ནོར་རྒྱུན་མའི་དབང་བཤད་བསྡུས་པ།
ནོར་རྒྱུན་མའི་དབང་བཤད་བསྡུས་པ་ཡོད། འོ་ན་ཁྱེད་རྣམས་ལ་ལྷ་མོ་ནོར་རྒྱུན་མའི་དབང་བསྐུར་བ་ཡིན་ཏེ། ལྷ་མོ་འདིའི་ངོ་བོ་ནི་སངས་རྒྱས་ཐམས་ཅད་བསྐྱེད་པའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་དེ་ཉིད། སྦྱིན་པའི་ཕ་རོལ་ཏུ་ཕྱིན་པའི་ངོ་བོར་བཞེངས་པ་ཡིན་ཏེ། ཡང་དག་པར་རྫོགས་པའི་སངས་རྒྱས་ཀྱིས་གསུངས་པས་ནོར་རྒྱུན་མའི་མཚན་བརྒྱ་པ་ལས། ནོར་འཛིན་མ་སྟེ་ནོར་གྱི་རྒྱུན། །གཟུགས་བཟང་མ་ལ་གཟུགས་མཛེས་མ། །ཞི་བའི་གཟུགས་ཅན་མཆོག་གསོལ་མ། །ནོར་དཔལ་དཔལ་མཛད་མ་མཆོག་ལ། །ཆ་དང་གཟུགས་ནི་འཛིན་མཛད་མ། །ཀུན་ལ་བྱམས་ལ་སྐྱབས་འོས་མ། །ལྷ་མོ་ཤེས་རབ་ཕ་རོལ་ཕྱིན། །ཞེས་གསུངས་སོ། །དཔལ་འཁོར་ལོ་སྡོམ་པའི་སྙིང་པོའི་རྣལ་འབྱོར་མ་བཞིའི་ནང་ནས་གཟུགས་ཅན་མ་ཞེས་བྱ་བ་ནི་འདི་ཉིད་ཡིན་ཏེ། སྣ་ཚོགས་གཟུགས་ཅན་གཞོན་ནུ་མ། །ཞེས་དང་། དགའ་བའི་གཟུགས་ཅན་གཟི་ཆེན་མ། །གསེར་མདོག་མ་ལ་འོད་འཕྲོ་མ། །ཞེས་དང་། སེམས་ཅན་དོན་ལ་བརྩོན་པ་མོ། །གཟུགས་ཅན་མ་ལ་ཕྱག་འཚལ་ལོ། །ནོར་རྒྱུན་མ་ལ་ཕྱག་འཚལ་ལོ། །ཞེས་མཚན་བརྒྱ་རྩ་བརྒྱད་
ལས་གསུངས་སོ། །ལྷ་མོ་དེའི་རྒྱུད་གསུང་ཚུལ་ནི། བཅོམ་ལྡན་འདས་ཤཱཀྱ་ཐུབ་པ་ཡུལ་ཀོའུ་ཤམ་བི་ཚེར་མ་ཅན་གྱི་ནགས་ན་བཞུགས་པའི་ཚེ། ཡུལ་དེའི་ཁྱིམ་བདག་ཟླ་བ་བཟང་པོ་ཞེས་བྱ་བ། དབུལ་ཞིང་བཟའ་མི་མང་བ་ཞིག་གིས་བཅོམ་ལྡན་འདས་ལ་ཕྱག་འཚལ་ཞིང་བསྐོར་བ་འབུམ་ཐེར་བྱས་ནས། དབུལ་བའི་སྡུག་བསྔལ་དང་ནད་སེལ་བའི་ཐབས་ཞུས་པས། བཅོམ་ལྡན་འདས་ཀྱིས་ཞལ་ནས། སྔོན་བསྐལ་པ་གྲངས་མེད་པའི་གོང་རོལ་དུ་སངས་རྒྱས་རྡོ་རྗེ་འཆང་རྒྱ་མཚོའི་དབྱངས་ཞེས་བྱ་བ་ལ། ནོར་གྱི་རྒྱུན་མའི་རིག་སྔགས་འདི་ཐོས་ཀྱིས་ཁྱོད་ལ་བཤད་པར་བྱའོ་གསུངས་ནས། ནོར་རྒྱུན་མ་འདི་བཀའ་བསྩལ་པས། ཁྱིམ་བདག་ཟླ་བ་བཟང་པོའི་ཁྱིམ་དེ་སྐད་ཅིག་ལ་ནོར་དང་འབྲུ་སྣ་ཚོགས་ཀྱིས་གང་བར་གྱུར་ཏོ། །གཞན་ཡང་ནོར་རྒྱུན་མའི་རྟོགས་པ་ཆེན་པོ་དང་། གསེར་འོད་དོན་གྲུབ་མ་ཞེས་བྱ་བ་ལས་ཞོར་བྱུང་དུ་གསུང་པ་དང་། དཔལ་སྒྱུ་འཕྲུལ་དྲྭ་བའི་རྒྱུད་ཆེན་པོ་ལས། ནོར་གྱི་རྒྱུན་ཆར་དུ་འབེབས་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཞེས་ལྷ་མོ་འདི་ཞལ་གསུམ་ཕྱག་དྲུག་མ་འཁོར་གནོད་སྦྱིན་མའི་ཚོགས་ཀྱིས་བསྐོར་
བའི་སྒྲུབ་ཐབས་གསུང་པ་དང་། དཔའ་བོ་གཅིག་སྒྲུབ་རྒྱུད་ལས་ཀྱང་། ཛམ་ལྷའི་ཐུགས་ཀར་ནོར་རྒྱུན་མ་མཆེད་ལྔ་བསྒོམ་པའི་སྒྲུབ་ཐབས་གསུང་པ་དང་། རྡོ་རྗེ་གུར་ལས་ནོར་རྒྱུན་མ་གཙོ་རྐྱང་ཕྱག་གཉིས་པ་གསུང་པ་སོགས་རྒྱུ་སྡེ་དུ་མ་ནས་ལྷ་མོ་འདི་གསུངས་ཏེ། རྒྱས་པར་རྡོ་རྗེ་ཕྲེང་བ་ན་ནོར་རྒྱུན་མའི་དཀྱིལ་འཁོར་གྱི་དབང་དང་། བསྡུས་པ་དང་། འབྲིང་པོ་གཙོ་རྐྱང་དང་། ལྷ་ལྔ་སོགས་དུ་མ་འབྱུང་བ་ལས། ད་ལམ་རྒེའི་དབང་ཡིན་ལ། འདིའི་ཕན་ཡོན་ནི། ནོར་རྒྱུན་མའི་གཟུངས་ལས། བཅོམ་ལྡན་འདས་ཀྱིས་བཀའ་སྩལ་པ། འདིའི་བྱིན་རླབས་ཀྱིས་གནོད་བྱེད་དང་། སྲིན་པོ་དང་ཤ་ཟ་སོགས་གདོན་གྱི་རིགས་ཐམས་ཅད་ཀྱིས་གནོད་པར་མི་བྱེད། འདི་ཐོས་པ་ཙམ་གྱིས་ཀྱང་བདེ་བ་དང་ལོ་ལེགས་པར་གསུངས་སོ། །འདིའི་མུ་གེ་དང་ནད་དང་འཆི་བ་འབྱུང་བར་མི་འགྱུར། འདི་ནི་སེམས་ཅན་དབུལ་པོ་དང་ནད་མང་བ་དང་། དགྲ་མང་བ་རྣམས་ལ་ཕན་པའི་ཕྱིར་སངས་རྒྱས་ཐམས་ཅད་ཀྱིས་གསུངས་པའོ། །ཞེས་དང་། དཔལ་བོ་གཅིག་སྒྲུབ་རྒྱུད་ལས། ནོར་རྒྱུན་མཆེད་ལྔ་གསུངས་ནས། སྒྱུ་འཕྲུལ་དྲྭ་བ་
ལས། རིན་ཆེན་ཆར་པ་འབེབས་པ་དང་། །ནོར་ཀུན་གྱི་ནི་ཆར་པ་དག །འབེབ་པར་བྱེད་པ་བསམ་པར་བྱ། །ནོར་གྱི་བློ་གྲོས་ཆེན་མོ་འདི། །དེ་ལྟར་སྔགས་པས་བསྒོམས་རྒྱུན་དེས། །དཔག་ཚད་བདུན་ནི་རྒྱས་པར་ཡང་། །ནོར་གྱི་རྒྱུན་ནི་ཁྱབ་པར་མཛད། །ཅེས་དང་། རྡོ་རྗེ་གུར་ལས། ཛམ་བྷ་ལ་དང་ནོར་རྒྱུན་གཉིས། ནོར་བསྒྲུབ་པར་བཤད་པའོ། །ཞེས་དང་། གསེར་འོད་ནོར་བསྒྲུབ་འགྲུབ་མ་ལས། གསེར་འོད་འདི་འདོན་ཅིང་། ནོར་ལྷའི་རྒྱལ་པོ་མཆོད་གྱུར་ན། ཚེ་རབས་ཐམས་ཅད་དུ་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་ནམ་ཡང་སྐྱེ་བར་མི་འགྱུར་རོ། །བྱོལ་སོང་གི་སྐྱེ་གནས་སུ་སོང་བ་རྣམས་དང་། བྱ་དང་རི་དྭགས་ཀྱི་སྐྱེ་གནས་སུ་རྣ་ལམ་དུ་གྲག་པར་གྱུར་ན་ཡང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །གལ་ཏེ་མིར་སྐྱེས་ན་ཡང་རྒྱལ་རིགས་སུ་སྐྱེ་བར་འགྱུར་རོ། །གཟུགས་བཟང་བར་འགྱུར་རོ། །དབྱངས་སྙན་པར་འགྱུར་རོ། །ཤེས་རབ་ཆེ་བར་འགྱུར་རོ། །ཆོས་སྤྱོད་པའི་སྐལ་པ་དང་ལྡན་པར་འགྱུར་རོ། །ཟད་པ་མེད་
པའི་ལོངས་སྤྱོད་ནི་ཚེ་རབས་ཐམས་ཅད་དུ་རྙེད་པར་འགྱུར་རོ། །ཁྱད་པར་དུ་རྒྱལ་པོ་ཆེན་པོ་རྣམ་ཐོས་སྲས་དང། དེ་བཞིན་དུ་ཨཱཿརྱ་ཛམ་བྷ་ལ་དང་། རྟ་བདག་ཀུ་བེ་ར་དང་། ཕྱུགས་བདག་ལྷ་མོ་ནོར་རྒྱུན་མ་དང་། ལུག་བདག་ནོར་བུ་བཟང་པོ་དང་། དེ་ལ་སོགས་པའི་ནོར་ལྷའི་ཚོགས་རྣམས་ཀྱིས་ཚེ་རབས་རྟག་ཏུ་གྲོགས་བྱེད་པར་འགྱུར་རོ། །ཞེས་དང་། ནོར་རྒྱུན་མའི་སྒྲུབ་ཐབས་ལས། འདི་ཡི་དམ་བྱས་ན་འབྲུ་དང་ལོ་ཐོག་བང་མཛོད་རིགས་རྒྱུད། རྐང་འགྲོས་མ་ཧེ་རྟ་ཕྱུགས་ཐམས་ཅད་འཕེལ། དུས་ཁྱད་པར་ཅན་ནམ་རྒྱུན་དུ་མཆོད་ན་ནོར་ཐམས་ཅད་འཕེལ། གཏོར་མ་བཀའ་བསྒོ་བྱས་ན་དགྲ་དང་ཆོམ་རྐུན་ཐམས་ཅད་ཀྱིས་མི་ཚུགས། ནོར་དང་ལོངས་སྤྱོད་ཐམས་ཅད་དང་ལྡན་ནོ། །གསོལ་བ་བཏབ་ན་ནོར་འབྱུང་། རིན་པོ་ཆེའི་ཆར་མངོན་སུམ་དུ་འབབ་པ་ཡང་ཡོད་སྐད་དོ། །ཞེས་གསུངས་སོ། །དེ་ལྟར་བསོད་ནམས་མངའ་ཐང་འཕེལ་ཞིང་ནད་ཐམས་ཅད་ཞི་བ་ལ་མཆོག་ཏུ་བསྔགས་པའི་དབང་ཞུ་བའི་ཕྱིར་རྗེས་ཟློས་མཛོད། ཅེས་རཱ་ག་ཨ་སྱས་སྦྱར་བ་མངྒ་ལཾ།། །།
ཤོག་སྟོང་།