སྒྲུབ་ཐབས་བཅུ་གསུམ་གྱི་སྤྱི་ཆིངས་དབང་བསྐུར་བའི་རིམ་པ་ནོར་བུའི་ཕྲེང་བ།
སྒྲུབ་ཐབས་བཅུ་གསུམ་གྱི་སྤྱི་ཆིངས་དབང་བསྐུར་བའི་རིམ་པ་ནོར་བུའི་ཕྲེང་བ་ཞེས་བྱ་བ་བཞུགས་སོ།།
ན་མོ་གུ་རུ་པདྨ་ཀ་ར་ཡེ། འདིར་དབང་སྒྲུབ་རྣམས་ལེགས་པར་གྲུབ་ནས། སློབ་མ་རྣམས་མདུན་དུ་འཚོགས་ལ། ཀུན་རིག་ལས་བྱུང་བའི་ཆ་གསུམ་བཏང་། སུམ་བྷ་ནིས་བགེགས་བསྐྲད། སྲུང་འཁོར་བསྒོམས། འོ་ན་ད་ལམ་ཁྱེད་རང་རྣམས་ལ་ཡི་དམ་ལྷག་པའི་ལྷའི་རྗེས་གནང་ཟབ་མོ་སྐུར་བར་བྱེད་པ་ཡིན་པས། ནམ་མཁའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་འདིར་གསང་སྔགས་རྡོ་རྗེ་ཐེག་པའི་དབང་བསྐུར་ཟབ་མོ་ཞུ་སྟེ་ཚུལ་བཞིན་དུ་ཉམས་སུ་བླངས་བར་བྱས་ནས། ཐུགས་བསྐྱེད་དང་ལྡན་པས་གསན་འཚལ། འདིར་དུས་གསུམ་
བདེ་བར་གཤེགས་པ་ནམ་མཁའི་སྐར་ཚོགས་ཙམ་ལས་བསམ་གྱིས་མི་ཁྱབ་གྲངས་ཀྱིས་མི་ལོངས་པར་བཞུགས་པ་འདི་དག་དཔེར་ན་ནམ་མཁའ་བཞིན་དུ་དག་པའི་དབྱིངས་ལྟ་བུ་ཆོས་ཀྱི་སྐུར་རོ་གཅིག་ཏུ་བཞུགས་པ་ཡིན་ཅིང་། དེ་ནས་ཆོས་ཀྱི་སྐུ་དེ་ལས་གཡོ་བ་མེད་བཞིན་དུ། སླར་ཡང་སེམས་ཅན་སྡུག་བསྔལ་གྱིས་གཟིར་བ་རྣམས་ལ་ཐུགས་རྗེས་བརྩེ་བར་དགོངས་ནས་དཔེར་ན་ནམ་མཁའི་ཀློང་ནས་འཇའ་ཚོན་ཤར་བ་ལྟ་བུའི་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་དང་། ཞི་བ་དང་། ཁྲོ་བོ་དང་། ཞི་མ་ཁྲོ་དང་། དཔའ་བོ་དང་། རྣལ་འབྱོར་
མ། ཡེ་ཤེས་ཀྱི་སྤྱན་དང་ལྡན་པའི་ཆོས་སྐྱོང་སྲུང་མ་ནོར་ལྷ་གཏེར་བདག །དཀར་ཕྱོགས་སྐྱོང་བ་དང་བཅས་པ། ཐབས་མཁས་པའི་ཕྱིར་དུ། བྱ་ཁྱུང་དང་སྡིག་པ་ལ་སོགས་པའི་སྐུ་རུ་སྤྲུལ་ནས། སེམས་ཅན་གྱི་དོན་མཛད་པ་ཡིན་པས། གུ་རུ་རིན་པོ་ཆེ་པདྨ་འབྱུང་གནས་ཀྱིས། རྒྱལ་བ་ཐམས་ཅད་ཡེ་ཤེས་ཀློང་དུ་གཅིག །ཆོས་ཉིད་དོན་ལ་ཆ་ལུགས་མི་མངའ་ཡང་། །ཐབས་མཁས་གང་འདུལ་སོ་སོའི་སྐུར་སྟོན་པ། །ཐུགས་རྗེའི་སྤྲུལ་སྒྱུར་མཛད་ལ་ཕྱག་འཚལ་བསྟོད། །ཅེས་གསུངས་པ་ལྟར་ཡིན་ཅིང་། ༼ཀ༽ སེམས་ཅན་གྲིབ་དང་མི་གཙང་བའི་གནོད་པ་ཐམས་ཅད་ཞི་བའི་ཕྱིར་དུ་གཟུགས་ཀྱི་སྐུར་བཞེངས་རྡོ་རྗེ་རྣམ་པར་འཇོམས་པ་ཡིན་ཀྱང་དོན་ལ་སངས་རྒྱས་དོན་ཡོད་གྲུབ་པ་ཡིན་ཅིང་། །འདིའི་དབང་ཐོབ་ན་སྤར་ཁ་ལི་ཡི་ཉེས་སྐྱོན་ཐམས་ཅད་ཞི་བས། ༼ཁ༽ སངས་རྒྱས་ཐམས་ཅད་ཀྱི་ཆོས་ཁམས་རྣམ་པར་དག་པ། འཕགས་པ་བཞི་པོ་བསྐྱེད་པའི་ཡུམ་དམ་པ་ཡིན་ཏེ། ཆོས་སྐུ་ཀུན་ཏུ་བཟང་མོའམ་ཡུམ་ཆེན་མོའི། མཚན་གྱི་རྣམ་གྲངས་དེ་རྣམས་སེམས་ཅན་ཚོགས་བསགས་པའི་དོན་དུ་གཟུགས་ཀྱི་སྐུར་བཞེངས་པ། ཤེར་ཕྱིན་མ་སེར་
མོ་འདི་ཉིད་ཡིན་ཅིང་། འདིའི་བསྙེན་སྒྲུབ་བྱས་ན། སེམས་ཀྱི་གནས་ལུགས་མྱུར་དུ་རྟོགས་ཤིང་དབང་ཐོབ་ན་སྤར་ཁ་ཁོན་མ་རྒན་མོའི་ཉེས་སྐྱོན་ཐམས་ཅད་ཞི་བ་ཡིན་པས། ༼ག༽ འདིར་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་སྐུའི་བདག་ཉིད་སེམས་ཅན་གྱི་གཏི་མུག་གི་མུན་པ་བསལ་བའི་དོན་དུ་གཟུགས་ཀྱི་སྐུར་བཞེངས་པ། རྗེ་བཙུན་འཇམ་པའི་དབྱངས་སུ་གྲགས་པ་ཡིན་ཞིང་། འདིའི་སྒྲུབ་པ་ལ་འབད་ན་ཤེས་རབ་ཕུན་སུམ་ཚོགས་པར་འགྱུར་ཞིང་། འདི་ཡི་དབང་ཐོབ་ན་སྤར་ཁ་དྭ་ཡི་ཉེས་སྐྱོན་ཐམས་ཅད་སེལ་བས། ༼ང༽ འདིར་དང་པོའི་སངས་རྒྱས་དཔལ་ལྡན་དུས་ཀྱི་འཁོར་ལོ་ཀུན་ཏུ་བཟང་པོ་དང་དོན་གཅིག་ཡིན་ཏེ། དེ་ཉིད་ཀྱི་ཀླུ་གདོན་ལ་སོགས་པ་གདུག་པ་ཅན་ཐམས་ཅད་འདུལ་བའི་ཕྱིར་དུ་གཟུགས་ཀྱི་སྐུར་བཞེངས་པ་ཡེ་ཤེས་ཀྱི་ཁྱུང་ཁྲ་བོ་ཡིན་ཅིང་། འདི་ཡི་བསྙེན་བསྒྲུབས་བྱས་ན། ཀླུ་དང་ས་བདག་གི་གནོད་པ། བད་ཀན་སྨུག་པོ་འབྲས་སྐྲན་ལ་སོགས་པ་ཞི་བ་ཡིན་ཅིང་། འདི་ཡི་དབང་ཐོབ་ན་སྤར་ཁ་ཁེན་པ་རྒན་པོའི་ཉེས་སྐྱོན་ཐམས་ཅད་སེལ་བས། ༼ཅ༽ འདིར་དུས་གསུམ་བདེ་བར་གཤེགས་
པ་ཐམས་ཅད་ཀྱི་ཐུགས་ཀྱི་བདག་ཉིད། སངས་རྒྱས་ཐམས་ཅད་ཀྱི་ས་ལམ་གྱི་བདུད་འདུལ་བའི་ཕྱིར་དུ་གཟུགས་ཀྱི་སྐུར་བཞེངས་པ། བཅོམ་ལྡན་འདས་དཔལ་ཕྱག་ན་རྡོ་རྗེ་ཡིན་ཅིང་། འདི་ཡི་བསྙེན་སྒྲུབ་བྱས་ན། གཟའ་ཀླུའི་གཙོར་བྱས་པའི་ལྷ་སྲིན་སྡེ་བརྒྱད་ཀྱི་གནོད་པ་ཞི་ཞིང་། འདི་ཡི་དབང་ཐོབ་ན་སྤར་ཁ་ཁཾ་གྱི་ཉེས་སྐྱོན་ཐམས་ཅད་སེལ་བས། ༼ཆ༽ འདིར་འཕགས་པ་སྤྱན་རས་གཟིགས་དབང་ཕྱུག་ཉིད་ཀྱི་སེམས་ཅན་གྱི་དོན་ལ་ཐུགས་བསྐྱེད་དང་ལྡན་པ། སྤྱན་སྟོང་ནི་བསྐལ་པ་བཟང་པོའི་སངས་རྒྱས་སྟོང་གི་སྤྲུལ་པ་ལས། ད་ལྟའི་སྟོན་པ་བཀའ་དྲིན་མཉམ་པ་མེད་པ་ཤཱཀྱའི་རྒྱལ་པོ་ཡིན་ཅིང་། འདི་ཡི་བསྙེན་སྒྲུབ་བྱས་ན་སྒྲིབ་གཉིས་བྱང་། ཚུལ་ཁྲིམས་གཙང་། རྒྱལ་གདོན་གྱི་གནོད་པ་ཞི། འདི་ཡི་དབང་ཐོབ་ན་སྤར་ཁ་གིན་རི་སྒོམ་ཆེན་གྱི་གནོད་པ་ཞི་བས། ༼ཇ༽ འདིར་ཆོས་སྐུ་ཡུམ་ཆེན་མོ་དེ་ཉིད་རིམས་ནད་དང་ཡམས་ནད་ཞི་བའི་ཕྱིར་དུ་གཟུགས་ཀྱི་སྐུར་བཞེངས་པ་ཡིན་པས། འདི་ཡི་བསྙེན་སྒྲུབ་བྱས་ན་རིམས་ནད་ཀྱི་གནོད་པ་ཞི་ཞིང་སྲུང་བའི་མཆོག་ཏུ་གྱུར་པ་ཡིན་ནོ། །འདི་ཡི་དབང་ཐོབ་ན་སྤར་ཁ་ཟིན་གྱི་
ཉེས་སྐྱོན་ཐམས་ཅད་ཞི་བས། ༼ཉ༽ འདིར་ཆོས་སྐུ་ཡུམ་ཆེན་མོ་དེ་ཉིད་མེ་ཁམས་རྣམ་པར་དག་པའི་རང་གཟུགས་ཡུམ་ཆེན་མོ་ན་བཟའ་དཀར་མོ་དེ་ཉིད་གཟུགས་སྐུ་དྲག་ཏུ་ཁྲོས་པ་ཁྲོ་མོ་གདུགས་དཀར་མོ་ཅན་འདི་ཉིད་ཡིན་ཅིང་། འདི་ཡི་བསྙེན་སྒྲུབ་བྱས་ན་བྱད་ཁ་རྦོད་གཏོང་བཟློག་ཅིང་། ཕྱི་མ་བདེ་བ་ཅན་དུ་སྐྱེ་བར་གསུངས་སོ། འདི་ཡི་དབང་ཐོབ་ན་སྤར་ཁ་ཟོན་གྱི་ཉེས་སྐྱོན་ཐམས་ཅད་ཞི་བས། ༼ཏ༽ འདིར་རྗེ་བཙུན་འཇམ་པའི་དབྱངས་གཤིན་རྗེའི་གཤེད་ལ་སོགས་པ་གདུག་པ་ཅན་འདུལ་བའི་ཕྱིར་གཟུགས་དྲག་ཏུ་ཁྲོས་པ་གཤིན་རྗེའི་གཤེད་དམར་པོར་གྲགས་ཤིང་། འདི་ཡི་བསྙེན་སྒྲུབ་བྱས་པ་དང་དབང་ཐོབ་ན་སྤར་ཁ་བརྒྱད་པོ་སྤྱི་ཡི་ཉེས་སྐྱོན་ཐམས་ཅད་བསལ་ཞིང་། །ཟ་འདྲེ་ཤི་གཤེད་ཀྱི་གནོད་པ་ཞི་ཞིང་། མདོར་ན་དགྲ་ཐོག་བདུན་ཟུར་ལ་སོགས་པའི་ཉེས་སྐྱོན་ཞི་བས། ༼ཐ༽ འདིར་ཀུན་བཟང་རྡོ་རྗེ་འཆང་ཆེན་པོ་འདོད་ཆགས་རྣམ་པར་དག་པ་སོ་སོར་རྟོགས་པའི་རང་གཟུགས་བཅོམ་ལྡན་འདས་མགོན་པོ་ཚེ་དཔག་མེད་ཅེས་བྱ་བ་ནུབ་ཕྱོགས་བདེ་བ་ཅན་གྱི་ཞིང་གི་བདག་པོ་ཡིན་ཅིང་། འདི་ཡི་དབང་ཐོབ་ཅིང་བསྙེན་སྒྲུབ་
བྱས་ན། དུས་མ་ཡིན་པར་འཆི་བ་བཅོ་བརྒྱད་ཞི་ནས་ཕྱི་མ་བདེ་བ་ཅན་དུ་སྐྱེ་བར་འགྱུར་བས། ༼ད༽ ཆོས་སྐུ་ཡུམ་ཆེན་མོ་དེ་ཉིད་ས་ཁམས་རྣམ་པར་དག་པའི་ཆ་ལས་སངས་རྒྱས་སྤྱན་མ། སེམས་ཅན་དབུལ་བའི་སྡུག་བསྔལ་ལས་བསལ་བའི་ཕྱིར་དུ། བྱང་ཕྱོགས་ལྕང་ལོ་ཅན་ནས་མགོན་པོ་ཛཾ་བྷ་ལའི་ཡུམ་གྱི་ཚུལ་དུ་སྐུར་བཞེངས་ནས་ལྷ་མོ་ནོར་རྒྱུན་མ་འདི་ཉིད་ཡིན་ཅིང་འདི་ཡི་དབང་ཐོབ་ཅིང་། བསྙེན་སྒྲུབ་བྱས་ན་དབུལ་ཕོངས་སྡུག་བསྔལ་ཞི་ནས། རང་གི་བསོད་ནམས་དང་མཐུན་པའི་ནོར་ཕྱུགས་རིགས་རྒྱུད་འཕེལ་བ་དང་། །ཞིང་ལོ་ལེགས་པ་ལ་སོགས་འབྱུང་བར་ཐེ་ཚོམ་མེད། ཕྱི་མ་བདེ་བ་ཅན་དུ་སྐྱེ་བར་འགྱུར་བས། ༼པ༽ འདིར་འཕགས་བཞི་བསྐྱེད་མཛད་ཡུམ་ཆེན་ཀུན་ཏུ་བཟང་མོ་དེ་ཉིད། ཆུ་ཁམས་རྣམ་པར་དག་པ། ཡུམ་ཆེན་མཱ་མ་ཀཱི་དེ་ཉིད། འགྲོ་བ་ཉམ་ཐག་ཆུང་སྲིའི་གནོད་པ་ཞི་ཞིང་སྲིའུ་གསོ་བ་དང་། རིགས་རྒྱུད་འཕེལ་བའི་ཕྱིར་དུ་སྐུར་བཞེངས་པ་ལྷ་མོ་སོ་སོར་འབྲང་མ་དེ་ཉིད་ཡིན་ཅིང་། འདི་ཡི་དབང་ཐོབ་ཅིང་བསྙེན་སྒྲུབ་བྱས་ན་གོང་གི་ཡོན་ཏན་རྣམས་འབྱུང་ཞིང་། ཁྱད་པར་སྲིའུ་གསོ་བའི་སྔགས་པ་བླ་མ་རྣམས་ཀྱིས་འདི་ཡི་
བསྙེན་པ་བྱེ་བ་གཉིས་བསྙེན་ཚད་ཡིན་པས་། དེ་འགྲུབ་ན་སྲིའུ་གསོ་སླ་བ་ཡིན་པས། ༼ཨ༽ འདིར་དང་པོའི་སངས་རྒྱས་རྒྱལ་བ་ཀུན་ཏུ་བཟང་པོའི་གསུང་གི་སྤྲུལ་པ་སངས་རྒྱས་འོད་དཔག་ཏུ་མེད་པ་དེ་ཉིད་ལོངས་སྤྱོད་རྫོགས་པའི་སྐུར་བཞེངས་པ་ཡིན་པས་འཕགས་པ་སྤྱན་རས་གཟིགས་འདི་ཉིད་ཡིན་ཅིང་། ཐུགས་ཀྱི་ངོ་བོ་གཅིག་ཏུ་གྱུར་ན་ཡང་ཞལ་ཕྱག་གི་རྣམ་པ་མང་ན་ཡང་། ད་ལམ་འདི་ཉིད་ནི་ལྷ་འགྲོ་འདུལ་ཕྱག་བཞི་པ་དང་སྔགས་ཡི་གེ་དྲུག་པ་བོད་ཁ་བ་ཅན་གྱི་ལྷ་སྐལ་དམ་པར་གྱུར་པ་ཡིན་པས། འདི་ཡི་དབང་ཐོབ་ཅིང་བསྙེན་སྒྲུབ་ལ་བརྩོན་པ་ཆེན་པོས་ཡི་གེ་དྲུག་པ་དུང་ཕྱུར་བཏོན་ན་སེམས་ངོ་ལ་བལྟ་མ་ཤེས་ཀྱང་སངས་རྒྱས་ཐོབ་པ་ཡིན་ཕྱི་མ་བདེ་བ་ཅན་དུ་སྐྱེ་བར་ཐེ་ཚོམ་མེད་པས་། དེ་ལྟར་སྨིན་བྱེད་ཀྱི་དབང་ཟབ་མོ་ཞུ་བའི་ཡོན་དུ་མཎྜལ་ཕུལ། ས་གཞི་སྤོས་ཆུས་བྱུགས་ཤིང་སོགས། བླ་མ་ལྔ་བཅུ་པ་ལས། པུས་བཙུགས་ཐལ་མོ་སྦྱར་ནས་ཉན་སོགས་འདོད་པའི་གསོལ་གསུམ་གདབ། །ཅེས་གསུངས་པ་ལྟར། བླ་མ་དང་ཡི་དམ་༼ཀ༽ རྡོ་རྗེ་རྣམ་པར་འཇོམས་པ། ༼ཁ༽ ཤེར་ཕྱིན་མ་སེར་མོ། ༼ག༽ རྗེ་
བཙུན་འཇམ་དཔལ་དབྱངས། ༼ང༽ཡེ་ཤེས་ཁྱུང་ཁྲ་བོ། ༼ཅ༽ འབྱུང་པོ་འདུལ་བྱེད། ༼ཆ༽ བཅོམ་ལྡན་འདས་རྡོ་རྗེའི་བདག་པོ། ༼ཇ༽ རི་ཁྲོད་ལོ་མ་གྱོན་མ༼ཉ༽ གདུགས་དཀར་མོ་ཅན། ༼ཏ༽ གཤིན་རྗེའི་གཤེད་དམར་པོ། ༼ཐ༽ མགོན་པོ་ཚེ་དཔག་ཏུ་མེད་པ། ༼ད༽ འཕགས་མ་ནོར་རྒྱུན་མ། ༼པ༽ སོ་སོར་འབྲང་མ། །༼ཨ༽འཕགས་པ་འཇིག་རྟེན་དབང་ཕྱུག །ཐ་མི་དད་པའི་དྲུང་དུ་དབང་ཟབ་མོ་ཞུ་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་འདི་ཞེས་བྱ་བ་ཡི། །དབང་དང་རྗེས་གནང་བསྩལ་དུ་གསོལ། །ད་ཁྱེད་རང་སློབ་མ་རྣམས་རྒྱུད་དག་པར་བྱ་བའི་ཆེད་དུ་བླ་མ་དང་ཡི་དམ་དབྱེར་མེད་པའི་དྲུང་དུ་བདུན་རྣམ་དག་སྔོན་དུ་འགྲོ་བའི་བྱང་ཆུབ་མཆོག་ཏུ་སེམས་བསྐྱེད་པ་འདི་ཡི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་
བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། ལས་བུམ་ཀུ་ཤས་སློབ་མ་བྲན། ཨོཾ་བཛྲ་ཨ་མྲྀ་ཏས་བསང་། །ཨོཾ་སྭ་བྷ་ཝས་སྦྱང་། སྟོང་པ་ཉིད་དུ་གྱུར། སྟོང་པའི་ངང་ལས་ཁྱེད་རང་རྣམས་རྡོ་རྗེ་ར་གུར་ཡེ་ཤེས་ཀྱི་མེ་འབར་བའི་སྲུང་འཁོར་གྱི་དབུས་སུ་པཾ་ལས་པདྨ་དང་ཉི་མའི་སྟེང་དུ་ས་བོན་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། མངོན་རྟོགས་འདོན་། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿཿདམར་པོ། ཐུགས་ཀར་ཧཱུཾ་སྔོན་པོས་མཚན་པར་གྱུར། དེས་ཁྱེད་རང་དབང་ལེན་པ་པོ་རྣམས་ལྷག་པའི་ལྷར་གསལ་བཏབ་ལ། མདུན་དུ་བཤམས་པའི་གཏོར་མ་འདི་ཡང་སྐད་ཅིག་གིས་ཡི་དམ་འདི་ཞེས་བྱ་བ་གསལ་བར་བསྐྱེད་ལ་གནས་གསུམ་དུ་བསྐྱེད་པར་གསལ་ཐོབ། སློབ་དཔོན་ཡང་དེར་
གསལ་བའི་མོས་འདུན་བྱས་པས། སློབ་དཔོན་དང་མདུན་བསྐྱེད་ཀྱི་སྐུའི་གནས་ཐམས་ཅད་ནས་འོད་ཟེར་ཁ་དོག་སྣ་ཚོགས་འཕྲོས་ཡི་དམ་ལྷ་ཚོགས་བསྒོམས་པ་དང་འདྲ་བ་དཔག་ཏུ་མེད་པ་སྤྱན་དྲངས་ནས་ཁྱེད་རང་རྣམས་ལ་ཐིམ་པས། ཁྱེད་རང་རྣམས་ཀྱི་སྒོ་གསུམ་དང་། འདིར་སྨོས་མ་ཐག་པའི་ཡི་དམ་གྱི་སྐུ་གསུང་ཐུགས་དང་དབྱེར་མེད་མི་ཕྱེད་པར་གྱུར་ཅིག ཡེ་ཤེས་པ་ཕེབས་བྱུང་སྙམ་པ་གྱིས་ལ་སེམས་རང་བབས་སུ་ཞོག་ཅིག །སོ་སོའི་སྔགས་བརྗོད་ལ། རོལ་མོ་དང་བཅས་པ་སྙིང་པོའི་མཐར། བཛྲ་ཨཱཿ་བེ་ཤ་ཡ་ཨ་ཨཱཿ༔ ཞེས་ལན་གསུམ་མམ་བདུན་བརྗོད། རྡོ་རྗེ་མེ་ཏོག་དང་བཅས་པས་སྤྱི་བོར་བཞག །ཏིཥྛ་བཛྲ། ཞེས་བརྟན་པར་བྱས། ད་སྐུ་གསུང་ཐུགས་ཡོན་ཕྲིན་ལས་ཀྱི་རྗེས་གནང་ལྔ་ལས། དང་པོ་སྐུ་ཡི་རྗེས་གནང་ཞུ་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་ལྷག་པའི་ལྷ་མཆོག་གི །སྐུ་ཡི་རྗེས་གནང་བསྩལ་དུ་གསོལ། །གསུམ་མམ་གཅིག དེ་ལྟར་གསོལ་བ་བཏབ་པས་སློབ་དཔོན་དང་མདུན་བསྐྱེད་རང་དང་བཅས་པའི་ཐུགས་ཀ་ནས་འཕྲོས། དབང་གི་ལྷ་རྣམས་སྤྱ་
ན་དྲངས་ནས་དབང་བསྐུར་བར་གྱུར། བུམ་པ་ལག་ཏུ་ཐོགས་ལ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །བུམ་པ་མགོར་བཞག་ལ། ལྷ་གང་ཡིན་གྱི་སྙིང་པོ་དང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། བུམ་ཆུ་བླུད། ཀུ་ཤས་སྤྱི་བོར་གཏོར་དབང་བསྐུར་སྐུ་གང་དྲི་མ་དག་ཆུའི་ལྷག་མ་སྤྱི་བོར་འཁྱིལ་པ་ལས་རིགས་ཀྱི་བདག་པོ་༼ཀ༽ དོན་ཡོད་གྲུབ་པ། ༼ཁ༽ མི་བསྐྱོད་པ། ༼ག༽ མི་བསྐྱོད་པ། ༼ང༽ དང་པོའི་སངས་རྒྱས་རྡོ་རྗེ་སེམས་དཔལ་༼ཙ༽ མི་བསྐྱོད་པ། ༼ཆ༽མི་བསྐྱོད་པ། ༼ཇ༽ མི་བསྐྱོད་པ། ༼ཉ༽ རྣམ་པར་སྣང་མཛད། ༼ཏ༽ རྡོ་རྗེ་སེམས་དཔའ། །༼ཐ༽ འོད་དཔག་ཏུ་མེད་པས། ༼ད༽ རིན་ཆེན་འབྱུང་ལྡན། ༼པ༽ རིན་ཆེན་འབྱུང་ལྡན། ༼ཨ༽ འོད་དཔག་ཏུ་མེད་པས། དབུ་བརྒྱན་པར་གྱུར། བཀྲ་ཤིས་ནི། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོས་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །འདི་ནི་
འཇིག་རྟེན་དགེ་བའི་བཀྲ་ཤིས་དང་པོའོ། །དེས་ཁྱེད་རང་རྣམས་ཀྱིས་ལུས་ཀྱི་སྒོ་ནས་བསགས་པའི་སྡིག་སྒྲིབ་དག །ལུས་ལ་གནོད་པའི་གདོན་ཐམས་ཅད་ཞི། ལུས་ལྷའི་སྐུར་བསྒོམ་པ་ལ་དབང་། འབྲས་བུ་སྤྲུལ་སྐུ་འགྲུབ་པའི་སྐལ་པ་ཅན་དུ་བྱས་པ་དེ་སྐུའི་རྗེས་གནང་ཡིན། ད་གཉིས་པ་གསུང་གི་རྗེས་གནང་ཞུ་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་ལྷག་པའི་ལྷ་མཆོག་གི །གསུང་གི་དབང་བསྐུར་བསྩལ་དུ་གསོལ། །གསུམ་མམ་གཅིག །དེ་ལྟར་གསོལ་བ་བཏབ་པས་སློབ་དཔོན་དང་མདུན་བསྐྱེད་ཀྱི་ཐུགས་ཀ་ནས་སྔགས་ཕྲེང་འཕྲོས། ཁྱེད་རང་གི་ཞལ་དུ་ཞུགས་ཐུགས་ཀར་འཁོར་བར་བསྒོམས་ལ་སྔགས་འདིའི་རྗེས་ཟློས་མཛོད། སོ་སོའི་སྔགས་རྗེས་ཟློས་བྱེད་བཅུག །ད་ཁྱེད་རང་རྣམས་ཀྱིས་མེ་ཏོག་གི་ཕྲེང་བ་རེ་སློབ་དཔོན་ལ་ཕུལ་བར་བསམ་ལ་རྗེས་ཟློས་མཛོད། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །གཅིག་གམ་གསུམ། སྔགས་ཀྱི་ཕྲེང་བ་འདི་ཉིད་མེ་ཏོག་གི་ཕྲེང་བ་རེར་བྱས་ནས་
སྤྱི་བོར་བཅིངས་པའི་མོས་པ་མཛད་དུ་གསོལ། དྲིལ་བུ་བསིལ་ཞིང་ཕྲེང་བ་དང་རྡོ་རྗེ་མེ་ཏོག་མགོར་བཞག །བཅོམ་ལྡན་འདི་ལ་བསྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། བརྟུལ་ཞུགས་བརྟན་པར་མཛད་དུ་གསོལ། །རིག་པ་འཛིན་པ་འདི་རྣམས་ཀྱི་རྒྱུད་ལ་ལྷག་པའི་ལྷའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་འཇུག་པར་གྱུར་ཅིག །བཀྲ་ཤིས་བརྗོད། དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་།པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དེས་ཁྱེད་རང་རྣམས་ཀྱིས་ངག་གི་སྒོ་ནས་བསགས་པའི་སྡིག་སྒྲིབ་དག །ངག་ལ་གནོད་ཅིང་འཚེ་བའི་འགལ་རྐྱེན་ཞི། ངག་སྔགས་བཟླ་བ་ལ་དབང་། འབྲས་བུ་གསུང་དབྱངས་དྲུག་ཅུ་དང་ལྡན་པ་ལ་ལོངས་སྤྱོད་རྫོགས་སྐུ་ཐོབ་པའི་སྐལ་པ་ཅན་དུ་བྱས་པ་དེ་གསུང་གི་རྗེས་གནང་ཡིན། གསུམ་པ་ཐུགས་ཀྱི་རྗེས་གནང་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་
དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་ལྷག་པའི་ལྷ་མཆོག་གི །ཐུགས་ཀྱི་རྗེས་གནང་བསྩལ་དུ་གསོལ། །གཅིག་གམ་གསུམ། དེ་ལྟར་གསོལ་བ་བཏབ་པས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་མདུན་བསྐྱེད་ཀྱི་ལྷ་ཡི་ཐུགས་ཀར་ཕོག །དེའི་ཐུགས་ཀ་ནས་ཕྱག་མཚན་དུ་མ་འཕྲོས། ཁྱེད་རང་རྣམས་ཀྱི་ཐུགས་ཀར་ཐིམ་པས་ལྷག་པའི་ལྷའི་སྐུ་གསུང་ཐུགས་ཀྱི་དངོས་གྲུབ་ཐོབ་བྱུང་སྙམ་པ་གྱིས་ལ་ཕྱག་རྒྱ་ཆེན་པོའི་ངང་ལ་མཉམ་པར་ཞོག །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །སོ་སོའི་སྔགས་བརྗོད་ལ་རྡོ་རྗེ། སྙིང་ཁར་བཞག །སྙིང་པོའི་མཐར། བཛྲ་ས་མ་ཡ་སྟེ། བཀྲ་ཤིས་བརྗོད། །དགེ་འདུན་དམ་པ་ཆོས་དང་ལྡན་པའི་བཀྲ་ཤིས་ཤིང་། །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་ཞིང་མཆོག་ངོ་ཚ་ཤེས་དང་དཔལ་གྱི་གཞི། །འཇིག་རྟེན་དགེ་བའི་བཀྲ་ཤིས་གསུམ་པའོ། །དེས་ཁྱེད་རང་རྣམས་ཀྱིས་ཡིད་ཀྱི་སྒོ་ནས་བསགས་པའི་སྡིག་སྒྲིབ་དག །ཡིད་ལ་གནོད་ཅིང་འཚེ་བའི་འགལ་རྐྱེན་ཐམས་ཅད་ཞི།
ཡིད་ཏིང་ངེ་འཛིན་སྒོམ་པ་ལ་དབང་། འབྲས་བུ་ཆོས་སྐུའི་ས་བོན་རྒྱུད་ལ་བཞག་པ་དེ་ཐུགས་ཀྱི་རྗེས་གནང་ཡིན། ད་བཞི་པ་ཡོན་ཏན་གྱི་རྗེས་གནང་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་ལྷག་པའི་ལྷ་མཆོག་གི་ཡོན་ཏན་དབང་བསྐུར་སྩལ་དུ་གསོལ། །གསུམ་མམ་གཅིག །དེ་ལྟར་གསོལ་བ་བཏབ་པས་ཁྱེད་རང་རྣམས་ལྷག་པའི་ལྷར་གསལ་ལ་སློབ་དཔོན་ཡང་དེར་གསལ་བ་ལྷག་པའི་ལྷའི་ཕྱག་མཚན་གཏད་པས་ལྷག་པའི་ལྷ་འདི་དང་སངས་རྒྱས་ཐམས་ཅད་ཀྱི་ཡོན་ཏན་གྱི་དངོས་གྲུབ་ཐོབ་བྱུང་སྙམ་པ་གྱིས། ༼ཀ༽ འདི་ནི་རྡོ་རྗེ་རྣམ་འཇོམས་ཀྱི། །ཕྱག་མཚན་སྣ་ཚོགས་རྡོ་རྗེ་སྟེ། ༼ཁ༽ འདི་ནི་ཡུམ་ཆེན་ཤེར་ཕྱིན་གྱི། །ཕྱག་མཚན་དམ་ཆོས་གླེགས་བམ་སྟེ། ༼ག༽ །འདི་ནི་འཕགས་པ་འཇམ་དཔལ་གྱི། །ཕྱག་མཚན་རལ་གྲི་པུ་སྟི་སྟེ།། ༼ང༽ འདི་ནི་ཡེ་ཤེས་ཁྱུང་ཁྲ་ཡི། །ཕྱག་མཚན་སྤྲུལ་རིགས་ལྔ་པོ་སྟེ།། ༼ཅ༽ འདི་ནི་ཕྱག་ན་རྡོ་རྗེ་ཡི། །ཕྱག་མཚན་རྡོ་རྗེ་རྩེ་དགུ་སྟེ།། ༼ཆ༽ འདི་ནི་བསྟན་
པའི་བདག་པོ་ཡི། །ཕྱག་མཚན་ལྷུང་བཟེད་བདུད་རྩིས་བཀང་།། ༼ཇ༽ འདི་ནི་ལོ་མ་གྱོན་མ་ཡི། །ཕྱག་མཚན་གསེར་གྱི་རྡོ་རྗེ་འདི།། ༼ཉ༽ འདི་ནི་གཙུག་ཏོར་གདུགས་དཀར་གྱི། །ཕྱག་མཚན་འཁོར་ལོ་རྩིབས་སྟོང་པ།། ༼ཏ༽ འདི་ནི་གཤིན་རྗེའི་གཤེད་དམར་གྱི། །ཕྱག་མཚན་ཐོད་དབྱུག་ཐོད་ཁྲུག་སྟེ།། ༼ཐ༽ འདི་ནི་ཚེ་དཔག་མེད་མགོན་གྱི། །ཕྱག་མཚན་ཚེ་བུམ་བདུད་རྩིས་བཀང་།། ༼ད༽ འདི་ནི་ལྷ་མོ་ནོར་རྒྱུན་མའི། །ཕྱག་མཚན་འབྲས་ཀྱི་སྙེ་མ་སྟེ།། ༼པ༽ འདི་ནི་སོ་སོར་འབྲང་མ་ཡི། །ཕྱག་མཚན་རལ་གྲི་དགྲ་སྟ་སྟེ། ༼ཨ༽ འདི་ནི་སྤྱན་རས་གཟིགས་དབང་གི། །ཕྱག་མཚན་ཕྲེང་བ་པདྨ་སྟེ།། ༈ ཁྱོད་ཀྱིས་རྟག་ཏུ་བཅངས་པས་ན། །ཐབས་ཤེས་ཟུང་དུ་འཇུག་པ་དང་། །དུས་གསུམ་སངས་རྒྱས་ཐམས་ཅད་ཀྱི། །ཡོན་ཏན་ཀུན་གྱི་སྣོད་གྱུར་ཏེ། །མཐར་ཐུག་སངས་རྒྱས་ཐོབ་པར་ཤོག །སོ་སོའི་སྔགས་དང་། གུ་ཎ་ཨ་བྷི་ཥིཉྩ་ཧཱི། ཅེས་ལག་ཏུ་བཞག་པའོ། །བཀྲ་ཤིས་བྱ། བཀྲ་ཤིས་རབ་རྒྱས་རྩ་གསུམ་ལྷ་ཚོགས་རྣམས། །བཀྲ་ཤིས་བར་ཆད་མི་མཐུན་གཡུལ་ལས་རྒྱལ། །བཀྲ་ཤིས་ཡིད་བཞིན་བསམ་པ་ཀུན་
འགྲུབ་པ། །བཀྲ་ཤིས་མཆོག་གི་ཀུན་ཁྱབ་བཀྲ་ཤིས་ཤོག །དེས་ཁྱེད་རང་གི་བསགས་པ་སྙོམས་འཇུག་གི་སྒྲིབ་པ་དག །སྒོ་གསུམ་ཆ་སྙོམས་ལ་གནོད་ཅིང་འཚེ་བ་ཐམས་ཅད་ཞི། གནས་སྐབས་ས་ལམ་གྱི་ཡོན་ཏན་ཐམས་ཅད་བསྒྲུབ་པ་ལ་དབང་། མཐར་ཐུག་འབྲས་བུ་བྲལ་བ་དང་། རྣམ་པར་སྨིན་པའི་ཡོན་ཏན་དྲུག་ཅུ་རྩ་བཞི་ལ་དབང་བའི་སྐལ་པ་ཅན་དུ་བྱས་པ་དེ་ཡོན་ཏན་གྱི་རྗེས་གནང་ངོ་། །ད་ལྔ་པ་ཕྲིན་ལས་ཀྱི་རྗེས་གནང་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་ལྷག་པའི་ལྷ་མཆོག་གི །ཕྲིན་ལས་དབང་བསྐུར་བསྩལ་དུ་གསོལ། །གསུམ་མམ་གཅིག །དེ་ལྟར་གསོལ་བ་བཏབ་པས། བླ་མ་དང་མདུན་བསྐྱེད་དབྱེར་མེད་པའི་དཔྲལ་བ་ནས་ཞི་བའི་འོད་ཟེར་དཀར་པོ། མགྲིན་པ་ནས་དབང་གི་འོད་ཟེར་དམར་པོ། ཐུགས་ཀ་ནས་དྲག་པོའི་འོད་ཟེར་མཐིང་ཀ །ལྟེ་བ་ནས་རྒྱས་པའི་འོད་ཟེར་སེར་པོ། གསང་བ་ནས་ལས་སྣ་ཚོགས་ཀྱི་འོད་ཟེར་ལྗང་གུ་རྣམས་འཕྲོས། ཁྱེད་རང་རྣམས་ཀྱི་གནས་ལྔར་ཐིམ་
པས་ནད་གདོན་བར་ཆད་ཞི། ཚེ་དང་བསོད་ནམས་ཐམས་ཅད་རྒྱས། སྣང་སྲིད་ཐམས་ཅད་དབང་དུ་བསྡུས། དགྲ་བགེགས་ཐམས་ཅད་ཚར་བཅད། སངས་རྒྱས་ཐམས་ཅད་ཀྱི་དབང་ཐོབ་པར་སྒོམས་ཤིག །སངས་རྒྱས་ཀུན་གྱི་ཕྲིན་ལས་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །ཕྲིན་ལས་དབང་འདི་ཁྱོད་ཀྱིས་ལོངས། །ལས་བཞིའི་ཙཀ་ལི་གཏད། མེད་ན་གཏོར་མ་མགོར་བཞག །སོ་སོའི་སྔགས་ཀྱི་མཐར། ཀརྨ་ཀཱ་ཡ་ཨ་བྷི་ཥིཉྩ་ཨཱཿ བཀྲ་ཤིས་བརྗོད། དཀྱིལ་འཁོར་གཞལ་ཡས་འདིར་ཡང་བཀྲ་ཤིས་ཤིང་། །ཉིན་ཡང་བཀྲ་ཤིས་དཔལ་འབར་ཏ་ལ་ལ། །མཚན་ཡང་བཀྲ་ཤིས་དཔལ་འབར་ཀྱི་ལི་ལི། །ཉིན་མཚན་རྟག་ཏུ་བཀྲ་ཤིས་བདེ་ལེགས་ཤོག །དེས་སྒོ་གསུམ་ཆ་མཉམ་གྱི་སྡིག་སྒྲིབ་དག །སྒོ་གསུམ་ལ་གནོད་པའི་འགལ་རྐྱེན་ཞི། ལས་རབ་འབྱམས་བསྒྲུབ་པར་དབང་། འབྲས་བུ་སངས་རྒྱས་ཀྱི་ཕྲིན་ལས་ཁྱབ་པ་དང་། རྟག་པའི་བདག་ཉིད་ལ་དབང་འབྱོར་བའི་སྐལ་པ་ཅན་དུ་བྱས་པ་དེ་ཕྲིན་ལས་ཀྱི་རྗེས་གནང་ཡིན། བྱ་སྤྱོད་རྒྱུད་ལ་གཏོར་དབང་མ་གསུངས་ཀྱང་། བླ་མ་རྣམས་ཀྱི་ཕྱག་ལེན་ལ་ཡོད་པས། ད་གཏོར་མ་འདི་
ཉིད། རྒྱས་པར་མངོན་རྟོགས་འདོན། བསྡུ་ན། སྔར་སྨོས་པའི་ལྷག་པའི་ལྷར་གསལ་ཐོབ་ལ། དེའི་སྟེང་གི་ཆ་ལ་བཀའ་བརྒྱུད་ཀྱི་བླ་མ། བར་གྱི་ཆ་ལ་ཡི་དམ་ལྷ་ཚོགས། འོག་གི་ཆ་ལ་ཆོས་སྐྱོང་སྲུང་མའི་ཚོགས་དང་བཅས་པ་སྤྲིན་འཁྲིགས་པ་ལྟར་ཁྱེད་རང་གི་སྤྱི་བོར་བྱོན་ནས་ངེད་ཀྱིས་གསོལ་བ་ཇི་ལྟར་བཏབ་པ་ལྟར་བྱིན་རླབས་དངོས་གྲུབ་ཐམས་ཅད་གནང་ཞིང་ཐོབ་བྱུང་སྙམ་པའི་མོས་འདུན་རྩེ་གཅིག་ཏུ་མཛོད་ཅིག །ཅེས་གཏོར་མ་ལག་ཏུ་ཐོགས་ལ། ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱིས་བྱིན་རླབས་ཤིང་། །དངོས་གྲུབ་རྣམ་གཉིས་འབྱུང་བའི་གནས། །གཏོར་མའི་དབང་བསྐུར་ཆེན་པོ་སྦྱིན། །ཛཿཧཱུྃ་བཾ་ཧོཿ ཆོས་སྐུ་དྲུག་པ་རྡོ་རྗེ་འཆང་ཆེན་པོ། ཏེ་ལོ་ཤེས་རབ་བཟང་པོ། ནཱ་རོ་ཛྙ་ན་སིདྡྷི། མར་པ་ཆོས་ཀྱི་བློ་གྲོས། མི་ལ་བཞད་པ་རྡོ་རྗེ། དྭགས་པོ་ཟླ་འོད་གཞོན་ནུ། དཔལ་ལྡན་དུས་གསུམ་མཁྱེན་པ། འགྲོ་མགོན་རས་པ་ཆེན་པོ། རྒྱལ་སྲས་སྤོམ་བྲག་པ། གྲུབ་ཆེན་ཀརྨ་པཀྵི། རྒྱས་པར་ཟུང་འཇུག་བརྒྱུད་པ་ཡོངས་རྫོགས་ནི། མཁས་གྲུབ་ཨོ་རྒྱན་པ། སེམས་དཔའ་རིང་བྱུང་རྡོ་རྗེ། རྒྱལ་བ་
གཡུང་སྟོན་ཆེན་པོ། འཛམ་གླིང་ཆོས་ཀྱི་གྲགས་པ། རྟོགས་ལྡན་མཁའ་སྤྱོད་དབང་པོ། ཆོས་རྗེ་དེ་བཞིན་གཤེགས་པ། རྗེ་བཙུན་རིཏྟཾ་བྷ་དྲ། སྤྲུལ་སྐུ་མཐོང་བ་དོན་ལྡན། ཀུན་མཁྱེན་འཇམ་དཔལ་བཟང་པོ། བྱང་སེམས་དཔལ་འབྱོར་དོན་གྲུབ། རྒྱལ་དབང་ཆོས་གྲགས་རྒྱ་མཚོ། གྲུབ་ཆེན་བཀྲ་ཤིས་དཔལ་འབྱོར། མཚུངས་མེད་མི་བསྐྱོད་རྡོ་རྗེ། རྒྱལ་བ་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། གར་དབང་ཆོས་ཀྱི་དབང་ཕྱུག །རྒྱལ་མཆོག་ཆོས་དབྱིངས་རྡོ་རྗེ། མཚུངས་མེད་ཀརྨ་ཆགས་མེད། ཁྱད་པར་དུ་བདག་གི་རྩ་བའི་བླ་མ་དམ་པ་ལ་སོགས་ཆོས་འདི་གང་ལས་བརྒྱུད་པའི་དཔལ་ལྡན་བླ་མ་དམ་པ་ཐམས་ཅད་དང་། ལྷ་གང་ཡིན་བརྗོད། ལྷ་ཚོགས་མ་ལུས་ཤིང་ལུས་པ་མེད་པ་ཐམས་ཅད་ཀྱིས། རྡོ་རྗེའི་སློབ་མ་འདི་རྣམས་ལ་སྐུ་གསུང་ཐུགས་ཀྱི་ངོ་བོའི་སྒོ་ནས་བྱིན་གྱིས་བརླབས་པ་དང་། དབང་བསྐུར་བར་མཛད་དུ་གསོལ། འདི་རྣམས་ལ་གནོད་ཅིང་འཚེ་བར་བྱེད་པའི། ནད་རིགས་བཞི་བརྒྱ་རྩ་བཞི། བགེགས་རིགས་སྟོང་ཕྲག་བརྒྱད་ཅུ། གདོན་རིགས་སུམ་བརྒྱ་དྲུག་ཅུ། སྟེང་གདོན་གཟའ་དང་རྒྱུ་སྐར།
འོག་གདོན་ཀླུ་གཉན་ས་བདག །བར་གདོན་བཙན་བདུད་ཐེའུ་རང་གི་གནོད་པ་ཐམས་ཅད་ད་ལྟ་ཉིད་དུ་ཞི་བར་བྱིན་གྱིས་རློབས་ཤིག །ཚེ་དང་བསོད་ནམས་དཔལ་དང་འབྱོར་པ་ཡེ་ཤེས་ཡོན་ཏན་ཐམས་ཅད་རྒྱས་པར་བྱིན་གྱིས་རློབས་ཤིག །བདུད་བགེགས་ལོག་འདྲེན་གདུག་པ་ཅན་ཐམས་ཅད་དྲག་པོའི་སྒོ་ནས་ཚར་གཅོད་པར་བྱིན་གྱིས་རློབས་ཤིག །སྐྱེ་བ་འདི་ནས་ཚེ་རབས་ཐམས་ཅད་དུ་རྡོ་རྗེའི་སློབ་མ་འདི་རྣམས་ཀྱི་ལྷག་པའི་ལྷར་མཛོད་ཅིག །ཉིན་གསུམ་གྱི་བྱ་ར་མཛོད། མཚན་གསུམ་གྱི་མེལ་ཚེ་མཛོད། །འཁོར་བ་དང་ངན་སོང་གི་སྡུག་བསྔལ་ཐམས་ཅད་ལས་བསྐྱབ་ཏུ་གསོལ། སོ་སོའི་རྩ་སྔགས་གསུམ་མམ་བདུན་བརྗོད། ཀཱ་ཡ་ཝཱཀྐ་ཙིཏྟ་བ་ལིཾ་ཏ་ཨ་བྷི་ཥིཉྩནྟཾ། ཡང་ཚེ་དབང་བསྐུར་དུས། །བཅོམ་ལྡན་ཚེ་དཔག་མེད་མགོན་གྱིས། །ཐུགས་བསྐྱེད་སྨོན་ལམ་དག་པའི་མཐུས། །འཆི་མེད་རིག་འཛིན་སྒྲུབ་པའི་རྫས། །ཡེ་ཤེས་ཚེ་རིལ་ཚེ་ཆང་འདི། །བྱིན་པས་རྡོ་རྗེའི་ཚེ་ཐོབ་ཤོག །ཨོཾ་ཨ་མཱ་ར་ཎི་ཛི་བནྟི་ཡེ་སྭཱ་ཧཱ། །ཞེས་ཚེ་རིལ་ཚེ་ཆང་སྦྱིན། རྒྱལ་བ་སྲས་བཅས་བདེན་པའི་བྱིན་རླབས་དང་། །ལྷག་པའི་ལྷ་མཆོག་རྣམས་ཀྱི་བདེན་ཚིག་གིས།
འགྲོ་བ་འདི་དག་བདག་གིས་བསྲུངས་ཟིན་གྱིས། །འདི་ལ་སུས་ཀྱང་གནོད་པ་མ་བྱེད་ཅིག །ཨོཾ་བཛྲ་རཀྵ་རཀྵ་ཧཱུྃ། གཏོར་མ་ལྷར་གསལ་བ་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་ཁྱེད་རང་རྣམས་ཀྱི་ལུས་ངག་ཡིད་གསུམ་དང་། ལྷག་པའི་ལྷ་མཆོག་གི་སྐུ་གསུང་ཐུགས་དང་དབྱེར་མེད་དུ་འདྲེས་པར་གྱུར་སྙམ་དུ་སྒོམས། བཀྲ་ཤིས་བརྗོད། བདག་དང་སྦྱིན་བདག་འབྲེལ་ཐོགས་མཁའ་མཉམ་འགྲོ། །འདིས་གཙོས་བདག་གིས་དུས་གསུམ་བསགས་ཡོད་ཀྱི། །དགེ་རྩས་བསོད་ནམས་ཕུང་པོའི་བདེ་ལྡན་དུ། །པདྨོ་ལས་སྐྱེས་དགེ་སློང་ཚུལ་འཛིན་ཏེ། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །འོ་དེས་ལྷག་པའི་ལྷ་མཆོག་གི་དབང་ལེགས་པར་ཐོབ་པ་ཡིན་པས། དེང་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ་ཡི་དམ་གྱི་ལྷར་བཟུང་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །ལུས་ལོངས་སྤྱོད་འབུལ་བའི་བློས་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་གྱུར་པ་ཡི། །ཆ་ཡིས་ཀྱང་ནི་སྤྱད་དུ་གསོལ། །
ཅེས་བརྗོད་བཅུག །དེ་ལྟར་དབང་ཐོབ་པའི་བཀའ་དྲིན་གཏང་རག་གི་ཡོན་དུ་མཎྜལ་ཕུལ། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་དུ་སྤྱོད་པར་ཤོག །མཉེས་བྱེད་མཎྜལ་བཟང་པོ་འདི་ཕུལ་བས། །བྱང་ཆུབ་ལམ་ལ་བར་ཆད་མི་འབྱུང་ཞིང་། །སྲིད་པར་མི་འཁྲུལ་ཞི་བར་མི་གནས་ཤིང་། །ནམ་མཁའ་དང་མཉམ་པའི་འགྲོ་རྣམས་སྒྲོལ་བར་ཤོག །ཅེས་བརྗོད་བཅུག །སློབ་མ་རྣམས་གྱེས་སོ། །དེ་་ལྟར་དབང་བསྐུར་ཐོབ་པའི་དགེ་བའི་རྩ་བ་ལ་བརྟེན་ནས་རང་གཞན་གྱི་དོན་རྒྱ་ཆེན་པོ་སྒྲུབས་པར་ཞུ། བསོད་ནམས་འདི་ཡིས་ཐམས་ཅད་སོགས། རྗེ་དབང་ཕྱུག་རྡོ་རྗེས་སྩལ་བའི་དབང་གཅིག་ཤེས་ཀུན་གྲོལ་འབྲིང་པོ་ལ་ཅུང་ཞིག་ཕྱག་ལེན་གྱིས་བརྒྱན་པར་བྱས་ཤིང་ཁྱེར་བདེ་བར་ཨ་རཱ་གས་ཁོལ་དུ་ཕྱུང་བ་ཉེས་པ་མཆིས་ན་བཤགས་ཤིང་དགེ་བས་འགྲོ་དྲུག་སྨིན་གྲོལ་དུ་གྱུར་ཅིག །ཁྱད་པར་འདི་ལ་འབྲེལ་བ་ཐོགས་ཚད་བདེ་བ་ཅན་དུ་སྐྱེ་བར་གྱུར་ཅིག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།