དབང་གི་སྤྱི་བཤད་ཞྭ་དམར་བཞི་པའི་དབང་ཆིངས་ལས་ཕྱུང་བ།
དབང་གི་སྤྱི་བཤད་ཞྭ་དམར་བཞི་པའི་དབང་ཆིངས་ལས་ཕྱུང་བ་བཞུགས་སོ།། ༈ ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་དབང་བསྐུར་ཟབ་མོ་གསན་སྙམ་དུ་ཐུགས་བསྐྱེད་པ་གསལ་གདབ་ནས་གསན་པར་ཞུ། དེའང་འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཐུགས་རྗེ་ཅན་དེ་ཉིད་ཀྱིས་གདུལ་བྱའི་དོན་དུ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་ཇི་སྙེད་ཅིག་གསུངས་པ་དེ་ཐམས་ཅད་ཧྲིལ་གྱིས་དྲིལ་ན། གང་ཟག་དབང་པོ་དམན་པ་ཟབ་ལམ་གྱི་སྣོད་དུ་མ་གྱུར་པ་རྣམས་ལ་རྒྱུ་ཕ་རོལ་ཏུ་ཕྱིན་པའི་ལམ་རིམ་བསྟན་ཅིང་། གང་ཟག་དབང་པོ་ཡང་རབ་ཟབ་དོན་གྱི་སྣོད་དུ་གྱུར་པ་རྣམས་ལ། སྔགས་ཀྱི་ཉེ་ལམ་རྨད་དུ་བྱུང་རྣམས་བསྟན་པར་མཛད་པ་ལས། འདིར་སྔགས་ཀྱི་ལམ་རིམ་ཉིད་སྟོན་པའི་སྐབས་ཡིན་ཅིང་། དེ་ལའང་སྨིན་གྲོལ་གྱི་ལམ་གཉིས་སུ་ཡོད་པ་ལས། འདིར་སྨིན་བྱེད་ཀྱི་དབང་འཆད་པའི་སྐབས་ཡིན། དེ་ཡང་རང་ཉིད་རྡོ་རྗེ་ཐེག་པའི་ཉེ་ལམ་ལ་ཞུགས་བསྐྱེད་རྫོགས་ཀྱི་ལམ་ཉམས་སུ་བླངས་ཏེ་མྱུར་བ་ཉིད་དུ་མཆོག་གི་དངོས་གྲུབ་ཐོབ་པར་འདོད་པ་
དག་གིས། ཐོག་མར་རྡོ་རྗེ་སློབ་དཔོན་མཚན་ཉིད་དང་ལྡན་པ་མཉེས་པར་བྱས་ཏེ། སྨིན་བྱེད་ཀྱི་དབང་ལེགས་པར་ཐོབ་པར་བྱས། དེའི་སྒོ་ནས་ལམ་རིམ་པ་གཉིས་ལ་ནན་ཏན་བྱས་ནས། མཆོག་དང་ཐུན་མོང་གི་དངོས་གྲུབ་ཐོབ་ཀྱི་གཞན་ཞིག་ཏུ་ཇི་ཙམ་འབད་ཀྱང་དངོས་གྲུབ་མི་ཐོབ་སྟེ། ཕྱག་ཆེན་ཐིག་ལེ་ལས། དབང་མེད་པར་ནི་དངོས་གྲུབ་མེད། །བྱེ་མ་བཙིར་ན་མར་མེད་བཞིན། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པས་འཆད་བྱེད་པ། །རྡོ་རྗེ་སློབ་དཔོན་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ་།དེ་བས་འབད་པ་ཐམས་ཅད་ཀྱིས། །བློ་མ་ལ་ནི་དབང་ནོད་ཞུ། །ཞེས་སོགས་རྒྱུད་རྣམས་ལས་མང་དུ་གསུངས་ཤིང་། དེར་མ་ཟད་དབང་ལེགས་པར་ཐོབ་ནས་དམ་ཚིག་མ་ཉམས་ན་ལམ་ཆེད་དུ་མ་བསྒོམ་ཡང་སྐྱེ་བ་བདུན་ནམ་བཅུ་དྲུག་ལ་ངེས་པར་དངོས་གྲུབ་ཐོབ་པར་གསུངས་ཏེ། གསང་བ་མཛོད་ལས། དབང་བསྐུར་ཡང་དག་སྦྱིན་ལྷན་ནི། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ལས་ནི། །མ་སྒོམ་པ་ཡང་སངས་རྒྱས་འགྱུར། །ཞེས་གསུངས་པ་བཞིན་ནོ། །དེ་ལྟ་བུའི་དབང་ལའང་། །
དབང་དང་རྗེས་གནང་བསམ་གྱིས་མི་ཁྱབ་པ་ཞིག་ཡོད་པ་ལས། ད་རེས་བཅོམ་ལྡན་འདས་སྣེ་མོ་རྗེས་སུ་གནང་བ་སྦྱིན་པ་ཡིན་པས། བླ་མ་བཅོམ་ལྡན་འདས་རྨི་མོ་ཐ་མི་དད་པའི་དྲུང་དུ་གསོལ་བ་འདེབས་པ་འདིའི་རྗེས་ཟློས་མཛོད། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།