རི་ཁྲོད་མའི་དབང་བཤད་ལོ་རྒྱུས།
རི་ཁྲོད་མའི་དབང་བཤད་ལོ་རྒྱུས་བཞུགས་སོ། །འོ་ན་ད་ལམ་ཁྱེད་རྣམས་ལ་བཅོམ་ལྡན་འདས་མ་རི་ཁྲོད་ལོ་མ་གྱོན་མའི་དབང་བསྐུར་བ་ཡིན་ཏེ། སྔོན་གྱི་དུས་ན་རི་རབ་ཀྱི་རྩེར་རིན་པོ་ཆེའི་གཞལ་ཡས་ཁང་ན། སངས་རྒྱས་དཔག་ཏུ་མེད་པ་འདུས་ནས། བྱང་ཆུབ་སེམས་དཔའི་སྨོན་ལམ་གྱི་ཏིང་ངེ་འཛིན་ལས་མི་གཡོ་བ་ལ་དབང་བསྐུར་ནས་ཆེར་གཟིགས་པས། དེ་ནས་བྱང་ཆུབ་སེམས་དཔའ་དེ་ཁྲོ་བོ་རྣམ་པར་སྣང་མཛད་དུ་སྤྲུལ་ནས་རྫུ་འཕྲུལ་ཆེན་པོ་བསྟན་ཏེ། སྤྲུལ་པ་བསྡུས་ནས་མི་འཁྲུགས་པས་སངས་རྒྱུས་རྣམས་ཀྱིས་སེམས་ཅན་གྱི་དོན་ལ་བསྐུར། དེར་སྨོན་ལམ་བཏབ་པས་དཔལ་ལྡན་ལྷ་མོ་དཔོན་གཡོག་ཏུ་གྱུར་པ། ལྷའི་བུ་རྣམས་སྐྲག་ནས་བསྔངས་སོ། །དེར་སྤྱན་རས་གཟིགས་ཀྱིས་འདི་ལ་མ་སྐྲག་མ་གཤེ་བར་མཆོད་བསྟོད་གྱིས་ཤིག་གསུངས་པས། ལྷ་རྣམས་ཀྱིས་མཆོད་ཅིང་བསྟོད། ལྷ་མོ་འདི་ནི་མ་འོངས་པར་སངས་རྒྱས་དཔལ་ལྡན་ནོར་བུ་རིན་པོ་ཆེ་ལས་བྱུང་བ་ཞེས་བྱ་བ་ཡིན་པར་གསུངས་སོ། །དེ་ནས་ལྷ་དང་ལྷ་མིན་འཁྲུག་པའི་ཚེ། ལྷ་མ་ཡིན་འདུལ་བའི་དོན་དུ། ལྷ་དབང་ཕྱུག་ཆེན་པོ་དང་། ལྷ་མོ་ཨུ་མའི་སྲས་མོར་འཁྲུངས་
ནས། ལྷ་མ་ཡིན་གྱི་གཡུལ་ངོ་བཟློག །སྐུ་རི་རབ་ཙམ་དུ་སྤྲུལ་ནས་ལྟེ་བར་ལྷ་དམག་གི་རྫོང་བཅས་པས། རྒྱལ་ཆེན་སྡེ་བཞིས་ཕྱག་འཚལ། ལྷ་མ་ཡིན་རྣམས་འོག་ཀླུ་ཡུལ་དུ་བྲོས་པས། རྒྱ་མཚོའི་དཀྱིལ་ནས་མེ་འབར་བའི་ཆོ་འཕྲུལ་བསྟན་ཏེ། ཀླུའི་རྒྱལ་པོས་ཕྱག་འཚལ་ནས་རྒྱ་མཚོ་མི་སྐམ་པར་ཞུས་པས། ལྷ་རྣམས་ཀྱིས་དཔག་བསམ་ཤིང་གི་བདག་མོར་བསྐོས། རྣམ་པར་རྒྱལ་བའི་ཁང་བཟང་དུ་རིན་པོ་ཆེ་སྣ་ཚོགས་པས་བརྒྱན་ཏེ། ལྷ་རྣམས་ཀྱིས་མཆོད་པ་བྱེད་དོ། །དེ་ནས་རི་ཁྲོད་མདངས་དགའ་བ་ན། ཤིང་ཤི་རི་ཞེས་བྱ་བའི་ལོ་མ་གྱོན་ན། འཕགས་པ་མི་ཕམ་པ་ཞེས་བྱ་བའི་གཟུངས་བཟླས་པས། རི་ཁྲོད་ལོ་མ་ཅན་པརྫུ་ཤ་བ་རི་ཞེས་བྱ་བ་ཡིན་ཏེ། འདིའི་གཟུངས་རྒྱས་བསྡུས་ལས། །འདི་བཟླས་ན་སྒྲིབ་པ་ཐམས་ཅད་དག་པ་དང་། བཀྲ་མི་ཤིས་པ་དང་། ཡམས་ནད་ཐམས་ཅད་དང་། རིམས་ཅན་ཐམས་ཅད་ཞི་ཚུལ་རྒྱ་ཆེར་གསུངས་ཤིང་། སམ་བྷ་ཏྲི་ལས་གདུག་རྩུབ་ཐམས་ཅད་ཞི་བ་དང་། །ནད་རྣམས་ཐམས་ཅད་འཕྲོག་བྱེད་པ། །ཤ་བ་རི་ཞེས་བྱ་བ་འདི། །རྣལ་འབྱོར་ཅན་གྱིས་བསྒོམ་པར་བྱ། །བཅོམ་ལྡན་རྡོ་རྗེ་
འཛིན་པས་གསུངས། །ཞེས་དང་། དཔལ་སྒྱུ་འཕྲུལ་དྲྭ་བའི་རྒྱུད་ལས། དེ་འདྲ་རྣལ་འབྱོར་ཅན་གྱིས་བསྒོམས་ན་མི་ངས་ཐམས་ཅད་ཞི་བར་བྱེད། ནད་། ཐམས་ཅད་ཞི་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཞེས་དང་། དངོས་གྲུབ་བསྟན་གཟིགས་རྒྱུད་ལས། རིམས་ནད་འཇོམས་བྱེད་བཀྲ་ཤིས་ཤ་བ་རི། །ཞེས་གསུངས་པས། མདོར་ན་བཀའ་གསར་རྙིང་ཐམས་ཅད་ནས་ནད་རིམས་མི་ནད་ཕྱུགས་ནད་ཐམས་ཅད་ཞི་བའི་མཆོག་དམ་པ་ཡིན་པར་གསུངས་པའི་ལྷ་མོ་བཀྲ་ཤིས་ཤ་བ་རིའི་དབང་ཞུ་བའི་ཕྱིར་མཎྜལ་ཕུལ། འདིར་གསར་མ་རྣམས་བྱ་རྒྱུད་དང་། རྙིང་པ་རྣམས་བླ་མེད་དེ། བཀྲ་ཤིས་རྟགས་བརྒྱད་སྦྱར་རོ། །ཞེས་པ་རཱ་ག་ཨ་སྱས་དོན་འགྲུབ་ཀྱི་འདོད་པ་ལྟར་ཉུང་ངུར་སྦྱར་བའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།