དབང་གི་མཚམས་སྦྱོར་རྒྱུད་ལས་བཏུས་པ།
དབང་གི་མཚམས་སྦྱོར་རྒྱུད་ལས་བཏུས་པ་བཞུགས་སོ། །
འོ་ན་ད་ལམ་དབང་ཐོབ་པའི་ཕན་ཡོན། མ་ཐོབ་པའི་ཉེས་དམིགས་སོགས་ཅུང་ཟད་མ་ཞུས་ན། དོན་མི་གོ་བས། དང་པོ་དབང་མ་ཐོབ་པའི་ཉེས་དམིགས་ནི། དབང་བསྐུར་རྒྱལ་པོའི་རྒྱུད་ལས། དེ་ནས་སྟོན་པ་ཀུན་ཏུ་བཟང་པོས། དབང་མ་བསྐུར་བའི་སྐྱོན་འདི་དག་ཀྱང་གསུངས་སོ། །དབང་མ་བསྐུར་བའི་ཉེས་པ་ནི། ངེས་པར་ཉིད་དུ་ཤེས་པར་གྱིས། །དབང་བསྐུར་གནང་བ་མ་ཐོབ་པར། །གང་གིས་སྔགས་ལ་འཇུག་བྱེད་ཅིང་། །ཉེན་ཅིང་སྒྲུབ་པ་བྱེད་པ་རྣམས། །འབྲས་བུ་མེད་ཅིང་བརླག་པར་འགྱུར། །།སློབ་དཔོན་བརྙེས་པར་མ་བྱས་
ན། །དབང་རྣམས་ཐོབ་ཀྱང་མི་ཕན་ནོ། །དབང་མ་ཐོབ་པར་ལས་བརྩམས་པར། །སྐྱེད་མ་བལྟས་པར་ཁལ་འགེལ་བའི། །དེ་དག་ཕུང་བའི་རྒྱུ་ཡིན་ནོ། །དབང་མ་ཐོབ་པའི་གང་ཟག་ནི། །གཞན་ལ་ཕན་ཡོན་གང་ཚང་བ། །འཁོར་ལོ་སྲོག་ཤིང་མེད་པ་འདྲ། །སྒྲུབ་པ་ཞག་གྲངས་དུས་ཚང་ཡང་། །རྟགས་ཀུན་ཚང་བར་མི་འགྱུར་ན། །དེ་ཡང་དབང་མ་ཐོབ་པའི་སྐྱོན། །མཆོད་པ་བསྙེན་སྒྲུབ་ཤུགས་འབྱུང་ཡང་། །དངོས་གྲུབ་ཐོབ་པར་མི་འགྱུར་བ། །དེ་ཡང་དབང་མ་ཐོབ་པའི་སྐྱོན། །གཞན་ཡང་དབང་མ་ཐོབ་པའི་སྐྱོན། །སྔགས་པ་དབང་
མེད་རོ་སྐྱོང་མཁན། །སྨྱོ་དང་མཛེ་དང་ལྐུགས་པ་དང་། །རིམས་དང་མུ་གེ་འཁྲུགས་པ་དང་། །ནད་རྣམས་སྣ་ཚོགས་འབྱུང་བ་ཡང་། །སློབ་དཔོན་དེ་ཡི་རྒྱུད་ལས་བྱུང་། །དབང་བསྐུར་གནང་བ་མ་ཐོབ་པར། །རིག་པ་ཤེས་རབ་རྩལ་རྫོགས་ཀྱང་། །སློབ་དཔོན་བྱ་བ་མི་འབྱུང་ངོ་། །གང་གི་སྔགས་ལ་སྤྱོད་འདོད་ན། །ཤེས་པར་གྱིས་ལ་དབང་རྣམས་ཞུས། །ཞེས་སོགས་གསུངས་པ་དང་། གསང་བ་སྙིང་པོའི་རྒྱུད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །བསྙེན་པ་ལ་སོགས་བརྩམས་པ་རྣམས། །འབྲས་བུ་མེད་ཅིང་བརླག་པར་འགྱུར། །ཞེས་པ་དང་། རྡོ་རྗེ་ཕྲེང་བའི་རྒྱུད་ལས། དབང་བསྐུར་མེད་པར་རྒྱུད་བཤད་ན། །སྒྲུབ་པ་སྔགས་ཀྱི་དོན་ཤེས་ཀྱང་། །ཕྱིར་ཟློག་པ་ནི་ཡང་མེད་པར། །སློབ་དཔོན་སློབ་མ་མཚུངས་པར་ནི། །ཤི་ནས་ངུ་འབོད་ཆེན་པོར་ལྟུང་། ཞེས་དང་། །རྒྱུ་མ་བདེ་མཆོག་རྒྱུད་ལས། དཀྱིལ་འཁོར་འདི་ནི་མ་མཐོང་བར།། །རྣལ་འབྱོར་པས་ནི་དངོས་གྲུབ་འདོད། །མཁའ་ལ་ཁུ་ཚུར་བརྡེག་པ་དང་་། །རྨོངས་པས་ཕུར་མ་བརྡུང་དང་མཚུངས། །བྱེ་མ་ལས་ནི་
མར་བཙིར་དང་། །སྨིག་རྒྱུ་ཆུ་ནི་འཐུང་དང་མཚུངས། །ཞེས་དང་། མཆོག་གི་དང་པོའི་སངས་རྒྱས་ལས། །དབང་བསྐུར་མེད་པའི་སྔགས་འཆང་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱིས་གྲོལ་བ་མིན། །ཞེས་དང་། གསང་བ་འདུས་པ་ལས། ཕྱག་རྒྱ་ཆེན་པོ་ཐིག་ལེའི་རྒྱུད་ལས། དབང་མེད་ལ་ནི་དངོས་གྲུབ་མེད། །བྱེ་མ་བཙིར་ཡང་མར་མེད་བཞིན། །གོང་གི་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ། །དེ་བས་འབད་པ་ཐམས་ཅད་ཀྱིས། །བླ་མ་ལ་ནི་དབང་ནོད་ཞུས། །ཞེས་དང་། རྡོ་རྗེ་ཕྲེང་བར། ཡང་ག་དབང་བསྐུར་གྱིས་དབེན་ན། །བསྒྲུབས་པས་རྒྱུད་ཀྱི་དོན་ཤེས་ཀྱང་། །སློབ་དཔོན་སློབ་མར་མཚུངས་པར་ནི། །མི་བཟད་དམྱལ་བ་ཆེན་པོར་འགྲོ། །ཞེས་དང་། སྐུ་གསུང་ཐུགས་ཀྱི་རྒྱུད་རྒྱལ་ལས། །དབང་དང་གདམས་ངག་མ་ཐོབ་པར། །དབང་བསྐུར་རབ་གནས་སྦྱིན་སྲེག་དང་། །སྔགས་སོགས་ངལ་བ་དོན་མེད་དེ། །ཤི་ནས་རྡོ་རྗེ་
དམྱལ་བར་སྐྱེ། །ཞེས་དང་། རྡོ་རྗེ་གུར་ལས། དཀྱིལ་འཁོར་དུ་ནི་མ་ཞུགས་དང་། །དབང་བསྐུར་མེད་པའི་རྣལ་འབྱོར་པ། །འཇིག་རྟེན་འདི་དང་གཞན་དུ་ཡང་། །དེ་ལ་དངོས་གྲུབ་མཆོག་ཉིད་མེད། །སངས་རྒྱས་ཐོད་པའི་རྒྱུད་ལས། །དཔེར་ན་པི་ཝཾ་རྒྱུད་ཀུན་རྫོགས། །རྒྱུད་དང་བྲལ་ན་རླུང་མི་རུང་། །དེ་བཞིན་དབང་དང་བྲལ་གྱུར་ན། །ཡེ་ཤེས་ཀུན་གྱིས་སྟོང་པར་འགྱུར། ཞེས་དང་། ཀློང་གསལ་ཉི་མའི་རྒྱུད་ལས། དཔེར་ན་ཞིང་ས་ཡོད་གྱུར་ཀྱང་། །སོ་ནམ་རིམ་བཞིན་མ་བྱས་ན། །འབྲས་བུ་པར་མི་འགྱུར་ལྟར། །སེམས་ལ་ཆོས་ཉིད་གནས་གྱུར་ཀྱང་། །དབང་གིས་སྨིན་པར་མ་བྱས་ན། །འབྲས་བུ་ཐོབ་པར་ག་ལ་འགྱུར། །མངོན་བརྗོད་ལས། དབང་མ་བསྐུར་བར་སྔགས་སྒོམ་པ། །དེ་ནི་ངན་འགྲོར་སྐྱེ་བའི་རྒྱུ། །ཞེས་དང་། རྒྱུད་རིན་ཆེན་འཁོར་ལོ་ལས། དབང་མ་བསྐུར་བར་རྒྱུད་བཤད་ན། །གཉིས་ཀ་རྡོ་རྗེ་དམྱལ་བར་འགྲོ། །དབང་བསྐུར་དམ་ཚིག་མ་བསྲུངས་ན། །བདེ་ཐོབ་ས་བོན་བརླག་པ་ཡིན། །ཞེས་དང་། སངས་རྒྱས་ཐོད་པ་ལས། རྨོངས་པ་གང་ཞིག་དབང་མེད་པར། །ངས་
ནི་དབང་བསྐུར་ཞེས་སྨྲས་པ། །ཇི་སྲིད་སངས་རྒྱས་བཞུགས་ཀྱི་བར། །སློབ་མ་དང་བཅས་དམྱལ་བར་འགྲོ། །ཞེས་དང་། གསུང་མི་གཡོ་བའི་རྒྱུད་ལས། །དཀྱིལ་འཁོར་གནང་བ་མ་བྱིན་པར། །འདི་ནི་སྟོན་ཅིང་གཏེར་བྱེད་ན། །སྐྱོབ་པ་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་བསླུ་བར་འགྱུར། །ཞེས་དང་། དཔལ་ཉི་མའི་འཁོར་ལོའི་མདོ་ལས། བླ་མ་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །བསྙེན་པ་ལ་སོགས་བྱེད་པ་ནི། །འབྲས་བུ་མེད་ཅིག་བརླག་པར་འགྱུར། །ཞེས་སོགས་རྒྱ་ཆེར་གསུངས་སོ། །གཉིས་པ་དབང་ཐོབ་པའི་ཕན་ཡོན་ནི། དབང་བསྐུར་རྒྱལ་པོའི་རྒྱུད་ལས་། དེ་ནས་སྟོན་པ་ཀུན་ཏུ་བཟང་པོས། ཡོན་ཏན་འདི་དག་འཁོར་རྣམས་ལ་གསུངས་སོ། །དབང་བསྐུར་བ་ཡི་ཕན་ཡོན་ནི། །ཡང་དག་ཉིད་དུ་བཤད་པར་བྱ། །ཆོས་ཀྱི་འཁོར་ལོ་བསྐོར་བ་ཡང་། །དབང་བསྐུར་ནས་ནི་བསྐོར་བར་བྱ། །སྒྲུབ་པ་གསུངས་པའི་དཀྱིལ་འཁོར་ཡང་། །དབང་བསྐུར་ནས་ནི་བསྒྲུབ་པར་བྱ། །སྒྲུབ་པ་གསང་བའི་དཀྱིལ་འཁོར་ཡང་། །དབང་བསྐུར་ནས་ནི་སྒྲུབ་པར་
བྱ། ཕྲིན་ལས་མཐའ་དག་བྱ་བ་ཡང་། །དབང་བསྐུར་ནས་ནི་བྱ་བ་འབྱུང་། །དབང་བསྐུར་གནང་བ་ཐོབ་ནས་ཀྱང་། །གང་བརྩམས་ལས་དེ་འགྲུབ་པར་འགྱུར། །དབང་བསྐུར་བ་ཡི་ཡོན་ཏན་ནི། །སངས་རྒྱས་སེམས་ཅན་ཐམས་ཅད་ལ། །ཡིད་ལ་ཅི་དགར་དབང་ཡང་བསྐུར། །མ་མོ་མཁའ་འགྲོ་བྲན་བཞིན་འཁོར། །ཚེ་དང་ལོངས་སྤྱོད་ཕུན་སུམ་ཚོགས། །འཇིག་རྟེན་འདི་ཡི་ཡོན་ཏན་ཡང། །བསམ་གྱིས་མི་ཁྱབ་པར་འགྱུར་བས། །དམྱལ་བར་སྐྱེ་བར་ངེས་ན་ཡང་། །དབང་བསྐུར་བ་ཡི་ཡོན་ཏན་གྱིས། །དམྱལ་བར་ནམ་ཡང་མི་ལྟུང་སྟེ། །ངན་སོང་གསུམ་པོ་ཀུན་སྤངས་ནས། །བླ་མེད་འབྲས་བུ་འགྲུབ་པར་འགྱུར། །ཚེ་ཟད་འཆི་བར་ངེས་ན་ཡང་། །དབང་འདི་རབ་ཏུ་བསྐུར་ནས་ནི། །ཚེ་ཟད་འཆི་བ་སླར་བཟློག་ནས། །ཚེ་ཚད་དཔག་མེད་ཐོབ་པར་འགྱུར། །གཞན་ཡང་ཚེ་ཡི་ཡོན་ཏན་ཡང་། །བརྗོད་ཀྱིས་མི་ལང་ཐོབ་པར་འགྱུར། །འཇིག་རྟེན་འདས་པའི་ཡོན་ཏན་ནི། །རིག་འཛིན་རྣམ་གསུམ་མན་ཆད་ནས། །ཀུན་ཏུ་བཟང་པོའི་དགོངས་པ་ཀུན། །སངས་རྒྱས་ཡོན་ཏན་ཐམས་ཅད་ཀུན། །སེམས་ཀྱིས་བསམ་ཞིང་
ལྷུན་གྱིས་གྲུབ། །ཆོས་ཀྱི་དབྱིངས་སུ་ཡང་སངས་རྒྱས། །ཞེས་པ་དང་། གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེས་ནི་སྐྱེ་བ་བརྒྱད་ལ་ནི། །མ་བསྒོམས་པར་ཡང་དངོས་གྲུབ་འཐོབ། །ཅེས་དང་། མཁའ་འགྲོ་རྒྱ་མཚོ་ལས། སངས་རྒྱས་ཀུན་གྱི་ཡེ་ཤེས་ནི། །དབང་ལས་ཡང་དག་ཤེས་པར་འགྱུར། །དབང་མཆོག་རིག་པའི་ཡེ་ཤེས་ནི། །འབྲས་བུའི་ལམ་དུ་འགྱུར་བ་ཡིན། །ཞེས་དང་། རྡོ་རྗེ་ཕྲེང་བ་ལས། ཐོག་མར་སློབ་མ་གང་གི་ཚེ། །བློ་ལྡན་ལ་ཡང་དབང་བསྐུར་ན། །རྫོགས་པའི་རིམ་པའི་རྣལ་འབྱོར་པ། །དེ་ཡི་ཚེ་ན་སྣོད་དུ་འགྱུར། །ཞེས་དང་། ལྟུང་བ་རྣམ་པར་བཤགས་པའི་རྒྱུད་ལས། དཀྱིལ་འཁོར་ཐར་པའི་གྲོང་མཆོག་འདིར། །ཞུགས་པ་དང་ནི་དབང་བསྐུར་བས། །ཕྱིར་ལྡོག་པ་ནི་ཡོད་མ་ཡིན། །འདིར་བཞུགས་བུ་ནི་འདི་སྐད་ཀྱང་། །འབྲལ་མེད་འོག་མིན་གནས་སུ་སྐྱེ། །ཉམས་ན་བྲལ་བར་གྱུར་པ་ན། །ཐུར་དུ་བལྟས་ན་དམྱལ་བར་འགྲོ། །ཞེས་དང་། རྡོ་རྗེ་སྙིང་པོའི་རྒྱུད་ལས། དབང་བསྐུར་བ་ཡི་ཆོ་ག་མཆོག །གང་
གིས་ལེགས་པར་བྱས་གྱུར་ན། །དེས་ནི་སངས་རྒྱས་ཉིད་དུ་འགྲུབ། །ཅེས་དང་། སམ་བྷུ་ཏྲི་ལས། དབང་བསྐུར་ཆོ་ག་རབ་རྒྱས་བྱས། །རྡོ་རྗེ་སློབ་དཔོན་མཉམ་པ་རུ། །འགྲུབ་འགྱུར་འདི་ལ་ཐེ་ཚོམ་མེད། །ཅེས་དང་། རྒྱུད་རིན་ཆེན་འཁོར་ལོ་ལས། སྐྱེས་བུ་རིགས་ཀྱི་དབང་ཐོབ་ནས། །དེ་ནི་ཚེ་གཅིག་མཁའ་སྤྱོད་འགྲོ། །ཞེས་དང་། དགོངས་པ་འདུས་པའི་ལུང་བསྟན་ལས། དབང་བསྐུར་དམ་པ་ཐོབ་པ་ནི། དེ་ནི་སྐྱེ་བ་བདུན་ནས་ཀྱང་། །མ་བྷོ་པར་ཡང་སངས་རྒྱས་འགྲུབ། །ཅེས་དང་། དཔལ་མཆོག་དང་པོ་ལས། དབང་བསྐུར་དམ་པ་དབང་ལས་བྱུང་། །ལུས་ངག་ཡིད་གསུམ་སྒྲིབ་པ་དག །དབང་གིས་རབ་ཏུ་དབང་བྱས་ན། །དཔལ་མཆོག་དམ་པ་ཐོབ་པར་ཤོག ཅེས་དང་། ཕྱག་རྒྱ་ཆེན་པོ་ཡེ་ཤེས་ཐིག་ལེ་ལས། །ཅི་ལྟར་དུག་ལ་རབ་སྔགས་ཀྱིས། །བཏབ་པར་བྱས་ན་བདུད་རྩིར་འགྱུར། །དེ་བཞིན་སློབ་མ་དབང་རྫོགས་ཀྱིས། །ལུས་ཀྱི་དྲི་མ་མེད་པར་འགྱུར། །ཞེས་དང་། འདུལ་བ་ལས། བླ་མའི་དབང་བསྐུར་ལག་ལེན་གྱི། །དངོས་གྲུབ་ཕྱིར་ན་ཇི་ལྟར་སྟོན། །དེ་བཞིན་དབང་བསྐུར་སྔ་མ་
ཡང་། །མ་དག་པ་ཡང་དག་པར་འགྱུར། །ཕྱག་རྒྱ་ཆེན་པོ་ཐིག་ལེ་ལས། །སློབ་དཔོན་དབང་ནི་གཅིག་གཅིག་གིས། །གསང་བའི་དབང་ནི་བཅུ་བཞིའི་མཆོག ཤེས་རབ་ཡེ་ཤེས་བཅུ་པ་ནི། །དེ་ལྟར་དེ་བཞིན་བཅུ་གཉིས་པོ། །ཐེ་ཚོམ་མེད་པར་རྙེད་པར་འགྱུར། །ཞེས་ས་ནོན་ཚུལ་དང་། ཀློང་གསལ་ཉི་མའི་རྒྱུད་ལས། དབང་བསྐུར་རིགས་ཀྱི་བུ་དེ་ཉིད། །ཚེ་འདིར་བསམ་པ་ཀུན་འགྲུབ་ཅིང་། །ཕྱི་མ་མངོན་པར་རྫོགས་སངས་རྒྱས། །ཞེས་དང་། ཡེ་ཤེས་ཐིག་ལེ་ལས། ལྷ་ཡི་དབང་ཕྱུག་དབང་བསྐུར་བྱ། །དབང་བསྐུར་ལ་ནི་སངས་རྒྱས་པ། །ཐེ་ཚོམ་མེད་པར་རྙེད་པར་བྱ། །དེ་བས་ཐམས་ཅད་རིབ་འབད་ན། །དཔལ་ལྡན་དབང་བརྒྱད་བླང་བར་བྱ། །ཞེས་དང་། འདུལ་བ་ལས། བླ་མ་གསང་སྔགས་ལམ་གྱིས་ནི། །སློབ་མ་ཡོངས་སུ་སྨིན་པར་བྱ། །སངས་རྒྱས་སེམས་ཅན་ཡེ་ཤེས་ནི། །དབང་ལས་ཡང་དག་ཤེས་པར་བྱ། །ཞེས་དང་། ནམ་མཁའ་དང་མཉམ་པའི་རྒྱུད་ལས། བུམ་པ་གསང་བ་ཤེས་རབ་དང་། །བཞི་པ་དེ་བཞིན་འབྲས་བུ་སྟེ། །དང་པོ་ལུས་ཀྱི་དྲི་མ་འཁྲུད། །གསུམ་པ་སེམས་ཀྱི་
དྲི་མ་འཁྲུད། །དེ་བཞིན་ཀུན་ཏུ་རྟོགས་པ་རྣམས། །འཁྲུད་པའི་ཕྱིར་ན་བཞི་པར་བཤད། །ཞེས་གསུངས་པས་དབང་ཐོབ་པའི་ཕན་ཡོན་མཐའ་ཡས་སོ། །སློབ་མས་ཀྱང་དབང་ཐོབ་ནས། དམ་ཚིག་གི་རྩ་བ་སྐུ་གསུང་ཐུགས་ཙམ་གསུངས་པ་གལ་ཆེ། བླ་མ་ཡང་རབས་མཚན་ཉིད་ཚང་བ་ཞིག་དགོས། འབྲིང་ཡང་སྐྱོན་ཤས་ཆུང་ཡོན་ཏན་ཤས་ཆེ་བ་ཞིག་དགོས། ཐ་ན་ཡང་དམ་ཚིག་རྩ་བ་ཡང་མ་ཉམས་པ་གཅིག་དགོས་ཏེ། བདེ་མཆོག་རྩ་རྒྱུད་ལས། ཤིན་ཏུ་མཉམ་གཞག་སྒྲུབ་པ་པོས། །དམ་ཚིག་རྟག་ཏུ་བསྐྱང་བར་བྱ། དམ་ཚིག་ཉམས་པས་དཀྱིལ་འཁོར་དུ། །དབང་བསྐུར་དངོས་གྲུབ་ཐོབ་མི་འགྱུར། །ཞེས་གསུངས་སོ། །ཞེས་འདི་དག་གི་སྐབས་དང་བསྟུན་ལ་བཤད་པར་བྱའོ། །ཞེས་པ་འདི་རང་གི་བརྗེད་ཐོ་ཙམ་ཨ་རཱ་གས་བྲིས་པ་མངྒ་ལཾ།། །།