མར་མི་དྭགས་གསུམ་གྱི་སྙན་བརྒྱུད་གསང་བ་ལྷན་སྐྱེས་ཕག་མོ་དམར་མོའི་རྒྱུན་ཁྱེར།
མར་མི་དྭགས་གསུམ་གྱི་སྙན་བརྒྱུད་གསང་བ་ལྷན་སྐྱེས་ཕག་མོ་དམར་མོའི་རྒྱུན་ཁྱེར་བཞུགས་པའི་དབུ་ཕྱོགས་ལགས་སོ།།
ན་མོ་བཛྲ་ཝཱ་ར་ཧི་ཡེ། ནཱ་རོ་པ་ཡི་རྒྱ་གཞུང་ལས། །མཆོག་དང་ཐུན་མོང་དངོས་གྲུབ་ནི། །ཡིད་བཞིན་ནོར་བུ་ལྟ་བུ་ལ། །གསོལ་བ་གང་བཏབ་འགྲུབ་གྱུར་པ། །དེ་ཡི་སྒྲུབ་པ་བཤད་པར་བྱ། །གསུངས་པ་རྒྱུན་ཁྱེར་ཉམས་ལེན་ནི། །འདི་ཉིད་འདོན་སྒོམ་སྦྲགས་པས་འཐུས། །འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་བརྩེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བྱས་ནས། །རྫོགས་པའི་བྱང་ཆུབ་སེམས་བསྐྱེད་བགྱི། །
རང་ཉིད་བཅོམ་ལྡན་ལྷན་སྐྱེས་དམར། །གསལ་བའི་ཐུགས་ཀར་པདྨ་དང་། །ཉི་མའི་སྟེང་དུ་ཡི་གེ་ཧཱིཿདེ་ལས་འོད་ཟེར་འཕྲོས་པ་ཡིས། །བླ་མ་དང་ནི་རྗེ་བཙུན་མ། །སངས་རྒྱས་བྱང་སེམས་ཚོགས་དང་བཅས། །སྤྱན་དྲངས་མདུན་དུ་བཞུགས་པ་ལ། །སྒོ་གསུམ་གུས་པས་ཕྱག་འཚལ་མཆོད། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་ཨབྷཾ་པཱཏྱཾ་པུཥྛ་དྷུ་པེ་ཨཱ་ལོ་ཀེ་གནྡྷེ་ནེ་ཝི་ཏྱཱ་ཤབྟ་པྲ་ཏཱིཙྪ་སྭཱ་ཧཱ། ཨེ་མ་ཧོ་ངོ་མཚར་རྨད་ཀྱི་ཆོས། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །འཁོར་འདས་ཡོན་ཏན་དཔལ་དང་
ལྡན་། །བཀའ་བརྒྱུད་རིན་པོ་ཆེ་ལ་ཕྱག་འཚལ་བསྟོད། །བླ་མ་སངས་རྒྱས་བླ་མ་ཆོས། །བླ་མ་དཔལ་ལྡན་རྡོ་རྗེ་འཆང་། །ཀུན་གྱི་བྱེད་པོ་བླ་མ་ཡིན། །བླ་མ་རྣམས་ལ་ཕྱག་འཚལ་ལོ། །སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབ་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །བླ་མེད་དཀོན་མཆོག་གསུམ་ལ་ཕྱག་འཚལ་ལོ། །དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུང་ཐུགས། །འགྲོ་བ་སྐྱོབ་ལ་ཕྱག་འཚལ་ལོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །བྱང་ཆུབ་མཆོག་ཏུ་སེམས་ཀྱང་བསྐྱེད། །སེམས་ཅན་མ་ལུས་བདག་མགྲོན་གཉེར། །བྱང་ཆུབ་སྤྱོད་པ་མཛད་བཞིན་སྤྱོད། །འགྲོ་ཕན་སངས་རྒྱས་འགྲུབ་པར་ཤོག །ལན་གསུམ་བརྗོད། ཚོགས་ཞིང་རང་ལ་ཐིམ་པར་གྱུར། སེམས་ཅན་བདེ་དང་ལྡན་གྱུར་ཅིག །སྡུག་བསྔལ་དག་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་
ཤོག །ཨོཾ་སྭ་བྷ་ཝ་སོགས། སྟོང་པའི་ངང་ལས་ཁམས་གསུམ་པོ། །ཐམས་ཅད་ཆོས་འབྱུང་གཞལ་ཡས་ཁང་། །དེ་དབུས་པདྨ་ཉི་རོའི་སྟེང་། །རང་སེམས་ལས་འོད་ཟེར་འཕྲོས། །འཕགས་མཆོད་སེམས་ཅན་དོན་བྱས་འདུས། །ཡོངས་གྱུར་བདག་ཉིད་རྣལ་འབྱོར་མ། །ཆོས་སྐུ་ཉག་གཅིག་ཞལ་གཅིག་མ། །ཐབས་ཤེས་ཟུང་འཇུག་ཕྱག་གཉིས་པ། །བདུད་དཔུང་འཇིགས་བྱེད་ཁྲོ་གཉེར་ཅན། །མཆེ་གཙིགས་ཚེམས་ཀྱིས་མ་མཆུ་མནན། །དམར་ལ་གཡོ་ཟླུམ་སྤྱན་གསུམ་འབར། །དབུ་སྐྲ་ཁམ་ནག་འབར་ཞིང་གྲོལ། །ཐོད་སྐམ་ལྔ་ཡིས་དབུ་རྒྱན་ཅན། །འདུ་བྱེད་དག་པའི་རང་བཞིན་གྱི། །ཐོད་རློན་ལྔ་བཅུའི་དོ་ཤལ་འཕྱང་། །མེ་ཏོག་དྲིལ་བུ་གཡེར་ཁས་བརྒྱན། །ཕྱིན་དྲུག་རུས་བརྒྱན་ཕྱག་རྒྱ་ལྔ། །རྡོ་རྗེ་གྲི་གུག་ཐོད་ཁྲག་བསྣམས། །རུས་པའི་ཁ་ཊཾ་གྲུ་མོར་བརྟེན། །གཡོན་བརྐྱང་གར་གྱིས་རྣམ་པར་རོལ། །སྟོང་གསུམ་ཁྱབ་པའི་འོད་འབར་བ། །ཧ་རི་ནི་སའི་ཡི་གེ་ལས། །སྤྱི་བོར་རྡོ་རྗེ་མཁའ་འགྲོ་སྔོ། །མགྲིན་པར་རིན་ཆེན་མཁའ་འགྲོ་སེར། །སྙིང་ཁར་པདྨ་མཁའ་འགྲོ་དམར། །ལྟེ་བར་ལས་ཀྱི་མཁའ་འགྲོ་
ལྗང་། །རྡོ་རྗེ་རིན་ཆེན་པདྨ་དང་། །རལ་གྲིས་མཚན་པའི་གྲི་ཐོད་འཛིན། ཁ་ཊཾ་འཛིན་ཅིང་རིམ་པ་བཞིན། །སོ་གཉིས་བཅུ་དྲུག་བརྒྱད་དང་ནི། །དྲུག་ཅུ་རྩ་བཞིའི་འཁོར་གྱིས་བསྐོར། །རང་གི་གསང་གནས་ཆོས་འབྱུང་དབུས། །ཧྲིདང་མཁའ་འགྲོ་བཞིའི་ཐུགས་ཀའི། །ཡི་གེ་བཞི་ལས་འོད་ཟེར་འཕྲོས། །ཨོ་རྒྱན་གནས་ནས་རྣལ་འབྱོར་མ། །འཁོར་བཅས་སྤྱན་དྲངས་ནམ་མཁར་བཞུགས། །དེ་རྣམས་སྐུ་ལས་སྐུ་མང་འཕྲོས། །།ལུས་ཐིམ་བདེ་དང་དྲོད་ནུས་སྐྱེས། །གསུང་ལས་ཨཱ་ལཾ་ཀཱ་ལཾ་འཕྲོས། །ངག་ཐིམ་མཐུ་དང་ནུས་པ་བསྐྱེད། །ཐུགས་ལས་བྱང་སེམས་ཆུ་རྒྱུན་བབས། །ཡིད་ཐིམ་བདེ་སྟོང་ཏིང་འཛིན་སྐྱེས། །ལྷ་རྣམས་རང་དང་སོ་སོར་ཐིམ། །གཉིས་མེད་རིགས་བདག་དབུ་བརྒྱན་པའོ། །གསང་བར་ཆོས་འབྱུང་པདྨ་འདབ་བཞིའི་དབུས། །ཧྲིདང་འདབ་བཞིར་ཧ་རི་ནི་ས་སྟེ། །དོན་ཀུན་འགྲུབ་བྱེད་འཁོར་ལོ་འོད་འབར་བའོ། །ༀ་བཛྲ་བཻ་རོ་ཙ་ནི་ཡེ་ཧ་རི་ནི་ས་ཧཱུཾ་ཧཱུཾ་ཕཊ་སྭཱ་ཧཱ། སྔགས་དེ་བརྒྱ་སྟོང་ཅི་འགྲུབ་བསྙེན། །དེ་ནས་སྒོམ་མཁན་སེམས་ལ་ལྟ། །ཧཱིཝལས་སྔགས་ཕྲེང་གཡོན་དུ་འཁོར་བ་མཆན། །དེ་ཡིས་རྫོགས་རིམ་གོ་ཆོད་ཡིན། །དེ་ཡན་རྒྱུན་དུ་ཉམས་ལེན་
པ། །ཕག་མོའི་བདག་བསྐྱེད་ཆག་མེད་ཚང་། །གྲངས་ཀྱི་བསྙེན་པ་འབུམ་ཚོ་བཞི། །ཐ་མལ་ཤེས་པ་བསྒྱུར་བར་ནུས། །ཟླ་བ་དྲུག་གིས་རྣལ་འབྱོར་གྱི། །འཁྲུལ་པའི་རྟོག་པ་ཟད་པར་འགྱུར། ༈ །དེ་ནས་མདུན་བསྐྱེད་བྱེད་འདོད་ན། །ཡོད་ན་དཀྱིལ་ཐང་མཆོད་གཏོར་བཤམས། །མེད་ན་མདུན་བསྐྱེད་ནམ་མཁར་བསྒོམ། ཨོཾ་སྭ་བྷ་ཝ་སོགས། བརྟན་དང་གཡོ་བའི་དངོས་པོ་ཀུན། །སྐད་ཅིག་ཙམ་གྱིས་སྟོང་པར་བསྒོམ། །སྟོང་པའི་ངང་ལས་ཆོས་འབྱུང་ནང་། །པདྨ་རོ་དང་ཉི་སྟེང་ཧཱིཿབསྐལ་པའི་མེ་ལྟར་འབར་བའི་འོད། །ཁྲོ་མོ་ཞལ་གཅིག་ཕྱག་གཉིས་མ། །མཛེས་པ་སིན་དྷུ་ར་དང་མཚུངས། །སྐུ་ཡི་འོད་ཟེར་སྟོང་གསུམ་ཁྱབ། །དབུ་སྐྲ་ཐོར་ཚུགས་ཚངས་པར་འཁྱིལ། །སངས་རྒྱས་ལྔས་མཚན་ཐོད་པས་བརྒྱན། །རྡོ་རྗེ་ཐོད་ཁྲག་ཁ་ཊཾ་བཅས། །དར་དཔྱངས་ཅོད་པན་རྣམ་པར་འཕྱང་། །ཕྱག་རྒྱ་ལྔས་ནི་རྣམ་པར་བརྒྱན། །མི་མགོ་རློན་པའི་དོ་ཤལ་ཅན། །མེ་ཏོག་ཕྲེང་བའི་རྒྱན་གྱིས་སྤྲས། །པདྨ་རོ་དང་ཉི་མའི་གདན། །གཡས་བསྐུམ་གཡོན་བརྐྱང་གར་གྱིས་བཞུགས། །ཆུ་ལས་ཉ་ལྡང་ཇི་བཞིན་དུ། །སྐད་ཅིག་ཙམ་གྱིས་རྫོགས་པར་བསྐྱེད། །དེ་ཡི་ཕྱོགས་ཀྱི་འདབ་བཞི་ལ། །
ཤར་དུ་རྡོ་རྗེ་མཁའ་འགྲོ་སྔོ། །ལྷོ་རུ་རིན་ཆེན་མཁའ་འགྲོ་སེར། །ནུབ་ཏུ་པདྨ་མཁའ་འགྲོ་དམར། །བྱང་དུ་ལས་ཀྱི་མཁའ་འགྲོ་ལྗང་། །རང་རྟོགས་གྲི་ཐོད་ཁ་ཊཾ་འཛིན། གར་བྱེད་ཆ་ལུགས་གཙོ་མོ་འདྲ། །གཙོ་མོའི་ལྟེ་བར་ཧྲིཡིག་དང་། །འཁོར་བཞིའི་ཧ་རི་ནི་ས་ལས། །འོད་འཕྲོས་ཡེ་ཤེས་སེམས་དཔའ་རྣམས། །རང་བཞིན་གནས་པའི་ཕོ་བྲང་ནས། །སྤྱན་དྲངས་གཉིས་སུ་མེད་པར་བསྟིམ། །ཧཱུྃ། སྣང་བ་ཆོས་སྐུའི་གཞལ་ཡས་ནས། །རྩ་བའི་བླ་མ་གཤེགས་སུ་གསོལ། །ཆོས་དབྱིངས་དག་པའི་གཞལ་ཡས་ནས། །བཀའ་བརྒྱུད་བླ་མ་གཤེགས་སུ་གསོལ། །ཆོས་སྐུ་སྤྲོས་བྲལ་དག་པ་ལ། །ལོངས་སྐུ་སྒྱུ་མའི་སྐུར་སྟོན་པ། །མཁའ་འགྲོའི་ཚོགས་དང་རྣལ་འབྱོར་མ། །ཕྱག་རྒྱ་ཆེན་པོའི་དབྱིངས་ནས་བཞེངས། །སེམས་ཅན་དོན་ལ་དགོངས་མཛོད་ལ། །སྐད་ཅིག་ཙམ་གྱིས་གཤེགས་སུ་གསོལ། །མི་འགྱུར་གནས་པའི་གཞལ་ཡས་ནས། །རྡོ་རྗེ་མཁའ་འགྲོ་གཤེགས་སུ་གསོལ། །བདེ་ཆེན་དག་པའི་གཞལ་ཡས་ནས། །སངས་རྒྱས་མཁའ་འགྲོ་གཤེགས་སུ་གསོལ། །།གཏེར་འབྱུང་ཡིད་བཞིན་གཞལ་ཡས་ནས། །རིན་ཆེན་
མཁའ་འགྲོ་གཤེགས་སུ་གསོལ། །ཤེས་རབ་བཙུན་མོའི་བྷ་ག་ནས།། །པདྨ་མཁའ་འགྲོ་གཤེགས་སུ་གསོལ། །མཆོད་རྟེན་དཀར་པོའི་དཔལ་གྲགས་ནས། །སྣ་ཚོགས་མཁའ་འགྲོ་གཤེགས་སུ་གསོལ། །དུར་ཁྲོད་ཆེན་པོའི་གནས་བརྒྱུད་ནས། །ལས་ཀྱི་མཁའ་འགྲོ་གཤེགས་སུ་གསོལ། །རོ་ལངས་འཁྲུག་པའི་གཞལ་ཡས་ནས། །འཇིག་རྟེན་མཁའ་འགྲོ་གཤེགས་སུ་གསོལ། །སྟེང་འོག་ཕྱོགས་མཚམས་སོ་སོ་ནས། །ཆོས་སྐྱོང་སྲུང་མ་གཤེགས་སུ་གསོལ། །ཨོབཛྲ་ཝཱ་ར་ཧི་ས་པཱ་རི་ཝཱ་ར་བཛྲ་ས་མཱ་ཛཿ བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་པདྨ་ཀ་མ་ལ་ཡ་ཧཱུཾ། ཛཧཱུྃ་བཾ་ཧོ༔གཉིས་མེད་གྱུར། །དབང་ལྷ་སྤྱན་དྲངས་དབང་བསྐུར་ཏེ། །སྐུ་གང་ཆུ་ལྷག་ཡར་ལུད་དེ། །རིགས་ལྔ་སོ་སོས་དབུ་རྒྱན་གྱུར། །ཨོཾ། དངོས་
སུ་འབྱོར་རམ་ཡིད་ཀྱིས་སྤྲུལ། །མཆོད་རྫས་ནམ་མཁའི་ཁམས་གང་བ། །ཞིང་ཁམས་ཀུན་གྱི་མཆོད་པ་ཡང་། །དེང་འདིར་མཆོད་པའི་རྫས་སུ་དམིགས། །ༀ་བཛྲ་སྤ་ར་ཎ་ཁཾ༔ འཇིག་རྟེན་ཁམས་ནི་དཔག་མེད་ན། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་ཆབ་དང་། །ཞལ་ཟས་རོལ་མོ་ཇི་སྙེད་ཀུན། །བདག་གིས་གུས་པས་བཤམས་པ་འདི། །བཅོམ་ལྡན་འདས་མ་འཁོར་བཅས་མཆོད། །ཨོཾ་བཛྲ་ཝཱ་ར་ཧི་ཨགྷཾ་ནས་ཤབྟ་པྲ་ཏིཙྪསྭཱ་ཧཱ། འཇིག་རྟེན་ཁམས་ནི་དཔག་མེད་ན། །གཟུགས་སྒྲ་དྲི་རོ་རེག་བྱ་དང་། །སྣ་ཚོགས་མཆོད་པ་ཅི་སྙེད་པ། །བདག་གིས་གུས་པས་བཤམས་པ་འདི། །བཅོམ་ལྡན་འདས་མ་འཁོར་བཅས་མཆོད། །ཨོཾ་བཛྲ་ཝཱ་ར་ཧི་རཱུ་པ་ཤབ་གནྡྷེ་ར་ས་སྤྱནེ་བི་ཤཱ་པྲ་ཏིཙྪ་སྭཱཧཱ། ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེ་ཤེས་རབ་ཅན་གྱིས་དབུལ། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་སབྟ་རཏྣ་པྲ་ཏིཙྪ་སྭཱ་ཧཱ། རིན་ཆེན་གདུགས་དང་གསེར་ཉ་དང་། །གཏེར་ཆེན་བུམ་པ་སྨན་བཟང་དང་། །དུང་དཀར་གཡས་
འཁྱིལ་དཔའ་བེའུ། །མཆོག་གི་རྒྱལ་མཚན་འཁོར་ལོ་བཟང་། །བཅོམ་ལྡན་འདས་མ་འཁོར་བཅས་མཆོད། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་ཨཉྫ་མངྒ་ལཾ་ཧེ་ཏུ་པྲ་ཏཱིཙྪ་སྭཱ་ཧཱ། ཡུངས་དཀར་དུར་ཝ་བིལ་བ་དང་། །གི་ཝང་ལི་ཁྲི་ཞོ་མཆོག་དང་། །མེ་ལོང་རྣམ་དག་དུང་དཀར་རྣམས། །ལྷ་མོ་བརྒྱད་ཀྱིས་ཕུལ་བ་ལྟར། །བཅོམ་ལྡན་འདས་མ་འཁོར་བཅས་མཆོད། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་ཨཥཱ་མངྒ་ལཾ་དྲ་བྱ་པྲ་ཏིཙྪ་སྭཱ་ཧཱ། ཐེག་མཆོག་བླ་རེ་གདུགས་དང་བ་དན་དང་། །བདུད་བཅོམ་རྒྱལ་མཚན་ལྷབ་ལྷུབ་སྙིང་འཕན་དང་། །གར་དང་རོལ་མོ་མཆོད་པའི་སྒྲ་དབྱངས་ཀྱིས། །འཕགས་མའི་དཀྱིལ་འཁོར་མཛེས་པར་བརྒྱན་པར་བགྱི། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་སརྦ་པཱུ་ཏ་པྲ་སྭཱ་ཧཱ། ཤ་ཆེན་གསུར་གྱི་བདུག་སྤོས་དང་། །ཞུན་ཆེན་གསལ་བའི་མར་མེ་དང་། །བྱང་སེམས་དཀར་དམར་བདུད་རྩི་དང་། །རྡོ་རྗེ་དྲི་ཆེན་ཞལ་ཟས་དང་། །རྡོ་རྗེ་དྲི་ཆུའི་བདུད་རྩི་དང་། །ཌ་མ་རུ་དང་སིལ་སྙན་གྱིས། །ཕ་རོལ་ཕྱིན་དྲུག་ལྷ་མོ་མཆོད། །ས་བཅུ་ནོན་ཕྱིར་བཞེས་སུ་གསོལ། །ཨོཾ་བཛྲ་ཝཱ་ར་ཧི་ས་པ་རི་ཝཱ་ར་གུ་ཧྱ་པྲ་ཏཱིཙྪ་སྭཱ་
ཧཱ། ཆང་སྣ་བཞི་ཡི་ཆང་ཕུད་ལ། །ས་བཅུ་ནོན་ཕྱིར་ལག་མཆོད་བྱས། །ཤེས་རབ་གཡོན་གྱི་ལག་པ་ལ། །ཐབས་ཆེན་གཡས་ཀྱི་ལག་པས་མཆོད། །མཚན་ལྡན་རྡོ་རྗེ་ཀ་པཱ་ལ། །ཀ་ནི་གང་དུའང་མི་གནས་ཤིང་། །པཱ་ནི་མ་སྐྱེས་སྐྱེ་བ་མེད། །ལ་ནི་བློ་འདས་ཡིད་དང་བྲལ། །སྐུ་གསུམ་མི་འགྱུར་ཀ་པཱ་ལ། །ཟག་མེད་བདེ་བའི་ཆང་ཕུད་གཏམས། །སྐྱེ་འཆི་མེད་པའི་བདུད་རྩི་བླུགས། །ཡི་གེ་གསུམ་གྱི་བྱིན་གྱིས་བརླབས། །ཨོཾ་གྱིས་སྐྱེ་མེད་སྤྲུལ་སྐུར་སྦྱངས། །ཨཱཡིས་འགག་མེད་ལོངས་སྐུར་བསྒྱུར། །ཧཱུྃ་གིས་བློ་འདས་ཆོས་སྐུར་སྤེལ། །ལན་གསུམ་དཀྲུགས་པའི་བདུད་རྩི་འདིས། །ཕ་རོལ་ཕྱིན་དྲུག་ལྷ་མོ་མཆོད། །མཉམ་ཉིད་དབྱིངས་སུ་བཞེས་སུ་གསོལ། །ཨོཾ་བཛྲ་ཝཱ་ར་ཧི་པའི་ས་པ་རི་ཝཱ་ར་པཉྩ་ཨ་མྲྀ་ཏ་པྲ་ཏཱིཙྪ་སྭཱ་ཧཱ། བསྟོད་པ་ནི། ཧྲཱིཿ ཞལ་གཅིག་སྤྱན་གསུམ་ལྗགས་འདྲིལ་ཞིང་། །ཞལ་གདངས་མཆེ་བ་རྣམ་པར་གཙིགས། །སྐུ་མདོག་རབ་དམར་འོད་ཟེར་འབར། །སྣང་སྟོང་སྐྱེ་མེད་སྐུ་ལ་བསྟོད། །འཛུམ་པའི་མདངས་ལྡན་བཞད་པའི་ཞལ། །གསུང་དབྱངས་ཡན་ལག་དྲུག་ཅུ་ཡི། །ཧཱུྃ་ཕཊ་ལ་སོགས་སྒྲ་སྒྲོག་མ། །
གྲག་སྟོང་དབྱེར་མེད་གསུང་ལ་བསྟོད། །གཡས་བསྐུམ་གཡོན་བརྐྱང་འཇིགས་བྱེད་དང་། །དུས་མཚན་བསྒྲལ་བའི་གདན་སྟེང་ནས། །སྣ་ཚོགས་མེ་འོད་བདུད་འདུལ་མ། །རྟོག་མེད་མགོ་ཕྲེང་ཅན་ལ་བསྟོད། །གཡས་ན་དམ་ཉམས་སྲོག་གཅོད་གྲི། །གཡོན་ན་བདུད་རྩིའི་ཀ་པཱ་ལར། །རིག་སྟོང་ལྔ་ཡི་དབུ་རྒྱན་ཅན། །ལྷ་ཡི་ལྷ་ལ་ཕྱག་འཚལ་བསྟོད། །བདེ་སྟོང་བླ་མ་ཡིད་བཞིན་གྱི། །ནོར་བུ་གཙུག་གི་རྒྱུན་ལྡན་མ། །།དུས་གསུམ་སངས་རྒྱས་ཐམས་ཅད་ཀྱི། །ཡུམ་གྱུར་མ་ལ་ཕྱག་འཚལ་བསྟོད། །ཧཱུྃ། ལྟེ་བའི་དབུས་གནས་རྣལ་འབྱོར་མ། །ཞེ་སྡང་གཅོད་མཛད་སྒྲུབ་པ་མོ། །མེ་ལོང་ཡེ་ཤེས་ངོ་བོ་ཉིད། །རྡོ་རྗེ་ཕག་མོར་ཕྱག་འཚལ་བསྟོད། །མེ་དཔུང་པ་འབར་བའི་ལྟེ་བ་ལ། །སྐུ་གསུང་ཐུགས་དང་ཡེ་ཤེས་ལྔ། །ཟག་མེད་བདེ་བ་སྟེར་མཛད་མ། །སངས་རྒྱས་ཡུམ་ལ་ཕྱག་འཚལ་བསྟོད། །དྷུ་ཏིའི་འོད་ཀྱི་རང་བཞིན་མ། །དབུགས་བྲལ་ལྟེ་བ་ཉིད་ལ་བཞུགས། །ཞུ་བའི་རང་བཞིན་བདེ་ཆེན་མ། །བདེ་སྟེར་ཡུམ་ལ་ཕྱག་འཚལ་བསྟོད། །དངོས་པོ་གཤིས་ཀྱི་དོན་སྟོན་མ། །སྐུ་བཞིའི་དབྱེར་མེད་
གཉུག་མའི་ངང་། །བདེ་བ་ཆེན་པོའི་ངོ་བོ་ཉིད། །རྡོ་རྗེ་མཁའ་འགྲོར་ཕྱག་འཚལ་བསྟོད། །བདེ་ཆེན་ལམ་སྣ་འདྲེན་པའི་ཡུམ། །དུ་མ་རོ་གཅིག་དོན་སྟོན་མ། །སྣང་སྟོང་དབྱེར་མེད་ངོ་བོ་ཉིད། །རིན་ཆེན་མཁའ་འགྲོར་ཕྱག་འཚལ་བསྟོད། །བདུད་བཞིའི་དམག་ལས་རབ་རྒྱལ་མ། །བདེ་ཆེན་བྱིན་གྱིས་རློབ་མཛད་མ། །རྩ་རླུང་ཐིག་ལེའི་ངོ་བོ་ཉིད། །པདྨ་མཁའ་འགྲོར་ཕྱག་འཚལ་བསྟོད། །བདུད་དང་ལོག་འདྲེན་ཞི་མཛད་མ། །བར་ཆད་བསྲུང་ཞིང་བྱིན་རླབས་ཅན། །མཐུ་དང་རྫུ་འཕྲུལ་ངོ་བོ་ཉིད། །ལས་ཀྱི་མཁའ་འགྲོར་ཕྱག་འཚལ་བསྟོད། །མཆོག་དང་ཐུན་མོང་ལ་སོགས་པའི། །དབང་བཞི་བསྐུར་བར་མཛད་དུ་གསོལ། །རྒྱུད་བཞི་སྨིན་པར་མཛད་དུ་གསོལ། །ཕྲིན་ལས་རྣམ་བཞི་བསྒྲུབ་ཏུ་གསོལ། །སྔགས་མཆོད་པའི་ཚུལ་དུ་ཅུང་ཟད་བསྙེན། ཨོ་བཛྲ་བེ་རོ་ཙ་ནཱི་ཡེ་ཧ་རི་ནི་ས་ཧཱུཾ་ཧཱུཾ་ཕཊ་སྭ་ཧཱ། ཡང་བསྡུ་ན། ཧྲཱིཿཧ་རི་ནི་ས༔ དེ་ནས་རྗེས་ཀྱི་ཆོ་ག་ནི། ཨོཾ་བཛྲ་ཝཱ་ར་ཧི་ས་པ་རི་ཝཱ་ར་ཨརྒྷཾ༴ ཤབྡ་པྲ་ཏཱིཙྪ་སྭཱ་ཧཱ། ལྟེ་བའི་དབུས་ནས་འབྱུང་བཞི་འཕྲོས། །ཆོས་དང་ལོངས་སྤྱོད་རྫོགས་པར་ལྡན། །མཁའ་འགྲོ་མ་རྣམས་སྡུད་མཛད་མ། །རྗེ་
བཙུན་མ་ལ་ཕྱག་འཚལ་བསྟོད། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པ་འཆིང་གཅོད་ཅིང་། །འཇིག་རྟེན་བྱ་བ་རིབ་འཇུག་མ། །དེ་སྙེད་རྣམས་ལ་ཕྱག་འཚལ་བསྟོད། །མ་འབྱོར་པ་དང་ཉམས་པ་དང་། །གང་ཡང་བདག་གི་བློ་ཡིས་ནི། །བགྱིས་པ་དང་ནི་ཅི་མཆིས་པ། །དེ་ཀུན་ལྷ་མོས་བཟོད་པར་གསོལ། །ལྷ་མོ་ཚད་མ་དམ་ཚིག་ཚད་མ་དང་། །དེས་གསུངས་ཚིག་ཀྱང་མཆོག་ཏུ་ཚད་མ་སྟེ། །བདེན་པ་དེ་ཡིས་ལྷ་མོ་མཆོག་གིས་ནི། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །བཀྲ་ཤིས་ནི། བཀའ་བརྒྱུད་བླ་མས་ལེགས་བྱིན་པའི། །རྟག་ཏུ་ཡེ་ཤེས་ཐུགས་རྗེ་ཡིས། །གཟིགས་ཤིང་ཆོས་སྐུར་ངོ་སྤྲོད་པའི། །བྱིན་རླབས་མཆོག་གི་བཀྲ་ཤིས་ཤོག །རྡོ་རྗེ་ཕག་མོས་ལེགས་བྱིན་པའི། །གསང་སྔགས་མཆོག་གི་ཆོ་ག་ལ། །ལུས་ངག་ཡིད་གསུམ་མཐུས་སྒྲུབ་པའི། །དངོས་གྲུབ་མཆོག་གི་བཀྲ་ཤིས་ཤོག །རྡོ་རྗེ་མཁའ་འགྲོས་ལེགས་བྱིན་པའི། །སེམས་ཉིད་འོད་གསལ་འདུས་མ་བྱས། །གཉིས་མེད་དཔེ་བྲལ་དོན་རྟོགས་པའི། །ཕྱག་རྒྱ་ཆེན་པོའི་བཀྲ་ཤིས་ཤོག །སངས་རྒྱས་མཁའ་འགྲོས་ལེགས་བྱིན་
པའི། །ཆོས་རྣམས་རང་བཞིན་གང་གི་སེམས། །རྒྱུད་འདི་ཆོས་ཀྱིས་མ་མཆིས་པའི། །ཆོས་ཀྱི་ཕྱག་རྒྱས་བཀྲ་ཤིས་ཤོག །རིན་ཆེན་མཁའ་འགྲོས་ལེགས་བྱིན་པའི། །ཡོན་ཏན་དཔེ་བྱད་དུ་མས་བརྒྱན། །ནད་དང་གདོན་ལས་ཐར་བ་ཡི། །བསམ་པ་འགྲུབ་པའི་བཀྲ་ཤིས་ཤོག །པདྨ་མཁའ་འགྲོས་ལེགས་བྱིན་པའི། །ཐབས་དང་ཤེས་རབ་གཉིས་མེད་སྦྱོར། །བདེ་ཆེན་ཡེ་ཤེས་ཐབས་ཀྱི་མཆོག །གསང་བ་ཤེས་རབ་བཀྲ་ཤིས་ཤོག །ལས་ཀྱི་མཁའ་འགྲོས་ལེགས་བྱིན་པའི། །རྣལ་འབྱོར་དམ་ཚིག་ལྡན་པ་ལ། །ཞི་དང་རྒྱས་ལ་སོགས་པ་ཡི། །ལས་རྣམས་འགྲུབ་པའི་བཀྲ་ཤིས་ཤོག །འཇིག་རྟེན་མཁའ་འགྲོས་ལེགས་བྱིན་པའི། །འགྲོ་བའི་བསམ་པ་རབ་ཤེས་ནས། །ཐབས་རྣམས་དུ་མས་འདུལ་མཛད་པ། །མངོན་ཤེས་དྲུག་ལྡན་བཀྲ་ཤིས་ཤོག །དཔའ་བོ་རྣམས་ཀྱིས་ལེགས་བྱིན་པའི། །རྡོ་རྗེ་གསུམ་གྱི་འོད་ཟེར་གྱིས། །བགེགས་རིགས་སྟོང་ཕྲག་ཞི་བ་དང་། །སྐུ་གསུང་ཐུགས་ཀྱི་བཀྲ་ཤིས་ཤོག །ལྷ་མོ་རྣམས་ཀྱིས་ལེགས་བྱིན་པའི། །འབྱུང་བ་ལྔ་ཡི་སྤྲོ་བསྡུ་ཡིས། །བདེ་བར་གཤེགས་པ་མཉེས་མཛད་པའི། །ཡང་དག་
མཆོད་པའི་བཀྲ་ཤིས་ཤོག །ཆོས་སྐྱོང་རྣམས་ཀྱིས་ལེགས་བྱིན་པའི། །འཁོར་བཟང་ལོངས་སྤྱོད་ལྡན་པ་དང་། །ནད་དང་གདོན་ལས་ཐར་བ་དང་། །བར་ཚད་མེད་པའི་བཀྲ་ཤིས་ཤོག །གཤེགས་གསོལ་ནི། ཨོ། ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཞིང་དུ་གཤེགས་སུ་གསོལ། །སངས་རྒྱས་ཞིང་དུ་གཤེགས་ནས་ཀྱང་། །སེམས་ཅན་རྣམས་ཀྱི་དོན་སླད་དུ། །སླར་ཡང་འབྱོན་པར་མཛད་དུ་གསོལ། །མཆོད་སྦྱིན་གནས་འདིར་གང་ལྷགས་པ། །འབྱུང་པོ་ས་འོག་རྒྱུ་བ་དང་། །ས་སྟེང་འཁོད་པ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐམས་ཅད་འགྲོ་བར་གྱིས། །ཡེ་ཤེས་པ་དང་འཇིག་རྟེན་པ། །ཐམས་ཅད་རང་གནས་བཛྲ་མུཿ སྣོད་བཅུད་དམ་ཚིག་སེམས་དཔར་བཅས། །རང་ཐིམ་དེ་ཡང་མི་དམིགས་པར། །སེམས་ཉིད་ཆོས་སྐུ་རྗེན་པར་བུད། །ཆོས་དབྱིངས་བྱང་ཆུབ་སེམས་ཀྱི་དཀྱིལ་འཁོར་དུ། །བདག་སོགས་སེམས་ཅན་ཐམས་ཅད་ཀྱིས། །དུས་གསུམ་བསགས་དང་རྟོགས་པ་ཡིས། །འགྲོ་དྲུག་སེམས་ཅན་མ་ལུས་པ། །
སྐུ་ལྔ་ཡོངས་རྫོགས་སངས་རྒྱས་ཐོབ་པར་ཤོག །དེ་ལྟར་སྒོམ་བཟླས་ཕན་ཡོན་ནི། །འབར་བ་གསུམ་གྱི་ཚུགས་པ་གསུམ། །འདུ་བ་གསུམ་དང་དྲོད་གསུམ་ཐོབ། །ཤེས་པ་སྟེང་ནས་སློང་བ་དང་། །ལུས་སེམས་གཉིས་ལ་ཞེན་ཞེད་དང་། །ངོ་བོ་འགྱུར་བ་མེད་པ་དང་། །རང་བཞིན་སྐྱེ་བ་མེད་པ་དང་། །མཚན་ཉིད་གཉིས་སུ་མེད་པ་དང་། །ཐུགས་རྗེ་འགག་པ་མེད་པར་འཆར། །དེ་སྐད་ནཱ་རོ་པཎ་ཆེན་གསུངས། །མདོར་ན་རྒྱས་འབྲིང་རྣམ་གསུམ་ནི། རྒྱལ་བའི་ཡུམ་ལ་མཆོད་པ་ཡི། །ཕན་ཡོན་རྒྱ་ཆེན་གང་གསུངས་པ། ཐམས་ཅད་འདི་ཉིད་བཏོན་པས་ཐོབ། །བླ་མ་ཡང་དག་ཅེས་བྱ་བས། །གླེགས་བམ་མཎྜལ་དང་བཅས་པས། །རིང་ནས་བསྐུལ་བས་དོན་ཡོད་ཕྱིར། །གྲུབ་ཆེན་གོང་མ་རྣམས་ཀྱི་གསུང་། །བསླད་མེད་གསེར་འཕྲེང་བཞིན་དུ་བསྒྲིགས། །འོན་ཀྱང་ཉེས་འགལ་མཆིས་སྲིད་ན། །ཆོས་བདག་ཊཱཀྐིའི་ཚོགས་ལ་བཤགས། །དེ་སྐད་རཱ་ག་ཨ་སྱ་ཡིས། །བསྒྲིགས་ཤིང་ངག་ནས་སྨྲས་པ་ལྟར། །དགེ་སློང་བརྩོན་འགྲུས་ཞེས་བྱས་བྲིས། །དགེ་བས་འདི་དང་འབྲེལ་ཐོགས་ཀུན། །ཚེ་འདིར་དངོས་གྲུབ་གཉིས་རྙེད་ནས། །ཕྱི་མ་མཁའ་སྤྱོད་བདེ་ཆེན་དུ། །ཡེ་ཤེས་མཁའ་འགྲོས་འཁྲིད་པར་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།