ་བཞུགས་པའི་ཕྱིར་ལྷ་གནས་གསུམ་དུ་གྲགས་པའི་རྒྱུད་ཅེས་བྱ། དེ་ནས་མི་ཡུལ་དུ་དར་བའི་ཚུལ་ནི། སངས་རྒྱས་མྱ་ངན་
ལོས་འདས་ནས་ལོ་བརྒྱ་དང་བཅུ་གཉིས་ནས་རྒྱལ་པོ་ཛའི་ཁང་སྟེང་གླེགས་བམ་གྱིས་ཆར་བབ་པ་ནས་བྱུང་། རྒྱལ་པོའི་དེ་ཡི་དོན་མ་ཤེས་ནས་སློབ་དཔོན་ཀུ་ཀུ་ར་ཙ་ལ་དྲིས་པས་མ་གཏོགས། རྒྱལ་པོས་གླེགས་བམ་སྤྱི་བོར་བཟུང་ནས་ཞག་བདུན་གསོལ་བ་བཏབ་པས། རྡོ་རྗེ་སེམས་དཔའ་ཞལ་མཐོང་གི་ལེའུ་གོ་ནས་བསྒྲུབས་པས། ཕྱག་ན་རྡོ་རྗེ་དངོས་སུ་བྱོན་ཏེ་དབང་བསྐུར་རྒྱུད་ཀྱི་བསྟན་པ་རྣམས་གཏད།། བསྒྲུབ་པས་འཁོར་འབུམ་ཕྲག་དང་བཅས་མཁའ་སྤྱོད་དུ་གཤེགས་པ་ཡིན་ཏེ། དཔལ་གདམས་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་སྟེ། །འཛམ་གླིང་ཤར་ལྷོའི་ཕྱོགས་མཚམས་ན། །དཔལ་ཞེས་བྱ་བའི་རི་བོ་ལ། །ཐུགས་རྗེས་མཐུན་པའི་བྱིན་རླབས་ཀྱིས། །རྒྱལ་པོ་ཛ་ཞེས་བྱ་བ་ནས། །ཕྱག་ན་རྡོ་རྗེས་གཏད་པར་བྱ། །ལ་ལ་སྐལ་#ལྡན་དམ་པ་རྣམས། །བྱང་ཆུབ་མཆོག་ཏུ་འགྲུབ་གྱུར་བས། །དེ་ལ་རྟག་ཏུ་གུས་པར་བྱོས། །ཞེས་གསུངས་པའི་ཕྱིར། དེ་ནས་རྣལ་འབྱོར་པ་ཀུ་ཀུ་ར་ཙ་ཞེས་པ་ལ་གནང་། དེ་
ནས་ཨིནྡྲ་བྷུ་ཏི་ལ་སོགས་པ་ནས་ཡོ་ག་མཁས་པ་མི་གསུམ་གྱིས་བར་དུ་དར་བ་ཡིན་ཏེ། དེ་སྐད་དུ་ཡང་། བཀྲ་ཤིས་པའི་ཁང་པ་རུ། ཀུ་ཀུ་ར་ཙ། ཨིནྡྲ་བྷུ་ཏི་དང་། སིདྷ་ཨུ་པ་ར་ཙ་དང་སྲས་མོ་འདུམ་པ་སོགས་སྒྱུ་འཕྲུལ་དྲྭ་བའི་དབང་ཐོབ་ནས། ཆོས་ཀྱི་འཁོར་ལོ་མངོན་བསྒྲུབ་སྟེ། རྡོ་རྗེ་འཆང་དབང་བར་མངོན་དུ་གཤེགས། ཞེས་གསུངས་སོ། །དེ་ལྟར་རྒྱ་གར་དུ་རྒྱ་ཆེར་དར་ནས་བོད་དུ་རྒྱལ་པོ་ཁྲི་སྲོང་ལྡེའུ་བཙན་གྱི་དུས། རྒྱ་གར་གྱི་མཁན་པོ་ཤནྟི་གཛྷ་དང་། བོད་ཀྱི་ལོ་ཙཱ་བ་བནྡེ་ཨ་ཙརྱ་དང་རཀྵི་ཏས་བསྒྱུར། པཎྜི་ཏ་དྷརྨ་ཀཱིརྟི་སྤྱན་དྲངས་ཏེ་དབང་ལུང་རྣམས་ཞུས། རྒྱལ་པོ་ཡབ་སྲས་ཀྱང་རྣལ་འབྱོར་རྒྱུད་ལ་ཤིན་ཏུ་དད་པར་གྱུར་ནས། བསམ་ཡས་དབུ་རྩེའི་བར་ཁང་ན་ཡང་རྡོ་རྗེ་དབྱིངས་ཀྱི་ལྷ་ཚོགས་བཞེངས། སྲས་སད་ན་ལེགས་ཀྱིས་དཀར་ཆུང་རྡོ་རྗེ་དབྱིངས་ཀྱི་ལྷ་ཚོགས་བཞེངས། མངའ་བདག་ཁྲི་རལ་གྱི་སྐབས་སུ་ཨ་ཙརྱ་རིན་ཆེན་མཆོག་གིས་སྐད་གསར་བཅད་ཀྱིས་གཏན་ལ་ཕབ། དེ་ཕྱིས་ནས་རྒྱུད་དར་བ་མ་བྱུང་བས་སྦྱོང་རྒྱུད་འདི་ནི་རྙིང་པ་ཡིན་ལ་འདི་ལ་ཐེ་ཚོམ་མི་དགོས་ཏེ། འདི་སྔོན་འགྲོ་དང་ལྕེ་ལག་བྱིན་རླབས། སྲུང་འཁོར་
རྒྱས་པ་དང་། ཚོགས་རྟེན་སྤྲུལ་པ་དང་། གཟུགས་བརྙན་གྱི་སྦྱོར་བ་དང་། དངོས་པོའི་སྦྱོར་བ་དང་དེ་དག་འདིར་མི་དགོས་པ་ནི། རྡོ་རྗེ་ཕྲེང་བ་དང་། མི་ཏྲ་བརྒྱ་རྩའི་རྣལ་འབྱོར་རྒྱུད་ཀྱི་སྐབས་ལྟར་ཡིན། དེ་ཡང་ཨ་ཧྥུ་ཀ་རའི་རྡོར་ཕྲེང་གི་གཞུང་ལྟར་ན། བདག་མདུན་བུམ་ལྷ་དྲན་རྫོགས་སུ་གསལ་བཏབ་ནས་སྔགས་བཟླས་ཏེ་དབང་བསྐུར་བར་ཆོག་པར་གསུངས་ཀྱང་། དེང་སང་བསྐྱེད་རིམ་ལ་བརྟན་པ་ཐོབ་པར་ཡང་དཀོན་པས་དེ་མི་སྤོབས། རྙིང་མའི་ལུགས་ལ་བདག་མདུན་བུམ་གསུམ་ཆོ་ག་ཚར་གཅིག་ས་དུས་གཅིག་བསྐྱེད་པར་གསུངས་ཀྱང་། དེ་རྙིང་མའི་ལུགས་ཡིན་པས་འདིར་མི་སྦྱར། གསར་མའི་དལ་ཆེན་པོ་རྣམས་ལ་བདག་བསྐྱེད་དཀྱིལ་འཁོར་བྷཻ་ནས་བསྙེན་པ་བྱ་བ་དང་། ས་ཐིག་སོགས་བྱ་བར་བཤད་དོ། །འདིར་རས་བྲིས་ལ་བརྟེན་པ་ཡིན་པས་ཐིག་མི་དགོས། གསར་མའི་དཀྱིལ་ཆོག་ཆེན་པོ་རྣམས་ལ་མདུན་བསྐྱེད་བསྒོམ་རན་ཛ་བསྡུས་ཚར་ནས་མེད། བདག་དཀྱིལ་འཁོར་དང་དབྱེར་མེད་དུ་མདུན་བསྐྱེད་བསྒོམས་ནས། མདུན་བསྐྱེད་ཀྱི་ཐུགས་ཀ་ནས་གཙོ་རྐྱང་གཅིག་སྤྲོས་ཏེ། ཤར་སྒོའི་སྒོ་ཁང་དུ་གནས་ནས་
མཆོད་པ་དང་བཀུལ་བ་སོགས་བྱེད་པ་ཡིན་པས་འདི་དང་དོན་གཅིག་ཏུ་བབས། དེ་ལ་མཁས་པ་ཆེན་པོ་ཡེ་ཤེས་དབང་ཕྱུག་གིས་མཛད་པའི་རྡོར་ཕྲེང་རྒྱས་པ་ལས། ཁ་ཅིག་རྡུལ་ཚོན་བསྐྱེད་ཟིན་ནས་བདག་བསྐྱེད་ཀྱང་དེ་ལས་སྤྲོ་བར་བྱེད། ཅེས་དང་། རྗེ་མི་བསྐྱོད་ཞབས་ཀྱིས་ཁྱད་པར་རྡོར་ཕྲེང་བའི་ཕྱག་ལེན་ཁ་ཅིག་ཏུ། བདག་མདུན་བུམ་གསུམ་དུས་གཅིག་བསྐྱེད་པའི་ལུགས་སྣང་། ཞེས་གསུངས་པ་ལྟར་པདྨ་དཀར་པོས་ཀྱང་དེ་ལྟར་མཛད། ཁྱད་པར་མཁས་པ་ཆེན་པོ་སྟག་ལུང་ངག་དབང་གྲགས་པས་སྦྱོང་རྒྱུད་ཕྱག་རྡོར་འཆི་བདག་འཇོམས་པའི་དཀྱིལ་འཁོར་ཡང་དེ་ལྟར་མཛད། རྡོར་ཕྲེང་དང་མི་ཏྲ་བརྒྱ་རྩ་སོགས་ནས་རྡོར་དབྱིངས་གཙུག་དགུ། སྦྱོང་རྒྱུད་དཀྱིལ་འཁོར་རྣམས་ལ་ཡང་དེ་ལྟར་མཛད་པ་ལྟར་འདིར་བདག་ཐ་མི་དད་པ་ཡིན་ལ། བུམ་ལྷ་དྲན་རྫོགས་སུ་གསལ་འདེབས་ཆོག་པ་ནི་ཨ་ཧྥུ་ཀ་རའི་རྡོར་ཕྲེང་གི་གཞུང་ནས་འབྱུང་བ་ལྟར་ཡིན་པས། དབང་སྒྲུབ་ལུགས་འདི་ནི་བྱ་སླ་ལ་ཚེགས་ཆུང་ཉུང་ཡང་མ་ཚང་བ་མེད་ཅིང་ཆད་པའི་སྐྱོན་དུ་མི་འགྱུར། ཁོ་བོ་དབང་བསྐུར་དང་ཆོ་གའི་གཞུང་ལ་རྒྱ་ཆེར་སྦྱོང་བའི་མཁས་ཁྱད་ངོ་མཚར་ཅན་ཞིག་ཡིན་ནོ། །
དེ་ནས་བདག་རཱ་ག་ཨ་སྱས་རང་ལོ་ཉེར་གསུམ་གྱི་དུས། འོ་བྲན་དཔལ་གྱི་དབང་ཕྱུག་གི་གདུང་རྒྱུད་སྔགས་ཕྱོགས་ལ་ཤིན་ཏུ་མཁས་ཤིང་དབང་ལུང་རྒྱ་ཆེ་བ་དང་། མངོན་པར་ཤེས་པ་དང་ལྡན་ཞིང་གྲུབ་རྟགས་མང་དུ་བཞག་པའི་བླ་མ་ངག་དབང་འཇིགས་མེད་གྲགས་པ་ལ་ཀུན་རིག་རྩ་བའི་དཀྱིལ་འཁོར་གྱི་དབང་ཞུས་པས། ཁོ་བོས་ས་ལུགས་ཀར་ལུགས་སྟག་ལུང་ལུགས་གསུམ་ཀ་ཐོབ་པ་གང་ཞུ་གསུངས། རྣལ་གྲོལ་སྒོ་ཆེན་འདོད་ཞུས་པས། དེ་བློ་ལ་མེད་པས་དཔེ་ཆོག་དགོས་གསུངས་ནས་དབང་སྒྲུབ་མཛད་ཚེ་དཔེ་ལ་གཟིགས་པས་ཕྱག་རྒྱ་སོགས་འགྲིགས་དཀའ་བས་ང་མ་མགུ་པ་དོགས་པ་འདྲ། དབང་སྒྲུབ་ཚེ་ཁྱོད་སྒོར་སོང་གསུངས། བདག་གིས་གབ་སྤྱད་པའི་ལུགས་དང་ཕྱག་ལེན་དེ་ཞོར་ལ་ལོབ་འདོད་པས་ལན་གསུམ་གསུངས་ཀྱང་མ་སོང་བར་བསྡད་པས་བླ་མས་སྐུ་ལུས་བསྲངས་ནས་ལྟ་སྟངས་ཤིག་མཛད་དེ་གྲེ་ཕུག་ནས་སུམྦྷ་ནི་གསུངས་པས། ང་རང་དབང་མེད་པར་སྒོ་རྒྱབ་ཏུ་འགྲོ་དགོས་པ་ཞིག་བྱུང་། བླ་མ་འདི་ལ་ནུས་པ་ཆེན་པོ་ཡོད་ཟེར་བ་བདེན་པར་འདུག་སྙམ་ནས་དད་པ་ཡང་སྐྱེས། རྒྱང་ཙམ་སོང་ནས་ནང་དུ་ཤོག་
གསུངས་ནས་ཀུན་རིག་གི་དབང་བཤད་དང་བཅས་པ་རྒྱས་པར་གནང་། དེ་ནས་ཁམས་སུ་ཡོང་བསམ་སྐབས་ཆོ་ག་ཡང་ལྐོག་ཏུ་བསྐུངས། མགོན་བླ་བསམ་གཏན་པའི་དྲུང་ནས་འདོན་ལུགས་ཕྱག་ལེན་དང་རྒྱས་འདེབས་སོགས་ཕྱག་རྒྱ་རྣམས་བསླབས། དེ་ནས་ཁམས་སུ་ཕྱིན་ནས། དཔོན་ཞིག་གིས་གསོལ་དགོངས་བཟུང་དགོས་ཟེར་བར་ཞག་ཉི་ཤུ་ཙམ་ལ་ཆོ་ག་བཏོན་ཚེ། ཚིག་དང་སྔགས་དང་ཕྱག་རྒྱ་ཏིང་ངེ་འཛིན་རྣམས་སྐད་ཅིག་ཀྱང་མ་ཡེངས་བར་ཁྲིག་ཁྲིག་འཕྲོད་པ་དང་པོ་དཀའ་ཞིང་དེ་ནས་འཕྲོད་ཐུབ་ཙམ་བྱུང་། རང་གི་ཡབ་རྒན་སློབ་དཔོན་ལ་དབང་བཅོ་ལྔ་ཉི་ཤུ་ཙམ་བསྐུར། དེ་ནས་མཚམས་བསྡམས་ཏེ་རྩ་རིག་ལ་བསྙེན་པ་ཞིག་བསྐྱལ། དེ་ནས་རང་གི་མཆེད་གྲོགས་སུ་གྱུར་པའི་བླ་མ་འགའ་ཞིག་ལ་ཆོ་གའི་ལུང་དང་། རོ་སྲེག་གི་ཕྱག་ལེན་རྒྱས་པ་མཐོང་བ་བརྒྱུད་པ་དང་། འདོན་འགྲིགས་དང་ཕྱག་རྒྱ་དང་། ཕྱིར་ལྡོག་དབང་བསྐུར་སོགས་ལ་འདྲ་བསྡུར་དག་བཤར་བྱས་སོ། །དེ་ནས་རང་གི་མཆེད་གྲོགས་རྡོ་རྗེའི་སྤྱན་དུ་གྱུར་པ་རབ་འབྱམས་སྡེ་སྣོད་འཛིན་པ་ཀརྨ་བི་ཤཱ་དྷ་ནི་རྙིང་མའི་དབང་ལུང་འགའ་ཞིག་གསན་པའི་ཕྱིར་དུ་ཕེབས་བྱུང་བས་ཁོང་
རང་གིས་སྔར་རི་བོ་ཆེའི་གཙུག་ལག་ཁང་དུ་རྗེ་ཆོས་ཀྱི་དབང་ཕྱུག་ལས་དཀྱིལ་འཁོར་བཅུ་གཉིས་ཐོབ་འདུག་པས། དབང་སྒྲུབ་རྣམས་བདག་རང་དང་མཉམ་དུ་བཅས་ཏེ་དག་ཆ་དང་བཅས་ཏེ་བྱས་ནས། སྔོན་མ་ཐོབ་པའི་དཀྱིལ་འཁོར་བཅུ་གཅིག་པོ་ཚང་བར་ཞུས། དུས་ཕྱིས་དྲུང་པ་སྒྲུབ་བརྒྱུད་བསྟན་པ་རྣམ་རྒྱལ་ལ་ངེད་མ་བུ་གཉིས་ཀྱིས་མཉམ་དུ་ཀུན་རིག་དབང་ཞིག་ཞུས། ཡང་སྤྲུལ་སྐུ་བདེ་ལེགས་སྙིང་པོས་སྟག་ལུང་ཞབས་དྲུང་ལ་དཀྱིལ་འཁོར་བཅུ་གཉིས་ཀྱི་དབང་གསན་འདུག་པས། ཀུན་རིག་གི་དབང་ཚེ་དཔག་མེད་གསུང་དཀྱིལ་གཉིས་ཞུས། ཡང་དྲུང་སྐྱིད་སྤྲུལ་སྐུས་དཀྱིལ་འཁོར་བཅུ་གཉིས་སྟག་ལུང་པ་ལས་གསན་པར་འདུག་པར་རྒྱ་ཆེན་བཞིས་བསྐོར་གྱི་དབང་བསྡུས་པ་ཞུས། ཡང་བླ་མ་སངས་རྒྱས་རྡོ་རྗེས་ཆོས་རྗེ་བཅོ་བརྒྱད་པ་བསྟན་འཛིན་ལྷུན་གྲུབ་ལ་དཀྱིལ་འཁོར་བཅུ་གཉིས་ཀྱི་དབང་གསན་འདུག་པས་ཚེ་དཔག་གསུང་དཀྱིལ་གྱི་དབང་བསྡུས་པ་ཞུས། རྗེ་མི་བསྐྱོད་ཞབས་ནས་ཐར་འདོད་གྲོལ་སྡེ། བཅོམ་ལྡན་རིགས་པའི་རལ་གྲིས་མཛད་པའི་ཀུན་རིག་འགྲེལ་ཆེན། ཡང་སྔགས་རམ་པ་ཞིག་གིས་མཛད་པའི་ཀུན་རིག་འགྲེལ་པ།
ཀུན་རིག་ཆེན་མོ་སོགས་ལ་ཐོས་བསམ་བྱས་པས་གོ་བ་ལེགས་པོ་བྱུང་བས། རྣམ་གྲོལ་སྒོ་ཆེན་ཀྱི་འགྲེལ་པ་སོགས་བརྩམས་པས། ཅུང་ཟད་འཕེལ་བས་དེ་དག་ལ་བརྟེན་ནས་བསྙེན་པ་ཐོན་མཁན་ཡང་མང་དུ་བྱུང་། དེ་དག་ཐོབ་པ་དང་ཤེས་པ་ཙམ་དུ་མ་བཞག་པར་རྒྱས་སྲས་ཐོགས་མེད་པའི་ལུགས་ལྟར་རྒྱུན་བསྙེན་དང། ཚེ་དཔག་གསུང་དཀྱིལ་གྱི་བསྙེན་པ་ཚན་ཆེན་བསྐྱལ། མི་འགྱུར་རྡོ་རྗེའི་དགོངས་གཏེར་ཀུན་རིག་དང་། ཀློང་གསལ་སྙིང་པོའི་གཏེར་གསར་གྱི་ཀུན་རིག་ཡང་ཐོབ། གཞན་ལྷོ་རིན་པོ་ཆེའི་དྲུང་ནས། རྡོར་དབྱིངས་གཙུག་དགུ་སོགས་རྣལ་འབྱོར་རྒྱུད་ཀྱི་དབང་གསུམ་ཡང་ཐོབ། དཀྱིལ་འཁོར་བཅུ་གཉིས་ཚང་བའི་དབང་ལན་གྲངས་གསུམ་བཞི་ཙམ་གཞན་ལ་བཙུགས་ཤིང་། དབང་ཐོར་བུར་བསྐུར་བ་དང་། ཕྱིར་ལྡོག་བྱང་བུ་རོ་སྲེག་སོགས་ཀྱང་མང་དུ་བྱས་པས་གོམས་འདྲིས་ཆེ། གང་ལ་གོམས་པ་དེ་ལ་མཁས། ཟེར་བའི་དཔེ་བདག་གིས་བསྒྲིགས་པའི་དབང་ཆོག་འདི་ཡིད་ཆེས་པའི་གནས་ཡིན་ནོ། །དེ་ཡང་འདིའི་བརྒྱུད་པ་ནི་རྣམ་གྲངས་མང་སྟེ། སངས་རྒྱས་ཤཱཀྱ་ཐུབ་པ། རྒྱལ་པོ་རབ་གསལ་ཟླ་བ། བྲམ་ཟེ་ཛི་ན་མི་ཏྲ། སྲ་
ཏི་ཕ་ལ། སྒྲ་གཅན་འཛིན་བཟང་པོ། ཡེ་ཤེས་རྡོ་རྗེ། པྲ་ཧ་ན་ཏི། ཀུན་དགའ་སྙིང་པོ། ཤེས་རབ་སྐྱོང་། རབ་འབྱོར་སྐྱོང་། ཁ་ཆེ་པཎ་ཆེན་ཛྙཱ་ན་བི་ཆེན་།་གཉལ་པ་ཉི་མ་འབར། །སྣུར་ཉི་མ། གཤིན་རྡོ་རྗེ་སེང་གེ །རྒྱ་གསེར་སོགས་འགྲོ་འཛི་བ། སྙེ་མདོ་བ་བསོད་དཔལ། སྙེ་མདོ་ཀུན་དགའ་དོན་གྲུབ། རྗེ་རང་བྱུང་རྡོ་རྗེ། གཡུང་སྟོན་པ། རོལ་པའི་རྡོ་རྗེ། མཁའ་སྤྱོད་དབང་པོ། དེ་བཞིན་གཤེགས་པ། རཏྣ་བྷ་དྲ། མཐོང་བ་དོན་ལྡན་ནོ། །ཡང་རྫོགས་པའི་སངས་རྒྱས། ཕྱག་ན་རྡོ་རྗེ། རྒྱལ་པོ་རབ་གསལ་ཟླ་བ། རབ་འབྱོར་སྐྱོང་། ཀུན་དཀའ་སྙིང་པོ། ཤེས་རབ་སྐྱོང་། གོ་མི་དགེ་བསྙེན་ཤཱཀྱ་ཡེ་ཤེས། ཇོ་བོ་རྗེ། གོ་མི་སྒོམ་ཆེན། སྤྱི་ནོར་ཛཱ་ན། གཉལ་པ་ཉི་མ་འབུམ། སྣུར་ཉི་མ་འོད་ཟེར། རྩ་སྐྱ་པ་དཀོན་མཆོག་གྲགས། ཤཱཀྱ་འབུམ། འཇིམ་པ་རིན་ཤེ། ལོ་མཆོག་དཔལ་ལྡན་སེང་གེ །བུ་སྟོན་རིན་པོ་ཆེའོ། །ཡང་ན། རྣམ་པར་སྣང་མཛད། ཕྱག་ན་རྡོ་རྗེ། རབ་གསལ་ཟླ་བ། སྒྲ་གཅན་འཛིན། ཀུན་སྙིང་། པྲཛྙཱ་པཱ་མི་ཏ། མུ་སྟེགས་ཀོ་ཥ། དྷརྨ་པཱ་ལ། ཇོ་བོ་
རྗེ། དོལ་པ་སྒོམ་ཆེན། སྐྱི་ནོར་ཛྷཱ་ན། གཉལ་པ་ཉི་མ་ཤེ། གནུར་ཉི་མ། གཤེན་རྡོར་སེང་། གླན་ཆོས་འབྱུང་བ། སུམ་སྟོན་ཤཱཀྱ་འབུམ། འཇིམ་པ་རིན་ཆེན་ཤེ །ཡང་རྩེ་བ་རིན་སེང་། ཀུན་མཁྱེན་བུའོ། །ཡང་ན། ཀུན་སྙིང་ནས་དེ་བཞིན་གཤེགས་པའི་རྡོ་རྗེ། ཤ་དྷ་ཀ་ར་ཝརྨ། ལོ་ཆེན་རིན་ཆེན་བཟང་པོ། ལོ་ཆུང་ལེགས་པའི་ཤེས་རབ་། གྲགས་པ་འབྱོར་ཤེས། སུམ་སྟོན་འབྱོར་ཤེས། སུམ་སྟོན་ཡེ་ཤེས་འབར། གཉེན་ཚུལ་འབར། ཐོད་པ་དབེན་ཚ་གྲགས། ཐོད་པ་འོད་ཟེར་གྲགས། རོང་པ་ཆོས་མགོན། རི་ལུང་ཕུག་པ་ཆོས་མགོན། བླ་མ་བློ་ལྡན་སེང་གེ །ཀུན་མཁྱེན་འཕགས་འོད། ཀུན་མཁྱེན་བུ་སྟོན་ནོ། །ཡང་ན། སྤྱན་རིས་གཟིགས། སློབ་དཔོན་དཔེ་མེད་མཚོ། རིན་འབྱུང་ཞི་བ། བྷ་སྐ་ར་དེ་ཝ། རྡོ་རྗེ་གདན་པ། བིཀཱ་ཏ་དེ་ཝ། ཁ་ཆེན་པཎ་ཆེན། བི་བྷུ་ཏི་ཙནྡ། གཡག་སྡེ་ལོ་ཙཱ་བ། ལོ་ཙཱ་བ་མཆོག་ལྡན། རོང་པ་དཔལ་ལྡན་སེང་གེ །ཀུན་མཁྱེན་བུ་སྟོན། དེ་ནས་ཐུགས་སྲས་ལོ་ཙཱ་བ། ཀརྨ་པ་མཐོང་བ་དོན་ལྡན། འཇམ་དཔལ་བཟང་པོ། ཆོས་གྲགས་རྒྱ་མཚོ། སངས་རྒྱས་
མཉན་པ། མི་བསྐྱོད་རྡོ་རྗེ། དཀོན་མཆོག་ཡན་ལག །གྲགས་པ་དོན་འགྲུབ། ཆོས་ཀྱི་དབང་ཕྱུག །ཡང་ན་ཆོས་གྲགས་རྒྱ་མཚེའི་བར་དང་། སི་ཏུ་བཀྲ་ཤི་དཔལ་འབྱོར། ཀརྨ་ཕྲིན་ལས་པ། གཙུག་ལག་ཕྲེང་བ། དཀོན་མཆོག་ཡན་ལག །དབང་ཕྱུག་རྡོ་རྗེ། ཐམས་ཅད་མཁྱེན་པ་དྲུག་པ། ངག་དབང་འཇིགས་མེད་གྲགས་པ། དེས་བདག་རཱ་ག་ཨ་སྱ་ལའོ། །རྩ་བའི་དལ་མ་གཏོགས་པའི་སྦྱོང་རྒྱུད་དཀྱིལ་འཁོར་བཅུ་གཅིག་གི་དབང་གི་བརྒྱུད་པ་ནི་གོང་དང་འདྲ་བ་ལས། རྒྱལ་བ་ཐམས་ཅད་མཁྱེན་པ་ཆོས་ཀྱི་དབང་ཕྱུག །པཎ་ཆེན་ལུང་རིགས་ཉི་མ། སྡོམ་བརྩོན་སྡེ་སྣོད་འཛིན་པ་ཀརྨ་བི་ཤོ་དྷ།་དེས་བདག་རཱ་ག་ཨ་སྱ་ལའོ། །ཡང་ཀུན་རིག་དང་རྒྱལ་ཆེན་བཞིས་བསྐོར་གྱི་བརྒྱུད་པ་ནི། ཆོས་ཀྱི་དབང་ཕྱུག །པཎ་ཆེན་ལུང་རིགས་ཉི་མ། སྒྲུབ་བརྒྱུད་བསྟན་པ་རྣམ་རྒྱལ། རཱ་ག་ཨ་སྱ་ལའོ། །ཡང་ཀུན་རིག་དང་གསུང་དཀྱིལ་གྱི་བརྒྱུད་པ་ནི། དཀོན་མཆོག་ཡན་ལག །བ་ལེ་བ་རྣམ་རྒྱལ་དཔལ་བཟང་། ངག་དབང་རྣམ་རྒྱལ། ངག་དབང་བཀྲ་ཤིས་དཔལ་གྲུབ། བདེ་ལེགས་སྙིང་པོ། རཱ་ག་ཨ་སྱ་
ལའོ་། །ཡང་ཚེ་དཔག་གསུང་དཀྱིལ་གྱི་བརྒྱུད་པ་ནི། ཁ་ཆེན་པཎ་ཆེན་དྷརྨ་པ་ལ། ལོ་ཆེན་རིན་ཆེན་བཟང་པོ། གཉལ་པ་ཉི་མ་ཤེས་རབ། ཉི་མ་འོད་ཟེར། རྡོ་རྗེ་སེང་གེ །རྒྱ་གསར་བ། བྲམ་ཟེ་ཏི་པ། འབྲོག་འཛིན་པ་རིན་ཆེན། བསོད་ནམས་དཔལ། གཉལ་པ་ཆོས་གྲགས། བྱ་རིན་ཆེན་འོད། བླ་ཆེན་སངས་རྒྱས་སྲས། བདག་སྟོན་གཞོན་ནུ་ཚུལ་ཁྲིམས། བླ་མ་ཚུལ་རྒྱལ་བ། བླ་མ་དཔལ་ལྡན་པ། ངོར་ཆེན་ཀུན་དགའ་བཟང་པོ། མཁས་གྲུབ་དཔལ་ལྡན་སེང་གེ །ཆོས་རྗེ་མགོན་པོ་དབང་ཕྱུག །གཉལ་ལོ་གྲགས་པ་ཆོས་འགྲུབ། མཁྱེན་རབ་བསྟན་འཛིན་བཟང་པོ། དབོན་བསྟན་འཛིན་ལྷུན་གྲུབ། དྲི་མེད་སངས་རྒྱས་རྡོ་རྗེ། རཱ་ག་ཨ་སྱེ་ལའོ། །ངན་སོང་ཐམས་ཅད་སྦྱོང་བའི་རྒྱུད་ཀྱི་རྒྱལ་པོ་ཉིད་དང་། ཀུན་རིག་ཆེན་པོ་རྣམ་གྲོལ་སྒོ་ཆེན། རྡོར་ཕྲེང་རྣལ་འབྱོར་རྒྱུད་ཀྱི་དབང་། མི་ཏྲ་བརྒྱ་རྩའི་སྦྱོང་རྒྱུད་ཀྱི་དབང་། མཆིམས་ཆེན་ནམ་མཁའ་གྲགས་ཀྱིས་མཛད་པའི་སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་ཡིག་རྙིང་། སྐྱེས་ཆེན་གཙུག་ལག་ཕྲེང་བས་མཛད་པའི་དཀྱིལ་འཁོར་བཅུ་གཉིས་ཀྱི་མགྱོགས་དབང་དེ་རྣམས་ཀྱི་དོན་བསྡུས་ཏེ། ཚིག་ཉུང་ཀྱང་དོན་ཟབ་རྒྱ་ཆེ་བ་ཡིན་ནོ། །ཆོས་རྗེ་མི་བསྐྱོད་ཞབས་ཀྱི་གསུང་ལས། དེང་
སང་ཁ་ཅིག་གིས་དབང་བསྐུར་དཔེ་ཆོག་ལ་བརྟེན་ནས་དབང་བསྐུར་བར་དབང་མི་འོས་སོ། །ཞེས་སྨྲ་བའང་མི་འགྲུབ་སྟེ། ཚིག་དང་དོན་གྱི་གཟུངས་ཐོབ་པ་དག་གིས་འཆད་རྩོད་རྩོམ་གསུམ་ཞེས་སོགས་འདོན་བྷཻ་ཅུང་བྱེད་ཀྱང་རྒྱུད་གླེགས་བམ་ལ་མ་ལྟོས་པར་འཆད་ནུས་ཀྱང་། གདུལ་བྱ་དབང་བརྟུལ་ཤེས་རབ་དམན་པ་རྗེས་སུ་བཟུང་བའི་སླད་ཀྱིས་བསྟན་པ་ཡུན་དུ་གནས་པར་བྱ་བའི་ཕྱིར། རྒྱུད་བསྐྱེད་རྫོགས་ཀྱི་སྒྲུབ་དཀྱིལ་ཐམས་ཅད་གླེགས་བམ་དུ་འགོད་པར་མཛད་ཅིང། གཞན་སྨིན་གྲོལ་དུ་འགོད་པ་ནས་ཀྱང་གླེགས་བམ་ནས་དེ་ལྟར་བྱུང་བ་ལྟར་གླེགས་བམ་དེ་ཉིད་ཀྱིས་སྟེང་ནས་རྒྱུད་འཆད་པ་སོགས་རུང་བ་ཉིད་ཀྱིས་ཕྱིར་ན་དེ་ཉིད་སྟེང་ནས་སྒྲུབ་དཀྱིལ་སོགས་ཀྱི་འདོན་བསྒོམ་བྱར་རུང་བའི་མཐུན་སྦྱར་བ་ལས། རྒྱུད་འགྲེལ་ཚད་ལྡན་གང་ནས་ཀྱང་གླེགས་བམ་གྱི་སྟེང་ནས་སྒྲུབ་དཀྱིལ་འདོན་བསྒོམ་བྱར་མི་རུང་ཞེས་དམིགས་གསལ་དུ་གསུངས་པའི་ཡི་གེ་ནི་གཅིག་ཀྱང་མེད་དོ། །གསང་སྔགས་ཀྱི་རྒྱུད་རབ་འབྱམས་ལ་སྒྲུབ་དཀྱིལ་མཐའ་ཡས་པ་དེ་ལས་དང་པོ་པས་གང་ཐོབ་བློ་ལ་འཛིན་མི་ནུས་པའི་ཕྱིར། གསང་སྔགས་གྱི་ཆོས་གང་ཐོབ་རྣམས་བློ་ལ་འཛིན་མི་ནུས་པའི་སྒྲུབ་དཀྱིལ་རྣམས་དཔེ་ལ་བརྟེན་ནས་འདོན་སྒོམ་བྱེད་པ་ནི་རྒྱ་བོད་ཀྱི་བརྒྱུད་པ་བར་མ་ཆད་པའི་སྲོལ་ཡིན་པས། ཕྱིས་སུ་གང་ཟག་ཁ་ཅིག་གིས་དབང་བློ་ཐོག་དང་ལུང་དཔེ་ཐོག་ནས་མ་བྱས་ན་དབང་རྣམ་དག་ཏུ་མི་འབྱུང་ངོ་། །ཞེས་ཟེར་བ་ནི་བརྗོད་པ་ཙམ་ལས་སྒྲུབ་བྱེད་ཅི་ཡང་མི་སྣང་ངོ་། །ཞེས་གསུངས་པ་ལྟར། འདི་ཡང་དཔེ་ཆོག་
གི་དབང་དུ་བྲིས་པ་ཡིན་ནོ། །ཞེས་དགེ་སློང་རཱ་ག་ཨ་སྱས་བསྒྲིགས་པ་ལ་འགལ་འཁྲུལ་གང་མཆིས་ཆོས་ཀྱི་སྤྱན་ལྡན་རྣམས་ལ་བཤགས་ཤིང་། དགེ་བས་འདི་ལ་འབྲེལ་པ་ཐོགས་ཚད་བདེ་བ་ཅན་དུ་སྐྱེ་བར་གྱུར་ཅིག །དཔལ་གཙང་མའི་རིས་ཀྱི་མགོན་པོ་བདུན་ཅུ་རྩ་ལྔས་ཀྱང་སྔོན་ཚེ་ཞལ་གྱིས་བཞེས་པ་བཞིན་དབང་འདི་འཕེལ་ཞིང་རྒྱས་པ་དང་། དབང་རྒྱུན་འདི་དང་འབྲེལ་པ་ཐོགས་ཚད་བསྲུང་ཞིང་སྐྱོབ་པའི་ཕྲིན་ལས་མཛོད་ཅིག །ཅེས་པའི་ཡི་གེ་པ་ནི་དགེ་སློང་བརྩོན་འགྲུས་ཏེ། འདི་ཉིད་བརྩམས་ཤིང་བྲིས་པའི་དགེ་བའི་རྩ་བ་དེས་བདེ་བ་ཅན་དུ་སྐྱེ་བར་གྱུར་ཅིག །འགྲོ་བ་སེམས་ཅན་ཐམས་ཅད་ཁྱབ་བདག་རྣམ་སྣང་ཆེན་པོས་རྗེས་སུ་འཛིན་པར་གྱུར་ཅིག །མངྒ་ལཾ།། །།
༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །