བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཀྱི་དཀྱིལ་འཁོར་བཅུ་གཅིག་གི་ལོ་རྒྱུས།
བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཀྱི་དཀྱིལ་འཁོར་བཅུ་གཅིག་གི་ལོ་རྒྱུས་བཞུགས་སོ།།
དེ་ཡང་བཅོམ་ལྡན་འདས་ཤཱཀྱ་ཐུབ་པ་དེ་ཉིད་ལྷའི་གནས་དགའ་བའི་ཚལ་ན་བཞུགས་པའི་ཚེ་ངན་སོང་སྦྱོང་བའི་རྒྱུད་བརྟག་པ་དང་པོ་གསུངས་ཚར་བ་དང་། གསང་སྔགས་དང་རིག་སྔགས་ཐམས་ཅད་ཀྱི་བདག་པོ་ཕྱག་ན་རྡོ་རྗེ་སྟན་ལས་བཞེངས་ཏེ་རྡོ་རྗེ་གསོར་ཞིང་། བཅོམ་ལྡན་འདས་ལ་ཕྱག་འཚལ་ཏེ། ཏིང་ངེ་འཛིན་ལ་སྙོམས་པར་བཞུགས་པའི་སངས་རྒྱས་ཀྱི་མཐུས། ཤཱཀྱ་ཐུབ་པ་སྐུའི་དཀྱིལ་འཁོར་འདི་གསུངས་སོ། །འདིའི་ཕན་ཡོན་ནི། རྒྱུད་ལས། དེ་བཙུན་བཞིན་དུ་བཅུག་སྟེ་དབང་བསྐུར་ན་ངན་སོང་ཐམས་ཅད་རྣམ་པར་གྲོལ་ཏེ། བདེ་འགྲོ་མཐོ་
རིས་ཀྱི་འཇིག་རྟེན་དང་། གང་ནས་གང་དུ་ཡང་སྐྱེ་བར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་རོ། །སངས་རྒྱས་སུ་ཡང་གདོན་མི་ཟ་བར་འགྲུབ་པར་འགྱུར་རོ། །སྔ་མ་བཞིན་དུ་ལས་ཐམས་ཅད་བྱེད་ཅིང་། ལས་ཐམས་ཅད་ལ་ཐོག་པ་མེད་པར་འགྱུར་རོ། །བྱབས་པ་བྱས་པས་རིམས་ཐམས་ཅད་དང། གདོན་དང་དུག་ལ་སོགས་པ་ལས་ཐར་བར་འགྱུར་རོ། །ཕྱག་ན་རྡོ་རྗེ་ཧཱུྃ་ཞེས་བྱ་བས་ལས་ཐམས་ཅད་བྱེད་པར་འགྱུར་རོ། །བརྟག་པ་གཞན་གྱི་ཆོ་ག་ཀྱང་ཐམས་ཅད་འགྲུབ་ནུས་པར་འགྱུར་རོ། །ལྷ་དང་ཀླུ་དང་གནོད་སྦྱིན་
དང་སྲིན་པོ་ལ་སོགས་པ་ངན་སོང་གི་རྒྱུད་ཀྱི་དབང་དུ་གྱུར་པ་རྣམས་ཤི་བའི་རོའམ། གཟུགས་བརྙན་ནམ། མིང་ལ་སོགས་པ་བྲིས་ཏེ། བཟླས་པ་དང་སྦྱིན་སྲེག་དང་། དབང་རྣམས་སྔ་མ་བཞིན་དུ་བསྐུར་ན་ངན་སོང་ཐམས་ཅད་ལས་ཡོངས་སུ་གྲོལ་བ་བྱེད་དོ། །ཞེས་གསུངས་པ་འདིའི་དབང་ཐོབ་ན། བར་ཆད་སེལ་བ་དང་། སྡིག་སྒྲིབ་ཐམས་ཅད་བྱང་བ་དང་། ཕྱི་མ་ངན་སོང་ལ་མི་ལྷུང་བ་དང་། བདེ་འགྲོ་གོང་ནས་གོང་དུ་སྐྱེ་བ་ཇེ་མཐོར་སྐྱེ་ཞིང་། མཐར་ཐུག་སངས་རྒྱས་ཀྱི་འབྲས་བུ་ངེས་པར་ཐོབ་པའི་ཕན་ཡོན་ཆེན་པོ་དེ་ལྟ་བུ་དང་ལྡན་པའི་དབང་ཞུ་བའི་ཕྱིར་རྗེས་ཟློས་མཛོད། ཅེས་རྒྱུད་ལས་བསྡུས་ཏེ་རཱ་ག་ཨ་སྱས་སྦྱར་བའོ།། ། ཚེ་དཔག་མེད་ཀྱི་ལོ་རྒྱུས་ནི། བཅོམ་ལྡན་འདས་ཀྱིས་ལྷའི་གནས་དགའ་བའི་ཚལ་ན་སྦྱོང་རྒྱུད་བརྟག་པ་དང་པོ་གསུངས་ནས། སངས་རྒྱས་ཀྱི་མཐུས་ཕྱག་ན་རྡོ་རྗེས་བརྟག་པ་ཕྱི་མ་གསུངས་པའི་སྐབས་སུ། བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱི་འཁོར་རྣམས་ལ་གཟིགས་ནས་ཞལ་འཛུམ་པར་མཛད་པས། འཁོར་ཐམས་ཅད་རབ་ཏུ་གཡོས་ཤིང་འགུལ། རབ་ཏུ་འབར་ཞིང་རྒོད་པ་དང་བརྩེ་བ་དང་ཡ་མཚན་པའི་ལྟས་སུ་གྱུར་ཏེ།
ཚངས་པ་ལ་སོགས་པའི་ལྷ་ཆེན་པོ་རྣམས་དངོས་སུ་གྱུར་ནས། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྒྱུ་མ་མཆིས་པར་འཛུམ་པར་མི་མཛད་ན། འཛུམ་པའི་རྒྱུ་གང་ལགས་ཞུས་པས། སྔོན་སངས་རྒྱས་རྣམས་ཀྱིས་བཤད་པའི་འཆི་བདག་ཞི་བར་བྱེད་པ་དང་། དུས་མ་ཡིན་པའི་འཆི་བདག་འཇིགས་པར་བྱེད་པའི་རིག་སྔགས་ཐོས་གསུངས་པས། ལྷ་རྣམས་དགའ་ཞིང་མགུ་ནས་བ་སྤུ་ལང་སྟེ་ཕྱག་འཚལ་ཞིང་བསྟོད་ནས། ཚེ་ཐུང་བར་སོན་ཚེ་རིང་བར་བགྱིས་པ་དང་། །དུས་མ་ཡིན་པར་འཆི་བ་རྣམ་པར་གྲོལ་བ་དང་། ངན་སོང་དུ་སྐྱེས་པ་ངན་སོང་ལས་ཐར་བ་དང་། འཁོར་བར་འཇིགས་པས་སྐག་པ་འཁོར་བ་ལས་ཐར་ནས། མྱུར་དུ་སངས་རྒྱས་པའི་ཕྱིར་དུ་རིག་སྔགས་དེ་གསུང་བར་ཞུས་པས། ཚེ་དཔག་མེད་གསུང་གི་དཀྱིལ་འཁོར་འདི་གསུང་པ་ཡིན་ལ། དེའི་ལྷ་རྣམས་ཀྱིས་འཛམ་བུའི་གླིང་གི་སེམས་ཅན་བསོད་ནམས་ཆུང་ཞིང་ཚེ་ཐུང་བ་དང་། ངན་སོང་གི་རྒྱུད་དང་ལྡན་པ། སེམས་ཅན་དམྱལ་བ་དང་ཡི་དྭགས་དང་། བྱོལ་སོང་རྣམས་སུ་སྐྱེ་བ་དག །མཆིས་ན་དེ་ལ་ཕན་ཇི་ལྟར་
གདགས་པའི་ཚུལ། དེ་དག་དཀྱིལ་འཁོར་དུ་ཆུག་ཅིག །ཆོས་ཀྱི་ཡི་གེ་ཡང་ཟློས་སུ་ཆུག་ཅིག །དེས་སེམས་ཅན་དེ་དག་ཚེ་རིང་བར་གྱུར་བསོད་ནམས་དང་བྲལ་བ་རྣམས་བསོད་ནམས་དང་ལྡན་པར་འགྱུར། ངན་སོང་ལས་རྣམ་པར་གྲོལ་བར་འགྱུར། ཞེས་གསུངས། དེ་ནས་ཚངས་པ་ལ་སོགས་པའི་ལྷ་ཆེན་པོ་རྣམས་ཀྱིས། རྒྱལ་པོ་དང་རྒྱལ་པོའི་བུ་རྒྱལ་པོའི་བློན་པོ་དང་རྒྱལ་རིགས་དང་བྲམ་ཟེ་དང་རྗེའུ་རིགས་དང་དམངས་རིགས་དང་། གཞན་ཡང་དམའི་མཁོ་རེ་ཆུང་བ་དང་། ཕྱགས་དར་བ་དང་། མཐའ་འཁོབ་པའི་རིགས་ཅན་གྱི་སྐྱེ་བོ་རྣམས་དཀྱིལ་འཁོར་གྱི་རྒྱལ་པོ་འདིར་ཞུགས་ནས། དེ་དག་གིས་རྣམ་པར་སྨིན་པ་ཅི་ལྟ་བུ་འགྱུར་ཞེས་ཞུས་པས། བཅོམ་ལྡན་འདས་ཀྱི་ཞལ་ནས་དཀྱིལ་འཁོར་འདིར་དབང་བསྐུར་བ་དང་ཕྱག་འཚལ་བ་དང་མཆོད་པ་ལ་སོགས་པའི་ཕན་ཡོན་ནི། དེ་བཤད་པའི་སྤོབས་པ་ང་ལ་མེད་དེ། ང་ཡི་བསོད་ནམས་ཀྱི་ཕུང་པོ་གང་ཡིན་པ་དེ་ནི་བརྒྱ་སྟོང་དུ་མར་བསྒྱུར་ཀྱང་གྲངས་སུ་མི་ཆོག །བསྒང་བར་མི་ཕོད་དཔེར་ཡང་མི་བཟོད། དེ་བཞིན་གཤེགས་པ་ཐམས་ཅད་ཀྱི་བསོད་ནམས་ཀྱི་ཕུང་པོས་ཀྱང་མི་བཟོད། ཅེས་
སོགས་གསུངས་པས་ལྷ་རྣམས་ཤིན་ཏུ་དད་ཅིང་གུས་ནས། དཀྱིལ་འཁོར་འདི་ལ་ཞུགས་ཤིང་དབང་ཐོབ་པ་རྣམས། བདག་ཅག་གི་སློབ་དཔོན་ལགས་པར་འཚལ་བར་བགྱིད། ཕྱག་ན་རྡོ་རྗེ་ལགས་པར་འཚལ་བར་བགྱིད། རྡོ་རྗེ་སེམས་དཔའ་ལགས་པར་འཚལ་བར་བགྱིད། བདེ་བ་ཆེན་པོ་དཔལ་ཀུན་ཏུ་བཟང་པོ་ལགས་པར་འཚལ་བར་བགྱིད། དེ་བཞིན་གཤེགས་པ་ལགས་པར་འཚལ་བར་བགྱི། ཞེས་དང་། དཀྱིལ་འཁོར་འཆད་པའི་སློབ་དཔོན་དེ་རུ་གཡོག་དང་བྲན་དང་བཀའ་ཉན་བྱེད་ཅིང་། བསྒོ་བ་ཐམས་ཅད་ཉན་ཏེ། ཕན་པ་དང་བདེ་བ་ཐམས་ཅད་བསྒྲུབ་ཅིང་། དངོས་གྲུབ་ཐམས་ཅད་སྩོལ་ཞིང་ཕྱི་བཞིན་དུ་འབྲང་སྟེ་རྐང་པའི་རྡུལ་ཡང་མགོ་བོས་བླངས་ཏེ་བཅོམ་ལྡན་འདས་ཉིད་ལྟར་ཕྲིན་ལས་བསྒྲུབ་པར་ཁས་བླངས་དམ་བཅས་པ་ཡིན་པས། འདི་ཡི་དབང་ཐོབ་ན་ཚེའི་བར་ཆད་ཞི་བ་དང་བསོད་ནམས་དབང་ཐང་འཕེལ་ཞིང་ལྷ་ཐམས་ཅད་ཀྱིས་སྡོང་གྲོགས་བྱེད་པ་དང་། ཕྱི་མ་ངན་སོང་གི་སྐྱེ་སྒོ་ཆོད་ཅིང་མྱུར་དུ་བླ་ན་མེད་པའི་སངས་རྒྱས་ཀྱི་གོ་འཕང་ཐོབ་པར་གསུངས་པས། དེ་ལྟར་དོན་ཆེན་དང་ལྡན་པའི་དབང་ཞུ་
བའི་ཕྱིར་རྗེས་ཟློས་མཛོད། ཅེས་རཱ་ག་ཨ་སྱས་སོ། ཕྱག་ན་རྡོ་རྗེ་ཐུགས་ཀྱི་དཀྱིལ་འཁོར་གྱི་ལོ་རྒྱུས་བཞུགས་སོ། །དེ་ཡང་བཅོམ་ལྡན་འདས་ཤཱཀྱ་ཐུབ་པ་འཁོར་དུ་མ་དང་བཅས། སྟེང་ལྷའི་གནས་དགའ་བའི་ཚལ་དུ་བཞུགས་པའི་ཚེ་ངན་སོང་སྦྱོང་བའི་རྒྱུད་ཆེན་པོ་གསུངས་ནས། བརྟག་པ་ཕྱི་མ་སངས་རྒྱས་ཀྱི་མཐུས་ཕྱག་ན་རྡོ་རྗེས་གསུངས་པ་སྟེ། དེ་ཡང་ཕྱག་ན་རྡོ་རྗེས་ལྷའི་བུ་ནོར་བུ་དྲི་མ་མེད་པའི་སྔོན་གྱི་སྐྱེས་རབ་གསུངས་པ་ན། ལྷ་རྣམས་ཀྱིས་མངོན་པར་བསྟོད་ནས། སླར་སེམས་ཅན་ཀུན་ལ་ཕན་པ་དང་། ཁྱད་པར་དུ་སེམས་ཅན་ཚེ་ཐུང་བ་རྣམས་དང་སྐལ་པ་ཆུང་བ་རྣམས་ཚེ་བསྲིང་བ་དང་བསོད་ནམས་བསྐྱེད་པའི་ཐབས་ཞུས་པས། བཅོམ་ལྡན་འདས་ཕྱག་ན་རྡོ་རྗེས་ཚེ་དཔག་ཏུ་མེད་པས་ཁྱབ་པར་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་ཞུགས་ནས། དེའི་སྙིང་པོ་གསུངས་པས་སེམས་ཅན་ཐམས་ཅད་ཀྱི་ངན་སོང་ཐམས་ཅད་རབ་ཏུ་ཞི་ནས་ངན་སོང་ཐམས་ཅད་དུ་སྐྱེས་པ་ལས་གྲོལ། འོད་ཟེར་གྱིས་འཇིག་རྟེན་ཐམས་ཅད་གསལ་བར་བྱས་ཏེ། མཛད་པ་བཅུ་གཉིས་ཀྱི་ཚུལ་བྱས་ནས་འོད་ཟེར་ཐུགས་ཀར་ཞུགས་སོ། །དེ་ནས་ཚེ་དཔག་ཏུ་མེད་པའི་
རྡོ་རྗེས་འོད་ཅེས་བྱ་བའི་ཏིང་ངེ་འཛིན་ལ་ཞུགས་ནས་དེའི་སྙིང་པོ་གསུངས་པས་ངན་སོང་གི་སྡུག་བསྔལ་ཐམས་ཅད་དེ་བཞིན་དུ་ཞི་བའོ། །དེ་ནས་སྒྲིབ་པ་ཐམས་ཅད་འཇོམས་པའི་ཏིང་ངེ་འཛིན་ལ་ཞུགས་ནས་སྙིང་པོ་གསུངས་པས་ངན་སོང་ཐམས་ཅད་ལྟུང་བར་འགྱུར་རོ། སྒྲིབ་པ་མ་ལུས་པ་འཇོམས་པའི་སྙིང་པོ་གསུངས་པས། བདུད་ཀྱི་གནས་ཐམས་ཅད་རབ་ཏུ་བཅོམ་པར་འགྱུར་རོ། །སྙིང་པོའི་གཟུངས་གསུངས་པས་འཇིག་རྟེན་གྱི་ཁམས་གཡོས་རབ་ཏུ་གཡོས། བསྐྱོད་རབ་ཏུ་སྐྱོད། བསྒུལ་རབ་ཏུ་བསྒུལ། རྨད་དུ་བྱུང་བས་འཇིག་རྟེན་དུ་སྣང་བར་གྱུར་ཏེ། འཇིག་རྟེན་འཆི་བདག་འཇོམས་པ་ཕྱག་ན་རྡོ་རྗེའི་ཐུགས་ཀྱི་དཀྱིལ་འཁོར་འདི་གསུངས་པ་ཡིན་ལ། འདིའི་དཀྱིལ་འཁོར་དུ་ཞུགས་ཤིང་། དབང་ཐོབ་ན་དུས་མ་ཡིན་པར་འཆི་བ་ཐམས་ཅད་བཟློག་པ་ཡིན་ཏེ། རྒྱུད་ལས། འཆི་བདག་སྦྲུལ་གྱིས་འཇིག་རྟེན་རྣམས། །འཆི་བདག་གཞོམ་ཕྱིར་གཞུག་པར་བྱ། ཞེས་གསུངས་སོ། །ཚེ་ཐུང་བ་དང་བསྐལ་པ་ཆུང་བ་རྣམས་ལ་ཕན་པ་དང་བདེ་བ་དང་ཚེ་བསྲིང་བའི་སླད་དུ་དཀྱིལ་འཁོར་འདི་གསུངས་པ་ཡིན་ལ། གཞན་ཡང་འདིའི་
བཟླས་པ་བྱས་པ་ཙམ་གྱིས་ཞི་བ་དང་རྒྱས་པ་དང་དབང་ལ་སོགས་པའི་ལས་རྣམས་བརྟག་མི་དགོས་པར་འགྲུབ་པར་ཐེ་ཚོམ་མེད་དོ། །ཞེས་གསུངས་སོ། །གཞན་ཡང་བ་དམར་སེར་གྱི་མར་རམ། མར་སར་རམ། ཆུར་བའམ་འོ་མའམ་ཆང་ངམ་ཤ་ལ་སོགས་པ་གང་ཡང་རུང་བའི་སྣོད་དུ་བཞག་ལ་རྡོ་རྗེའི་རྭ་གཡོན་པས་མནན་ལ་འདིའི་ལྷ་ཚོགས་ལ་སེམས་གཏད་དེ་སྔགས་བཟླས་པས་འོད་དུ་ཞུ་བ་དང་དྲི་ཞིམ་བྲོ་བ། ཟས་དེ་ཟོས་པས་ཉི་ཟླ་དང་མཉམ་པའི་ཚེ་རྡོ་རྗེ་ལྟ་བུར་ཐོབ་ལ། རྟགས་ཐ་མ་ཅུང་ཟད་ཙམ་གྱིས་ཀྱང་དངོས་གྲུབ་དེ་དང་མཚུངས་པར་ཐོབ་པ་དང་། རྟགས་མ་བྱུང་ན་ཡང་འཇིག་རྟེན་ན་ནད་མེད་པ་དང་། ལོབ་སྐྱེན་པ་དང་། སྐྲ་དཀར་གཉེར་མ་མེད་པར་འགྱུར་ལ། ལུས་རྟེན་དེ་ལ་ཚེ་ལོ་བརྒྱ་ཐུབ་པར་གསུངས་ན། ཚུལ་བཞིན་དུ་སྒྲུབ་པའི་དཀྱིལ་འཁོར་དབང་ཐོབ་ན་བར་ཆད་སེལ་བ་ལྟ་སྨོས་ཀྱང་ཅི་དགོས་པས། དེ་ལྟར་འཆི་བདག་འཇོམས་པའི་དབང་ཞུ་བའི་ཕྱིར་རྗེས་ཟློས་མཛོད། ཅེས་རྒྱུད་ལས་བསྡུས་ཏེ། རཱ་ག་ཨ་སྱས་སྦྱར་བའོ།། ། འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་གྱི་ལོ་རྒྱུས་ནི། དེ་ཡང་བཅོམ་ལྡན་འདས་ཤཱཀྱ་ཐུབ་པ་སུམ་རྩེན་དགའ་
བའི་ཚལ་དུ་བཞུགས་ནས་ངན་སོང་སྦྱོང་བའི་རྒྱུད་གསུངས་ཤིང་། དེ་ནས་ཕྱག་ན་རྡོ་རྗེས་བརྟག་པ་ཕྱི་མ་འདི་གསུངས་ཏེ། རྒྱུད་འདི་ལ་བརྟག་པ་བཅུ་གཉིས་ཡོད་པ་ལས། འདི་ནི་འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་ཡིན་ཏེ། གཙོ་བོ་རྡོ་རྗེ་སེམས་དཔའ་ཀུན་ཏུ་བཟང་པོ་དང་བདེ་བ་ཆེན་པོ་གང་རུང་བྱ་བར་གསུངས་པ་ལས། །འདི་ཀུན་ཏུ་བཟང་པོ་གཙོ་བོར་བྱས་པ་ཡིན། འདི་ཉིད་ཀྱི་དཀྱིལ་འཁོར་སྒོམ་བཟླས་བྱས་པའི་ཕན་ཡོན་ཡང་། ཀུན་ཏུ་བཟང་པོ་བདེ་བ་ཆེར། །འདི་ཉིད་ཀྱི་ནི་བསྒོམས་ནས་ཀྱང་། །སྙིང་གར་ཧཱུྃ་ཞེས་བྱ་བསམས་ནས། །རྡོ་རྗེ་སེམས་དཔའ་མཉམ་པར་གྱུར། །དཔལ་ལྡན་ལས་རྣམས་ཀུན་བྱེད་ཅིང་། །ཀུན་ཏུ་བཟང་པོ་བདག་ཉིད་འགྱུར། །དེ་ལྟར་འགྱུར་བ་ཐེ་ཚོམ་མེད། །ཞེས་གསུངས་ཤིང་། དེ་བཞིན་དུ་ཕྱག་ན་རྡོ་རྗེ་དང་རྡོ་རྗེ་ཁྲོ་བོ་དང་རྡོ་རྗེ་བརྟན་པ་ཕྱག་ན་པདྨ་རྡོ་རྗེ་ལ་སོགས་པ་རིགས་བཞིའམ་ལྔ་བསྒོམ་པའི་རིགས་སོ་སོ་དང་མཉམ་པའི་དངོས་གྲུབ་ཐོབ་པ་དང་། དེ་བཞིན་ཏུ་སེམས་དཔའ་བཅུ་དྲུག་གིས་ལས་ཚོགས་བཅུ་དྲུག་བསྒྲུབ་ཚུལ་རྒྱ་ཆེར་གསུངས་སོ། །ཁྱད་པར་དུ་ཡང་དཀྱིལ་
འཁོར་འདི་ལ་ནི་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཕལ་ཆེར་འདུས་པ་ཡིན་ལ། དེ་ཡང་རྒྱུད་ལས། དབང་ཕྱུག་ཆེན་པོ་ལ་སོགས་པའི་འཁོར་ཐམས་ཅད་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་འདིར་བཞུགས་པ་གང་ལགས་པ་དེ་དག་བཅོམ་ལྡན་འདས་ཀྱིས་བདག་ཅག་ལྷ་རྣམས་ཀྱི་སྒྲིབ་པ་ཐམས་ཅད་རྣམ་པར་བསྟན་ནས་སྦྱང་ངོ་། །མཐོ་རིས་ཀྱི་ལམ་བསྟན་པར་བྱའོ། །བདེ་འགྲོས་ལམ་བསྟན་པར་བགྱིའོ། །ངན་སོང་མ་ལགས་པའི་ལམ་བསྟན་པར་བགྱིའོ། །སྒྲིབ་པ་མ་མཆིས་པའི་ལམ་བསྟན་པར་བགྱིའོ། །དབེན་པའི་ལམ་བསྟན་པར་བགྱིའོ། །རྣམ་པར་དབེན་པའི་ལམ་བསྟན་པར་བགྱིའོ། །འབྱུང་བས་ལམ་བསྟན་པར་བགྱིའོ། །མྱ་ངན་ལས་འདས་པའི་ལམ་བསྟན་པར་བགྱིའོ། །དམ་པའི་ཆོས་ཀྱི་ལམ་བསྟན་པར་བགྱིའོ། །བདེ་འགྲོའི་ལམ་བསྟན་པར་བགྱིའོ། །སྤངས་བའི་ལམ་བསྟན་པ་བགྱིའོ། །ཉོན་མོངས་པ་མེད་པའི་ལམ་བསྟན་པར་བགྱིའོ། །སངས་རྒྱས་ཉིད་དུ་སྒྲུབ་པའི་ལམ་བསྟན་པར་བགྱིའོ། །
བྱང་ཆུབ་སེམས་དཔའ་ཉིད་དུ་འགྲུབ་པའི་ལམ་བསྟན་པར་བགྱིའོ། །རྡོ་རྗེ་འཛིན་པ་ཉིད་དུ་འགྲུབ་པའི་ལམ་བསྟན་པར་བགྱིའོ། །དུས་ཐམས་ཅད་དུ་འཇིགས་པ་ཐམས་ཅད་ལས་བསྲུང་བ་དང་། བསྐྱབ་པ་དང་སྦ་བར་བགྱིའོ། །བདག་ཉིད་ཀྱི་བུ་བཞིན་དུ་ཡོངས་སུ་སྐྱོང་བར་བགྱིའོ། །ཕ་རོལ་གྱི་དགྲ་རྐུན་ཡོངས་སུ་གཞོམ་པར་བགྱིའོ། །གྲོང་དང་གྲོང་ཁྱེར་དང་གྲོང་བརྡལ་དང་ལྗོངས་དང་རྒྱལ་པོའི་ཕོ་བྲང་དང་རྒྱལ་སྲིད་རྣམས་བསྲུང་བར་བགྱིའོ། །ཡུལ་དང་ཕྱོགས་དང་གྲོང་དང་གྲོང་ཁྱེར་དང་གྲོང་འཁོར་རྣམས་བསྲུང་བར་བགྱིའོ། །རྒྱལ་སྲིད་ཐོབ་པ་རྣམས་ཀྱི་རྒྱལ་སྲིད་རྒྱས་པར་བགྱིའོ། །གླིང་གཅིག་དང་གླིང་གཉིས་དང་གསུམ་པ་དང་བཞི་པ་དང་། བདེ་འགྲོ་དང་ལྷའི་གནས་དང་། ས་འོག་འཁོར་ལོས་སྒྱུར་བ་རྣམས་བརྩལ་བར་བགྱིའོ། །མདོར་ན་བརྒྱ་བྱིན་ཉིད་དང་། ཚངས་པ་ཉིད་དང་། རྟོག་འདོད་ཉིད་དང་། དབང་ཕྱུག་ཆེན་པོ་ཉིད་བརྩལ་བར་བགྱིའོ། །ཞེས་ཁས་བླངས་དམ་བཅས་སོ། །དེ་ནས་འཁོར་ལོས་སྒྱུར་བའི་དཀྱིལ་འཁོར་འདི་ཉམས་སུ་བླངས་ན། རྡོ་རྗེ་སེམས་དཔའ་འམ་ཀུན་ཏུ་བཟང་པོའི་གོ་འཕང་
འཐོབ་ལ། ཉམས་སུ་མ་བླངས་ཀྱང་དབང་ཐོབ་པའི་ཕན་ཡོན་ཁོ་ནས་ཕྱི་མར་ལྷ་རྣམས་ཀྱིས་ལམ་སྣ་འདྲེན་ཏེ། །དག་པའི་ཞིང་ཁམས་སུ་བདེ་འགྲོ་མཐོ་རིས་ཀྱི་ལམ་དུ་འཁྲིད་ཅིང་ལམ་སྟོན་པ་དང་། ཚེ་འདིའི་བར་ཆད་ཐམས་ཅད་སེལ་བ་དང་། ཇི་ལྟར་འདོད་པའི་དངོས་གྲུབ་ཐམས་ཅད་སྩོལ་བར་གསུངས་པས། དེ་ལྟ་བུའི་ཕན་ཡོན་རྒྱ་ཆེན་པོ་ཅན་ཞུ་བའི་ཕྱིར་རྗེས་ཟློས་མཛོད། ཅེས་རྒྱུད་ལས་བསྡུས་པ་ཨ་རཱ་གས་གསུངས་སོ། མེ་ལྟར་འབར་བ་ཕྲིན་ལས་ཀྱི་དཀྱིལ་འཁོར་ལོ་རྒྱུས་ནི། དེ་ཡང་བཅོམ་ལྡན་འདས། ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཀྱི་རྒྱལ་པོ་བརྟག་པ་དང་པོ་ཀུན་རིག་རྩ་བའི་དཀྱིལ་འཁོར་བཅོམ་ལྡན་འདས་ཤཱཀྱ་ཐུབ་པ་ཉིད་ཀྱིས་གསུངས། བརྟག་པ་ཕྱི་མའི་དཀྱིལ་འཁོར་བཅུ་པོ་བཅོམ་ལྡན་འདས་ཕྱག་ན་རྡོ་རྗེས་གསུངས་ཟིན་པ་དང་། ལྷ་རྣམས་རབ་ཏུ་དགའ་ནས་ཕྱག་འཚལ་ཞིང་། ཁྲོ་བོའི་དཀྱིལ་འཁོར་གསུངས་པར་གསོལ་བ་བཏབ་པས། བཅོམ་ལྡན་འདས་ཕྱག་ན་རྡོ་རྗེ་རང་ཉིད་ཀྱི་སྐུ་མི་སྣང་བར་རྡོ་རྗེ་སེམས་དཔའི་སྐུར་བཞུགས་པའི་རྡོ་རྗེ་གཉིས་སུ་མེད་པར་མཉམ་པའི་ཏིང་ངེ་འཛིན་ལ་བཞུགས་ནས་རྡོ་རྗེ་སེམས་དཔའ་ཁྲོ་བོ་རྡོ་རྗེ་མེ་དང་
ཉི་མ་ལྟར་འབར་བའི་དཀྱིལ་འཁོར་ཆེན་པོ་འདི་ཉིད་གསུངས་སོ། །འདི་ཡི་དབང་ཐོབ་ནས་ཚུལ་བཞིན་དུ་བསྙེན་པ་ཐེམ་ན་འཇིག་རྟེན་གསུམ་གྱི་དངོས་གྲུབ་ཐམས་ཅད་ཐོབ་པར་གསུངས་ཏེ། དེ་ཉིད་དྲན་ལྡན་བསྙེན་པར་བྱ། །དེ་ནས་ངེས་པར་དངོས་གྲུབ་སྟེར། །ཡུད་ཙམ་འཇིག་རྟེན་གསུམ་དབང་འགྱུར། །ཞེས་གསུངས་སོ། །དེ་བཞིན་དུ་ཕྲིན་ལས་སྒྲུབ་སྟེ། ཁྲོ་བོའི་རྒྱལ་པོས་ལས་དངོས་སུ་བྱེད་པར་ཡིན་པར་བཤད་མོད་ཀྱི། ཞི་དང་དབང་དང་རྒྱས་པ་རྣམས། །དེ་དག་བྱེད་འགྱུར་གདོན་མི་ཟ། །ཞེས་གསུངས་སོ། འདིའི་དབང་བསྐུར་བ་ལ་སོགས་པའི་ཐབས་ལ་བསྟེན་ནས་ནད་གདོན་བར་ཆད་ཐམས་ཅད་སེལ་བ་ཡིན་ཏེ། མདོར་ན་དུག་རིམས་གདོན་ལ་སོགས། །དེ་བཞིན་དེ་དག་ཐམས་ཅད་ནི། །ཐབས་ལ་སོགས་པས་འཇོམ་པར་བྱེད། །ཞེས་གསུངས་སོ། ཁྱད་པར་དུ་ཁྲོ་བོ་འཇིག་རྟེན་གསུམ་སྣང་སྐུར་བཞེངས། ཧཱུྃ་ལ་སོགས་པའི་སྔགས་དམིགས་སམ་བྱབ་པའི་ཆོ་ག་བྱས་པས་རིམས་དང་དུག་ནད་དང་གདོན་དང་བགེགས་དང་རྒས་པ་ལ་སོགས་པ་མི་མཐུན་པ་ཐམས་ཅད་སེལ་བར་གསུངས་ཏེ། རྒྱུད་
ལས་ཁྲོ་བོ་འཇིག་རྟེན་གསུམ་སྣང་མཛད། །ཟླ་བ་འདྲ་བའི་དགེ་བསམ་དང་། །འོད་ཟེར་འབྱུང་བ་མང་པོ་ཡི། །ཆད་པར་འགྱུར་བ་རྣམས་བསམས་ལ། །རིམས་དང་དུག་དང་གདོན་ལ་སོགས། །འོད་ཟེར་གྱིས་ནི་ཕྱུང་ནས་སུ། །དེ་ཡི་ནད་ཀྱི་གནོད་པ་རྣམས། །ཞི་བའི་ཕྱིར་ནི་རིང་དུ་དོར། །དེ་ནས་ཧཱུྃ་གིས་ཚིག་བཞག་ལ། །རྡོ་རྗེ་ལྟ་བུར་ལུས་བསམས་ཤིང་། །ཧཾ་གིས་འཁོར་ལོས་གོ་ཆ་བགོ །འོད་ཟེར་ཆུ་ཡི་དབང་བསྐུར་རོ། །དེ་ནས་དེ་ཡི་མིང་སྨོས་ནས། །བཟླས་པ་ཚུལ་བཞིན་བསམ་པར་བྱ། །ཞེས་གསུངས་ཤིང་དེ་བཞིན་དུ་ཞི་རྒྱས་དབང་གི་སྦྱིན་སྲེག་རྒྱས་པར་གསུངས་ནས། བརྒྱ་བྱིན་ལ་སོགས་པའི་ལྷ་རྣམས་ཀྱིས་ཕྱག་འཚལ་མཆོད་པ་དཔག་ཏུ་མེད་པས་མཆོད་དེ། ཕྱག་ན་རྡོ་རྗེ་ལ་མཚན་བརྒྱད་ཀྱིས་བསྐོར་བར་བྱས་སོ། །དེ་ལ་འདིའི་དབང་ཐོབ་ན་ལྟ་སྨོས་ཅི་དགོས། དཀྱིལ་འཁོར་དམ་པ་འདི་ཡིད་ལ་དྲན་པ་རྣ་བས་ཐོས་པ་ཙམ་གྱིས་ཀྱང་། ཕན་ཡོན་མཐར་ཐུག་རྫོགས་པའི་སངས་རྒྱས་བཅོམ་ལྡན་འདས་ཕྱག་ན་རྡོ་རྗེ་ལྟ་བུ་ཐོབ་པར་གསུངས་པ་ཡིན་ཏེ། གོང་གི་འདི་བྲིས་བཀླག་གྱུར་ཏམ། །རྟག་ཏུ་འདི་འདོན་འཆང་བྱེད་
དང་། །དྲན་ནམ་ཉན་པར་བྱེད་ཀྱང་རུང་། །ཕྱག་ན་རྡོ་རྗེ་འདྲ་བར་གྱུར། །ཞེས་གསུངས་སོ། །དེ་ལྟར་གནས་སྐབས་སུ་བར་ཆད་སེལ་བ་དང་མཐར་ཐུག་སངས་རྒྱས་འགྲུབ་པའི་དབང་ཟབ་མོ་ཞུ་བའི་ཕྱིར་རྗེས་ཟློས་མཛོད། ཅེས་རྒྱུད་ལས་བསྡུས་རཱ་ག་ཨ་སྱས་སོ། ཕྱག་ན་རྡོ་རྗེ་ལ་རྒྱལ་ཆེན་བཞིས་བསྐོར་བའི་ལོ་རྒྱུས་ནི། དེ་ཡང་སྦྱོང་རྒྱུད་བརྟག་པ་ཕྱི་མ་ལས། རྒྱལ་པོ་ཆེན་པོ་སྡེ་བཞིས་སེམས་ཅན་རྣམས་ལ་ཕན་པ་དང་བདེ་བའི་ཕྱིར་དུ་བཅོམ་ལྡན་འདས་ཕྱག་ན་རྡོ་རྗེ་ལ། རང་རང་གི་སྙིང་པོ་ཕུལ་ནས་བཅོམ་ལྡན་འདས་ཀྱིས་བྱིན་གྱིས་བརླབས་ནས། ཕྱག་ན་རྡོ་རྗེ་ལ་རྒྱལ་པོ་བཞིས་བསྐོར་བའི་དཀྱིལ་འཁོར་ཆེན་པོ་འདི་གསུངས་པ་ཡིན་ལ། འདིའི་དབང་ཐོབ་པའི་ཕན་ཡོན་ནི། རྒྱལ་པོ་མ་ཡིན་པར་རྒྱལ་པོར་འགྱུར་བ་དང་། རྒྱལ་པོ་དང་སྡེ་དཔོན་ཡིན་ན་སྟོབས་དང་མངའ་ཐང་སྐྱེ་བ་དང་། ཐ་མལ་པ་ཡིན་ནའང་། རང་རང་ལ་དཔགས་པའི་ཁ་རྗེ་དབང་ཐང་ཐམས་ཅད་པཎྜི་ཟླ་བ་ཡར་གྱི་ངོ་ལྟར་འཕེལ་བ་སོགས་ཐོབ་པའི་ཚུལ། རྒྱུད་ཉིད་ལས་གསུངས་པ་འདི་རྣམས་ལ་དཔྱད་པས་འཐུས་པར་འདུག །དཀྱིལ་འཁོར་ཉིད་དུ་དབང་བསྐུར་ན། །རྒྱལ་པོ་
མ་ཡིན་པ་ཡང་རྒྱལ་པོར་འགྱུར། །རྒྱལ་པོ་ཡིན་པ་ཆེན་པོར་འགྱུར། །འཛམ་བུ་གླིང་དབང་དཔལ་དང་ལྡན། །གླིང་བཞི་པ་ལ་དབང་བའི་མཆོག །ལས་བཞིར་དབང་ནི་བསྐུར་བར་བྱ། །ལན་བཞི་ཞུགས་པར་བྱས་ནས་ནི། །དེ་ལ་རྡོ་རྗེ་འཛིན་རྒྱལ་བདག །བུ་སྡུག་བཞིན་དུ་སྐྱོང་བར་བྱ། །ཞེས་བཅོམ་ལྡན་འདས་ཕྱག་ན་རྡོ་རྗེས་བཀའ་བསྩལ་པ་དང་། རྒྱལ་པོ་ཆེན་པོ་བཞིས་དམ་བཅས་པ་ནི། བདག་ཅག་རྒྱལ་པོ་ཆེན་པོ་བཞིས། །འབངས་དང་འཁོར་དང་བཅས་པ་དང་། །ཕོ་བྲང་འཁོར་དུ་བཅས་པ་ཡིས། །རྒྱལ་པོ་རྟག་ཏུ་སྐྱོང་བར་བགྱིད། །དེ་གདོན་གཞན་གྱི་ཕྲུ་མ་དང་། །དེ་ཡི་ནད་དང་འཆི་བ་ནི། །འཇིགས་དང་མུ་གེ་ལ་སོགས་པའི། །གནོད་པ་རྣམས་ནི་གཞོམ་པར་བགྱི། །ངལ་སོས་དང་ནི་རྒྱས་པར་བགྱི། །གནས་སྲུང་པོ་ནི་ཞི་བར་བགྱི། །ཕྱུག་དང་གཉེར་བཅས་དུས་མིན་པའི། །འཆི་བདག་ལུས་འཕགས་པོ་ཡིས་འཇོམས། །མིག་མི་བཟང་གིས་བཀྲ་ཤིས་ཤིང་། །མུ་གེ་ལ་སོགས་རྣམ་པར་འཇོམས། །མདོར་ན་བདག་གིས་དེ་ཡི་ནི། །རེ་དང་བསམ་པ་ཀུན་གྱི་སྟེ། །ཅི་སྟེ་ངེས་པ་མ་ལགས་ན། །ཕྱག་ན་རྡོ་རྗེ་
འཁུས་པར་འགྱུར། །ཞེས་དམ་བཅའ་ཕུལ་ཏེ། རྒྱལ་པོ་ཆེན་པོ་སྡེ་བཞིས། འདིའི་དབང་ཐོབ་པ་རྣམས་རྟག་ཏུ་བསྲུང་ཞིང་སྐྱོང་བ་དང་། དེ་ལ་གནོད་པའི་གདོན་དང་། ནད་དང་དུས་མ་ཡིན་པར་འཆི་བ་དང་། མུ་གེ་ལ་སོགས་པའི་གནོད་པ་ཐམས་ཅད་ཟློག་པར་བྱེད་ཅིང་། ཁྱད་པར་དུའང་འདིའི་དབང་ཐོབ་པ་རྣམས་ལ། རྒྱལ་པོ་རྣམ་ཐོས་སྲས་ཀྱིས་ཚེ་དང་བསོད་ནམས་རྒྱས་པར་བྱེད་དོ། །ཡུལ་འཁོར་སྲུང་གིས་ནི་ནད་གདོན་བར་ཆད་ཞི་བར་བྱེད་དོ། །འཕགས་སྐྱེས་པོས་ནི་མི་ནོར་ཐམས་ཅད་དུས་མ་ཡིན་པར་འཆི་བ་བཟློག་གོ །སྤྱན་མི་བཟང་གིས་མུ་གེ་མེད་ཅིང་བཀྲ་ཤིས་པར་བྱེད་དོ། །མདོར་ན་ཡིད་ལ་ཇི་ལྟར་འདོད་པའི་རེ་བ་ཐམས་ཅད་སྐོང་ཞིང་བསམ་པ་འགྲུབ་པར་བྱེད་དོ། །གལ་ཏེ་དེ་ལྟར་མ་བྱས་ན་རྒྱལ་པོ་ཆེན་པོ་སྡེ་བཞིས་བཅོམ་ལྡན་འདས་ཕྱག་ན་རྡོ་རྗེས་བཀའ་དང་དམ་ཚིག་ལ་མ་རྩིས་པ་ཡིན་པས། ཕྱག་ན་རྡོ་རྗེ་ལ་འཁུས་པ་སྟེ། ཕྱག་ན་ཚརྡོ་རྗེ་ལ་གནོད་པ་དང་འདྲ་བའི་ཉེས་སྒྲིབ་དང་བཀའ་ཡི་ཆད་པའི་གནས་སུ་གྱུར་ཅིག་ཅེས་པའི་དམོད་པ་བོར་བ་ལགས་པས། འདི་ཡི་དབང་ཐོབ་ནས་དམ་ཚིག་བསྲུངས་ན་རང་རང་
ལ་བསོད་ནམས་ཇི་ཙམ་ཡོད་པ་དང་། རྗེས་སུ་དཔག་པའི་ཚེ་བསོད་ནམས་ཁ་རྗེ་དབང་ཐང་ཐམས་ཅད་ཡར་འཕེལ་དུ་འགྲོ་བ་ཐེ་ཚོམ་མེད་དོ། །དེ་ལྟར་ཚེ་བསོད་ནམས་རྒྱས་པར་བྱེད་པ་ཕྱག་ན་རྡོ་རྗེ་ལ་རྒྱལ་པོ་བཞིས་བསྐོར་བའི་དཀྱིལ་འཁོར་གྱི་དབང་ཞུ་བའི་ཕྱིར་རྗེས་ཟློས་མཛོད། ཅེས་རྒྱུད་ལས་བསྡུས་པ་རཱ་ག་ཨ་སྱས་སོ། ཕྱག་ན་རྡོ་རྗེ་ལ་ཕྱོགས་སྐྱོང་བཅུས་སྐོར་བའི་ལོ་རྒྱུས་ནི། དེ་ཡང་སྦྱོང་རྒྱུད་བརྟག་པ་ཕྱི་མའི་སྐབས་སུ། ཕྱོགས་སྐྱོང་བ་ཆེན་པོ་བཅུས་བཅོམ་ལྡན་འདས་ལ་ཕྱག་འཚལ་ནས།་སེམས་ཅན་ཐམས་ཅད་ལ་ཕན་པ་དང་བདེ་བའི་སླད་དུ་རང་རང་གི་སྙིང་པོ་ཕུལ་ལོ། །དེའི་ཚེ་བཅོམ་ལྡན་འདས་ཕྱག་ན་རྡོ་རྗེས། ཕྱག་ན་རྡོ་རྗེ་ལ་ཕྱོགས་སྐྱོང་བཅུས་བསྐོར་བའི་དཀྱིལ་འཁོར་འདི་གསུངས་ནས། ཕྱོགས་སྐྱོང་རང་གི་ཕྱོགས་གནས་རྣམས། བརྟག་མི་དགོས་པར་འགྲུབ་པར་འགྱུར་རོ། །ཞེས་འདི་འགྲུབ་ཀྱང་སླ་བར་གསུངས་པས། ཕྱོགས་སྐྱོང་བཅུ་པོ་དགའ་ཞིང་མགུ་ནས། ཕྱག་འཚལ་དམ་བཅའ་ཕུལ་བ་ནི། རྒྱལ་རིགས་རྒྱལ་པོ་ཆེན་པོ་དཀྱིལ་འཁོར་འདིར་ཞུགས་ཤིང་དབང་བསྐུར་འདི་ཐོབ་པའམ། །རིགས་ཀྱི་བུའམ་རིགས་ཀྱི་བུ་མོ་དད་པ་ཅན་དེ་དག་
བདག་ཅག་གིས་རྟག་ཏུ་དུས་ཐམས་ཅད་དུ་བསྲུང་བ་དང་། བསྐྱབ་པ་དང་སྦ་བར་བགྱིའོ། །ཕ་རོལ་གྱི་ཕྲུ་མ་ཀུན་གཞོམ་པར་བགྱིའོ། །དུས་དུས་སུ་ཆར་འབེབས་པར་བགྱིའོ། །འབྲུ་དང་མེ་ཏོག་དང་འབྲས་བུ་རྣམས་སྐྱོང་བར་བགྱིའོ། །ཞེས་ཁས་བླངས་ཤིང་ཁྱད་པར་གཤིན་རྗེ་ཆོས་ཀྱི་རྒྱལ་པོས། དེའི་ཚེ་བསྲིང་བར་བགྱིའོ། །དུས་མ་ཡིན་པར་འཆི་བ་བརྒྱད་པོ་སོ་སོར་དགག་པར་བགྱིའོ། །ཞེས་ཁས་བླངས་དམ་བཅས་སོ། །སྲིན་པོ་རྣམས་ཀྱི་བདག་པོ་ནི་རི་ཏའི་ན་དང་ཡི་དྭགས་དང་འདྲེས་མི་འཇིགས་། པར་བགྱིའོ། །སྲིན་པོ་ལ་སོགས་པས་འཇིགས་པར་མི་བགྱིའོ། །དུས་མ་ཡིན་པར་འཆི་བདག་འཇིགས་པར་མི་བགྱི་སྟེ། དུས་ཐམས་ཅད་དུ་བསྲུང་བ་དང་བསྐྱབ་པ་དང་སྦ་བར་བགྱིའོ། །ཞེས་ཁས་བླངས་དམ་བཅས་སོ། །ཀླུའི་རྒྱལ་པོ་ཝ་རུ་ཎས། བདག་གིས་ཀྱང་དུས་ཐམས་ཅད་རྒྱལ་པོ་དང་ཡུལ་སོ་སོར་སྐྱོང་བར་བགྱིའོ། །ཀུན་ཏུ་བསྲུང་བར་བགྱིའོ། །འབྲུ་རྣམས་བསྐྱེད་པར་བགྱིའོ། །ཀླུའི་ཉེས་པ་རྣམས་མི་འབྱུང་བར་བགྱིའོ། །དུག་དང་སེར་བ་རྣམས་མི་བབ་པར་བགྱིའོ། །དུས་མ་ཡིན་པར་འཆི་བ་རྣམས་སོ་སོར་
དགག་པར་བགྱིའོ། །ཞེས་ཁས་བླངས་དམ་བཅས་སོ། །དེ་ནས་རླུང་གི་བདག་པོས། བདག་ཀྱང་སེམས་ཅན་ཆེན་པོ་དེ་ལ་དུས་ཐམས་ཅད་དུ་རླུང་གི་འཇིགས་པ་ཐམས་ཅད་མི་འབྱུང་བར་བགྱིའོ། །དུས་མ་ལགས་པར་རླུང་མི་འབྱུང་བར་བགྱིའོ། །འབྲུ་དང་མེ་ཏོག་དང་འབྲུ་ཐམས་ཅད་བསྐྱེད་པར་བགྱིའོ། །འཇིགས་པ་ཐམས་ཅད་སོ་སོར་དགག་པར་བགྱིའོ། །ཞེས་ཁས་བླངས་དམ་བཅས་སོ། །དེ་ནས་གནོད་སྦྱིན་གྱི་བདག་པོ་ཀུ་བེ་རས། བདག་གིས་གྱི་བདག་པོ་ཉི་ཤུ་རྩ་བརྒྱད་དང་ལྷན་ཅིག་ཏུ་མཆིས་ཏེ། སྟོབས་དང་ལྡན་པས་སེམས་ཅན་ཆེན་པོ་དེ་དག་ལ་དུས་ཐམས་ཅད་དུ་གནོད་པ་ཐམས་ཅད་སོ་སོར་དགག་པར་བགྱིའོ། །ནོར་དང་འབྲུ་ཐམས་ཅད་ལེགས་པར་འབྱོར་བར་བགྱིའོ། རང་གི་སྐྱེ་བོ་དང་ཡ་ཀྱི་སྐྱེ་བོ་དང་ཡུལ་དང་གནས་དང་བྲན་དང་སྣག་གི་གཉེན་དང་རུས་ཀྱི་གཉེན་དང་གྲོགས་དང་བུ་མོ་དང་། ཆུང་མ་ལ་སོགས་པ་བསྲུང་བར་བགྱིའོ། །གླང་དང་བ་དང་བོང་བུ་དང་རྔ་མོང་དང་ལུག་དང་མ་ཧེ་དང་བ་གླང་དང་རྟ་དང་ར་ལ་སོགས་པ་བསྲུང་བར་བགྱིའོ། །ཞེས་ཁས་བླངས་དམ་བཅས་སོ། །དེ་ནས་འབྱུང་
པོ་ཐམས་ཅད་ཀྱི་བདག་པོ་དབང་བྱེད་ཀྱིས། བདག་གིས་ཀྱང་དེ་ལ་འདི་དང་ཕ་རོལ་ཏུ་ཡོངས་སུ་བསྐྱབ་པ་དང་། ཕན་གདག་པ་དང་ཡོངས་སུ་སྐྱོང་བ་དང་ཞི་བ་དང་བཀྲ་ཤིས་པ་དང་ཆད་པ་སྤང་བ་དང་མཚོན་ཆ་སྤང་བ་དང་། དུག་གཞིལ་བ་དང་དུག་བཅོམ་པ་དང་། མཚམས་བཅད་པ་དང་། ཕྱོགས་ཀྱི་མཚམས་བཅད་པ་དང་། རྡོ་རྗེའི་རྭ་བས་བསྐོར་བ་དང་། རྡོ་རྗེ་ཕུར་བུས་གདབ་པ་དང་། རྡོ་རྗེ་རྭ་བ་རྣམས་བྲེ་བར་བགྱིའོ། །དགོས་པ་ཐམས་ཅད་ཉེ་བར་གནས་པར་བགྱིའོ། །དགོས་པ་དང་དགོས་པ་ཏི་མ་ལགས་པ་རྣམས་ཀྱི་མཚན་མ་ཉེ་བར་གནས་པར་བགྱིའོ། །དངོས་གྲུབ་ཐམས་ཅད་སྩོལ་བར་བགྱིའོ། །ཞེས་ཁས་བླངས་དམ་བཅས་སོ། །དེ་ནས་ནམ་མཁའི་བདག་པོ་ནམ་མཁའ་ལ་ལོངས་སྤྱོད་པ་རྣམས་ཀྱིས། བདག་གིས་ཀྱང་དུས་ཐམས་ཅད་འཇིགས་པ་ཐམས་ཅད་ལ་བདག་ཉིད་དང་འཁོར་ཐམས་ཅད་དང་བཅས་པ་མཆིས་ལ། བསྲུང་བ་དང་པཀྴི་བསྐྱབ་པ་དང་སྦ་བར་བགྱིའོ། །མཆོག་ཐམས་ཅད་དུ་རབ་ཏུ་སྟོན་པར་བགྱིའོ། །ནད་ཐམས་ཅད་རབ་ཏུ་ཞི་བར་བགྱིའོ། །དུས་ཐམས་ཅད་དུ་ཕྱི་བཞིན་དུ་འབྲང་བར་བགྱིའོ། །
ཞེས་ཁས་བླངས་དམ་བཅས་སོ། །དེ་ནས་ས་འོག་གི་བདག་པོ་འཕག་པ་ཆེན་པོས་ཀྱང་། བདག་གིས་ཀྱང་རྒྱལ་རིགས་སོགས་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་རྣམས་ཀྱི་དུས་ཐམས་ཅད་དུ་དོན་ཐམས་ཅད་བསྒྲུབ་པར་བགྱིའོ། །འཇིགས་པ་ཐམས་ཅད་ལས་དུས་ཐམས་ཅད་ལུས་བསྲུང་བར་བགྱིའོ། །བདག་ཉིད་ཀྱང་ཡོངས་སུ་སྐྱོང་བ་བགྱིའོ། །ཞེས་ཁས་བླངས་དམ་བཅས་སོ། །དེ་ལྟར་དབང་འདི་ཐོབ་ཅིང་དད་པ་མ་ལོག་པར་བྱས་ན། ཡེ་ཤེས་ལྷ་ཕྱག་ན་རྡོ་རྗེ་དང་། འཇིག་རྟེན་ཁམས་ན་དབང་ཆེ་བ་ཕྱོགས་སྐྱོང་ཆེན་པོ་བཅུ་འཁོར་དང་བཅས་པས་རྟག་ཏུ་སྲུང་སྐྱོབ་སྡོང་གྲོགས་བྱེད་ཅིང་། བར་ཆད་སེལ་བ་དང་དངོས་གྲུབ་སྩོལ་བ་ནི། ཁོང་རྣམས་ཀྱི་དམ་ཚིག་ཡིན་པར་འདུག་པས། དེ་ལྟ་བུའི་དབང་ཞུ་ཞིང་དད་པ་མ་ཉམས་པ་བྱ་སྙམ་པས་རྗེས་ཟློས་མཛོད། ཅེས་དགེ་སློང་རཱ་ག་ཨ་སྱས་སོ། ཕྱག་ན་རྡོ་རྗེ་ལ་གཟའ་བརྒྱད་ཀྱིས་བསྐོར་བའི་ལོ་རྒྱུས་ནི། དེ་ཡང་ངན་སོང་སྦྱོང་བའི་རྒྱུད་ཆེན་པོ་བརྟག་པ་ཕྱི་མ་ལས་གཟའ་ཆེན་པོ་བརྒྱད་རྒྱུ་སྐར་དང་བཅས་པས་རང་རང་གི་སྙིང་པོ་ཕུལ་བ་ལ་བསྟེན་ནས་བཅོམ་ལྡན་འདས་ཕྱག་ན་རྡོ་རྗེ་ལ་ལེགས་སོ་གསུངས་ནས་བྱིན་
གྱིས་རླབས་ཏེ་ཕྱག་ན་རྡོ་རྗེ་ལ་གཟའ་དང་རྒྱུ་སྐོར་གྱིས་བསྐོར་བའི་དཀྱིལ་འཁོར་འདི་གསུངས། དེ་ནས་གཟའ་ཆེན་པོ་དེ་དག་གིས་དེ་ལ་དུས་ཐམས་ཅད་དུ་དེ་བཞིན་ཏུ་ཐམས་ཅད་བགྱིའོ། །དེས་རྒྱུ་སྐར་དང་སྐད་ཅིག་ཡུད་ཙམ་དང་ཐང་ཅིག་དང་དུས་དང་ཟླ་ཚེས་དང་སྦྱོར་བ་དང་ཁྱིམ་དང་དུས་དང་སྦྱོར་བ་དང་འཇུག་ཚོལ་ལ་སོགས་པ་དཀྱིལ་འཁོར་གྱི་ལྷ་ཐམས་ཅད་ཀྱིས་ཀྱང་། དུས་ཐམས་ཅད་དུ་སེམས་ཅན་ཆེན་པོ་དེ་དག་གི་བཀའ་མི་བཅག་སྟེ། དཔོན་པོ་བཞིན་དུ་སྐྱོང་བར་བགྱིའོ། །གྲོང་དང་གྲོང་ཁྱེར་དང་གྲོང་བརྡལ་དང་ལྗོངས་དང་། རྒྱལ་པོའི་ཕོ་བྲང་འཁོར་དང་རྒྱལ་པོའི་ཕོ་བྲང་གི་གནས་ཐམས་ཅད་སོ་སོར་བསྐྱེད་པར་བགྱིའོ། །འཇིགས་པ་ཆེན་པོ་འབྱུང་བའི་ཚེ་ཡང་དེ་བདག་ཅག་གིས་མཆོད་ན་གདོན་མི་འཚལ་བར་འཇིགས་པ་མི་འབྱུང་ངོ་། །ཞེས་ཁས་བླངས་དམ་བཅས་པ་སྟེ། འདིའི་དབང་ཐོབ་པའམ་དཀྱིལ་འཁོར་འདི་མཆོད་པའི་ཕན་ཡོན་དེ་བཞིན་དུ་ཐམས་ཅད་བགྱིའོ། །ཞེས་པའི་དོན་ཡིན་ཅིང་། སྔོན་དུ་ཕྱོགས་སྐྱོང་བཅུས་ཁས་བླངས་བའི་དོན་དེ་དག་ཐམས་ཅད་ཡིན་ཏེ། དུས་མ་ཡིན་པར་འཆི་བ་ཐམས་ཅད་བཟློག་ནས་ཚེ་
བསྲིང་བ་དང་། ཡི་དྭགས་དང་འདྲེ་དང་སྲིན་པོའི་གནོད་པ་ཐམས་ཅད་ལས་བསྲུང་ཞིང་བསྐྱབ་པ་དང་ཀླུའི་གནོད་པ་ཞི་ཞིང་འབྲུ་དང་ལོ་ལེགས་པར་བྱེད་པ་དང་། རླུང་གི་གནོད་པ་ཞི་ཞིང་འབྲས་དྲུག་སྐྱེས་པ་དང་། འཇིགས་པ་བཅུ་དྲུག་གི་གནོད་པ་བསྒགས་པ་དང་ནོར་ཕྱུགས་རྟ་སོགས་སྒོ་ནོར་རྣམས་སྲུང་ཞིང་འཕེལ་བ་དང་། ཡུལ་དང་གནས་དང་ཉེ་དུ་དང་བྲན་འཁོར་ཐམས་ཅད་སྲུང་ཞིང་སྐྱོང་བ་དང་། མཚོན་ཆ་ཆད་པ་དང་། དུག་གི་གནོད་པ་ཞི་བ་དང་། རྡོ་རྗེའི་རྭ་གུར་ཕུབ་ནས་སྲུང་སྟེ་བཀྲ་ཤིས་པ་དང་དགོས་པའི་དོན་ཐམས་ཅད་འགྲུབ་པ་དང་། བགེགས་མེད་ཅིང་དངོས་གྲུབ་ཐོབ་པ་དང་། ནད་ཐམས་ཅད་ཞི་བ་དང་། འཇིགས་པ་ཐམས་ཅད་ལས་དུས་ཐམས་ཅད་དུ་སྲུང་བར་བྱེད་པར་བཞེད་དོ། །ཁྱད་པར་དུ་ཡང་མི་གཡོ་བ་བརྟུལ་ཕོད་པའི་རྒྱུད་ལས། བདེར་གཤེགས་བདག་གིས་བསྒོམས་ནས་སུ། །གཟའ་རྣམས་སོ་སོར་མདུན་གནས་ནས། །སྔགས་ནི་བརྗོད་པར་བྱ་བ་ཡིན། །ཞེས་དང་། སྣ་ཚོགས་གཟུགས་ཅན་གཟའ་རྣམས་ནི། །དེ་ལྟར་ཐམས་ཅད་མཆོད་པར་བྱ།། །བསྐལ་བཟང་སྐྱེ་བར་འགྱུར་བ་དང་། །ལོངས་སྤྱོད་རྒྱལ་ཆེན་སྩོལ་
བར་འགྱུར། །རྒྱལ་པོ་མི་རྒོད་ཆོ་འཕྲུལ་སོགས། །སྲིན་པོ་ལྟོ་འཕྱེ་སྤྲུལ་རྣམས་དང་། །དེ་ཀུན་འབྱུང་བར་མི་འགྱུར་ཏེ། །དེ་ཡི་འཇིགས་པ་ནམ་ཡང་མིན། །ནད་རྣམས་ཀུན་ལས་རྣམ་པར་གྲོལ། །སྡུག་བསྔལ་ཐམས་ཅད་རྣམ་པར་སྤང་། །ཐམས་ཅད་དབང་ཕྱུག་གོ་འཕང་ཐོབ། །ཐེ་ཚོམ་མེད་པར་འབྱུང་བར་འགྱུར། །ཞེས་གསུངས་སོ། །དེ་ལྟ་བུའི་དབང་བསྐུར་ཟབ་མོ་ཞུས་ཤིང་ཉམས་སུ་ལེན་སྙམ་པས་འདིའི་རྗེས་ཟློས་མཛོད། འདི་ཡང་རྒྱུད་ལས་བསྡུས་ཏེ་རཱ་ག་ཨ་སྱས་སྦྱར་བའོ།། ། ཕྱག་ན་རྡོ་རྗེ་ལ་ལྷ་ཆེན་པོ་བརྒྱད་ཀྱིས་བསྐོར་བའི་ལོ་རྒྱུས་ནི། དེ་ཡང་བཅོམ་ལྡན་འདས་ཀྱིས་ངན་སོང་ཡོངས་སུ་སྦྱོང་བའི་རྒྱུད་ཆེན་པོ་གསུངས་པའི་ཚེ། ཚངས་པ་ལ་སོགས་པའི་ལྷ་ཆེན་པོ་བརྒྱད་ཀྱིས། རང་རང་གི་སྙིང་པོ་དང་ཆོ་ག་ཞིབ་མོ་ཕུལ་ནས་བཅོམ་ལྡན་འདས་ཕྱག་ན་རྡོ་རྗེས་ཀྱང་དེ་ལྟར་འགྲུབ་པར་བྱིན་གྱིས་རླབས་སོ། །དེའི་ལྷ་རྣམས་ཀྱིས་དམ་བཅས་སོ། །འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་འདིར་ཞུགས་པ་གང་ལྟར་ལགས་པ་དེ་དག །བདག་ཅག་ལྷ་རྣམས་ཀྱིས་སྒྲིབ་པ་ཐམས་ཅད་རྣམ་པར་སྦྱང་ངོ་། །སྒྲིབ་པ་མ་མཆིས་
པའི་ལམ་བསྟན་པར་བགྱིའོ། །དབེན་པའི་ལམ་བསྟན་པར་བགྱིའོ། །རྣམ་པར་དབེན་པའི་ལམ་བསྟན་པར་བགྱིའོ། །འབྱུང་བའི་ལམ་བསྟན་པར་བགྱིའོ། །མྱ་ངོན་ལས་འདས་པའི་ལམ་བསྟན་པར་བགྱིའོ། །དམ་པའི་ཆོས་ཀྱི་ལམ་བསྟན་པར་བགྱིའོ། །བདེ་འགྲོའི་ལམ་བསྟན་པར་བགྱིའོ། །སྤང་བའི་ལམ་བསྟན་པར་བགྱིའོ། །ཉོན་མོངས་པ་མེད་པའི་ལམ་བསྟན་པར་བགྱིའོ། །སངས་རྒྱས་ཉིད་དུ་བསྒྲུབ་པའི་ལམ་བསྟན་པར་བགྱིའོ། །བྱང་ཆུབ་སེམས་དཔའ་ཉིད་དུ་བསྒྲུབ་པའི་ལམ་བསྟན་པར་བགྱིའོ། །རྡོ་རྗེ་འཛིན་པ་ཉིད་དུ་བསྒྲུབ་པའི་ལམ་བསྟན་པར་བགྱིའོ། །དུས་ཐམས་ཅད་དུ་འཇིགས་པ་ཐམས་ཅད་ལས་བསྲུང་བ་དང་བསྐྱབ་པ་དང་སྦ་བར་བགྱིའོ། །བདག་ཉིད་ཀྱི་བུ་བཞིན་དུ་ཡོངས་སུ་སྐྱོང་བར་བགྱིའོ། །ཕ་རོལ་གྱི་དགྲ་རྐུན་ཡོངས་སུ་གཞོམ་པར་བགྱིའོ། །གྲོང་དང་གྲོང་ཁྱེར་དང་གྲོང་བརྡལ་དང་ལྗོངས་དང་རྒྱལ་པོའི་ཕོ་བྲང་དང་རྒྱལ་སྲིད་རྣམས་བསྲུང་བར་བགྱིའོ། །ཡུལ་ཕྱོགས་དང་གྲོང་ཁྱེར་དང་གྲོང་བརྡལ་རྣམས་བསྲུང་བར་བགྱིའོ། །རྒྱལ་སྲིད་རྣམས་ཀྱང་བསྩལ་བར་བགྱིའོ། །རྒྱལ་སྲིད་ཐོབ་པ་རྣམས་ནི་རྒྱལ་སྲིད་རྒྱས་པར་
བགྱིའོ། །གླིང་གཅིག་པ་དང་གླིང་གཉིས་པ་དང་གསུམ་པ་དང་བཞི་པ་དང་། བདེ་འགྲོ་དང་ལྷའི་གནས་དང་ས་འོག་འཁོར་ལོས་སྒྱུར་བ་རྣམས་བསྩལ་བར་བགྱིའོ། །མདོར་ན་བརྒྱ་བྱིན་ཉིད་དང་ཚངས་པ་ཉིད་རྟོག་འདོད་ཉིད་དང་དབང་ཕྱུག་ཆེན་པོ་ཉིད་བསྩལ་བར་བགྱིའོ། །ཞེས་དམ་བཅས་ཏེ། དཀྱིལ་འཁོར་འདིའི་དབང་ཐོབ་ན་ལྷ་དང་མིའི་བདེ་སྐྱིད་ཡོན་ཏན་ཐམས་ཅད་ཡིད་ལ་གང་འདོད་པ་ལྷ་རྣམས་ཀྱིས་སྩོལ་བར་གསུངས་ཤིང་། འཆི་བའི་ཚེ་ཡང་ལྷ་རྣམས་ཀྱི་བདེ་འགྲོ་དང་མཐོ་རིས་ཀྱི་ལམ་སྟོན་པར་བཤད་པས་ཕན་ཡོན་དེ་ལྟ་བུ་དང་ལྡན་པའི་དབང་ཞུ་བའི་ཕྱིར་རྗེས་ཟློས་མཛོད། ཅེས་པ་རཱ་ག་ཨ་སྱས་སོ། ཕྱག་ན་རྡོ་རྗེ་ལ་ཀླུ་ཆེན་པོ་བརྒྱད་ཀྱིས་བསྐོར་བའི་ལོ་རྒྱུས་ནི།་དེ་ཡང་བཅོམ་ལྡན་འདས་ཀྱིས་ངན་སོང་ཐམས་ཅད་སྦྱོང་བའི་རྒྱུད་ཆེན་པོ་གསུངས་པའི་ཚེ། ཀླུ་ཆེན་པོ་བརྒྱད་ཀྱིས་རང་རང་གི་སྙིང་པོ་ཕུལ་ལོ། །དེའི་ཚེ་བཅོམ་ལྡན་འདས་ཕྱག་ན་རྡོ་རྗེ་ལ་ཀླུ་ཨ་བརྒྱད་ཀྱིས་བསྐོར་བའི་དཀྱིལ་འཁོར་འདི་གསུངས་ནས། དེ་ནས་མིང་ཙམ་བརྗོད་པས་ཀྱང་། །ཀླུ་རྣམས་ཐམས་ཅད་འགྲུབ་པར་འགྱུར། །ཞེས་གསུངས་སོ། །དེས་ཀླུ་རྣམས་
དགའ་ནས་ཁས་བླངས་དམ་བཅའ་ཕུལ་བ་ནི། བདག་ཅག་གིས་བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་རྣམས་གལ་ཏེ་དཀྱིལ་འཁོར་འདིར་ཞུགས་པ་རྣམས་བསླུས་པར་གྱུར་ན། དེའི་བཅོམ་ལྡན་འདས་ཉིད་བསླུས་པར་གྱུར་ཅིག །དེའི་ཚེ་བདག་ཅག་གི་གནས་བྱེ་མས་བསྲེགས་པར་གྱུར་ཅིག །རྡོ་རྗེ་ཀུན་ཏུ་འབར་བས་བདག་གིས་མགོ་འགས་པར་གྱུར་ཅིག །རྟག་པར་དུས་ཐམས་ཅད་དུ་སེམས་ཅན་ཆེན་པོ་དེ་བསྲུང་བ་དང་བསྐྱབ་པ་དང་སྦ་བར་བགྱིའོ། །བརྒྱ་བྱིན་ཆེན་པོ་དང་སྟོབས་དང་བརྩོན་འགྲུས་བསྐྱེད་པར་བགྱིའོ། །དེའི་དུག་རྣམས་དུག་མ་མཆིས་པར་བགྱིའོ། །འཇིགས་པ་ཐམས་ཅད་རྣམ་པར་གཞོམ་པར་བགྱིའོ། །རྒྱལ་བའི་བཀའ་དང་རྡོ་རྗེ་འཛིན་པའི་བཀའ་རབ་ཏུ་བསྒྲུབ་པར་བགྱིའོ། །ཞེས་དམ་བཅས་ཤིང་ཐ་ཚིག་ཕུལ་ལོ། །ཁྱད་པར་དུག་གི་ནད་དང་ཀླུའི་དུག་སྟེ། མཐོང་དུག་དང་རེག་དུག་ཁ་རླང་གི་དུག་དང་མཆེ་བའི་དུག་དང་བསམ་ངན་གྱི་དུག་ཕོག་པ་ལ་བརྟེན་ནས་མི་རྣམས་ལ་མཛེ་དང་དམུ་ཆུ་དང་བད་ཀན་དང་། དྲེག་དང་གྲུམ་བུ་དང་མེ་དབལ་དང་ལྷོག་པ་དང་འབྲས་དང་བས་བལྡགས་ལ་སོགས་པའི་ཀླུའི་ནད་བྱུང་བ་ལ་
འདིའི་དབང་ཐོབ་ན་ནི་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པ་ཐམས་ཅད་ཕན་པ་ཡིན་ཏེ། བཅོམ་ལྡན་འདས་ཕྱག་ན་རྡོ་རྗེས། དེ་ནས་ཀླུ་ཡི་རྒྱལ་པོ་དང་། །རྒྱལ་རིགས་ཐམས་ཅད་རབ་བཅུགས་ནས། །དུག་གི་ཉེས་སྐྱོན་བསལ་བའི་ཕྱིར། །ཕུ་ཞེས་བྱ་བས་དབང་བསྐུར་རོ། །ཞེས་གསུངས་ཏེ། དེའི་ཕྱིར་ན་འདིའི་སྒོ་ནས་ཀླུའི་གདོན་ཁྲོལ་ལ་སོགས་པ་བྱ་བར་རྒྱུད་ལས་གསུངས་ཤིང་ཕྱག་སྲོལ་ལ་ཡང་ཡོད་པ་ཡིན་ཅིང་། ཁམ་ས་ལ་ཀླུ་བརྒྱད་དཀྱིལ་འཁོར་བྱ། །ཞེས་པ་སོགས་འབྱུང་བ་ལྟར། འདིའི་སྒོ་ནས་ཆོ་ག་དང་མཆོད་པ་བྱས་ན་ཀླུ་བཅོས་དང་ཀླུ་མཆོད་ཀྱི་མཆོག་དམ་པ་ཡིན་པས། ཀླུ་མཆོད་དང་ཀླུའི་གཡང་སྐྱབས་དང་། ཆར་འབེབས་ལ་སོགས་ཀླུའི་བྱ་བ་རྣམས་བྱེད་པ་ལ་ཡང་། འདི་ཡི་དབང་ཐོབ་ན་འགྲུབ་སླ་ཞིང་ཡོན་ཏན་ཆེ་བ་སྟེ། ཀླུ་རིགས་མ་ལུས་པ་ཐམས་ཅད་ཀླུ་ཆེན་པོ་འདི་བརྒྱད་ཀྱི་རིགས་དང་འཁོར་དུ་མ་གྱུར་པ་མེད་ཅིང་། ཡེ་ཤེས་ཀྱི་ཀླུ་བརྒྱད་འདི་ནི་ངོ་བོ་སངས་རྒྱས་བྱང་སེམས་ཀྱི་སྤྲུལ་པ་ཀླུའི་རྒྱལ་པོའི་ཚུལ་གྱིས་སེམས་ཅན་གྱི་དོན་མཛད་པ་ཤ་སྟག་ཡིན་པར་བཤད་དོ། །དེ་ལྟར་ཡོན་ཏན་དུ་མ་དང་ལྡན་པའི་
དབང་ཞུ་བའི་ཕྱིར་རྗེས་ཟློས་མཛོད། ཅེས་པ་རཱ་ག་ཨ་སྱས་སོ། ཕྱག་ན་རྡོ་རྗེ་ལ་འཇིགས་བྱེད་དགུས་བསྐོར་བའི་ལོས་རྒྱུས་ནི། དེ་ཡང་ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ཆེན་པོ་གསུངས་པའི་ཚེ། ལྷ་ཆེན་པོ་འཇིགས་བྱེད་དགུས་རང་རང་གི་སྙིང་པོ་ཕུལ་ནས། ཕྱག་ན་རྡོ་རྗེ་འཇིག་རྟེན་གསུམ་རྒྱལ་ལ་འཇིགས་བྱེད་དགུས་བསྐོར་བའི་དཀྱིལ་འཁོར་ཆེན་པོ་འདི་གསུངས་སོ། །འདིའི་དབང་ཐོབ་ན་འཇིག་རྟེན་པའི་ལྷ་མཐུ་བོ་ཆེ་ལ་སོགས་ཀྱི་གནོད་པས་སྐྲག་ཅིང་སྔངས་བ་ཐམས་ཅད་ཞི་ནས་འཇིགས་པ་མེད་པར་ཐོབ་པར་བཤད་དོ། །འཇིགས་བྱེད་ཉིད་ཀྱིས་ཞུས་པ། བདག་གིས་བཀུག་པ་དང་བུད་མེད་རྣམས་ཀྱང་སྐྲག་ནས། ལྷ་དང་ཀླུ་དང་ཐམས་ཅད་སྐྲག །རྣམ་པར་སྐྲག་སྟེ། རབ་ཏུ་སྐྲག་སྟེ་ཁ་སྦུབ་ནས་འགྱེལ་ནས། གོས་དང་བྲལ་ཏེ་སེམས་ཀྱང་གཏོར་ནས་ཀུན་ཏུ་མཁྱེན་པ་དེ་དག་ལ་ཕན་གདག་པ་དེའི་སླད་དུ། བདག་ཅག་གི་སྙིང་པོ་ཕུལ་བར་འཚལ་གྱི། བཅོམ་ལྡན་འདས་ཀྱིས་ལེགས་པ་བྱིན་གྱིས་བརླབ་པར་མཛད་དུ་གསོལ། ཞེས་ཞུས་ནས་བཅོམ་ལྡན་འདས་ཀྱིས་ཀྱང་དེ་ལྟར་བྱིན་གྱིས་རླབས་པར་མཛོད། འདི་བསྒྲུབ་ཅིང་འགྲུབ་པར་གྱུར་ན་
འཁོར་ལོས་སྒྱུར་བའི་རྒྱལ་སྲིད་དང་། འཇིག་རྟེན་གསུམ་གྱི་དངོས་གྲུབ་ཐམས་ཅད་དང་ཐུན་མོང་གི་གྲུབ་པ་ཆེན་པོ་བརྒྱད་ལ་སོགས་པའི་དངོས་གྲུབ་ཐམས་ཅད་འབྱུང་བར་གསུངས་ཏེ། ཞུ་བ་དང་བྲོ་བའི་བཏུང་བ་དང་། །རྫས་དང་རལ་གྲི་འཁོར་ལོ་དང་། །རྩེ་གསུམ་པ་དང་མཐོང་རེག་དང་། །མིང་དང་ས་འོག་རྒྱལ་པོ་དང་། །གླིང་དང་གླིང་བཞི་བརྒྱ་བྱིན་དང་། །གནོད་སྦྱིན་དབང་ཕྱུག་སྲིན་པོ་དང་། །རིན་ཆེན་དང་ནི་རིག་འཛིན་ཉིད། །འཁོར་ལོས་སྒྱུར་དང་འཇིག་རྟེན་ཉིད། །གསུམ་གྱི་བདག་དང་བཀའ་ཉན་དང་། །རང་གི་འཁོར་དང་བུད་མེད་ཀྱིས། དངོས་གྲུབ་གང་ཡང་རུང་བ་ནི། །ཅི་དགའ་བར་ཡང་སྦྱིན་པར་བྱེད། །ཞེས་གསུངས་སོ། །ཞེས་པ་རཱ་ག་ཨ་སྱས་སོ།།
༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།