བདེ་མཆོག་ནཱ་རོ་ལྷ་ལྔ་བསྡུས་པ།
བདེ་མཆོག་ནཱ་རོ་ལྷ་ལྔ་བསྡུས་པ་བཞུགས་སོ། །
ན་མོ་ཙཀྲ་སཾ་བྷ་ཝ་ར་ཡེ། བཅོམ་ལྡན་བདེ་བ་མཆོག་ལ་གུས་བཏུད་ནས། །ནཱ་རོ་ལྷ་ལྔའི་རྒྱུན་ཁྱེར་བ་སྡུས་པ་བྲི། །དཔའ་བོ་ཌཱཀིའི་བཀའ་གནོང་བྱིན་གྱིས་རློབས། །ནང་མཆོད་གཏོར་མ་ཅི་འཛོམ་བཤམས་བྱས་ནས། །མདུན་བསྐྱེད་ཚོམ་བུའམ་གཏོར་མ་དམིགས་བརྟེན་བྱ། །ཨ་ལས་ཐོད་པར་མཆོད་སྤྲིན་རྒྱ་མཚོ་དང་། །རླུང་མེ་ཐོད་སྐྱེད་སྟེང་དུ་ཀ་པཱ་ལར། །ཤ་ལྔ་བདུད་རྩི་ལྔ་དང་ཡི་གེ་གསུམ། །ཁོལ་ཞིང་ཞུ་བས་ཟག་མེད་བདུད་རྩིར་གྱུར། །བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བའི་དོན་དུ་ཧེ་རུ་ཀ་དཔལ་བསྒྲུབ། །རང་ཉིད་ལྷར་གསལ་འོད་ཀྱིས་ཚོགས་ཞིང་རྣམས། །ནམ་
མཁར་སྤྱན་དྲངས་ཕྱག་འཚལ་མཆོད་ཚོགས་འབུལ། །སྡིག་པ་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་བསྐོར་ཞིང་རྟག་པར་བཞུགས་གསོལ་འདེབས། །དགེ་བས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །འགྲོ་ཀུན་བདེ་ལྡན་སྡུག་བསྔལ་ཀུན་བྲལ་ཞིང་། །བདེ་ལས་ཉམས་མེད་བཏང་སྙོམས་ལ་གནས་ཤོག །ཚོགས་ཞིང་རང་ཐིམ་མི་དམིགས་སྟོང་ཉིད་གྱུར། །ཨོ་ཤཱ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཏྨ་ཀོཉཧཾ། མེ་རི་རྡོ་ར་དུར་ཁྲོད་གཞལ་ཡས་དབུས། །ཧཱུྃ་ལས་རང་ཉིད་དྲྭ་བ་སྡོམ་པའི་སྐུ། །ཕྱག་རྒྱ་དྲུག་ལྡན་གཡས་བརྐྱང་སྟབས་ཀྱིས་བཞུགས། །རྡོར་
དྲིལ་འཛིན་པ་གང་ལ་འཛེག་པའི་ཡུམ། །རྡོ་རྗེ་ཕག་མོ་གྲི་ཐོད་འཛིན་པ་འཛེག །པད་ཉི་འཇིགས་དུས་འགྱེལ་བའི་གདན་ལ་རོལ། །གནས་གསུམ་འབྲུ་གསུམ་གནས་དྲུག་གོ་ཚར་བཅས། །ཕྱོགས་བཞིར་ཡུམ་བཞི་མཚམས་བཞིར་བུམ་པ་དང་། །ཧཱུྃ་ལས་འོད་འཕྲོས་ཡེ་ཤེས་སེམས་དཔའ་དྲངས། །དབང་ལྷས་དབང་བསྐུར་རིགས་བདག་གིས་མཚན་པའི། །ས་བོན་འོད་ལས་བྱུང་བའི་ལྷ་མོའི་ཚོགས། །ནམ་མཁའ་གང་བས་མཆོད་ཅིང་བསྟོད་པར་གྱུར། །ཨོཾ་ཤྲཱི་ཧེ་རུ་ཀ་ས་པ་རི་ཝཱ་ར་སརྦ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྤ་རཾ་ཎ་ས་མ་ཡེ་ཧཱུྃ་སྭཱ་ཧཱ། ཨོཾ་ཤྲཱི་ཧེ་རུ་ཀ་ས་པ་རི་ཝཱ་ར་ཨོཾ་ཨཱཿཧཱུྃ། ཞེས་བདུད་རྩི་ལོངས་སྤྱོད་ཅིང་བཟའ་བཏུང་ཡང་བདུད་རྩིར་བསམས་ལ་ལོངས་སྤྱོད། གཙོ་བོ་ལྷ་མོར་བཅས་པ་ཡི། །རྣལ་འབྱོར་གསང་སྔགས་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་བདག་གིས་བསྟོད་པར་བགྱི། །བདག་ལུས་རྩ་གསུམ་འཁོར་ལོ་བཞི་ལྡན་པ། །གསལ་བའི་ལྟེ་བར་ཨོཾ་ལས་མེ་འབར་བས། །སྙིང་ཁའི་ཧཱུཾ་དང་མགྲིན་པའི་ཨོ་བསྲེགས་པས། །སྤྱི་བོའི་ཧཾ་ལས་བདུད་རྩིའི་རྒྱུན་བབས་ཏེ། །ལུས་ཀུན་ཟག་མེད་བདེ་ཆེན་སྐྱེས་པར་གྱུར། །ཅེས་
བསྒོམས་པས་རྟགས་བཅུ་འཆར་བར་གསུངས་ཤིང་། བསྒོམ་ལ་སྐྱོ་ན། བདག་ཉིད་ཧེ་རུ་ཀ་མཆོག་གསལ་བ་ཡི། །སྤྲུལ་པའི་འཁོར་ལོ་པད་ལྟར་ནཱ་ད་ལས། །བཟླ་བའི་སྔགས་ཕྲེང་སྒོ་ཡི་ལམ་ནས་ཞུགས། །དཀྱིལ་འཁོར་བར་གྱུར་འགྲོ་དོན་མཛད་ནས་སྔགས། །གཟུགས་ཀྱི་ཡུམ་གྱི་ཞལ་ཞུགས་སྐུ་ལུས་བརྒྱུད། །པདྨའི་ལམ་ནས་ཡབ་ཀྱི་གསང་བར་ཞུགས། །སྤྲུལ་པའི་པད་ལྟར་ནཱ་དར་ཐིམ་པར་གྱུར། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱཀི་ནི་ཛཱ་ལ་སམྦྷ་རཾ་སྭཱ་ཧཱ། ཞེས་སྙིང་པོ་དང་། ཨོ་ཧཱི༔ཧ་ཧ་ཧཱུྃ་ཧཱུྃ་ཕཊ། ཅེས་ཉེ་སྙིང་དང་། ཨོཾ་སརྦ་བུདྡྷ་ཌཱཀི་ནཱི་ཡེ་བཛྲ་ཝརྞ་ནཱི་ཡེ་ཧཱུཾ་ཧཱུཾ་ཕཊ། ཅེས་པ་ཡུམ་གྱི་སྙིང་པོའོ། །ༀ་བཛྲ་བེ་རོ་ཙ་ནཱི་ཡེ་ཧཱུཾ་ཧཱུཾ་ཕཊ། ཉེ་སྙིང་། ཨོ་ཌཱཀི་ནཱི་ཡེ་ཧཱུཾ་ཧཱུཾ་ཕཊ། ཨོ་ལ་མེ་ཡེ་ཧཱུཾ་ཧཱུཾ་ཕཊ། །ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ༀ་རཱུ་པི་ཎི་ཡེ་ཧཱུཾ་ཧཱུྃ་ཕཊ། ཌཱ་ཀི་བཞི་ཡི་སྔགས་ཅི་ནུས་བཟླས། གྲངས་ཀྱི་བསྙེན་པ་གཙོ་བོར་འབུམ་འཁོར་ཁྲི་སྟེ་དུས་ཀྱི་དབང་གི་བཞི་འགྱུར་རོ། །བདག་བསྐྱེད་རྐྱང་པའི་སྐབས་སུ་འདིར་ཐུན་བསྡུ་བ་སོགས་བྱའོ། །མདུན་བསྐྱེད་ནི། ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ། ཨོཾ་སྭ་བྷ་ཝ་སོགས། སྟོང་པའི་ངང་ལས་འབྱུང་བ་རིམ་བརྩེགས་སྟེང་། །ཐར་པ་ཆེན་པོའི་ཕོ་བྲང་རྣམ་སྣང་གི །རང་
བཞིན་རིན་ཆེན་སྣ་ཚོགས་ལས་གྲུབ་པ། །གྲུ་བཞི་སྒོ་བཞི་རྟ་བབས་དུར་ཁྲོད་དང་། རྡོ་རྭ་མེ་རི་བཅས་དབུས་པད་སྟེང་དང་། །བྷྲཱུཾ་ལས་བུམ་པའི་ནང་དུ་འདབ་བརྒྱད་དབུས། །ཧཱུྃ་ལས་དཔལ་ལྡན་དྲྭ་བ་སྡོམ་པའི་སྐུ། །ཕྱག་རྒྱ་དྲུག་ལྡན་གཡས་བརྐྱང་སྟབས་ཀྱིས་བཞུགས། །རྡོར་དྲིལ་འཛིན་པས་གང་ལ་འཛིག་པའི་ཡུམ། །རྡོ་རྗེ་ཕག་མོ་གྲི་ཐོད་འཛིན་པས་འཛེག །པད་ཉི་འཇིགས་དུས་བསྐྱེལ་བའི་གདན་ལ་རོལ། །གནས་གསུམ་འབྲུ་གསུམ་གནས་དྲུག་གོ་ཆར་བཅས། །ཕྱོགས་བཞིར་ཡུམ་བཞི་མཚམས་བཞིར་བུམ་པ་བཞི། །ཧཱུྃ་ལས་འོད་འཕྲོས་ཡེ་ཤེས་སེམས་དཔའི་དྲངས། །ཡེ། ཛཿཧཱུྃ་བཾ་ཧོས་གཉིས་མེད་གྱུར་པ་ལ། །དབང་ལྷས་དབང་བསྐུར་རིགས་བདག་མཚན་པར་གྱུར། །ཨོཾ་བཛྲ་སྨྲ་ར་ཎ་ཁཾ། མཆོད་པའི་སྤྲིན་ཕུང་ནམ་མཁའི་ཁམས་གང་བ། །ཆུ་བཞི་ཉེར་སྤྱོད་རྣམ་ལྔ་རོལ་མོ་དང་། །འདོད་ཡོན་ལྔ་དང་རྒྱལ་སྲིད་རིན་ཆེན་བདུན། །ནང་གི་མཆོད་པ་རིག་མ་བཅུ་དྲུག་སོགས། །ཕྱི་ནང་གསང་བའི་མཆོད་པ་དུ་མས་མཆོད། །སྐྱེད་ཚལ་གཞལ་མེད་ཁང་དང་དཔག་བསམ་ཤིང་། །གཏེར་གྱི་བུམ་པ་ཁྲུས་རྫིང་པདྨར་བཅས། །
འབྲུ་སྨན་རིན་ཆེན་རྩི་བཅུད་བང་མཛོད་དང་། །གོས་དར་ཁྲི་སྟན་བཞོན་པ་བྲན་ཁོལ་འབུལ། །ཨོཾ་ཤྲཱི་ཧེ་རུ་ཀ་ས་པ་རི་ཝཱ་ར་སརྦ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྤུ་ར་ཎ་ས་མ་ཡེ་ཧཱུྃ་སྭཱ་ཧཱ། ཨོཾ་ཤྲཱི་ཧེ་རུ་ཀ་ས་པ་རི་ཝཱ་ར་པཉྩ་ཨ་མྲྀ་ཏ་མ་ཏཾ་གི་ཨཱ༔ ཧཱུྃ། བཅོམ་ལྡན་མགོན་པོ་དཔའ་བོ་ཆེན་པོ་ནི། །བསྐལ་པའི་མེ་དཔུང་ལྟ་བུར་རབ་ཏུ་འབར། །རལ་པའི་ཅོད་པན་དབུ་ཡི་རྒྱན་དུ་བཅིངས། །མཆེ་བ་རབ་གཙིགས་དྲག་ཤུལ་འཇིགས་པའི་ཞལ། །དབུ་ལ་སྤྱན་གསུམ་གཟི་བརྗིད་ལྡན་པ་པོ། །དགྲ་སྟ་ཞགས་པ་ཁ་ཊཾ་མདུང་རྩེ་བསྣམས། །རབ་འཇིགས་སྟག་གི་པགས་པ་སྐུ་ལ་གསོལ། །སྐུ་ཆེན་དུད་ཁ་བགེགས་འདུལ་མཛད་ལ་འདུད། །བཅོམ་ལྡན་རྣམ་ཀུན་རྡོ་རྗེ་ཕག་མོ་ཆེ། །འཇིག་རྟེན་གསུམ་གཞན་རྒོལ་བས་མི་ཚུགས་ཤིང་། །འབྱུང་པོའི་འཇིགས་པ་མ་ལུས་རྡོ་རྗེ་ཕག་མོས་འཇོམས། །རྡོ་རྗེ་གདན་བཞུགས་ཚངས་པ་ལས་རྒྱལ་ཞིང་། །བདུད་ཀྱི་འཇིགས་པ་མ་ལུས། ཕམ་མཛད་མ། །སྐྱེ་གནས་འབྱུང་བ་ཀུན་གྱི་རང་བཞིན་གཟུགས། །ས་གསུམ་དབང་ཕྱུག་ཆོས་རྣམས་ཡོངས་རྫོགས་མཛད། །རྣལ་འབྱོར་འདོད་པའི་དབང་ཕྱུག་མ་ལ་འདུད།
སོགས་མཆོད་བསྟོད། དེ་ནས་བསྙེན་པ་བྱ། གཟུངས་ཐག་བརྒྱུད་ནས་སྔགས་ཀྱི་འོད་ཟེར་གྱིས། །བུམ་ལྷ་བསྐུལ་བས་སྦྱོར་མཚམས་བྱང་སེམས་བབས། །ཞེས་བུམ་བསྙེན་དང་། ལྷ་རྣམས་ཞུ་བ་བུམ་ཆུ་དང་རོ་གཅིག་པར་གྱུར། ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ། བཟླས། ལས་བུམ་ལྷ་ཡིས་བགེགས་རྣམས་བཟློག་པར་མཛོད། སྐབས་འདིར་དབང་ལེན་པ་དང་བསྐུར་བར་བྱའོ། །རང་གི་ཐུགས་ལས་སྤྲུལ་པའི་ལྷ་མོའི་ཚོགས། །ས་གཞི་བར་སྣང་གང་བས་མཆོད་ཅིང་བསྟོད། །ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་བློལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །ཅེས་མདུན་བསྐྱེད་དམ་ཚིག་པ་རང་ལ་བསྡུས་ལ། དེ་ནས་བདག་བསྐྱེད་ཐུན་བསྡུ་སྟེ། ཐུགས་ཀའི་ཧཱུྃ་གི་འོད་ཀྱིས་སྣོད་བཅུད་ཞུ། །ཡུམ་ལ་ཐིམ་ཞིང་ཡུམ་ཡང་ཡབ་ལ་ཐིམ། །དེ་ཡང་ཧཱུྃ་དང་ཞབས་ཀྱུ་ཁོག་པ་མགོ །ཐིག་ལེ་ཟླ་ཚེས་ནཱ་ད་དེ་ལས་ཀྱང་། །འདས་པས་དམིགས་སུ་མེད་པའི་ངོ་བོ་སྟོང་། །སེམས་ཀྱི་རང་བཞིན་རིག་སྟོང་རྗེན་པར་བུད། །ཅེས་མཉམ་པར་བཞག་ལ། རྗེས་ཐོབ་ཆུ་ལ་ཉ་བཞིན་བདག་ཉིད་
ནི། །དཔལ་ལྡན་སྡོམ་པ་སྒྱུ་མ་ལྟ་བུའི་སྐུ། །འཁོར་བ་ཇི་སྲིད་དེ་སྲིད་འགྲོ་དོན་མཛད། །བགོ་བའི་སྔགས་ཀྱིས་གོ་ཆར་མཚན་དཔེས་བརྒྱན། །འགྲོ་འདུག་དཀྱིལ་འཁོར་བ་ལ་བསྐོར་བ་སོགས། །སད་རྨི་གཉིད་དང་སྙོམས་འཇུག་གནས་སྐབས་རྣམས། །སྐུ་བཞིའི་རྣམ་ཐར་སྒྱུ་མའི་རྣལ་འབྱོར་རོ། །ཞེས་འདིའི་དོན་ལ་བསླབ་ཅིང་། རྣལ་འབྱོར་བདག་སོགས་འཆི་བའི་ཚེ། །དཔལ་ལྡན་ཁྲག་འཐུང་ལ་སོགས་པས། །མེ་ཏོག་སྣ་ཚོགས་ལག་ན་ཐོགས། །འཆི་བ་ཞེས་བྱ་རྣམ་རྟོག་སྟེ། །བདེ་ཆེན་ཞིང་དུ་ཁྲིད་པར་ཤོག །ཅེས་བསྔོ་སྨོན་བྱའོ། །ཞེས་པ་འདི་ནི་ནཱ་རོའི་རྒྱ་གཞུང་དང་། །རང་བྱུང་ཞབས་དང་མི་བསྐྱོད་རྡོ་རྗེ་དང་། །ཆོས་གྲགས་དཔལ་བཟང་བདུད་མོ་བཀྲ་ཤིས་པ། །དྭགས་རམ་པས་མཛད་སོགས་ཀྱི་དོན་བསྡུས་ཤིང་། །ཆོས་ཀྱི་དབང་ཕྱུག་གིས་མཛད་ལྷན་སྐྱེས་ཀྱི། །གཞུང་ཚིག་ཉིད་ནས་ཁོག་ཕུབ་ཕལ་ཆེར་ནི། །ཡབ་སྲས་གསུངས་རྣམས་བྱིན་རླབས་ཆེ་རྣམས་བསྒྲིགས། །ཅུང་ཟད་མཚམས་སྦྱར་གཞུང་གི་ཚིག་དོན་བསྡུས། །རང་ཉིད་ཁོ་ནའི་རྒྱུན་ཁྱེར་ལ་དམིགས་ནས། །ཆུ་སྟོད་ཟླ་བའི་ཡར་ཚེས་བཅུ་གཅིག་ཉིན། །རྫོགས་པར་བྲིས་འདིས་འགལ་འཁྲུལ་ཉེས་པའི་ཚོགས། །གང་མཆིས་འགྲོ་བའི་སྡིག་དང་ལྷན་ཅིག་བཤགས། །རྣམ་དཀར་གང་དེས་འགྲོ་ཀུན་བདེ་ཆེན་ཐོབ། །བདག་
ཀྱང་འཕོ་ཚེ་ཧེ་རུ་ཀ་དཔལ་དང་། །དཔའ་བོ་ཌཱཀིས་བདེ་ཆེན་ཞིང་ཁྲིད་ཤོག །པདྨ་གར་དབང་མཆོད་པས་མཉེས་བྱེད་ཤོག །ཅེས་རཱ་གའི་མིང་ཅན་དེས་བྱས་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།