རྗེས་གནང་སྤྱི་ལ་སབ་རྒྱུའི་མངོན་རྟོགས་ཉི་ཤུ་རྩ་བརྒྱད།
རྗེས་གནང་སྤྱི་ལ་སབ་རྒྱུའི་མངོན་རྟོགས་ཉི་ཤུ་རྩ་བརྒྱད་བཞུགས་སོ། །
སྟོང་པའི་ངང་ལས་ཟླ་བའི་སྟེང་དུ་ཧཱུཾ་ཡིག་སེར་པོ་ལ་ཨཱཿ་ལི་ཀཱ་ལི་དཀར་པོའི་བསྐོར་བ་ལས། བཅོམ་ལྡན་འདས་རྡོ་རྗེའི་བདག་པོ་སྐུ་མདོག་སེར་པོ་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་གཡས་ས་ནོན་གཡོན་མཉམ་བཞག་རྡོ་རྗེའི་སྐྱིལ་ཀྲུང་གིས་བཞུགས་པ་ན་བཟའ་དམར་པོ་གསོལ་བ། ཞི་བའི་བདག་ཉིད་ཅན། མཚན་དང་དཔེ་བྱད་ཀྱིས་བརྒྱན་པ་གཡས་སུ་བྱམས་པ་སེར་པོ་གཡས་རིན་པོ་ཆེའི་རྔ་ཡབ་དང་གཡོན་ཀླུ་ཤིང་གི་ཡལ་ག་མེ་ཏོག་དང་བཅས་པ་འཛིན་པ། གཡོན་དུ་འཇིག་རྟེན་དབང་ཕྱུག་དཀར་པོ་གཡས་རིན་པོ་ཆེའི་རྔ་ཡབ་དང་། གཡོན་པདྨ་
དཀར་པོ་འཛིན་པ་གཉིས་ཀའང་རལ་པའི་ཅོད་པན་ཅན་དུ་གསལ་སོགས། སྙིང་པོ་ནི། ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཨཱབཛྲ་ཧཱུྃ་སྭཱ་ཧཱ། རིགས་བདག་ནི་རྣམ་སྣང་ཡིན། རྒྱུད་ནི་བྱ་རྒྱུད་ཡིན་ནོ། །རྫས་བརྒྱད། ༈ པད་ཟླའི་སྟེང་དུ་ཧྲཱིཿལས་འཇིག་རྟེན་དབང་ཕྱུག་སྐུ་མདོག་དཀར་པོ་ཞལ་གཅིག་ཕྱག་བཞིའི་དང་པོ་གཉིས་ཐལ་མོ་སྦྱར་བ། འོག་མ་གཉིས་བགྲང་ཕྲེང་དང་པདྨ་བསྣམས་པ་རྡོ་རྗེའི་སྐྱིལ་ཀྲུང་གིས་བཞུགས་པ། རྒྱན་ཐམས་ཅད་ཀྱིས་བརྒྱན་པ། གཡས་སུ་ཡི་གེ་དྲུག་མ་སེར་མོ་ཆ་ལུགས་གཙོ་བོ་དང་མཚུངས་པ། གཡོན་དུ་ནོར་བུ་འཛིན་པ་དཀར་པོ་
ཞལ་གཅིག་ཕྱག་གཉིས་གཡས་ཕྱག་འཚལ་བའི་ཚུལ་དང་། གཡོན་རིན་པོ་ཆེའི་ཕྲེང་བ་འཛིན་པ། སྙིང་པོ་ནི། ཨོཾ་མ་ཎི་པདྨེ་ཧཱུཾ། འོད་དཔག་མེད་ཀྱིས་དབུ་རྒྱན་ཞིང་རྒྱུད་ནི་བྱ་རྒྱུད་ཡིན་ནོ། །རྫས་བརྒྱད།། ༈ །།སྟོང་པའི་ངང་ལས་ཧཱུྃཡིག་དཀར་པོ་ལས་ཁ་སར་པཱ་ཎི་འཇིག་རྟེན་དབང་ཕྱུག་དཀར་པོ་པད་ཟླ་ལ་སྐྱིལ་ཀྲུང་ཕྱེད་པས་བཞུགས་པ་ཞལ་གཅིག་ཕྱག་གཉིས་གཡས་མཆོག་སྦྱིན་གཡོན་པདྨ་བསྣམས་པ། རལ་པའི་ཅོད་པན་ཅན། རྒྱན་ཐམས་ཅད་ཀྱིས་བརྒྱན་པ། གཡས་སུ་སྒྲོལ་མ་དང་ནོར་བཟང་གཡོན་དུ་ཁྲོ་གཉེར་ཅན་དང་རྟ་མགྲིན་གནས་པ། དབུ་བརྒྱན་ནི་འོད་དཔག་མེད། སྙིང་པོ་ནི། ཨོཾ་ཧཱུྃསྭཱ་ཧཱ། ཁ་སར་པ་ཎི་འདི་ནི་བྱ་རྒྱུད་ཡིན་ནོ། །རྫས་བརྒྱད།། ༈ །།སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་ཨ་དཀར་པོ་ལས་སེང་གེ་དཀར་པོ། དེའི་སྟེང་དུ་ཨ་ཡིག་ལས་པདྨ་དཀར་པོའི་ལྟེ་བ་ལ་ཧཱིདཀར་པོའི་མཚན་པ་དེ་ཡོངས་སུ་གྱུར་པ་ལས། རྗེ་བཙུན་སེང་གེ་སྒྲ་སྒྲོག་སྐུ་མདོག་དཀར་པོ་ཞལ་གཅིག་སྤྱན་གསུམ་པ། ཟླ་བ་ཕྱེད་པས་དབུ་བརྒྱན་པ། རལ་པའི་ཅོད་པན་ཅན། ཕྱག་གཉིས་ཀྱི་ཕྱག་གཡས་མཆོག་སྦྱིན་དང་། གཡོན་པའི་ཕྱག་གྒ་སྐུ་
རྒྱབ་གདོན་ལ་གཏད་པ། གཡས་ལོགས་ན་པདྨ་དཀར་པོའི་སྡོང་བུར་སྦྲུལ་དཀར་པོས་དཀྲིས་པའི་དབྱུག་གུ་རྩེ་གསུམ་དཀར་པོ། གཡོན་ལོགས་ན་པདྨ་དཀར་སྟེང་ན་རལ་གྲི་དཀར་པོ་དེ་དང་ཉེ་བར་མེ་ཏོག་དྲི་བཟང་པོས་གང་བའི་ཐོད་པ་དཀར་པོ་རྒྱལ་པོ་རོལ་པའི་སྟབས་ཀྱིས་སེང་གེའི་གདན་ལ་བཞུགས་པ། སྟག་ལྤགས་ཀྱི་ན་བཟའ་ས་ཤིང་སྐུ་ལ་རིགས་ལྔ་འཕྲོ་བ་སོགས། དབུ་རྒྱན་འོད་དཔག་མེད། སྔགས་ནི། ཨོཾ་ཨཱཿཧྲཱིཿ སེང་ཧ་ནཱ་ད་ཧཱུྃ་ཕཊསྭཱ་ཧཱ། སེང་གེ་སྒྲ་འདི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་ཧཱུྃལས་འཇིག་རྟེན་མགོན་པོ་སྐུ་མདོག་དམར་པོ་པདྨ་ལ་རོལ་པའི་སྟབས་ཀྱིས་བཞུགས་པ། ཞལ་གཅིག་ཕྱག་གཉིས་གཡས་མཆོག་སྦྱིན། གཡོན་པདྨ་བསྣམས་པ། རལ་པའི་ཅོད་པན་ཅན། གཡས་སུ་སྒྲོལ་མ་ལྗང་གུ་གཡས་མཆོག་སྦྱིན་གཡོན་ཨུཏྤལ་འཛིན་པ་ཞི་བའི་ཉམས་ཅན། གཡོན་དུ་རྟ་མགྲིན་དམར་པོ་གཡས་པས་ཕྱག་འཚལ་བ། གཡོན་པས་དབྱུག་པ་འཛིན་ཅིང་སྐུ་ལ་སྟག་ལྤགས་གསོལ་བ། ཁྲོ་བོའི་ཆ་ལུགས་སུ་ཅན་དུ་མོས་ལ། དབུ་རྒྱན་ནི་རྡོ་རྗེ་ཆོས། སྔགས་ནི། ཨོཾ་ཧྲིསྭཱ་ཧཱ། འདི་ཡང་བྱ་རྒྱུད་ཡིན་ནོ།། ༈ །།
སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་ཧཱུྃལས་པདྨ་དཀར་པོ་ཧྲིས་མཚན་པ་ལས་ཐུགས་རྗེ་ཆེན་པོ་ཧ་ལ་ཧ་ལ་སྐུ་མདོག་དཀར་པོ་ཞལ་གསུམ་ཕྱག་དྲུག་པ་ཞི་བའི་ཉམས་ཅན་རྩ་ཞལ་དཀར་པོ། གཡས་ཞལ་སྔོ་གཡོན་སེར་གཡས་གསུམ་མཆོག་སྦྱིན་བགྲང་ཕྲེང་དང་མདའ། གཡོན་གསུམ་ན་ལྷ་མོ་འདོད་ལྡན་མའི་ནུ་མ། པདྨ་དཀར་པོ་གཞུ་བསྣམས་པ། སྟག་ལྤགས་ཀྱི་ཤམ་ཐབས་ཅན། པདྨ་དང་ཟླ་བའི་གདན་ལ་རོལ་པའི་སྟབས་ཀྱིས་བཞུགས་པ། རལ་པའི་ཅོད་པན་ལ་ཐོད་སྐམ་དང་ཟླ་ཕྱེད་ཀྱིས་བརྒྱན་པ། །དེའི་གཡས་སུ་པདྨའི་སྟེང་དུ་སྦྲུལ་གྱིས་དཀྲིས་པའི་རྩེ་གསུམ། གཡོན་དུ་མེ་ཏོག་སྣ་ཚོགས་ཀྱིས་གང་བའི་ཐོད་པ། ཡུམ་ལྷ་མོ་འདོད་ལྡན་མ་དམར་མོ་གཡོན་ཕྱོགས་ནས་འཁྱུད་པ༔ ལྷོ་ཕྱོགས་རིན་ཆེན་མི་གཡོ་བའི་རི་ཕུག་ན་བཞུགས་པར་མོས་ལ། དབུ་རྒྱན་ནི་འོད་དཔག་མེད་དོ། །སྔགས་ནི། ཨོཾ་ཧ་ལ་ཧ་ལ་ཧཱུྃསྭཱ་ཧཱ། ཐུགས་རྗེ་ཆེན་པོ་འདི་ནི་བྱ་རྒྱུད་ཡིན་ནོ།། ༈ །། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་དྷིལས་འཇམ་དབྱངས་སྐུ་མདོག་དམར་པོ་གཡོན་ཨུཏྤལ་དང་། མདུན་དུ་ར་ལས་དྲ་བ་ཅན་གྱི་འོད་ལྗང་གུ་གཡོན་ན་པདྨ་
འཛིན་པ། གཡས་སུ་པཾ་ལས་སྒྲ་གཅན་མ་དམར་མོ་གཡོན་པདྨ་དམར་པོ་འཛིན་པ། རྒྱབ་ཏུ་ཙོ་ལས་ཟླ་འོད་མ་དཀར་མོ་གཡོན་པདྨ་དཀར་པོ་འཛིན་པ། གཡོན་དུ་ནཾ་ལས་ཉེ་བའི་སྒྲ་གཅན་མ་དམར་མོ་གཡོན་ཨུཏྤལ་འཛིན་པ། གཙོ་འཁོར་ཐམས་ཅད་ཞལ་གཅིག་ཕྱག་གཉིས། གཡས་ཐམས་ཅད་མཆོག་སྦྱིན་གཡོན་པདྨའམ་ཨུཏྤལ་ཡུ་བ་ཅན་འཛིན་པ། རྡོ་རྗེ་སྐྱིལ་ཀྲུང་གིས་བཞུགས་པ། རྒྱན་ཐམས་ཅད་ཀྱིས་བརྒྱན་པར་མོས་ལ། དབུ་རྒྱན་ནི་མི་བསྐྱོད་པ་ཡིན་ནོ། །སྔགས་ནི། ཨོཾ་ཨ་ར་པ་ཙ་ན་དྷིཿ འདི་ནི་བྱ་རྒྱུད་ཡིན་ནོ། ༈ །།སྟོང་པའི་ངང་ལས་ཆོས་འབྱུང་དཀར་པོ་གྲུ་གསུམ་གྱི་ནང་དུ་པདྨ་དང་སྣ་ཚོགས་རྡོ་རྗེ་ལ་གནས་པའི་གཞལ་ཡས་ཁང་གྲུ་བཞི་སྒོ་བཞི་རྟ་བབས་དང་བཅས་པ། །མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་དང་ཟླ་བའི་གདན་ལ། ཚུ་ལས་འཇམ་པའི་རྡོ་རྗེ་ཞལ་གསུམ་པ་རྩ་ཞལ་དང་སྐུ་མདོག་གུར་གུམ་གྱི་མདོག་ཅན་གཡས་སྔོ་གཡོན་དཀར་བ། ཕྱག་དྲུག་པའི་དང་པོ་གཉིས་རང་འོད་ཀྱི་ཡུམ་འཇམ་པའི་རྡོ་རྗེ་མ་ལ་འཁྱུད་ཅིང་མ་མཆུ་འཇིབ་པ། བོར་མ་གཉིས་ཀྱིས་རལ་གྲི་དང་ཨུཏྤལ་ལ། ཐ་
མ་གཉིས་ཀྱིས་མདའ་དང་གཞུ། རྡོ་རྗེ་སྐྱིལ་ཀྲུང་གིས་བཞུགས་པ་རིན་པོ་ཆེའི་རྒྱན་གྱིས་སྤྲས་པ། དབུ་རྒྱན་ནི་མི་བསྐྱོད་པའོ། །སྔགས་ནི། ཨོཾ་ཨཱཿམཉྫ་བཛྲ་ཧཱུྃ། འདི་ནི་བླ་མེད་ཕ་རྒྱུད་ཡིན་ནོ།། ༈ །།སྟོང་པའི་ངང་ལས་སྣ་ཚོགས་པདྨ་དང་། ཉི་མའི་སྟེང་དུ་ཧཱུྃ་ལས་གཏུམ་པོ་ཆེན་པོ་ཟར་མའི་མེ་ཏོག་གི་མདོག་ལྟར་སྔོ་བ། རིན་པོ་ཆེས་བརྒྱན་པ། ཞལ་གཅིག་པ་མཚེ་བས་མ་མཆུ་མནན་པ། རབ་ཏུ་དམར་བའི་སྤྱན་གསུམ་ཟུར་གྱིས་གཟིགས་པ། དཔྲལ་བར་ཁྲོ་གཉེར་བསྡུས་པ། ཕྱག་གཡས་རལ་གྲི་ནམ་མཁའ་ལ་ཕྱུར་བ། གཡོན་སྡིགས་མཛུབ་དང་བཅས་པའི་ཞགས་པ་ཐུགས་ཀར་འཛིན་པ། ཞབས་གཡོན་གྱིས་པུས་མོ་དང་། གཡས་ཀྱི་མཐིལ་གདན་ལ་བཙུགས་པ། སེམས་དཔའ་སུམ་བརྩེགས་ཅན། རིགས་བདག་མི་བསྐྱོད་པ་ཡིན་ནོ། །སྔགས་ནི། ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། འདི་ནི་སྤྱོད་རྒྱུད་ཡིན་ནོ། །དུར་ཁྲོད་ཆས་བརྒྱད་ཡོད་ན་མི་གཡོ་བ་ཡིན་ནོ།། ༈ །།སྟོང་པའི་ངང་ལས་པད་ཟླའི་སྟེང་དུ་མེ་སེར་པོ་ལས་མགོན་པོ་བྱམས་པ་སྐུ་མདོག་སེར་པོ་ཞལ་གསུམ་རྩ་ཞལ་སེར་པོ་གཡས་ནག་གཡོན་དཀར་བ། ཕྱག་བཞི་དང་པོ་གཉིས་ཆོས་འཆད་ཀྱི་ཕྱག་རྒྱ་མཛད་པ། གཡས་
འོག་མས་མཆོག་སྦྱིན། གཡོན་འོག་མས་ཀླུ་ཤིང་གི་མེ་ཏོག་སྙེ་མ་འཛིན་པ། སྣ་ཚོགས་པའི་རྒྱན་དང་ན་བཟས་མཛེས་པ་སྣ་ཚོགས་པདྨ་ལ་སེམས་དཔའི་སྐྱིལ་ཀྲུང་གིས་བཞུགས་པར་གསལ་བའི་སོགས། རིགས་བདག་མཆོད་རྟེན་གྱི་དབུ་རྒྱན། སྔགས་ནི། ཨོཾ་མེ་ཏྲི་མེ་ཏྲི་སྭཱ་ཧཱ། འདི་ནི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་ཨཱཿ་ལི་ལས་ཟླ་བ། ཀཱ་ལི་ལས་ཉི་མ། བར་དུ་པདྨ་ཐཾ་གྱིས་མཚན་པ་དེ་རྣམས་ལས་འོད་ཟེར་འཕྲོས། སེམས་ཅན་གྱི་ནད་གདོན་སྡིག་སྒྲིབ་ཐམས་ཅད་ཞི་བར་བྱས། ཚུར་འདུས་པ་ལས་སྣ་ཚོགས་ཡུམ་དཀར་མོ་ཞལ་གཅིག་ཕྱག་གཉིས་གཡས་མི་འཇིགས་པའི་སྦྱིན་པ་དང་། གཡོན་པདྨ་དཀར་པོ་བསྣམས་པ། པདྨ་དཀར་པོ་ལ་སྐྱིལ་ཀྲུང་གིས་བཞུགས་པ། རྒྱན་དང་ན་བཟའ་དཀར་པོས་བརྒྱན་པར་གསལ་བའི་སོགས། རིགས་བདག་ནི། རྡོ་རྗེ་སེམས་དཔའོ། །སྔགས་ནི། ཨོཾ་ཤྲཱི་བི་ཤྭ་མ་ཏ་བཛྲ་ཀནྡ་ཀ་ན་ཤ་ཡ་ན་ཤ་ཡ་མ་མ་ཤཱནྟཾ་ཀུ་རུ་ཡེ་སྭཱ་ཧཱ། འདི་ནི་གཉིས་མེད་རྒྱུད་ཡིན་ནོ།། ༈ །།པདྨ་དམར་པོ་དང་ཟླ་བའི་གདན་ལ་ཛཾ་ཡིག་སེར་པོ་ལས། དུག་སེལ་མ་གསེར་གྱི་མདོག་ཅན་སེར་སྔོ་དཀར་བའི་ཞལ་གསུམ་སྤྱན་གསུམ་མ། །
སྤྲུལ་གྱི་གདེངས་ཀ་བདུན་གྱིས་བརྒྱན་པ། གཡས་པ་གསུམ་ན་རྡོ་རྗེ། རལ་གྲི། མདའ། གཡོན་པ་གསུམ་སྡིགས་མཛུབ་དང་བཅས་པའི་ཞགས་པ། དུག་གི་མེ་ཏོག ། གཞུ་འཛིན་པ། མེ་ཏོག་ནོར་བུས་བརྒྱན་པར་རོལ་པའི་སྟབས་ཀྱིས་བཞུགས་པར་གལ། དབུ་རྒྱན་ནི་མི་བསྐྱོད་པའོ། །སྔགས་ནི། ཨོཾ་ཛ་གུ་རུ་ལ་སརྦ་བི་ཥ་པྲ་ཤ་མ་ནི་ཕུ་སྭཱ་ཧཱ། འདི་ནི་བྱ་རྒྱུད་ཡིན་ནོ།། ༈ །སྟོང་པའི་ངང་ལས་ཨ་ཡིག་དམར་པོ་ལས་པདྨ་དམར་པོའི་སྟེང་དུ་ཏཱཾཡིག་དཀར་པོ་ལས་ཐོད་པའི་ནང་དུ་ཉི་མ་ལ་ཧཱུཾ་ལས་གྲི་གུག་ཧཱུྃ་གིས་མཚན་པ་ལས་རྒྱ་ནག་སྒྲོལ་མ་སྐུ་མདོག་ནག་མོ་ཞལ་གཅིག་སྤྱན་གསུམ་པ་ལྗགས་འདྲིལ་ཞིང་མཆེ་བ་གཙིགས་པ། ཕྱག་བཞིའི་གཡས་གཉིས་རལ་གྲི་དང་གྲི་གུག་།གཡོན་གཉིས་ན་ཨུཏྤལ་དང་ཐོད་པ་འཛིན་པ། རུས་པའི་རྒྱུན་ལྔ་དང་མགོ་བོའི་དོ་ཤལ་འཕྱང་བ། ཀླུ་བརྒྱད་ཀྱིས་བརྒྱན་ཅིང་སྟག་ལྤགས་ཀྱི་ཤམ་ཐབས་ཅན་རལ་པ་དམར་སེར་རཾ་ཁཾ་པའི་ཐོར་ཚུགས་ཅན་ཐུང་ཞིང་གསུས་ཁྱིམ་ཆེ་བ། གཡོན་བརྐྱང་གི་སྟབས་ཀྱིས་རོ་གདན་ལ་བཞུགས་པར་གསལ། དབུ་རྒྱན་ནི་མི་བསྐྱོད་པའོ། །སྔགས་ནི། ཧཱུྃ་ཏྲེམ་ཧཱུྃ་ཕཊ། འདི་ནི་བླ་མེད་ལུགས་སོ།། ༈ །།
སྟོང་པའི་ངང་ལས་པདྨ་དམར་པོ་དང་ཟླ་བ་ལ་དྷིཡིག་སེར་པོ་ལས་ཤེར་ཕྱིན་མ་སེར་མོ་ཞལ་གཅིག་རལ་པའི་ཅོད་པན་ཅན། ཕྱག་གཉིས་ཆོས་འཆད་ཀྱི་ཕྱག་རྒྱ་པོ་ཏི་དང་བཅས་པའི་ཨུཏྤལ་སྔོན་པོ་གཡོན་ཕྱོགས་སུ་བསྣམས་པ། རྡོ་རྗེའི་སྐྱིལ་ཀྲུང་གིས་བཞུགས་པ་གོས་དང་རྒྱན་སྣ་ཚོགས་ཀྱིས་བརྒྱན་པར་གསལ་བ། དབུ་རྒྱན་ནི་མི་བསྐྱོད་པའོ། །སྔགས་ནི། ༀ་དྷི་ཤུ་ཏི་མྲི་ཏི་བི་ཛ་ཡེ་སྭཱ་ཧཱ། འདི་ནི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་པད་ཟླ་ལ་པུཾ་ལས་པདྨ་དྲྀ་གྱིས་མཚན་པ་ལས་ཤེར་ཕྱིན་མ་དཀར་མོ་ཞལ་གཅིག་ཕྱག་གཉིས་ཆོས་ཀྱི་ཕྱག་རྒྱས་ཤེར་ཕྱིན་གྱི་པོ་ཏིས་མཚན་པའི་པདྨ་གཉིས་གཡས་གཡོན་འཛིན་པ། གོས་དང་རྒྱན་སྣ་ཚོགས་ཀྱིས་བརྒྱན་པ། རྡོ་རྗེའི་སྐྱིལ་ཀྲུང་གིས་བཞུགས་པར་གསལ་བ། དབུ་རྒྱན་ནི་མི་བསྐྱོད་པའོ། །སྔགས་ནི། ཨོཾ་པྲ་སྭཱ་ཧཱ། འདི་ནི་བླ་མེད་དགྱེས་རྡོར་རྒྱུད་ཡིན་ནོ།། ༈ །།སྟོང་པའི་ངང་ལས་བྷི་སེར་པོ་ལས་ཁྲོ་གཉེར་ཅན་མ་སེར་མོ་ཞལ་གཅིག་ཕྱག་བཞི་རལ་པའི་ཅོད་པན་ཅན་སྤྱན་གསུམ་གཡས་གཉིས་མཆོག་སྦྱིན་དང་བགྲང་ཕྲེང་། གཡོན་གཉིས་དབྱུག་གུ་རྩེ་གསུམ་དང་སྤྱི་བླུགས་འཛིན་པ། པོད་ཟླ་ལ་གཡས་
བརྐྱང་གིས་བཞུགས་པར་གསལ་བ། དབུ་རྒྱན་ནི་འོད་དཔག་མེད། སྔགས་ནི། ཨོཾ་ཧཱུཾ་ཀུ་ཏྲི་སྭཱ་ཧཱ། འདི་ནི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་སྙིང་གར་པཾ་ལས་སྣ་ཚོགས་པདྨ་དང་ཟླ་བའི་སྟེང་དུ་ཧཱུཾ་ཡིག་དཀར་པོ་ཡོངས་སུ་གྱུར་པ་ལས། གཙུག་ཏོར་རྣམ་པར་རྒྱལ་མ་སྐུ་མདོག་དཀར་པོ་ཞལ་གསུམ་གྱི་གཡས་སེར་ཞིང་ཞི་བ། གཡོན་སྔོན་པོ་ཁྲོས་ཤིང་མཆེ་བས་མ་མཆུ་མནན་པཾ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཕྱག་བརྒྱད་ཀྱི་གཡས་བཞི་ན་སྣ་ཚོགས་རྡོ་རྗེ་དང་། པདྨ་ལ་བཞུགས་པའི་འོད་དཔག་མེད་དང་། །མདའ་དང་མཆོག་སྦྱིན་གྱི་ཕྱག་རྒྱ་མཛད་པ། གཡོན་བཞི་ན་སྡིགས་མཛུབ་དང་བཅས་པའི་ཞགས་པ་དང་། གཞུ་དང་མི་འཇིགས་སྦྱིན་པའི་ཕྱག་རྒྱ་དང་། བུམ་པ་བཟང་པོ་འཛིན་པ། རྒྱན་ཐམས་ཅད་ཀྱིས་བརྒྱན་པ་སྣ་ཚོགས་པདྨ་དང་ཟླ་བའི་གདན་ལ་རྡོ་རྗེའི་སྐྱིལ་ཀྲུང་གིས་མཆོད་རྟེན་གྱི་ནང་དུ་བཞུགས་པར་གསལ། དབུ་རྒྱན་ནི་རྣམ་སྣང་ཡིན་ནོ། །སྔགས་ནི། ཨོཾ་ཨ་མྲྀ་ཏ་ཨ་ཡུརྡ་དེ་སྭཱ་ཧཱ། ཨོཾ་ཧཱུཾ་སྭཱ་ཧཱ། རྒྱུད་ནི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་ཨ་ལས་ཟླ་བའི་སྟེང་དུ་པཾ་སེར་པོ་ལས་སོ་སོར་འབྲང་མ་སེར་མོ་གཡས་བསྐོར་གྱིས་
རྩ་ཞལ་སེར་དཀར་ནག་དམར་བའི་ཞལ་བཞི་དང་ལྡན་པ་སྤྱན་གསུམ་དང་ལྡན་ཞིང་། ཕྱག་བརྒྱད་ཀྱིས་གཡས་བཞི་ན་རལ་གྲི་འཁོར་ལོ་རྩེ་གསུམ་མདའ། གཡོན་བཞི་ན་དགྲ་སྟ། གཞུ། ཞགས་པ། རྡོ་རྗེ་འཛིན་པ། པད་ཟླ་ལ་རོལ་པའི་སྟབས་ཀྱིས་བཞུགས་པ། ཉི་མའི་རྒྱབ་ཡོལ་ཅན། དར་སྣ་ཚོགས་པའི་ན་བཟའ་དང་། རིན་པོ་ཆེ་སྣ་ཚོགས་ཀྱིས་བརྒྱན་པ། ནུ་མའི་བར་དུ་སྲིད་སེར་པོའི་མཚན་པར་གསལ། དབུ་རྒྱན་ནི་རིན་ཆེན་འབྱུང་ལྡན་ནོ། །སྔགས་ནི། ཨོཾ་མ་ཎི་དྷ་རི་བཛྲ་ས་ཎི་མ་ཧཱ་པྲ་ཏི་སཱ་རི་ཧཱུཾ་ཧཱུཾ་ཕཊ་ཕཊ། འདི་ནི་བྱ་བའི་རྒྱུད་ཡིན་ནོ།། ༈ །།སྟོང་པའི་ངང་ལས་རང་གི་སྙིང་གར་ཟླ་བ་ལ་ཨོཾ་ཡིག་དཀར་པོ་ལས་གཞན་གྱིས་མི་ཐུབ་པ་གདུགས་དཀར་མོ་ཅན་གེ །དཀར་སྔོ་དམར་བའི་ཞལ་གསུམ་སྤྱན་དགུ་ཕྱག་དྲུག་གི་གཡས་གསུམ་ན་འཁོར་ལོ། མདའ། ལྕགས་ཀྱུ། གཡོན་གསུམ་ན་རྡོ་རྗེ་དཀར་པོ། གཞུ། ཞགས་པ་དང་བཅས་པའི་སྡིགས་མཛུབ་ལྷའི་ན་བཟའ་དང་རྒྱན་གྱིས་བརྒྱན་པ། རྡོ་རྗེའི་སྐྱིལ་ཀྲུང་གིས་བཞུགས་པ། ཁྲོ་མོའི་ལྟ་བས་གདོན་ཐམས་ཅད་ཚར་གཅོད་པར་གསལ། དབུ་རྒྱན་ནི་རྣམ་སྣང་། སྔགས་
ནི། ཨོཾ་སི་ཏ་ཏ་པ་ཏྲེ་ཨ་པ་ར་ཛི་ཏེ་སརྦ་གྲ་ཧ་ན་ཨ་མ་ནུ་ཏྲ་ས་ཡ་ཧ་ན་ཧ་ན་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཉེ་སྙིང་ནི། ཨོཾ་མ་མ་ཧཱུཾ་ནི་སྭཱ་ཧཱ། འདི་ཡང་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་པདྨ་དང་ཨ་ལས་ཟླ་བའི་སྟེང་དུ་ཛ་སེར་པོ་ལས་ཛཾ་བྷ་ལ། ཞལ་གཅིག་ཕྱག་གཉིས་གཡས་བི་ཛ་པུ་ར་ཀ་དང་། གཡོན་ནེའུ་ལེ་འཛིན་པ། ཨུཏྤལའི་ཕྲེང་བ་ཅན་ཐུང་ལ་ལྟོ་བ་འཕྱང་བ། རོལ་པའི་སྟབས་ཀྱིས་བཞུགས་པ། རྒྱན་ཐམས་ཅད་ཀྱིས་བརྒྱན་པ། ཞབས་གཉིས་དུང་དང་པདྨའི་གཏེར་བདག་མནན་པར་གསལ་བ། དབུ་རྒྱན་ནི་རིན་ཆེན་འབྱུང་ལྡན་ཡིན་ནོ། །སྔགས་ནི། ཨོཾ་ཛཾ་བྷ་ལ་ཛ་ལེན་ཏྲ་ཡེ་སྭཱ་ཧཱ། བྱ་རྒྱུད་ཡིན་ནོ།། ༈ །།སྟོང་པའི་ངང་ལས་རྡོ་རྗེ་སྔོན་པོ་ཧཱུྃ་གིས་མཚན་པ་ལས། ཛཾ་བྷ་ལ་གཞོན་ནུ་ལོ་བཅོ་ལྔ་ལོན་པའི་ན་ཚོད་ཅན། ཞལ་གཅིག་མཆེ་བ་གཙིགས་པ། རྣ་བ་མ་ཕུག་པ་ཁྲོ་གཉེར་བསྡུས་ཤིང་དམར་ལ་ཟླུམ་པའི་སྤྱན་གསུམ་པ་སྐྲ་ཁམ་པ་གྱེན་དུ་བརྗེས་པ། ཕྱག་གཉིས་གཡས་ཐོད་ཁྲག་ཐུགས་ཀར་འཛིན་པ་ལ་ཞལ་ཕྱོགས་པ། གཡོན་རིན་པོ་ཆེའི་སྙེ་མ་སྐྱུག་བཞིན་པའི་ནེའུ་ལེ་བརླ་སྟེང་དུ་འཛིན་པ། ནོར་སྦྱིན་སེར་པོ་རིན་པོ་ཆེ་སྐྱུག་པའི་སྟེང་དུ་
གཡོན་བརྐྱང་གིས་བཞུགས་པ། གཅེར་བུ་ཕོ་རྟགས་གྱེན་དུ་ལང་བ་མིའུ་ཐུང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་ཀླུ་བརྒྱད་སྦྲུལ་གྱི་གཟུགས་སུ་སྤྲུལ་པའི་སྐུ་ལུས་བརྒྱན་པར་གསལ་བ། དབུ་རྒྱན་ནི་མི་བསྐྱོད་པ། སྔགས་ནི། ན་མོ་རཏྣ་ཏྲ་ཡ་ཡཱ། ན་མོ་མ་ཎི་བྷ་དྲ་ཡ། མ་ཧཱ་ཡཀྵ་སེ་ན་ཏ་པཱ་ཡེ། ཏདྱ་ཐཱ། ཨོཾ་ཛ་བྷ་ལ་ཛ་ལེན་ཏྲ་ཡེ་སྭཱ་ཧཱ༔ འདི་ནི་བླ་མེད་རྒྱུད་ཡིན་ནོ།། ༈ །།སྟོང་པའི་ངང་ལས་པདྨ་དང་ཟླ་བའི་སྟེང་བཾ་སེར་པོ་ལས་ནོར་རྒྱུན་མ་སེར་མོ་ཞལ་གཅིག་ཕྱག་གཉིས་གཡས་མཆོག་སྦྱིན་དང་། གཡོན་འབྲུའི་སྙེ་མ་དང་རིན་པོ་ཆེ་སྣ་ཚོགས་ཀྱིས་ཆར་འབེབས་བཞིན་པའི་བུམ་པ་བསྣམས་པ། ལོ་བཅུ་དྲུག་གི་ན་ཚོད་ཅན། རྒྱན་ཐམས་ཅད་ཀྱིས་བརྒྱན་པ་སྐྱིལ་ཀྲུང་ཕྱེད་པས་བཞུགས་པར་གསལ་སོགས། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་བཱ་སུ་དྷ་རི་ཎི་སྭཱ་ཧཱ། འདི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མ་ལ་ཧཱུཾ་ལས་མི་མགོ་རློན་པ་ལས་བྱས་པའི་དབྱུག་པ་དཀར་པོ་ཧཱུྃ་དམར་པོས་མཚན་པ་ཡོངས་སུ་གྱུར་པ་ལས། གཤིན་རྗེའི་གཤེད་སྐུ་མདོག་དམར་པོ་ཞལ་གཅིག་སྤྱན་གསུམ་པ། སྐྲ་
སེར་པོ་གྱེན་དུ་བརྫེས་པ། ཕྱག་གཉིས་གཡས་ཀྱི་མི་མགོས་མཚན་པའི་དབྱུག་པ་དཀར་པོ་ཕྱུར་བ། གཡོན་ཐོད་ཁྲག་འཛིན་པས་རིང་འོད་ཀྱི་རིག་མ་གྲི་ཐོད་འཛིན་པ་ལ་འཁྱུད་པ། སྟག་ཤམ་དང་སྦྲུལ་གྱིས་བརྒྱན་པ། སྣ་ཚོགས་པདྨ་དང་མ་ཧེའི་སྟེང་ན་གཡོན་བརྐྱང་གིས་བཞུགས་པ། ཐུགས་ཀར་ས་བོན་གྱིས་མཚན་པའི་སེམས་དཔའ་སུམ་བརྩེགས་ཅན་དུ་གསལ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧྲིལླི་ཝི་ཀྲི་ཏཱ་ན་ན་ཧཱུཾ་ཕཊ་སྭཱ་ཧཱ། འདི་ཡང་བླ་མེད་རྒྱུད་དོ།། ༈ །སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མ་ལ་ཧཱུཾ་ལས་རྡོ་རྗེས་མཚན་པའི་དབྱུག་པ་ནག་པོ་ཧཱུྃ་མཐིང་ཁས་མཚན་པ་ལས། གཤིན་རྗེ་མཐིང་ཁ་ཞལ་གཅིག་མཆེ་བ་བཞི་གཙིགས་པ་ལྗགས་འདྲིལ་ཞིང་གད་རྒྱངས་སྒྲོག་པ་སྤྱན་གསུམ་སྨིན་མ་དང་སྨ་ར་དམར་སེར་ཅན། ཕྱག་གཉིས་ཀྱིས་གཡས་རྡོ་རྗེས་མཚན་པའི་དབྱུག་པ་མཐིང་ཁ་ཕྱར་བ། གཡོན་ཞགས་པ་དང་བཅས་པས་སྡིགས་མཛུབ་མཛད་པ། སྟག་དང་སྦྲུལ་གྱིས་བརྒྱན་པ། ལྟོ་བ་འཕྱང་བ། མི་མགོའི་ཕྲེང་བ་ཅན། པད་ཉི་དང་མ་ཧེའི་སྟེང་ན་གཡོན་བརྐྱང་གིས་བཞུགས་པ་ཐུགས་ཀར་ཕྱག་མཚན་དང་ས་བོན་སེམས་
དཔའ་སུམ་བརྩེགས་ཅན་དུ་གསལ། དབུ་རྒྱན་ནི་མི་བསྐྱོད་པའོ། །སྔགས་ནི་གོང་གི་ཡི་གེ་བཅུ་གཅིག་པ་བཟླའོ། །རྒྱུད་ནི་བླ་མེད་རྒྱུད་ཡིན་ནོ།། ༈ །སྟོང་པའི་ངང་ལས་པད་ཉི་ལ་ཧཱུྃ་ལས་དཔལ་སྒེག་པ་རྡོ་རྗེ་སྐུ་མདོག་སྔོན་པོ་གཡས་རྡོ་རྗེ་དང་། གཡོན་རྡོ་རྗེའི་མཚན་པའི་ཐོད་པ་འཛིན་པ་ཡུམ་བདག་མེད་མ་ཞལ་གཅིག་ཕྱག་གཉིས། གྲི་ཐོད་འཛིན་པས་འཁྱུད་པ། སྟག་ཤམ་ཅན་རོའི་གདན་ལ་གར་སྟབས་ཀྱིས་བཞུགས་པ། རུས་པའི་རྒྱན་དྲུག་དང་མགོ་ཕྲེང་གིས་བརྒྱན་པ། ཐལ་བས་བྱུག་པར་གསལ། དབུ་རྒྱན་ནི་མི་བསྐྱོད་པའོ། །སྔགས་ནི། ཨོཾ་ཏྲེ་ལོཀྱ་ཨཀྵེ་བ་ཧཱུྃ་ཧཱུྃ་ཕཊ་ཕཊ། འདི་ནི་བླ་མེད་རྒྱུད་ཡིན་ནོ།། ༈ །།སྟོང་པའི་ངང་ལས་པཾ་ལས་པདྨ་དང་། ཨ་ལས་ཟླ་བའི་སྟེང་དུ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་འབྱུང་པོ་འདུལ་བྱེད་སྐུ་མདོག་མཐིང་ནག་སྤྱན་གསུམ་མཆེ་བ་གཙིགས་པ། དབུ་སྐྲ་དམར་སེར་གྱེན་དུ་བརྫེས་པ། ཕྱག་དང་པོ་གཉིས་ཐུགས་ཀར་ཕྱག་རྒྱ་བཅིང་ཞིང་། འོག་མ་གཉིས་གཡས་རྡོ་རྗེ་དང་། གཡོན་སྡིགས་མཛུབ་དང་བཅས་པའི་ཞགས་པ་འཛིན་པ། ཞབས་གཡོན་བརྐྱང་གིས་འབྱུང་པོ་བསྐྱེལ་བའི་སྟེང་ན་བརྫིས། ཐོད་
སྐམ་ལྔའི་དབུ་རྒྱན་དང་སྟག་ཤམ་ཅན། སྦྲུལ་བརྒྱད་ཀྱིས་སྐུ་ལ་བརྒྱན་པ། ན་བཟའ་སྔོན་པོ་མནབས་པ་གསལ། དབུ་རྒྱན་ནི་མི་བསྐྱོད་པའོ། སྔགས་ནི། ཧཱུྃ་བཛྲ་ཕཊཿ འདི་ནི་སྤྱོད་རྒྱུད་ཡིན་ནོ། །དེ་ལྟར་ཡང་ལྷ་ཉི་ཤུ་རྩ་དྲུག་པོ་འདི་ནི་སྒྲུབ་ཐབས་བརྒྱ་རྩ་རྒྱུ་མཚོ་གཉིས་ཀ་ནས་གསུངས་པའི་མངོན་རྟོགས་ཟུང་ཡོང་རྒྱ་གཞུང་ཡིན་པས་བྱིན་རླབས་ཆེའོ།། ༈ །།ལོ་གྱོན་མ་ནི། སྟོང་པའི་ངང་ལས་པད་ཟླ་ལ་ཧཱུཾ་སེར་པོ་ལས་ལོ་མ་གྱོན་མ་སྐུ་མདོག་སེར་མོ་ཞལ་གཅིག་ཕྱག་གཉིས་སྤྱན་གསུམ། ཕྱག་གཡས་གསེར་གྱི་རྡོ་རྗེ་ནམ་མཁའ་ལ་ཕྱར་བ། གཡོན་སྡིགས་མཛུབ་ཐུགས་ཀར་བསྒྲེང་བ། དར་དང་རིན་པོ་ཆེའི་རྒྱན་ཅན། རྨ་བྱའི་མདོངས་དང་ཤིང་ལོ་གསར་པའི་ཤམ་ཐབས་ཀྱིས་བརྒྱན་པ། བགེགས་རྣམས་མནན་པའི་པད་དཀར་ལ་རྡོ་རྗེ་སྐྱིལ་ཀྲུང་གིས་བཞུགས་པར་གསལ། དབུ་རྒྱན་ནི་མི་བསྐྱོད་པ། སྔགས་ནི། ཨོཾ་པི་ཤ་ཙི་པར་ཎ་ཤ་བ་རི་སརྦ་ཛཱ་ར་པྲ་ཤ་མ་ཎི་སྭཱ་ཧཱ། ཨོཾ་པི་ཤ་ཙི་སྭཱ་ཧཱ། འདི་བྱ་རྒྱུད་ཡིན་ཀྱང་བླ་མེད་ཀྱང་རུང་། སྟོང་པའི་ངང་ལས་པད་ཟླ་ལ་འབྲུ་གསུམ་རིམ་གྱིས་ཞུ་བ་ལས་རྣམ་རྒྱལ་ཧཱུྃ་གིས་མཚན་པ་ལས། སངས་རྒྱས་སྨན་གྱི་བླ་སྐུ་མདོག་མཐིང་ཁ་གཡས་མཆོག་སྦྱིན་དང་ཨ་རུ་
ར་དང་། གཡོན་བདུད་རྩིས་གང་བའི་ལྷུང་བཟེད་འཛིན་པ། དབུ་གཙུག་ཏོར་ཞབས་འཁོར་ལོ་སོགས་མཚན་དང་དཔེ་བྱད་ཀྱིས་སྤྲས་ཤིང་རྡོ་རྗེའི་སྐྱིལ་ཀྲུང་གིས་བཞུགས་པར་གསལ། དབུ་རྒྱན་ནི་མི་བསྐྱོད་པའོ། །སྔགས་ནི། ཨོཾ་བྷི་ཥ་ཛེ་གྷོ་ཥ་ཛེ་མ་ཧཱ་བྷེ་ཥ་ཛྭ་རཱ་ཛ་ས་མུཏྟ་ཏེ་སྭཱ་ཧཱ། འདི་ནི་བྱ་རྒྱུད་ཡིན་ནོ།། ༈ །།སྟོང་པའི་ངང་ལས་པད་ཟླའི་སྟེང་དུ་ཧཱུྃ་ཡིག་དཀར་པོ་ལས་རྡོ་རྗེ་རྣམ་པར་འཇོམས་པ་དཀར་ལ་སྔོ་མདངས་ཅན་ཞལ་གཅིག་སྤྱན་གསུམ་ཁྲོ་ཞིང་འཛུམ་པ་ཕྱག་གཡས་རྡོ་རྗེ་ཐུགས་ཀར་འཛིན་ཅིང་གཡོན་བདུད་རྩིའི་བུམ་པ་ཁྲོ་ཞལ་གྱིས་མཚན་པ་འཛིན་པ། རྡོ་རྗེའི་སྐྱིལ་ཀྲུང་གིས་པད་ཟླའི་གདན་ལ་བཞུགས་པ། དར་དཀར་པོ་དང་རིན་པོ་ཆེས་བརྒྱན་པར་གསལ། དབུ་རྒྱན་ནི་རྡོ་རྗེ་སེམས་དཔའ་ཡིན་ནོ། །སྔགས་ནི། ཨོཾ་བཛྲ་བི་དཱ་ར་ན་ཧཱུཾ་ཕཊ། གཞན་ཡང་། རྣམ་འཇོམས་ཀྱི་རྒྱུད་དང་གཟུངས་ཐུང་ན་མཎྜ་བཛྲ་སོགས་བཀླག་གོ །འདི་ནི་བླ་མེད་ཀྱི་རྒྱུད་བཀྲལ་བ་བི་མ་ལའི་ལུགས་ཡིན། རང་བྱུང་བའི་ཐུགས་དམ་བཀྲ་ཤིས་རྫས་བརྒྱད་ཀྱང་རུང་། བྱབ་ཁྲུས་ལྗང་གུ་དང་འདྲ། བསྟོད་པ་ཡང་ཁྱད་མེད།། ༈ །།རྣམ་འཇོམས་ལྗང་གུ་ནི། སྟོང་པའི་ངང་ལས་ཧཱུྃ་ལྗང་སྔོན་ལས་རྡོ་རྗེ་རྣམ་པར་འཇོམས་པ་སྐུ་
མདོག་ལྗང་སྔོན་ཞལ་གཅིག་སྤྱན་གསུམ་ཁྲོ་ཞིང་འཛུམ་པ། ཕྱག་གཡས་སྣ་ཚོགས་རྡོ་རྗེ་ཐུགས་ཀར་བཀར་ཐབས་སུ་འཛིན་ཅིང་གཡོན་དེའི་ཡུ་བ་བྱས་པའི་དྲིལ་བུ་དཀུར་བརྟེན་པ་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་དར་དང་རིན་པོ་ཆེའི་རྒྱན་ཐམས་ཅད་ཀྱིས་སྤྲས་པ། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པར་གསལ། དབུ་རྒྱན་ནི་རྡོར་སེམས། སྔགས་ནི། བདག་མདུན་གཉིས་ལ་གཟུངས་སོ་སོའི་སྙིང་པོ་ཚར་བདུན་ནམ་ཅི་རིགས་བརྗོད་ལ། བུམ་བསྐྱེད་ནི་བཟླས་པ་རྒྱས་ན་འདི་སྐད་བདག་གིས་ཐོས་པ་དུས་གཅིག་ན་སོགས་ནས་སྨྲས་སོའི་བར་ཚར་གཅིག་དང་གཟུངས་རིང་ཚར་བདུན་འདོན། ཡང་ན་གཟུངས་རིང་གཅིག་དང་། གཟུངས་ཐུང་ཉེར་གཅིག་བཟླའོ། །དེ་ནས་སྡིག་པ་ཐམས་ཅད་བྱང་ནས་ནི་སོགས་ནས་ཁྲུས་གྱིས་ཤིག་བར་ཚང་མ་བརྗོད། བསྡུ་ན་ཉེ་སྙིང་འདི་བརྒྱ་རྩ་བརྒྱད་བཟླས་པས་ཆོག་ལ། གཟུངས་རིང་མི་དགོས་སོ། །བསྙེན་པའི་དུས་དམིགས་པ་ནི། བུམ་པའི་ཐུགས་ཀར་སྣ་ཚོགས་རྡོ་རྗེའི་ལྟེ་བའི་ནང་དུ་བསྒྲུབ་བྱ་གནས་པ་ལས་བདུད་རྩིའི་རྒྱུན་བབ་པས་ནད་གདོན་བར་ཆད་ཐམས་ཅད་ཞི་ཞིང་ཚེ་དང་བསོད་ནམས་ཐམས་ཅད་འཕེལ་བར་གྱུར། ཅེས་བསྒོམས་ལ་མཐར་དེ་བཞིན་གཤེགས་པ་ཐམས་ཅད་ཀྱི་སོགས་བསྟོད་པ་དང་བཀྲ་ཤིས་སྐབས་ཐོབ་དང་སྦྱར་རོ།། ༈ །།
སྟོང་པའི་ངང་ལས་པད་ཟླའི་སྟེང་དུ་ཧཱུྃ་དཀར་པོ་ལས་མི་གཡོ་བ་དཀར་པོ་ཞལ་གཅིག་ཕྱག་གཉིས་གཡས་རལ་གྲི་མེ་འབར་བ་ཕྱར་ཞིང་། གཡོན་ཐུགས་ཀར་སྡིགས་མཛུབ་རྡོ་རྗེ་ཞགས་པ་འཛིན་པ་པདྨ་ཉི་མའི་གདན་ལ་ཙོག་པུར་བཞུགས་པའི་གཡོན་གྱི་པུས་མོ་གདན་ལ་བཙུགས་པ། ཡན་ལག་རགས་ཤིང་ལྟོ་བ་ཆེ་བ། ཁྲོ་བོའི་ཆ་ལུགས་ལ་དར་དང་རིན་པོ་ཆེས་བརྒྱན་ཅིང་མེ་དཔུང་གི་དབུས་སུ་བཞུགས་པའི་ཐུགས་ཀར་འཁོར་ལོ་རྩིབས་བཅུ་པའི་ལྟེ་བར་ཧཱུྃ་དཀར་པོ་རྩིབས་བཅུ་ལ་ཡི་གེ་བཅུ་དང་བཅས་པ་གསལ། རིགས་བདག་ནི་མི་བསྐྱོད་པའོ། །སྔགས་ནི། ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ འདི་ནི་སྤྱོད་རྒྱུད་ཡིན་ནོ། །ཀྱེ། རྟག་ཆད་མཐའ་གཉིས་རྣམ་པར་མ་གཡོས་ཀྱང་། །མཐའ་བྲལ་བདེ་ཆེན་ཁྲོ་བོའི་རྒྱལ་པོ་ནི། །སྤྲུལ་པའི་གཟུགས་ཀྱིས་འགྲོ་དོན་དཔག་མེད་མཛད། །རབ་འཇིགས་མི་གཡོ་མགོན་ལ་ཕྱག་འཚལ་བསྟོད། །ཅེས་བསྟོད་དོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།