རྗེ་བཙུན་འཕགས་མ་སྒྲོལ་མ་སྤྱི་ཡི་དབང་བཤད།
རྗེ་བཙུན་འཕགས་མ་སྒྲོལ་མ་སྤྱི་ཡི་དབང་བཤད་བཞུགས་སོ། །འོ་ན་ད་ལམ་ཁྱེད་རྣམས་ལ་རྗེ་བཙུན་མ་འཕགས་མ་སྒྲོལ་མའི་དབང་བསྐུར་བ་ཡིན་ཏེ། དེའི་ལོ་རྒྱུས་ཟུར་ཙམ་ཞུ་ན། སྒྲོལ་མ་འདིའི་ངོ་བོ་ནི་སངས་རྒྱས་སྣང་བ་མཐའ་ཡས་ཀྱི་སྤྱན་གཡོན་པ་ནས་སྤྲུལ་པ་ཡིན་ཏེ། རྒྱ་གར་གྱི་པཎྜི་ཏ་འབུམ་ཕྲག་གིས་མགྲིན་གཅིག་ཏུ་བསྟོད་པ་ལས། སངས་རྒྱས་སྣང་བ་མཐའ་ཡས་ཀྱིས། །འགྲོ་བའི་དོན་དུ་སྤྲུལ་པའི་སྐུ། །སྒྲོལ་མ་ཞེས་བྱའི་མཚན་གྲགས་མ། །ཐུགས་རྗེ་ཅན་ལ་ཕྱག་འཚལ་ལོ། །ཞེས་གསུངས་སོ། །སྤྲུལ་པ་ཉེར་གཅིག །ཇི་ལྟར་འཁྲུངས་ཚུལ་ནི། འཕགས་པ་སྤྱན་རས་གཟིགས་ཀྱིས་སེམས་ཅན་གཅིག་ཀྱང་མ་ལུས་པར་སྒྲོལ་བའི་དམ་བཅའ་ཆེན་པོ་མཛད་ནས། བསྐལ་པ་དཔག་ཏུ་མེད་པར་སེམས་ཅན་ཐམས་ཅད་ཀྱི་དོན་མཛད་ནས་ད་ཅི་འོང་བར་དགོངས་ནས་བལྟས་པས་སེམས་ཅན་ལ་མང་བའམ་ཉུང་བར་མ་མཐོང་ནས་ཐུགས་མུག་སྟེ་སྤྱན་ཆབ་བསིལ་བས་སྤྱན་ཆབ་གཉིས་ལས་མེ་ཏོག་པདྨ་གཉིས་བྱུང་སྟེ། དེ་ཁ་བྱེ་བའི་ནང་ནས་སྒྲོལ་མ་དང་། ཁྲོ་གཉེར་མ་གཉིས་བྱུང་སྟེ་གསུང་བསྒྲགས་པའི་ཐོག་མར། སྲིད་ན་སུ་ཞིག་འཇིགས་པས་
འཇིགས་གྱུར་པ། །དེ་ཀུན་ངས་སྐྱོབ་མ་འཇིགས་མ་འཇིགས་ཤིག །ཅེས་དམ་བཅས་ནས་འཕགས་པ་སྤྱན་རས་གཟིགས་ཁྱེད་ཐུགས་མུག་པར་མ་མཛད་དང་ངེད་གཉིས་ཀྱིས་འགྲོ་དོན་གྱི་གྲོགས་བྱེད་དེ་སེམས་ཅན་དཔག་ཏུ་མེད་པའི་དོན་བྱའོ། །ཞེས་གསུངས་པས། དེའི་ཚེ་སངས་རྒྱས་རྣམ་པར་སྣང་མཛད་ཀྱི་ཕྱག་འཚལ་ཉི་ཤུ་རྩ་གཅིག་གིས་བསྟོད་པ་མཛད་ཅིང་། སྒྲོལ་མ་མངོན་པར་འབྱུང་བའི་རྒྱུད་ལས་གསུངས་སོ། །དེ་ནས་སྒྲོལ་མ་དཀར་སྔོན་གཉིས་དང་སྒྲོལ་མ་ཉི་ཤུ་རྩ་གཅིག་དང་སྒྲོལ་མ་བརྒྱ་རྩ་དང་། མདོར་ན་སྤྱན་རས་གཟིགས་ཀྱིས་སྤྲུལ་པ་ཇི་ཙམ་མཛད་པའི་གྲངས་དང་མཉམ་པའི་སྒྲོལ་མའི་སྤྲུལ་པ་ཡང་དེ་ཉིད་གཅིག་མཛད་ནས་ཕྲིན་ལས་ཀྱི་གྲོགས་མཛད། སེམས་ཅན་ཇི་སྙེད་པའི་གྲངས་དང་མཉམ་པའི་གང་ལ་གང་འདུལ་དུ་སྤྲུལ་ནས་སེམས་ཅན་གྱི་དོན་མཛད་དེ། སློབ་དཔོན་རྟ་དབྱངས་ཀྱིས་སྒྲོལ་མ་ལ་བསྟོད་པ་ལས། འགྲོ་དོན་སྤྲུལ་མཛད་སྒྲོལ་མ་ཁྱོད་ཀྱི་སྐུ། ཚངས་པ་ཁྱབ་འཇུག་དབང་ཕྱུག་ལ་སོགས་དང་། །དྲག་པོ་ཞི་བ་ཨུ་མ་ལ་སོགས་དང་། །བསྐུལ་བྱེད་ལུ་གུ་རྒྱུད་དང་ཁྲོ་གཉེར་ཅན། །མཱ་མ་ཀཱི་དང་སྒྲོལ་མ་གོས་དཀར་མོ། །
འགྲོ་བ་གང་ལ་གང་འདུལ་དེར་སྟོན་པ། །ཞེས་གསུངས་པས་སྒྲོལ་མའི་རིགས་ཐམས་ཅད་ཐུགས་རྒྱུད་གཅིག་པ་ཡིན་ཏེ། འཇམ་དཔལ་རྩ་རྒྱུད་ལས། རིགས་ཨ་པའི་རྒྱལ་པོ་རྫུ་འཕྲུལ་ཆེ། །དེ་ནི་སྒྲོལ་མ་ཞེས་ཀྱང་བསྟན། །ཅེས་དང་། བདག་ཉིད་རྣམ་པ་སྟོང་དང་ནི། །རྣམ་པ་མང་པོར་བྱས་ནས་ཀྱང་། །རྒྱ་མཚོ་བཞི་ཡི་མཐར་ཐུག་པ། །ས་རྣམས་ཀུན་ཏུ་རྣམ་པར་རྒྱུ། །ཞེས་གསུངས་པ་ལྟར་སྤྲུལ་པ་མང་ཡང་སྐུ་དངོས་ནི་པོ་ཊ་ལ་ན་བཞུགས་ཏེ། རེ་དེའི་རྩེ་ན་འཕགས་པ་སྤྱན་རས་གཟིགས་བཞུགས་ཤིང་། །རི་དེའི་རྩ་བ་ན་རིན་པོ་ཆེའི་གཞལ་ཡས་ཁང་ན་རྗེ་བཙུན་སྒྲོལ་མ་ལ་གྲུབ་པའི་ལྷ་མོ་དཔག་ཏུ་མེད་པས་བསྐོར་ཏེ་བཞུགས་ཏེ་ཆོས་བསྟན་ཏོ། །སྒྲོལ་མ་འདིའི་དབང་དང་བྱིན་རླབས་ཐོབ་ན་ནད་ཐམས་ཅད་ཀྱང་ཞི་སྟེ། སློབ་དཔོན་ཙནྡྲ་གོ་མས། ཕྱག་འཚལ་བྱིན་རླབས་སྨན་གྱུར་ནས། །འབྱུང་བ་འཁྲུག་དང་གདོན་གྱིས་བསྐྱེད་པ་ཡིས། །སྲོག་འཕྲོག་ནད་ཀྱི་བྱེ་བྲག་མ་ལུས་པ། །ཁྱོད་ལ་གསོལ་བཏབ་འདུལ་བ་སེལ་མཛད་མ། །ཞེས་གསུངས་སོ། །དཔལ་སཾ་བྷུ་ཊི་ལས། སྒྲོལ་མ་འཁོར་བ་ལས་སྒྲོལ་མ། །དེ་ལྟར་སྒོམ་པ་ཙམ་
གྱིས་ནི། །བསྒྲུབ་པོ་སངས་རྒྱས་ཐོབ་པར་འགྱུར། །དངོས་གྲུབ་གཞན་ལྟ་སྨོས་ཅི་དགོས། །སྒྲོལ་མའི་ལས་ཚོགས་འབྱུང་བའི་རྒྱུད་ལས། འཇམ་དཔལ་དེའི་ཕན་ཡོན་ནི། མཚམས་མེད་པ་ལྔ་དང་། དེ་དང་ཉེ་བ་ལྔ་དང་། སྡང་བ་དང་རྨི་ལམ་ངན་པ་ཐམས་ཅད་ཞི་བར་འགྱུར་རོ། །ངན་སོང་གསུམ་གྱི་སྡུག་བསྔལ་ཞི་བར་འགྱུར་རོ། །མི་ཁོམ་བརྒྱད་དུ་ནམ་ཡང་མི་སྐྱེ་བར་འགྱུར་རོ། །ཚེ་རབས་དྲན་པ་དང་དབང་པོ་གསལ་བ་དང་། ཡིད་གཞུངས་པར་འགྱུར་རོ། །བཟོ་ཡི་གནས་ཐམས་ཅད་ལ་མཁས་པར་འགྱུར་རོ། །སྟོབས་དང་མདངས་དང་གཟི་བརྗིད་ཕུན་སུམ་ཚོགས་པར་འགྱུར་རོ། །འཇིག་རྟེན་སྐྱོང་བ་ཐམས་ཅད་ཀྱིས་བསྲུང་བ་དང་། སྐྱོབ་པ་དང་། ཆད་པ་དང་། ཕན་པར་བྱེད་དོ། །གང་དུ་ཕྱིན་པ་ཐམས་ཅད་དུ་བཀྲ་ཤིས་པར་འགྱུར་རོ། །ཞེས་གསུངས་སོ། །དེ་ལྟ་བུའི་དབང་ཞུ་བའི་ཕྱིར་མཎྜལ་ཕུལ། ཞེས་ཨ་རཱ་གས་སོ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།